رواية خلخال مشوه الفصل الأول بقلم زمرده
يقولون قديماً أنَ الخِلخال رمزَ الجمال
وصوتهُ يعني الفرح
أما ما بينَ السطور والحقيقه خِلخالي كانَ"مشوهاً" !!!
كُل ما فيَّ مُشوّه حتى ذلكَ الخِلخال لم يعُد يرُن
" خِلخالي كان شاهدًا على
ما أُفتعل بيَّ "
رنةً تلوا الأُخرا اتناثر لا مفر
لي الا لهُ
أودُ أن ابدأ لكن لا بمُفردي
هل تأتون معي ؟
نبدأ ؟
مُستعدون ؟
ما زُلتم تقرأون ؟
من الواضح أنكُم لا تخافون ؟
وصلتُم ألى هُنا ؟
" أذاً أنكُم شُجعان "
نُكمل معاً ؟
من أين نبدأ ....
من عند التشوهُات أم عند صوت ذلكَ الخِلخال
في هذهِ الرواية عجزتُ عن الوصف فأكتفيت
بتلكَ المشاهد لكَ أيُها القارئ
فعليكَ أن تقراء ثُم تُقرر هل ستكون معنا أم لا ؟
" اذُكر لي تاريخ بدايتكَ هُنا "
°•° #المشهد_الأول °•°
أيام كانت كالجحيم ،وبعضاً منها كان بلسماً
/. /. في أحد السنين
فاتحه الشباك وأباوع منه ،نمسات هوه بارده
تطب للغرفة وتمر بشرتي المشوهه تقريباً سبب
تعذيبه المستمر ،روحي محترگه لو صارت تمطر
الدنيا ثلج هم ما راح تطفى ولو شوي من ناري
وين جنت و وين صرت وبيا ظيم جاي اعيش
أنا....
رفعت رأسي اباوع على الأشجار گدامي تتحرك
بهدوء ما اشوفهن بوضوح منوره الحدايد
گدامي لاحمهن على الشباك خاف لا أشرد منه
مايدري أنام واگعد وهل فكرة ما تفارگني ولا لحظه..!!
بلعت ريگي بغصه من أجت عيني على أيدي
مكان الحرگ مال قبل جم يوم لهسه بعده
يوجعني ومنضره تلعب نفسي كل ما اشوفه
فززني خطواته الكافيات يسببلي رعب ويخلني
اتشاهد على روحي
خطواته وصوت يدة الباب وهيَ تتحرك خلني
أرجف بمكاني
رگبتي بالگوه درتها وباوعتله
من حسيته طب للغرفة...
باوعلي يسحل بروحه سحل طافي شمر نفسه
على الفراش بالگاع يلحن بأكثر من أُغنيه يخبط
مايدري بروحه شيحجي
گمت على كيف اطلع
ما اگدر ابقى يمه وهوَ بهل حال بس وأنا أمر
منه ما حسيت غير انجريت من أيدي و وگعت
على صدره ربطني بأيده تلاويت ويا أريده بس يعوفني وهوَ قافل
عيطت ولطمت و بالغلط
مادري شلون ضربته...!!!
عافني يلوب من الوجع
وأنا من شفت حاله
هيج أحس حتى لون مابقى بوجهي
وگفت أبجي من الخوف شراح يخلصني ،شراح يسوي بيه !!!
وبس فكه الوجع خزرني وطلع من الغرفة
استغربت معقولة عداها بهالسهوله بس جنت غلطانه
غلطانه كلش وياريت ضاربني مصيح مكسر ولا
هل عذاب الراح ينعاد وراح ارجع أعيشه والله بعدني ما طايبه والله الاثار تارسه جسمي...
بجيت بخوف اتوسل بي لا وهوَ يا جبل ما يهزك ريح
بكل شر يتقدم عليَّ ،وبأيدة سيخ النار من گد
ما حار صاير لونه أحمر بس شوفته سلبت روحي
شلون لو حرگني بي مثل كل مره..!!!
تضربيني لج ؟
رجعت لوره خايفه وانتفض مثل السعفه أرجف
صفيت ويا الحايط ماكو وين اروح بعد تلفتت بالمكان منو يخلصني وين انطي وجهي
هم راح يحرگني
هم راح اتعذب ولازم أتحمل
الوجع واطيب وحدي بدون لا علاج ولا أحد
يگلي شبيج راح اموت ربي
راح اموت هل
أنسان هذا شلون خلقته هيج...!!!
عطت وأحس روحي صعدت لسابع سماء بس
لزگ السيخ على أيدي وقبل لا افقد من گد الوجع العشته ما بأذني غير صوت ضحكته
المريضه ونبرة صوته الحقيره ....
°•° #المشهد_الثاني °•°
حاطه أيدي على گلبي وامشي دنيا ظلمه وبس
صوت الشصر بأذني وي صوت سعف النخل كل ساعه فازة وزادها عليَّ صوت الططوه تصيح
وجن بصوتها تگلي
_ راح تنگلب حياتج من هل ساعة الجاي أضرب من العشتي
باوعتلها واگفه على النخله تباوع عليَّ
دنگت ومشيت وگلبي يريد يطلع من مكانه شبيه هلگد خايفة وجن أول مره اطلع...!!!
رفعت عباتي وعبرت الساگيه أتلفت رجلي
تطگطگ من الخوف ،بس ما أعرف شني
المخليني مكملة طريقي گعدت على حافة الشط واباوع على الگمرية
معكوسة وي ضل النخل من يتحركن
مديت رجلي بالماي احركها الماي بارد بس روحي
محترگه وكلشي صار محفور براسي ما جاي اگدر
لا انسه حجيهم ولا ضربهم ولا حتى قساوتهم
وياي شأنسه وحده ثنين ،جابوا عمرهم همهم
بس الولد والبنيه لا شيء عدهم يحسوها عار
عليهم...
نزلت عباتي من جتافي ودنگت اخذ ماي من
الشط اغسل وجهي احس نار گابه بي مسحت وجهي
بالعباية ورفعتها حتى ألبسها بس بنفس الوكت فززني صوت وراي صوت زلمه قريب مني كلش
وجن ملك الموت واگف وراي من سمعته يسأل
بنبره صوت خشنه خلتني اتراجف وأنا گاعده
_ مني أنتِ ؟!
°•° #المشهد_الثالث °•°
أمشي واتلفت خايفه لا يلحگني ساعتها شنو
نوع العذاب الراح يعذبيناه !!!
مريت بدرابين قبل ماشيه بيهن أمشي ورجليه
مادري وين ماخذتني
وين اروح ؟ وين أنام ؟
وأرجع اهونها على نفسي وأنا اردد
_ المهم خلصتي منه المهم طلعتي من سجنه
وأنا أمشي لمعت گبالي اضوية السوگ تحسرت وأنا اباوع الهن ومشيت أكمل طريقي
طبيت أمشي بنص السوگ الدنيا مغرب والناس
جاي تعزل...
تلفتت أباوع شفت مره گاعده تلم بالبسطيه مالتها بسيطه مال خُضره
رحت بسرعه أمشي
يمها مادري ليش گلبي أرتاح الها وحسيتها
من أهل الله وراح تساعدني على الأقل بس
تساعدني الگه مكان أخلص هل ليله بي
خاله.. خاله
باوعتلي المره مستغربه من نبرتي السريعه
نشغت بس شافت وجهي عرفت خافت مني
من فشلتي وقهري بسرعه تلثمت بالشال
احجي وياها
خاله فدوه ساعديني
شبيج يمه ؟
خاله أريدلي مكان اگعد بي فدوه
شني يمه مكانيش ؟
تحاجيني المره وكلش مستغربه
خاله عادي أنام جوه البسيطه مالتج ؟
تنهدت تباوعلي
شلون يمه تنامين بالشوارع وأنتِ بنية
حديثه ؟
ميخالف خاله ماعليَّ شي
لا يمه مايصير أهلج وين ؟
تنهدت اباوعلها والقهر اكل گلبي شاگلج يا خاله
اهلي سدوا بابهم بوجهي بدون ما أحجي شي
بعد مشيت عايفتها مادري ليش حسيت ردت
أبجي من سألتني عليهم ،هواي هاضميني هواي كاسريني صاحت وراي ولا التفتت ومشيت أكمل طريقي المجهول...!!!
رجعت للشارع العام أمشي واحس بعيون الناس
كُلها عليه حقهم يباوعون هدومي مشگگه ووجهي بس عيوني مبينه منه وبين روحي أحجي
هسه يلگاج ويموتج
رجف جسمي من طبيت بدرابين عبالك مهجوره
تلفتت خايفه
ما حسيت بنفسي
شجايبني هنا شوصلني ؟؟؟
ومنا گلبي يريد يوگف وزاد ضيمي من سمعت
صوت جلاب بالفرع عبالك صوت أسود مو جلاب
طگيتها ركضه بكل ماعدي من حيل من حسيت
بصوتهن قريب مني بثانية برمشة عين صرت
بنص السوگ يم بسيطة المرة غمضت عيوني
بخوف وگعدت بالگاع جوه البسطيه ومادري
شلون وعلى نفس الگعده غفيت وما گعدت غير
على صوت المرة تندهني
خاله يا يمه اگعدي حبيبه
فزيت اباوعلها وافرك بعيوني وبدون ماحجي
جريت اللثام على وجهي وگمت
بس وگفني صوت ولد يصيح وراي
يابنيه
نداريت اباوعله وبس عيوني طالعه باوع بعيوني
ورديت باوع لشالي
حمحمت وسألته
شرايد خويه ؟
رفع أيده بيها خِلخالي
هذا الج ؟
" ما فعلهُ ذلكَ الخِلخال لم
يكُن منسياً "
•----∞∞∞∞∞∞-----•
ما حالك عزيزي القارئ بعدما قرأت تلكَ المشاهد وليست الرواية بأكملِها ؟
والآن أنتَ معنا ؟
أجل أنا مُتاكده بأنك من ألان سوف تُضيف هذهِ الرواية إلى المكتبة وتترقب نشر أجزائها
عُذراً عزيزي القارئ📌
فهذهِ الرواية لا يمكُن وصفها ...
" علينا أن نُطيل النظر
فأنها تحتاج الى صبر "
•----∞∞∞∞∞∞-----•
#بـــارت1
أولاً
اهلاً بك عزيزي القارئ وسهلاً
بقدومكَ معنا عند سور هذهِ القرية
التي عُرفت بقرية "خنسه"
"مُحرم الحرام" في أحد الأعوام ذات يوم من
الايام بدأت تُفتح أبواب ذلكَ السور الذي
يُطوق أُناس عُرفوا ب أحفاد "ألراجس" لنُشاهد
عن قُرب وعلى لسانهُم نقراء ما عاشوه خلال
السنين التي مضت
أُناس سُكبت في عروقهُم دِماء اجدادِهم ،اجوائُهم
عراقيه ،جنوبية ،شيعية ،لا نِقاش بذلك
تحتَ شِعار "خِدام الحُسين"
•---∞∞∞∞∞∞∞---•
دنيا المغرب ومخبوصين ،الولد يحظرون للموكب
وأحنه للمجلس ونوح وأم المشاكل جفون
يتمالخون لان ما كوتله دشداشته السوده وهوَ
موصيها...
ليث : ولك نوووح تعاال شيل وياي الگونيه
نوح : بس اوگفلي اكتلها واجيك
ليث : دعوفها بيا حال أحنه ما تشوف هم يلا
نلحگ نمشي للموكب ،ورانه كومة شغل
نوح : هسه جايك
ليث : أبوي راح يلعب العگال على ضهرنه من جوه
راسك لهسه ما فاتحين الحسينيه وكلشي ما
مسوين
نوح : مو نوح مصباح علاء الدين طلعت ما يكمل الشغل
اذا ما انا موجود
ليث : ماشي انا عود الحگني
بس مشى ليث ركض نوح وراها ،تركض وهو يركض
يريد يلزمها وهيَ مثل الزيبگ فرته فر ،تغلط عليه
وتكمز من مُكان لمكان...
ضحكت بيدي الصونده أغسل الحوش وهمَ
اخذوا الحوش بكبره واحد يسحل الثاني بنص
الماي ،تعودنه على عركهم حتى مابينه أحد
يحط روحه بنصهم لان شوي ونرد نلگاهم صحبه
أجت تركض ختلت ورأي ،لازمه دشداشتي
تحتمي بيَّ منه لان شايل النعال يريد يطگها
_ غاية الغالية ،عليج الله لاتخلي يطگني
جريتها أضمنها منه وهوَ واگف يتهدد يريد يطگها
لان وگعته وبللت هدومه
نوح : يابه راح اسحلجن ثنينجن
باوعتله صفح
_ اسحلها بس هيَ انا شلي غرض
نوح : لا ما اسحلج اسحل بس هاي الخايسه
وهيَ من وراي تصيح
_ أنتَ الخايس الجايف أبو ريحه
نوح : تروحيلي فدوه لج
صحت بزعانه روحي من نگرتهم
_ كافي ترا مصختوها
نوح : حطيلها ملح
باوعتله بلايه ما أردن عليه ،وجريت هاي الماصخه
كلش وطببتها جوه اسحل بيها ،گعدتها يم أمي
_ خليها يمج لا ترد تتعارك ويَّ نوح عيب كبروا
الى متى يضل عركهم گاب
زهرة : تنرد العرمه
جفون : انا العررررمه ؟
زهره : أي أنتِ ،عرمه لا تستجنين ولا تهيدين
وگعت وذره من لساني وانا اگلج عيب يمه عوفي
الولد لا تعاركي بس وين اگدرلج انا
جفون : يااا خلف الله عليج ،هوَ هذا هم حضي
أني حض ماعدي هيَ گوه .
زهرة : يااا ياااا طلعتنه احنه الغلط شوفي ولج
يمه غاية شوفي
ضحكت اهزن بأيدي ولا تنگدر هل جفون هاي تفر
حكومه بحيلتها
جفون : مگرودة الله عمه شبيج وياي
أيست منها أمي وسكتت ،لان هيج هيج أحنه
الغلط وهيَ الصح
زهرة : يمه غاية كملتي الحوش ؟
_ لا وين خلوني زوج المشاكل
جفون : عليمن ولج ؟
زهرة : اسكتي رموش اسكتي لا اگوم اگطع النعال
على ضهرج وأنتِ يمه امشي كملي الحوش
جفون : أنتِ تلعبين بأسمي حسب الموقف هسه
صرت رموش مو هيج عمه ؟
زهرة : رموش ودموع بعد شتردين ؟
بلايه ما احجي طلعت واسمعها وراي تدردم
جفون : الك الله يالفقير .
باوعت على الحوش غرگان بالماي ومنا هوَ هالله
هالله ،شويَ وابجي شينشفه ،مشيت جبت الماسحه
وبديت انشف بي وانا ادردم عليهم ،كله من زوج
المشاكل طگ ضهري الا كمل
طبيت للمطبخ كاضه ضهري بعد عدي كومة شغل
وزاد من طب أبوي متسوگ للتوزيع مال مجلس
تلگيته أخذ العلاليگ من ايده واحجي وياه
_يابة جا وين اللالنگي ؟
محمد : بره ،جبت صندوگين يكفن ؟
_ أي كافي عاشت ايدك
محمد : وايدج بوية ،جا وين جفون ليش مو وياج ؟
_ جفون فالها بس العرك ويَّ نوح ،الشغل ما يعجبها
محمد : ما ضل وكت
_ هسه أصيحنها
مشى أبوي يجيب الالنگي وانا گعدت اعزل بالهوسه
ركض ركض بس اريد اخلص ومن شفت روحي ما
الحگ جبت جفون وياي نشتغل بساع حتى نلحگ
احنه أول بيت تجينه الملايه ...
لازمه بأيدي المبخره وأفتر ابخر بالديوان وعيني
على الساعه ،اندگ الباب مشيت افتحه
أبتسمت من شفتها بوجهي رافعه عباتها وتدردم
حواري : الباب منگع من يّجن النسوان راح يخزنكم
_ طبي حور وصميلي حلگج
حواري : هااا عليه ؟
_ اكو وحده غيرج اسمها حور ؟
حواري : أي اكو ،العراق متروس من أسمي
_ ولج طبي لا يّجي أحد ويشوفج واگفه هنا
حواري : لا تخافين ما يحجون هذا شهر التحرير
_ شلون يعني ؟
طبت وسدت الباب تشرحلي
حواري : ولج قصدي بهذا الشهر يخلونه نهبت
تنفتح بيبان السجون علينه
_ وين عمي يسمعج
حواري : اسكتي فدوه شيسمعني غير اذا يكفني
هسه يخليني الطم صفح واضحك النسوان عليَّ
جريتها وهيَ بعدها تريد تسولف ،طببتها بالصاله
سلمت على أمي وگعدت يمها ،أجت يمها جفون
هم ،وانا مشيت اسبح ما ضل وكت ،وبس كملت رديت يمهن
_ حلو ثوبي ؟
حواري : يخببببل
جفون : غير جديد يعني
زهرة : اليسمعج يگول ما خيطتلج أنتِ هم
حواري : يم منو خيطتي عمه ؟
زهرة : يم أم أحمد
حواري : والله عاشت ايدها مبدعه بي
واگفه امشط شعري وعيني عليهن ،بس كملته اطيت
المشط الامي وگعدت گدامها
_ اگلبي يمه ما اگدرله
زهرة : يا يوم گدرتيله أنتِ ؟
_ غير ما تخليني اگصنه
ضربتني على راسي بالمشط
زهرة : گصي فد يوم جا غير اگص ايدج
_ جا ضلي هيج حايره شلون تلمي
زهرة : ميخالف راضيه انا
حواري : والله ياعمه جايبه التعب الروحج
زهرة : بالحسين ياعمه مستعزه بي لان غير خلصت العمر اداري حتى يصير هيج
حواري : بس عمه گصي منه شويَ حيل طويل
زهرة : لا يممممه
ضحكت على ردة فعلها معوده اذا أحد گالها گصي
شعر غاية تنشغ هل نشغه هاي وتخليني اتراجع
بكل مره اريد اگصه وضال يطول أكثر واكثر
من كملت گمت لبست شالي الأسود وطلعت وره امي
نستقبل النسوان بدن يّجن ،وبس ألتمن ركضت
للمطبخ ،فتحت الكاونتر اطلع دولاك الماي الگزاز
حواري : اكسر ثلج ؟
_ أي مجمده من امس بس لاتخلين هواي لان
الجو بارد
حواري : خوش
اخذتهن على السنك اغسلهن وحواري تكسر ثلج
يمي وتسولف ويَّ صاحباتنه وعلى
جهه واگفه جفون تعدل شالها على المراية الموجوده
بالمطبخ
حواري : أريد اروحن لموكب الولد اشوفنهم شسووا تمشن وياي ؟
رقية : هيدي حور ،نسيتي العام شصار بينه من
لگفونه
حواري : والله لو يموتوني هم اروحن ،اريد اشوف
التغييرات المسويها هاي السنه
رقية : ولج تحوسين على كتلتج أنتِ ؟
حواري : أي والله صار هواي ما مكتوله
رقية : شحجي وياج ؟
حواري : كلشي لا تحجين ،أمشن نوزع الماي والله
كريم
ما تدخلت ولا منعتها لان انا هم هاوية امشي واشوف اجوائهم هناك ،أبد ولا ماشيه كل سنه حواري وجفون يمشن وانا اضلن أخاف امشي
ماعدي هل جرئه هاي وافكر شلون لو كضونه
اخذت أخر دولكة ضلت ومشيت افتر على النسوان
كل وحده بينه مستلمه جهه توزع ،وكل وحده اطيها الماي تعبر عن حزن هذا الشهر بكلمة تعودنه نسمعها
_ بثوابك يا أبا عبدالله .
كملنه وطبت الملاية ،قدمت الها ماي وطلعنه بأيدنه
الدولكات فارغات خليناهن بالمطبخ وركض
ردينه للديوان حتى نعيش هاي الأجواء بتفاصيلها
أجواء حزن ،تبدأ بذكر واقعة كربلاء ومُصاب
سيد شباب أهل الجنه
أبا عبدالله الحُسين (ع)
گاعده بعتبة باب الديوان عيني مسلطه على المجلس
كله ،عباره عن غيمه سوده من العبي والملابس
السود دليل على الحداد ،الملاية تقره والنسوان يردن
بصوت واحد ولطمه قوية صداها بأذني ما يروح
منظر قشعر جسمي ،والدمعه لمعت بعيني وانا
اشوفن أجواء العزاء هاي التنعاد ب بيتنه كل سنه
والحمدلله ألي من علينه بهاي الفضليه
التفتت على أثر أحد يندسني
جفون : گومي نحظر التوزيع گبل لا تسوي الوگفه
گمت اعدل بثوبي ومشيت وراها ،طلعت سلات
التوزيع محظرتهن وصرنه نغسل بالالنگي ونخلي
بيهن
جفون : لو غاسلي گبل بوكت
_وين لحگنه احنه
جفون : أي والله ،اصيح البنات وياي ؟
_لا ما يحتاج ،بس خفي ايدج وياي
جفون : شوفيني حتى تنگعت بعد اكو اكثر من
هيج سرعه
_ ديلا الج ثواب
سكتت تشيل بالسلات تخليهن على الكاونتر
حواري : هاا بنات تحتاجن مساعده ؟
_ كملنه بس تعاي هاج هاي السلتين ابدي وزعي
حواري : خوش
اخذتهن ومشت ،وانا خفيت ايدي اكثر من سمعت
الملايه سكتت لان عرفت هذا وكت التوزيع
_ هاااا بت محمد
رفعت رأسي على باب المطبخ عرفت صوتها
_ هاا بت ضاري الورده
ضحكت وأجت يمي
كوكبة : منين ورده ضاري ورده على بختج
_ شعجب اجيتي
كوكبة : خيه بالبوگه
_ ما توبين ،شلون لو لگفوج
كوكبة : يمعوده خلهم يلگفوني ،مجلس الحسين
حارميني منه الله ما يقبل الهم والله
_ أي والله ،كلنه أهلنه ما يحبون الطلعه بس المجالس ما يفكون حلگهم
كوكبة : يااا خيه أحنه كفرة الله وكيلج ،لا يسوّن
مجالس ولا يطلعون مجالس
_ شلون عايشين ،شيعة نص ردن
كوكبة : تبرت منهُم شيعة علي
_ ولج لسانج
كوكبة : يا لساني غير مشوفيني نجوم الظهر
خليني ساكته وضامه جروحي بروحي
_ امشي نوزع وبعدين نگعد نسولف
اخذت سلة من ايدي وطلعت گدامي وانا وراها
كملنه التوزيع ولملمنه الوصاخه ،شغلت السماعة
الملايه وذكرت الصلاة على محمد وآل محمد قبل
لا تگول
_ يالله حبايب بيجن حيل توگفن .
وضجت أصوات النسوان بالمجلس ،كلهن نزعن
عبيهن و وگفن يتحظرن بس بدت اشتد اللطم
اكثر من گبل شويَ يطبن مجموعات بالنص يحين
أجواء المجلس بالطم على الگصه
تشتد اكثر واكثر وانا واگفه على جهه الطم واباوع
بعيوني ،اجت كوكبة وگفت يمي تقنعني نطب
سوه
كوكبة : شبيج حبابه غاية خلي نطب سوه وجفون
هم ويانه
_ وينها ؟
كوكبة : هذيج واگفه بالنص متانيتنه
_ يلا أمشي
لزمت أيدي وخلصتها مدافع يلا وصلنه جوه وبس وخرن اليلطمن طبينه بمكانهن ،شعور مو جديد بس حزين بكل مره أعيشه ،اصوات اللطم وانا بهل قرب من ميدان العزاء فضل چبير
من رب العالمين
تعبت وطلعت من الميدان بكبره اريدن اتنفس أحس
شح عدي النفس
حواري : غاية شبيج ؟
تنفست بقوه ،اريد دگات گلبي تستقر
_ مابيَّ شي ،بس فحطت شويَ
حواري : هواي ضليتي تلطمين وأنتِ موزين عليج
_ والله لوما مختنگه ارد الطم
حواري : ولا توبين ،نحجي هندي جا غير موزين عليج
_ ما يصيرلي شي ،أبا عبدالله ما يضرني
حواري : ميخالف بس غير عينج على روحج
_ على الجايات
كوكبة : هاا شكو ؟
حواري : ماكو شي بس هاي مختنگه
كوكبة : أي شفتها انفعلت باللطم گلت راح تطيح
حواري : ليش صحتيها تلطم ؟
كوكبة : جا اخليها تباوع بعيونها ،شبيها مشلوله
قابل
حواري : وگلبها ؟
كوكبة : بزونة أم سبع ارواح لا تخافين عليها
باوعتلها صفح ومشت وكوكبة تصيح عليها ولا
ردت
كوكبة : شبيها هاي ؟
_ طگن فيوزاتها لا تضوجين منها
كوكبة : لا على شنو أضوج ،بس استغربت منها
تنتر ،تنتور
_ امشي نرد راح يخلص المجلس
جريتها من أيدها وردينه للديوان ،وبس طبينه
خلصت القصيدة الاخيره
كوكبة : شگد خير احنه
النسوان وحده ورا الثانيه بدن يطلعن للبيت
الثاني بعيد عن قريتنه شويَ ،أجت تركض تلبس عباتها وتحجي
رُقية : مو ما تچن
_ امشي وجايّن وراج
رُقية : عفيه حبابات
طلعت تركض ورا أمها حتى تلحگ ويَّ النسوان
مشن لبيتهم
كوكبة : انا اروحن بعد لا يحسون عليَّ
_ لا ،لا تروحين أمشي وياي لبيت أم رقية خطيه
مو گالت تعالن
كوكبة : ولج واذا حسوا عليه والله يخبزوني خبز
_ منو بالبيت ؟
كوكبة : ماكو بس أمي
_ أي جا أمشي ،وعود ردي من البستان
كوكبة : حسبت حسابي خليت الباب الخلفي مفتوح
_ جا دمشي نلبس عبينه
كوكبة : الله يستر
طبينه لبسنه عبينه وضلينه واگفات نتاني البيت
كلش يفرغ حتى نقفله ونمشي
جفون : هسه غير يفضنها عاد
كوكبة : حتى القراية بدت هسه
حواري : شني عمة شوكت نمشي
صاحتها حواري حتى بلكي يگومن أمي وصاحبتها
زهرة : خيه أمشينه هناك نكمل سالفتنه
جفون : الحمدلله واخيرًا
خزرتها صوتها عالي وفشله اذا سمعت المره تزعل
زهرة : يمة غاية عباتي
_ هاي بيدي
زهرة : بعد گلبي يا يمة
أبتسمت وطلعت أمشي ويَّ البنات وهيَ والمره ورانه
حواري : بس نخلص هذا البيت نفلت نشوف موكب الزلم
جفون : تلگيهم هسه مكروبين كراب
حواري : خلي يحركون نفسهم ضالين متختخين
جفون : يجوز بس اخوتج المتختخين الباقين لا
حواري : يااا أخوتي انا ،الله وكيلج تلگينأخوتي
سايگين على الباقين هسه وناعلين سلف سلفاهم
العجب ما يعجبهم
جفون : أخوتج بس يتأمرون
حواري : ليش اخوتج مقصرين من صخر وشيلي
ايدج
نترت بيهن اسكتهن
_ كافي شبيجن خلصتنها اخوتج واخوتج ،الصمن .
همستلي
كوكبة : خيه الله يساعدكم هواي يحجن
_ من ينجمعن احنه بالظيم
كوكبة : راسج شلونه ؟
وگفت بباب البيت أرد عليها خانگه ضحكتي
_ زين ،زين
زهرة : طبن يمه فضنها
طبيت انا وكوكبة جوه وحده تسحل بالثانية
لگينه الملاية بادية تقره ،ما مشينه يم النسوان گبل
للمطبخ يم رقية وبس خلص المجلس گالت أمي
نمشي وياها لثالث بيت
جفون : عمه نلملم البيت ونلحگج
زهرة : وتجن وحدچن ؟
جفون : شكو قابل هذا البيت ،كله چم خطوه
حواري : نجي وراج عمه لاتخافين
زهرة : يالله جا ماشيه مو تتأخرن
جفون : لا ما نتأخر
بس راحت احنه ركضنه لعبينة ،البس بالعباة واحجي وياهن متوتره
_ ولجن والله خايفه ، شلون اذا لگفونه ؟
جفون : ننكتل كتله زينه
_ جفووون لا تخوفيني شبيج
رُقية : والله بنات اخواني ايدهُم ثگيله
كوكبة : مو اثگل من ايد اخواني
حواري : تمشين ويانه ؟
كوكبة : أي بس خايفة
جفون : أنهجم بيت الخوف ،أنتِ تخافييين ؟
كوكبة : جا وحد
حواري : يالله بنات بساع
_ والله حواري اذا لگفونه اگلهم أنتِ جبتينه
تخصرت تباوعلي مزغرة عيونها
حواري : لا والله قابل راح اخذچن سحل ،بكيفجن
تمشن لو لا ما جابرة وحده انا
جفون : انا ما اعوفك ضلعي امشي وياك وين ما
تمشي
حواري : أنتَ اكثر واحد خسيس وجذاب ،نسيت
العام شلون بعتني ؟
جفون : هل سنه ما ابيعنك لا تخاف
كوكبة : عيييع شگد اضوج من تحجن هيج ،احسن
أريد البس حجابي گدامجن عبالك زلم
جفون : انجب حبيبي معَ أحترامتي الك كل هذا الجمال وتگول زلمه
رُقية : وين انوثتج جعفر
جفون : ضامتها لرجلي
رُقية : خطيه راح ينغش لان يجي يوم تبين الحقيقة
حواري : امشن ضيعتن وكتنه شگد تحچن
طلعت گدامنه بلايه ما تسمع ردنه ،واحنه طلعنه
وراها مثل الحراميه ،خاف لا وحده من النسوان
تشوفنه وتفتن ألامي...
لزمت أيد كوكبة أحسن بروحي أرجف ،عزه العزاني
شورطتني ومشيت وراهن هذني يدولبن بينه
ولا مهتمات يمشن گدامنه بكل ثقه وانا كل ما نمشي
اكثر أحس الرجفه تزيد بأطرافي
كوكبة : نرد ؟
_ لا ،لا نمشي والله كريم
وبس صار الشارع العام گدامنه تراجعت أريد ارد
يمه والله أخافن
_ راح ارد انا
جفون : وين تردين يمعوووده وصلنه
_ ولجن والله أخاف منهم اذا لزمونه ما يخلون عظم بينه صاحي
حواري : عادي نجبرهن
كوكبة : بنات انا راح ازوع من الخوف
جفون : لا دخيلج ،شبيچن ؟
رُقية : عدچن عادي عبالجن أحنه صلفات مثلجن
حواري : جا ما متوازيات تجن
كوكبة : عرباين أحنه
حواري : دمشن شبيجن هذا موكبهم گدامنه ،نروح
نگعد على ذيج الكراسي مال موكب الثاني ونباوع
عليهم
رُقية : وشلون اذا عرفونه ؟
جفون : نتلثم بالعبي شبيجن محلوله
كوكبة : شگد اگول على نفسي صلفه بس اكتشفت
أنتن اصلف مني
جفون : شعبااالج تاااج وباج احنه ،مو هيج ضلع
حواري : هيج هيج وغصب عن كل واحد ما يرضه
فريت أيدي اباوع عليهن
كوكبة : باعن بس عيوني تبين مو ؟
حواري : أي هيج
تلثمت بالعباة مثلهن ،ومشيت اطگطک لازگه ب كوكبة عاد شوية اجرئ مني ،يايمه شصار بروحي من عبرنه منهم مادري شلون الله ستر وما طحت گدامهم ،مدنگه وعبرتهم وانا بگلبي أقره الفاتحه ألام البنين (ع) حتى ما شفت شجاي يسوون
من گعدنه يم الموكب الثاني الا شوي جريت
نفس وباوعتلهم مخبوصين ويشتغلون وهوستهم
واصله يمنه ،ناس تغسل الجدوره وناس تعلگ
بالرايات وناس تنضيف يركضون مراكض بس يريدون يلحگون لان الزوار بدت تمشي على دربهم
نوح : ولك ضيرررم
ضيرم : وسم الهاااري ، شبيك ؟
نوح : شغل قصديتي بدااااعة الخوه
ضيرم : اشتغل وعوف قصيدتك أبو المشاكل
لازم البيرغ بيده و واگف على الدنگة مال حسينية
نوح : اذا ما تشغلها أشمر روحي منا
ضيرم : وشمرتهم
عبد الحق : دشغلها اله شبيك معاند وياه؟
ضيرم : قصديته مليانه طائفه مثله
عبد الحق : يا طائفه هاي يمعود شغلها ،شغلها
ضيرم : شگد تلح
أبتسم عبد الحق وگعد على الكرسي يباوع على
نوح يشمرله بوسات بالهوه ،وبس اشتغلت
قصديته بكل صوته صار يقره وياها ،ومن وصل
للبيت الخابصنه بي صاح على ضيرم نصه الصوت
وهوَ عله صوته يقره بصوت مليان خشونه
_ لهفه ودمع واشواگ ساگن تسابگ ساگ
خل تسمع العشاگ قصة هوانه
مو حب على المألوف ،لا بالكتب موصف
حبنه على طرف سيوف ،والدم لسانه
والشيعه حبهم غير ما يوصفه التعبير ،واليفهم التطبير يفهم حجينه
عله الصوت عبد الحق ورد يغسل بالكراسي
ويقره ويَّ نوح
_ من كل كتر وفاد ،مشايه ع الميعاد يم گبر
أبو السجاد ننصب عزيه ،لمن سمعنه الصوت
حيا على داعي الموت جينه ورانه بيوت ضلت
خليه
من جهه ثانيه ضيرم يجلف بالجدوره ويقره وياهم
بنبرة صوت كسرت على صوتهم ،ومن وصلوا
لهذا البيت الولد كلهم وكفوا سوه يقرون وهدوا
البيدهم وتگابلوا يلطمون ونوح من فوگ يلطم
وياهم
_ نسوه وزلم واطفال مابينه واحد مال ،ثرنا
بغضب زلزال ع الناصبيه ،خل يزرع الظلام درب
الطفوف الغام ،لو فجرونه عظام نوصل ولينه ،
نلتم وذر ونگوم لجلك نضحي ذموم والغاضريه اليوم تشهد علينه
حواري : تمنيت نفسي ولد باعن اجوائهم تخبل
رُقية : أي والله هنيالهم
نوح : ولكَ فقاااار جيبلي الدرج راح اطيحن
فقار : انزل انزل عار ما يصيبك طحيل
نوح : ولك اذا تكسرت ما تعرس بفرحة الزهره
فقار : لا دخيلك ،اجيبلك الدرج وانا الممنون
ضحكنه خنگ واحنه نباوع عليهم ،فقار جاب الدرج
ونوح نزل يحجي على فقار
نوح : مصلحجي والحمزه أبو حزامين ،اكبر مصلحجي أنتَ
فقار : طبعاً مصلحجي ،جا تريد تطيح وتأجل عرسي سنه وانا گلبي مشلوع بس اريد تجي
فرحة الزهره
عبد الحق : اگول تشتغل من كل گبلك
فقار : لا تخلي بيها أنه ،تره اشتغل للحسين جاي
عبد الحق : صدگتك
فقار : بكيفك لا تصدگ ،ولك عزيز راح يوصل الماي
للطحين
محمد : شني ما كملتوا ؟
فقار : لا عمي بعدنه
ليث : ماضل شي ونكمل يابة
محمد : خفوا ايدكم كون للريوگ ملحگين
ضيرم : بس لو يبطلون سوالفهم ،عمي خلصوها
جرجره
محمد : صدگ ولكم
صخر : وانا أشهد يابه
فقار : عمي والله جاي نشتغل
ضيرم : أي عمي يشتغلون ساعه وساعتين يسولفون
محمد : اذا اجاكم جدكم يلعب بيكم طوبه
عبد الحق : شوكت يجي جدي ؟
محمد : على جيه هسه ،استعجلوا
عافهم أبوي ومشى يطب للحسينيه يشوف الباقين
درت للبنات احجي وياهن
_ خلِ نرد بنات هسه أمي حست علينه
كوكبة : أي والله امشن خاف لا واحد من اخوتي
لو أبوي يردون وما يلگوني
گمنه نعدل بعبينه وبالبوگه عبرنه منهم ،وبس وصلنه
لشارع بيت أهل رقيه تلثمنه بالعبي الشارع هوسه والنسوان جاي تطلع من المجلس ،روحي راحت من الخوف لا تلگفنه أمي والله تسوي بينه فلم
طبينه وحده وره الثانيه للمجلس الرابع وبس
شافتنه أمي ننزع بعينه بالحوش
جرتنه انا وجفون تحقق ليش تأخرنه وما لحگناها
زهرة : وين چنتن هاااا ؟
جفون : شبيج عمه ،اخخخ أيدي راحت
جرت نفسها تفرك مكان الگرصه مني أيدي وجعتني
زهرة : أم الفواين ،وين مشيتن احجلي ؟
جفون : ياااا عمه شبيج ويااااي
بسرعه عيونها دمعن ودارت وجهه على حواري تغمز
الها ،دنگت رأسي مبتسمه راح يطلعن جذبه
حواري : اخذتنه السوالف عمه مو تدرين صار هواي
ما متلاگيات ،اسألي رقية
رُقية : أي خاله جانن يمي
زهرة : ما مصدگه بيجن ،بس راح اعوفجن هسه
بس يا ويلجن لو عرفت رايحات لمكان والله احجي
لچدچن وأنتن تعرفن شيسوي
حواري : دخيل بختج عمه
زهرة : طبن جوه قرت الملاية ،واريدچن گبال عيني
مشت واحنه وراها وحده تجر بالثانية ،گعدنه بصف
أمي ،انا وكوكبة وجفون وحواري ورقية
بدت الملاية تقره وانعادت أجواء العزاء مثل كل
بيت ،وبس كملت طلعنه نتراكض لبيتنه لان أجانه
علي أبن عمي سمير گال راح يجون جدي وجده
شمرت عباتي على الكاونتر ،وركضت أحظر العشه
هسه أكيد يجون جواعه طريقهم طويل وگفت اسوي شوربة العدس جدي يحبها ،وعلى جهه شغلت طاوة الزيت اگلي كباب عروگ
زهرة : هاا يمه شسوين ؟
_ أحظر عشاهم ،هسه يّجون جواعه
زهرة : بعد أمج تعبتي،هسه تجي هيوفة تشيل
وياج الشغل
_ خلي تجي الف رأسي وأنامن اخليها حايره بالبيت
مثل ما أسبوع عافتني اهبت وحدي
ضحكت ومشت تتجه على الحايط ،وانا كملت
العشه ويا طبتهُم ،غسلت أيدي حتى اروحن
يمهم بالصاله
وگفت يمي تحجي بصوت ناصي
جفون : اجه جدج الحقنه ،والله جنه مرتاحين
_ اششش يمعوده شبيج
عفتها تدردم وطبيت للصاله بأبتسامه أحجي
_ ياهلاً نور البيت والله
رأجس : هلا بالعاقله ،هلا جدي تعاي حدي
تقدمت وانا راسمه أبتسامتي على وجهي بست ايده وگعدت يم جده
_ البقية بحياتج جده
غضة : حياتج الباقية حبوبه
_ جوعانين ؟
غضة : انا نفسي مسدوده بس ما افشلنج
_ محضره عشاكم بس غسلوا بين ما أصبن ،تعاي
جفون وياي .
صحتها واگفه يم باب الغرفه تباوع بعيونها بلايه
كلام ،وبس شافها جدي نتر بيها
رأجس : بيج مرض ما تسلمين ؟
باوعتله ومشت للمطبخ بلايه ما ترد عليه ،وبساع
جدي صار أعصاب من تصرفها
رأجس : اناا الها بت البدووية اذا ما كسرت
رأسها فلا أطلع راجس أل غضب انا تباوعلي
بطرف عينهااا
محمد : هدي يابة تراها جاهله وما تفتهم
رأجس : ماكوو جاهله ،مو صارت مره ويوميا خطاطيبها داگه الباب علينه
محمد : يابة بس هذا مو حجي ،بعدها البنيه زعطوطه حتى ازغر من بنياتي
رأجس :ضلَّ ضلَّ ،دافع الها تاليها تكسر عيونه من
جوه راس دلالك
محمد : ما تكسر عيونه لا تخاف
سكت جدي من شاف أبوي ما يطي بيها ،طبيت للمطبخ اخلي الاكل بالمواعين وأحجي ويَّ هيوفة
_ شفتي بنات قادر ؟
هيوفة : اسكتي وخليها ولا چن عدهم فاتحه يلمعن
لمع ليگول متحظرات لموت جدهن
وگفت ورانه تحجي وتتوعد
جفون : يوم لچدچن والله نذر عليه البس الوان
هيوفة : صخام الصخمج صوتج ولج لا يسمعوج
جفون : خلي يسمعوني والله ولا تفرق عدي
طلعت الخبز من المجمده
_ هاج حمي وكافي هاي السوالف
أخذت الخبز تحمي وانا طلعت خيار وطماطه
اسوي زلاطه واحجي وياهن
_ راح اروحن ويَّ ليث باجر للگاع يريد يحوش
الفجل
جفون : امشي وياج عليج الله
_ لا وين تردين هوَ انا وبالگوات اقتنع
جفون : شبيج حباااابه
هيوفة : اگعدي جفون واسكتي شعدج ماشية للتعب
جفون : جا بس غاية تمشي
هيوفة : هاي تحب التعب أنتِ هيدي هنا
جفون : أنا هم أحبن التعب
هيوفة : قفلت بعد
_ تعاي هيوفة شيلي الصينية وياي
اجت گابلتني على الصينيه وديناها للصاله والتموا
عليها جدي وجده وأبوي ،وطب صخر من برة يفر بسبحته سلم وگعد على الكرويته صاح وهوَ يباوع بمبايله
صخر : جاي جاي
واگفه بصفي تحجي ويَّ روحها
جفون : يتنفس جاي
ركضت حطيت القوري على النار وگعدت اتاني
يفور ،وبس فار خليت الورگ وحضرت الاستكاين والصخر صبيتله بگلاص واخذته اله
باوعلي صفح واخذه من أيدي ،خلص عمره ما
يعارف يگول كلمة شكراً يمكن يحسها عيب لو فد
شي جبير يعني..!!!
گعدت بصف هيوفة مسويتلها لفة وماخذه ركن
تصفن
ليث : السلام عليكم
سلم وگعد بصف صخر يحجون بصوت ناصي
ما اعارف شعدهم ،شكلت أذني يمهم بس أريدن اسمع بس ما گدرت ،گمت احمي الجاي من
شفتهم خلصوا صبيت الجاي ورديت للصاله وزعته الهم شلنه الصينيه انا وهيوفة ،تساعدنه على المواعين انقهرت عليها گلت مو من هسه اكربها
خليها على باجر اطلع الروحه من عيونها واخليها تگول التوبة
صخر : جاي .
بلايه ما احجي شغلت القوري ،وبس حمه صبيتله
أخذ الگلاص ومشى يصعد الغرفته
كلها طشت الغرفها وبقينه بس أنا وهيوفه گاعدات
بالمطبخ
_ احجيلي شأخبار أل خبير .
هيوفة : والله خيه مطورين أحسن من يمنه ،اللبس
شني الكشخه الكاشختها نسوانهم شني ولا عبالك
فاتحه تشوفين الشعافي أميشه ويفترن أجواء عرس بس ناس تلطم .
ضحكت وسألتها
_ وبت خاله ناهده شلونها ؟
هيوفة : هاي الوحيده مصخمه بيناتهن ،الظيم مبين
عليها
_ تقهرني هواي شلون عايشيه هناك وحدها بين
هل كومة حياية
هيوفة : والله ينگطن سم ،سبعة أيام ولا شفتها
هادت بس تفتر تكسر الخاطر
_ اتمنى تجي تعيش يمنه
هيوفة : أريدن اقنع جده تحاجي أخوها ،شو هوَ
بالجيش وهل مظلومه ما يمها أحد
_ عفيه حاجيها بس أنتِ تگدرين لجده
هيوفة : بس خليها وره الأربعين من نروح لان هسه
أكيد ما يقبل ابوها
صخر : شو گاعدات ؟
فززنه صوته مادري شوكت نزل ولا حسينه بي الا
واگف بباب المطبخ الجوه
هيوفة : گاعدات نسولف خوية .
صخر : گومن نامن مو وراجن دوام ؟
هيوفة : جا مو ماخذلي إِجازه ؟
صخر : أجيتي بعد داومي حتى لو ما گضت ،لو
تحبين التسخت ؟
هيوفة : لا خوية يا تسخت
گامت على حيلها تحجي ويا
_ ها أها گمت
صخر : وأنتِ غاية شني ماعدج دوام ؟
_ لا عدي بس اريدن اغيب لان ماكو دروس
صخر : ماكو بكيفج هيَ ،گومي نامي يلا
گمت ادردم بگلبي ما يخلي أحد يغيب أمنية حياتي
فد يوم من الأيام أغيبن
صخر : رجلي حكتني جاي تحجين عليه ولج ؟
التفتتله أبلع ريگي
_ لا شسالفه تاج راسي أنتَ شلون احجي عليك
باوعلي عاگد حاجبه ما مقتنع وأشر الي روحي
طبيت للغرفة حضرت هدوم المدرسة وجدولي
ونمت ،ما گعدت غير على صوت هيوفة تگعدني
فتحت عيوني بالگوات اباوع الها
هيوفة : ولج گومي راح تتأخرين
_ والله مابيه أشيل روحي من الفراش
هيوفة : دگومي گومي قابل بس أنتِ ،كلنه مثلج
جفون : تراااا حرام مايصير هيج خلني انحم
هيوفة : مو عدج دوام ؟
جفون : ضهرررري ،عمي والعبااااس ضهرري بس ارحمني
شمرت عليها المخده وگمت ،طلعت من الغرفة وانا
اشمشم بريحة الجاي الترد الروح غسلت وجهي ومشيت للمطبخ هيج وكت أمي تسوي الريوگ وكلها تگعد تتريك
_ صباح الخير يمة
اندارت شافتني ورجعت تطرگ بالبيض
زهرة : صباح العافية ،تجين تتريگين ؟
_ ما الحگ سويلي لفه بين ما أبدل
زهرة : خوش
رديت للغرفة بدلت و وگفت اعدل بحجابي رشيت
من ريحتي ،ولبست جنطتي بچتافي وعباتي لزمتها بأيدي وطلعت ،وگفت بمكاني من شفت جده تطلع من غرفتها
_ صباح الخير جده
غضة : صباح الخير حبوبة ،شني ماشية للدوام ؟
_ أي والله ،جا جدي وينه ؟
غضة : ما اعارف گعدت لگيته ماهوَ
_ يااا
زهرة : غاااية يمه اجه خطج
ركضت البس عباتي ورديت البس حذاتي وأمي
يمي تحجي وياي
زهرة : نوبه لو گعدتي متأخره ماخليج تمشين
ضحكت وگمت أخذ اللفه من أيدها
_ والله تسوين فضل جا هنيالي ما أروحن
زهرة : جا شگد كسلانه
_ أنه كسلانه شحال لوما اشوفج درجاتي ؟
زهرة : دروحي روحي الرجال واگفلج بره
بستها من خدها أضحك وطلعت أصعد بالسياره
وكتاب الكيمياء بأيد واللفه بأيد اراجع عدي أمتحان يومي وردت اغلس عليه بس بعد مابيها فايده
وأكيد تگومني
طبيت للمدرسة ويا دگة الجرس ،ركضت لصفي
بساع أم العربي حقنه ولو طبت ما تخليني بعد
أطبن للصف وراها ،هم زين بس وصلت لرحلتي
أجت
نزعت عباتي وگعدت اخليها بالجنطه
زينب : جا مو گلتي تغيبين امس ؟
_ يمعوده غير لگفني صخر وگال ماكو غياب وهل
أجيت
عاطت بينه المعلمه وسكتنه ،طلعت كتاب العربي
وعيني وياها من تشرح ،صح حقنه بس شرحها حلو ويفهم وكل شي تكتبه أكتب يفديني حتى لو فد شي بسيط
ما عولت شوكت يخلص الدوام واردن للبيت اريد
الحگ بليث خاف يمشي ويعوفني
بس طبيت للبيت شفته گاعد يم جده سلمت وسألته
_ ليث شوكت تمشي للگاع ؟
ليث : العصر لان ماعدي شغل هواي
_ خوش بس مو تعوفني
ليث : لا ، لاتخافين
أبتسمت وكملت دربي للغرفة بدلت ملابسي ورديت يمهم گعدت اكتب تحاظيري
هيوفة : السلام عليكم
سلمت وطبت تنزع عباتها ،وگفت بتعب مطت
جسمها
هيوفة : شنو هاي تعبت
غضة : لان صارلج اسبوع ما مداومه
هيوفة : أي يجوز
غضة : اكلي حبوبة ونامي ارتاحيلج شوي ورانه
مجالس
فريت ايدي
_ جده ترا انا هم جنت بالمدرسة وتعبانه
غضة : أنتِ مدرسة هيوفة كليه تتعب خطيه
_ خوب أنتِ عدج هيوفة لا گامت ولا گعدت من
قبل بالمدرسة تشكيلها وهسه تگولين لان كليه
غضة : وشني أنتِ تغارين منها ؟
_ لا جده شأغار دخيل بختج ،خلي اروحن أنام
باوعت عليه وانا احلفه
_ ليث عليك الله گعدني
ليث : انخمدي وفكينه
_ صارت انخدمي ؟
ليث : مو لحيتي گتلج أخذج
_ تذكر چم مره بمره واعدتني وما خذتني ؟
ليث : عمي والله هل مره أخذج
_ خوش خوش
طبيت للغرفة فرشت فراشي يمكن أمي لأمته وبس
حطيت رأسي على المخده ومادري شلون گعدت
وطلعت من الغرفة ويا ما نزل ليث من فوگ لابس هدوم الشغل ،تخصرت أباوعله
_ هااا جا مو گلت أخذج ؟
ضحك ونزل وگف گدامي ،من انتبه على حركتي
خزرني نزلت ايدي بساع
ليث : تحظري بساع بس تتأخرين أعوفنج
_ لا ،لا ما اتأخر بس اللبس عباتي
ركضت للغرفة لبست وطلعت بس شافني صاح
ليث :على كيفج لا تنچبحين
وگفت گدامه الابتسامه هلكبرها على وجهي
ليث : ضمي ضحكتج ،شبيج ؟
_ فرحاااانه
ليث : والله لو ولد جان انهزمتي حالج حال أخوج
نوح
_ أمشي ليث عليك الله لا يّجي صخر وما يخليني
اروحن وياك
ليث : أمشي
طلع وأنا وراه أمشي ،شني غير چن شوف وين
ماشية مو للگاع ،جن شاد مُحرك اريد الحگ بي رجليه راحن حتى مادري
وين احط رجلي ادوس على كلشي گدامي وهوَ
طاير رجليه طوال كل خطوه من خطواته عشره
من خطواتي
صحتله يتانيني ومشيت سريع حتى اوصله ،بس
مادري شصار بروحي من دست الگاع بكل حيلي
صحت متوجعه وگعدت رايحه روحي من الوجع ...
•----∞∞∞∞∞∞-----•
بعد هذا البارت فُتحت لنا
سور قرية "خنسة"
احم احم
