رواية العدم نقطة السواد الفصل الخامس عشر بقلم اسراء
﷽
أبد ما عايش الحاضر
بعدني مچتف بماضيچ
• ━━━━━━━━ ━━━━━━━━ •
التفتت اني على صوت لميعة مبتسمه
فرحانة متشمته وهي تگول بصوت عالي
لميعة -: كيلاس ؟ تعالي امي تعالي يم السيد خله يشوف الزين على اصوله .
ما لحگت حتى اتنفس وحيدر تعداها ومشى
وهي مدت ايدها ما صاحت صوتها طلع رقيق
كيلاس -: اوكف شبيك؟ تعال كلي شلون تتزوج؟ ماما وخالة لميعة رادونه لبعض .. شلون؟..
اتعداها كأنما ما سمع فتح الباب وطلع
والباب وراه انضرب قوي
كيلاس بقت واگفه تباوع ع الباب المسدود عيونها الزرگ انترست دموع .. التفتت علي وهمست من بين دموعها
كيلاس -: رفيدا .
ماخلنها تكمل واجن عليها كفاية وهديل وسهام
كفاية لزمت ايدها
كفاية -: تعالي حبيبتي تعالي .
هديل ركضت جابت ماي وسهام تمسح على راسها و على شعرها النازل من جوا الشال.. فوتوها گعدوها وهي تبچي مثل الجهال شهگة ورا شهگة جسمها كله يرجف
لميعة باوعت علي وعلى حنين .. اشرت بإيدها
لميعة -: لمي السفرة انت وهاي .
وراحت گعدت يم كيلاس بوجهها بحلگها طبت تحچي وياها وتداري مشاعرها
لميعة -: اهدي امي اهدي هساع يجي حيادر وكلشي ينحل حتلو متزوج منو يگول راح تضل على ذمته؟؟ .
اني واگفه ايدي على حلگي ما اعرف شسوي
كيلاس رفعت راسها باوعت بيه و دموعها على خدها
كيلاس -: ليش مو انا حبيتج ؟ مو اوثقت بيچ وحچيتچ عن حيادر ؟ تطلعين متزوجته؟ ليش حبيبتي ليش؟ ما لگيتي غير حيادر؟ .
رحت گعدت مسافة عنها ما گدرت اقرب
لهسه احس غريبه عنهم .. واختلف
رفيدا -: سمعيني مو بكيفي والله السيد واهله هما الدمروا حياتي واذوني ومو بكيفهم يتحملون اثر افعالهم وشرورهم صدگيني اني مظلومة مثل ما انت مظلومة .
رجعت تبچي وتون و تحچي مثل الجهال وياهن
كيلاس -: ليش سوى بيه هيج ليش؟ مو أنا أحبه؟ .
انقهرت عليها والله انقهرت گلبي انعصر لأن خطيه هيه مريضه وتشوف الامور عكس ما تريد دائما
دعيت على صنديد وهديل من كل گلبي هما السبب .. هما اللي ذبوني بهاي الحفرة
وفزيت اتذكرت شلهب برا گمت عدلت الشال بسرعه ورحت لباب الحوش فتحت الباب شويه فتحة گد عيني
الصياح يهز الفرع هز
ولد المنطقة ملتمين عليه يريدون يلزمونه وهوا مو طبيعي ابد يتطوطح والبرنو بإيده مو ثابت يميل يمين ويسار
حيدر گباله واگف وفارد ايديه يصيح بيهم
حيدر -: لحد يدناله مو بوعيه يابويه ولكممم مو بوعيه لحد يدنااااله .
يأشر لأخوانه و زلم منطقتهم يتراجعون ليورا وينزلون اسلحتم ، ورجع صوته هادئ يحاول يسايره
حيدر الكرار -: لا تتهور خويه اخيتك يمي معززة مكرمة تعال فوت جوا واخليك تشوفها .
رفعت عيني على شلهب الندبه اللي بحاجبه صايره اكبر صايره طبر مو ندبه وخشمه من العظمة هم بي ندبه اثر ضربه وركب رجليه الاثنين مزلغات وكلهن دم وتراب هذا مو شلهب القوي هذا اخوي التعبان .
روحي فرفحت عليه اريد افتح الباب واطلع اركض له واضمه بس ماگدر الشارع مليان زلم وكلهم ملثمين بأشامغ
ضليت واگفه ودموعي تنزل على خدودي
النسوان كلهن يباوعن من البيبان ويبسبسن
و شلهب صوته مو منتظم يحچي ويتطوطح
شلهب -: وينها وين رفيدا .. جيبولياها والله ارميكم ولككمممم اريد اختي اريد عزيزة اخوها ولكم اريد حبيبة اخيها يابويه شصار بحالها شسويتو بيها يا سفلة .
حيدر الكرار -: شلهب نزل السلاح اخيتك بخير وجدي رسول الله بخير معززة مكرمة جوه ببيتي .
شلهب -: چذاب.. انت چذاب انت ماخذها گوه مجبوره عليك وينها هي وينها ولككك جيبها ابن ال*** .
حيدر الكرار -: ورا هالباب بعلي ورا هالباب متانيتك بس نزل السلاح حتى افوتك تشوفها ، لا تتهور .
شلهب يهز براسه و دموعه نزلت ، اول مره اشوف اخوي يبچي واضح الصاير وياه مو قليل اكيد اكو شي ، اكو مصيبة
صاح يريدني و رجليه ما شالته وگع على ركبة الثنتين والسلاح وگع من ايده على الگاع شهگت وحطيت إيدي على حلگي ، عبالك گلبي اللي وگع
حيدر شمر سلاحه اللي بإيده على ذو الفقار وگال له ضموهن جوه لأن الوضع مو زين وخاف الامريكان يجون تفتيش مع ان بغداد امان عكس صلاح الدين
حيدر ركض على شلهب اللي صار يضرب على وجهه بإيديه الثنتين وحيدر لزمه جتف إيديه خلاهن ورا ظهره وحضنه قوي حتى يثبته
حيدر الكرار -: بس.. بس خويه بس انت زلمة بويه عيب تبچي وتلطم هيچ .
سليم واگف يباوعلهم وجهه صار اسود من الغيره جگارته بين اصابيعه ومرتجي على سلاحه يتفرج عليهم
حيدر الكرار -: كلمن على بيته انحلت ماكو شي هذا اخو العلوية مرتي انحلت بويه انحلت ومشكورين على نخوتكم .
واحد من الزلم قرب طبطب على چتفه
_ _ سيفنا وبتارنا انت بويه من يومك ابوك ما سماك هيچ عبث هذا انت من تطب لمچان الشر ينبتر .
سليم ذب جگارته و داسها برجله حچه وهوا يتقدم ع السيد
سليم -: السيف البتار من يسل ما يرجع فارغ حيدر الكرار ما يحتاج وگفات هو بزوده سيف بتار محفوظ ب الله والامام علي .
حيدر -: استغفر الله بويه السيف البتار سيف الامام علي انه وين والسيف وين انه خادمكم وخادم الحرمين الشريفيين .
الثاني تقدم ضرب على چتافه وهوا يگول:
_ ما غلط ابوك الشهم كاظم الموسوي من سماك السيف البتار اي وابو فاضل بتار من تگول انحلت تنحل الله يخليك ذخر لأهلك ولديرتك بويه .
حيدر هز راسه وابتسامه بنص تعبه ارتسمت على شفايفه
_ كافي بويه لا تكبروني انه خادمكم الزغير وخادم الحسين عليه السلام .. بس اريدنها من شواربكم كلمن يرد لبيته .
كلمن راح لبيته وحتى النسوان سدن البيبان
حيدر سند شلهب شاله وجابه للباب اول ما وصلوا يمي فتحت الباب و شلهب بس شافني وكع على ركبة و گعت وياه وحضنته حيل والتراب اللي بملابسه طبت بخشمي ، بس هذا اخوي
حيدر سد باب الحوش وخلى اخوانه برا عمدا حتى لا يشوفون شلهب بهالحالة
شلهب بعده بحضني جتافه تهتز ويشهگ ، ابتعدت عنه وكفختني ريحة حلگه مو طبيعيه شارب شي وعيونه يمه عيونه حمر ومغورگة وايديه ترجف يريد يلزم ايدي ما يسيطر من كثر الرجفه عرفت شارب
ليش اكو من شوكت يشرب ؟ اخ يا يمه ااخ اهلنا دمرونا
رفع راسه باوع بعيوني
شلهب -: روفي وين چنتي؟ وين؟ عفتيني انت والنوب هي .
رفيدا -: منو؟ .
شلهب -: رويدة راحت لغيري تزوجت .. تزوجت ولچ.. وآنه الي حاسبها عمري نكرتني داست على گلبي وراحت .
لو مو يبچي هسه گدامي الا اطگها بهلهوله واخيراااا خلصنه من بنت ابليس ، عضيت على شفتي حتى لا اضحك
وهوا يأشر بإيده الترجف ما تثبت واني والله بگد ما اكره رويدة انقهرت عليه شصاير بحاله
شلهب -: تدرين شگالت؟ گالت انت ما عندك مستقبل انت بس تفكر بأختك انت ما تحبني ليش انه مو احبها من الصغر ؟ انت تدرين شگد احبها روفي انت اكثر وحده چنتي تحسين بيه ليش نكرتني ليييش .
وبچه بحرگة گلب على چتفي ، مسحت دموعه
وحاولت ارفع راسه وهوا ماكو راسه على چتفي ويشمر بأيده ، حركاته مو طبيعيه
رفيدا -: شلهب ..
شلهب -: لا.. لا تگولين شي انت هم عفتيني من ازوجتي البيت صار گبري واجت هي وگالت راح أعوضك عنها صدگتها .. سهرت وياها حچيت وياها ليالي گلت يمكن انساچ بس مانسيتچ ماگدرت تنسيني اخيتي ماگدرت تنسيني لا هي ولا عشره من امثالها هالمكاره .
هزيت راسي ومسحت على راسه شعره كله تراب
رفيدا -: ما تستاهلك خليها تولي هيچ احسن يا امي وابوي انت هاي البنيه ما توالمك ولا توالم تفكيرك وثقافتك ولك انتوا حتى بالشكل ما تتوالمون هي وين وانت وين .
شلهب -: لا مو احسن لعد وحبي إلها ؟ وسوالفنه؟ وسهرنه؟ وليالينه؟ وكلمة احبك؟ شلون تگدر بدوني؟ شلون رفيدا شلون انا ليش مو گادر بدونهااا .
وصاحها من غمج گلبه ، والله حسيت گلبي انشلع من صدري على صوته ، رجع سند گصته على چتفي و يبچي يشهگ شهگة ورا شهگة
شلهب -: دمرونا ولچ الدنيا والناس واهلنا شسوينه احنا ؟ انا ضايع وانت ضايعة شايل همچ فوگ همي .. شوكت نخلص .
واني بس امسح على راسه وابچي وياه دموعي تنزل على ايديني
رجعت حضنته خليت راسه على صدري
شلهب -: اريد انام نومة اهل الگبور.. بعد ما اگعد.. دخيلچ ضميني
بست راسه ومسحت على شعره وهوا يشهگ
حيله مهدود بحضني اخوي القوي مو قوي اليوم
حنين ::
ايدي كلها زاهي دا الم المواعين من الصالة للسنك ركض
أسمع صياح الزلم برا وگلبي طاح على رفرف اريد اطلع اشوفنها شصار بيها خايفة عليها .. خليت آخر ماعون بالسنك وطلعت
بالهول امي وخواتي سهام وكفاية وهديل گاعدات يم كيلاس يواسن بيها
و كيلاس بعدها تبچي .. انقهرت عليها هي كلش حساسة ومنا مرضها والطامة الكبرى لو عرفت رفيدا كيلاس مو بس بت خالتي..
هزيت راسي وفتحت باب الصاله شويه شفت رفيدا
واحد گاعد يمها راسه على چتفها ويبچي مثل النسوان ، هذا اخوها على ما اظن ومن شفت حيدر يمهم رجعت ليورا بساع بقيت فاتحة الباب شويه واباوع
اخوها رفع راسه يحچي ويا رفيدا يشمر بإيده ويضرب على جهة گلبه ، عيونه دم و عنده ندبه طويله بحاجبه لحد خده وبخشمه اكو طبرة قويه جديدة بيها دم يابس بعضمة خشمه ووجهه وهدومه كلهن تراب .. و رفيدا تشبگ بي و تمسح بوجهه بأيديها الثنتين وتبچي وياه
فزيت على صوت امي من وراي
لميعة -: حنييينة شنووو طررررمة؟؟؟ موبايلي يدگ بالمطبخ روحي جيبي .
رحت للمطبخ ركض شفت الاسم..
_ السيد نهاش .
الدم نشف بيه واطرافي ثلجت ، رجعت ذكرياتي كلها من چنه بالعمارة .. شگد چان حقير ويانه وشلون ما يحب اخواني ولا هما يحبونه..
بلعت ريگي وديت التلفون ل امي
انطيته الها وتصنمت من شافت الاسم حطت ايدها على گلبها و وجها صار ينطي الوان .. باوعت على خواتي وحدة وحدة وحچت بخوف واضح بصوتها
_ عمكم السيد نهاش .
وفتحت الخط
لميعة -: الو .. هلا بيك سيد شلونك ؟ .
صوته عالي .. حتى انه الواگفه شوي بعيد سمعته
نهاش -: شنهي هااي الفضايح شنيهاي الفوضى ؟ هذا السني جاي هاد بالسلاح بفرعنه ؟ هاي اهانة النه يا ام ذو الفقار من شوكت هيچ نماذج يهدون علينه؟؟ .
لميعة -: لا لا .. سمي برحمن سيد اذكر الله هذا بس..
نهاش -: لا تحسبين احنا نسينه ترا كيلاس تضل حرمته الأولانية وما ينحط على راسها شريچه وهساع تأكدتوا من شرف هالبت ؟ خلاص احنا احفاد من هاي البت ما نريد .. ما نتشرف بيهم احفادنه راح يجون من بت اخونه من دمنه ولحمنه .
اي ادري راح تنصدمون والصدمه اللي ما تعرفها رفيدا ان كيلاس بت عمي لأن جدي متزوج قبل جداتي الثنتين وحده كردية وهذا الولد طلع نسسسخة من امه وما بي طبع من اطباع اهل الجنوب ف إعمامي متبرين منه وهوا عاش بكركوك استقر هناك وعاف بلاويه وراه..
وبنفس اللحضة عرفت .. هذا الحقير سليم هو الوصل الخبر يريد بأي طريقة يزيح كل شخص يحب حيادر
نهاش -: احنا امشينه وراجعين من العمارة لبغداد وما نطلع من يمكم الا واحنا مگاومين هذا السني الدخل علينا بسلاحه بيت اخوي صارت جدام الغرب تدوسه ؟ .
لميعة -: اي اي حياك الله ابو..
قاطعها ماخلاها تكمل
نهاش -: وشغلة ثانية يا أم ذو الفقار جدامي ماترد من باب بيتكم إلا وحيدر عاگد على بت أخونه .. نگطة راس سطر انتهى الكلام .
سد الخط بوجهها واميگامت تضرب على رجليها تلوب تلوب
لميعة -: اخوچن يتنفس مشاكل ياكل مشاكل عايش ع المشاكل انه هساع شلون راح اواجه اعمامكم؟ شلووون؟ .
حنين-: الصوچ منچ يمه .. انت جبرتي على هذا الطريق وتدرين بگلبه شكو وتعرفينه يح..
لميعة -: لا تگوليها لا تگوليهااااا انه گدرت له كل هالسنين وزحتها من گلبه چا شعبالج ماگدر ازيحنها هساع ؟ .
گامت وطلعت برا وانه وراها رحت عفت البنات يتناقشن بموضوع اعمامي ويحللن من كيفهن
رفيدا صارت بوجه امي توها تريد تفوت للبيت
لميعة -: كلها من وره هاي الفگر .. هاي الخايبة الي ما شفنا الخير من طبت لهذا البيت .
رفيدا ساكته ما ردت بس دموعها تنزل على خدها الحديقه فارغه ماكو احد اكيد حيدر فوت اخوها للديوان
اخذتها من ايدها ومسحت دموعها..
حنين -: البيها كافيها يممه انتو بهذلتوها من وره بنتچ .
هديل بالباب واگفه متخوصره بس سمعتني
زمخت بيه وبثت سمها بوجهي
هديل -: سكتي لا تخليني احچي ترا كلشي من وره مرت اخوچ هاي .. هاي العايبه لو ما داخله علينه چا احنا بخير ، محد گاللها تلف على زلمتي وترد تلف على اخوي ام الزلم .
سهام وكفاية هجمن عليه وياها
سهام -: لا تحچين على اختچ جدام الغرب هاي ما تنحسب من عدنا احنا من فتحنه عيونه ع الدنيا كيلاس لحيدر .. ما عدنا غيرها هالحچايه .
حنين -: روحن انتن واخوچن وامچن شتريدن تسون سون بس عوفوا البنية بحالهااا شبيكم لخاطر الله شبيكم چا مو جدنه رسول الله وصى بالدخيل؟ اعتبرنها دخيلة ع الاقل .
اخذتها وطبينه للبيت عفتهن متناقشات برا ، ردت اخذها للغرفة بس من شافت كيلاس عافت اديه وراحت گعدت يمها كضت ايديها الثنتين
رفيدا -: اني ما اريده والله ما اريده ولا يهمني حيدر الچ لا تبچين .
كيلاس بعد ما چانت مدنگه وصوتها مطبگ من البچي ، رفعت راسها مثل الجهال من يردون يتأكدون
كيلاس -: والله الي؟ يعني ما حبيتيه انت ؟ صدگ ما حبيتيه؟ .
رفيدا هزت براسها ودموعها تصب
رفيدا -: لا وحگ هو الله ما حبيته اني من يومي اعتبر روحي دخيلة عليه وعلى اهله واوعدچ اوعدچ وعد كيلاس .. حيدر الچ هو الچ و بس الچ اني وياه حتى بالجنة ما نتوالم واذا اشوفه داخلها والله اختار النار ولا اكون سبب بتعاستچ لحظة وحده .
وحدة حضنت وحدة وانه صافنة عليهن..
كيلاس حبابة وفطيرة ومنا مريضة والله القهر راح يموتها ادري انه شايفه شلون تفرح من يكون يمها ويحچي وياها هي ما تحبه حب كبار لا ، هي تهواه لأن شافت بي ابو ، شافت بي أخ .
مسحت دموعي وانه اعاين الهن
و رفيدا بعدها تمسح بدموع كيلاس
كيلاس مسحت خشمها بضهر ايدها
وگالت شي بحيث حلگي انفتح من الصدمه
كيلاس -: خليچ على ذمته حتى ماما لميعة ما تأذيچ انا ما عندي مشكلة .
رفيدا ابتسمت الها و كيلاس مستمره تسولف على مستقبلها هي وحيادر و انفتح الباب وحيدر فات
شافهن الثنتين گاعدات والثنتين عاينن عليه
كيلاس گامت بساع راحت وگفت قريب منه
كيلاس -: اسفة حيادر فهمتك غلط رفيدا حجتلي كلشي .. زواجكم صار بسبب اهلها وهي دخيلة يمك صح ؟ .
حيادر انصدم يباوع الها ويرجع يباوع ل رفيدا من ورا كيلاس ودمارات اثنين بگصته طلعن من سمع رفيدا هيچ حاچيه ل كيلاس عن علاقتهم
رفيدا باوعت عليه ببرود وردت على كيلاس..
رفيدا -: اي حبيبتي كيلاس وياريت تستعجلون بزواجكم واوعدچ راح احني ايديني الاثنين وشعري بهاي المناسبة .
حيدر بلع ريگه حول نظره اليه
حيدر -: وين الوالدة؟ مخابرة على ذو الفقار تريدني .
حنين -: راحت هي والبنات فوگ بغرفتها .
هز راسه ومشى يريد يصعد الدرج
حنين -: حيادر .
فر ايده -: شكو ؟ .
حنين -: عمي نهاش جاي بالدرب هوا واعمامي .. داري بهدادة اخو رفيدا..
صفن لثواني ما حچى شي عافني وصعد
گعدت بالصاله و هاي كيلاس خطية ماتسكت تسولف ل رفيدا عليها وعلى حيادر من چانوا صغار
و رفيدا بس تهز براسها ، شو هاي ولا مهتمة
ماتحملت سوالف كيلاس المالها داعي كضيتهن اثنينهن من ايديهن
حنين -: گومن تعالن لغرفتي .
اخذتهن وسديت الباب علينه
وهم رجعت كيلاس تسولف ماتسكت ، رحت للحمام فتحت الماي مليت الطشت اخذت الصابونه الدوف مالتي خليتها بصف الطشت و وياها الليفة
رجعت لگيت كيلاس حاطة رجل على رجل وتدگ على حيادر وتعض بشفتها، وهوا مايرد
كيلاس -: اوف ميجاوب شبيه حيادر؟ .
حنين -: حبيبتي عنده شغل عنده مصايب فوك راسه .
اجانه صوت حيادر يصيح على امي غرفتها سمعناه لأن صايره گبال غرفتي ، كيلاس فزت و ركضت عليهم .. اكيد حيادر عرف اعمامي يريدوه يعقد على كيلاس واتسودن
رفيدا شامره روحها ع الفراش حسبالك جثة فاردة ايديها وعيونها عالسگف الدموع تنزل من طرف عينها على شعرها
گعدت يمها ما حچيت وبعد مدة هي همست
بصوت مبحوح ورايح من البچي
رفيدا -: حنينة .. اني ليش هيچ يصير بيه؟ كلشي احبه بالراحة وياه يروح من ايدي .. معقولة ما استاهل ؟ .
حنين-: انت غلطتي من حچيتي ل كيلاس وگتيلها حيادر مو مهم عندچ .
_ هو فعلا ما يهم..
_ لا تگولين ما يهمني چا ودموعچ هاي شنهي ؟ .
_ ابچي على نفسي، على اخوي ، على عمرنه الضاع .
چنه احد ضربني بوكس بگلبي من سمعت كلامها
حنين -: گومي سبحي گومي بردتلچ ماي خليت لچ صابونة دوف والليفة گومي حتى ترتاحين .
گامت بثگ فتحت شعرها الخمري الوااصل لنص ظهرها متموج يجنن يزيد وجهها براءة وعيونها؟ يا عيونها مورمات من البچي
فاتت للحمام ردت البردة وسمعتها تغرف بالطاسه وتصب على روحها ، صوت الماي يضرب ع الگاع
رحت للمطبخ اريد اسويلها لگمة تاكلها حيادر وصاني عليها وانه نسيت ، البت راح تطيح من طولها من المشاكل والصدمات والتفكير والقلق
لگيت الحبايب گاعدات بالمطبخ كفاية وسهام وهديل وميرج مرت ذو الفقار يحچن بزواج حيادر
كفاية -: ما ترهم للسيد وين وهيه وين السيد بعلي امي ظلمته وياها والسبب انت يا هديل .
هديل-: خاب ماتنچبين انه ياهو مالتي ؟ هي امچ تكره هالبت من زمان تتذكرين من چنه نروح على بيت عيالي وحيادر ويانه؟ ماما تمنعه يمشي وياها ويگرب منها هي ماطيق هالبت انه شنهو ذنبي خايبات .
ميرج -: خوب حيادر مدري شماله متسودن عليها هي كل عمرها 13 سنة
سهام -: لا وشفتن جسمها؟ فلككك تگول مرة كامله مكمله وابو فاضل انه حسبالي عمرها 17 جسمها متناسق ومرتب
كفاية-: يا متناسق اخوچ لو سلبوح سيان هم يضل ميت عليها وعلى طاريها انتن شايفاته من يجي من برا؟ يضل يسئل اكلت؟ شربت؟ نامت؟ خوب امي ما خايف عليها هيچ .
سهام -: بكل الاحوال ارد واگولن ما تناسبه .
دمي فار عليهن واني اطبخ التفتت عليهن
حنين -: انتن شكو؟ قابل انتن تزوجتنها بداله ؟
علگت تعاركنه صوتنه على الا شوية وننتف شعر بعض وسكتنه فرد سكته من نزل حيادر وجهه احمر وعيونه طالعه يصيح على امي من جوه ويعاين عليها ليفوگ
حيدر -: حتى لو اعقد عليهاااا بس زواااج ما اتزوووججج خوووش محد يجبرني انه ، وانت تعرفيني حجيييه .
لميعة-: ولك خايب حويدر يمه البت لا تسمعك خطيه شيصير بحالها حسبي الله عليك من ولد .
عافها وطلع خلاها تتوسل بي يرجع يحاجيها
سمعنا صوته هو واخواني متسودنين لان عمي نهاش اجه واكيد اعمامي كلهم وياه..
رجعت كملت الاكل واخذتها ل رفيدا
فتحت الباب ريحة الدوف تارسه الغرفة وهي گاعده بالگاع تمشط بشعرها وتلم بي توها مكملة سبح..
حطيت الصينية جدامها وبهاللحظة فاتت كيلاس
كيلاس -: يااا جوعانة زين سويتي اكل حنينة .
و رفيدا صاحتها اجت كعدت يمها لزگ و هاي تاكل تاكل ولا كأن هاي هاويه زلمتها انصدمت منها شكد قويه
كملن اكل و كيلاس راحت نامت يم امي لأن صاحتها تريد تقرا عليها و رفيدا غفت على لحافي
شعرها منثور ع المخده و صوت انفاسها ضعيف ما ينسمع وبين كل نفس تشهگ بحسرة نابعه من گلبها
بقيت وحدي و الوقت تأخر الكهرباء طفت والحر يقرا مليار حاولت انام تگلبت هواي ما اجاني نوم ، نزلت اغسل المواعين واغني واني اغسل بيهم امي فاتت
لميعة -: لا تغنين عيب هذا بيت سادة مو بيت كيوليه .
حنين -: صار يمه .
لميعة -: استعجلي كملي المواعين ووصلي كيلاس لبيتهم .. خطية تخاف من چلب بيت ابو حازم .
فريت راسي باوعت الها
حنين -: يمه وانت ما تخافين علي من چلبهم؟ .
لميعة -: لا والله ماما اخافن على الچلب منچ .
متت ضحك ، كملت المواعين ومسحت ايدي بدشداشتي طلعت لگيت كيلاس تنتظرني وتفرك بعيونها .. اخذتها وطلعنه
الطرمة ظلمة تخوف والشارع برا اظلم شلون راح اوصلها ما ادري؟
مديت راسي من الباب عاينت يمنى يسرى ماكو شي طلعنه ع الكيف وصلتها لبيتهم دگيت الباب وفتحته خاله بديعة
حنين -: ماما گالتلي وصلي كيلاس خاله .
فاتت كيلاس نعسانه وبساع شمرت روحها بالصاله ع الفراش بالگاع
بديعة -: فوتي نامي اذا تخافين من الچلب ماما خاف يحودچ .
حنين -: افا خاله انه باتمان ما انام احرسكم .
ضحكت وگالت
بديعة-: يلا ماما روحي هساع امچ متانيتچ .
ترخصت منها ورجعت وبنص الدرب شفت الچلب يلهث ومكشر سنونه عليه واگف يم باب ابو حازم ويعاين علي يريدني اطير حتى يطير وراي
وانه ماقصرت رفعت دشداشتي وطيييييررر ركض والچلب وراي ينبح وشالي طيره الهوى وشعري انفتح
حنين -: خرا خرا بشعريييي .
وبالگوه كضيت الباب فتحته وطبيت اتلاهث انفاسي مگطوعه ختمت القرآن كله بهاللحضة وآنه سانده ضهري ع الباب والچلب برا بعدة ينبح
ضليت مغمضه عيوني واقرا
_ بسم الله الرحمن الرحيم.. قل هو الله احد.. زين من الله فكني منه.. زين من الله فكني منه
الجو برا بارد بس انه عرگانه وشعري ملزگ على وجهي من الركض
وفجأة حسيت بأنفاس حارة بوجهي كلش قريبة
وريحة مو طيبة ، جگاير وشي ثاني غريب اول مره اشمه! وشي ثگيل واگف گبالي حاجب الهوا عني
ما فتحت عيوني حسبالي اتخيل و قبل لا افتحهن
ايدين خشنة كضت خصري حيل .. سحبتني بقوة لحد ما انضرب وجهي بشي صلب ، فتحت عيوني مفزوعة ولگيت روحي بصدر زلمة؟! .
رفعت راسي شويه وشهگت .. عيونه حمره كلش ومغوشة ، الطبرة الي بحاجبه نازلة لخده صايره حمرة ووارمة اكثر .. وبخشمه طبرة جديده من جسر خشمه بعدها حمره و واضحه
يتنفس بسرعة جسمه حار نار وكل شوية يتمايل بيه ويرجع يثبت روحه ويتنفس بصوت عالي .. صدره يرجف كل شوية راسه يميل على وجهي ويعدل نفسه ويتراجع يثبت عيونه بعيوني..
بلعت ريگي وانه اشوفن الطبره اللي بخشمه
وهو مال وخشمه انطبگ على خشمي ، ريحة الدم شميتها ، فزيت وصحت بي بصوت ناصي
حنين -: عوووفنييي ياااا ولك شدتسوي عوفني .
_ اشششش لا تصيحين .
صوته ثگيل سكران للأخير ايديه قويات حيل زنوده متروسات .. ادفع بي وما اگدر افلت منه يفعص بخصري فعص
حنين -: عوفني ولك .. عوفني ياااا الله ياخذك انت شدتسوي
ما يسمعني عيونه تطفى وتفتح يعاين لي بس ما يشوفني انه
_ ليش عفتيني؟ ليش ؟ .
حنين -: عفتك؟ انه وين شايفتك حتى اعوفنك؟ .
_ انا شنو؟ شنو انا؟ لعبة؟ من تملين تشمريها؟ انا شلهب .. شلهب الي ما بچه بحياته غير بحضنچ .. الي بچه على فراگچ مثل الطفل .. تالي تعوفيني؟
وهوا يحچي حط راسه برگبتي وانه تجمدت اطرافي ثلجت ، دفعته حيل
حنين -: ولك شتسوي؟ شيل راسك شيييله يمممممااا .
ادفعه من چتافه بكل قوتي و يرجع يدحس راسه برگبتي اقوى خشمه المطبور ينحك برگبتي وريحة الجگاير والشي الغريب صارت اقوى .
_ شيليني .. شيليني مثل قبل لميني ، خلي راسي يمچ بس انت تطفين النار البيه انه تعبان والله تعبان .
دفعته اقوه ترنح جدامي وثبتني اقوه ع الحايط
حاولت اتملص منه ماكو ماگدرت له ، شعره نازل على گصته وخشمه حيل متضرر لدرجة وارم وصاير احمر
حنين -: اي طبعا تتعب هو انت ليل نهار سكران منو يبقى يمك؟ .
عاينلي مصدوم عيونه تفتح وتغمض
رفع ايده يتلمس شفايفي بأصابعه
دفعت ايدي قوي وضربته راشدي
شلهب -: انت تگولين هيچ ؟ .
حنين -: اي اگول وبعد اگول حبيبتك عافتك حگا لو انه منها هم اعوفنك ريحة حلكك واصلة للحلة .
يفتح عيونه اقوه يحاول يشوفني
ويضرب على خدي بخفه وكض
فكي يفر بي يمنه ويسرى يتأكد مني
شلهب -: لا.. انت مو هيچ انت لسانچ مو طويل .
حنين -: لا حبيبي انه لساني اطول من شارع فلسطين .. شتريد بعد ؟ .
ضحك صفح وهو سكران رجع دحس راسه برگبتي يمممه ردت اذبحه بعليي هذا شبي
شلهب -: خلي راسي هنا.. هنا بارد .. انا من جوا مشتعل ، گلبي راح يوگف من الركض وراچ خليه يرتاح برگبتچ .
حنين -: مشتعل؟ ولك اذا ما تعوفني هساع اصيح حيادر يجي يشعل اهل اهلك من صدگ .
دفعته اقوه وكضيت ايديه من خصري احاول وياه حتى يعوفني وهوا ماكو ايديه تگول حديد
شلهب -: اذا اجه هالگواد حيدر گليله.. گليله انا ميت بيچ .
سكتت .. وگلت انطي على گد عقله
حنين -: اي هساع اگله .. بس عوفني اول .
شلهب -: ما اعوفچ روحي چانت ضايعة و لگيتها هسه يمچ شلون تريدين ارجع اضيعها؟ .
وادفعه وهو يرجع يلزگ راسه سنده على چتفي
حنين -: لككك هاي حبيبتك شلون متحملتك؟ .
شلهب -: چانت تتحملني هواي... مثلچ .
حاولت ادفعه بصدره بس چان ثگيل سكران وكل ثگله عليه . تملصت من جوا ايده اليمنى رجع سحبني باليسرى وثبتني ع الحايط، يربي شلون بلوه
ردت انزل راسه من چتفي.. لزم خصري وقربني اكثر انفاسه حاره برگبتي
حنين-: ولك ادفعك وترد تلزگ؟! شنو عصارة اميري انت ؟؟؟ .
يضحك عيونه تطفى وتفتح يعاين على خشمي
شلهب -: انت ليش خشمچ صغير ولسانچ طويل؟ المفروض بالعكس .
حنين -: هااا؟ يعني انت هساع دا تتنمر ؟ روح صلح خشمك اول ابو طبرة .
شلهب -: ابو طبرة ؟ .
حنين -: همم خشمچي باشا
عنفصت خشمي مثل خشمه ولميت عيوني
وهو صافن بوجهي يبتسم ويهز براسه
شلهب -: وانت ام لسان الهترة .
گالها ومد ايده يريد يجر الشال من شعري
كفخته على ايده وراسه لزگته ع الحايط وراي
ماكو مجال ارجع بعد وهوا وجهه بوجهي
حنين-: ادنةةةة ابن ابو العرگ عركچي لا تمد ايدك لا تمدهاااا .
شلهب -: هترتي .
نععم؟ هترته شو هذا اخذ راحته
حنين -: ولك منو هترتك ؟ انه لا مالتك ولا مال غيرك انه مال اهلي .
شلهب-: انت مو مثلها ماعفتيني ورغم خوفچ بعدچ يمي وجدامي وتسمعيلي .
حنين -: لان كاضني .. لو عايفني چا هساع انه بالهند .
صرت اتلاطم من جواي وبس اتلفت اذا طلع هسه احد صح ظلمة ومايبين بس انه اخافن بعمري ما صار وياي هالموقف بس هذا الخايس ابن الخايس ما متربي ونوب مو بوعيه
حنين -: امشي ولي روح نام بالديوان قبل لا يجي حيدر يشوفك كاضمي هيچ ويموتك ويموتني وياك .
شلهب -: ما انام اذا نمت راح تروحين وتعوفيني رويدة .
حنين -: خالي رويدة ماتت شبعت موت انه حنين من خرب لشة رويدة والخلف رويدة
كض خدي بسرعة قبل لا ادفعه واصبعه الابهام مسح على جلدي
شلهب -: حنين .. اسمچ حلو بس ابد مو حنينة
حنين -: شفت؟ هسه انت بديت تفتهم ويلا عوفني لا منصدگ اشيل الحنية هساع .
وشال ايده من خصري اخيرا بس بقي واگف جدامي .. بعده يتمايل يمنى ويسرى
شلهب -: باجر.. اذا صحيت .. راح اذكرچ ؟ .
حنين -: لا .. راح تذكر كضيت وحدة بالحوش وسميتها الهترة .
شلهب -: لا .. راح اذكر عيونچ .
حنين -: شبيهن عيوني؟ .
شلهب -: مثل نهر دجلة غميجات ويغرگن .
قبل لا اجاوبه تطوطح مال وراد يطيح
امديت ايدي لا اراديا كضيته وهو ثگل
ذب حيله علي ودحس راسه بركبتي
شواربه خرمشت جلدي
حنين -: يمااا ولك شيل راسك شيل راسك اتسووودنتتت انت .
شلهب-: دجلة تروي الناس وعيونچ تروي گلبي .
حنين-: صار شاعر براسي ابو طبرة .
ادفع بي و يرجع يطيح هوا وراسه برگبتي
شلهب -: لحظة.. لحظة دخت .
اخذ نفس طويل ، خشمه وشواربه
كزبرن جسمي ولا ارادي لميت رگبتي
_ عطرچ .
_ احچي عدل راح اكفخك عاااد .
_ انچبي ، شنو نوعه ؟ فر راسي فر .
_ الله واكبر لا تبالغ رحمة للكعبة ترا هو عطر ب 5 الاف من العتبة .
واخيرا توازن جسمه بعد معاناة وتوا عدلت شالي اريد اعبره كض ايدي ورجعني
شلهب -: لا تروحين .
وتطوطح مال علي وهم دحس وجهه بشالي
شلهب -: طيب طب بگلبي گبل خشمي .
حنين -: واو انت عندك گلب؟ انت عندك بس بطل عرگ بس .
شلهب -: عندي وهسه دا يدگ .
حنين -: اي يدگ لان شاربلك تريله مو من وره عطري .
دفعته بقوه هالمره طاح وره وسند ظهره ع الحايط وگعد بالگاع.. عاينلي بعيونه التطفي وتفتح
_ ضلي يمي .
حنين -: اضل يمك؟ حتى الصبح امي تگلي شنو هذا السكران النايم يمچ ؟ .
سند راسه ع الحايط وغفت عيونه شويه
حنين -: ولك لا تنام هين .. گوووم لا تفضحنا
ما يرد راح الزلمه انتهى
حنين -: ابو طبرة ؟ .
هساع اذا نام هين راح يبرد ويموت واصير انه السبب ؟ اهمداني من شوكت اخاف على السكاره؟
كضيته من ايده وحطيتها ورا رگبتي حاولت ارفعه ثور ثكيل ما ينحمل
حنين -: هساع شلون راح اشيل هذا الثور؟ .
حاولت اسنده جرجرته لباب الديوان وهوا يتمايل
شلهب -: وين ماخذتني الهترة ؟ .
حنين -: للديوان .. لبيتنه .. لجهنم اللي تشعلك انت و رويدة مالتك .
مديت راسي اباوع جوا الديوان شفت ابا الفضل نايم وبالجهة الثانيه مغوار ، لطمت على خدودي زلغتهن تزلغ
حنين -: يا يما.. اذا شافوني اجيب هذا السكران للديوان راح يدفنوني انه وياه .
خله اصبعه على شفايفي وهمس
_ اششش شكثر تلغين صوتچ صوووتچ .
دفعته جوا الديوان صار رجل جوا ورجل برا واريد اسد الباب واشرد كض طرف شالي وجرني عليه كض وجهي بثنين ايديه
شلهب -: لحظة..
_ولك عوفني راح يگعدون يالمسودن .
_ ما اعوفچ الا تاخذين لقبچ .
_ يا لقب ؟ .
_ الهترة .
_ عمي انت من كل عقلك ؟ هساع هذا وكت القابك الخايسه ؟ انت سكران وكاضني واخواني اذا گعدوا وشافوك راح يسووك لحم بعجين بعلي .
_ خلهم يگعدون اسبيهم وحگ الخلق عيونچ و سباني بيهن .
حنين -: اي مبين تسبيهم .. لابس دشداشتك بالعكس .
عاين على دشداشته وصدگ لابسها بالعكس
شلهب-: هههههههههه شفتي؟ حتى وانه غلط انت تصلحيني .
خليت ايدي على شفايفه اكتم ضحكته الفضيحه
_ انه لو اصلحك اريدلي مصنع .
_ كل الخراب البروحي قابل يتصلح بأيدچ .
_ شوكت تصير آدمي ؟ .
_ اصير آدمي بس اريدچ انت التعلميني شلون .
تطوطح عاف وجهي وكض حافة الباب يعاينلي
وشعره نازل على وجهه مغطي عيونه
_ الهترة .
_ ابو طبرة .
_ باچر اذا صحيت وما لگيتچ ، تذكري واحد سكران حبچ اكثر من الصاحي .
_ تذكر انت اول شي وين بيتكم وبعدين تعال حبني .
_ تريدين الصدگ ؟ بيتي بدونچ حتى ما اندله .
وجهي صار احمر
حنين -: انجب ونام يلااا كافي .
دفعته حيل وسديت الباب سمعت صوت طيحته
وركضت طبيت للبيت اضرب بگلبي ، حنين شبيچ؟ هذا سكران سكران لا تتسودنين .
رفيدا ::
فزيت ما لگيت حنين يمي
الكهرباء طافية مثل كل يوم هو هنا ببغداد مثل صلاح الدين نفس الحر ونفس الضيم مال الكهرباء
گمت عرگانه الدولكة يم راسي فارغه ولا قطره بيها ، گمت فتحت الشباك الهوا الحار ضرب وجهي بس احسن من الماكو
گعدت افكر ب كيلاس شلون تحب حيدر
ضحكت وحدي وغميت روحي لأن اني
انطيتها كلشي ، انطيتها حصتي من هالدنيا
حطيت الشال على راسي هذا اليزحلك كل شويه
شلت الدولكة وطلعت اريد اشرب واريد اشوف حنين وين
نزلت الدرج وسمعت صوته حتى قبل لا اشوفه
يرتل قصيدة عن الامام علي بصوت ناصي
ضوة الالة بصفه مشتعلة وسبحته العقيق بإيده مضوية وفص المحبس مالته هم يضوي حاولت ما اخليه يشوفني .. افتريت للمطبخ امشي على رويسات اصابيعي
وبهاللحظة حنين فاتت من باب الصاله تلهث وجهها اصفر من شافتني هبطت وگامت تباوعلي وتباوع لحيدر ، هزيت راسي الها يعني "شبيچ؟ ."
بلعت ريگها وشردت فوگ لغرفتها
رحت للمطبخ فتحت الثلاجة بالظلمة بس اتهمس كلشي ما اشوف طلعت بطل ماي صبيت بالدولكة وشربت وغسلت وجهي منه
تذكرت حلمت بصنديد تعوذت من الشيطان هواي هواي وفركت وجهي وعيوني
توا اريد اگعد على القنفة الخشب الي بالمطبخ
فزيت على طبگة الباب وضوة الالة من الصالة اختفى
همست
_ منو؟ حنين؟ .
اجه وگعد ع القنفة قبلي ، توا اريد امشي واعوفه سحبني من ايدي وگعدني على رجليه وجهي صار بوجهه المكان ظلمة والبيت هدوء الابرة لو تشمرها تنسمع حتى من بلع ريگه سمعته
سكتنا لثواني .. بس انفاسه اسمعها
_ سيد
_ سيدچ روحه ترف عليچ لتسوين بيه هيچ .
خله ايده ورا راسي وسحبني عليه كزبر جسمي من حسيت بشواربه على جلدي
_ روحي ترفرف مثل طير من اسمعچ تگولين سيد .
رفعت ايديني الاثنين ودفعته بخفه عني
رفيدا -: كيلاس تحبك لا تخسرها .
_ السيد ما يطيب الا برفة روحه كل نسوان السلف ما يجن بعدال ظفرچ ، ما يعوضن مچانچ بگلب السيد .
_ ماعندي وياك ، گتلها للبنيه ماعندي شي وانت ماتعنيلي انت بگلبي حالك حال اخوي شلهب .
_ شلون ما عندچ شي وياي ؟ شلون ؟ .
_ مثل ما سمعت ما عندي شي اني صغيره ع الزواج وع المسؤولية وكيلاس ترهملك تحبك وتفهمك .
رخى ايده من شعري وضحك ضحكة تعبانه
_ ترهملي؟ انت شمدريچ شنو الي يرهملي؟
لزم ايدي وضغط عليها بقوه
_ انه ما اريدن وحدة تحبني انه اريدن وحدة احبنها انه .. استوعبي .
رفيدا -: سيد عوفني .
_ انت جماد والله جماد صخرة لا تحنين ولا تلينين شحاطة بگلبچ؟ .
رفيدا -: ما عندي شي بگلبي الك اي انت ما تهمني وگلت ل كيلاس الصدگ .
_ لا تجبريني اتحداچ بنفس الطريقة الي تتحديني بيها .
_ شتسوي ؟ .
_ اخليچ تندمين على كل چلمة گلتيها اخليچ انت الي تگولين عندي شي وياك .
_ مستحيل .
سند گصته على چتفي
_ احچي دامچ قويه احچي بعد .
_ شحچي؟ گتلك كلشي عندي .
_ لا بعدچ ما دستي زين دوسي على گلبچ اول وبعدين على گلبي .
_ سيد
_ يا رفة جفنه بشوفتچ ويا رفة روحه بعوفتچ .
_ انت ما تهمني ولا يهمني وين تروح ولا ويا منو راح تكمل حياتك اني اصلا..
سكتت ما گدرت اكمل وهوا كمل بمكاني
_ انت اصلا شنو ؟ .
_ ما اطيقك .
رفع راسه من چتفي وخلى وجهه گبال وجهي بالظلمة احس بس بأنفاسه تلفح بوجهي
_ انه ساكت متحمل وادري ليش دا تدوسين على گلبي علمود كيلاس ما يضل ذنبها برگبتچ .
_ لا ابدا انت فعلا ماتهمني ومستحيل اتقبلك بحياتي وما اشوفك غير الشخص اللي استغلني و سلبني حياتي ودمرني .. شلون تريد اعيش وياك طبيعي؟ شنو ماعندي كرامة ؟ .
_ شششش ديري بالچ لا تدوسين كلش ترا گلب الرجال اذا ينذل يصير من الخطر اخطر .
_ تهددني ؟ .
_ احذرچ لا اكثر! .
وبلمح البصر انرفعت من خصري وصرت ع القنفة الخشب وگام سد باب المطبخ وطلع
خطواته تبتعد خارج البيت..
رجعت لغرفة حنين لگيتها گاعده ع الچربايه ولازمة تلفونها النوكا من شافتني فزت ووكع التلفون من ايدها ، وبسرعه رجعت اخذته
رفيدا -: شبيچ ؟ .
گعدت يمها چانت مشعلة الالة وضواها اصفر على وجهها
حنين-: مم.. ماكو شي اريد انام .
حسيتها مو طبيعية بس ما سألتها تغطينه ونمنه
الصبح..
ما فزيت على صوت الاذان ، فزيت على ايد تلز بچتفي
حنين -: رفيدا .. رفرف گومي ولچ .
فتحت عيوني بالگوه ضوه الشمس ضارب بعيوني من الشباك
رفيدا -: شكو ؟ .
وجهها اصفر وتحچي بسرعة وشالها على راسها
حنين -: كومي خل نتريك اعمامي جايين بالطريق نهاش وعكاش وغباش كلهم متعنين علمود سالفة اخوچ العرگچي .
فزيت گعدت راسي يوجعني من قلة النوم
گمت حطيت شالي على راسي و فتت للحمام
حمام غرفة حنينة مو باب بي بردة بيضه وعليها تول ابيض تجنن ، لگيتها مبردة ماي بالطشت من الليل .. لان المي يجيهم حار وهم الشمس حاره ، دنكت غسلت وجهي المي بارد يخبل مسحت وجهي بطرف شالي وطلعت
لگيت ام كيلاس گاعده وبصفها لميعة يسولفن ويضحكن اول ما شافني علت اصوات ضحكتهن
والبنات خوات السيد حوالين كيلاس وهي گاعده بنصهن شعرها مفتوح وتضحك مستحيه
واحنا رايحات للمطبخ سمعتهن
سهام -: واخيرا حيادر اقتنع هساع من يجون اعمامي تنحل ان شاء الله .
الكلمة دخلت باذني مثل البسمار
ما باوعت عليهن طبيت للمطبخ فتحت الثلاجه طلعت البيض وخليت الطاوة على الطباخ
حنين فاتت وراي سدت باب المطبخ شويه وهمست..
حنين -: سمعتيهن ؟ .
رفيدا -: اي سمعت .. شكو ؟ .
حنين -: رفيدا اعمامي طبوا الديوان وديلحون على حيادر لو يعقد على كيلاس هساع لو يطلگچ ويرجعچ لاهلچ وحيدر..
رفيدا-: شعليه بي لا تحچيلي شي عنه اريد اخلص منه واخيرا راح تاخذه بت خالتچ وتفكنه منه واني اتريگ واروح لغرفتي ما اتدخل بأحد عساهم بجهنم .
حطيت الزيت بالطاوه هواي حطيت ايدي ترجف مدري شبيه والدمعة بطرف رموشي وگعت
حنين اجت ارتجت كبالي ع الميز الطباخ
حنين -: بس هوا..
رفيدا -: گتلچ لا تحچين .
الزيت حمى حيل بدا يطگطگ ضربت الطاوه بدون ما ادري وطفرت نقطه حاره على ايدي
حنين -: يممااا رفرف .
تخبلت ركضت فتحت الفريز طلعت قالب ثلج صغير واجت عليه
حنين -: انطيني ايدچ انطيني .
اخذت ايدي تكلب بيها وترزل بيه لأن صارت حمرة و تحرگ ، سحبت ايدي منها بسرعه
رفيدا -: ماله داعي حنين .
حنين -: انت ليش هيچ تعاندين؟ .
ما رديت رجعت للطاوه دا احاول احط البيضه بس ايدي ترجف وگوووه لازمه الطاوه
تذكرت كلامه بالليل بالمطبخ من گعدني على رجليه " لا تدوسين كلش ترا گلب الرجال اذا ينذل يصير من الخطر اخطر ."
يعني دا ينفذ؟ هسه دا ينفذ تهديده؟ .
اي خلي ينفذ طبه مرض البنيه متعلقه بي ما اوگف بوجهها خلي ياخذها اني شكو
توا اريد اكسر البيضة بالماعون وسمعنه صوت عياط من الديوان هز البيت هز وميزت صوت شلهب من بينهم
شلهب -: ولك شتگول؟ منو البلا اخلاق؟ عيدها اذا انت زلمه وشواربك هذني عليك .
ذبيت الطاوه وگعت بالگاع الزيت والبيض انذب كله ركضت اعدل بشالي بسرعة ودفعت باب الديوان و فتت عليهم
صاروا بوجهي ثلاث زلم كبار معگلين لابسين دشاديش وعبايتهم على چتوفهم وجوهم سود
وواحد منهم طويل عريض لحيته بيها شيب وعينه يما عينه عين وحده سوده والثانية بيضه تخوف ، يباوعلي بتك عين خرعني
مخنزر على شلهب اللي صاير ورا چتاف حيدر و ذو الفقار .. ويهدد ويتوعد له من وراهم ، حيدر وذو الفقار حاطين شلهب ورا ظهرهم حامينه
شلهب يشب يريد يفلت منهم ويروح يكتله
شلهب -: عوفوني ولكمم عوفوني خلي اعلمه شلون يغلط على اصلي وفصلي هالاعور الدجال هذا .
ذو الفقار لازمه من صدره ويدفع بي ع الحايط
نهاش باوع علي بعينه التك وحده ورجع باوع على حيدر واشر بأصبعه علي
نهاش -: هيه هاي الي تفضلها على بت عمك؟ هاي؟ تفضلها على كيلاس؟ .
هبطتتت هبطه مو طبيعيه ، يعني كيلاس مو بس بنت خالته؟ وبنت عمه هم! !
حيدر الكرار -: عمي لا تتجاوز عليها هاي حرمتي ان رضيتوا وان ما رضيتوا فرض وينفرض عليكم
واحترامها واجب على چبير وزغير .
ابا الحسن -: لا عمي ما اتفقنا هيچ انت چبيرنا وعلى راسنا بس هاي مرت اخونه وبنيتنه وكرامتها من كرامتك انت قبل كرامتنا وما نقبل احد يمسها لو بچلمة .
ابا الفضل-: عمي حگك علينا چبير وصح ما اخذنه بشورك من اخذناها بس هاي داخلة بذمتنا وذمتك ، واحنا ولد اخيك وما نرضى ينحچي عليها لان اذا انحچه عليها جدامنه انهانينه احنا بمچانها .
نهاش-: تردووون بوجهي لجلها ولككمم؟؟ .
مغوار -: عمي ما نرد بوجهك ، بس العلويه هاي و واجب نوگفلها .
وواحد من عمامهم الگاعدين هم گام يهدي..
لزمت ايد شلهب اريد اسحبه وعفتهم متناقشين
نهاش -: هيه هاي الي گالبة الدنيا ولكممم هيه هاي الهاد اخوهااا بسلاحه عليكم وانتوا حامينه ورا ضهركم ؟ هاي بدال ماتگاومون عشيرته وتزوعوه فصل مربع .
رفيدا-؛ هو بس اجه يشوفني قابل كفرررر؟؟؟ .
نهاش نزل عينه البيضة عليه
نهاش -: اخوچ طب علينا بسلاح وداس بيت اخوي بيت الساده وترديني اسكت؟ الا فصل مربع من ابوچ ينفصل فصل مربع يلا نرضى .
رفيدا -: هذاك ابوي روحوله بس عوفوا اخوي .
وهذا شلهب يشب من ورا الولد يريد يلزمه و حيدر و ذو الفقار گوه ساندينه
شلهب -: هدوني عليه ولكممم هدوني عليه يدور فصل ابو عين العوره الاعووور .
واحد يصد والثاني يرد والديوان صار حلبة مصارعة ، نهاش يريد يخمط شلهب من هدومه وحيدر ما يخلي حاط ايده بنص صدر عمه
وبنص هاي الهوسه كلها لمحت مغوار من ورا
يغم بعمه نهاش يغم يغم ويرجع بسرعة يبوس بايد عمه من تنرفع على اخوانه
مغوار -: هدي عمي هدي.. انت چبيرنا وتاج راسنا هدي مو زين عليك العصبيه .
ووراها يرجع يغم بنهاش مرة ثانية واني بهاللحضة لو ما الموقف يقهر جان متت ضحك
نهاش عينه البيضة صارت حمره من القهر ومد اصبعه بوجه شلهب يحذر بي من ورا الولد كلهم
نهاش -: طلعوا هذا من الديوان طلعوه هساااع خلينه نتفاهم رجال لرجال لان اذا اضل اعاين بوجهه انحره.. انحره بمچانه وعلي .
شلهب شاط يريد يفلت من ذو الفقار ويخمطه من عبايته وهذا نهاش يرجع ليورا خايف يلزمه
شلهب -: تنحرني؟ ولك انت اكبر من سالفتك تعال .. تعال انحرني اذا بيك خير الاعور الدجال حتى اطفيلك عينك الثانيه .
عمامهم البقيه گاموا يجرون ب نهاش التخبل خبال لأن شلهب هيچ حچه وبالگوه بالگوه طلعوا شلهب برا الديوان حيدر واخوانه دفعوه دفع
واني اجر بي جر لازمة ذراعه هد حيلي
شلهب -: عوفيني رفيدا هذا ابو عين العوره يهددني انااا ؟ والله اطيح صبغه واخنگه بعگاله اللابسه .
طلعنا برا حيدر يدفع ب شلهب لا يرجع يطب
وذو الفقار ومغوار مجلبين بعمهم
حيدر سد باب الديوان وبس صياحهم ضل جوا
بقينا احنا الثلاثة اني و شلهب وحيدر الصبح بعده بأولى والشمس تضرب بوجوهنه
حيدر -: انت شوكت ترد لصلاح الدين؟ .
_ ما اروح اذا ما اخذ اختي وياي .
_ اختك هيه مرتي شنهو نسيت؟ مرتي انه .
_ وهيه اختي قبل لا تصير مرتك انا اخوها .
حيدر : اخوها على راسي ، بس هساع صارت بذمتي ، تريد تاخذها تاخذ اذني اول .
شلهب : اخذ اذنك شكو؟ هي اختي .
_ ومرتي!
_ واختييي!
_ ومرتييي!
رفيدا : رااااح انجلط ، بسسسكم اسكتووووا .
ما يسمعون اثنينهم واحد يباوع ع الثاني ويريد ياكله صحت بيهم بصوت عالي و التفتوا عليه اثنينهم
رفيدا -: اذا ما تسكتون والله العظيم اعوفكم واطب جوا واخليكم هنا .
شلهب سكت بس بعدة ينفخ
ومن جوا صوت نهاش يصيح على حيدر
نهاش -: حيييدر.. وينك؟ تعال فوت ولك تعال لا تشرد من فعايلك انت وامك .
عكاش -: حيدر تعال ابني تعال خل نحلها .
حيدر بعده يباوع بوجهي دفعته بأيدي على صدره بخفه وهمست
رفيدا -: فوت جوا تفاهم وياهم وخليني ويا اخوي شويه .
ما تحرك نزل عينه علي وانطاني نظرة ذكرني بسوالف الليل من گال "لا تجبريني اتحداچ"
حيدر الكرار -: ما عندچ حچي.. قبل لا افوت؟ .
رفيدا -: اي حچي؟ .
بلعت ريگي عرفت شيقصد يقصد اتراجع عن كلامي ، عينه بعيني يفتش على اي خيط امه يخليه يتمسك بيه
شلهب ضربه على ركبته من ورا
شلهب -: لا تباوعلها هيچ شتباوع؟ عينك شويه نزلها .
حيدر ما نزل عينه بالعكس دنگ وحط عينه حيل بعيني يستفز ب شلهب
حيدر الكرار -: شكو؟ دا اعاين على مرتي عندك اعتراض؟ .
شلهب -: اي عندي مرتك بس اختي لا تباوعلها هيچ جدامي استحي شويه يالماشايف .
حيدر دنك علي اكثر يباوع ل شلهب ويرجع يباوعلي
حيدر الكرار -: ما استحي مرتي وحگي اعاين شوكت ما اريد شحارك حطباتك انت .
_ اذا ما تشيل عينك هسه انه اعرف شلون اشيلها من صدگ عاااد .
_ تعال شيلها يلاااا .
وقدم وجهه على شلهب
رفيدا -: يممماااا منكممم..
حيدر اخيرا شال عينه وفتح باب الديوان غمز ل شلهب وطب خله شلهب يگمز بمكانه من القهر
طلعت حنين من البيت شايلة بيدها صينية الچاي ، ومن شافت شلهب رفعت حاجب واحد من فوگ ليجوه باوعتله
حنين -: ابو طبرة ؟ .
وهو طبگ حواجبه التفت علي
شلهب -: هاي مو صاحيه مو ؟؟؟ .
حنين تخبلت شمرت الصينية علي وراحت للبيت تدردم
حنين -: اي خبله ولا اسكر واطوطح على بنات العالم نصاص الليالي .
شلهب فتح حلگه وصفن عبالك يتذكر شي
و حنين لزمت يدة الباب والتفتت غمزت له
وفاتت تضحك
شلهب -: هاي منو؟ .
رفيدا -: هاي حنين اخت حيدر .
_ دخيلك ربي الله يعينكم عليها .
رفيدا -: راح ترجع لصلاح الدين ؟ .
سحبني من ايدي وگعدنه ع الثيلات بالگاع
شلهب -: لا ترجعين لاهلي .. لا ترجعين على ابوي خله يموت بقهره وحسرته عليچ خلي يعض اصابعه ندم انت اذا رجعتي راح يذلچ لأن ابوي نفسه ماتغير بعد طبعه نگس .
نزلت راسي
رفيدا -: هو مات بگلبي هو وامي من زمان ماتوا .
شلهب -: انا هم ما راح ارجع
رفيدا -: ليش؟؟ .
شلهب -: بگت من فلوس الجنطة وراح استقر هنا ببغداد ويا جماعتي اريد اقدم ع الجامعة اريد اطلع معدل اعلى.. اريد صيدلة .
رفيدا -: راح تضل هنا؟؟؟ صدگ؟
شلهب -: اي ما اگدر افارگچ ما ضل ليه احد غيرچ روفي .
من لهفتي حضنته وبجيت هوا مسح على راسي بأيده وضحك ، ابتعدت عنه وگتله
رفيدا -: وامي؟ وابوي؟ .
شلهب -: عساهم بنار جهنم ما يهموني .
فزينه من علت الاصوات بالديوان حيدر وعمامه يتعاركون گمت.. رحت وگفت يم باب الديوان اتنصت و شلهب راح بعيد شوية يحچي تلفون مدري ويا منو
من جوا اسمع صوتهم:
نهاش -: ورث بت اخوي ما يطلع للغريب البت برگبتك يعني برگبتك هاي امانة وجدك آمني عليها ماگدر اخون الامانة .
حيدر -: ما انطيتها چلمة انه ما انطيته البت نفسي ما تهواها قاااابلل گوووه ؟ .
عكاش -: مو گوه نهاش والله مو گوه الولد نفسه ما تهواها .
غباش -: الا گوه شنهي حگ بنيتنا يصير حلال الغريب يسرح ويمرح بكيفه؟ خالي اعقد عليها فوگ مرتك ما نريد تطلگها للبت اعقد على بت اخونه .
حيدر -: حتى لو اخذها نفسي ما تريدها ما اريدهااا افتهمووووا ليش اظلم البت وياي واظلم روحي وابهذلها وادمرهااا .
نهاش صاح بعالي صوته
نهاش -: شني بگيفك مالك نفس ولك؟؟ ما تاكل عندي انه شني هيه زاد حتى نفسك ما تشتهي؟ هاي انه واعمامك كل واحد متزوج اربعة وثلاثه صير زلمة.حوگ نفس اعمامك .
ذو الفقار -: عمي مرته وهو حر ما يريد يحط على راسها مره ماله داعي تجبرونه .
سمعت واحد جاي يريد يفتح باب الديوان
همست بسرعة ل شلهب
رفيدا -: شلهب.. الله يخليك لا تتعارك فدوه عوفهم لا تسوي مشكله اني راح اروح للبيت .
هز راسه واني رحت طبيت للبيت
لگيت الحبايب لهسه گاعدات نفس الگعده بديعة ولميعة وكفاية وسهام وهديل وكيلاس بنصهن
رحت گعدت يمهن حطيت رجل على رجل گبال لميعة مباشرة وحدة تنطي نظرات للثانيه
بديعة تفحصتني كلش زين وبعد صفنة طويله بيه بوجهي ببشرتي بأيديه ، حچت
بديعة -: رفيدا بنتي رجاءا لا تعارضين زواجهم بنتي محد الها وانه رجلي والكبر ما دايمة واخافن تضل وحيدها بهالدنيا وحيدر ستر الها وهوا الها گبل لا يصير الچ .
كيلاس -: لا ماما لا روفه گالت معليه انا هيه متحبه هيه بس دخيلة يمه مو صح روفه ؟ .
باوعت على كيلاس عيونها تلمع تريدني أأكد
رفيدا -: صح .
والتفتت على لميعة كملت كلامي
رفيدا -: وانت عمه .. ياريت تتحمليني ببيتچ مو چنة لا .. تحمليني واعتبريني وحده من بناتچ فترة وتخلص آني مخططة لهواي امور ببالي وبس تصير ما تشوفين وجهي بعد .
هديل-: اي بالأول دخيله وبعدين تفرين ع السيد مثل ما فريتي على زلمتي .
باوعت عليها من فوگ ليجوه وضحكت
رفيدا -: هو زلمتچ هذا التحچين عنه يرگض وراي مثل الچلب بس شگول؟ انت لو ما بيچ العيبه ما چان فضلني عليچ .
گمت عفتها علگانه وراي كلهن يحچن ويغلطن ويلعلعن حتى خواتها الا بديعة ترزل بهديل لأن جاي وعايفه رجلها هناك وحده ..
اول ما حطيت رجلي على اول بايه من الدرج
استوقفني صوت لميعة وهيه تلعلع بصوتها المستفز
لميعة -: اعرفچ صدگ بت ابوچ وگويه واحسبچ صدگ ما تريدينه لحيادر ولا لچ نفس بي اذا ضليتي وحضرتي خطوبته من كيلاس هساع .
التفتت عليها وبكل رزانه وقوه رجعت گعدت بصف كيلاس ، لزمت ايدها وحچيت بصوت عالي
رفيدا -: وين العريس؟ غير يستعجل على عروسته؟ مو گاعده تنتظر .. ما يصير هيچ .
كلهن انصدمن وضلن وحده تهمس لوحده
حنين بباب المطبخ واگفه تهز براسها وتفر بايدها.. يعني "شجاي تسوين انت ؟"
انفتح باب الصاله وطب حيدر
وجهه احمر دم. وعيونه حمر وضعه مخربط شعره نازل على گصته .. ويفور يفور من العصبيه
باوعلي مباشرة
حيدر الكرار -: لحگيني علوية .
گمت وراه ، باوعت عليهن
رفيدا -: من رخصتچن شويه اكيد لازم ياخذ رضاي .
لميعة تخبلت ضلت تلعلع وحدها وتشمر بأيديها تريده يرجع يحاجيها وهوا لبسها من صدك
طبيت وراه للغرفه ومالحكت التفت خلى ايده على ايدي وقفل الباب بسرعه و سحبني من ايدي گعدني ع العرسي الخشب ودنك گدامي على ركب رجليه ، لزم ايديه الثنتين
حيدر -: راح اعقد على كيلاس .
گالها وهو يفتش بعيوني يدور على قهر حزن غيرة اي شي دمعة جفن يرف ؟.. ماكو اني حايط
سحبت ايديه منه
رفيدا -: گوم لا تدنك گدامي .
_ علوية سمعيني انه..
_ وبعدين ليش تگلي؟ روح اعقد يلا البنيه تنتظر مو حلوه بحقها .
تخبل من برودي ضغط على ايدي
_ لا تسوين هيچ لا تسوين روحچ ما مهتمة انه دا اشوفچ احچي .
_ شحچي ؟ .
_ گولي لا تعقد گولي ما اريدك تاخذها گولي اي شي بس لا تسوين روحچ ما مهتمه انه دا اموت علوية دا اموووت من برودچ وعقابچ اليه .
رفيدا -: وليش اگول؟ اني شعليه بيك؟ روح اخذها البنيه عاشكتك من الصغر لا تكسر گلبها .
حيدر -: دا اثبت لچ دا احاول اثبت لچ انه ما رايدها بس انت تدفعيني .. انت راح تدمرينه .
رفيدا -: اي ما اريدك ولا اريد شوفتك واذا تعقد عليها هسه اني ارتاح اخلص منك ومن طاريك وياريت تتجنبني منا ورايح لا تصيحني هيچ گدامهم ويضنون بينه غلط .
گلتها بقسوة بكل قسوة عندي وهو رغم كلشي يتحمل ويتوسل بيه لزم ايديه مرة ثانية باسهن ولهفته تبين بعيونه اللي لون بياضهم صار احمر من القهر
_ اريدن بس حرف ، نظرة ، دمعة من عينچ وانهي كلشي لا تحسسيني انه مو مهم عندچ.. انه مهم لو لا ؟ گليلي انت تهمني وريحي هالگلب .
يفتش بوجهي ومنين ما ادير وجهي يدير وجهه
_ احچي گولي اكرهك گولي كرهتك لأن استغليتني على حساب اختك بس گوليها وانت تبچين مو وانت حايط حتى احس صدگ انه مهم عندچ .
رفيدا -: انت مو مهم عندي انت ولا شي افتهمت؟ انت عدم بالنسبة الي واذا تريد الصدگ؟ كيلاس
ما تستاهلها انت راح تدمرها بأطباعك ومصلحتك .
سحبت ايدي من ايده ودفعته بصدره خفيف
رفيدا -: وگوم لا تذل روحك گدام وحده ما تريدك زحمة على شواربك .
_ احچي گولي لا گولي لا تعقد وانه هساع اطلع اگىلهم ما رايدها بس گوليها لا تضلين تدوسين على جرحي انه اعترف غلطت بس انه مو معصوم انه مو نبي .
رفيدا-: ما اگول ما اگول لان ما يهمني افتهمت؟ ما يهمني لو تتزوج اربع نسوان بليلة وحده .
گام يفتر بالغرفه مثل المسودن باوع للغراض المحطوطة بالشباك لجام الشباك للمرايه المعلگه الصغيره
واني مستمره احچي احجي واضغط واغلط بحقه
_ روح اخذها وخلصني لمن الباقي من كرامتك وعوفني وبعدين اني شنو؟ اني انفرضت عليكم اني الي اهلها ذبوها عليكم روحلهااااا لا تترجى مني ارجع اباوعلك بنفس اول نظرة شفتك بيها .
_ ما انسى شلون استغليتني علمود اختك ودمرت حياتي ، انت بعيني مو حيدر المترجم الامريكي.. انت السيد حيدر الداس على گلبي وسمعتي ونزل راس ابوي بين الوادم وخلاه يشمرني شمرة هدوم الميت .
ما تحمل صاح ب اخ بعلو صوته وضرب جام الشباك بايده فلشه تفلش وايده انجرحت
_ تتحديني موووو؟؟؟ هساع اخليچ تفرغين كلشي بگلبچ كلشي .. تردين اثبت لچ شلون اتغير اذا انذل ؟ .
رفيدا -: شتسوي؟ .
اشر عليه بأصبع السبابه ويحچي گاز على سنونه
حيدر -: اعقد عليها جدامچ واخليچ انت الي تلبسيها الذهب بايدچ اخليچ تشوفيني شلون انسى لا حسبالج تهينين بيه واسكت انت دستي على گلبي .
گالها وراح للباب توا يريد يطلع وگف لثواني
والتفت اجاني يمشي سريع وجرني ضمني بحضنه
خله راسه برگبتي بالشال يشم بيه وجسمه يتراجف
_ سيد .
_ السيد يكره رفة گلبه يكرهها يكرهها يكرهها .
عصرني بحضنه قوي ودموعي نزلت على صوت شهگته
_ السيد چانت جفونه ترف بشوفتچ وهساع راح ترف بعوفتچ للموت .. للموت ترف للموت علوية .
دفعته بخفه وهوا مو راضي يتزحزح
_ روح لمرتك تنتظرك .
_ روحي الچانت ترفرف مثل الطير بس تسمع اسمچ هسلع تكرهچ .. روحه السيد الترف بشوفتچ تكرهچ .
ابتعد عني وهزني من اجتافي قوي
_ لا اريدچ ولا اريدنها افتهمتوا؟ لا اريدنچ ولا اريدنها ، ما اعقد عليها لو مو تتجاهليني وشنووو يعني؟؟ راح اموتن بلياچ؟؟ راح تتندمين علوية.. والله راح تتندمين على صدتچ هاي اليه .
ابتعد خطوه باوعلي باخر نضرة ونطاني ظهره مسح دموعه بجراويته السوده وطلع ضرب الباب حيل
بعد انهيارات وبچي ولطم هواي وراي..
مسحت دموعي وعدلت شالي وطلعت گعدت يمهن بالصاله كلهن يباوعن علي بشماته وكيلاس طايرة من الفرحة
گضت الگعدة دقايق من النظرات مثل الحياية ناس تگص بناس وانتظار.. وانتظار.. وماكو الديوان هدوء واصواتهم اختفت
اجه مغوار من الديوان وجهه ما يطمن ابد و واضح شكد ضايج
مغوار -: ماكو خطبة اليوم حيدر قافل ما يقبل عمي نهاش جزع وهساع راح يتوكلون للعمارة .
لميعة-: و ورث كيلاس يوول خاااايب؟؟؟ هذا اخوك راح يموتني ، عمك نهاش گال اجردكم من ورث ابوكم جررررد اذا ما يعقد عليها ابني الطايح العاشك الولهاااان لهل الزرگه .
وغمتني ، ورجعت تتناقش وياه و مغوار يفهمها حيدر قافل وحتلو يردون يجردوهم من ورثهم عادي وحسب ما فهمت حتى البيت هذا الگاعدين بي يگدرون يجردونهم منه والورث گيعان وبساتين بالعمارة
باوعت الهن بنظره بمعنى شفتن؟ هو ما يريد ينزل ضره مو گوه
رفيدا -: شنو مشتهيات خالاتي بهالمناسبة؟ .
بديعة-: مشتهيه افصل راسچ يا خاله .
رفيدا-: ياااا خاله هواي شرسه انت .
لميعة طلعت تلفونها تدگ على حيدر ومايرد
گمت وقبل لا اروح للمطبخ غمزت ل بديتة ورحت عفتهن يتناقشن
لگيت حنين واگفه تگرض بشفتها الجوه
رفيدا -: شبيچ انت مو طبيعية اليوم؟ .
حنين -: مابيه بس .. بس دايخه .
اخذت القوري خليت بي ماي وحطيته ع طباخ وخليت ورگ چاي ، وگفت انتظره ولمحت حرگ رجلي متگشر ودا يبدي يطيب
رفيدا -: بدت تطيب رجلي شوفي .
وحنين مو يمي ابد احسها تعرف شي وما تريد تگوله.. حطيت شكر بالاستكانات وعديتهن على عدد الگاعدات بالصالة
رفيدا -: راح اكثرلهن شكر بلكي يصعد السكر عدهن .
ورجعت احجيلها عن شلهب..
وهيه سدت باب المطبخ واجت گعدت بمكانها
رفيدا -: شلهب راح يستقر هنا واخيرا بس يتوظف حياته راح تتيسر راح نرتاح واروح اعيش وياه ببيت وحدنا ، بس لا تخافين ما اعوفچ
التفتت عليها وجها مخطوف تهزلي براسها
بس عيونها وحركاتها ابد مو طبيعية
شلت الصينية وطلعت بعدني بعتبة الباب
وانصدمت باللي شفته .. رجفت كلي مو
بس ايدي ، گلبي خفق خفقات قويه
عيوني ما صدگت التشوفه ، حلگي يبس
واذاني انترست ب هلاهلهن ، عيوني نشف
مايها واني اشوفه دنك يبوس ايدها وعيونه
قبل شفايفه تضحك لها..
رفع راسه باوعلي بعيونه التارسهن
القهر وگال بصوت مسموع و واضح
السيد حيدر -: مبروك النه .... واخيرا ....
