رواية العرجاء الجميلة الفصل الخامس بقلم جمانه السعيدي
رزق....بس اني عندي شي اكوله قبل لا نعقد
كمال....اي تفضلي
رزق...انت تعرف اني عرجه عرج ولادي اني ماأحب اغشك احب تكون بالصوره حتى لا تكول قشمرتني
كمال...اي اعرف وهذا الشي ما يهمني هيج شغله
مراح تغير موضوع زواجنا
رزق....انت متاكد ماعندك مشكله
كمال.... اي متاكد خلص لو عندج بعد شي
رزق...لا ماعندي اي شي
كمال...خلاص نحدد موعد العقد
رزق...طلعت بس شافني ابوي سئلني هااا
رزق...كلشي تمام
ابوي...على بركة الله نكول الف مبروك
ام كمال...الف مبروك حبيبتي
امي...شايفه كل الخير
اتحدد الموعد بعد اسبوع واحد ويتم عقد القران
ما تتخيلون فرحتي حسيت كمال العوض من رب العالمين
انسان متفهم وواعي ومحترم
كل الصفات الحلوه بي ماناقصه شي
صدكو بليلتها ماكدرت انام من الفرحه
ما مصدكه واخيرا راح ارتبط وتكون عندي عائله حالي حال باقي البنات كلما يخطبني وواحد ويروح ومايرجع
اضوج احس بلنقص
الف الحمد لله والشكر
ثاني يوم عقيل راح يرجع زوجته
دخل وكعد وياا ابوها
عقيل....اجيت ارجع سمر اني قدمت على قرض
وإنشاء الله بأقرب وقت راح ابني بيتي
ابو سمر......اي بيها الخير انشاء الله
عقيل...شوف سمر ترجع وياي لو لا
ابو سمر....اي ترجع شلون ماترجع بس على كيفك وياها
عقيل....اني ما مقصر وياها بشي ابد
حتى اهلي ما يضغطون عليها بلشغل عايفيها على راحتها
بس هيه متخبله عليه اهلك ياطالبة اهلك
لا تكعد وياهم لا تنطيهم فلوس تقبل انت بهذا الحجي
تقبل جنتك تفرض على ابنك يعوفكم
اهلي ربوني وتعبو عليه هسه علمود حضرت سمر تنزعج
منهم لازم اعوفهم
اني ما مقصر وياها وكل طلباتها مجابه
اذا مقصر وياها خل تجي هنا تكعد كبالي
ابو سمر...بس انت ضربتها
عقيل....اي ضربتها لمن شفتها تتجاوز وتعلي صوتها عليه
اني الرجال مااسمحلها تتجاوز
وقبل لا نرجع ممنوع تدخل بعلاقتي بااهلي
ولا تحجي حرف واحد عن اختي
هيه الها يمي مااقصر وياها بشي وبس تقبل سمر
تقبل احجي عليكم لو احرمها منكم
جمانه السعيدي
ابو سمر....يله ماصار شي انشاء الله ترجع العلاقه بينكم احسن من قبل وهسه يكمل بيتكم وطلعون
عقيل...بقيت كاعد منتظرها
شويه واجت شايله جنطتها وشايله علاوي
عقيل....تعال بابا شلت ابني
ابو سمر.... اسمعي كلام زوجج فهمتي لو لا مااريد مشاكل
عقيل....شكرا عمي هااا اذكرت يوم الخميس معزوم عدنا مهر اختي
راسا سمر وكفت وكالت مهر رزق
عقيل...اي خطبها كمال ابن حجي حسن ويوم الخميس المهر عمي مو تنسى
خاف ننشغل وما نعزمك
ابو سمر.....لا انشاء الله اجي
عقيل...منا لمن وصلنا للبيت سمر ساكته ما حجت ولا حرف
حتى من دخلنا للبيت ما سلمت على اهلي
كبل صعدت بغرفتها
رتبت ملابسها وخلت ابنها بحضنها ونامت
واني ماحجيت وياها اي شي
ثاني يوم طلعت للدوام
وهنا سمر بدت خطتها شلون رزق تزوج كمال
رزق تاخذ كمال مال وجاه وحسب ونسب
وبيت وحدها لا والف لا رزق ما تزوج
هذا الزواج مايتم على كص ركبتي
يمكن السحر راح مفعوله
بس كيد النساء مايروح مفعوله ابد
بقت سمر ادور على رقم كمال تريد تخرب هاي الزواجه بااي شكل من الأشكال
اتصلت بولد اقاربهم هو هم يصير اقاربنا
سايق تكسي دائما اتاجره يوصلها الاهلها
وأهلها يأجرو الاي مكان يرحون اله
سمر....الو سعد شلونك
سعد...هله ام علاوي شلونج
سمر....الحمد لله اريد اطلب منك طلب
سعد....اي تفضلي
سمر....اريد رقم كمال ابن حجي حسن
سعد...ماعندي الرقم بس انتظري شويه هسه اشوفلج
يمكن عد عدنان اخوي رقمه
دقيقه وارجع اتصل عليج
سمر...بسرعه فدوه ضروري
سعد...تدللين
شويه ودز الرقم سعد رقم كمال
سجلت الرقم سمر وكبل اتصال مستعجله على الخراب
مابقى على المهر بس يومين
لازم تلحك تحرك الدنيا
سمر....السلام عليكم
كمال...عليكم السلام
سمر....اسفه اتصل عليك انت ما تعرفني
كمال....عادي ماكو مشكله منو حضرتج
سمر....اني سمر زوجت عقيل اخو رزق
كمال....اهلا وسهلا كل الهلا اعذريني مااعرفج
سمر....لا ماكو مشكله
كمال...تفضلي بيش اكدر اساعدج
سمر....اني مجرد فاعلة خير اني هم اقاربك
انتم عائله محترمه وسمعتكم ذهب خاصه انت الف وحده تتمناك
واني مااقبل احد يأذيك راح اقدملك عمل انساني
كمال...خير شكووو
سمر...اني سمعت خاطب رزق
كمال...اي انشاء الله بعد يومين للمهر
سمر....مايهون عليه واحد يغشك او يضحك عليك
وصدك انت انسان الله يحبك
ودزني اللك حتى احذرك من هاي الزواجه
كمال...شكووو احجي اكو شي مااعرفه
سمر....اشياء مو شي واحد
كمال....ياستار ياربي
سمر...مثل ما كتلك انت رب العالمين يحبك واني اجيت احذرك
اني امس يله عرفت لو اعرف قبل لا تخطب مجان خليتك وصلت بيتهم
هما صح عيالي بس اني مااقبل بلغلط
كمال...هسه غير تحجي شكو ورا هاي المقدمه
سمر...رزق من كون الله لا يرزقها ويبهذلها
وحده بلا اخلاق عدها علاقات بكد شعر راسها
ماكو واحد ما طالعه وياا ماكو واحد ما مسويه ويا علاقه
واذا يكلولك بدون علم اهلها يجذبون عليك
ابوها وخوانها هم الي مشيلها هاي السالفه
يدرون بيها وساكتين وقابلين
حضرتها مدلله ومحد يرفضلها طلب واي شي تريده تاخذه
محد يكدر يكول لا
جمانه السعيدي
اني جنت زعلانه بيت اهلي
تعرف ليش لان شفتها مدخله واحد بلبيت بليل واهلها
نايمين عود نصحتها
انكلبت عليه طنطل غلط وحجي
كتلها عيب انتي بنيه وهاي السوالف تأثر على سمعتج
تالي راحت كلبت القصه عليه
وخلت عقيل يضربني ويطردني بيت اهلي بليله سوده
اني وابني
هم شايف هيج بنيه
حتلو ازوتجها مراح تكدر تحكمها فنك تفتح حلكك وياها
بكلمه
ابوها وأخوانها يهدون عليك وتطلع انت الغلطان
هيه متعلمه تمشي بكيفها
اني من سمعت خطبتها تعجبت شلون
كدرو يضحكون عليك انت ما سئلت عنها
لو تسئل عنها تسمع بلاوي سوده ما تتخيلها
لازم شفت عيونها الزرك وغشنك
نصيحه من اخت الاخوها اطفر من هاي الزواجه
دير بالك تتورط
لان راح تدخل بمشاكل ما تخلص
ومراح تكدر عليها ابد ابوها وخوانها بضهرها
محد يكدر يحجي وياها
كتلك اهلها يدرون بعلاقاتها ويا الولد وساكتين
زين اسئلها كم واحد قبلك تقدملها وشرد
هم هيج مثلك يغرهم شكلها بس من يسئلون ويعرفون بلاويها يشردون وبعد مايرجعون
انت اذا ازوجتها مراح تفيدني ولا تأذيني اني مالي علاقه بيها اصلا اني مااحجي وياها نهائيا
حبيت انصحك نصيحه لوجه الله
اني وصلتك الحقيقه وانت بكيفك تريد تكمل
كمل وياها تريد تنقذ نفسك اشرد من البدايه
اني هسه ريحت ضميري
وحجيتلك الحقيقه
انت ما تعرفني اني انسانه حقانيه ومااقبل بلغش والضلم
وانت انسان محترم
حرامات اضيع عمرك ويا وحده مثل هاي
جمانه السعيدي
عندي طلب اخير الله يخليك لا اجيب اسمي بلطاري
لا تكول سمر اتصلت عليه
ولله اطلك هو اني نصحتها نصيحه
عقيل ضربني وطردني بيت اهلي
شلون لو يعرفون اتصلت عليك كبل طلاك
اتمنالك حياة سعيده ويا انسانه تستحقك
مو رزق العرجه
ام الولد لاتستحي ولا تخاف
رزق....منتظره يوم المهر بفارغ الصبر
ما مصدكه نفسي احلم بكمال ليل نهار
واخيرا راح ازوج واستقر
حياتي راح تتغير
اتخيل نفسي بلمهر واتخيل نفسي لا بسه ثوب العرس
وعايشه بيتي ومستقره
ماامشي على الكاع طايره من الفرح
وصلنا لليوم الي قبل يوم المهر
بس كمال لا اتصل ولا جاب الذهب ولا كال تعالي اختاري الذهب
حتى امه ما تواصلت ويانا
رزق....يمه شو اني خايفه من هاي السكته
باجر المهر ولا اشترينا الذهب ولا أخذنا فستان ولا حجزنا صالون
ليش ما تتصلين بأم كمال
خاف صاير عدهم شي
رزق....شفت سمر واكفه على الدرج وتسمع كلامنا
امي...اي اتصل عليهم لان بعد ما نلحك يمتى
نشتري الذهب يمتى نحجز صالون
رزق...عيني على سمر ولو هيه هاي عوايده تموت على
الاخبار عبالك جاسوس
بس مالي شغل بيها ولا احسسها اني مهتمه بوجودها
اتصلت امي على ام كمال
اول رنه ماردت ولا الثانيه
بلثالثه ردت علينا
امي...شلونج ام كمال
ام كمال..... الحمد لله
امي....شو مارحنا نشتري الذهب ولا حجزنا الصالون
مارجعتولنا خبر
ام كمال.....كمال بطل مايقبل يزوج اني اعتذر منكم
كلشي بهاي الدنيا قسمه ونصيب
امي....يااا ليش
ام كمال....ماكو قسمه
امي....لا ما مقبوله منكم ليش بقيتو ساكتين
ليش ماحجيتي قبل
ام كمال....اني مستحيه منكم اعذريني
امي...اعذرج هذا شلون حجي
ام كمال....كلشي قسمه ونصيب
رزق....نزل كلام ام كمال عليه مثل النار الي حركت كلبي
ليش ليش اني ماعندي حظ
ليش الانسان الي حبيته تخلى عني
شنو السبب ليش عافني
بلكوه واكفه على حيلي ما متخيله زواجي يخرب
بعد ماامي طبكت التليفون شفت سمر صعدت بسرعه فوك
شغلت اغاني بصوت عالي وتركص
صوت التكمز شال السكف شيل
امي....هاي شبيها تخبلت
رزق...فرحانه لان زواجي خرب
امي...الله يغثها الغثيثه
رزق...دخلت غرفتي وشبعت بجي على حظي الاسود
شكرا لزيارتكم عالم روايات سكيرهوم
