رواية لا يقدر بمال الفصل الاول
-انا مش هبيع بيت ابويا, البيت ده ابونا سابه عشان يجمعنا فيه, كان عارف اننا لو بعناه مش هنعرف بعض بعدها.
-بطلي كلام فارغ, هو البيت والحيطان دي اللي هتقربنا من بعض!
قالها "ماهر" اخوها وأيدته الاء وهي بتقول:
-ماهر معاه حق, مش البيت هو اللي هيجمعنا, احنا اخوات وعمرنا ما هنفترق.
بصتلها جيهان بسخرية وقالت:
-ده بجد؟ اخوات! وده من امتى؟ ليه محسساني اننا كل يوم متجمعين ولا كل أسبوع حتي! احنا بالعافية بنتقابل مره كل شهر, وعشان نفتح نفس الموضوع وهو بيع البيت, لولا كده ولا كنا اتقابلنا حتى, عرفتوا ليه مش عاوزه نبيع البيت.
قال ماهر بهدوء:
-على فكره احنا رأي الأغلبية, انا والاء موافقين, يعني رأيك يخسر قدام رأينا.
اتعصبت وهي بتقول:
-يعني ايه؟ هتبيعه غصب عني؟
اتدخل عادل جوز الاء وهو بيقول:
-استهدوا بالله يا جماعه كل مشكلة وليها حل.
بصتله جيهان بحدة وهي بتقوله:
-بلاش انتَ, انا عارفه كويس انك اللي مكبر في دماغها فكرة البيع, عشان تستفيد.
رد ماهر بالنيابة عنه:
-وايه المشكلة ما كلنا نستفيد! انتِ عارفه انتِ بتتكلمي في كام! البيت المهندس فصله ب 8 مليون, يعني انا 4 وكل واحده فيكم 2 مليون, وعاوزانا نتمسك بيه!
بصتلهم بصدمة وهي بترد عليه:
-محدش فيكم محتاج.. ال4 مليون دول انتَ معاك ضعفهم في البنك, وهي هتعمل ايه بالفلوس؟ مش محتاجاهم وظيفتها مكفياها والمفروض ان جوزها حالته ميسورة وعنده شاليهات بتدخله ملايين في السنه, وانا كمان مش محتاجه الفلوس, طه مش مخليني محتاجه حاجه يبقي ليه نبيع؟ نبيع لو حد فينا مضطر اوي له, لو حالتنا المادية واقعه, لكن احنا كويسين!
رد ماهر بضحكة سخيفة:
-هو في حد بيقول للفلوس لا؟ وبعدين ايه يخليني اسيب بيت زي ده واجمد 4 مليون فيه من غير فايدة انا مش لازمني وجوده, ومش عاوز يبقي فيه كل فترة حوارت على ورث, نخلص بقي ولا ايه!
ردت الاء بتردد وهي بتبص لجيهان:
-وانا عايزه افتح صيدلية كبيرة باسمي, واسيب شغلي وعادل مش معاه سيولة يمولني.
-تسيبي شغلك؟ ليه؟ ده انتِ في منصب محدش يحلم بيه, انتِ عارفه يعني ايه تبقي مديرة سلسلة صيدليات كبيرة زي اللي انتِ فيها! ايه يخليكِ تجازفي بده عشان تفتح شغل خاص؟ اعملي ده وانتِ في وظيفتك لكن مش تستقيلي وتجربي, لو الصيدلية منفعتش معاكي هتعملي ايه وقتها؟
رد عادل وهو بيحاوط الاء بدراعه:
-هساندها طبعا, ووقتها هيكون معايا سيولة همولها لحد ما الصيدلية تقف على رجليها, كفاية شغل عند الناس, لازم يبقى لها شغل خاص, ومش محتاجه تفضل شغاله مع البيزنس بتاعها, اومال انا روحت فين, انا مكفي بيتي يا جيهان, انا بس سايبها تعمل اللي نفسها فيه عشان مكبتش طموحها, لكن انا مش محتاج لا شغلها ولا بيزنس خاص بيها.
يأست من الكلام معاهم واضح انهم مصممين, وكل واحد رتب حياته بناء على قراره, فسألتهم:
-يعني ده اخر كلام؟ خلاص نويتوا تبيعوا؟
ضحك ماهر ضحكة صغيرة وقال:
-ده اللي بقوله من الصبح.
ربعت ايديها وهو بتقول:
-وانا مش موافقة.
-مش مهم.
قالها ماهر باستفزاز وكمل:
-انا والاء موافقين.
سألته بعصبية:
-ايوه يعني هتبيع غصب عني؟
-لا ابدا في حل وسط.
-واللي هو؟
سألتها باستهزاء مكتوم فيه غضب وغيظ, فرد:
-نبيع نصيبنا, وخلي نصيبك, نشوف حد يفاصل البيت, ولو نصيبك طلع بقيمة شقة نبيع باقي البيت ونسيب الشقة بس هي اللي باسمك.
شاورتله بصدمة:
-هتدخل حد غريب يشارك اختك! هتبيع لواحد يا عالم يرازي فيا ولا يعمل أيه.
اتعصب لأول مره من اول القعدة وزعق فيها:
-جيهان اعمليلك قفلة! يا تبيعي معانا يا تسبينا نبيع نصيبنا متبقيش عامله زي الشوكة في الزور كده!
-شوكة في الزور!
اتملت عينيها دموع وبعدين بصتلهم وقالت:
-لا تمام... بس انا مش راضيه عن اللي بتعملوه, وعن كسر وصية ابوكم اللي وصى البيت ده يلمنا كلنا ويلم احفاده, وانا مش هبيع يا ماهر.
وخدت شنطتها وسابتهم ومشيت.
بصت الاء ليهم بتردد وبعدين قالت:
-انا قلقانه نكون بنغلط, ويكون جيهان معاها حق, انا اخترعتلها حوار الصيدلية اللي عايزه افتحها عشان توافق نبيع, لكن انا أصلا هاخد الفلوس احطهم في مشروع عادل داخله جديد.
رد عادل بسرعه:
-وايه المشكلة لو كنتي قولتيلها كده! هو انا مش جوزك, والخير بيعم عليا وعليكِ؟ وقولتلك هكتبلك نسبة 20% بال2 مليون دول, يعني حقك محفوظ لو قلقانه مني.
بصتله بسرعه وهي بترفض:
-لا يا عادل مش قصدي كده يا حبيبي والله, انا واثقه فيك من غير نسب, وبعدين في النهايه فلوسي وفلوسك واحده, انا بس بقول كنا ممكن نصبر شويه, بابا اتوفي من 6 شهور بس.
رد ماهر بزهق:
-الله يرحمه ايه علاقته بالبيت! هو في عالم تاني دلوقتي, لا فارق معاه بيوت ولا وصيه ولا غيره, بعدين ليه نستنى برضو! ما كل واحد ياخد حقه ونخلص.
