رواية جوز حرامية الفصل الأول 1 بقلم عمرو خالد ليث

: أنتي سرقتي أي! 

• مسرقتش حاجة

: أنا شايفك بتسرقي وريني الشنطة دي كده فيها أي

• أنا مش حرامية بقولك مسرقتش حاجة

يدوب لسه بيمسك الشنطة وبيفتحها اخدتها وجريت منه بسرعة قبل ما يفتحها ويشوف إللي فيها، فضلت كل شوية ابص ورايا أشوفه بيلحقني ولا لا، لحد ما اتطمنت أنه مبيجريش ورايا، وقفت تحت العمارة اخد نفسي شوية من كتر الجري وطلعت الشقة فوق .. 

: بت يا شهد فين الحاجة! 

يا دوب لسه مدخلتش من قدام الباب وأمي استلمتني .. 

• معرفتش اتصرف فيها 

: معرفتيش تتصرفي إزاي ابوكي لو جه وملقيش الحاجة هيرميكي من الشباب

• قولتلك مليون مرة متقوليش ابويا ده مش أبويا ده جوزك أنتي 

: طيب جوزي لو جه من بره وملقيش الحاجة إللي قالك عليها هيرميكي بره البيت 

• وأنتي هتسيبيه يعمل كده! 

: بيته وهو حر 

• وأنتي؟ 

: أنا لو اتكلمت هيرمينا إحنا الإتنين 

فضلت واقفة قدامها من الصدمة مش عارفة انطق اقولها أي، معرفتش أرد عليها، بس انا مش مستغرباها، مش مستغربة واحدة سابت جوزها وعيالها عشان تتجوز واحد بتحبه، مش مستغربة واحدة خربت بيتها عشان قلبها مش مطاوعها تقعد أكتر من 15 سنة مع واحد مش بتحبه، مش هبقى مستغربى لو طردتني هي معاه، كده كده مصلحتها فوق أي حد .

نزلت الصبح بدري عشان اشوف هعمل أي في إللي طلبه مني جوز أمي، عايزني اسرق ساعة من الساعات إللي عند الجواهرجي إللي في أول السوق، بيقول أن الساعات إللي عنده ماركات وغالية جدًا، نزلت إمبارح عشان اخد ساعة بس جه علىٰ آخر لحظة واحد مسك فيا قبل ما احطها في الشنطة وكنت في لمح البصر مرجعاها مكانها تاني، روحت نفس الشارع تاني بس علىٰ أمل أني اخلص بدري المرة دي ومطولش عشان محدش يقطع عليا المرة دي كمان، روحت ووصلت علىٰ أول الشارع وكنت وقفت ورا صيدلية كده متدارية عشان البس طرحة طويلة والبس كاب عشان ملامح وشي متبانش لحد، ولسه كنت هلبس الكاب لمحت نفس الشخص إللي مسكني إمبارح وأنا وباخد الساعة، مسكت الشنطة وكنت هجري بسرعة قبل ما يلمحني، بس وقفت كام ثانية كده ولقيته بيقرب بهدوء من الرفوف بتاعت الصيدلية وبيحط حاجة في كيس كان ماسكه في أيده من غير ما حد يشوفه، فضلت مراقباه لحد ما راح واشترى حاجة بسيطة وخرج من الصيدلية .. 

: أما انت حرامي نص كوم صحيح 

أول ما شافني اتفزع وفضل يبص حواليه كتير .. 

• أنتي بتعملي أي هنا ؟ 

: كنت بشوفك يا شريف وأنت بتسرق الصيدلية، أي ده لبن هو أنت بتسرب اللبن ده لمين 

• ملكيش دعوة

: مليش دعوة إزاي بس وانت لسه قاطع عليا إمبارح 

• أنا مبسرقش

: أمال أنت كده بتعمل أي بتخرج زكاة عن الصيدلية

سابني ومشي من غير ما يتكلم معايا، مكنتش فاهمة بيعمل كده ليه بس كنت مستغرباه، ومعرفتش اسيطر علىٰ فضولي ومشيت وراه .. 

: انا مش بكلمك

• عايزة أي! 

: بتعمل كده ليه أنت ميبانش عليك أنك حرامي

• أول حاجة متحكميش علىٰ الناس من مظاهرهم

: وتاني حاجة؟ 

• تخليكي في نفسك

: مش قبل ما تقولي بتعمل كده ليه

• تعالي ورايا وهتفهمي

مشيت وراه ومفهمتش بردو هو بيعمل كده ليه ولا رايح فين أصلًا، فضلت ماشية وراه لحد ما لقيته دخل شارع كده أو منطقة بيوتها من دور واحد ومبنية من طين، وراح نحية بيت كده متطرف وخبط علىٰ الباب الخشب بتاعه إللي ماسك نفسه بالعافية، خرجت ست كبيرة من جوه واداها الكيس إللي فيه علب اللبن، الست أول ما شافتهم فضلت تدعيله .. 

: روح يا بني ربنا يستر طريقك وما يحوجك لحد أبدًا

كنت واقفة بعيد عنهم شوية ومراقبة إللي بيحصل، أخدت الحاجة منه وهو مقالش أي حاجة ليها ومشي علىٰ طول .

: عرفتي أنا بعمل كده ليه؟ 

• طب مكنش فيه طريقة تانية يجيبوا بيها الحاجة دي! 

: الناس دي عايشة اليوم بيومه، مش قادرين يشتروا العيش الحاف عشان يكلوه، وللأسف الطفل كان محتاج اللبن ده ضروري 

• اه فهمتك

: الغايات النبيلة تغفر وسيلة الاضطرار حين تضيق الأبواب

• واللي عملته ده نبيل! 

: هو غلط بس مفيش حل تاني 

فضلت بصاله كتير بحاول استوعب إللي بيقوله وأنا مش مقتنعة، رغم أني ناوية أعمل نفس الحاجة بس لغرض تاني خالص، بس مش قادرة اطاوع نفسي ولا عارفة اخلع ولا اتصرف، بحاول ابرر إللي هعمله بأي طريقة ومش لاقية أي طريقة ابرره بيها، رجعت معاه مكان ما كنا عند الصيدلية ..

: وأنتي أي قصتك؟ 

• قصة أي؟ 

: قصة حياتك وبتسرقي ليه؟ 

• قولتلك مسرقتش

: كنتي هتسرقي ورجعتي الحاجة مكانها تاني  

بصيتله ومعرفتش أقوله أي، بس هو اخد باله خلاص وشافني فـ .. 

: كنت مضطرة أعمل كده 

• وده عشان بتساعدي مين! 

: نفسي

• إزاي! 

: جوز أمي بيهددني لو مسرقتش ساعة من عند الجواهرجي هيطردني بره البيت وانا لو اتطردت معنديش مكان اروحه

• وابوكي! 

: ابويا اتجوز بعد ما أمي خلعته ورماني معاها فـ معتقدش أنه ممكن يقبلني عنده وحياته بقيت احسن بكتير 

• مجربتيش تشتغلي! 

: بدور على شغل

• طيب واللي يلاقيلك؟ 

: مش لما تلاقي لنفسك الأول 

• ندور يمكن نلاقي ونسيب القرف إللي بنعمله ده

: ماشي موافقة ندور 

• مش هتقربي من السرقة تاني؟ 

: مش هقرب 

• وعد يا ؟ 

: وعد واسمي شهد 

• ماشي يا شهد

كنت أول مرة احس أني المفروض أخد خطوة كويسة عشان نفسي ولو مرة، طول الوقت بفكر إزاي ارضيهم واخليهم مبسوطين، بس مفكرتش قبل كده أي إللي يبسطني أنا، الأول أبعد عن العك ده وأشوف المفروض هعمل أي .

سبتها ومشيت وأنا متأكد أنها هتبطل فعلاً تسرق تاني، رغم أنها مسرقتش اولاني بس كانت بتحاول عشان جوز أمها، وهي مكنش عندها حل تاني غير أنها تسرق وتسمع الكلام عشان تقدر تعيش، هي الحياة كده هتجبرك تعمل حاجات غصب عنك عشان تقدر تعيش الحياة إللي أنت مجبر تعيشها، وزي ما قال عمرو خالد " لا يُصارع المرء لأجل أحلامه، بل يُصارع لأجل البقاء حيًا ." يعني بيعمل كده عشان يفضل عايش مش عشان يعيش حياته، الرفاهية بقيت مستحيلة في زمن بتحارب فيه عشان تعيش بس . 

: اتأخرت كده ليه؟ 

• معلش كنت في الشغل 

: رحمة بتحاول توصلك وتليفونك مقفول

• اه فصل شحن من بدري ونسيته محطتوش في الشاحن

: طيب ثواني والاكل يكون جاهز

• لا مليش نفس يا فرح بجد هموت وانام 

: مش جعان؟ 

• جعان نوم بجد

سبتها ودخلت فعلاً من التعب نمت ومكنتش قادر أعمل أي حاجة تاني اليوم تاني، كنت خلاص فصلت ونمت علىٰ طول أول ما نمت علىٰ السرير . 

كنت واقف في المترو الساعة 9 الصبح عشان أروح الشغل متأخر، سمعت صوت دوشة وزعيق حواليا، ببص لقيت راجل ماسك عيل صغير من التيشيرت بتاعه وبيشده، قربت منه بسرعة عشان اشوف في أي .. 

: كان واقف ورايا وأنا وبسحب فلوس من المكنة وسرق الفلوس إللي في جيبي 

• يعم فتشني اهو قدامك مسرقتش حاجة منك

: اسكت يلا وطلع الفلوس

حاولت أخلع الولد من الراجل وخلعته منه بالعافية لحد ما سابه واديته أنا جزء من الفلوس عشان يسيبه يمشي .. 

: الفلوس فين! 

• يعم مسرقتش حاجة أنت كمان

: يسطا أطلع بالفلوس الراجل مشي خلاص 

ولقيته بيعدل لياقة التيشيرت بتاعه وبيطلع منها الفلوس .. 

: لا حرامي حرامي يعني

• أعمل أي طيب لو معملتش كده مش هعرف اعيش لا أنا ولا أمي 

: ما تشتغل 

• عيل زيي هيشتغل أي بس 

ولسه بتكلم مع الولد ولقيت شهد بتلف حوالين نفسها في المترو لحد ما شافتني واقف مع الولد .. 

: أي ده مين ده ؟ 

• عيل كده كان راجل ماسكه وعايز يضربه

: يضرب عيل صغير ليه هو اتجنن! 

• عشان سرقه يا شهد

ولقيتها بتبص للولد بنظرة غريبة كده شوية بعد ما كانت متعاطفة معاه .. 

: أنا لو معملتش كده مش هلاقي أكل أنا ولا أمي ومش هعرف أجيب العلاج بتاعها

• هي أمك مالها

: تعبانة عندها ورم وعشان تشيله محتاجين تعمل عمليه ومش معانا فلوس العملية

بصيت لـ شهد ولقيتها هي كمان بتبادلني نفس النظرة الخبيثة إللي معناها أننا .. 

: هنعمل أي طيب؟ 

• لا إحنا بطلنا سرقه صح مش هنعمل إللي في دماغك

: أنا هقولك نعمل أي .