رواية ديون النبض الفصل الرابع عشر
مشهد المطبخ.. سوا وغدا البيتزا 🍕❤️
رفع مجد راسي بإيده، وبص في عيني وقال:
مجد: وعد، إنتِ ليه بتهربي دايمًا من نظرة عينيا؟
بعدت عنه بسرعة، وحاولت أهرب من نظراته اللي بقت بتلخبطني، وقلت له:
وعد: مجد، يلا نجهز الشاي وكل المشروبات اللي هم عايزينها.
مسكت السفنجة وبدأت أغسل الأطباق، على أمل إني أشغل نفسي عن الكلام اللي قاله، لكنه قرب مني وقال بابتسامة:
مجد: على فكرة، بالرغم من جرأتك دي، كل يوم بكتشف فيكِ حاجة أجمل. بحس إن سعادتي بيكِ بتزيد يوم عن يوم، وكل ما أعرفك أكتر، بحس إني ضايع من غير سعادتي معاكي.
مكنتش عارفة أرد عليه بإيه، ففضلت مركزة في الأطباق اللي قدامي، لحد ما لقيته بياخد السفنجة من إيدي.
بصيت له باستغراب وقلت:
وعد: إنت بتعمل إيه؟
مجد: بغسل المواعين. ولا إنتِ فاكرة إني معرفش؟
وعد: إنت بتعرف تغسل مواعين كمان يا دكتور؟
مجد: طبعًا، وعلى فكرة أنا شاطر، ما تقلقيش!
وقفت بعيد عنه، وحطيت إيدي على خدي وأنا بتفرج عليه.
معقولة دكتور مجد واقف في المطبخ بيغسل المواعين، وبيعملها بمنتهى الجدية كمان!
مكنتش قادرة أمنع ابتسامتي. كنت مستمتعة بالمشهد بشكل غريب، مش عشان هو بيغسل الأطباق، لكن عشان وجوده جنبي كان مخليني حاسة براحة وسعادة مش عارفة أوصفهم.
كنت سرحانة فيه، لدرجة إني نسيت نفسي وأنا ببص له.
وفجأة قطع شرودي بصوته:
مجد: يا دكتورة وعد، أنا هخلص لوحدي ولا إيه؟ مش هتساعديني؟
اتكسفت لما اكتشفت إنه واخد باله من سرحاني، فقربت منه بسرعة وقلت:
وعد: حاضر، هساعدك أهو!
بص لي بمكر وقال:
مجد: على فكرة، أنا اللي بساعدك في المطبخ، مش إنتِ اللي بتساعديني.
ضحكت، وبدأت آخد منه الأطباق وأشطفها تحت الحنفية.
هو يصبن، وأنا أشطف، وكل شوية واحد فينا يقول للتاني كلمة، فنضحك ونكمل.
جهزنا القهوه لياسين، والشاي لحازم، والينسون لماما ورغد، وفضلنا في المطبخ وقت طويل من غير ما نحس بالوقت.
كانت لحظات بسيطة جدًا، لكن بالنسبالي كان فيها حاجة مختلفة.
مفيش دكتور ومريضة، ولا حسابات ولا تكلف، ولا حتى إحساس إني محتاجة أفكر قبل ما أتكلم.
كان فيه مجد ووعد، بيتعاملوا مع بعض بعفوية، كأنهم يعرفوا بعض من سنين، مش من وقت قريب.
ولأول مرة، حسيت إن قربه مش مجرد كلام حلو بيتقال، لكنه تفاصيل صغيرة بتخليني أرتاح له أكتر من غير ما أقصد.
---
بعد فترة، كنا كلنا قاعدين مع بعض، والضحك مالي المكان.
ماما بصت لي أنا ورغد وقالت:
ماما: يلا يا بنات، عايزين نجهز الغدا.
بصيت لها وقلت بحماس:
وعد: ماما، إحنا كل مرة بنتفق على غدا معين، والمرة دي هنشوف مجد نفسه عايز يتغدى إيه، ونعمله سوا.
وبعدين بصيت لمجد وكملت:
وعد: إحنا متعودين كل مرة نخلي الاختيار لحد فينا. المرة اللي فاتت كان ياسين، واللي قبلها حازم. المرة دي دورك إنت، وأنا وماما ورغد هنأجل دورنا. النهارده الغدا على ذوقك.
رغد بصت لي باستغراب وقالت:
رغد: إنتِ مش عارفة مجد بيحب إيه؟
هزيت راسي وقلت:
وعد: بصراحة لأ.
رغد: طب ما هو أكيد محروم من الأكلات اللي زي الكريب والبيتزا! طنط غالبًا مش بتعمل الحاجات دي كتير، لأنها دقيقة جدًا في موضوع الأكل.
بصيت لمجد وسألته:
وعد: الكلام ده حقيقي يا مجد؟ إنت فعلًا مبتاكلش الأكلات دي؟
ابتسم وقال:
مجد: بصراحة، أنا شايف وجهة نظر ماما صح. الأكلات دي ساعات بتكون تقيلة على المعدة.
وعد: ماشي، بس ده مش معناه إننا نحرم نفسنا منها! يعني إيه نفضل ناكل أكل صحي طول الوقت؟ لازم ندلع نفسنا كل فترة. إيه رأيك نعمل بيتزا وكريب النهارده؟
مجد: أنا معنديش مشكلة، بس السؤال الأهم... إنتِ بتعرفي تعملي الكلام ده أصلًا؟
قمت من مكاني وبصيت له بثقة:
وعد: طبعًا! اسأل ياسين، ده أنا عليا بيتزا.
ياسين ضحك وقال:
ياسين: صدقها يا مجد، البيتزا بتاعتها هتاكل صوابعك وراها.
بصيت لهم بانتصار وقلت:
وعد: خلاص، يلا بينا نبدأ. إنت يا مجد وحازم تقطعوا الخضار، ورغد تساعدنا في التجهيزات.
مجد: طب وإنتِ هتعملي إيه؟
وعد: أنا هعجن البيتزا طبعًا، مش هسيب أهم حاجة لحد تاني!
بص لي وقال:
مجد: لأ، خلي رغد وحازم يقطعوا الخضار، وسيب بابا وماما يرتاحوا. أنا وإنتِ هنعجن البيتزا سوا، وبعدها نجهز الكريب.
ابتسمت وقلت:
وعد: ماشي، اتفقنا.
ودخلنا المطبخ كلنا، وكل واحد بدأ يمسك حاجة يجهزها.
---
حرب الدقيق.. وقلب بيدق ❤️
بدأت أعجن البيتزا، وأنا مركزة في العجينة اللي قدامي، لحد ما الدقيق اتناثر على وشي.
مجد كان واقف جنبي، وأول ما شافني بالشكل ده، قرب مني ومد إيده يمسح الدقيق عن خدي.
اتجمدت مكاني.
مكنتش متوقعة قربه بالشكل ده، ولا كنت مستعدة للإحساس اللي سيطر عليّ فجأة.
كل ما إيده تقرب، قلبي كان بيعمل دوشة جوايا بيدق بسرعه رهيبه.
فضلت باصة له من غير ما أتكلم، وأنا بحاول أفهم نفسي.
أنا مالي؟
ليه كل مرة بيقرب فيها بحس إن قلبي عايز يخرج من مكانه؟
عمر ما حد قرب مني بالطريقة دي، وأنا أصلًا مكنتش بسمح لحد إنه يتجاوز المسافة اللي بحطها بيني وبينه.
لكن مع مجد، الوضع كان مختلف.
قربه مكنش غريب عني، بالعكس، كان فيه إحساس بالراحة، كأني مش محتاجة أخاف منه أو أكون حذرة معاه طول الوقت.
ومع ذلك، كنت بتكسف، وكل ما أحس إن المسافة بينا بتقل، أحاول أبعد أو أشغل نفسي بأي حاجة.
أما هو، فكان واضح إنه عايز يقرب أكتر، لكن من غير ما يضغط عليّ أو يجبرني على حاجة.
وفجأة، من غير ما أقصد، إيدي اللي كانت مليانة عجين ودقيق خبطت في قميصه ، فسابَت عليه علامة كبيرة.
بعدت عنه بسرعة، وغطيت نص وشي بإيدي وأنا بقول باعتذار:
وعد: أنا آسفة يا مجد، والله ما أقصد!
بص لقميصه، وبعدين بص لي، وفجأة ضحك.
مجد: لا، كده الموضوع محتاج رد مناسب!
وقبل ما أفهم هو بيخطط لإيه، مد إيده في طبق الدقيق، ومسح بيها على وشي!
صرخت وأنا ببص له بصدمة:
وعد: يا نهارك أبيض! إنت عملت إيه؟!
بص لي ببراءة وقال:
مجد: بأخد حقي يا دكتورة!
مكنتش هسيبه طبعًا. غمست إيدي في الدقيق ورديت له اللي عمله فيا.
ومن هنا بدأت الحرب!
هو يرش عليّ دقيق، وأنا أرد عليه، وكل واحد فينا بيحاول يكسب الجولة، وسط ضحكنا اللي مكنش بيقف.
وعد: يا مجد، إنت بهدلتني! عاجبك كده؟ شعري باظ خالص!
رفع حاجبه وبص لقميصه:
مجد: وإنتِ مخدتيش بالك من قميصي؟ شوفي بقى اتبهدل دقيق وعجين إزاي!
وعد: تستاهل! إنت اللي بدأت!
مجد: وأنا مستعد أكمل كمان!
كان حازم ورغد واقفين بيتفرجوا علينا، ومش قادرين يبطلوا ضحك.
المطبخ كله اتقلب دوشة وهيصة، والبيتزا اللي دخلنا نجهزها بقت آخر حاجة ممكن نفكر فيها.
لحد ما سمعنا صوت ماما من عند الباب:
ماما: هو إنتوا بتلعبوا ولا بتجهزوا الغدا؟ يلا خلصوا، إحنا كده مش هنتغدى!
بصيت لها، وأنا لسه ماسكة الدقيق، وقلت بكل ثقة:
وعد: ماما، بعد إذنك، روحي إنتِ مع ياسين وسيبينا إحنا. أنا ومجد بينا تار، ولازم نخلصه دلوقتي!
ماما بصت لشكلنا، وحطت إيدها على راسها وهي بتقول:
ماما: إيه الحال اللي إنتوا فيه ده؟! كنت فاكرة حازم ووعد هما العيال الصغيرة، طلعت إنت كمان يا دكتور مجد؟!
مجد ضحك، وبص لها وقال:
مجد: أعمل إيه في بنتك يا ماما؟ كنت بشيل الدقيق من على وشها، راحت بهدلتني، فاضطريت أرد لها اللي عملته!
بصيت لماما باعتراض:
وعد: يا ماما، هو اللي بدأ، مش أنا!
ماما هزت راسها وهي بتحاول تمنع ضحكتها:
ماما: ماشي يا ستي، هو اللي بدأ. بس يلا خلصوا، إحنا كده مش هنتغدى غير بعد العشا!
خرجت ماما، وإحنا فضلنا نضحك على اللي حصل.
وبعد ما هدينا، رجعنا نكمل شغلنا. عجنّا البيتزا وسبناها تخمر، وبدأنا نجهز الكريب وباقي المكونات، وكل واحد فينا بقى مسؤول عن حاجة.
وبعد وقت طويل، أخيرًا خلصنا كل حاجة، ودخلنا البيتزا والكريب الفرن.
كنت مبسوطة، لكن حرارة المطبخ بدأت تتعبني، والصداع اللي كنت بحس بيه من فترة رجع يضغط على رأسي.
حاولت أستحمل وأكمل عادي، لكن رغد لاحظت إني مش على طبيعتي.
رغد: وعد، إنتِ مالك؟ وشك اتغير. اطلعي بره شوية، إنتِ مش هتقدري تكملي كده.
سندت إيدي على الرخامة، وحاولت آخد نفسي براحة.
مجد أول ما شافني، قرب مني بقلق:
مجد: مالك يا وعد؟
وعد: مش قادرة أقف. كل ما أقف في حرارة المطبخ كتير، بتعب وبيجيلي صداع.
ملامحه اتغيرت، وبص لي بتركيز:
مجد: من إمتى الكلام ده؟
وعد: من فترة، بس مكنتش مركزة مع الموضوع.
مجد: وعد، ده مينفعش. إنتِ دكتورة، يعني المفروض تكوني أكتر واحدة عارفة أهمية إنك تهتمي بصحتك.
وعد: حاضر يا سيدي.
فضل يبص لي كأنه بيحاول يربط الأعراض ببعضها، وبعدين قال:
مجد: الصداع مع الإحساس إن نفسك مكتوم، خصوصًا مع الحرارة، محتاجين نفهم سببه. ممكن يكون عندك مشكلة في الجيوب الأنفية، لكن مش هنفترض حاجة من غير كشف.
هزيت راسي، وبعدين اعترفت له:
وعد: أوقات كتير فعلًا بحس بصداع، ونفسي بيبقى مكتوم.
مجد: يبقى لازم تاخدي بالك من نفسك. بكرة تروحي لدكتور أسعد يكشف عليكي، ونطمن إن مفيش حاجة محتاجة علاج.
بصيت له وأنا بحاول أهرب من الموضوع:
وعد: أنا دكتورة اه، وبكشف على الناس، بس أنا بكره الدوا والعلاج.
بص لي بجدية:
مجد: وعد، مينفعش تعاندي في حاجة زي دي.
وعد: ما تحاولش معايا يا مجد.
مجد: وعد، متعانديش.
ضحكت غصب عني وقلت:
وعد: متقلقش، أنا كويسة. وبعدين أنا مش بقف في المطبخ كتير أصلًا.
ساعتها ابتسم وقال بمنتهى الهدوء:
مجد: على فكرة، أنا بحب الأكل البيتي جدًا... معنى كده إنك هتقفي في المطبخ كتير.
بصيت له، وابتسامتي اختفت تدريجيًا.
الكلمة فتحت بابًا لكلام كنت بحاول أهرب منه من بداية اليوم.
سكت لحظة، وبعدين قلت له بصوت هادي:
وعد: إنت ليه مستعجل يا مجد؟ إحنا قدامنا سنين على اللي إنت بتفكر فيه ده.
اختفت ابتسامته، وبص لي بجدية:
مجد: وعد، أنا مش شايف إننا محتاجين نستنى كل ده. أنا بفكر إن حازم ورغد... وإحنا كمان نكون مع بعض.
اتخضيت من صراحته، وحسيت إني لازم أحط حد للكلام قبل ما يوصل لمكان أنا مش مستعدة له.
وعد: بعد إذنك يا مجد، متفكرش في كده دلوقتي. أنا ده قراري.
ملامحه اتغيرت، وواضح إنه اتضايق فعلًا، لكنه حاول يتمالك نفسه.
مجد: طيب، نخلص السنة دي الأول، وبعدها نبقى نفكر في كلامك.
اتوترت من نبرة صوته، وحاولت أوضح له وجهة نظري:
وعد: مجد، أنا مش عايزاك تزعل مني، بس محتاجاك تفهمني. الموضوع مش متعلق بيا أنا وبس. حازم لسه بيجهز نفسه، وعليه مصاريف دراسة وكتب، ولسه مسددش كل مصاريف جوازه.
إنت دكتور وعارف كويس إن الدراسة مش سهلة ولا مصاريفها قليلة. ليه أزود عليه مسؤوليات تانية ليه؟ هو كان ناقصه ده؟
فضل باصص لي شوية، وبعدين قال بصوت فيه عتاب:
مجد: وعد، إنتِ ليه حاطة فرق بينا وبين بعض بالشكل ده؟
رديت من غير ما أفكر كتير:
وعد: لأن فيه فرق يا مجد.
سألني بهدوء، لكن السؤال كان واضح إنه وجعه:
مجد: إنتِ شايفة كده فعلًا؟
وطيت صوتي وأنا بحاول أوصل له اللي جوايا من غير ما أجرحه:
وعد: أنا مش قصدي أزعلك، بس إحنا لسه من امبارح بس بدأنا نقرب من بعض بالشكل ده. إنت عايزني أفكر في كل حاجة مرة واحدة، وأنا لسه بحاول أفهم مشاعري وأستوعب اللي بيحصل بينا.
سكت لحظة، وبعدين رد عليّ بكلمات بسيطة، لكنها وجعتني أكتر مما توقعت:
مجد: بس أنا قريب منك من أول ما شوفتك يا وعد.
معرفتش أرد.
فضلت باصة له، وحسيت إن كل الكلام اللي كنت مجهزاه اختفى فجأة.
هو شايف إن قربه مني بدأ من زمان، وإن اللي بالنسبة لي لسه بداية، بالنسباله امتداد لإحساس قديم كان بيكبر جواه يوم بعد يوم.
أما أنا، فكنت لسه بحاول أستوعب إن وجوده بقى مهم عندي بالشكل ده.
أخدت نفسًا وقلت:
وعد: ممكن نسيب الكلام ده دلوقتي، يا مجد؟
بص لي للحظات، وبعدين هز راسه وقال بهدوء بارد:
مجد: تمام.
الكلمة كانت قصيرة، لكن نبرته قالت لي إنه مش تمام خالص.
سابني وخرج من المطبخ، وراح وقف في البلكونة لوحده.
فضلت مكاني، وبصيت ناحية الباب اللي خرج منه.
مكنتش عارفة أتصرف إزاي، ولا أروح أتكلم معاه ولا أسيبه لحد ما يهدى.
كل اللي كنت حاساه إني بدل ما أفرحه بقربي، زودت همه، وحطيت حمل على قلبه بدل ما أخفف عنه.
---
ماما لاحظت إن في حاجة اتغيرت، فقربت مني وبصت في وشي.
ماما: وعد، مالك يا حبيبتي؟ إنتِ اتغيرتي فجأة ليه؟
حاولت أتصرف بشكل طبيعي، لكن واضح إن ملامحي فضحتني.
وعد: مفيش حاجة يا ماما.
ماما ضيقت عينيها وهي بتبص لي:
ماما: مفيش حاجة إزاي؟ وإنتِ كنتِ بتضحكي من شوية، ومجد كان معاكي، ودلوقتي هو واقف لوحده في البلكونة وشكله زعلان.
في اللحظة دي، دخلت رغد وحازم، ولما لاحظوا إن ماما بتسألني، بصوا لي باهتمام.
رغد: هو فيه إيه يا وعد؟ حصل حاجة بينك وبين مجد؟
أما حازم فبص ناحية البلكونة، وبعدين رجع بص لي وقال:
حازم: مجد ماله؟ أنا حاسس إنه متضايق من حاجة.
سكت، ومكنتش عارفة أبدأ كلامي منين.
إزاي أشرح لهم إن المشكلة مش في حاجة حصلت بيني وبين مجد، لكن في حاجات كتير بدأت تحصل جوايا، وأنا لسه مش عارفة أتعامل معاها؟
وإزاي أقول لهم إن أكتر حاجة مخوفاني مش قرب مجد مني، لكن خوفي إني أكون السبب في وجعه؟
رفعت عيني ناحية البلكونة مرة تانية.
كان واقف وظهره لينا، ساكت، وباصص بعيد.
ولأول مرة من بداية اليوم، تمنيت لو أقدر أعرف هو بيفكر في إيه من غير ما أضطر أسأله.
