رواية غالية سيدة قلب يونس الفصل الواحد والعشرون
داخل غرفة «سمر»، وبعد أن غادر الجميع وبقي المكان غارقاً في صمت ثقيل، تفاجأت سمر بـ «رجب» يقتحم عليها غرفتها من دون مقدمات.
رفعت عينيها المحمرتين من البكاء وقالت بحدة وهي تبعد يده عنها وتزقه:
ـ «جنّيت ولا إيه يا رجب؟! جاي لحد أوضتي في الوقت المتأخر ده؟ وعينك عيني بتدخل على الحريم في أسرّتهم؟!»
ابتسم رجب ببرود مستفز، ووضع يديه في جيوبه وهو يطالعها بسخرية لا تُطاق:
ـ «ووطّي حسك يا بت! مالك بتهوهوي كده؟ هو خدوهم بالصوت ليغلبوكم ولا إيه؟ ولا أنتِ جاية تتشطرِ عليّا بعد اللي حصل فيكِ، وبهدلتك ومرمطتك تحت رجلين مرة العمدة؟ يا اللي على أساس كنتِ هتبقي مرته وست الدار!»
قعد رجب على طرف السرير بكل راحة، وكمل بلسان سموم:
ـ «بس أهو أديكِ واقفة قدامي.. لا، وكمان هتطلعي من الدوار كلياته، والله أعلم هيبعتوكِ تقعدي فين عشان يداروكم عن الفضيحة الكبيرة اللي سويتيها!»
جن جنون سمر، واهتزت أعصابها من قهرها، فزعقت فيه بقوة:
ـ «اقفل خشمك ده واضبط كلامك وياي زين يا رجب! إيه اللي جابك هنا في الليلة دي انطق؟! أنا عفاريت الدنيا كلياتها بتتنطط في وشي من اللي جرالي!»
لم يتبدل وجه رجب، بل أخرج علبة سجائر ببطء، أخرج منها واحدة وأشعلها، ثم أخذ نفساً عميقاً ونفخ الدخان في الهواء، وقال ببرود أعصاب:
ـ «والله أعذرك يا بت يا سمر.. يعني بعد كل الخطط اللي عملتيها أنتِ وأمك، تتفضحوا قدام النجع كله.. مش الدوار بس يا سمر، ده النجع كله! وتروحي تعترفي وتعتذري لـ غالية اللي هي ست الدار ومرت العمدة اللي كانت بتخدم تحت رجليكي! آه يا باطل عليكِ يا زمن، آه يا باطل!»
هنا بلغ الغل من سمر كل مبلغه، فصرخت فيه بصوت أشبه بالجنون:
ـ «جرى إيه يا رجب؟! أنت جاي عايز مني إيه الليلة دي؟! جاي لحد عندي عشان تشمت فيا وتعايرني؟! مين راسك عليّا ولا باعتك تقول لي الكلام ده؟!»
ضحك رجب ضحكة عالية، ثم قال بتهكم:
ـ «اتهدي يا بت أنتِ.. أنتِ ما تعرفيش تعملي وياي حاجة أصلاً! اقعدي بقى كده واسمعي الكلمتين اللي محشورين في زوري عشان نخلص من الليلة دي!»
وفي نفس اللحظة.. في جناح العمدة بالأعلى.
كانت «غالية» قد دخلت الجناح وغيرت فستان فرحها الممزق بملابس مريحة وهادئة. وبينما هي واقفة، لاحظت «زينب» قاعدة على الكنبة بملامح شاردة وقلقة، فقربت منها وسألتها بحنان:
ـ «مالك يا زينب؟ قاعدة محتارة كده ليه؟»
رفعت زينب عينيها وقالت بصوت مكسور:
ـ «قلقانة يا غالية.. قلبي مش مطمن على منصور، وعايزة أنزل أطمن عليه.»
قعدت غالية جنبها، وطبطبت على كتفها برفق، وقالت بابتسامة دافئة:
ـ «قومي يا خيتي.. قومي اطمني على جوزك عشان يهدى بالك وتعرفي تنامي، النهار ده كان يوم طويل وصعب علينا قوي.»
تنهدت زينب بقهر، وقالت:
ـ «عندك حق والله يا غالية.. منهم لله، كسروا فرحتنا واليوم اللي كنا بنحلم بيه سنين.»
ـ «يلا.. خير يا زينب، ربنا هيعوضنا. قومي يلا اطمني على جوزك، وأنا كمان هقوم أطل على كريمة، بفكر أجيبها تنام ويانا كمان النهاردة عشان ما تقعدش لوحدها.»
ـ «ماشي يا غالية، ربنا ما يحرمني من أصلك الطيب.»
قامت زينب ونزلت بخطوات هادئة متوجهة لجناح منصور، ولما قربت، لاقت منصور واقف في البرندة لوحده بيحاول يهدّي أعصابه. دخلت بهدوء، وحطت إيديها الاتنين برفق على كَتفه.
التفت منصور بابتسامة متعبة وقال:
ـ «خير يا حبيبتي؟ مش جايلك نوم؟»
ـ «ما جانيش نوم يا منصور، وقلت أجي أطمن عليك.. عارف إن فيك هم الدنيا كلياته.»
ابتسم بوجع وقال:
ـ «انزاح الهم كلياته أول ما شفتك يا زينب.»
ـ «ربنا يخليك ليا.. مالك، شارح في إيه؟»
قال منصور بنبرة يغلبها الغضب الداخلي:
ـ «بيني وبينك يا زينب، بفكر أروح أطل على سمر.. قلبي محروق منها قوي على عملته فينا وفي نفسها، بس رغم كل ده، عايز أطل عليها أشوفها ناوية على إيه، وإيه مصيرها الأيام اللي جايّة.»
قالت زينب بتعاطف:
ـ «روح لها يا منصور.. هي برضه أختك، وأنا عارفة إن اللي عملته غلط وكبير، بس معلش، روح لها عشان يطمئن بالك.. وأنا هاجي وياك.»
اعترض منصور بلهفة:
ـ «لا يا زينب، خليكي مرتاحة..»
قاطعته بإصرار:
ـ «ما تخافش، مش هتدخل معاك، هاوقف بره الأوضة في الممر مش أكتر، بس لازم أبقى جنبك.»
هز منصور رأسه بموافقة وقال:
ـ «خلاص.. يلا بينا.»
وخرجوا اتنينهم من الجناح، وفي اللحظة اللي كانوا نازلين فيها على السلم، صادفوا «عبد الرحيم» طالع بخطوات ثقيلة ومكسورة. فوقف وبص لهم باستغراب:
ـ «رايح فين يا ولد في الوقت المتأخر ده؟»
رد منصور بتهدئة:
ـ «كنت رايح أطل على سمر يا أبوي، أطمن عليها.»
تنفس عبد الرحيم بوجع وقال:
ـ «وأنا كمان.. كنت طالع أروح أشوفها، وأعرف دماغها دي هتوديها فين أكتر من كده، وكمان عشان أرتب لها المكان اللي هتروح فيه لحد ما الأمور تهدأ في النجع.»
قال منصور:
ـ «طب يلا بينا يا أبوي.»
وفي الوقت نفسه.. تحت في أوضة سمر.
كان الحوار مولعاً بين سمر ورجب؛ فقالت سمر بحدة واستهزاء:
ـ «يعني عايز تفهمني إن أنا وأنت هنعرف نكسر يونس وغالية، وناخد اللي حلتهم؟! إيه الأفلام الخيالية دي يا رجب؟! أنت مش جاي تصحصح عليّ ولا إيه؟! فاكرني هبلة؟!»
قرب منها رجب وقال بنبرة جادة وصارمة:
ـ «يا بت اسمعي مني.. امشي ورايا بس وهتكسبي! يونس أخذ كل حاجة.. العمودية، والست اللي كانت عيني عليها، ومسك الأراضي وبقى هو الكل في الكل.. وأنا ما هاسيبوش يتهنى بكل حاجة كده! أنا سبته الأيام اللي فاتت يعمل اللي هو عايزه بمزاجه، لكن دلوقت خلاص، ما عدتش هاسكت.. هتبقي معي ولا لأ؟!»
ردت سمر بغضب:
ـ «مش قبل ما أعرف أنت ناوي على إيه بالضبط!»
ـ «أكيد هاقول لك.. بس مش دلوقتي.»
ـ «إيمتى؟! تكلمني عدل!»
ـ «في الوقت اللي أنا هحدده!»
هنا فَقَدت سمر صبرها، وعلّت صوتها بعصبية مفرطة:
ـ «لا! بقول لك إيه، أنا مش كيس جوافة تمشيه تحت أمرك وتقول لي حاضر ونعم! فوق لنفسك يا رجب، أنا سمر بنت نعمة، ما يخفاش عليّ الكلام ده.. قول لي عايز إيه بالظبط، ولا والله العظيم هاصوت وألم عليك البيت كلياته، وأقول إن أنت جاي عندي دلوقتي في الليل العتمة تعوز إيه!»
من شدة خوفه ليفتضح أمره وتخرب خطته، هاجمها رجب بسرعة البرق ووضع يده القوية على فمها ليمنعها من الصراخ، فقاومته بعنف واختل توازنها، فوقعت ممددة على السرير، وفقد هو توازنه وسقط بكل وزنه فوقها تماماً!
وفي تلك اللحظة بالذات..
كان عبد الرحيم، ومنصور، وزينب قد وصلوا أمام الباب. ومن دون سابق إنذار، مد عبد الرحيم يده وفتح الباب دفعة واحدة!
انسكب النور من الممر، وتسمّر الثلاثة في أماكنهم بذهول قاتل؛ فوقعت عيونهم على سمر ملقاة على السرير، ورجب فوقها في وضع فاضح ومريب!
اتسعت عيون منصور حتى كادت تخرج من محجريها، ووقف عبد الرحيم صامتاً كأن صاعقة ضربت رأسه من الشدة، بينما أطلقت «زينب» التي كانت تقف خلفهم صرخة مدوية هزت أركان الدوار كالصاعقة وهي تضرب على صدرها:
ـ «يــا مــرّي!!»
وفي الوقت نفسه تقريباً، كانت «غالية» خارجة من جناحها متوجهة لغرفة «كريمة» عشان تطمئن عليها وتجيبها تنام معاها، لكنها ما لقيتهاش في الأوضة. وبينما هي بتدور عليها، سمعت فجأة صرخة «زينب» المرعبة وهي جاية من الممر.
وفي اللحظة دي بالضبط، كان «يونس» طالع من جناحه، فلما شافها نازلة تجري وشعرها مكشوف ومن غير طرحة، استغرب وقال بلهفة:
ـ «مالك نازلة تجري كده يا غالية؟! وما جيبتيش طرحتك وياكِ على شعرك ليه؟!»
حطت غالية إيديها على شعرها بتوتر وقالت بصوت متهدج:
ـ «نسيت والله يا يونس! أصل سمعت صرخة زينب، وكنت رايحة أطمن على كريمة ما لقيتهاش في أوضتها، وفجأة سمعت صرخة زينب فنزلت أجري!»
سألها يونس وعينيه بجدية:
ـ «صرخة زينب فين؟!»
ـ «ما أعرفش! هي قالت لي إنها رايحة عند منصور تطمن عليه عشان كانت قلقانة عليه.»
ـ «طب تعالي وياي نشوف في إيه!»
خطا يونس خطوتين، وبعدين وقف فجأة وقال بحزم:
ـ «استني هنا يا غالية.»
بصت له باستغراب وقالت:
ـ «في إيه يا يونس؟»
قال وهو بيتحرك بسرعة نحو جناحه:
ـ «خليكي، جاي أهو.»
دخل لثواني وطلع وفي إيده "الشال" الخفيف اللي بيحطه على كتفه، وقرب منها وغطى بيه شعرها بحنان، وقال بصوت دافئ وقاطع:
ـ «من هنا ورايح، وطالعة مع شريكتي، ما عادش يظهر شعرك قدام أحد خلاص.. أنتِ تجوزتي وبقيتي مرة العمدة!»
ابتسمت له بخجل وقالت برقة:
ـ «حاضر من عيوني يا سيادة العمدة.. يلا بقى تعالا بينا نشوف زينب مالها.»
مشوا هم الاتنين بسرعة وراحوا على جناح منصور اللي كان قريب من جناحهم، بس ما لقوش حد جوه! وبينما هما ماشيين، سمعوا أصوات زعيق وعياط جاية من ناحية أوضة سمر.
قالت غالية بصوت كله قلق:
ـ «وه! الصريخ ده جاي من عند أوضة سمر! تعالا يا يونس نشوف في إيه!»
هناك في أوضة سمر..
أول ما وصل يونس وغالية، شافوا منظر جنوني؛ «منصور» كان ماسك «رجب» ونازل فيه ضرب مبرح، و«عبد الرحيم» ماسك «سمر» من شعرها وقاعد يضرب فيها بقهر وجنون، بينما «زينب» كانت قاعدة حاطة إيديها الاتنين على صدرها وبتخبط عليه بصدمة.
في اللحظة دي، رفع «يونس» يده بحزم، وقال بصوت جهوري قطع به كل الأصوات:
ـ «بـس!.. هدوا حسكم كليّاتكم!»
ثم التفت بعينين حادتين إلى عمه «عبد الرحيم» و«منصور»، وقال:
ـ «قول يا عمي.. إيه اللي حصل بالضبط؟ وعم عبد الحميد ومراته يعرفوا إيه عشان رجب يكون معمول فيه كده؟»
لم يتماسك «منصور» نفسه، فجرى نحو رجب، مسكه بقسوة من ذراعه وهزه بقوة وسطهم وهو بيصرخ بغل:
ـ «اسألوا ابنكم! اسألوا ابنكم كان بيعمل إيه في أوضة أختي في الوقت المتأخر ده؟! كان مطرّحها على السرير وهو فوقها!»
شهقت «وصال» بصدمة ووضعت يديها على صدرها، بينما لطمت «نعمة» على وجهها بصدمة وقالت بعصبية:
ـ «إيه الكلام اللي بتقوله على أختك ده يا منصور؟! أنت اتجننت؟! لحسوا عقلك خلاص؟!»
ردت وصال بغضب ودفاع أعمى عن ابنها:
ـ «أنا ولدي ما يروحش لسمر! ولدي ما يروحش على بنت عمه بالباطل!»
هنا تدخل «عبد الرحيم» وزعق بصوت مكسور لكنه صارم:
ـ «لا، راح! راح وشفتهم بعيني الاتنين.. راح!»
اقترب «عبد الحميد» من ابنه رجب، وقال بصوت مهزوز من الصدمة:
ـ «أنت عملت كده يا رجب؟! إيه اللي ودّاك غرفة بنت عمك في الليل؟!»
وقف رجب صامتاً لا ينطق بكلمة، فالتفت «يونس» إليه وقال بنبرة مرعبة:
ـ «ما تنطق يا ياض! قول لعمك إيه اللي وداك غرفة بنت عمك في الليل ده؟!»
ولما رأى يونس أن رجب يرفض الكلام، التفت إلى «سمر» وقال بحدة:
ـ «ما تقولي يا محروسة! قولي، كان بيعمل عندك إيه في الوقت ده لوحدكم، وكنتوا على السرير بتعملوا إيه؟!»
هنا تملكت الرعب من سمر؛ خافت أكثر لو اعترفت بالحقيقة أو ذكرت الخطة التي كانت تطبخها، فخافت من عواقبها الوخيمة أمام أبيها والعمدة. وتحت وطأة الخلع والرعب، قالت بصوت متهدج ودموع كاذبة:
ـ «ما أعرفش.. ما أعرفش والله يا يونس! هو.. هو اللي جه وتهجم عليّ، وكنت عايزة أصرخ، لكن حط إيده على بوقي وخشمي، ووقعنا على السرير، وكان عايز يتهجم عليّ!»
ولم تكن سمر تدري أنها بكلماتها هذه وضعت نفسها في مشكلة أكبر بكثير من التي كانت فيها!
جن جنون «رجب» حين سمع اتهامها، فصرخ بجنون:
ـ «كذابة! كذابة! هي اللي اتدحلبت لي، وهي اللي خلتني آجي! أنا عمري ما طلعت عندهم! هي اللي قعدت تقول لي: إحنا عايزين ننتقم من يونس وغالية، وقعدت تتدحلب لي وتجرجرني!»
تبادل «غالية» و«يونس» نظرات سريعة تحمل معاني كثيرة، بينما وقف الحاج «نعمان» يتابع بصمت مشحون.
أما «نعمة» فكانت تلطم على وجهها بانهيار، وفي تلك اللحظة لم يمسك «منصور» أعصابه، فهجم على رجب ونزل عليه بقلم ساخن على وجهه، وهو يصرخ بغل:
ـ «آه يا خسيس يا واطي! طول عمرك دون ورِمام!»
فصرخت وصال مدافعة عن ابنها:
ـ «لا! أنا ولدي ما يعملش كده! أكيد زي ما قال، أكيد سمر هي اللي اتدحلبت له، حكم إن سمر مش هينة خالص ومعروفة بطباعها!»
لم تتحمل «نعمة» هذا الطعن في ابنتها، فالتفتت إلى وصال وقالت بانفعال عصبي:
ـ «اكتمي! اقفلي خشمك ده يا مرة! بيت مين اللي اتدحلب لابنك؟! ده ابنك جلاّب المصايب، اللي كل يوم مع واحدة شكل وذليل الرباية! بنتي ما تعملش كده واصل، أكيد ابنك اللي راح لها وهو اللي حاول يتهجم عليها!»
وقفت سمر ورجب يتشاكلان ويتبادلان الاتهامات وسط صرخات الأمهات، وكل ذلك تحت أنظار يونس والحاج نعمان الصارمة.
رفع الحاج «نعمان» يده وقال بصرامة:
ـ «بس! اخرصوا.. اكتموا كليّاتكم!»
ثم التفت إلى عبد الرحيم وقال بجدية:
ـ «ناوي على إيه يا عبد الرحيم في المصيبة دي؟»
تبادل «عبد الرحيم» ومنصور النظرات لثوانٍ معدودة، ثم التفت منصور إلى يونس وقال بصوت ثقيل:
ـ «أنت بقيت العمدة يا يونس.. احكم أنت.»
نظر يونس إلى الجميع، ثم التفت إلى غالية بنظرة هادئة تحمل احتراماً لرأيها، قبل أن يعود ببصره الحاد إلى عبد الرحيم ومنصور، وقال بصوت قاطع:
ـ «لو قلت حكمي، هيمشي على الكل غصب عنهم يا عمي.. لو أنت عايز تحكم بحاجة معينة، قول.»
رد عبد الرحيم بصوت مكسور ويد مرتعشة:
ـ «لا يا يونس.. احكم يا ولدي باللي يرضي الله ويحط عليه ضميرك.»
تنفس يونس بعمق، وقال بحسم:
ـ «طالما وكلتني يا عمي.. يبقي الحل الوحيد، هنجوزوهم!»
اتسعت العيون في الصالة على مصراعيها، وأكمل يونس بنبرة لا تقبل النقاش:
ـ «لأنهم اتصادقوا في أوضة نوم لوحدهم، مش في مجلس ولا وسط الناس، وكانوا في وضع فاضح.. وأنتم بنفسكم حكمتم وشفتوا الوضع بعينكم! ما دام وصلوا للمرحلة دي، يبقى سترهم في بيت واحد هو الحل الوحيد عشان ندفن الفضيحة دي.»
وهنا، صرخت «سمر» بجنون واهتزت بقوة، وتقدمت بخطوات متهدجة وهي ترفض بغضب أعمى:
ـ «لاااه! أنا ما هتجوزوش! ما هتجوزش الزفت ده أبداً! يونس، اسمعني.. أنت ما لكش حكم عليّا!»
ـ «تبقى مين أنت عشان تحكم عليّا؟!».. صرخ بها «رجب» وهو بينفض أثره بوقاحة، ووجهه محتقن بالدم ودموعه المختلطة بالوحل تنزف من مناخيره، وتابع بتهكم واستهزاء:
ـ «أنا راجل حر وما أحبش حد يمشي كلمته عليا! سامعنا يا يونس؟ أنا مش هتجوزها، ورينا هتعمل إيه!»
هنا جن جنون «وصال»، فهجمت وتقدمت بلهفة مدافعات عن ابنها بصوت عالٍ وصراخ ملأ المكان:
ـ «أيوه! ولدي مش هيتجوز المفضوحة دي! دي فضحت نفسها قدام النجع كلياته على لسانها، وعاوزة تلزقها فيه عشان بتحب واحد متجوز وعينها فارغة! هيلاقي إيه الناس ويقولوا إيه لما يتجوزها؟ أنا ولدي راجل ولازم ياخد واحدة زينة، واحدة تبوس التراب اللي بيمشي عليه!»
ما إن سمعت «نعمة» كلام وصال حتى شعرت وكأن ناراً اشتعلت في صدرها؛ فالتفتت إليها كالمجنونة وقفت قدامها بندية وقهر:
ـ «اقمي يا مرة أنتِ كمان! مين دي اللي مفضوحة؟! ده ولدك مجرثم في النجع كلياته وفي البَر، ومعروف إنه جليل الرباية وما لوش أصل! بنتي بألف راجل وما تتجوزش الكلب ده واصل، سامعاني؟!»
اشتعل البهو بصرخات الحريم وتداخل الأصوات، وكل واحدة تدافع عن ابنها وتهاجم الثاني، والكل بيزعق ويشير بصوابعها، وسط ذهول الحاج نعمان اللي حاول يوقف المهزلة دي كلها.
لكن «عبد الحميد» (أبو رجب)، اللي كان واقف جنبهم بيتابع الصدمة ووشه شاحب من عمايل ابنه، ضرب كف على كف، وقال بصوت حاسم ورعدي قطع به صراخ الحريم كليّاتهم:
ـ «بس! اخرصوا كليّاتكم! بلا كلام زايد بلا قرف! رجب هيتجوز سمر، وغصب عن الكل كمان! الشغلة مش على مزاجكم، ولا هي لُعبة عيال عشان تشرطوا فيها.. اللي عملوه في أوضة النوم مش هيعدي بالساهل، وفضيحتنا بقت على كل لسان، والستر ملوش طريق تاني غير الجواز!»
وقفت سمر ورجب مذهولين من قرار الأب، بينما لطمت نعمة ووصال على وجوههم، وكأن الكلمة نزلت عليهم زي صاعقة كهربا!
وفي تلك اللحظة الحرجة، قطع الحاج «نعمان» حالة الهرج والمرج، والتفت بوقاره إلى الرجال وقال بصوت حاسم:
ـ «تعالوا وياي على المكتب يا عبد الحميد، ويا عبد الرحيم، أنت ويونس ومنصور.. وأنت يا حمزة، خد رجب وطلّعه أوضته عشان مش قادر يشيل نفسه من كتر الضرب!»
تحرك الجميع خلف الحاج نعمان؛ مسك يونس إيد عمه عبد الرحيم وسنده ودخلوا المكتب معاً، بينما أخد حمزة رجب وطلع بيه بصعوبة وهو بيجرجر رجليه.
وبقي في البهو الحريم وحدهن، فوقفت «الحاجة صفية» وتبادلت نظرات هادئة مع نعمة وسمر، وقالت بصوت هادئ يحمل الكثير من العِبر:
ـ «سبحان الله.. يمهل ولا يهمل! عشان تبقوا تقولوا كلام عفش في حق البنية الزينة وتتهموها بالباطل.. سبحانه قادر على كل حال، شوفوا إحنا قولنا إيه والناس هتقول إيه بالليل والضحا! إمبارح سمر كانت هتموت على ولدي، واليوم هتتجوز رجب! شوفوا بقا، شوفوا بقا قصة ألفوها أنتم ووصال عشان تحللوها في عيون الناس!»
هبت «نعمة» من مكانها بوجع وقهر وقالت بانفعال:
ـ «وه! جاية تشمتي فينا يا حاجة صفية؟! هو ده اللي تعرفيه من الأصول وعيشة الدوار؟!»
ردت صفية بثبات وقالت بلهجة حكيمة:
ـ «معاذ الله.. اللهم لا شماتة! إحنا ما بنشمتش يا نعمة، بس بحب أقول لك: كما تدين تدان.. عشان تبقوا تخافوا الله وتخافوا إنكم ترموا المحصنات!»
ثم التفتت إلى غالية وزينب وقالت بحنان:
ـ «تعالوا يا حبايبي.. تعالوا نطلع نريح العرسان الجداد، وراينا فرحة كبيرة عايزين نحضر لها زين.»
أخدت صفية غالية وزينب وطلعوا فوق.
وفي البهو، كانت وصال ونعمة مش طايقين نفسهم ولا بعض، بينما سمر قاعدة بتعيط وبتلطم على حظها الأسود؛ كانت بتحلم تبقى مرة العمدة، ودلوقت هتبقى زوجة لواحد مالوش لازمة والكل في النجع بيكرهه!
بصت «وصال» لسمر ونعمة بقرف وقالت بحدّة:
ـ «ما بقاش إلا دي تكون مرة مرزوق ولدي كمان!».. وسبتهم وطلعت متأففة.
فجن جنون نعمة، وصاحت بصوت عالي وهي باصة في قفاها:
ـ «والله العظيم لأربيك من أول وجديد يا وصال، ولأعرفك إزاي تقولي كده!»
ثم التفتت لبنتها المكسورة وقالت بغل:
ـ «قومي.. قومي معايا الأوضة، واحكي لي إيه اللي حصل وإزاي ده جه عندك! كترت بلاوينا قوي يا سمر!».. وشادتها من دراعها وطلعوا على فوق.
وفي جناح العمدة بالأعلى..
كانت غالية وصفية وزينب قاعدين بيستردوا أنفاسهم بعد الليلة الطويلة دي، فقالت غالية باستغراب وهي بتبص حواليها:
ـ «ما تعرفيش فين كريمة يا خالتي صفية؟! دورت عليها ما لقيتهاش في أوضتها!»
أكدت زينب كلامها وقالت:
ـ «أيوه، أنا كمان دخلت مالقيتهاش خالص.»
ابتسمت صفية وقالت بطمأنينة:
ـ «ما تقلقوش يا بنات.. كريمة طلبت مني إنها تطلع تنام في أوضة الضيوف اللي فوق خالص عشان تبعد عن الصداع، وزمانها نايمة من هدة التعب.»
وفي وسط كلامهم، خبط الباب خبطات خفيفة.
قالت صفية:
ـ «ادخل.»
اتفتح الباب بهدوء، وظهرت «راوية» واقفة على الحافة بكسوف وتردد. استغربت صفية وقالت بحنان:
ـ «في إيه يا بتي؟! تعالي يا راوية، مالك واقفة كده؟»
دخلت راوية بخطوات بطيئة، وقالت بصوت مكسور:
ـ «ينفع يا إخوانا أقعد معاكم بعد إذنكم؟»
ابتسمت غالية وقالت بلطف:
ـ «اقعدي يا راوية.. هو فيه إستئذان بيننا ياك؟!»
قعدت راوية وهي متوتره، وقاعده تفرك في إيديها ببعضها بقلق. لاحظت صفية حالتها فسألتها بقلق:
ـ «مالك يا بنتي؟ في إيه؟ إيه اللي منزلك في وقت متأخر كده؟»
رفعت راوية عينيها وبصت لغالية بصدق وقالت:
ـ «ربنا جاب لك حقك يا غالية.. وخليهم زي ما رموكِ بالكلام، الناس بكره هترموهم بألف كلمة وكلمة.»
هزت غالية رأسها بهدوء، بينما قالت زينب:
ـ «ربنا ما بيسيبش حق حد يا راوية.»
ردت راوية بدموع لمعت في عيونها:
ـ «أنا عارفة.. وكمان.. أنا كنت شفت رجب وهو داخل عند أوضة سمر الليلة دي، وكنت عايزة أجي أقول وأبلغ الكل، بس خفت ما حدش يصدقني.. وسبحان الله، أهي الحقيقة طلعت لوحدها وكل البيت عرف.»
قالت صفية بحكمة:
ـ «ربك ما بيسيبش حق ظالم يا بنتي.. وأنتِ عارفة زين أخوكِ كان عامل إيه في غالية كتير، وسمر وأمك.. وحتى نعمة.»
بصت راوية لغالية بقلوب مليانة أسف وقالت:
ـ «عندكم حق في كل كلمة.. عموماً، أنا كنت جاية أقول لغالية إني.. إني آسفة لأي حاجة عملتها معاها قبل كده، وإنه كان غصب عني وتحت ضغط.»
ابتسمت غالية بسماحة قلبها وقالت:
ـ «أنا عارفة يا راوية.. وربنا بيسامح، وأنا مسامحتك يا خيتي من قلبي.»
اتسعت عيون راوية بفرحة مش تصديق وقالت:
ـ «بجد يا غالية؟!»
قالت غالية بيقين:
ـ «والله بجد يا راوية.. على الأقل أنتِ جيتي وأعترفتي بغلطك، ودي لوحدها شهامة.»
تنفسّت راوية الصعداء براحة، فقالت لها صفية بابتسامة دافئة:
ـ «يلا قومي يا خيتي ارتاحي ونامي، عشان من بكره وراكي تحضيرات كتيرة هتحضريها وياي أنا وزينب وكريمة.»
قالت راوية بامتنان:
ـ «ربنا ما يحرمنيش منكم أبدا.. يلا، تصبحوا على خير.».. وقامت وطلعت بهدوء والراحة مالية قلبها.
---
🖤🖤🖤🖤🖤🖤🖤🖤🖤🖤🖤🖤🖤🖤
ما إن دخل الرجال إلى مكتب الحاج نعمان، حتى التفتت نعمة ناحية سمر، وكانت عينيها بتطلع شرار من شدة الغضب. مسكتها من دراعها بعنف، وجرّتها وراها ناحية أوضتها، وسمر ماشية معاها وهي بتبص حواليها بخوف، مش عارفة أمها ناوية تعمل فيها إيه بعد الفضيحة اللي حصلت.
أول ما دخلوا الأوضة، نعمة قفلت الباب وراهم جامد، لدرجة إن سمر اتنفضت من مكانها. وبحركة عنيفة، زقتها على السرير، ووقفت قدامها وهي بتبصلها بنظرات تخوّف:
ـ «قوليلي يا بت.. إيه اللي جاب رجب لحد عندك؟!»
سمر بلعت ريقها، وحاولت تتكلم، لكن نعمة قربت منها وهي بتقول بصوت مخيف:
ـ «والكلام اللي اتقال تحت ده صح ولا لأ؟! ردي عليا يا بت! ولا عايزاني أموتك وأفطسك بإيديا دول؟!»
سمر رفعت إيديها قدامها بخوف، وقالت بسرعة:
ـ «والله يا أمه ما حصل حاجة من اللي في بالك! أنا كنت قاعدة في أوضتي، ولقيت حد بيخبط على الباب، قمت أفتح، لقيت رجب واقف قدامي، وأول ما دخل حط إيده على بُقي عشان ما أصرخش.»
نعمة ضيقت عينيها، وقالت بشك:
ـ «وبعدين؟! كمّلي، أنا سامعاكي.»
ـ «قال لي إنه عايزنا نتفق على خطة نوقع بيها غالية ويونس. هو كان عايز غالية، وأنا كنت عايزة يونس، وكل واحد فينا كان فاكر إن التاني ممكن يساعده يوصل للي هو عايزه.»
ـ «وبعدين يا روح أمك؟!»
ـ «قعدت أسأله عن الخطة، وأقوله هي إيه، وهنعمل إيه بالظبط، لكنه ما كانش راضي يقول لي. كل شوية يقولي: هقولك في الوقت المناسب.»
سمر مسحت دموعها، وكملت وهي بتحاول تبرر لنفسها:
ـ «وأنا اتعصبت منه، وقلت له أنا مش عايزة أبقى زي كيس الجوافة معاك! كل ما أسألك عن حاجة تقولي في الوقت المناسب! أنا عايزة أعرف إحنا هنعمل إيه!»
نعمة عقدت دراعاتها قدام صدرها، وقالت بحدة:
ـ «وبعدين؟! هو إنتِ كنتِ هتاكلي بعض عشان مش راضي يقولك الخطة؟!»
سمر هزت راسها، وبدأت نبرة صوتها تعلى من الغيظ وهي بتفتكر اللي حصل:
ـ «هو اللي استفزني يا أمه! فضل يقولي إن يونس عمره ما هيحبني، وإن غالية اللي كانت خدامة بقت ست الدار، وإن أنا عمري ما هبقى في مكانها مهما عملت!»
عينيها دمعت أكتر، وقالت بقهر:
ـ «والله يا أمه الكلام وجعني، وما استحملتش! قمت رايحة أضربه، لكنه مسك إيدي، وفجأة لقينا نفسنا وقعنا على السرير. وبعدها الباب اتفتح ودخلوا علينا كلهم في الوضع ده!»
خلصت كلامها، وفضلت باصة لأمها بترقب، مستنية تشوف هتصدقها ولا لأ.
نعمة فضلت ساكتة ثواني، بتبصلها من فوق لتحت، وبعدها ضحكت ضحكة قصيرة كلها غيظ، وقالت:
ـ «حسبي الله ونعم الوكيل فيكي يا شيخة!»
سمر بصتلها بخضة:
ـ «ليه بس يا أمه؟! والله أنا ما عملتش حاجة!»
نعمة رفعت إيدها في وشها وقالت بانفعال:
ـ «كل ما أعمل مخطط، وكل ما أرتب لحاجة، تيجي إنتِ تبوظيها لي! طب أعمل فيكي إيه دلوقتي؟! حرقتيلي كل فرصة بإيدك! بدل ما نطلع من اللي إحنا فيه بحاجة، فضحتينا قدام البلد كلها!»
قربت منها، وانحنت ناحيتها وهي بتقول من بين سنانها:
ـ «أموتك وأشرب من دمك عشان أخلص منك؟! إنتِ غلبتيني يا سمر، غلبتيني!»
سمر رجعت بضهرها لورا، وهي بتترجاها:
ـ «والله يا أمه غصب عني، هو اللي استفزني!»
نعمة استقامت في وقفتها، وبصتلها بغل، وبعدها أشارت بإصبعها ناحية السرير:
ـ «اسمعيني زين يا بت! إنتِ هتفضلي هنا، ما تطلعيش من أوضتك دي إلا لما أجيلك بنفسي. سامعة؟! لا عايزة أشوف وشك، ولا عايزة أسمع صوتك، لحد ما أشوف هنعمل إيه في المصيبة اللي إنتِ حطيتينا فيها!»
ـ «حاضر يا أمه.»
ـ «حاضر دي خليها تنفعك!»
لفت نعمة ناحية الباب، وفتحته بعنف، وخرجت وهي بتخبط الباب وراها، لدرجة إن سمر غمضت عينيها من الخضة. فضلت سمر قاعدة على السرير، حاطة إيديها على وشها، ودموعها بتنزل وهي بتهمس بحقد:
ـ «كله بسبب غالية... من يوم ما دخلت حياتنا، وأنا مش شايفة يوم عدل!»
لكنها ما كانتش تعرف إن المصيبة اللي وقعت فيها المرة دي، ممكن تكون بداية نهايتها، مش مجرد عقاب من أمها.
وفي أوضة رجب...
كان رجب ممدد على سريره، جسمه كله واجعه من الضرب اللي أخده، ووشه عليه علامات الإرهاق والغضب. كان بيحاول يغيّر وضعه، لكن كل حركة كانت بتزود وجعه.
في اللحظة دي، الباب اتفتح بعنف، ودخلت وصال وهي مش على بعضها من القلق والعصبية:
ـ «إيه اللي حصل يا رجب؟!»
رجب ما ردش، وفضل باصص للسقف كأنه مش سامعها. وصال قربت من السرير، وقالت بصوت أعلى:
ـ «أنا بكلمك يا واد! إنت صح رحت لسمر وقعدت معاها، والكلام اللي الرجالة قالوه تحت ده صح؟! رد عليا!»
فضل ساكت، ووشه متجهم. وصال هزته من كتفه وقالت:
ـ «رد عليا وكلمني يا واد إنت! هو أنا بكلم الحيطة؟! ما ترد عليا بدل ما أنا هتجنن منك!»
رجب اتنفض من مكانه، واتأوه من الوجع، وبعدها زعق فيها:
ـ «بقولك يا أمه، ملّيني! أنا مش ناقص! شايفاني قادر أتكلم؟! جسمي كله واجعني، وإنتِ جاية فوق دماغي تحقيق وأسئلة! همليني لحالي، واخرجي برّه!»
وصال اتسمرت مكانها من زعيقه، وبصت له بصدمة، وكأنها مش مصدقة إن ابنها اللي خايفة عليه وداخلة تطمن عليه، بيطردها بالشكل ده. سكتت لحظة، وبعدها هزت راسها وهي بتحاول تمنع دموعها من النزول:
ـ «ماشي... ماشي يا ابن بطني.»
قربت من الباب، لكنها وقفت قبل ما تخرج، وبصت له بوجع وقالت:
ـ «أنا اللي غلطانة إني جاية أطمن عليك! بس ماشي يا رجب، ربنا يهديك لنفسك.»
خرجت وقفلت الباب وراها، وهي حاسة إن اللي حصل لابنها مش بس ضربة في جسمه، دي ضربة لكبريائه كمان، وهو بدل ما يعترف بغلطه، اختار يطلع غضبه عليها.
وفي أوضة روية...
كانت روية نايمة على سريرها، بتحاول تهرب من دوشة البيت والمشاكل اللي ما بتخلصش. لكن الهدوء ما استمرش كتير، لأن الباب اتفتح بعنف، ودخلت وصال من غير حتى ما تخبط. روية اتفزعت وقامت قاعدة بسرعة، وبصتلها بقلق:
ـ «وه! فيه إيه يا أمه؟! داخلة كده ليه؟!»
وصال بصتلها من فوق لتحت، وقالت بسخرية:
ـ «ما شاء الله عليكي يا أختي! نايمة ولا همك اللي حصل في أخوكي تحت؟! ولا اللي عملوه فيه؟! ده إنتِ قاعدة كأن المصيبة ما حصلتش!»
روية اعتدلت في قعدتها، وبصتلها بهدوء غريب بالنسبة لوصال، وقالت:
ـ «وعملوا فيه إيه يعني يا أمه؟! هو غلط، وبيأخد جزاءه، هو وسمر.»
وش وصال اتقلب، وفي لحظة كانت واقفة جنب السرير، ماسكة روية من دراعها جامد:
ـ «جرى إيه يا بت إنتِ؟! مالك كده؟! ما تظبطي نفسك شوية! مالوية علينا ليه؟! إيه اللي حصل لك؟! هو إنتِ نسيتي إن ده أخوكي؟!»
روية اتوجعت من مسكتها، وحاولت تفك دراعها، وقالت بنبرة بدأت تبان فيها كل السنين اللي سكتت فيها:
ـ «سيبي دراعي يا أمه، إنتِ بتوجعيني!»
وصال زودت ضغط إيديها، وقالت بحدة:
ـ «ما تردي عليا الأول! إيه اللي جرالك؟! هو إنتِ خلاص حنيتي عليهم وبقيتي واحدة منهم؟! أنا عديت اللي حصل بمزاجي، وسيبتك تقفي جنب غالية بمزاجي، لكن واضح إنك فهمتيها غلط!»
روية بصتلها، وعينيها لمعت بدموع محبوسة، لكنها المرة دي ما نزلتش راسها:
ـ «بمزاجك؟! هو أنا طول عمري كل حاجة في حياتي بمزاجك إنتِ؟! حتى لما أسكت وأستحمل، يبقى بمزاجك، ولما أتكلم يبقى برضه لازم بمزاجك؟!»
وصال قربت منها بوش متجهم:
ـ «إنتِ بتقولي إيه يا بت؟! هو مين اللي حشّى دماغك بالكلام ده؟!»
روية هزت راسها بحزن، وقالت:
ـ «محدش يا أمه، محدش حشّى دماغي بحاجة. أنا بس فوقت، وبقيت شايفة نفسي كويس أوي.»
اتنهدت، ومسحت دمعة هربت من عينها، وبعدها قالت:
ـ «إنتِ طول عمرك تعيريني، وتقوليلي يا ريتك ما خلفتيني، وتعايريني بشكلي، وتقوليلي يا صمرة يا ليفة محروقة! كل كلمة من دول كانت بتوجعني، بس كنت بسكت وأقول لنفسي دي أمي، مهما عملت فيا، دي أمي.»
صوتها اتهز للحظة، لكنها تماسكت وكملت:
ـ «لكن كفاية يا أمه! أنا مش هفضل طول عمري أستنى منك كلمة حلوة، ولا هفضل أحاول أرضيكي على حساب نفسي. أنا عرفت قيمتي، ومش هسمح لحد يقلل مني تاني، حتى لو كان أقرب الناس ليا.»
وصال بصتلها بذهول، وبعدها قالت بانفعال:
ـ «جرى إيه يا بت؟! إنتِ اتجننتي ولا إيه؟! مين اللي قلبك عليا بالشكل ده؟!»
روية ردت من غير تردد:
ـ «محدش يا أمه. أنا كل اللي حصل إني بس فُقت، مش أكتر.»
سكتت لحظة، وبعدها بصتلها مباشرة وقالت:
ـ «ولو على أخويا، فأيوه، هو يستاهل اللي حصل له. أنا شفته بعيني وهو داخل أوضة سمر بالليل، وما رضيتش أتكلم عشان ما تحصلش مشاكل في البيت. قلت يمكن ربنا يهديه، ويمكن يرجع عن اللي في دماغه.»
هزت راسها بأسى، وكملت:
ـ «لكن سبحان الله، كلهم عرفوا، والحقيقة ظهرت من غير ما أنا أتكلم. ودلوقتي هو بياخد جزاءه، وبدل ما يفكر في غلطه، قاعد يزعق فيكي إنتِ كمان!»
وصال فتحت بقها عشان ترد، لكن روية سبقتها وقالت:
ـ «أنا مش فرحانة في أخويا يا أمه، والله ما فرحانة. بس مش معنى إنه أخويا إني أقول له الغلط صح، ولا أقف معاه وهو بيظلم الناس. أنا تعبت من كتر ما كل واحد في البيت ده عايزني أبقى نسخة منه، ومحدش فيكم سألني أنا عايزة إيه!»
وصال سابتها لحظة من المفاجأة، لكن بعدها رفعت إيدها مهددة:
ـ «والله العظيم يا روية، لو ما تظبطي نفسك لأصدقيني هظبطك! وإنتِ عارفاني زين، وعارفة أنا أقدر أعمل إيه! فاهمة يا بت إنتِ؟!»
روية بصتلها، ورغم الخوف اللي كان مستخبي جواها، ردت بصوت هادي:
ـ «فاهمة يا أمه... فاهمة زين.»
وصال استنت منها إنها ترجع في كلامها، أو تعتذر، أو حتى تنزل عينيها زي كل مرة، لكن روية فضلت ثابتة مكانها، وما قالتش كلمة تانية.. وده كان أكتر شيء استفز وصال. لفت ناحية الباب وهي بتقول بغضب:
ـ «الأيام بينا يا روية، والأيام هتبيّن مين اللي هيكسب في الآخر!»
وخرجت وقفلت الباب وراها بعنف.
روية فضلت قاعدة على السرير، بتبص للباب المقفول، ودموعها بدأت تنزل في صمت. ما كانتش فرحانة إنها واجهت أمها، ولا كانت حاسة إنها انتصرت، لكنها لأول مرة من سنين طويلة حسّت إنها قالت اللي جواها من غير ما تعتذر عن وجعها.
داخل مكتب الحاج نعمان...
كان الحاج نعمان قاعد ورا مكتبه، بينما يونس ومنصور قاعدين قدامه، وعلى الكنبة المقابلة قعد عبد الرحيم وعبد الحميد، أما حمزة فكان قاعد على واحدة من الكنب الجانبية. يونس هو اللي أصرّ إن أبوه يقعد مكانه ورا المكتب، احترامًا لمكانته وقدره.
الحاج نعمان أخد نفسًا طويلًا، وبص للحاضرين، وبعدها قال بنبرة جادة:
ـ «دلوقتي يا جماعة، اللي حصل حصل، وسواء بنتك يا عم عبد الرحيم، ولا ولدك يا عبد الحميد، الاتنين غلطوا، والموضوع لازم نتصرف فيه قبل ما يكبر أكتر من كده. أنا شايف إننا نجوزهم ونستر على اللي حصل، بدل ما الحكاية تنتشر في النجْع كله، خصوصًا إن الأيام الجاية كلها هتبقى حركة في الدار بسبب الفرح والتجهيزات.. ولا إيه رأيك يا يونس؟»
يونس بص لجده، وبعدها رد:
ـ «والله يا جدي، أنا شايف إننا لازم نتكلم مع رجب وسمر الأول، وأفهم إيه اللي حصل بينهم، وإيه اللي جمعهم من الأساس.»
منصور بص له بضيق وقال:
ـ «لسه هنتكلم يا يونس؟! خلاص يا أخوي، اللي حصل حصل، ومش ناقصين نفتح أبواب إحنا في غنى عنها. الأحسن نخلص الموضوع ده بدل ما الناس تفضل تتكلم.»
يونس رد بهدوء:
ـ «اهدى يا منصور، أنا مش بقول إني هسيب الموضوع، بس عايز أفهم. رجب وسمر عمرهم ما كانوا بيطيقوا بعض، إيه اللي جمعهم فجأة؟»
حمزة هز راسه موافقًا وقال:
ـ «عندك حق يا يونس، بس الأهم دلوقتي إننا نتصرف في اللي حصل النهارده، والحمد لله إن الناس كانت مشيت قبل ما الموضوع يكبر.»
يونس التفت ناحية عبد الرحيم وقال:
ـ «إيه رأيك يا عم عبد الرحيم؟»
عبد الرحيم اتنهد، وقال:
ـ «شوف يا ولدي، أنا سايبلك الأمر ده كله. إنت أدرى بمصلحة الدار، واللي تشوفه اعمله. عايز تجوزهم، جوّزهم، وعايز تتصرف بطريقة تانية، إنت حر.»
يونس حوّل نظره لعبد الحميد، فقال الأخير:
ـ «وأنا كمان يا ولدي، اللي تشوفه أنا موافق عليه، وإحنا واثقين في حكمك.»
يونس سكت لحظة يفكر، وبعدها قال:
ـ «بصوا يا جماعة، إحنا أنا ومنصور فرحنا قرب، والدار كلها مشغولة بالتجهيزات، وأنا مش عايز أي حاجة تحصل تخلي حد يتكلم علينا، ولا عايز فرحتنا تتحول لسيرة على لسان الناس في النجْع كله.»
وبص لعبد الرحيم، وكمل:
ـ «يا عم عبد الرحيم، إنت عارف اللي حصل النهارده في الفرح، وعارف إن سمر اتكلمت على غالية قدام الناس، وقالت كلام ممكن يفتح علينا أبواب إحنا مش ناقصينها. وأنا مش عايز حد يربط بين اللي حصل النهارده وبين جواز رجب وسمر.»
أخد نفسًا، وبعدها قال بحسم:
ـ «عشان كده، أنا شايف إننا نجيب المأذون بكرة بالليل، بعد العشاء، ونكتب كتاب رجب وسمر في هدوء، من غير ما حد من برّه الدار يعرف. وبعد ما نخلص فرحنا أنا ومنصور على خير، نبقى نعلن جوازهم قدام الناس. كده نكون سترنا عليهم، وفي نفس الوقت ما فتحناش باب لكلام الناس.»
حمزة أومأ برأسه موافقًا، والحاج نعمان وافق، وكذلك عبد الرحيم وعبد الحميد. منصور بص ليونس وقال:
ـ «أنا موافق يا أخوي، بس عندي طلب واحد.. محدش يتكلم مع رجب وسمر كتير، وعايزك إنت اللي تتكلم معاهم وتشوف إيه اللي حصل بينهم بالظبط.»
يونس هز راسه بجدية:
ـ «وده اللي أنا ناوي أعمله.»
بعد ما خلص الاجتماع، طلع كل واحد على أوضته. الحاج نعمان دخل جناحه، فلقى غالية وزينب قاعدين مع الحاجة صفية. أول ما شافوه، وقفوا وقالوا:
ـ «السلام عليكم يا عمي.»
رد الحاج نعمان بابتسامة دافئة:
ـ «وعليكم السلام يا بناتي.. قاعدين لغاية دلوقتي؟»
قالت غالية:
ـ «أصلنا كنا قاعدين نطمن.. عمي جه أهو يا خالتي صفية، نقوم أنا وزينب بقى عشان نروح ننام.»
وقفها نعمان وهو بيضحك:
ـ «وه! هاتوها لي كده يا بنتي.. أول ما دخلت عايزة تهربي؟! خليكم قاعدين وياي شوية.»
اعتذرت غالية برقة:
ـ «معلش يا عمي، حقك عليا، بس اليوم كان طويل وصعب قوي، وإنت كمان لازم ترتاح.»
بص لها نعمان بإعجاب وابتسم بحنان، ثم التفت لزينب وقال:
ـ «مش عايز الحزن النهارده يكسر فرحتكم يا بنات، واني هعوضكم إن شاء الله، وعندي ليكم هدايا مجهزة.»
نطت زينب بلهفة:
ـ «بجد يا أبوي؟! طب فين هي الهدايا؟»
ضحك الحاج نعمان على طريقتها:
ـ «يا بت، إنتِ على طول نطّالي كده؟! ما تقلقيش، هديها لك، بس مش النهارده.»
قالت زينب بمزاح ودلع:
ـ «يعني لسه هتخليني أستنى يا أبوي؟! طب بتقول لي عليها ليه دلوقتي؟! ده قلبي هيوقف من الشوق!»
ضحك عليها نعمان بصوته كله:
ـ «ههه.. اجري، اجري روحي يلا ناموا، عشان وراكم الأيام الجاية تحضيرات كتير.»
قربت غالية وزينب وباسوا راسه بحب، وقالوا:
ـ «تصبح على خير يا عمي/يا أبوي.»
وطلعوا.
بعد ما طلعوا، بصت صفية لجوزها وقالت بقلق:
ـ «ها يا حاج نعمان.. عملتوا إيه؟»
اتنهد نعمان وقال:
ـ «والله يا صفية.. قررنا نكتب كتابهم بكرة بالليل في السر، ومن غير ما حد يعرف. وبعد ما نعمل فرح يونس ومنصور، نبقى نعلن جوازهم عشان الناس ما تقولش حاجة.. سمر كانت لسه طاعنة في شرف غالية وعشان بتحب يونس، فما ينفعش تاني يوم نقول إنهم اتجوزوا، هيقولوا أكيد فيه إنّ، وإحنا مش عايزين كتر حديث.»
هزت صفية راسها بموافقة:
ـ «والله عملتوا عين العقل يا أخويا.»
وفي الوقت ده، كانت غالية وزينب طالعين على الجناح فوق، فصادفوا يونس وحمزة ومنصور وهم كمان طالعين. وقفوا في الممر، فقال يونس باستغراب:
ـ «كنتوا فين لحد دلوقتي كده؟»
ردت زينب وهي بتبص لمنصور:
ـ «كنا قاعدين ويا أمي..»
سكتت زينب لما لاحظت شحوب وجه منصور، فقالت بلهفة وقلق وهي بتقرب منه:
ـ «كيفك يا منصور؟! مالك، لونك مخطوف خالص كده ليه؟!»
بص لها منصور بوجع وتعب وقال بصوت مكسور:
ـ «والله ما أنا قادر يا زينب.. حاسس إن دماغي هتنفجر.»
غمزت غالية لزينب بخفة إنها تطبطب عليه وتروح معه. لاحظ منصور الحركة، فأومأ بدماغه، وقالت زينب برقة وهي بتمسك دراعه:
ـ «طب تعالى وياي أنا.. هوصلك لأوضتك ترتاح.»
ومشوا سوا.
وقف حمزة، وبص ليونس وغالية بابتسامة هزار:
ـ «آه.. أدي زينب أخدت منصور وراحوا ويا بعضهم.. وكده يونس وغالية هيقعدوا مع بعض، وأنا أخد بعضي وأروح أنام، ما أنا مليش حد ياخدني!»
ضحك يونس هو وغالية، فقالت له غالية بمزاح:
ـ «بكرة تيجي اللي تاخدك وتروحوا ويا بعض إنت كمان يا حمزة، ما تستعجلش!»
ضحك حمزة وقال:
ـ «اللي يسمع من بقك لباب السما يا غالية! تصبحوا على خير.»
ومشي.
تنهد يونس بثقل بعد ما مشي حمزة، وبص لغالية بحنان وهي بتحط إيديها على وجهه:
ـ «مالك يا يونس؟! احكي لي في إيه؟»
مسك كف إيدها وباسه برقة وقال:
ـ «تعالي وياي بس..»
أخدها ونزلوا من الدوار ومشيوا في الجنينة اللي ورا لحد ما قربوا من الإسطبل. فتحوا الباب، فوقفت غالية بذهول وفرحة:
ـ «وه! نجمة وأصيل؟! واخدني هنا ليه في الوقت ده يا يونس؟»
قال بابتسامة دافئة:
ـ «تعالي بس..»
قربت غالية بسرعة على فرسها «نجمة»، وحضنتها بحب وبقت تحسس عليها، فعملت نجمة صوت الصهيل الفرحان، وأكلتها شوية سكر. وفي الناحية التانية، كان يونس بيطبطب على «أصيل» ويأكله سكر هو كمان.
بعد دقايق، قعدوا الاتنين على الأرض جوه الإسطبل بهدوء، فقال يونس بنبرة جادة:
ـ «بكرة.. بكرة هنكتب كتاب رجب على سمر.»
اتسعت عيون غالية بذهول:
ـ «وه! بالسرعة دي يا يونس؟!»
ـ «أيوه.. قعدنا النهارده والكل حكم، وأنا حكمت إننا نكتب كتابهم بكرة عشية، ونعلن جوازهم بعد فرحنا، عشان الناس ما تتحدثش كتير.. ما إنتِ عارفة اللي حصل النهارده، هيقولوا كيف كانت بتحب يونس وهتتجوّز رجب؟! فمنعًا للقيل والقال، لازم نستر عليهم.»
طبطبت غالية على كتفه بحنان، وقالت بصوت نقي:
ـ «زين ما عملت يا يونس.. والله، رغم كل اللي عملوه فيا، لكن ساعة ما حصلت المصيبة دي، قلبي وجعني عليهم، وما اتمنيت لهمش الشر أبدًا.. اللهم لا شماتة، وزي ما قلت: كما تدين تدان، والحمد لله على كل حال.»
مسك يونس إيدها وباسها وقال بحب:
ـ «أنا أكتر حاجة بحبها فيكِ يا غالية هي عقلك الراجح وطيبة قلبك الكبيرة.. ما فيش زيك في الدنيا دي كلها.»
رجعت سألت بحيرة:
ـ «أمال مالك مهموم كده تاني؟»
تنفس يونس بعمق وقال:
ـ «عايز أعرف.. إيه اللي لمّ سمر على رجب بالشكل ده؟! طول عمرهم مش بيطيقوا بعض، إيه اللي حصل فجأة؟! ولو إني أقطع دراعي إن الموضوع ده وراه مصيبة متعلقة بيا وبيكِ.»
هزت غالية رأسها بتأييد:
ـ «بيني وبينك.. أنا حاسة برضه إن فيه إنّ! لكن على قولك، أكيد كانوا متجمعين علينا وربنا كشفهم.»
قال يونس بوعيد:
ـ «أنا هأعرف كل حاجة بنفسي.»
قعدوا شوية كمان، ولما الليل بدأ يتأخر، أخدها وقاموا راجعين على الدوار عشان يرتاحوا ويستعدوا ليوم بكرة الطويل والناري.
صباح اليوم التالي..
طلع الصبح على الدوار، وكل واحد فيه كان شايل همّ اللي حصل بطريقته.
نعمة ما داقتش طعم النوم طول الليل، وقعدت جنب سمر تفكر في الفضيحة اللي حصلت، وفي كل الخطط اللي كانت بتحاول ترتبها، لحد ما بنتها بوّظت كل حاجة بإيديها.
أما عبد الرحيم، ففضل طول الليل صاحي، مش قادر يستوعب اللي حصل لبنته، ولا عارف إزاي هيواجه الأيام الجاية.
وصال هي كمان ما ارتاحتش، كانت غضبانة من رجب بسبب طريقته معاها، ومن روية بسبب الكلام اللي واجهتها بيه، وفوق ده كله مش لاقية إجابة تشفي غليلها عن اللي حصل في أوضة سمر.
أما رجب، فكان صاحي من بدري، والغضب بياكل في قلبه. فكرة إن يونس قرر إنه هيتجوز سمر كانت مستفزاه، وكان بيسأل نفسه بغيظ: هو يونس فاكر نفسه مين عشان يقرر عني أنا هتجوز مين؟!
وفي أوضة سمر، كانت قاعدة لوحدها، عينيها وارمة من كتر العياط، مش قادرة تتقبل فكرة إنها هتتجوز رجب اللي طول عمرها ما بتطيقوش، وهي قلبها متعلق بيونس.
وفي الناحية التانية من الدار، كانت غالية وزينب وكريمة وروية صحيوا بدري، وبدأوا يجهزوا الهدوم والحاجات اللي لسه ناقصة للفرح.
لكن كريمة كانت قاعدة وسط البنات ساكتة، وعينيها مليانة دموع، وكل شوية تمسحها بسرعة وتحاول تداري حزنها.
لاحظت غالية سكوتها، فقربت منها وقالت بحنان:
ـ «بكفاية عليكِ بقى يا كريمة، هتفضلي لحد إمتى شايلة الهم وعايزة تعيشي نفسك في الحزن؟! اللي حصل حصل يا خيتي، والحمد لله إن ربنا ستر.»
بصت لها كريمة، وانفجرت في العياط وهي بتقول:
ـ «مش مصدقة إنه حصل يا غالية! مش مصدقة إن سمر أختي ورجب ولد عمي يحصل بينهم كده!»
حاولت غالية تهديها، لكن كريمة كملت وهي بتمسح دموعها:
ـ «أنا مش عارفة أعمل إيه.. نفسي أروح لسمر وأتكلم معاها، وأسألها إزاي وصلت نفسها لكده، وفي نفس الوقت خايفة أروح أزعق لها أكتر، أو تحس إني بشمت فيها.»
زينب قربت منها وقالت بحنان:
ـ «يا كريمة، إنتِ هتفضلي تعيطي لحد إمتى يا حبيبتي؟! اللي حصل حصل، ودلوقتي هما خلاص هيتجوزوا، وربنا وحده اللي عالم كل واحد فيهم هيعمل إيه بعد كده.»
كانت روية قاعدة قريبة منهم، فبصت لكريمة وقالت بهدوء:
ـ «خليكي بعيدة عنها دلوقتي يا كريمة.. هي أكيد مش قادرة تسمع كلام من حد، وإنتِ كمان مش مطالبة تصلحي غلط غيرك. سيبيها تهدى، ولما ربنا يفرجها وكل واحد يعرف غلطه، ساعتها ممكن نبقى نتكلم معاها.»
هزت كريمة راسها، ومسحت دموعها بطرف إيدها وقالت:
ـ «عندك حق يا روية.. أنا مش هروح لها دلوقتي، مش عايزة أزود عليها أكتر من كده.»
مسكت غالية إيد كريمة بحنان وقالت:
ـ «روية عندها حق يا حبيبتي.. ما تفضليش شايلة همّ كل الناس. دلوقتي إحنا عندنا فرح، وعايزين نكمل استعداداتنا ونفرح من قلبنا. اللي حصل حصل، وربنا وحده أعلم كل واحد يتعلم إيه من اللي مرّ بيه.»
ابتسمت كريمة ابتسامة صغيرة وقالت:
ـ «حاضر يا غالية، هحاول أهدى وأركز معاكو.»
ابتسمت زينب وقالت وهي بتقوم من مكانها:
ـ «أيوه بقى، هو ده الكلام! يلا يا بنات بدل ما نقعد نعيط، نشوف الهدوم والحاجات اللي لسه ناقصة للفرح.. مش معقول الفرح ييجي وإحنا لسه بنواسي بعض!»
ضحكت غالية وروية، وحتى كريمة قدرت تبتسم وسط دموعها، وقاموا كلهم يكملوا تجهيزاتهم، وبدأت أصوات الضحك والكلام ترجع للأوضة من جديد.
وفي اللحظة دي، اتفتح باب أوضة سمر فجأة، وظهر يونس واقف على الباب بملامح جامدة ونظرات خلت سمر تقوم من مكانها بخوف.
نعمة بصت له باستغراب وقالت:
ـ «خير يا يونس؟! إنت داخل علينا كده ليه؟»
يونس بص لها ببرود وقال:
ـ «اطلعي برّه يا نعمة، واتقي شرّي أحسن لك... يلا، من غير كلام كتير!»
نعمة فتحت عينيها بصدمة:
ـ «إنت بتقولي أنا الكلام ده يا يونس؟!»
رد عليها بنبرة حاسمة:
ـ «أيوه، بقولك إنتِ! ويلا على برّه!»
نعمة بصت لسمر بقلق، وبعدها خرجت وهي بتتمتم بكلام مش مفهوم.
سمر فضلت واقفة مكانها، قلبها بيدق من الخوف، وبصت ليونس بتوتر:
ـ «إنت عايز إيه يا يونس؟!»
يونس ما ردش عليها، إنما فضل باصص لها بنظرات غامضة، وبعدها قال بصرامة:
ـ «تعالي ورايا.»
سمر اتراجعت خطوة وقالت بخوف:
ـ «أروح معاك فين؟! وليه؟!»
يونس زعق فيها:
ـ «قلت تعالي يا سمر!»
اتخضت من صوته، وما قدرتش تعانده، فمشت وراه بخطوات مترددة، وهي مش عارفة هو ناوي على إيه.
أول ما خرجوا من الأوضة، ظهرت نعمة قدامهم وهي بتقول بحدة:
ـ «إنت واخد البت على فين يا يونس؟!»
يونس وقف وبصلها بنظرة حادة:
ـ «مالكيش صالح يا نعمة! خليكي في حالك أحسن لك.»
وسابها واقفة مكانها، ومشي بسمر، اللي كانت بتبص حواليها بخوف، وكل خطوة بتاخدها كانت بتزود حيرتها.
_-يا ترى يونس واخد سمر على فين؟ وإيه اللي ناوي يواجهها بيه؟❤️🔥
