رواية مابيني وبينه قدر الفصل السابع عشر 17 بقلم رقية الأنصاري

 

 

 


رواية مابيني وبينه قدر الفصل السابع عشر بقلم رقية الأنصاري


فضلت أحلام قاعدة مكانها على الأرض بعد ما يوسف خرج، ضامة رجليها لصدرها، ودموعها بتنزل كل شوية مهما حاولت تمسحها.

هي كانت عارفة إن عنده شغل.

وعارفة إن اللي حصل جه فجأة ومش بإيده.

وزعلها من السفرية نفسها مكانش بالشكل اللي هو فهمه أصلًا.

هي آه اتضايقت.

طبيعي تتضايق وهي من الصبح بتجهز الشنط، ومستنية اليوم ده، وفرحانة إنهم أخيرًا هياخدوا كام يوم بعيد عن الشغل والدوشة وكل حاجة.

بس هي أصلًا ملحقتش تعترض.

ملحقتش تقوله سيب شغلك.

ولا قالتله إن لازم يسافر غصب عنه.

هي كانت لسه بتتكلم معاه حرفيًا.

لسه بتقوله إنهم مجهزين كل حاجة، ولسه هتسأله إذا كان في حل أو ممكن يأجلوا كام ساعة بدل ما يلغوا، وفجأة لقت صوته بيعلى في وشها، وكلام “النكد” و”تكبير المواضيع” بيتقال لها كأنها واقفة بتزن عليه من ساعة.

مسحت دموعها بظهر إيدها وهي باصة للباب اللي خرج منه.

_ أنا أصلًا مكنتش لسه لحقت أقولك حاجة يا يوسف…

قالتها بصوت مخنوق، وبعدها دموعها نزلت أكتر.

اللي وجعها طريقته.

إنه بدل ما يسمعها دقيقة، هب في وشها كأنها جت تزوده حمل فوق اللي عليه.

وبعدها أخد مفاتيحه ومشي.

بصت للشنط اللي كانت مجهزاها جنب الكنبة.

من ساعتين كانت بتبص لهم وتبتسم.

دلوقتي حتى منظرهم كان بيخنقها.

قامت بعد وقت بالعافية، ودخلت الأوضة.

رمت نفسها على السرير زي ما هي، ولفت الغطا حواليها.

فضلت عينيها مفتوحة شوية وهي باصة قدامها من غير ما تشوف حاجة فعلًا.

كل مرة تحاول تقنع نفسها إنه كان مضغوط، يرجع في ودنها صوته وهو بيقول لها بلاش نكد.

فتعيط من جديد.

لحد ما التعب غلبها في الآخر، ونامت وهي متكورة على نفسها، وملامح الزعل لسه واضحة على وشها.

•••••••••••••••••••••••••••••••••••••••••••

الوقت كان عدى نص الليل لما باب الشقة اتفتح بهدوء.

يوسف دخل وقفل وراه من غير صوت تقريبًا.

كان شكله لوحده كفاية يقول إن اليوم طحنه.

حط مفاتيحه على التربيزة، ووقف لحظة في الصالة.

عينه راحت تلقائي على الشنط.

لسه مكانهم.

مقفولين.

متجهزين.

فضل باصلهم ثواني، وبعدها طلع نفس طويل وهو بيمرر إيده على وشه.

دخل الأوضة بخطوات هادية.

أول ما فتح الباب، وقف.

أحلام كانت نايمة على جنبها، ضامة الغطا حواليها، ورجليها مضمومين ناحية بطنها كأنها بتحاول تصغر نفسها جوه السرير.

قرب منها.

كل ما قرب، آثار العياط بانت أكتر.

يوسف حس بوخزة ضيق في صدره.

قعد على طرف السرير جنبها، وفضل باصص لها كام ثانية.

رفع إيده بهدوء، ولم خصلة شعر كانت داخلة على وشها، وحطها ورا ودنها.

مرر كف إيده على شعرها ببطء، وبعدها مال عليها وباسها.

أحلام فتحت عينيها فجأة واتخضت من وجود حد قريب منها، فرجعت بجسمها سنة وهي باصاله بـ فزع.

يوسف رجع لورا شوية وقال بسرعة:

_ في إيه يا بنتي إنتي شفتي عفريت؟ أنا يوسف اهدي.

أحلام خدت نفس وهي بتحاول تستوعب.

_ إنت جيت إمتى؟

يوسف رد بصوت واطي من التعب:

_ لسه داخل دلوقتي.

أحلام أول ما استوعبت إنه هو، وافتكرت اللي حصل، ملامحها اتقفلت.

بعدت الغطا عنها وقامت بسرعة من السرير.

يوسف مد إيده ومسكها من معصمها قبل ما تقوم.

_ رايحة فين؟

أحلام بصت لإيده، وبعدها بصتله بزعل.

_ عايز مني إيه؟

يوسف فضل ماسكها بخفة.

_ رايحة فين بس؟

أحلام حاولت تسحب إيدها.

_ مش رايحة في حتة سيبني في حالي.

يوسف قرب سنة.

_ طب استني بس أنا عايز أتكلم معاكي.

أحلام هزت راسها بسرعة.

_ وأنا مش عايزة أتكلم في حاجة ومش عايزة أتكلم معاك دلوقتي أصلًا سيبني.

حاولت تقوم تاني.

يوسف جذبها ناحيته بهدوء لحد ما رجعت قعدت على السرير.
 
قرب عليها وحاوطها بجسمه كله ، مانعها تقوم.

أحلام لقت نفسها محاصرة بينه وبين ظهر السرير، ووشه قريب جدًا من وشها، ونَفَسه هادي بس تقيل من التعب.

رفعت عينيها له بغيظ.

_ يوسف بجد ابعد عني أنا مش ناقصة رخامة.

يوسف ما اتحركش.

فضل قريب منها، وصوته وطي جدًا.

_ أنا آسف.

أحلام سكتت.

واضح إنها مكانتش مستنية أول كلمة منه تبقى كده.

يوسف فضل باصصلها، وصوته خرج هادي ومجهد:

_ والله أنا آسف يا أحلام… أنا كنت راجع مضغوط بطريقة بشعة واليوم كله كان فوق بعضه والتسليم جه فوق دماغي فجأة، والموقع كان ملخبط وأنا أصلًا داخل البيت مصدع ومتنرفز من قبل ما أسمع منك كلمة.

عينيها بدأت تلمع تاني.

يوسف كمل:

_ وإنتي لما اتكلمتي أنا سمعت كلامك كإنه ضغط زيادة عليا من غير ما أديكي فرصة أصلًا تكملي اللي عايزة تقوليه.

أحلام دمعتها نزلت.

_ ما أنا فعلًا كنت لسه بتكلم معاك يا يوسف… أنا مكنتش عملتلك حاجة عشان تهب في وشي كده.

يوسف نزل عينه لحظة.

أحلام كملت بصوت بدأ يهتز:

_ أنا مكنتش بقولك سيب شغلك وتعالى سافر بالعافية ومكنتش بعملك مشكلة عشان السفرية هتتأجل أنا آه اتضايقت عشان طبيعي أتضايق وأنا من الصبح مجهزة وفرحانة بس أنا ملحقتش أصلًا أقولك أنا زعلانة من إيه.

مسحت دمعتها بسرعة.

_ إنت اللي فجأة صوتك علي وقولتلي بلاش نكد وبلاش تكبير مواضيع… طب أنا نكدت عليك إمتى؟ أنا كنت لسه بسألك.

يوسف رفع إيده ولم خصلة شعر نازلة على خدها، وبعدها مسح دمعتها بإبهامه براحة.

_ معاكي حق… وإنتي فعلًا ملحقتيش تقولي حاجة وأنا اللي اتعصبت عليكي.

أحلام بصتله بعتاب.

_ انا أكتر حاجة وجعتني إنك مشيت…يعني حتى بعد ما زعقتلي خدت مفاتيحك ومشيت قبل ما أقولك أنا أصلًا كنت عايزة أقول إيه.

يوسف قرب منها أكتر.

_ عشان كان لازم أنزل فعلًا بس أنا عارف ان كان ممكن أرجع وأقولك إني اتعصبت ومقصدتش… بس أنا كنت متعصب وغبي وخرجت قبل ما أفكر.

يوسف قرب وباس خدها.

أحلام لفت وشها سنة، ولسه زعلانة.

يوسف باس الخد التاني، وقال بصوت واطي:

_ حقك عليا يا حبيبتي… والله حقك عليا أنا ما كانش قصدي أخليكي تحسي إن زعلك مش مهم ولا إنك حمل زيادة على يومي.

_ ما هو ده بالظبط اللي حسستني بيه وبعدين جاي بعد ما عيطت ونمت وانا مخنوقه تقولي حقك عليا.

يوسف ابتسم بخفة.

_ ما أنا عارف إني جيت متأخر وعارف كمان إنك مش هتديني البراءة بسهولة فخدي حقك براحتك.

أحلام بصتله، وسكتت.

فضلوا ساكتين شوية.

إيده لسه ماسكة إيدها.

وبعدين يوسف قال بنبرة أهدى:

_ وعلى فكرة… السفرية مش هتتلغي.

أحلام رفعت عينيها له باستغراب.

_ إزاي؟ 

يوسف ابتسم وهو بيلف خصلة من شعرها حوالين صباعه.

_ وأنا فعلًا لازم أكون هناك الصبح وهروح من بدري جدًا وأسلم بنفسي وإن شاء الله قبل الضهر هكون مخلص وراجع هنا عندك.

أحلام فضلت باصاله.

يوسف كمل:

_ وبعدها ناخد الشنط ونمشي…بدل ما كنا هنسافر من الصبح هنتأخر كام ساعة بس لكن مش هنلغي حاجة.

عينيها لمعت بالفرحة رغم إنها حاولت تخبي.

_ بجد يا يوسف؟

_ بجد يا قلب يوسف.

وبعدين قرب منها أكتر.

_ هاخد أسبوع كامل إجازة ميرنش فيه تليفون واحد عشان خاطر عيونك.

أحلام ضحكت وسط دموعها.

_ إنت بتقول كده دلوقتي وأنا عارفاك تاني يوم هتقوللي بس أشوف رسالة واحدة.

يوسف ضحك.

_ خلاص اعمليلي رقابة وأنا موافق…المهم إن الأسبوع ده يبقى لينا إحنا.

أحلام بصتله بحنان.

_ أنا مش محتاجة تعمل كل ده عشان تراضيني على فكرة.

يوسف هز راسه.

_ عارف وأنا مش بعمله رشوة أنا أصلًا كنت عايز أسافر معاكي.

سكت لحظة، وبعدين قال:

_ عشان أنا كمان محتاج الأسبوع ده معاكي أكتر ما إنتي متخيلة.

الجملة هدت حاجة كبيرة جواها.

فضلت باصاله كام ثانية.

وبعدين قربت منه من غير ما تقول حاجة، ودخلت في حضنه.

يوسف حاوطها فورًا، وشدها ناحيته جامد لدرجة إنها اختفت تقريبًا جواه.

أحلام لفت إيديها حوالين ضهره، ودفنت وشها عند رقبته.

يوسف ضمها أكتر، وحط دقنه فوق راسها.

_ خلاص بقى متزعليش.

أحلام قالت وهي في حضنه بصوت واطي:

_ أنا مش بحب أكون زعلانة منك أصلًا بحس الدنيا كلها تقيلة لما إحنا بنكون مش كويسين.

يوسف باس شعرها.

_ وأنا البيت كله بيبقى ضيق عليا لما تكوني زعلانة مني حتى لو إنتي قدامي.

فضلوا ساكتين لحظات.

أحلام كانت سامعة دقات قلبه تحت ودنها، وإيده بتتحرك على ضهرها براحة.

ووسط الهدوء ده، ومن غير ما ترتب الكلمة أو تفكر فيها، خرجت منها ببساطة:

_ أنا بحبك أوي يا يوسف.

إيد يوسف وقفت مكانها.

أحلام نفسها استوعبت اللي قالته بعد ما خرج.

وشها سخن فجأة، وحاولت تدفن وشها أكتر في صدره.

يوسف بعدها عنه سنة صغيرة، بس فضل محاوط وسطها بإيديه، وبصلها كأنه مش مصدق إنه سمع صح.

_ إنتي قلتي إيه؟

أحلام ضحكت بكسوف، وضربته بخفة على كتفه.

_ خلاص اسكت انت سمعت.

يوسف عينيه وسعت بفرحة.

_ بالله عليكي يا شيخة قوليها تاني…إنتي عارفة أنا مستني أسمعها منك بقالي قد إيه؟

أحلام رفعت حاجبها بدلع.

_ وأنا مالي؟ كنت استنى أكتر ما إنت خلتني أستنى كتير لحد ما حضرتك اكتشفت إنك بتحبني.

يوسف قرب منها سنة.

_ طب اعتبريها تعويضات عن التأخير وقوليها مرة كمان.

أحلام هزت راسها وهي بتضحك.

_ لأ خلاص دي كانت مرة واحدة وطلعت مني من غير تخطيط ومش هنعرف نكررها بنفس الجودة.

يوسف ضحك من قلبه.

_ يا سلام؟

أحلام زقته في صدره وهي بتضحك.

_ اه.

يوسف قرب جبينه من جبينها.

_ أنا حاسس إن قلبي عايز يسمعها تاني ويتأكد.

أحلام حاولت تمنع ابتسامتها، لكن الفرحة اللي في عينه خلتها تفشل.

رفعت إيديها وحاوطت وشه بين كفوفها.

يوسف سكت فورًا.

أحلام بدأت تمشي صوابعها براحة على ملامحه.

فضلت باصاله ثواني، وبعدها قالت بصوت أهدى:

_ بحبك… وبموت فيك يا يوسف.

ابتسامته هديت، وعينيه ثبتت عليها.

أحلام كملت وهي بتمرر صباعها على خده:

_ وبزعل منك أوي عشان إنت بتفرق معايا وأي كلمة منك بتوجعني أكتر من أي حد تاني… بس مهما أزعل منك مقدرش أفضل بعيدة عنك.

سكتت لحظة، وبعدين ابتسمت بكسوف:

_ بس كفاية عليك كده عشان متتغرش.

يوسف ضحك فجأة وسحبها لحضنه بقوة.

_ وأنا بعشقك يا قلب يوسف… ومستني الكلمة دي منك من يوم ما أنا قولتهالك.

أحلام ضحكت وهي مخبية وشها في صدره.

فضلوا شوية في حضن بعض، لحد ما هديوا.

بعد وقت، يوسف قام غير هدومه ورجع، واتمدد جنبها.

مد دراعه لها من غير ما يقول حاجة.

أحلام قربت تلقائي، وحطت راسها على صدره.

يوسف حاوطها، وباس راسها.

_ تصبحي على خير.

أحلام غمضت عينيها وهي مبتسمة.

_ وإنت من أهله… ونام عشان لو اتأخرت بكرة أنا اللي هزعقلك المرة دي.

يوسف ضحك بصوت واطي.

_ أنا مستعد أستحمل منك أي زعيق بعد كلمة بحبك دي.

أحلام خبطته في صدره.

_ نام يا يوسف.

يوسف شدها له أكتر.

وبعد وقت قليل، كانوا الاتنين ناموا.

•••••••••••••••••••••••••••••••••••••••••••

تاني يوم، قبل الضهر بشوية، كانت أحلام جاهزة من بدري.

كانت قاعدة على الكنبة، ماسكة الموبايل، وكل شوية تفتح آخر رسالة منه وتقفلها.

“خلصنا ياحبيبتي ربع ساعة وأكون عندك.”

عدت أكتر من ربع ساعة بشوية.

بصت للساعة.

وبعدين بصت للباب.

وفي نفس اللحظة تقريبًا، سمعت صوت المفتاح.

قامت بسرعة، وقبل ما يوسف يفتح الباب كامل كانت هي واقفة قدامه.

دخل وهو لسه لابس هدوم الشغل، وشكله عليه أثر تعب الصبح، لكن ابتسامته ظهرت أول ما شافها.

أحلام ما استنتش كلمة.

قربت منه بسرعة وحضنته.

يوسف اتفاجئ ثانية، وبعدها ضحك وحاوطها بإيديه، وباس راسها.

_ الله… الاستقبال ده لو كنت أعرفه كنت خلصت من بدري.

أحلام فضلت حاضناه وهي مبتسمة.

_ حمد لله على السلامة، أنا من ساعة ما بعتلي إنك قربت وأنا مستنية صوت المفتاح.

يوسف بعدها عنه سنة صغيرة، وبص وراها ناحية الشنط.

_ واضح إن حضرتك جاهزة ومستنياني من ساعة.

أحلام رفعت دقنها بثقة.

_ فل الفل وعشره على عشره والشنط اتقفلت من بدري وكل حاجة متراجعة، ومش ناقص غير سيادتك تغير هدومك بدل ما إحنا واقفين نضيع الوقت.

يوسف ضحك، ومد إيده يربت على شعرها بحب.

_ طب اهدي يا مستعجلة خمس دقايق بالظبط وهتلاقيني لابس ونزلنا.

أحلام ابتسمت بفرحة واضحة.

_ ماشي بس أنا هحسبهم عليك فعلًا.

يوسف وهو داخل الأوضة بص لها.

_ ما أنا عارف إنك بتحاسبي بالدقيقة لما الموضوع يبقى على مزاجك.

أحلام ضحكت.

_ يلا يا يوسف أول دقيقة عدت وإنت واقف ترغي.

بعد حوالي خمس دقايق فعلًا خرج، لابس هدوم خروج مريحة ومفاتيح العربية في إيده.

أحلام بصت للساعة.

_ خمس دقايق ونص مقبولة مش هعمل مشكلة على النص دقيقة.

يوسف مد إيده ياخد شنطتها.

_ كتر خيرك على التسامح.

أحلام ضحكت.

_  متتعودش ده عشان أنا رايقة بس.

يوسف قرب منها سنة، وبصلها بنظرة دافية.

_ وأنا ناوي أفضل مخليكي رايقة كده طول الأسبوع.

أحلام ابتسمت.

_ هنشوف يا أستاذ.

يوسف فتح لها الباب.

_ اتفضلي يا مدام يوسف، بدأت السفرية رسميا.

•••••••••••••••••••••••••••••••••••••••••••

عدى يومين.

وفي الصعيد، آسر كان قاعد قدام عبدالله، مستنيه يخلص مكالمة.

عبدالله قفل الموبايل، وبصله.

_ مالك بقالك عشر دقايق قاعد قدامي ساكت؟ في حاجة عايز تقولها؟

آسر أخد نفس.

_ آه يا بابا… في موضوع عايز أكلمك فيه.

عبدالله عدل قعدته.

_ قول.

آسر سكت ثانية، وبعدها قالها من غير لف كتير:

_ أنا عايز أتقدم لميرال.

عبدالله فضل باصله لحظة.

وبعدين رفع حاجبه.

_ ميرال بنت عمك؟

آسر ابتسم بتوتر.

_ هو في ميرال غيرها.

عبدالله ضحك.

_ ما أنا بس بستوعب.

آسر قرب بجسمه شوية.

_ أنا بقالي فترة بفكر في الموضوع واتكلمت مع عمي أحمد، وميرال عارفة وهي موافقة إن الموضوع يبقى رسمي.

عبدالله بصله باستغراب.

_ وإنت كلمت أحمد قبلي؟

آسر هز راسه.

_ آه عشان أنا حسيت إن قبل ما أقول لحد لازم أعرف موقف ميرال وموقف أبوها..ومكنتش عايز أفرحك بحاجة وهي أصلًا مش موافقة عليها.

عبدالله سكت شوية، وبعدها ملامحه هديت.

_ طب ده كلام عدل…بس برضو كان يبقى احسن اني أعرف من ابني بدري شوية مش بعد ما نص الموضوع يخلص.

آسر ابتسم.

_ حقك عليا والله بس أنا كنت عايز أجيلك وأنا عارف إني داخل في حاجة جد.

عبدالله فضل باصله كام ثانية.

وبعدين ابتسم.

_ وإنت متأكد من قرارك؟

آسر رد من غير تردد:

_ جدًا.

عبدالله هز راسه.

_ خلاص ما دام إنت متأكد وهي موافقة وأحمد عارف أنا معنديش كلام…دي بنت أخويا وإحنا عارفين أصلها وتربيتها من قبل ما نفكر أصلًا في أي حاجة.

ابتسامة آسر ظهرت غصب عنه.

عبدالله أخد باله.

_ أخيرًا وشك بان عليه إنك فرحان.

آسر ضحك.

_ ما أنا كنت مستني أعرف رأيك.

عبدالله مد إيده وربت على كتفه.

_ رأيي إنك لو داخل الباب ده تدخل جد وتحافظ عليها…ميرال مش بنت غريبة دي بنت عمك وإنتوا متربيين مع بعض.

آسر هز راسه.

_ عارف يا بابا.

عبدالله ابتسم.

_ طب بكرة نقعد مع احمد ونفتح الكلام رسمي وبعدها نتكلم مع أبويا ونرتب اليوم.

آسر أخد نفس براحة.

_ تمام.

عبدالله بصله وهو بيضحك.

_ وبعدين تعالى هنا…  انت ازاي ساكت على حاجة زي دي؟ أنا واضح إني بقيت آخر واحد يعرف أخبارك.

آسر ضحك.

_ خلاص المرة الجاية هبعتلك بيان رسمي.

عبدالله ضربه بخفة على كتفه.

_ قوم من وشي قبل ما أغير رأيي.

••••••••••••••••••••••••••••••••••••••••••••••

في الناحية التانية من البيت، ميرال كانت قاعدة مع زينب في المطبخ بعد ما الكل هدي.

زينب كانت بتحط حاجات في التلاجة، وميرال واقفة وراها بقالها شويه.

زينب خدت بالها في الآخر.

لفت لها.

_ يابت انتي وقفالي كده ليه؟ عايزه حاجه؟

ميرال ابتسمت بتوتر.

_ ماما… عندي حاجة عايزة أقولك عليها.

زينب قفلت باب التلاجة، وبصت لها كامل.

_ خير يا حبيبتي قولي.

ميرال نزلت عينها، وبعدها قالت بسرعة:

_ آسر كلم بابا وعايز يتقدملي.

زينب سكتت.

ميرال رفعت عينيها لها ببطء.

لقيت ملامح أمها اتغيرت بين الصدمة والفرحة.

_ آسر؟

ميرال ابتسمت بكسوف.

_ آه يا ماما.

زينب قربت منها بسرعة.

_ وإنتي؟ إنتي مبسوطة؟

هزت راسها بخفة.

_ أنا متوترة أوي..ولسه في حاجات جوايا مضايقاني منه، بس… آه مبسوطة.

زينب حاوطت وشها بإيديها، وبعدها ضمتها لحضنها.

_ يا قلب أمك… ربنا يكتبلك الخير ويسعدك ويطمن قلبك.

ميرال حضنتها بقوة.

زينب باست راسها.

_ إنتي ليه مخبية عليا لحد دلوقتي؟

ميرال بعدها عنها سنة.

_ مكنتش عايزة أقولك قبل ما أعرف أنا نفسي عايزة إيه وبابا قعد معايا واتكلمنا..وأنا وافقت إن الموضوع ياخد خطوة رسمية.

زينب ابتسمت.

_ وأنا مش هسألك غير عن راحتك…طول ما إنتي مرتاحة وموافقة من قلبك أنا مبسوطة.

•••••••••••••••••••••••••••••••••••••••••••

أحلام كانت قاعدة في بلكونة الفندق، رجليها مرفوعين على الكرسي اللي قدامها، وكوباية عصير بارد في إيدها.

يوسف كان جوه بياخد شاور بعد ما رجعوا من بره.

موبايلها رن.

أول ما شافت اسم ميرال، فتحت الفيديو بسرعة.

_ يا قلب أحلام عاملة إيه؟ أنا كنت لسه هكلمك.

ميرال ظهرت قدامها بابتسامة مختلفة خلت أحلام تعقد حواجبها فورًا.

_ مالك؟ الابتسامة دي اكيد وراها حاجه قولي بسرعه.

ميرال ضحكت بكسوف.

_ إنتي ليه مستعجلة كده؟ طب قوليلي بس السفريه أخبارها ايه.

أحلام قربت وشها من الشاشة.

_ السفرية بخير وأنا بخير إنما إنتي وشك عامل زي واحدة مخبية خبر فقولي آسر عمل إيه؟

ميرال فتحت عينيها.

_ إنتي عرفتي منين إنه آسر أصلًا؟

أحلام ضحكت.

_  عشان باين على وشك وانا عرفاكي.

ميرال ضحكت أكتر، وبعدها خدت نفس.

_ آسر اتقدملي يا أحلام.

أحلام قامت من الكرسي مرة واحدة.

_ بجد؟ بجد والله يا ميرال؟!

ميرال انفجرت ضحك من رد فعلها.

_ آه والله بجد كلم بابا وأنا قلت لماما النهارده وآسر كلم عمي عبدالله، وخلاص هيبدأوا يرتبوا الموضوع رسمي.

أحلام كانت فرحتها واضحة جدًا.

_ يا حبيبتي! أنا مبسوطة أوي ليكي والله كنت مستنية اليوم اللي تيجي تقوليلي فيه كده.

ميرال ضحكت بكسوف.

_ أنا لسه متوترة أوي.

أحلام هزت راسها.

_ طبيعي بس أنا فرحانة إن الخطوة دي جت منكوا بعد ما اتكلمتوا وفهمتوا بعض مش استعجال وخلاص.

ميرال قربت من الشاشة.

_ المهم مفيش خطوبة وإنتي مش موجودة.

أحلام رفعت حاجبها.

_ إنتي بتهزري؟ أنا لو أسيب السفرية دلوقتي وأرجعلك هرجع.

في اللحظة دي يوسف خرج من جوه، بينشف شعره بالفوطة.

بص لأحلام وهي واقفة مبسوطة.

_ في إيه؟ مالك سعيده اوي كده ليه يختي؟

أحلام لفت الشاشة ناحيته.

_ تعالى سلم على العروسة.

يوسف وقف مكانه.

_ عروسة مين؟

ميرال ضحكت من الموبايل.

_ أنا يا يوسف آسر اتقدملي.

ابتسامة يوسف وسعت فورًا، وقرب من الشاشة.

_ والله؟ ألف مبروك يا ميرو ربنا يتمملكم على خير ويفرح قلبكم.

ميرال ابتسمت.

_ الله يبارك فيك بس أنا عايزاكم هنا.

يوسف بص لأحلام.

_ إحنا تحت أمرك قولي اليوم وإحنا هنظبط نفسنا.

أحلام قالت بسرعة:

_ إحنا هننزل قبلها بيوم أصلًا أنا لازم أبقى معاها في التحضيرات.

ميرال ابتسامتها وسعت.

_ بالظبط كده.

فضلوا يتكلموا شوية، وبعدها قفلوا.

أحلام فضلت باصة للموبايل بابتسامة كبيرة.

يوسف قرب منها وباس راسها.

_ مبسوطة؟

أحلام هزت راسها.

_ جدًا حاسة إنها أخيرًا بدأت تطمن.

يوسف ابتسم.

_ ربنا يفرحهم ويهدي آسر.

أحلام ضحكت.

_ سيب الولد في حاله إنتوا كلكوا فجأة بقيتوا أوصياء عليه.

يوسف حاوط خصرها بخفة.

_ وأنا مالي أنا راجل مسالم قاعد مع مراتي ومليش دعوة بحد.

أحلام بصتله بمشاكسة.

_ آه واضح جدًا.

•••••••••••••••••••••••••••••••••••••••••••

قبل الخطوبة بيوم، يوسف وأحلام وصلوا الصعيد.

من أول ما دخلوا البيت كان واضح إن زينب أخدت الموضوع على قلبها جدًا.

 زينة بتتعلق في الجنينة.

ورد على الترابيزات.

لمبات صغيرة على السور.

وزينب نفسها ماشية في البيت من مكان لمكان وهي بتراجع كل تفصيلة.

أحلام أول ما دخلت، ميرال نزلت من فوق بسرعة وجريت عليها.

_ أخيرًا جيتي! والله كنت هتجنن لو اتأخرتي ساعة كمان.

حضنتها بقوة.

أحلام ضحكت وهي محاوطاها.

_ يا بت إحنا جايين قبل الخطوبة بيوم كامل عايزه ايه تاني؟

ميرال بعدها عنها ومسكِت إيدها.

_ تعالي فوق بسرعة أنا عندي تلات فساتين وماما كل شوية تغير رأيها وأنا خلاص مش عارفة ألبس إيه.

من بعيد، زينب سمعتها.

_ أنا اللي بغير رأيي؟ إنتي اللي كل ما أقولك ده حلو تقوليلي التاني احلى!

أحلام انفجرت ضحك.

_ واضح إن البيت محتاج حكم محايد.

زينب قربت منها وحضنتها.

_ حمد لله على السلامة يا حبيبتي تعالي شوفي بنت عمك دي بقى عشان أنا هتجنن منها.

يوسف دخل وراهم وهو شايل الشنط.

_ طب حد يقولي حمد لله على السلامة أنا كمان ولا أنا مجرد سواق نقل للأسرة؟

زينب ضحكت وراحت له.

_ حمد لله على السلامة يا حبيبي تعالى حط الشنط وارتاح إنت ملكش دعوة باللي فوق.

يوسف بص لأحلام.

_ هتخطفوا البت مني من أولها كده.

أحلام ابتسمت وهي ميرال بتسحبها.

_ استحمل يوم واحد بس بكرة هرجعلك.

يوسف رفع حاجبه.

_ بكرة؟ أنا كنت فاكر ساعة بالكتير.

ميرال ضحكت.

_ سيبه يصوت مع نفسه يلا على فوق.

•••••••••••••••••••••••••••••••••••••••••••

يوم الخطوبة، البيت كله صحى بدري.

زينب كانت من أول الصبح في حركة مستمرة.

مرة في الجنينة.

مرة في المطبخ.

ومرة طالعة لميرال تشوف شعرها وفستانها.

أحلام فضلت جنب ميرال تقريبًا طول الوقت.

ميرال كانت متوترة بطريقة تخليها كل عشر دقايق تسأل:

_ أحلام الساعة كام دلوقتي؟ أنا حاسة الوقت مش بيعدي.

أحلام بصت لها من المراية وهي بتضحك.

_ يا ميرال والله الساعة مش هتجري عشان إنتي بتسألي عنها.

ميرال عدلت طرف فستانها.

_ أنا مش مستعجلة على فكرة أنا بس عايزة أعرف إحنا متأخرين ولا لأ.

أحلام رفعت حاجبها.

_ ايوه ايوه وإنتي طبعا مش فارق معاكي آسر وصل ولا لسه مش كده؟

ميرال بصتلها بنظرة تحذير.

_ أحلام بالله عليكي بلاش تبدأي معايا النهارده عشان أعصابي مش ناقصة.

أحلام قربت منها وعدلت خصلة شعر عند كتفها.

_ يستي انا مش هتكلم أنا بس مبسوطه وانتي كل ما ييجي صوت عربية تبصي من الشباك.

ميرال وشها احمر.

_ أنا ببص عادي عشان الناس بتوصل.

أحلام ابتسمت.

_ طبعًا وعينيكي بتدور على عمي عبدالله أكيد.

ميرال ضربتها بخفة.

_ إنتي رخمة أوي.

أحلام ضحكت، وبعدها حاوطت كتفها.

_ بس إنتي حلوة أوي النهارده.

ميرال بصت لنفسها في المراية.

فستانها كان بسيط وناعم، لونه هادي، وشعرها نازل على كتفها بتموجات خفيفة، ومكياجها بسيط بارز ملامحها من غير ما يغيرها.

ميرال أخدت نفس.

_ أنا فعلًا متوترة يا أحلام… مش عارفة ليه يعني أنا عارفة الناس كلها تحت ومفيش حد غريب وآسر أنا عارفاه من وأنا صغيرة بس حاسة إن كل حاجة مختلفة النهارده.

أحلام هديت نبرتها.

_ عشان هي فعلًا مختلفة…إنتي مش نازلة تقعدي مع ابن عمك اللي بتتخانقوا وتهزروا عادي إنتي نازلة تقعدي قدام خطيبك.

ميرال بصت لها.

_ حتى كلمة خطيبي نفسها غريبة.

أحلام ضحكت.

_ استني لما  تلبسي الدبلة ساعتها هتستوعبي أكتر.

في اللحظة دي زينب دخلت.

أول ما شافت ميرال جاهزة، وقفت عند الباب.

كل الحركة اللي كانت فيها من الصبح هديت مرة واحدة.

فضلت باصة لبنتها شوية.

ميرال خدت بالها.

_ ماما… إنتي هتعيطي؟

زينب قربت منها وهي بتحاول تضحك.

_ وأنا هعيط ليه؟ أنا بس افتكرتك وإنتي صغيرة بتجري في نفس الأوضة دي وشعرك منكوش وبتقوليلي مش هتتجوزي أبدًا عشان الرجالة رخمين.

أحلام انفجرت ضحك.

ميرال فتحت عينيها.

_ ماما! إنتي قولتي مش هتفضحيني.

زينب ضحكت وحضنتها.

_ دي مش فضيحة دي مقدمة بسيطة.

ميرال حضنتها بقوة.

زينب باست راسها.

_ ربنا يسعد قلبك يا بنتي ويكتبلك الخير ويراضيكي.

أحلام وقفت جنبهم بابتسامة دافية.

•••••••••••••••••••••••••••••••••••••••••••••••

تحت، آسر وصل مع عبدالله.

كان لابس بدلة بسيطة، وشعره مترتب أكتر من عادته، وملامحه بتحاول تبان طبيعية جدًا.

لكن إيده كانت كل دقيقتين تروح تعدل الساعة.

وبعدها الكم.

وبعدها ترجع تتشبك قدامه.

يوسف كان واقف قريب منه، وفضل يتفرج عليه شوية.

_ إنت لو فضلت كل شويه تلعب في الساعه كده هتكسرها وربنا.

آسر بصله.

_  هي واسعة شوية بس.

يوسف رفع حاجبه.

_ آه طبعًا والكم كمان واسع وشعرك واسع والبيت كله واسع مفيش أي توتر خالص.

آسر حاول يمنع ضحكته.

_ يوسف بجد لو فضلت واقف جنبي هتوترني أكتر روح شوف مراتك فين وسيبني أتنفس.

يوسف خف نكش لما حس إنه فعلًا متوتر.

حط إيده على كتفه.

_ اهدى كل الناس دي أهلك وإنت داخل على خطوة إنت مستنيها بقالك فترة.

آسر بصله.

_ أنا مش خايف من حد… أنا بس مش عارف هي هتبصلي إزاي لما تنزل.

يوسف فهم قصده.

_ هتبصلك زي ما هي عايزة تبصلك وإنت متستعجلش منها حاجة…هي موافقة إنك تكون هنا النهارده ودي لوحدها خطوة كبيرة.

آسر أخد نفس طويل.

_ عارف.

بعد شوية، عبدالله وأحمد وعبدالحميد وعماد قعدوا سوا.

الجو كان عائلي ودافي أكتر ما هو رسمي.

عبدالله بص لأحمد بابتسامة.

_ إحنا طبعًا مش جايين بيت غريب وإنت عارف آسر من يوم ما اتولد، بس الأصول أصول… وأنا جاي النهارده أطلب ميرال لابني رسمي وربنا يكتب لهم الخير ويراضيهم ببعض.

أحمد بص لآسر لحظة.

آسر عينه كانت ثابتة عليه، والتوتر باين فيها رغم محاولته يخفيه.

أحمد ابتسم.

_ وإنتوا أهلي قبل أي حاجة…وآسر ابني قبل ما يكون ابن أخويا وميرال اتسألت وهي موافقة، وربنا يتمملهم على خير ويجعلها خطوة خير ليهم هما الاتنين.

عبدالحميد ابتسم براحة.

_ ربنا يباركلهم ويتمملهم على خير ويهديهم لبعض ويفرحنا بيهم.

التوتر اللي كان في الجو بدأ يفك.

عبدالله ضحك.

_ الحمد لله أهو كده أقدر أتنفس…أحمد من ساعة ما قعدنا عامل وش رسمي خلاني حاسس إني جاي أطلب بنت رئيس دولة.

أحمد ضحك.

_ لازم أحسسك إن البنت غالية ومش هتاخدوها بالساهل.

الضحك انتشر.

حتى آسر ضحك، والتوتر اللي كان ماسكه بدأ يخف.

وفوق، زينب سمعت صوت الضحك.

دخلت أوضة ميرال بسرعة.

_ خلاص… اتفقوا تحت.

ميرال قلبها دق بعنف، وبصت لأحلام فورًا.

أحلام ابتسمت ومدت إيدها لها.

_ يلا يا عروسة.

ميرال مسكت إيدها.

_ أحلام أنا حاسة إني مش عارفة أمشي أصلًا.

أحلام قربت منها.

_ امشي عادي محدش مستني منك تدخلي تعملي استعراض. دول أهلك و ده آسر … بس النهارده النظرة مختلفة شوية.

زينب باست راسها.

_ ربنا يسعدك يا حبيبتي.

ونزلوا.

أول ما ميرال ظهرت على أول السلم، آسر عينه راحت لها تلقائي.

وقف كلامه.

هو نفسه ما خدش باله إنه وقف.

فضل باصلها وهي بتنزل خطوة خطوة.

ميرال من أول ما نزلت، عينيها دورت عليه غصب عنها.

ولما لقيته باصلها بالشكل ده، اتكسفت فورًا ونزلت عينها، لكن ابتسامتها الصغيرة ظهرت على شفايفها.

أحلام اللي كانت ماشية جنبها لمحتها.

قربت منها وهمست:

_ على فكرة لو فضلتي تضحكيله كده هتنسي إنك المفروض لسه مدياله فرصة مش أكتر.

ميرال عضت على شفايفها عشان تمنع ضحكتها.

_ اسكتي يا أحلام بدل ما أرجع أوضتي واسيبكم.

أحلام ضحكت بخفة.

قعدت ميرال جنب زينب.

اللمة كلها بقت أدفى بمجرد ما نزلت.

كلام.

ضحك.

دعوات.

تصوير.

وكل شوية ميرال تسرق نظرة ناحية آسر وتلاقيه هو كمان باصصلها، فتلف بسرعة كأنها اتقفشت.

بعد وقت، جه وقت الدبل.

زينب جابت العلبة.

ميرال وقفت.

آسر وقف قدامها.

وفجأة كل الهزار اللي كان في القعدة اختفى من دماغه.

خد الدبلة من العلبة.

إيده كانت فعلًا بتترعش سنة.

ميرال خدت بالها فورًا.

بصت لإيده.

وبعدين رفعت عينيها له.

قربت سنة صغيرة، وهمست بصوت واطي جدًا عشان محدش يسمع غيره:

_ إيدك بتترعش ليه؟ 

آسر رفع عينيه لها.


شكرا لزيارتكم عالم روايات سكيرهوم

تعليقات