رواية خلخال مشوه الفصل الثالث عشر 13 بقلم زمرده

 

 

 

رواية خلخال مشوه الفصل الثالث عشر بقلم زمرده




لا حضينه ولا نسينه ولا فرحنه
ولا جمعنه الله وبقينه محيرين

عريان السيد خلف

•---∞∞∞∞∞∞∞---•

بركة : من كل عقلهم ياخذون هذا ،شلون گدروله ؟

لزمت ايدها ارجف وفاتحه عيوني واباوع على الغرفة ما مصدگة الشافته عيني ،شخص تارس الكرسي من ضخامته ،گعدته ترهب وچن بيها جاي يحوك لمصايب بس الله اليعلم بيهن
_ ولج امشينه ،امشي بركة

جريتها وهي تريد ترد تباوع وانا اتوسل بيها لا ،لان لو ردت باوعت صدگت راح يشوفها هل مره ونطيح بمصيبه الها أول ما الها تالي

بركة : خايبه شبيج هديني خليني اشوفه

_ شتشوفين يمعوده ،تردين تطيحين حظنه أنت ؟

بركة : شگد جبااانه

_ لا مو جبانه بس اتصرف بعقل مو مثلج

بركة : قصدج انا بلايه عقل ؟

_ جا هاي سوايتج بس البلايه عقل يسووها وبليتيني وياج

بركة : جا شني اجي وحدي ؟

_ لا بس لو حاجيتلي ما جان رضيت لا أنت تجين ولا جان اجيت انا هم وياج

بركة : دسكتي لا تسويها سالفه ،امشينه وراح نرد بعد عليش الحجي

_ والله گلبي لعب فد نوب من جيته وخايفة لو كضونه يطلعون حرگة بيت غازي كلها بينه

مشت گبلي وانا وراها احجي وهي ساكته بس من ملت دنگت للگاع شالت حجاره
بركة : تلصمين لو اطگج بيها

_ طگي عاد اهون من طگهم من راح يضكونه

بركة : لا يااااربي ،لج بس اريد اعرف عمتي شگد مباوعه على البومه من جانت حبله بيج

_ من نرد اسألها شگد مباوعه عليج

ضحكت وركضت من اجت تركض وراي ،ولا ظلمه بالگوه اشوف شجاي ادوس ،راحت روحي من حسيت بشي شلون الگزازه جك رجلي وچن رجلي نملت وصارت حاره ،صحت وگعدت بالگاع لازمتها واللوب ،بالبدايه بركه عبالها جاي اجذب بس من شافتني صدگ متوجعه گعدت گبالي تريد تعرف شبيها رجلي ومن گد ما ظلمه كلشي ما مبين ،گومتني وانا ما اگدر ادوس الگاع ،ومن وصلنه قريب على السياج حطت بلوكه وفوگاها جابت طابوگات سفطتهن حتى نرد ،عبرت گلبي وانا بالگوه عبرت ...

سندتني ومشينه ،وما ضل عدي حيل من شفتهم يفترون وصياحهم گايم ،انداريت الها أرجف
_ واج جنهم يدورونه

وهي وجهه صار اصفر ،حرنه وين نطي وجهنه وما يشوفونه
_ شلون ولج نلگف يعني نلگف

بركة : تعاي نگلهم چنه گاعدين جوه النخله بعيده اكيد ما مدورينه يمها

مشيت وراها اسوي روحي امشي طبيعي گوه على روحي ،ومن دست زايد عليها الوجه زاد ،لزمت ايدها وكملنه طريقنه وانا الرجيف اخذني من شفته واگف والجگاره بأيده وبس شافنه فتح عيونه وصاح
صخر : وييين چنتن ؟

انا عود محتميه ب بركة تالي هي من شافته هيج اندارت تباوعلي تريدني احجي وانا اگرص بيها اريدها هي تحجي انا بساع يلگفني جاي اجذب عاد هي بلكي تعبر عليه

على صوت صيحته كلهم اجو ،جا شني غير دم بعروگي ما ضل
بركة : هناك ،هناك گاعدين النخله لان ضجنه

باوعلها مزغر عيونه ،شمر چگارته وداس عليها ،هز رأسه وگال
صخر : ولان ضايجات تطرن كل هل مسافة حتى تگعدن يم النخله

هزينه رأسنه ب أي بس نريده يقتنع وهو يباوعلنه ما مقتنع بس ماعده دليل علينه
عبد الحق : تعاي بركة

جرها من ايدها وانا ضليت وحدي گبال صخر وگد ما مركز بوجهي حرت وين اطي وجهي من وجهه ،شوي وردتلي بركة جرتني ومشت من گال
عبد الحق : طبن جوه وبعد لو مشيتن منا لهنا بدون ما نعرف رچليجن تنحش

ماعولنه نطب ونخلص منهم ،وانا بس شفت امي مشيت گعدت يمها ماده رجلي اباوع عليها اريد اموت من الوجع وهي وعماتي استلمنه من رزايل وحده تسكت والثانيه تخلص وراها
شيماء : والله مال اگومن احطچن واكتلجن على هاي دگتچن ،والله گلنه اخذوچن وتصخم وجهنه

بركة : شني السالفة يمه هيج متأثره بالهنود

شيماء : انجبي انا گلبي موجر منج ،فوگ النص ساعه يدوروچن وماكو

غضة : عرمات ماشيات الاخير البيت مني گبل مسويتها حتى تسونها أنتن

نجوى : كافي ترزلن بيهن خطية

غضة : خطاهن البين وينهن وين الخطية خلن الولد ما يعرفون دربهم منين

بركة : اثاري ما محترگ گلبج علينا ،كله علمود الولد

غضة : اسكتي أنت
باوعتلي
غضة : وانا اگولن عليج العاقلة ،سوايتج هاي جفون العرمة ما سوتها

بركة : شني جدة وين مشينه اليسمعج يگول طالعين من البيت

باوعتلها مزغره عيوني ،جذبت الجذبه وصدگتها
غضة : جا شحدچن والله اخليهم يكسرون رجليچن

بركة : لا والله شني

غضة : وشنشانه تشنشن ضلوعج

بركة : جده ترا والله انا هم بت أبنج

غضة : جا لو مو بت ابني اخليج تدگين دروب براحتج

بركة : يادروب جده رحمة الابوج هسه يسمعوج عبالهم صدگ داگه دروب

اباوعلهن واحسن بنار تمشي بجسمي ،ماگدرت اسكت بعد ولزمت رجلي ابجي
زهرة : اسم الله شبيج ولج ،غاية يمة شبيها رجلج

بركة : يااا جا غير واحنه گاعدين ما أعرف شني گرصها برجلها

غضة : فلك الفلكجن، وساكتات

بركة : جده هو أنتن تخلن واحد يحجي أول ما طبينه استلمتنه بالرزايل

زهرة : شتحسين ولج يمة

أخذت نفس اريد بس احجي ،احس حتى الهوه صار صعب علي
_ نار يمه برجلي ،احس روحي جاي تطلع من الوجع

زهرة : ولج خاف گارصتج حية لو عگرب

فتحت عيوني خايفة
_ لا يمه

زهرة : أي والله ،امشي جفون صيحيلي صخر

لزمت ايد جفون گبل لا تگوم وباوعت الامي خايفة
_ يا صخر يمه جا غير هسه روحه بخشمه والله يحطني ويكتلني

زهرة : انهجم بيتج يمته طاگج ،بس هو ماعده حظ وهل هيج تشيعن عليه ،امشي جفون صيحي

_ يمه ما شايفته شلون خازرني ضل من شافنه ،والله خلاني انسى عدي رجلين واگدر امشي

زهرة : جا غير تستاهلين حيل وياج

_ هو أنت شوكت تطين بولدج من يوم يومج حتى لو غلط توگفين وياهم

زهرة : راح اسكتلج لان مستخطيتج هسه

ضحكت وضميت ضحكتي من طب صخر ،باوع الامي يسألها
صخر : رايدتني ؟

أشرت علي
زهرة : أي تعال شوف أختك تگول ما أعرف شني گارصها

باوعلي واجه گعد ثاني ركبته گدامي وانا نسيت رجلي وضليت بس اريدنه يگوم راحت روحي والله ضليت اتخيل هسه يجيبني براچدي يطبع وجهي بشالي
صخر : مبين گرصة عگرب ،لبسوها عباتها وانا ماشي اشغل السيارة

أنا دريت عگرب راحت روحي وچن هستوني مگروصه
زهرة : جفون بساع عباتها ،وجيبي عباتي بدربج

مشت ومن ردت اخذت عباتي من ايدها ولبستها واريد اگوم ما اگدر بالگوه ذبيت حيلي على أمي وطلعنا بس شافني گال
صخر : ما حجيتي صار شگد ،هسه السم مشى بجسمج

نشغت خايفة ولزمتني الگحه وهو يباوعلي چن يگلي حل بدون مايحجي
عزيز : اجيبلج ماي ؟

اندارله عاگد حاجبه
صخر : لو تريد جان گالتلي ،تعالن اصعدن

صعدني بالسيارة وانا ميته من الشرگه الشرگتها والاكثر من الخوف ،بس وصلنا للمستشفى طببوني للطؤاري وبس حجيت الاعراض العدي للدكتور
گال
_ هاي لدغة عگرب سام ،لازمها ابره وهم علاج راح اكتبه الكم من بره

كتبولي الدوه ومشى صخر جابة ورد ،ضربوني الابره وگالوا أضل تحت العناية بين ما تخف الأعراض عدي

مددت على الجرباية اباوع بالسگف وامي گعدت گبالي ،درت وجهي عليها من سمعتها تگول
زهرة : بردانه يمه ؟

_ لا بس شوكت نطلع ؟

زهرة : شني هستونه طبينه

_ يمه ما احمل المستشفى ما احبنها

زهرة : أعرف بس احسن تردين للبيت وما نعرف شيصير بيج ساعة الساعة

سكتت لان حجيها صدگ ،شوي وطب صخر جان يخابر بره ،گعد گبالي على الكرسي الثاني يباوعلي ويريد يحجي ويرزل بس يمكن مستخطيني
صخر : گال الدكتور بعد ساعتين نگدر نطلع اذا بادي مفعول الابره

زهرة : بلكت الله لان اخيتك ما تتحمل تضل هواي

صخر : من ايدها غصب تتحمل تضل عسى ما يگولون نضل لباجر

سكتت أمي من حست بي بعده عصبي ،وانا الجان الحايط حجه انا حجيت ،الا ما رايده روحي احجي حتى يطبعني بالسدية هسه ،فززني صوت مبايله يدگ ،مد ايده بجيب البطرون

صخر : الووو ،ها ليث خييير

گام بساع يطلع من الغرفة وانا وأمي ضلينه وحده تصفن بوجه الثانية نريد نعرف شكو ،وهو بس رد مگلوب گلب ومبين اكو مصيبة

زهرة : يمه صخر شكو ؟ شصاير ؟

مسح على شعره بأيده يحاول يهدي روحه
صخر : عزيز طالع وما راد صار فوگ الساعة ،ليث يگول نخابر عليه موبايله يطلع مغلق

لطمت امي وبخوف گالت
زهرة : ولك يمه خاف اخذوه بيت غازي

صخر : جا هو اكو غيرهم ،غاية شلون صرتي ؟

_ أحسن

صخر : جا لبسي عباتج وامشونه نرد

گمت ذابه ثگلي على رجلي الثانية ،لبسيت عباتي ومشيت لازمة أيد امي من مدتها الي ،طلعنا نمشي وراه ،وهو گد ما مستعجل احسه ما يدوس الگاع وما صدگ وصل للسيارة بس شغلها طار للقرية ،بس وصلنا شفتهم كلهم واگفين بره واصواتهم العالية تحجي كبر المصيبة الصايرة ،بس نزلت وطبيت للصالة صارت گدامي حواري تحوس يم الباب بس
شافتني گالت
حواري : عزيز ما شفتي برة ؟

_ لا

سكتت تفرك بأيدها ،وانا بس طبيت للصالة شفت عمة نجوى گاعده وتدعي عزيز يرد سالم وبصفها گاعده عمه شيماء
نجوى : دخيلك ياربي ردلي وليدي سالم ،مو حمل خسارة انا وداعة الحسين

عماتي وجدة وأمي الاجت گعدت بصفها ،كلهن حايرات شيحجن وبيا كلمة يخففن من قلق عمة وهل مرة السالفة مبينة راح تصير وحده بوحده

مشيت لجدة من صاحتني
غضة : تعاي جدة غاية اشوفنج

گعدت بصفها وهي تسأل بي
غضة : شطوج دوه ؟

_ ابره ومسكنات وگالوا اذا صخنت اسوي كمادات

غضة : خوش حتى تبطلين تسترعنين وأنت العاقلة

أبتسمت
_ خوش

مسحت على رأسي بأيدها واندارت تحجي وي عمة نجوى الصارت تبجي من الخوف على عزيز من طب فقار وسألته
نجوى : ما حصلتوه ؟

فقار : لا مشوا كلهم يدوروه وخلونه انا ونوح هنا خاف يصير شي

حاجتها أمي ترديها بس شوي تهده
زهرة : ليش تبجين وتفاولين بالفگر ،يجوز موبايله مابي شحن

غضة : وجدك وين ؟

فقار : گاعد بالديوان

طب نوح گعد على اول باية من الدرج ،شوي وشفته يباوع بصفي ومن درت وجهي اشوف على شنو يباوع جانت جفون گاعده ومبين مطنگره ،انا بساع عرفتها لهسه بعدها مقهوره على كرفس بس يمكن نوح بعده ما يعرف هل ضل مركز عليها يريد يعرف شني سبب هل طنگوره ...

ندستها
_ بعدج ضايجه ؟

باوعتلي ودنگت تباوع بالگاع وبساع عيونها دمعن
جفون : جا انا احس ابني مات

_ الله يعوضج تچيبين غيره

رفعت راسها خزرتني ،شكلها يضحك من تصير عصبية
جفون : تضحكين علي ؟

هزيت رأسي ب لا
_ اريدج تضحكين ،شني هيج ضاله مطنگره وحتى هاده حواري وحدها تصفن

جفون : هدني اعيش حزني

_ حزنج على كرفس الحتى اسمه الله گالبه

جفون : احلى من اسمج راية

_ غاية ،غاية اسمي

جفون : سامعة من واحد يگلولة أنت عندك غاية هاي أنت الغاية

سكتت عنها من بدت تفگ طنگورتها ،كل مره تصنف على اسمي اتعارك وياها بس هسه غلست وگلت على الجايات وهم الوكت مو مناسب

فقار : گوم نوح نطلع شعدنه ضالين هنا

گام نوح وطلعوا هو وفقار وانا ضليت احوس ،شني أول تالي انا گاعده متعلمه احوس ،بياع ضجت واجت على بالي هيوفة ،ما الومها من تگول مليت والله هسه انا المليت وما صارلي ساعة من گعدت هل گعده هي شلون بيها وصارلها فوگ الشهر ما حاطه رجلها بالگاع ودايسه عليها ،گمت بالگوه ادوس اريد امشي للغرفة احس بروحي منعسة

بس طبيت شفتهن نايمات ،هيوفة على فراشها وميمنة نايمة يم راسها ومتغطيه ،وانا منا منعسة وشفت هذن نايمات گبل نزلتلي بطانية ومخده وحطيت روحي يمهن ومددت ،بالي صار يم اصواتهم بره بس ما اگدر اگوم النعاس سيطر علي وغفيت ...

°حواري°

طلعت بالحوش اللوب ،ما اجوي تأخروا وخاف صاير شي ،خاف اخذوا عزيز مثل ما اخذنه واحد من ولدهم وجاي يردوها النا ،افتريت بالحوش والقلق ذابحني ،لا انا الاگدر اهيد ولا اگدر اطب جوه ،كل بالي يمه هسه ،شلون بي ..!

انداريت على صوتها من طلعت من المطبخ تصيح باسمي
بصائر : حواااري ،شعدج هنا ؟

رديت اباوع للباب وانا متانيته شوكت ينفتح ويطبون و وياهم عزيز
_ متانيتهم ،شوكت يردون ؟

بصائر : تعاي طبي جوه يمعوده بارده هنا

_ ما اگدر والله خليني گاعده

اجت گعدت بصفي ،وانا ذيج الاحب احجي احس بروحي ما اعرف شني احجي بهذا الوكت
بصائر : اليشوف مناگرگم يوميا ولا يحسب هلگد تحبي وتخافين عليه

انداريت عليها
_ انا اخواني كلهم احبنهم حتى لو تناگرت وي عزيز بس اضل احبه وهو هم يعيل بي

بصائر : لاحضت هو يحب يلاشيج

هزيت رأسي ب أي وضليت گاعده وهي بصفي تالي ملت ومشت ،وانا ما همني البرد گد ما همتني شوفتهم مو يطبون وهو وياهم ،گمت بساع من انفتح الباب وباوعتلهم ادوره بيناتهم ،تالي من ما شفته باوعت لضيرم الحاني ضهره ويباوعلي عرفني متانيتهم

بخوف سألتهم
_ وين عزيز ؟

تقدم يمشي علي ومن وصل يمي لزمني من ايدي يريد يطببني
ضيرم : يرد عزيز بس تعاي طبي جوه بارده عليج

باوعت بعيونة الكافيات يردن علي ويأكدن كل شي جنت افكر بي ،ورديت سألت اچذب الشافته عيني
_ يعني عزيز وين ؟

رأجس : يمهم ،يم أل عبود

باوعت لجدي وانا لو بيدي هسه اطي الهم ويردولنه عزيز لان هاي جزات أفعال جدي الخلص عمره يحطهم بنص الخطر بدون ما يخاف عليهم ،بدون ما يفكر لا نفگد واحد ثاني ،شگد احب الطلايب وانا مو اقل منهم اهوسلهن وانا بت ،بس هسه بدت تقوى وطلايبهم صارت تخوف وصلت بيهم مرحلة خطف وحرگ والجاي ما يعلم بي غير الله ...! !

طبيت أيدي بايد ضيرم الامي أول ما شافته نضراتها سألنه گبل لسانها على اخونه ،هدني ومشى الامي بس گعد گبالها عرفت عزيز ما رد وياهم

نجوى : ماكو اخيك مووو ،طاح بيها عزيز ولك ضيرم؟

حار شيحجي وي أمي وهي لازمه ايده وتحجي وعيونها نترسن دموع
نجوى : اخذوا عزيز يمهم ،اخذوا ابني ،حاجوني

ألام لو صار بيها هيج موقف اجرئ شخص بالعالم يحير شلون يوگف گدامها ويحجلها ،وأمي من سكوتهم عرفت اخوي ما رد وياهم وصارت تلطم على روحها تلوم بيهم كلهم

نجوى : گنالكم تالي الطلايب هاي مو زينة بس ما بيكم أحد اخذ بحجينه ،مابيكم أحد ستر على هاي الزلم واچفه الشر حتى لا يصير بيهم شي ،هااكم هذا ثاني واااحد نخسره منوره عداوتكم وي بيت غازي الما تفض للممات

گعدت بصفها عمة زهرة وأمي انفجرت عليهم ما خلت شي بگلبها ماحجته
نجوى : اناااا بس يرد عزيز والله اخذ وليداتي واهج من القرررية وگلوا ما گالت

باوعت على جدي مشى للديوانية الجوه لأول مره ما يرد على امي من تحجي ،من مشيته مبينه وهو ساكت مبينه السالفه جبيره هل لحگوه ما يردون يحجون گدامنه وانا ما گدرت اضل ومشيت وراهم حطيت اذني على الباب اسمع عمامي شلون يلومون بجدي والولد ما راضين على حجيهم

محمد : انا گتلكم سلموهم الزلمه وفضوها ،هسه احسن من سووها وحده بوحده

رأجس : لحد الان ماكو دليل يثبت ابنهم عدنه

باقر : جا حتى هم ماعدنه دليل يگول عزيز يمهم

ماحجه جدي لان حس بالگاله أبوي صحيح ،وانا القلق اكل راسي من حجيهم
محمد : خلصته عمرنه نگوب خلونه نستر على هاي كومة الزلم لانخسر واحد بيهم بس أبوي الله يسلمه واحفاده راگعين كلشي نحجي بعرض الحايط وما براسهم غير بس اليصرف الهم

رأجس : محمد لا تدوس بالحجي ،تراني سكتلكم هواي

مشيت للمطبخ بس طبيت طب حق من بره ،دنگت رأسي بساع اريدن اعبر منه واطلع للحوش مختنگه كلش واحس بعيوني يحرگني اريد ابجي من القلق والخوف ،الله يعين گلب اهل اليمنه ،عزيز اختفى ساعات وكل حيل ما ضل عدنه هم شلون ،والمصيبه
جدي مصر ينكر ابنهم عدنه

ضل واگف بالباب وانا عبرت منه ،بس وگفت من سمعته گال
عبد الحق : باچيه ؟

درت وجهي باوعتله ،ساند ضهره على الباب يباوعلي بنضره عكس نضراته الثابته كل مره ،مبين حتى هو قلق على عزيز

بلعت ريگي
_ خايفة على عزيز

درت وجهي اطگطگ بأصابعي من حط عينه بعيني وضل مركز بيهن ،تحركت اريد اطلع بس وگفني مره ثانية من گال
عبد الحق : عيونج لا يتعبن بالبچي ،يرد لا تخافين نطلعه من جوه الگاع

رجف صوتي وانا اگله
_ أن شاء الله

تنهد يباوعلي ومشى من سمع اصواتهم علت ،طلعت گعدت بعتبة باب المطبخ ايدي على خدي وافكر هسه وينه ،وشحاله ،وشني الصار ويا ...!

فزيت بساع اوگف على حيلي من سمعت صياح عمي
محمد : ويييين ماشييين ،بوووية حاجيني شني يجيبون تفگهم ،وين تريد توديهم

طبيت اركض واباوع البنات وعماتي كلهن واگفات وغاية طلعت من الغرفة تركض مبين جانت نايمة وگعدت على صوت الصياح ،وگفت بصف جفون اباوع عليهم باب الديوانيه مفتوح وصياحهم صاير
شعلوه ،مشيت وره امي وعمة زهرة من مشن يمهم

رأجس : يمشون يدگوهم جا نضل هيج گاعدين وعزيز ما نعرف گاعه وين

محمد : جااا نكبرها ما نزغرهاااا ،مو هيج تنحل بوية نوديلهم گوامة ونشوف الحل شني

رأجس : وانا اخلي عزيز يمهم الليله ،افااا وانا جده

محمد : جا من حفيدك هيج مهم عدك عبالك ابن العالم هين عدهم

باقر : نرد ابنهم ويردلنه عزيز

رأجس : ما ارده اذا ما يردولي الگاع

باقر : شني السالفة يابة مو تعرف بيهم راكبين راسهم على الگاع ،خل يردون عزيز والله كريم لسالفة الگاع

رأجس : ماكو انا من زمان رايد اللوي ذراعهم هيج حتى اخذ حگي اليمهم ،عشر دوانم لو ما ردوهن يحلمون اردلهم أبنهم

سمير : جا بوية هسه متفطن بيهن أنت ؟

رأجس : جنت إأجل بيهن ويوم بعد يوم اگولن من يجي وكتهن احجي بيهن وهسه اجه وكتهن وانا ما مطلع ابنهم لوما ردوهن بأسمي

صاح عمي محترگ گلبه
محمد : انا اطيك فلوسهن بس استر علينا يابة

رأجس : جا عبالك انا ميت على الفلوس ،انا اللي حگ وما ارتاح اذا ما طلعته من عيونهم

محمد : وگعهن بوية لخاطر الولد مابينه حيل نخسرهم واحنه هذاك المسجون ما مطلعي

رأجس : مانخسرهم وجانك على عزيز ما اخلي يطول يمهم وحگ الحسين

حاروا شيحجون ويا أبوي وعمامي من گال للولد
رأجس : امشوا دگوهم وردوا ،وعدي حجي الهم وصلوه

والولد ما گالوا باطل وچن ما يسمعون عمامي وأبوي الصيحوا ما راضين على روحتهم ومشوا كل واحد يجيب تفگته ،وبس ردوا و وگفوا محزمين جدي گبالهم يحجي يريدهم
يوصلون اليگولة وضيرم يكتب التهديد على لسانه

رأجس : "لو طر الصبح واليمكم ما رد احسبوا بيوتكم محترگة عليكم"

وبس خلص حجيه گال
رأجس : لفها على حجارة وشمروها عليهم ،وانا لوما نفذوا الگلته بأيدي احرگ بيوتهم

طبگ الورقة ضيرم وگام وصخر واگفلهم اول واحد بس گال جدي امشوا طلعوا كلهم وهل مرة لا عمامي ولا أبوي وياهم لان يعرفون اليردونه بيت غازي وليش سووا هيج ،بس جدي ما يعترف السوا غلط بغلط ...! !

طبيت للصالة ،گعدت صافنة ،هيج البخت يسويها ويرد وياهم بس وين بيت غازي عناد حالهم من
حالنه ،باوعتلها گعدت بصف جده لازمه ايدها ومبين متأذيه

شالت شيلتها تدعي
غضة : دخيلج يا أم الحسن استرينه ،دخيلج احفضلينا وليداتنه ورديلنه عزيز سالم غانم وتكف هل مشاكل

زهرة : والله عمة لو مو يرد تضل هاي طلايبنه يوميا
وابد ما تنحل

غضة : بس گولي يا الله

ضليت گاعده احوس يامن يردهم ،حايره اشيل هم عزيز لو هم المشوا يدگوهم
نجوى : انا حيل ما ضل عدي والله ،ادعلي الله يرده وياهم لان اموت لو ما شفت طوله اليوم

زهرة : گولي يا الله خية يرد والله ،بس هدي روحج لا يصير بيج شي

عمتي تقنع بأمي وهي مبين عليها الخوف بس تحاول ما تخليها تحس بي ،انا اباوع بعيون الكل ،كل وحده بينه گاعده هسه ماكلها القلق متانين يمته يردون على نار ... 


تعليقات