رواية فرص ثانيه الفصل الخامس عشر
دلف يحيى إلى المكتبة وبيده دفتره وقلمه، بحث عن ركن هادئ ولا يوجد به أحد وجلس يرسم بهدوء، كان يحاول أن يكون هادئًا ويتحكم في أعصابه، ليقطع سكينته حركة خلفه، كانت أبسط الأشياء تجعله يتوتر وتثير أعصابه، التفت ببطء إلى مصدر الحركة، فوجدها حياة، وكان عليه أن يتوقع، كانت تقفز باستمرار تحاول أن تضع كتابًا لكن لقصر قامتها لم تعرف، وقف بجانبها ومد يده يأخذ الكتاب منها ووضعه بأريحية، فقالت له:
-هات بقى الجزء التاني، جنبه أهو
أشارت بيدها إلى الكتاب الذي تريده، نظر مكان ما تشير بنفاد صبر، ليأخذه ويعطيها الكتاب، فقالت:
-شكرًا
-العفو
ثم جلس في مقعده وحاول أن يستجمع أعصابه، وشرع في الرسم وبدأ يندمج رويدًا رويدًا حتى قطع تركيزه هذا، قربها منه، التفت إليها لتبتعد هي قليلًا لقرب المسافة، وقالت:
-ما ترسمني
أغمض عينيه بقوة وقال بسخرية:
-أرسم إيه والنبي
أجابته بثقة:
-ترسمني أنا
-وإيه المقابل
نظرت له بطرف عينيها وقالت:
-إنت مادي أوي
-ما أنا هضيع وقتي في رسم الموناليزا لازم يبقى في مقابل
-هو إنت بتتريق عليا
ابتسم بسماجة وقال:
-لا مقدرش
ضيقت عينيها وقالت:
-لا حساك بتتريق
ضحك عليها وقال:
-حاسة مش متأكدة
أخذت كتابها وهمّت بالمغادرة، فقال لها:
-خلاص يا ستي بنهزر تعالي
التفتت له تنظر له بعبوس، فقال:
-هرسمك بس بشرط
صدرت منها همهمة ليكمل حديثه:
-في كتاب كنت بقرأه، لكن أنا ماليش خلق للقراءة فأنا هرسمك وإنتي هتقرأيهولي
قلبت عينيها، وقالت بتحدٍّ:
-لو الرسمة معجبتنيش مش هقرأ حاجة
رمش ببطء وقال بثقة:
-لا سيبي هتعجبك ولا لأ دي عليا
جلست بجانبه ووضعت كتابها وقالت:
-أوكي أما نشوف
فتح صفحة جديدة من دفتره وهو ينظر لها بتحدٍّ، وكانت تفتح كتابها وتنظر له نظرة تقابل تحديه
____________________
عاد أمير من عمله، ليجد نهى تجلس على الفراش، عيناها متورمتان من فرط البكاء، عنقها متورم قليلًا، وجهها مرهق، دنا منها بفزع وقال:
-نهى مالك يا حبيبتي، مالك
أخفضت نظرها له وقالت بهمس:
-اتصلت عليك كتير
أجابها وهو يمسح على وجهها:
-كنت في عملية وأول ما خلصت جيت على طول
ضمها له وقال:
أنا هنا يا حبيبتي، خلاص أنا هنا
أبعدته عنها وقالت بألم:
-أنا كل مرة ببقى محتاجاك بتبقى في العمليات، هو شغلك أهم مني
أعادها مرة أخرى بين ذراعيه وقال:
-لا طبعًا يا حبيبتي، لكن غصب عني حقيقي غصب عني
لتبعده مرة أخرى بقوة وهدرت:
-ملكش دعوة بيا يا أمير، ملكش دعوة بيا فاهم
نظر لها بعدم فهم وقال:
-في إيه يا نهى، أنا ضايقتك في حاجة
ابتسمت ابتسامة حزينة وقالت:
-لا يا دوبك كل ما أحتاجك مش بلاقيك، لازمتها إيه الجوازة دي وكل ما أعوزك بتبقى في عمليات، عمالة أقولك تعبانة، تعبانة وإنت كل همك شغلك
اقترب منها يحاول تهدئتها:
-خلاص أنا هاخد إجازة وأقعد معاكي إجازتك، إيه رأيك ونشوف إيه اللي تعبك
أخذ يقترب منها حتى أخذها في عناق طويل، كانت تبكي بحرقة، فما تمر به في الأيام الخوالي قد أرهقها
______________________
في صباح يوم جديد، دلف ماهر إلى المصحة يسير بتبختر في الممر، كان يعرف وجهته جيدًا، حتى وصل إلى الباب الذي يؤدي إلى الحديقة التي يجلس فيها يحيى، وقف امام الباب، وبحث بعينيه عن يحيى، وعندما وجده ضيق عينيه بتركيز فهيئة يحيى كانت تؤلم القلب، فقد تغير كثيرًا، وجه شاحب، تحت عينيه عتمة الليل، هزيل البنية، يبدو عليه التعب، كان يقترب بخطوات بطيئة، وفي كل خطوة كان شعورة بالندم و الذنب يزداد ، وقف أمامه وحجب عنه الضوء، رفع يحيى رأسه لكي يرى مَن، فألجمته الصدمة حين وجد ماهر أمامه، نهض معقود الحاجبين، وقال بتقطع:
-إنت... إنت بتعمل إيه هنا
-جيت أشوفك
قال وهو يغادر:
-وشوفتني
أوقفه ماهر قائلًا:
-استنى يا يحيى، عايز أتكلم معاك
التفت له وقال:
-تتكلم معايا في إيه، مافيش حاجة نتكلم فيها
-نتكلم على اللي حصل زمان
ابتسم ابتسامة مؤلمة وقال:
-اللي حصل زمان!!!!
ليقوم بسؤاله:
-ليه عملت فيا كدا
ثم أعاد عليه السؤال بنبرة غاضبة:
-ليييه
أخفض ماهر نظره، كان سؤالًا صغيرًا مكوّنًا من ثلاثة أحرف لكن دائمًا ما يكون جوابه صعبًا ومحمّلًا بالاعترافات المؤلمة، ورؤية يحيى بهذه الهيئة قد حركت به شيئًا، ولأول مرة بعد تلك المدة من فعلته يكتشف مدى سوءها، فقطع حديثهم حضور ملك التي أتت ركضًا، وضعت يدها على صدرها وقالت وهي تلهث:
-إنت بتعمل إيه هنا
وجهت حديثها لماهر الذي أجاب:
-كنت جاي زيارة ليحيى
-الزيارات ممنوعة، اتفضل
أشارت له بيدها لكي يرحل، نظر لها نظرة ذات معنى، فأشاحت بنظرها عنه، نظر لهم يحيى وشعر أن هناك شيئًا، لكن قطع حبل تركيزه رحيل ماهر، وصوت ملك تقول:
-هخلي أحمد يبلغك بمعاد جلستنا
هز يحيى رأسه لها بصمت، فرحلت ملك سريعًا تحاول أن تستجمع نفسها بعد تلك المواجهة التي لم تكتمل
________________
يجلس حسام أمام حسين وبيده السيرة الذاتية الخاصة به، ضم حسين شفتيه وأغلق الملف وقال:
-ملفك مناسب للشغل يا أستاذ حسام، لكن في كام حاجة سمعتهم عنك معجبونيش
نظر حسام في الأسفل وحمحم قائلًا:
-حاجات إيه
-حاجات سمعتها من أهل منطقتك بس قولت أتأكد منك، وأظن فهمتني دلوقتي
رفع حسام نظره وقال بأسف:
الحاجات اللي سمعتها عني مظبوطة، لكن ده كان ماضي، وبحاول أتغير للأحسن، بحاول على قد ما أقدر أكمل باقي حياتي نضيف وأبعد عن الحرام، وأبقى إنسان كويس
لينهض حسام ومد يده لحسين لكي يأخذ الملف وقال:
-لكن لو الماضي بتاعي هيضايق حضرتك، فأستأذنك في الملف
نظر له حسين مباشرة في عينيه، كان يريد أن يرى إذا كان يكذب أم يقول الصدق والعيون خير معين في تلك الأمور، مد حسين له الملف، فأخذه حسام، لكن فشل في سحبه بسبب تمسك حسين به الذي قال له:
-هجربك ٣ شهور لو الـ٣ شهور مشيت فيهم مظبوط، هعينك
ارتسمت البسمة على وجه حسام، وقال بسرور:
-شكرًا جدًا يا أستاذ حسين، شكرًا إنك إدتني فرصة أثبت نفسي
-العفو على إيه، الصح إننا نقف جنب اللي بيحاولوا يتغيروا ونديهم فرصة
ثم أكمل بجدية:
-هتبدأ شغل من بكرا والسكرتير بتاعي هيقولك كل التعليمات
هز رأسه بالإيجاب وقال:
-تمام، هتلاقيني بكرا في المعاد مظبوط
خرج حسام وكادت عيناه تدمع من السعادة، فلقد أعطاه الله فرصة لكي يبدأ حياة جديدة، حياة مليئة بما يرضي الخالق، اتجه إلى السكرتير الذي أخبره بكافة التعليمات اللازمة، ثم غادر المصنع متجهًا إلى أقرب مسجد، يسجد لربه ويشكره على كرمه الواسع
_____________
يقف أمير في المطبخ يعد وجبة خفيفة له ولنهى التي تركها تجلس على الأريكة تشاهد التلفاز، وبعد أن انتهى من الطعام أخذه وذهب إليها وضعه أمامها وقال وهو يقبل رأسها:
-اتفضلي يا نونتي أحلى أكل لأحلى نونا في الدنيا
ابتسمت ابتسامة صغيرة ومدت يدها تأكل، نظر إلى وجهها العابس وقال:
-هو إحنا لسه متصالحناش؟
لا اتصالحنا
أنهت كلامها ووضعت الملعقة في فمها بعد أن ملأتها بالطعام
-أمال مالك بتقوليها من غير نفس ليه
-لا أنا بس تعبانة شوية
-مش حاسس بس ماشي
كانت تمضغ طعامها، وتنظر له بطرف عينيها، فوضعت يدها على فمها وقد تعكرت معدتها، فقال يسألها بقلق:
-إنتي كويسة
هزت رأسها بالنفي، ثم نهضت سريعًا إلى المرحاض تستفرغ كل ما في جوفها، بينما أمير يقف بجانبها ويمسد على ظهرها بحنان، وبعد أن انتهت، غسلت وجهها عدة مرات، فمد أمير يده بالمنشفة وقال:
-أحسن، ولا تحبي نروح للدكتور
نظرت له بسخط ورحلت، ولم يفهم معنى نظرتها، ذهب خلفها وقال:
-مالك يا نهى
التفتت له وهدرت قائلة:
-وإنت هتعرف إزاي مالي وإنت مش معايا أصلًا، أنا بحلم بكوابيس وأنا نايمة وبشوفها وأنا صاحية، وحقيقي مش فاهمة إيه ده
ضغط بأصابعه بين عينيه يحاول أن يستجمع أعصابه، فهو لا يفهم شكواها المتكررة بسماع أصوات حولها وأنفاس، وكوابيسها المتكررة، فقال يحاول تهدئتها:
-أنا بحاول أكون جنبك على قد ما أقدر، مش فاهم اللي بتشتكي منه لكن بحاول أبقى معاكي، لحد ما نشوفله حل سوا
لتصرخ به قائلة:
-نشوفله!!!! إيه نشوفله دي، حاول تحل مشكلة بتواجهنا لوحدك مش لازم كل مرة أكون معاك فيها، متحسسنيش إنك من غيري متعرفش تعمل حاجة
أغمض عينيه بقوة وقال من بين أسنانه:
-نهى، كلامك بيوجع، وغلط إنك بتقولي كدا
أجابته بعند:
-الغلط اللي إنت بتعمله، اعمل حاجة لوحدك يا أمير
نظر لها بعتاب، ولأول مرة ينظر لها ولم يعرفها، فتلك ليست نهى خاصته، لم يجد رقتها وأنوثتها، بل وجد امرأة أخرى، امرأة لم يعرفها، اتجه إلى غرفتهما وارتدى ملابسه سريعًا وغادر المنزل
_________________
دخلت حياة صالة الطعام، أخذت صحنها واتجهت إلى الطهاة حتى امتلأ صحنها بمكونات الغداء، وقفت تبحث عنه بعينها لكن لم تجده، تنهدت بملل ثم اتجهت إلى إحدى الطاولات وجلست بمفردها، تحاول تناول الطعام، لكنه لم يكن يمر من حلقها، حتى وجدت من يضع صحنه ويجلس أمامها، رفعت نظرها لتجده يحيى قد أتى، ارتسمت البسمة على وجهها ولم تعقب، فقط عادت تأكل الطعام وقد عادت لها شهيتها، وهو أيضًا تناول طعامه بشهية فهو أيضًا لديه نفس العادة لا يستطيع أن يتناول الطعام بمفرده، مد يده بورقة مطوية نصفين، تركت الملعقة وأخذت الورقة تفتحها وهي تمضغ الطعام، لتحتل ملامح الدهشة وجهها، فكانت صورتها، بكل تفاصيلها بعيونها البنية المسحوبة، وشفتيها المستديرة، ووجنتيها الممتلئتين، مضغت الطعام سريعًا وقالت:
-ده إنت جايب مناخيري بالظبط ولا مصغرها ولا مكبرها
ابتسم على تعليقها وقال:
-أنا قولتلك سيبي إعجابك بالرسمة ده عليا
كانت تنظر إلى الرسمة بانبهار حقيقي، لتشير على شعرها الذي يشبه في قصته الشلال، وقالت:
-لا الشعر تحفة، تحفة بجد، أصلًا أنا قصيت القصة دي قبل ما أجي هنا
لتحرك رأسها وتضع يدها على شعرها وقالت:
-أنا أغلى حاجة عندي هي شعري، قعدت أطوله وأهتم بيه لحد ما وصل الطول اللي كنت عايزاه، ورحت بقى الكوافير وخليتها تقصهولي تدرّج (ديجراديه)
كان يستمع لها وهو يتناول طعامه، فتحولت نظرتها إلى الحزن وانطفأ صوتها المتحمس وقالت:
-ويارتني ما رحت
اقترب على الطاولة وقال يسألها:
-ليه إيه اللي حصل
ضمت شفتيها بأسف وقالت:
-من بعدها مشوفتش يوم عدل وعرفت حاجات وحشة
ثم رسمت ابتسامة حزينة وقالت:
-وجيت هنا
أثرت فيه ابتسامتها الحزينة فقال:
-إيه اللي حصل
تنهدت وفي ثوانٍ محت ملامح الحزن ورسمت ابتسامة وقالت:
-بلاش نكد، إحنا دلوقتي بنتأمل التحفة الفنية دي
تعجب من تغيّر ملامحها، وابتسامتها التي رسمتها باحترافية، يبدو أنها جيدة في إخفاء ألمها، فقال لها:
-هتقرأيلي الكتاب إمتى بقى
وضعت الرسمة جانبًا وعادت تمسك الملعقة وقالت:
-تعالى بعد الغدا نسقي النبتة ونروح المكتبة
-أنا سقيت الزرعة، وعندي جلسة بعد الغدا
ضيقت عينيها وقالت:
-سقيتها من غيري!!!!!!، إخص، خلاص روح الجلسة وخلص وأنا هبقى في المكتبة
-أظن إن الهدف من الموضوع إننا نبقى مسؤولين عنها مش حد يفكرنا بيها
نظرت له بطرف عينيها بضيق، وأكملت طعامها، لينهض هو قائلًا:
-هروح أنا بقى عشان متأخرش
هزت رأسها وفمها ممتلئ بالطعام، ليبتسم على تصرفاتها ويرحل متجهًا إلى غرفته ينتظر ملك، ولم تمر دقائق وكانت تدق على بابه، نهض يفتح لها الباب، لتقابله بابتسامة صغيرة، دلفت قائلة:
-إيه الأخبار النهاردة
جلست على المقعد تنتظر إجابته، اقترب يجلس أمامها قائلًا:
-بخير
كان ينظر لها بتركيز، كان يريد أن يستنتج شيئًا من حركاتها ونظراتها، لكن لم ينجح الأمر، فقالت ملك:
-لو عايز تقول حاجة اتفضل بلاش الحركات دي يا يحيى
تنحنح بحرج لاكتشاف أمره، ليقول:
-عارفة مين الشخص اللي كان بيكلمني النهاردة وإنتي مشيتيه
أجابته بثبات:
-مين
-ده ماهر، سبب كل حاجة بتحصلي
-يحيى لازم نوضح نقطة مهمة في الموضوع ده، قرار إنك تاخد المادة المخدرة كان قرارك، هو آه كان نابعًا عن ضعف بسبب اللي حصل، بس في الأول والآخر كان قرارك، مينفعش تلومه على وجودك هنا، تلومه على إنه عمل لعبة خسرتك شغلك بس
كانت الكلمات ثقيلة عليها، كانت تشعر بالذنب وهي تحدثه لكن كان يجب عليه أن يفرّق بين الأمرين، فقال لها:
-هو إنتي تعرفيه
ابتلعت ريقها وقالت:
-لا معرفهوش
-بتدافعي عنه ليه طب، والنهاردة كان بيبصلك أكنه عارفك، ومعنى إنه دخل هنا بكل سهولة ومش في معاد الزيارة يبقى عارف حد هنا وده خانقني من ساعتها، إني أشوفه واقف قدامي بعد ده كله هو عايش حياته وكويس، وأنا مرمي هنا ده بيخنقني
كان يتحدث بانفعال، والغضب مسيطر عليه، فقالت بهدوء:
-أنا مش بدافع يا يحيى، أنا دكتورتك ولازم أوريك الحقيقة من وجهة النظر الصح، إنك تلومه في حالتك ده طبيعي، لكن مش صح، وأنا هشوف إزاي دخل وأضمنلك إنه مش هيدخل خالص
هز رأسه عدة مرات وقال:
-يبقى أحسن أنا مش عايز أشوفه
-هو لازم يبقى فيه مواجهة بينكوا لكن أكيد مش دلوقتي
نظر لها نظرة غاضبة، جعلتها تطرح عليه سؤالًا آخر:
-عملت إيه مع حياة سألتها
-لا كنت هسألها لكن لقيت إن الموضوع بيضايقها، فقولت أسكت أحسن
-ممكن تحكيلك هي لوحدها
-ممكن
-ليك مكالمة مع أهلك النهاردة بعد الجلسة
لمعت عيناه اشتياقًا وقال:
-الحمد لله، بجد هما وحشوني أوي
ابتسمت وقالت له:
-وتقدر تقولهم إنهم يجوا آخر الأسبوع زيارة كمان
-شكرًا جدًا يا دكتورة ملك
-العفو على إيه بس أنا بحس إن زيارتهم ليك بتحسّن نفسيتك وبتسرّع من العلاج
-دي حقيقة، إني أشوف ماما ونسمة وإنهم كويسين ده بيخليني مطمن وبيديني دافع إني أكمل رحلة علاجي
-ربنا يكمل شفاءك على خير
أنهت جملتها ونهضت قائلة:
-الجلسة خلصت
-بسرعة كدا
هزت رأسها وغادرت على الفور، نظر لأثرها بتعجب ثم دلف للمرحاض، بينما ملك كانت تتجه إلى مكتب الدكتور إبراهيم سريعًا، فتحت الباب على مصراعيه وقالت:
-أنا مش قادرة أكمل، مش قادرة
نهض إبراهيم سريعًا ودنا منها قائلًا:
-تعالي اقعدي
جلست على المقعد ومد يده بكوب من الماء، كانت أنفاسها مضطربة، أخذت الكوب وارتشفت قليلًا من الماء، جلس إبراهيم أمامها، وقال لها:
-إيه اللي حصل
أجابته بتقطع:
-ماهر.... ماهر جه هنا وكلم يحيى
-وبعدين
أدمعت عيناها قائلة:
-لولا إن أحمد قالي مكنتش لحقته، مكنش ينفع يبقى فيه مواجهة بينهم دلوقتي، يحيى مش متزن لسه وممكن تجيله نوبات غضب
اقترب منها إبراهيم ومسد على ظهرها:
-اهدي يا ملك، اهدي
نزلت دموعها على خدها وقالت:
-أهدى إزاي
ثم أكملت من بين شهقاتها:
-أنا قولت النهاردة ليحيى إنه مينفعش يرمي اللوم كله على ماهر، لكن أنا حاسة بيحيى وفاهماه، مر بحاجات كتير وحشة وأخويا لو مكنش عمل ده كله مكنّاش دلوقتي في الموقف ده
كان يستمع لها إبراهيم ويمسد على ظهرها لعلها تهدأ، فقال لها بنبرة هادئة:
-إن يحيى يبطل يرمي اللوم كله على ماهر ده الصح يا ملك، إنتي مقولتيش كدا عشان أخوكي، ومينفعش تلومي نفسك إنتي ملكيش ذنب في ده كله
-سألني إذا أعرفه وقولتله لا، قولتله لا وكدبت
قالت جملتها بانهيار، ليقف إبراهيم ويمسكها من كتفيها وأوقفها أمامه وقال لها بجدية:
-ملك، فوقي إنتي معملتيش حاجة وكل اللي بتعمليه عشان يحيى وإنه يكمل علاجه ويبقى أحسن، بطلي تلومي نفسك على حاجة إنتي معملتيهاش
كانت تنظر له بعيون حزينة ووجه ممتلئ بالدموع، فأكمل:
-امسحي دموعك واجمعي نفسك وكملي شغلك يا دكتورة
مسحت دموعها بضعف، وقالت:
-أنا حاسة إني مش هقدر
ابتسم لها بحنان قائلًا:
-بس أنا متأكد إنك هتقدري
مد يده لها بمنديل فأخذته منه ومسحت دموعها وهي تنظر له بحزن
___________________________
يجلس أمير بجانب صديقه وائل، تنهد أمير تنهيدة عميقة وقال:
-أنا البيت عندي فوقاني تحتاني ومتخانق مع نهى ومش طايق نفسي
نفض وائل سيجارته بطرف إصبعه وقال:
-وأنا سبت تسنيم وهروح آخد الشبكة بكرا
عقد أمير حاجبيه وقال:
-إيه ده ليه كدا
قوّس شفتيه للأسفل وقال:
-معرفش مبقتش أحسها، ومقفول منها كدا، اتخانقنا وخلصت على تعالى خد دهبك
-ده إنت كنت بتموت في حاجة اسمها تسنيم
رفع كتفيه لأعلى وقال:
-مش عارف
ضرب أمير على ظهره بخفة وقال:
كل شيء قسمة ونصيب، متضايقش نفسك
