رواية جريمة العلاقة السرية الفصل الرابع بقلم ياسر عوده
وطبعا علشان كنت في موقف محرج اوي ماقدرتش اعترض او اقول أي حاجه خالص، ووافقت على كل الكلام اللى قاله اخواتي ونفذته كمان.
اتطلقت من هاني ورجعت عشت مع اخواتي، ولما كنت بحب اخرج كنت لازم اخرج مع السواق اللى هما حطينه يراقبني، ومع مرور الايام لقيت طريقه تخليني ارجع مره تانيه اعيش واسهر زي ما انا عاوزه، والطريقه دي اني امثل على السواق اني بحبه، وطبعا هو لما هيصدق وهيقع بسهوله، وفعلا دا اللى حصل فعلا، وقدرت اخلي السواق واللى كان اسمه علاء يقع في حبي، وبدل ما كان عين عاليا بقى تحت امري، بيوصلني لـ أي مكان اسهر فيه برحتي ويروحني البيت وبيعمل كل اللى بقوله، وفضلت على الحال ده فتره بس للاسف الخطه اتكشفت، واخواتي عرفوا اني قدرت اسيطر على السواق، ووقتها لقتهم اجبروني المرادي اني اتجوز السواق، وفعلا اتجوزته وهما عملوا كده علشان يبقى سهل عليهم انهم يسيطروا عليه، واتجوزت السواق بتاعي وحياتي بقت مستقره، وبقيت مجبوره اني ماسهرش في أي مكان او اتأخر، ودا كان بسبب اني لما اتجوزت عشت في نفس البيت اللى فيه اخواتي، وانا كمان كنت زهت من الحياه اللى كنت عايشاها، وحسيت اني عاوزه اعيش حياه مستقره، وحتى اخواتي لحظوا الموضوع ده ومابقوش يحاولوا يرقبوني زي الاول، وفي الوقت ده الظروف جابتني عند فهمي، ودا حصل لما كنت خارجه بعربيتي وسافرت بيها من المدينه اللى عايشه فيها لمكان تاني، وفي الطريق العربيه عطلت ومن حسن حظي وقتها انها عطلت عند ورشه فهمي، ولما روحتله وابتدي يصلح في العربيه وبمجرد اني اتعاملت معاه حسيت انه عاجبني اوي، واكتر حاجه عجبتني فيه انه كان محترم جدا وماحولش يرفع عينه فيا، كنت اول مره اقابل شخص بالشكل ده، ولما خلص تصليح عربيتي دفعتله مبلغ كبير كان رافض يخده، بس انا سبتهوله ومشيت، وكنت عارفه اني هشوفه مره تانيه، وبعد كام يوم روحتله مخصوص الورشه، وكان في الاول متحفظ في الكلام معايا، بس انا قدرت اغيره وحده وحده، وكانت علقتي بيه بتبقي افضل مع الوقت، وكنت مفهماه اني مش متجوزه، اصلي كنت متأكده ان واحد زي فهمي لو عرف اني متجوزه مستحيل هيتكلم معايا بالشكل ده، ومع مرور الايام علاقتنا بقت كويسه اوي، وفي يوم عرضت عليه الجواز العرفي في السر، هو كان متردد في البدايه، وعلشان هو متجوز ومخلف قدرت اقنعه يوافق، وفعلا وافق بعد محاولات كتير بنا، وكنا بنروح مع بعض لشقه انا اجرتها مخصوص علشان نتقابل فيها، وكنت بديله فلوس مقابل الوقت اللى بيسيب فيها ورشته علشان مراته ماتشكش في حاجه، وفضلنا على الحال ده فتره لغايه لما جوزي اكتشف الامر، لما لقاني بغيب لاوقات كتير اوي راقبني، وبلغ اخواتي اللى كبسوا عليا انا وفهمي في الشقه الايجار اللى كنا بنتقابل فيها، وهناك فهمي عرف الحقيه، عرف اني وحده متجوزه وان جوازي منه باطل، وقتها اتصدم فهمي بس اخواتي ماكنوش مصدقين انه مايعرفش اني متجوزه، وكانوا مصممين انهم ينتقموا منه، بس انا قولتلهم الحقيقه ووعدتهم اني مش هقابله تاني، وكمان هو ماكنش هيقبل انه يقابلني مره تانيه، وفعلا دا اللى حصل واخواتي صدقوني، ومن وقتها وعلقتي بـ فهمي انقطعت خالص وماشفتهوش من وقتها، ومستحيل اخواتي او جوزي يبقى ليهم علاقه باختفاء فهمي لانهم كانوا بيحاولوا يداروا الموضوع علشان لو اتعرف اللى حصل بيني وبين فهمي داه يأثر على سمعتهم، وجوزي كل اللى يهمه انه يفضل في النعيم اللى عايش فيه، وكلهم متأكدين ان علقتي بـ فهمي انقطعت بشكل نهائي.
ــــــــــــــــــــــــــــــــــــــــــــــــــــــــــــــ
دي كانت اقوال هاله قدام ضابط الشرطه، وفعلا التحريات اللى اتعملت بعد كده اكدت ان اقوالها كانت سليمه، وفي اللحظه دي عجزت الشرطه انها توصل لحقيقه اللى حصل مع فهمي، وكانت النتيجه ان الشرطه حفظت المحضر لحين ظهور أي ادله اخري، والكل اعتقد ان حكايه فهمي خلصت لغايه كده، بس الحقيقه ان سالم اخو فهمي كان رافض انه يستسلم للامر الواقع، وكان عاوز يعف ايه اللى حصل مع اخوه، ويعرف مين اللى خطفه او مين اللى قتله لو اخوه اتقتل، وحاول اكتر من مره انه يضغط على الشرطه لفتح القضيه من تاني بس بدون فايده، ولما دا حصل قرر انه يحاول يوصل للحقيقه، ولما ركز سالم انتبه لحاجه مهمه جدا، انتبه ان مرات اخوه وفاء كانت بعد مرور 3 شهور من اختفاء جوزها اعتبرته مات فعلا، وهو انتبه لتصرفاتها اللى عمره ما كان متوقعها، وفاء رجعت لـ حياتها الطبيعيه، لدرجه انها اجرت ورشه فهمي لشخص علشان يبقى تعيش من الايجار ده، ومش بس كده هو كمان سمع بعض الاشاعات اللى بتقول ان مرات اخوه وفاء على علاقه بالشخص اللى أجر الورشه، وانها بتسمحله يدخل بتها، وحاول سالم يتأكد من المعلومه دي وسأل ابن اخوه لو كان فعلا الشخص ده بيدخل بيت اخوه ولا لا، والطفل فعلا قاله انه بيدخل البيت وبياكل معاهم، وقتها سالم بقى شبه متأكد ان وفاء ه اللى ورا اللى حصل مع اخوه فهمي، بس لما حاول يقول الكلام ده لـ ضابط الشرطه وقتها الضابط طلب دليل على كلامه، بس سالم ماكنش فاهم ازاي يوصل لدليل يثبت ان وفاء هي اللى اتخلصت من اخوه، لغايه لما سمع عني وكنت وقتها مسافر للبلد اللى هو فيها في ندوه، ولقيت سالم جالي وطلب مني مسعدته وقالي:
-انا سمعت ان حضرتك تقدر يا دكتور نبيل تخلي أي شخص يقول الحاجات اللى مخبيها عن الناس، وانا طالب مسعدتك علشان تكشف مرات اخويا وتخليها تعترف باللى هي عملته.
وقتها انا وافقت، انا عمري ما اتأخر عن شخص محتجني، ووافقت اني اروح مع سالم لغايه بيت اخوه، وهناك لما روحت كنت متفق معاه انه لما هيقعدني مع مرات اخوه هنومها مغناطسا وهخليها تعترف بالحقيقه، لو هي فعلا ورا اللى حصل لـ اخوه هي هتقول عملت كده ازاي وليه، وطلبت منه يسجل الجلسه دي فديو علشان يقدمه للشرطه لو هي اعترفت بانها فعلا السبب في اختفاء اخوه.
ودا اللى حصل فعلا، ودخلت بيت فهمي مع سالم ومن غير ما تنتبه وفاء قدرت انبمها وبعدها قولت لـ سالم:
-اسألها أي سؤال انت عاوزه.
وقتها سالم قالها:
-اخويا فهمي فين؟
ردت وفاء وقتها وقالت:
-اخوك فهمي هنا، مدفون في ارض اوضه الخزين.
وقتها سالم انفعل وكان عاوز يهاجمها، بس انا منعته وسألتها وقولتلها:
-احكي ايه اللى حصل بالظبط وليه عملتي كده؟
-فهمي هو السبب، انا عرفت انه على علاقه بوحده اسمها هاله، كان بيخرج معاها وكان بيتكلم معاها طول الوقت في التليفون، وسمعته وعرفت انه متجوزها عليا، وكمان سمعته اكتر من مره بيقولها انه مابقاش يحبني ولولا الاطفال كان سبني.
وقتها انا قررت اني لازم انتقم منه، وفضلت من وقتها افكر ازاي انتقم منه قبل ما يطلقني، واخيرا فكرت في الخطه اللى هعملها، انا بعد ما نيمت عيالي حطتله مخدر في كوبايه الشاي اللى لازم يشربها قبل النوم، ولما اتخدر قتلته وكنت مجهزه حفره في اوضه الخزين ودفنته هناك وردمت عليه، واتصلت بسالم بعدها وقولتله حكايه الناس اللى خدوا فهمي ومرجعش تاني، والخطه بتعتي نجحت.
-طيب ايه حكايه الشخص اللى بيدخل عندك البيت اللى مأجر الورشه؟
-مافيش داه يبقى جوزي اسمه فاروق، اجر مني الورشه ولما شوفته عجبني وبحاول اقرب منه علشان اتجوزه بعد ما اخد من المحكمه حكم بان جوزي مفقود بعد مرور سنه.
وبعد اللحظه دي فوقت وفاء، وسالم قدم الاعتراف للشرطه واللى قبضوا على وفاء، ورغم اللى انا عملته مافيش أي حاجه عني اتكتبت في المحاضر الرسمه.
ــــــــــــــــــــــــــــــــــــــــــــــــــــــــــــ
وبعد ما خلص الدكتور نبيل حكايه الجريمه الغريبه اللى قدر يساعد في كشفها، انا شكرته على الوقت اللى قضناه في حلقه البرنامج، وبعد ما اتذاعت الحلقه وزي ما كنت متوقع الحلقه عملت تفاعل كبير اوي، وعلشان كده ان كنت محتاج ان الحلقه التانيه تبقى قويه زي الحلقه الاولي، وبعد مرور اسبوع جه معاد الحلقه التانيه، وقدمت الضيف بتاعي وقولت:
-ضيفنا النهارده من الناس المعروفه في مجال عمله، سمعنا كتير عن انجازات ومساعده الشرطه والنيابه في حل اللغاز كتير لجرائم صعبه، معانا ومعاكم الدكتور فايز محمد دكتور التشريح، واللى هيحكلنا عن اغرب الحالات اللى قابلها في حياته المهنيه.
-اهلا بيك يا دكتور.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
