رواية في طريقنا الفصل الرابع عشر
مالك نزل عينه، وأنا خرجت.
رجعت مكتبي وفتحت العرض. كتبت أول جملة، ومسحتها. بعد شوية بدأت تاني، وكملت.
الأيام اللي فضلت على الافتتاح خلصنا فيها المطلوب. كلامنا بقى عن مواعيد وصور ونقط هنشرحها، لحد ما جه اليوم اللي مستنياه من أول المشروع.
كنت قدام المراية لما ماما دخلت تصلّحلي ياقة القميص. جنى واقفة وراها، بتحاول تقفل شنطة حاطة فيها كشكول وعلبة ألوان وكتاب.
طلعت الكتاب، وسيبت لها الكشكول وقلمين تختارهم.
= إحنا رايحين الافتتاح يا جنى.
= عارفة. عشان مقولكيش أنا زهقت.
فضلت محتارة بين القلمين، وماما بصتلي في المراية.
= متوترة؟
هزيت راسي.
= لما تقفي، بصّيلي.
جنى رفعت إيدها.
= وأنا كمان.
ابتسمت، وأخدت شنطتي.
وصلنا بدري. أستاذ شريف سلّم على ماما، وبعدها دخلتهم لحد قعدتهم. جنى وقفت عند جزء من التصميم.
= ده اللي إنتِ غيّرتي لونه وإحنا بناكل؟
= هو.
بصت من التصميم ليا وابتسمت. سيبتهم، وروحت أراجع النسخة مع مريم.
كنا لسه بنتكلم لما شفت مالك داخل مع راجل وست. سلّموا على أستاذ شريف، وبعدها قربوا مننا.
- سلمى… بابا وماما.
سلمت عليهم. عرفت صوت والدته أول ما قالت:
= اتشرفت بيكي يا سلمى.
والده سألني عن لوحة عند المدخل، فشرحتله فكرتها.
- مالك كان بيبعتلنا صور الشغل. قولناله نيجي نشوفه قبل ما يرجع.
والدته سألتني على ماما، ومشينا نسلم عليها. قربت لها الكرسي، لكنها قامت تسلم من نفسها ورجعت قعدت.
جنى لمحت مالك.
= شفت شعري؟
انحنى ناحيتها وبص كأنه بيفحصه.
- إنتِ مين؟
ضحكت وهي بتشد فستاني.
= أنا جنى!
- آه، عرفتك. إيه الشياكة دي؟
لفت تورّيه شعرها من ورا، وماما بدأت تسأل أهله عن الطريق.
وقفت أسمعهم. كنت متخيلة القعدة دي في بيتنا، وماما بتسألهم يشربوا إيه.
مريم نادتني، فاتحركت.
بعد دقايق أستاذ شريف قدّم الفريق. لما قال اسمي، سمعت تسقيف جنى قبل أي حد. كانت رافعة إيديها وبتسقف بكل قوتها، وماما بتضحك وهي بتحاول توطّيهالها.
ابتسمت، وقدرت أبدأ.
حكيت عن الفكرة من أول رسم، وعرضت الصور. كل ما صوتي يتشد، أبص ناحية ماما وأكمّل.
واحد من الحضور سأل:
- إيه اللي كسبتوه من الشكل الجديد؟ قبل كده كان فيه مكان لقطع أكتر.
وقفت عند الصورتين.
= قطع أكتر، بس مش كلها بتتشاف. إحنا اشتغلنا على اللي يقابل الزائر وإزاي يعرف يكمل، والمساحة اللي تخليه يقف ويسأل من غير ما يعطّل غيره. حضرتك تقدر تجرب ده بنفسك بعد العرض.
هز راسه. كملت، وسلمت الكلام لمالك عند النقطة اللي اتفقنا عليها.
وهو بيشرح التنفيذ، رجع لصورة المدخل.
- التغيير ده من تصميم سلمى. إحنا اشتغلنا على تنفيذه مع الحفاظ على الفكرة، رغم اختلاف المقاسات على الطبيعة.
بصلي لحظة، ورجع للحضور.
كان عارف قيمة شغلي. أما اللي اتقال بيننا في القاعة، مكنتش عارفة أعمل معاه إيه.
خلصنا، والناس قامت تتفرج. مالك قاللي إني كنت كويسة، فشكرته وروحت لماما.
مسكت وشي وباستني.
= ربنا يفرح قلبك يا بنتي.
حضنتها، وجنى دخلت بيننا عشان متتفوتهاش.
والدة مالك قربت تهنيني. استنت ماما تقعد، وبعدها قالت بصوت واطي:
= أنا فكرت في المكالمة اللي بيننا. عندك حق، أنا أقدر أفرّق بينك وبين والدك.
شدّيت إيدي على الكارت اللي معايا.
= كلام حضرتك وجعني.
= وأنا غلطت. مالك كان حكالي عن رفضك لفلوسه، ومع ذلك حسبت حساب كلام الناس أكتر من اللي عرفته عنك.
استنيت تكمل.
= متشرحيش إنتِ مش زيه ليه. أنا اللي كان لازم أفرّق من الأول. حقك عليا في دي.
مقدرتش أرد بسرعة. كنت مستنية تبرير، ولقيتها بتعتذر.
شكرتها، وهي رجعت تقعد مع ماما. فضلت مكاني ثواني قبل ما أستاذ شريف يناديني.
كان معاه ممثل العميل.
- اتفقنا إن الشركة تمسك حملة الفرع بعد الافتتاح، وإنتِ هتبقي المسؤولة عنها. اختاري الفريق اللي محتاجاه، وجهّزي تصورك عشان نتفق على المطلوب والمقابل قبل البداية.
بصيت للراجل، فأكد الكلام.
- محتاجين نبدأ قريب. عندك تصور مبدئي؟
كنت لسه خارجة من العرض، وفي دماغي صور كتير. اخترت أبسط واحدة.
= الناس اللي واقفة بره شافت مكان جديد. الحملة محتاجة توريهم الحاجة دي هتبقى إزاي في حياتهم. نستخدم نفس القطعة في أكتر من مساحة، بدل ما نصورها لوحدها كل مرة.
سألني عن مثال، ففتحت صورة على التابلت وشرحتله. طلب نطوّر الفكرة في الاجتماع.
حددت المعاد، وأستاذ شريف استنى لما مشي.
- جهّزي مقترحك، وهنتفق على دورك ومقابله قبل ما نبدأ. والمكافأة اللي اتفقنا عليها نزلت في حسابك النهارده.
شكرته، ورجعت أبص للمكان. كان فيه شغل خلص، وشغل جاي أنا اللي هختار أبدأه إزاي.
مريم قربت مني.
= ينفع نتصور قبل ما تمشي؟
وقفنا جنب بعض. بعد الصورة حطت إيدها على ضهري لحظة.
= مبسوطة إن آخر مشروع ليا هنا خلص كده.
كانت لسه هتسلّم آخر حاجات قبل شغلها الجديد، لكننا خلصنا آخر يوم كبير اشتغلناه سوا.
= ابقي طمنيني لما تروحي هناك.
رفعت عينها وابتسمت.
= هطمنك.
روحت أخد ماما وجنى. اتصورنا، والبنت أصرت تمسك البرنامج عشان اسمي مكتوب فيه.
مسكته بالمقلوب.
لما وريتها الصورة، رفعت كتفها.
= كنت عايزاكم تقروه.
ضحكنا، وماما طلبت صورة تانية.
عند العربية، مالك ساعد ماما تقعد، وانحنى يسلّم على جنى. لما قفل الباب، هنّاني على الحملة الجديدة.
شكرته، وكنت هركب لما قال:
- أنا راجع القاهرة بكرة.
وقفت.
- عندي تسليم الصبح هنا، وبعدها هتحرك. معتز شايل أغلب الشغل من فترة، وعندنا شغل داخل محتاج وجودي.
= هترجع تاني؟
طلع السؤال قبل ما أختار له شكل أهدى.
بصلي.
- مش عندي شغل هنا بعد كده.
هزيت راسي. كنت عارفة إنه جاي عشان المشروع، لكني نسيت أحسب آخر يوم فيه.
= ربنا يوفقك.
- وإنتِ كمان.
ركبت، وهو فضل واقف لحد ما اتحركنا.
في الطريق حكيت لماما عن المكافأة. ولما عدينا على محل الجزم، طلبت أقف.
ماما اختارت تستناني في العربية، وجنى نزلت معايا.
لقيت الجزمة اللي شطبت تمنها من حساباتي كذا مرة. طلبت مقاسي، وقعدت أقيسها. جنى شافت واحدة لامعة وجابتهالي.
= دي أحلى.
= وأنا هروح الشركة باللي بيلمع ده؟
رفعتها قدامي تاني.
= للبيت.
ضحكت، ورجّعتها مكانها. لبست اللي اخترتها، ومشيت بيها خطوتين. كانت مريحة زي ما افتكرتها.
لما الراجل سألني هآخدها ولا لأ، قولت آه.
خرجت بالكيس، وماما طلبت تشوفها قبل ما نتحرك. فردتها على رجلي وبصيتلها، ومن غير حسابات جديدة رجّعتها في العلبة.
أخدنا أكل ورجعنا. حكيتلهم عن الحملة، وفرحت. وفي نص الكلام افتكرت إنه مسافر، ورجعت أكمل.
بعد الأكل مريم بعتتلي الصور. كنت بقلب فيها لما وصلت رسالة من مالك:
«أنا غلطت في حقك في موضوع وائل. ينفع أقابلك بكرة قبل ما أسافر؟»
فضلت باصة للرسالة.
«عايز أعتذرلك وأنا قدامك.»
سألت ماما تقدر تقعد مع جنى ساعة بعد العصر. وافقت، فحددتله المكان والميعاد.
تاني يوم لقيته مستنيني. على الكرسي اللي جنبه شنطة سفر صغيرة.
قعدت، وعيني راحت لها قبل ما أرجع أبصله.
- هتحرك من هنا على القاهرة.
هزيت راسي، وهو سألني أطلب إيه. طلبنا، وبعد ما الويتر مشي، مالك حط الموبايل على جنب.
- أنا صدقتك يوم ما قولتيلي إن مفيش حاجة بينك وبين وائل. وكملت أسئلة كإني مستنيك تقولي غير اللي سمعته.
فضلت ساكتة.
- معرفتش أستحمل إني عرفت متأخر، ففضلت أفتكر كل قعدة وكل كلمة. ولما إنتِ سألتي شفت إيه، ملقتش حاجة أقولها.
بصلي.
- أنا آسف إني خلّيتك تدافعي عن نفسك.
أخدت نفس. كنت متخيلة كلام كتير، ومستعدة لردود كتير، لكن طريقته خلتني أسكت لحظة.
= إنتَ فاهم إنك كنت بتسألني إذا كنت بحبك وإنتَ بتكلمني، وأنا مستنية وائل؟
نزل عينه.
- فاهم.
= ده اللي فضل معايا. مش السؤال عن أيام الكلية.
- عارف. وغيرتي مش عذر.
وصلت الطلبات، فبعدت الكوباية عن طرف الترابيزة. استنى لحد ما الويتر مشي، وبعدها كمّل:
- كنت بحكي لأهلي عنك، وبفكر في البيت، وفجأة حسيت إني معرفكيش كفاية. بدل ما أقول إني متضايق، تصرفت كإنك إنتِ اللي لازم تثبتيلي إني آمن.
بصيتله.
= أنا كنت هحاول أفهم زعلك. إنما معرفتش أعمل إيه قدام شك ملوش حاجة أقدر أرد عليها.
هز راسه.
- ومش مطلوب منك تعملي حاجة. أنا مش مستني أشوف رسائل، ولا حد تاني يطمني. أنا مصدقك.
الجملة اللي استنيتها في القاعة اتقالت أخيرا.
بصيت للكوباية، ومسكتها بإيدي الاتنين. لقيتني بعيط، فنزلت وشي.
مد علبة المناديل ناحيتي، وساب إيده على الترابيزة. مخدتش غير منديل.
= أنا مقدّرة إنك بتقول ده. بس لسه الكلام واجعني.
- مش طالب منك تقولي إن خلاص.
مسحت وشي.
= أنا كنت محتاجة أسمع ده. بس إنتَ هتقوم تسافر، وأنا اللي هفضل أقابل وائل في الشغل وأفتكر شكلك وإنتَ بتسألني.
سكت، فكمّلت:
= مش عايزة أرجع أراجع ضحكة ولا كلمة، وأفكر لو شفتني هتفهمها إزاي.
- لا، متعمليش كده عشان غلط أنا اللي عملته.
= مش هعمله. بس ده كان إحساسي، وعايزاك تعرفه.
نزل عينه شوية، وبعدين رجعلي.
- إنتِ مش مطالبة تغيّري تعاملك مع حد. ولا أنا ليا حق أبقى واقف في بالك كل ما تتكلمي في شغلك.
أخدت نفس. كانت دي أول مرة يسمع مني اللي خلّفه كلامه من غير ما يقاطعني بحاجة أنا قصّرت فيها.
= إنتَ جاي تعتذر، ولا جاي تشوف لو ممكن نرجع؟
اتحرك في كرسيه، وبعدها قال:
- جاي أعتذر عن اللي عملته. ونفسي نرجع، بس مقدرش أطلب ده وأنا لسه مش قادر أوعدك بالبيت اللي إنتِ محتاجاه.
سكتنا. كان نفسي أسمع إجابة مختلفة، رغم إني دخلت وأنا عارفة إن اعتذاره عن وائل مالوش علاقة بقرار جنى.
مالك لف الكوباية بين إيديه.
- وفي حاجة تانية فهمتها. أنا لما قولتلك تسيبي جنى مع والدتك ونجيب حد يساعد، كنت بعتبر تعبك معناه إنك مستنية فرصة تمشي.
رفعت عيني.
- إنتِ قولتيلي إنك عايزة ترجعي تلاقيها حتى لو مفيش واجب ولا مدرسة. فضلت أفكر في الجملة دي.
فضلت باصة له.
- أنا كنت بغيّر مكانها عشان يناسب اللي أنا عايزه، وبقولك إني كده بريحك.
بلعت ريقي.
= يعني فهمت ليه الحل ده مينفعش؟
- أيوه. ومش هرجع أقترحه عليكي.
لأول مرة مكنتش مضطرة أشرح له جنى هتعيش إزاي بعد ما أمشي.
بس لما فتحت بقي، سبقني بهدوء:
- ده مش معناه إني بقيت جاهز. وأنا مش عايز أقولك موافق دلوقتي عشان متبعديش، وبعدها تلاقيني بعاتبك على وجودها.
رجعت بضهري للكرسي.
= وأنا مش عايزة أجيبها بيت وأفضل أحاول أخلي وجودها خفيف عشان محدش يزعل.
هز راسه، وسكت.
كان بيبص لإيدي اللي على الكوباية. افتكرت أول مرة قعدنا في كافيه، وإحنا بنحاول نثبت ترابيزة بتتهز ونضحك.
الترابيزة دي ثابتة. وأنا اللي مكنتش عارفة أستقر في مكاني.
فضل ساكت شوية، وبعدها قال:
- أنا حجزت استشارة أسرية لما أرجع القاهرة.
رفعت عيني.
- عايز أتكلم مع حد فاهم. إيه اللي أنا قادر عليه، وإيه اللي بخاف منه وبتهرب منه. أنا مش هعرف أوصل لإجابة وأنا كل مرة بفكر بس إزاي أرجعلك.
= عملت ده إمتى؟
- حجزت الصبح. ميعادي الاتنين الجاي في القاهرة بعد الشغل. ومش بقولك عشان تبني عليه حاجة، ولا تستنيني أرجع بإجابة معينة.
فضلت باصة له. كانت أول خطوة بيعملها تخص السؤال نفسه، بدل ما يطلب مني أغيّر حياتي عشان السؤال يختفي.
- إنتِ كنتِ حلوة أوي إمبارح.
رفعت عيني.
- من أول ما وقفتي لحد ما خلصتي. كنت فرحانلك، ونفسي أقولك كلام أكتر من مبروك.
ابتسمت ودموعي لسه على خدي.
= وأنا كنت بدور عليك بعد ما عرفت خبر الحملة.
صوته وطي.
- كان نفسي أفضل أول واحد تحكيله.
سكت. مسحت خدي، ومديت إيدي للشنطة.
حاسبنا، وقومت. مالك شال شنطته، وخرجنا سوا.
عند عربيته، فتح الباب وحطها جوه. رجع وقف قدامي.
- مش هطلب منك تستنيني يا سلمى.
بصيتله، وإيدي لسه ماسكة المفتاح.
- معنديش حق أربطك بوعد إني يمكن أتغير.
كنت فاهمة. ومع ذلك الكلمة وجعتني.
= وأنا مش هعرف أستناك من غير ما أفضل أحسب كل يوم.
هز راسه. وقفنا ساكتين، وبعدها قلتله يخلي باله من الطريق.
- هخلي بالي.
ركب، وأنا رجعت خطوتين.
استنيت لحد ما عربيته خرجت. كنت مستنية أتكسّر، لكن اللي حصل إني فضلت واقفة، ماسكة شنطتي ومفتاحي.
كان لسه واحشني، وأنا شايفاه بيبعد.
رجعت عربيتي، وقعدت من غير ما أشغّلها. ماما اتصلت، فقلت لها إني خلصت وراجعة.
= مع السلامة.
قولتها، وبعد ما قفلت اكتشفت إني كنت عايزة أقولها لمالك. كنت واقفة قدامه ومقدرتش.
هو اعتذر، وأنا سمعته.
بس وهو ماشي، مخدش مني وعد. وأنا مكنش معايا ميعاد أستناه يرجع فيه.
