رواية جريمة قتل الزوجة سر ملابس النوم الفصل الأول ياسر عوده
اخيرا خلصت دراستي وهروح استلم شغلي، النهارده اول يوم ليا في الشغل، عارف ان الشغل اللى انا داخله مش سهل، ومحتاج مواصفات خاصه، بس انا باذن الله هجتهد لغايه لما اعمل لنفسي اسم في هيئه النيابه.
اعرفكم بنفسي، اسمي احمد عارف، ولسه مستلم جواب تعيني في النيابه العامه، حلم حياتي هيتحقق خلاص وهبقى وكيل نيابه، دا ماكنش حلمي لوحدي، دا كان حلم ابويا الله يرحمه وكمان حلم امي ربنا يخلهالي يا رب.
بعد ما سلمت على امي وبوست ايديها روحت للشغل، وهناك بعد ما عرفتهم بنفسي وسلمتهم جواب التعيين وخلصولي الاجراءات كلها، ووقتها ماكنتش لوحدي كان في 3 غيري حاصلين على جواب تعيين، واتوزعنا كل واحد راح يشتغل مع واحد من وكلاء النيابه علشان يتدرب، وكانت فرحتي لا توصف، ودخلت مكتب السيد وكيل النيابه صفوت ابراهيم، وبعد ما عرفته بنفسي وبأني هتدرب على ايده، وقتها قالي:
-كل وكلاء النيابه بيحبوا يعلموا المتدربين بطريقه انهم يخلوهم يحضروا كل جلاساتهم في التحقيق، وكمان بيخدوهم للمحكمه لو عندهم مرافعه هناك، بس انا ليا اسلوب مختلف في التعليم، وعلشان كده انا هطلب منك حاجه تعملها، هتخليك تكتسب خبره كبيره في وقت قليل.
-انا تحت امر حضرتك يا فندم.
-تمام، تعالى معايا.
وخرجت مع السيد وكيل النيابه من مكتبه وانا مش عارف هو موديني على فين، وبعد كام دقيقه لقيت نفسي واقف معاه قدام باب مكتوب عليه الارشيف، وبقيت مستغرب هو ليه موديني الارشيف وايه اللى هتعلمه في المكان ده، ولقيته بيقولي:
-تعالى ادخل يا احمد.
ودخلت معاه الارشيف ووقفنا قدام قسم من الاقسام اللى موجوده هناك وقالي:
-هنا هتبقى بدايتك يا احمد، من هنا هتبقى واحد من افضل وكلاء النيابه.
-ايه المطلوب مني يا فندم؟
-هتختار ملف قضيه من الملافت الموجوده وتراجعها كويس اوي، وتعرف كل حاجه فيها، وتعرف ازاي النيابه اتعملت مع القضيه، وبعد كده عاوزك توجدلي دليل في الملف وكيل النيابه مانتبهش ليه، وعارف ان الموضوع صعب جدا، بس لو قدرت تعمل كده ساعتها هتبقى تستحق المكان اللى انت هتشتغل فيه، تمام يا احمد.
-تمام يا فندم.
وسبني السيد وكيل النيابه ومشي، وقعدت اتفرج على الملفات واساميها علشان اختار واحد من الملافات دي، وفي الاخر عيني جت على ملف رقم 759، وكان مكتوب عليه انت*حار.
وقتها حسيت اني عاوز اشوف الملف ده، وفعلا خدت الملف وقعدت بيه على مكتب من المكاتب الموجوده، علشان افتح الملف وابتدي اعرف ايه اللى موجود جوه الملف.
مسكت الملف وفتحته، وقراءت فيه:
مدحت اسماعيل، من افضل امناء الشرطه اللى ممكن تقابله في الشرطه كلها، لو حبينا نوصفه هنقول عليه الرجل المثالي في كل حاجه، الوحيد اللى مافيش أي شبوهات حامت حوليه، لا عمره اخد رشوه من أي مواطن او من أي شخص كان ليه طلب في القسم اللى هو شغال فيه، او في أي جهه تانيه، ورغم كده كان راجل خدوم جدا لكل الناس، أي حد يروحله في أي خدمه كان بيعملهاله بدون تردد وبدون مقابل، حتى لو الخدمه دي مش تبع القسم بتاعه او حتى تبع الشرطه نفسها، سمعته في المكان اللى عايش فيه ممتازه جدا جدا.
من المعلومات المعروفه عن مدحت انه في يوم لما كان راجع من شغله وكانت الساعه وقتها 4 العصر تقريبا، صادف انه شاف مجموعه من الناس ملمومين في مكان، دخل مدحت وسط الزحمه علشان يعرف ايه اللى بيحصل، هو كان متعود انه مايتجاهلش أي حاجه بالشكل ده ويقول لـ نفسه انه في وقت الراحه والكلام ده، ولما دخل شاف سيده عمرها فوق ال 60 سنه، كانت قاعده على الرصيف وهي عماله تعيط، ولما سألها:
-مالك يا امي بتعيطي ليه؟
ردت عليه السيده وهي بتبكي وقالت:
-انا خرجت من بيت ابني ومش عارفه ارجع البيت، انا مش عارفه الطريق.
-طيب تعرفي العنوان او معاكي ورقه مكتوب فيها العنوان؟
-لا.
-طيب ابنك اسمه ايه؟
-طاهر منصور احمد.
-عارفه ابنك شغال ايه او فين؟
-مش فاكره، انا كل اللى فكراه اني كنت راكبه اتوبيس ومش عارفه انا كنت ركباه ليه اصلا.
-ماعيكي أي اوراق طيب، حتى لو تذكره اتوبيس او متروا او أي حاجه تساعدنا نوصل لعنوانك.
-مش لاقيه معايا حاجه، ومش عارفه البوك بتاعي راح فين.
فهم وقتها مدحت ان السيده دي عندها مرض الزهيمر، وخدها ورجع بيها على القسم، وهناك حاولوا يوصلوا لـ ابنها، كان ممكن مدحت يسيبها في القسم ويمشي، بس هو ماعملش كده، هو فضل موجود ولما ماقدروش يوصلوا في القسم لـ ابنها، قرر انه ياخد الست معاه البيت، تقعد معاه ومع مراته فاتن.
وراح مدحت مع السيده واللى عرف منها ان اسمها فايزه، ولما روح بيها وكان وقتها لسه متجوز من حوالي 4 شهور بس، وطبعا ماكنش عنده اطفال وقتها لانهم لسه متجوزين من فتره قريبه، ولما فاتن شافت الست فايزه سألت مدحت وقالتله:
-مين دي؟، وليه جايبها البيت؟
وقتها مدحت حكلها كل حاجه حصلت من البدايه، ولما سمعت فاتن كلامه قالتله:
-وانت ازاي تجبلنا وحده غريبه البيت، انت عارف هي مين وراها ايه، يمكن عمله نصيبه وبتعمل تمثليه عليك، ايه يا مدحت هو انا هفهمك شغلك.
-اكيد انا مش هجبها لو مش متأكد انها كويسه ونضيفه يا فاتن، الجو سقعه تلج، ولو سبت الست في القسم هتتعب، مش هتستحمل الجو ده وماعرفش احنا هنقدر نوصل لـ ابنها امتي، فقولت اجبها معايا وبكره باذن الله لما اروح الشغل هخدها معايا.
سكتت فاتن لما سمعت الكلام ده، وطبعا كل الكلام اللى دار بنهم كان بعيد عن الست فايزه وماسمعتش منه حاجه، واهتمت فاتن بالست فايزه واكلتها لانها كانت جعانه اوي، وتاني يوم لما مدحت راح الشغل خدها معاه، وهناك عمم مواصفاتها على كل الاقسام والمدريات علشان لو في أي بلاغ بتغيب سيده في سنها، وبعد كام ساعه جاله اتصال من واحد من الناس اللى شغالين في قسم في منطقه بعيده عن المكان اللى شغال فيه مدحت وقاله:
-جالنا بلاغ من شخص بيقول ان امه خرجت من الشقه وهو مش موجود، وقال انها مريضه بالنسيان وكمان قال ان اسمها فايزه.
وقتها مدحت صور الست فايزه وبعت صورتها للشخص اللى بيكلمه، ولما طلعت هي صاحبه البلاغ وقتها طلب منه مدحت انه يبعت ابنه للقسم بسرعه علشان ياخد امه، وبعد ساعه جه ابن الست فايزه واللى شكر مدحت عن اللى عمله مع امه، وقاله ان امه خرجت من باب الشقه من غير ما حد ينتبه ليها، وطلب منه مدحت انه ينتبه على امه اكتر لانها ممكن يحصلها حاجه لو خرجت بالشكل ده من غير ما حد يشوفها، ورجعت الست فايزه لـ اسرتها.
دي كانت لمحه بسيطه تعرفنا مين مدحت، وبدايه المشكله واللى حصلت بعد كام سنه، لما جه بلاغ من مدحت لـ قسم الشرطه اللى هو شغال فيه وقالهم:
-مراتي فاتن ضربت نفسها بالنار.
طبعا بلاغ زي ده كان كفيل انه يقلب القسم كله، ووقتها اتحرك قوه من الشرطه وكمان كان معاهم فريق من المعمل الجنائي وكمان اتلطب الشرعي، ووصلوا لـ شقه مدحت، وهناك لقوا ان عربيه اسعاف موجوده، وكان واضح ان مدحت هو اللى اتصل بالاسعاف على امل يسعفوا مراته ويلحقوها، بس لما وصلوا المسعفين وكشفوا على فاتن وقتها لقوها ميته فعلا، وبلغوا مدحت انها ميته، واتصل مدحت بالشرطه بعدها وبلغهم باللى حصل.
اتكلم ضابط الشرطه المسئول مع مدحت وقاله:
-ايه اللى حصل يا مدحت؟
-مش عارف اقولك ايه يا فندم، انا لغايه دلوقتي مش قادر استوعب او حتى افهم اللى حصل.
-وضح كلامك علشان افهم لان الموضوع مش سهل زي ما انت فاهم، في جريمه حصلت، ولازم نحقق بشكل رسمي، وعاوزك تفهم اني معاك، وعمري ما هصدق انك عملت حاجه غلط، بس انت لازم تساعدني وتحكيلي اللى حصل بالتفصيل.
