رواية خلخال مشوه الفصل السادس عشر 16 بقلم زمرده

 

 

رواية خلخال مشوه الفصل السادس عشر بقلم زمرده




والعطر يخنكني عكبك
والورد ما كمت اطيقة
تدري ما يعبر الليل
بلا جكارة ولا موسيقى

•---∞∞∞∞∞∞∞---•

°كوكبة°

_ مني أنت ؟!

هن حجايتين لو چن شلني ،لا البي اگومن ولا اضل گاعده واخذني الرجيف
صار سنين اگعد هنا بس ما يوم لاگيت أحد غير بس
ليث أخ غاية واضل اتختل بين الاشجار منا لمن اوصل للشاط وانا صارت عدي عادي ياما وياما أجيت بس ما يوم لاگيت احد بهذا المكان الاگعد بي

_ شني ماتحجين مني أنت وشچابج بگاعنه

بلعت ريگي وگمت مطيته گفاي تلثمت بعباتي وبس عيوني ضلت طالعة و سميت بسم الله وانداريت وانصدمت من شفت الگدامي نفسه ليث الجنت دوم اشوفنه واشرد

ليث : شني سالفتج وليش گاعده هنا

ذاك هو صوتي مبين مال وحده خايفة
_ كل سالفة ماعدي بس اجيت اشم هوه الله

ليث : وما لگيتي غير گيعان أل غضب

_ الاگرب الي جانت

ليث : انا اعرفج ،وسامع كلش زين هذا الصوت

_ شني شمعرفك بي

ليث : نزلي العباة من وجهج وانا اگلج أنت مني

ومن كل عقلي نزلت العباة وهو صفن بعيوني ودار وجهه بساع
ليث : بت ضاري أنت كوكبة

بلعت ريگي هذا ميمنة ياعرفني

رد اندار وبكل هدوء سألني
ليث : شعدج هنا بنص الليالي

_ ماعدي شي والله بس انا متعلمه كل ما ضاگت بي الدنيا اجي اگعد هنا

ليث : واهلج ما تخافين منهم

_ اصلا هم سبب جيتي لهنا

باوعلي مستغرب الاگولة
ليث : ليش

أبتسمت بوجع وچن كلمة الليش طاحت تيزاب على جروحي
_ اهلي موش أهل مثل خلگ الله اهلي كاسرين خاطري

بلايه ما يحجي طال النظر بعيوني وانا غصتي صارت تصعد وتنزل اريد اشكي عليهم حتى يم الغريب اريد ابجي يم ناس عدها رحمة
ينسكر خاطرهم لو طاحت دموعي مو مثل اهلي لو بچيت گالوا تتمضيگين

لا الغريب الانا اعرفه حجه ولا انا البعد فكيت حلگي وقررت ارد للبيت بس وگفني بمكاني من سمعته گال

ليث : ضلي قوية مثل اول مره شفتج بيها

انداريتله وانا اتسائل شوكت شافني هاي المره الأولى وشافني بيها مكسوره ،من شافني اباوعله دنگ
ليث : ردي يابت الناس لبيتكم لا تصيرلج طلابه

ماحجيت شي ومشيت اردن للجحيم الانا عايشة بي لمكان بي اندفنت طفولتي وشبابي وكل حلم من أحلامي تهدمت ببيت اوادمه وحوش يكرهون طاري البت وشحال لو صارت عدهم

لفيت عباتي وحطيتها بالتانكي وطبيت ومن سمعت صوت طگطگه بره كفيت رداناتي ومشيت اغسل مواعين العشه الضالت حتى لو فطنوا علي ماكو راح يلگوني بالمطبخ ولو ما يصدگون يخلصون مني وكلش ما اهمهم وين أنا عسى ما اموت بغرفتي ما يعرفون بي

كفيت المواعين ونضفت المطبخ ومشيت للغرفة بس طبيت گعدت بالگاع اعيد بشريط حياتي الما بي غير بس الضيم والضلايم

تمددت اباوع للسگف وجريت البطانية ادفي بيها روحي الماي بهذا الوكت مثل الگزاز وانا تبللت هدومي وتعاجزت ابدلهن وثاني يوم صبحت مريضه وراسي ما اشيلة من الفراش

گمت وانا احسن بالگاع صايرة مثل المنخل بي و بالگوه وصلت الباب وفتحته طلعت وانا اشوفهم كلهم هنا گاعدين من گلت صباح الخير محد رد علي وانا ما تفرق عدي ردوا لو لا مشيت للمطبخ بي ما بي سويتلي گلاص حليب وگعدت اشربه وانا اسمع صوت عرك الدجاج برة بس خلصت گمت حطيت الگلاص بالسنك وطلعت بره ما اريدن اطب اگعد يمهم وانا احس بروحي ثگل عليهم ضلتي هنا بره بهذا البرد ولا الگعده يمهم

انداريت على صوت امي وراي
نادية : گومي اعجني خبز ماضل عدنه

_ بس انا مريضة

نادية : جا شلون اذا مريضة تضل الوادم كلتلها الجوع

گمت مستهضمة وانا كل ضني لو گتلها مريضه راح ينكسر خاطرها علي بس امي حالها من حالهم گلبها من حجر وكل حس امومه ماعدها

گمت طلعتلي معچانه ومشيت گعدت يم الگنوية أنخل وانا بالگوات احرك ايدي ،وبس خلصت رديت للمطبخ طلعت جدرية ترستها ماي وحطيتها على النار اريدنه يدفه اعچن بي وبس جسته دافي شلت الجدر ونزلته بالگاع وگعدت اعچن وانا احس كل حيل مابي بس مجبوره لان لوما خبزتلهم تنقام القيامه علي وما راح يعدي هذا اليوم علي سلامات وكلش زين اعرف راح يگضوني گضيان

بس كملت عجين دثرته وبين ما يختمر مشيت عزلت البيت هاجمينه هجم بكل مكان مشورتلهم حاجة وانا مثل الخدامه الهم افتر حتى لو ميته مو مريضة

انداريت على صوت أبوي يحاجيني
ضاري : امشي مسحي شحاطتي اريدن اطلع

هديت من ايدي هدوم الخايس حسن التارسات الصاله ومشيت اخذت وصله وطلعت امسح بشحاطته وادردم عليهم

_ حاجة ما يعارفون يسونها بلياي ريتني اشوف بيكم بيوم

حطيتها بالگاع ورديت اشوفن العجين صفيت منه الماي ودثرته وضليت گاعده بصفه شگد ما تعلمت على الركض والخدمه صرت ابد ما اتقبل اضل
گاعده هل گعده وايدي على خدي حالي حال كل بنية مريضة

علموني حتى لو جنت مريضة ما اقبل بالراحة وصلوني مرحلة اشتري راحتي بالشغل حتى لا يمدون ايدهم علي

تنفست بقوة اريدن الهوه يطب ريتي احسن بروحي حيل مختنگة والهوه بريتي ما يمر مثل مايمر على خلگ الله

گمت مشيت للغرفة ،تمددت وانا اگولن لروحي
_ مريضة أنت لازم ترتاحين

وانا كلش زين اعرف جاي اضحك على روحي بهذا الحجي وبس تذكرت لازم اشعل التنور رديت طلعت لان بين ما يهفت ياخذله وكت

طلعت الحطب وكومته بالتنور ومن البطل البي نفط شوي رشيت على الخشبات وبس شمرت الشخاط اشتعلن وانا عفتهن ورديت للغرفة ،مددت اباوع على الساعة اطي ساعة ونص منا لبين ما يهفت

ضليت اصفن بالحياطين ،وبس خلص الوكت گمت شنگت وطلعت واخذت لوصله امسح التنور حتى خبزته تطلع نضيفه وبساع بلشت خبز ومشت بي بالساعة انا على هل وگفه حسيت الدنيا صارت تفتر بي وما صدگت شوكت اخلص واطب جوه

بس طبيت حطيت الصنينة المتروسة خبز حار على السنك وگعدت اريدن تستقر الگاع بي بس ما اطتني مجال ووگفت فوگ رأسي تگلي

نادية : شريهن لا يعورگن بساعج

گمت وانا خاوية روحي بس حيل للحجي ماعدي بس شلت الصينية انجبحت وطحت والخبز كله تطشر وانا من سمعت حسها وركضتها كل ضني اجت تگومني بس هي أمي سويت العكس وأجت غمتني

نادية : جيرة بگصتج هاي ما دبرتيها

بلعت ريگي وغصاتي وجروحي كلهن وگمت والمن الخبز وانا اسمعها تحجي علي وچن مشاعري مشاعر حايط مو بشر
نادية : غمة كل نفع مابيج المن ضاله على گلبي ما تتزوجين وافك

رفعت راسي ودموعي بعيني
_ جا شني عبالج الگعده حاليتلي يمكم ؟

نادية : جا ما تخلصينا

_ ما لگيت ابن الاوادم

نادية : انهجم بيتج مو يوميا يجونج

_ بس كلهم مثل خيستكم زواج ومن طرفكم ما اريدنه

خزرتني وأجت تمشي بساع جرتني من شعري كضيت ايدها بس اريدها تفكني وامي ماجنها امي جنها مرة أبو
نادية : الساقطة تگولين علينا خيسة

_ أي خيسة واكبر خيسة هم اخخخ شعررري

عطت من حسيت بخصلة من راسي انجرت ومن وخرت وباوعت صدگ شعري هذا والله تارس ايدها انضهمت هواي ودگيت ولطمت فرغت قهري بروحي
لان ما بأيدي شي عليها ،تخبلت وما عرفت بيا طريقة اضرب ييها نفسي واخلص من هالعيشة هاي عيشة زفرة وي ناس تصرفاتهم مو مال بشر

وما أعرف الشيطان شلون گدر يسطر علي ويخليني اخطي هل خطوه واجر السجين الجديده من الكاونتر واجرح بيها ايدي من الوريد والدم صار يتاطفر بكل مكان

طحت من طولي وانا كل ضني هاي اخر لحظات افتح ييها عيني وبعد راح اخلص ،غمضت وتشاهدت على روحي بس خابت كل امالي من فتحت عيوني ولگيت روحي بالمستشفى هنا بجيت وتخبلت

ليش ما متت

شعدي عايشة وانا يوميا احسن بروحي زايده عليهم وكل فايده ما الي بالحياة غير الشغل وبس انا شلي بهالدنيا وشني الشفته من سنيني الگضن ما أعرف شلون و وين ولمنو

رفعت ايدي اباوع عليها ورديت نزلتها من انفتح الباب وطبت أمي وبمكات ما تگول
_ الحمدلله ع السلامة

أمي گالت
نادية : ريتج لا گعدتي

باوعتلها وانا حسرات الدنيا كلها بگلبي شهل أم هاي عود هم الجنه جوه رچليلها

سدت الباب ووگفت گبالي
نادية : شگلتي لروحج من سويتي الرواية السوده هاي

بلعت ريگي وگتلها
_ اريدن اخلص منكم

نادية : ابوج دره ،شراح يخلصج منه

_ وشني يطگني خله يطگ انا من كثر طگاتكم صرت ماحسن بوجع

نادية : مأثرين عليج الهنود التباوعيلهم

درت وجهي لان الحجي وياها مايجيب غير بس القهر وانا قهر روحي كافي علي ولهناك ورفعت راسي على صوت دفرة الباب وچن متحزملي
حزام وگف گبالي وبالگوه كاض روحه مايطگ لان احنه بالمستشفى

ضاري : خل نرد للبيت وانا الج اريدن اشوف شعدج وتردين تنتحرين

باوعتله والخوف بگلبي انزرع هذا الما حسبت حسابة ما حسبت راح يشك بي ويغير بالسالفة مثل ما يريد

باوعتلها من گالت
نادية : جبيتها لروحج

أبتسمت وانا كل كلمة براسها خير ما محسبة اسمع منها وگف گلبي من شفت حسن طب متعنيلي تدنيت اضم روحي منه وانا كلش زين اعرف لو طحت بيده والله عظم صاحي بي مايضل
من ضرباته ... 


تعليقات