رواية العدم نقطة السواد الفصل الثامن عشر بقلم اسراء
امي تسودنت عيونها صارن براسها
گامت تضرب على خده تريده يعاين عليها
لميعة -: يمه عاينلي عاين بوجهي يبعدي ترا انه سويت هيچ لمصلحتك هاي البت مو من ثوبك يمه انه ما استغليتك انه خابرت صنديد حتى اطلعك من هذا البير الي شمرت روحك بي
آنه واگفه وراه اعاين لچتافه مهدوم وايديه يرجف رجف ساكت وكل احنا نعرف حيادر من يسكت بشنو يفكر من يسكت يعني الدنيا احترگت بگلبه
امي لزمته من چتافه تهز بي تهززز تريد تطلع الحچي منه گوه
لميعة -: يمه انه والله ردت مصلحتك انه من دزيت صنديد عليها حسبالي يلعب بعقلها شوية وتعوفك ما حسبالي يحبها صدگ ويريدها على اخيتك وما لگيت غير ادزك انت تمنعه حتى هي تكرهك وما تجي بدربك وانت تعوف دربها
واخيرا اول مرة يعاين بعيونها من طب صنديد لهسه عض على شفته الجوه الي صايره نيل من الگرض
السيد -: جزاچ الله خير حجيه خربتي صورتي بعيونها بس انت منهو يزين صورتچ بعيني بعد
گالها وكض صدره يفرك على جهة گلبه النفس گام يجره گوه وامي من سمعت حچايته فزت تهز راسها ب لا و ايدها راحت على ايده الحاطها على صدره
لميعة-: لا يمه لا تحچي هيچ لا تخسر الجنة الجوا اجدامي لخاطر بت يمه يابعد هلي وهيبتهم وكرمهم
دفع ايديها وهي رجعت حطتها على گلبه تفرك بي گام يريد يطلع من البيت كله وهيه فزت بساع كضته من امتونه تبچي وتشهگ كضت وجهه تريده يعاينلها وهو ماكو قفل صاد وجهه بصفحه
لميعة -: لا يمه سامحني انه سويت هيچ حتى احافظ عليك حتى ما تاخذك وحده ما تستاهلك يمه يبعد چبدي لا تگول خربت صورتي بعينك انت صورتي انت هيبتي انت هلي
بچينه كلنا عليهم حتى مغوار وجهه صار احمر ودار وجهه للباب وايده على خصره
وامي سحبتها كفاية تغسل بوجها وتسمي عليها
گعدتها بالگاع لأن رجليها ما عاد تشيلها
حيدر الكرار -: مغوار
_ هاا
_ صيح شلهب
فتح طريق ل رفيدا بأيده
السيد -: يلا علوية جدامي بويه جدامي
هي لمت ثوبها عليها ومشت جدامه وقبل لا يطلع وگف بباب الصالة التفت و عاين ع الكل على امي وعلينا احنا البنات دمعته بطرف عينه
_ نذرت عمري الكم و يوم حبيت ولا واحد بيكم ولا گواد بيكم وگف وياي حتى انت حجية لميعة حتى انت خربتي صورتي بعين عشگ صباي
وانطاها ظهره ومشى نفض الچراوية على چتفه
حيدر-: حنينة لمي هدوم العلوية وحطيهن بالباب
وجدة هلالة نايمة بالگاع شخيرها واصل للقمر الصناعي والنفاضة يمها متروسة گطوف وباكيت الجگاير مال مغوار بأيدها ماتدري شصاير بالدنيا
ما لحگ يطلع و امي ركضت عليه
لميعة -: اوگفي لچ بت شااااكر
صوتها رج البيت رج مغوار كضها من ايدها وهمس
مغوار -: يمه سكتي فضحتينا عوفي العلوية بحالها
وهي ماكو انفجرت تنفض ايدها من ايد مغوار وتأشر على رفيدا اللي واگفه بالطرمه والسمة بدت تطمر خفيف عليهم
حيدر صار جدامها حاميها بزنده بدون ما يجيسها
لميعة -:مو هذا التريديه اجيتي تاخذين ابني مني
طلعت يمهم بالطرمه ومغوار يسكت بيها وهي تشمر بأيديها وتعيط وتمثل الكلام التگوله بأيديها
لميعة -: چنتي كل طولچ شبر من چنت اجي على بيت خالچ بگد النملة تركضين حافية ووراچ شلهب و ذو الكفل
كضيت حافة الباب اعاين عليهم وابچي
لميعة -: چان حيدر عمره 13 سنة توه بادي يطلع شاربه وانت 3 سنين من ذاك الوكت وانت لازگه بي مثل الگملايه وين ما يروح وراه تلعبين بشعره وتضحكيله حتى عيونه تحطين اصبعچ بيهن متعجبه بلونهن وهو جاهل ما يفتهم تعلگ بيچ ومن يصيحچ تركضين تختلين ورا عباية امچ تسوين روحچ مستحيه وانت بايعه من ذاك الوكت وانت راسمة تاخذين ابني مني
حيدر عض على شفته
وجهه صار احمر من القهر
حيدر الكرار -: حجية كافي
لميعة -: لاااا مووو كافييي خل تسمع
كملت وهي تدگدگ وتأشر ل رفيدا الخاتله ورا ضهر حيادر
لميعة -: والمرة الوراها من اجينه هو 16 وانت 6 چان زلمة طول بعرض وشواربه تخبل شيخ الشباب گلت هساع يعوفها گلت كيلاس بت خالته موجوده بيضة حلوه وعيونها زرگ گلت راح ينساها بس بختچ گوي من طبينه للبيت اول وحدة سأل عليها انت گال وين رفة
رفيدا فاتحه حلگها مصدومه تتصفن يمكن جاي تتذكر شي و المطر ينزل على وجها
لميعة -: وچان يطگگگ ويموووت من يعاين ل صنديد يگعدچ على رجليه ويشيلچ على متونه وانت تحبينه عكس حيدر ما تعبرينه تگولين هذا الامريكي عيونه زرگ يخوفني وابني يطحل بروحه طحل من القهر ويزورك شفايفه الا يطلع دمهن من غيرته عليچ چنتي مكارة نوب تحبينه نوب تكرهينه انت مكااارة بت مكارة
حيدر التفت على رفيدا يريد يشوف ردة فعلها
ويهزلها راسه بـ لا يعني
" لا تصدگيها "
لميعة -: گلت هاي نزوة جهال وتروح گلت طيش مراهق ويعقل الى ان رجعنه من بيت خالچ وحيدر طاح ذليل الفراش ساعة 3 بليل صعدت حرارته ويهذري بيچ رفة .. رفة
وآنه گاعده يمه وابچي يمه كوون ترف روحچ وتصعد لباريها ونخلص منچ
كلمة رفة خلت رفيدا ترفع راسها تعاين ل حيادر مصدومة هساع يلا تذكرت منو چان يصيحها هيچ
لميعة -: اقرة عليه وما يفيد يغفه بألف يا علي ويفز مثل المسودن اخذه للدكتور ما يعرف دواه وآنه ادري دواه انت حرمته من دواه حتى ازيحچ من دربه
حيدر صاح بيها
حيدر -: گلت كااافي حجية شني ما تسمعين
لميعة -: لا مو كافي خليها تسمع شمسويه بيك بلچن تحس على روحها وبعد ما اشوفن وجها ببيتي
اخذت نفس و كفاية جابتلها ماي ومغوار يفرك بأيديها يهدي بيها ويكللها يمه كافي عوفي البت راح تروح هساع نصيح اخوها ياخذها وهي ماكو فصلت خرطت الاول والتالي
لميعة -: ولجل عيونچ ذني التوحات درس انكليزي بمچان حلمه چان يريد صيدلة وصار مترجم وية الامريكان بس حتى يضل يتذكر سالفتچ من تگليله الامريكي
رفيدا عيونها غرگت بدمعها
لميعة -: صار وية الامريكان وگلنه نساچ وكيلاس بس الاستهواها گلبه بس انصدمت من اول ما طلع تعيينه سوة واسطة ونقل دوامه لصلاح الدين حتى بس يگابل وجهچ الفگر يبت شاكر
حيدر چان يگدر يخلي امي تسكت بس حسيته متعمد يخليها تكمل لأن حتى هو مشتاگ يتذكر شلون عشگها امي مسحت وجها من الماي وكملت
لميعة -: اي انه الدزيت صنديد وخليته يدمرتچ وانت زغيره حتى لا تكبرين حتى لا يشوفچ ابني حلوة وياخذچ چنت اريد اكسر بختچ من انت زغيرة بس بختچ گوي اجه جابچ گوه عاند هله واعمامه وهساع هو واخوانه مهددين ينكتلون على مودچ وهو بعده لازگ بيچ ما يريد يطلگچ وانت تريدين الطلاگ ما عاجبچ ام خشم اليابس روحي عساچ لا تتوفقين لا دنيا ولا آخرة
حيدر جر رفيدا من جوه المطر من شافها تبللت ودخلها جوه الطرمه يعاين لوجها خايف عليها شفايفها ترجف وامي تسودنت
لميعة -: اي جرها خايف عليها تبلل خايف على عشگ صباك لا يمرض خايف على رفة گلبه وامه عايفها
شال غترته الخضرة من على چتافه
الغترة ام الحضرة الي ما يعوفها حتى بنومته خلاها على راسها ولفها بحرص واحد يلف روحه مدنگ راسه يتفحص ملامحها الي ما گدر الزمن يغيرها بگلبه خدودها حمر وعيونها مورمه
همس الها
_ لا تبچين علوية دخيل الحضرة لا تبچين
وهي تريد تحچي ما تگدر حيدر التفت على امي الي واگفه ولهساع تحچي ما بطلت
_ حجية طبي جوه
مايفيد تريد تحچي وخزرها
وبنفس هدوئه گاللها
_ حجية گلت طبي جوه
دارت وجهها وطبت دفعتني بچتفي
لميعة -: ايي اطب
رحت وگفت بصف مغوار وتوا اريد احچي شو هذا خزرني وانطاني نظرة بمعنى
" طبي جوه "
مغوار -: حنينة
حنين -: اي خويه
سديت الباب بس خليته مفتوح شويه اعاين عليهم بنص عين سمعت حيدر يگول ل ابا الفضل يصيح شلهب دقايق واجه من الديوانيه بس ما اشوفه لان صاير بالجهة الثانية وگلبي تسارعات نبضاته من سمعت صوته ويا خوفي يصير بحر من الدم بسبب الراح يگوله شلهب
رفيدا ::
ما ادري شلون اجه ما استوعبت من گالولي شلهب هنا شفته گدامي و انصدمت مو هو بالتدريب شجابه هسه يمكن اخذ اجازة من شاف الدنيا انهدت فوگ راسي
تسالموا على اعصابهم وشلهب وجهه احمر وطبرة خشمه مخليه ملامحه الحادة أحد
تراجع شلهب وتنفس من خشمه ما طايق روحه و گالها بسرعه
شلهب -: خابرتني على موضوع ضروري خير
حيدر باوعلي ورجع باوع لشلهب
حيدر -: خابرتك حتى اردلك الامانة مثل ما اخذتها
شلهب حواجبه انطبگن على بعض تقدم خطوة وفر ايده بوجه حيدر ومن حچه يدري بالموضوع بس تغابه ويريد يسمعها منه
شلهب -: شترجع
حيدر -: اخيتك حرمتي اردها لك معززة مكرمة مثل ما اخذتها اظفرها ما جسته وهاي هي جدامك اذا تريد تضل على ذمتي وحرمة اليه احطها بعيني واغمض جفني عليها القرار راجعلها
شلهب دار عيونه عليه
_ تريدين تطلگين
ما گدرت احچي هزيت راسي ب اي
ودموعي نزلن وحدهن على خدي
رفيدا -: ما اريد اضل هنا محد يحبني اهله ما يحبوني
حيدر گالها بسرعة يريد يلحگ على دموعي قبل لا توگع وصار يبرر من كل عقله
حيدر -: علوية انت راعية البيت واحنه خطارچ من چبيرنا لصغيرنا جدامچ
لمحت مغوار ليغاد منه يتفرج ويضحك على حچاية اخوه ويفر بايده ومن حركة شفايفه افتهمته يگول "استلم"
وشلهب مادري شلون طفر من گدامي وجر حيدر من ياخته وعيونه تصب شر صب
شلهب -: شنو تاخذ وتطلگ بكيفك هيي گوااااد اخيتي مو لعبة عندك انت و الخلفوك
حيدر لزم ايده وحچه وياه بهدوء
حيدر -: خوية اخيتك هي الما تريد ماتريد العيشة وياي انه ما طاردها هي چازه مني وانه وعدتها اردها يمك واريدن اوفي بوعدي
شلهب تخبل رفع ايده ولزم ياخته بايديه الثنتين ولزگه ع الحايط مغوار راد يتدخل وحيدر ما خلاه
حيدر -: لااااا مغوار عوفنه نتفاهم بيناتنه
ورفع ايديه لزم ايدين شلهب اثنينهن
حيدر -: خوية هي مو گوه انه ما اجبر حرمة تضل يمي غصب هي بعدها زغيرة وانظلمت وياي انه عمري ما يوالف عمرها
شلهب عيونه دم وصوته طلع رج المكان رج
ويه كل كلمة يگولها عيونه تطلع بوجه حيدر
شلهب -: لااا تظن اروح واجي على بيتك عبالك نسييييت شسوووويت بيهااا
حيدر خلاه براحته يگدر يدفعه يگدر يضربه بس مخلي براحته احتراما اليه
حيدر -: گلي شنو اليرضيك ويرضيها العلوية ما رايده تضل تريد اجبرها
شلهب هد ياخته وقرب وجهه من وجه حيدر
وحچه بمكر وشيطنه واضحه بصوته
شلهب -: اكو طريقة ترضيني بس ما اظن ترضيك
حيدر طبگ حواجبه شك بس راد يتأكد
حيدر -: شني
شلهب -: تنطيني اختك اخذها فد شهر زمان واردها مطلگة مثل ما رديت اختي حتى نتصافى
گالها و بعد ماحسيت الا حيدر واخوانه شامريه ع الحايط وخانگي ما لحگت اشوف منو لزم منو من سرعتهم ما عاد افرق حيدر من اخوانه بس اسمعهم واحد يگول للثاني عوفه الي
ركضت ما ادري شلون و لزمت ايد حيدر الخانگه شلهب من رگبته
رفيدا -: عوفه الله يخليك سيد
سييييد عوووفه هو مو قصده بس لان عصبي هيچ حجه
شلهب ضرب راسه براس حيدر
اخوانه فار دمهم نترو بوجهه ونزلوا بي بوكسات واحد يضرب على حلگه والثاني ببطنه
شلهب -: وخررري انا كلشي احچي عن قصد ما عندي شي بدون قصدد اررريد اختهممم اريد اشوف يقبلون اختهم تصير مطلگه بهالزغر
فاروا عليه ونزلوا بي دگ بوكسات يريد يحچي ما يگدر دحست روحي بنصهم ادفع بحيدر وادفع باخوانه مغوار لزمته بالغلط من شافني رجع ليوره بسرعه استحى يطخ بيه احتراما لاخوه وصاح بأخوانه يرجعون ورا
وگعت يم شلهب امسح الدم بشالي من وجها
رفيدا -: عوفوووه لا تضربونه محد ضل الي بس هو وانت سيد تريد تسلبني اخوي بعد ما امك سلبتني اهلي
خزرني وفر ايده يأشر على شلهب الگضوه گضي من الضرب گوه يجر النفس وبعده يرادد مايسكت
حيدر -: خوب خلي اخوچ يعرف يسولف مثل الوادم
شلهب گام مسح طبرة خشمه النبع الدم منها وتقدم على حيدر صدره يعلى وينزل ووجه اصبع السبابه على صدر حيدر
شلهب -: الما ترضونه على خواتكم لا ترضونه على بنات الناس
مغوار گمز يريد يخمطه من من دشداشته وآني طفرت گدامه فردت ايديه من شافني صرت گدامه تراجع خطوة يحاچي من بعيد
مغوار -: خاااب انجب ما تعرف تسولف انت حيدر ماله غرض هي امي دزت صنديد عليكم وضل وراها ومن طلع يحبها وصارت الشغلة صدگ امي گالت لحيدر وحيدر تسودن لان هو رايد اختك يعني ما استغلهااا مو علمود اخيتنااا هديييل
شلهب -: خلي هالحچي يفيدكم انا ما ارضى الا حار بحار تطلگون اختي جيبولي اختكم اعقد عليها واخليها فترة بـ..
ما لحگ يكملها و ابا الفضل مادري شلون طفر من گدامي و رگعه ببوكس على خشمه انفتح طبر خشمه وگام يصب دم على وجهه تلازموا واحد لازم الثاني حيدر چان يضرب بي ومن شافني ابچي واملخ بخدودي دفع اخوانه يفاكك بيهم و يقنع ب مغوار النايم بوكسات على راس شلهب
_ مغوار عوفه ولك عووفه يازمال لا تضربه كااافيييي يا زمال العلوية راح يصير بيها شي
على صوت صياحهم اجه سليم من برا وذو الفقار وابا الحسن بالگوة فاككوهم دفعوا مغوار عن شلهب ولزموا مغوار من جهة و شلهب لازمين صدره من جهة ثانية
مغوار رفع اصبعه بوجه شلهب وجهه احمر من القهر وگوه يحچي يلهث
مغوار -: العلوية مرت اخونه وهي اخيتي وانه اول واحد بأخواني ما رايد هالطلاگ بس هي تريد شنسويلهاا نجبررهاا
شلهب بغمزة -: اي انطوني اختكم اعقد عليها
ما كملها وگمزوا عليه الثلاثه مغوار وابا الفضل وذو الفقار وهو شلهب يصارع بيهم يمعط هذا كله وذاك بوكس وهذا دفرة وهم ما يفيد فقدوا وحيدر طايح بيها يحجز بينهم وعينه كل شوية تصير عليه
سليم جر مغوار وحيدر جر ابا الفضل و ذو الفقار واخذوهم يگعدوهم بالديوانيه مشيت وراهم لا اراديا رجليه مشن وحدهن وحيدر يمشي گدامي
التفت عليه خازرني فر ايده ووجهه صاير ازرگ ودم شفايفه الزرگه نابع
حيدر -: وووين رايحة
_ اريد اضل يم اخوي
_ ما نجيسه بعلي ما اخلي احد يجيسه
رفيدا -: جذاب خليني يمكم لان من تشوفني ما تجيسه
باوع وراي وخزر اقوى التفتت وراي وشفت حنين بالباب تبچي عيونها مورمه حيدر عاط بيها
_ طبي جوه رجليچ ابترهاااا اذا عاينتلچ طالعه برااا
حنين بسرعه سدت الباب وهو مشى يريد يروح للديوانيه وانه بلا وعي لزمت زنده
_ سيد
التفت عليه طابگ حواجبه وعرگ گصته يصب
السيد : سحنتي للسيد يابويه موعتي گلبه شبيچ
_ اخذني وياك
_ كلها زلم
_ انت موجود ما اخاف حتلو زلم
التفت باوع لباب الديوانيه ايده على خصره وهمس ويه روحه
حيدر -: سودنتي گلبه للسيد يابويه مرمرتي
رجع التفتلي
حيدر -: يلا جدامي علوية بس ما اريد بچي دمعة من عينچ واخليهم كوم لحم بعلي
مسحت خشمي بغترته الخضرة ومشيت گدامه وهو وراي طبينه للديوان وهو سد الباب
التفتت
وشفت اخوانه الاربعة موجودين وياهم سليم عيوني افترت عليهم ولمحت اسلحة ضخمة معلگة بالحايط من كل جهة اثنين اول مرة افوت هنا بلعت ريگي حسيت روحي فارة وطبت بنص بزازين
الشر يتطاير من عيونهم واگفين ومچتفين ايديهم على صدورهم عيونهم على شلهب الواگف ومرتچي ع الحايط ويهز بحذائه على اي لحظة يتكامشون
وگفت بصف اخوي لزمته من زنده حتى اذا گمزوا عليه اصير گدامه وهو مسح على راسي عدل وگفته وخلى عينه بعين حيدر
حيدر -: شلهب هذا مو حل تريد اخيتي شني هي ثارات هذا زواج عشرة عمر مو لعبة
شلهب -: ايييي وامك من سلطت صنديد عليها ودمرتها ورجعت سلطتك انت عليها واستغلت حبك الها ما گالت لعبة لا شو انا اريد اكسر خشمها لهاي العلوية مالتكم
ما كمل كلامها وگمزوا عليه مغوار اول واحد
طفرت گدامهم وفردت ايدي الثنين على جسم شلهب حضنته من گدام وصحت بيهم ب لا
غصبا عليهم رجعوا ليوره ما يريدون يطخوني صدورهم تهبط وتعلى انفاسهم مسموعة شفطو اوكسجين الديوانية كله
شلهب -: انا راح اخذ اختي هسه بس باچر اجي وياي شيخ اعقد على اخيتكم هي كلها فترة واردها لبيتكم
ما شفت حيدر شلون وصله بس سمعت طگة البوكس بخشم شلهب و شلهب رجعله البوكس بخشمه وتلازموا
انگلب الديوان سليم وذو الفقار يفاككون يجرون بهذا ويجرون بذاك ذو الفقار دفعنا اني و شلهب برا طلعنا للطرمه
ذو الفقار -: روحوا هساع هذا ما يتفاهم تسودن ما عاد يعاين لدربه
شلهب مسح دمه بظهر ايده وباوع على باب البيت
شلهب -: گول لعلويتكم شاربي هذا (ولزم شاربه) ازينه بالقندرة اذا ما رجعتلها السوته باختي
جر ايدي مشينا لباب الحوش وذو الفقار طب جوه
شلهب طلع موبايله الصرصر وضرب الباب الحديد برجله كل ضربة تطلع نار من گلبي
شگيت وصلة من الشال مالي وخليته على خشمه حتى يوگف النزيف وهو اخذه من ايدي رايح راد ما يوگف بمكان
شلهب -: ارد السووه وياي باختهم حنين والله لأررردهاااا اطلع ابن گح** اذا ما رديتهاا
باوع عليه روحه طافره
شلهب -: ضلي هنا بس اشوف سيارة من خرب لشة ابوي وشيبة الخلف ابوي وخلاني بهيچ بهذلة
طلع يدور وبقيت وحدي الدنيا ليل و الكهرباء جاية بس المنطقة ظلمة گلوب واحد بعيد يرمش
سمعت خطوات وراي التفتت وشفته هو
حيدر -: هذا الزمال وين راح
رفيدا -: طلع برا يأجر سيارة
_ الزمال ليش ما گلي چان وصلتكم
_ م.. ما ادري
نزلت دمعتي ما گدرت الزمها هو شافني وزفر بقهر
_ شكو شبيچ تبچين اخخ سحنتي گلبي سحن بعلي سحنتي سحن
_ اريد اروح ويا اخوي
_ روحي بويه روحي لا تبچين راح تخلصين من السيد وضيمه
نزعت غترته الخضرة من على راسي و مديتها اله
_ هاك
_ خليها على چتافچ ثوبچ خفيف
_ لا ما اريده
عض اصبعه شايط مني
_ من تصلين اشمريه لا تضميه حتى لا يذكرچ بيه هيچ زين علوية
اجه شلهب من الشارع يصيح
شلهب-: ها شبي الزمال اجه يتوسل بيج ترجعيله والله لو يرافس هيچ هيچ جدامي وتطلع روحه بعد ايده الخايسه المعفنه ماتجيسچ
حيدر -: بالك على اختك يا زمال لا تخليني افتح راسك مثل ما فتحت خشمك
شلهب -: محد غيرك زمال ولا تنسى تحضرلي اختك
حيدر -: احضرلك شلون كتله ازوعك حليب امك الرضعته
شلهب -: اي يلا حضرلي حنين حضرهاااا
حيدر گمز يريد يگمشه وشلهب سحبني من ايدي وگمز برا وسد الباب الحديد بوجهه حيدر فتح الباب رافع ايده يريد يضربه ومن شافني بوجهه نزلها
رفيدا : ترفع ايدك عليه
_ آسف حيونه مني حسبالي ذاك الزمال
_ لا تعيدها
_ ما اعيدها انه زمال اذا اعيدها
ضحكت وجوه سمعت مغوار يصيح
مغوار -: شبي هذا
خزر شلهب اللي واگف وراي وگال
حيدر -: يريدني ازوعه حليب امه من خشمه، عوفه
جرني شلهب من ايدي و حيدر سد الباب وطب جوه رحنا نمشي و شلهب اشر على سيارة مارسيدس طابگة بنهاية الفرع
شلهب -: ذيچ السيارة اجرتها مشينه
صعدنه السيارة قديمة وريحتها ما طيبة كلها تراب سندت راسي ع الجامه والهوى يضرب المطر بوجهي بارد لان الصيف دا يخلص واحنا على ابواب الشته
حنين ::
گاعدين بالصاله انه وامي وخواتي لا حس ولا نفس ساكتين بس صوت المطر برا وصوت امي تزفر انفاسها بعصبيه محروگ گلبها من رفيدا
الباب انفتح و طبوا اخواني خمستهم
ذو الفقار اول واحد وراه حيدر وجهه اسود وايديه ترجف مو من البرد من القهر سوده عليه يا خويه وراهم ابا الحسن وابا الفضل ومغوار
امي وگفت على حيلها بس شافتهم
لميعة -: هااا شبي هذا وهي راحت ويا اخوها
ذو الفقار عاين لحيادر و ما حچه حيادر گعد ع القنفه حط راسه بين ايديه وگالها بتعب
حيدر -: يريد حنينة
لميعة -: شلووون يعني يريد اختكممم
مغوار گعد بصف حيادر وجاوب ببداله
مغوار -: يريد يريد يعقد عليها فترة ويطلگها مثل ما حيادر يريد يطلگ اخته حار بحار يگول
نصي راح بالگاع و وجهي صار نار
امي شهگت ايدها لطمت على صدرها
لميعة -: شنووو يريد حنينة ابن الچلب يريد بتي
ابا الفضل -: اي يمه وگال شاربي ازينه بالقندرة اذا ما اخذتها
ابا الحسن -: والله اذا يظل يجيب طاري اختي على لسانه اگصلهياااه انا الاگصه بايدي
مغوار -: خل يجي باچر ويجيب الشيخ مالته الا ادفنه هو والشيخ بالديوانيه
امي گامت تفتر بالصالة و تلطم على راسها وتشمر بأيديها
لميعة -: هذا كله من وره ذيچ البت اجت وفتحت علينا باب ما ينسد
ابا الحسن -: يمه لا تظلمين العلوية مالها ذنب الذنب ذنب اخوها الزمال
ذو الفقار -: حيادر انت شتگول احنا ما ننطيها السمه اگرب له منها
حيدر گام وگف بنصهم رغم هو ازغر من ذو الفقار بس حچايته مسموعة
حيدر -: ما ننطيها حنينة اختي گبل لا تكون اختكم بس الزلمه هساع شايط على اخته يريد يثأر انطوه مجال يبرد باچر انه اروح له احاچيه رجال لرجال مو بالبوگسات الزلمة غشيم
مغوار -: غشيم يجيب طاري اختي اغسل وجهه بدمه اذا يجيب طاريها مرة ثانية بعلي
حيدر -: مغوار حنينة اختي انه هم وغيرتي عليها اكثر منك بس اذا نضل نتعارك راح تصير مذبحة وانه ما اريدن اختي تنذل ولا اخت الناس تنذل
تخيلت لو جدة هلالة گاعده چان شهرت امي شهيرة وشبعتها رزايل بس نامت بغرفة مغوار من زمان وساده الباب عليها شخيرها واصل للحلة
رجليه ما شالتني من الفشلة والخوف وهما يتناقشون بموضوعي رحت للمطبخ لميت روحي ورا الثلاجة اتسمع عليهم واسمع امي تصيح
لميعة -: والله حيادر يمه اذا انطيتوها اله الا اشرد من البيت ما اگعد وياكم افضحكممم بعلي
حيدر ما يرد عليها زعلان على سوايتها
ابا الحسن رد بمچانه
حيدر -: محد ينطيها اله يمه بس لا تگلبين الدنيا باچر حيادر يتفاهم وياه واذا بقى على عناده انه اعرف شلون اربيه
اشتد الحديث بينهم من مغوار فتح موضوع حيادر و رفيدا ولأول مره ذو الفقار ينفجر ويعلي صوته على امي
ذو الفقار -: انت دمرتي العلوية ودمرتي بنتچ وابنچ بعد منهووو راح تدمرررين يمه گوليلي خلصوا ولدچ لو بعد
لميعة -: انه اريدن مصلحتكم اريد ازوجكم بنات اوادم والهن اصل وفصل مو بت شاكر الما وراها اهل
ذو الفقار ضرب القنفة برجله
ذو الفقار -: مصلحتنه هاي مصلحة عاينيله عايني لوجهه هذا ابنچ عايني لوجهه من القهر مو هذاك حيادر اخوي الاعرفه وجهه اسود وايديه ترررعش حسبالك شايب عمره 60 سنة شسويتي بي يمه دمرتي
لميعة -: شسويت قابل هاي فوگ ما اريد ازوجكم بنات اوادم والهن اصل وفصل هيچ تحاچوني
ابا الفضل تدخل بالحديث
ابا الفضل -: و كيلاس شلونها هي هاي اختيارچ بربچ مريضة ما تعرف تحچي تصرفاتها مال زعاطيط هاي العلوية اميرة يمها
لميعة -: يممه كيلاس بنت خالتكم من لحمكم ودمكم
ذو الفقار -: لحمنا ودمنا ما نريدها افتهمتي انت خربتي زواج حيادر خليتي العلوية تظن هو استغلها طلعتي انت مخططة لكلشي انت عگربة يمه عگربة مو ام
لميعة -: انه عگربة انه الي ربيتكم وكبرتكم صرت عگربة
ذو الفقار -: اي عگربة لان لو ام صدگ ما تسوين هيچ بابنچ شفتي حيدر شحاله عايني لوجهه هذا اخوي الزغير تفگتي الرمايه وكت اليعيل بينه احد وترديني ما اشيل همه
حيدر الكرار -: ذو الفقار كافي
ذو الفقار -: لا مو كافي خلي تسمع انت بيدچ خليتي العلوية تطلع من البيت وهي اختنا چانت اختناااا
مغوار -: والله يا يمه لو يجي اخوها باچر انه ما عندي اخت انطيها حنينة لو يگطعون لحمي وصل وصل ما انطيها لزمال مثل هذا
لميعة -: محد ياخذها انه ما انطيها سدوا الموضوع عاد
ابا الحسن -: انت ما تنطين انت اول وحدة بعتي اخوي حتى بس تسوين البراسچ وما تصعب عليچ تضحين ب حنينة هم
تعالت اصواتهم صياحهم وصل لسابع جار
وكلهم هدئوا على صوت دگة تلفون حيادر
حيدر الكرار -: هذا ابن عمي قبيس
فتح الخط وخلاه سبيكر
حيدر الكرار -: الو
قبيس من ذيج الصفحة صوته هادئ و وراه اصوات زلم هواي يحچون اصواتهم عاليه
قبيس -: هاا حيدر شلونك ابن العم عساك مرتاح وانت نايم ببيتكم وبت عمنا بالمستشفى تصارع الموت والوادم تاكل بشرفها
حيدر الكرار -: شتريد قبيس
قبيس -: شريد الوادم جاي تحچي بشرف بت عمنا كيلاس ولان ما جيت انت لخطبتكم الوادم شاكه بشرفها واحنا ما نسكت تسمعني ما نسكت
حيدر الكرار -: وانه شكو
قبيس -: شكو.. انت خطيبها انت سترها اذا انت ما تسترها منو يسترها الك مهلة منا لباچر العصر ننتظرک ببيت عمتنه بديعة ام كيلاس و اذا ما تجي بحر من الدم راح يصير بينه وبينكم واول نگطة راح تنزف بهالبحر منكم انت او واحد من اخوانك ما احددلك منو بس واحد منكم راح يروح بيها وانت مجرب بيت آل نهاش شلونهم بالطگ
مغوار گام يصيح راد يحچي وياه وحيدر سكته
حيدر-: بحر دم هههههههههه ضحكتني قبيس ولك انت تغرگ بطاسة جاي تحچيلي ببحر تعال لاوينه واحدنه يسبح ببحر الدم سبح وانت جاي تهددني بي اخواني اذا واحد منهم گام يردم بحرك انت وآل نهاش كلهم
ذو الفقار صاح بغضب
ذو الفقار -: عيني ابو البحر انتم حتى نهر ما صايرين مسوين رواحكم تحجون ببحور دم اخواني سباع تخسى تلاويهم يا عار
ابا الحسن -: جاي تهددنه ولك اخواني كل واحد بيهم اذا يزمخ ينشف البحر مالتك روح بابا روح لا تسويلي افلام
قبيس -: انه ما اهدد انه انطي علم
حيدر -: حرمتي وطلگتها وهذا چان مطلبكم هاهيه طلگتها وصرت مو ملزوم اتزوج بت عمكم
قبيس ضحك بحقارة
قبيس -: ايييي اتفقنا اذا ما تطلگ حرمتك نرفع عليك قضية الزواج من قاصر وهي ما تريدك ف ياااا سلام القضية تصير اسهل وتنوخذ البت منك بالقوه وترد لابوها المريض الي يريد يطم عارها وانت ما قصرت من خوفك عليها طلگتها وودعتها يم اخوها بس موضوع بت عمنا ما خلص تعقد عليها لان السوالف كثرت بشرفها
حيدر -: اسمعيني زين قبوسه كيلاس مو مرتي وما تصير مرتي ولو على شرفكم انتو ملزومين بي مو انه احنا من فتحنه ع الدنيا انتوا بدرب واحنا بدرب ولا حسبالك ولد عم ف محد يگلي او يجبرني شنو اتصرف
قبيس -: باچر العصر اذا ما جيت لا تلوم الا نفسك سيد
حيدر طبگ الخط بوجهه
مغوار ضرب شي قريب منه
مغوار-: ابن الچلب ولكم آنه الا اغرگه ببحر الدم الي يحچي بي اخلي آل نهاش يلگطون لحمه من الگاع لحمه لحمه
اليوم الثاني مر طبيعي
اخواني طلعوا بس اخذوا حذرهم شالوا اسلحتهم وياهم كلهم الا حيادر بايع روحه وما سائل طلع بدون سلاح گال
" ما يهمني انه عمري خلصان "
العصريه امي وخواتي وميرج برا البنات يغسلن بالطرمة وامي وجدة هلالة گاعدات بالثيلات الا انه خايفه رايحه راده اعاين للساعة المعلگه بالصاله صارت ب3.. ب4.. ب5.. گلبي يدگ ويا الميل
امي گالت مشتهية عصريه ف رحت للمطبح سويتلهن وسويت چاي ثگيل ل جده هلالة و طلعته برا امي تاكل وتسولف ولا كأن شي صاير
لميعة -: ولدي اسباع محد يگدرلهم المهم زحت بت شاكر من درب ابني
حنين -: حرام عليچ يمه لهسه مصدومه بيچ طلعتي انت السبب وحيدر ما استغلها يعني من راح منع زواجها چان يحبها ورايدها ليش هيچ سويتي
لميعة -: انچبي انت شمفهمچ انه اريدن مصلحته
ما رديت لأن النقاش مايجيب نتيجة وياها شلت الصينية وطبيت انظف الديوانيه شفت سلاح حيادر الكلاشنكوف الجعاره محطوط ع القنفه السفنج عافه هذا الزمال عافه ما يرتاح اذا ما يمرد گلبي عليه
كملت وطلعت اسگي بالشتلات مال البرتقال والرمان والليمون بالصونده الماي بارد يطفر على رجلي
وفجأة
شگ هدوء العصرية صوت رمي طلقات صلي بفرعنه الچاي طاح من ايد امي وبلا وعي كلنا ركضنا للباب الخارجي شفنه الزلم ملتمه على شي بالگاع وگلبي ماع من شفت ابا الحسن اجه مفرفح شاگ زيج دشداشته ويلطم على وجهه صابغ روحه صبغ ويعيط مفجوع!! ...
ابا الحسن -: يا خوويه .. يا حيلي .. يااااا يمممه ذبحووو اخوي طگو خووويه يا يمه طگوووه جدامي طگووه وانه اعاينله .. يا يمممه دمه ترس ايدي .. يا يمممممه هذا دم اخووي .
فاتح ايديه الثنين متروسات دم .. ودشداشته كلها دم .. گلبي انماص وصرت ما اشوفن عدل .. يا يمه هذا دم منو يا اخو من اخواني؟؟! !
امي لطمت على وجهه وطاحت بالگاع على ركبها
و كفاية كضتها سندتها
لميعة -: منوووو؟؟ منووو من اخوااانك ؟؟؟ .
ابا الحسن -: مغواااار يا يمممه .. قبيس .. قبيس ابن نهاش هو وربعه صوبووووه .. يا يمه طگوه جدامي وانه اعاين مالحگت اشيلنه ، شالوا تابوتي يممممه كون شالو تابوتي قبل لا يشيلووه .
طحت بالگاع رجليه ماتن ، حيلي باد صبغت روحي صبغ
حنين-: لااااا يا يمه لا مو اخوي مو مغوار يا يمممه مغواااار يا خوويه يا يمممه گوموني ودووني عليه اردن اشوفن خووويه .
وجدة تلطم على راسها بثنين ايديها
حجية هلالة-: يمممه مااتتت امك ياحبوبة احووي احوووييي مااتت حبوبتك يا حبوبه احووييي صوبوا امك يحبوبة ريت صوابك بيها احووييي احوويي يا حبوبه عمت عيني .
على اثر عياطنه وبرمشة عين انترس بابنه وفرعنه نسوان ، منهن اجن على امي يهدن بيها.. ومنهن يهدن بيه وب سهام و كفاية
ابا الحسن طاح بحضني مفرفح بدم مغوار ويشهگ دشداشته مشگگة ويعيط مفجوع
ابا الحسن -: يا خووويه مغوواار رحت من ايدي يا خويه .
شبگت من راسه وضميته على صدري اعيط وابچي وياه ، دم هدومه صبغ ثوبي
ابا الحسن -: رموه .. رموه ، قبيس الچلب قبيس رماااه يا بويه .
وامي گوه كاضاتها النسوان تريد تروح تشوفه
الزلم محاوطينه كلشي ما مبين من عنده بس مخبوصين خبص ناس تروح هيچ وناس تركض هيچ ، لمحت سليم من بينهم ايده على خصره ويخابر مدري على منو ..
لميعة -: يمممه يا مغواارر يوليدي يا يمممه يمدلل اخوانك لا يا يمممه لا تموت وتچوي گلبي
وانه ودموعي مغوشة عيوني شفت سيارة حيدر تشحط شحط بالشارع .. طبت حيل سريع وطبگت يم الزلم نزل مفجوع دشداشته مفتوحة من الياخة وجهه مورم من اللطم وايده تضرب على صدره دماراته طالعة ورگبته مشخطه ، دفع الزلم وطب بنصهم يصيح
_ ولكمم خووويه اريدن خوويه اريدن خزرة عيوني ، يا بويه يا چيلة اخوك يا خويه .
اعاين له من بعيد هيچ مفرفح هيچ ضايع اول مرة اشوفن حيادر بهالضعف .. حيادر ابو الجعارة عزيز ابوي و خيبر جدة هلالة وسند اخوانه ، طايح على ركبه بنص الزلم ما اشوفنه بس اسمعنه يلطم وصوته انبح من العياط ، دموعي نزلت حرگت خدي
دقايق مرت ودموعي مغوشة عيوني شفته .. طلع من نص الزلم
_ عدلللل اخووووي عدل ولكم اخويه عدللل يا بويه خويه عدللل .
صوته فطر گلبي ، دفع الزلم دفع وطلع دشداشته مشگوگة من ياخته والچراويه على چتافه ، عيونه دم ما يعاين جدامه
طب للبيت يركض .. وانه عفت ابا الحسن مفرفح بأيد كفاية وگمت اركض وراه
حنين-: حيادر خوويه حياااادر شلونه مغوار؟؟ ولككك حاچيني شلوونه خوويه؟؟؟ .
ما يرد ، لحگتنه امي و سهام و كفاية وابا الحسن ونسوان جوارينه هم
لميعة-: حبيبي حيادر يمممه اخووك يممه وليدي اخووك شبي مااات؟؟؟ يممه لا تچذب گللنه ماات؟؟! !
طب للديوانيه مثل المسودن ينثر ، يگلب بالقنفات السفنج ، يدور ع الهويه مال مغوار
حيدر-: عدل خوويه عدللل ولكمم عدلل
لا تگولون مات لا تگولوها عدل هو عدل .. بس وحگ ذاك اللفاه الچفن اذا ما گعد اذا راح مني وحگ النايم جوه التراب لأخلي امهات تنحب ونسوان تترمل وزلم تتعايط ، ادفن چتاله وياه بفد گبر .
طاحن خواتي على رجليهن يحمدن الله ويدعن
وانه عيني على حاله عيونه ابد ما يبشرن بخير ، عيونه دم وايديه يرجفن رجيييف
حيدر الكرار-: ذوله صاوبوا عيني ما صاوبوا مغوار .. عيني الصاوبوهااااا ، بس الله ينطيني حيل لأطلع سواديني على الخلفوهم .
يحجي ويشمر بالمخاديد ، بالمصلايات ، المعرض كله نثره نثر وطيح المزهريات
حيدر-: الهوية وين .. وين الهووووويةةة .
لمحتها بالگاع شلتها ومديتها اله
حنين-: هاي.. هاي خويه.. هاي الهوية .
اخذها مني ايده ترعش حطها بجيب صدره
وطلع يمشي سريع ، لحگناه لباب الحوش ايدينه على گلوبنه شفنه ابا الحسن وذو الفقار ينتظرونه .. فاتحين الباب الخلفي مال السيارة وممددين مغوار بيها و ذو الفقار حاط راس مغوار على گلبه حيييل وينوح يلوب يلوب مفرفح شعره مخربط ومرته وبناته يبچن عليه بالباب واگفات ، والزلم كلها ملتمة حواليهم ماگدرنه نروح نشوفه ..
صعد حيادر جدام يسوق و ابا الحسن بصفه وابا الفضل راد يروح وحيادر ما خلاه گله ابقى يم الحريم وحركوا السيارة ومشوا اطاراتها عاطت بالفرع ونثرت التراب علينا
ضلينا انه وامي وخواتي ونسوان اثنين يمنه ندعي يرد النه بالسلامة
لميعة-: يا علي لا تفجعني بوليدي يا بو فاضل لا تشلعه من عرج عيني وتاخذه ، ردلياه يابو فاضل ردلياااااهه .
شالنها النسوان من الگاع يهدن بيها و انه امسح على ضهرها
طببنه ابا الفضل للحديقه وكفاية غسلت وجهه ع الصوندة برا وانه رحت جبت له ماي اخذ الدولكه الستيل مني ايده ترجف شرب
ابا الفضل-: الحمد لله.. الحمد لله ربي ستر ولطف.. چيلتين وحده شاطه خاصرته و وحده قريبة على صدره بس ادعن ما واصله الرية .
كلنا-: يارب ما واصله يارب يا علي كون يگوم عدل ومابي شي دخيلك يابو فاضل .
وامي مانزلت ايديها رافعتهن للسمه تدعي تسمع خبر زين
وساعات مرت من الانتظار صلينا ودعينا يردلنه ونذرنا وماكو خبر .. نتصل على حيادر مغلق وذو الفقار هم مغلق .. والنسوان ما راحن گاعدات وذيج راس الحية بديعة خاتلة هي وبتها ما شفناها ابد، كل الصار بسببهن وعلي ، لگمة ما فاتت بحلگنا واگفين على نار نروح ونرد عيونه ع الباب
وباليوم الثاني .. دگت الساعة 7 المغرب واحنا ما طاحت من حلگنا الدعوات.. بالحديقه دنصلي وتوا انه طابگة المصلايه وامي بعدها ما مسلمة وتدعي ل مغوار عيونها وارمات
وفات علينا حيادر! ! ..
لا.. مو حيادر الي طلع الصبح ، حيدر ثاني هذا
خيبر حيدر الكرار مثل ماتگول حبوبة هلالة :
" خيبر لو ما علي چان ما طاح سوره وبابه
ودارنه لو ما حيدر چا اتفرهدت احبابه ".
اسراء :
توضيح صغير : بالنسبة للي فهموا كلام حجية هلالة كمقارنة ، فمو هذا القصد أبدا، حيدر ما انذكر ك"مثل الإمام علي" بمقامه ، حاشاه إنما حجية هلالة تشوف بي شجاعة وهيبة ورثها من جده الامام علي عليه السلام ، ولهذا هيچ گالت ك تشبيه بالصفة والشجاعة ، مو بالمقام والمنزلة ..
طب چن زلزلال عبرني غترته السوده لافها على رگبته ملثم بيها ودشداشته مصبوغه من دم مغوار
ما حچه راح راسا للديوانية لحگته و وراي امي والبنات ، شال الكلاشنكوف الجعارة من على القنفه وفحصه سحب المخزن شافه و طگ الاقسام طگتين سريعات عاين ببطنها ورجع المخزن
احنا وامي فزينه
امي شهگت حطت ايدها على حلگها ، عرفت شيريد يسوي وانه وخواتي كضينه طرف دشداشته ، جسمي كله يرعش .. گتله
_ حيادر فدوه .. حيادر لا
ما عاين علينا.. عيونه ع الجعارة حواجبه طابگهن
وعرگه يصب من گصته
لميعة -: ها يمه؟ شتريد تسوي؟ اخووك شلونه؟ .
ما جاوبها التفت على ابا الفضل وابا الحسن وگال بصوت يرهب
حيدر الكرار -: اكو مثل يڪول الزلم تموت على حگها.. وانه ما اموت الا اخذ حگ اخوي .
ابا الحسن كاض شماغه وينضف بسلاحه ويعاين ل حيدر ، ابتسم ب شر وگال
_ وعلي لأخلي امه تولول عليه .
حيدر رفع الجعارة بأيد وحده وخله طرفها على صدر ابا الحسن ودفعه
حيدر الكرار-: الي يطيح زلمة من عدنه نطيح عشرة من عده.. هذا مبدأ انه ماشي عليه .
ابا الفضل-: استلممم .. بابا انچبوا اخافن عليكم بعلي، الامور ماتنحل هيچ .
لميعة -: يمه حاچوني شتريدون تسوون؟ اخوكم شلونه؟ عدل اخوكم عدل؟؟ .
كلامها چان ويا حيدر بس ما جاوبها، ابا الحسن جاوب بمچانه
_ عدل يمه.. عدل بس دمه انهدر وانه اليوم اهدر دم ابهاتهم .
لميعة -: چا اذا هيچي روحوا يمه .. لا تردون الا ودمه على اديكم، ارفعوا راسي .
ابا الفضل-: يمه حرام تشجعيهم ع المشاكل بالله كتلوه وابتلوا بدمه؟ منين تجيبيلهم زلمه بمچانه؟ ترا الدكتور گال مغوار زين حتى صحى من البنج وحچه ويه ذو الفقار ، حالته جاي تتحسن .
ابا الحسن -: والله لأشرب الگاع من دمه ..ولكم انه ينهدر دم اخوي واضل ساكت چني حرمة؟ من همداااني .
ابا الفضل -: انچب انت تتنفس طلايب ، هساع نروح لقبيس نحچي وياه ونتفاهم بهدوء ، اكيد موجود ببيتهم اللي هين وكلها تعرف هو الصوبه ف ماراح ينكر .
حيدر الكرار -: ما عندي حچي ويه واحد صوب اخوي.. اريدن دم بدم ، الي هدر دم اخوي اهدر دمه ودم اليطلع بضهره .
لميعة -: اييي هذوله ولدي مو حرامات الحليب الرضعتوه اذا رديتوا ثار اخوكم .. روح وبيض وجهي لا تردلي خايب يمه حويدر ، خل الوادم تعرف لميعة شخلفت .
رادوا يبدلدون هدومهم.، رحت انه و كفاية جبنالهم دشاديشهم غيروهن وتوجهوا للباب يريد يطلعون ركضت سديت الباب بجسمي وجهي اصفر، صرت بوجه حيادر
حنين -: حيادر لا تروح الله يخليك ، مغوار عدل الدكتور گال زين لا تروح وتهدر دمهم وهم راح يهدرون دمكم وماتخلص هسالفة ، ذولة شياطين ما يخافون الله .
حيدر -: ادني من جدامي حنينة هذا اخوي هذا چيلتي تفگتي وكت العرك ، اذا ما اردن ثاره الليلة
اطم روحي بفد گبر اشرفلي .
حنين -: واذا طگوك؟ واذا رحت وما رديت؟ احنا شلون بينا؟ .
خله ايده على راسي مسح على شعري
حيدر الكرار -: اذا متت ادعيلي وگولي اخوي مات وهو يرد ثار اخوانه .. واذا رديت بعلي لاخلي قبيس يتمنى لو ما صوب مغوار .
تعدوني ودفعوا الباب وطلعوا ثلاثتهم
الغتر مشمره على چتافهم والشر بعيونهم
يا خوفي هاي الهداده تفتح بحر من الدم علينه
طلعت حبوبة هلالة بوجهم، جانت تنتظرهم برا رفعت عوجيتها عليهم
حجية هلالة -: ولكاامم وين؟ وين رايحين ؟؟ حيدر؟ ابا الفضل ولك سلبوح وانت ابا الحسن حبوبة وين خيركم ؟ .
حيدر ما رد يريد يعبرها و سدت الباب بعوجيتها
حجية هلالة -: لا تطلعون ولكم .. لا تطلعون انه ما اريدن يصير دم بينكم .. ذولة ولد اعمامكم من لحمكم ودمكم .
ابا الحسن -: حبوبة هما البدوا بهذا الدم مو احنا هما الي هددونه ببحر دم واول نگطة بهذا البحر دم مغوار .. ودمهم هو الراح يترسه ، اذا عفت حگي ما اتسمى ابن شروگيه .
حجية هلالة -: يا يمه اخوكم عدل .. عدل الحمد لله لا ترحون تذبحون ارواحكم اذا راح واحد منكم شلون بيه انه ولكم حبوبة ؟؟ منو يضل ليه ؟؟ .
حيدر باس ايدها .. وباس راسها
وهي فرحت كضت وجها بثنين ايديها وتسمي عليه
حيدر الكرار -: حبوبة.. لو اخوچ انطگ تعوفين ثاره ؟ .
سكتت و دموعها طاحن
حجية هلالة -: لا يا يمه.. بس انه خايفة عليكم، ذوله ولد الانبارية دمهم حامي وانتم دمكم حامي يا بعد حبوبتكم ، اخافن عليكم انه .
حيدر الكرار -: حبوبة حطي ايدچ بمي بارد .. ولد الشروگيه ياخذون حگهم احنه ما ينخاف علينا .
گالها وعاين ل ابا الحسن يضحك
ابا الحسن -: احنا ينخاف من عدنا .
امي وراهم تهوس
لميعة -: خلهم يرحون حجية خلهم يشوفون الشروگيه شتجيب .
حبوبة خزرت امي
حجية هلالة-: انت انچعمي لا بهاي ( ورفعت عوجيتها) اجي احوس بفادچ حوس وعلي انت ام الفتن .
وبعدين التفتت لحيدر تعدل الغترة على چتافه
هلالة -: روح حبوبة .. بس ردلي سالم اهم شي تردلي سالم انت واخوتك يابعد امك واهل امك وطوايفهم يحبوبة .
گالتها وعاينت ل امي تبتسم تستفز بيها
حيدر هز راسه وطلع، دزيت ابا الفضل وياهم حتى خافن يصير شي هوا يتصرف.. و وراهم جدة تدعي شالت دولكة الماي من الگاع ورشتها على دربهم، كملت وفترت على امي عوجيتها بايدها .
حجية هلالة -: هاه.. ارتاحيتي هساع ؟؟ برد گلبچ يسلبوحه يبت السلبوح ؟؟ .
امي فرت حلگها وگعدت بالگاع فتحت شيلتها تهفي بيها
لميعة -: شسويت انه .
جدتي ضربت عوجيتها بالگاع
حجية هلالة -: گولي شنهو الضل وما سويتي؟ انت خربتي بيوت ولدچ .. انت العاندتي الا تاخذين هاي السلبوحه كيلاس ل حويدر .. هاي المگروده الي ما تعرف تفرگ بين الچاي والشوربه ، عاااندتييي الا ازوجها لابني الا .
لميعة -: حجيه انه اريدن مصلحتهم.. وهي بت اختي .
حجية هلالة -: مصلحة؟؟ يا مصلحة؟؟ هاي مصلحة ولدچ واحد نايم بالمستشفى دمه سايح وثلاثة رايحين يذبحون .. هاي مصلحتهم يالعگربة؟ .
انه و كفاية و سهام خاتلين بالزويه ما نتدخل لان حبوبة هلالة من تحچي حتى الحايط يسكت مو بس احنا .
حجيى هلالة -: انه من گتلچ عوفي الصبي .. الصبي يحب العلوية .. يحبها عميه انت؟ ما تشوفين؟ گال لا ما اريد بت عمي راح وجاب العلوية من ورانه وانت رحتي هجمتي بيته .. هساع ارتاحيتي ؟؟ شفتي شسويتي باحفادي ؟ .
لميعة -: عمه هو حيدر ..
هلالة -: انچعمي لا تگولين حيدر.. وابو فاضل اذا صارلهم شي اريدنهم منچ، اروحن لعمهم هذاك الانباري واخلي يراويچ شغل الله بس هذاك دواچ .
وكملت تضرب بعوجيتها ..
حجية هلالة -: انه صگارتچ من يوم الاجيتي لهذا البيت وانه اصگرچ وانت عگربة ما تتربين امچ هم چانت عگربة مثلچ .
لميعة -: حجيه لا تدخلين امي بالموضوع .
حجية هلالة -: ادخلها ونص هي الربتچ على هالملعنة انه لو بيدي ارد ل حيدر علويته هساع ويجيبها هين .. وانت تخدميها حتى تتربين وتبطلين تهجمين بيوت ولدچ .
متت ضحك رغم الخوف والبچي بس حبوية هلالة من تگول "اصگرچ" تضحكني لأن فعلا امي تخاف منها ، كفاية كضتني تگرص بيه
كفاية -: اسكتي .. تالي تلوف علينه .
وحبوبة بعدهي تصيح على امي وامي ساكته اول مره من سنين اشوفن امي ساكتة وما ترد بس تفر بحلگها
كملت وافترت علينا شافتنه نضحك، خزرتنه ورفعت عوچيتها
حجية هلالة -: وانتن شمالجن تتضمحكن؟؟ ها؟ على شنو تضحكن؟؟ اخوتجن راحوا يتذابحون وانتن تضحكن؟؟؟ .
سكتنه ما ردينه عليها
حجية هلالة -: وحدة تضحك والثانية عوبه على اميمتها ياهو الي ضحكت؟؟ انت ام الگصيبة؟ .
تأشر عليه انه
حنين -: لا حبوبه والله ما ضحكت .
حجية هلالة -: بلى ضحكتي شفتچ سنونچ طالعات تضحكين على امچ؟؟ امچ عگربة بس هم امچ .. لا تضحكين عليها عيب .
كفاية همست
_ شفتي؟ گلتلچ لا تضحكين .
حجية هلالة -: وانت شكو تتهامسين؟؟ ام لسان؟؟ هم انت الثانية؟ .
سكتت وفجأة ملامحها تغيرت من العصبية للرحمة گعدت ع القنفة حطت ايدها على خدها وتنهدت
حجية هلالة -: آخ روفيدة وينچ يا حبوبه .
احنا عاينه لبعض مصدومين منها
حجية هلالة -: تذكرون هالبت لمن چانت هين؟ سلبوحه بس حليوه مچكنمه وحبوبه مثل الورده مالها حس مو مثل امكم .. امكم لو تنطوها العين تطمع بالحاجب .
انه متت ضحك وكفاية عضت اصبعها حتى لا تضحك
حجية هلالة -: اي والله يمه الحباية الزينة تنعرف من گشرتها حسها يرد الروح مو مثل كفاية من تندهني اگولن يا ساتر اجت الغورله .
كفاية -: حبوووبة .
حجية هلالة -: لا تحببيني انت اكبر عگربة مثل امچ .
ردت لافت عاينت على امي
حجية هلالة -: گومي سلبوحه سويلي چاي گومي بس لا مثل المره التاليه سويه مثل ما تسويه روفيدة ثجيل و مر .
امي گامت مقهوره وتنفخ
لميعة -: هسه صارت روفيدة زينة .
حجية هلالة -: اي صارت زينه غصبا على خشيمچ زينة وبت اوادم احسن منچ ومن بناتچ .. يلا لا دردمين من دهر دهرچ شوكت تموتين واگعد اكل بعزاچ .
متنه ضحك ، هايه حبوية هلالة اذا تحب واحد ترفعه للسما واذا تكره واحد تدفنه وهو عدل
هناسة ::
البيت چان مليان بلمتنا
انه ومرت عمي نهاش ام قبيس ومرت عمي عكاش ام شعاع وبنات عمي اللي هما بنات اعمامي نهاش و عكاش .. كلنا ملتمين بالمطبخ وجدر القيمة ع النار وتمن وياها .. و جهال شعاع يفترون حوالينه .
ام قبيس -: نوسة بنيتي الشكر خل اصب الچاي لعمچ گبل لا يجي من برا و يسويها وليه علينه .
هناسة -: اي عمه .
ام قبيس -: قبيس هساع يجي .. واذا اجه گليله لا ياكل لحد ما يجي ابوه من الفاتحه .
انه من سمعت بأسم قبيس ابتسمت لا ارادي ودنگت راسي
انه احبه اعشگه من احنا زغار من چنا نلعب بالسطح اللي ببيتهم بالعمارة وهو يگلي :
_ هناسة الياخذچ اخلي دمه بطوله انت هناسة گلبه ل قبيس
صار يومين اجينا احنا و اعمامي عكاش و نهاش واستقرينه هين وما اضن اكو ردة للعمارة الا يفضون سالفة ابن الشروگية ( حيدر الكرار ) ومن قبيس صوب اخوهم لهسه آنه عايشه بخوف عكس كل الموجودين ولا همهم، هذوله اعمامي يا ما دفنوه من ولدهم ومستعدين يدفنون حتى بس يحصلون الورث ويمشون چلمتهم..
راح تسألوني: ليش ولد اعمامچ ما يعقدون على كيلاس بمچان ابن الشروگيه؟ كيلاس اختهم بالرضاعة ف ماتحل عليهم ، نسوان اعمامي مرضعاتها من حليبهن قبل، وهسه يريدون يزوجوها ل حيدر الكرار " ابو الجعاره " هيچ يسمونه اعمامي لأن چان بعمر ال 15 والجعاره ماتفارگ ايده وبسبب طلايبه ومشاكله اهله شالوا من العمارة وسكنوا ب بغداد
آنه بنت عمهم المتوفي الوحيده لأهلي وامي ماتت وهي تولدني على هالدنيا ف تربيت ببيوت اعمامي ما حسسوني آنه بدون ام واب ابد ، وخاصة قبيس اذا احد يعترض لي او يردلي طلب يصعده فلقة، بس؟! كلشي بحدود واذا اعبر حدوده آنه اليصعدني فلقة .
فزيت على باب الحوش انفتح وطب قبيس
لابس دشداشتة النيليه وجهه تعبان بس من شافني اول وحدة عاين الها انه وابتسم براحة ، اجه سحب كرسي قريب مني وانه واگفه ع طباخ دنه يريد يگعد ومال بجسمه علي ، وهمس:
قبيس -: هلا ب هناسة روحي .
ابتسمت ودنگت راس گلبي يدگ يدگ مدري شماله يراد ادگه بالنعال حتى يثگل جدامه راح يفضحني ام قبيس تحمحمت تدري شبي تدري يحبني الكل يدري حتى نسوان اعمامي ضحكن وانه رحت نصي بالگاع ..
ام قبيس -: هلا يمه .. بس يجي ابوك حتى تتغده .
قبيس -: لا يمه ما مشتهي .
گالها وهو يعاينلي وضحك
قبيس -: هناسة .
_ ها .
_ چاي! .
_ صار .
يحاچيني وعينه بعيني ، هالانسان ما اگدر اقاوم نضراته ، ترجفني.. ترگصني والله مو بس ترجفني
ام قبيس -: يلا نوسة سويله چاي ماما .
ايدي ترجف عفت القيمة و سويتله چاي ثخين مثل ما يحبه وخليت بي هيل، صبيت بأستكان وقدمته اله ايدي ترعش على شويه ويطيح الاستكان
هناسة -: هاك .
اخذ الچاي وتعمد ايده لمست ايدي
قشعريرة سرت بيه وايدي ضميتها بهدومي حتى ما يلاحضني ، مسح على شواربه وابتسم بمكر وهمس
قبيس -: عاشت ايدچ
_ و.. وايدك .
شعاع و عميد ولد عمي عكاش فاتوا وراه
شعاع -: بردت گلبي بأبن الشروگيه اليوم ، چا شني بكيفه ما يعقد على خيتنه وبعدين هي رايدته حتى الدكتور منعكم منعا باتا تگطعون عليها الشغلات المتعلگه بيها وتعلگها ب حيدر مو شي طبيعي .
عميد -: اي بعلي خليت ولد لميعة يعرفون آل نهاش اذا رادوا شي يصير وچلمتهم تمشي ، نگطة راس سطر .
قبيس سكت مارد بس هز راسه وكمل چايه
ام قبيس-: هي لميعة حچت بالبت من الزغر وگالت اريدها ل حيدر الكرار ، بعد شبلاها ترد بچلمتها هساع ؟ .
ام شعاع-: خيه ام قبيس چا انت هم غلطتي يبعدي، شون ادزين وليدچ يطگ اخوهم، وعلي اذا ثارو ذوله ولد الشروگيه ما يبرد افادهم اذا ما ياخذون ثار اخوهم .
ام قبيس-: عجل اذا هما ولد شروگية انا ولدي ولد الانبارية بت الغربية يسوون نهارهم ليل ويترسون نهر الدم اللي صار بينه وبينهم بدمهم .
يمكن اكو اشياء غريبه شويه بنظركم! ..
بس انه اعاينلها مو غريبة، عمي كاظم ابو حيدر الكرار تزوج شروگيه من ملة امه وعمي نهاش و عكاش تزوجوا من الانبار من ملة امهم، بس مرت عمي عكاش اللي هي ام شعاع تربت ببيت اجدادي لهذا السبب لهجتها جنوبية، اما ابوي ف تزوج شروگية تگرب ل لميعة ام حيدر الكرار..
فزينه على صوت چيلتين بالباب، گلبي طاح بمعدتي و رد ضرب صلية مره التاليه، جهال شعاع گاموا يتعايطون، وعمه ام قبيس طاحت صينية التمر من ايدها
ام قبيس -: يا يمه .. شنهو هذا؟ .
عميد راح لشباج المطبخ كف البرده وعاين منه
عميد -: اجو .. ولد لميعة اجوا وجابهم الله لدارنه .
گاموا قبيس و شعاع مشوا واحد ورا الثاني وگفوا يم باب المطبخ يعاينوله منه ، سمعنا صوت رجولي خشن ومبحوح هز البيت علينا بصياحه
حيدر الكرار -: السلوگييي .. اطلع لك عار الزلم اطلع النثية چلب نهاش الوفي .
قبيس سحب مسدسه من خصره
قبيس -: انه طالعله انت شعاع عميد ابقوا هين شيصير لا تطلعون .
توا يريد يمشي وكضيته من ايده الشايل بيها المسدس
هناسة -: لا قبيس لا تطلع .. لا تطلع عليك العباس ابو فاضل .
دفع ايدي بخفة، عينه ع الباب برا ، خله ايده على ايدي نضرة الي ونضرة برا عيونه تروح وترد
قبيس -: اردلچ هناسة .. ما اطول ها؟ .
عاينلي بأخر نظرة وطلع للحوش و شعاع و عميد وراه، ركضت للشباچ وشفتهم طلعوا من باب الحوش وخلوه مفتوح، يبينون كلهم الجايين ثلاثة ما اعرفهم بس ادري بيهم ذولي ولد عمي كاظم ميزت حيدر الكرار من الجعارة اللي بأيده لأن بس هو من اخوانه يطرب على صوتها ، و وراه زلم اثنين يمكن اخوانه..
دار نقاش حاد بينهم، ما اسمعهم بس واضح الوضع مشتد وعيني ع الجعارة بأيد هذا المسودن خايفه يرمي قبيس و شعاع و عميد لأن هما بطرگ المسدسات، واخوان حيدر الكرار اثنينهم مسلحين
قبيس ما اعرف شنو گال ل حيدر و ذاك ثار عليه
و دگ الجعارة بالكاع يسحب بأقسامها..
گلبي لعب وطلعت من الباب اركض حافيه
صرت ورا قبيس و گتله بصوت مسموع
حتى حيدر واخوانه عاينولي
هناسة -: قبيس لا .. عوفهم قبيس طب للبيت عليك شريفة بت الحسن .
التفت عليه وانصدم عيونه يريدن يطفرن برا
ادري راح اتعاقب. بس لازم اسوي شي
قبيس -: هناسة! طبي جوه بابا .
ما طبيت ركضت وگفت بنصهم بين قبيس وحيدر ايدي فردتهن
هناسة -: حيدر فدوه .. هذا بيت بي حريم لا ترمي و.. وهم اخوك ما مات يعني ليش اجيت هداد ها؟ .
ما عاين بوجهي، عاين ل قبيس وضحك
حيدر الكرار -: هاي رجولتك يالنثية؟ تحتمي ب حرمة ولك ؟؟ من طمامة اطمك واطم ابوك والخلف ابوك .
قبيس-: هنااااااسسةةةة! ! ! .
هناسة -: حاچيني الي حيدر ، اذا تريد ترمي ارميني انه .
تجاهلوني وضلوا واحد يرادد بواحد وانه كاضه گلبي وعيني على اسلحتهم الطايشه
قبيس-: واحد منكم يعقد على بت عمي كيلاس ويفضها ويبرد الدم امك رادتها من هي زغيره شمعنى هساع؟ لو هاي لأن عاشگلك بت شاكر .
ابا الفضل -: تبرد الدم بحرمة ؟ ولك انتم نسوانكم رخيصة لهالدرجة؟ تذبوها على اول زلمة تلاگونه ؟ .
قبيس: احترم بت عمي لا ادوس شواربكم بعلي .
ابا الحسن-: منو يدوس شواربي؟؟ انت؟؟؟ لك انت كل حدك عتوي مال مطابخ ماتصلح تدوس شوارب الدوس يرادله زلم .
ابا الفضل-: شباب هدوا تنحل بالتفاهم احنا مانريد دم بدم، نريد نحل موضوع خيتنه كيلاس وشنهو التردونه بالضبط ؟ .
حيدر-: احنا نعتبرها اخيتنه وهي شريفه يشهد عليها ربي بس انتو حتى اخياتكم ما احترمتوهن من سويتوهن فصوله .
گالها وغمز يذكر قبيس بخواته الانطوهن فصليات قبل، عاينت ل قبيس اعصابة بارده
قبيس: اذا ما واحد منكم يعقد عليها حرب بيناتنا تصير وهذا اعتبروه تهديد من آل نهاش .
ابا الحسن-: لااااا هذا يريدني اطفي الجوزة عنده من صدگ عاااد .
گال هيچ واجه فاتح ايديه يريد يكض قبيس و حيدر عته من متونه ورده بمچانه
حيدر-: حرب؟ انت تحارب؟ ولك انت اذا شفت خيالك بالليل تخاف .. تحاربني انت؟ .
قبيس: لا تستهين بيه الحجارة الما تعجبك تفشخك .
ابا الحسن-: ولك انت مو حجارة انت ذرة تراب بنعالي .
ورفع النعال على وجه قبيس برجله
حيدر-: استهين بيك وبعشيرتك.. ولك انت صوبت اخوي غدر لان لو توگف جدامه وجها لوجه .. چان گطعك بسنونه .
قبيس-: انه حذرتكم بعد واذا ما نفذتوا راح اشوفن شغلي .
حيدر-: تهدد منهو ولك؟ انت لو بيك خير چا رحت توگف بوجه الي يريد يأذي اخواني مو تصوب اخوي علمود ترضيهم .. انت چلبهم السلوگي .
يقصد اعمامي لأن قبيس چان يحب حيدر واخوانه بس اعمامي حولوا هذا الحب ل كره، زرعوا بعقولهم ان عمي كاظم ابو حيدر اكل حلالهم كله بحكم عمي كاظم اكبر من اعمامي البقية
والقهرني وفور دمي قبيس يحجي ببرودة دم وما مدرك خطورة حيدر الكرار ولا شايف الغضب والحقد اللي انه اشوفنه بعيونه بعيونه عليه
قبيس-: هساع فضوني عليمن جايين ؟ جاي تريد تموت ولك حويدر؟؟ .
حيدر ضحك وهو يتقدم مدنگ راسه بالگاع ولسانه يفتر بحلگه ، اول مره يتقدم من اجه لهسه ، رفع راسه وغمز ل قبيس
حيدر الكرار-: جاي ادور چلب ضايع اثاريه انت لگيتك .
قبيس-: لا تغلط ولك .. انت ببيتي وبديرتي بعلي افرك حلگك! ! .
ابا الحسن-: حبيبي حيادر خليني اوكله نعالك بلا زحمة عليك بس اسمحلي .
ابا الفضل-: لا حرامات حيادر مشتري بعده جديد .
حيدر الكرار-: ديرة مال نثاية هاي .. احچيلك بيها؟ لو انت تحچيلي شلون تريد موتك ؟ .
قبيس ، اشر بمسدسه -: تمشي تتزوج كيلاس هساااااع والدم بيناتنه يبرررد شني ما تسمع انت؟ بعلي اربيك انت واخوتك اذا ما تمشون من باب بيتي! .
حيدر الكرار -: تربي منو ولك؟ انت حتى لحيتك ما تعرف تربيها.. تربي زلم؟ .
قبيس-: احچي عدل لا افلش راسك هساع بعلي اخلي امك تنحب عليك سنين .
ابا الحسن-: اه تفلش منو ولك؟؟؟ اجي افلش سنونك بحلكك ابو خيسة اعرف سولف وي تاج راسك! .
حيدر عيونه انگلبن دم، نزل الجعارة من متونه
وگام يگلب بيها يمنى يسرى يعاين عليها والعالم كلها ملتمه وتتفرج سمعوا حديثهم من اولى لأخرى ناس تهدي بيهم وناس ماعليها ماتتدخل وساكته..
و شعاع و عميد الدين بداخل الحوش يتفرجون من بعيد، موقفهم قهرني لأن قبيس دوم يوگف الهم وهما لا، جبناء
ابا الحسن-: ها شو ختلوا ربعك؟ شعشوع وينه؟ وذاك عميد الدين؟ اللي ذرة دين ما عنده ولا مذهب، خل يگابلوني اريدن احاجي زلم وللأسف اليوم اجيت ومالگيت زم.. لگيت نثاية منگبه .
هوا هيچ گال وقبيس فار دمه توا يريد يسحب بسلاحه و واحد من اخوان حيدر اجه ركض جرني من ايدي وخلاني وراه ، سديت اذاني من سمعت صوت الجعارة يهلهل فوگانه، زرف طبلة اذني زرف والوادم گامت تتعايط والجهيل صريخهم ترس الدربونه، كلشي ما اشوفن بس چتافه العريض جدامي محتميه بي من الرمي
حسيت بواحد يسولف يم وجهي، گوه سمعته
ابا الفضل -: ولچ شموگفچ هييين تردين تمووتييين انت؟؟؟.. طبي جوه راح تتصوبين .
وانه ساده اذاني وعيوني جاوبته
هناسة -: ما اطب.. ما اطب الا توگفون الرمي دخيلك شسمك؟؟ مدري شسمك المهم .. انت العاقل بيهم وگفه الله يخليك وگف اخوووك المسوودن ابو سوادين ابو الجعارة .
ابا الفضل-: اسمي ابا الفضل.. هو هساع وكت الاسماء والله بطرانه... رووحييي للبيت لچ روووحي .
فتحت عيوني على عيطة ام قبيس و عماتي من البيت شگن طبلة اذني وبس فتحت، وياريتني ما فتحت قبيس طايح على ركبته متصوب برجله
ودمه سايح بالگاع، صحت روحي مفرفحة عليه
هناسة -: قبيييسسس .
عاينت ل لهذا ابو سوادين محتمي بسيارتهم الاجوا بيها ويرمي فاتح عيونه على وسعهن حمر يخوفن مابيهن ذرة رحمة والصدمني انه يمهم واگفه وابا الفضل يحجي وياه كاضه من صدره حاضنه حضن بكل گوايته ومتلاوي وياه موجه حلگ الجعاره على بيت الجيران وهوا تحول علينه ، خلص الشاجور واخيرا ربي اتلطف بينه وديبدل بي..
وطلعوا شعاع و عميد شالوا قبيس اللي دمه صاير بطوله يريدون يدخلونه للحوش ويحطوه ورا الباب شايلينه واحد من ايديه و واحد من متونه ، توا اريد اركض روحي ماعت عليه و كضني ابا الفضل من ايدي گعدني بسد السياره وضغط على راسي بأيده حتى لا انهض وزمخ بوجهي، الا بچيت
ابا الفضل-: مسووودنه انتتتت مسووودنه؟؟؟ شوون تردين تركضين بنص الچيلات ماتشوفين عكاش يرمي من ذيچ الصفحة .
عاينت ع الصفحة الاشر عليها و فعلا شفت عمي عكاش يرمي على حيدر، وحيدر يرمي عليه ويعيط عياااط دمه فاير عبالك اسد چان محبوس وهاج
ابا الفضل -: حيدر كافي.. كافي ولك هذا بيت بي حريم والرجال اتصوب بثلاث طلقاااات كااافي ولككك .
يضرب بي راشديات على وجهه ما يفيد دفع ابا الفضل شمره هنااااك، و رجع لزگ عليه يريد يلاگي ايديه على ضهره ما عاد يگدرله
حيدر الكرار-: يصاااوب اخوووييي هذا العاااارررر ابن نهاش النثية يصاااوب اخوووي ولككك صاوبوا عيني ما صوبو مغوااارر .
دفع ابا الفضل مره ثانيه وهذا ابا الفضل انتهى حيله باد بس يلهث وايده على ركبته گوه يجر النفس، وانه اعيط ودموعي تتماطر اريد اروح وهذا ما يخليني يجرني كل شويه، والرمي يمطر من كل جهة من يم عمي عكاش ومن يم بيتنه شعاع و عميد يرمون و هذا المسودن صوت جعارته مغطي على اسلحتهم يرعد رعيد بالسمه
الشاجور خلص بيده للمره الثانيه وتسودن عيونه تطاير شرر خلص فشگ ماعنده، عاين ع الگاع يدور سلاح اخو
حيدر -: ويييين سلاحك ويييييننه انطينياه والله وبالله الا افلش الباب على راسه وراس اليطلع وراااه .. انطينييييي الشااااجووووررر .
ابا الفضل توا يريد يخمط سلاحه من الگاع وما يخليه ياخذه و حيدر سبقه، يا يمه شگد سريع
اخذه قبل ابا الفضل وعبا الجعارة بساع ايده ترررجف رررجيييف من الحقد
عمي عكاش مادري شلون طفر وصار يمنه بعد ما أيس يگدرله كضه يريد يشبگه من ورا ويگله عوفه راح يموت ويشمروك بالسجن وهذا فقد يدفع ب عمي وب أخو
حيدر الكرار-: اليوم أهد بيوتكم على روسكم واخلي امهاتكم تلبس اسود وتواري روسها بالتراب عليكم ، وهذا البحر الي تحچون بي راح اخليه يطفح بدمكم يا نثاية! ! .
هيچ صاح بصوت يرعد! ! ..
وما كملت گولته الا والجعارة رعدت بأيده اصبعه لزگ ع الزناد لزگ ازيد من قبل شويه والوادم انفجعت فجيع ، نسوان تصيح وزلم تركض وجهيل تتعايط ، ابا الفضل وعمي عكاش كضوه ، كل گوايتهم حاطينها بي وما گدروله ، تلاوو وياه و رفعو ايده فوگ بالگوه ، والجعارة من رعدت ، الله اكبر شلون رعدت ضواها فطر السمه نصين ، شرارة حمرة وصفرة طگت بالسما وضوت المچان كله حتى وجوهم بينت من الضوه ، انه اعاين على حلوگهم مفتوحة يصيحون عليه بس الصوت ما يوصلني، و عيونه نار تريد تحرگ آل نهاش كلهم .
قبل شويه جنت مغمضه وماشفت هالمنظر
بس هالمره رجف گلبي وانه اعاين لضواها بالسمه قبض روحي، سديت اذاني حييييل وعاينت من ورا السياره اشوف الولد و لمحت رجل قبيس طالعة من الباب ، اتهسترت گمت اتطافر من الخوف
هناسة -: ابا الفضل دخيلك لا تخليه يرمي دخيل بخت جدك عاينله.. عاين رجله طالعه راح يذبحه اخوووك المسووودننن راح يذبح قبيييس .
وهذا ابا الفضل يملخ بأخو يريد يوگف رمي ويگله لا تصاوب الحريم لو تكتل واحد وتبتلي بدمه وتدخل سجن انه مو متبري من دمك اموتن وراك اذا تنسجن، و حيدر ابو سوادين يگله عوفني خل ادخل سجن اريدن ثار اخوي اليوم انعل ابهاتهم ، اثنينهم يعيطون عياط، نزلت بالگاع وعاينت على باب الحوش ، الباب انفتح من الرمي والحياطين تزرفت نخلهم نخل ابن الشروگيه المسودن..
وشفت وياريتني ما شفت! ! ..
شعاع و عميد طايحين اثنينهم بالگاع هدومهم مصبوغه دم سابحين بدمهم سبح و قبيس ورا الباب يون
عطت مخترعة ..
هناسة -: يمممه شعاااع عميييد .
وحيدر بعده يرمي الجعاره بيده موجهه للسمه عيونه تفيض بحقد مو طبيعي ، ابا الفضل كاضه من ايديه الثنتين وگوه گادرله هوا وعمي عكاش
ابا الفضل -: حيدر نزل سلاحك كافييي ولك ماااتوووو ابتليت بدمهممم حيييدرررر .
ابا الحسن كاضه من ظهره يسحب وهذا ما ينشلع
ابا الحسن -: حيدر امشي ولك الشرطة راح تجي امشي يا خويه كااافي اخذت حگك وفوگه هم .
مادري شلون وعى على نفسه وضل يعاين ع الباب يتلاهث وعرگه يصب يريد يتأكد قبيس مات لو لا
حيدر الكرار -: عوفوني .. الا اتأكد مات يلا امشي .
ابا الفضل -: يموت باجر عساه بالموت .. هسااااع امشي ولك .
اخذ ابا الحسن الجعارة من ايده گوووه
وسحبوه سحب وهو يجر برجليه يريد يرد
ويصيح بعلو صوته، صوته انبح
حيدر الكرار -: قبييييسس.. اذا بالطگة الاولى ما متت .. بالثانية اموتك اذا تتعرض لاخوتي بعد .
آنه رجليه ما عاد تشيلني اريد اروح للبيت بس اشوفن الدم سايح وطالع برا الحوش وگلبي ما ينطيني، ضليت اشهگ وابچي بمچاني، الوادم التمت عليهم وعمي عكاش وياهم يصيح ويگول
_ شيلوهم.. شيلوهم للسيارة بساع .. گبل لا يرجع هذا المسودن ابو سوادين .
نقلوهم للسيارة واحد واحد و قبيس وجهه ما يبين من كمية الدم ، عمي عكاش قبل لا يصعد السياره حچه بصوت عالي سمع الموجودين كلهم
عكاش-: من اليوم يوجوه الخير.. ماكو شي اسمه صلح الدم بالدم والي يتعاطف وياهم افنيه وياهم اذا هو ابو الجعارة آنه عكاش اخو نهاش .
وصعد بالسياره وراح وياهم، عاينت ل باب الحوش
عمه ام قبيس وام شعاع يلطمن على روسهن ويوارن بالتراب فوگاهن والنساوين تهدي بيهن وتغسل وجوهن بالماي البارد
من رجعت للبيت رجليه ما شالتني ذبيت روحي ع القنفة والكل ملتم نساوينه يلطمن وانه وجهي اصفر وريجي ناشف من البچي ، عمه ام شعاع جابت لي ماي شربت
الحمد لله خابرنه وطمنونه عليهم عايشين بس حالتهم جدا خطرة وخاصة قبيس و شعاع
جدة طرفة گاعده بنصنه .. كاضة عوچيتها الذهبية ولابسة نظاراتها وتسمع سوالفهم على حيدر شسوه بيهم..
طرفة-: احجولي ولكم؟ منهو هذا الخله طشاركم بفلس؟؟ انتم زلم لو حريم ؟ فهموني .
هناسة-: يمه جدة والله شفته بعيني اجه ابو سوادين والجعارة بيده وعيونه تخوف ما شفت هيچ حقد بحياتي .
طرفة-: منهوو من ولد لميعة ؟ .
هناسة-: حيدر الكرار جده نخلهم نخل البوب والحياطين زرفها على روسنه .
قيس اخو قبيس اجه ورا ما فضت وهسه هو گاعد يم جده طرفة وهم يحچيلها ع الصار لأن الوادم الچانت موجوده شهدت كلشي وحچت له
قيس-: الوادم كلها تحچي ، يگولون اخوانه وعمي عكاش كاضينه وماگدروله حادهم حود خله طشارهم ماله والي .
طرفة-: هههههههه هذا.. هذا ابن الشروگيه .
هناسة-: جده تعرفينه ؟ .
طرفة-: عجل شون ما اعرفو ؟
هذا ابوه كاظم شال من العمارة من وره مشاكلو زلمة دمو حار مو مثل زلم هالوكت يلبدون ورا الباب .
گالتها و غمت قيس، تقصد شعاع و عميد
هناس-: يمه جدة هذا مسودن وعمي عكاش يتوعد يفنيه، خايفه جدة .
طرفة-: هذا عكاش بزر بطني لو يجي ابوه بشحمو ولحمو هم ما يوصل لظفر هالشروگي .. يفني منهو؟ خل يضم راسو من البلاوي اللي راح تمطر على راسو وراس خلفتو .
قيس-: اريدن حيل انه، اريدن الله ينطيني حيل وينهضون اخوتي ويصير خير ويه ابن الشروگيه .
طرفة-: هوا هذا السماه ابوه السيف البتار وبعدين غيرولو اسمو ؟ .
قيس-: اي جدة هو نفسه .. الچانوا بالعمارة يصيحونه ابو الجعارة .
ضحكت جدة وهزت راسها
طرفة-: اي.. چنت اگول هاي مو مشية لميعة هاي مشية ابوه .
طگت عوجيتها بالگاع وكملت...
