رواية قط وفار والقلب احتار الفصل الواحد والعشرون بقلم شيماء يسري زهران
خرجت ع الشارع ولقيت كشك صغير فرحت وجريت عليه:
- انا معلش ممكن اعمل مكالمة؟؟
رد عليا الراجل الكبير في السن:
- اتفضلي يابنتي..أنتِ كويسة؟
- لأ يا عمو انا مش كويسة، ومعييش فلوس كمان، ينفع اتكلم ولا حضرتك مش هتوافق؟
- عادي يابنتي لا حول ولا قوة الا بالله، بس اقدر اساعدك؟
- لأ يا عمو انا تمام، ممكن التليفون بس اعمل مكالمة؟
اداني الراجل التليفون، طلبت رقم بابا..
| في بيتنا|
كانوا كلهم متجمعين في شقة جدو، رد بابا في لهفة:
- الو، أيوة يابنتي طمنيني لقيتوا هاجر؟
- أيوة يا بابا لقيناها، بس انا مش عارفة ارجع، ممكن تيجي تاخدني؟
- ليه!! فين مراد وسليم؟؟؟
صوتت حنان:
- عيالي!!!
- مراد وسليم كويسين يا بابا، انا مش عايزة اركب معاهم ارجوك تعالى خدني.
- طيب بس متعيطيش أنتِ كويسة؟
- أيوة..لو سمحت يا عمو هي المنطقة دي اسمها ايه؟
قالي ع اسم المكان وقولت لبابا وقالي إنه جاي حالًا.
| في عربية سليم|
راكب مراد جمب سليم وساند كوعه ع الشباك وهو مضايق، كانت قاعدة ورا هاجر بتعيط، رن مراد تاني ع الفون:
- الو؟ ايه يا مراد؟
- ايوة يا عمي طمني؟
- هي كلمتني وخلاص رايحلها اهو.
- طب هي واقفة لوحدها في الشارع؟
- بتقولي واقفة جمب كُشك.
اتعصب مراد وقال:
- كُشك ايه بس في مكان مقطوع زي ده، وقف يا سليم نزلني .
- يابني رايح فين ما ابوها رايحلها.
- ياعم نزلني.
- انت بني ادم عنيد، ماهي مش طايقاك وقالتلك امشي!
نزل مراد وكمل سليم سواقة، رجع مراد لوحده تاني ع الشارع بيحاول يبص يمين وشمال، فكر يرن عليها بس افتكر إن الفون بتاعها معاه اصلا.
فضل مكمل مشي ويبص يمين وشمال والمنطقة هادية اصلا وفجأة لقاها جمب كشك صغير بسيط منور.
عدى الشارع وراحلها، اتخضت وقالت في صوت عالي:
- انت ايه اللي جابك تاني يابني انت عايز ايه مني!
اتكلم صاحب الكشك:
- هو ده اللي ضايقك؟ انت يابني انت هبلغ البوليس ابعد عنها انا قريبها.
- انا ابن عمتها يا حاج مش حد بيضايقها.
شدني من ايدي ومشي بيا خطوات لقدام، زقيته وانا مش طايقاه:
- مش هروح معاك! طب وربنا ورب الكون ده كله مش ماشية معاك، حلو كده؟ انا بابا جاي يجيبني.
زعق عليا وقال:
- مينفعش تقفي في مكان زي ده لوحدك انتِ هبلة؟؟
- اه أنا هبلة، بس هبلة اني فكرت اني ممكن اصدق عيل جبا.ن زيك مش عارف هو عايز ايه.
- ما تتلمي!! انا مش عيل ومش جبان!!!!! انا مكنتش اعرف إن كل ده هيحصل.
- لأ كنت عارف، واقولك حاجة بقى؟ انت روحت تنقذ هاجر في سبيل انك تسلمني لحسام.
- لأ ده أنتِ كده اتجـ. ننتي! أنا هعمل كده؟؟؟؟
صوت وقولت:
- ابعد عني!!!
خرج الراجل العجوز من الُكشك وهو ماسك عصاية وعايز يرن ع البوليس:
- لو ممشيتش من هنا دلوقتي هندمك.
- عجبك كده تخلي الغريب يدخل بينا؟؟؟
- اه عاجبني، ولو مبعدتش عني هبلغ عنك أنا.
بص ليا في قلة حيلة، اتنهد وبص حواليه، لقى صخرة صغيرة بعيدة عني شوية، راح يقعد عليها يستنى بابا.
فات ساعة، لقيت بابا جاي بعربيته البسيطة وقف قدامنا، بعد ما فضل يرن كل شوية ع الكُشك واوصفله المكان بالعافية وسأل ناس كتير عشان يقدر ييجي المكان ده، جريت عليه، حضني وقال:
- أنتِ كويسة؟
- أيوة يا بابا، عايزة اركب ونمشي من هنا.
قام مراد يقرب مننا، سأل بابا:
- في ايه يا مراد؟
- يا عمي مـ....
عيطت قدام بابا واتعصبت:
- يا بابا خليه يبعد عني ارجوك، انا مش عايزة اتعامل معاه في حياتي تاني انا بكرهه، ومش هيروح معانا عشان خاطري.
رد بابا:
- طب بس اهدي، ميصحش طيب خلاص انا وصلت بالعربية يابنتي، تعالى يا مراد اركب.
سكت مردتش، طلعت اركب جمب بابا وركب هو ورا، كان سرحان في كل حاجة، حاسس مش مصدق المسلسل اللي هو فيه..بيفكر اذا كان هو غلطان أو لأ بس هو شايف إن مكنش في ايده حاجة.
| قدام البيت|
طلعت من العربية اول واحدة وطلعت ع السلم لقيتهم كلهم متجمعين في شقة جدو، طلعت اجري ع فوق، كان الباب مفتوح، شافتني ماما طلعت عشان تجري ورايا لقت مراد طالع مع بابا، وقفت مكانها، دخل مراد الشقة لقى سليم وهاجر وهالة وصلوا، هاجر في حضن امها..
كان شايل ومشحون من كل اللي حصل، دخل يزعق :
- بص بقى يا عمي بنتك دي محتاجة يتشد عليها.
شهقت نوال وقالت:
- ايه يا حنان اللي ابنك بيقوله ده!
- أنا بقول اللي شايفه! بنتك هاجر عمالة تفكر وتخطط ولا كأنها في مسلسل عشان توقع بيني وبين مرام..وبنتك هي اللي مدبرة الخطة دي كلها وعملت نفسها مخطو.فة وكمان ليها علاقة بملك اللي كنت خاطبها وشكل كده حسام اللي كان خاطب مرام.
قال فتحي:
- انت بتقول ايه يابني انا مش فاهم حاجة!
رد جدو يزعق على هاجر:
- بت يا هاجر الكلام ده حقيقي؟؟؟؟
عيطت هاجر وقالت:
- كداب يا جدو.
قرب مراد منها وقفتله امها تزعق:
- انت اتجننت يا واد أنت ولا ايه! ما تفوق كده!! عايز تمد ايدك على بنتي!! جرا ايه يا حنان!
قام سليم يقرب من مراد يشده من دراعه:
- اطلع يا مراد واهدى.
قالت حنان:
- هو في ايه يابني، عملت ايه هاجر؟
- هي عارفة كويس هي عملت ايه..
بص لهالة في شك وقال:
- والله اعلم مين بيساعدها.
بصت هالة في الأرض، اتكلم سليم:
- انت هتـ. خبط؟؟ بتبص لهالة ليه وهي مالها بالمواضيع دي!
- اسألها يا عندليب.
- مراد اتظبط!
- انا مظبوط كويس! بس عيال عمك اللي محتاجين يتظبطوا.
زعق عمو فتحي عليه:
- مراد!! احترم نفسك وأنت بتتكلم عن بناتي!
زعق مراد:
- وانا مش بتبلى عليهم! أنا بقول الحقيقة وهي انهم حاطين مرام في دماغهم وبسبب هاجر النهاردة مرام اتخطفت من حسام.
اتخضت ماما وبابا، طلعت ماما سابت الشقة عشان تشوفني فوق، اتكلم فتحي:
- انت بتقول ايه!!! وايه علاقة هاجر!
- ابقى اسألها يا عمي.
طلع مراد وساب الشقة، طلعت وراه امه تشوفه.
| بعد اسبوعين|
طول الفترة دي او في أولها كان بيحاول كتير يرن عليا ويبعتلي يفهمني، لكن بعد اسبوع زهق..زهق من فكرة اني مبردش عليه اصلا وعملتله بلوك من كل حتة بعدها..
ومن ساعتها اختفى وقرر حتى مينزلش شقتنا تاني لأني ركبت ترباس للأوضة ومهما يخبط مبفتحش..
حتى في الماتش مكنش قادر يسجل اهداف ومستواه نزل شوية من التفكير في المشا.كل اللي حصلت.
| في شقة جدو|
كان قاعد ماسك المصحف، لقاني طالعة ندهلي:
- عملتي ايه؟
- الحمدلله يا جدو اخيًرا اخر يوم امتحانات غا.ر خلاص، مش قادرة اصدق اني خدت الاجازة.
ابتسم جدو وقال:
- وجدو عاملك مفاجأة بقى بما انك خدتي اجازة الصيف.
- ايه؟؟
- هنطلع مصيف السنادي، مرسى مطروح، ايه رايك؟
- بجد!!
حضنته وانا فرحانة :
- بقالنا كتير مطلعناش.
- أيوة حبيت افرحك شوية واهو الواحد يفُك عن نفسه شوية.
سكت فجأة افتكرت شيء، قولت:
- بس جدو..انا مش مش هعرف اطلع معاكم.
- ليه كده!!!!
- مراد جاي؟؟
| في شقة حنان|
- انتِ روحي أنتِ يا امي ومعاكي سليم، انا مش هكون فاضي من الكورة.
- يابني ده هما ٣ ايام! ما تيجي فُك عن نفسك هو كل حاجة كورة كورة!! نفسيتك يابني مش كده.
- يا امي افهمي، مرام هتبقى هناك، وهيحصل مشاكل كبيرة ونفرج الناس علينا وانا مش حِمل الحوارات دي كلها، انا بقالي اسبوع بحاول اصالحها وهي خلاص مبقيتش طايقاني وعملتلي بلوك..وجودنا هناك مشكلة.
- ليه يابني كل ده! انتوا طول عمركم في لفة واحدة!
- هي بت دماغها نا.شفة وخلاص فجأة مبقيتش عايزة تعرفني تاني، وانا بقالي اسبوع مشوفتهاش وكده انا تمام لكن هرجع اشوفها وأضعف و...قصدي يعني هيحصل مشاكل لو شوفتها.
- مسم.. تضعف؟ جرا ايه يا روح امك؟ انا مش قولتلك شيل الحوارات إياها من دماغك؟
- امي والله ما وقتك، المهم اني مش رايح.
| في شقتنا|
- يابت تعالي ولسانك ميجيش على لسانه طالما زعلانة منه اوي كده، إنما اسيبك هنا لوحدك! البيت كله هيبقى فاضي!
- يارب الصبر، ياستي ما يبقى فاضي هو أنا صغيرة!
اتكلم بابا في نبرة جد:
- مرام! خلص الكلام! انا استحالة اسيبك لوحدك هنا، هتيجي.
| في شقة حنان|
- هتيجي يا مراد يعني هتيجي وإلا مش هروح وهتبوظ عليا السفرية! أنا بتونس بيك انت واخوك!
- لا اله الا الله هي عافية يعني يا امي!
- أيوة.
| بعد اسبوع|
يعني فات ٣ اسابيع ومحدش فينا بيكلم حد..يدوبك جهزنا حاجات السفر اللي انا مغصوبة عليه، كانت الساعة ستة الصبح، نزلنا الشُنط والحاجة اللي حطيناها في شنطة سليم عشان يروح بيها هو على الموقف بتاع اتوبيسات السفر.
واحنا ركبنا ميكروباص كبير يشيلنا كلنا لحد الموقف، بس هو مركبش معانا ولا شوفته، قالت حنان أنه هيركب الموتوسيكل بتاعه ويسبقنا.
ولما وصلنا الموقف نزلنا من الميكروباص ولقيته واقف جمب الموتوسيكل بتاعه، قال لصاحبه:
- تمام ارجع انت بالمكنة بقى، حبيبي.
اتكلم بابا:
- طب ما كنت ركبت معانا من الأول بدل البهدلة دي!
- لأ عادي يا عمي مش بهدلة ولا حاجة انا متعود ع الموتوسيكل.
كنت مدارية ورا بابا لسه مشافنيش، ولما اتحرك بابا ولمحني، سرح فيا شوية، بقاله ٣ اسابيع مشافش وشي..
مبصيتش عليه وعملت نفسي مش شايفاه اصلا، ركبنا الاتوبيس بعد ما حطينا الشنط وكله تمام..
طلعت حطيت الهاند فري في ودني وسرحت مع الطريق..كانت قاعدة شيماء جمبي، قالتلي:
- بقولك..هو أنتِ جيبتي الصن بلوك؟
نزلت السماعة وقولت:
- اه متقلقيش.
- طب ينفع تديني ازازة عصير من الشنط اللي فوق دي؟
- حاضر، قومي ثواني..
قامت شيماء، قومت خرجت انزل الشُنط دي اللي فيها اكل الرحلة، وخرجت علبة عصير، اتحركت عيني ليمين لقيته قاعد بيتفرج عليا في الخبا.ثة، بصيت بقرف وبعدت وشي وانا بديها العصير وقعدت مكاني تاني:
- عايزة حاجة بقى قومي هاتيها أنتِ، عشان هنام.
مر وقت طويل من الساعات، ولقيت اللي بتصحيني:
- اوعي يا شيماء عايزة انام.
- يابنتي وقت البريك لو عايزة التويلت أو حاجة.
قومت اتعدلت ونزلت..كانت كافيتريا كبيرة جدًا وسط الطريق، دخلت التويلت وظبطت شعري والميك اب وخرجت لقيته قاعد بيشرب شاي وباصص عليا، اتنهدت وخرجت من المكان كله اركب الاتوبيس، طلعت وانا متعصبة بفش وانفخ..
- في ايه يابت مالك؟
- هو يا عمتو ابنك عايز مني ايه!!! ما يخليه في حاله!
- ده نزل يشرب شاي هو ضايقك؟
- بيبصلي ليه!!!!
- اقعدي يابنت فوزية ربنا يهديكي ياختي.
| بداخل مرسى مطروح|
طلعنا الشقة اللي كانت مساحتها كبيرة عشان تشيلنا كلنا، وطبعا بعد ما حطينا لبسنا في الدولاب وكل التفاصيل دي، كان اليوم خلص ومروحناش بحر النهاردة..
| في الليل|
كانوا كلهم في الصالة بيتكلموا بقى وقاعدين يهزروا، خرجت من اوضتي وانا حاطة الاغاني ودخلت البلكونة بتاعت الشقة، كان قدامي فضى كده والهوا ريحته تحفة.
كان جاي ورايا، بدء يتكلم:
- مرام..طب احنا حتى متكلمناش من ساعتها تفهميني حصل ايه..
ملقاش مني رد، واقفة باصة ومدياله ضهري:
- أنتِ ليه بتعملي معايا كده؟ ٣ اسابيع مش عايزة تكلميني؟ انا يتعملي بلوك؟
ملقاش مني رد..ابتسم وقال:
- يعني مش بتردي عليا ده معناه اني موافقة نتصالح؟ طب لو قربت هقر.صك من كف ايدك.
قرب اكتر وقال:
- لو مرديتيش عليا دلوقتي هعرف انك موافقة نتصالح واقر.صك.
ملقاش رد..فرح وقرب مني مسك كف ايدي وقر.صه جا.مد.
| في الصالة|
اتخضوا جا.مد وقاموا جريوا ع البلكونة من الصر.خة:
- انت حيوان!!!!
بص على السماعة اللي بشيلها من ودني وهو مصدوم، قال:
- أنتِ مكنتيش سمعاني؟؟
اتعصبت وقولت:
- انت هتستهبل!! ما تلمي ابنك يا عمتو انا قاعدة في حالي جاي يقر.صني من ايدي !
قال بابا:
- هو انتوا مش ناويين تكبروا؟؟ انا زهقت منكم، وقعتي قلبي فكرتك اتقلبتي من البلكونة وتقوليلي قر.ص ايدك!
قالت هاجر في صوت واطي:
- ياريتها كانت اتقلبت.
اتوتر مراد وساب البلكونة وخرج.
| في اليوم التاني|
صحيت الصبح عندي حماس للبحر، رغم اني مبعرفش اعوم اصلا بس اهو كلا.بي يعني، لبست الفستان، دخلت شيماء الأوضة عندي:
- ايه ده! فين البوركيني يابنتي!
- لأ بكرة هلبسه.
- ليه مش هتعومي؟
- هعوم عادي..
- تعومي عادي ازاي! بالفستان! مش هينفع هيبقى شفاف!
- لأ عادي متقلقيش هو جاي معاه بنطلون..بس ايه رايك؟
- لأ عسل عليكي اوي..
- حياتي، وأنتِ قمر.
دخل بابا وقال:
- يلا انجزوا نازلين..
خرجنا برا الأوضة ونزلت تحت انا اسبقهم، لقيته قاعد قدام الباب ماسك الفون، حطيت الطاقية على دماغي وعديت ولا كأني شايفاه، رفع عينه على ضهري وانا ماشية قدامه، قام وقف وقال:
- هو ايه ده بالظبط؟؟
مردتش عليه، قرب مني يشد ايدي:
- لأ لحد هنا ومش هنهزر.
بعدت ايدي عنه وانا متعصبة:
- نعم؟؟؟ عايز ايه مني!!!
- ايه الفستان ده!! مش هتروحي بيه بحر أنتِ هبلة؟؟
- اللهم طولك يا روح!
على صوته عليا:
- متجننيش اهلي!!! اطلعي غيريه حالًا.
زعقت:
- وانت مالك!!!! بابا موافق يبقى انت متدخلش!
زقني لقدامه عشان اطلع:
- لأ هدخل يا روح امك يلا اطلعي.
- اوعى ايدك واحترم نفسك! انا لحد دلوقتي محترمة معاك! بعد كده هزعلك وربنا! ما تخليك في حالك.. روح شوف هاجر لابسة ايه وشيماء وبقية ستات العيلة معندكش غيري!!!
- بت!! قولت اطلعي! الفستان ضيق جا.مد تفاصيل جسمك طالعة عليا! ايه هي فُرجة؟؟؟!!
- انت حيوا.ن ولسانك مش محترم ايه اللفظ القذ.ر ده!!
شدني جا.مد من ايدي وسحبني وراه..
- اوعى بقولك..يا بابا، يا عمتو.
نزلوا كلهم، قالت عمتو:
- في ايه يا واد؟
- يا عمتو عايزني اغير الفستان وعمال يدخل في حياتي!
رد جدو وهو لابس العوامة ع رقبته:
- ما تسيب البت ماهي معانا والشط مش هيكون زحمة يا مراد.
قال بابا:
- لأ يابا الفستان ضيق فعلًا مخدتش بالي، اطلعي غيريه.
- يا بابا والله مش ضيق اهو.
- مرام خلص الكلام..عيب تمشي كده..اطلعي.
نفخت وبصيت لمراد بقرف وانا بز.قه في كتفه وطلعت.
| ع الشط|
كنت لابسة بوركيني كده اسود واسع شوية، قاعدة مبوزة ومش طايقة نفسي ع الرمل..
قام سليم وهو بيشد مراد:
- يلا ننزل الماية..
- لأ يا عم مش عايز.
قام بابا وعمو وجدو وشدوه ينزل معاهم..
كنت عايزة اثبتله أنه مبقاش ليه لازمة في حياتي وأنه كلامه مش هيمشي عليا خاصة بعد حوار الفستان اللي ضايقني..
قومت نزلت البحر لوحدي وعمالة ابل في شعري، لقيت عوامة جات جمبي:
- ممكن تديني العوامة دي؟
اديت للشاب العوامة وقولت في هزار:
- بتعوم بعوامة في سنك ده؟
انا عارفة أنه ميصحش افتح كلام مع حد غريب كده..بس انا بجد كنت بجبر نفسي بالعند فيه عشان أبان اني حرة:
- لأ دي بتاعة اختي..أنتِ بتعرفي تعومي من غير عوامة؟
- لأ كلا.بي.
لمحني من بعيد واقفة مع واحد غريب في البحر وبهزر..سابهم وعام لحد عندي ، اضايقت وفرحت في نفس الوقت اني حر..ق.ت د***مه، قال:
- انت مين؟
اتوتر الولد ومشي، قرب مني يزقني في كتفي:
- بعد كده هخرج عن شعوري وهروقك.
- تروقني دي لما ابقى صالة امك.. انا حرة.
- لأ اروقك دي يعني اكـ. سرلك عضمك عشان تتظبطي.
- قولتلك مبحبش الكلام ده! وبعدين أنا مش عارفة انت عايز مني ايه!! مش كل واحد راح لحاله؟
- مين اللي كنتي واقفة معاه؟
- وانت مالك؟ واحد اتكلمنا. عادي!
شدني من دراعي وطلعني في غـ.ضب:
- بجد والله؟ طب تعالي اطلعي.
- مش هطلع..
فجأة شالني على أيديه الاتنين، شهقت مخضوضة، وانا بحاول انزل لكن مقدرتش ،وصل بيا لحد الشط وحطني ع الكرسي قدامهم..
كانوا قاعدين الستات كلها بتاعت العيلة والبنات باصين عليا وعليه، قالت حنان:
- وده ايه يا روح امك؟ بتصوروا فيلم؟
ضحكت ماما وضحكت حنان، معادا نوال اللي قاعدة مهرية هي وهاجر..
اتنهدت هاجر وقالت:
- انا هروح انزل الماية..
قومت وقفت من ع الكرسي وقولتله بصوت واطي :
- روح علمها العوم..ومش بعيد تعمل نفسها بتغرق عشان تديها قبلة الحياة..انا نازلة الماية.
نزلت وسيبته، العيلة قاعدين عاملين عُبط، قال في صوت واطي:
- مش أنتِ اللي طلبتيها؟ ماشي.
نزل فكرته جاي ورايا لكن ببص لقيته بيقرب من هاجر..
يعني ايه!!! ده بيعوم جمبها!!!!
- مراد!! غريبة انك نزلت تعوم جمبي..ولا بتغيظها؟
- عادي مش أنتِ بنت خالي؟ يبقى واجب اكون معاكي وانتي بتعومي عشان محدش يضايقك..
قربت منه في نبرة حزن:
- نفسي اكون اكتر من بنت خالك..
اتحرج مراد وبعد، وفجأة لقاني صر.خت.
شكرا لزيارتكم عالم روايات سكيرهوم
