رواية العرجاء الجميلة الفصل الرابع بقلم جمانه السعيدي
رزق....خل احجيلكم بلبدايه على سبب كره وحقد سمر
اول مره شافتني بلمهر مهرها هيه و عقيل
من شافتني هلكد حلوه خافت اي خافت
خافت تدخل بيتنا وتصير مقارنه بيني وبينها من ناحية الجمال
يعني تبين موحلوه بلنسبه للجمال الي اتمتع بي
خافت اهلي واقاربي والناس الي تجينا تقارن جمالها بجمالي
وهيج تبين موحلوه
مع ان الجمال الحقيقي جمال الروح
جمال الاطباع جمال الاخلاق
واهلي اصلا بدون مبالغه ابد مايقارنون احد بيه
هيج من رب العالمين عدهم اني ماكو مثلي
وعلى هذا الأساس اني تربية عندي ثقه عاليه بنفسي
رغم عرجه مثل مايكولون عني
الشي الثاني الي خلا سمر تكرهني اكثر وتحقد عليه ااكثر
من دخلت بيتنا وشافت طريقة تعامل اهلي وياي
وشلون مهتمين بيه
وشلون يحبوني ويقدروني
كتلتها الغيره اكثر ليش مهتمين بيها ليش يحبوها الهلدرجه ماكو اهل يحبون بتهم هيج
كل تفصيله بلبيت لازم بيها رزق
شنو الاكل اسئلو رزق شتحب حتى نطبخ
اذا رادو يغيرون مكان شي اسئلو رزق
اذا اكو سفره اسئلو رزق وين تريد تروح
ليش رزق بكل سالفه ليش يهتمون بيها هيج
ليش اني مهمشه ومحد يسئلني
هذا الشي خلاها تعزل نفسها عنا وما تكعد ويانا
ماتريد تسمع اسمي وتخاف تصير مقارنه بيني وبينها
كرهتني كرهتني بشكل مو معقول
كرهتني للحد الي سوتلي سحر حتى ادمرني
حتى تخلص من احساس النقص الي تحسه من اني موجوده كبالها
هسه نرجع للعرس عرس اقاربنا الي انعزمنا علي
ابوي صمم اروح للعرس
يريد نفسيتي تتغير شويه
قبلها بيوم واحد عقيل استلم راتبه
هو متعود كلما يستلم الراتب ينطيني ٢٥ الف مصرف اليه
وكلما ينطيني سمر تتعارك ويااا
شلون تنطيها ٢٥ ابوها موجود وأخوانها يشتغلون
شلون تنطيها من راتبك
اني وابنك أولى بهاي الفلوس منها
هيه ما محتاجه خل انجمع بلكت نطلع بيت وحدنا
قابل نبقى معلكين فوك طول عمرنا
هلمره استلم الراتب وطلع ٢٥ انطاني هيه شافته
اصلا هيه ماكاتلتها الفلوس بس تكرهني ماتريد عقيل يهتم بيه
نزلت علينا غضب
شنو تنطيها فلوس انطيني ٢٥ اسويها سلفه
نجمع ونطلع بيت وحدنا
المهم اتعاركت ويا عقيل وكامت اصيح علي كدمنا
ماكدر عقيل يسيطر على نفسه ضربها راشدي وغلط عليها
صعدت فوك جمعت ملابسها وأخذت ابنها وطلعت من البيت زعلانه على ٢٥
طلعت زعلانه رغم هو ابد ما حارمها من شي
تلبس احلى لبس واذا تريد اي شي ما يقصر وياها
وخاله عينها على ٢٥ الي تاخذهن رزق
جمانه السعيدي
ابوي من شافها هيج كلش ضاج
حتى امي وأخواني لان اسلوبها مو حلو
رزق....ليش ضربتها هاك هاي ٢٥ اخذهن وبعد لا تنطيني
فلوس
عقيل...خل تولي اني ما مقصر عليها بشي
شكد عينها ضيكه الف مره كتلها معليج برزق
شنو قيمة ٢٥ وتسوي مشكله علمودهن
رزق....تكدر يومنا بسبب سمر
بقينا طول النهار ضايجين
ااكثر شي ضجنا على علاوي ابن عقيل ما متعودين نفاركه
ثاني يوم رحنا للعرس اني وامي وابوي
اني لابسه فستان ازرك ضارب على لون عيوني
ولا بسه شال تول طالعه حلوه
كعدنا بيت العريس وسولفنا وضحكنا شويه غيرنا جووو
طلعنا ويا الزفه اني ماكدر اصعد سياره عاليه
ولا اكدر اصعد بلكوستر لان هوسه وخاف يدفعني
ااكو ولد شاب تقدم وسلم على امي
كمال مهندس مدني العمر ٢٧ سنه ابن عائله محترمه
مستواهم المادي فول
يصير أقارب امي ابو يصير ابن عم امي
شكله حلو جسمه مرتب طويل شخصيه
انيق
تقدم سلم على امي وكللها تعالي وياي بسيارتي
بس امي وياي
التفتت امي عليه وكالت رزق ماما تعالي هنا بهاي السياره
بهاي اللحظه هو التفت عليه
بقى يباوع عليه
حسيت بلاحراج دنكت
امي...يله تعالي هذا كمال ابن حجي حسن
مو غريب هذا وليدنا
رزق شلت فستاني شويه ودنكت الحد ما وصلت للسياره
قربت لازم اسلم علي بعد ما بيها مجال
رفعت راسي وسلمت
اجن عيوني بعيونه دنكت ودخلت للسياره
صعد شغل السياره وطلعنا ورا سيارة العرسان
كل شويه عينه على المرايه
يباوع عليه
سئلته امي عن احوالها
امي....ازوجت بعدك
كمال...لا ولله بعدني ادور بنت الحلال
كال هاي الكلمه ورفع راسه يباوع عليه بلمرايه
امي...انشاء الله تلكا البنيه الي تريح بالك وتصونك
كمال....رحمله والديج عمه
كملنا الزفه ورجعنا البيت العرسان
نزلت وهو بقا واكف وعينه عليه
للمغرب جابولنا العشى تعشينا بعدين زفو العريس
بدت الناس نطلع
ابوي دز علينا
يله نرجع للبيت
طلعنا لكينا ابوي واكف هو وكمال يسولفون
جمانه السعيدي
ابوي... ام عقيل هذا كمال عرفتي
امي...الله يحفظه اي أخذنا بلزفه
كمال...اني اوصلكم
ابوي...منريد نتعبك ويانا
كمال....وين التعب اريد اندل بيتكم ايجوز اجي
اتعشى يمكم فد يوم
ابوي...هله بيك ومرحبا كل الهلا
رزق...ابوي صعد ليكدام واني وامي وأم كمال صعدنا ورا
بقا كمال يسولف على ابوي منا لمن وصلنا البيتنا
رزق...حسيت اكو شي حلو خلاني اتعلق بي
يمكن اهتمامه بينا او اسلوبه بلكلام
او نظراته اليه مااعرف بس اكو شي شدني اله
اليوم الي بعده ابوي جمعنا على الأكل وكال العقيل
اتاجر بيت وتطلع انت وسمر
اني بعد ماريد اشوف سمر بهذا البيت
جان كتلك طلكها لان انسانه ما محترمه
بس مااريد اضلم ابنك ويعيش بعيد عنك
انت راتبك خير من الله ااجر بيت واطلع انت وياها
اني بعد مااريد اشوفها بهذا البيت
مزوجين صار ٣ سنوات
خلصتها علينا مشاكل ومعلكه روحها فوك حتى ما تنزل
تكعد ويانا
ولا تشاركنا بكلشي شنو حضرت جنبها احنا ما عاجبينها
عقيل...خليها تولي هسه هيه تتوسل بس كون ترجع
لا اطلعها بيت ولا اكبر راسها
منو مدللها مثلي شتريد وتطلب ما مقصر وياها
هيه مو بس علمود الفلوس
تحاسبني شنو تكعد يم اهلك واني معلكه فوك وحدي
اكلها انزلي نكعد ويا اهلي
تكول لا ما يعجبني اكعد ويا اهلك
تريدني من ادخل للبيت كبل اصعد يمها
شكد انغشيت بيها من شفتها كلت بس هيه وبس
تالي طلعت حقيقتها
ابوي...مبينه ادور مشاكل تريد تعزل
خلص شوفلك بيت واعزل انت وياها
عقيل...يطير نص الراتب على الايجار خل تولي مااعززلها
ابوي...ااكو قطع اراضي توزيع جديد
باجر اروح نشوف اسعارهن
نشتري حتلو ٥٠ متر اسحب عليهن قرض وابني بيتك
رزق.. فعلا ابوي وعقيل راحو ثاني يوم وشترو قطعة أرض ١٠٠ متر
وعقيل قدم طلب قرض حتى يبني بيته
اسبوع واحد ورا العرس
وندكت الباب
رزق... منووو
ام كمال...اني خاله اني ام كمال
رزق....استغربت ام كمال شعدها جايتنا
فتحت الباب مجنت لابسه حجاب لابسه تراك وردي
وضافره شعري كصيبه
فتحت الباب جان يصير كمال وامه كدامي
رزق...صرت ورا الباب وكتلهم اهلا وسهلا
تفضلو تفضلو
دخلت ام كمال باستني
وكمال بقى برا
دخلت للبيت وصحت امي وابوي
دخلو بيتنا وامي وابوي فرحو بيهم
واني رحت اخدر الجاي
جمانه السعيدي
شكد فرحت بهاي الزياره فرحت من كل كلبي
رغم اني مااعرف هم ليش جايين علينا
شويه واجت امي تاخذ الجاي
امي...جايين عليج
رزق...عليه اني ليش
امي...جايين يخطبونج
رزق....كمال جاي يخطبني
امي.. اي واخيرا اجاج الانسان المناسب
رزق...الحمد لله الف الحمد لله والشكر
امي...بدلي وتعالي يريد يحجي وياج
رزق...استحي
امي...احنا يمج يله بسرعه
رزق...رحت لبست نفنون اسود مشجر هذا احلى نفنوف عليه
وخليت الشال على راسي ودخلت سلمت عليهم
كعدت كبال كمال
ام كمال....فدوه الله شنو هذا الجمال
امي...رحمله والديج
كمال...اني اريد احجي ويا رزق من رخصتكم
ابوي....اي من حقك الشرع والدين يكول لازم تتعرف عليها
قبل الزواج
رزق...اني كاعده ومندكه وافرك باديه هلكد ما محرجه
طلعو امي وابوي وأم كمال بقينا وحدنا
كمال...شلونج رزق
رزق...الحمد لله
كمال....الصراحه عجبتيني من اول نضره
وكلت هيه هاي الانسانه الي ادور عليها
كمال....ليش محرجه تكدرين اتسئليني اي سوال
رزق...بقيت ساكته
كمال...احجي ليش ساكته
رزق....ماعندي اي سوال
كمال....اني موضف مهندس مدني وبيتي كامل
بس محتاج بت الحلال
من شفتج اتاكدت انتي الي جنت ادور عليها
رزق...شكرا
كمال....بس هيج شكرا وبس
احجي عندج طلبات شروط حابة تسئلين عن حياتي شي
رزق...ما يحتاج مبين ابن اوادم ومحترم
اني مااحجي باي تفاصيل الكلام والاتفاق ويا ابوي
كمال...ولله معدله ومحترمه مثل ما توقعت
خلاص مادام متفقين نحدد يوم المهر
رزق... تمام
كمال...انتي شمخلصه
رزق...رسبت بلسادس اان تمرضت وبعد ماكدرت ارجع للمدرسه
كمال....حابه تكملين
رزق....بكيفك اذا تقبل اكمل
كمال....انشاء الله نتناقش بهذا الموضوع ورا الزواج
خلاص توكلنا على الله
رزق...والنعم بلله
شكرا لزيارتكم عالم روايات سكيرهوم
