رواية في طريقنا الفصل السابع عشر 17 بقلم زياد محمد


 رواية في طريقنا الفصل السابع عشر 

‏بصيت لإيدها اللي ماسكة فيا، وبعدين قلت:

‏= هقولهم فكرتك. بس محتاجة أعرف إنتِ قلقانة من إيه غير أوضتك.

‏حرّكت رجلها تحت الكرسي.

‏= لما بصحى بالليل، بعرف أروحلك من غير ما أنوّر.

‏حطيت إيدي على شعرها.

‏= ولو بقينا في بيت تاني، هنتعلم مكان كل حاجة سوا. وهنروحه قبل ما نسكن فيه.

‏= وهاخد سريري؟

‏= لو ينفع نركّبه هناك، ناخده.

‏فكرت شوية.

‏= أنا بحب مالك. بس بحب بيتنا.

‏قرّبتها مني.

‏= عارفة يا حبيبتي. ينفع تحبيهم الاتنين.

‏مطلبتش منها تتحمس. قعدنا نكمّل الكتاب، ولما قامت تمسك إيدي، رجعت قالت:

‏= بس تقوليله موضوع السرّير.

‏= هقوله.

‏في البيت حكيت لماما وهي بتحط الغسيل مكانه. سمعتني، وبعدها قعدت على طرف السرير.

‏= وإنتِ عايزة تعملي إيه؟

‏= معرفش. بفكر فيكي إنتِ كمان. مش هقدر أبقى مطمنة وإنتِ لوحدك.

‏شدّت فوطة من اللي في إيدي.

‏= أنا عايزاكي قريبة. ولما أتعب أعرف ألاقيكي. بس البيت هنا أوضتين، وإنتوا محتاجين مكان ليكم.

‏بصيت للهدوم اللي بينا.

‏= وإنتِ مش هتوحشك قعدتنا؟

‏= هتوحشني. بس هتعملي إيه؟ هتفضلي مكانك عشان أنا هزعل شوية؟

‏عيني دمعت، فقرّبتني بإيديها.

‏= أنا كمان هتعود يا سلمى. ومش لازم أعرف أعمل ده كله من أول يوم.

‏مسحت وشي، وسألتها عن الأيام اللي ركبتها بتوجعها فيها ومبترضاش تقول.

‏= هنرتبها مع بعض. يوم الدكتور تفضلي تيجي معايا، وفايزة في أيامها. ولو احتجت أكتر هقولك، مش هفضل ساكتة لحد ما تتخانقي معايا عشان تعرفي.

‏ضحكت بخفة، وبعدها سألتها:

‏= وإنتِ نفسك إيه يفضل زي ما هو؟

‏بصتلي لحظة، وبعدين ابتسمت.

‏= فطار الجمعة. تيجوا تفطروا معايا، حتى لو هتكملوا يومكم في حتة تانية.

‏= ولو جيتلك بدري وإنتِ لسه نايمة؟

‏= تفتحي وتعملي الفطار.

‏ضحكت، وقعدت جنبها أطبّق باقي الغسيل. كلامها عن الجمعة خلاني أقدر أتخيل إن قعدتنا هتفضل موجودة، حتى لو مش كل ليلة.

‏كلمت مالك بالليل بعد ما وصل القاهرة. حكيتله سؤال جنى، وسكتّ وأنا مستنية ردّه.

‏سألني عن اللي قالته بعدها، فحكيت.

‏- طب يبقى مندوّرش بعيد عن مامتك. ونشوف حاجتها هتتنقل إزاي قبل ما نتكلم معاها في حاجات جديدة.

‏= وإنتَ؟ إحنا بنتكلم في حتة هتعيش فيها إنتَ كمان.

‏- عشان كده بقول نشوف. نحدد اللي نقدر عليه، وننزل إحنا الأول، وبعدها نوريهم المكان لو لقينا حاجة مناسبة.

‏فتحت النوت اللي جنب السرير. لأول مرة كنا بنكتب تفاصيل هنحتاج ننفذها؛ معاد سفره، الطريق للمدرسة، وماما لما تحتاجني بالليل.

‏لما خلصنا، كان فيه حاجات لسه محتاجة إجابة. سبتها مكتوبة، وقفلت وأنا عارفة هنبدأ منين.

‏خلال التلات أسابيع اللي بعدهم، نزلنا نشوف شقق في الشوارع القريبة. واحدة كانت فوق من غير أسانسير، والتانية إيجارها أكبر من قدرتنا.

‏كنت عايزة أقول موافقة على التانية لمجرد إنها عجبتني.

‏مالك فتح حساباتنا تاني. مصاريف القاهرة، ونصيبه الجديد في المكتب، والتزامي ناحية ماما وجنى. قعدنا نحسب لحد ما أنا قلت:

‏= لأ. مش هعرف أعيش وأنا مستنية أول حاجة تبوّظ الحساب ده.

‏قفل الموبايل.

‏- يبقى نكمّل تدوير.

‏في الشغل خلصت عرض الحملة الجديدة، وسلّمت دفعة تانية من رسومات الكتاب. والناشر بعت تجربة الغلاف، وعليها اسمي تحت اسم مؤلفة الكتاب. كنت تعبانة، لكن بقيت أعرف أقول لمالك إن عندي تسليم، وأستنى مكالمته تاني يوم من غير ما نعمل من ده زعل.

‏وترتيب مكتبه الجديد بدأ يتنفذ. بقى فيه أيام عارفين من قبلها إنه في القاهرة، وأيام يقدر يقعدها هنا.

‏آخر الأسبوع التالت لقينا شقة على بُعد عشر دقايق مشي من ماما. أوضتين وصالة، وفيها أسانسير. الإيجار مناسب، بس المطبخ محتاج إصلاحات.

‏راجعنا تكلفتها مع صاحبها، وبعدها مالك وقف عند شباك الصالة وسألني عن مكان مكتب رسوماتي.

‏= هنا السفرة ممكن تاخد المكان كله.

‏- نختار سفرة أصغر. إنتِ محتاجة تشتغلي في نور كويس.

‏= وإنتَ لما يبقى عندك شغل؟

‏- نقعد سوا، لو بتعرفي تركزي وأنا جنبك.

‏= حسب هتسكت ولا هتفضل تسأل.

‏ابتسم.

‏- أتعلم أسكت.

‏= مش هنختار السفرة على وعد إنتَ مش قدّه.

‏ضحك، وأنا بصيت للمكان تاني. كنت بتخيل حاجتي سايبة مكانها، مش بلمّها كل شوية عشان حد يعدّي.

‏رجعنا الجمعة مع ماما وجنى، قبل ما ندفع أو نمضي حاجة.

‏جنى وقفت في الأوضة الفاضية ماسكة إيدي.

‏= دي ممكن تبقى أوضتي؟

‏هزيت راسي. مالك فتح المتر وقال إن مقاس سريرها هيناسب الحيطة الطويلة.

‏بصتله.

‏= خالتو قالتلك؟

‏- قالتلي إنك عايزة سريرك ييجي.

‏هزت راسها، وبعدها سألت:

‏= وصورة ماما وبابا؟

‏= تختاري مكانها إنتِ.

‏شاورت جنب السرير، وهو علّم المكان في الورقة.

‏فضلت بتفرج عليه بيساعدها تختار مكان صورتهم. أول مرة أعرف أسكت، وأسيب تفصيلة تخصها تتظبط من غيري.

‏سألتني هنبقى فين، فورّيتها الأوضة التانية. رجعت لمكان سريرها وندهت عليا، ورديت عليها من جوه.

‏= هسيب الباب مفتوح بالليل.

‏= نسيبه مفتوح.

‏ماما نادتنا على قفل شباك مفكوك. مالك جرّبه، وكتبه وسط الإصلاحات اللي لازم تخلص قبل السكن.

‏وإحنا ماشيين، جنى طلبت نجرب الطريق لبيت تيتة. مشيت معاهم، ومالك فضل يراجع باقي التفاصيل مع صاحب الشقة.

‏عند باب بيتنا، جنى بصت وراها.

‏= طب ده مش بعيد. بس مش همشيه لوحدي.

‏= طبعا مش لوحدك.

‏ماما ضغطت على إيدي.

‏= أنا حبيت المكان.

‏ابتسمت. لسه كان فيه حاجات هنراجعها، لكننا بقينا بنتكلم عن نفس البيت.

‏في آخر اليوم، مالك جه يقعد معانا. جنى كانت جايبة البسكوت، وحطت قدامه تلات قطع.

‏- ده نصيبي؟

‏= آه.

‏مد إيده ياخد واحدة، فلحقت مسكتها.

‏= دي لتيتة.

‏رجّع إيده.

‏- طب والتانية؟

‏= ليا.

‏فضل باصص للتالتة، فزقّت الطبق ناحيته بمنتهى الكرم.

‏= دي ممكن تاخدها.

‏ضحكت لحد ما ماما بصتلي، وأنا مش عارفة أشرح لها سبب الضحك على وشه وهو بيقول شكرا.

‏بعد ما قاموا يجهزوا الشاي، مالك قرّب مني ورقة مطبقة.

‏= إيه دي؟

‏- حاجة كتبتها وإنتِ بتتكلمي مع صاحب الشقة.

‏فتحتها، وهو رجع بضهره للكنبة.

‏أنا كنت مستني أشوف البيت،
‏لقيتني ببص لوشّك فيه.
‏كل ما تقولي: هنا نقعد،
‏أنسى أنا جاي أسأل على إيه.

‏قريتها تاني، وبعدها رفعت عيني.

‏= إنتَ كنت بتكتب وأنا بسأل عن السباكة؟

‏ضحك.

‏- كنتِ بتضحكي وإنتِ بتتكلمي، وبتقولي هنا وهنا كأنك قعدتي خلاص. مقدرتش أبطل أبصلك.

‏نزلت عيني للورقة.

‏= كنت فرحانة.

‏- وأنا كمان. وبقالي كتير عايز أشوفك فرحانة بحاجة لينا.

‏سكتّ، والورقة بين صوابعي.

‏كان نفسي أقولّه إني كمان كنت بتخيله في المطبخ، وفي الأوضة التانية، وباسمع صوته وهو بينادي عليا.

‏قلتله بصوت واطي:

‏= كنت بحاول أبان عادية. بس أنا من ساعة ما خرجنا وأنا نفسي أرجع هناك معاك.

‏ملامحه هديت، وابتسامته فضلت.

‏- طب بصّيلي وإنتِ بتقوليها.

‏بصيتله، ووشي سخن. ضحكنا، ورجّعت الورقة في الشنطة قبل ما جنى ترجع وتطلب تعرف أنا مخبية إيه.

‏دخلت أوضتي وطلعتله ورقة من كشكولي. كنت راسماه من صورة الافتتاح، وسيباها في النص من يومين.

‏مسكها، وبصلي، ورجع بص للرسم.

‏- إنتِ رسمتيني؟

‏= كنت عايزة أعملك حاجة.

‏فضل ساكت، وأنا بدأت أشرح ليه الرسمة لسه مش متقفلة.

‏قاطعني وهو بيفرد أطراف الورقة على ركبته:

‏- ينفع آخدها كده؟

‏هزيت راسي. فضل يتفرج، وبعدين ضيّق عينه.

‏- هو أنا حواجبي كده؟

‏ضحكت.

‏= دي نظرتك وإنتَ بتراجع شغلي.

‏- طب ما ترسميني وأنا ببصلك دلوقتي.

‏بصيتله. حاولت أضحك، بس ابتسامتي هديت، وقلتله:

‏= دي محتاجة ورقة لوحدها.

‏ماما رجعت وهي شايلة الشاي، فعدلت قعدتي بسرعة. هو لف الورقة بحرص، وقام يساعدها.

‏فضلت أتابع الورقة وهو بيشيلها. حاجة مني هتبقى عنده في القاهرة، يشوفها لما يرفع عينه من الشغل. كنت عايزة كده، ومبسوطة إني قدرت أقوله من غير ما أرجع أخاف وأخبيها تاني.

‏قبل ما يحطها في جيبه، رجّعها لي وطلب أمضيها. كتبت اسمي تحت بخط صغير. ولما كتب تاريخ اليوم على ضهرها، قولتله إنها من يومين. رفع عينه وضحك، وقال إنه عايز يفتكر اليوم اللي أخدها مني فيه، مش اليوم اللي بدأت فيه الرسم.

‏تاني يوم داليا اتصلت.

‏كنت بجهز الغدا مع ماما، ففتحت وأنا واقفة جنب الحوض.

‏= باقي الفلوس وصلني يا سلمى. حبيت أقولّكم زي ما قولتلكم أول مرة إن ليا حق عنده.

‏إيدي سابت الفوطة.

‏= كل الباقي؟

‏= كله. وأنا اتأكدت قبل ما أكلمك.

‏شكرتها إنها قالتلي. ماما كانت واقفة قدامي، وأول ما قفلت سألتني، فحكيت.

‏قعدت على الكرسي، وأنا فضلت مكاني.

‏فلوس داليا رجعت. مكنش ده معناه إن السنين رجعت، لكنه عمل حاجة كان يقدر يفضل يأجلها.

‏بالليل اتصلت بيه. سألني إذا كانت داليا كلمتني، فقلت أيوه.

‏- أنا عارف إن ده كان لازم يتعمل من بدري.

‏= مبسوطة إنك عملته يا بابا.

‏سكت. وأنا لقيتني بحكيله عن الكتاب، وبعدها عن الشقة من غير ما أكون مجهزة أقول إيه.

‏سألني عن مالك، وعن أهله، وسمع لحد ما خلصت.

‏كنت هقوله ييجي معانا أول ما نحدد معاد، لكن لقيتني بقول إننا لسه بنرتب.

‏حسيت بصوته بيوطى، لكنه مقاطعنيش.

‏أنا كنت محتاجة وقت معاه. بس لقيتني كمان مأجلة إني أطلب منه حاجة، كأني لو احتجته تاني هنسى اللي زعلني.

‏قولتله أول ما نتفق هكلمه، وفضلت أسمعه وهو بيسألني عن مشوارنا وعن يومي.

‏قبل ما نقفل قال:

‏- لو احتجتي أجي معاكي أشوف حاجة، قولّي.

‏= هقولك.

‏الأسبوع اللي بعده قعدنا أنا ومالك مع بعض، وراجعنا اللي عرفناه عن الشقة. صاحبها وافق يصلّح حاجات، وحاجات اتحسبت علينا. بقينا عارفين المبلغ اللي محتاجينه قبل السكن، وإمتى ممكن المكان يجهز.

‏مالك قفل الورق، وسألني إذا كنت مستريحة نكمل في الاختيار ده.

‏كنت مستريحة. ولسه خايفة. بس الخوف مبقاش بيخليني أستنى حاجة تبوظ عشان أقول إني كان عندي حق.

‏= أنا عايزة أهلك ييجوا لنا.

‏إيده وقفت على الملف.

‏- إمتى؟

‏= الجمعة الجاية، لو يناسبهم.

‏فضل باصصلي، وأنا ابتسمت.

‏= أنا عايزانا نتخطب يا مالك.

‏أخد نفس طويل، وبص بعيد لحظة. لما رجعلي كان بيضحك، وعينيه محمرة.

‏- أنا هقول لماما دلوقتي.

‏= استنى لما أروح أقول لماما الأول.

‏- خلاص. بس أول ما تدخلي البيت كلّميني.

‏ضحكت، وهو مسك الموبايل، وبعدين حطه تاني، وسألني:

‏- إنتِ مبسوطة؟

‏هزيت راسي.

‏= مبسوطة. ومحتاجة لما أتوتر أفتكر القعدة دي.

‏- أفكّرك بيها.

‏في البيت ماما حضنتني قبل ما أكمل كلامي. وبعد ما اتفقنا على المعاد، سألتها إذا كانت مستريحة إن بابا يبقى موجود.

‏بصتلي، وبعدين قالت:

‏= أنا عايزاه هنا. المهم إنتِ عايزاه؟

‏هزيت راسي، ودخلت أوضتي أتصل.

‏رد وهو بيسألني إذا كنت محتاجة حاجة.

‏= مالك وأهله جايين الجمعة يا بابا. وأنا عايزاك إنتَ اللي تفتح لهم الباب.

‏سكت، فشدّيت على الموبايل.

‏- ينفع أجي بدري؟

‏دموعي نزلت، وأنا بقول أيوه.

‏- قوليلي محتاجين نعمل إيه قبل ما يجوا.

‏اتفقنا على الميعاد، وقبل ما نقفل ناديته.

‏= يا بابا... أنا لسه بزعل. بس مش عايزة تفضل كل حاجة حلوة تحصل وإنتَ بعيد.

‏سمعت صوته بيتغيّر.

‏- أنا هبقى عندكم يا بنتي.

‏الجمعة جه قبل المعاد بساعتين.

‏فتحتله وأنا بلمّ شعري، فرفع إيده وضحك:

‏- ادخلي إنتِ جهّزي. أنا ومامتك هنشوف الباقي.

‏دخلت، وبعد شوية سمعت جنى بتشرحله مكان الكراسي عشان تفضل شايفة مالك.

‏ولما خرجت، لقيته واقف قدام المراية بيظبط ياقة قميصه بإيد مش عارفة تستقر.

‏قربت وعدّلتها له.

‏بصلي من المراية، وبعدها لف ناحيتي.

‏- طالعة حلوة يا سلمى.

‏حطيت إيدي على إيده، وفضلنا كده ثانية. بعدها ماما نادتني، وبابا راح يكمّل معاها.

‏الجرس رن في المعاد.

‏جنى سبقتنا، لكنها وقفت تستنى. بابا فتح، وأنا شفته بيسلّم على مالك وأهله ويدخّلهم.

‏مالك كان ماسك ورد، وعينه بتدور لحد ما شافني.

‏ابتسم، وأنا ابتسمتله من غير ما أحاول أخبي فرحتي.

‏قعدنا.

‏قبل الكلام الرسمي، بابا سألني إذا كان ينفع يوريهم غلاف الكتاب. وافقت، وأنا بلحق أقول إنه لسه تجربة.

‏مد الموبايل لمامت مالك، وقال إن الرسومات شغلي.

‏سألتني هينزل إمتى، ففتحت الرسومات وبدأت أحكيلها. بابا فضل سامعني، وكل ما كانت تسأل عن تفصيلة، يبصلي ويسيبني أجاوب.

‏وأنا بمد إيدي آخد الموبايل، شاور على اسمي.

‏- أنا مستني أمسكه بإيدي وأشوف ده مطبوع.

‏ابتسمتله. كنت داخلة القعدة متوترة من الكلام عن الجواز، ولقيت نفسي بحكي عن شغلي، وبابا قاعد يسمعني وهو مبسوط بيا.

‏ولما باباه بدأ يطلب إيدي، حسيت إني عايزة أسمع الجملة تاني.

‏بابا بصلي.

‏- رأيك إيه يا سلمى؟

‏كنت قلتها لمالك، ولماما، وحتى لنفسي وأنا بتجهز.

‏بس المرة دي رديت وأنا ببص لمالك قدامهم كلهم:

‏= أنا موافقة يا بابا.

‏مالك وطّى راسه لحظة، وبعدها رجعلي وعينيه بتضحك.

‏باباه مد إيده لبابا وقال:

‏- نقرا الفاتحة؟

‏

Ghazal
Ghazal
تعليقات