رواية خلخال مشوه الفصل الخامس عشر 15 بقلم زمرده

 

 

 

 

 

رواية خلخال مشوه الفصل الخامس عشر بقلم زمرده




العيون أستراحن هودن بالشوف
و الگلوب ٱلتقن و بشوگنا ٱحترگن

•---∞∞∞∞∞∞∞---•

نزلت صينية التمن وگامت للمطبخ وانا وراها كفت رداناتها ومشت للسنك تنضف بيهن وبس خلصت گالت
نجوى : راح اگطعهن فد نوب

_ أي احسن

بس كملتهن اخذتهن ورديت للبيت اول ماطبيت صار گدامي ليث يريد يطلع ،بس شافني عگد حاجبه
ليث : شني طالعة وحدج ؟

_ لبيت عمي باقر بس علمود عمة نضفتلي الدجاجات

ليث : وليش ما تانيتيني انا اوديهن ؟

_ جا غير مستعجلين ،لان ساعة الساعة يردون

ماحجه شي بس مبين ضاج طلع هو وانا طبيت بساع كج ميمنة بعدها بالمطبخ بس شافتني گالت حطيهن على السنك النجانه متروسة ترس وشثگلها
حطيتهن وضليت افرك بأيدي توجعني

ميمنة : بساع طلعيلي جدر يكفيهن

نزعت عباتي ومشيت اعاونها وانا وياها كملنه تركيب وحواري بس كملت تنضيف اجت ويانه غسلت التمن وحظرته
حواري : رايدات شي بعد اريدن ارتاح كافي سحلتني

ميمنة : امشي ارتاحي منو كاظج

حواري : جا خوش ضلن وحدچن

هزت ايدها ميمنة ومشت جابت ملح تخلي على المرگه وانا اباوعلها ارديدن اتعلم منها ،ابتسمت من شفتني هيج مركزه وگالت

ميمنة : تردين تتعلمين ؟

_ أي احب اتعلم اطبخ

ميمنة : حلو الطبخ

_ أي والله ،بعد شني نسوي ؟

ميمنة : راح ابدي اركب البرياني

_ الله شگد احب البرياني التسوي أنت

أبتسمت وكملت تگليب الدجاج ومن صار يحمس سدت الجدر بالقبق واندارت علي
ميمنة : اهلي كلهم يحبون تركيبي وحتى امي صارت ما تركب هواي غير بس بالضرورة

_ حقهم غير تركيبج ما ينشبع منه

ما راحت ابتسامتها وأنا احجي وياها طبت جفون جاية من المدرسة
جفون : جا شني ما أجت هيوفة ؟

_ لا بعدها

جفون : شني گلت هسه الگاها جايه

ميمنة : يمكن هسه على جيه امشي بدلي هدومج وردي حطي اكل لزقزقواتج كاتلهن الجوع

جفون : يايمه سوده علي

مشت بساع للغرفة بدلت وردت نزلت قفصهن وگعدت بالگاع تحجي وي الافراخ مالتهن فقسن وصوت تزقزهن تارس البيت ،گامت جابت الدخن خلتلهن واندرت تحجي علي

جفون : ليش ما خليتيلهن اكل لوجه الله

رفعت اچتافي بمادري
_ وانا شمدريني مخلصات هاي ميمنة شايفتهن

باوعتلي صفح وگامت حطلتهن ماي وعلگتهن ،وانا عزلت هوسة التركيب و وگفت اغسلهن ،منا لمن خلصت ميمنة مخلصه البرياني ،باوعت من الشباك من انفتح الباب وطب صخر يدفع بالكرسي هيوفة
طلعت بساع اتلگاهم والبنات وراي

التعب مبين عليها حتى من حاجيتها بس هزتلي رأسها وطببها صخر جوه وجده تلگتها تبوس بيها
غضة : يابعد حيل حبوبتج ،من حيلي على حيلج

صخر : اطببها جوه ؟

ميمنة : أي ادفالها وفراشها مفروش

ماحجه شي واستجابه لحجي ميمنة مشى يدفع بالكرسي طببها جوه وانا مشيت وراهم نزلها على فراشها يحجي وياها
صخر : لا تمشين ديري بالج گال الدكتور نسويلج مساج منا اليومين الا تبدين تخطين

هزت رأسها ب أي ورجعت ضهرها على الحايط ،شوي وطبت ميمنة تسألها
ميمنة : تردين شي ،ابدلج ؟

صخر : راح اطلع وبدليلها

مشى يريد يطلع بس هي وگفته من گالت
ميمنة : صخر

اندر وباوعلها ورد دنک
صخر : گولي

ميمنة : عادي احرك رجليها لو مايصير ؟

صخر : لا عادي بس على كيفج وياها لان توها مفتوحه

ميمنة : خوش

طلع هو وميمنة اجت طلعتلها هدوم وصارت تبدل الها وهي تسولف وياها تريد تضيع عليها الوجع الجاي تحس بي وهو مبين من ملامحها...

طلعت من صاحتني أمي
زهرة : امشي طفي المرگة طلعت ريحتها

هزيت راسي ب أي ومشيت طفيتها وگلبت التمن وضليت احظر بالمواعين لان جده گالت عمامي ونسوانهم كلهم هنا راح يتعشون ،وصدگ ساعة وكلهم التموا واحنه نركض ركض نصب لان الولد نصهم جانوا بالگيعان وكاتلهم الجوع

صحت عليها
_ شني ما شايفة حواري گوميي جفون ويانة

جفون : اهووو يا طلابة جفون الماتخلص ،حسره علي اگعد

_ جا بيا حال احنه وأنت تردين تگعدين ،شگد فااايخه

جفون : گايمه عمي گايمه أمري لله ،هو هذا الفقير محد يعذره

ضحكت وهزيت ايدي من سوت روحها تبچي والبنات يضحكن وهي مستمره تتحسب وما سكتت الا سحلتها حواري وگامن ثنينهن يشتغلن ويحجن ،لو يگومن ثنينهن لو ماكو يضلن گاعدات

مشيت بساع طلعت الطرشي ورديت احطه بكاسات زغار واحجي وياها
_ والله راح تخبليني شگد تشربين لبن

بصائر : لان عدي هبوط وبس هو يصعده روحي تروح عليه

ميمنة : خاف حامل ؟

بصائر : لا يمعوده ما ضال شي لموعدها

ميمنة : هاا

بصائر : أي والله ،اگلجن جا منو يم هيوفة ؟

ميمنة : جده گعدت يمها

بصائر : جا انا هم راح امشي يمها لان مابي حيل اوگف بعد

ميمنة : جا امشي لاتطيحين علينه

بصائر : هو ماشية

طلعت من المطبخ واحنه كملنه وبس خلصنه غده صبيت الجاي ومشيت اودي الهم اخذه ليث من ايدي و وزعلهم وانا مشيت گعدت على الدرج اباوعلهم ساكتين بس صوت الخواشيگ وهم يخوطون الجاي مسموعه بالصاله ،بس ما ضل هواي هل هدوء وكسره جدي من گال

رأجس : بعد ماكو داعي نأجل خطوبة ضيرم اكثر وبين ما هيوفة تدوس على رجليها الجمعة خطوبتهم

محمد : شني بوية وين لاحگه بثلاث ايام تطيب ؟

رأجس : ما رايدها تطيب كلش بس تحط رجليها بالگاع وهو بس عقد عليش نأجله اكثر

باوع ابوي لجدي حاير
محمد : هاي هي بكيفك بوية

رأجس : وأنت باقر شتگول ؟

باقر : جا كلمتي ما تعلى على كلمتك بوية هاي هي خطوبتهم الجمعة

ضيرم : عليكم السلام والرحمة

رأجس : ها شبيك ؟

ضيرم : هيج بس اسلم عليكم

هز ايده جدي وضيرم ضحك واندار على صخر يحاجي ولان انا گاعده على الدرج سمعته شلون يتحارش بصخر
ضيرم : راح اخذ اختك

صخر : مو اطيح حظك

ضيرم : فدوه الك انا وحضي خال الجهال أنت تمون

صخر :لا اله الا الله ،أنت ما رايد روحك او شني ؟

ضحك ضيرم بصوت عالي وكل العيون صارت عليه وهو سكت بساع من شافهم كلهم جاي يباوعله
صخر : والله اذا حجيت الزمك اگضي بيك التوبه

دار وجهه من صخر يتحمحم ويعل شواربة ،وصخر طول ما يحجون بالخطوبة هو ساكت ولا تدخل عكس كل مره ...!

اندارله ضيرم وما تاب منه
ضيرم : شبيك ساكت تحسسني واحد مسكوره عينه

صخر : أنصحك وخر مني لان راح ابتلي بيك والله

ضيرم : ضايج لان راح اخذ اختك

صخر : بالگوه كاض روحي عنك اسلم على نفسك لان راح اتخبل عليك

گمت بساع من سمعت صوتهن عالي ،و وي ما وصلت صاح عزيز لان عرف هاي ضحكة حواري ،ما أعرف بنات عمي باقر سالفتهن وي الضحكه العالية شني ...

بس طبيت مشيت گعدت بصف بركة وسالتهن
_ شحجيتن وهيج ضحكت ؟

جفون : انا دغدغتها

_ لا والله ؟

جفون : أي والله

هزيت ايدي على سوالفهن ،شوكت يعقلن! !
زهرة : شنلحگ بثلاث ايام صالون لو بدلة لو شني وهي بتي بعدها على رجليها ما دايسة

نجوى : جا أنت ما تعرفين عمي قرر بعد ،انا أخذ ميمنة وأمشي اشتريلها الفستان والصالون هم بدربنه نحجزه والباقي الله كريم نتعاون ونلحگ

زهرة : امرنه ل الله

°هيوفة°

كل الگاعدات يمي ضايجات ويمكن انا الوحيده البيهن فرحانه بقرار جدي هن يباوعن من ناحية الشغل وانا صافنه وما مصدگه بعد ثلاث ليالي اصير حلاله ،الحلم الخلصت عمري احلم بي راح يصير حقيقة ولغيرة ما راح اصير

ومن ثاني يوم بدن بالركض وانا صخر بده علاج طبيعي وي رجلي بالبيت مثل ما علمه الدكتور و كل چم ساعة يگومني امشي جم خطوه واگعد
شايطه روحي من الوجع واريد بس ابجي وكلهن يمي يصبرن بي

وميمنة كلساع من تشوفني ابجي تشاورني
ميمنة : اتحملي واسكتي لا يبطلون الخطوبة

وبس تگلي هيج اخلي واسكت والخميس من درت من السوگ اجتني تحجيلي شجابت وتشوفني بالغراض

ميمنة : جبتلج حذاء ناصية طبية ما تأذيج

طلعتها من الكارتونه
ميمنة : وهم أكبر من قياسج حتى لا تهيج رجلج

أبتسمت ولزمت ايدها
_ هواي تعبج

أبتمست وأجت حضنتني
ميمنة : ابد ماكو تعب ،انا طاير گلبي من اشوفج هيج فرحانه والتعب كله يهون لخاطر سنين عمرج التانيتي بيهن

دمعن عيوني من ذكرتني بكل سنه جنت أتمنى بيها انا حلاله ضحكت ومدت ايدها مسحت دمعتي الطاحت
ميمنة : صارن سوالف وهاي احنه جاي نحظر لخطوبتكم باجر

همست بصوتي الرايح
_ ما مصدگه

ميمنة : باجر راح تصدگين ،ها صدك نامي من وكت مو تضلين گاعده وتنسطرين من تمشين للصالون

_ تمشين وياي مو ؟

ميمنة : جا شلون ،ما اعوفج انا

ضحكت وهي گامت تحظر بجنطة الصالون وتسولف وياي ،صفنت واندارت على الباب أثر صوتها من طبت
ريحانة : شلونهن عرايسنه ،شلونج هيوفة

أجت بوستني ومشت لميمنة بوستها وضلت واگفه گبالها
ريحانة : ليش تباوعيلي هيج ؟

ميمنة : شلون ؟

ريحانة : انقهر من نضرتج هاي والله

لزمت ايدها تشرحلها
ميمنة : ابد مو قصدي اقهرج بس انا شوي مشوش بالي

ريحانة : يعني مو قصدج ؟

هزت رأسها ب لا وأبتسمت
ميمنة : منو جابج ؟

ريحانة : خابرت حق واجاني لان حمزه معزوم يم صاحبة

ميمنة : زين ما سويتي ،صدگ ما اخذتي سونار ؟

ريحانة : أي اخذت بس بعده ما مبين

ميمنة : لان بعدج ،يمكن من تخلصين الرابع يبين

ريحانة : أي گالت الدكتوره

أجت گعدت بصفي وميمنة بس خلصت جنطة الصالون صارت تعزل بالغرفة وانا خليت ايدي على بطن ميمنة من انتبهت عليها كبرانه

_ صلاوات بطنج مبينه

أبتسمت
ريحانة : أي ،الدكتوره تگلي طفلج صاير خشن

ضحكت
_ طالع على خالة

غمزتلي
ريحانة : اخوي ؟

أبتسمت وهزيت رأسي ب أي
_ عمة عدها صوره اله وهو عمره شهرين هلكبره چنه جاهل عمره ست اشهر

ريحانة : بطن أمي تربي ويمكن انا طالعة عليها

_ أي

طبت حواري و وراها جفون گعدن گبالنه و وحده تصفن بوجه الثانية ومبين عدهن مصلحه
حواري : احجي شبيج ،مو گلتي انا احاجيهن ؟

جفون : هاي أختج أنت حاجيها

حواري : وهيوفة هم أختج حاجيها

جفون : احممم

ريحانة : احچن شكو ؟

جفون : هاي حواري گالت خل نحف بس شواربنه

حواري : اياااا جذابة مو انا وياج اتفقنه

عضتلها شفتها
جفون : شبيچن حفن النه الشوارب ،مو صايرات جنهن شوارب صخر

ميمنة : وعماتي شيخلصنه منهن

جفون : أنتن حاجنهن شبيچن حبابات

ضحكت علينه بچم حجاية وخلت ميمنة تقتنع وتگلهن
ميمنة : امشي جيبلي بكرة

طفرت جفون تصفگ ومشت جابت البكرة وگعدت گبال ميمنة ،بس حطت الخطيت على وجهه عاطت ميمنة : بطلت

لزمت ايدها
جفون : لا والله، لا كملي ماعليج بي

كملتلها وجفون حتى عيونها مدمعات من الوجع بس مادري شني الجابرها تتحمل ،و وراها حفت لحواري وهاي ولا جنها عكس جفون المشت
بساع تغسل وجهه وردت تهفي عليه وتدردم

جفون : نسوان عرمات شلون تحفن

ريحانة : مثل ما حفيتي أنت هسه

جفون : يعني صرت عرمه مثلچن ؟

ريحانة : أي

ضحكت وگالت
جفون : جا ميخالف

هزيت ايدي ومددت من حسيت بروحي تعبت وهيجي خلص أخر يوم أني مو على ذمته ،خلصت الليل كله أني گاعده ما جايني نوم ،وبس صارت الساعة بالسبعة مشينه للصالون ،وانهد حيلي الا ردينه وي الغده طبيت للبيت انا وفستاني البنفسجي
والبرگع الابيض لافه بي روحي لف طبيت وتلگتني الهلاهل والجگليت وانا ما مصدگه روحي بحلم لو علم يعني صدگ اجه هذا اليوم ...! !

ورچفت هاي روحي من طببوني للغرفة حتى نعقد والدمعة وگفت بطرف عيني من سألني الشيخ

_ اذا قبلتي قولي نعم أنت وكيلي

رفعت ايدي ومحست دمعتي الطاحت من جوه البرگع وهمست بصوت بالگوه ينسمع
_ نعم أنت وكيلي

_علي صوتج خليني اسمعها

عدتها وانا بهل وكت إحساسي صعب وصفه
_ نعم أنت وكيلي

ماگدرت الزم دمعتي وما اخليها تطيح من تعالت صوت الهلاهل وانا بهل وكت جرتي للنفس صارت صعبة اريدن ابجي اريدن اصدگ الجاي يصير حقيقة موش حلم ...

والاكدلي الصار صدگ من سأله الشيخ وانطه الموافقة وخلص العقد بمباركة الشيخ
_ الحمدلله الذي بنعمته تتم الصالحات مبارك الكم زوج وزوجته

"زوج وزوجته"

كلمتين لو ردت احلم بيهن اخليلهن ايام كلش بعيده اكثر من الأيام الخلصت وانا اتحسر بيهن على شوفته
اكثر من كل ليلة عدت وانا اتمنى باجر يباوعلي ،اكثر من كل شعور بخسارته جنت
احس بي اليوم وهسه ،وبهل لحضه هاي انا صرت حلاله اگدر احلم واباوعله بكيفي وباليحلالي لو رادت عيني تصير بعينه ماكو بعد حرام وماكو أثم ولا اگول "لا هيفاء مو حلالج لا تباعيله"

هاي انا هسه گدامة مفرعه بلاية حجاب يسترني
منه صار "رچلي"

دنگت رأسي بساع اباوع للحلقه وهو يخليها بأيدي
شگد جنت اخاف لا يجي يوم وتلمع بأيده غير
حلقته شگد جانت الفكره تخوفني ،وايام بالي ينشده لو كل ما گالوا خطبوج ،بس هسه بالگوه لزمت أبتسامتي من باوعتلها بأيدي اليمنه چن ملكت الدنيا كلها بيها وهي بأصبعي

لبسته حلقته وبنفس الوكت هوسوله
_حبها ولك حبها ولا تخاف من أمها .

أبتسم وانا اباوعله واحس بروحي ما مصدگه هو بهذا القرب مني ،فز گلبي وحرت وين اطي وجهي من المستحى من طبع بوسته على گصتي ،غمضت عيوني من همسلي
ضيرم : احبج وانا الممنون وداعة شوارب اخوج .

شعوري تمنيت لو گدرت اوصفه جان خلصت العمر كله اكتب حتى يوصلكم الحسيت بي بهل وكت ،فتحت عيوني بساع من گال و وجهه بوجهي

ضيرم : راح اطلع اگل الاخوج حبيت أختك

بلعت ريگي وانا من كل عقلي مصدگه راح يحجله
همستله وانا اريدن اتخبر
_ لا عليك الله

أبتسم ودار وجهه على صوت ريحانة بصفة تطي الگلادة بعد حتى يلبسنياها ،ايده طخت رگبتي لو چن نتلني ،ماعولت يوخر وهو ضل هواي يسوي بيها ما يعرف ،وبس وخر الا گدرت اجر نفس مثل خلگ الله

لبسني باقي الذهب وطلع وانا ياعيوني مانزلت من طولة الماخذ گلبي وهو يمشي مطيني ضهره ويصيح
ضيرم : شبيكم خبصتووونه

گعدت اهفي على وجهي اريدن ابجي ،انتبهتلي ميمنة واجتني تحجي وياي وانا بعمري ما حسبت اجرب غصة الفرح وهسه جربتها ،حاجتني تريدني احجي وانا إأشرلها بأيدي ما اگدر

ميمنة : تگومين للغرفة تنزعين الفستان ؟

هزيت رأسي ب أي ومن شافني گمت كلهن صاحن
_ وين

وميمنة بساع طلعتلي عذر وگالتلهن
ميمنة : جا غير ما صار چم يوم من شالت البلاتين وهاي الگعده موزينه عليها

زهرة : أي بعد عمتج اخذيها خلها تبدل فستانها وترتاح

هزت رأسها ب أي وگومتني ،وبس طبيت للغرفة گعدت بالگاع ودموع الفرح طاحن من عيوني ،ضحكت بصوت ناصي وأجت گعدت گبالي

ميمنة : جا أنت گبل تبچين وبعد ما صار حلالج تبچين ؟

رفعت ايدي امسح بدموعي
_ ميمنة ما مصدگه الجاي يصير والله

ميمنة : حگج ،انا گلبي الطاير شحال گلبج

_ احس روحي بحلم والله

ميمنة : لا والله مو حلم حقيقة ،وهذا الرگص برة والهوسة كلها الكم ،الج أنت

ضحكت وبنفس الوكت بجيت ،وهي لمتني بحضنها شلون گبل من اشكيلها تعبي ،اليوم لمتني تواسيني بفرحتي مو بحزني

وخرت مني تباوع بوجهي
ميمنة : تبدلين ؟

هزيت رأسي ب أي
ميمنة : تدرين خربتي مكياجج

_ راح اگومن اغسله

ميمنة : امشي للحمام وانا اجيبلج هدومج

مشيت بلايه ما احجي ،ضليت حايره وي سحاب الفستان ،حطيت ايدي على خدي اصفن بين ما دگت الباب علي من طلعتلها گالت

ميمنة : يا شني بعدج ؟

_ بس افتحيلي السحاب ما تنفتح

اطيتها ضهري فتحتها الي واخذت الهدوم من ايدها وطبيت سبحت ،ماتعذبت وي التسريحه لان اصلا مو تسريحه كامله نص الشعر مفتوح وفوگ مرفوع منه شوي بجم ماشه ،وخرتهن بساع ...

فتحت باب الحمام وانا الف بالخاولي على راسي ،
وابتسمت من شفتها ضاله بالباب متانيتني ،لزمت ايدها احجي وياها
_ ليش ضليتي هنا ،جان مشيتي گعدتي رجليج راحن من الوگفه

أبتسمت وهزت راسها ب لا
ميمنة : ما تعبت ،گلت لا تحتاجين شي ومحد يمج عاد اضل قريبة عليج

الابتسامة شگت حلگي ،حضنتها وهي ضحكت
ميمنة : ها شني ترا انا موش ضيرم

وخرت بساع وخزرتها بالگوه ضامه ضحكتي
ميمنة : ما تخوفيني

خليت ايدي على حلگي اضم ضحكتي ،وما أعرف شگلت لروحي من سألتها
_ يعني عادي اشبكه ؟

هزت رأسها ب أي
ميمنة : جا غير حلالج ،بس مو تسويها وتشبكي صدگ وتخزينه

_ لا ،ما اسويها من نعرس

ميمنة : والله فلا مرتاحتلج

حركتلها حواجبي ومشيت گدامها للغرفة ،وانا بكل خطوه اخطيها احس بروحي بحلم ،يعني معقولة انا هلگد فرحانه معقولة الهوسات والرگص هل مره الي ..! !

طبيت للغرفة امشط بشعري واحجي وياها
_ تعاي شو گرصيني حتى اصدگ

ابتسمت وانا هاي ابتسامتها كلش زين اعرفها ،اعرف شگد فرحانتلي ،لميت شعري وطلعت وهي وراي بس شافني هلهلهن وانا بالكوه كاضه روحي ما اضحك ..

مشت شغلت الديچي ،وصاحت على جفون
حواري : ولج شال الليلات وينه ؟

جفون : بالغرفة

حواري : امشي جيبي بساع

جفون مشت للغرفة وهي علت صوت الاغاني وفتحت شعرها ،وبس اطتها جفون الشال ،شدته وصارت ترگص رافعه ثوبها اللونه لا هو سمائي ولا اخضر ،على گولة ميمنة رگصها مال وحده خبره
طبت وياها جفون شاده شال اسود ،بس حواري العيون كلها عليها على گد ما جان رگصها حلو ،ريحانة تعضلها شفه تريدها تنسحب وهي ولا
جنها ...

وبس خلصت الأغنية گعدت بنص الصاله تعبانه وتهفي على وجهه ،مشيت انا گعدت بصف جده الأول ما شافتني جرت وجهي تبوسني وبيني وبينها همستلي
غضة : ها يابعد حبوبتج ،اليوم صارلج محبوبج .

لزمت ايدها وهزيت رأسي ب أي وسألتها
_ جده أنت گلتي لجدي يخليني انا لضيرم ؟

هزت رأسها ب أي
غضة : جا شلون اخليج مكسورة گلب ،سألني مني الانسبله وانا گلتله هيوفة

حرت شأحجي ،ضليت اباوعلها وانا بگلبي اگلون،لوما
سألها وبكيفة خطبله جان شحالي بهل يوم ،جان شهدت على نهايتي گدام عيني ،وهي عرفت بشني افكر من صفنتي ،خلت ايدها على ايدي وگالت

غضة : صارلج بعد ياحبوبة لاتفكرين زايد وتتعبين

هزيت رأسي ب أي اباوع على البنات مدن السفره بالصاله وبين الضحك والهوسات نگلن كل الاكل لهنا والتمينه ،جان احلى عشه بحياتي ،ولا انسى شلون اكلت بشهيه مفتوحه وانا بين الاسمع واشارك بسوالفهن ماغابت أبتسامتي من وجهي طول ما هن يتناگرن

حواري : جا انا شلي غرض صوجج أنت جبتي شال زغير ،گلتلج جيبي الشال الچبير گلتي لا أنا ضعيفه

جفون : جا انا شمدريني هلگده

حواري : الما يسمع حجي حواري الچنه ،يخسررر

نجوى : تبرت منج الچنه ،خزيتنه چنج رگاصه

حواري : جا يمه غير خطوبة أخوي

نجوى : حتى لو أول العالم أخر العالم اخوج يخطب

حواري : والله انا اذا ما ارگص ما احسن بروحي عدنه فرح

نجوى : انهجم بيت عدوج ،والله اذا ما شگگت شال الرگاصات ما اطلع بت أبوي

طگت قوطية الببسي ،وردت على عمه وكلنا ضحكنه
حواري : عادي اشدن وصلة المسح وارگص

لطمت على خدها عمه
نجوى : انا هل بنية هاي تجلطني راح

عمة تحجي بشقة لان بزعانه روحها من حواري ،و تعرفها كلش زين اذا ما سوت البراسها ماتهيد
حواري : أم فستان الأسود گومي بدلي مطلعه زنودج علينه

جفون : وأنت شني الغاثج ؟

حواري : أخاف لانطگج بعين

عله صوت الضحك وهن بعدهن مستمرات بسوالفهن وبيناتنه الحجي حلن الگعده ،خلصنه عشه وگعدنه ناكل كيك ونسولف ،بس طفرت بساع من مكاني اريدن اشرد من گالت أمي تسرتن ،ماعولت اوصل للغرفه واضم روحي ،ما ضليت هواي گاعده وطبتلي

ميمنة : ليش شردتي ؟

غطيت وجهي احسن حايره وين امشي
_ استحي اضلن هناك وهو راح يطب

فتحت عيوني وفز گلبي فزة من گالت
ميمنة : أول ماطب گال وين مرتي

بلعت ريگي اريدن اصدگ
_ عليج الله ؟

ميمنة : أي والله ،حتى اخوج صار عصبي عليه

_ يا اخوي ؟

ميمنة : اكو غير صخر ؟

ضحكت وهزيت ايدي
_ جا شبيج ماتگولين اسمه ؟

ميمنة : امشي اطلعي يردون يتباركولج

_ لا يمه ويين اطلع لو اموووت

ميمنة : لا تموتين ولا شي شكو قابل ،تضلين هيج ضامه روحج ؟

_ مادري ميمنة والله استحي

ميمنة : جدي گال صيحيها جا شگله والله حضرة جناب الريشة تستحي

ضحكت ومشيت طلعتلي شالي من الكنتور مأيسه ،اعرفها كلش زين ما تمشي اذا ما انا وياها وبس شافتني اللبس بشالي طلعت گبلي وانا وراها اريد ارفع راسي ما اگدر بوجهي لجدي مشيت من صاحني
رأجس : تعاي بعد چدج

بس وصلت يمة حط بأيدي فلوس وگال
رأجس : بياضج هذا نسيت اطيجياه ،وبل مبارك بعد چدج

همست وانا مدنگه
_ الله يبارك بيك چدي

محمد : تعاي بوية

مشيتله بصف جدي باسني من راسي وتباركلي وعمامي كلهم تباركولي واولهم عمي باقر الأول ما وگفت گدامه گال
باقر : شايفة كل الخير بعد عمج ،"چنتنه"

ياكلمة چنتنه شگد حلوه ،رفعت راسي وأجت عيني بعينه صخر ،أشرلي تعاي ،مشيتله حضني نص حضنه وباسني من راسي وضيرم واگف بصفه
صخر : مبارك بعد أخيج ،تتهنين أن شاء الله

همست
_ الله يبارك بيك خوية

وخرت منه اعدل بشالي وضيرم گاله
ضيرم : بعد لا تشبكها هيج گدامي .

اندر خزرة ونتر
صخر : شني بكيفك ؟

ضيرم : جا غير مرتي ؟

ماحجه شي وضل يباوعله ،بس انا أخوي واعرفه هسه يتمنى كون يكسره على هل ملاشات هاي بس ما أعرف شلون لزم روحه وراد يطلع بس رد عليه يگله
صخر : امشي وياي

ضيرم : وين ؟

صخر : امشي وتعارف

جره ومشوا سوه ،وانا مشيت گعدت بصف ريحانة الايدها على بطنها سألتها مستغربة وضعها شو مادري شلونها
_ شني شبيج ؟

باوعتلي وجرت نفس
ريحانة : مابي شي بس تعبانة شوي

_ خوما بطنج توجعج ؟

ريحانة : لا ،بس انا شوي مالي خلگ

_ خوفتيني

أبتسمت ماتريد تقلقني
ريحانة : لاتخافين ،بس بطني جاي تبدي تكبر وهم عدي زلال احس بروحي جاي اورم حتى بالگوه اتحرك

باوعتلها ما مقتنعه گلبي يگلي مو هاي السالفة المضوجتها واكو شي ثاني بس ما ردت الح عليها وضليت گاعده اسولف وياها ومن ردوا ضيرم وصخر راسي بعد ما رفعته وهي تلاشيني

ريحانة : شني وين مشى لسانج مو هستوج تحجين

_ ما مشى بس تعبانه

ريحانة : تستحين من اخوي ولج ؟

ندستها لان گالت كلمة أخوي بصوت مسموع بس هم زين ماكو احد ركز
_ اسكتي ريحانة لا اجفص ببطنج

ريحانة :خل يجي ابني الا اگله مرة خالك جانت تهددني بيك وتريد تجفص ببطني

_ گليلة

ريحانة : خوش ،خوش بس والله حرام عليج

تحجي بضحك وانا بالگوه كاضه ضحكتي وهي ادري بيها جاي تخبث
ريحانة : باعي أخوي جاي يباوعلج

رفعت راسي وانا كل ضني جاي تچذب علي ،بس من تلاگت عيني بعينة درت وجهي بساع عنه وانا حايره وين اضم وجهي ...

خلصت العمر كله اتاني اليوم الهيج يباوعلي بس ما حطيت ببالي انا راح اديرن عيوني منه بعد ما جنت اتحسر على هاي النضره ،بس ردت اگومن منا لان شوي بعد واحس بروحي راح اتخبر وهم زين ميمنة الگاعده وبيني وبينها مسافة جانت منتبهتلي ،گامت گبلي وصاحتني بحجة تريد مني شغلة ،بس طبيت للمطبخ وراها مشيت
بساع للمغسله اغسل وجهي وهي بصفي تذكرني من جنت اگلها

ميمنة : مني الجانت تگلي هم يجي يوم يباوعلي ،هل اجه هذا اليوم وباوعلج وأنت انهزمتي

وانا امسح وجهي من الماي بشالي ،گتلها
_ ماشفتي شلون جان صافن

ميمنة : شفت ،وبساع باوعتلج ولوما ريحانة گالتلج ما جان انتبهتيله

_ ميمنة گلبي راح يوگف والله

ميمنة : هاي كله لان باوعلج ،جا شلون لو حاجاج ؟

_ خليها سكته شايله هم والله

ميمنة : ترا احطج واكتلج ،ما عولنه تصيريله تالي هيج تتشردين منه

_ جا مو بيدي والله استحي

زغرت عيونها تباوعلي وانا ضميت ضحكتي ومشيت ارد جوه بس ما ضليت بالصاله طبيت للغرفة وگعدت بيها ماخذتلي ركن اصفن ،وبيني وبين روحي اگولن

_ صدگ يعني صرتله ،وصدگ باوعلي بعد ما جنت اتحسر على النضره منه

رفعت رأسي ورددت
_ الك الحمد ياربي ،ماكسرت گلبي .

باوعت للباب من صار صوت قريب منه ،فتحته بصائر وباوعتلي
بصائر : هاا الشارده

_ جا اكو ناس اشهر ما راوت وجهه

ضحكت وسدت الباب واجت وگفت گبالي
بصائر : جا انا مو مثلج نهى علي

_ اممم

بصائر : أي والله ،ولج يا هيوفة بوكت نهوته شگد كرهته

_ وهسه ؟

بصائر : هسه صار يصعد وينزل وي النفس

_ ربي يديمكم وتضلون هيج طول العمر واحد يحب الثاني

بصائر : أمين يااارب

_ اگلج

بصائر : گولي ؟

_ ما تعرفين ريحانة شبيها مو طبيعية ؟

بصائر : لا والله ما أعرف ،بس هي من اجتنه ضايجة

_ هو ليش سألتج احس بيها شي مو خالية

بصائر : ما سألتيها ؟

_ سألتها بس گالت منوره الحباله

ضلينه انا وياها حايرات ،اول مره اشوف ريحانة هيج مگدر حالها وحتى من لاشتني ماحسيت بيها مثل گبل وحتى اليوم كله ما سمعنى صوت ضحكتها الرنانه ..! !

نزعت شالي وتمددت احس برجلي وجعها صار ما ينحمل هواي دست عليها اليوم وهذا كله مو زين علي ،بس من فرحتي نسيت حتى الوجع وهسه بين علي وما هادت الا من ضربتني ميمنة ابرة المسكن وبس بده مفعولها وانا منا تعبانة بساع نمت بنص هاي الهوسة برة

هستوني غافية وحسيت غطه نزل علي ،فتحت عيوني هاي ميمنة غطتني ،وبس شافتني اباوعلها
گالت
ميمنة : ردي نامي

طفت الضوه علي ومشت وانا جريتها نومة وما گعدت غير على صوت أذان صلاة الصبح
گمت توضيت وصليت بالصاله ومشيت للمطبخ بكامل نشاطي شبعانة نوم ،طلعتلي قوري زغير خدرت بي جاي على گدي واشتهيت اگلي طماطه ،بساع
سويتها وخليتها على النار وانا ما مصدگه بروحي جاي امشي واگدر افتر براحتي
صح متوجعة بس فرحتي بدوسة الگاع نستني أم الوجع

بس استوت الطماطه حطيتها بصينية وصبيتلي گلاص جاي وگعدت اكل وانا اسمع لصوت زقزوقات جفون الزغار ،رفعت راسي اباوع للقفص ،ماكو ثنينهن بالحله مالتهن خرزة وكركم ،بس هذن الزغار دوم هيج صوتهن عالي ...

گمت غسلت طاوتي والگلاص ومشيت للصالة اريد اقره قرآن ،وهستوني مديت مصلايتي وانفتح باب غرفة أمي ،بس شافتني أبتسمت وأجت وگفت گبالي
فرحانة بي

زهرة : صباح الخير وطولج الحلو بالبيت يابعد امج

أبتسمت
_ صباح النور حبيبتي

زهرة : شو اوگفي عدل اشوف طولج

عدلت وگفتي مبتسمه
زهرة : يايمة شگد دعيت اشوفنج واگفه وحدج

_ ياحبيبتي

أبتسمت ومشت للمطبخ وانا لبست جادر الصلاة وگعدت ،شوي وأجت متوضية ،فرشت مصلايتها تصلي وانا اقره ،هاي الگعده وهذا اليوم شگد تحسرت عليهن طول ذيج الايام البيهن جنت ما اگدر اوگف وحدي ...

أبتسمت من اجت عيني على الحلقة بأيدي تلمع ،تأملتها بمكانها الجنت كل ما لبست محبس ولمع بأيدي اتمنى حلقة ذاك الانسان الحبيتة بمكانه ،ومن هل وكت واعدت روحي ما انزعها واحافظ عليها لان بهل لحضه اقتنعت
حلقة الشخص النحبه كل ما نشوفها چن نشوفه

عند الوصف قالت
"خاتم المحبوب كوجوده أمام عينياي"

ومن كملت قراية قرآن صدقت وگمت رديته بمكانه ورديت لميت مصلايتي وشلتها وباوعت للدرج من سمعت صوت خطوات ومبين واحد منهم نزل ،أبتسمت من شفته وهو بس شافني واگفه اباوعله ضحك و وگف على أخر باية قريب علي
علي
ليث : هلا بهل صباح هذا ،شني عمي واخيرا شفنه طولك الحلو

ضحكت وهو نزل وگف گبالي ،لم وجهي بين ايده وباسني من راسي
ليث : ضلينه بحسرة هل وجه من الصباحية ،بس يله صارت سوالف بعد

هزيت رأسي ب أي وگلتله
_ اسويلك ريوگ ؟

ليث : هنيالي وتاكلين وياي

_ ولو ماكله بس ميخالف اگبالك ،شتريد ؟

ليث : بيض وطماطه من ايدج ولا واحد يسويها مثلج

زهرة : ها ليث ؟

ضحك يلزگها
ليث : يايمة التسويها أنت تخبل بس تعرفين انا احبن البيض وطماطه من ايد هاي

زهرة : جا هاي ماعدها اسم ؟

ليث : جا ما تعرفيني أنت انا هذا حجيي ،يله بساعج هيوفة اريدن امشي للگاع

_ صار تدلل

خليت المصلاية بالمعرض ومشيت للمطبخ ،سويت جاي جديد ومثل ما يحب هو سويتله البيض وطماطه واخذت الصينية بس شافني طبيت للصالة وانا شايلتها گام
اخذها مني بساع وگعد وانا وأمي گابلناه ،صبلنه جاي يشكي

ليث : صار شگد خبزة حاره ما ماكلين لو ميمنة تخبز وتدز النه لو نضل ناكل البايت

زهرة : جا شنسوي غير اخيتك طاحت وانا حيل مابي لوگفة التنور

ليث : جا أنت خلف الله عليج تطبخيلنه وين بيج تخبزين

زهرة : يابعد امك

ضحك وانا گلتله
_ هسه أنت تريد تتريگ خبز حار ؟

ليث : أي والله مشتاگ

_ جا تدلل باجر اخبزلك ،چنك على خبز

ليث : لا هيدي ،من تطيبين كلش انا امشي اشعلج التنور وشرط حطب جديد اجيبلج

_ جا خوش

بس خلصنه ريوگ گام هو مشى للگاع وانا گمت يم امي بالمطبخ تسوي ريوگ لجدي وجده وأبوي گعدوا وبس خلصت شالت الصنينة ومشت وانا وراها اخذت قوري الجاي والخبز ،حطيتهن بالگاع وگعدت اصبلهم جاي واسمع لحجيهم ...

وبس تريگوا مشوا أبوي وجدي عدهم طلعة ومن صارت الساعة بثمانية نزل صخر وگبل صباح الخير گال
صخر : اريد جاي بعد اخوج راسي راح يطگ

_ صار تدلل

مشيت للمطبخ حطيت الجاي على النار وبس حمه صبيتله بگلاص واخذته اله ،اطيتيها وگعدت اباوع عليه يباوع على التفزيون مشتغل قرآن ،يخوط بالجاي ومبين باله كلش مو يمه ،بهل وكت دعيتله الله يريح باله ولا يضل بهذا الحال المشدوه لان گلبي ينطحن طحن كل ما شفت هذا الحزن بعيونه...

°حواري°

_ يااااربي گلادتي ويييين

عاط بي من بره
عزيز : وخرس لهذا الصوت

طلعت من الغرفة وانا ادگ والطم
_ گلادتي نمت لابستها ماكووووو

عزيز : صووووتج

خليت ايدي على حلگي وانا ادگ رجلي بالگاع
عزيز : احجي مثل خلگ الله وخلينه نفتهم .

وخرت ايدي مو حلگي
_ گلادتي الجابها ضيرم اختفت

عزيز : شلون ؟

_ نمت لابستها گعدت مالگيتها برگبتي

عزيز : جا دوريها بفراشج

_ دورتها

عزيز : جا ضاعت

زغرت عيوني اباوعله
_ هسه تطلع أنت ماخذها

عزيز : انجبي شني عايزلج

_ جا وينها

عزيز : گلي لروحج

صحت
_ يمه عزيز باگ گلادتيييي

اجه يريد يكفخني وامي طبت بساع جرته وانا بعدني قافله هو الماخذها
نجوى : فلك الفلكج تبوگين اخيج

_ جا هو حاط عينه عليها وبعده محتاج فلوس على العده الا يگدر يجيب سياره وهل اخذ گلادتي وباعها

جرته امي وانا رديت ليوره لان حسيت راح يجيبني بكفخه ينسيني انا مني ،بس عود اسكت ابد ما گدرت اضل بلايه ما احجي واخليه يتخبل بالزايد

_ خاب شني والله الا اگل لضيرم عزيز راد يضربني

لزمته حيل امي وانا طيگتها ركضه لان لو لازمني يلزگني بالگاع ،طبيت للغرفة وما أعرف شلون تذكرت انا نزعتها امس من أجيت من بيت جدي وردت اسبح ،يافشلتي لو ضاله ضايعه احسن ولا لاگيتها بكنتوري ،لا وكل عقلي اگولن نمت ولابتسها ديلا هسه لو يملخني عزيز هم ما الومه سويته هو البايگها

غميت نفسي ولبستها وانا اباوع بالمراية عليها
ياربي شگد احبها ولا جنها گلاده عادية
،شمرت لروحي بوسة وانداريت على صوتها تهز بأيدها وتحجي
ريحانة : الحمدلله على نعمة العقل ياربي

رفعت حاجبي
_ شني قصدج انا بلايه عقل ؟

ريحانة : أي

_ جا احسن ،المخابيل عايشين احلى عيشة ،تدرين ليش ؟

ريحانة : ليش ؟

_ لان ما يعرفون شي من هم الدنيا ولا من ضيمها

ضحكت تسألني
ريحانة : يعني هسه أنت تعرفين شي من ضميها ؟

هزيت راسي ب أي
_ جا شني بس الامتحانات كافي علي

ريحانة : هاا ،هنا الحجي ،ضايجة من الامتحانات ؟

_ أي ،والله لعبان نفس لو تضل علي جان بطلت ورجلي ابو الجهال يصرف علي

صافنه تباوعلي وانا نزلت دوسة ونص على المدرسة
ريحانة : والله ماكو احلى من الدوام والتعين ،انا شگد
الومن بنفسي اگول لو مداومه جان هسه تخرجت

_ والله بطرانه ،عمي أنت خلصتي من الظيم

هزت ايدها جزعانه مني ،وانا هاي طگاتي كل سنه وي الامتحانات بس بعدين يطشن طلعت وراها من مشت الامي صاحتها ،بس طبينه للمطبخ گالت

نجوى : تعالن تريگن بس لا تشبعن هواي حتى تتغدن زين

گعدت واخذت خبزه وسألت
_ ليش شنو غدانه اليوم ؟

نجوى : سمج مسگوف ،اخيتج مشهيته

_ ها عيني علمود ريحانة ؟

نجوى : جا شني غير حامل

_ أي عيني لان حامل ،هو أنت من يوم يومج كل ما تجي ريحانة تحيرين شتسوين

نجوى : جا غير خطاره شلون مانحير بيها

_ أي صدگت

ريحانة : ها حواري الچنة شبيج ؟

_ خايبة كلشي مابي بس جاي اتشاقة

ريحانة : أعرف

أبتسمت وشمرتلها بوسة ،وبس خلصنه الريوگ غسلت المواعين انا وهي وامي گاعدات يسولفن وانا كلساع مندارتلهن واگلهن

_ حسبي الله ونعم الوكيل

ريحانة : خايبة دغسليهن كلهن جم ماعون فد نمونه ،لو تشوفين يم عيالي شگد اغسل وانا حامل جان بجيتي علي

_ جا هم عيالج بلاية ضمير

ريحانة : أي والله

بس خلصت المواعين مشيت كنست الحوش ورديت على البيت من شفته يحتاج كنس ،واليوم الشمس طالعة ما اعرف شعجب حتى الجو بارد بس مو مثل كل يوم ،للساعة بالعشرة نزلت بصائر تتثاوب وانا تخصرتلها
_ جا لو ضاله نايمة مو احسن ؟

فرت ايدها وجابتني بغمة وفقار وراها يضحك، صحت
_ حاجييي مرتك شوفها تغمنييي

فقار : انا شدخلني أنت وبت عمج

_ من الزمها واكتلها ما تدخل ؟

فقار : لا عمي اسحب كلامي ما يتشاقة وياج

ضحكت وگعدت اباوعلهم ،اندارتله ورفعت نفسها تبوس خده وهو يضحك اخوي مكيف يمكن حتى نسانه نباوع عليهم
نجوى : فلك الفلكج ولج مو گدامنه ،خااايبه ديري وجهج الصلفه

ضحكت ودرت وجهي من عاطت بي ،وبصائر فعلت وضعية البيب بيب وطارت للمطبخ وهو ضل يشاقي بأمي

فقار : شني نجوى جا واذا باستني هي كلها بوسة خد

نجوى : انهجم بيتك جا شتريد

فقار : امشي اگلها شأريد

اندريت اباوعله مشى للمطبخ امي ضحكت وصاحتله
نجوى : العقل ربي

ريحانة : والله انا كل ما اشوفنه هيج فرحان بيها ما اگدر الزم ضحكتي

نجوى : ادعيلهم الله يدومهم يايمة ،انا اكيف من اشوف واحد بيكم مرتاح

ريحانة : ولدج خوش صادوا صيدات

نجوى : أي والله ،ضل بس عزيز لو يرضى امشيله

ريحانة : منين تخطبيله ؟

نجوى : من بنات عمة جا منين

ريحانة : انا وحده ببالي اله

نجوى : ياهي ؟

ريحانة : حاجي من يقتنع تمشيله انا اگلج على ياهي تمشين ،و والله اشوفنها كلش توالمه

نجوى : جا خوش احاجي على يوم واگلج

ريحانة : ما گال جدي عرس ضيرم شوكت ؟

نجوى : لا والله ولا راح نسأله ما نريد ننشده مثل الخطوبة ونخلصها ركض بركض

ريحانة : أي والله انا من خابرتوني جانت بطني توجعني تانيت بلكت الله تهيد وماكو ضلت ،حتى هدوم ما گدرت امشي اشتري

نجوى : يايمه وليش ما أعرف ؟

ريحانة : ما ردت اخرب فرحتج ،مشيت للدكتورة گالت تقلصات قوية عدي وهم بداية زلال

نجوى : سوده علي وانا اباوعلج كل ضني سمنانه طلعتي من الزلال مرمه

ريحانة : اسم الله يمه ،ميخالف الحمدلله والشكر خليني اورم اسمن ولا اضل بلايه جهال

نجوى : أي والله ماضل شي ويعدن وتصير سوالف

هزت رأسها ب أي ،وضلن يسولفن وانا بالنص بس اسمع ،شوي وأجت بصائر جايبة صينية الريوگ ،گعدت هي وفقار يتريگون ويسولفون بيناتهم ولا يمنه أصلا ،وانا ضليت حايره ويامن احجي خليت وگمت للغرفة لبست حجابي وعباتي وگعدت گبال فقار الباوعلي صفح أول ما شاف العباية بأيدي وگال

فقار : مايصير تگعدين بالبيت أنت ؟

_ أي مايصير ومليت ضاله اباوع للحياطين ،وديني لجفون احسلي

فقار : خل اكمل ريوگ

_ خوش

بس شفته كمل گمت لبست عباتي و وگفتله بالمطبخ غسل واجاني
فقار : شني ماتگدرين يوم ما تمشيلهم ؟

_ أنت تگدر يوم ما تمشي لنوح ؟

ضحك واندار علي
فقار : هذا ابو السفينة وي النفس

_ جا انا هم جفون أم الرموش وي النفس

فقار : دمشي

مشيت وراه وبس وصلنه طبيت وهو ضل وراي بس شفت جفون صحتلها
_ أجيت يمج اهلي مابيهم سالفه

زهرة : الا احجي الامج

_ عمه ترضيها مخليني اصفن وي المحياطين ،امي تسولف وي ريحانة وفقار ملتهي ببصائره وانا ضاله حاطه ايدي على خدي

زهرة : حگج

_اي والله ياعمه حگي

نزعت عباتي وگعدت يم جده بس شافتني گالت
غضة : هاا الرگاصة

_ ياا جده شني مو عيب تگولين على حفيدتج رگاصة

غضة : جا مچذبة امس صرتي الرگاصة بت باقر

_ ياا يااا

غضة : انا غطيت وجهي من المستحى

لطمت على خدي
_ شني السالفة جددده

ضحكت هيوفة وأجت گعدت بصفي
هيوفة : تشاقيج لا تضوجين

أبتسمت
_ شلونها رجلج ؟

هيوفة : توجعني من ادوس عليها ومن اتعب بس ميخالف

صفنت متذكره
_تذكرت ،يعني هسه أنت مرررة اخوووي

هزت رأسها ب أي وبعدني ما حاجية وأجت ترس أذني حجاية جده
غضة : خايبة وجبح لهل صوت هذا ،فوگ ما رگاصة دلاله

كلهن ضحكن وانا گمت وگفت
_ شني جده ترا ازعل وأمشي والله

غضة : خايبة غير اشاقيج ،هاي بركة هم اشاقيها مثلج وجفون هم أنت شبيج من دونهن بيج گمزه

رديت گعدت وانا اگلها
_ طالعة على أخوي

غضة : فدوه لطولة

_ ها جده مو مرته گاعده زحمة

غضة : جا انا احجي البگلبها

تمددت اضحك وهيوفة تگلها
هيوفة : هااا جده شني

غضة : خايبة شحجيت

هيوفة : احجي بكيفج حبيبتي

خليت ايدي على حلگي وگعدت اباوعلهن ،شني عبالي راح يتعاركن
_ جا شني ما تتعاركن ؟

غضة : انجبي بيش طالبتنه

_ شوكت يجي يوم اتمشت بيچن

غضة : عاب لهل لسان ما يحجيله حجاية براسها خير

_ لا جده هاي لان حجيت الحگ ،مو بس انا لا عبالج كل حفيدات رأجس يتانن هل يوم

غضة : فلك الصاب عدوچن ،تعاي ليه هيوفة جده على عناد حورية

ضحكت ودحست روحي بنصهن من حضنتها ،كفختي على راسي وگالت
غضة : انا الله يشهد احبنچن كلچن

_ أي جده بس هيوفة غير

غضة : أي جا طبعا

ضحكت و وخرت ،شمرت شالي وگعدت گبالها
_ شني التحبين تعرفي عن ضيرم ؟

هيوفة : مثل شني ؟

_ أي شي

هيوفة : بعدين

اشرتلي على الگاعدين بعيونها انا عرفت ماتريد نحجي گدام احد ،گمت للمطبخ يم جفون ومثل كل مره اتيهه الگاها گاعده ومگابلة زقزوقاتها ،وخاف چنه بثنين لا هسه صاروا خمسة نعمه من الله وهي متخبله بيهن ...

گعدت بصفها
_ شني شوكت يطلعن من الحله؟

جفون : بعدهه زغار ،يجوز اسبوعين بعد هيج لو أقل

_ خوش ،اگلج وليمون وينه ؟

جفون : مات ،ضل وحده ومات

حطيت ايدي على خدي مقهوره من شفت عيونها غورگن بالدموع
_ جا خل نوم يجيبلج غيرهن

جفون : لا ما اريدن اگله ،نوح صاير مو نوح مثل گبل

_ شبي ؟

جفون : ما أعرف احسن بي شي غريب

_ يحبج

جفون : ياطلابة اليحبج الما تخلص ،انا شگلتلج ،مو گلت بعد لا تردين تحجين هل حجي هذا لان تعرفين انا شني وشني نوح عدي

_ سكتنه عمي ،اگلج

جفون :گولي

_ لا تحجين منوره خشمج لا اسحلج

جفون : گولي حواري وفضيها

_ باعي

جفون : باوعت

_ امس منو شافج بالفستان الاسود ؟

جفون : محد لان گبل لا يطبون بدلت

_ هااا

جفون : ليش ؟

_ هيج اگول ،بس والله حرامات حلو

جفون : أي كلش عجبني

غميتها وضحكت وهي صافنه بوجهي ومن طخت بعقلها شني اقصد ،جرتني من شعري تصيح
جفون : اموووتج راح والله ،لج ما توبين أنت ؟

أنا اضحك وهي تجر بي ،المنعوله گطعت شعري
_ خايبه هددديني

وما هدتني بدون ماتعضني خلتني ارفس وهي وگفت گبالي
جفون : حتى توبين ،شگد اگلج لا تشاقيني
بهل سالفة وأنت تعاندين ،تجيبين التكفخ لروحج

وگفت افرك بزندي
_ خاب امداااج وامده اليجيج ،وامداااني

غميت روحي ومشيت أريدن اجيب عباتي وهي جرتني
جفون : وين موليه ؟

_ وله التولج ونامت بنص ضلوج ،وخري خليني امشي شوهتي زندي

جفون : أنت علتي وتستاهلين ،وخلينه نتصالح

_ ما اصالحح

جفون : نجبي ترا اروحن ل ليث واگله هاي وحده

سديت حلگها خازرتها
_ شبيج ،بله أحد سمعج ؟

جفون : جا لا تمشين وخل نصالح

باوعتلها بطرف عيني وهي جرت خدودي بأيدها
جفون : نتصااالح

هزيت رأسي ب أي ،مدت اصبعها الزغير وانا هم وتصالحنه
جفون : ادبسزز تريد تزعل مني ،والله اطگج لو زعلتي

_ جا أنت چنج جلب تعضين

جفون : تستاهلين

_ ترا ارد ازعل وأمشي

ضحكت
جفون : لا لاتزعلين ،امشي نطلع يم بطاتي

_ امشي

گعدت انا على بلوكه وهي مشت فتحتلهن الباب وطلعن يلعبن هن وافراخهن الكبرانات
_ اگلج شتوكليهن شو صايرات جنهن فياله ؟

جفون : قل اعوذ برب الفلق ،طفي عينج يمعوده

_ ما احسد والله ،هذا بس عمي يوسف هيج عينه ليزر

جفون : عمج ولا ينبلع ،ياااايمه الله يساعد البنات والولد عليه

_ أي والله ،مشوفهم نجوم الضهر وهاي عود هم مايحجون ،بس هو وحق ما يصافون عزيز يگول يوميا گابه بينهم

جفون : جا حقة هو عمي يوسف يجفص بالمصارين

_ والله ما أعرف شلون حاملي

ضلينه انا وياها گاعدات من سالفه لسالفة ،منا لمن ردوا الولد صبت عمة الغده الهم وانا واگفه يمها بالمطبخ وغاية گاعده تقره ،وجفون تغسل بالخضره

زهرة : من تخلصيها ودي الاخوانج لان ما حاطتلهم

جفون : خوش

خلصت من غسلها وبس صفت من الماي گسمتها بالنص ومشت ودتلهم وردت ،باوعت على غاية الحايرو وي الكتب
جفون : هاي لو انا عدي امتحان فلا جان تحركت من الغرفة

رفعت راسها باوعتلها وردت دنگت
غاية : اضوج أضل وحدي

جفون : بالعكس احسن تفتهمين

غاية : لا عادي جاي افتهم هسه

زهرة : امشي حواري گعدي هيوفة ،وأنت جفون طلعي الطرشي

عدلت حجابي ومشيت للغرفة ،شغلت الضوه وباوعتها نايمه ومتلفله بالبطانية ،مشيت على كيف اندها بأيدي ،واگلها
_ مرة اخووي اگعدي تغدي

فتحت عيونها الصفر ،باوعتلي وگعدت تتثاوب ،منضرها من هي وهستوها گاعده يخبل هنياله أخوي

گامت طلعت وانا وراها هي مشت تغسل وانا مشيت للمطبخ أول ما شافتني عمه گالت
زهرة : اجه فقار عليج گلتله تتغده يمنه

هزيت رأسي ب أي وانا بالاصل ما اريدن امشي ضايجه
زهرة : تگابلن على الصينية أنت وجفون

ماگلت شي وشلناها انا وجفون وميشنه للصاله ،التمينه ناكل والولد گاعدين ياكلون ومسافة بيناتنه
نوح : اگلج يمه

زهرة : هاا يمه

نوح : زوجيني

زهرة : بعدك زغير وينك وين الزواج

نوح : يمة يازغير ماضل شي واتخرج

صخر : بعدلك سنتين شني ماضل شي

نوح : جا شلون

زهرة : شني جا شلون ،گدامك اخيك ليث وأنت وراه

نوح : لا هاي هي اغسل ايدي يعني

ليث : واسبح هم

نوح : عليك الله ليث اخطب انا اريد اخطب

ليث : من الگه الغريبة التاخذ گلبي

صخر : خاب دنجب ،وجدي يخليك تجيبله بكيفك

ليث : والله انا قوانين جدك هاي ما تمشي علي ،يريد يمشيهن عليكم بس انا لا

صخر : بساعة اليقرر فنك لو فكيت حلگك

ليث : بعده السره ما واصلني ومن يوصلني بلكت الله لاگيها

°جفون°

ضحكت وباوعت ل ليث يحركلي بحواجبة ونوح خازرني ،شبي هذا شني مايصير نضحك صاير كلش ما اعرف شلونه ،انداريت اباوع لحواري وجهه انگلب كله حتى اكل ما گدرت تاكل بعد

ندستها وهمست
_ كملي اكل لاتخلين احد ينتبهلج

باوعتلي وعيونها بساع غورگت بالدموع ،دارت وجهه و دنگت بساع ماتريد احد يشوفها وانا بساع گمت وصحتها
_ تعاي حواري وياي

زهرة : وين گايمات

_ نجيب ماي

زهرة : جا ماتشمين وحدج

_ لا اله هي وياي

گامت وانا مشيت گبلها بس طبت للمطبخ رفعت شالها تمسح دموعها الصارن يطيحن بلايه ما تگدر تكضهن

وگفت گبالها
_ كافي حواري شني سالفتج لايطيب أحد

تحجي وتمسح بدموعها
حواري : انا شگد حاولت اقنع بروحي ما راح يجي يوم يباوعلي بس والله مو بيدي انا وعيت احبه والله وعيت بس هو بعيني

_ من اول ما حجيتيلي عنه گلتلج ليث يشوفج حالج من حالي انا وغاية ،ما سمعتي للحجيته وضيعتي گلبج وروحج

حواري : كله مني انا الحطيت روحي بنص التعب

_ ديلا الصار صار بعد ،وامشي نرد وسوي روحج طبيعية

هزت رأسها ب أي وانا مشيت طلعت دولكة ترستها ماي وگتلها
_ امشينه .

ردينه للصاله وهي ماردت طبيعية شگد اشوفها تحاول ما تبين بس انا الاعرف شبيها هسه وكلش انقهر من اشوفها هيج مكدرة وانا ما متعلمه عليها هيج ساكته ومو بس انا كلنه

زهرة : شبيج عمة حواري ؟

باوعتلها وأبتسمت
حواري : مابي شي ،بس راسي شوي يوجعني

زهرة : جا اكو حبوب مال راس بالثلاجه اخذي منهن

حواري : خوش

گامت للمطبخ وانا كلش زين اعرفها بس رادت تشرد بحجة الحبوب بس هي ماتگدر تضل گاعده هنا اكثر وهل لگتلها حجه ،مشيت وراها اسوي جاي لان غاية بساع ردت تقره وكت ماعدها

حطيت القوري على النار وانداريتلها
_ كافي لامه الوجه چنج بومه افرديها شوي

حواري : خايبه ماتهديني انا ضيمي كافيني

_ انهجم بيت ام الضيم ،دتعاي اغسلي المواعين هسه تشرد ضوچتج

نزلت من المجمده
حواري : انا اشرد مو ضوجتي

_ اغسليهن لا احط راسج بالسنك

حواري : نجبي مااا ،وصدگ ما تستحين على روحج انا خطار وتشغليني

_ ياهي الخطااار ؟

حواري : انا

_ فلك من صارت بيها مواعين صرتي خطار

ضحكت وانا ضحكت وجبتها بغمه بأثنين أيديه وهي ردتلياها بدال الوحده ثنين مشيتلها اريد اجرها وطب صخر باوعلنه بخزره
صخر : شبيچن ؟

حواري : شبينه ؟

صخر : انا اسأل شبيچن لا تردين السؤال علي

_ جاي نتشاقة

باوعلي مزغر عيونه وگبل لا يمشي يغسل گال
صخر : جاي اكو ؟

_ سويت راح أصب

مشى غسل ورد وانا بهل وكت صبيت الجاي ومشيت للصاله بس شافني نوح گام اخذ الصينيه من ايدي وهمس
نوح : اغديلج فدوه

فتحت عيوني مصدومه بالگاله وهو ابتسم ومشى خلاني واگفه بمكاني مثل خراعة الخضره ،من گعد باوعلي ولا چن حاجي
نوح : شبيج واگفه هيج ؟

رفعتله حاجبي بحركة "لا والله"

ضحك مفتهمني واندر على ليث الگاعد بصفه
ليث : شو زايعها كلش أنت ؟

نوح : جا شني كافي نضل ساكتين

ليث : صخررر تعال تعال احجيلك

انداريت وشفته وراي طب ينشف بأيده بالخاولي
صخر : شكو شصاير ؟

نوح : ليث اذا تحجي اتبره منك والله

صخر : شني شكو ليث ؟

ليث : ماكو شي هيج ،تعال اشرب جاي

رديت للمطبخ وانا اصفن ،اجت وگفت گبالي
حواري : هااا شبيج ؟

_ نوح

حواري : شبي

_ مادري

حواري : جيره بگصتج

_ خوب بگصتج أنت

طبت عمه شافتنه نريد نتعارك صاحت
زهرة : خايبات كافي مناگررر

مشيت اغسل مواعين امري لالله لان هاي بلايه ضمير بالشغل كلش ،بس خلصت مشيت سبحت وگعدت اتدفه يم الصوبة وهيوفة گاعده بصف جده يسولفن چن صارلهن شگد ما متشاوفات...

°هيوفة°

گمت بساع اريدن اطب للغرفة من سمعت صوته بالمطبخ سلم على أمي وسألها على حواري گالتله أمي جوه
وهو بساع گاللها سويلي درب اطب ،لزمتني جده

غضة : شني وين شارده ؟

_ امشي للغرفة

غضة : خايبة اگعدي

_ جدده

غضة : اگعدي ولج جا غير رجلج

وصدگ ما خلتني أطب ،وانا حرت وين اطي وجهي من طب هو وانا بلاية حجاب احسن بروحي مادري شبي عيوني ما گدرت ارفعهن وهو اجه گعد بصف جده من گالتله
غضة : تعال بعد چدتك اگعد يمي

احس برگبتي شكلت على گد ما مدنگه وهو وجده يسولفوه
غضة : شلونه دوامك بعد جدتك

ضيرم : والله جده تعب بس تعودت

غضة : الله يساعدك ،جا شبيج هيوفة ما ترفعين راسج ما ناكل

ضحك ضيرم وجده أعرف بيها متقصده تريدني احجي وانا ضليت ساكته
ضيرم : قافله جده لا تحاولين

غضة : والله عياره جا شني أول مره تشوفي

والله اعرفها جاي تريد تحجيني
ضيرم : هديها جده بعدها جديده

غضة : شو رفعي راسج خاف ما تردي

رفعت راسي اباوع على جده
_جده شبييج وياي ؟

ضحك يمسح على شواربة
ضيرم : والله فلا تنگدرين ياجده ،طلعتي حسها

نزلت راسي بساع من باوعلي ،اريد احط ايدي على گلبي اهدي سوادينه بس استحي احس عيونهم علي ،شوي وصاح على حواري حتى يمشون وهي أجت تگله
حواري : اريدن أضل ماعدي قرايه

ضيرم : جا شوكت تجين ؟

حواري : انا اخلي نوح يجيبني

ضيرم : لا أنا اجيج بس گليلي شوكت تردين ؟

حواري : بالليل

ضيرم : جا هسه الدنيا العصر صارت

حواري : ميخالف بالليل گبل لا تنام تعال اخذني

استغفر ومشى وهي ضلت يمنه تفتر هي وجفون واخير شي من حيرتهن شيسون گعدن يلعبن محيبس وانا گاعده اباوع عليهن

جفون : ما تلعبين ويانه ؟

_ مالي خلگ

جفون : اصيحلج غاية أنت وياها فريق وانا وحواري الچنه فريق

_ جا خوش اللعب

مشت بساع للغرفة طولت الا ردت و وراها غاية تدردم
غاية : شوي وارد اقره

حواري : هسه دگعدي هو احنه شوي ونبطل

غاية : خوش

گعدت بصفي وبدن جفون وحواري من اول لعبتين اخذت انا المحبس من ايدهن
جفون : لاااا شني شبساع بعدنه ما ضحكنه عليچن

_ جا شني قديمة انا بيها ،چنه نلعبها انا وميمنة وريحانة وسيوف

حطيت المحبس بأيدي اليمنه وبدينه لعب منا لمن خسرن عشر مرات ضبط گامت حواري تلطم
حواري : عليج بداعة اخويا اطينياه ،شبيج حبابه

ضحك ومديت ايدي بيها المحبس اخذنه مني وضحكن وغاية طنگرت
غاية : شني تطي الها عود صدگ تحجين ؟

_ جا حلفتني

غاية : واذا حلفتج تطي الها

_ أي جا شلون

غاية : احمدك ربي واشكرك

ضحكت وباوعتلهن مبين عد جفون لان وجهه صار اصفر ،أبتسمت
_ جفون طگي السيره واطينياه من اليمنه

فتحت ايدها وصاحت
جفون : لاااا ترا مايصير هيييج

°حواري°

ضحكت هيوفة وكملنه لعب ومن مشت غاية تقره بعد بطلنه ،وانا وجفون گمنه للحوش حايرات وين نطي وجهنه

خلت اصبعها على رأسها متذكره
جفون : نلعب توكي ؟

صفگت بأيدي
_ أي والله صار هواي ما لاعبين

جفون : جا اوگفي اجيبن طابوگه نخطط بيها

_ خوش

مشت جابت ربع طابوگ وأجت خططت التوكي
نزعت من رجلي وبديت انا وهي واگفتلي ومن وصلت للثلاثه صاحت
جفون : دستيي ،خسرتي يلا وخري

وخرت وهي بدت تلعب وهم وين ما انا خسرت هي خسرت ،ضحكت وگتلها
_ وخري يلا وخرررري

ضحكت و وخرت من گتلها
_ الدنيا دواره

جفون : يلا هسه تخسرين عادي

ضلينه نلعب منا لمن انفتح الباب وطب شافنه هز ايده
صخر : جهال والله

جفون : جا ماكو قرايه وين نطي وجهنه

صخر : حگجن ،صدگ ذكرتيني شگد جبتي بأمتحان الرياضيات ؟

_ قرتني هيوفة وجبت خمسة وتسعين

صخر : ليش مو ميه ؟

_ عدي غلط بخطوتين

صخر : ميخالف بس كون تتعلمين من غلطج

هزيت رأسي ب أي ومن طب ردينه نلعب ولهناك وطب نوح من شافنه نتمالخ ضحك ،انا اگلها ما دست وهي تگلي دستي ،اجه وگف گبالنه وبلايه ما يفتهم شكو گال

نوح : انا اگلج صدگ دستي

تخصرت
_ شني شفتني بعيونك ؟

نوح : لا بس جفون ما تچذب

_ خااااب دطييير أنت وياهاااا

فتح عيونه خازرني وانا حطيت ايدي على حلگي منتبهه شجفصت
نوح : تلام بيج چده من تسميج أم لسان المعذرب

أبتسمت بفشله
_ نسيت عيب وأنت أكبر مني

نوح : هو أنت خليتي أكبر واصغر،امشي اطب جوه لا تنهان الشوارب

ضحكت اباوع لوجهه شواربة جنهن سرب نمل ويخاف عليهن لا ينهانن ،طبينه وراه بعد ملينه وما نعرف شنسوي بعد أخر شي گعدنه نرسم

رفعت ورقتي اباوع بالرسمة ،كلش عجبتني جناح طير واحد ولازمة جف ايد جرتها من ايدي جفون تشوفها
جفون : الله شگد حلووو

احذتها منها اكمل ضال بيها جم لمسه وتخلص كلش
جفون : شلون هيج ترسمين حلو ؟

_ اندري

ضحكت ودنگت تكمل رسمتها وانا طبگتها اخذها وياي من سمعت صوت ضيرم جاي ياخذني ما طب وضل واگفلي بالمطبخ لبست عباتي ومشيت وياه بساع بس طبيت شفت بصائر وريحانة واگفات بالمطبخ يسون عشه ،نزعت عباتي وگعدت اباوع عليهن بلايه ما اشارك

ريحانة : راح اخابر حمزة اگله ما يجيني لان كلش مابي حيل امشي

بصائر : أي احسن صيري زينه الا تمشين

ريحانة : أي

°كوكبة°

مشيت بقهر واحس بعضامي تصل علي من الضرب
يضربون بلايه رحمه چن بين أيدهم رجال مو مره وماتحمل هذا الضرب ،بس وين هم مختلفين بكلشي مبدلين گلبهم بحجارة و ولا چن انا بتهم چن جايبني من الشارع وفالي وفال بس خدمتهم. ...

گعدت بعتبة باب المطبخ وانا صافنه على السمه وحايره لا البي اسلمهم بيد الله ولا البي اتحمل بعد روحي جاي تطلع بكل مره يضربوني بيها

انداريت على صوت أمي وراي ما راضيه لان گاعده هنا والدنيا بارده صارت حنينه علي

گمت بلايه ما احجي شي وطبيت لغرفتي افكر بيني وبين روحي
_ هم يجي يوم ينعدلون ؟

لفيت راسي بالبطانية مأيسه ولا راح ينعدلون من وعيت على الدنيا وهاي هم هيج ناس ماعدهم مخافة الله ،ما أعرف انا شلون بتهم صلاة ما يصلون حتى هذا أبوي ما بيوم شفته ركع ل الله ،وهذا أكثر شي يخليني اغسل ايدي منهم

غفيت وانا احس بروحي مكسره تكسر وفزيت شايغة روحي على أثر دفرات بخاصرتي خلت روحي تشيغ صيحت اريدنه يرحم بي وما يضرب بعد بس هو هذا انگس واحد بيهم وكلش مشيوله من گلبه الرحمه

حسن : ليش ما غاسله هدووومي ،انااا شگلت گبل لا اطلعع

جريت روحي وانا الم الغطه علي وابجي بوجع ما منه وجع ،وجع ضرباته وهضمتي تگابلن علي وحيره على منو منهن ابجي

حسن : ادبسزز ما اعرفج عناااد ما غسلتهين ،اذا ما توبتج من عنادج هذا شوفي

دنگت رأسي ما اريدن احجي ويرد علي وانا مكان بجسمي ما ضل ما متلون من ضربهم ،من شافني ساكته خله وطلع وانا ساعات تجر ساعات گاعده أنوح وكل ما مر وكت وجع خاصرتي يزيد ،وهاي مو اول مره يضربني احس على يوم من كثر ضرباته توگف وحده من كلياتي

لنص الليل انا ضليت ما طالعة حتى عشه ما سويت وخليت امي تحير بي ،فوگاها اطلع اسويلهم زقنبوت

من حسيت بالبيت صار هدوء لبست حجابي وطلعت للباب الخلفي فتحته ومشيت للتانكي المخليه بي عباتي لبستها ومشيت

حاطه أيدي على گلبي وامشي،دنيا ظلمه وبس صوت الشصر بأذني وي صوت سعف النخل كل ساعه فازة وزادها علي صوت الططوه تصيح چن بصوتها تگلي
_ راح تنگلب حياتج من هل ساعة،الجاي أضرب
من العشتي .

باوعتلها واگفه على النخله تباوع علي ،دنگت ومشيت وگلبي يريد يطلع من مكانه ،شبيه هلگد خايفة وجن أول مره اطلع...! ! !

رفعت عباتي وعبرت الساگيه أتلفت رجلي تطگطگ من الخوف ،بس ما أعرف شني المخليني مكملة طريقي ،گعدت على حافة الشط واباوع على الگمرية
معكوسة وي ضل النخل من يتحركن

مديت رجلي بالماي احركها ،الماي بارد بس روحي
محترگه وكلشي صار محفور براسي ما جاي اگدر
لا انسه حجيهم ولا ضربهم ولا حتى قساوتهم
وياي شأنسه ،وحده ثنين ،جابوا عمرهم همهم بس الولد والبنيه لا شيء عدهم ،يحسوها عار عليهم يجوز

نزلت عباتي من چتافي ودنگت اخذ ماي من الشط اغسل وجهي احس نار گابه بي ،مسحت وجهي بالعباية ورفعتها حتى ألبسها بس بنفس الوكت فززني صوت وراي ،صوت زلمه قريب مني كلش وجن ملك الموت واگف وراي من سمعته
يسأل بنبره صوت خشنه خلتني اتراجف وأنا گاعده

_ مني أنت ؟! ...


شكرا لزيارتكم عالم روايات سكيرهوم

تعليقات