رواية العدم نقطة السواد الفصل العاشر بقلم اسراء
﷽
كون تشوف روحي
شخلى بيها الخوف
ردنا نعوف كلشي
وما گدرنا نعوف
كون تشوف حالي
شگد الك ملهوف
• ━━━━━━━━ ━━━━━━━━ •
وصوت شخص ثاني اخذ التلفون :
_ شلونك حجي؟ خطبة مباركة .. بس العريس شويه تعبان ، جسمه ما يتحرك تحبون ارجعه الكم يمشي على رجليه ؟ لو تريدون نشيله على چتوفنه مثل النعش ؟ .
سحر لطمت على وجهها لطم لطم حيل بكل حيلها ، وگعت بالگاع
سحر -: يمه وليدييييي ولك رجعلي ابني رجعلي صنديد الله لا يوفقك يا ابن الحرام رجعه اليييه .
إخوانه هجموا ع التليفون
أنور -: ولك منو انت ؟ منو انت ولك؟ إذا بيك خير اطلع واااجهنييي لا تتختل مثل الحريم .
أيهم -: والله إذا ما ترجع أخوي اليوم لأگلب الدنيا واجيبك لو من بطن امك انت منووو؟؟ .
ابوي عرگه يصب ، مد ايده واخذ التليفون من ايد انور ، وصرخ
شاكر -: ولككك منوووو انت ؟ .
سكت ل ثواني وجاوبه بهدوء
حيدر -: واحد ناذر اذا صنديد طب لبيتكم مره ثانيه ارده زحف وهساع وفيت نذري .
ابوي بسرعه عرفه
شاكر -: ولككككك حيييييدررررر يا ابن ال... ولك رجع الولد لا تخزيني بين الناااااس..
حيدر -: هه.. حجي شاكر ماكو خطبة بشش تبخرت روح دور على عريس ثاني لبنتك ، هذا من اول بوكس تفصخت عظامه .
اني بهاللحظة ما حسيت برجلي لزمت أمي وحضنتها ، واگفين بالزاويه بس نباوع العركه بالتلفون مستمرة ، صياحهم هاز البيت .
أمي لازمة إيدي عاصرتها وتهمسلي
نوفة -: يا ربي دخيلك.. هدي يمه هدي
عيني راحت على سواد
گاعد على الكرسي الخشب حاط رجل على رجل
ولا كأنه صاير شي ، وبأيده عود اسنان ينظف بسنونه ، ويتفرج على صياحهم
باوعلي و اشرتله بعيوني " انت؟ " هوا هز راسه وابتسم .
فجر ومليحة، واكفات بصفي ، ينغزن بيه ويضحكن
فجر -: هذا حيدر ، والله هذا حيدررر..
مليحة ، تغمزلي -: جنتل مان .. خطف العريس علمودچ .
امي فاتحة عيونها على سرسرتهن وچان تشيل النعال بأيدها تأشر بي
نوفة -: ها فجر و ملوحة؟ حنيتن للنعالي ؟ .
وهنه ولا يهتمن ، يضحكن بنص هاي الهوسه كلها
وابوي رجع اخذ التلفون من
ايد اخو صنديد ويصرخ عليه
شاكر -: اسمعني ولك .. اذا ما ترجعه والل...
مالحگ يكمل وسد الخط بوجهه..
الكل سكت ، بس صوت سحر تلطم
_ يمه وليدي يمه ليش تعاند .. حيدر گالك لا تسويها هذا ابن الشروگيه الملعب گلك لا تخطبها عوووفهااا ليش تعاند يا يمه ليييش .
_ يمه هددوك اذا تحط مره على راس مرتك يذبحونك ويجيبوك الي بالنعش يااا يمه .
و رويدة تهدي بيها وتبچي وياها
بهالاثناذ .. باب الحوش انفتح حيل وكلنا باوعنه بأتجاه الحوش ويبين الجاي لأن باب الصاله مفتوح ، اجه ليث اخو صنديد الزغير ركض ، حافي و وجهه مخطوف اصفر وازرك ينطي الوان
ليث -: لگيناه .. لگينه صنديد هسه.. هسه سياره سوده شمرته بالحوش مالتنه لافينه بالبساط ما يحرك لا إيد ولا رجل من گد الضرب والتعذيب .
سحر فزت وركضت هبريها مايل وشعرها طالع وجهها مصبوغ صبغ ، ورويدة وراها تبچي وتصيح
رويدة -: يمه اخوي .
اخوانه كلهم ركضوا ورا امهم رواحتهم مفرفحه عليه
بقى بيتنا هدوئه يخوف..
وهنا شلهب انفجر. اول مرة اشوفه
يحچي ويا ابوي هيچ وعيونه حمر
شلهب -: شفت ؟ شفت لوين وصلتنا ؟ ليش قبلت تنطي رفيدا إلهم؟ لييييش؟ .
ابوي رفع راسه بعد ماچان منزله بالگاع
شاكر -: وانت ما تگول لنفسك ؟ شنو شايف من بنتهم الخفيفة هاي رويده ها؟ مو تارس التليفون برسايلهاااا ؟؟؟ .
شلهب -: صارلي سنين احبها يابا انا وضعي يختلف انا زلمة بس اختي بنيه ما يتساوم عليها بفلوس وجنط .. ما تنباااااع .
ابوي سكت . كلام شلهب سكته
گام على حيله تقدم علي ، لزم إيدي الثنين وايده ترجف ، عيونه دمعت ولأول مرة بحياتي ابوي يعتذرلي گدام الكل
شاكر -: خربت خطبتچ من وراي انا .. سامحيني بنيتي إذا ما تريدين توافقين ، خله يولي المهم انت مرتاحه كافي ضميري يأنبني عليچ .
اريد ابچي بهاللحظة اريد اگول اي ما اريده ، بس
ما اگدر اكو شي بداخلي يريد هالزواج
طلعت مني الكلمة مجبوره
رفيدا -: لا بابا .. آني أريده .
مليحة گحت بقوه حتى تسكتني .
فجر فاتحة عيونها علي ، تهز بإيدها
من ورا ابوي _ لا لا ، لا تمسلتين
قريت حركة شفايفها وفهمتها
اباوع عليهم ودموعي تصب ، اريد أصرخ لا مو اني دا احچي بس لساني مربوط
ابوي عيونه مدمعه ، طبطب على ايدي وما حچه شي طلع للحوش ، طلع جگارته وشعلها
شلهب ما تحمل ، التفت علي، صوته عالي
شلهب -: شجاج رفيدا؟ تخبلتي؟ قبل فترة گتيلي لو يموتوني ما اصير على ذمته انا اعرفهم شنو هذوله ما اريد تتعبين وياهم .
سكت ثواني ، باوع لأبوي برا ورجع باوعلي بقهر وطب لغرفته وضرب الباب .
ذو الكفل هم معصب ما باوعلي حتى ، راح ورا شلهب
البيت هدأ واخيرا
هالفتره هواي تعبانه وماعندي طاقة افكر بشي
گمت ما بيه حيل لميت المواعين رتبت البيت شلت هدوم اخواني كلهم غسلتهن وشريتهن ع الحبل الشمس غروب ، السما صايره حمره
رجعت للبيت ، عيني اجت ع الشباك بطل الماي اللي نطانياه حيدر بعده هناك .
أخذته، إيدي ترجف ، سميت
رفيدا -: بسم الله الرحمن الرحيم .
وشربت منه ، بس نزل لصدري ، حسيت گلبي هدأ شويه
طلعت برا لميت حطب شعلت نار صغيرة بصينيه وخليت الحرمل اللي نطانياه حيدر وبلشت ابخر بالبيت كله ، وأني أقرا "بسم الله أرقيك من كل شرا يؤذيك "
رحت على غرفة شلهب لگيته گاعد ع الفراش عيونه ع الموبايل ، يراسل بت إبليس ومندمج حيل
تقربت ونفخت عليه دخان الحرمل
_ هفففف
شلهب -: لچ شنووو ؟ شنو هذا ؟ وخرري .
رفيدا -: حرمل حبي يطرد الشياطين .
شلهب -: ريحته ما طيبه وخررري .
رجعت انفخ عليه مرة ثانيه
_ هففف
تخبل وگمز ضايج
_ لچ رفيدااا شدا احچي هندي؟ وخرري من يمي دا اگوووللل .
متت ضحك عليه وهوا يكمز
من الدخان والموبايل بإيده
رفيدا -: اعصابك حبي ردت اطرد ابناء ابليس عنك .
سواد طب شافني ابخر مد راسه:
سواد -: بخريلي وياج عين صايبتني .
فجر -: هوا انت ياهو يحسدك ؟ وجهك يگطع الرزق .
مليحة -: شلون راح تصير عالبخور النوب ؟ .
سواد -: حسدوني على طبعي اما انتوا عدكم شكل بس ماعدكم اطباع .
اندفر الباب وابوي طب علينا معصب ، عيونه حمر اجه يمشي سريع على سواد لزمه من فانيلته ورفعه
شاكر -: لكك تعال .. تعال يا ابن ال** حرامات بيك الربى والمداراة حرامات حسبتك طالع من ضهري
جره يسحل بي لبرا ، ذبيت الصينيه بالگاع و لحگناه آني وخواتي وامي ورانه طلعت على صوت صياحه
شاكر -: عرفت .. عرفت وحگ ررربي انت متفق ويا حيدر .. حرامات الربى بيك حرامات الزاد الأكلته ببيتي انا ربيتك ويه ولدي وبناتي وثقيت بيك .
شمره بالحوش گباله وابوي نازل بي رزايل
وهوا منزل راسه فشلان ذيج الفشله ما يرد ولا يصد
شاكر -: من اليوم ما اعتبرك واحد من ولدي انت خدام يمي خداااام وبسسس .. هذا مقاااامك .
اديان لازگه بثوب امي و مدمعه عيونها بس بنفس الوقت مبتسمة بمكر ، فرحانة لأن ابوي جاي يرزل بي
ركضت على ابوي منعته يصيح بوجه
رفيدا -: شبيك بابا شمسوي سواد ؟ .. فدوه بابا حلوها بالتفاهم لا تصيح بوجهه خطيه .
شاكر -: هذا جذاب اكبرررر جذاب ما يغزر بعينه يخوني ويه حيدر ومساعده يخطف صنديد ويضمه! .
رفيدا -: لا تظلمه بابا انت منين عرفت؟ .
شاكر -: صنديد شايفهم هوت وحيدر من جايين ماخذينه .. الرجال ما يتهم زور ولا باطل .
كل هذا وسواد ساكت ، مدنگ راسه، أشرتله "ليش هيچ سويت؟" رفع چتافه يعني "شنو أسوي؟"
بعد رزايل وصياح وسب وغلط على سواد وابوي يحچي فاير دمه و شلهب يحاول يقنعه سواد ما اله ذنب ، بالأخير ابوي حسم الموضوع
شاكر -: تروح تشتغل بالكراج انا مشتري كراج ويحتاج عامل ، هناك مبيتك تبات هناك وتاكل هناك ماكو طبة بعد لهذا البيت .
سواد بس يهز براسه
حيل قهرني هالولد
ذو الكفل كل وهوا ساكت واخيرا تقدم ، لزمه من ياخته وعينه بعين سواد
ذو الكفل -: بما ان حجيت وسمعنا صوتك واخيرا .. گلي شنو اسمك؟ وشلون تقرأ وتعلم أديان تكتب؟ انت مو تگول ما اعرف ؟؟؟ .
سواد ضل ساكت .
اني شكيت بأمره لأن مره كال ان هوا قرأ رساله حيدر ، بس رغم كلشي دافعتله
رفيدا -: عوفه ذو الكفل هاهيه راح يروح يشتغل بالكراج لحد يضل يحچي عليه كافي .
ذو الكفل صرخ بوجهي ، اول مره من بعد فتره
_ انت طحتي من عيني وصعب ترجعيلها بعد لا تدخلين بيني وبين امور تخصنا اني وابوي .
رفيدا-: يااا شمالك هسه تنفتگ علينا .
تجاهلني وأيد ابوي بقراره
_ اي ذبه بالكراج يصلح سيارات ويبات هناك
و؏ المستقبل نشوف له شغله ثانيه نستفاد من عنده بيها .
امي تدخلت وهيه واگفه بالباب مال المطبخ وتبچي
نوفة -: خطية بعده صغير يا شاكر..
عصب منها ، صاح بيها محترگه اعصابه
شاكر -: قراري نهائي حطولي هدومه بجنطة ، ما آمن وهو بنص بيتي بعد! .
ركضت عليه
حضنته حيل كأنما اريد اضمه بروحي
بجيت ودموعي توگع على شعره ، شهگاتي فضحتني
شميت عطره .. شميته وحسيت هذا آخر وداع بعد ما راح اشوفه ، گلبي يأذيني عليه
رفيدا -: سواد...
فجر ومليحة وأهاب هم حضنوه ، أهاب يبچي
أهاب -: دير بالك على روحك حزام ظهري..
امي ما تحملت ، فاتت للبيت جابت هدومه بجنطة وانطتهن لأبوي ، اخذه وصعدوا بالسياره
لوحت له بإيدي ، وهو يباوعلي من الجامه منزل راسه ، بعد ما مشوا التفتت أريد أفوت للبيت وعيني اجت على اديان
واگفة بالباب متشمته تباوع على دربه فرحانة لأن أبوها طرد سواد هذا كله لأن تغار على ابوي منه وما تريد واحد يحبه أكثر منها .
دخلت للبيت لگيته وحشه والله وحشة بليا سواد مكانه بالصالة فارغ ، فراشه ملفوف ومحطوط ع الميز ماكو صوت چقچقة العلچ مالته ، ماكو واحد يصيح " ابو النسوان وصل "
ذبيت روحي ع الفراش ، فجر ومليحة يمي
رفيدا -: البيت مو حلو بليا سواد .
فجر عيونها دمعت، مسحتهم وگالت
فجر -: والله كل شوية اباوع ع الباب عبالك راح يطب ويصيح " جوعان" شگد چان يحب الاكل .
مليحة تمسح بدموعها
مليحة -: حتى من چان يبوگ قلم اديان ويسوي النه اجواء البيت چان بي صوت .. هسه فاهي بدونه .
بهاللحظة اهاب طب ، عيونه حمر اجه حضني حيل وبچى اول مره اشوفه يبچي
اهاب -: رفيدا ما اصدگ سواد يسوي كل هذا هاي خطة من النجس صنديد .. صنديد چذاب سواد ما يخون ابوي والله .
مسحت على راسه ، وبسته
رفيدا -: خلاص حبيبي لا تفكر وتشيل هم ، تنحل إن شاء الله .. ابوي من يعصب يحچي هيچ ، باجر يرضى ويرجعه .
اهاب -: صدگ يرجعه ؟ .
رفيدا -: اي ، آني اقنع ابوي و ارجعه .
هالنهار هلكنا هلك وما عده واجه الليل وبصعوبة غفينا من التفكير والقلق على سواد ، نفكر ابوي شسوه بي معقولة يشغله عامل بكراچ سيارات ؟
ثاني يوم الصبح
گعدت من الفجر ، الشمس بعدها ما طالعه زين فجر ومليحة لابسات ومتحضرات اليوم يستلمن شهايدهن
شلهب واگف بالباب لابس قميص ابيض رسمي ومكوي بإيده كوب چاي وبالإيد الثانية يراسل بت ابليس .
طبيت للمطبخ لگيت امي گاعده تعجن و يمها المسجل مالتها ومشغله اغنية عمرو دياب
رفيدا -: يمه وين ابوي؟ .
جاوبتني وهي تدگ بالعجين
نوفة -: ما اجه ، بات بالكراج يم سواد .
هزيت راسي ، واديان چانت واگفه بباب المطبخ وسمعت ، ما حچت بس وجهها انگلب و نفخت بقهر
رحت للمطبخ سويت لفجر ومليحة لفات ، خليتلهن خبز وبيض وجبن وشلهب اخذهن وطلع
شويه وشفتها طلعت من غرفة ابوي شايلة بطانيته وتسحل وراها ، لحگتها وشفتها طلعت شمرتها برا
رفيدا -: اديان شبيچ؟ .
اديان -: اذا هوا يحب ينام بالكراچ يم سواد خلي ينام لأن مبين ناسي عنده بنية .
فتحت حلگي مصدومه من شطانتها
هزيت راسى مأيسه منها ومن غيرتها هاي الما تبطلها
كملت شغل البيت كله ، كنس ، مسح ، غسلت مواعين البارحه وبعدين رحت فتحت الكنتور طلعت كتبي مال المدرسة ، التراب صاير عليهن گعدت بالگاع وفتحتهن
عندي طموح بداخلي و راح ارجع وبقوه هم ، محد يگدر يمنعني من حلمي لا صنديد ولا ابوي ولا كائن من يكن آني حرة وكيدي عظيم ، اگدر .
ضليت أقرا وأقرا وأقرا لحد ما دخت ، عيوني غوشت من الكتابه ، صعدت للسطح انطي اكل لحمامات اهاب
انطيتهن اكل ومن شبعن صحت
رفيدا -: كش عااع .
الحمام رفرف وقسم من عنده طار بالسما
لونهم ابيض عبالك عرايس
طبگت حواجبي من سمعت صوت من وراي
خزعل -: الله الله .. شنو هالحمامه الحلوه اللي عدنا ؟ .
التفتت شفته فوگ سطحهم هم يطير حمام .
خزعل -: فدوة لهالعيون ، شلونچ رفيدا ؟ .
خزرته بحقد
رفيدا -: تفووو عليك يا ساقط .
ونزلت اركض وادرد
رفيدا -: أستغفر الله .. حتى اليطير حمام ما خلصان منهم .
نزلت جوا لگيت امي تسوي غده ، ريحة التمن تفوح ، الباب انفتح فاتن فجر ومليحة شهايدهن بإيدهن ويصيحن بحماس
فجر -: نجحناااا
مليحة -: روفي نجحنا بمعدل عاااالييي .
رفيدا -: فدوه اروحلچن ذني خواتي الاعرفهن .
أمي هلهلت واني حضنتهن ، أخيرا خبر حلو بهالبيت
وبالليل بحدود الساعة 8 ونص ، اندگ الباب
ورحت افتحه لأن شلهب ديسبح ، اول مافتحته طلعت رويدة بوجهي تبجي وعيونها مورمه اول ما شافتني حضنتني حيل وهي تشهگ
رويدة -: رفيدا وين شلهب؟ دخيلچ وين شلهب؟ أبوي يريد يزوجني لابن خالي بالبصره گوه .
ما لحگت اجاوبها و شلهب سمع صوتها من جوا طلع والمنشفه على شعره ، وجهه مطعون واحمر
شلهب -: شگلتي؟؟ عيدي الگلتيييي .
رويدة -: امي وافقت على ابن خالي وابوي راح يخابرهم الاسبوع الجاي ويبلغهم بموافقتي شلهب ما اريده اني اريدك الك .
فوتها جوا ، گعدت بالصالة تتراجف
ودموعها تصب عبايتها كلها تراب
راح شلهب يلبس بقميصه و الباب انفتح ابوي توه جاي من الكراج تعبان ونعسان عيونه حمر من السهر، اول ما شاف رويدة ، انصدم
شاكر -: هاي شنو شجابها هنا ؟ .
طلع شلهب من الغرفه و واضح سمع ابوي
شلهب -: يابا لريد تخطبلي رويدة .
شاكر -: شنو؟؟ انت ماضل براسك عقل اكيد .
شلهب -: مثل ما سمعت اريد تخطبلي رويدة باجر والموضوع ما يتحمل تأخير .
ابوي انفجر ، گعد يصيح
شاكر -: ما ترهملك هالبنية افهمممم هاي بنت ابو انور تريد اناسبهم مرة ثانيه ويطيح الفاس بالراس ؟ نسيت اخوها صنديد شلون نام على زردومي ويطالب بأختككك ؟؟؟ .
شلهب قافل ، گعد گبال ابوي يهز برجله وصوته يرجف من القهر
شلهب -: حلااال تنطي رفيدا ل صنديد بس حرام آخذ رويدة مووو؟؟؟ حلال تبيع لحمك علمود فلوس بس انا من اجب ما يصييرررر؟؟ .
ابوي ثار ، شمر مفاتيح الكراچ من إيده وصاح
شاكر -: لا تجي تعلمني شلون اتصرف؟؟ انا أبوك انا اعرف مصلحتكم .
شلهب -: قسما عظما يابا إذا ما تخطبلي رويدة انا راح آخذها بدون علمكم والله انهبهاااا واشرررد .
ابوي تخبل ، ضل يصيح ويشمر بإيديه يفتر بالصاله
وعيونه يتطاير منهن الشرار ودمار بگصته نط
شاكر -: تهددني؟ تهددني ولككك ؟ تهدد ابوك لخاطر حرررمه .
شلهب گاعد بمكانه ما يباوع بأحد بس عيونه كل شويه تخطف نظرة على رويدة وحالها وهيه تبچي
اني صافنه عليها شلون تبچي ودموعها شلالات مبين السالفة صدگ بس گلبي ما يتعاطف وياها ما ادري ليش احسها چذابه احس اكو شي ورا هالبچي احسه تمثيل .
حاولت أهدي النفوس ، وگفت بينهم وحچيت بهدوء
رفيدا -: بابا حبي اهدأ ، شلهب خل نفهم السالفه مو هيچ تنحل الامور .
شلهب رفع عيونه علي حمر دم ، صاح بيه فززني
_ اسوي بنفسي شي اذا ما تخطبوها الي والله اذب روحي من جسر نهر دجلة واريحكم وارتااااح .
امي سمعت شلهب واجت ركض لزمت رويدة من إيدها وسحبتها برا
نوفة -: يلا بنيتي ، يلا ارجعچ لبيت أهلچ عيب تجين هنا وبتوالي الليل ما يصير يمه شتگول الناس عليچ .
رويدة دايره راسها تباوع على شلهب وتبچي وهوا يباوع عليها وروحه طالعه ، اخذتها امي وطلعتها من البيت
ابوي قبل لا يروح لغرفته ، باوعلي وگال
شاكر -: خطبتچ تأجلت أسبوع بابا ، على ما صنديد يتشافى ويرجع لحيله .
باوعتله
رفيدا -: شلونه هوه هسه بابا؟ .
هز راسه بقهر
شاكر -: متكسر تكسر والله بابا ، ما خالين بي عظم صاحي .
هزيت براسي و طبيت للمطبخ ، شفت فجر ومليحة اثنينهن كاتمات الضحكه گوه وجوهن حمره وبس ابوي طب للغرفه وسد الباب فطسن ضحك
فجر اجت تهز برگبتها يمي
فجر -: تأجلت أسبوع؟ هذا احلى خبرررر سمعته اليوم .
جاوبتها مليحة وهيه تنهش التفاحه
مليحة-: انخووك اسبوع قليل .. المفروض شهر .
فجر -: يستاهل .. خلي السيد يعدل خشمه المعووج .
مليحة -: شفتي؟ الله استجاب دعائنا .
فجر -: دعينا يبتعد مو يتكسر بس هم نعمة .
مليحة -: خلي يتشافى براحته .. ماكو شي ورانا
بس السيد وراه ودخييييل بخت السيد ودخيل عمامة جده رسول الله .
رفيدا -: كااافي عيييب الشماته بناااات .
فجر -: عيب ؟ لعد هوا من لازگ مثل الچلب ما گال عيب ؟ .
مليحة -: عيب شنو روفي ؟ هوا لو بي خير چان ما انضرب وانسحل .
فجر -: احنا لازم هسه نزور صنديد ونگله اجر وعافيه ابن خالي .. الكسر الجاي اقوى ان شاء الله
مليحة -: عاد تخيلوا المنظر بعد اسبوع جاي يخطب وراسه ملفوف ووجهه ماكو مكان ما مزورگ بي .
حدتهن للغرفه حود ، سديت الباب وقفلته وضليت متكافشه اني وياهن يهلسن بشعري واهلس بشعرهن ، بس اني الگدرت عليهن اكيد لأن هنه من يضحكن بعد مايگدرن يضربني يگضنها ضحك
ومر يومين ، ثلاثه ، اىبعة .. وصار اسبوع
واجت سحر طبت وحدها ، رويدة ماكو مختفيه گعدت بالصاله عبالك ما صاير شي ولا كأن ابنها انكتل قبل اسبوع ، مكياجها ثگيل وحمرتها حمررره طوووخ و عطرها واصل لسابع جار
سحر -: بنيتي رويدة ابوها راح ينطيها ، البنيه دتكبر ما تصغر والستر زين للبنيات .
شلهب بالمطبخ ياكل ، من سمعها ضرب الخاشوگه بالصحن إلا انكسر ، وجهه انطعن گام يرگع بالبيبان وطلع برا وسحر تباوعله متعمده ، تريد تستفزه حتى يخطبها ادري بتفكيرها الخايس مثلها .
نوفة-: الله يسعدها يارب وتتهنى بزواجها .
سحر-: امين يعيوني امييين يوما تفرحين ب شلهب .
اني گاعدة گدامها مبهذله شعري مفتوح ودشداشتي عاديه
باوعتلي من فوگ ليجوه وگالت
سحر -: گومي ماما رفيدا البسي الفستان الجابه الچ صنديد وخلي كحيلة وحميرة بحلگچ الحلو هذا .
رفيدا -: مو لازم .
سحر -: لا تلبسين اسود مثل آخر مرة وجبتيلي ابني مچفن بالبساط ، فال الأسود مو حلو .
رفيدا -: صار .
گمت فتحت الثلاجة من أمس ما ماكله اكلت شي بسرعة ورحت للغرفه
لگيت فجر ومليحة لاعبات بيها جوله وحدة تمشط والثانية تحط حمرة وتغني
_ حبيبي ينور العين يا ساكن خيالي
_ عاشق بقالي سنين ولا غيرك فبالي .
وترد بشعرها يمنى ويسرى وتتمايل بخصرها
ضحكت عليها وعلى حركات الدلع مالتها المعتادة
فتحت الكنتور ، اخذت تنورة بلون بصلي توصل لجوا الركبة ، وياها قميص ككاوي واسع رداناته مزخرفة ونازلة لحد چف الإيد ، طبيت سبحت ولبستهن وبعدها فتحت شعري .. ما احتاج أرتبه بطبيعته ناعم وتموجاته الويفي المتوسطة منطيته شكل مرتب من نفسه
وگفت گدام المرايه ، ابحوش بجنطتي مال المكياج لگيت محدد ككاوي وحمرة مشمشية فاتحه حددت شفايفي ومليت النص بالحمره ورسمتهن ، سحبت عيوني بكحلة خفيفه وحطيت شوية ماسكارا ، توني مشتريتها جديده بعد ما مستخدمتها ما احب المكياج الثگيل ، احب يبين كأن ما حاطة شي
حواجبي مرتبات بطبيعتهن بس سرحتهن بإصبعي لفوك وضليت اباوع لروحي بالمرايه وادندن بأغنية
وارد بشعري يمنى ويسرى ، خففت الحمره بأصابيعي لأن حسيت لونها صار غامج .
فجر من وراي سمعت بس شهگتها
فجر -: يماااه شنو هالجمال؟ .
مليحة -: رفيدا انت اليوم تموتين ، اشتعل صنديد وخلفته .
فجر-: حرامات كل هالجمال لهذا المعوق .
اتشكرتهن بغرور وآني العب بشعري
رفيدا -: ادري ادري .. يلا عزلن الغرفه
فتحت خزانة الأحذية ، وطلت منها حذاء كعب ككاوي بمقدمة مدورة وكعبه متوسط ، لبسته وعدلت التنورة عليه ، بعدها سحبت شال شيفون خفيف بلون بيج فاتح ، حطيته على راسي بخفه وانسدلت اطرافه على چتافي وطلع متناسق ويه القميص الككاوي والتنوره البصليه
لبست تراچي وسوار وگلاده ناعمة على شكل كواكب وگعدت انتظر الشيخ وصنديد يجون .
بعد مدة اندگ الباب و اهاب فتحه نص فتحه ، مد راسه وهمس:
اهاب -: اجه الشيخ وصنديد وياه تحضري راح يجي يعقد .
راح اهاب ، وگلبي وگع من الخوف
دقايق واندگ الباب ، فات صنديد
لابس دشداشة بيضة جديدة ومكوية وعطره يفوح مبتسم من الأذن للأذن بس وجهه رايح بيها .. عينه زرگة ومورمه ، شفته مجروحة ، راسه مضمد ، ايده معلگة على صدره ويعرج من رجله .
وبالرغم من كل هذا مبتسم ويضحك
صنديد -: هلا بولف روحي .. كسروني بس ما گدروا يكسرون حبچ بگلبي .
سحبت الهبري بسرعه وحطيته
على راسي ضمضمت بي شعري كله
تحمحمت لخواتي حتى يطلعن لأن فطسن ضحك على شكله وهوا حس عليهن ، ما اتخيل شكلي شلون صرت من الفشاله من وراهن
فجر طلعت ومليحة وراها من فاتت من ورا صنديد غمته بكل حيلها ورفعت ايدها مثلت كسر ايده عبرت آني متتتت گوه ساكته عضيت شفتي حتى لا
اضحك .
بقينا وحدنا بالغرفه ، تقدم خطوه وصوته طلع ناصي
_ دخيل هالوجه .. شلون تخلين الواحد ما يحبچ ؟ .
ما رديت ، إيدي ترجف على الهبري
گرب شويه ، بس ما لمسني
صنديد -: بعد اسبوع من الخطبة آخذچ كلشي جاهز ، الغرفة والأثاث كملته بس تجهزين ملابسچ .
بلع ريگه وگال بفخر :
صنديد -: مهرچ 10 ملايين ، اتفقنا عليه انا ابوچ والمؤخر ابوچ خلاه 300 مليون بس انا گتله لا ، خليه 500 مليون لأن ما خايف ومتأكد من حبي إلچ .
باوعتله، صوتي رايح :
رفيدا -: ؏ادي .
مد إيده يريد يلزم إيدي ، بس قبضها ورجعها
صنديد -: كلشي بيه يريدچ بس اخاف الله بيچ .. انت النظيفة بنص خراب روحي .
باوعلي آخر نظرة ابتسم رغم الجرح بشفته ، وطلع
وره شوية، اجت امي ، لزمتني من إيدي
نوفة -: تعالي يمه ، الشيخ اجه .
گعدت على كرسي خشب وره الباب ، بنفس الغرفه الباب مفتوح شويه اسمع الصوت من الجهة الثانيه
ريحة البخور طالعه و صوت الشيخ واضح
وهوا يقرأ ، كمل تحمحم وگال
الشيخ -: بسم الله الرحمن الرحيم
سكت شويه ، وبدأ
الشيخ -: على بركة الله .. ابنتي رفيدا شاكر هل تقبلين الزواج من صنديد عبد اللطيف على مهر قدره عشرة ملايين والمؤخر خمسمائة مليون؟ .
ضليت ساكته صافنة بوجه امي
الشيخ عادها مره ثانيه:
الشيخ -: ابنتي رفيدا شاكر .. هل تقبلين؟ اذا قبلتي قولي نعم قبلت .
هم ساكته ، دموعي نزلت بلايه صوت
امي حاضنتني ، تبچي وياي و تهمس بإذني:
نوفة -: سوده عليه يمه سوده عليه شبيدي عليچ .
الشيخ راد يعيدها للمره الثالثهة، بس صنديد قاطعه من الصاله وگال :
صنديد -: شيخ بلش من يمي .. بلش من يمي انا موافق .
الشيخ -: صنديد عبد اللطيف هل تقبل الزواج من رفيدا شاكر على المهر المتفق عليه ؟ .
جاوبه بنبرة متونسه
صنديد -: نعم قبلت .
الشيخ -: مرة ثانيه ؟
صنديد -: قبلت
الشيخ -: ثالثة؟
صنديد -: قبللللت .
ورجع الدور الي
الشيخ -: ابنتي رفيدا هل تقبلين الزواج من صنديد عبداللطيف على المهر المتفقعليه ؟ .
فتحت حلگي توي أريد أگول
"موافقة" ودموعي بعيني..
وفزيت على صوت باب الصالة اندفر
من جهة الشيخ وأبوي وصنديد ..
صوت بنية تصيح يمهم :
_ وينه؟؟ زلمتي الكفووو وينه؟؟ .
شاكر -: شلون تفوتين هيچ ؟ مو عيب عليچ؟ .
صنديد -: شجابچ ولچ؟؟ .
جاوبتهم بصوت عالي رن بالبيت رن
_ اجيت اشوفن ضرتي الجديده .
وگفت على حيلي توي اريد اطلع عليها
والباب اندفر بوجهي وانفتح على عرضه
صارت بوجهي هديل مرته عبايتها كلها تراب و شعرها طالع من الهبري و انفاسها تتلاهث من العصبيه ، عيونها حمر تفحصتني من فوگ ليجوه
رجعت تباوع عليهم واحد واحد ، ع الشيخ ، على ابوي ، علي ، وآخر شي على صنديد
هديل -: اني حامل .. حامل بأبنك صنديييدد شلون تردون تتحملون خطيئة طفل ؟ .
الدم صعد لراسي ، الهبري وگع
من شعري من قوه ما فزيت..
رفيدا -: حامل؟؟ .
الكل سكت وانتبهولي على ردة فعلي القويه
ابوي صرخ وهوا ياشر بأصبعه ع الباب :
شاكر -: اطلعي برااا بيتي اطلععييي شلون تفوتين هيچ؟؟ معقوله همجيه لهالدرجة .
اني تحنطت بس اتفرج ، حتى
النفس نسيت شلون اخذه ..
هديل التفتت على صنديد ، صوتها يرجف :
هديل -: چا طلگني اذا تاخذها .
وهو بدون تفكير صاح عليها
صنديد -: ما اطلگ .. وراويني عرض چتافچ يلاااا .
هديل ضحكت ضحكة مستهزئة التفتت على ابوي ، اشرت بأيدها والحچاية الطلعت من حلگها خلتني انكفخ على وجهي ومن الصدمه راسي ثگل اذاني صارت تصفر ، ما استوعبت السمعته من گالت :
هديل -: چا اذا انطيتوا ابنيتكم لزلمتي ما يطلع اخوي السيد حيدر اذا ماخليته يهز گيعانكم جواكم ويرعد سما الله فوگاكم ...
شكرا لزيارتكم عالم روايات سكيرهوم
