رواية حب من اول غرزة الفصل الخامس 5 بقلم عمرو خالد ليث

: أهو خطفناها خليه يورينا ازاي هيتجوزها

• يتجوز مين؟ 

: سارة

• يتجوزها إزاي وهي مخطوبالي أنت عرفت منين؟ 

: لما جه عندنا عشان يكلم أمي على سارة عشان تزورها في المستشفى، أبويا قاله أنت مين أصلًا عشان تقولنا نعمل أي ومنعملش أي، وهو رد عليه وقاله أنا مين فعلاً وهو ماشي فضل يتمتم بالكلام وقال انا هوريه أنا مين هتجوزها واوريه

• وماله مش عايز يتجوزها يبقىٰ يقدرها

: يعني أي يقدرها ؟ 

• هقولك

حسيت بدوخة جامدة وأنا قاعدة علىٰ السرير مستنية زين يجيب الماية عشان نمشي من المستشفى، بس آخر حاجة فكراها كانت فاتن وهي بتقولي أنتي سمعاني وكنت شيفاها ضباب الرؤية مكانتش واضحة كويس، وفجأة روحت عن الدنيا خالص، فوقت وأنا دماغي هتفرقع من الوجع، حاسة أني متلجمة او مربوطة، حاولت اتحرك يمين وشمال مش قادرة لأني فعلاً طلعت مربوطة، سمعت صوت حد بيتكلم حواليا، الصوت بعيد بس حساهم قريبين مني، كأنهم واقفين فوق راسي، الأصوات دي مش غريبة عليا أنا عارفاها كويس، لحد ما استوعبت مين إللي بيتكلم . 

: سارة سارة فين! 

بعد ما دخلت الأوضة إللي كانت قاعده فيها سارة، ملقيتهاش في مكانها ولسه كنت هرجع لقيت حد قفل الباب وضربني علىٰ دماغي وقعت علىٰ الأرض وأنا مش حاسس بأي حاجة، شفت الدنيا كأنها شبورة قدامي، حاولت أعدل نفسي واتماسك وبقيت اقاوم الوجع والخبطة لحد ما قمت ووقفت وأنا بتسند علىٰ الباب، مسكت راسي من الوجع لقيتها بتنزل دم، فضلت الف في المستشفى كتير لحد ما وقعت من كتر التعب إللي كنت فيه واغمىٰ عليا تاني، بعدها معرفتش أي إللي حصل لحد ما سمعت صوت حد بيتكلم حواليا .. 

: أي إللي حصل؟ 

• الكاميرات جابته بيجري في المستشفى وراسه مفتوحة، ولحد ما وصلناله كان وقع وفقد الوعي

: هي المستشفى كانت فاضية؟ 

• حضرتك الساعة كانت 4 الفجر وقسم الرعاية مفيهوش غير كام مريض ومفيش زيارات في الوقت ده

: تمام

دماغي هديت شوية واتعدلت من مكاني وكان الظابط قاعد جمبي مستنيني افوق، اتعدلت وبدأ يسألني أي إللي حصل وحكيتله كل حاجة حصلت لحد ما وقعت في نص المستشفى .

: طب وأنا هاخد أي؟ 

• هتاخدي قلبي

: لا مليش في الكلام ده أنا عايزة حقي

• حق أي هو إحنا مش متفقين من الأول 

: بس في الأول الحكاية مكنش فيها فلوس إنما دلوقتي الوضع أتغير 

• عايزة أي يا فاتن

: شوفوا انتوا استاهل كام بعد كل إللي عملته وأنا موافقة عشان خاطر عيونك

• الربع يستي 

: الربع الربع رغم أني استاهل أكتر من كده بس ماشي عشان خاطر عيونك

• عارفة يا بت يا فاتن أنا بحبك ليه؟ 

: عشان حلوة؟ 

• لا عشان واضحة معروف تمامك أي واخرك أي وعايزة اي مش بتلعبي ولا بتشغلي دماغك 

: مأنا قولتلك نعمل أي حاجة عشانك

• مش خسارة فيكي أي حاجة يا بت 

ولسه كان هيقرب مني بس سيف دخل فجأة علينا ..  

: بعد اذن الحب إللي مولع في المخزن سارة فاقت تعالى يعم أنت وسيبك من فاتن دلوقتي 

• ما تخليك مع أختك أنت 

: مش وقت الكلام ده دلوقتي تعالى يا سعيد

• ماشي يعم جايلك يخربيت فصلانك فصلتني

خرج سعيد وسيف وأنا خرجت وراهم عشان نشوف سارة بعد ما فاقت، كانت مربوطة في كرسي وحاطين ربطة علىٰ عنيها ولزقة علىٰ بؤقها، راح سيف شال كل إللي علىٰ وشها، بدأت هي تستوعب المكان واللي واقفين قدامها .. 

: سيف وسعيد وفاتن! 

• مستغربة ولا أي؟ 

: لا خالص يا سيف مش مستغرباك لا أنت ولا سعيد بس فاتن أي يا فاتن بتعملي أي هنا ؟ 

• ملكيش دعوة بفاتن خليكي معايا

: انتوا خاطفيني! 

• لا خالص لسمح الله نخطفك أي إحنا بس جايبينك هنا عشان نقولك الف سلامة عليكي اصل المحروس بتاعك معرفش إسمه أي جالنا البيت بيعاتبنا إزاي مروحناش المستشفى نزورك ونتطمن عليكي فـ جبناكي هناك عشان نتطمن عليكي

: قولوا عايزين أي! 

• ولا حاجة كنا عايزين فلوس بس

: الفلوس في الشنطة خدها وسيبني أمشي 

• قصدك شوية الملاليم إللي بتديهملنا لا إحنا طمعانين في المحامي بتاعك

: اي! 

• زي ما سمعتي هنساومة عليكي ونشوف هيدفع فيكي كام

: انتوا كلاب فلوس 

• إحنا كلاب فلوس فعلاً مش إحنا كلاب فلوس يا سعيد مش إحنا كلاب فلوس يا فاتن ايوة إحنا كلاب فلوس يا سارة ياحبيبتي وأنتي ربنا بعتك لينا نعمة فـ ليه نرمي النعمة حرام لما نسيبها كده منستغلهاش

راحت سارة تفت علىٰ وش سيف من غير ما ترد عليه، مسكها سيف من شعرها وضربها ورماها في الارض وقعت وهي بتعيط، مش عارفة لي حاسة بإحساس بشع أول مرة يجيلي، مكنتش فاكرة أن الموضوع هيوصل للمرحلة دي خالص، خرجنا إحنا التلاتة وقعدت سارة في المخزن مربوطة، ولسه سامعة صوت عياطها في ودني، خرجت وقفلت الباب ورايا وأنا حاسة أني عايزة أولع في نفسي .

كنت متأكد أن الحركة دي متطلعش غير من أهلها، عشان كده استنيت لحد ما قدرت أقف علىٰ رجلي وروحتلهم تاني، قعدت تحت البيت مستني لحد ما لقيت سيف نازل، نزلت من العربية بسرعة مسكته من رقبته وخنقته ووقع على الأرض .. 

: فين سارة 

• فين سارة

: أنا بسألك هي فين؟ 

• أنت عبيط يعم هو أنت مش لسه جاي من يومين تقول أنها في المستشفىٰ

: سارة اتخطفت من المستشفىٰ ومحدش يعمل الحركة دي غيرك 

• أنت عبيط يعم اخطفها بتاع أي 

: عشان تاخد فلوسها مثلا 

• وأعمل أي بفلوسها وأنا الحمدلله شغال

: أنت يا سيف تشتغل طب إزاي 

• اتكل على الله ومش هحاسبك علىٰ إللي عملته دلوقتي 

: يلا أختك مخطوفة أنت فاهم يعني أي! 

• يعم بقا مخطوفة ولا مش مخطوفة هعملها أي يعني

ولقيته بيشوحلي بإيده وسابني ومشي علىٰ طول، أي العالم دي بجد أنا لحد دلوقتي لسه مش مستوعب أن في اهل بالشكل ده، أنا كان عندي شك فعلاً أنه يكون خاطفها، بس ده باين عليه مش طبيعي أصلًا، حد لاعب في اساسياته أو جيناته مستحيل يكون طبيعي . 

روحت المستشفىٰ تاني يمكن تكون رجعت أو في أي جديد، لأني مش عارف اوصلها إزاي ولا اكلم مين يوصلني ليها ولا اتطمن عليها من مين، روحت المستشفىٰ ولقيت فاتن واقفة في قسم الطوارئ، أول ما شافتني حاولت تتهرب كأنها مش عايزة تشوفني، عملت نفسها مش شيفاني وفجأة اختفت، حسيتها خايفة مني أو حاسة أني السبب في خطف سارة، أو مش عايزة مشاكل تحصلها، مشيت من المستشفى لأني حسيت أني ممكن أعمل مشاكل وأنا مش عايز حد يتأذي بسببي، أما سارة أنا مش عارف أي إللي حصلها ولا راحت فين .

: المتخلف كان مستنيني تحت البيت وضربني

• وعملت أي؟ 

: معملتش حاجة قولتله معرفش راحت فين ومليش دعوة بيها تتخطف ولا متتخطفش

• طب وهنعمل أي! 

: هنكلمه علىٰ الفلوس عايز أخلص من الحوار ده واسافر 

• طب وسارة 

: مالها ؟ 

• هنعمل فيها أي! 

: مش هنعمل فيها حاجة خليها مرزوعة

• طب وفاتن؟ 

: فاتن دورها خلص وبقيت كارت محروق

• وهنعمل فيها أي؟ 

: الكارت المحروق يا بنرميه يا بنولع فيه

• مش هينفع تترمي ممكن تفضحنا

: يبقى نولع فيه كلمها تيجي

كنت قاعدة مربوطة ليا يومين فاتن بتأكلني وبتشربني وعاملة معايا أحلى واجب في المسرحية إللي عاملينها دي، بس مش قادرة ابص في وشها، مش قادرة انطق ولا أقولها أي حاجة، فاتن إللي قاعدة واكله شاربة نايمة معايا بتعمل فيا كده وبتساعدهم أنهم يأذوني، أمال لما نحرص من الناس إللي واكلين شاربين نايمين معاهم وعشرة سنين، أمال نتطمن لمين ونآمن لمين ونرتاح لمين، ريحت دماغي كده كده لعبة ويومين وهتخلص، وأنا يعني مخطوفة من حد غريب ده اخويا وخطيبي أو إللي كان خطيبي خلاص، كنت قاعدة بدندن وأنا مربوطة وفي ظروف سيئة، دخلت فاتن عليا وهما ماسكينها وضاربينها ووشها كله وارم، حطوها جمبي وهي مربوطة ومتكتفة وبتعيط وشعرها متقطع .. 

: عملوا فيك أي يا حمام قولي 

فضلت بصالها وبضحك ومش عارفة اقولها أي والله .. 

: محدش قالك أن دي النهاية إللي بتحصل دايمًا في نهاية الأفلام، متعرفيش أن البياع بيتباع في آخر الفيلم وبيبقى هو الوحيد إللي خسران في اللعبة كلها، قبلتي علىٰ نفسك وهان عليكي تبيعي واحدة واكله شاربة نايمة معاكي، متعيطيش ياحبيبتي ده أمر طبيعي أنه يحصلك مش نهاية غريبة أنتي كده بالنسبالهم كارت محروق يعني دورك خلص عملتي المطلوب منك ورموكي 

قعدت تبص عليا وتعيط وترجع تبص للأرض تاني، وكأنها عايزة تقولي حاجة بس مش عارفة .. 

: سعيد كان هيتجوزني

• يتجوزك أي ياحبيبتي بس وأنتي صدقتي

: ماهو مكنش بيحبك وكان خاطبك غصب وكان كلها كام شهر وهيسيبك

• يعني مقالكيش أنه عمل مشاكل كتير عشان يخطبني! 

: قالي أنه مغصوب عليكي وعمل كده عشان ميزعلش أمه 

• يروح أمه 

: وأنا والله معرفش أن كل ده هيحصل هو كل إللي كان بيقولي أعمله هو أني بوصله أخبارك بس، واخر حاجة كانت أني احطلك المنوم في العصير إللي شربتيه قبل ما تخرجي من المستشفى بس كده، مكنتش أعرف أنهم هيخطفوكي ولا هيطلبوا فلوس من زين، وبعد ما يخلص كل ده سعيد قالي هفركش الخطوبة وهاجي اخطبك ونتجوز 

• أي القرف إللي بتقوليه ده إنتي مستوعبة بتقولي أي، واعية عملتي أي وليه أصلًا 

: عشان متحبتش قبل كده، عمري ما جربت شعور أن حد يحبني، عمري ما قابلت حد قالي كلام زي كده، هو أنا مستاهلش اتحب ولا اتجوز زي الناس، طول عمري محرومة من الشعور ده طول عمري بدور علىٰ حد يحبني ويحببني في نفسي، بدور علىٰ أي إهتمام، بدور علىٰ الحاجة إللي ملقيتهاش في أهلي، بدور علىٰ إللي ناقصني يا سارة كان ناقصني حد يحس بيا ويحبني ويتطمن عليا 

• مش بالطريقة دي يا غبية مش بالطريقة دي، متخسريش كل حاجة عشان حاجة بتدوري عليها وياريتها جت صح دي جت غلط مع ناس غلط وعملتي الغلط مع أقرب ناس ليكي ده غباء مش احتياج إللي محتاج حاجة بيصبر عليها مش بيجري وراها حتىٰ ولو في الغلط

قعدت ساكتة متكلمتش أصلها هتقول أي يعني مش هتلاقي كلام تقوله تبرر إللي هي فيه، مش هتلاقي حاجة تقولها بعد ما استوعبت أنها لقيت حاجة وخسرت قصادها كل حاجة، خسرت نفسها وكرامتها وعزت نفسها وشكلها، من أمته الحاجة إللي بنحتاجها بنخسر حاجات عشان نلاقيها، من أمته الغلط بيتعمله مبرر، أنك تبرري غلطك في أن أهلك كانوا مقصرين معاكي، مش مهتمين بيكي، ومحدش بيسمعك ولا مهتم ومش معبرين في أنك تروحي تصدقي أي كلمتين يتقالولك، تصدقي أي حد يقولك أنه بيحبك، تجري ورا واحد وتسمعي كلامه سواء صح أو غلط عشان حاسة أنه بيحبك، حاسة أنك متطمنة معاه، حاسة أنك مرتاحة وخلاص اخيرًا لقيتي حد يهتم بيكي، ده وهم مش حقيقة، ده الفخ إللي كلنا بنقع فيه، أننا بنشبع رغباتنا بالطريقة الغلط وبنلاقي مبرر للغلط، أصل أنا أهلي مش بيحبوني، أصل أنا اهلي مش مهتمين بيا، أصل أنا أهلي مطلعين عيني في البيت ومتمرمطة وجايين علينا وبيحبوا اخواتي أكتر مني وأنا مظلومة، ياحبيبتي أنتي مش مظلومة أنتي ضعيفة، ده ضعف سبتي مساحة لدماغك توهمك بكل ده، سبتي نفسك توهمك أن محدش بيحبك واللي بيعمل الغلط معاكي هو الوحيد إللي في الدنيا بيحبك، ولكن لو بصيتي هتلاقي هي دي العلاقة الغلط الوحيدة إللي في حياتك، كل ده عشان وهمتي نفسك بكل ده، والنتيجة معروفة، النهاية دايمًا معروفة، هتحبي وهتعملي الغلط وهتشبغي رغباتك مؤقتًا وهتتسابي وهتبقي كارت محروق، لأنك داخلة العلاقة دي تشبيع رغبات مش داخلاها مع الشخص إللي هتعيشي معاه حياتك، داخله تدوري علىٰ إهتمام وحب مش بيت وعيلة ومسؤولية، العلاقات دي نهايتها وحشة، فـ يا تلحقي نفسك، يا تخسري نفسك .

عدىٰ تلات أيام علىٰ قعدتي دي هنا وأنا مش طايقة نفسي وعايزة أقوم اكسر المكان كله، حاسة أني عندي طاقة مفرطة عايزة افرغها، بدأت أفهم واستوعب كل حاجة، بدأت أغضب واتعصب بشكل غريب علىٰ عكس هدوئي إللي كان في أول يومين، بس مستنية الفرصة إللي همسكها واقوم اعجن أي حد يجي قدامي، من كتر التهاون إللي كنت فيه معاهم بقيت مباحة ليهم لدرجة أنهم يخطفوني عشان ياخدوا فلوس، اخ يخطف اخته وواحد يخطف خطيبته، أي عقل يستوعب الكلام ده، عشان كده تعاملنا بحذر مع الناس خوفًا على مشاعرهم بيوصلهم فكرة أنك شخص قابل لأي شيء، كثرة تسامحك معاهم وتهاونك بيخليهم يقتنعوا أنك متقبل أي شيء منهم، إسرافك في مشاعرك ووقتك ومجهودك بدون مقابل بيوصلهم أنك حاجة من الإتنين  ..

أنك بتعمل كده عشان هما يستاهلوا إللي أنت بتعمله عشانهم وأنهم يستحقوا أكتر من كده كمان . 

أو أنك شخص مش محتاج مقابل منهم لأنك على الله حكايتك وكأنهم لقيوك في كيس شيبسي . 

متحطش لحد أعذار، اللي بيغلط مرة واتنين وعشرة ملوش أعذار، اللي واقفلك على غلطة عشان يمشي مشيه من غير ما تغلط، الناس والعشرة والصحاب والحبايب كل دول بيظهروا في المواقف، فـي اللحظة اللي بتكون محتاج فيها حد وتلاقي اللي تروحله ويقبلك هو ده الشخص الصح، إنما لما تبقى محتاج حد في لحظة معينة ومتلاقيش اللي تروحله ويقبلك أعرف ساعتها أنك بتضيع وقت ومجهود ومشاعر في مكان مش بتاعك .

: المحروس بتاعك شوية وجاي وجايب الفلوس معاه

• والله يا سيف الحوار ده ما هعديهولك 

: مش لما تكملي معانا لبعد الحوار أصلًا مش يمكن نودعك مثلا

• مش هتقدر أنت جبان مش هتعرف تقتل فرخة

: بلاش تستفزيني أنتي عارفة ممكن أعمل أي 

• عارفة أن اخرك فاضي متعرفش تعمل حاجة 

: مش هرد عليكي أنتي كده كده تحت رحمتي

• مسيرك هتيجي تحت رجلي

فضل باصصلي بغيظ وأنا مبتسمة في وشه ولا كأني مربوطة، لمحت رمشة في عينة بدأت تظهر كده فهمت أنه بدأ يقلق .. 

: مش عايزة تعرفي هيدفع فيكي كام

• مش عايزة أعرف حاجة كدا كدا مش هتلحقوا تتهنوا بحاجة 

اخد بعضه ومشي من قدامي بعد ما طفى النور، صحيت فاتن علىٰ صوتنا وبتتلفت حواليها .. 

: هو في أي! 

بصيتلها ومردتش عليها، ريحت دماغي علىٰ العمود إللي ورايا، الدنيا هادية خالص مفيش غير صوت عقارب الساعة إللي محطوطة جمب الباب قصادنا، تقريبا الساعة كانت 4 الفجر، حاولت أغمض عيني معرفتش من كتر التفكير، مجاش في بالي غير زين إللي كنت بلاقيه أول ما بفتح عيني من أي مشكلة، لسه سامعة صوت انفاسه وأنا وبخيطله الجرح بتاعه أول مرة، لسه فاكرة مسكته أيده ليا ساعتها وهو مش واعي، لوهلة عدت عليا ريحة البرفان بتاعه لما شفته أول مرة، بس الريحة المرة دي كانت قوية شوية، بدأت استوعب الريحة دي بجد ولا في خيالي، لحد ما لقيت حد بيمسك أيدي إللي كانت مربوطة ورا ضهري، اتخضيت جامد وكنت هصوت بس .. 

: شششش أهدي أنا زين 

بصيتله أول ما شفت وشه كويس، هديت وقعدت ساكتة لحد ما فكلي أيدي ورجلي ووقفت قدامه مش عارفة أقوله أي، مش عارفة انطق حاسة أني عايزة .. 

: هي دي فاتن! 

• ايوة 

: بتعمل أي هنا 

• هبقى أقولك يلا بس نمشي 

ولسه هنتحرك من مكانا لقيت النور بينور وسيف وسعيد داخلين علينا .. 

: لا لا مكنش ده اتفاقنا يا أستاذ زين وبعدين مش هو ده المكان إللي اتفقنا نتقابل فيه

• مأنا عارف قولت أوفر عليكم واجيلكم أنا 

: جيت برجلك فين الفلوس

• اوبس نسيتها في المحفظة

: مليون جنية أي إللي دول إللي نسيتهم في المحفظة

• مليون جنية اي بس انتو تمامكم خمستاشر جنية كل واحد فيكم سبعة ونص 

ولقيت زين بيبص عليا وبيقولي ..

: ولا نكملهم كل واحد عشرة يا سارة ؟ 

• لا حلو عجبتني بس أنت مش عارف أنك مش هتطلع علىٰ رجلك؟ 

: هطلع ومعايا سارة سواء طلعت علىٰ رجلي او جثثكم

ولقيت سيف بيطلع المسدس من جيبه وبيوجهه نحية زين .. 

: لعبت مع الشخص الغلط يا زين 

• سيف نزل السلاح سيف بقولك نزل السلاح

وبدأ سيف يعلي صوته وسعيد اتدخل وزين بيزعق معاهم، الصوت بقي عالي والدوشة ظهرت وأنا مقدرتش استحمل، مسكت راسي من كتر الأصوات إللي كانت حواليا ووقعت الأرض، لحد ما سمعت صوت ضرب نار، سمعت حد بيتخبط الأرض، حاولت اتعدل أشوف مين، بالعافيه بصيت قدامي لقيت الحكومة بتقبض علىٰ سيف وسعيد وبتكلبشهم والظابط بيسحب السلاح من سيف، اتلفت بسرعة بصيت ورايا لقيت زين إللي واقع علىٰ الأرض، حاولت اتحرك من مكاني مقدرتش لحد ما فقدت الوعي .

صحيت مخضوض على حد بيضربني علىٰ كتفي، من الوجع ببص لقيت .. 

: لسه عايش مماتش يجدعان أهو 

• يخربيت غبائك يا سما بتعملي أي؟ 

: بتطمن عليك

• أنا فين! 

: أنت في المستشفى 

• بعمل أي في المستشفى! 

: بنعملك الغدا هتاكل معانا ؟ 

يخربيت الاستظراف بتاعها، حاولت اتعدل بصيت حواليا لقيت أمي وسارة وسما وابويا كلهم واقفين فوق راسي .. 

: اي يجدعان في أي مش عارف اتنفس

• حمدلله على السلامة 

: الله يسلمك .. أي إللي حصل؟ 

• ولا حاجة الحكومة قبضت علي سيف وسعيد وفاتن وأنا وأنت جابونا المستشفى

: إحنا مكتوب علينا عيشة المستشفيات دي مش هنخلص منها 

• تخيل كام غرزة كانوا سبب في كل المشاكل دي كلها

: من بعدها اتخيطت مرتين وأنتي عملتي حادثة واتكسرتي واتخطفتي وأنا اتضربت بالنار

• مش ملاحظ أننا بنيجي علىٰ نفس السرير

: ايوة اخدت بالي ونفس الاوضة

• طب ما نحجزها لزوم يعني لو حصلت حاجة تاني

: لا الف سلامه عليكي 

• وعليك

إبتسمت في وشي إبتسامة حسيتها رجعتني للحياة تاني، رجعت لحياتي الطبيعية بعد ما خرجت من المستشفى علىٰ طول، وسما راحت تشتغل في مستشفى خاصة وأنا رجعت الشغل بتاعي الطبيعي، بس المرة دي مكنش حد بيعمل حاجة لوحده، كانت خطواتنا مع بعض، بنقرر مع بعض، بنتحرك مع بعض، ولك أن تتخيل أني قاعد دلوقتي بفتكر أول غرزة اخترقت جسمي من غير بنج، وكل السيناريوهات جت في دماغي في اللحظة إللي أنا ببصم فيها، ببصمم علىٰ عقد جوازنا . 

بارك الله لكما وبارك عليكما وجمع بينكما في خير ..

: وهي كده الخطوة الجاية لينا أي؟ 

• بعد الجواز مش خطوات أنا حققت هدفي

: وأنا حققت التارجت 

• هو انا بالنسبالك تارجت! 

: أنت الحبيب الأول والاخير

• ده الحب إللي من أول نظرة ؟ 

: لا ده الحب إللي من أول غرزة 

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم