رواية بيت العيلة الجزء الثاني الفصل الرابع
نزلت إيدها بالراحة وحطت الموبايل على السرير
والدموع اللي كانت حابساها نزلت مرة واحدة بس المرة دي بصوت عالي .
تاني يوم نزلت جميلة على السلم وهي سامعة صوت صراخ صباح على الجميع ،دخلت الشقة وقالت
-صباح الخير
-اي يا عروسة صبحية مباركة لسه نازلة !؟
-معلش يا ماما أصل تعبانة شوية وراحة للدكتور
ردت عليها الأخرى ساخرة
-كده من غير ما تقولي ،وعلى كده لو مكنتيش لقتيني مكنتيش قولتي
بدأت جميلة تفرك في يدها من الأحراج الشديد ،سكتت ثواني وبلعت ريقها وقالت بصوت واطي
-لا خالص كنت هستاذن حضرتك
ورفعت عينها بالعافية وكملت باحراج
-أنا كنت محتاجة فلوس علشان يعني الكشف
سكتت صباح وبصتلها من فوق لتحت كده بنظرة رخمة وقالت
-فلوس؟ للكشف؟
قامت فتحت الشنطة بتاعتها وطلعت 200 جنيه ورمتهم على الترابيزة وقالت بمنتهى القسوة
-خدي أهي بس تبقي تقولي قبلها مش كل شوية نصحى نلاقي مصايب والوصل تجيبيه معاكي عشان أشوف الدكتور خد كام
وطت جميلة خدت الفلوس وصوابعها بتترعش الدموع كانت محبوسة في عينها بس المرة دي بلعتها
-حاضر يا ماما... شكراً
طلعت تجري على برا قبل ما صوتها يخنقها تاني، وهي بتسمع صباح بتكمل زعيق في الشقة وراها.
وقفت قدام البيت وهى بتبص لأديها اللي فيها ال٢٠٠ جنية وهيا بدوس عليها ونفسها تقطعها ،وافتكرت
"فلاش باك"
-ادي يابني الشيك لجميلة هانم هي ملكة الليلة
ضحكت جميلة بصوت عالٍ وقالت
-هات هات،هيكون بكام يعني ،أنا جميلة منصور ،والحساب المره دي على حسابي كله لأجل الشلة العسل دي
وهاتي بقا واحد ايس كوفي بدل اللي خلص دا خلينا نلعب شوية كمان
-أمرك يا هانم
"عودة للحاضر"
مسحت دموعها واتحركت من قدام البيت ،مُتجهه لمكانًا ما .
بعد مرور نص ساعة كانت قاعدة في كافية منتظرة صديقتها مروة ،جاءت مروه وعندما لمحتها وقفت جميلة وعندما اقتربت مروه
أول ما شافتها مروة فتحت دراعاتها على طول
جميلة حضنتها جامد وانهارت من
العياط اللي كانت كاتماه من امبارح طلع كله مرة واحدة صوتها اتخنق ودموعها غرقت كتف مروة
مروة اتخضت وطبطبت على ضهرها جامد وقالت بخضة
-في ايه يا بنتي؟ مالك؟ حصلك ايه؟ اهدي بس
جميلة كانت بتهز راسها ومش عارفة تتكلم كل اللي طالع منها شهقات مكتومة
-ص...صباح... بهدلتني... عشان فلوس الدكتور
قعدوا الاتنين مروة جابت منديل ومسحت وش جميلة وهي بتقول بعصبية
-طب اهدي واشربي مية قوليلي عملت ايه تاني؟ انتي خاسة كده ليه؟
جميلة خدت نفس ومسحت دموعها بايدها وقالت بصوت مكسور
-ولا حاجة هي دي العادي بتاعها بس المرة دي حسيت اني مش قادرة استحمل ،متخيلة أنا اتزل علشان أخد فلوس،جميلة اللي فلوسها كانت تغطي اي حد بقت تمد اديها لحماتها ،أنا استاهل ضرب الجزمة علشان وافقت بالمستوى دا و مليش عين أكلم اهلي
مروة مسكت ايديها جامد وقالت
-بصي أنتِ مش لوحدك وأنا مش هسيبك احكيلي من الاول
الجرسون جه حط المية جميلة شربت واخدت نفس عميق كأنها بتحاول تلم نفسها من اول وجديد،وبدأت تحكيلها على كُل اللي حصل من ساعة ما دخلت البيت ،وعن كلامها مع نسرين .
-ومستنيه ايه؟؟؟ لحد ما يكون معاكِ عيل ويربطك بالعيلة دي للنهاية،مش علشان غلطة نفضل في الغلط يا جميلة لازم أهلك يعرفوا
جميلة هزت راسها بسرعة وعينيها دمعت تاني
-لا لا لو عرفوا هيجيبوا اللوم عليا أنا يا مروه وإن دا كان اختياري
سكتت وعضت على شفايفها وكملت
-هيقولولي ما احنا قولنالك بلاش ابن صباح ... أنتِ اللي اصريتي مش هطيق كلمة واحدة منهم
مروة اتنهدت وقربت منها اكتر وهمست
-طيب وهنفضل ساكتين لحد امتى؟ لحد ما يكسروكي اكتر
من كده
مسحت دمعة نزلت من جميلة وقالت
-بصي، انا معاكي في اي قرار بس اوعديني بحاجة واحدة... انك مش هتستحملي الذل ده تاني لوحدك لو مش قادرة تكلمي اهلك دلوقتي، نتكلم مع محامي؟ مع شيخ؟ مع اي حد كبير في العيلة بيفهم؟
جميلة بصت في المية اللي قدامها وضحكت ضحكة مكسورة
-محامي؟ هيقولوا عايزة تفضحينا شيخ؟ هيقول اصبري واحتسبي
ورفعت عينها لمروة فجأة وقالت بحزم غريب
-انا مش عايزة اطلق دلوقتي انا عايزة كرامتي عايزة فلوسي عايزة احس اني بني آدمة
مروة ابتسمت اول ابتسامة من ساعة ما قعدوا وقالت:
-حلو اوي. يبقى دي اول خطوة. نرجعلك كرامتك. وبعدين نشوف هنعمل ايه في الباقي
سكتوا شوية والكافيه كان دوشة حواليهم بس هما في عالم تاني
مروة سندت بضهرها وقالت
-طب بصي مش هتروحي البيت ده النهاردة هتباتي معايا
جميلة اتخضت وبصت حواليها
-نعم؟ ازاي؟ وصباح؟ لو عرفت اني مارجعتش هتقلب الدنيا وتتصل بجوزي
مروة مسكت ايديها بقوة
-يتصلوا. خليهم يتصلوا النهاردة انتي اللي هتقولي لا اول مرة في حياتك تقوليها وتكملي فيها للاخر.
جميلة قلبها كان بيدق جامد احساس غريب خوف متلخبط مع راحة
-طب ولو جم البيت عندك؟
مروة رفعت حاجبها وقالت بثقة
-ييجوا واقعدي اتفرجي عليا وانا بتعامل معاهم أنت تعبانة بقالك كتير
جميلة مسحت وشها واخدت نفس لأول مرة من شهور حست ان في حد في ضهرها بجد
قامت وقفت بالراحة وقالت بصوت واطي بس ثابت
-ماشي هاجي معاكي
مروة قامت وحضنتها من جنبها
-يلا يا بطل خطوة خطوة
وخرجوا من الكافيه سوا وجميلة لأول مرة ماشية وراسها مرفوعة مش مكسورة
بعد مرور عدة ساعات
كانت صباح تتحدث مع أمجد وهي تقول بكُل غضب
-مراتك القادرة ،الس** مرجعتش البيت لحد دلوقتي دكتور ايه تقعد عنده بالساعات اما متربتش صحيح
-ايييييه
