رواية خلخال مشوه الفصل التاسع عشر بقلم زمرده
شرربني زماني هموم من كاس
اقسى وامر من سم الثعابين
تجرعته بصبر ما سمعت ناس
لجن يا حيف فضحتني النياشين
°كوكبة°
هذا ليث گام من حس بي قريبة وبالتحديد واگفه واره نكث هدومة وعينه علي بلعت ريگي وانا بين الخايفة منه وبين ما اركز بشكله يقل
خوفي وأبتسامته هسه بهل وكت خلتني احسن بشعور غريب شعور يشبه شعور الامان الما حسيت بي بحياتي ولا عرفته
رفع شعره بأيده يسألني
ليث : صاير وياج شي
صفنت بوجهه اريدن اعارف سبب سؤاله وهو حس علي مستغربة
ليث : صار چم مره أجي وما اشوفنج هنا گلت اسألج خاف صاير وياج شي
نزلت راسي وانا اتمنى واحد من اهلي يخاف علي لو يفتقدني مو هذا الغريب
ليث : احسن بشي واردين احجي اذا رضيتي
رفعت راسي وعيوني تلاگت وي عيونة هزيت راسي ب أي
_ گول
طال النظر بعيوني وما عكسهن ابد وحجه وهو يباوعلهن
ليث : ليش كلما اشوفنج عيونج بهالحال ليش هواي تبچين
أبتسمت وانا بالگوه مسطيره ما اردن ابجي
_ انا جاي اعيشن بظلم حالي حال النغله يعاملوني ولا بيوم حسيت روحي بتهم
عگد حاجبه
ليث : اهلج
هزيت رأسي ب أي
_ جا اكو غيرهم
ليث : يطگوج
_ گول هم بيوم ما طگوج
عگد حاجبه ما مفتهمني
ليث : شلون يعني
أبتسمت بوجع وهو بجيبة اللايت ما اعارف شلون اجه بباله يضوي على وجهي ويشوف أثر الراچدي الضربتيناه امي
فتح عيونه مصدوم
ليث : ليش هيج
رفعت اچتافي ب ما ادري
ليث : أنت بتهم شلون هيج يسوون وياج
_ امشي اسألهم لان تعبت وانا اسأل روحي نفس السؤال يوميا وكل جواب ما لگيتله
ليث : شني الخلاهم اليوم يطگوج
مشيت بلايه ما احجي گعدت على حافة الشط وهو اجه گعد بس بيناتنه مسافة استغربت ليش هلگد حاط باله ويريد يعارف انا بشنو جاي امر ليش مطول خلگ وبهل برد گاعد هل گعده هاي وچنه حاير شيحجي وياي اندار باوعلي ورد عكس عينه يباوع للشط
ليث : منو اكثر واحد بيهم يطگج
اخذت نفس واندريت اباوعله وانا اگولن بگلبي
_ شعده يسأل
من شاف صفنتي طولت رد سأل
ليث : منو
صفنت حايره بأذيتهم لروحي واحد واحد ورديت عليه بكل وجع
_ كلهم بس حسن هواي مأذيني انا ساعة الساعة من ضرباته توگف كلياتي
ماحجه شي ورفع رأسة يباوع للگمر طولت گعدتنه والسكوت چان حاجز بيها مضى الوكت وانا بين سالفه وسالفه عقلي ابد ما هاد تعبت وانا افكر شراح يصير بعد يومين شراح اسوي
گمت حتى ارد وهو من حس علي گام مشى گبلي ومن ضليت واگفه بمكاني
اندارلي
ليث : امشي اوصلج كوكبة
مشيت وصرت گدامه ،وهو اسمع بس صوت خطواته وراي من وصلت قريب على بيتنا انداريت ما لگيته وراي نزعت عباتي وطبيت وانا اسحل بروحي سحل وكلما فكري صار يمه ليش حسيت اسألته وراهن شي ومو خاليات
طبيت للغرفة ونزعت شالي گعدت اتصفن بالحاطين وبيني وبين روحي افكر هسه اني شنو حياتي والمن أيامي جاي تمشي بلايه فايده يخلصن من عمري سنين جاي ينحسبن لناس ما تستاهل گلاص الماي اطي الهم بس مجبوره بخدمتهم مو لان اهلي لان يعتبروني مجرد خدامه الهم وبس
تنفست وانا احسن راسي بثگل الطابوگه عيوني احسن بيهن مثل يردن يطگن على گد البجي البيچته
أنا والله مرات ينكسر خاطري على روحي واردن اهونها على نفسي من اگومن اصلي وادعي من الله يصبرني إلى اليوم البي اطلع وبعد ما اعترف بيهم والله لان اهلي مو أهل ينشد بيهم الظهر انا دوم ادعي ما تديم عازتي الهم
تمددت وانا عيني على السگف وبين الصفنه والحسره غفيت وگضت ايامي واجه يوم الجمعة وعساه لا أجه
°حواري°
من طيحتي امس وانا احسن صحتي ابد ابد ما ترد مثل گبل
من امس لليوم وانا كلما وگفت احسن بروحي راح اطيحن ما اگدر امشي اذا ما اسند روحي على شي بدربي انا ما متعوده هيج انا خلصت عمري ما امشي اركض واهسي من الدنيا بين ليلة ويوم احس جاي يطفى وروحي هاي روحي كارهتها من الوجع الجاي احسن بي
گمت وانا ما اگدر امشي بلايه ما احط ايدي على الحايط اخافن لا اطيح فتحت باب الصاله وطلعت من سمعت صوت سوالفهن
ريحانة : جيبي بنية حتى احجزها الابني
بصائر : ما اطي اعذريني انا ما بتي ماتزوج غريب
ريحانة : جا منو الياخذها ومحد من الولد معرس ومخلف
بصائر : حتى لو أكبر من رجلها بفد چم شهر بس اهم شي ما اخرب قوانين چدي
ضحكت
ريحانة : جا مو أنا المخربتها خربيها وياي واطيني بتج
بصائر : عمها يتزوج ويخلف وياخذها
ريحانة : خايبة امداج وامده بتج وياج اخذله غريبة ولا ذلتج
ضحكت وگامتلها
بصائر : البطريق مو اسحلج أنت وبطنج
ريحانة : خايبة اهفي عليج تطيحين استچني روحج رايحة وتهوبزين
ضحكت وردت گعدت بمكانها
بصائر : انا الج اذا ما خليت بتي تطيح حظ ابنج
اجتهن امي من المطبخ
نجوى : كافي موتني بعده هاگدوته وتصيحن بنية
ريحانة : انا شدخلني يمة هاج چنتج تريد بنية وصارلها ساعة تگلي ادعيلي بنية مو دعوة الحامل الله يستجابها
نجوى : خايبة عيون فقار انا گلبي يگلي بيج وليد
ريحانة : والله حتى انا احسن وليد
بصائر : شني السالفة شبيچن وياي انا اريدن بنية
ريحانة : ميخالف ثاني بطن خلفي بنية
بصائر : يمة شبيه مخبله انا من هسه حلفت التوبة مو انوبه اروحن احبل مرة الثانية
صارلهن ساعة يسولفن ولا حاسات علي كل ضنهن
انا بعدني نايمة
نجوى : هاا يمة گعدتي
هزيت رأسي ب أي ومشيت اگعد يم الحوامل
نجوى : جوعانة اسويلج شي تاكلي
هزيت رأسي ب لا
نجوى : جا شلون تضلين وأنت من اهد الريوگ
_ ما اعارف يمة بس احسن بروحي ما اگدر احطن لگمة بحلگي
نجوى : لو ماشية للدكتور چان عرفنه شني سالفتج احسن
_ جا ما شفتيني رديت من المدرسة روحي رايحة
ريحانة : وهاي عود طلعج ضيرم
اندارت على امي
ريحانة : انا وضعها كلش ما جاي يعجبني يمة والله انا من ضيرم اخذها سحل للدكتور شني بيكفها ما ترضى
نجوى : ما تعارفين اخيج گلبه رجيج وياها وبس گالتله ما اگدر گالها نضل على السبت بس والله انا احس هذا التاجيل كله بلايه معنى
ريحانة : أي والله
حطيت ايدي على خدي امسعلهن وماكو ربع ساعة عدت وطب
فقار يفر بسويج دراچته بس شافنه ملتمات صاح
فقار : شني هاي ملتمات الگمر ونجومة
أنا ما حطيت بالي ولا الي خلگ الاشي بس ريحانة ما تگعد راحة غمزتله وهي تگله
ريحانة : منو الگمر ومنو النجوم
تقدم يمشي رافع حاجبه وگف گبالنه
فقار : طبعا جاي تحفرين ترديلج مشكلة مو
ضحكت وهزت رأسها ب لا
ريحانة : نيتي صافية
فقار : اي كلش مثل وجه بصائر
بصائر : ضل حاط عينك على وجهي
فقار : اغديله فدوه على گولة نوح جا غير يشع شع
ريحانة : اممم نوح
فقار : المحقق ريحانة لاتضلين على كلشي فاتحة اذاناتج
أبتسمت وگامت
ريحانة : انا اگوم أحظر غراضي
سألتها مستغربة
_ شني راح تمشين
ريحانة : أي خابرني حمزة گال بالليل يجي
_ يااا جا شني كملوا
ريحانة : والله ما اعارف
مشت للغرفة تحظر روحها وانا ضليت گاعده حاطة ايدي على خدي واباوع بعيوني عليهم
بصائر : تاخذني لاهلي
فقار : لا اعذريني منعس
بصائر : جا شني انا كاظه عيونك
فقار : جا شلون ترديني انام وأنت ماكو بالغرفة
أبتسمت وهي حركت راسها مبتسمة واخوي سلمها تراب جر راسها وباسها من خدها حيل خلاها تعيط وامي ترزل بي ما راضيه
ضحك يباوعلها وهي مبرطمه
فقار : خاب يمه شني بس هاي البوسه التروي الگلب
نجوى : بس مو گدامنه عيب عليك
فقار : خاب يا عيب تعاي ابوسنج أنت هم حتى لا تزعلين
ضحكت وهزيت ايدي من گام باس امي حيل خلاها تطگه
نجوى : خاااب شبيك هيييج الناس تبوووس راح وجهي
اباوعلهم واحسن هاي مو أنا الجنت احطن روحي بنصهم وما اضلن اباوع من بعيد واهسي من الدنيا بعد ما جنت كلي طاقة ولساني ما يكست واذا ما لگيتلي احد احجي وياه اخلصها احجي وي روحي حتى لا املن وهسه وانا ساكته احس براسي هوسة ما صايرة من گبل
گمت امشي للغرفة اشوفنها خلصت لان رجلها اجه وطلعله فقار
بس طبيت للغرفة شفتها واگفه تلبس عباتها ابتسمت وانا اباوع لبطنها وبگلبي اگولن شوكت تجيب واشيلنه واللعبه ويگلي خاله حيل متلهفه لشوفته من هسه اتخيل شكله راح يطلع يشبه امه لو ابوه لو ليش ما يشبهني مو أنا خالته
باوعتلي ودنگت تحط مبايلها بالجنطه
ريحانة : هاا شو صافنة
_ جاي افكر راح يطلع يشبهج لو يشبه ابوه
أبتسمت
ريحانة : انا اتمناه يشبه حمزة عيونة كبار وملامحه هيج احسنها مرمسومة رسم
كشيت وجهي وهي ما رضت علي خزرتني بس شافت هيج سويت
ريحانة : شني چن ما عاجبج الحجي
_ خايبه املح شلج بيه
ريحانة : يااا شني املح اسمر هيبته بسماره جا اخذنه ابيض وجهه مثل وجهي
_ بس هو حيييل اسمر چن راگعته الشمس صبح و ليل
ريحانة : جا الله يساعده اركض ركض ما تعارفين بس ظيم البنيان كافي عليه وهو على ابو خلفة انشلع گلبه
_ الله يساعده تدرين مرات احسن خطية هذولي اهله
ريحانة : والله حتى انا بالاصل هو وحماي الچبير مشلوع گلبهم بس عدج مرتضى شوي عمتي تحبة لان يمشي وراها بس لو نحجي الصدگ هو حقير حاله حالها
_ كون من يتزوج يگلب حتى على أمه
ريحانة : لا ما يگلب أمني تريدله بت اختها بس ياهي من نعارف
_ جا طحتن بيها أنت واستبرق
ريحانة : أي والله راح يصير اتحاد علينه
صاحت امي من بره
نجوى : شني ريحانة وين صرتي رچلج متانيج
اطتني جنطتها
ريحانة : طلعيها حبابة انا مو أختج حامل وموزين اشيلن ثگل
باوعتلها رافعه حاجبي بس ما لحگت احجي من طلعت گبلي مشيت انا وراها وما طلعت ضليت بالمطبخ واگفه واطيت جنطتها بايد فقار وهو مشى حطها بالسيارة ورد وگف يمهم أمي توصي بحمزة عليها وهو ما على لسانه غير كلمة الصار وبعيوني
ومن مشوا طب فقار والنعاس مبين عليه گعد گبال امي من گعدت وبصائر گدامه باوعتلها امي وردت باوعتله
نجوى : يعني عاد صدگ ما صعدت نمت وضليت متاني هل شبر ونص هاي
دنگ يعدل بشعره وبصائر منها گالت ومثل كل مره تحجي امي وتشاقيها
بصائر : جا شعبالج ابنج ما يگدر ينام واذا انا ماكو بغرفته
نجوى : جا دگومي نوميه
ضحكت ودنگت رأسها وهو بلايه ما يخجل صعد گبلها ولنص الدرج صاح
فقار : يمة بداعة أبوي شحتيها وراي شغل اريدن امشي وكاتلني النعاس
بس اختفى من گدامنه امي باوعتلها
نجوى : خايبة گومي شعدج مگابلتني
بصائر : شني عمة خلي واذا نام وانا ما موجوده ما اريدنه يتعلم علي
نجوى : جا من الزينات يتعلم عليج
بصائر : الدنيا كلشي عليها ومنو ضامن روحه انا اخافن عليه من تعلقه بي
نجوى : شوف شوف شلون تحجي گومي لا احطنج برگبتي
گامت تضحك تحجي بأمي
بصائر : يجوز اموت من اجيبن
گاملتها أمي تصيح عليها
نجوى : غددي من لسانج
تضحك وتباوع لامي وانا ما اعارف ليش ضليت اباوع وگلبي خامشني
نجوى : اذا تعيدن هيج حجي احطج واكتلج ولا تگولين ما گالت
وگفت على أول باية من الدرج مبتسمة وتحجي
بصائر : اشاااقيج عمة شني ما يصير نتشاقة
نجوى : أي مايصير هيج حجي ما ينحجي شلون تفاولين على روحج وتعارفين ابني يتخبل لو سامعج
بصائر : بعد ما احجي
نجوى : يلا روحيله گطعتي گلبه
ضحكت ودارت وجهه تصعد الدرج البيت صار هدوء وكل مره من يصير هل هدوء هذا وبالتحديد اذا خميس انا ما اضلن بالبيت واخلص هل يوم يم بيت جدي ويم جفون بالذات
ما الي لا نفس اطلع ولا شي كل الاريده يصفه راسي من الوجع الجاي احسه ياكل براسي اكل
طب عزيز وانا على گعدتي گعد يم امي وانا بالي ولا يمهم ولوما صايح بأسمي فلا چان انتبهتله
عزيز : شني سالفتج صار ساعة احجي وياج وما تگليلي ها
فركت عيوني حتى تروح الغواشة منهن وبس فحتهن شفتهم يباوعلي صافنين علي
_ شني شبيكم ليش هيج تباوعولي
اباوع على عزيز دار وجهه وما اعارف بشني يحجي وي روحه وامي کامت لمت وجهي بين ايدها واندارت تباوع لعزيز الرد يباوعلي والاستغراب مبين عليه من شني ما اعارف
ردت تباوعلي وهي تسألني
نجوى : ليش فركتي عيونج هيج
استغربت ليش هيج سألتني
_ عيوني يوجعني وهل فركتهن
نجوى : شفتي شي
_ شي مثل شنو
بلعت ريگها وانا احس بأمي مو طبيعية ابد احس بيها اكو حجي تريد تحجي بس ما اعارف شني الما مخليها
لمتني على صدرها وعزيز گام يفتر وكلساع مباوعلي ويرد يباوع الامي
_ خاب شبيك تفتر سطرتني
بلايه ما يحجي طلع بره وهذا اكثر شي زيد أستغرابي
وخرتني وهي تباوع بوجهي تحاجيني
نجوى : شعجب ما تمشين يم جفون واليوم خميس
_ احسن بروحي تعبانة ومالي خلگ للطلعة
نجوى : جا اول تالي
_ ما اعارف أصلا انا مستغربة من روحي
_ گومي لبسي عباتج وامشينه يم چدتج هم انا اشوفنها اريدن
فتحت عيوني مستغربة ،امي تريدني امشي وياها!
_ هااا
نجوى : خايبة دگومي بساعج ،ترا اعوفنج وأمشي
گمت بساع ومن حسيت بدوخه كضيت
الحايط وانا اگلها
_ لا ،اوگفي هسه بساع بس ابدل واجي
نجوى : ديلا لا تتأخرين
هزيت راسي ب أي ومشيت للغرفة ،بدلت هدومي ومشطت شعري بساع ولبست حجابي وبس خلصت طلعت بأيدي عباتي من شافتني گامت گبلي تمشي للمطبخ ،لبست عباتها المعلگه وطلعت وانا وراها وبس فتحت باب الشارع صار گدامنه ضيرم ينزل من سيارته هستوه جاي
وگف گبالنه
ضيرم : شني وين ماشيات ؟
نجوى : ماشية اشوفن چدتك
ضيرم : هاا ،جا امشن اوصلچن
نجوى : گول اريدن اشوف الريشة
ضحك منحرج ومشى گدامنه ،مشينه انا وامي وراه وبس فتح الباب صار بوجهنه صخر مبين يريد يطلع
صخر : لا هلا ولا مرحبا ،شعدج جايبته وياج عمة ؟
ضحكت امي وهي تحاول تتوسط الاخوي
نجوى : جا محرمة جيته لبيت جده لو شني ؟
صخر : عمة من الاخير انا صاير ما اطيقن ابنج كلش ولا ابلعة هسه لو تطيني وراه بطل سفن
نجوى : وهاي عود أنتم الصحبان الروح بالروح الينضرب بيكم المثل هيج تاليتكم تخربكم مره
صخر : جا انا ما ناكر صحبته ،بس هو ابنج وهذا گدامج اسألي يتقصد يغثني
نجوى : تحمله أنت اكبر منه وعاقل
ضيرم : لا هنا راح احجي وما اضلن ساكت حتى تتوسطيلي ،يعني انا مخبل لو شني ؟
صخر : جا ما تعارف روحك مخبل وأبو گمزة ؟
ضيرم : وأنت عصابچي ارهابي كلهن لامهن ،تخطف وتهدد وكلشي تسوي بس من جوه ليجوه
صخر : جا احسن خوما اخلصها اگمز على الوادم وهارج الامه هرج
ضيرم : جا مو چنه انا وياك سوه ،صرت ما اعچب من خطبت اختك
خزره واندار وباوع الامي
صخر : گلي الابنج لا يضل حجاية والثانية وصاح أختك
نجوى : خايب ضيرم صدگ ما تسكت عنه انا كل مره اشوفنك تعيل بيه وما ادخل
صخر : الف رحمة على والديج حجيتي الحگ
ضيرم : هااا صار اتحاد علي
صخر : عمة أنت كل الهلا بيج بس تعذرينة هذا ما يطب للبيت
نجوى : اتصافوا أنت وياه انا مالي غرض ،بيناتكم ولد عم
صخر : جا خوش
من مشت امي تطب مشيت انا وراها وهم ضلوا بالحوش ،سلمت وگعدت وأجت جفون گعدت بصفي ندستني
جفون : خايبة منين مطفيج
درت وجهي عليها
_ ما مطفيني بس انا ما الي خلگ احجي راسي ما يخليني
جفون : خايبة والله جاي اضوچن واليوم فگدتج گلت كل خميس يمي
_ جا شني انا ما عايفتج ،بس خل اصير زينة الزگ يمج
احجي وياها واباوع على امي تبسبس وي جده ومندمجات كلش وأجت عمة زهرة گعدت بيناتهن وانا اللگطته أذني من جده گالت
غضة : خايبة تتخايلون ،يجوز لان چان وكت غروب والگاع مديوسة هل شفتي هيج
نجوى : عمة مو بس انا والله ،اسألي عزيز ،لو ما هو چان انا هم گلت اتخايل
غضة : گولي يا الله وانسوا الشفتوه لان انا ما يدشن عقلي هيج سوالف
نجوى : أخاف بيها شي ؟
غضة : خايبة فلك موش چناين عدي بوم ،تعارفين التفكرين بيه شني ،تنهجم حياتها ومستقبل الها ما يضل لو احد سمع التگولينه
ما اعارف ليش الحجي حسيته يخصني انا ،بس شني الگالته أمي وخلت جده هيج تنفعل وما تنصي صوتها لوما شايفتتي مركزة وياهن وبساع غيرت السالفة وصارت تسأل على ريحانة وبصائر وانا حاولت ما احطن بالي يمهن واگوم ورا جفون من مشت للمطبخ
طبيت شفتها مگابلة كوم كتاكيت وگاعده ،مشيت گعدت يمها اسألها
_ شني منيلج ذني ؟
باوعتلي وردت تباوعلهن تطيهن اكل وهن بالقفص
جفون : جا مو گلتلج نوح جابهن الي ،شبساع نسيتي؟
صفنت اريد اتذكر وهي بساع گالت
جفون : حتى گلتلج شسميهن گتيلي عشرة هواي خليهن بلاية اسم لو سميهن كلهن بأسم واحد وانا سميتهن كتكوتات
ضليت احاول أتذكر ،عصرت مخي عصر وما تذكرت انا هيج حاجية ،حسيتها تتخايل وماشيتها من هزيت رأسي ب أي وگتلها
_ حلو ،صار عدج زقزوقات وكتكوتات
أبتسمت
جفون : هو انا اختاريته هيج يشبه زقزوقات
_ عدج ذوق
جفون : جا شعبالج مو اختاريتج صاحبتي
صفنت بوجهه حايرة هاي جاي تمدح لو تذم
ضيرم : بعلي اتمنى اردهن الك بس اتذكر أنت اكبر مني واسكت
طبوا ضيرم وصخر وراه واخوي لازم گصته ،وگف غسل وجهه على السنك وانا اباوعله گصته معنجره
صخر : بعد اذا حطيتها بكل حجاية مو اضربك كله لا والله ارگع راسك بالحايط
ضيرم : مصلحتي يمك راح اسكتلك ،بس خل اخذها شوف شلون اردهن الك وحده وحده
صخر : جا عبالك اهدك بكيفك ،والله وداعة هل شوارب هاي
ضيرم : الله حلف بالعزيزات
لزم شواربة وهو يگله
صخر : باوع بوجهي زين ،وداعة من زرع بيك روح هاا ،اخذها من بيتك لو غثيتني بحجاية
ضيرم : مو بكيفك هي
صخر : جا شني بكيفك أنت ؟
ضيرم : نشوف بكيفمن
صخر : نسألها ؟
ضيرم : أي امشي
باوع بوجهه ورفعله حاجبه چن اكو شي يقصده چان ضيرم وهو افتهمه
صخر : امشي اطلع بره
اجه جراه من فالينته ،دفعه وسد باب المطبخ وانا وجفون ضالات بس نباوع ،أخر شي بالدنيا توقعته يخرب صحبتهم القوية ،بس يمكن هل شي اكيد السبب لان اخوي ما يحترم غيرة صخر القوية على أخته وكل ما شافه گاله أختك هل اليوم انشحت وضل يتوسل بيه يفتحله الباب وصخر عافه وطب جوه مرتاح ومتشفية نار گلبه بأخوي وانا لان خوش اخت مشيت فتحتله الباب وطب گبلنه للصاله
لحگناه انا وجفون وصخر بس شافه خزره ولان جده گاعده ماگدر يحجي شي
ضيرم : السلام عليكم
غضة : هلا يابعد جدتك ،هلا برچل الريشة
صخر : لا اله الا الله
باوعله ورد اندار يشكي لجده
ضيرم : ترضيها ياجده شحتني وسد الباب ما يرضى اطب
غضة : ليش ولك صخر ؟
صخر : جده هواااي يدوس وياي
غضة : خايب يشاقيك
صخر : وانا مو حمل شقاه ،ليش يعيل بي ويعرف على يوم احطنه برگبتي
غضة : يااا شني بكيفك ؟
صخر : خايبة جده والله على يوم ارده الج مدمه
نجوى : يمه شني ما رايده ابني لو زايد عدي
صخر : حگ الله احجي ،ابنج مو يعيل بي ؟
نجوى : أي والله ،بس ما تعارفه هو من يوم يومه يحب يداهرك
صخر : وانا من اليوم وجاي كل ما اشوفنه اطگه حتى يتوب مني
غضة : خايبين شني زعاطيط ،زلم صرتوا وكل واحد شواربة گدامه
طب من بره بساع ربط فيشة
نوح : جا انا شواربي شوكت يصيرن گدامي
غضة : هااا حطيت روحك
اجه گعد يمها
نوح : طبعا انا فلا عدي حظ ،بس ما الومنج انا مو بس وياج ما گاعد حظي
طب ليث مطين ،اجه گعد يصفن ،باوعله نوح وصاح
نوح : هااا السفينة غرگانه ؟
ليث : سفيتنك الغرگانه موش سفينتي انا
نوح : أن شاء الله تغرگ وانا اول الشامتين بيك
صخر : هاي شجاي يحجون ؟
ضيرم : ما اعارف جن اكو شي ما نعارفة
صخر : انا ما حاجي وياك
ضيرم : صوجي انا والله الاردن عليك
صخر : محد گايلك ترد
ليث : متعاركين ؟
ضيرم : لا
ليث : جا شبيكم ؟
ضيرم : هيج اخوك طاگات عده
صخر : مو اجيك
ضحك ضيرم وگعد بصف جده يبسبس وياها وصخر يباوعلهم وعاگد الحاجب ،ماكو اقل من الربع ساعة أمي گالت نمشي ،گمت لبست عباتي وطلعت
گبلها اريدن بس امشي ،وانا واگفتلها بالحوش طب حق وراه عزيز ،باوعلي وعبرني بساع وعزيز وگف يمي يسأل ليش واگفه هنا
اشرتله جوه
_ متانيه امي
عزيز : جا حتى لو ما ضليتي متانيتها جوه ؟
_ اريدن امشي راسي يوجعني
باوعلي بلايه ما يحجي طب صاح امي ومن طلعت مشت گدامي وانا وراها بس طبيت للبيت نزعت عباتي وبوجهي للغرفة وانا الوجع رد ينهش براسي نهش ،طفيت ضوه الغرفة وگعدت بالزوية لافه روحي بالبطانية وبس عيوني مطلعتهن ،ما خليت دعاء ما قريته بس اريدن يخف وجعي
وانا بهذا الحال انفتح الباب وطب ضيرم ،شغل الضوه وباوعلي مستغرب
ضيرم : شني شعدج گاعده هنا ؟
كضيت راسي ودنگت ما اگدر اباوع والضوه مشتغل يزيد الوجع علي
_ راسي خوية موتني ،احسن شلون السچين تگص بي من جوه
اجه گعد گبالي ،رفع راسي يباوعلي
ضيرم : ليش عاندتي وما خليتني اخذنج اليوم ؟
_ أجيت منعسة وما گدرت اطلع وانا ما نايمة
ضيرم : حتى لو چان نمتي من ردينه
_ أصلا ما گدرت أنامن غير ساعة ،انا والله راح اموتن احس ريگي من الوجع ما اگدر ابلعه
ضل يباوعلي حاير ،هز رأسة مأيس وگام طلع شوي وطلعت وراه ،سمعت صوته بالمطبخ مشيت وانا ايدي على عيوني
ضيرم : يمة سويلها چاي نومي بصره بلكت ينعدل راسها
باوعتلي وردت باوعتله وأمي ابد مو طبيعية
نجوى : اگعدي وهسه اسويلج
هزيت راسي ب أي وگعدت ،ومن ضيرم طلع اجت گعدت يمي تفلس بالنومي وبالها ولا چن يمي ،حاجيتها مره و مرتين وامي شاردت البال
بأخر مره من صحت كلش الا فزت
نجوى : هااا شكووو ؟
_ جا يمة صار ساعة احجي وياج وين صافنه ؟
نجوى : ما اعارف ،گولي شتردين ؟
_ ما عرفتي شوكت عرس ضيرم ؟
نجوى : چدتج تگول يجوز ورا الامتحانات
_ ياااا چا هم راح نركض مثل الخطوبة
نجوى : جا ما تعارفين چدج اذا ما يركضنة ما يرتاح
بس خلصت گامت حطت النومي بقوري وحطتله ماي وشغلت النار جواه ،وبس خلص صبتلي بگلاص واطتني ،خلصته وانا على امل شوي اصيرن زينة لان احسن حتى حبوب وچع الرأس بعد ما يفيد وياي وهم زين من خلصت الگلاص بديت احس اكو فرق وگلت ما دام هاد راسي اگومن اقرالي
شوي لان ما ضل شي للأمتحانات ولو هاج راسي راح يسطرني وما يخليني اعارف دربي منين
أول ما بديت بالعربي چان عدي موضوعين قواعد
ما ضابطتهن ،قريت واحد وبس بديت بالثاني طبت علي بصائر بايدها علاگة ،حطتها وگعدن
بصائر : يگولون اكو وحده صايرة شاطره وتريد تقره حتى تطلع من الثالث
أبتسمت
_ انا والشطارة ما نتلاگة بس صدگ انا اريدن اطلع من الثالث لان هيج صاير عدي فضول شنو راح يجيبلي ضيرم هدية
بصائر : ضيرم والذهب ما تعارفي ،هسه يجيبلج لو تراچي لو محبس
صفگت بأيدي
_ الشي الوحيد المخليني اريدن ادرس الذهب
بصائر : انا اذكر نجحت من الثالث أبوي راد يبطلني
وبرهان تخبل گاله انا اريدنها توصل
_ وصرتي صيدلانية منو گدج
أبتسمت
بصائر : ساحلتني سحل الصيدلة وابن مدري بت اخوج
_ يلا تجيبين وتخلصين
بصائر : الله من هسه اريدن افك ،لان والله حيل تعبانة روحي جاي تخلص وكلشي ما ضال ببطني
باوعتلها صدگ متغيره ،وجهه الحلو بادي يضعف عيونها جاي تبين أكثر لان الخدود جاي تروح ،من غير رچفة ايدها الخفيفة الهسه انتبهت الها ومبين لان ما جاي تاكل ،وحتى لو اكلت مايطول الاكل بمعدتها غير بالزايد دقيقة ،من هسه تحسب الروحها شوكت تجيب وهو بعده ما مبين أصلا ..!
فتحت العلاگة واطتني منها نستله وطگت قوطية الببسي وحطتها گدامي
بصائر : اكلي بالنايبة عني وعنج وعن هذا البطني
أبتسمت
_ جا شني ما تاكلين ؟
بصائر : لا وين اگدر شو صايرة ما احبن الحلاة
_ جا شلون انا اكل النستله التحبيها
بصائر : اكليها واقريلي الفاتحه
ضحكت وهزيت ايدي وهي هم ضحكت ،ضلت يمي وانا اكل واحجي وياها وبس مشت رديت قريت وكلساع اصفن وي روحي صح الوجع ما راح بس المهم خف واحسن من كل وكت
گمت طلعتلي هدوم ومشيت سبحت ،وبس طلعت گابلت الصوبة وگعدت ،أجت امي گعدت يمي
بأيدها صينية زغيرة ومن حطتها گبالي چانت بيها كاسة لبلبي حار والبخار يطلع منه
نجوى : اكلي بلكت تصيرين زينة
هزيت رأسي ب أي وشلت الخاشوكة ،لگمة ولگمتين وحسيت باللعبان نفس بده يردلي وكرهت حياتي وازدت الدنيا سود بيعيني فوگ سوادها من گمت فرغت كلشي ببطني وافترت بي الدنيا وما حسيت روحي غير انا بالمستشفى
فتحت عيوني على شي بارد يمشي بجسمي ،باوعت على ايدي هاي كانونه ،حياطين بيض ،يعني هم طحت وهم أجيت للمستشفى لمكان اضن انا بعد ما راح افارگه...! !
مسحت عيوني المغوشات وانا احسن لو ضل هل غواش كلساع چايني راح انعمي
نجوى : هااا يمة حواري ،ولج طيحتي گلبي يا يمة
بالگوات صوتي طلع وانا اگلها
_ مابي شي ،لا تخافين
نجوى : خايبة شلون ما اخافن وأنت تبخرتي بين أيديه ،ولج هديتي حيل أمج
گاعده گبالي ولامه وجهي بين ايدها وكل كلمة تحجيها طالعة من كل گلبها
نجوى : خايبة خليتينه ما نندل دربنه ،ما تگليلي شچاج شو چنتي جنج ورد
بلعت ريگي وانا احسن بي تجرح على گد ما يابس ومر
_ يمة اريدن ماي
نجوى : صار
گامت فتحتلي بطل الماي البيدها وشربتني ،وبنفس الوكت انفتح باب الغرفة وطب ضيرم
من شافني أبتسم ومبين عليه شگد جان خايف والصاير وياي خلاهم دربهم ما يندلوه لان أخوي طالع بشحاطة البيت
وگف گبالي وانا رديت تمددت
ضيرم : شجاج خوية جا هي هيج خلتيني اطيرن بالسياره دربي ما مندله منين
_ انا ما اعارف شچاي يصيرلي ،كل ضني اليوم انا صرت زينة بس هم رديت طحت
بالگوه احجي حرف حرف وهو يباوعلي حاير ،انا اعترف حيرتهم وانا هم حرت ،چنت كلشي ما
بي وفجأه صرت ما اگدر هاي روحي اعينها وأمشي
نجوى : شنسويلها يمة ضيرم ؟
ضيرم : انا اخذها للدكتور السبت اسويلها فحص شامل واشوفن الخلل وين
نجوى : زين ما تسوي لان مو مال تظل هيج احسن بيها يوم عن يوم جاي تذبل
ماحجه شي وضل يباوع على المغذي ،من خلص سده واجه شال الكانونه من ايدي وبهل لحظه وانا اشوفه يتوجع وياي عرفت انا عدي اهل بوكت طيحتي يگولون أخ گبلي ،وكل ما مرت هاي الايام السود جاي اتاكد من الگلتله ...
گمت اسند روحي على امي وهو طلع يمشي گبلنه بس وصلنه للسياره فتح
الباب وگال
ضيرم : اصعدن وانا شوي وارد
نجوى : خوش
صعدت انا وامي مشت گعدت بالصدر وهو شوي ورد فتح الباب من جهتي وفتح بطل العصير
ضيرم : أشربي لان صاير عدج حتى هبوط بالسكر
نجوى : يااا جا شو ما حجه الدكتور ؟
ضيرم : ما حجه بس انا اعارف ،هاي هي مبينة هبوط سكر عدها مو بس ضغط
نجوى : شجاكم يايمة بكل طيحة ولزگ وياكم السكر
ضيرم : گولي يا الله يمة مو مزمن
نجوى : جا وعزيز
ضيرم : جا مو گلنه بس يلتزم سنة يرد كلشي مابي
امي منداره تبلوعلي وهو واگف متانيني اكمل العصير ومن شافني شربته نصه وما گدرت اخلصه اخذه من ايدي وسد الباب واندار صعد يسوق والطريق كله مبايله ما سكت ،كلساع واحد من الولد مخابره وهو يرد بكلمة "ردينه"
بس وصلنه شفناهم واگفين بالباب ،عزيز وحق وليث يمهم ،نزلت من السياره ،وانا احسن بجسمي يرجف من البرد ،بساع اجانه عزيز و وراه ضلوا واگفين ليث وحق ،باوعتله عينه ابد ما أجت علي ،چان مركز وي ضيرم ويسأل
ليث : خير ،شني صاير وياها ؟
ضيرم : هبوط بالضغوط ،وهم بالسكر
وبنفس الوكت عيني راحت على الي عينة چانت مركزة بي وابد ما نزلها حتى من باوعتله ،غمض عيونة وچن بحركته يگلي
"الحمدلله على السلامة"
درت وجهي بساع ،ورديت اباوعله وانا محترگ گلبي لان الگدامي ابد ما اهتملي
فزيت ونزلت راسي بساع من شفت عزيز چاي ناحيتي ،لزم ايدي ومشاني يطببني جوه ،واول ما طبيت صارت گدامي بصائر وجهه صاير اصفر
وخر عزيز وهي لزمتني ،طببتني للغرفة وگعدت گبالي
_ خايبة شبيج ؟
بصائر : ولج خليتي شبيه ،شايفة من طحتي شسويتي بينه ،نگعتج بالماي وأنت ما صحيتي
عمتي اجت تطيح فوگاج
بلعت ريگي وانا احسن بخوفها وحقيقة حجيها انقهرت لان هلگد مخوفتهم
ماكو شوي وطب ضيرم وامي گعدوا يمي وانا لازمة راسي واباوعلهم ،وبنفس الوكت سمعت أصوات
بره گام ضيرم يشوف شكو وعرفتهم بيت جدي من طبت جفون
سلمت وگعدت وامي گامت تتلگه جده من سمعت صوتها بره
جفون : وانا اگولن عليج صل وما يصيبج طحيل
شو طلعتي فاشوشي
_ هسه مقهوره علي لو مقهوره لان ما طلعت صل مثل ما تگولين ؟
جفون : خايبة والله ضايجة ،احسنج مو حواري صرتي فد وحده عجوز
_ خاب شبيج الناس تگول الحمدلله على السلامة أنت راح تمرضيني بالزايد
جفون : ما امرضج بالعكس أنا اريدج تطيبني لان احسن روحي مضيعة تكي
_ اياا ادبسزز
ضحكت تحركلي حواجبها وطبت جده وعمة زهرة تحمدلي بالسلامة وگعدن وامي اجت گعدت يمهن تحجيلهن علي من تخربطت ،شوي وطبت
بصائر بايدها دولكة الماي قدمتلهن وگعدت بصف جده
اندارت الها تسألها
غضة : ما صرتي زينة ؟
بصائر : لا وين جده بعدني ،احسن روحي جاي تخلص يوم عن يوم
غضة : هاي أنت بلايه حباله شلونج مو النوبه حبلتي
نجوى : صح عمة بس هم لاتنسين نساتها قوية وماخذها عافيتها
غضة : جا اذا على النساوة سهله ،تخلص الرابع وتوگف على حيلها
نجوى : بلكت الله
زهرة : الدكتوره ما گالتلكم شگد عليها ؟
نجوى : شهر وچم يوم بس هم ما متاكده
زهرة : جا بعد هواي
غضة : يصيرن سوالف
ضلن يمنه شوي ومن اجاهن نوح مشن ،وانا ما عولت تفرغ الغرفة واطفي الضوه ،اتمددت وانا عيني على السگف وصارت الدقيقة البيها راسي ما يوجعني اطيرن من الفرح ،صدگ اكو اشياء من نخسرهن الا نحس بقيمتهن ونعمتهن علينا
غفت عيوني بعد ألف دعوه والف نخوه ،نمت ساعات وگعدت على حلم خلاني مثل الطير المذبوح
اريد بس اشرد من الغرفة وأمشي الامي ،دگيت الباب عليها شلون الشارد من شي
فتحه أبوي متخردل من طريقة دگتي الهجومية ،طبيت وانا ادور امي بالغرفة ،ضلمة وما اشوفن شي وانا بس اريدن حضمها ،وبس
سمعت صوتها ركضت ضميت روحي يمها وجسمي كله يرجف
لمتني بحضنها حيل چن تريد تطببني بين ضلوعها أبوي واگف يباوع علينه ومن وگفته احسن بيه شگد مستغرب وحاير من وضعي بهل وكت ،وانا بذات نفسي ما اعارف شني الجاي يصير وياي وليش هيج حالي بين ليلة ويوم انگلب! !
وخرتني تريد تفتهم شني السباب الخلاني ادور حضنها بهل وكت
نجوى : شبيج يمة حواري ؟
رجفت اطرافي وانا اتذكر الحلم ،غمضت عيوني واحس برچفتي تزيد ،شكد ما اخافن و ولا بيوم توقعت هيج انا حلم يخوفني ،كل ما غمضت عيوني وينعاد گدامي والزگ بامي اكثر وحتى ما گدرت امشي للغرفة وضليت يم امي نمت بحضنها وتغطيت بنفس بطانيتها ،وابوي من شافني نمت بمكانة
فرشله بالگاع ونام وغفيت وانا اسمعها تقره أيات قرآنية علي
گعدت على صوتهم بره وريحة الجاي طاب للغرفة وعرفت ملتمين يترگون من صاح
فقار : تعاي بصائر تريگي
بصائر : وين اگدر اكل بيض انا ،تريد تخلص مني بس ما تعارف شلون
فقار : هاي فوگ ما اصيحج تاكلين ،عمي والله مو صوجج
ضيرم : خايب عوفها ،ماتشوفها شاده الخشم لعبت روحي من البيض
نجوى : جا غير ماتگدر تشتم ريحته
ضيرم : دشوفيها شلون تباوعلنه ،راح تخليني أحلف ما اكل بيض بعد
بصائر : شبيكم وياي
نجوى : تعاي اكلي جبن
بصائر : ولا اگدر عمه انا ماي ما جاي اگدر اشرب
گمت فتحت الباب وطلعت بس شافوني ضيرم صاحني حتى اتريك ،مشيت گعدت بصفه ،صبلي گلاص جاي وحط خبزة گدامي ،اكلت لگمتين من الجبن وماگدرت اكل بعد
باوع علي ورد باوع الامي
ضيرم : احسن عدها جرثومة بالمعده
نجوى : هاا صدگ ؟
ضيرم : مو اكيد بس ابو الجرثومة هيج ما يگدر ياكل ولو اكل ما يثبت اكل بمعدته
نجوى : وتتعالج ؟
شرب من لجاي وگام يريد يمشي
ضيرم : تتعالج بس تطول ،گوم فقار يلا
مشى وفقار لحگه ،بيوم الجمعة متعودين كلهم يمشون للگيعان ونصهم مرات يمشون للدواچن وبيهم لمحلات الگصابة ،شكو شغل عدهم يكفوه بهذا اليوم لان منوره دواماتهم ما عدهم وكت زايد
°جفون°
حاطه ايدي على خدي وگاعده بالمطبخ وماخليت دعاء على بيت غازي ما دعيته ،غاية تقره
عدها امتحان وهيوفة جاي تغسل هدوم وانا طحت برطينة الجاي
مشاكلنه وي بيت غازي تفض وسالفة الجاي ما تفض
جدي وعمي محمد طالعين والمعزب عمي يوسف واذا تأخر الجاي يابوية شيخلصنه
گمت صحت على النوح المخلصها يباوعلي صفح وانا حتى مالي خلگ اعاركه منعسة وجاي امشي بالگوات ما اعول شوكت اشمر روحي بالفراس واخلص ولا واحد يحشمني لان هسه الجاي سويته
على اعصابي واحسن بيهم راح يشربون افشل جاي بحياتهم كلها
بس خلصت شال الصينية ومشى بلايه ما يحجي وياي ،هزيت ايدي خاب حجيت والما حجيت قابل نهاية العالم لو شني!
طبيت للغرفة اباوع عليها تتثاوب وتقره ،مشيت گعدت يمها وهي من گد ما مطفية من سألتها الأحد شنو امتحاناج گالت
غاية : عربي
باوعت للكتاب البيدها
_ جا مو بأيدج اسلاميه
باوعت للكتاب وردت باوعتلي
غاية : يلا ماكو فرق
_ امتحانج شني ؟
غاية : خايبه اسلامية بس انا امسلت
هزيت ايدي وگمت فرشت الروحي وتمددت ،وما طولت خمس دقايق وغفيت ،بس هستوني غافية وفزيت على صوت هيوفة طبت للغرفة تحجي
كاتلها البرد من شافتني فزيت منوره صوتها حطت اريدها على حلگها
هيوفة : گعدتج ؟
رديت غمضت وانا اگلها
_ هسه ارد انام بس طفي الضوه
هيوفة : گومي غاية اطلعي بره أقري خليها تنام خطية
غاية : بارده بره
هيوفة : الصوبة مشتغله ماكو برد
کامت غاية طلعت وهيوفة شوي ولحگتها بس گبلها طفت الضوه علي ،هستوني رديت غفيت وهم
فزيت على صوت بره ،گمت بساع حطيت الحجاب على راسي وطلعت
حطيت ايدي على گلبي وانا اشوفنه حاله حال وهدومه كلهن ترابة وچف ايده ينزف ،وصخر يفتر گدامه ويرزل
صخر : انا چم مره گايل الدراااجه ما تفحطوون بيها چم مره حاجي شكبركم بعد تصيرووون
نوح : خاب شنيييي زعاطيط گدامك
صخر : زعاطيط ونص واكسر راسك أنت وذاك البي بخت شرد
طب جدي التعب مبين عليه وعمي محمد وراه ،بس شاف نوح بهل حال وخبصتنه خبصه گال وهو يباوع بالوجوه
محمد : خير شصاير ؟
أشر على نوح
صخر : هذا وتكه ماشيلهم بهيمه يفحطون بالدراچه ومن گالبه بيهم خابرني والله تعالي ما نگدر نمشي
خزره عمي ما راضي
محمد : انا چم مره گايل هاي السوالف بطلوهن ؟
صاح ضايج وهو يباوع لصخر
نوح : ساعة السوده لو چايين مشي هواي احسلنه
محمد : صوتك نوووح لا تعلي
دنگ راسة بلايه ما يحجي ومشى يصعد فوگ وجدي طب لغرفتة يرتاح وعمة لزمت عمي اسأله
زهرة : خوما صايرلهم شي ؟
محمد : بس واحد من الولد متصاوب وبالمستشىفى
زهرة : يااا ياااا وعمك شسووه ؟
محمد : متحزم حزام ،بعد رباح أخو رأجس يموت على الطلايب
زهرة : فلك لا يسمعك عمي
محمد : العدنه اهون من ذاك البلاء الأسود ،واليقهر عدهم جهال حالهم بالظيم
زهرة : اوووف ،انا والله لو الي خلگ الدرب جان مشيت وياكم
محمد : وين تمشين
اندار على هيوفة
محمد : حضريلي الحمام بعد ابوج
هيوفة : صار تدلل
مشت تحظر الحمام وانا گعدت يم الصوبة بصف غاية نومتي طارت تعلعلت ،ضليت بس انا افتر بالبيت كلهم ناموا ،اذن الصبح وصليت وانا المن السجاده سمعت صوت باب المطبخ ينفتح وماكو غير ليث يجي هيج وكت من الگيعان
نزع چفيته الاف بيها وجهه من البرد ،واجه يريد يگعد يم الصوبة ويحجي وياي
ليث : شني شعجب گاعده رموش ؟
_ ما نايمة أصلا
ليث : هااا ،جا گبل لا تنامين تگدرين تسويلي شي اكله ؟
_ صار
مشيت للمطبخ وانا اگولن بگلبي ،والله لو نوح جان گتله لو تموت ما اسويلك بس هذا ليث الحباب مو نوح ابو ريحة
بساع سويتله طماطه وخدرت جاي وبس خلصت وديتهن اله ،گعد ياكل وانا مشيت للغرفة ،لزگت روحي بهيوفة ونمت ،ومن گعدت وانا هستوني طالعة من الغرفة شفت صخر هستوه چان نازل من فوگ مبين عده طلعة لان كاشخ
وگف گدامي وگبل صباح الخير گالي
صخر : يگولن اكو وحده جاي تسخت وما تحظر لنص السنه
فاتت مني غاية ،من سمعت هيج گال گالتله
غاية : جا غير ماكله الكتب اكل هسه لو تمتحن ابو التربية يگلها طبي وزاري غصبا علي
صخر : جا ما اعارفها شاطره ،بس انا اريدلها درجات عالية يرفعن الرأس
أبتسمت
_ والله أجيبن درجات عالية وشوف
صخر : چا خوش حتى اجيبلج هدية بأخير السنة
هزيت راسي ب أي فرحانة وهو مشى يطلع ،وانا كملت دربي للمطبخ ،سوتلي ريوگ هيوفة
صح هو جبن والجاي حمته بس انا احبن من ما تخليني بلايه ريوگ لان تعرفني اغلس واضلن
كاتلني الوجع لوما هي تسويلي
گعدت اكل وانا اباوع لكتاكيتي يلعبن بالمطبخ
صارت بي خوفة ما اخليهن ابد يطلعن بالحوش وهسه هيوفة تغسل مواعين وكلساع فازه من
واحد يجي يمها وتصيح
هيوفة : والله راح ادوووسنه واموته
ضحكت وگمت ضميتهن بالقفص وغسلت ايدي ورديت اكل ،ومن خلصت مشيت للغرفة أقره گبل
لا ننخبص ،اليون بيت غازي يجونه عود يعتذرون على دوسة البيت
بساع تگابلنه انا وهيوفة نضفنه البيت انشلع گلبنه لان وكت ماكو وخابر شيخ واحد واحد گال جاين ماكو هستونه طبينه للبيت وسمعنه صوت الهوسة بره تلگوهم عمامي وجدي والولد ،بس الگلب الموازين واملنه بالصلح من طب نوح وسألناه گال
نوح : ولا واحد منهم اجه
لطمت عمه على وجهه
زهرة : جااا هم راح تضل الطلايب
نوح : شيخ واحد وصل حجي لجدي على لسان غريب ،گايله كللهم اذا ما اطوني رهيب اسوي بيهم الانگس
زهرة : يااا يمة ،ما تفض والله عرفت ما تفض
غضة : خايبة اسكتي شني سالفتج ،كمل نوح حبوبة وشني الراح يسوي جدك ؟
نوح : ما اعارف بعد ،اطوني ماي خل امشي
ترست هيوفة دولكة الماي واطتها اله ،اخذها وطلع واحنه ذاك املنه وفرحتنه طارن
والخوف والقلق سيطر علينه ،ضلينه وحده تگل للثانية
_ شراح يسوون ؟
ومن طبولنه بلايه ما نسأل عرفناهم ما ناوين على خير لا جدي ولا الولد ،جدي گعد وهم واگفين محاوطي ،عمي محمد صافن على الولد وچنه يعارف بيهم شراح يسوون وبين يريد يمنعهم بس يعارف جدي يمشيهم مثل ما يريد وحسب الهو مقرر بيه..! !
انداريت من حسيت بأحد واگف وراي ، باوعتله نوح ،ما باوعلي وضل عينه عليهم ،ايده
بجيوب البجامه و واگف بشكل مستقيم ،طولي يم طولة يضحك ،مشيت وگفت بصف هيوفة الماخذتلها زوية بعيده عن العين
تدنيت يمها
_ شني خاتله ؟
هيوفة : جا ما اريدن مشاكل لان كل ما يشوفني يتعاركون
_ أي والله صدگ
تطشروا وكل واحد بيهم ما اعارف وين مشى وما عدت الساعة وردوا التموا ،بس لمتهم جانت عباره عن كل واحد منهم شايل تفگته
وگفوا بالصاله وجدي بنصهم ،الخوف رد وذيج الايام السود والخوف العشناه وكلشي بيهن راح نرد نعيشهن من جيدد ،تحزموا ومشوا لبيت غازي وحالفين بعد لا عطوه ولا هم يحزنون وماكو غير الجيلات بيناتهم
ضلينه الخوف والقلق كاتلنه ،ساعات عدن وماكو بالبيت غير بس عمي محمد يوسف وجدي ،كلهم مشوا ولهسه ما ردوا
عمتي زهرة من الخوف والقلق گعدت تنوح واحنه التمينه عليها نهدي بيها وبنفس الوكت طبت عمة تم ضيرم
نجوى : شني وين صاروا الوليدات ؟
رأجس : تگابلي اللطمي وي هاي البومه
باوعت عليه عمه نجوى حايرة تريد تحجي بس تعارف حجيها كل نتيجة ما راح يجيب وجدي ما يمشي غير بس البراسة
هستوها گعدت عمة نجوى وطبت عمة شيماء تسأل على الولد وجدي صاح بيها ،عده الوكت وجدي وعمامي يخابرون ومابيهم واحد يرد ،ومن وصلت حدها كلش خابر عمي على شيخ واحد
وأول ما جاوبة گاله
محمد : شيخنه الولد وعمامهم مشوا لقرية بيت غازي وما منهم احد رد
سكت شوي ومبين الشيخ جاي يلوم بيهم لان عمي گال
محمد : مو وكت ملامه شيخته ،خابرهم
وشوف الولد يمهم لو شني ،هاي هي في امان الله
سده وباوع الجدي الأول مره اشوفنه ساكت وچن مو حسبة بباله حسبات
محمد : راح يخابرهم ويردلنه خبر
هز رأسة جدي ب أي وضلت عينه على الساعة ،عدت بالربع ساعة ودگ موبايل عمي وكلنه ضلينه مركزين وياه ،فز چبيرنه گبل زغيرنه من گال عمي
محمد : دخيلك شيخ يا مركز هذا .
°كوكبة°
مديت الزولية نگعتها بالماي ورشيت التايت ودنگن اجلفها اذب حرگة گلبي بيها وانا كل صفنه اصفنها تهد حيل جبال مو بس حيلي
بس خلصت خضيتها من التايت و وگفتها على بلوكه بهذا البرد وانا احسن النار البي هذا الماي اليگص گص من برودته ما يبرد ولو شوي من حرگات گلبي
نشفت الحوش وطبيت ،مشيت بدلت ورديت گعدت يم الصوبة وانا
اصفن اردين اطلع بس ما اگدر ،اردين امشي ابجي واحجي بالگلبي للشط ،صار هاي اللياله الثالثة وانا ما ماشية ولا متنفسة الهوه التعودت عليه كل ما ضاگت بي الدنيا ...
اريدنهم بس ينامون حتى اطلع ،النعاس ذبحني وانا ضاله مقاومه بس حتى افرغ همومي بمكاني التعودت ما ارفرغ حرگه گلبي غير بيه ،تعودت انا كل ليلة بيها تثگل همومي هناك اخلصها
وبس ناموا وشفت البيت صار هدوء گمت امشي بلابه حتى ما اطلع صوت ،لبست عباتي وطبگت الباب وراي وطلعت بساع اهفن ،وبس شفت الماي يلمع عاكسة عليه الگمرية طاحت دموعي ومشيت اگعد وأنا احجي وي روحي
_ من ظيمهم يردون يشمروني لظيم اكبر
مشى الوكت بي وانا بعدني گاعده ،وما اعارف شلون اجه على بالي ،تلفتت بالمكان مستغربة شعجب ماكو كل ما اجي هو هنا
من شفت الصبح بده يطلع گمت اردن ،وريتني ما رديت من نزعت عباتي وفتحت الباب وشفته واگف گبالي وشر الدنيا كلها بعيونه ...
