رواية عوالم بنت الباشا الفصل الاول
في قصر عيلة عصران في أوضة عصران… عصران راجل كبير في السن نايم على السرير وتعبان جدًا وبيتنفس بصعوبة قدامه حفيده الكبير سليم. شاب وسيم وأنيق جداً ف لبسه. واقف جنبه أمه منى هانم ست متكبرة جداً. ومراته رحمة هانم زي حماتها روحها في مناخيرها ومغرورة جداً.
عصران بتعب
خلاص يا سليم قربت أموت ولسه وعدك ليا ما تحققش خايف أموت ولسه ما نعرفش هي فين ولا عايشة إزاي
سليم بزهق
وأنا أعمل إيه أكتر من اللي بعمله يا جدي عشر سنين وأنا مش بعمل حاجة غير إني بدور عليها. كفاية بقا أقتنع أنها خلاص مش موجودة.
عصران بعتاب
انت خلاص يأست يا سليم وعدك ليا راح فين يا سليم بيه.
منى بحنق
والله يا عمي أنا مش فاهمة إنت جايب الثقة دي كلها منين ما يمكن تكون ماتت مع اللي ماتوا ولا عشان ما لقيناش جثتها تبقى خلاص لسه عايشة
عصران
أنا متأكد إنها عايشة وإنت يا سليم لو خلاص مش قادر ترجع بنت عمك اتصل بمراد ييجي يكمل المشوار عنك طالما خلاص مش قادر توفي بالوعد اللي قطعته على نفسك من عشر سنين
فجأة دخل عليهم مراد وكان واضح من شنطة السفر اللي في إيده إنه لسه راجع من سفرية حط الشنطة على جنب ودخل وهو بيتكلم بعد ما سمع جزء من الحوار.. شاب وسيم جداً واضح من لبسه أنه ظابط جيش
مراد
أنا رجعت يا جدي وما أظنش إني هقدر أعمل اللي سليم ما قدرش يعمله في عشر سنين أنا مش هعمله حتى لو في مليون سنة وأظن الميت ما بيرجعش ولازم نقتنع إنها خلاص ماتت ومش هترجع مهما عملنا
منى ورحمة بصوا ناحية مراد ببرود وسليم بص لعصران بعتاب
سليم
قالك كلامي يا جدي حتى مراد كمان أهو مقتنع إنها ماتت ياريت بقى حضرتك تقتنع كمان وتريح نفسك وتريحنا معاك
عصران بتحدي
خلاص اتفقتوا كلكم إنها ماتت بس أنا متأكد زي ما أنا شايفكم قدامي دلوقتي إنها لسه عايشة وكلام قلته من عشر سنين وشكلكم نسيتوه بس أفكركم تاني لو نسيته من غير فيروز مافيش واحد فيكم هيطول جنيه واحد من ورث أبوه ولو مت وما ظهرتش كل حاجة هتطلع على روحي صدقة للأيتام
سليم ومنى بصوا له بغيظ ورحمة لوت شفايفها بسخرية إنما مراد بص لجده بيأس وحزن. عصران كمل كلامه بحدة
عصران
أنا خلاص قلت اللي عندي اللي عنده كلمة يتفضل يقولها ولو مافيش يبقى انصرفوا واتفضلوا كل واحد على أوضته أنا تعبان وعاوز أنام ويمكن تكون دي آخِر نومة ليا علشان ترتاحوا
خرج سليم وهو متعصب جدًا وجريت رحمة وراه ومنى بصت لعصران بغيظ وبعدين بصت لمراد بزهق وطلعت وراهم. مراد قرب من جده وهو بيقول بعتاب
مراد
هتستفاد إيه بس يا جدي من كل اللي حضرتك بتعمله ده غير إنك خالق صراع جوه البيت من عشر سنين ومافيش حد مرتاح. ارجوك اقتنع إنها خلاص ماتت واللي بيموت ما بيرجعش يا جدي.
ــــــــــــــــــــــــــــــــــــــــــــــــــ
في نفس التوقيت الساعة عشرة بالليل في مكان تاني بعيد عن القاهرة.. في بيت قديم جدًا يعتبر أوضة واحدة وحمام وصالة ومطبخ في مكان واحد… كانت عوالم بنت جميلة جدًا بيضاء عيونها رمادي شعرها أسود طويل عاملة ضفيرتين. لابسة عباية فلاحي قديمة. نايمة على الكنبة الخشب المتهالكة. وعمالة تتقلب يمين وشمال وهي بتقول بزهق.
عوالم
أوووف بقى وبعدين في أم الليلة السودة دي الناموس بقى عامل زي النحل ومافيش رحمة زي الدنيا اللي دايسة علينا دي.
طلعت صافية أمها من الأوضة على صوتها.. ست جسمها مليانة شوية لابسة عباية فلاحي سمرا على طرحة.
صافية
مالك يا بت اتهبلتي ولا إيه بتكلمي مين في نص الليل كده
عوالم
وهكون بكلم مين يعني بكلم الناموس اللي مش راحمنا لا صبح ولا ليل مش عارفة أتخمد منه
صافية قعدت جنبها بصت لها بتردد قبل ما تقول
صافية
طيب سيبك من الناموس دلوقتي هدخل أولع لك شوية تبن هيطرده واسمعي هقولك إيه
عوالم ضربت ناموسة كانت واقفة على وش صافية ونزلت قلم على وشها.. صافية صرخت بغضب.
صافية
مالك يا بت المجنونة اتلبستي ولا إيه
عوالم ببرود
مش أحسن ما أسيبها تمص في دمك هو إحنا لاقيين الدم ده يعني ولا إيه
صافية خبطتها على كتفها بغيظ
صافية
لا ما إنتي هتنشفي الشوية اللي فاضلين.. سيبك من أم الهبل ده وركزي معايا بدل ما أقوم أولع فيكي دلوقتي.
عوالم ببرود
طيب قولي يا ختي هي بينها ليلة سودة من أولها.
صافية بزهق
الصبر من عندك يا رب.. اسمعي يا زفتة خالتك حسنات كانت هنا الصبح وقالت إن البيت اللي شغالة فيه الشغل تقِل عليها وعاوزة واحدة معاها وجات ليكي
عوالم باستغراب
بس مش خالتي حسنات دي شغالة في مصر برضو
صافية
ومش أي مصر دي شغالة في القاهرة بيت زي القصر اللهم بارك والمرتب حلو قوي
عوالم
هاخد كام في الشهر وهشتغل إيه معها
صافية
قالت هي بتقبض عشرين هتديكي منهم سبعة كل شهر وإنتي هتساعديها في تنظيف البيت مش أكتر وساعتين زمن تكوني خلصتي وتكملي باقي اليوم نوم.
عوالم فكرت شوية وبعدين أبتسمت بفرحة
عوالم
طيب حلوة والله أهم حاجة أخلص من أم الناموس ده وأعرف أنام وأنفخ بطني كويس.
صافية هزت رأسها بيأس منها وهي بتقول.
صافية
هو ده كل اللي همك ومش همك الكرشين اللي هتجبيهم حتى تساعدي شوية في جوازتك ونعرف نجهزك زي الناس.
عوالم
لا حوش يا حجة العرسان واقفين طوابير برة مش ملحقين عليهم بلا خيبة ياما. اللي بيتجوز النهاردة عاوز نسب غني يتفشخر بيه ماحدش عاوز عوالم بنت الحداد زي ما بيقوله.
صافية بصت لها بحزن وفضلت سكته شوية وبعدين قالت.
صافية
حقك علينا يا عوالم نفسنا ونور عينينا والله يابنتي نشوفك احلي واحسن واحدة في الدنيا بس هنعمل اي انتي شايفة الدنيا بتقطع فينا ازاي..
صافية قامت وهي بتنهي كلامها.
صافية
المهم نامى لكي شوية علشان خالتك حسنات هتجي تاخدك معها الصبح علشان أجزتها خلصت ومسافرة بكرة الصبح.
صافية سبتها ورجعت تاني علي الأوضة اللي طلعت منها.. وفضلت عوالم قاعدة بتفكر في اللي ممكن يحصل لها في الشغل الجديد.. تبتسمت بفرحة وهي بتكلم الناموس.
عوالم
يلا تصبح على قبرك ياللي ينشف دمك زي ما انت منشف دمنا. اخري لليلة معاك في المخروبة دي.
ـــــــــــــــــــــــــــــــــــــــــــ
تاني يوم الصبح في قصر عمران بالتحديد في غرفة سليم.. سليم طالع من الحمام بينشف شعره بالفوطة. لاقى رحمة قاعدة على السرير سرحانة.. قرب منها وهو بيقول باستغراب.
سليم
مالك قاعدة مبلمة ليه كده.
فضلت رحمة قاعدة زي ما هي وكأنها مش سامعة.. سليم قرب منها أكتر وهزها من كتفها.
سليم
بت مالك هو أنا مش بكلمك؟
رحمة انتبهت له وبصت له وبرضو فضلت ساكتة.. سليم نفخ بزهق.
سليم
أوووف أنا ماشي أحسن ما نجلط وأنا واقف.
اتحرك علشان يخرج قامت رحمة وجريت وراه.
رحمة
سليم استنى عاوزة أقولك على حاجة.
سليم بزهق
حاجة إيه دي؟
رحمة اتوترت وفركت في إيديها وهي مترددة.
سليم
هتقولي ولا أغور في داهية؟ مش فاضي للدلع بتاعك ده.
رحمة مترددة
كنت بفكر في حاجة كده بس مش عارفة هتعجبك ولا إيه.
سليم بشك
حاجة إيه دي؟ ما تتكلمي على طول مش لازم كل كلمة تعمليلها فيلم وإنتي واقفة.
رحمة بحنق
طيب.. المهم.. افرض ما لقيناش بنت عمك هنعمل إيه؟
سليم بزهق
ما هو إحنا مش هنلاقيها.. بس عاوزة تقولي إيه؟ مش فاهمك.
رحمة
ما إنت سمعت جدك.. الورث قدام البت دي لو مش لاقينها يبقى ربنا بيعوضنا في شقى السنين؟
سليم فكر في كلامها شوية وبعدين قال بحيرة.
سليم
طيب وأنا أعمل إيه؟ ما سبتش خرم إبرة إلا ما دورت فيه عليها.
رحمة بخبث
الميت مش بيرجع يا سليم بس جدك مش مقتنع إنها ماتت علشان كده كنت بفكر يعني ليه ما نعملش له اللي هو عاوزه ونجيب له فيروز.
سليم
إنتي حصل لعقلك حاجة ولا إيه؟ هنجيب له فيروز منين؟
رحمة ابتسمت بخبث وهي بتمسك إيده وسحبته علشان تقعد على السرير وهو معاها.
رحمة
دي بقى محتاجة قعدة ودماغ رايقة علشان نفهم بعض كويس..
