رواية العدم نقطة السواد الفصل الثالث عشر 13 بقلم اسراء

﷽

حتى أعز الناس من طحنا

بهظم جاروا علينا 

​• ━━━━━━━━ ━━━━━━━━ •

الچاي انكب كله على رجلي .. بس والله ما حسيت بحرگته الحرگة وين؟ الحرگة بگلبي..

الكل باوع علي ولميعة وجهها صار اصفر رجفت رررجففف من كيلاس .. خافت تشك ف بسرعة صاحت..

لميعة -: هاي بس الخدامه .. مسودنه عوفيها .

كيلاس رفعت حاجبها.. باوعت على لميعة مستغربة بعدين نزلت عيونها علي اني والاستكانات داير مدايري ، ما بيها شي من الشر بالعكس عيونها بيها خوف علي..

ما تحملت نظراتهم كلهم علي گمت وركضت للمطبخ .. رجلي تحرگني نار بس گلبي يحركني اكثرر..

طبيت للمطبخ وسديت الباب وراي وگعدت بالگاع حضنت رجلي بإيدي وشهگت.. شهگة طلعت من غمج گلبي ودموعي ما تنزل .. والله ماتنزل من الصدمه..

وراها سمعت الباب يندگ

حنين -: رفيدا حبيبتي فتحي الباب فدوه .

ما رديت..

حنين -: فتحي حبيبتي والله رجليچ راح تلتهب .

فتحت الها طبت شافت رجلي و شهگت خايفه ركضت للثلاجة جابت طاسة بيها ثلج ومي..

حنين -: يلا حبيبتي حطي رجليچ بيها فدوه .

حطيتهن والمي البارد لسعني لسعة خلت جسمي كله يرجف بس اني ابچي .. ابچي بسكوت اخاف يسمعوني برا..

حنين گعدت يمي بالگاع لزمت إيدي وهمست

حنين -: رفيدا سامحيني والله أمس ردت احچيلچ.. بس ردتچ تنامين وترتاحين .. امي ما تخلي أحد مرتاح وابو فاضل اذا عرف حيدر هيچ سوت يتسودن .

ضليت ساكته مارديت روحي طالعه عيوني على رجلي الحمره بس عقلي يمها شگد حلوه ..

ومن برا .. سمعت صوت ضحكتها.. ضحكة كيلاس ناعمة أنثوية تخبل دلوعة .. حتى واني بهذا القهر كله طلعت مني بدون إرادة گلت بداخلي فدوه شلون حلوة ضحكتها .

بقينا شويه اني و حنين گاعدين .. مسحت دموعي وگمت رجلي بعدها تحرگني وگمت اعرج.. حنين سندتني وطلعنه..

أول ما طلعت من الباب عيوني اجت بعيونها

چانت واگفه تنتظرني من شافتني اعرج اجتي علي.. ريحتها تخبل عطرها ناعم مثلها.. وگالت بصوتها الدلوع

_ حبيبتي رجلچ شلونها هسه ؟ ان شاء الله ما انحركتي هوايه ؟ .

مدت إيدها لزمت إيدي تريد تگعدني ع القنفه

و ام حيدر من وراها نطتني نظرة .. نظرة تهديد معناها " سدي حلگچ لا تحچين شي "..

گعدتني على طرف القنفه وهيه گعدت يمي قريبة هواي وصارت تحچي بهمس فرحانه مثل الطفلة اللي تحچي عن لعبتها الجديدة..

كيلاس -: تدرين؟ آنا من شفت حيدر اول مراا حبيته والله حبيته من كل گلبي هوا آنا احبه من الطفوله وهوا هم يحبني .

گلبي انعصر عصر ردت ابچي عضيت على شفتي حتى لا ابچي گدامها وهيه عبالها دا ابچي من وجع رجلي .. لزمت إيدي وضمتها بأيدها ..

كيلاس -: لا تبچين حبيبتي فدوه لا تبچين هسه يطيب .

طلعت تلفونها فتحته وطلعت صوره مدت التلفون گدام وجهي..

كيلاس -: شوفي هاي انا وياه مو لايگين لبعض؟ .

باوعت للصورة هزيت الها براسي وبقيت صافنه بيها دمعتي وگفت على رمش عيني ..

هيه رجعت تباوع ع الصوره وتبتسم بدلع وتعض على شفتها من الخجل..

كيلاس -: تدرين .. هاي الصورة أخذتها خاله لميعة غصب .. آنا كنت مستحيه بس هو ما رفض شوفي ضحكته تخبل مو ؟ .

ما رديت بلعت ريگي ، ريگي ناشف..

هيه عبالها ما اسمعها مالت علي اكثر وهمست..

كيلاس -: آنا اعرف .. اعرف راح تگولين علي مسودنه لأن اشوفچ بصورنه .. بس والله ما اگدر من گالتلي ماما لميعة ابني يريدچ گلبي طفر من مكانه .

هزيت الها براسي و دمعتي طفرت من عيني

سدت التلفون وخلته ع القنفه وراها ونزلت لمست الحرگ .. فزيت من الوجع وناشغت

كيلاس -: اووي اسفه بعدها تحرگچ ؟ .

هزت راسي ب اي

بدون ما استأذنت راحت ركض للمطبخ سمعت صوت الثلاجة تنفتح رجعت بسرعة بإيدها شويه ثلج بقطعة قماش..

كيلاس -: جيبي رجلج .. خلي احطلچ آنا كلش اعرف بهالسوالف .

لميعة من بعيد عينها علينا ما عجبها صاحت..

لميعة -: كيلاس حبيبتي عوفيها هاي متعوده انت تعالي گعدي .

كيلاس-: لا ماما لميعة خطيه رجلها تأذيها شلون راح تنام بليل .

نزلت بالگاع يمي وحطت الثلج على رجلي بإيدها الناعمه..

لميعة-: كيلاس امي تعالي گلت .

كيلاس -: خطية ماما لميعة البنيه انحرگت بسببي .

گالت "بسببي" واني صرت ابچي اقوه وگلبي انعصر عصر ، رجعت كملت وهي تخلي الثلج على رجلي:

_ خطيه من شفتيني فزيتي و طاح على رجليچ الچاي انا اسفه ياروحي .

لميعة گامت واجت سحبتها من ايدها

لميعة -: كيلاس حبيبتي تعاي .. تعاي گعدي يمي عوفيها هاي متعوده .

كيلاس باوعت علي .. عيونها الزرگ تجنن ما رادت تگوم وتعوفني

كيلاس -: بس ماما لميعة خطية رجلها انحرگت..

لميعة جرتها بقوه .. وتضحك بوجها تجاملها

لميعة -: عوفيها حنين تحطلها دوه انت عروسة ما يصير تگعدين بالگاع حبيبتي انت تعاي .

أخذتها وگعدتها بنص المجلس ع القنفة وكل النسوان التمن عليها وحدة تگرص خدها وترجع تبوس اصابعها وحدة تگول "ما شاء الله تخبل "..

وحنين گاعده يمي بالگاع تحطلي ثلج بقطعة قماش وتهمس..

حنين -: تحملي حبيبتي الله يخليچ تحملي .

رفعت راسي عيوني اجت بعيون كيلاس چانت تباوع علي من بعيد وتبتسملي عبالها آني صدگ خدامه مثل ما گالت لميعة..

نزلت راسي بسرعه ما گدرت اباوع بعيونها حلگي ناشف ورجلي تحرگني نار

سمعتها تحچي ويا لميعة صوتها الدلوع يترس الصاله

كيلاس -: ماما لميعة حيادر وين؟ ما شفته من اجيت .

لميعة ضحكت بصوت عالي متعمده تسمعني

لميعة -: برا حبيبتي برا بالموكب .

كيلاس عضت على شفتها من الخجل

واحمرت .. خدودها صارن ورديات..

ضليت اباوع عليها شلون حلوه و بريئه شلون تحب واحد هوا بالأساس تزوجني؟ بس والله حتى واني بهذا القهر كله ما گدرت أكرهها حاولت والله حاولت اضمها عضيت على شفتي صميت حلگي بإيدي بس ما گدرت شهگتي طلعت من غمج گلبي عاليه مو بإيدي وكل النسوان التفتن علي مرة وحدة حتى الملايه سكتت

كيلاس فزت من مكانها وعيونها علي صارت ..

كيلاس -: شبيها ؟ ليش تبچي يروحي ؟ .

لميعة بسرعة لزمتها من إيدها ورجعتها..

لميعة -: لا حبيبتي لا عوفيها هاي شويه حساسه تبچي على كلشي .. تعاي گعدي .

عيوني غوشت وتذكرت ..

تذكرت من چان يجي بالهمر بدربونتنا ومن جان يطبگ يالشارع وينتظرني أطلع من المدرسة

و من سوى روحه أبو موطة علمودي .. يبيع موطة گدام بيتنه بس حتى يشوفني..

ما تحملت شهگتي الثانية طلعت أعلى وصرت ابچي بصوت عالي ابچي مثل الجهال ما استحي بعد..

كيلاس ما تحملت عيونها دمعن رادت تجيني

كيلاس -: خطيه ليش تبچي فدوه سكتوها گلبي ميتحمل هيچ .

لميعة صاحت بيها..

لميعة -: كيلاس گعدي امي شلج غرض بيها .

التفتت على حنين لزمت إيدها وگتلها بصوت يرجف

رفيدا -: حنين اخذيني للغرفه عفيه اخذيني .

حنين -: رفيدا شويه اصبري خليني..

صحت بيها من كل گلبي

رفيدا -: اخذينيييي .. دا اگلچ اخذينيييي .

سكتت الصالة كلها حنين لزمتني من إيدي وگومتني اعرج منها رجلي ما شايلتني و دشداشتي طويله تسحل وراي

صعدتني الدرج وورانا لميعة تصيح ع النسوان..

لميعة -: يلا استعجلن حضرن المواعين للغدا وملاية عيني كملي قرايه .

الملاية رجعت تقرا بس صوتها عالي هالمره تريد تغطي على صوت بچيي..

فوتتني حنين للغرفة وسدت الباب

لزمتني من چتافي وگعدتني ع الجرباية..

حنين -: شلونچ؟ انت بخير نواعس؟ فدوه لا تبچين هيچ .

ما رديت.. بقيت ابچي بصوت عالي مثل الجهال شهگاتي ترج المكان..

رفيدا -: اريد مامااا اريد خواتييي اريد ارجع لبيتنااا ما اريد اضل هنااا انتو ظلااام ظلمتوني اخوووچ ظلمنييي .

گعدت يمي ولزمت ايدي تمسح عليها

حنين -: نواعس حبيبتي سمعيني والله حيادر مو..

قاطعتها رفعت اصبعي بوجهها وصحت بحرگة گلب

رفيدا -: اخوچ مو بس استغلني خلاني انزل ضرة على راس بنية حبابه وطيوبه .. شفتيها شلون حلوة؟ شلون طيوبه ؟ شلون تبتسملي وخايفه علي ؟ خلاني ضررررة عليهاااا .

لزمت ايدي الثانيه وسحبت ايدي منها بقوه واني مستمره ابجي واناشغ بصوت عالي..

حنين -: ما اگدر احچي شي إلچ حيادر هوا يتصرف آنه هسه اوديله خبر .. والله اوديله .

إنفجرت بيها من صدگ..

رفيدا -: ما يهمنيي لا هوا ولا مرته ولا وين يريد يروووح .. حسبي الله ونعم الوكيل عليه إبن الروسية .

طبگت حاجبها

حنين -: ابن منو ؟ .

رفيدا -: ايييي .. عيونه زرگ ابن روووسيةة .

ما تحملت وگعت ع جربايه من الضحك

حنين-: مسودنه انت .

رفيدا -: بسبب اخوچ .. بسبب اخوچ صرت مسودنه على گولتكم .

وضربتها على چتفها وهيه تضحك.. واني ابچي واضحك بنفس الوقت .. مادري شنو هذا الديصير ويايه

صاحوا من جوه على حنين

_ حنينة .. حنونه تعاي ساعدينه .

حنين باوعت للباب ورجعت

باوعتلي ، مسحت دموعي بإيدها

حنين -: نواعس لازم أنزل لميعة إذا ما نزلت تسوي ليلتي سوده .

گامت جابتلي مي شىربتني وحطت الگلاص گالت وهي طالعه:

_ انت نامي ارتاحي لا تبقين تبچين انه اخابر حيادر .. تمام ؟ .

ما رديت.. طلعت وسدت الباب وراها

الغرفة هدوء .. بس صوت الملاية من جوه بعده يوصل خفيف شمرت الهبري ت حطيت راسي ع المخده واشتغل التفكير ..

هسه أهلي شحالهم بدوني ؟ ابوي هم يشتاگلي لو نساني؟ اخواني من رجعوا ومالگوني شسووا؟ صارلي يومين .. يومين بس حسيتهن عمر ، بطني تقرقر من البارحة ما ماكله بس نفسي مسدوده حتى ريحة الأكل ما اريدها..

جريت اللحاف وتغطيت .. ريحته بخور تجنن ، تغطيت بي لحد راسي .. غفيت بسرعه من التعب ومن الصدمات ومن كلشي صار ويايه .. ما حسيت بشي عبالك ميته جسمي ثگيل وراسي ثگيل من التفكير والبچي

ما ادري شكد مر وقت بس كلشي هدوء براسي حتى الملاية سكتت جوه وفجأة.. فزيت على دگة خفيفه ع الباب..

حيدر الكرار -: علويه ؟ علويه تسمعيني ؟ .

ما جاوبته .. رجعت راسي ع المخده شعري مخربط وعيوني وارمة من البچي .

حيدر -: علويه .. گاعده ؟ بس چلمتين وياج واروحن .

وراها سمعت صوت لميعة من غرفتها اللي صايره گبال غرفة حنين .. صوتها يلعلع..

لميعة -: ولك حويدر شتصيحلها علويه؟ هاي علويه ؟ ولك عايف كيلاس اللي مثل الورده المفتحه وميت على هاااييي ؟؟ .

حيدر الكرار -: يممممه لا تقارنين ماكو احد احسن من احد .. كل وحده والها احترامها لا تقللين من وحدة على حساب الثانيه .

لميعة -: ذيچ إختياري .. وابو فاضل اسويها وليه ولك خايب حويدر هاي ما تصير علويه لو تنطبگ السما ع الگاع .

طفرت روحي گمت من الفراش رجلي بعدها تحرگني رحت فتحت الباب بس حتى اخلص منه

فتحته و صار بوجهي لابس دشداشته السودا والچراويه الخضره لافها على راسه مثل اهل الجنوب عاكسة على عيونه .. عيونه الصايرات زمردي هسه

صفن بعيوني وضل متصنم بالباب

همست وگلبي محترگ..

رفيدا -: شايف من تگول على شي سبحان الخالق شلون حلو .. وبعدين من تعرفه على حقيقته تگول سبحان المغير ؟ انت هيچي .. اول مره شفتك گلت سبحان الخالق وهسه اگول سبحان المغير شلون گدرت تتغير من ملاك لشيطان بعيوني ؟ .

تجاهل كلامي فات جوه .. وطبگ الباب حيل وقفله .. اتخبلت عقلي شطح لأن قفله

رفيدا -: شكو سديت الباب؟ شكوووو .. اطلعععع .

رفع ايديه يهدي بيه

_ علويه فدوه سمعيني .. بس سمعيني انه ..

رفيدا -: شنو اسمععع؟؟ نزلتني على ضررررة يا چذااااب يا چذاببب .

صرت اصيح و اضربه بأيدي على صدره

ورا الباب امه تسمع صياحي وترد..

لميعة -: ايييي سمعي ولچ ضرة ضرة وغصبا عليچ منو انت حتى يحسبلچ حساب ؟ إضربها وليدي حويدر اضربها ولك خلها تتربى خل اسمع ونينها يمه حويدر .

ما سمعها محترگ گلبه يريد يمد إيده لچتافي يثبتني ويرجعها مستحي

حيدر -: علويه سمعيني والله كيلاس..

رفيدا -: لا تگووول اسمهاااا گداااميييي .. لا تگووووله

ابچي واعيط .. وهو يباوع علي فجأة نزل نظرة على رجلي ونزلت نظري وياه شفت الچوية كلها صايره دماميل چبيره وشايلة مي.. وجهه انخطف ونزل على ركبة گبالي..

_ هاي شنووو؟ ولچ شوكت احترگتي ؟ ليش ما گلتي ولچ رجلچ .. رجلچ محترررگه شلون ساكته ؟ شلوووون ؟ .

امه تصيح تخبلت من ورا الباب لأن سمعته خايف علي ، هوا متجاهلها وعيونه متوسعه على رجلي وروحه شايطه من القهر

رفيدا -: مم.. ما ادري نمت عبالي ما يصير هيچ .

گام على حيله لزمني من چتافي وگعدني ع جريايه

_ گعدي گعدي علويه .

گعدت وهوا لزم رجلي من المداس من جوه راد يطخ الدمل ورجع عض إصبعه گلبه شاط عطب من منظرهن ضرب على رجله..

حيدر الكرار -: شلون هيچ بويه ؟ غير تنتبهين علويه غيرررر تگولييين ؟؟؟؟ .

أمه ورا الباب لهسه تصيح تخبلت لأن رجع گال علويه..

لميعة -: علويه ؟ بعدك تگول علويه ؟ ولك هاي لو علوية آنه سيد عگاب .

هوا ما يسمعها .. راح فتح كناتير حنين نثرهن نثر يفتح بالجرارات ويشلخ بيهن لگه لفافه و إجه گعد گدام رجلي بالگاع ركز برجلي ضل صافن بيها ايده ترجف وما يعرف منين يبدي.. يريد يلزمها وخايف تلچمني يباوع ع الحرگ ويباوع بوجهي حاير شيسوي .. اخر شي تاه ضرب على گصته بكل حيله ..

حيدر الكرار -: ملح وماااي .. حنيييينة ملحححح .

ما صبر انخبص خبص عاف اللفافة يمي وفتح الباب ونزل ع سريع عرگه يصب من گصته .

باب الغرفة ضل مفتوح وامه واگفه متخوصره باوعتلي رافعة حاجبها وفرت إيدها..

لميعة -: استلممم خدام الحرمين صار يداوي جروح زعطوطه لو آنه متت ما ركضلي هيچ .. حسبالك انجرحت بمعركة احد .

مغوار اجه وگف بصف امه شايل بأيده

كوب چاي وبالأيد الثانيه كيكه ياكل بيها

مغوار _ ها يمه شكو ؟ .

لميعة _ اخوك نزل يجيب ملح للعلوية مالته .

باوع لرجلي ورجع باوع ل امه ، حچه متعمد يستفزها

مغوار _ بووويه عاينيله شلون نزل حتى ما شافني حسبالك بيته محترگ .

لميعة -: خايب ولك مغوار تريد تجلطني؟؟؟ .

غص بالچاي والكيك تطشر من

حلگه وصار يگح من الضحك

مغوار -: يمه هو انت انجلطتي من هسه چا من يجي ويگعد يم رجلها ويداوي بيها شتسوين ؟ .

امه تخبلت ضلت تگمز وتلعلع بمكانها وتحچي نوب على حيدر نوب علي وهيه تتوعد الي .

تجاهلتها بس ابچي من حرگ رجلي ما ادري ليش هسه صارن يوجعني يمكن لأن شفتهن

مغوار راح ميت ضحك و امه فاتت ورفعت اصبعها بوجهي..

لميعة -: سمعي ولچ خايبه آنه أعرف نوعيتچ شنهي كضي روحچ عن الزلمه ولا تفكرين ناسيه سالفة شرفچ يا بايعه .

اجه حيدر بإيده طاسة بيها ماي وملح .. سمعها بس سوه روحه ما سمع شي ، فات من يمها طخ چتفه بچتفها واجه نزل يمي بالگاع

حيدر -: طلعي وعوفي البت مو وكتچ هساع حجيييه .. طلعييي .

اتخبلت .. شافته شلون دنگ گدامي وحط رجلي بطاسة الماي والملح ويغسلها بإيده وينفخ عليها..

حيدر -: يمه شفتي شصار بيها؟ ليش خليتيها تشتغل والبيت متروس نسوان ؟ .

لميعة -: ولك حويدر صارلها يومين بالبيت صرت محامي الها ؟ صرت تصيح علي على مودها ولك اني اميمتك يخايب .

اني مصدومه صدمة عمري إيديه باردة لازمه رجلي وعيونه الزمردية كل شويه يباوعن بيه يريد يطمن اني بخير ويرجع وينفخ على حرگي

طفرت روحه من أمه لزمها من إيدها وطلعها برا

حيدر -: يلا حچية يلا .. فدوه روحي لغرفتج بعدين نسولف .

لميعة -: اي اييي طلعني طلع امك علمودها ولك آنه لميعة.. آنه اللي جبتك للدنيا وكبرتك و..

سد الباب وقفله قبل لا تكمل

اني گلبي وگف .. ليش قفله؟..

رفيدا -: ليش قفلت الباب ؟ .

ما جاوبني اجه يمي.. دنگ مره ثانيه اريد اسحب رجلي من الماي واغطيها..

رفيدا -: ماله داعي..

رجع أخذها وحطها بالملح

حيدر الكرار -: الا اله داعي لا تضلين عنوديه هالراس لا يعاند .

سكتت وهوا ينفخ على رجلي عرگ گصته يصب كل شوية يمسحه بإيده ويلوم بيه..

حيدر -: ليش إشتغلتي؟ منو گالچ تشتغلين؟ چا انه ليش موصي حنينة .

ضليت ساكته ثواني ورفع راسه ملاحظ سكوتي عيونه بعيوني و همس:

_ تأذيچ ؟ .

رفيدا -: گلبي اليأذيني .. گلبي .

_ ليش؟ احد غثچ بشي؟ گليلي اندمهم والله .

_ انت متزوج ؟ .

_ دخيل الله سمعي مني وبعدين احكمي .

رفيدا -: جاوبنييي كيلاس مرتك؟؟ اليوم اجتي والچاي وگع من إيدي من امك گالت هلا بمرية السيد حيدر هلا بكيلاس .

گام من الگاع اجه گعد بصفي وخله بيناتنا مسافه ومبتسم بطرف شفته .. متونس عباله غرت ابن الروسية

_ كيلاس مو مرتي هي بس الوالدة خاطبتها ليه يعني خطبة اهل ، ماكو بيناتنه شي رسمي .

هناااا اتفشلت فشلة مو طبيعية حسيت وجهي صار نار يبووو هسه عباله اغار عليه..

رفيدا -: وليش تحچيلي؟ آني ما يهمني .

حيدر -: چا غير انت محترگة من طاريها .

رفيدا -: آنيييي؟؟؟؟ عشتوووو وليش احترگ من طاريها أستاذ حيدررر؟ انت ومرتك بستين داهية ما تهموني .

ابتسم .. ونزل عيونه على رجلي مره ثانيه..

حيدر -: قصدي رجلچ محترگة علويه مو انت .

هناااااا اتفشلت فشلة اكبر عبالي يقصد محترگه يعني غيرانه

رفيدا -: ها.. اي اي.. ادري .

ضليت امتمت وابلع بريگي وهوا يضحك اول مرة اشوفه يضحك هيچ من اول ما اجينه ، حس بفشلتي واستغلها صار متلاعب..

ضل يباوع على رجلي وبعدين رفع عيونه باوع بعيوني مباشرة وگال

_ بس .. كيلاس حلوة مو ؟ .

متتت نرفزني..

رفيدا -: اي حلوة .

حيدر -: عيونها حلوه .. بس انت عيونچ احلى .

رفيدا -: ما يهمني .

حيدر -: وشعرها اشگر وطويل انت شايفته ؟ .

سكتت وتعمدت اكابر حييل..

حيدر -: والوالدة تحبها تگول تخبل مؤدبة ومعدلة .

ما تحملت لزمت المخده وضربته بيها

ضحك وشمر المخده على صفحة ..

رفيدا -: كافي ابن الروسية .

اول ما سمعها عيونه ذبلت

وبلع ريگه.. ابتسامته انمحت..

_ شگلتي ؟ .

_ ابن الروسية .

استدار بكل جسمه علي قرب شويه و صوته طلع ناصي بي بحة

حيدر -: عيديها .

رفيدا -: ابن الروسية .

حيدر -: بعد .. دخيل الله بعد هالمره طوليها .

رفيدا -: ابن الروووسيييةةة ابو عيون شيرازية ما تنبلع .

ضحك و رجع دنگ يشوف رجلي

دردم بينه وبين روحه :

_ دخيل ربج .. دخيل الجابچ بدربي و دوخني .

استحيت وجهي بوخ .. سحبت رجلي من ايده..

رفيدا -: عوف رجلي .

لزمها مره ثانية و ثبتها بالمي والملح..

حيدر -: لا خليچ .. دا اعاين اذا بعد تغارين لو لا .

رفيدا -: ما اغااارر .. ولك آني شعلية بيك وبكيلاس انتو السادة تحبون الحلوات .

باوعلي .. وإبتسم تك خد ..

_ آنه ما احبن الحلوات .. آنه هايم بالعيون الدايخه .. النعسانة .

جاوبته بثول..

رفيدا -: اهاا.. يعني تحب عيون البنات اليتعاطن ؟ .

_ لا.. احبن عيون من كد ما نعسانه تخلي الواحد يتمنى يسهر يعاين عليها .. مثل ذني بالضبط

( ورفع حواجبه يأشر على عيونه)

_ اهاا يعني انت ما تنام الليل تحب السهر ؟؟ .

غمض عيونه بنفاذ صبر .. مأيس مني..

حيدر -: علويه .

رفيدا -: ها؟ .

_ شبيچ بويه؟؟ .

_ ها؟ شنو؟ .

_ ثولة انت ؟ .

_ لا مو ثولة .

_ الا ثولة ونص .

سكت شويه ورجع يتلاعب..

حيدر -: زين اذا ما تغارين ليش ايدچ ترجف من سمعتي اسمها ؟ .

رفيدا -: ما رجفت .

لزم اصبعي ورفعه .. من صدگ ترجف..

حيدر -: هاي شنو ؟ هزة ارضية ؟ .

سحبت إيدي منه وجريت اللحاف

لفيت روحي بي ، غطيت حتى راسي

رفيدا -: من البرد .

حيدر -: برد ؟ وانت متغطيه باللحاف ؟ .

رفيدا -: اي بارده .

ضحك وراح فتح الباب باوع منه يشوف خما اكو احد وبس طبگه بدون لا يقفله واجه گعد بصفي ، ترك مسافه بيناتنه ، عيونه على رجلي

حيدر -: اگول .

رفيدا -: ها؟ .

_ اذا اجت كيلاس وصارت مرتي صدگ شتسوين ؟ .

_ شسوي؟ ما اسوي شي اهلهل الكم الف مبروك .

_تهلهلين؟ .

_ اي .

حيدر -: چذابة تبچين ويحترگ گلبچ .

رفيدا -: ما ابچي .

حيدر -: الا تبچين .

ضحكت بعلو صوتي متقصده استفزه

رفيدا -: لا صدگ شبيك؟ قابل راح أموت؟؟ .

عيونه تباوعلي وتحچي بمكان

لسانه .. وگال بصوت مكسور :

_ براحتج هلهلي چا .. من هساع تعلمي التهلهل .

سكتنا اثنينه وهوا يباوع للفراغ وجهه صار اسود بعد ما گتله قابل راح اموت ، گطع هدوئنه المفتاح وهوا يفتر بالباب وصوت امه من ورا الباب اجانه..

لميعة -: باجر يا حويدر اذا فتحت الباب وما لگيت دم زواجك منها فلا يطلع اسمي لميعة إذا ما ألم خوالك واعمامك عليها وأخليهم يطلعون حيف گلبي بيها .

حيدر گمز للباب وصار يضرب بي..

حيدر -: يمه فتحي الباب يمممةةة عيييب البت بعدها زغيره حرام يمه حرااام على الأقل خليها تبلغ بعدها زغيره .

لميعة من ورا الباب..

لميعة -: خايب ولك حويدر شوكت تبلغ؟ 6 سنين؟ لوكتها ما اضمن نفسي اضل عدلة حتى أطيح حظها إذا طلعت مو بت بيت .

اتخبل وجهه صار احمر من العصبية..

حيدر -: يمه لا تحچين هيچ بعدها زغيره وبريئة ماتعرف بهسوالف لا تخليني اتسودن وفقد اعصابي .. فتحيييي المهجوم .

تجاهلته وراحت صوتها صار يبتعد..

لميعة -: يلا ولك حويدر الصبح اريدن دم لا اسوي دمها بطولها بعلي .

ضل يضرب بالباب ويصيح ومن اختفى صوتها مل وإلتفت مجتف إيديه على صدره عاض شفته السفليه ويفكر عينه علي..

سحبت رجلي من الملح ولفيتها باللفاف وتربعت ع الجربايه لازمة اللحاف على صدري

رفيدا -: و.. وين راح تنام ؟ .

حيدر -: انه انامن بالگاع وانت نامي ع الجربايه .

رفيدا -: اطيح حظك والله أطيح حظككك اذا تقترب .

تقدم عليه بكل هدوء خطواته قاصدتني.. رجعت ليورا ورجعت ورجعت لما حسيت ظهري لزگ على تاج الچربايه

گعد گدامي ايد حطها منا على تاج الچربايه وايد منا حاوطني وقرب وجهه مني عيونه الزرگ تاكل بملامحي بشفايفي بعيوني الوارمه بگذلتي الطالعة من الشال ونازلة على وجناتي ، عطره غريب اول مره اشمه واصل لخشمي.. حچه بصوت ناصي ومتلاعب

_ ليش ترجفين؟ مو قبل شويه گلتي ابن الروسية؟ وين راح هالحچي ؟ .

رفيدا -: اب.. ابتعد .

حيدر -: ما ابتعد هذا بيتي وانت مرتي مو؟ لو نسيتي ؟ .

رفيدا -: لا مو مرتك .. آني مو مرتك .

قرب اكثر .. حسيت انفاسه حاره على وجهي

حيدر -: چا شنهو علويه ؟ .

رفيدا -: دا.. دا اگول ابتعد .

حيدر -: الحجيه گالت الصبح تريد دم .. شأگول الها آنه باچر ؟ .

وجهي صار اصفر من الخرعه ..

رفيدا -: بالقرآن هسه اصيح .

حيدر -: اششش اهل البيت كلهم جوا تردين لميعة ترد مره ثانيه ؟ .

وابتسم بمكر وسرعان ما محاها

توا اريد احچي وقاطعني بصوت متلاعب

_ اگلچ اذا اريد اسدن حلگچ شلون اسده؟ .

رفعت ايدي اريد اضربه لزمها بسرعه..

رفيدا -: عوف ايدي ابن الروسية .

حيدر -: دا اسئلچ جاوبيني .

قربت وجهي منه غصب .. لأن ماكو مكان وراي ارجع بعد..

رفيدا -: شلون تسده ؟ .

عينه مرت على شفايفي ورجعت استقرت بعيوني واردف .. عيونه تلمع بمكر واضح

_ اكو طريقتين .

_ شنو ؟ .

_ وحده طويله تملين منها وحده قصيره تخليچ تستحين تعاينين بوجهي بعد .

_ الله ، اريد القصيره لأن ماريد اباوع بوجهك بعد .

_ القصيرة تبدي منا ( مرر عينه على شفايفي ببطئ) وتنتهي منا .. و غمزلي .

متت بدمي مالحگت اجاوبه و همس بتلاعب

_ اختاري بساع لان انه اذا اختار .. اختار الثانيه .

انصدمت فتحت عيوني على وسعهن

رفيدا -: نععممم ؟؟ .

مات من الضحك عافني وگام يضحك على شكلي

رفيدا -: اي اختارها وشوف شلون اخليك انت الي تستحي تباوع بوجهي بعد! .

حيدر -: هيج احسنلچ؟ ما تجرين عدل الا اذا هددتچ .

ضربته بالمخده ولزمها قبل لا توكع بي

رفيدا_ ادبسزز .

وگف مركز بهدومي وحچه وهوا يكح من الضحك

حيدر -: شني هاي اللابستها ولچ ؟ دشداشة امي شني ؟ شو تسحل وراچ .

باوعت على روحي صدگ طويلة عليه واصله مغطيه حتى رجلي

راح گعد بالكاع وسحب نفاضة من جوا الجربايه

ورث جگاره وخلاها بين شفايفه

سحبت الغطوه تغطيت لحد خشمي و بس عيوني طالعة ضليت اباوع عليه خازرته

_ نامي شبيچ خازرتني بهالعيون ؟ بعلي ما اجيسچ بس لا تضلين تعاينين هيچ ترا انه هم بشر مو حايط .

غمزلي وضحك.. شهگت وسحبت الغطا غطيت حتى عيوني هالمره

رفيدا-: نااممم .

رفعت الغطه شويه و شفته اخذ مخده وتمدد بالگاع ع الزوليه مخلي ايديه جوا راسه ويباوع للسگف

_ حاضر علويه انامن بالگاع بس تدرين ؟ .

_ شنو ؟ .

_ هاي اول مرة واحد ينام بالگاع وهو فرحان .

ماگدرت الزم روحي ما اضحك

وهمهمت بصوت ناصي حييل

_ سامعچ الچذابه دتضحكين بس تدرين ؟ هاي الزوليه ارحم منج ع الاقل ما تخزرني .

_ شتريد ؟ اضحك بوجهك يالچذاب يلا صد ليغاد لا تباوع .

_ دا احاول ما اعاين .. بس انت كل شويه تطلعين راسچ مثل الجريذيه .

رجعت غطيت وجهي كله باللحاف حتى لا يشوفني اضحك

_ لا تغطين وجهچ كله اخافن تختنگين واتورط بيچ .

سكتت ما جاوبته وبديت ارجع بذاكرتي

شلون چان يجي لبيتنا ويدورني وللمدرسه

يفتشها ويكتل ب صنديد علمودي ، تذكرت

كلشي للحضة ما انكشف المستور واجيت

هنا .. وخرت الغطه عني وهمست بحسره

رفيدا -: مرتاح ابن الروسيه ؟ .

حيدر -: شكو ؟ .

رفيدا -: نسيت شسويت بيه؟ نسيت شلون خربت سمعتي حتى بس لا انزل ضرة على اختك ؟ .

گعد على حيله و وجهه تغير..

رفيدا -: هسه مسوي روحك حباب؟ مو انت اللي دمرت حياتي؟ مو انت اللي خليت ابوي يتبره مني؟ مو انت اللي خليتني اتبره من اهلي؟؟ .

حيدر -: علويه..

رفيدا -: لا علويه ولا هم يحزنون انت ما رحمتني استغليتني علمود اختك .

طلع الباكيت من جيبه و ورث جگاره وشال سبحته العقيق بإيده يسبح بيها وراسه بالگاع ..

حيدر -: شذكرچ ؟..

رفيدا -: ما نسيت حتى اتذكر انت ما رحمتني استغليتني .

اخذ نفس من الجگاره ونفخه ع السگف .

_ استغلچ؟ .

_ اي .

_ لو اريد استغلچ چان هساع ما نايم بالگاع چان نايم يمچ بس آنه ما سويت شي علمود اختي .

_ لعد علمود شنو ؟ .

سكت.. يسبح بالسبحه

حيدر الكرار -: علمود..

رفيدا -: علمود شنو؟ احچيييي .

گام من الگاع راح للشباك فتحه شويه و الهوا دخل بارد وعطره رجعلي شميته

حيدر الكرار -: علويه ؟ .

رفيدا -: ها ؟ .

_ تدرين انه شگد صارلي ما نايم عدل ؟ .

_ شگد ؟ .

_ من شفت ذيچ العيون محاوطها السواد .

رفيدا -: منو ؟؟ .

حيدر الكرار -:

والعين إن كحلت سبت قلب الفتى

وما كنت أدري أن الكحل قاتلي .

خجلت وجهي بوخ و جسمي رجف ، عضيت شفتي وانه اباوع له وهوا واگف وايديه ضهره اجه ابالي من شفته بسوگ مريدي بذاك اليوم .. وقبل لا الملم بقايا روحي .. همس بيقين :

_ الكحل مو زينة .

_ لعد شنو ؟ .

عضيت شفتي اقوه واني

منتظرة جوابه ، فرد بخشونة :

_ سلاح .

ابتسمت لا ارادي وقبل لا يردف ..

سكت شويه .. وتنهد من غمج گلبه

حيدر الكرار -:

قالت تكحلت ، قلت: بل تسلحت

فعيناك جيش والرموش جنود .

رفيدا -: منو تقصد ؟ .

_ عيونها .

يراوغ هواي يراوغ ولازم اتصرف مثله..

رفيدا -: وشبيها عيونها ؟ .

حيدر الكرار -:

ما كنت أدري أن في عينيك سلاحا

حتى رميت، فكان قلبي أول الجرحى

رفيدا -: هاي عود انت سيد .

حيدر -: شسويت انه ؟ .

_ المفروض تغض بصرك .

_ ومنو كال انه شفتها بعيوني ؟ .

_ لعد شلون ؟ .

_ شفتها بگلبي .

رفعت حاجبي ضليت صافنة .. منو هاي؟

أكيد يقصد كيلاس قابل يقصدني آني؟ غبية

اذا اصدگ بي بعد

رفيدا-: منو هاي التقصدها ؟ .

حيدر -: نامي .

اجه تمدد بفراشه وظهره إلي ما گال بعد شي

غطيت راسي بالبطانيه وچنت ارجف مو من البرد من القهر ودموعي نزلت بسكته حتى لا يسمعني خنگت روحي بالبطانية لحد ما نمت .

ثاني يوم ما وعيت إلا على صوت يلعلع جوه..

لميعة -: شفتتتت عرفتهااااا مو بتتتتت لهذا السببب ما دخلت عليهااااا .

گعدت مفزوعه .. گلبي وگع ببطني..

حيدر الكرار -: حجيهه هيه بالتفاهم مو بالصياح البتت زغيرررره مو مال اجيسها انت ما تستوعبين ؟؟؟ .

لميعة -: لاااااا انت مستهويها يبن بطني وخايف عليها تنفضح جدام الوادم .

صاح وصوته رج البيت..

حيدر -: صوتچ يمممه صوتچ لا يعلى البت امانة يمي وما اريدنها تسمع غير الي يسر خاطرهاااا .

صايره هوسه اخوانه يهدون بيهم

مغوار -: حيادر هدي خويه ماتسوه كل هالصياح .

ابا الحسن -: خويه ترا كيلاس خطية لحد هساع ما تدري والبت متعلقة بيك من الصغر يا امها تعوفها لو ترجع حرمتك لأهلها اذا مو گادر تحل مشاكل نسوانك وامي .

ذو الفقار -: يممه خل نكون واقعيين حيادر ما انطه للبت خيط امل .. انت گبعتي كيلاس براسه .

لميعة -: هايي تبدلها ب كيلاس ولك حوووويدرررر؟؟ هاي؟؟ احجي انطققق شكووو ساااكت خذت عگلك بس نمت يمها بغرفة وحده ؟؟! .

سمعته ضرب شي .. و انكسر

حيدر -: لا تقارنيها بأي بت حجيييييةةةةة لا تقارنيها .

رحت ركض للدرج اباوع من فوك وهمه جوه..

اخوهم ابا الفضل اجه من برا ..

ابا الفضل -: حيادر إعمامي بالديوان رايدينك .

حيدر تحولت انظاره ل امه وراسا فهم..

حيدر الكرار -: ها؟ إعمامي؟ .

هوا گال هيچ وهيه ركضت عليه مدت ايدها

لزمته من صدره وتمسح على وجهه

لميعة-: حويدر يمه اسمعني انه..

نفض ايديها وابتعد عنها رفع اصبعه بوجها

يرجف رررجف من العصبيه

حيدر -: محد يجبرني يممه محددد لو مو بس اعماميييي لو تجيبين ابيچ بشيبته ، فاهمتنيييي ؟؟ .

وطلع طبگ الباب وراه ..

شفت لميعة تريد تصعد فوك ركضت للغرفه سديت الباب وقفلته وگعدت ورا الباب الهث

سمعت رجليها فاتت وحلكها الما يسكت

يدردم فاتت لغرفتها وطبگت الباب..

تنهدت براحة ، ثواني واندگ الباب گلبي وگع ببطني

رفيدا -: منو ؟ .

حنين -: آنه .. حنونة .

فتحته و طبت لوتيه تتمضحك سدت الباب وراها واندارت علي

حنين -: هاا شكو؟ شصار بليلة امس؟ سولفيلي ؟ .

رفيدا -: ما صار شي .

حنين -: وجهچ احمر والزلمه نزل علينا نار من الصبح .. شصاير ؟ .

رفيدا -: ابن الروسية هذا بوخه مايسوي شي يخوط بصف الإستكان .

ضحكت وگالت وهي تغمز وتلمز ..

حنين -: لا داده ابن الروسيه كاسر خشوم الوادم جوه علمودچ وانت تگولين يخوط بصف الاستكان ؟ .

كعدت ع جربايه وغطيت وجهي بأيديني

رفيدا -: حنين الله يخليچ اطلعي .

حنين -: ما اطلع الا تگولين نام يمچ لو بالگاع ؟..

رفيدا -: حنيييييين اطلعييي .

حنين -: لااا ما اطلع الا تگولين احچيلي نام يمچ .

رفيدا -: لاااااا .

حنين -: لعد ليش وجهچ أحمر ؟ .

رفيدا -: من البچي .

اجت كعدت يمي وهمست..

حنين -: بچيتيي ؟ ليش؟ شگالچ؟ .

رفيدا -: گال.. گال ماعرفت انام عدل من شفت ذيچ العيون محاوطها السواد وحسيته يقصدني .

حنين -: يااااااا هذا طايح على وجهه .. سيدنا طلع مو هين ، اي وبعدين شگال ؟ .

رفيدا -: ما گال .

حنين -: بس ؟ .

رفيدا -: اي وبعدين گال نامي .

حنين -: حيادر گالچ نامي ودار وجهه ؟ مستحيل هذا حيادر انه اعرفه .

رفيدا -: والله هذا الصار .

حنين -: رفود هذا اخويه وانه اعرفه هذا من يگول نامي معناها گاعد يغلي لو ما مستحي منچ چان..

رفيدا -: چان شنو ؟ .

سكتت عبالك تذكرت شي...