رواية صرخة مؤجلة الفصل الثامن 8 بقلم ود الزهراء

انكسر مجداف عمري بزحمه الروج

ووكف بيه الزمن يم اليكرهون

وخفت همي تكشفه اسرار العيون 

وخطيت النضر عن لا يشوفون 

وخفت حيلي يحدب يكشف العوز ضهر شديت صبري لشيل المتون وخفت شماتي تصرخ أي وكع طاح وكفت رمح على جرحي كبال العيون

•••••••••••••••••••••••••••

سَدف

گمت من مكاني داخلة للبيت رحت توضيت و صليت الفجر أنوب أحتاريت شسوي گاعدة صافنة و كلها نايمة گلت خلي أرجع أنام نمت و ما گعدت ألا علىٰ صوت مينا تگعد بية 

مينا:: جوعانين 

سَدف:: بيش الساعة هسه؟ 

مينا:: ما أدري 

گمت بسرعة حطيت شالي علىٰ راسي و طلعت لگيت هستوهم مادين السفرة و جاي ينگلن بالأكل ، رحت للمطبخ لگيتهن كلهن واگفات بس شافتني عقيلة صاحت

عقيلة:: لا شغلة ولا عملة بس نوم للظهاري فالحة بيه تعالي أگضيلچ شغلة ويانة مو بس نوم و راحة

سكتت ما حاچيتها لأن مالي خلگ هستوني گاعدة أخذت الطماطة من أيد نيروز اللي تباوعلي بحقد و غل و گصصتها بدلًا عنها و ملحتها و وزعتها بمواعين و شفت يعني كلشي مخلصات بس ينگلن ماكو شي أسويه سويت بيضات الأخواني و گلاصات حليب و چاي لأن يحبونه و أنا هم خليتلي گلاص لأن ما أحس روحي متريگة أذا ما يكون موجود خذيت الصينية و دخلت للغرفة كلينة و ضلينة نسولف گلتلهم

سَدف:: اليوم ما بيها مجال كون أدرسكم هم ياللّٰه

مينا:: هيَّ حلوة المدرسة؟ شلون تصير

سَدف:: حلوة أنا أحبها بس بعد ما ضليت بيها 

علي الرضا:: ليش؟ 

سَدف:: بعد شاء القدر بأن أنا ما أكمل بس أن شاء اللّٰه أخليكم أنتم تكملون دراسة تصيرون فد شي چبير بالمجتمع و الناس تحترمكم و تقدركم

علي الرضا:: بيها فلوس؟ 

سَدف:: طبعًاا بيها فلوس هواي بس مو هسه من تخلصون كلش و تشتغلون، صدك شنو تريدون تصيرون؟ 

علي الرضا:: أنا أريدن ضابط 

مينا:: و أنا أريدن دكتورة

سَدف:: أن شاء اللّٰه

باوعتلهم مبتسمة و أدعي رب العالمين بداخلي يوفقني حتىٰ اگدر أحقق أحلامهم و أي شي ما حققتة أنا أخليهم همَ يحققونة، شلت الصينية و وديتها للمطبخ باوعتلة هوسة چانت لمياء واگفة لازمة ظهرها و وجهة صاير أصفر كركم گلتلها

سَدف:: چا وين براء؟ 

لمياء:: راحت الأهلها من البارحة

سَدف:: ياا ولا أدري بيها، عوفيهن و روحي گعدي أنا أغسلهن 

لمياء:: أي واللّٰه علواه بطني موتتني

راحت و أنا أستلمت المطبخ تنظيف كلش و كنستة و مسحتة و طلعت للهول محد موجود بيه لأن كلهم بالشغل 

هم نظفتة و مسحتة و ضليت على هالرَنّة لـ حد ما كملت البيت كله ما عدا الغرف الجوه أما الفوگ ما گدرت أنكسر ظهري لأن البيت چبير أنوب رحت للغرفة الي أحنة ننام بيها صايرة كلش وصخة نظفتها وراها سبحت و مشطت شعري و گعدت متحلفة بعلاوي و مينا كون أدرسهم طلعت الدفتر اللگيتة البارحة و ضليت أفتر أدور على قلم لـ حد ما لگيت بالديوانية مشمور على صفحة قلم جاف أخذتة و رحت ركاض لـ أخواني، گعدتهم و أستلمتهم بالبداية حروف العلة و علمتهم المقاطع، و تمر الأيام و أحنه علىٰ نفس الروتين و علىٰ نفس الطلايب وي صبيحة تذب سمها عليَّ بس ضليت حتىٰ ما أردن عليها مالي خلگها

أما غسان أختفى من يوم الصارت بيه المشكلة بعد ما شفتة أبد و هاي الأيام كلها قليل ألتقي وي عمامي و كل ما ألتقي بيهم الگاهم مخبوصين ما أدري عليمن و عمتي وحيدة وجهة ثگيل عليَّ عبالك أنا المسوية المشكلة مو أبنها ما حاولت أحچي وياها لأن أنا البية كافيني و بعدني لـ حد الأن أنا ما متخطية الصار و كل ليلة تمر ما أنامن مثل الوادم أضلن أتفزفز كلساعة أضل بقلق لا يتكرر نفس اللي صار و أنام كلش بصف أخواني حتىٰ خاف أحد يجي يمهم أحس عليه، حرفيًا عشت بحرب نفسي و قلق على حياة أخواني بسبب هذاك عديم الرجولة

و أبوي أبدًا ما لفه ولا شفتة ولا أريدن أشوفنة لأن كارهتة كره مو طبيعي كل الهسه أحنه بيه بسببة هوَ، هوَ أساس دمار حياتنا و ما مسامحتة إلىٰ يوم الدين و خطية أمي تضل برگبتة الى يوم يبعثون، و أمي ما ناسيتها ولا لحظة بكلشي أسويه أتذكرها رغم ما أتذكر هواي اشياء حلوة وياها بس عايشة علىٰ القليلات

و بيوم گاعدة مثل كل مرة بعد ما خلصت شغلي و أدرس بأخواني اللي بدوا يتهجون و يقرون بس مو ممتازة قرائتهم و هالشي يطيرني من الفرح و صلوا لهالمرحلة بدون أي كتاب أو شي يساعدهم بس على الدفتر و القلم اللي بطلاع الروح حصلتهن و همَ هم حابينها لأن يعتبرونها شي جديد و نگضي بيه وكت بس مرات يتململون و يشلعون گلبي ياللّٰه نكمل و من شفت مستواهم زين بالقراءة گلت أدرسهم الأرقام و اليوم أول يوم نبدي بيهن، بعدني ما مكملة دراستهم و صاحتلي عمتي وحيدة رحتلها بس طلعت لگيتها مو وحدها وياها عمامي ثلاثتهم ضليت واگفة أباوعلهم صاحلي عمي صباح

صباح:: تعالي گعدي بوية 

رحت گعدت ما مطمنة لأن شفتنة وحدنة يعني أكيد شي مهم گال عمي فلاح

فلاح:: عمي أنتِ گبل فترة گالتلچ عمتچ وحيدة عن غسان 

هزيت راسي مدنگة أفرك بيدي 

فلاح:: و حصلنة الرفض منچ ما أريدن أگلچ ليش و من هذا الحچي، جاي أشوفن أبني من يوم حصلنة الرفض لليوم هو مو على بعضة متسودن فَـ أنا ما أريدن گلب وليدي ينكسر يحبچ و ما بيها شي بت عمه أحسن مما تروحين للغريب فَـ يا عمي أقبلي بغسان حتىٰ نسوي عقدكم گبل محرم وشتگولين؟ 

سَدف:: عمي ما أريدن بعدني صغيرة

صباح:: لا مو صغيرة مرة شگدچ شكبرچ چندوب تضلين بدون زواج أكو الأصغر منچ و تزوجن و هالصارن أمهات بيوت و كل وحدة جهالها بطولها 

سَدف:: عمي أنا عندي أسباب هواي للرفض مو لأن غسان أنا أي واحد ما أقبل بيه هسه لأن ما أگدر أعوفن أخواني بعدهم صغار، عود من يكبرون ياللّٰه هذيچ الساعة أفكر أتزوج 

فلاح:: أنتِ الظاهر ما يفيد وياج العيني و أغاتي ألا بالعين الحمرة، تطلعين سوالف من جوة الگاع كون ترفضين المهم أحنه أجينة ننطيچ خبر مو نطلب رايچ و راح يصير عقدكم گبل محرم أم عدنان من باچر أخذيها للسوگ تشتري حوايجها و بعد أنتهى النقاش

سَدف:: عمي ماكو شي بالجبر أحترموا رغبتي أنا ما أريدن أتزوج راح ينشلع گلبة ويا... 

فلاح:: شحدچچ أحش اللسانچ حش و ياللّٰه لا تتفلسفين براسي ولي منا 

وگفت على حيلي مصدومة و أبچي بصوت عالي أحچي وي عمتي

سَدف:: عمة ما أريدن حاچيهه

تباوعلي و تهز براسها بقهر تخبلت ضليت أصرخ و أگطع بشعري و أصيح

سَدف:: ما أررريددنه ما أريدددنننه 

گام عمي يريد يطگني بس كضتة عمتي 

وحيدة:: بروح أبوك عوفها مقهورة چا شتسويي

فلاح:: طللعيها براا ما أريدن أشوفن وجهة السا... 

گومتني عمتي و أنا أدفع بيها ما أقبل تكضني، ما جاي أستوعب بهالسرعة و بهالبرود يفضل سعادة أبنه على تعاسة غيره دگيت لطمت صرخت و ما فااد ما كسرت گلوبتهم ضليت أتحسب عليهم و أدعي من كل گلبي و بصوت عالي و كلها تسمعني 

سَدف:: حسبيَّ اللّٰه و نعم الوكيل بيكم اللّٰه يشلع گلبك غسان اللّٰه يشلع گلبكم بحق بالحسيين... 

عمتي ضلت تسد بحلگي ما تخليني أحچي

وحيدة:: سكتيي ولچ لا تددعين

شاغت روحي كلش و بالگوة سحلتني عمتي البرا الديوانية لأن عمي فلاح متحلف بية يريد يكتلني بس كاضينة عني عمامي، أخذتني للغرفة گعدتني تحچي وياي

وحيدة:: عليمن گلبتي الدنيا بالصريخ

سَدف:: يعنيي تشوفونة شييي عاادي من تجبرروني على الزواج من شخص أنا ما رايدتة!!!؟؟؟ 

وحيدة:: خايبةة گلابچ وين تلگين مثل غسان واللّٰه الف وحدة تتمناه 

سَدف:: أخطبيله من هذني الألف شكو جايين عليَّ 

عضت أصبعها بحرگة 

وحيدة:: غيرر كوون يرضىٰ ما يرضىٰ

سَدف:: عفية عوفوني عمةة ما أفيدكم واللّٰه أشلع گلبكم و گلبة خاف تگولين ما گتلچ

وحيدة:: شحدچچ نفصم ظهرچ، ترا حتى أنا ما راضية بيچ بس بعد أبني ما عندة ذوق شسويلةة

سَدف:: ترا أنا حتى ما أخلف شنو تروحون تفرفرون بية يم الدكاترة و تدفعون فلوس عليمن أخذولة بنية صاحية 

احچي هيچ حتى عسىٰ و لعل يفكون ياخة عني بس هيَّ هم مو بيدها، طلعت و عافتني منهارة وحدي وي أخواني اللي يشاهدوني و أنا بهيچ حال و ما بيدهم شي عليَّ، بچيت بچي سنيين كل الأفكار التمن عليَّ أتذكر حياتي قبل صحيح ما چانت حلوة بس أرحم من العيشة هنا، مسحت وجهي و بدون أي تردد قررت أنفذ الفكرة اللي ببالي اليوم گبل باچر بس شلوون أدبرها وحدي و وياي أخواني مو وحدي ما أدرري، ضليت گاعدة أفكر شلون أنفذ اللي براسي لأن شي مو سهل ومخاطرة علىٰ حياتي و حياة أخواني بس ما عندي غير حل...

گضة أليوم بس بچي حاولت أسكت الخاطر أخواني الخايفين بس كل محاولاتي فاشلة لأن الفكرة تخوف تخيلي وياي يجبرونچ على الزواج من شخص مأذيچ سابقًا و غصبًا عليچ توافقين شنو راح يكون شعورچ بهاللحظة؟ 

(جاوبي بالتعليقات🫂). 

و براء بس سمعت بالصار أجتني تسكت بية و تمدح بغسان و تگول هوَ بس شوي عصبي بس أهم شي يحبچ بس أنا ما أقبل أقتنع بهذا الحچي ، أنطيتهم علىٰ مايهم و سكتت بس البراسي أسويه يعني أسويه ولا أستسلم للخسيس غسان و أهله ، أنا شفت أشكال و ألوان بحياتي ضليت ما أهتم التصرفاتي ولا القراراتي ابد و حتى تفكير ما فكرت عدل من أتخذت هذا القرار بس چنت رايدة حل سريع يخلصني منهم و من ضيمهم، عدة كم يوم و أنا أخطط و أرتب گبل لا أسويها حتىٰ أخلص منهم تمامًا و غسان ما شفتة بهاي الأيام كلها مختفي 

چنت گاعدة بالغرفة كالعادة بعد ما كملت الشغل مالت البيت و أدرس أخواني الظهر دخلن علينا عمتي وحيدة و براء گالت عمتي 

وحيدة:: يمة ما ضل وكت على حفلة المهر بعد چم يوم خلي تطيح الشمس شوي و روحن أنتِ و براء للسوگ أشتري حوايجچ 

ردت أرفض و اگول علىٰ غير مرة بس تذكرت فعلًا ماكو وكت و أروح أشتري أشياء احتاجهن الي و لـ أخواني أحضر نفسي گلتلها

سَدف:: خوش چا هسه اگومن أبدل بس أخواني يضلون هنا لو آخذهم؟ 

وحيدة:: خليهم يمي غاد أزدحام و يضيعون 

هزيت راسي و هنة طلعن، كملتلهم دراستهم بس أنا شاردة شعور الضياع محاصرني باوعت الهم ما يستاهلون يعيشون بالذلة بس لنفرض سويت البراسي و بعدين؟ شمنتظرني؟ سالفة الشردة مو سهلة و ينرادلها گلب گوي بس منين أجيب هذا الگلب

و كل ما جاي يمر الوكت اختنگ اكثر و أحس الدائرة بدت تضيگ عليَّ ما عندي وكت أقترب موعد أعدامي بأعتبار

صحيت من الصفنة و عيوني مغورگه ليش كل هذا جاي يصير بية؟ بعدني صغيرة مو مال أعيشن هيچ أشياء البعمري يمهن أهاليهن يهونون عليهن التعب و يشيلون حملهن و همهن أما أنا عشت أشياء أكبر من عمري و ما أستاهل كل هذا اللي جاي يصير بية بس دائمًا اگول كله أختبار حاشاه رب العالمين يضيع حگ أحد كلهم ألهم يوم، و بعد سلمت أمري للّٰه حسبيَّ اللّٰه و نعمَ الوكيل

گمت من مكاني بدلت لبست عبايتي و شالي و طلعت أريدن أشوف وين براء فاتنة الوكت صارت الساعة فوگ الثلاثة، ضليت منتظرتها شوي ياللّٰه نزلت رحت الأخواني گلتلهم شوي و أجي ما اتأخر و وصيت عمتي عليهم و طلعنة أنا و براء و صعدنة بسيارة ليث هوَ وصلنة نزلنة و هوَ ضل منتظرنة، طبينة للسوگ الصاير أزدحام كتلة يمكن هاي ثاني مرة أطلع للسوگ المرة الأولىٰ من چنت صغيرة كلش و گبل لا أبوي يمشي بالطريق الأعوج أمي أول ما عرفت روحها حامل أخذتني و رحنة للسوگ تشتري أشياء للمولود و هيَّ حتى ما تدري بيها توم ولا تعرف أجناسهم و راحت أشترت ملابس و كريكوت واحد و جابتلي الي هم ملابس، أتنهدت و ذبيت التفكير بالماضي علىٰ صفحة و كملت طريقي وي براء 

دخلنة المحل فساتين يخبلنن و بدت هيَّ تراويني و تگلي هيچ موديل يلوگلچ باوعتلة لونة وردي فاتح بدون ردن و بيه وردة چبيرة صفح علىٰ الصدر و كلة عبارة عن لمع و ترتر و بيه تلة چبيرة و أبو المحل يگللها هذا جديد هسه نزل موديله، دارت عليَّ تريد تشوفني حابتة لو لا بس أنا ما مهتمة هزيت راسي بمعنىٰ أي شافتلي أكثر من فستان و تتعامل وي الرجال على أسعارهن لـ حد ما ثبتنة على نفس الفستان و أنطتنياه

براء:: روحي گدريه ياللّٰه حتى نأجرة 

سَدف:: لا هوَ على قياسي ما أريدن أگدر

براء:: يااا شلون لازم تگدرينه 

سَدف:: براء هاي هيَّ على قياسي ما بية حيل اگدرنة

بقت تلح عليَّ ألا أگدره بس أنا رافضة لأن ما بية حيل و هم ما يحتاج لأن اصلًا ما راح ألبسنة، سكتت عني و أتفقت وي أبو المحل على الفلوس و الأيجار و گلتلة يمتى ناخذة من عنده و طلعنة خلصت الطريق كله تحچي عليَّ لأن ما لبستة و انا ساكتة، طبينة محل أحذية أختارتلي كعب كلش عالي

سَدف:: شني السالفة أطخ بالسگف

براء:: لا هم ياللّٰه زين حتى من توگفين يمه شوي تصيرين بعلوة مو حلو أنتِ هالگدوتچ توگفين يمه تضيعين

سَدف:: لا ما أريدنة ما أعرف أمشي بالكعب جيبيلي فلات

براء:: يااعع لا تسودنيني

سَدف:: جيبيلي فلات عفية ما أرتاح بالكعب 

عضت أصبعها من جوة العباية متحلفة بية بس ما تگدر تحچي أختارتلي حذاء أبيض فلات گلتلها

سَدف:: و أخواني؟ 

براء:: حتى أخوانچ؟؟؟

سَدف:: أيي چا خطية غير يكشخون بخطبة أختهم خو ما يضلوون مبهذلين خلي أختارلهم حذاء و ملابس 

جبتلهم أخذية حتى يلبسونها من نطلع لأن همَ ما عندهم ولا أنا عندي هسه لابسة حذاء براء حتىٰ أقطهم و أهج هذا أبسط شي أسويه بحقهم، رحنة محل ملابس أطفال أختاريتلهم تراكات كل واحد منهم تراك ألوان و تراك أسود لأن جاينة محرم و أشتريت الي كم شغلة محتاجتها بحيث جهزت الجنطة النشرد بيها بدون لا تحس عليَّ براء و الزاد من الفلوس أنطتياهن 50 ألف فرحت بيهن كلش لأن أنا حاليًا بأمس الحاجة الهن، ضلينة هواي بالسوگ نفرفر لـ حد المغرب ياللّٰه رجعنة للسيارة لگينة ليث ينافخ لأن صارلة هواي منتظرنة وصلنة للبيت و هوَ حرك السيارة طلع ما أدري وين، دخلنة بعلاليگنة لگينة صبيحة تنافخ ضايجة و بتها يمها وجهة أحمر و مورم و تباوعلي بحقد خذيت علاليگي و دخلت للغرفة لگيت مينا نايمة و علاوي گاعد يكتب بالدفتر الحروف يراجعهن

سَدف:: هلو علاويي

گمز من شافني گبل گام تلگاني شال العلاليگ مني خلاهن بالغرفة بستة 

سَدف:: تعاال شوف شجبتلكمم، ميناا گعدي شوفي شجبتلچ

گعدت گبل أول ما سمعت صوتي أجو ملتمين يمي متحمسين طلعتلهم الملابس و الأحذية كلش فرحوا بيهن و بعد ما راويتهم كلشي، سكتت مترددة أحچيها بس بالأخير حسمتها و حچيتها لأن ما بقى ألا قليل

سَدف:: عندي سالفة وياكم، باعو أنتم تردوني أتزوج غسان و أروحن بعيد عنكم؟

علي الرضا، مينا:: لاا

سَدف:: چا يريدون يزوجوني غسان و أنا ما أريدنه و ما أريدن أعوفنكم فَـ لازم نسوي خطة حتى نخلص بيها منهم

علي الرضا:: شنسوي؟ 

سَدف:: نشرد منانة

مينا:: يكضونة 

سَدف:: لا أن شاء اللّٰه نطلع بدون ما يدرون و نسافر بس أنا وياكم و بعد محد راح يگدر يفرقنا عن بعض نضل وحدنة مرتاحين 

علي الرضا:: و بعد ما يجوون النه؟ 

سَدف:: لا ما يگدروون لأن احنه راح نروح بعيد 

مينا:: چا خووش يمتى نروح؟ 

سَدف:: هاي الأيام يمكن بس مو تحچون الأي أحد متفقين؟ 

علي الرضا، مينا:: متفقين 

أبتسموا و همَ يحچونها بس أنا ما مرتاحة و مترددة أسويها و أخاطر بحياتي و حياة أخواني بس ولا أضل يمهم، بدلت هدومي و طلعنة أنا و أخواني راحوا يلعبون وي زين العابدين و انا رحت للمطبخ لگيت صبيحة و عقيلة يسون بالعشا گلت خلي أسويلهن خير لـ آخر مرة لأن بعد ما أشوفهن گلتلهن

سَدف:: ياا عمة ليش أنتن واگفات بالمطبخ روحن أنا أكمل العشا

باوعتلي عقيلة من فوك لجوة

عقيلة:: مشكورة ما نريد اصلًا خلصنا شني توچ ياللّٰه أجيتي 

سَدف:: بكيفچن

ردت أطلع گالت صبيحة

صبيحة:: ترا ما تعديلچ سلامات يَبت ألميعة

خفق گلبي درت عليها أباوعلها بتوتر كل اللي ببالي عرفت الخطة لو سمعتنة من حچيت وي أخواني، حچيت بتوتر

سَدف:: شـ.. شقصدچ؟؟ 

ضحكت و گالت

صبيحة:: تهني بيه بس أول أيام لو تموتين ما أخليچ فرحانة و بتي شابعة قهر أشوفچ نجوم الظهر أترگبي سَدف

هديت شوي من عرفت سالفتها مو يم الشردة أصلًا شوي أتطمن گلبي گلتلها بثقة متصنعة

سَدف:: نشووف

گلتها و طلعت من المطبخ بسرعة متهربة رحت گعدت يم عمتي وحيدة و عمي فلاح و صباح گاعدين بالهول و عمي فلاح يخابر 

فلاح:: هسه شني يريدون نجيب؟ 

سكت شوي يستمع للمتصل أنوب رد گال

فلاح:: جنسية غسان و جنسية بنيتنا بس؟ 

جاوبة المتصل و تسالموا و سد الأتصال دار على عمتي

فلاح:: أم عدنان جيبيلي علاگة المستمسكات نريدهن علمود العقد 

وحيدة:: ولا بية حيل أگومن منا لهنا ركبي يوجعني سَدف ما تروحين تجيبيهن 

كيفت أنا گلت بلكت اللّٰه أگدر آخذ جناسينة گبل گلتلها

سَدف:: وين الگاهن؟ 

وحيدة:: روحي الغرفتنا بالبوفية اللي گبال الباب جوة الملابس تلگين چيس بيه كلشي جيبيه و تعاي

هزيت راسي و گمت بسرعة دخلت الغرفتهم رحت على البوفية و رفعت الملابس و شفت حبل نجاتي، بسرعة فتحت الچيس أگلب بالجناسي نستعجلة لگيت جنسية مينا بقت مال علاوي بقيت أدور بسرعة حتى لا يحسوون عليَّ اتأخرت و صاحت عمتي عليَّ فززتني 

وحيدة:: هاا لگيتيهن؟؟ 

سَدف:: لحظةة عمة جاي أدور

وحيدة:: شالقضية ما دبرتيها الچيس گبالچ

سَدف:: أيي عمة جاي أدور... هاي لگيتة 

وي ما جاي أحچي وياها لگيت جنسية علاوي أخذتهن أثنينهن و ضميتهن بالمخبأ السري و بسرعة شديت الچيس و وديتة ركض أنطيتة العمي خذاه مني ضليت كاضة گلبي بيدي خايفة لا يفتقدهن بس لـ حسن حظي چان مستعجل يطلعهن و ما دقق طلع مالتي و مالت غسان خلاهن بالچيس سوية حتى أول ما يفتح الچيس يلگاهن و أنطانياهن گال روحي رجعيهن، خذيتهن منه راجعة للغرفة فتحت الچيس مرة ثانية و خذيت جنسيتي ما أدري شجاي أسوي بروحي و شهالمخاطرة هاي، رجعت كلشي المكانة و خذيت الجناسي و طلعت 

بوجهي رحت للغرفة اللي أحنه بيها و دحستهن بالجنطة مالتنة جوة الملابس كلش، و تعشينة أنا و أخواني وياهم، و نظفت همين و أجة ألليل و كلها نامت و حتىٰ أخواني بدوا يغفون بقيت بس أنا گاعدة حسبة تجيبني و حسبة توديني ما فكرت غير بالطلعة من هذا البيت ردت شلون ما كان نطلع و نفتك، بس بقى شي مهم و ما أگدر أتحرك بدونة الفلوس منين أجيب؟ عندي بس 50 ألف اللي أنطتنياهن براء شتسويلنا هاي الخمسين لازم الگة حل، ضلت الأفكار تروح و تجي ببالي و ما وصلت غير لـ فكرة وحدة و أدري بيها غلط و أكبر غلط أسويها بس أنجبرت أنا ما متعودة أسوي هاي السوالف و مو مالاتي بس بعد الظروف حكمتني 

أبوگن فلوس من أي أحد من البيت لأن ما عندي غير حل، و بديت أفكر من جديد منو اللي أبوگنه وصلت الفكرة بس ما أدري أذا صح لو غلط بأن أگولن النيروز و تساعدني بس ما أثق بيها گلت خلي أجرب و أذا ضلت تهددني أهددها بـ أن أگولن هيَّ تحب غسان و أگلب الفلم عليها گمت من مكاني متوجهة الغرفة نيروز صعدت و دگيت بابها فتحتة بس مستغربة من وجودي 

نيروز:: خيرر

سَدف:: خير أن شاء اللّٰه خلي ندخل عندي سالفة وياچ مهمة تفيدچ

نيروز:: أحچي هنا مالي خلگ فلسفة

سَدف:: أجيتچ علمود أخليچ أنتِ التزوجين غسان مو أنا بس بكيفچ راح أروحن 

گلتها و رحت أريدن أنزل و هيَّ مثل المخبلة سحبتني من أيدي فازة 

نيروز:: تعالي أدخلي أدخلي

أبتسمت و دخلت للغرفة وياها گعدت و هيَّ گعدت گبالي

سَدف:: باعي أنا راح أگلچ اللي ببالي هم أنتِ تاخذين التحبينة و هم أنا أخلص من هذا البيت و بعد ما تشوفيني أبد 

نيروز:: سولفي

سولفتلها أللي أريدن أسويه و گلتلها تساعدني، صفنت عليَّ أنوب گالت

نيروز:: و أنا شنو الأستفاده أنتِ و راح تهجين أنا شلون آخذ غسان

سَدف:: انا راح أختفي بعد ما تلگوني و هوَ راح يدور لـ حد ما يتعب بس ما يحصل نتيجة ما يلگاني و شلون تسحبينة الچ هاي بعد أنتِ و شطارتچ لأن هوَ ما يرضى يتزوج و أنا ما راح أكون موجودة راح تبقين أنتِ شتسوين سوي بس ساعديني أطلع و بعد ما تشوفين وجهي

نيروز:: بيش أساعدچ

سَدف:: أريدن فلوس دبريلي، بس واللّٰه يا نيروز لو طلعت حچاية وحدة منچ أفضحچ و أگولن تحبينة و هيَّ گلتلي شردي

نيروز:: لا لا واللّٰه ما أگول شي، و الفلوس شگد محتاجة أنا أنطيچ 

سَدف:: ما أعرف شگد عندچ أنطيني 

نيروز:: عندي تراچي ذهب و مجمعة ميتين ألف أنطيهن الچ عادي بس كون ترحين 

سَدف:: أي واللّٰه أروحن بس أنتِ ديربالچ تحچين شي 

نيروز:: لا هاي هيَّ و العباس

هزيت راسي و هيَّ گامت فتحت الكنتور و أنطتني الفلوس و زيادة فوگاهن و گالت 

نيروز:: التراچي ما راح أنطيچياهن مستعزة بيهن من أبوي

سَدف:: خوش ما أردينهن بعد راح تخلصين مني 

ضلت تباوعلي فرحانة للحظة حسيت بحبها الغسان و مستعدة كلشي تسوي علمودة و هوَ مثل المطي عايف هالبنية و يفتر وراي، كسرت خاطري رحت شبگتها بس ما بادلتني الحضن

سَدف:: مشكورة ما راح أنسىٰ فضلچ عليَّ و حفظي سري بعد أختچ حتى أنتِ هم ما تطيحين بمشاكل كون هالسر يضل بگلبچ و أبد ما تطلعينة

شبگتني و گالت

نيروز:: لا واللّٰه أبد سرچ ببير بس فدوة عوفيني بحالي

وخرت عنها و أهز براسي ودعتها و طلعت من الغرفة الدنيا ما سايعتني من الفرحة معقولة لگيت المفتاح اللي ضيعوه من سنيين و هسه أگدر أفتح باب نجاتي؟ 

دخلت الغرفتنا من الفرحة بست أخواني و كأنما أگللهم تحررنا، ضميت الفلوس كلش زين جوة الهدوم بالجنطة هنة و المستمسكات و نمت أحلىٰ و أريح نومة أنامها بحياتي كلها، و فزيت الصبح على تحضيراتهم المفروض باچر حفلة خطوبتي!!! لگيت حتى نيروز گاعدة من الصبح وجهة منشنش و فرحانة حتى أمها مستغربة منها، أول ما دخلت للمطبخ تلگتني عمتي وحيدة بالهلاهل و الهوسات و براء تضحك، أباوع للكل فرحان ألا أنا المفروض أكون أسعد أنسانة بهاللحظة بس... 

جاملتهن و گالت براء

براء:: حضري روحچ فد شوي و نروح للصالون حتى نحف وجهچ و حجزنالچ صالون الباچر

سَدف:: لا ما أريدن وجهي ما بيه شي 

براء:: لا شلون لازم نروح حتى تصير ألچ نشعة

سَدف:: لا خلي النشعة للعرس أحسن مو عمة؟ 

وحيدة:: أي واللّٰه أنا هم أگللها بس ما تقتنع

براء:: فوگاها بكيفچن

سكتت مر اليوم و الكل فرحان و باللحظة الطب بيها غسان للبيت من بعد غيبة طويلة طبيت للغرفة و ما طلعت أبد حتى عشا ما تعشيت و كلساع جايتني براء تگلي تعالي طلعيي بس ما أقبل خليت بس أخواني يروحون ياكلون شوي و أجوا ضليتة وحدنا گلتلهم

سَدف:: أليوم نطلع نص الليل

علي الرضا:: سَدف خاف يكضوونة

سَدف:: لا ما يدروون بس بعدين يضلوون يدورون و هم ما يلگوونة لأن راح نروح البغداد

همست الكلام همس خاف أنسمع و شيفكني همَ فرحوا من سمعوا بغداد و أنا هم أحب بغداد و ولا مرة رايحتلها و كلشي ما أندل بيها شلون بية ما أدري

صار ألليل و أخواني ناموا و أنا عيني جافاها النوم التفكير كلاني أكل و كل ما يقترب الوكت گلبي يصير بيه خفقان، طلعت من الغرفة أشوف الأوضاع شنو، لگيتهم نايمين و هدووء و البيت أظلم، رجعت للغرفة حضرت الجنطة مالتنة الناخذها 

و ضليت مگابلتها و گاعدة لـ حد ما باوعت للساعة صارت بالثنتين گلت هاي هيَّ هذا أنسب وكت الطلعتنا، گعدت أخواني و بدلتلهم عالسريع و خليتهم يطلعون گدامي بيد علاوي الجنطة و أنا بدلت و لزمت العباية بيدي ما لبستها و طلعت أمشي على طرف أصابعي قريت الفاتحة لأم البنين بنية تسهيل الأمر و رحت يم أخواني لگيتهم لابسين أحذيتهم و أنا هم لبس حذائي و لبس عبايتي و طلعنة من البيت و عساني لا طلعت و لا فكرت بهيچ طلعة

الفصل التاسع من هنا