رواية خلخال مشوه الفصل الثالث والعشرون 23 بقلم زمرده

 

 

 


 

رواية خلخال مشوه الفصل الثالث والعشرون بقلم زمرده


سنبلت بيدك حنطة الظيم
وتيمم اعله زلوفك الغيم
شفافك مواسم والعمر ديم
مختنگ وانفاسك ترانيم

°غاية°

نوح : مو بكيفها انا نهاي عليها ولغيري ما تصير

فتحت عيوني ولطمت على خدي ومو بس انا الصدمني كل الگاعدين صدمتهم مو اقل مني ،وهي ما گدرت تضل ساكتة طفرت من مكانها ورفعت اصبعها
جفون : ما تصرف وياي سوالف النهوه ولا انا الأمشي بيها واگلك صار والتريده

تحجي وترجف عاط بيها جدي ما راضي
رأجس : نزلي اصبعج لا اگومن اكسر ايدج بت البدوية صايرة ما تحترم

ضلت عينها على نوح وفاتحة عيونها لا نزلت ايدها ولا تحركت من مكانها وأبوي گام على نوح عته من فالينته يريده يگوم ونوح بلايه ما يحجي أول
ما وگف گبال أبوي اجاه راچدي خلاه يريد ليوره من قوته

شهگت وحطيت ايدي على حلگي گام ليث يفكه من ايد أبوي من رد كضه
صخر : هده يابه مووو هيج واذا نهى عليها مو تعارفة من سنين رايدها

خزرة
محمد : الرأي رايها ما اجبرها لان هو يريدها

اندار يسألها وهي واگفه ترجف وعيونها مغورگة وبكل حقد تباوع لنوح
محمد. : راضيه بنوح

بساع هزت رأسها لا وهو تخبل
نوح : مووو بكيفج اموتج والله وما اخليج تاخذين غيري

رد طگه ونتر بي
محمد : انچب لا اكسر سنونك بحلگك

كاض خده ويباوع الابوي
نوح : گلتلك انا اريدها گلتلي الك

محمد : بس گلتلك الا هي ترضى وهل ما رضت ما اجبرها

صخر يباوع ولا تدخل يشرب جاي وچنه جاي يشاهدله فلم جدي طول الوكت ما تدخل الا من هو اندار على جدي
نوح : جدي انا لو الغريب

رأجس : أنت ونهوتك ماشية غصبا على اكبر خشم والما عاجبه يطگ راسه بالحايط

صاح أبوي ما راضي
محمد : شني بوووية

رأجس : شبيك

محمد : تشجعة على الغلط

رأجس : بت عمة ويريدها وين الغلط

محمد : ما تريده

رأجس : مو بكيفها

اباوع عليها شوي وتتخبل حتى على جدي ترجف وتباوع الابوي
جفون : شني عمي ينهي علي جا مو جاي اگولن ما اررريده

وجدي ولا مهتم يرد عليها
رأجس : واحنا ما نمشي بكيفج

جفون : ما ارررريد اناا اعتبره اخوووي ما اريده

رأجس : صوتج لا تعلي لا اگومن اطيح حظج

لطمت على وجهه متخبله گمت بساع اجرن ايدها وهي شلون الجان خايف من شي وصار من ما گدرتلها هو جر ايدها وكضهن حيل يباوعلها طافره روحه أول مره اشوفنه بهل حال

نوح : لو مو تطگين روحج هم لغيري ما اخليج تصيرين هسة لو تموتين گدامي نهوتي ما افكنها وشتسوين سوي لا عبالج انا نوح ابو گلب الطيب يعبرن علي سوالفج الطمي منا لسنة وما جني اشوفنج لان اعارف شني براسج والتفكرين بي ابد ما اخليج تسوي لو على چثتي

بس خلص حجية جره
ليث : كضيتها هل مرة مرت الثانية اكسر ايدك

الأجواء صارت مشتده ،بحيث ما احد بعد كمل عشا نوح طلع وصخر صعد وليث گعد يم جده وشوي وتمدد حاط راسة على رجلها وانا بس شفتها مشت للغرفة ركضت وراها

بس طبيت اجت براسي القراصة كضيت راسي اباوع عليها شكو شي گدامها تمشرة تفتر مثل حايره شتسوي ومبين گلبها گد ما محترگ لو حجايتها هسة تحطني وتكلتني بدال نوح وما يرفلها جفن
عاد احترمت نفسي وضليت واگفة اباوعلها من تعبت وكملت خبالاتها

سألتها
_ ليش هيج ما تردي

فتحت عيونها تتنفس بقوة
جفون : وشلون تسأليني هيج وأنت تعارفين انا اعتبر هذولي التلاثة اخواني انا ماتوا اهلي وربيت هنااا حالي من حاالج وعيت انااا عدي ثلاث اخوان مثلج وتردين اقبل اصيرررن مرته والله لو اموتن

_ بس لو نحجي بالصدگ يحلون عليج ما فكرتي بيها

جفون : لا ما حاطتها ببالي لان ما اريدن احس انا بلاية أهل وهذولي ولد عمي مو اخواني

بلعت ريگي حايرة شأرد عليها
جفون : انا ما اريدنه والله غاية ما جاي اگدر اباوعله غير ذاك نوح الربيت انا وياه وحتى لعبنة جان سوه

_ بس هو مبين يحبج

وانا احجي وياها طبت مأيده كلامي
نسمات : والله انا منتبهتله شگد مبين عليه يحبج

جفون :بس وانا انا احبنه مثل أخوي احب اهتمامة بي كلشي اريد يجيبلي ما حسنني انا بلايه اخو وابد ما حسبت الي بباله غير عن انا الأفكر بيه انا والله لو اموتن ما ارضى اتزوجة

بحيرة گلت وانا اباوع عليها تمسح بدموعها
_ بس هاي نهوة

هزت رأسها وچنها تفكر بشي
جفون : يفكها واذا ما فكها اموت روحي والله

بعدها تحجي وطبت ميمنة بلايه ما تحجي جرتها من ايدها گعدتها وگعدت گبالها

ميمنة : تعارفين ليش انا دوم اسمي نوح ابو السفينة

هزت رأسها ب لا

أبتسمت وهي كاضه ايد جفون
ميمنة : مرة من المرات شفتة يباوعلج وأنت نايمة انا حاطة بالي يمة لان حاسة بيه يحبج سألته چن ابو السفينة غرگان گالي غرگان لا من اليوم ولا امس وبوكتها عيونة جوابتني گبل لسانة گلتله لا تخليها تروح لغيرك وصح السواه اليوم غلط بس احسن من ما تمشين الناس ما تعارفيهم شني ما شني تضلين هنا يم اهلج بنفس المكان الربيتي بي ما تطلعين

تبجي وتتوسل بحجيها تريد تقنعها
جفون : ما اگدر والله ميمنة ما اريدنة ما اگدر اتقبله غير أخوي

بنفس ابتسامتها تحجي
ميمنة : گبلج گالوها وهسة تشوفيهم يخبلون

جفون : الگالوها مو مثلي انا رابية هنا انا حالي يختلف

ميمنة : جا هي هم كرهته وتخبلت منة من نهة عليها خوب أنت هم واعية ما تتذكرين كلما جانت تشوفة تغمة وتگلة امداك وامده نهوتك شوفيها هسة والله حتى يم اهلي ما تگدر تبات وتعوفة

أبتسمت وانا اتذكر يوم النهة عليها شلون تخبلت ولطمت لطم وتعاركت فلا جنها الفقيره على گولة جده تالي هسة كله تسميه فقاري و واحدهم مسودن ع الثاني

جرت نفس تتحلف
جفون : انا ما اريدنه ميمنة مو بالغصب والله اسوي بروحي شي لو ضلت نهوتة علي

ميمنة : ما اريدن إأيسج بس جدي حجة وأيده مثل ما ايد فقار يعني راح تضل نهوتة

جفون : يعني شنو

گامت بساع من صاحها صخر وگبل لا تطلع گالتلها
ميمنة : يعني حاولي ترضين بالوضع

وجفون افتهمت حجايات ميمنة بالمگلوب گعدت تلطم وتغلط وما خلت حجاية على نوح تعبت عليها ما حجتها وانا ضاله بس اباوع عليها وحاطه ايدي على خدي

وبنص اللطم طبت أمي ،بس شافتها صاحت
جفون : عمة يرضيج السواه أبنج هااا يرضيج

زهرة : والله زين ما سوه انا اريدنج يمي

لطمت على وجهه واصله حدها كلش وساعة الساعة تگوم تملخ شعرها
جفون : راح تخبلوووني والله شني عمة اناااا ما اريدن ابنج ما اريدنة افتهموااا انا ما اريدن

تحجي وما نعارف بي قريب من الغرفة ومبين بس سمعها اجة وهي گامت تجر بحجابي من راسي تلبسة لان الخبله ما اعارف وين شامره حجابها

هز ايده يباوعلها
نوح : واذا ما ترديني شني عبالج انا ميت عليج

رفعتله حجابها بأستفزاز تحاجي
جفون : جا فك النهوة اذا ما ميت علي

نوح : عناد اخليها حتى تضلين طول عمرج مربوطه بيها

دگت رجلها بالگاع وهو يباوعلها وحاط ايده بجيوب البجامة
نوح : ما تعبتي شگد بيج حيل تلطمين

جفون : والله اذا ما تفكها اموتك اسمك والله

فكت عيونها امي مصدمة
زهرة : يا يمة فلك الفلكج

جفون : جا حاجي ابنج خل يكف مني

زهرة : حاجي أنت لو لسانج بس علينا مو هذا گدامج

جفون : ما شفتي حاجيتة وما فاد وياه يريد يمشي كلامة غصبا علي

زهرة : جا انا شبيدي

جفون : مو امه أنت گليلة يكف مني

اندارت عليه وكملت
جفون : والله اذا ما تفك مني اكرهك بعشتك وبالساعة السوده ل الله خالقك بيها

نوح : أي خوش

دار وجهه وطلع وهي شاطت حارت شتسوي وكل هذا وانا بس اباوعلها حگها ما الومنها بس بعد الصار صار وهذا اللطم كله ما منه كل فايده

طلعت من الغرفة من تذكرت السفرة بعدها بالگاع بس من شفتها ماكو والصاله مرتبة عرفت هي لمت كلشي مشيت للمطبخ واول ما طبيت صارت گبالي تفتر بالمطبخ بكل هدوء تعزل المواعين بلايه صوت

من حست بي وراها اندارتله
ميمنة : تعاي عدلي شالي لا يجي اخوج ويرزلني

أبتسمت ومشيت اضم شعرها الطالع من الحجاب لان هي ايدها مدمره وما تگدر بس خلصت اندارت للسنك تغسل بالمواعين وتحجي وياي

ميمنة : تدرين شني انا ابد ما حطيت براسي نوح تطلع منه ينهي عليها

_ انا لهاني عن الصدمة لطمها ولج ولا حطيت ببالي أخوي يحبها

ميمنة : انا اعارف من سنين حاطة بالي يمه بكل تصرف يسوي وكلشي يجيبه الها اعرفه مو لان يعتبرها أخته

_ والله انا جنت كل ضني مكسور خاطرة عليها تالي طلعت انا خطية نايمة ورجليه بالشمس

ضحكت بس ما چنها ضحكة ميمنة القديمة احسن بيها شي مو طبيعي بس خلصت صعدت تعزل غرفتها وانا صعدت وراها اعزل غرفة ليث لان شفتها مگلوبة

فتحت الباب وطبيت اشغل الضوه طافي اتفاجأت من شفتة نايم ع الجرباية وصافن على السگف من شافني گدامة واگفه گعد على حيله باوعتله بقهر وانا اعارف البي شني أخوي ما يگدر يعبر الصدمة الصارتله بسهولة

مشيت گعدت گباله وانا اگولن
_ شعجب ما ماشي للگيعان

بلع ريگة بباوعلي
ليث : ما اگدر امشي واشوفنها هناك گاعده مكسورة وانا ما بيدي شي اسوي الها

صفنت حايره ما اعارف شأردن عليه انصدمت من شفتة مد ايده ع الكومدي وجر باكيت جگاير وجداحة طلع وحده وشعلها حطها بحلگه وباوعلي
وانا شني ضليت لا اخذ ولا اطي من الصدمة اخر شي توقعته بالدنيا ليث يدخن

ليث : لا تباوعين هيج ماكو غيرها اتطفي نار گلبي

_ مو تگول ما احبن الجگاير

ليث : مجبور عليهن وداعتج

گرص خشمي بايده الما لازم بيها الجگاره أبتسمت وگمت اعزل بالغرفة واحجي وياه اريدن اوخر شوي من ضوجته ما اگدر اشوفنه هيج مگدر خلگه

طول الوكت هو لو يهز رأسة لو يحجيله كلمة ومبين ابد باله مو يمي واذا سكتت الگاه صافن والا اصيحنه مره مرتين الا يرد انطحن گلبي طحن من شوفته بهل حال سكتت من حسيت جاي اضغط عليه ولازم اعوفنة وحده بس خلصت الغرفة طلعت وانا افكر بيه

طبيت للغرفة نزعت شالي ومديت فراشي وتمددت وجفون گاعده على فراشها ومبين لو حاجيتها راح تفتح علي لان طنگورتها ما تتسولف نسمات نايمة وانا
غفيت افكر بهاي الخبله وبنوح وليث كل فكري عدهم مقهوره على اخواني هاي العوبة ما تريد أخوي
وليث الخلص عمرة يريد غريبة من لگاها طارت من ايده

°حواري°

اباوع عليها صعدت ع الدرج تنزل البردات اليوم هاجمة على البيت مادري شعدها وبصائر تشتغل التگدر عليه وياها هزيت ايدي وتمددت اباوع عليهن الكانونة بأيدي ما اگدر استغل يعني وحتى لو مو بيدي هم ما راح اشتغل انا ويني وين الشغل فلا احبنه

هيوفة : خايبة انزعي نعالج هذا لا ترحين تتملزگين وتصخمين روسنة

بصائر : ما اعارف امشي حافية

هيوفة : ولج يملزگ امس أجيت اطيحن منوراه

بصائر : لا ما اطيحن منتبهه

هيوفة : والله گلبي خامشني

نزعته تضحك
بصائر : هاا وهسة

هيوفة : احسن الگاع مبلله حتى لا تطيحين

بصائر : دوگفي عدل لا تاليتج أنت تطيحين من الدرج

ضحك تندار عليها
هيوفة : ميخالف انا اطيحن ولا أنت

بصائر : يمعوده دسكتي غير اذا طحتي شيخلصنه من لسان رجلج

هيوفة : والله ما يحجي رجلج اليحجي لو طحتي

صحت دايخه
_ كااافي اسكتن راسي راح يطگ

بصائر : شفتج وشفتيني راسج يوجعج

_ هاا شقصدج

بصائر : مقهوره عليج والله

_ صدگت

ضحكت وانا مشيت للغرفة من حسيت بروحي منعسة بلكت انام امس ولا نمت كلساع وشايفتلي حلم شكل احس روحي راح اتخبل والله وانا منا شلوني حتى تكمل كلش وياي وتصير فرد نوب

تمددت اغطي روحي واحس بعيني وحدها تسند الدوه قوي يخليني هيج اليوم كله فاقده ومكسرة تكسر نمت مثل الجثة بس
فززني صوت عيطة بصائر القوية الرجت البيت رج

گمت اركض وكل بالي بسلا طاحت بس طلعت فتحت عيوني بخوف وانا اشوفنها طايحة بنص الماي وامي وهيوفة متگابلات عليها يردنها تگوم وهي تبجي بخبال من رفعنها نشغت وانا اشوفن الماي متلون احمر امي من شافتة لطمت
على وجهه وهي من اندارت وباوعت وجهه صار اصفر

باوعت بوجه امي وردت تباوع بوجه هيوفة تسأل بيهن بعيونها

من شافتهن ساكتات گالت بصوت يرجف
بصائر : عمة طرحت مو گليلي طرحت

وامي چنها تريد تچذب الشافتة
نجوى : لا تعاي اگعدي وهيوفة بساعج امشي شوفيلي واحد من الولد

هزت رأسها ب أي وركضت بساع لبست عباة امي ومشت گعدتها امي والحال البيها احنه بهل وكت ما ينوصف شلون المتاكد من شي بس يجذب روحة

گمت بساع اركض للغرفة ناسية روحي بلاية حجاب ولوما صوت حق من صاح من المطبخ حتى نسويله درب فلا جان فگدت روحي

لبست حجابي ورديت طلعت بساع وانا اشوفنة مگابلها مگلوب گلب والخوف مبين عليه
عبد الحق : شطيحج ولج خوية شلون تمشين بنص الماي ما خفتي على روحج

وهيوفة واگفة وراه ترجف
هيوفة : والله كلساع اگلها هيدي وهي ولا تسمع تگلي ضايجة

عدل وگفتة
عبد الحق : بعد بصائر ورادت شي بساعج خوية لبسيها وانا ماشي اشغل السيارة

هيوفة : صار

هستوه طلع وطبت عمة شيماء بس شافتها بهل حال وامي حجتلها تخبلت عقل ما ضل براسها من الخوف وبس لبستها هيوفة مشن وياها امي وامها وانا وهيوفة ضلينا حال الظيم حالنه نريدلنه بس خبر عليها

تنشف بالبيت وتحجي وتلوم بروحها
هيوفة : كله مني انا شگومني على البيت اليوم انا صوجي شلون لو صارلها شي شأسوي بروحي

وانا اقنعها وانا الخوف تارس گلبي
_ ترا قدر ومكتوب مو صوجج يعني

هيوفة : ميخالف انا الحگ علي سكتت عنها وخليتها تمشي بكيفها

_ جا ما تعرفيها تحوس

سكتت تجر النفس مهمومة لهناك وطب فقار شافنة انا وياها وحده مگابله الثانية ووجوهتنه تتلاطم والخوف مبين علينا

اول شي گاله وعيونة تفتر بيناتنه
فقار : جا بصائر وين

باوعتلي حايره تريدني انا احجي
_ طاحت واخذها حق وامي للمستشفى

فتح عيونة وبساع رجف صوته
فقار : شبيها

_ مابيها شي بس هذا يجوز الجاهل بي شي

بلايه ما يحجي طلع ما يندل دربة يركض وانا وياها ضلينا صفنة تجيبنه وصفنة تردنه ويامن يردهم طولوا هواي الا ردوا واحنه بس سمعنا
صوت السيارة طلعنا انا وياها نركض وبهتنه بمكانة من نزلت وفقار ساندها عليه

بلعت ريگي بخوف من الجاي افكر بيه ومشيتلهم وكل الوجوه ما تبشر بخير بس حاولت اچذب الجاي اشوفنة وانا اسأل أمي

_ بشري يمة شلونه الجاهل

دنگت راسها وانا وصلني جوابها گبل لا تحجي بي
نجوى : الله اطاه والله خذاه واهم شي هي بخير

هزيت رأسي ب أي ودمعتي بطرف عيني اريدن ابجي عليها هواي تعبت بنساوتها وما صدگت شوي بدت تخف تالي هيج من طيحة يروح تعبها كله بس الحمدلله على كل حال الله ما قاسمة الهم

طبوا كلهم وانا ضليت امسح بعيوني ما اريدن ابجي انداريت اباوعله واعدل بحجابي وهو عينة وي أيدي تتحرك

حط عيونه بعيوني يسألني
عبد الحق : شلون صرتي

حطيت ايدي على گصتي احمي عيوني من الشمس لان ما شاء الله لازم هواي ارفع راسي حتى اشوفنة
_ الحمدلله زينة

عبد الحق : بس ما مبين عليج زينة

_ اگولن زينة لان تعودت على البي انا

اخذ نفس وزفره وعينة بعيني گال
عبد الحق : عينج على روحج ما بي حيل يوميا شايفج طايحة

وبكل استغراب سألته
_ ليش

عبد الحق : مو بت عمي

_ أي

عبد الحق : أي يعني سلامتج تهمني

هزيت رأسي وانا اگولن
_ خوش

مشى گبلي يطب جوه وانا وراه بس طبيت شفتها واگفة بالمطبخ تمسح بعيونها مشيت يمها مفزوعة من صارت تبجي بصوت عالي حتى حق ضل بمكانة ما تحرك مستغرب منها

_ خاب هيوفة شبيج

هيوفة : خسرت ابنها منوراي

_ يااا عود صدگ تحجين

عبد الحق : گولي يا الله خوية ترا كل ذنب ما الج وهذا قضاء وقدر

هيوفة : والله راح اموت من القهر

عبد الحق : لا تسويها سالفة بعد اخوج شي مكتوب وصار بعد علموديش هل قهر هذا

هزت رأسها ب أي بس انا اعارفها راح تضل تلوم بروحها وحتى لو بصائر ما حجت هي تضل تاكل بروحها وتحط اللوم على نفسها

مشى هو يطب جوه وانا ضليت يمها من طلعت من المطبخ بايدها دولكة الماي مشيت وراها لغرفتنة طبت قدمت الماي وانا مشيت يم بصائر گعدت وانا اگلها

_ الحمدلله ع السلامة عيون فقار

بصوت تعبان بالگوه تحجي ردت علي
بصائر : الله يسلمج

اجت گعدت بصفها من الجهه الثانية كضت ايدها
هيوفة : الحمدلله ع سلامتج

ردت عليها طبيعي
بصائر : الله يسلمج

من شافتها مدنگة راسها وما ترفع عيونها گالتلها
بصائر : شبيج ترا قدر وصار لا تلومين روحج

هيوفة : شلون ما الومن روحي ولوما انا طشيت التايت بالگاع ما جان طحتي

من بجت صاح
فقار : شني السالفة خوية ،راح فدوة اهم شي هي سالمة ولا تضلين تبجين ما نرضى على دموعج ترانه

باوعتلها مبتسمة بس مبين متوجعة من ابتسامتها
بصائر : طيحتي عادية بس هو ضعيف

كضت ايدها تمسح عليها مكان الكانونة
هيوفة : تردين شي اسويلج تاكلين

بصائر : لا كلشي ما اريدن بس اريد انام

ساعدتها تمدد وفقار حط المخده جوه رأسها غطتها وطلعت گمت انا وراها اعارف هيوفة من زمان لو صار شي هلكدوته يهدلها بال ابد

طبيت وراها للمطبخ طلعت دجاجة من المجمدة تموعها وتحجي
هيوفة : خايبة والله گلبي احسنة يفور عليها اعارف ما جاي تبين تعبها گدامي حتى لا انقهر

_ شبيج كافي شني شو انا اسوي مصايب وما اهمن هلگد أنت ما متقصده بعد عليش تحرگين بروحج هيج

جرت حسرة ساكتة وردت للغرفة وانا افتر وراها حتى نسيت مرضي ودوختي ولوما مسوده الدنيا بعيني وانا واگفة فلا جان گعدت

بلعت ريگي وانا ارد ضهري على الحايط وامي تحجي وياي بس بالي مو يمها اريدن اتنفس ما جاي اگدر احسن مثل الحبل التف على رگبتي وخنگني
ما گدرت حتى أضل واگفة ومن فتحت عيني
بساع اجت عينة بعيني جان مركز وياي دار وجهه من شافني جاي اباوعله

درت وجهي على امي من حسيت بيها كضت ايدي
نجوى : شبيج يمة

بلعت ريگي بالگوات
_ اختنگت

نجوى : ماخذه دواج

_ أي بس بعد مال ظهر من يجي ضيرم

عبد الحق : عمة ليش هيج يصير وياها

نجوى : يگولون منوره السحايا

عبد الحق : لا عمة خاف عدها خلل بالتنفس لو نقص بالاوكسجين

نجوى : ما اعارف والله ما گال الدكتور

عبد الحق : جا مو عدتكم دكتور شلون هيج ضاله

نجوى : جا والله ما مقصر

سكت وانا دنگت بساع من شفتة باوعلي ودار وجهه على امة
عبد الحق : تضلين

شيماء : أي اضلن واذا طلعتوا جيبولي اختنكم لا تضل وحدها

عبد الحق : ميخالف

ترخص ومشى وانا ضليت حاطة ايدي على خدي واباوعلها تلوب من الوجع بس تحاول ما تبين حتى لا هيوفة تحس لان كلساع تجي تسألها

هيوفة : خوما متوجعة

وهي تگلها لا بس جذابة ما تريد تقلقها ضلينا اليوم كلة مخبوصين ومن جده وعمة زهرة درن بالصار اجنه بالليل واول ما طبت اجت گعدن بصفي تگرص بي

طگيتها على ايدها
_ خايبة لا تگرصين شبيج

جفون : صايرة جنج بومة

_ يعني صايرة اشبهج

جفون : ايااا طايحة الحظ

اجت گعدت بصفي
غاية : مادريتي

_ لا شني

غاية : شلون سالفة تخليج هسة تصيرين مثل الحصان ومثل المطي تزاگطين

جفون : كضي لسانج لو الا تحطيني بلحگها

غاية : جا مو صاحبتج شلون ما تگليلها

جفون : ما تعارفين تضل تاخذها وتردها تاكل مخ راسي

هن يحجن وانا عاگده حاجبي ما مفتهمة شجاي يحجن هذني
_ شبيچن

جفون : ماكو شي كلشي مابينة

غاية : لا والله چذابة انا اگلج شكو

سدت حلگها
جفون : اخنگج وما اخليج تحجين

ساده حلگها وغاية تحجي بس كلشي ما افتهمت
_ خايبة هديها شكووو اختنگت

غضة : فلك شبيچن

جفون : مابينه شي جده

غضة : جا ليش ساده حلگ غاية

جفون : لان تخروت وصايره ما تبات بحلگها حجاية

غضة : هااا عارفت

جفون : هااا جدة اسد حلگج

غضة : ولج شني

وخرت ايدها من غاية
جفون : اشاقة وياج احجن وانا ماشية للبيت

غضة : انجبي واگعدي خبلتينا من امس لليوم

نجوى : شبيها

هيج بكل بساطة گالت
غضة : مو نوح امس نهة عليها

درت وجهي بساع على جفون فاتحة عيوني بصدمة وهي تخزر بي وترد تخزر جده
نجوى : يااا ليش نهة عليها

غضة : خطبتها أم احمد واشو هذا تخبل عاد طلع عاشگها

هن يحجن وجفون تباوعلهن متخبله لو بيدها تشرب من دمهن من شافتني صفگت بأيدي وضحكت جابتني بكفخة على راسي حتى لو السحايا الها نية تروح بهاي كفختها ردت

كضيت راسي
_ گبرر گبررر رااااسي

جفون : ليش تضحكين

_ اضحك لان جبت عمري اگلج يحبج وتگليلي لا يعتبرني أخته

غضة : يااا فلك يعني تعارفين

_ أي والله جده اعارف وحاسة عليه ومن اگلها لو تطگني لو تزاعلني ومرات تعضني

نجوى : خايبة شبيج وياها سوده علي خلفتي شابعين تكفخ من خلفتج زهرة

طبت مزغره عيونها تتشاقة
هيوفة : شني قصدج عمة

نجوى : قصدي مبين عيني الريشة

أبتسمت ومشت تطلع من الغرفة لان بصائر بالحمام جاي تسبحها بركة وهي واكفتلهن بالباب خاف يصير شي
غضة : العرمة من امس لليوم حتى احنا عاركتنه

جفون : جا شتردين جده ترا منهي علي تعرفين شني منهي علي

غضة : خايبة يحبج وهل نهة عليج ما رادج تمشين لغيرة

جفون : بس انا ما اريدنه انا ربيت وكبرت ووعيت يمهم تلاثتهم اخواني ما اكدر اتقبل النهوة بكل روح رياضية

_ جدي شگال

هزت ايدها ومبين محترگ گلبها
جفون : جدج شيگول ما تعارفي يموت علي ،بساع گاله نهوتك ماشية

دارت وجهه بساع من دمعن عيونها باوعتلها مقهورة عليها اول مره اشوفنها هيج ضايجة بس شبيدنه عليها كلمة جدي تمشي على اكبر واحد والدليل صخر الما گدر يعترض بزواجة

عدي فضول اشوفن حياتهم هو وميمنة شلون ماشية

تقبلها

_ غاية

غاية : هااا

_ شعجب ما اجت ميمنة وياكم

غاية : نايمة ما تعارف

_ يااا مو اگولن شعجب ما اجت تشوف اختها

غاية : امي وصت صخر بس تگعد يجيبها لهنا

_ اگلج

غاية : صارن هواي اگلج گولي

_ شلونهم

غاية : منو

_ صخر وميمنة

غاية : يعني زينين بس نوبات احسنهم ما جن متزوجين حياتهم هيج سطحية

_ شلون يعني

غاية : ما اگدر احجي

_ خاب عليج الله

نحجي بصوت ناصي بيني بس انا وياها
غاية : والله حرام انقل خصوصيتهم لو تريدين اسألي ميمنة

_ يااا فلك شاسألها

غاية : جا عوفي فضولج خل يولي

_ الحجي سهل

غاية : عبالي بطلتي فضول

_ لا ما بطلت بس قللت


تعليقات