رواية خلخال مشوه الفصل الثامن عشر 18 بقلم زمرده

 

 

 

 

رواية خلخال مشوه الفصل الثامن عشر بقلم زمرده



بياضچ حاد مو فاهي
وشمسنا گبال
وجهچ گمره تتحول
ما بين الگطن
والغيم والنجمات لونچ
ماخذ الأول

°جفون°

گلبي انعصر من باوعت للمكان
اللگيت بي كرفس ميت

بلعت ريگي ومشيت خليته يم البقيه ومشيت ربطت الصونده بالبوري مال ماطور وشغلته ارشن الخضار وبنفس الوقت البي جانن البطات يلعبن يمي مكيفات بالماي وانا اضحك من اشوفهن يردن يسبحهن بالماي الركد بالگاع وصوتهن بي وما يعلى

طب نوح ومن سمعته صاح باسمي التفتتله بايدي الصونده بس طاحت من ايدي من شفت بايده قفص مليان كتاكيت بكل الالوان

ضحك من شاف صدمتي وفرحتي بنفس الوكت مشيت بساع اخذتهن من ايده وفتحت باب القفص الهن
طلعن بساع وبكامل نشاطهن يلعبن بالحوش حسبتهن عشرة من كل لون ثنين جانن

رفعت راسي وانا فرحة خلگ الله كلها بگلبي مدنگ مبتسم يباوعلي چن متانيني احجي

دمعن عيوني وانا اگله
_ شكرا كلش شكرا أنت احسن أخ بالدنيا

ملامح وجهه كلهن انگلبن غمض عيونة وبلع ريگة
ومن رد باوعلي ما حجه شي ابد ومشى يرد يطلع من البيت وانا ركضت طفيت الماطور من تذكرت الماي بعده يجري وشراح يخلصنه من غاية

ابتسمت وانا اباوعلهن شالن قفصهن وگعدن بگلبي والله گمت اركض اشحت البزون من اجت عليهن وبساع واحد واحد ضميتهن وانا أرجف من الخوف عليهن صارت بي خوفة من موتتة كرفس

من خلصتهن اخذت القفص وطبيت جوه بس شافني بأيدي القفص وشني بي أول وحده عمة زهرة لطمت على خدها

زهرة : هم كتاكيت واذا مات واحد ننصب عزه بالبيت ويصير حال الظيم حالج

_ اسم الله من عمري على عمرهن

غضة : لا هاي هي ردت ريمة العادتها القديمة

زهرة : نوح جابهن مو

_ أي وعمة من مات كرفس مو أنت گتيلي تخلين نوح يجيبلي غيرهن

زهرة : حجاية التنحجي قابل صدگ

_ هاا يعني تضحكين علي

زهرة : لا بس انا علمودج ما اريدن تضوجين من يموت
واحد

_ لا ما يموتن انا اديرن بالي عليهن

زهرة : اذا واحد مات وبچيتي اگطع النعال عليج

وانا اباوعلهن گتلها
_ خوش

گعدت وحطيتهن گبالي اريدن اسميهن بس يرادلي كومة أسماء
غاية : جفووون

بلعت العافية من سمعت صوتها چن شافت الحوش منگع گمت بساع اختل بسد هيوفة

طبت وهي تدردم
غاية : جفووون تك حواري الخايسة سويتيلج شغلة خلصيهاا لو الا تعوفيهاا على النص

من وره هيوفة احجي وهي واگفه گدامي
_ التهيت بالكتاكيت

غاية : هسه الزگهن الج بدعوة اخليج حايرة تبچين على منو بيهن

_ گبر شبيييج

غاية : الحوش امس منضفته ليش هيييج مسوية بي

هيوفة : خيبه كافي انا هسه اگومن اكمله

غاية : جا قابل انا متعاجزة بس هاي ماتسويلها شغلة براسها خير

غضة : خايبة اسكتي سطرتينة

مشت وهي بعدها تدردم وانا طلعت من ورا هيوفة ومشيت گبال كتاكيتي اباوع عليهن شگد حلواااات

°غاية°

طبيت للمطبخ اركض من سمعت صوت الصياح بره اباوع من الشباك كلهم واگفين وشيخ خزعل بصف جدي ويحجي وي الولد يهدي بيهم وهم صايرين نار ولا بيهم مجال يهيدون

صخر : والله هسه اجيبن التفگ ونمشيلهم بنص اهله اخلص عليه مستگوي وصاير خوش زلمه چن بس هو عده رتبة

اندار على جدي
شيخ خزعل : شني ابو محمد ما تردهم

رأجس : ماعليك شيخ ما يمشون المچان انا ما اخليهم وهم من شوري يطلعون

شيخ خزعل : انا حجيت وي چبيرهم شيخ واحد واليوم راح يمشيلهم الله شاهد ابد ما رضى عليهم

رأجس : چا خله يردهم لان الصبر وياهم خلص كلش

شيخ خزعل : العطوه شيخ خلها والصار احنه نحله أن شاء الله

رأجس : لا والله كل عطوه الهم ما عدي

شيخ خزعل : گول يا الله هاي السالفة ما عليها بالصار

رأجس : شلون ما عليها لبس العطوه وي النعال وداس بيت رأجس الغضب مو بس القرية

شيخ خزعل : هم اعذره دمه محترگ على اخوه

رأجس : بس مو يدوس البيت شگد وصلنه وياهم بس ما سوينه سوايته ولا طبينه لواحد من بيوتهم

شيخ خزعل : ميخالف طيحها وانا والله من حجيت لشيخ واحد فلا رضى وگال راح يمشيلهم يطيح حضه

محمد : شيخ هو مو بالمستشفى شوكت طلع

شيخ خزعل : والله ما اعارف

ضلوا شوي يسولفون ومشى الشيخ وكلهم طبوا ورا جدي وگف روحه بطرف خشمه

ضيرم : اناا كل صبر وياهم ماضل عدي ساعة الساعة امشيلهم بفد رمانه اطيح بيوتهم عليهم

عبد الحق : انا اروحن وياك

محمد : هيدوا لا احطكم برگبتي

جدي گعد وهم ضلوا واگفين بالصاله وانا اباوعلهم من باب المطبخ واحد يتناثر شر اكثر من الثاني بس ساحبين بريك شوي لان چدي هل مره ساكت ومخليها ورا الشيوخ واحدهم بالگوه لازم روحه لو بغير وضع ومتدخله الشيوخ بيها جان مانمنه الليل من صوت الچيلات بينهم بس النقذنه حتى شيخ واحد چبير أل عبود تدخل والسمعته منهم هسه ما راضي على المسوي

رأجس : انا ماريدن استعجل ويطيح اللوم علي خل نشوف هل مره شلون يحلوها

محمد : والله بوية زين ما سويت مابينه حيل تكبر ما تزغر

يوسف : والله خلصت ارواحنه شوكت تفض وياهم

رأجس : شتفض وحده ثنين

محمد : ناس راكبة راسها اكثر من ناس

رأجس : جا شتردين نمشي نصالحهم

محمد : لا شني بوية

باقر : لا احنه نصالحهم ولا هم يصالحونه وراح تضل طلايبنه من جيل لجيل

باوعله جدي بنضرة الما عاجبه دورت بعيوني هيوفة ماكو مختفية أبتسمت شردت لان ضيرم هنا گعدت ع الدرج اباوع عليهم وجفون گاعده وراي

رأجس : هم بيكم واحد ماشي لرهيب

ضيرم : جدي انا گلت اليوم امشي اشوفنه

رأجس : عينكم عليه اخذوله اكل وهدوم

ضيرم : صار جدي من امشي اخذله

هز رأسه جدي بخوش ،وانا گمت بساع سويت جاي من اندارلي صخر وگال
صخر : جاي بساع

وانا اصبن الجاي بالگلاصات رفعت راسي من حسيت أحد طب للمطبخ عدلت حجابي من شفته عزيز

باوعلي واجه اخذ گلاص جاي ومشى للصالة من خلصت شلت الصنينة ومشيت بس شافني نوح جان قريب علي اجه اخذها من ايدي ومشى يوزعلهم
وانا رديت گعدت بمكاني اباوع عليهم يتحلفون شراح يسون لو ما اجه واعتذر على دوسة البيت مو بس القرية

°حواري°

گمت اتثاوب فتحت باب الغرفة وطلعت افرك بعيوني راسي احسن بي مثل الطابوگة ومن گد ما يوجعني على ريگي اخذت حباية وجع راس وامي استلمتني رزايل

نجوى : شلون تشربيها على ريگج تخبلتي

لزمت راسي وگعدت
_ يمة راسي يريد يطگ والله

نجوى : خاف فلاونزه براسج

_ ما أعرف بس يجوز صدگ لان من سبحت مشيت شريت الهدوم

نجوى : جا هنا الحجي اگعدي خل اسويلج ريوگ

هزيت رأسي ب أي وگعدت وشوي وحطت الصينية گدامي اكلت شوي وما گدرت اكل بعد عود شگد جنت جوعانة
نجوى : جا شاكلتي

_ نفسي ما تريد الاكل

نجوى : شجاج يايمة

_ ما أعرف والله احسن بروحي ما أعرف شبي

نجوى : خل يجي ضيرم واگله ياخذج دكتور احسن

هزيت رأسي ب أي لان صدگ احس بروحي بعازة روحة للدكتور عاد أعرف شني هالوجع الما جاي يهدني من امس لليوم

ضليت گاعده يم امي وهي تثرم لحم تريد تسوي كبة
رفعت راسي على صوت بصائر من طبت
بصائر : صباح الخير

_ صباح النور

نجوى : صباح النور عيون فقوري

أبتسمت واجت گعدت يمي
بصائر : شلون صرتي

_ الدوخة خفت بس راسي كلش يوجعني

بصائر : أي اكيد يوجعج يوم يومين ويفك الوجع لا تخافين

_ أن شاء الله لان والله مليت

بصائر : حگج هو انا من جان يهبط اكره روحي

_ ادعيلي ما يرد يهبط بعد

بصائر : أن شاء الله بس هل مره

شوي وطب عزيز كاشخ على أخر حباية مشى يشرب ماي وأمي تحاجيه

نجوى : جا منو امس ينعل ويسب اليدوام بعد

أبتسم وحط الگلاص على الكاونتر
عزيز : حجي لسان يمه

نجوى : ونضل يوميا تجي روحك بخمشك ومن تريد تمشي تگول حجي لسان

عزيز : جا شنسوي ضغوطات شغل

أبتسم وهو يگول أخر حجايتين
نجوى : تتريگ ابو الضغوطات

عزيز : لا ما ضل عدي وكت اتريگ هناك

نجوى : مو تضل ماتاكل ويصير بيك شي

شال جنطته يريد يطلع
عزيز : لا والله اكل لا يضل بالج

نجوى : جا خوش الله وياك

بس طلع عزيز طبت ريحانة ايدها على بطنها
نجوى : شني ما تاكلين شي

ريحانة : اشو عدي لعبان نفس

نجوى : شني سالفتچن اليوم ياهي الاكضها وگالت لعبان نفس

ريحانة : جا غير حوامل شنسوي

بصائر : أي والله

باوعتلهن وگامت طلعت طاوة تريد تحمس اللحم
نجوى : راح اسوي غده والما تاكل اشحتها من البيت

بصائر : انا اول المشحوتين

ريحانة: وانا الثانية

بصائر : ماشية گبل لا تطلع ريحتة واموت

شردت من المطبخ وانا وريحانة ضلينا گاعدات على گعدتنه امي اطتها الچريش تعجنه بين ما تخلص الحمسية وبس خلصت اجت گعدت تلف
وتحجي وي ريحانة ،بس گطع سوالفهن صوت دگة الباب

گامت امي غسلت ايدها وطلعت تشوف منو ماكو شوي وردت
نجوى : هذا رجلج يمه بالباب

گامت بساع تعدل بشعرها وتحجي
ريحانة : شعچب اجه شو ما گالي

نجوى : دمشي شوفي بساعج زحمة ضال برة

هزت راسها ب أي وبساع طلعت شوي وسمعت صوتهم صار بالحوش وصوت باب الديوانية انفتح يعني طبوا گمت للصالة بس من عبرت من باب الديوانية الداخلي چذبتني حجاياتهم وضليت واگفه اسمع

ريحانة : شعچب ما گلتي راح تجي

حمزة : اشتاگيتلج واجيت

ضلت ساكته شوي وراها گالت بشك
ريحانة : احسن بيك مو خالي شبيك

حمزة : اريد اگلج شي ما اگدر اضلن ساكت اكثر بعد

°كوكبة°

بايدي المكناسة اكنس واحجي وي روحي
_ شلون خالات حياية راح يلتمن

رفعت راسي على صوت مرة اخوي سعد
سكينة : راح يصير تچمع مال حياية لو أعرف يچن جان ضليت يم اهلي

_ والله احسلج انا هسه حايرة وين اطي وجهي منهن

سكينة : فلا أنزل ما بي حيل حرگان الگلب كل ما گابلتهن گالن الا نزوج سعد وشني ضاله بلايه جهال

_ ما تعرفيهن بس يردن سالفه يسولفن بيها

سكينة : والله انا اخاف لا صدگ يسونها وهاي خالتج السحارة تلزگ بتها بسعد

_ يحبج ما يتزوج عليج

سكينة : السحورة لا تخلي حب ولا طرگاعة

_ دمشي كفي المواعين انفصم ضهري والله

سكينة : ماشية شبيج راح تبچين

_ جا غير تعبت الله واكبررر

ضحكت ومشت للمطبخ وانا بس خلصت كنس الصالة حطيت سطلة المسح وبهالبرد اموت من امسح بالماي البارد وبس خلصت بوجهي للمطبخ شلت جدر الماي الحار حميتة حتى اسبح حطيتة بالحمام وطلعتلي هدوم ومشيت سبحت
بس طلعت صارت الهوسة گدامي أجن لا هلا ولا مرحبا بيهن

بس شافتني واگفة صاحت
نادية : شني ماتچين تسلمين على خالاتج

رسمت ابتسامة چذابية على وجهي ومشيت سلمت عليهن وحده وحده وبس وصلت يم خالتي أم مرتضى گالت وهي تبوسني تمثل الحنية الله يسلم گلبها
بشرى : يمة فدوة للبنات هلا بعروسة أبني

°حواري°

حمزة : اريد اگلج شي ما اگدر اضلن ساكت اكثر بعد

ريحانة : شني گول

ضل ساكت وانا احسن بي حاير يحجي لو لا ومن ردت گالتله تاكدتلي حيرته
ريحانة : شصاير حمزة خوفتني والله

حمزة : صخر

حسيتها ارتبكت من گال اسمه
ريحانة : شبي صخر

حمزة : احسن بي ابد ما يطيقني حتى سلامة ثگيل وياي

گلت بگلبي
_ شلون يطيق وأنت رجل اليحبها

ريحانة : هو هذا طبعه لا تحط بالك يمه وتضوج روحك

حمزة : ما اعارف بعد احسن بي ابد مو طبيعي واحساسي يگلي اكو أنه

ريحانة : شني اكو أنه

حمزة : من أعارف اگلج

غيرت السالفه من گالتله
ريحانة : شسويتوا اليوم

حمزة : جاي نحول بالاثاث أبوي گال ابدوا بالغرف حتى يستقرن الچناين

سألته بمداهر
ريحانة : ابوك لو امك

ضحك
حمزة : اثنينهم

ريحانة : يعني انا شوكت تجي تردني

حمزة : باچر بس اذا تردين تضلين بكيفج

ريحانة : خوش جا اريدن امشي للدكتوره اليوم

حمزة : أي

ريحانة : يعني حرك ايدك اريد فلوس

حمزة : شگد

ريحانة : اطيني 50 واذا عوزت اخذ من أمي

حمزة : هاج 70 ولا تاخذين من احد

ريحانة : بس حتى لو أمي

حمزة : ميخالف حبيبتي

ريحانة : يابعد عيون حبيبتك الله يحفضك الي

ما سمعت شگاللها لان فززتني بصائر من جرتني

تسحل بي وتحجي
بصائر : شگد فضوليه ما تبطلين سوالفج

_ ما اگدر شني جديدة انا لا من اليوم ولا امس احط اذني على البيبان

بصائر : تعترف

_ جا شني قابل چذب

بصائر : عيني عيب

گمت اريد امشي للغرفة ،بس گبلها وگفت گبالها
_ خوش وبعد

بصائر : والله صوجي احجي انجب وأحير باللعبان نفس وأنت ضلي وين ماتشوفين باب الزگي بي حتى تتصنطين

ضحكت وهي غمتني ومشت وانا طبيت للغرفة احظر بروحي للدوام بس خلصت شلت الجنطه وطلعت صارت گدامي ريحانة ايدها على بطنها جنها مختنگه
_ شبيج

ريحانة : خايبة احسن الجاهل صاعد على گلبي والله

_ مبين حتى بطنج عالية

ريحانة : أي حتى أمي تگلي

سويت روحي ولا سمعت وگتلها
_ جا لو تمشين للدكتوره احسن

ريحانة : هو العصر راح امشي وحتى گلت لحمزة اطاني فلوس

_ جا خوش

ريحانة : هذا صوت الخط

_ أي

ريحانة : وأنت جاي تسولفين

_ أي

ريحانة : مصيبة أنت والله اطلعي بساع كرهتي الرجال بالساعة السوده اللزملج بيها خط

_ خاب شني جا غير بفلوسنه

ريحانة : واذا بفلوسج تشتلي هيج

_ قهرتيني ماشيتله

هزت ايدها ما راضية وانا بس مشيت لباب الشارع وگبل لا افتحه دفعه حق وطب بس شافني گال
عبد الحق : وين صرتي الرجال صار ساعة واگفلج

_ اسولف

صفن بوجهي ما متوقع ردي وانا حطيت ايدي على حلگي صافنه شبي ماعدي بريك
عبد الحق : گلتله يمشي الجفون ويردلج اطلعي

هزيت رأسي ب أي ومشيت وهو طلع وراي
عبد الحق : امشي

مشيت وراه البيت جدي ،بس وصلت طلعت جفون وصعدنه سوه والرجال گد ما بزعانه روحه مني ومتعود على تأخيري ولا حجه ولا گال بس حرك گالت وهي تباوعلي
جفون : جا ليش ما خليني واحد من الولد ياخذولج اجازه وين بيج حيل تداومين

_ لا احسن بروحي زينه

جفون : بس وجهج لهسه مخطوف لونه

_ اي عادي يوم يومين ويرد بي الدم

ضلينه نسولف وبس وصلنه مشينه كل وحده الصفها حتى الچرس داگ واكلت رزاله زينه
من المعلمه الا رضت اطب للصف بس گعدنه گرصتني من ضهري
رقية : كله من وراج اذا تتأخرين بعد اطب لبيتكم اكتلج

_ انا الج خل تطلع المعلمه واشوفج مني تكتلني

رقية : جا شني عبالج خايفة منج

_ نشوووف

رقية : اذا ما اسحلج من شعفتج

_ امداج هيج تتعاملين وي المريض

رقية : خوش اسحلج من تطيبين

واحنه نحجي بصوت ناصي ما اعارف شلون لجحتنه المعلمه وجابتنه بعيطه تسوه سوالفنه غميت روحي ورا الرزاله وركزت وياها جاي تشرح قواعد أخير موضوع داخل بنص السنه وانا مخلصتها سوالف وكلشي ما عرفت منه وتالي من ارد للبيت اخلصها لطم وضيرم يتورط يقريني ويرزل بي تصير قراية بنكهه الرزايل

بس خلصنه دوام واول ما طبيت للبيت صارت گدامي ريحانة بالمطبخ تلبس بعباتها وبنفس الوقت طبت بصائر هم متحظره

تخصرت اباوعلهن
_ جا شني گلجن راح تمشن وانا وين أولي

بصائر : جا غير انا هم حامل واريدن امشي اشوفن الجاهل

طبت أمي
نجوى : بدلي وخل اوديج يم بيت چدج

_ جا امشي وياچن

نجوى : خايبة حق ياخذنه وتعرفينه يضل يحجي هسه يگول ماشيات زفة

_ ما ماعلي لو مو حق انا اريدن امشي

نجوى : غضب على عنادج امشي بساع بدلي

بس گالت هيج طگيتها ركضة للغرفة صار بي كل الحيل وعود هستوني راده من المدرسة فاطسه روحي بس بيها طلعه وانا ما اصدگ اطلع من القرية بزعت روحي من الحبسة

شمرت الجنطه بالغرفة ومشيت بساع بدلت وطلعت احلى شال عدي لونة ازرگ يخبل اشترته الي ريحانة بدال الشال الاخذته لان گالت ضايع منها

لبسته بساع وطلعت اركض بايدي عباية الطلعة لأمي ما تخليني البسها اذا ماكو طلعة تسوه على گولتها

بس طبيت للمطبخ صاحت
نجوى : خايبة بساع شنلحگ على الحجز

_ بس اوگفي يمة

انداريت على بصائر
_ اريد شحاطتج الزرگه اللبسها ترهم وي الشال

بصائر : اصعدي تلگيها بالميز

_ خوش

صعدت اجيبنها ومن نزلت لابستها بساع اخذت العباية من ريحانة ولبستها باوعتلي امي وهزت ايدها
نجوى : جا وين ماشين لعرس

_ على الحجاب والشحاطة

زغرت عيونها تباوعلي
نجوى : جا والعباة الجديده

أبتسمت
_ جا غير عباتي وصخه وتعارفين چنت لابستها بالمدرسة

من سمعت صوت هورن السيارة برة گالت
نجوى : امشن أجتج من الله على الله

ضحكت ومشيت ورا ريحانة الدرب كله من البيت للسيارة انا مدنگه من الشمس اليوم طالعة وسطرتني سطر
ريحانة : خايبة ارفعي راسج راح تعثرين

رفعت راسي وصرت عين بعين وياه فاتح الجام ويباوع متانينه نصعد درت وجهي بساع من گال
عبد الحق : جا حواري هم تمشي

من وراي امي حاجته
نجوى : أي گتلها ضلي يم بيت جدچ بس هي راس يابس

ماحجه شي واحسن بي ضلت عينه علي صعدت ورا بصف ريحانة من صعدت وبصفي بصائر
يعني انا صرت بالنص هو دائما الزايد ولازگ روحه يحطونه بالنص وهذا حالي هسه كلما رفعت عيني الگاه يباوع بالمراية واديرن وجهي من يرفعلي حاجبه ومبين ابد ما راضي على جيتي بس يعرف لو گالي ارد ما راح اسكت

نزلنه من وصلنه للدكتوره وانا ضليت اعدل بعباتي على جامة السيارة نزل هو وسد الباب واجه بهدوء يمشي وگف بصفي ما يباوعلي عينه على امي والبنات الا من شافهن طبن للعياده مأمنات أني راح الحگهن وهو موجود

عبد الحق : ماعدج غير هل شال

سألته بأستغراب وكل ضني بي شي
_ شبي

عبد الحق : لونه

زغرت عيوني مستغربه شجاي يحجي
عبد الحق : جاية لعرس ست

رفعت حاجبي مبتسمة وكلش زين مفتهمته بس سويت روحي ما اعرف شجاي يگول وشني يقصد
_ شني شجاي تحجي

عبد الحق : حورية أنت ما تعبر عليج حجاياتي لا تغشمين روحج

أبتسمت ومشيت گبله وهو وراي اسمعه يحجي ويرزل
عبد الحق : والله لو نطيچن مجال تسون العمايل هاي وعود احنه كاضيچن جاية بلايه جواريب

انداريت عليه مزغره عيوني
_ انا ما احبنهن

عبد الحق : ونمشي أحنه بكيفج

_ حق

اباوعله بلع ريگه ودار وجهه بساع يمسح على لحيته والا من رديت گلت اسمه الا ندارلي
عبد الحق : هاا گولي

_ امشي گبلي انا نسيت منين طبن

هز رأسه ب أي ومشى وانا وراه وكلساع يندارلي هوسة قوية مكان العياده صاير
كلش يم السوگ بحيث أصوات السيارات والسماعات مال بسطيات لهنا واصلات حتى من طبينه للعياده

گعدت بصف ريحانة وبصائر بصفها من الجهه الثانية
_ شوكت سراچن

ريحانة : بعد ساعة هيج ونطب

_ خوش حتى نرد من وكت عدي امتحان

ريحانة : جا اذا عدج امتحان المن جاية

_ اريدن اشم هو والله اختنگت شني حياتنه طلايب ومدرسة

من حست جاي احجي الصدگ سكتت و شوي وطب حق يسأل على سراهن وگبل لا يمشي باوعلي ورد دنگ يباوع على رجلي چن عچبته الشحاطه بس ما يعارف انا مداينتها من أخته

انداريت احجي وي بنية گعدت بصفي وبساع
اخذت وياها ميانة بس فززتني ريحانة من كرصتني باوعتلها وانا اهمس بيني وبينها

_ خاب شبيج تگرصين چنج عگرب

ريحانة : حق يصيحج

بأستغراب حركت راسي
_ هااا

ريحانة : گومي بساع شوفي شيريد

رفعت راسي اباوع على باب العياده من شافني اباوعله اشرلي تعاي گمت اعدل بعباتي وبس وصلت يمه حط علاگه بوجهي

وگبل لا اسأل گال
عبد الحق : اللبسيهن وما اريدن اسمع لا

_ شنو هن

عبد الحق : جواريب مطعله رجليج گدام خلگ الله كلها حرام وزحمة بحقي انا هسه يگولون هذا الزلمة الوياها حاط شواربة ديكور وما عرف يگلها چفني رچليج

_ بس ترا صدگ انا ما احبنهن

عبد الحق : لو واحد من اخوتج وياج تجين بلياهن

صفنت بوجهه وبمجرد ما فكرت خفت من الرزاله الاكلها منهم واذا افكر بعزيز لازم افكر شلون اللم كرامتي ورا السحله الراح يسحلها الي بالعياده

عبد الحق : اللبسيهن واعتبريني

سكت ما كمل وانا بكل صلافه ما أعرف منين جايبتها سألته
_ شني

عبد الحق : اعتبريني أبن عمج

كضتني الضحكه بس سترت على روحي من غطيت وجهي بأيدي كل هل حجي والوگفه واحنه نحجي بهمس
عبد الحق : وخري ايدج بساع خايبة حواري راح اطگج

وخرت ايدي خازرته
_ شني تايهتلك

عبد الحق : جا لو احجي لاخوانج واگلهم طالعه بدون جواريب وطگيتها يحبوني من راسي

_ لا والله

عبد الحق : والله امشي للتواليتات اللبسيهن

_ خاب حق شبيك

عبد الحق : الستر حلو واحنه حلالنه عزيز عدنه حورية

سكتني وما اطاني مجال بعد اگولن لا ومشيت لبستهن ورديت گعدت تدنت علي بشماته
ريحانة : حل حتى بعد لا تشمين على البراسج

خزرتها
_ مو انزعهن والله

ريحانة : جا حق وين راح اصيحنه عليج والله واگله كسرت كلامك

_ خاب دطيري أنت وياه

ريحانة : انا الج بس اجيبن اخلي ابني ما اعرف بتي ما يگلج خاله

_ ما عايزة عليج اكو واحد يگلي عمه

ريحانة : طاح حظ هيج خاله

_ أكبر مني راح احترمج غصبا علي مو برضاتي

حركتلي حواجبها بخباثه واندارت على صوت السكرتيرة من صاحت اسمها طبت وبصائر اسمها وراها لحت الا تطب وياها وبالگوه رضت ضليت انا وامي متانياتهن بره عدت اكثر من ربع ساعة وطلعن وحده لازمة ايد الثانية گامتلهن امي تسأل

نجوى : بشرن

عيونها بساع دمعن
ريحانة : انا بي ولد يمة

أبتسمت امي ولمتها لحضنها ومن وخرت مسحت دموعها وباوعت على بصائر
نجوى : وأنت عمه

بصائر : كيس الحمل موجود وگالت مبين عدج حمل بس لازم ارجع بعد شهر نشوف النبض واطتني دوه

نجوى : نعمه من الله امشن بشرن زلمچن

أبتسمت ريحانة وهزت رأسها ب أي وبصائر لمت وجهه
بصائر : انا فقار خابصني ياعمه احسن بي ولا فرحان يگلي اخافن عليج

نجوى : جا غير يحبج ويخاف عليج

بصائر : بس مو هيج كلما حجه وگال انا گلبي لازمني وانا گلبي ما مرتاح

نجوى : لان يشوف وضعج مخربط و الوجه صاير اصفر حقه يخاف

بصائر : جا انا بيدي والله حتى هاي مشيتي مو براحه اخافن لا اطيح بس هذا رزق الله ويا محلاة رزقة

نجوى : أي والله

ريحانة : تضلن تسولفن لو نمشي

نجوى : اعرفج تحوسين تردين بس تخابري

أبتسمت وهزت رأسها ب أي وطلعت گبلنه الگاع ما مكفية فرحتها بس شافنه فتح السيارة وصعد ومثل کبل شوي هم گعدني بالنص

أمي مشت للصيدليه جابت دواهن وردت وبس صعدن حرك السيارة وسأل أمي
عبد الحق : شلونهم جهال خواتنه

نجوى : الحمدلله بخير ريحانة بيها وليد

عبد الحق : نعمة بالعافية خوية

ريحانة : الله يعافيك ويوم التزوج ونشوف وليدك

عبد الحق : الله يسلمج وأنت خوية شلونه وضعج

بصائر : الدكتوره تگول زين وبعد لازم اردلها

عبد الحق : خير أن شاء الله عينج على روحج بعد أخيج

نجوى : خاب شبيكم خبصتونه من يوم الحبلت لليوم الناس تفرح أنت واخوك ضجتوا

عبد الحق : عمة والله لان وضعها ما مستقر هل اخافن عليها ولا يصير ببالج شني انا ما افرح اصيرن خال بس مو على حساب صحتها

نجوى : لاتخاف مابيها شي مثل كل مره عدها نساوة

سكت وبعد ماحجه شي وبس وصلنه نزلت انا گبلهن وببدال ما امشي لبيتنه
مشيت لبيت جدي وحق وراي يصيح وين انداريتله

_ بس اسلم على البنات وارد

وگبل لا أطب سمعته گال الامي
عبد الحق : فلا تركد بتج

بس طبيت صارت گبالي غاية تكنس الحوش مگطوع گلبها وادردم حتى ما حست علي من طبيت

صحت
_ خايبة شبيج تلطمين

رفعت رأسها وشمرت المكناسة من ايدها
غاية : خايبة گلت لتگج تنضف الحوش وكل ضني مشت تنضفه تالي من طلعت لگيته على حطته وهي تلعب وي كتاكيتها

أبتسمت
_ خليها تعيش طفولتها خطية

هزت ايدها
غاية : انا هم غمة المن جاي احجي وهو ثنينچن نفس الموديل

تخصرت
_ شنو قصدج

غاية : جا شني خايفة منج وما اگولم موديل مال زوج نعل

نزعت عباتي وركضتلها وهي طگتها بركضه فرت الحوش كله وانا وراها واخر شي گد ما ركضت گعدت دايخة واحسن بالگاه تفتر بي وهي عبالها جاي أچذب عليها وسويت هيج حتى الزمها بس ما تعارف انا الدنيا جاي تسود بعيني كل ما تعبر ثانية

بلعت ريگي وغمضت عيوني بعد ما اگدر اضلن مفتحتهن السواد شوي شوي بده يسيطر علي وبعد ما حسيت غير على راچديات هيوفة فتحت عيوني وانا احسن بروحي جاي تطلع باوعتلهن جده وعمه والبنات فوگ رأسي وانا بحضن غاية

زهرة : بسم الله عمة شجاج

لزمت راسي احس الوجع ردلي
_ ما أعرف عمة

غضة : خايبات گومن طببنها جوه

سندني هيوفة وجفون و غاية ورانه تلوم بنفسها وكل ضنها لان ركضت دخت گعدت ورجعت راسي ع الحايط ادعي الوجع هذا ما يطول ويختفي لان لو ضل انا انتهي والله

حطيت راسي على چتفها من اجت گعدت بصفي
هيوفة : شني سالفتج يوميا طايحة اول تالي

غضة : ما تمشين للدكتور ياحبوبة احسلج خاف راسج بي شي

زهرة : لا اسم الله هاي سوالف الهبوط وهم يجوز فقر دم

هن يحجن وانا بس اهزن راسي ب أي ومن گالت
هيوفة : لا تضلين صدگ امشي

رديت عليها وانا عيوني ما اگدر افتحهن من الوجع
_ هو ع الأساس اليوم امشي بس من رديت ما لگيت الولد عدهم شغل وكلهم ماشين وهم مشينه للدكتوره علمود ريحانة وبصائر

زهرة : يا خيرهن

_ مابيهن شي بس ريحانة مراجعتها وبصائر رادت تشوف الجاهل

غضة : مابين ريحانة شعدها

_ بيها ولد

صلن على محمد فرحانات ووحده تگل للثانية الله عوضها بس لا انا ولا هن چنه نعرف عوضها ابد ما راح يدوم وراح تجيها ايام تخسرها كلشي فرحت بي وهاي مجرد أيام تسبق عواصف حياتنه الجاية مو بس حياتها

اخذت نفس وانا ادنگ احط راسي بين أيديه وادعي بس يهدني مثل الكفخه اجاني الوجع احس بروحي راح تطلع ومن گد ما الوجع قوي بجيت من كل گلبي

حارن بي وانا ابچي والوجع يزيد
هيوفة : ولج كافي عيونج انمردن

ضربت على راسي واحسن بنار تطلع من عيوني
_ ما اگدر راح اموت والله راح اموت

غضة : خايبة اسكتي جاي يزيد من نوحيج

ما تعارف جده انا جاي ابجي من الوجع الزايد عن حده كل مره يوجعني راسي بس مو هيج هل مره حتى مو مثل من طحت بالمدرسة ولا مثل كل وجع فلاونزه هل وجع ما يتفسر

غمضت عيوني وصكيت على سنوني حيل من حسيت هاي هي انا بعد ما أقاوم ولا اگدر اخفف
من رجفة جسمي

°هيوفة°

ضربت على خدها اريدنها تصحى وهي انتهت بأيدي اخذني الرجيف من شفتها تشهك وچن واحد بالگوه يجر النفس

انخبصنه خبص بيها وهي ولا من ايد ولا من رجل
كلما بيها جسمها يخشب اكثر
زهرة : بسم الله الرحمن الرحيم ولجن أنتهت فرد نوبه امشي غاية بساع صيحي أمها

ركضت غاية لبست عباتها ومشت ماكو اقل الخمس دقايق طبت عمه متخردله والبنات وراها طبن گعدت گبال حواري

جرتها مني لحضنها تحاجيها وترچف
نجوى : ولج حور يمة فتحي عيونج

زهرة : صار شگد نگعد بيها وهي ماكو فلا فتحت عيونها

غضة : صيحن واحد من الولد مو مال تضل اكثر بعد

نجوى : عمة محد هنااا شلون بي راح تروح بتي من ايدي

ريحانة : حق بعده بالقرية انا شفت سيارته هسه من اجينه

غضة : جا امشي صيحي شمتانية

بلايه ماتحجي عدلت عباتها وطلعت وبصائر مشت وراها وانا ماخليت دعاء ما دعيته بس حتى تفتح عيونها طب حق والبنات گدامه وانا وخرت منها مأيسه

باوعلها ومبين خاف من
حالها
عبد الحق : شبيها حورية

زهرة : فقدت وصار بالربع ساعة هيج

عبد الحق : ربع ساااعة تحچن صدگ بساع عباتها ووخرن

بس وخرن دنگ شالها وبصائر نزعت عباتها وحطتها عليها وهو طلع بساع وامها وراها گعدت انا مهدود حيلي وكل فكري يمها والموجودين مو اقل من حالي حالها خربط احوالنه وخلانه نحير بزمانه چنه بوحده وصرنه بأثنين ياقهر بصائر وزادتها هسه حور

مشى الوكت واحنه على نفس الگعده وما گمنه الا من طب جدي وأبوي
أبوي بساع عرف اكو شي من باوع على البنات يمنه والهم مبين علينه

محمد : خير صاير شي

غضة : تعالوا اگعدوا

گعدوا أبوي وجدي وجده بساع گالتلهم
غضة : حواري تخربطت وضلت هواي فافقده

محمد : ياستار ياربي شني سالفتها

غضة : ما ناعرف صاحت راسي وبعد فقدت

رأجس : خاف مثل بصائر

غضة : هو اضن هيج

رأجس : خابرهم محمد شوفها شلون صارت

محمد : منو اخذهم

غضة : حق

هز رأسه بخوش وطلع مبايله من جيبة دگ على حق شوي وفتح خط وأبوي حط الموبايل على أذنه يسأل
محمد : ها عمي بشر

سكت شوي ومبين حق جاي يحجيله على حالة حواري
محمد : الحمدلله.. وشوكت تردون.. خوش هلا بيكم

سده وباوع لجدي
محمد : طالع عدها هبوط حاد الدكتور يگلهم زين ولحگتولها

ضلينه متانين جيتها وبس سمعنه صوت حق طلعنه كلنه طبت بس مو حواري هاي وحده تعبانه كل حيل مابيها حتى بدوسة الگاع احسن بيها تتوجع

تلگيتها وانا انزعها العباة وهي كلمة ما حجت ذابة كل ثگلها على أمها بس طبت گالت تريد تمشي لغرفة جده اخذتها للغرفة وحطيتلها مخده تمددت وهي عينها على الكانونه بأيدها

گعدت يمها اريدن احجيها حواري ما تسكت وبس المرض گدر يسكتها
_ ليش ضاله الكانونه بأيدج

بلعت ريگها وبالگوه كلمة كلمة گالت
حواري : بعد عدي مغذي ورا ما اكل

_ متغدية لو لا

هزت رأسها ب لا
حواري : انا احسن ما اگدر اكل

_ ماشية اسويلج وماكو ما اگدر

صحت جفون اجت گعدت يمها و انا مشيت للمطبخ طلعت صدور دجاج هم زين ما جامدات كلش خليتهن بالماي الحار حتى يموعن بساع

انداريت على صوت حق وراي
عبد الحق : خوية هيوف

_ هاا خوية

صفن شلون الحاير يحجي لو لا بس ما گدر يسكت من گلتله
_ إأمر رايد شي

عبد الحق : بس بلايه زحمه عليج ملحي اكلها زايد لان الدكتور وصاني

_ صار وبعد

عبد الحق : عدكم لبن

_ أي

عبد الحق : هم ملحي حتى يصعد ضغطها شوي

_ خوش

طلع بره ومبين يريد يدخن وانا ضليت افتر بالمطبخ بس كملت شلت صينيتها ومشيت للغرفة لگيتهن كلهن ملتمات يمها حتى جده خليت الصينيه گبالها وگلت لعمه توكلها وانا گعدت اباوع عليها بالگوه تبلع اللگمه
زهرة : ليش ما ضليتي يمنه المن مشيتي بلايه غده

غضة : جا أنت ما تعارفيهن اهم شي يدگن دروب

حواري : ها جده مو مريضة لا تاخذين غيبتي

غضة : كلشي مابيج هل طلع حسج ومعناها صحيتي

انتبهت حتى جده تحاول تحجيها وما تريدها تضل ساكته لان حواري والسكوت ما يچتمعن

گمت على صوت ليث يصيحني بس شافني طلعت گال
ليث : حضري الجاي ،شيخ خزعل وچبير أل عبود شيخ واحد جايينه

_ شگد يعني عددهم

ليث : بس يجون انا اگلج بس حسبي حساب اكثر من ثمان نفرات

_ خوش

مشى يصعد بساع يريد يبدل وانا طبيت للمطبخ ترست قوري الجاي الچبير وضليت أحظر الاستكاين ومن سمعت صوت برا باوعت من الجام الما أعرف شعجب جايبينه شفاف كلش ومو مثل ذاك الجام

طب شيخ واحد بعده نفسه ذاك نفس هيبته من شفته بذيج الطلابة الفتحت درب الطلايب الما ينعدن بيناتنه احنه وبيت غازي چنت جاهله بس كلش زين بعدني أتذكر وگفته بنصهم وهو يتوسل بچدي يرضى على طلبهم وچدي راكب راس قراره ما يتغير وبعد ذاك القرار انتهت كل علاقتنه احنه وبيت غازي وكل شخص يربطنه بيهم

وانا احطن الورگ انداريت على صوته
ضيرم : هاي مرتي هنا

أبتسمت وهديت القوري من ايدي من گال
ضيرم : تعاي يمي گبل لا يجي اخوج

من صرت قريبة منه گتله
_ شلونك

ضيرم : بشوفتج بأحسن حال

دنگت رأسي وهو حس بي خجلت غير السالفة من سألني
ضيرم : اهلي يمكم

_ أي يمنه

ضيرم : جا سويلي درب

مشيت گبله گلت للبنات يتسترن ورديت صحته طب هو وانا وراه أجيت وگفت بصفه يم الباب أبتسمت من شفت جده صافنه علينه وحاطه ايدها على خدها وما أعرف بشنو تهمس وي روحها وبس مشيت گعدت يمها وهو گعد يم حواري يستفسر على حالها

دنت روحها علي تگلي
غضة : الله كتبلي عمر وشفت طولكم سوه واگفين

أبتسمت وباوعتله هو هيج حلو لو لان انا احبنه اشوفه احلى واحد من بعد اخوتي گعدته وهيبته رزانتله وي الكل وبس يمي تتغير كل تفصيله بهاي الانسان انا احبنها

لزم ايدها يمسح على مكان الكانونه
ضيرم : باجر أخذج لدكتور صاحبي مو مال تضلين هيج كلساع ايدج مزرفة

حواري : رأسي موتني

ضيرم : اذا ماكله اطوها حباية وجع راس حتى يهود الوجع

زهرة : گومي يمة هيوفة جيبيلها

بلايه ما احجي گمت مشيت للمطبخ جبت الشريط وگلاص الماي ورديت اطيتهن اله هو اطاها الحباية وگلاص الماي شربت والوجع مبين عليها كلساع تغمض عيونها وترد تفتحهن وهو من عرف اكو عدها مخذي علگه الها وضل گاعد من مشى شوي منه هو طلع

°جفون°

گاعده بصفها وهي تحوس شوي وجرتني تشاورني
حواري : امشي اسمعي شكوا وتعاي گليلي

_ خايبه ولي

حواري : اذا ما تمشين اگومن انا والمغذي واشهركم

غميتها وگمت بلايه ما يحسن علي طلعت بس وصلت يم الديوان وصلتني اصواتهم العالية وحتى الولد جايين

صاح بيهم ومبين بزعانه روحه
شيخ واحد : شني ما تسكتوون لو امشي والله

شيخ خزعل : گول يا الله شيخ ما تعارفهم طگه ونص

شيخ واحد : على روحهم مو علي حاجيهم أبو محمد لا امشي منا وبعد تحرم علي دوسة قريتكم

رأجس : صخر ،عبدالحق ضيرم ،كافي اسكتوا

بس حجه جدي سكتوا
شيخ واحد : والله فلا يگدرلكم غيره صار ساعة محمد يگول اسكتوا ومابيكم واحد سد حلگه

محمد : جا ما تعارفهم تربية چدهم احنه ابهات هيج بس بالاسم

ضحك شيخ واحد وعمي مبين طافره روحه منهم كلهم
شيخ واحد : انا مشيتلهم امس وحاجيت غازي گال
ما يعارف بسوايته ولو اله علم چان من خلاه هيج يسوي

رأجس : والمعنى

شيخ واحد : عطوتكم ضاله سواية غريب انسوها لان انا هم سمعت گبل فتره أنتم هم موديلهم تهديد وصارت وحده بوحده

رأجس : صحيح بس ما دسنه بيت من بيوتهم

شيخ واحد : بس دايسين القرية مره حفيدك صخر الله يسلمه ومره كلهم وحتى بيومها ضاربين غريب

رأجس : جا گبلها هم هم داسوا قريتنه ولباب بيتي وصلوا

شيخ واحد : يا أبو محمد الغلط منكم ثنينكم تصالحوا وفضوا المشاكل لا يرحون بيها هاي الشباب

رأجس : افااا انا عگب كلشي اصالحهم والله ايدي لو انمدت للصلح وياهم اكسرها

شيخ واحد : جا تضلون هيج

شيخ خزعل : مايصير هيج أبو محمد يعني ثاراتكم هاي شوكت تخلص

رأجس : ابد ما تخلص وانا أيدي بأيدهم ما احطنها لو أخر يوم بعمري

شيخ واحد : الفات مات واحنه اولاد اليوم ابدوا صفحه جديده وانسوا الصار

رأجس : شأنسه تحجي صدگ شيخ

شيخ واحد : انا لخاطر هاي الشباب خايف عليهم الله وكيلك والشيطان شاطر

رأجس : تريد مني اصالحهم وأنت اكثر واحد شاهد على الصار گبل

شيخ واحد : لا تنسى الصار وياهم مو هين هم خسارتهم چبيره والسبب نعارفه

فزيت حاطه ايدي على گلبي من صار گبالي نوح مزغر عيونه ويباوعلي
نوح : شني شعدج هنا

عدلت وگفتي اريد ادبرلي چذبة
_ أجيت اگلكم تردون چاي

رفع حاجبه
نوح : واصدگ أنت تطلع منج

_ جا شبي مو بعينك

رجع خطوه وابتسم
نوح : بعيني وبگلبي هم

رمشت بعيوني اريدن افتهم شيقصد بس ما اطاني مجال افكر زايد من گال
نوح : امشي طبي بساع وبعد ما اريدن اشوفنج واگفه هنا

رفعتله حاجبي ومن شفته تحرك ومبين يريد يجيني صرت بيب بيب على گولة حواري وطرت جوه وانا حاطه ايدي على حلگي ضامه صوت ضحكتي
بس طبيت للمطبخ نزلت ايدي وضليت اباوع من الشباك بعده واگف بمكانه غمض عيونه ومن رد فتحهن مشى للديوان وانا رديت للغرفة گعدت يم حواري

ندستني
حواري : شصاير

_ شيخ واحد يريدهم يتصالحون وچدج قافل ماكو صلح

حواري : جدي ما يرتاح اذا ما تصخم روسنه

_ شوف هاي مني تحجي

حواري : والله انا بعد الشفته شلون رادوا يخطفونه كلت هذول كلشي يگدرون يسوون وحتى كتل يكتلون بدوم بارد لان حطيها براسج اليخطف كلشي يسوي

_ أي والله صدگ

ضلينا گاعدات نسولف منا لمن گضه المغذي وبصائر وخرته الها وردت گعدت شالت الكانونه وانا روحي وي روحها راحت
بصائر : خايبه خلصت فتحي عيونج

فتحت عيونها تباوع على مكان الكانونه ولامه وجهه بوجع عفت بصائر يمها وگمت من صاحتني هيوفة وغاية وراي طبت
هيوفة : جفون انا مو گتلج نضفي غرفة نوح وغاية غرفة ليث وانا نضفت غرفة صخر ليش صعدت لگيتهن على حطتهن

غاية : انا گلت اخلص الحوش واصعد بس تعرفين انخبصنه

هيوفة : ترا الولد راح يضلون يحجون بس يمشن البنات وعمة تصعدن تنضفن

غاية : جا نمونه اصعد شعدي

هيوفة : ها جفون شو مالج صوت

لميت ايدي الصدري
_ خلي غاية تنضفها غرفة ليث انضفها انا

ليث : غاية تنضف غرفتي

انداريت على صوته وراي ،حطيت ايدي على وجهي امثل البچي واگله
_ قهرتني.. قهرتني

ليث : ما عاش اليقهرج بس انا متعلم غاية تنضفها

وخرت ايدي من وجهي
_ الدنيا تدور ويجي يوم تگلي نضفيها واگلك لا خلي غاية تنضفها

مبتسم يحاچيني
ليث : لذلك الوكت عدي مره والله ما يعوزني لا عليج ولا على غاية

غاية : هاي بعدك ما متزوج وبعتنه

رفعلها حاجبه يداهرها
ليث : جا هاي الغريبة الراح تطب لبيت رأجس

هيوفة : اليسمعك يگول لاگيها

أبتسم ونصه صوته
ليث : اضن صدگ لگيتها ياخوية

هيوفة : گول والله

ليث : ما أعرف لا تحلفيني

هيوفة : اعارفها

هز رأسه ب أي وبساع طلع لان عرف راح نخبصه بأسلتنه
غاية : عود صدگ لگاها

هيوفة : اندري هو يگول اضن يعني ما متأكد

غاية : ما أعارف والله انا اتمنى ما يلگاها لان متاكده راح ينشلع گلبه

هيوفة : لكل حادث حديث امشن نطب

مشت گبلنه واحنه وراها بس طبيت للغرفة شفت بصائر جاي تلبس حواري عباتها
مشيت يمهن اسأل
_ شني راح تمشن

بصائر : أي صار هواي هنا وهم ريحانة ترتاح لان ضهرها هاج عليها

هزيت رأسي ب خوش
_ بس عينچن على حواري

نجوى : جا شلون ما عينه عليها

_ باجر امتحانج أقري شلون ما چان وبس تخلصين الامتحان خل واحد من الولد يطلعج

حواري : هو هيج لان اعارف روحي ما اتحمل اضلن بالمدرسة

مشت لازمتها بصائر طلعن وعمه وريحانة گبلهن وانا والبنات وعمة وراهن بس ودعناهن بالمطبخ وطلعن واحنه ردينه بعدني ما گاعده واجتني هيوفة گالت امشي نضفي غرفة نوح

اخذت المكناسة ادردم انا هيج التنضيف يتعب نفسيتي

من فتت من غرفة ليث لگيتها مفتوحه مديت
راسي من الباب لگيت تعزل الهدوم صحت بيها
_ الله يطيني من واهسج شوي

غاية : خايبة دمشي راح يجون ترا

_ نضفيها أنت حباااابه

رفعت الحذاء مال ليث
غاية : تولين لو اطگج بيها

ضحكت ورديت ليوره من حسيت صدگ راح تشمرها طگيتها ركضة للغرفة وبس طبيت فتحت عيوني وحلگي مصدومه بالهوسة چن فد رمانة زينة طاگه بيها

اباوع على الغرفة واحجي وي روحي
_ شگد مخررربط

شلت الهدوم من الگاع اصفن ما جاي اعارف الوصخ من النضيف هذا يحجي صدگ خابطهن خبط من غير هوسة الكنتور المفتحه بيبانه لو الچرباية المسويها ميز مال دراسة والاوارق والكتب مطشرات عليها

حرت منين ابدي ومنين اخلص شگد حجيت عليه وانا الم الأوراق والكتب رتبتهن وحطيتهن ع الميز بصف الجرباية ومشيت للهدوم البلگاع كلهن نزلتهن للغساله لان شيعرفني النضيف من الوصخ ومو مال اگعد اشمشم بيهن حرام

جبت المكناسة اكنس وگشور الحب يطافر انشلع گلبي
_ماكو هيج بشررر خااااايس ولا چن اخوه صخر

بلعت ريگي وهديت المكناسة من ايدي من سمعت صوت الباب ينفتح رفعت راسي اباوعله من گال

نوح : هاي وعود الباب مسدود وكلمة الخايس أجت ترس أذني

ركضت لشالي ع الميز اللبسه وهو طب ورد الباب باوعتله وباوعت للباب
_ ليش سديته

نوح : جا واذا

_ افتح الباب مايصير

رمشت بعيوني من شفته يتقدم علي درت وجهي بساع من صار قريب مني وبعد ما اگدر ارجع اكثر لان ضهري انضرب بالكنتور

وگف گبالي احسن بي مركز بي بس انا دايره وجهي منه الساني انبلع اريدن احجي واگله وخر بس سبقني من گال
نوح : ليش تشردين مني

عضيت طرف شفتي اريدن اسيطر ع التوتر الغريب الجاي احسن بي بالگوه همست اسمه وانا ارفع ايدي اريده يوخر وگفته گبالي كلش ضوجتني

_ نوح

نوح : هاا يا شحمته

باوعت بوجهه وعيني صارت بعينة مركز بي بكل ما عده من حيل رمشت درت عيوني بساع وهو حس ووخر انا كل جسمي صار يرجف گعدت على الچرباية مدنگه وبين ما هدت رچفتي رفعت راسي اريدن اتعارك وياه بس ما لگيته گبالي ولا بكل الغرفة طلع وانا ما حسيت بيه

بالگوه رديت انضف بالغرفة وبس كملت نزلت ادور هيوفة بس طبيت بالمطبخ شفتها واگفه تسوي عشه مشيت يمها وانا اگولن منفعله

_ شبي اخوج شبي نوح تصرفاته راح تخبلني

اندارتلي تسويلي بايدها بمعنى نصي صوتج وگفت يمها وانا احسن روحي طافره
_ شبي.. شبييي تصرفاته صايره ما اعارف شلونها عقلي راح يوگف والله

هيوفة : خايبة شبيج غير افتهم شمسوي خلصتيها علي تصرفاته وتصرفاته

اخذت نفس وانا احاول انصي صوتي واحجي مثل الاودام
_ كلما شافني وشمرلي حجاية يوم اغديلج ما اعرف شني واليوم يگلي شحمتي

أبتسمت ودارت للطباخ مشيت وگفت بصفها
_ احجي وي روحي انا لو شني

هيوفة : وخري خل اخلص فاطسة ارواحهم من الجوع

_ احجيلي شبي اخوج

هيوفة : وانا شمدريني شو وخري لا اهفج بالطاوة

وخرت منها اتأفأف ومشيت للغرفة طلعت كتبي وگعدت اقره وحتى من صاحوني علمود العشه ما طلعت وضليت اقره بس خلصت مشيت سويتلي لفة مال چبن وحميت الجاي وگعدت اكل وانا طنگورتي واصله لبيت غازي غازات

رفعت راسي على صوت ليث باوعتله مبدل ومبين يريد يمشي للگيعان
ليث : شعدج گاعده هنا

_ جاي اكل

ليث : المطبخ بارد لاتضلين هنا هواي

هزيت رأسي ب أي وهو أبتسم ومشى يلبس حذائه وبس خلص نكث هدومه ومشى وانا غسلت وطبيت جوه اعيد بكلشي من تصرفاته براسي وغير
ذاك التفسير ماكو بس كل ما اجه بفكري انفض راسي وانا كلي رفض لأي احتمال بيه هو

°بركة°

طلعت بأيدي ماعون تمن فوگاه مرگه من غدانه ضميتهن وما عولت ينامون حتى اطلع مشيت والدرب اضلم گلبي يتراجف من الخوف بس كلما افكر ما صار چم يوم ما ماكل اتشچع اكمل دربي واگولن
_ انا جاي اسوي خير والله راح يوگفلي لو صار شي لان نيتي طيبه

بس وصلت لذيج الغرفة طلعت المفتاح الاخذته امس من حق مطيه اله ضيرم لان ماگدر يمشيله هو طلعله شغل وكلفه بداله بس أخوي نسه وضل ملتهي بالطلابه وهل بشر الهنا كاتله الضيم لگمه ما حاط بحلگه كل ضني ما راح الگاه عايش بس صدمني من فتحت الباب ورفع راسة بساع علي

بلعت ريگي متوتره احسن برجليه بادن خفت منه ومن هيئته الضخمه

مشيت وانا اسمي بسم الله حطيت الماعون وفوگاه الخاشوگه وبلايه ما اباوعله گلت
_ جبتلك اكل.. اكل واطيني الماعون ارده وياي

بصوت ناصي بس بي خشونه گال
رهيب : اذا مبين عليج الخوف هيج ليش أجيتي

درت وجهي عليه بس بلايه ما اباوعله طگطگت اصابعي مدنگه
_ أجيت اجيبلك اكل

رهيب : ومنو گالج انا جوعان

_ صار هواي ما ماكل شلون مو جوعان

رهيب : يعني أل غضب طلع بيهم واحد عده ضمير

باوعتله حايره شأرد التعب مبين عليه وقله للأكل مذبله من ضخامته بس بعده هو ذاك الگعدته خوفتني من اول مره باوعتله بيها من الشباك همست

_ اكل

رهيب : زاد أل غضب ما يدخل زردومي اخذي وياج ومشكورة

_ اكل لا يصير بيك شي

أبتسم بطرف شفته
رهيب : يعني خايفة لايصير بي شي واهلج يتورطون مو لان عدج ضمير

_ شبيك وياي فوگ ما سويتلك زين

رهيب : دمج خسيس بتهم منو يضمن الاكل ما بي شي

_ شلون اثبتلك مابي شي

صفن بوجهي من حس جاي احجي بكل جديه
رهيب : اكلي منه حتى اصدگج

هزيت راسي ب أي وبالخاشوكة شلت شوي من التمن واكلت وبس نزلتها من ايدي گال
رهيب : جيبي الماعون

مشيت اطي اله بس من باوعت على ايده نزلت الماعون بالگع افتح بالحبل الرابطين بي ايده وبس خلصت رديت اطيته الماعون وگعدت اباوعله كاتله الجوع ياكل بسرعة وماطول اقل من 5 دقايق وطاني الماعون مديت ايدي على الخاشوگه بأيده

_ اطينياها

رهيب : خليها عدي

_ شتسوي بيها

رهيب : حتى من تجيبلي اكل بعد عدي خاشوگه

وانا من كل عقلي صدگته
رهيب : شدي ايدي

عگدت حاجبي عود صدگ يحجي وين اكو واحد يگل للخاطفينه شدوا ايدي
رهيب : شبيج صفنتي

_ هيج

شديت ايده وگبل لا اطلع درت وجهي عليه
_ رايد شي بعد

هز راسه ب لا وانا طلعت وقفلت الباب ورديت للبيت وانا ادعي ما يلگفوني بس طبيت وشفت الهدوء حمدت الله وشكرته علگت المفاتيح بمكانهن وغسلت الماعون وهم رديته بالكاونتر ومشيت للغرفة
بس طبيت ضميت روحي بفراشي وانا افكر السويته
صح لو غلط وشيصير بي لو عرفوا انا متصرفه بكيفي

°كوكبة°

خالتي الثانية تباوعلي وترد تباوع لخالتي بشرى
وتگلها
_ صبر ونال شلون صيده صيدته

صفنت بوجهن يعني امي ماجانت تحجي مجرد حجي والگالته صدگ
بشرى : شتوكليها نادية وهيج الوجه يشع شع

بأبتسامه گلت
_ يوكلوني تكفخ ورا كل وجبه كتله دسمه

ضحكت واندارت الامي وكل ضنها انا اتشاقه عفتهن ومشيت للغرفة امشط بشعري اتعارك وياه موتني طويل حيل ومكسر كلش كلها تگلي لايگلج بس انا ابد ما احبنه لان شالع گلبي

وبس خلصت مشيت للمطبخ طبيت وبعد ما طلعت سكينة سوتها صدگ وشردت وانا من خبصة الغده بعد شوي وابجي

من أيست وعرفت بروحي وحدي لو اموت ما الحگ صعدت فوگ بساع دگيت باب غرفتها وطبيت لگيتها گاعده على الجرباية وصافنه

_ خايبة انزلي وياي ما الحگ

سكينة : ابد والله فلا أنزل لان كلش زين اعرف اموتن من الحرگه اليوم

_ خايبه لخاطري مو تگولين انا أختج والله بعدني
لا مخلصة الزلاطة ولا التمن والسمج بالفرن وحده يرادله وگفه

باوعتلي حايرة ومن رديت گتلها
_ بس انخلص اصعدي

گامت لبست شالها ونزلت وياي وانا وياها ركضنه ركض الا خلصنه ومن شافت كلش كامل ردت صعدت وانا ما الومنها لان من صدگ خالاتي فلا ينحملن

وانا افرش بالسفره اسمع خالتي بشرى وامي يسولفن ما اعرف ليش ركزت يمهن من سمعت كلمة "نسوانه"

نادية : شوفي ياخية رزق الله لو ثنينهن حبل لو ضال گلبه مشلوع على ريحة البزر

بشرى : بس هاي بيها وليد امس درينة

اندارت امي على خالتي الثانية
نادية : وأنت بتج

وداد : بنية ماضل شي وتچيب

نادية : جا شبيها ماسوت جدول ولد هسه تچيب ولد وبتج تفلس من كلشي وهو بلايه شي يباوع لحلگها

وداد : اندري ما حطيت ببالي سالفة الجدول

بشرى : لا تخافن كلها چم يوم ويصير ما يشوفها بعينه

اسمع امي ضحكت بصوت ناصي وانا مسوية روحي بالي ولا يمهن
نادية : لازم بديتي شغل عليها

ضحكت خالتي بلايه ماترد وانا گلبي انعصر عصر وصار كل بالي يم المگروده الصارت چنتها شجابها شوداها خالاتي ما ينجرعن والما يجي مثل ما يردن يشغلن سوالفهن واعمالهن الشيطانيه عليه

مابيهن وحده تحركت انا وحدي انشلع گلبي انگل بالاكل
على السفره وهن گاعدات يسولفن بس خلصت گتلهن
_ تفضلن خالاتي

وبگلبي گلت
_ المسمومات

التمن على السفره وانا محسبة حساب ما اگعد وياهن عزلت الي والسكينة اكل وصعدته فوگ بلايه ما ينتبهن بس طبيت وشافتني گامت من الجرباية

سكينة : الله چابج كتلني الجوع

_ عرفت تعاي اگعدي

حطيت الصنينة بالگاع وتگابلنه انا وياها مسحنه الصنينة مسح وگبل لا انزل گتلها
_ ما راح اخذها من يولن نزليها خوش

سكينة : خوش

نزلت ركض بوجهي للمطبخ حضرت الجاي لان بعدهن ياكلن ويسولفن بس خلصن لميت السفره و وديتلهن الجاي طاح حضي بالمواعين وزفرتهن بس خلصت طلعت گعدت بالحوش ما اريدن اطبن جوه يمهن كلش اضوج من گعدتهن وسوالفهن الي ما تعجبني

رفعت راسي على صوت الباب أنفتح وانا بلايه حجاب من شفته مرتضى ابن خالتي بشرى طفرت اركض اطبن جوه واحجي عليه بيني وبين روحي

_ ذوق ماكو وين اكو واحد يطب بلايه ما يدگ الباب بس امك بشرى شأترجه منك

جريت عبات امي المعلگه من سمعته يتحمحم
صحت
_ تفضل

طب يباوعلي بكل صلافه درت وجهي منه من بس رديت خزرته من سمعته يگول
مرتضى : شلونها مرتي

ضحك من شاف عيوني تريد تطلع على گد ما ضجت من حجايته

مرتضى : شبيج شحجينه

_ ترا عيب اهينك زحمة بحق شواربك

ابد ما چان متوقع ردي خرزني ولو بيده يفصل راسي عن جسمي
مرتضى : ادبسزز اذا ما ربيتج على ايدي شوفي

_ خاب تحلم ويلا ولي يم امك روح نام بحضنها خل تخليك تسرح بأحلامك زين

انا على گد ما گلبي مورم منهم اريد بس واحد افرش بي ضوجتي وهو اجه والله جابة بس ما أعارف شلون كض نفسه وعبرني بلاية ما يحجي
بس ما جنت أعارف راح انسحل سحله زينه اليوم
منوره حجاياتي وياه

طب سلم وانا وراه اللبس بحجابي واغلط عليه بگلبي اندار باوعلي ورد باوع الامي يشكيلها مني

مرتضى : شني هاي بتج خاله شو فرد نوب ما تحترم

امي بساع خزرتني
نادية : ليش شسوت

مرتضى : تگلي ولي بحضن امك

بشرى : يااا ياااا

نادية : صدگ ولج

هي موته موته عاد اموت مرفوعة راس
_ أي

بشرى : فلك شني وفوگاها تعترف

أمي بساع انگلب لونها وسوتلي حركة البسيطة بايدها وگدامهم تلزگلي بس انا اعارف من راح يمشون تقوم القيامة علي
نادية : اعذرها يا خالة جاهل وما تفتهم

باوعلي وهز رأسه ب أي وانا مشيت للغرفة ذبيت حجابي وگعدت افكر وين اطي وجهي لو اجوي وامي حجتلهم

وصدگ بس مشوا طبتلي امي هاجمه علي من كل كتر بجسمي خلت أثر ضرباتها وما اكتفت من طب حسن أخوي وسألها ليش ضربتيها حجتله وهو الثاني كمل علي

عافوني بس مثل الجثة الواگعتلها من فد مكان عالي هيج احسن جسمي مفلش تفلش وكلاتي گامت علي من أثر البوكسي الضربة الي الليل كله انا اللوبن طبتلي سكينة ومن شافتي بهذا الحال حارت شلون تدعي عليهم

گومتني اغسل وانا كل خطوة ادوسن الگاع بيها روحي تطلع مني وترد مو يوم صار مثل الجحيم علي كل مره من يجن ويمشن انا لازم انكتل حتى
لو حاجيتلي حجاية بلاية قصد مو انوب حجيت وانا متقصده

بلعت ريگي احسن بدوم ينزل من خشمي خليت ايدي على وجهي وصدگ جان خشمي ينزف حارت بي سكينة تغسلي ويرد ينزف واخذله بالربع ساعة هيج

صفنت بوجهي تسألني
سكينة : هم ضاربج على خشمج

هزيت راسي ب لا
سكينة : جا ليش هيج ينزف

_ ما أعارف

طببتني للغرفة وهي قهرها يمكن اكثر من قهري تمددت وغطتني ضلت گاعده يمي شوي ومن شافتني اريدن انام مشت

بس انا ابد ما چنت اريدن انام چنت امثل النعاس حتى من تصعد انا امشي لمكاني

كل حيل ماعدي امشي بس ماعدي مكان يحتويني غير الگاع والبيها ماعدي أحد اشكيله ويسمعلي غير بس الشط انا ماعدي احد يسمعلي ويگلي كلمة تطيب خاطري وتنسيني الوجع انا خلصت عمري مكسورة

لبست عباتي وعبرت وانا امشي اردد بگلبي سورة الأنشراح حتى تروح خنگتي

باوعت من بعيد على مكاني الاگعد بي وضليت صافنه من لمحت احد گاعد بي مشيت حتى اصير قريبة اكثر وگمزت من شفت..


شكرا لزيارتكم عالم روايات سكيرهوم

تعليقات