رواية النصاب الفصل الرابع عشر والاخير بقلم جمانه السعيدي
بان...بعد ما طلعت ساره من الشركه
ميثم جاب المحامي
عصام...تفضل
المحامي...بان رافعه عليك دعوة نفقه
عصام...شنو نفقه اني لا أريدها ولا اريد جهالها
على يا اساس انطيها نفقه
المحامي...هذا قانون اما تحضر وتدفع نفقه او الحبس
عصام...توصل للحبس
المحامي...حبس وهم تدفع
عصام.....ااي ميخالف عود بعدين
المحامي...ماكو بعدين طليقتك سجلت بياناتك
تكدر الشرطه توصلك باي وقت
عصام...استغفر الله ولله مو وكتها هسه
توقعت خلصت منها
المحامي..تكدر تخلص من كلشي ومن النفقه ومن طليقتك
عصام...شلون اخلص منها هاي الهايشه لا حكتني وين ماكان
المحامي....بان طالبه اما النفقه وهاي راح تستمر وياك
الحد ما يوصل عمر الاطفال ١٥ سنه تقرببا
او تتنازل عن الجهال للابد مالك شغل بيهم
ولا تطالب بيهم ولا تمنعهم من السفر
عصام...بس هاي اني مااريدهم أوقع بلعشره
عسمى تحركهم مالي شغل بيهم
المحامي...خلاص تحضر للمحكمه باجر وتقدم عريضه
وتكتب انت متنازل عنهم ومراح اطالب بيهم كل عمرك
وتوقع عليها كدام القاضي وثنيين شهود
عصام...باجر انت موجود للمحكمه
المحامي.. اكيد
عصام...حضري العريضه واني انطيك تعبك أوقع عليها واطلع
المحاني...تمام
جمانه السعيدي
بان...المحامي بس طلع من عصام اتصل عليه كال مستعد يتنازل عن الجهال
رجعت ساره للبيت
بس وصلت اتصل عليها زوجها
ساره...هلو حبي هاا شنو الاخبار
زوجها...اتصل واحد اسمه ميثم يتأكد من من عمل الشركه
خاف عمل مشبوه لو عدنا صفقات وهميه
ساره...خلي يتأكد براحته حقهم دفعو مبلغ خيالي على هاي الاتفاقيه خليهم يتأكدون
زوجها....انت وين وصلتي بهذا الاتفاق
ساره...باجر التوقيع الاخير راح ترجع املاك بان
وفوكاها بوسه خل اضحكك عصام يريد يخطبني
.....هههه شكد غبي الخاطر الله
ساره...طمعه بلفلوس خلا اعمى وكلشي مايشوف
بان...اليوم الي بعده انتشر خبر بنيه ماخذه جرعة مخدرات
وميته الناس لكوها مشموره على الشارع
الخبر انتشر بشكل والناس كلها تحجي بي
الشرطه ادور على ملابسات القضيه تريد تعرف ووين وشلون ماتت
اهل البنيه متخبلين يكولون طلعت للدوام وبعد مارجعت
ومانعرف منو الي سوا بيها هيج لان ماعدنا اعداء
ثاني يوم كان موعد التوقيع بين عصام وساره
بلبدايه عصام طلع للمحكمه وكتب تنازل عن الأطفال
كدام القاضي والشهود ولمن خلص من التنازل
اتصل على ساره تجي الدائرة التسجيل العقاري وياها المحامي
بدلت ساره وطلعت من الساعه عشره الصبح الساعه ثنتين الضهر يله رجعت رجعت وهيه مكمله كل الاجراءات طبعا هيج إجراءات ما تخلص بسرعه
بس ساره دفعت مبلغ محترم حتى تخلص كلشي بسرعه
قبل لا عصام يكتشف هاي اللعبه
بعد تسجيل الاملاك باسم ساره رجعو للشركه
حتى يكملون توقيع العقد بينهم
عصام...هيج صرنا شركاء بلعمل بعد نصير شركاء بلحياة الزوجيه
ساره...اوعدك افكر بلموضوع يمكن نفتح شركه خاصه بينا اني وياك
عصام....اي هو هذا المطلوب
ساره...شكرا للثقه انشاء الله فاتحة مشاريع جديده
بعده عصام مارد عليها اجا تليفون من خالته
الحك عليه الشرطه لزمت زيدون بقضية البنيه
المقتوله
طلع زيدون عنده علاقه بهاي البنيه وماخذها الشقة امه
هاي الشقه تشتغل بيها دعاره
على اساس ياخذون مخدرات هو وياها قبل العلاقه بس البنيه ماخذه جرعه زايده وماتت
زيدون خايف ينكشف منتظر لمن صارت الدنيا ليل وماخذها شامرها بلشارع ااكو كامره مصورته
ساره... مادام عصام ملتهي بقضية زيد
أحول الاملاك باسمج واطلعلج جواز ترحين وياي
بان...والدوام
ساره...اخلي وليد يقدملج على اجازه سنه كامله بدون راتب
اذا عجبج الوضع تبقين هناك وياي
واذا ما عجبج ترجعين للعراق
بان.. موافقه
جمانه السعيدي
قضية زيد جرت امه ويااا والشرطه اكتشفت هاي الشقه
مشبوها من فتحوها لكو بيها كمية مخدرات
وكامره تصور كلشي داخل الشقه حتى موت هاي البنيه
ولكو مقاطع 🔞 ا مخله الناس داخل الشقه
ام زيدون وزيدون ثنيبنهم انسجنو على ذمة القضيه لمن يكمل التحقيق
طبعا عصام انشغل وياهم جاب محامي يلزم القضيه
ودفع رشاوي الناس يحاول يحل القضيه
انخبص بيهم يريد بس يطلعهم من هاي القضيه
بهذا الوقت ساره رجعت املاك بان الها
وكملت إجراءات السفر خلال ٣ ايام ساره تشتغل بكل سرعتها تحاول تسبق الوقت قبل لا عصام ينتبه
للمصيبه الي وكع بيها
ساره اخذت بان هيه وجهالها وطارت الامريكا
وعصام مشغول شلون يطلع خالته من السجن
ساره غيرت ارقامها كلها وحضرت عصام وميثم
حتى لا يرجعون يتواصلون وياها
عصام ويا هاي الهوسه اكتشف ساره ماكووو
حاول يتواصل وياها ارقامها كلها مغيرتها
بدا الشك يلعب بعقله ليش اختفت ساره فجئه بدون حتى ماتودعه
حاول يتواصل ويا الشركه بامريكا طلعو حاضرينه
من كل وسائل التواصل
طلع رقم جديد حتى يتواصل وياهم
زوج ساره رد علي
عصام....ممكن اعرف ليش حاضريني لان اني بيني وبينكم عقد عمل شنو المشكله اني قصرت بشي
زوج ساره.....العقد الي عندك بلله واشرب مايه
القانون لا يحمي المغفلين
عصام بقى مصدوم يعني شنووو عقد وهمي
وملاكي وين راحت
رجع يحاول يتواصل ويا ساره ماكو فايده
راح الدائرة التسجيل العقاري بلكت يكدر يطعن بعقد البيع لان هو قبل التنازل وقع هو مستلم المبلغ الي باع بي الاملاك وهو بلحقيقه كلشي ما مستلم
بس وصل وسئل الموضف عن بيع الاملاك
وهو يريد يطعن بلبيع
اكتشف الحقيقه المره الي مجان متوقعها طول عمره
الاملاك رجعت كلها باسم بان
بان شنو دخلها بلموضوع ساره ليش كتبت الاملاك باسم بان منيين تعرفها
صعد سيارته وراح البيت بان وهو مصمم يقتلها خلاص
لان ضحكت علي وأخذت منه الاملاك
بلاول طلع المسدس وحضره وهو ناوي يقتلها هيه وجهالها
مادام خسر كلشي بسببها
بعد حياته مالها معنى يقتلها ويدخل سجن
بس حتى يبرد نار كلبه بيها شلون ضحكت علي
ومنيين تعرف ساره وشلون لعبن هاي اللعبه علي
بدون مايحس
صعد سيارته يمشي بسرعه هلكد ما عصبي مايشوف دربه
يريد بس يوصل حتى يخلص على بان
قبل لا تكمل فرحتها وهيه تحس انتصرت علي
جمانه السعيدي
يمشي بسرعه بدون مايركز بلشارع
جان تطلع علي سياره من شارع فرعي وتضربه
طلعو من السياره بعجوبه شهر كامل بلمستشفى وهو فاقد الوعي من قوة الضربه صار عنده شلل
باقي بلمستشفى محد يسئل عنه اما اصدقائه
بعد ماخسرو كلشي بسببه اتخلو عنه وعافو وحيد
زيدون انحكم اعدام وأم زيدون انحكمت ١٥ سنه
بسبب قضية الدعاره والمخدرات
اما بان شافت عالم غير العالم الي جانت عايشه بي
عالم يختلف كليا
عالم مايشبه العالم الي جانت عايشه بي وهيه خايفه
من كل الناس
قررت اول خطوه تغير حياتها جذريا
سوت تكميم معده وبدت اتابع ويا دكتور تغذيه
نزل وزنها ١٣٥ كيلو إلى ٨٠ كيلو
تغير شكلها وتغيرت نفسيتها وأهم شي رجعت تثق بنفسها
وما تحس بلنقص
دخلت دورات تاهيل نفسي صارت انسانه ثانيه
مو بان القديمه الي عازله نفسها عن الناس
وتخاف يتنمرون عليها
بلنسبه الساره وزوجها طايرين بلجهال
عبالك جهالهم مو جهال بان
ساره وزوجها مايقبلون بان ترجع للعراق قدمت اجازه خمس سنوات بدون راتب
ووليد اخو ساره رجع ااجر المحلات وااجر بيت بان
وكل شهر يدزلها حواله بلوارد منهن حتى تعيش منها هيه وجهالها ولو ساره ما مقصره وياها ابد
وزوج ساره مهتم بيها هيه وجهالها
ادم وساره حاليا عمرهم خمس سنوات
عايشه هيه وجهالها بيت مستقل قريب على بيت ساره
بلنسبه العصام بعد ما نصاب بلشلل
محد يهتم بي قدم على دار رعاية المسنيين
طبعا عمره زغير ما ينقبل بس بسبب حالته الصحيه وماعنده احد يساعده قبلو بي كحاله خاصه
واخيرا رجع الحق الاصحابه بعد كل ذيج المعاناه الي عاشتها بان
ااكو مثل يكول لو تصاحب خوش صاحب لو تضل من غير صاحب
وهذا المثل ينطبق عل ساره الي حفظت العهد
وصانت العشره ودافعت عن صديقة عمرها
جازت الإحسان بلاحسان
القوه الي دافعت بيها ساره عن صديقة عمرها
رب العالمين هو الي مدها بهاي القوه
هو الي الهمها هاي الأفكار حتى تساعد صديقة عمرها
لان رب العالمين ما يقبل بلظلم
وبأن انظلمت هواي من اهلها ومن زوجها
ومن كل الناس
مو يكولون يوضع سره بااضعف خلقه
رب العالمين خل سر القوه عد ساره حتى ادافع عن بان
وطلع حقها من عصام
والنعم بلله تعالى
انتهت قصتنا دمتم سالمين
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
