رواية العدم نقطة السواد الفصل الرابع عشر بقلم اسراء
چا والناس والوهواس واثار البچي ونوحه
ترى التعبان من روحه ما أظن تبرد جروحه
• ━━━━━━━━ ━━━━━━━━ •
سكتت عبالك تذكرت شي
حنين -: ولا شي استغفر الله . (ورجعت تضحك)
رفيدا -: احچي شكو تضحكين ؟ .
حنين -: لا والله حيادر موصيني ، گايل هاي بعدها زغيره لا تعلميها على هيچ سوالف مو زينه .
رفيدا -: عوفينه من اخوچ ، سمعت كلشي صار جوه
حنين -: وسمعتي من گال لا تقارنين رفيدا بأي بت؟ .
سكتت و وجهي حسيته صار احمر
حنين -: هاا ها احمريتي؟ .
غطيت وجهي بأيديني
رفيدا -: لااااا وخررري .
حنين -: بلا بلا شوفي وجهج بالمرايه .
رفيدا-: حنين ليش ماگتيلي حيدر مو متزوج و كيلاس امچ رايدتها اله ؟ .
حنين-: مو شسمه عايني .. هوا حيادر ماقبل نفتح موضوعها جدامچ وأأكد على ماما لميعة بالذات ماتسولف بس ميفيد وياها تتنفس مشاكل .
فجأه سمعنا صوته جوا حنين گمزت وگفت على حيلها
حنين -: اجه .. اجه الأسد .
وراحت تركض فتحت الباب شويه تباوع
حنين -: نعوسه گومي گومي عدلي شعرچ اجه .
غطيت راسي بالغطوه وعيوني وارمه من البچي
رفيدا -: ما اگوم .
حنين -: راح يوصل يا غبيه والله إذا لگاچ بهالمنظر حاطة بطانية على راسچ وتبچين راح يرجع يتعارك ويه لميعة .
سمعنا صوته وهوا يصعد الدرج
حيدر الكرار -: وينها ؟ .
لميعة -: فوگ بالغرفه .
حيدر الكرار -: لحد يلحگنا .
وصوته هالمره حيييل عصبي
حنين سدت الباب بسرعه
حنين -: اجه اجه صعدلچ .
رفيدا -: حنين لا تفتحيله .
حنين -: انه.. انه طالعه انتو اتفاهموا .
فتحت الباب وشردت ..
فاتت من يمه وهوا باوع الها وابتسم وسرعان ما انمحت ابتسامته بس شافني وجهه اسود مدري شبي
فات وقفل الباب علينا وذب چراويته بالگاع ، نزلت من الچربايه وگفت اباوع له وهوا يتقدم علي
رفيدا -: ش.. شبيك صاير شي ؟ .
حيدر الكرار -: اعمامي گالو اثبت شرفها لو شيلها من دارک وآنه يشيلون نعشي ولا اشيلچ .
تقدم علي وآني ارجع ليورا لحد ما لزگت بالحايط
قطرة دم مابقت بيه لأن شكله اليوم ابد مو طبيعي
حيدر الكرار -: اعذريني يا لوعة انتظاري وصلت لحدها وما اگدر ارد بعد ، ما ظلتلي چارة .
ايده راحت تفتح دگم ياخته روحي ماعت من الخوف وجهي اصفر واحمر وازرگ لزمت إيديه واتوسل بي بدمع يجري على خدي :
_ عوفني عليك الله ، والله رجلي بعد ما يشيلني من الخووفف .. حيدررر اسمعنييي لا تخلي كلام امك يأثر بيك وتكسر وعدك حييييدررر .
لزمني من زندي بأيد وبالأيد الثانيه يفتح بأخر دگمه ، ماكو فايده من كلامي تصارعت وياه ردت اعبره واشرد ماگدرت لزمني من طرف دشداشتي وجرني عليه عتيت روحي عت من ايده بس ماكو فايده بحكم هوا اطول واضخم مني ما گدرتله .. جرني عليه و ..
مليحة ::
رحت لباب الحوش الباب مفتوح شويه
مليحة -: اديان.. ادياااان وينچ؟ .
أدور عليها صار ساعه امي موصيتني عليها
گالت لا تخلينها تطلع برا وحدها
مديت راسي وشفتها تلعب ويا سلطان دعبل
اديان تموت عليه وهوا يموت عليها يشيلها يأكلها يغسل وجهها اذا توسخ وامه دوم تگول
_ اديان ل سلطان .
فررررح حيل من راح سواد من البيت والجو صفاله ، سلطان شافني وابتسم
سلطان -: تعالي مليحة خليت اديان تفوز علي لأن هيه جبانه ودائما تخسر
اديان -: الچذاب لا تخسر روحك حتى انا افوز .
ضحكت عليهم .. بس ضحكتي ما طولت
ركزت ب اديان.. شعرها بني مثل شعر رفيدا وعيونها مثل عيونها هم ، اليوم صارلها يومين من راحت بس چنهن سنتين
ابوي الصبح يگعد يمنه يضحك يأكل ويانه و يصيح علينه يشاقينه طبيعي كأنه كلشي ما صاير
بس آني اعرفه بالليل من ننام كلنا يطب للغرفة اللي چانت تنام بيها رفيدا
يگعد بفراشها بمكانها يفتح كنتورها يطلع ملابسها يشمهن ويبچي .. والليله المضت هم شفته اصلا يوميه اشوفه وانهضم وياه عليها
دموعي نزلن وفزيت على صوت امي
نوفة -: مليحة ولچ وين اديان؟ جيبيها كافي يلعبون الدنيا اظلمت .
مليحة -: اديان تعالي ماما تصيحچ .
سلطان لزم ايديها مسحهن بهدومه ونضفهن الها وجابها واجه يمشي هوا وياها هي تباوعلي وهوا صافن عليها ويبتسم
رجعت جوه للحوش يم فجر وامي ديخبزن على تنور الطين و فجر وجها صاير اسود من الدخان ضحكت عليها بگلبي لو بيه حيل جان شمرت الها حچايه وخليتها هسه تطير وراي تكتلني
فجر -: وينچ ؟ تعالي ساعديني الملحة .
نوفة -: لا طبي للبيت .. جيبيلنه مي نشرب .
طبيت فتحت الثلاجه واخذت بطل مي وفتحت الكاونتر ادور دولكه
رجعت انطيت لماما ماي
وهي عينها ع الدربونه عينها على أديان وسلطان يلعبون بالباب ، انطتني الگلاص وتنهدت بحسره
نوفة -: اخوچن شلهب صارله يومين عقله طاير لا ياكل لا ينام يفتر من بيت لبيت يدور عنوان رفيدا راح يتخبل هالولد .
فجر -: البارحة شفته گاعد باب الحوش يبچي عليها .
مليحة -: چان من الاول منع زواجها من هالحقير صنديد وحتى من السيد الا راحت يلا صارت غاليه .
فجر-: يابووويه مليحة صنديد لهسه مارجع من الموصل تدرين اذا رجع وعرف السيد عقد عليها شيسوي ؟ بالقران ليگلب عاليها واطيها على مرته و اهلها .
مليحة -: كلشي ما يسوي هذا افرغ من جيبي بس يهمبل ويگمز هوا لو بي حض چان گال ل رفيدا السيد حيدر اخو مرتي چان ماصار كل هذا بس مطي .. صنديد مطي .
أمي مسحت دموعها بطرف هبريها وگالت بغصه
نوفة -: ياريت ابوچ يقبل چان رحنا شفناها چان رحنا جبناها .
التمينه آني وفجر عليها حضناها وصرنا نبچي احنا الثلاثه
فزينه على دفرة باب الحوش انفتح على عرضه
وفات ذو الكفل يركض وگع بالباب وگام ركض وهم رجع وگع بنص الدرب ، گلبي وگع وياه اني من العصر مو مرتاحه ، امي صاحت بخوف:
_ ذو الكفل يمممه شكووو؟؟ .
ما جاوب انفاسه مگطوعه من الركض گام يركض ومن صار يمنا وگع يم رجلينه على ركبه ويبچي گوه ياخذ النفس
مليحة-: ولككك احجيييي شصايرررر هبطتني اشتعلللل جدككك اي والله .
وجهه مابي قطرة دم وبس يلهث بصوت عالي يريد يحچي مايگدر ، امي لزمته من چتافه صارت تهز بي
_ احچييي شصاير يمممه اخيتك رفيدا بيهااا شيييي ؟
ذو الكفل باوع على امي وبچه بحرگة گلب
وصوته يادوب طلع
ذو الكفل -: يممه.. ش .. شلهب .
امي خلص صبرها طگته براشدي على وجهه
وصاحت بي محترگ كلبها ومايع من الخوف
نوفة -: ولك احجي عدل مثل الاوادم شكووو ؟ شصاير بشلهب تريد تموتني انت؟! احجيييي .
ونطق بالشي ال خله أمي تشگ هدومها و تلطم على وجهها و تصرخ باسم شلهب .. و آني و فجر انهد حيلنا و وگعنا فوگاها نلطم و نعيط ..
رفيدا ::
گمزت اريد اشرد وجرني عليه حيييل انضربت بصدره .. صحت ودموعي تنزل عشره عشره ، أتوسل بي وجسمي كله يرررجف ررجففف
رفيدا-: عووفني حيدر عوفني لا تسويهاااا الله يخليييككك ، خاف الله بيه حيييدرررر ولككك حرااام عليككك لا تسويهاااا لاااا .
سفطني على الحايط وصار گبالي عالي مغطي علي بجسمه الأضخم من خوفي حاوطني من كل جهة واني مفرفحه اضرب بي واناشغ دنگ يم اذني وهمس بصوت ناصي ، مبحوح ويرعد من الخوف علي والعصبية:
_ ما اجيسج بعلي .. بعلي ما اجيسججج علويه بطلييي بچي اثبتييي وسمعيني .
لازمني من ثوبي ما طخ جسمي وأني ادفع بي اريد اشرد من الباب وهوا منين ما اريد اشرد يمنعني بجسمه حتى لا اطلع
رفيدا-: عوفني ولككك عووووفنيييي يممممه ارررريد اميييي اريدهااااا الله يخليك رجعنييي لأهلييي انتوا متأكدين من انفسكم سااادةةة؟؟؟ .
حيدر -: اي نستاهل بويه سبينه سبيني الي سبي هلي احنا مو سادة احنا زمايل آنه وهلي واعمامي زمايل بعلي زمايل ولد زمايل .
رفيدا -: اريد اطلع اريد اهلي .
حيدر -: ولچ سمعينييي .. اذا طلعتي هساع بهاي الدموع ، أمي واعمامي راح يثبتوها عليچ ويگولون مو بت بيت وشردت .. آنه ما اخليچ ما أخلي واحد يمس شرفچ بحچايه گعدي وخلينه نتفاهم يبت الناس .
جايتني مثل النوبة اشهك وأبچي من بين أنفاسي الضايعة صرت أدفع بإيديه الاثنين بكل ما بيه من حيل اضرب بصدره وبجسمه المغطي علي واريد بس افك روحي منه :
رفيدا -: وخررر عني لا تجيسني يا چذاب وخررر تريد تسوي عملتك وتروووح .
وهوا لازم ثوبي من خصري من الجهتين حريص كل الحرص إن أطرافه ما تلمس جسمي ولا يطخني يثبت بيه بخوف ، يريدني بس أثبت يتوسل بيه اسكت ويحلف بصوت يرجف :
_ ولچ علوية اهدي خايبه بروح ابوي ما اجيسچ وجدي رسول الله بس اثبتي هدي روحج بعلي ما اجيس شعره منچ بعليي انه اجيت ادور حل .
اخير شي مل من دفعي وخوفي المو طبيعي رفع ايديه الثنتين وحاوط وجهي بين چفوفه .. ثبت راسي بوجهه بالقوه ، گصته طخت بگصتي وخشومنه انطبگت سوا انفاسه الحارة لفحت وجهي وعطره الغريب شميته ، شفايفه ترجف وهو يبلع بريگه اكثر من مره همس برجفه واضحه على صوته
_ ما اريد اجيسج .. ماااا أريددددننن بعلي ما أسويهااااا وانت مو بالغه ولا برضاتچ ولچ سمعيني دخيلج سمعينييي.. آنه النعنعت عظام صنديد لأن چان يريدچ بالگوه ، شلون ليه نفس احطن چفي عليج وأنت هيچ لايبه ؟؟ .
وصوت لميعة من ورا الباب..
لميعة -: اثبت شرفها ولك حويدر اريدن اسمع زماطك .
هوا ما سمعها عيونه بعيوني ، وهدوء غريب بعيونه الزرگ خلاني اصفن بيهن رغم شهگتي فزيت على صريخ امه مره ثانية وهيه تشجعه يسويها ، شهگت واشرت ع الباب اريد احچي و قاطعني بصوت مبحوح
_ لا تسمعيها سمعيني آنه .. آنه ما اسويها وانت بهذا العمر عمري ما اسويها تثقين بيه ؟ .
هزيت راسي لا إراديا من الخوف من التعب من كلشي وامه من ورا الباب تضرب بالباب بمفاصلها وصوتها يلعلع
_ يلا ولك حويدر لا تخلي اعمامك يحجون علينا
جايين من العماره حتى يشوفون مزامطك لا تخلي العار يلحگنا .. سويها وأرفع راس أمك .
شهگت ودرت وجهي منه ع الباب اريد اعيط
وهو رجع سحب وجهي وخله عيوني بعيونه
_ اشش دخيل الله لا تموتيني انه وياچ مو عليچ عوفيها گتلچ ما اجيسچ لو تنطبگ السما آنه أمانچ بويه آنه أمانچ طول ما آنه هيين وبسدچ محد يدنالچ .
حسيت عيوني بدت تطفى وصرت اشوفه مغوش
طبگت جفني وكلشي صار ضلام .. رجعت فزيت على صوته يصيح بأسمي و يعت بوجهي طابگ گصته على گصتي
_ علويه عاينيلي بس عاينيلي اشتعلووو اعمامي وخلفتهم .
حسيته سندني من ردت اوگع وآني تمسكت بأيديه شهگاتي بعدها تگطع أنفاسي ومن فتحت لگيته يباوعلي بخوف واضح بعيونه ، تنهد بصوت مسموع ارتاحت عيونه من شافني صحيت وهمس بنص رجفته :
_ انه يمهم عزرائيل اذا قهروچ .
_ ويمي ؟ .
_ يمچ ملاك يحرسچ .
_ جذاب .
_ لا وحگ عيونچ يمچ احن ويمهم أشرس .
بلع ريگه بصعوبه وخصلات
شعره نازله على گصته..
_ والله ما ناوي اخوفچ .. سمعيني زين انت شي ماتردي ما يصير إلا برضاچ تمام؟؟ متفقين؟ ها ؟ .
رفيدا -: اريد اطلع..
_ ما اطلعچ وانت بهالحاله خافن تطيحين سمعيني للأخر ساعتها اخليچ تطلعين .
ورا الباب امه تشجع بي وهوا لابسها ولا يرد
شفايفي رجفت بخوف من كلامها السمعته
ابتعد شويه وضل متمسك بطرف دشداشتي
سحبني منها على كيفه وگال
حيدر-: گعدي هين سمعيني خلينا نتفاهم .
رفيدا -: ما اسمع اطلع برا وعوفني .
التفت علي معصب ويأشر بأيده ع الباب
حيدر -: شلون اطلع واعمامي جوه ؟ شلون اطلع وأمي واگفه ورا الباب تريد دم ؟ اذا طلعتي هساع راح يثبتون حچيهم عليچ .
شهگت بصوت مسموع وعيوني مورمه وشعري مخربط ، هوا رجع ليورا بسرعه و رفع إيديه الثنين بالهوا حتى اشوفهن..
حيدر -: عايني ايدي بالهوى ما اجيسچ .. ما اريدن ادنالج ابد ما اريد بعلي .
سحب كرسي وگعد گبالي بس بعيد عني خله ركب ايديه على رجله و راسه بالگاع وهوا يحچي
حيدر -: سمعيني بس سمعي هالچلمتين مني امي تريد دم اعمامي زمايل يقيسون الشرف بالدم و إذا ما سوينا شي هساع ، راح يطبون علينا ويأخذوچ مني .. اقصد من بيتي .
رفيدا -: ش.. شتسوي ؟ .
سكت واني عيوني مورمة وريگي ناشف وهو رافع راسه ع السگف يفكر ويهز برجله عيونه حمر مثل الجمر تعبان ، شافني متوتره واصابعي غارزتهن بلحم ايدي نزل عيونه على ايدي وحچه يطمني :
_ لا تخافين مو لبالچ بعلي مو لبالچ وحگ جدي رسول الله مو لبالچ .
ما صدگت گلبي يدگ الف دگه بالثانيه
صحت بوجهه وآني ارجف
رفيدا -: لعد شنووووو احچيييي احجي لا تسكت لا تموتني .
انضرب الباب وصوت أمه من وراه توز بي مثل الحيه
لميعة -: ولك حويدر شمنتظر؟ ولك دمها يغسل عارها لا تخلي اعمامك يصعدون هساع ويفضحونه .
لزمت طرف الجربايه واظافري غرزت بيها گمت أرجف وما أگدر أتنفس ، دموعي نزلت لحالها
وهوا متجاهل امه عينه عليه آني وبس گام فجأة آني فزيت ليورا لزگت بتاج الجربايه :
رفيدا -: لاااا لاااا والنبي اصيح وافضحك .
راح للكنتور فتح الباب الأول ، دور بي مثل الخبل ذب الملابس بالگاع ما لگه شي راح لجرار حنينة مال المكياج والحاجات يبحوش بي ، طلع مراية صغيره مربعه ، شهگت وعيوني توسعت
رفيدا -: ش.. شتسوي بيها؟؟ شتسوي ؟ .
اجه بأتجاهي وگف قريب مني وهمس
_ اريدن اكسرها وامي واگفه ع الباب خافن تسمع عيطي بعلو صوتچ وابچي مثلي علمود تغطين على صوت المرايه وهي تتكسر .
رفيدا -: شلون ما اگدر .. ما اگدر اعيط .
دنگ يمي ، عينه بعيني وهمس بتوسل
_ سويها بس هالمره علمودي حتى اسدن حلوگهم عنچ وكسري الغراض حتى حسبالهم آنه الجاي أكسر .
بلعت ريگي وغمضت عيوني ولميت كل القهر والخوف والصياح الچان مخنوگ بصدري من الصبح لليل وصحت بعلو صوتي لحد ما حسيت حلگي انشگ
رفيدا -: لااااااا عوفنيييي لا تجيسنييي الله يخليك حيدر عوووفنييييي .
وضربت بإيدي ع الميز وگعت المزهريات واتكسرت ، گمت اضرب كلشي گدامي غراض حنينة ، كنتورها ، مكياجها ع الميز .
رفيدا -: أبوس ايدك لاااا عوفني اريد ارجع لأهليييي .
هوا فاتح حلگه عليه مصدوم يباوعلي عبالك أول مرة يشوفني ، من بين العياط همستله وآني أبچي
رفيدا -: شبيك يلاااا أكسرهاااا .
ورجعت عيطت اقوى حتى أغطي عليه وامه فرحانه ورا الباب .. عبالها ديسوي التريده
هو ضرب المرايه بالگاع وصوتها اختفى جوه عياطي ، تطشرت وگزازها ترس الكاع ترس
سكتت انفاسي انگطعت شفته شايل گزازه چبيره حادة تلمع بإيده ، الدم نشف بوجهي
رفيدا -: شتسوي بالمرايه ؟ .
ما جاوبني ، اجا يم الجربايه بصفي ، وبهاللحظة سوى شي ما توقعته بحياتي .. نزع دشداشته بسرعه ، ضل بس بالفانيلة البيضه والشورت زنده بين گدامي عروگه طالعة وگصته تصب عرگ رفع الگزازه وجرها على زنده من فوگ خله الدم يصب عبالك نافوره ..
رفيدا -: شسويت بروحك عزاااا .
الدم نزل على فانيلته ركضت ادور شي
رفيدا -: وين الوصلة وين دمك دمك دا ينزف ولك دمك .
هو بارد بس عينه ع الباب ويسمع صوت أمه
_ هذا كلينس ماله داعي .
سحب كلينس من يم تاج الچربايه ضغطه على جرحه ، ضل ضاغط لحد ما انگطع الدم شويه شاله والكلينس انترس صار احمر كله
لبس دشداشته بسرعة ، ضم الكلينس المليان دم بجيبه وشال جراويته يلف بيها گدام المرايه وكل شويه ينلچم من ايده بس يسوي روحه طبيعي
وآنه بس فاتحة حلگي عليه ، مصدومه دموعي بعدهن على خدي
حيدر الكرار -: لمي الگزاز بساع .
دنگت ، مديت ايدي اريد المه وتوا اريد الزم اول گزازه و استوقفني صوته
_ لا تدنگين جدامي .. انه المه
رفعت راسي اباوعله اجه دنگ وصار يلم بالگزاز وحده وحده بإيده السليمة يلم ويحط بصفحه حتى اصغر فتافيت الگزاز لمها ما خله وحده ، رحت جبت كلينس ومديته اله
رفيدا-: هاك لمهن بي .
اخذ الكلينس من إيدي بدون لا يلمسها فتحه وصار يخلي الگزاز المكسور بداخله ، من خلص لفه شويه شويه وخلاه بجيبه
رفيدا -: ليش بجيبك؟ ليش ما نذبه بسلة الزباله ؟
باوع للباب وصوت امه بعده واصلنه من غرفتها يمه شكد صوتها عالي ، گال بصوت ناصي :
_ حتى لحد يشوفهن هين ويكشفنه اذا شافوا الگزاز بالزباله راح يعرفون ويخرب كلشي سويناه اخليهن بجيبي من اطلع اذبهن برا بمچان بعيد .
عدل دشداشته ع المرايه وطلع عطر بشيشة صغيره لونها خضرة من جيبه مسح منه على رگبته وشريان ايده وعلى شواربه نفس العطر الي أشمه بي كل مره
واجه وگف گبالي قريب حيل لحد ما صرت أشوف عروگ رگبته ، باوع على وجهي الأصفر ، وهمس :
_ لمي شعرچ و مسحي دموعچ آنه جاي أستغفر ربي الف مرة بالدقيقة من وراچ واگولن بعدها زغيره .
_ زغيره ؟ شتقصد ؟ .
_ ها لا يعني لتبچين بويه لتبچين بعدچ فرخه .
باوعتله بطرف عيني لميت شعري بإيدي ، كله داخل ببعضه ومتشابك رديته ليورا بإيدي الثنين اخذت الشال من الگاع نفضته نفضتين ولبسته
احس خشمي حار واحمر وعيوني مورمه واني اباوعله نضراته لخشمي لخدودي لعيوني المنفوخه شككتني بنفسي وفجأه مات من الضحك
رفيدا -: شبيك؟ شكو تضحك؟ .
_ لا ماكو شي بس اتذكرت شكلچ من طبيت عليج .
_ تضحك حضرتك؟ ماشفت روحك شلون طبيت علي عبالك جونسينا .
صار يكح من گد ماضحك
رفيدا -: حيدررررر .
_ لا صدگ تعرفين تمثلين انت فد شي .. آنه انبهرت حسبالك انت التردين تتأكدين من شرفي من يمي خفت .
رفيدا -: لعد شسوي؟ انت گلت عيطي و آني شفت كل الافلام التركية بهاي اللحظة .
_ لو مسوين اختبار للتمثيل بالعراق چا انت اخذتي الأوسكار بالبچي واللطم وطبعا ما ننسى جائزة الثول ( وغمزلي ) .
ضيگت عيوني بوجهه وتخوصرت..
_ تستهزئ ؟ .
_ لا بعلي بس لو شويه مقللة البهارات يعني من گلتي "ابوس إيدك عوفني" چان صوتچ واصل للحلة .
نرفزني.. رفعت اصبعي بوجهه توا اريد احجي و اندگ الباب قوي ، اثنينه فزينه
لميعة-؛ ولكم شصار؟ شسويتو؟ فتحووو المهجوووم .
اني وياه باوعنا لبعض ، الضحكه انمسحت بثانيه
مسحتها لميعة ام اللمع ، وهوا رجع همس بسرعه
_ سمعي ولج يالبلوه ، هاي السالفة بيناتنه لا تحجينها حتى لحنينة ، سمعتي ؟ .
هزيت راسي بسرعة وآني اعدل بالشال
_ صار صار والله ما احچي .
ضيگ عيونه بوجهي
_ الچذابه عيونچ مال وحده راح تروحن تركض لحنينة تحچيلها كلشي بالتفصيل الممل مع البهارات .
رفيدا -: لا الله .
_ وحگ علي آنه قريتچ من گلتي "صار" معناها بعد خمس دقايق حنينة راح تعرف انه جرحت روحي .
رفيدا -: لاا مو هيچ بس شويه يعني حنينة اختك ولازم تعرف ان انت بطل .
حط ايده على راسه خليته
يروح ويرد بالغرفة خبلته
_ يا بطل يالبلوه سكتي بس اليوم .
_ صار ما احچي بس .. اگدر أحچي ل حنينة .
_ هاي البلية الابتلينه بيها .
_ اهووو شبيك ما احچي لحد دا اشاقه .
_ آنه متأكد هساع حتى طباخ بيتنا راح يعرف بالسالفة .
باوع للباب سمع صوت امه برا نزلت جوا تحجي ويا اخوانه ، ورجع باوعلي
_ سمعيني لچ آنه طالع وبليل ارد اذا رديت و لگيتچ ما ماخذة حگچ و حگ علي اسوي شي ما يسرچ .
صفنت ذيچ الصفنه وبعدين استوعبت يقصد امه
يممه عزااا عزااا
رفيدا _ شلون ؟ .
_ شلون شنهوو؟ تگومين توگفين جدامهم و تاخذين حگچ حچايه بحچايه هم گالوا نبوس رجلها اذا طلعت شريفه وهساع صار دورچ تردين اعتبارچ .. مفهوم ؟ .
فتحت حلگي ، عقلي وگف معقوله
يريدني اتعارك ويا امه ؟ لا لا زحمه
رفيدا-: يا حق؟؟ معقوله تشجعني آخذ حقي من أمك؟ من امك سيد ؟ .
تقدم خطوتين ونزل راسه لمستواي ، عيونه صارت بوجهي يحجي بهدوء
_ اي منهااا مو هي گالت احبن رجليها؟ روحيلها اخذي حگچ و إذا اشوفنچ تبچين و ساكته ياعلي شسوي بيچ لأخليچ تتندمين ع الساعة السوده العرفتيني بيها يلااا .
دنگت راسي العب بأصابعي وهمست بخوف
رفيدا -: واذا .. اذا احد ضربني ؟ .
مد ايده لزم حنچي و رفع راسي خله عيوني بعيونه
_ طگيهم اكتليهم دافعي عن نفسچ لا تسكتين لواحد .
رفيدا -: لا ما اگدر .
ضغط بأيده على حنچي وهوا يحچي
حسيته قسى وعيوني دمعت وبرطمت
حيدر -: الا تگدرين واذا رجعت وما لگيتچ مسويه شي اكتلچ بعلي اكتلچ وادفنچ بأيدي ولا اشوفن دموعچ .
رفيدا-: تكتلني ؟ .
رخى إيده من حنچي و خلاها على خدي
مسح دمعتي بإبهامه وهو يتأمل عيوني ..
_ اي وابو راس الحار اكتلچ وانهضم يم گبرچ العمر كله ولا اشوفنهم يبچونچ ، انه اگدر اتصرف بس اريدن ازرع بيچ قوه ضعفچ هذا مخوفني عليچ .
مسح دمعتي بإبهامه من خدي الثاني و بقى إبهامه ثابت على خدي ، نزل عيونه على شفايفي الترجف من البچي .. و همس بحنية :
_ لا تبچين اريدچ قويه بس يمهم و يمي ابچي مثل ما تردين ابچي يمي آنه بس جدامهم لا .. لا تنطين دموعچ الهم حطي اصبعچ بعينهم وافگسيها .
من بين شهگاتي همست
_ سيد .
همس وهوا دايخ بتفاصيلي:
_ يا رفة روحه يا عشگ صباه .
_ شكرا لأن تقويني عليهم .
_ اگويچ على الدنيا كلها وانه الضعيف يمچ .
جسمه ثگل عيونه نص مفتوحة ، فجأة سمع دگ الباب .. فز رجع لوعيه ، وابتعد عني يستغفر
راح فتح الباب وامه فاتت مدرعمه ، دشداشتها سوده و عيونها تفتر بالغرفه ، باوعتلي من فوگ ليجوه وگالت
لميعة -: ها شصار ؟ حمامة لو غراب ؟ .
حيدر طابگ حواجبه ولا باوع بوجها ، طلع الكلينس من جيبه ، وشمره عليها حچه وياها وهوا يسد بدگم ردن الدشداشه
حيدر -: شريفة يمه البت شريفة وبت اصول ظلمتيها هذا شرفها عايني بعينچ .
فتحت الكلينس شافته و عيونها لمعت ابتسمت ابتسامة نصر ، ضمته بسرعة بجيبها وگلتله عمامك ينتظروك بالديوان ، طلع وعافني اني وياها
گامت تفتر عليه تتفحصني من فوگ ليجوه بعيونها الي تجدح شر
لميعة -: وهساع اتاني الضنه منچ يچنتي .
رفيدا -: هااااا؟؟ .
اشرت بأيدها على بطني
لميعة -: اريدن الضنه اريد اشوفن خلفة حيادر يمته اسمع بيچ حبلى ؟ .
رفيدا -: نععممم؟؟ .
لميعة -: وإذا طلعتي ما تحبلين تعرفين شأسوي بيچ؟ ازوجة عليچ اربعه بعلي .
ورفعت اربع اصابع بوجهي غمتني بيهن
همست بيني وبين نفسي ، بس صوتي
طلع مسموع شويه
رفيدا -: منين احبل من زرف الحايط ؟ .
طبگت حواجبها وتخصرت
لميعة -: شگلتي؟؟ شگلتي ولچ؟ .
رفيدا -: گلت صار عمه احبل .. احبل بتوم مو بس واحد .. توم ولد .
ضربت على صدرها ورجعت غمتني
لميعة -: عمه العماچ لا تگولين عمه انه مو عمتچ .
تذكرت كلام السيد وگلت لازم اطبقه حتى اعيش
ف استهزيت بيها ، سويت حركة مال أميرات :
_ حاضر مولاتي لميعة خانم .. تأمرين بشي بعد جلالتچ؟ .
لميعة -: تستهزئين حضرتچ ؟ .
رفيدا -: لااا ابد آني أستهزئ؟ آني الفقيره الحبابه الي راح تجيبلچ دستة جهال من السيد .
لميعة -: صميلي حلگچ ومن اليوم تاكلين بيض عرب ودهن حر حتى تحبلين .
اييي تتأمرين على راسي يالعرمه اني الچ
لفيت شعري على اصبعي برطمت وهمست
رفيدا -: عمه اني عندي حساسية من البيض .
لميعة -: گلت لا تگولين عمه! .
رفيدا -: حاضر خاله لميعة .. تاج راسي .
اشرت لي ع الباب وهي لاويه حلگها گالت
لميعة -: امشي جوه .. سوي چاي راسي يوجعني وغسلي المواعين .
رفيدا -: آني؟؟ مواعين؟؟ آني ما اعرف اغسل مواعين.. آني بالبيت حتى ماي ما اصب لنفسي .
لميعة -: تتعلمين يلااا جدامي .
رفيدا-: لا لموعة ما يصير العوبات اولا .. اقصد السيدات المحترمات اللي مثلچ .
گلت هيچ وطلعت اركض تريد تضربني ما لاحتني
نزلنا من الدرج ، لميعة صارت گدامي تمشي واني وراها گوه امشي دشداشتي طويلة واخاف اوگع..
بنص الدرج عيني إجت ع الصاله حنين متمدده ع القنفه وبإيدها موبايل بس عينها عليه من شافتني فتحت عيونها وبدت تأشرلي بحواجبها ترفع حاجب تنزل حاجب تغمز تلمز يعني "شصار؟ سويتوها ؟"
ما گدرت احچي بس أشرتلها بإيدي حطيت إيدي على حلگي وسديته يعني "اسكتي لا تحجين هسه ننفضح " وهي الثوله ما فهمت ، رجعت غمزت اقوى صارت حواجبها تتگامز وحدها
وبهاللحظة مغوار گاعد ع القنفة الصايره گبالنه اني وحنين شاف حركاتنه باوع لحنين وحواجبها ترگص وباوعلي آنه أأشر من ورا أمه مثل الحرامي شرگ بالچاي وگام يگح
لميعة التفتت عليه:
لميعة -: شو بس تشرگ انت ؟ ولك خايب مغيوور بسلا مصيوب ولكك .
مغوار -: لا يمه الچاي حار .
جرتني من إيدي بكل قوتها
لميعة -: تعالي وراي تعالي للمطبخ اليوم أعلمچ شلون تصيرين مرة .
طبينا للمطبخ و مواعين تارسة السنك للسگف جدرية محروگة طماطة بالگاع ، حسيتها هيه سوت هيچ عمدا ، اشرت لي ع السنگ
لميعة -: يلا اغسليهن
فتحت حلگي مصدومه :
_ هذني كلهم عمه؟؟ .
لميعة -: عمه العماج شگد گلت لا تگولين عمه .
_ اسفه مولاتي .. يعني هذني كلهم آني اغسلهن؟ .
لميعة -: اي انت واذا ما يلمعن لمععع اخليچ تلحسيهن بلسانچ .
رحت للسنگ لزمت الليفة وتعمدت اسوي روحي ما أعرف منين ابدي لزمت صحن بي زيت وگلت
رفيدا -: عمه.. عفوا جلالة الملكة هاي الليفة شلون ينشغل بيها؟ .
لميعة -: خلي عليها زاهي وافركي يالخايسه .
عصرت البطل كله على صحن واحد وصارت الرغوة للسگف
رفيدا -: هيچي كافي؟ .
لميعة -: لچ يالمفهيه شسويتي خلصتي الزاهي من عساچ لا حبلتي كوون .
باوعت الها بعيون بريئة من اعماق شروري وهمست
رفيدا -: عمه آني عبالي كل ما أكثر زاهي يصير انظف .
_ لا تگولين عمه .
_ حاضر عمه .
ضربت على رجليها ، شاطت
_ راح تجيبلي جلطة هالبت .
_ حاضر حبوبه .. حاضر خالة لموعة .
_ لموعة؟ منو لموعة ؟ .
_ انت ادلعچ يعني لميعة لموعة لموعتي .
_ شني هازة كاروكي ولچ ؟ .
باوعتلها بنفس العيون البريئة وهمست
_ لا عمه اني اهز اعصابچ منا وهيچ .
_ منا وهيچ ها؟؟ آنه منا وهيچ راح أهز النعال على راسچ .
هزيت الها چتفي و ملت عليها
_ عمه انت كلچ هزاز .. لسانچ هزاز نعالچ هزاز بقت بس روحچ بلكي يهزها ملك الموت وارتاح .
گرصتني من چتفي قوي
_ لا والله انت لسانچ هزاز و عقلچ هزاز و چتفچ هزاز .. بس بختچ ؟ اخخ يا بختچ ثابت ما يهتز .
تذكرت السالفه واني اجلف بالمواعين و صفنت مخمختها بعقلي وگلت لازم افجر القمبله
_ اگول خاله لموعة.. مو انت گلتي اذا طلعتي بنت بيت ابوس رجلچ؟ ها؟ مو گلتيها؟
_لا چا شوكت گلت انه ؟ .
مديت رجلي ليگدام و رفعت دشداشتي شوية
_ لا عمه لا تنكرين گدام ولدچ گلتيها يلا بوسي و اعترفي اني بت بيت و احسن منچ .
لميعة -: ابوس رجلچ؟؟ انه لميعة ابوس رجلچ؟؟ تعالي هين ولچ .
و كفختني على ظهري بأيدها التگول ايد ثور
شهگت بس ما بچيت وگفت عدل و عيوني صارن حمر من القهر ، بداخلي تذكرت من حيدر گال "لا تسكتين عن حقچ .. اذا انت على حق احچي "
رفيدا -: بعد ما يفيد الضرب عمه آني على حق و الحق ينوخذ مو ينضرب اذا ما تبوسين هسه والله اسوي سواية شكبرها واخلي عربكم يگولون مرت السيد دچت عمتها .
السچينه بأيدي وجهتها عليها
وايدي كلها رغوه تضحككك
_ تهدديني ولچ ؟ .
_ لا ما اهدد اطالب بحقي بوسي و خلصيني عندي شغل .
ورجعت مديت رجلي ، تخبلت عيونها گمزن برا
جرتني من ايدي وشمرتني برا المطبخ
لميعة-: اذا ضليتي يمي راح اتسودن من تصرفاتج شنو شاف منچ ابني المسودن روحييي لا تراويني وجهچ .
رفيدا -: صار عمه ما اراويچ وجهي بس لا تنسين آنه راح احبل بتوم .
لميعة -: راح تجلطني رسمييي اطلعييييي براااااا عساچ لا حبلتي بت شويكرر .
وگفت بالباب و رجعت هزيت چتفي اقوه و ابتسمت ابتسامة مستفزة
رفيدا -: عمه شبيچ معصبة؟ لعيونچ اذا حبلت بتوم واحد راح اسميه لميعة و الثاني لموعة حتى كل ما اصيحلهم اتذكرچ و اترحملچ .
لميعة -: نعمممم؟؟ .
كملت و واني حاطة ايدها على بطني
_ اي و راح اعلمهم اول كلمة يگولوها مو ماما و بابا يگولون لموعة هزازة النعل .
نزعت شحاطتها وشالتها واجتني
_ ولچ بتتتت ال... ام الهززز ساجده عبيد اطلعييي .
واني اركض اشرد منها گتلها :
_ عمه لا تنسين تبوسين رجلي قبل لا احبلللل هيهيي هههاااييي .
وختلت ورا مغوار و حنين بالگوه فكوني منها
النوب اني تلبست بسبب ابن الروسية لبسني جني
واني خاتله ورا القنفه واسولف وياها
رفيدا -: لااااا عمه لااا لا تقتربين تره لبسني جني روسي اذا ضربتيني هسه الجني الروسي يهز النعال عليچ من صدگ .
حنين -: يمه عوفيهااا بعدها زغيره ماتعرف حيادر ميقبل تجيسيها حبااابه ماما .
رافعة الشحاطة و تصيح
_ شوفيهاااا عاينيلهااااا مرت اخوچ تريدني احبن رجلها ولكمممم هدوووني عليهااااا منين اجيبلها حنية وهي رجلها ممدودة جدامي .
و مغوار منين ما تريد تعبر امه يروح منا و يگمز منا ما يخليها تجي علي ، وجهه صار ازرگ من الضحك
مغوار -: يمه يمه طولي بالچ .. اعتبري رجلها انباست و خلص .
لميعة -: شلون اعتبرها انباست؟؟ خايب ولك مغيووررر .
باوعلي وجهه ازرگ من الضحك ما گادر يحچي
مغوار -: هههههههههه يمه .. هههههههه. هيه رجلها نظيفة بوسيها و فضيها .
صحت من ورا ضهره
_ اي عمه بوسيها تره نظيفة البارحة ابنچ غسلها بمي وملح .
لميعة -: ولك مغواارررررر هاي هم سحررررتلككك ادنةةةة عنهاااا خليني اشوفن شغلي بيها .
مغوار -: والله ما ادنه اذا عبرتي تاكلين البت و حيدر ياكلني آنه .
لميعة -: ويا منو انت ولك ؟ ويا امك لو ويا هاي الهزازة؟ .
مغوار -: يمه والله آنه ويا الحق .. وياچ طبعا بس..
لميعة -: بس شنهووو ولككك خايب بس شنهوو ؟ .
مغزار -: بس حيادر موصيني گال اذا امي هدت ع الداهيه انت اوگفلها لا تخليها توصللها .
طلعت راسي من ورا مغوار وصحت
_ شفتي عمه؟ حتى ابنج موصي عليه يعني اني مو اي وحده .
لميعة-: حيدر موصيك عليها مني آنه؟؟ ابن بطني يوصي عليها حتى لا اضرب مرته ؟؟ ولكمممم خايبين جيبوووليااااه .
حنين شافت الوضع تأزم لزمت ايد امها وسحبتها
حنين -: يمه تعالي تعالي فوك .. اخذچ لغرفتچ اشربچ مي عفيه حيادر هساع يجي ويشوفچن متعاركات على بوسة رجل .
تلعلع وهي تنسحب بالگوه وحنين تجرجر بيها
لميعة -: شسوي بالمي؟؟ انه اريدن ابلع رفيدا مو مي عساها لا حبلت بتوم .
رفيدا-: درزن ان شاء الله عمه درزنننن مو بس توم .
من الدرج صاحت بيه
_ بتتتت شووويكرررر .
حنين اخذتها فوگ و مغوار لزم قميصه يمسح حلگه بي ويضحك عيونه مدمعه
مغوار-: رايحة على امي ترديها تبوس رجلچ؟ امي تبوس رجلچ؟؟ امي حتى ابوي ما باسته .
وطلع يهز براسه ، واني رحت للمطبخ اكمل جلف
اول ما اخذت الليفه فاتت حنين واجتني ركض
لزمت ايدي تمنعني
حنين -: لااا لا تجلفين .
_ ليش ؟ .
حنين -: انت عروس ما يصير و بعدچ تعبانة ورجلچ تأذيچ گعدي .
اخذت الليفة من ايدي وگعدتني ع الكرسي اللي بالمطبخ وبدت تجلف بالمواعين البقت ايدها سريعه ولسانها اسرع منها ، ضليت صافنه عليها شلون محبوبة هالبنية تحچي وتضحك وحدها
_ حنين .
_ همم؟ .
_ كيلاس شتقرب الكم .
_ كيلاس بت خالتي .
_ بت خالتچ ؟ .
_ اي ابوها ذباها على خالتي من هي وزغيره عافهن ورجع لكركوك .. خالتي ربتها .
_ كركوك؟ .
_ اي ما شفتيها شگد بيضه ؟ تشبه الكرديات ما تشبه خالتي .. خالتي سمرة وهي بيضة مثل الثلج عيونها زرگ .
حنين : بس كيلاس مو طبيعيه ترا .
_ ليش شبيها ؟ .
_ عدها حالة اسمها الافشاء القهري تحچي كلشي ، بدون تفكير .
_ شلون يعني ؟ .
_ يعني بس تشوف اي احد تحچيله كلشي اسرارها ، همها ، كلشي كلشي مو لان تريد تحچي بس لان من هي زغيره ابوها چان يضربها ما انطاها اهتمام ، ف هسه صارت تحچي حتى احد يسمعها ويبقى يمها وتحس الكل يحبها حتى الما يمها ولا بدربها .
اتذكرت من گعدت يمي وصارت تحچيلي ع السيد بدون توقف وتمدح بي وهوا بالصوره چان ولا يضحك وحواجبه متعاركات ولا مباوع بوجها
_ وين ساكنة هسه هيه ؟ .
_ هين بنفس الفرع مالتنه من تفتحين الباب بيتهم بوجهچ يصير .. بيت خالة بديعة ام كيلاس .
هزيت راسي وباوعت للمطبخ فارغ وحتى البيت مابي احد
_ وين البقية؟ سهام وكفاية وهديل واخوانچ؟ .
_ البنات راحن يم خالة بديعة ام كيلاس واخواني كلمن راح لشغله .
رفيدا -: اخوانچ شنو يشتغلون ؟ .
_ ذو الفقار عنده معارض سيارات وأبا الحسن دكتور أسنان وأبا الفضل طالب جامعي آخر مرحلة ومغوار هم جامعة بس اليوم غايب چان عنده امتحان وغلس .
_ والسيد ابن الروسيه ؟ .
_ ابن الروسية طالب ماجستير انكليزي بجامعة بغداد الامريكان رشحوه للعمل بعد ما عرفوا مستواه بالإنكليزي لان لغته فول ومثقف خلوه مترجم القائد الامريكي والمسؤولين العراقيين بالمنطقة الخضراء راتبه بالدولار وعنده باج يدخل الخضراء و عنده حماية امريكان ، وسيارة مصفحة خاصة اله توديه وتجيبه للجامعة .
_ واذا تسألين عن شغله الخاص عنده مكتب تعقيب معاملات مال جوازات وفيز مكتب صغير بالمنصور يمشي معاملات العراقيين الي يريدون يسافرون لامريكا واسطته وعلاقاته تفتح الأبواب بس القرار الأخير يبقى للسفارة الأمريكية .
هيه تحچي واني بس اهز براسي
ابن الروسيه طلع داهيه
حنين -: حيادر اكثر واحد طموح ويحب يدير اكثر من وضيفة ومعروف اكثر حتى من ذو الفقار .
_ وانت ما تدرسين؟ وخواتچ؟ .
_ ياااا لا ما ندرس اعمامي ما يقبلون هما شويه مسودنين وعدهم عقد نفسية بالشرف يگولون البت اذا درست تفسد ف گعدونه بالبيت .
سكتت اباوع عليها وهي تجلف بالمواعين والسنك وتنظف وتسولف تسولف ما تمل والله شگد محبوبه
رفيدا -: لعد وين ميرج مرت ذو الفقار ؟ .
حنين -: ذو الفقار بيته خارجي يعني بنفس الحوش إحنا بس بيتهم معزول عنه إله باب وحده ميراج ما تطلع كلش .. تحب العزلة .
واحنا نسولف اندگ الباب..
حنين -: رفرف فدوه روحي فتحي الباب ايدي كلها زاهي .
رحت فتحت الباب وبوجهي طلع سليم صاحب حيدر الكرار
لابس دشداشة سوده لحيته خفيفه وبإيده باكيت جگاير من شافني ابتسم وعدل وگفته
سليم -: اهلا بالعلويه .
_ هلا ، تفضل! .
سليم -: وين حيادر ؟ .
_ ما اعرف ، طلع .
مد راسه جوه يباوع بالبيت
سليم -: اي .. طبعا ما تعرفين هوا إيمتى يگعد بالبيت من وره سوالفچ ؟ .
تذكرت كلام حيدر براسي يرن "أخذي حگچ لا تسكتين "
_ شنو قصدك ؟ .
باوعلي وهالمره حچه بصوت ناصي حتى حنين ما تسمعه من المطبخ لأن سمع صوتها تغني
سليم -: قصدي حيادر چان اله مكانته وچان اله هيبة بين الوادم هساع من وره زواجچ منه صار بعينهم ما يسوه خطيه .
ايدي رجفت بس ما نزلت راسي مثل ما علمني
رفيدا -: آني ما جبرته يتزوجني هوا اللي .
قاطعني
سليم -: هوا شنو ؟ هو إنغش بيچ حسباله بت عالم وناس وطلعتي ..
وسكت ما كمل بس عينه كملت كل الحچي
ابتسمت و باوعتله من فوگ ليجوه
رفيدا -: اي صح انغش حيدر عباله مصاحب زلمه طلع مصاحب وحده لسانها اطول مني ومسويه روحها زلمة علينه اسمها سلومه ، يلا حبيبتي سلومه ماعندي وقت اضيعه وياچ .
توا اريد اسد الباب بوجهه و سمعت
صوت حنين من المطبخ
حنين -: منو بالباب رفرف ؟ .
سليم ابتسم و رجع صوته عالي وحباب
ولا تأثر بالفشاله شگد صلفف
سليم -: آنه سليم .
رفيدا -: لا تهتمين حبيبتي هذا واحد خطية جاي يدور على رجولته ضايعة ودازته امه يدور عليها هنا واني دا اگله ماكو هنا روح دور بغير مكان .
انصدم فتح عيونه وحلگه عباله ما اگدر ارد عليه
وجهه صار احمر من العصبيه وراها سمعنا صوت حنين اجت
حنين -: ياااااا هذا سليم ولج عزااا هههههههههه .
سليم يريد يرد بس بلعها لأن حنين اجت
سليم -: لا ماكو شي چنت دا أسئلها على حيادر .
وباوعلي بنظرة معناها " تونا بدينا "
واني باوعتله بنفس النظرة " اي نبدي شعدنا "
رفيدا -: وحيدر مو موجود من يجي اگله صاحبك اجه وسئل عليك .
حنين -: فوت جوه سليم حيادر ما يطول .
سليم -: لا عندي شغل بس گولي لحيدر صاحبه اجه ومرته استقبلته احلى إستقبال .
وابتسم ابتسامة مليانه شرور
انطاني ظهره وراح ، گلبي يدگ بسرعة بس اول مره احس روحي قويه ، سديت الباب وحنين لزمتني
حنين -: شگالچ؟ وجهچ احمر شو .
ابتسمت ودنگت راسي..
اول مره من يومين ابتسم صدگ
رفيدا -: ما گال شي بس ذكرني بكلام السيد .
حنين -: ياااا عيني وشگالچ السيد ؟ .
رفيدا -: گال أخذي حگچ مربع وآني هسه اخذته .
حنين -: مالچ غرض بي هوا هيچ يحب يتشاقه .
رفيدا -: يتشاقه؟ هاي سلومه تتمنى تذبني بالشارع .
ماتت ضحك وجرتني للحوش فتحت المي مال الصونده وگامت تغسل برجليها ، ركزت بحديقتهم
شگد حلوه چبيره وبيها مرجوحه خشب و زرعات بسنادين واشجار عاليه تخبل مزروعه ويه طرف السياچ
حنين -: تعالي وجهچ صار طماطيه .
رفيدا -: لا ما اريد..
ما سمعتني خلت إيدها جوه المي غرفت منه و بدت تفرك وجهي ، تفرك بي عبالك تغسل لجاهل
حنين -: غمضي .. غمضي عيونچ .
_ حنيييين المي بارد .
_ اي حتى تصحصحين شبيچ ناسية روحچ من امس صايره چنچ بيبي هلاله .
وتفرك وتفرك واني ميته ضحك
المي ينزل على هدومي
_ حنين كافي جلفتي وجهي جلف .
_ لا خليچ صرتي حلوه هساع ، شويه شويه تصيرين تشبهين كيلاس ولموعة ترضى عليچ .
مسحت وجهي بطرف شالها وهي تضحك
رفيدا -: سليمه شيقرب إلكم؟ .
حنين -: ههههههههههه ابن عمي ، احنا اصلنا عمارچية اعمامي كلهم ساكنين بالعماره بس هذا سليم اجه واستقر هين لأن يحب بغداد يحب حضارتها .
رفيدا -: لاحظت ما تحچون بغدادي قوي .
_ اي وعدنا عرگ انباري هم .. ابو ابوي متزوج ثنين جدتي عمارچيه والثانية انباريه ما سمعتي مغوار يسولف انباري يقلدهم ؟ .
رفيدا-: و لموعة هم من العماره ؟ .
حنين-: لا لموعة بغدادية ابوي خذاها عن حب اجه من العمارة علمودها واهلها ما قبلوا ينطوها الا يستقر ببغداد وابوي قبل وعاش هين لهذا تشوفين لهجتنه كوكتيل عمارچية وبغدادية .
هزيت الها راسي و رجعنا للمطبخ سوينه اكل
وگعدنا ناكل وهي تحچيلي على حياتهم ومنطقتهم وعاداتهم وتقاليدهم ووو هواي حچت .
النهار گضه هنا وهنا صعدنه نضفنه الغرفه مالتها اني وياها النثرها السيد وضليت وياها من الصالة للغرف ومن الغرف للحمامات .. اساعدها بشغل البيت بس عقلي مو يمي..
لميعة فوگ من صارت السالفة لهسه ما نزلت باب غرفتها مسدود اسمعها مرات تدردم وحدها وتسب بيه وخايفه يرجع ابن الروسية ويسألني اخذتي حقچ؟ شنو اگله ؟
مليحة ::
ذو الكفل -: يمه شلهب .. شلهب اتخبل ، اخذ سلاح ابوي واول ما صنديد رجع من الموصل طب عليه للمحل، خلى السلاح براسه گاله احچي وين بيت السيد حيدر؟ وين ضامين رفيدا؟ إلا اطشر راسك هسه.. صنديد خاف وانطاه العنوان ، وشلهب طالع لبغداد ومسوي حادث وما ندري وينه هسه! .
امي تلطم على راسها وتبچي واحنا بس نريد نثبت ايديها حتى لا تأذي روحها وهيه ماكو روحها فرفحت
ذو الكفل -: يمه اخوييي يمممه مارحت وياااه تعممهه عينييي يمممه قبل لا يروح گال إذا ما أنحر حيدر وأجيب رفيدا منهم ما ارجع يمه راح اخوووي راح خسررررته .
أمي شگت دشداشتها من الدلعه ولطمت على وجهها
نوفة -: شلهب يمه وليديييي ولككك يممممه ذو الكفلللل جيبليي اخووووك ولككك جيبه يممممه ماااتت امكك قبلك يممه شلهب .
ذو الكفل يبچي بحضنها وهيه حاضنته وتبچي وياه اسوء يوم مر علينا هوا هذا اليوم ، حيل صعبة من تضل حياة شخص غالي عليك معلگه بين الوهم والحقيقة ، مانعرف اخوي ابن امي ميت لو عدل يمه ماتت اختك يروحي يالمربيني بصباي
نوفة -: يممممه رااااح يذبحوه والله يذبحوووه ذوووله ولد الشروگية ما يخلوه عدل ولككك يمممه شلهب شسويت بروحك يا يممه .
على صوتنه الجيران إلتموا صبرية وام خزعل طبن يركضن سئلن شصاير و فجر حجت الهن
وهيه تناشغ و وجها اصفر مخطوف مثل الموتى
وخطيه تخبلن على امي التمن علينا يواسن بينا
نوفة -: الحگ اخوووك ولك الحگه ذو الكفل يمممه الحگه لا يضيع عمره ذوله ولد الشروگيه ما يخلوه عدل والله ما يخلوووه .
ذو الكفل گام رجليه ما تشيله يركض ويوگع يركض ويوگع استند ع الباب لم حيله وطلع من الحوش يركض ويبچي..
من يوم راحت رفيدا وتزوجت بت ابليس رويدة وهو مو شلهب اي لا تنصدمون بت ابليس تزوجت وخلصنا منها واخيرا
بس شلهب لا أكل لا نوم يفتر من بيت لبيت يسئل على السيد حيدر يگول أختي ما تريده انجبرت هوا شيعي واحنا سنة هوا اخذها غصب وكل ما احد يگله اختك انطيتوها ل شيعي يرجع للبيت يضل يضرب راسه بالحايط ويگول آنه الچبير المفروض أحميها ويضل يلوم بنفسه
الندم اكله اكله ، لحيته طلعت وحتى شيب بين بيها
طبيت للبيت فتحت الثلاجه جبت بطل ماي وكلاص طلعت ل ماما وجهها احمر من اللطم واديان واگفة متصنمه وجهها مخطوف من الخوف وتررعش ، رحت يمها شربته ماي وغسلت وجها ، تباوع ل امي اللي روحها فرفحت من اللطم و فقدت بحضن خاله صبريه
اديان -: راح يموت؟ شلهب راح يموت مليحة ؟ .
مليحة-: لا لا دودي حبيبتي ما يموت ما يموت راح يرجع وياخذج يشتريلچ موطه .
اديان-: من عمو ابو العربانه؟ و ناخذ روفي ويانه؟ .
امي رجعت تعيط وتلطم رحت يمها غسلت وجهها وخليت الماي يم حلگها اشربها
مليحة -: اشربي ماما .
دفعت ايدي حيل والگلاص وگع مني
نوفة -: ما اشرب .. ما اشرب إلا يرجعولي شلهب اذا ما اشوف طوله جدامي ما اشرررب قطرة مي ماتفوت بلعومي .
صبرية وام خزعل يهدن بيها
صبرية -: صلي على رسول الله نوفة استهدي بالرحمن ان شاء الله مابي شي .
صارت تلوب وتضرب على رجليه وتميل
من القهر يمنى ويسرى روحها لايبه
نوفة -: كل الصار بسببه .. بسببه هوا خسرت بنتي وهسه ابنييي اذا صارله شي اريده من شاكر .. اريده من ابن حبيبة .
ورجعت تضرب على رجليها ووجهها
فجر راحت للتنور جابت سطل ماي وطفته
اني ما تحملت طبيت جوه توضيت وگفت ع السجادة اصلي وادعي
واني اصلي فزيت على صوت الباب.، التفتت وشفت اهاب طب للغرفة يملخ بهدومه يلطم على وجهه فتح الكنتور ينثر بي يريد يبدل بسرعة عرفته يريد يلحگهم.. فزيت من السجاده وطفرت عليه لزمته
مليحة -: اهاب وين رايح؟ .
اهاب -: الحگ اخواني ما اعوفهم وحدهم
ولججج مليحة اخوااانييي تريديني اعووفف اخوانييي لججج عوووفينيي خليني الحگهممم .
مليحة -: لا حبيبي لا انت بعدك صغير الله يخليك لا تروح اهاب مالي غيرك الله يخليك لا تروح اهاب .
اهاب -: عوفيني مليحة لازم الحگ ذو الكفل لاااازمم
فجر طبت شافتنه واجت لزمته من الإيد الثانيه
وتوسلت بي بعيون مليانه دموع
فجر -: فدوة اهاب لا تروح امي راح تموت .
انهد حيله وگع بحضنه يبچي بصوت عالي
اهاب -: اخواني ولكم يااا بوووويه اخواني مليحة .. راح يكتلوون اخواااانييي .
حضنته وفجر حضنته من جهة گعدنه الثلاثه بالگاع نبچي وصوت امي من الحوش بعدها تعيط وتلطم
اهاب فز وملخ روحه من ايدينه وطلع يركض
ويبچي ويصيح اخواني ما اعوفهم ، طلعنه نركض وراه وامي شافته ونوب اتخبلت تعداها وطلع يركض نيته يروحلهم وامي تعيط ماتريده يروح ، وگعت من طولي بعتبة الباب وعيني فاضت بدمها وتباوع ع الدرب .. اخواني راحوا گدام عيني ويمكن مايرجعون منين ما راحوا ..
رفيدا ::
نزل علينا الليل والبيت هدوء لميعة فوگ ما نزلت والولد والبنات بعد ما رجعوا لهسه
بس آني وحنين نحضر بالعشه
حنين طايره عبالك مروحه تحط بالمواعين ع السفرة ايدها خفيفة وشاطره واني وياها اساعدها بس مو بسرعتها
كل شوية گذلتي تطفر من الشال هما يسموه شال يصير ناعم وخفيف وكل شوية يزحلگ
وحنين ترتب بالمواعين وتدندن ::
حنين :
_ سافر وگلي اصبرلي راجعلك اني اكيد
_ راح وبعد ما اجاني خلاني عايش وحيد
واني لازمه گلبي بإيدي خايفه من ابن الروسية لا يجي هسه
توي دنگت اريد احط الماعون على السفره وشعري طفر من الشال وگع على وجهي
بهاللحظة الباب إنفتح من وراي وحنين بالمطبخ .. مو يمي ، تجمدت والماعون بإيدي
وايدي رعشت من سمعت صوته وراي قريب
حيدر الكرار -: علويه .
نبرة صوته مو مثل الصبح نبرة صوته تگول
_ ها سويتي مثل ما گتلچ؟ .
گلبي وگع بالسفره ، ما إلتفتت بقيت واگفه وشعري على وجهي والماعون بإيدي يرجف
حيدر الكرار -: ست آنه دا احچي وياچ .
فريت راسي شويه بس ما باوعتله
سويت روحي مركزة بالماعون..
رفيدا -: ها ؟ .
_ ها؟ شنهو ها ؟ شحجيتلچ الصبح؟ گتلچ اخذي حگچ مربع .. سويتي ؟ .
بلعت ريگي وهمست -: اي .
قرب خطوه ودنگ راسه ل مستوى طولي
حسيت بأنفاسه تحرك برموشي
_ اي شنهو ؟ .
رفيدا -: اي اخذته شبيك .
_ وينه؟ طلعيه اشوفه حگچ وين ؟ حطيتي بجيبچ ؟ .
_ لا مو هيچي .
_ چا شلون ؟ راح تجلطني هالبلوه .
رفعت راسي وعيوني خليتهن بعيونه
سويت روحي غبيه .. غبيه رسمي
رفيدا -: يعني اخذته بس .. نسيته فوگ الثلاجه .
رفع حاجب واحد
_ حگچ نسيتيه فوگ الثلاجة؟ شني بطل زاهي ؟.
_ لا .
_ يا علي چا شلون ؟ .
_ اخذته بس شويه .. يعني مو مربع اخذته مثلث .
_ احااا مثلث ؟ هذا مو حگچ هذا بيتزا ؟ .
_ اي انت گلت مربع بس آني ما اعرف اسوي مربع .. ف سويته مثلث يصير ؟ .
قرب خشمه على خشمي وحكه بي
وابتعد ، ضرب خشمي بطرف اصبعه
_ يصير كلشي يصير انت حتى لو تگلبين حياتي مثلث انه قابل .. انه والخلفوني .
رفيدا -: غبيه .. آني غبيه .
_ ادري مبين .
خله ايديه ورا ضهره يفر بالسبحه على اصابعه ، رفع حاجبه باوع فوگ على غرفة امه ولم شفته الجوه ، وهمس بصوت ناصي
_ احچي الصدگ واجهتيها ؟ .
_ اي واجهتها .
_ شگلتي الها ؟ .
_ گلتلها بوسي رجلي يلااا .
_ اي هيچ لا تستكين بس من يبوسون رجلچ سويلي واهس اشجعچ .. صوريها الي .
گالها وغمز ملامحه ارتاحت بشكل
لأن گتله هيچ وتقريبا تقريبا اخذت حقي
_ اغدي فدوه للگوية آنه هيچ اريدنچ ترفعين راسي بس لا ترفعيه كلش خافن تطردينه من البيت .
رفيدا -: صدگ؟ يعني اخذت حقي مربع ؟ .
_ لا بويه انت اخذتيه مربع ومثلث ودائرة سويتي هندسة كامله يبعد هالأفاد .
ورجع يضحك ويمسح على شواربه يغطي بضحكته قرب وجهه مني وعينه ع الدرج فوك من همس :
_ بس المرة الجايه اخذي مستطيل تمام ؟ .
_ تمام مربعي .
_ مربعچ ؟ .
_ اي انت مربعي .
_ دخيل جدي رسول الله آنه شسويت بروحي ؟ جبت مصيبة لبيتي مو مرة .
راح ينزع بالچراويه ذبها ع القنفه وگعد فرد ايديه منا ومنا وراسه رافعه فوك مغمض عيونه ويسبح بالسبحه
اجت حنين شافته اشرت لي بأيدها بمعنى باي ورجعت للمطبخ ركض حاضنه الماعون على صدرها ، رجعت باوعت له وگلت بصوت مسموع
رفيدا-: المهم اخذت حقي حتلو شويه بس حنينة خطية ايدها انهرت من الزاهي و..
فتح عيونه باوعلي .. صفن بيه صفنه طويله ، صفنة واحد عطشان وشاف گدامه مي .. عيونه تاكل بملامحي ، من گذلتي الطافره على وجهي لعيوني لخشمي لشفافي الي ترجف ، صفن بيه لما حسيت وجهي احمر من نظراته..
واني شايلة الماعون وايديني ترجف گام على حيله واجه يفر بسبحته على ايده صار گبالي دنگ وخله طرف خشمه على خشمي ، انفاسنه تخالطت ما اعرف جاي اسحب هواه لو هو يسحب هواي ، وهمس بمكر :
_ تدرين اذا ما ترجعين تأخذين حگچ من صدگ؟ .. آنه الراح آخذ حگي منچ .
_ شتاخذ ؟ .
_ آخذ الگذلة الطافرة واردها لمچانها دوختني كلما تطفر گلبي يطفر وراها .
_ ما .. ما اعرف اخليها ورا اذاني ، كلما اخليها تطفر وحدها .
گلت هيچ واني مدنگه راسي وهوا
عيونه ذابت سلهمت راح بغير كوكب
مد ايده اصابعه دافيه طخت خدي ، لزم الگذلة الطافره بطرف اصابعه وهوا يباوع بعيوني حطها
ورا اذني ومشى اصبعه على خدي نزولا..
_ ارحميني وخليها ورا اذنچ ، لا تطيرين هالذرة الباقيه من عقلي وانه الم بيها صارلي سنين .
متتت من الرجفه اللي بجسمي ، واخيرا
طلعت حنين من المطبخ شايلة ماعون
وحيدر طفر متر عني وگام يحك برگبته
حنين -: احممم نحن هنا يا قوم .
رفيدا -: حنينة اخذيني وياچ .
حنين -: لا متروحين الا يرد گلب السيد خطية طافر بالصاله .
حيدر -: حنين نچبي ترى اعصابي ما متحمله سوالفچ .
حنين -: اي ادري سيد .. اعصابك مال گلب يطفر ويه الگذله نواعس رجعيله گلبه حبيبتي حتى ينام اليوم .
فاتت من يمه تضحك كفخها على ضهرها بسبحته وهي ولا كأن اجت اخذت الماعون من ايدي
حنين-: ياااااا رفرف شبيچ صافنه بالماعون يحضي .
رفيدا -: دا .. دا أتفاهم ويا الماعون.. دا اگله اخذ حقي من ابن الروسية .
حيدر صد عني منطيني ضهره و مات من الضحك
غميت روحي اكثر من مره وهوا يهز براسه مغسل ايده مني
حيدر الكرار -: مسودنه بعلي .. والله مسودنه .
وراح للغرفه ، حنين دفعتني بخصري بالماعون
اللي بأيدها
حنين -: روحي .
رفيدا -: اووي وين ؟ .
غمزتلي
حنين -: شكلها لميعة سوت شي بي فايدة من خلت السيد يتمم زواجكم .
رفيدا-: شنو ؟ .
حنين -: روحي ولچ ديصيحچ ياااا هههههههههه هالبت فاهيه .
من الغرفه صاح :
_ لحگيني ام گذلة الطافرة .
_ ما اجييي .
_ لحگينييييي .
حنين دفعتني دفعة قويه وراحت تركض للمطبخ خلتني وحدي ، ضليت الطم على خدودي اروح لو لا ؟
باوعت ع المطبخ :
رفيدا -: حنيييين تعالي ساعديني .
حنين -: روحي آنه ما اتدخل بين الگذلة والگلب الطافر اخافن يطفروني وياهم .
وابن الروسية رجع يصيح ، باب غرفته مفتوح شويه
حيدر الكرار -: تعاااي دا اگلچ .
لطمت على وجهي اقوى اقوى
_ يمه يمه هذا شبي هيچ عصبي .
بديت أقرا
_ بسم الله الرحمن الرحيم .. قل أعوذ برب الفلق .. قل أعوذ برب الناس .. آية الكرسي .. قل هو الله أحد .
ختمت القرآن يلا مشيت لغرفته دفعت الباب وطبيت لگيته ديلبس بگلابيه سوده و نص صدره طالع بعده مو لابسها عدل .. شهگت ودرت وجهي للحايط بسرعة
_ استغفر الله .
_ شبيچ ؟ .
جاوبته واني دايره وجهي للحايط
_ البس عدللل .
ضحك بخفه وگال
_ لابس تعالي .
_ لا ما آجي البس اول .
_ لچ تعاي لبست شتردين البس تيشيرت حنين الوردي ؟ .
التفت شويه باوعت من بين اصابيعي شفته لابس وديلبس بساعته .. ريحة عطره واصلة لخشمي
_ سدي الباب وتعالي .
_ وصلاة امي وابويه ما اسده .
_ لچ بعلي ما اسوي شي بس اريد ادوخن بالگذلة الطافره .. قصدي ارجعها .
سديت الباب واجيت وگفت مسافة عنه مثل المسويه مصيبة وتنتظر العقاب وهو گعد ع الچرباية .. وطبطب بأيده على مكان بصفه
_ تعالي گعدي .
_ لا اني مرتاحه هيچ .
_ تعاي اگعدي لا اگوملچ .
گعدت بطرف الچربايه بعيد عنه متر
_گربي .
_ لا هنا زين اكو هوى .
_ يا هوى ؟ احنا بالغرفة مو بالسطح .
وقرب هوا علي
_ وهساع احچيلي ليش ما أخذتي حگچ؟ خفتي منها ؟ .
يمه انصدمت هذا شلون كشفني ما اخذت حقي
رفيدا -: لا بس لموعة مره چبيره .
_ وآنه مو چبير بعينچ ؟ آنه مو زلمتچ ؟ كلامي مو مهم ؟ .
جاوبته واني عيوني على اديه العصرتهن عصر
هزيت راسي -: لا مهم .
_ چا باچر اذا گتلچ ردي اخذي حگچ تاخذيه ؟ .
_ اي .
دنگ راسه ل مستواي وهمس
_ مربع ؟ .
_ مربع ونص .
انفجر ضحك وگع على ظهره ع الچربايه
_ مربع ونص .. والله عقلچ المربع ونص .
گعد وبدل وجهه صار جدي..
مسح وجهه بإيده وباوعلي ، باوع على گذلتي الطافرة لهسه كل ما ارجعها تطفر ، على عيوني ، على ايدي الاعصر بيهن
_ سمعيني زين يبنت الناس آنه ما تعجبني الحرمة الضعيفه ابدا .
سكت شويه وصوته صار اثگل :
_ هالوگت ما يرحم الضعيف إذا سكتي مره راح يدوسوچ الف مره واذا انطيتي خدچ مره راح يطگوچ العمر كله .
باوعتله وبكل ثول گلت
رفيدا -: شلون اصير قوية.؟ .
لطم على گصته
_ ياعلي شلون ؟ هساع اعلمچ شلون .. سمعي الي يغلط وياچ لا تسكتيله ابددد لا تسكتين تردين الچلمة بعشره .
رفيدا -: بعشرة؟ هواي .
_ اي بعشره حتى بعد ما يتجرأ يعيل وياچ .
هوا يحچي واني بس اهز براسي
احاول اخزن كلامه بذاكرتي واطبقه بعدين
_ لا تهزين براسچ .. احچي .
_ فهمت .
_ اي احد منا وغاد حتلو امي اذا صاحت عليچ لا تدنگين عايني بعيونها گوليلها بصوت عالي آنه مو عبده عدكم آنه مرت ابنچ تحترميني
آنه -: وأذا ضربتني
_ توگفين جدامها وتگليلها ايدچ لا تمديها مره ثانيه تمدين ايدچ اتصرف غير تصرف آنه موجود آنه بسدچ بس اريدنچ انت الي توگفين مو آنه اليوگف بمچانچ كل مره
ورث جگاره وحچه بصوت اهدأ
_ انه اطلع للشغل اروح للجامعة واضل افكر بيچ إذا أحد حچه عليچ وانت ساكتة آنه انهضم مو عليچ علي لأن ما علمتچ تردين
همست وعيوني بعيونه
_ يعني انت راح تعلمني
_ اي اعلمچ واربيچ واگويچ على إيدي واخلي الكل يحسبلچ ألف حساب بس انت لا تسكتين بعد
رفيدا -: ماراح اسكت
_ گوليها بصوت عالي
_ ما اسكت
_ اعلى
_ ما اسكتتت
ابتسم وهو يطفي الجگاره بالنفاضه
_ اي هيچ هساع صرتي من صدگ بلوة
اندفر الباب وطبت لميعة بدون إستئذان
لميعة -: ها شكو شعدها ام الهز
حيدر -: لا يمه ماكو شي جاي اعلمها شلون ما تسكت حتى من اعوفها يمچ ما تسكت وتهز راسچ ليل نهار
لميعة -: ولك خايب حويدر آنه الي اهز راسكم ليل نهار لا تستهينون بـ لميعة
اجت ودحست روحها بيني وبينه ودفعته بعيد
_ يلا سولفي شنو ما تسكتين عليمن ما تسكتين ولچ
اشرلي من وراها يشجع بيه اكمل
رفيدا -: ما اسكت عليكم جميعا وابنچ اولهم
لميعة -: يا هاي علي ولچ ام الهزز
_ واذا ما عاجبچ انت وابنچ اطلعوا برا
حيادر _ يمه شفتي الصلافه بچلمه وحده هزتنه اثنينه
وهوا من ورا امه يأشرلي كملي لا تسكتين
وجهه ازرگ من الضحك مختنگ كوه كاتم ضحكته لفيت گذلتي على اصبعي وغمزتلها
لميعة -: ايا صلفة بت الصلفة يا ام لسان طوله مترين
رفعت ايدها تريد تضربني وهوا
لزمها باسها وحطها على صدره
_ يمه طگيني بگلبي ولا بيها طگيني هين اذا تردين بس هي لا ايدچ لا تدنالها
لميعة -: عوف ايدي يمممه خايب حوويدرر سوده عليه يمه شبيك تسودنت
سحبت ايدها منه وباوعت علي رافعه اصبعها بوجهي
لميعة -: افتح وياچ صفحة بيضة مو على سواد وجهچ لا لخاطر ابني حويدر بس الصفحة البيضه هم تنترس حبر اذا ما جبتيلي الولد
باوعت عليه من فوگ ليجوه وصارت تقيس بأيديها على بطنها
_ اريدچ تحبلين بطنچ يصير جدامچ مترين واذا جبتيلي بت مثلچ هزازه اطردچ انت وياها بعلي
حيدر -: يمه شبيچ شهالسوالف
لميعة -: اسكت انت خلي تولد وتربي مو بس تهز چتف
رفيدا -: احبل
لميعة -: اي تحبلين شبيچ فاتحة حلگچ
باوعت عليه وجهه صاير احمر
وآني بكل ثول جلطته فوگ جلطته
رفيدا -: شلون احبل
لميعة -: يعني شلون تزوجتي وما تعرفين تحبلين
رفيدا -: لا والله ما اعرف
حيدر -: يمه البت زغييييره
لميعة -: زغيره شنهو هاي بگد النخله آنه بگدها جبتك انت وذوالفقار
رفيدا-: وصلاة امي وابويه ما اعرف يصير تعلميني
لميعة -: اي اعلمچ عايني اول شي..
حيدر عاط بيها
حيدر -: يمه لا تعلميهاااا
لميعة -: ولك ليش خليها تتعلم شكو بيها
_ يمه بعدها ماتعرف تجمع چلمتين سوا وانت تردينها هساع تجيب ولد لا طلعيني عن طوري فدوه
لميعة -: ولك انت ابوها لو رجلها
حيدر -: اثنينهن يمه رجلها وابوها هاي اذا عيطتي عليها هساع تروح تضم روحها بالكنتور وتبقى تبچي للصبح
گمزت ختلت وراه لأن حسيت السالفة صدگ تخوف
لميعة -: چا شلون راح تحبل ولك اذا انت ضامها وره ظهرك مثل العتويه
حيدر -: تحبل يمه تحبل بس مو هساع خليها تكبر بعيني شويه يمه لا تضيعين برائتها
التفتت علي من وراه وگالت
لميعة -: عايني لچ لازم تاكلين بيض هواي بيض ودجاج وتشربين حليب
حيدر ضرب على گصته
رفيدا -: الله يعني بس أكل بيض سهلة آني احب البيض
لميعة -: اي وتالي من تحبلين تجيبين ولد يشبه حيادر مو يشبهچ انت ووجهچ هذا
_ ليش وجهي شبي
_ يطرد النعمة
حيادر _ يممه
لميعة -: شنو يمه دا احچي الصدگ
رفيدا-: وجهي يخبل حيادر گال وجهچ حلو
امه عيونه گمزن برا باوعت عليه
لميعة -: حويدر ولك شوكت گلت وجهها حلو
حيدر -: اي يمه يعني مقبول
رفيدا -: لا انت گلت حلو گلت رفرف وجهچ دوخني سطرني والگذلة الطافرة روحي تطفر وياها
لموعة تخبلت عيونها صارن بعرض السما
حيدر -: فلك لو مخليها ثوله احسن من هالفضايح
لميعة -: ولك حويدر خايب يمه طايح بيها
حيدر الكرار -: يمه لا
لميعة -: طايح بيها آنه أمك اعرفنك من گمت تدافع عليها عرفتك طايح ولك
رفع ايديه يباوع ع السگف ويدعي
_ يارب صبرني والله لو اعرف تاليها هيج ما چنت اعاين على گذلتها
لميعة -: سمعي لچ خلينا بالمهم اذا تردين تحبلين نامي من وكت لا تبقين سهرانه
رفيدا -: صار
لميعة -: ونامي عدل مو مثل الخفاش
_ يمه كافي البت راح تحبل من وره نصايحچ گومي
گامت وهي طالعه باوعت علينا
لميعة -: ولك حويدر تعال وراي رايدتك بسالوفه
جرته من ايده گام وراها وقبل لا يروح همسلي
_ لا تاكلين بيض هواي راح تفگسين
وطلعوا ضليت وحدي بالغرفة افكر
_ يعني اذا اكلت 10 بيضات احبل بتوأم
گمزت ورحت وراهم ررركض وصلت للسفره وانصدمت خواته كلهن موجودات هديل وسهام و كفاية من شافتني هديل نفخت بحقد
هديل -: آنه اتعشه بالمطبخ
لميعة -: لا گعدي هين ماعندي احد يعزل روحه
خزرتني وگعدت
انفتح الباب وفاتوا اخوان حيدر واحد وره واحد
كلهم گعدوا ع السفره ما شاء الله انترست بيهم
بقيت آنه واگفه افرك بإيديني مستحية اگعد
وحيدر بدون لا يرفع راسه من الماعون گال
_ علويه تعالي هين
وطبطب على مكان بصفه بالگاع
مغوار شافه غمز ل ابا الحسن
مغوار -: هااا هين
ابا الحسن -: اي هين مو هناك هين يم گلبه
ذو الفقار اتحمحم ويخزر بيهم مستحي يريدهم يسكتوم وجهه صار احمر ابا الفضل ضحك
أبا الفضل -: ذو الفقار اذا تحمحم بعد مره راح تطير السفره كلها
مغوار -: لا راح يصير زلزال
مشيت و گعدت بصفه كلش بصفه ريحة عطره طبت بخشمي ولميعة العوبه على راس السفره تخزر بيه تريد تشلعني من الگاع لأن گعدت بصفه
هو مد ايده گص خبزات سواهن
صغار وخلاهن گدامي -: اكلي
رفيدا -: ما اريد
مغوار سمعني
مغوار -: ليش ما تريد خبزتنه مو عاجبتچ زوجة اخي العزيزه
أبا الحسن -: لا هي ما تريد تاكل يم حيادر تستحي لو يطلع حيادر تاكل السفرة كلها
وجهي صار طماطيه من وراهم
_ لا والله بس..
أبا الفضل -: چا ليش ماتمدين إيدچ مدي إيدچ علويه كله خير من الله ما بي سم اسم الله على گلبچ من السم خيتي
مغوار -: بس شوية بي حقد لميعة
ابا الحسن شرگ بالماي وتبده من حلگه بحضن حنين وحنين تخبلت راحت للمطبخ تدردم
لميعة -: ولك مغيووور
مغوار -: ها يمه؟ دا احچي الصدگ
ذو الفقار اتحمحم مرة ثانيه اقوى و حيدر حط خبز گدامي و شال ماعون وهم خلاه گدامي
ابا الفضل -: يممه عايني ابنج يحط خبز جدامها وهي حتى ما تعاين بوجهه
أبا الحسن باوع علي وعلى حيدر وگال بصوت ناصي بس كلنا سمعناه
ابا الحسن-: گوم ولك مغوار الخبز انگلبت اعدلها الها
مغوار-: فلكك سبحان مغير الاحوال وين حيادر الي يطگني بتوثية
حيدر رفع راسه خزرهم
حيدر الكرار -: تاكلون لو اگوملكم ترا من اگوم اعلمكم شلون الواحد يركض ورا اخوه بالتوثية
مغوار -: لا ناكل ناكل ألف عافية ع العشاگ اقصد ع الحبايب
واني اكل اسمع ابا الفضل يهمس لمغوار
أبا الفضل -: ولك هذا طايح
أبا الحسن -: طايح وغارگ
مغوار -: غارگ وشابع ماي
ابا الفضل-: ااهههييي ههاهاهاييي
تمنيت الگاع تنشگ وتبلعني ولميعة بعدها تخزر وهديل تنفخ كل ثانيتين
بلشوا ياكلون ومغوار ما سكت كل شوية يشمرله حجاية
مغوار -: حيادر هذا العشه مو طيب
حيدر الكرار -: طيب اكل وانچب
مغوار -: اي العشه من ايد حنينة طيب بس من ايد لميعة يصير علگم
لميعة -: ناوشيني النعال ولج سهووومه
مغوار -: اگول زوجة اخي انت تعرفين تسوين بامية
رفيدا -: لا
مغوار -: چا شتعرفين تسوين
أبا الحسن -: تعرف تسوي حيدر يصفن
حيدر -: تسكتون لو اگوم اخلي طشاركم ماله والي
حنين تشرب ماي ومن سمعت مال
"تعرف تسوي حيدر يصفن" شرگت بالماي وطلع من خشمها صفگت بحماس
حنين -: الله الله على الأداء
سكتنه على دگة موبايل حيدر طلعه من جيبه ولمحته بطرف عيني اسم سليم
حيدر -: الو ها سليم ؟
صوت التلفون چان عالي واسمعه
سليم -: حيادر خويه الحگ فد واحد مسودن ببابكم شايل برنو ويعيط أريدن اخيتي والولد التموا عليه بالفرع يردون يطگونه
حيدر وجهه انخطف وباوعلي بسرعة
حيدر الكرار -: شنهو؟ منو ؟ شلون شكله
سليم -: طويل اسمر يگول آنه أخوها شايل البرنو يگول لخلي الفرع يصير نهر دم إذا ما طلعتوها الحگ ولك
الخبزه وگعت من إيدي
رفيدا -: شلهب..
حيدر فز وگام صعد الدرج بايتين بايتين وصاح بذو الفقار :
_ ذو الفقار اطلع گللهم لا يجيسونه گللهم هذا مو غريب هذا أخو علويتنه لحد يدناله استعجل خووويه لا يطگونه آنه هساع نازللكم
امه من سمعت كلمة "علويتنا" عبالك لزمتها كهرباء اللگمة شمرتها من ايدها ولوت حلگها وبأيدها تضرب على رجلها تلوب تلوب عينها علي تريد تملخني
ذو الفقار گام واخوانه كلهم گاموا وياه وگفوله مثل السد القوي الفزعه واضحة بوجوهم التدور ع الشر دواره ويشمرون بردانات الدشاديش الگاع تهتز جوه رجلينهم وهما متوجهين للباب البيت انترس بصياحهم وهم يصيحون يردون اسلحتهم الضامينها
كفاية اختهم ركضت لغرفة وراح مغوار وراها
دقايق وطلعوا شايليهن وزعهم على اخوانه ومشوا ورا ذو الفقار يضحكون بشر وهو يگللهم :
_ اليوم اخلي شبح حيدره ابو الجعارة (الكلاشنكوف) تهلهل على متونه
هوا گالها واني گلبي وگع ببطني خفت يأذون شلهب وفزيت رجلي اخذتني وراهم احس بدگات گلبي تخربطت وعلى اي ساعة اوگع مالحگت اوصل الباب وسمعت سهام تهمس لكفاية ويضحكن
سهام _ علويتنه اثاري الحب عماك سيد حيدر
لميعة -: استلممم خوش علوية لگيت وحده شوارعيه ومسويها علويه
وبها الاثناء حيدر نزل الدرج بايتين بايتين يلف بالچراويه على راسه من الجهتين عيونه ما باوعت علي آنه باوع عليهن نطاهن نظرة وحده خلتني اني ارعش بمكانهن نظرة تگول حسابچن بعدين و تعداهن وطلع
مشيت وراه اجر بدشداشتي رجليه ماتن على اخوي ما الي قابليه ارد على احد
وقبل لا ينفتح الباب انفتح من وحده وصارت كيلاس بوجهنا و ميرج مرت ذو الفقار وراها! ..
كيلاس واضح عليها مو بخير شعرها نازل على چتافها من جوا الشال ووجهها وخشمها حمر من البچي ومبرطمة مثل الجهال من يزعلون عيونها وگعت علينا اني والسيد قبل الكل
التفتت اني على صوت لميعة مبتسمه
فرحانة متشمته وهي تگول بصوت عالي
لميعة -: كيلاس ؟ تعالي امي تعالي يم السيد خله يشوف الزين على اصوله ..
شكرا لزيارتكم عالم روايات سكيرهوم
