رواية الشيخ عرب والمسحورة الفصل الخامس والاخير
ودلوقتي في أوضة غادة وهاجر.. كانت غادة نايمة صاحية على السرير سرحانة في السقف فوقها وكانت هاجر بتذاكر على السرير التاني بصت لها وهي بتقول بعفوية
هاجر
بتقولك يا غادة ما تسيبي خالد ده وتتجوزي عرب
غادة بصت لها باستغراب
غادة
إنتي بتخرفي تقولي إيه؟
هاجر
بقولك الحقيقة بصراحة عرب شكله أصلاً بيحبك أو معجب بيكي والله أعلم
غادة قاعدة على السرير وهي بتركز في كلامها
غادة
إنتي جبتي الهبل ده منين؟
هاجر
من عيونه وعيونك إنتي كمان أنا كنت قاعدة واخدة بالي مش هبلة يعني
غادة بزهق
طيب ياريت تاخدي بالك من مذاكرتك يا فالحة قال بيحبني قال هو يعرفني أصلاً علشان يحبني إنتي الروايات خربت دماغك
غادة نامت تاني مكانها وادت هاجر ظهرها وهي من جواها بتتمنى يكون اللي بتقوله صحيح وعرب فعلاً يكون معجب بيها ويتقدم لها تاني حتى لو بهدف يعالجها.
ـــــــــــــــــــــــــــــــــــــــــــــــ
في نفس الوقت في بيت عرب كان عرب قاعد على سجادة الصلاة بيدعي ربنا برجاء وخشوع ودموعه نازلة وهو بيحاول يقاوم مشاعره
عرب
يارب إنت عارف إن ده مش بإيدي يارب وإن قلبي بين إيديك يارب طهر قلبي وفكري من أي عشق حرام يارب أنا عارف إن اللي بحسه ده مش صح وإن مشاعري تجاهها ممكن تكون فتنة ليا بس إنت عارف إني ما طلبتش ده ولا سعيت له يارب ساعدني أشيلها من فكري وقلبي لو وجودها في حياتي مش خير ليا يارب وإن كان فيها خير ليا فاجعلها من نصيبي بالحلال وابعد عني أي طريق يغضبك يارب أنا ضعيف وإنت أعلم بيا وبضعفي وبقلبي فلا تكلني لنفسي طرفة عين.
سجد علي السجادة وهو بيترجي ربنا ينقذه من شر الفتن ما ظاهر وما بطن منها.
ــــــــــــــــــــــــــــــــــــــــــــــــــــــ
تاني يوم في شركة خالد وبالأخص في المكتب غادة دخلت وكان خالد مشغول في ملف
غادة
حضرتك طلبتني يا فندم؟
خالد رد بجدية من غير حتى ما يبصلها
خالد
أيوه لو سمحتي محتاج ملف الصفقة النهاردة
غادة عقدت حواجبها باستغراب وخدت بعضها خرجت بعد ما قالت
غادة
أمرك يا فندم
وبعد شوية كانت غادة رجعت ومعاها الملف قربت من قدام خالد وهي بتقول
غادة
حضرتك تؤمرني بحاجة تانية؟
رد خالد برسميات وهو بيفتح الملف اللي هي جابته
خالد
لا شكراً جداً اتفضلي روحي شوفي شغلك
غادة باستغراب
خير مالك يا خالد في حاجة ولا إيه؟
خالد
لا عادي أصلاً حد كدا قالي اللي مش قد الهزار ما يهزرش واكتشفت إني مش قده فقررت أبطل
غادة بصت له شوية قبل ما تقول بتردد
غادة
خالد أنا بعتذر لك لو ردي كان جاف شوية بس صدقني أنا ما كنتش مركزة في اللي بقوله
خالد بص لها وبعدين قال
خالد
هسألك سؤال يا غادة لو سمحتي جاوبيني بصراحة علشان نرتاح إحنا الاتنين إنتي موافقة عليا؟
غادة دموعها نزلت
غادة
أنا ما ينفعش صدقني يا خالد وحتى لو اتجوزنا هنطلق لأنك مش هتقدر تقرب مني ومش هتستحمل صدقني
خالد باستغراب
مش فاهم قصدك إيه مش هقدر أقرب منك إزاي يعني؟
غادة بدموع وحسرة
غادة
أنا علشان كدا بقولك إنت مش فاهم حاجة وأنا ما ينفعش أتجوز تاني أمي عملت لي سحر مافيش راجل هيقدر يعاشرني يا خالد
وبدأت تحكي له كل اللي حصل من أول جوازتها الأولى لحد ما اتعرفت على عرب وعرض عليها إنه يتجوزها علشان يعالجها وبعد ما خلصت خالد قام وهو بيقول بدهشة
خالد
يعني إحنا حتى لو اتجوزنا مش هيحصل بينا أي حاجة ومش هقدر أقرب لك زي أي راجل ومراته؟
غادة بدموع
للأسف ده اللي هيحصل عرب قال إنه عارف علاجي بس شرط نتجوز ومش فاهمة السبب
خالد بص لها وفكر شوية قبل ما يقول
خالد
يعني عرب قال إن في علاج بس لازم تتجوزوا مش كدا؟
غادة باستغراب
أيوه قال كدا
خالد بحماس
طيب يا حبيبتي ما هي محلولة أهي
غادة بشك
مش فاهمة عاوز تقول إيه؟
خالد
تعالي نقعد بس وهفهمك
خالد سحب لها كرسي وقعدت عليه وبعدين قعد قصادها وقال
خالد
بصي يا ستي طالما عرب قال إنه قادر يعالجك بإذن الله يبقى بإذن الله الشفا على إيده أنا واثق في عرب ده أخويا مش بس صاحبي وافقي واتجوزي إنتي وعرب الأول لحد ما تتعالجي وبعدين تطلقوا وإحنا نتجوز عادي وتكوني اتعالجتي ها إيه رأيك؟
غادة كانت بتسمعه وهي ساكتة واتجمدت مشاعرها تجاهه أول ما فهمت اللي في دماغه وإنه زيه زي اللي قبله هدفه من حبه هو جسمها مش روحها ولا قلبها بس ما حبتش تخسر الفرصة وتخسر عرب للمرة التانية وكل لحظة الظروف تثبت لها إن واحد زي عرب هو اللي يستاهلها
غادة
طيب أنا موافقة أتجوز عرب تقدر تخليه يتقدم لي تاني؟
خالد رد بحماس
خالد
هو ده الكلام وعين العقل اتجوزي إنتي وعرب ولما تتعالجي إحنا نتجوز حلو كدا
غادة قامت وهي بتقول بهدوء مريب
غادة
تمام شوف رأيه وابقى اديني خبر عن إذنك
سابته وخرجت وهي حاسة إن كان في جبل على قلبها وانزاح لما اتأكدت إن حب خالد ليها مش حقيقي وزيه زي اللي قبله الغاية من حبه هو جسمها مش روحها وقلبها. ولو ما وصلش لهدف هيبقي مصرها طلاق للمرة التالته بس قرارات المرة دي تختار صح
ــــــــــــــــــــــــــــــــــــــــــــــــــ
وبعد شوية كان عرب قاعد مع خالد في عربية خالد عرب بص لخالد بدهشة
عرب
إنت بتقول إيه يا خالد؟
خالد
اللي سمعته يا عرب غادة حكتلي على كل حاجة وأنا واثق فيك يا عرب اتجوزها وبعدين أتجوز أنا وهي
عرب جز على سنانه بغيظ
عرب
يبقى إنت كدا ما بتحبهاش يا خالد
خالد بحزن
والله بحبها بس أعمل إيه لازم تتعالج الأول هو الجواز إيه حلو فيه غير كدا؟
عرب
إنت فاهم الجواز غلط بعترف إن الموضوع ده مهم بس مش كل حاجة حلوة في الجواز الجواز فيه حاجات أحلى على الأقل هتصحى وتنام والست اللي بتحبها في حضنك والأحلى الونس يا خالد والونس يأنس حياتك وأكلتك ونومتك وونس يشاركك كل تفاصيل يومك
خالد بزهق
طيب يا عرب أنا يا عم غبيش ما بفهمش قولي بقى موافق تتجوزها ولا إيه؟
عرب
تمام موافق بس على شرط
خالد باستغراب
شرط إيه مش فاهم؟
عرب
مش هطلق غير برضاها وموافقتها هي لو حصل وحبت تكمل معايا مش هطلق
خالد بقلق
يعني إيه يا عرب هتطمع فيها ولا إيه؟
عرب
للأسف يا خالد إنت اللي طمعان فيها اللي بيحب واحدة بجد ما بيسبهاش لغيره حتى لو لأبوه عن إذنك
عرب سابه وخرج من العربية لما فهم إن خالد ما بيحبش غادة حب حقيقي وحمد ربنا إن جوازها منه ما كملش
وفعلاً عرب اتقدم لغادة بس مش علشان خالد يتجوزها بعدين علشان فهم إنه هو اللي بيحبها حب حقيقي وخاف ربنا فيها وغادة وافقت فعلاً لما اتأكدت إن عرب هو اللي يستاهلها هو الراجل اللي هيسندها في حياتها ومش هيهمه جسمها حلو ولا وحش علشان حب روحها حب غادة الحقيقية غادة اللي محبوسة جوه قفص مش غادة الظاهرة للناس
وفات أربع شهور وجاء اليوم المنتظر يوم دخلت عرب على غادة.. في شقة عرب وغادة كان عرب بيجهز الرقية الشرعية والعطور اللي هيعالج بيهم غادة في أول جلسة بص بانبهار لما شافها خارجة من أوضة النوم لابسة روب أبيض
غادة بكسوف
إيه رأيك حلو؟
عرب بقلق
قمر بس هو ده مش هينفع دلوقتي
غادة ضحكت
ليه هو إحنا مش عريس وعروسة ولا إيه؟
عرب باستغراب
مش فاهم؟
غادة قربت منه
غادة
بس أنا فاهمة وفاهمة كويس أوي وعلى فكرة أنا اللي قعتك وفكر زي ما تفكر بقى
عرب باستغراب أكتر
لا إنتي كدا محتاجة كوباية شاي مظبوطة
غادة ضحكت
فعلاً ممكن تركز أحسن من كدا بص هبسطهالك أنا اللي بعتلك خالد يعني أنا بغبائي كنت هضيع راجل قمر زيك من إيدي بعدين قلت يا بت يا غادة شغلي دماغك ورجعي الفار للمصيدة تاني فهمت؟
عرب بابتسامة
يعني أفهم منك إنك كنتي بترسمي عليا بعد ما مسحتي بكرامتي الأرض؟
غادة
بصراحة آه
عرب شالها ولف بيها وهو بيقول بفرحة
عرب
الا إنتي كدا محتاجة ركعتين شكر لله
غادة فضلت تضحك بسعادة هي وعرب وهو بيلف بيها
ــــــــــــــــــــــــــــــــــــــــــــــ
وبعد شوية دخل عرب غرفة النوم وغادة وراه وهي مكسوفة ومتوترة قفل الباب بهدوء وبصلها بابتسامة مطمنة
عرب
تعالي يا غادة
غادة قربت منه بخجل
عرب
النهارده مش عاوز منك غير حاجة واحدة إنك تطمني وتحطي كل خوفك على جنب أنا جوزك قبل أي حاجة وصاحبك وسندك ومهما حصل مش هسيبك لوحدك
غادة دموعها لمعت وهي بتبتسم
غادة
أنا لأول مرة من زمان حاسة إني مش خايفة من الجواز يا عرب.
عرب ابتسم ومد إيده ليها
عرب
علشان مع الشخص الصح يا غادة… المهم تعالي نصلي ركعتين لله ونبدأ حياتنا صح
وقف عرب يصلي وغادة لبست اسدال وقفت وراه وبعد ما خلصوا الصلاة قعد جنبها ورفع إيده يدعي ربنا
عرب
اللهم إني أسألك خيرها وخير ما جبلتها عليه وأعوذ بك من شرها وشر ما جبلتها عليه اللهم بارك لنا في زواجنا واجعل بينا المودة والرحمة والسكن واهدينا لكل خير وابعد عننا كل شر واجعل بيتنا بيت طاعة وستر وراحة بال.. وفك كربها فانت القادر القهار عالم الغيوب والشهادة.. اللهم أسألك بجمع أسمائك العظيم ترزقنا الذرية الصالحة وتحفظنا من عينك التي لا تنام من شر الشيطان الرجيم ومن خلفه.
غادة كانت بتبكي بهدوء وهي بتسمع دعاءه.. عرب بص لها بحنان
عرب
خلاص يا غادة من النهارده مافيش خوف مافيش هروب ومهما حصل هنواجهه سوا
غادة
ربنا يخليك ليا يا عرب أنا عمري ما تخيلت إن ممكن حد يطمني بالشكل ده ولا عوض ربنا ليا يكون حلو اوي كدا.
عرب
وأنا عمري ما تخيلت إن قلبي يتعلق بإنسانة بالشكل ده بس الحمد لله إن ربنا جمعنا بالحلال
غادة ابتسمت وسط دموعها وسندت رأسها على كتفه
غادة
أنا بحبك يا عرب
عرب ابتسم وحط إيده على إيدها
عرب
وأنا كمان بحبك يا غادة وربنا يعلم قد إيه نفسي أشوفك مرتاحة وسعيدة من غير خوف ولا وجع في حياتك…
وبعد فترة وبفضل الله وحبهم الطاهر لبعض قدر عرب فعلاً يعالجها بالقرآن والرقية الشرعية لحد ما السحر اتفك ولما عرف إن غادة حامل كانوا هيطيروا من السعادة وخالد لحد آخر لحظة كان مستني طلاقهم بس فقد الأمل لما عرف إنها حامل من عرب
وعرب طبعاً ما أجبرش غادة إنها تسامح أمها ولا حتى فاتح الموضوع معاها وساب لها حرية المسامحة علشان تيجي من قلبها مش من الضغط وتبقى المسامحة مقبولة من ربنا.. ودلوقتي كان عز قاعد بيقرأ قرآن لما غادة خرجت لابسة وجاهزة للخروج.
غادة
عرب
سكتت لما لاقته ماسك المصحف عرب صدق وقفل المصحف وبصلها بالابتسامة المشرقة اللي ما بتظهرش غير لها
عرب
يا قلب وروح عرب نعم يا ملك قلبي يا وصية النبي
غادة ابتسمت
عليه أفضل الصلاة حاسة إن كفاية كدا وحضن ماما واحشني أوي ممكن تاخدني زيارة لها؟
عرب بفرحة
اللهم صلي وسلم وبارك على خير الخلق هو ده الكلام الحلوة يا حبيبتي يلا أودكي
غادة
طيب استنى عاوزة أسألك عن حاجة إنت ليه ما حاولتش تصلحني على ماما؟
عرب تنهد
ما حبتش أضغط عليكي عارفة إنها غلطت ومش سهل اللي شوفتيه في حياتك بسبب الغلطة دي فحبيت تسامحي لما تحسي إن جروحك شفيت وداوت
غادة حضنته فجأة
كل لحظة بحسد نفسي عليك يا عرب بجد إنت أجمل عوض ليا من ربنا
عرب ضمها لصدره وهو بيقول بمزح
عرب
بِسْمِ اللَّهِ الرَّحْمَٰنِ الرَّحِيمِ
قُلْ أَعُوذُ بِرَبِّ الْفَلَقِ. مِن شَرِّ مَا خَلَقَ. وَمِن شَرِّ غَاسِقٍ إِذَا وَقَبَ. وَمِن شَرِّ النَّفَّاثَاتِ فِي الْعُقَدِ. وَمِن شَرِّ حَاسِدٍ إِذَا حَسَدَ.
غادة بصت له بغيظ
غادة
على أساس إني حسد يعني؟
عرب
يا حبيبتي إنتي ما سمعتيش المثل اللي بيقول ما يحسدش المال والجمال إلا صاحبه
بصوا لبعض وانفجروا في الضحك.. والقلب ورح بيضحكوا معهم…
تمت بحمد الله
