رواية خلخال مشوه الفصل الرابع والعشرون بقلم زمرده
_ جا صدگ ليش نسمات ما اجت وياكم
غاية : گالت تجي وي ميمنة حالها مگلوب اليوم خابر عليها ابوها ما اعارف شگاللها حتى اليوم كله روحها بخشمها
جاي اردن عليها بس سكتت اباوع للباب من سمعت صوتها بره طبت وهي تگول و وراها نسمات
ميمنة : السلام عليكم
ردينا السلام ونسمات اجت گعدت بصف غاية وميمنة مشت برة گمت انا وراهن اول ما طلعت صارت گدامي حاضنه بصائر وهي هستوها طالعة من الحمام
وخرت تمسح دموعها الما شفتهن طاحن غير هسة
ميمنة : لا تبجين الله ما قاسمة واكيد ضاملج العوض
هزت رأسها ب أي وندارت لهيوفة ال على بجي بصائر تبجي
ميمنة : وأنت على شني تبجين شني ذنبج ترا شي مكتوب ورادله حجة حتى يصير
هزت رأسها ب أي تمسح بعيونها
لزمت بصائر من ايدها وباوعتلنا
ميمنة : تعالن نطب جوه موزين عليها تضل واگفة
مشت گبلنا واحنا وراها ردينا للغرفة وبس گعدت بصائر جابت الصوبة يمها هيوفة حتى تتدفة
زهرة : خايبة يمة الجو زين مو مال صوبة
غضة : لا لازم تتدفة حالها حال النفسة هسه
ضلوا يمنا ومن اجاهم ليث الا ردوا ،مديت فراشي من غير جهه عكس فراشها وهستوني اريد
اتمدد وطب النعاس مبين عليه تمددت وهو گعد يمها اباوعله كاض ايدها ويحجي
فقار : تمشين فوگ
بصائر : تنام هنا
باوعلي مبتسم
فقار : خاف حواري ما ترضى
بصائر : لا شني بكيفها ما ترضى اشحتها وأنت تنام هنا
صحت
_ هااا عيني سالمين
ضحك وگال
فقار : مديلي فراش هنا حبابة
_ انا مو حبابة وگوم أنت افرش لروحك انا نعسانة
فقار : شبيج لا تصيرين نحسة
_ يعني مثل مرتك
فقار : بداعة شواربج گومي
كضيت مكان شواربي
_ عود صدگ مبينات
فقار : أي والله خضر
_ جا باجر احفنهن
فقار : شگد صلفة بالوجوه تگول تحفهن
_ جا شني ازينهن
فقار : لا بس عيب أنا اخوج عيب تگولين گدامي تحفين
گمت على حيلي اريدن امشي اجيبلة
فراش من غرفة أمي
_ خاب ياعيب هذا انا ما استحي منك
فقار : لان مطيج على راحتج هل ماخذه ميانة وياي لو مثل هذولاك الوادم مروايج عين الحمره ما جان حجيتي گدامهم
_ شني ترا هي حفافة وياريت حافة وجهي بس شواربي
أنا احجي وهو يهز بأيده من شافني بي مجال اضلن احجي بعد تمدد على الزولية وحط راسة على مخده بصائر
_ ماشية اجيبلك فراش لا تسوي هاي السوالف عود تكسر خاطري
حاط ايده على عيونه ويحجي مبين تعبان
فقار : منيلج خاطر أنت
طلعت اهزن بايده بالكوات كاضه روحي عيب امدن لساني وياه فقار حباب مو مثل عزيز الشايف روحة
جبتله فراش من غرفة أمي ورديت فرشتله بصف بصائر وانا اگولن
_ لوليله خطية ما يگدر ينام
اشرت على الفراش وهو واگف يباوع مزغر عيونة
بصائر : تعال حبيبي تعال على عناد هذولاك الناس
تخصرت
_ مو اشحتكم من غرفتي
بصائر : مو بكيفج عيني
_ جا بكيفمن غير غرفتي
تمدد بصفها وجر الغطا يتغطا وياها
_ جا مو جبتلك بطانية
فقار : شني اخوان وعازلة غطانة
_ والله فلا تستحي
فقار : جا شني من يوم يومي ما استحي
ضحكت متعجبة عليه شني هاي شو صاير كلش صح هو ما يستحي بس زايد هسة
°هيوفة°
تمددت على الجرباية صافنة واعيدن بالصار اليوم درت وجهي اباوع للباب من حسيت باليده تتحرك
مسحت عيوني بساع من شفتة طب للغرفة حاولت أبتسم وانا اگومن اتلگاه فتحلي ايده شمرت روحي بحضنه وهو يمسح على راسي
وخرني ولم وجهي بين ايده
ضيرم : شبيج
_ مابي شي
ضيرم : علي احجيلي شني المضوجج
اخذت نفس ناوية احجيله البگلبي
رجف صوتي وانا اگولن
_ احس روحي انا السبب بطيحة بصائر والله ضيرم احس اريدن اموت من القهر ما جاي اگدر ما الومن روحي
كض ايدي ومشى بي للجرباية گعد وگعدني على رجله وانا الدمعة لو رمشت تطيح
حط ايده على خدي بطريقة حنينة
ضيرم : الصار مو صوجج الصار الله كاتبة ولازم المكتوب علينا يصير ما منه مهرب
_ ما اگدر احط عيني بعين فقار
ضيرم : گبل شوي جنت يمه ولا عبالج لامج لو شي بالعكس هو گالي حاجيها ولا تخليها تلوم بنفسها الصار صار
_ گول والله
ضيرم : والله
جر خدي بأصابعة
ضيرم : وكافي هيج معبسة ما متعود اشوفنج ضايجة
_ مو بيدي والله
ضيرم : اعارفج گلبج رهيف
أبتسمت من كمل
ضيرم : اتذكر من چنتي زغيرة دستي طيرة جعفر الزغيرة بوكتها حرت اشوفنها لو اسكتج
كبرت ابتسامتي وانا اكمل
_ بوكتها يومين لكمة ما اكدر احط بحلگي وكل ما ردت اكل اتذكرها شلون انمردت واضل اعيط
ضيرم : گلبج رهيف مو اگلج حيوان مريتي ما تأذي
ضحكت متغير مزاجي ،بساع گد يضحكني ولضحكتي مبتسم
ضيرم : فدوه لهل ضحكة
دنكت خجلانة من راد يبوسني ضحك وبأيده رفع وجهي يباوع بعيوني ذبلانة عيونة
ضيرم : اموت ع الصفر اسلمها تراب انا وگلبي
حطيت ايدي على گلبة وبالگوات احجي بعدني استحي منه
_ سلامة گلبك ياروحي
جر نفس طويل ولمني الصدرة وحرف حرف گال وانا احسن بكل كتر بي رجف من حجاياتة
ضيرم : أحبج ميت بيج انا عاشگج من جدمج لراسج
بلعت ريگي وانا احسن بگلبي هاي هي راح يوگف مثل ما وگف عدي الوكت هسة ومتمنية اضل هيج بحضنه
وخرني يعدل بشعري مبتسم بس احسن بايده ترجف
ضيرم : عشگج گلبي بساعة الگابلتي الطيرة تبجين ومن شلتج واطيتج العمة حتى تستكتج حسيت من وكتها وأنت ماخذه شي مني
ضحكت ما مصدگة وانا اگله
_ اخذت گلبك مو
هز رأسة ب أي
ضيرم : حرامية بگتي گلبي
ضحكت من كل گلبي وهو على ضحكتي يضحك بس صوتي طغى على صوتة
حط ايده على حلگي يسكتني چن تذكر الدنيا ليل
ضيرم : كافي شهرتينة ولج
وخرت ايده وانا اسألة
_ جا ليش ما حسيت بيك تحبني
ضيرم : چنت اجذب بروحي واگول لا عاجبتني لان حلوة بس من جدي گال أنت الي بوكتها حسيت گلبي گام يرگص بنص الصالة
وي كل حرف يگولة احس اريد ابجي بس اكض روحي لان زحمة تمدد وجرني ينيمني على ايده ويحجيلي
ضيرم : مرة من المرات شفتج چنتي لابسة شال ماروني طالعة تخبلين ،بيومها ابد ما رحتي عن بالي ونويت هاي هي امشي عليج بس من تذكرت صخر تراجعت لان اعارف غيرته شني وشراح يسوي بي واول شي راح يگلي حاط عينك على أختي بس انا سهلتها من لمحت لعمي محمد عليج وهو ما گال شي
رفعت راسي من صدرة
_ يعني حاجيت أبوي
هز رأسة ب أي
ضيرم : گلتله عمي لو اخطب منك تطيني وهو بساع گال تگبع وتاخذ عاد حطيت بباله انا رايد منه ولو احد تقدملج يجي يحاجيني
_ جا شلون جنت تگول ما اريدن اعرس
ضيرم : صدگ ما جنت ناوي اعرس الا ابني بيت بصف اهلي واعزل لان انا اريدن استقر
_ وليش من جدي حجة سكتت
ضيرم : لگمة وأجت للحلگ زحمة ترد
ضحكت وانا اگله
_ تفكر بالاكل خاف جوعان
ضيرم : أي والله جوعان
_ اسويلك شي تاكلة
ضيرم : ياريت والله لان لو ضليت جوعان راح اكلج
فتح ايده الجان حاضني بيها ونزلت من الجرباية وانا أخذ شالي احطة على راسي وگلت گبل لا اطلع
_ مو تنام هسة بساع اسويلك
ضيرم : جاي وياج
گام من الجرباية ونزلنه سوا طبيت للمطبخ بساع مشيت للثلاجة اشوفن شسويلة اخذتلي صفنة الا طلعت اللحم اموعنة
ضيرم : عوفي اللحم سويلي بيض وطماطة مشتهيا من ايدج
انداريتله مبتسمة
_ صار
گعد على الكرسي يباوع علي وانا اتحرك بالمطبخ بس احسني ما مرتاحة من نضراته والزادها علي من اجة حصرني بينة وبين الكاونتر دنگت
راسي اديرن وجهي منه وهو احسة بالگوات كاض ضحكته
ضيرم : شو ارفعي راسج
وانا گالي ارفعي راسج الجان رفعته وباوعتله دنگت اكثر بعد وهو ضحك بصوت ناصي وجرني على صدره حاضني ويتحارش وانا الطم بالخنسة وهو يزيد
_ ضيرم لا يجي أحد عليك الله وخر ننفضح وال...
بعدني ما مكملة وفزينه انا وياه على صوت أحد يتحمحم وانا لو الگاع تنشگ وتبلعني هواي احسن حرت وين اضمن روحي ومن ثولي ضميت روحي وراه ودفنت وجهي بضهره ولو جاي عمي ولا فقار الشهيرة
فقار : هاا چبيرنة شلونك
ضيرم : بخير ليش تسأل
فقار : مبين بخير قابل مثل حضي مسوين علي مقاطعة
ضيرم : انجب وبطل سوالفك
فقار : عمي يا سوالف خليتهن الك انا رجال فقير أجيت اشرب ماي خوما مثلك گاضيها تنخس بالمطبخ
من راد يمشيله واعارفة صار عصبي كضيته بأثنين ايديه وبعدني ضامه روحي وراه
ضيرم : اذا اجيك والله حتى نسلك اگطعة
فقار : يا نسل رحمة لمدري ياهو ،امشي لغرفتك لا تصعد عدي الجفاف رجال محروم
ضيرم : ايااا طايح الحظ شو صاير ما تستحي
فقار : خليت المستحى الك عيني
شوي وسمعت صوت الكاونتر البصفي انفتح فتحت عيوني وصار بوجهي ماد راسة يباوعلي وبايده دولكة
فقار : شلونج خوما تعبانة
گبل لا افك حلگي جر ضيرم الدولكة من ايدة وهم زين جانت ستيل جابهه براسة خلاه يرد ليورة من الوجع
فقار : خرررب شبيك ايدك والطگ ترا ما يصير هيج
ضيرم : انجب و ولي منا بساعك انگلع
فقار : تريد تگلعني حتى تستفرد بيها مووو
شرد بساع من راد يطگه نسى حتى الماي بس اندار علي لطمت على خدي ميتة من الموقف الصار
جر ايدي
ضيرم : شكو ليش تلطمين
_ شافنة والله عيب شايفنة
ضيرم : دخلي يولي يبيع استشراف براسي وانا جم مرة لاگفة بنص الليل طافر على بيت عمي يوسف واجيبنة سحل وهو جان بس خاطبها
شوي بعد ابجي وانا اگله
_ شلون احط عيني بعينة
ضيرم : واحنا نضل على كلشي وصحنه شلون احط عيني بعينة انسي بوية
_ خاف يضل كلما يشوفني يذكرني
ضيرم : لا حجه هسة بعد ما يحجي وسويلي اكل لان راح اموتن من الجوع
_ أسم الله عليك
ضيرم : تخافين علي
_ جا شلون
ضحك ومن تقدم انا رديت ليورة
_ ضيرم
ضيرم : هااا ريشته
ضحكت من جر كلمة ريشته
_ وخر خل اسوي اكل مو جوعان
ضيرم : اعوف الاكل واكلج احسج اطيب بس سويلي وياج گلاص جاي
ضحكت و وخرت منه ما ينگدر هل رجال ابد طلعت طماطة ثرمتها وحطيتها ع النار بين ما خذت جاي انداريتله گاعد وبأيده مبايله
_ ضيرم
ضيرم : گولي عيون ضيرم
غطيت حلگي بايدي ما يرتاح اذا ما يخجلني ومن يشوف وجهي صار احمر يضحك
ضيرم : عمي بعد ما نحجي گولي شني تردين
_ خابر على ليث احس غصيت عليه هو يحب البيض وطماطة الانا اسويهن
ضيرم : خاف نايم
_ لا ما ينام هيج وكت يمشي للگيعان
ضيرم : خوش
دگ عليه وفتح اسبيكر ماطول ورد وانا اشتغل واسمع حجيهم گبل السلام گالة
ضيرم : اگلك هاي اختك سوت بيض وطماطة وغصت عليك تجي تاكل
سمعتة ضحك بس ركزت اكثر من حسيت بضحكتة مو چن ضحكتة القديمة
ليث : خاب فدوة الايدها اجي شلون ما اجي مشتاگلها
ضيرم : بساعك ترا اسد الباب لو تأخرت
ليث : مو اكبر مني وما اريد اتحازوز وياك
ضيرم : حتى اطيح حظك
ضحك وسد الخط وماكو خمس دقايق واندگ الباب طلع ضيرم يفتحه وانا احظر بالصينية طب للمطبخ و وراه ضيرم يهز بأيده مادري شمحاجي
ليث : خاب فدوه لهل طول تعاي
فتحلي ايده ابتسمت ومشيت لحضنه وضيرم على جهه باقي بس ينافخ باس راسي مبتسم
ليث : هذا رجلج صار تنين
باوعلة صفح
ليث : شني عود تغار مني عليها
ضيرم : لا شني جا غير اخوها
ليث : أي خوش تعاي ابوسن خدودج
جرني متنرفز
ضيرم : لا ترا طوختها حيل
ليث : جا مو اگلك تغار
ضيرم : أي اغار ارتاحيت
ليث : انا اخوها وخر خل ابوسنها لا اخذها وياي
خزرة وليث ما اهتم اجه باسني من خدي بوسة أم الطگة على گولتة وندار باوع للصينية وعافنه ومشالها
ليث : الله ياخذك ضيرم فوگ ما ماخذها منه مدلل تاكل من اكلها الطيب
ضيرم : سلاية بعينك أن شاء الله اول مره تسويلي عشا وغصت عليك
باوعلي مبتسم
ليث : يروحلج فدوه نوح
ضحك وشلت قوري الجاي
_ امشونه للديوانية
شال ليث الصينية وانا اخذت بايدي الثانية الخبز ومشيت وراه وضيرم يهز بأيده چن جبتله شريچه مو أخوي
گبل لا يگعد صحتله
_ ضيرم جيب الصوبة من الصالة نحمي عليها الخبز
ما گال شي ومشى جابها ورد گعد وانا اباوعله
_ جا شلون اشغلها
مد ايده على جيبة طلع جداحة واطانياها
ليث : هاج
اخذتها منة مستغربة
_ شتسوي بيها
ليث : جا شلون اورث الجگارة بأصبعي لو شني
_ يا جگارة
حمحم ومسح على شواربة
_ ليث من شوكت تدخن
ليث : ما صار جم يوم
_ ليش ليث جا منو چان يتخبل من ريحتها
ليث : ما سامعة المثل اليگول الحجارة الما تعجبك تفشخك
_ ما فهمتك
ليث : محتاجها هيوفة انا واصل مرحلة بس هي تشتعل وتطفيني
بلعت ريگي حايرة ،وطول الوكت ضيرم ساكت ما حجة ومن شافة دنگ متحسر اتندنه شاورني
ضيرم : اخوج مهموم چن واحد عاشگ
_ اتذكر لمحلي بس شجاه هسة ما جان هيج
ضيرم : حاجي أنت انا ما اريدن اتدخل
ما رديت عليه وبساع گلت ل ليث بكل هدوء
_ صاير وياك شي
باوعلي وباوع لضيرم ورد دنگ
ضيرم : اطلع اذا تريد تحجي
باوعله يهز رأسه ب لا
ليث : شني جا غريب أنت
ضيرم : جا شبيك
ليث : ورا الاكل احجيلكم
ما لحينه عليه وانا صرت احمي خبز بس كل بالي يمة صبيت جاي وحطيت گباله ضيرم ياكل وهو لگمة ما حط بحلگة وانا طول ما هو ضايج
ويشرب جاي وباله شارد حسيت بنفسي انسدت وما گدرت اكل وبس اريدن اعارف شبي
مد ايده على ايدي يردني اباوعله وانا مركزة وي ليث
درتله وجهي گاعد بصفي
ضيرم : ما تاكلين
_ هسة
گلت هيج ومديت ايدي على الخبزة اگسم منها اكلت لگمة والثانية ما گدرت حتى ابلعها وانا اسمع صوت حسرته احس بگلبي تملخ تمنيت بس يحجيلي وهو خابروا عليه مكاين الماي ما جاي يشتغلن خله ومشى لگمة ما اكل
شلت الصينية واجه وراي ضيرم بس طبت گلتله
_ راح اموت ضيرم اول مره اشوفنه بهالحال والله
ضيرم : تدرين حتى انا مستغرب ما حطيت براسي بيوم من الايام راح اشوفنة هيج ضايج
نزلت دمعتي وبساع مسحتها
_ اتمنى اگدر اشيلن من ضوجته واخففها عليه ولا يضل هيج
ضيرم : هاي شنو تبچين
هزيت راسي بلا امسح بعيوني الصارت تمطر حيل مستغربة حيل مو شلون ما جان أول مره
حتى ضحكته احسنها مو من كل گلبة وجاي يسلك النه بعد ما جان هو السبب بيها
بس كفيت المواعين صعدت هو صاعد گبلي ونايم لان باجر عده دوام نزعت شالي واخذتلي هدوم سبحت ورديت للغرفة وانا كل فكري يم ليث مشطت شعري وطفيت الضوه ومشيت للجرباية بس حس بي تمددت سحبني اله يلفني بحضنه من التفكير ما طولت هواي ونمت اليوم احس صار اثگل يوم يمر علي وهمة لهل وكت محفور بگلبي
°غاية°
ندهتها اگعدها
_ نسمات اگعدي ولج خايبة نسمات
فزت مخترعة تباوعلي حطت ايدها على گلبها تجر النفس زغرت عيوني اباوعلها هاي شبيها مو طبيعية
_ شبيج كل ما اگعدج هيج تفزين
مسحت وجهه بچف ايدها وگامت
نسمات : مابي شي بس انا بي فزة
_ هااا
نسمات : شبيج چن مامصدگة
_ حاجية هسة انا
نسمات : لا ،بس احسن بيج ما مصدگه
_ هاي بس اليچذبون هيج يحسون
دارت عيونها مني ما تحط عيونها بعيوني
نسمات : ما مچذبة
_ خوش گومي حظري روحج
طلعت گبلها طبيت للمطبخ اشوفن أمي وگفت بصفها من شفتها جاي تسوي رويگ
_ جا يمة شو صخر ما گعد
زهرة : ما اعارف انا شگد ردت ليث هو الياخذنه بس اخوج ما اعارف شجاية
_ تعبان يمة لا تضغطين عليه
اندارتله
زهرة : فلك شحجيت انا هسة
_ ما حجيتي بس والله هو تعبان لازم تعذورنة
باوعتلي بشك
زهرة : تعارفين شي
_ لا شني شأعرف
زهرة : شبي اخوج غاية
بلعت ريگي اريدن ادبلي چذبة
_ ما تعارفين ما ضل شي للحصاد وهو حيلة أنهد بالگيعان سودة علي
ضلت عينها علي ما مقتنعة والخلصني منها صخر من طب للمطبخ
صخر : صباح الخير
ردينا عليه وانا بساع طلعت اشرد من امي ما اگدر احجيلها ما اريدنه يگول حجيتلج وما ضميتي السالفة هستوني اريدن اطب للغرفة وطلعت نسمات لابسة حتى عباتها
_ خايبة شو مستعجلة
نسمات : مو خاف اخوج يشوفني ما لابسة العباة وعباله ما متحظرة
ضحكت بصوت ناصي ما اريدنه يسمع وسألتها
_ هاي حتى أنت تخافين منة
نسمات : ليش الجذب اخوج والله يخوف مرات اگولن ميمنة شلون رضت بي
_ بعد رضت
نسمات : احسنة اذا يتغزل بيها يگلها عيونج چنهن جيله
ضحكت بصوت عالي وهي تقلد
نسمات : واذا راد يگلها أحبج يحلفلها ببيت غازي
ضحكت اكثر ما گادرة اكض روحي ولوما صوته وراي وزمخته ما جان سكتت
صخر : وسم لهل صوت
سديت حلگي بأيدي وانداريت اباوعله خازرني وعينة تفتر مني لنسمات
صخر : شهل ضحك من صباح الله
_ مو شنو هاي
صخر : شنو
_ حجت نكتة وضحكت
هز ايده وبس مشى نسمات زلغت خدودها
نسمات : يا فشلتي كله منج غاية
_ خايبة اسكتي انا حتى نسيت شلون احجي موزين طلعتلي بچذبة
نسمات : اوووف منج
اجت امي شايلة الصينية حطتها بالگاع
_يلا لاتضلين تأفأفين وامشي تريگي
زهرة :تعاي بعد خالتج
مشت وانا وراها گعدن وانا گعدت بصف نسمات گلت اتريگ وياهم لان ما احبن اكل وحدي
زهرة : جا اخيج وين
_ صعد فوگ
زهرة : خاب بسلا يگعدها خطية امس ما نامت
_ لا اضن يبدل
زهرة : امشي گليله لا يتأخر لا يبرد الاكل
گمت وانا اگلها
_ صار
بس صعدت ودگيت الباب فتحة الي يعدل برد القميص وما اعارف شلون اجت عيني على الفراش المدود بالگاع
حمحمت وانا اگله
_ أمي تگول انزل بساع لا يبرد الريوگ
صخر : انزلي وانا جاي وراج
هزيت رأسي بأي ونزلت بساع وانا افكر بالفراش بس گعدت نزل صخر رفعت رسألي عليه من گال
صخر : غاية صبيلي جاي
زهرة : جا شني يمة ما تاكل
صخر : لا شبعان
زهرة : شلون شبعان وانا امس حتى ما شفتك تعشيت
صخر : ما اشتهي والله
بحيره من وضعة الصدگ يحير سألته
زهرة : شبيك يمة
صخر : شبيه
زهرة : ما اعارف احسنك مو طبيعي
صخر : خوما جديد عليج انا ما تعارفيني كل ما اگعد من النوم ضايج خلگي
زهرة : اعارفك
صخر : جا بعد ليش تحجين
زهرة : گلبي يگلي بيك شي
تحسر يجر نفس واخذ گلاص الجاي من ايدي وگعد
صخر : گلب والدة بعد
زهرة : جا غير ضناي أنت انا اعارف البيك لا عبالك غافله عنك
أبتسم صفح ودار وجهه يشرب من الجاي وچن باله مو يمة بس خلصن ريوگ گال يلا لبست امي عباتها وطلعن وگبلها وصتني بس يگعدون جده وجدي وأبوي اريگهم واردن انام
وبس گعدوا صبحت عليهم ومشيت للمطبخ اسويلهم الريوگ ملتهيه اثرم بالبصل لان جدي يموت على شي اسمة بيض وبصل بالريوگ بس الخلاني اهد السجينة من ايدي والطم على صدري بخوف شوفتة من طب مدمه
اريدن اتحرك وامشيله ما اگدر احس حيلي كله تبخر من شفتة يمسح بالدم من خشمة ركضتله
من حسيتة راح يطيح كضيته من ايده اگعده وانا أصيحن بحس يرجف
_ بوووية تعال الحگ ليث بوية ليث خشمة
ثواني واجه أبوي يركض ،جمد من شافة بهل حال ولوما طب جدي و وراه جده وصاح فلا جان
گدر يتحرك
رإجس : ولك محمد شوووف ابنك شبي
جراه من ايدي يحركة وهو چن يريد يفقد انا تخبلت اللطم وابجي من شفتة غمض عيونة وجده حالها مو اقل من حالي
_ بوووية ليث ليث بوية الحگة فقد والله فقد
ابجي بخبال وابوي طگ على وجهه يريد يصحيه وهو بس فصوص عيونة تتحرك من أيس منة يگعد طلع بساع يشغل السيارة وانا لميت الدنيا كلها بصوتي
رأجس : وجبح لهل صوووت اسكتي خزيتينه
_ شلون اسكت جدي ما شفتة لا من ايد ولا من رجل
احجي وافتر مثل الطير المذبوح وحتى نسيت روحي بلاية حجاب من طب عزيز يركض شالة هو وأبوي ومبين أبوي صاحة لان وحده ما يگدرله
سوده علي ضخم
من خوفي عليه لزگت بأبوي اتوسل
_ بوية اخذني وياك عليك الله فدوة اخذني وياك
صاحت بي
غضة : وين ماشية ولج
مسح على راسي مستعجل يريد بس يطلع بس مقدر خوفي عليه مشوا وانا تمنيت روحي اگدر امشي وياهم لو تأخروا ساعة اموت من الخوف والله الا ليث الا اخواني انا گلبي ما يتحمل يصير بيهم شي والله
لميت شعري الما اعارف شوكت مفتوح ونازل على طولة ومن گد ما جنت مشدوها ابد ما حسيت بي
مشيت للصالة وبس وگفت گبال جدي گلتله
_ جدي خابر على أبوي الله عليك شوفة شلونة
رأجس : تراهم بعد حتى ما عابرين القرية
گعدت على باية الدرج وانا حال الظيم حالي ريت من هم گلبك لگلبي يابعد گلب أختك وريت الهم الما توقعت اشوفة بيوم على ملامحك ينشال منك يا أبو ضحكة الحلوة
رفعت راسي أدعي كون كلشي مابي ويرد بخير وانا ادعي شفتها نزلت من شافتني بهل حال ورافعة ايدي زغرت عيونها مستغربة
ميمنة : شبيج غاية
نزلت ايدي ورديت ضهري على الحايط اسويلها درب تعبر
_ ليث تخربط
ميمنة : يااا اسم الله شبي
_ ما لحگت افتهم والله طب مدمة يصب خشمة دم حتى تالف هدومة وهستوني مشيتله طاح بأيدي
ما نزلت گعدت يمي تسأل
ميمنة : منتبهه عليه مو طبيعي ابد تعارفين شصايرله
هزيت راسي بلا ما اريدن احجي سر أخوي ال أي واحد هو أمن من حجالي وانا لازم اكون گد الامانة
كضت ايدي تريد تهون علي
ميمنة : ما بي شي هسة شوي وتلگي راد بس لا تخافين لا يروح يهيج عليج گلبج
بللت شفتي بلساني
_ أصلا هاج احسن بي يريد يطلع من مكانة على گد ما جاي يدگ بساع
صفنت علي حايرة ،من حسيت بيها خافت كضيت ايدها
_ ما بي شي بس لان خفت شوي واصير زينة لا تخافين
هزت رأسها ب أي وگامت نزلت وانا اباوع عليها مشت للمطبخ
مسحت على گلبي اريدنه يهيد هو بجهه وخوفي
على ليث بجهه ثانية
رفعت راسي على صوت جده من حجت
غضة : خابر عليهم هسة وصلوا
ما حجة شي ومن شفتة طلع مبايلة من جيبة گمت بساع اوگف قريبة عليه باوعلي وباوع بالموبايل يدور دگ على أبوي وطول الا رد وانا طول الوكت احوس
رأجس : هااا محمد شني بشر شلون صار ليث
فتحت عيوني بخوف من گال
رأجس : وشجابة الصخام الضغط عليه
رأجس : خوش متانياكم
سده وباوع لجده
رأجس : راح يجون بس يخلص مغذية
غضة : شبي
رأجس : صاعد ضغطة كلش
لطمت على صدرها
غضة : منيله الضغط ماعده ضغط هو
رأجس : اندري يجون ونعارف
وانا شلون اهيد بعد ما عارفت اسم الگعده ولا هادلي ومن تعبت من الأنتظار جوه مشيت گابلت
باب الشارع وگعدت وما صدگت سمعت صوت سيارة أبوي وطفرت من مكاني من انفتح الباب
تمنيت اگدر اطي من حيلي ولا اشوفنة ساند روحة على عزيز ذاك أخوي الجان يفتر ليل ونهار وما
يگول تعبت اليوم كل كتر بي يگول انا تعبان عيونة
تسولف أخوي مهموم والتعب مستوطن بروحة
مشيتله وانا اگله
_ ريت من حيلي على حيلك يابعد حيلي
أبتسملي وفتحلي ايده من الجهه الثانية حضنته وانا رافعة راسي اباوعله
_ ليش هيج خوفتني عليك
ليث : سوده بوجهي بساعة الخوفتج
_ اسم الله
ليث : كلشي ما بي هاي انا امشي على طولي
هزيت رأسي ب أي وانا اعارفة كلش زين ما يطي بروحة ما گدرت ما أبتسم من گال وهو يحاول يغير الجو شوي ولو مو من عوايده
عزيز : راح اوديلج حواري علميها الحنية شوي
غطيت حلگي بأيدي من عرفتة جاي يبسمرة
ليث : اتعلم تحجي وياها مثل الاوادم وبعدين الك حق تطالب بالحنية
خزرة
عزيز : انجب شبيه ما اعارف احجي لو شني
ليث : لا عيني أنت التعارف تحجي محامي بعد منو گدك
عزيز : تريد اردك للمستشفى
ليث : وخر مني
دفعة وگال
ليث : تعاي الله لا يعوزني عليك
عزيز : رد لسانك مو هستوك جنت ميت
ليث : يومك گبل يومي
عزيز : ايااا نكار الجميل مو هستوني شايلك وطگ ضهري بيك
ليث : غصبا عنك تشيلني جا عضلاتك المن رايدهن
عزيز : خاب بعلي ضوجتني كلش ومحترمك لان مريض
أبوي طول الوكت واگف يباوعلهم وميمنة واگفة يم باب المطبخ
محمد : تطبون لو شلون
عزيز : عمي وعلي ابنك ما ينحمل
محمد : يداهرك ما تعارفة
عزيز : هو يعارف انا ما احبن المداهر
محمد : هسة طبوا جوه والله كريم
جراه من ايده
عزيز : اعارف لو تمشي وحدك تطيح بس كض لسانك اطببك جوه واولي
ليث : گلعة
مشاه بلايه ما يحجي بس طببه جوه طلع گعدت جده بصفة تلزم بوجهه وهو مبتسم يباوعلها وكلهم الهنا عبالهم هاي ابتسامتة تعني هو زين بس انا اعارفة جاي يضيع بيها من هواي حجي ما يحجي بس انا ما عبرت علي وضليت طول الوكت اباوعله والدمعة تفتر بعيني
گاعده بصفها وهي مندارتله تحجي بقهر
غضة : يابعد روحي ياحبوبة سودة علي مزرفين ايدك الخير
تباوع الايده مكان الكانونة وتحجي
غضة : شجاك طحت هيج وهذا أنت التگول انا صل وما يصيبني شي شو طيحك الضغط
ليث : وبعدني صل شوفيني هل رديت ضغطي مفول لو غير واحد جان ضربتة جلطة بس حفيدج ما صابة شي
غضة : عوذة من عينك لاتحسد روحك
ضحك ومدد حاط راسة على رجليها وهي تمسح على شعرة
غضة : شبيك جده
ليث : مريض جده يعني شبي
غضة : لا عوف المرض شبيك مهموم
تنفس وصدرة صعد ونزل بشكل واضح حط ايده على عيونه
ليث : نعسان جده ما نايم
غضة : ما تريد تحجي مو
ليث : ما اگدر جده خليهن بگلبي ليش تقهرين روحج
باوعتله بحيرة
غضة : بساعة التريد تحجي تعال وانا اسمعنك
وخر وباسها من ايدها و وگف على طولة يريد يصعد فوگ يمشي بس مشيتة ما متوازنة وهل شي خوفني عليه وخلاني امشي وراه لحد ما صعد طب للغرفة وانا ضليت واگفة بالباب مدد على الجرباية وصاحني
ليث : طبي خوية
طبيت وسديت الباب وراي گعدت بالگاع يم الجرباية وهو گبالي متمدد
_ شبيك ليث شني الخلاك توصل لهل حال اليوم
بلع ريگة ودار وجهه عني وبصوت ناصي همس
ليث : بعد شهر عرسها راح ياخذها الما گابل الشط كلما يشتاگلها
_ ليث
اندار يباوعلي وعيونة بساع انصبغن حمر
ليث : هاا
_ مو من نصيبك الله عليك لا تتعب هيج والله حيلي اتمنى اطي الك ولا اشوفنك تعبان وأنت ما يلوگلك التعب
أبتسم وهز رأسه
ليث : صار ما نتعب بعد
_ تعودني
تلاشت ابتسامتة وهز رأسة بلا
ليث : ما اريدن اوعد واخلف بوعدي بس احاول انساها
_ صدگ لو مكتوبة الك ما جان صارت لغيرك بس هي مو من نصيبك
هز رأسة بأي وانا احسن بي ما مقتنع بس يحاول يسمعلي حتى يهيد بالة
_ جوعان
ليث : لا بس اريدن انام ولو كلشي يصير لا تگعديني
_ صار اذا تحتاج شي صيحني
أبتسم وحط ايده على عيونه گمت طفيت الضوه وطلعت نزلت جوه وانا احمد الله واشكره من بدل الخوف باطمئنان
بس شفتي جده جاي نزلت صاحتني
غضة : تعاي حبوبة
_ هاا جده
غضة : تعاي يمي
مشيت گعدت گبالها
_ گولي جده
غضة : ما عارفتي شبي اخيج ما حجالج
_ لا جده مو شفتي ما يريد يحجي
غضة : والله گلبي ضل بالي عليه
_ ريحي بالج جده اهم شي طلع منها سالم
غضة : أي والله الحمدلله
گمت امشي للغرفة اريدن اگعد جفون هل تمبل هاي ما مصدگة مخلصة امتحانات بس طبيت للغرفة ندهته
_ جفووون يمعووده راح يأذن الظهر شني سالفتج
جريت البطانية واستغربت من شفت بمكانها مخاد مسفطات فتحت عيوني خايفة بالجاي افكر بي وطلعت بساع من الغرفة صاحت وراي جده مستغربة من حالي وانا احسن الدنيا تفتر بي من الخوف
امس بالليل گالت اهجن لوما نوح فك النهوة امس حجتها واليوم سوتها
°ريحانة°
طبيت شايلة العلاليگ بأيدي طايرة بيهن لو مشتريه السوگ كله فلا جان شبعت والله
درت وجهي على حمزة وراي اريدن اطب بس اخاف لا اسمع حجاية لو يشوفون البيدي ويخربن فرحتي وهو بساع عرف بشني جاي افكر
كضني من ايدي الثانية ومشى گبلي طبينا بلايه صوت بس جانوا كلهم ملتمين بالصالة لان متعلمين العصرية لمتهم تصير وما تخلى من الجاي والكعك الحتى انا عودوني عليهن وصارن جزء من يومي لو صارت گعده
سلمنه انا وياه وهو مشى يمهم وانا ردت اصعد بس عمتي ما ترتاح اذا ما تشمرلها حجاية
بشرى : شني هاي كومة العلاليگ البيدج لامة السوگ كلة بيهن وجاية
أبتسمت احاول ما اخليها تسوي طلابة
_ هاي هدوم لحفيدج عمة ما ضل شي واجيبن
بشرى : وين ما ضل شي بعد بالثلاث أشهر
أستبرق : غمض عين فتح عين خلصن وما تلگيها غير جايبة
باوعتلها ما راضية لان ردت ببدالي
بشرى : وأنت مني مشغلج محامي دفاع الها
منتظر : جا يمة هي شحجت
بشرى : لا تحط روحك أنت بسوالف النسوان
تأفأف ضايج دار وجهه واشر لأستبرق تگوم حتى لا تكبر وتصير مشكلة
شالت ابنها النايم بحظنها وگامت وعمتي تخبلت
بشرى : شنييي ما عجبج الحجي وگمتي
اندارت عليها
أستبرق : لا عمة بس ماشية اصعد عبوسي للغرفة يكمل نومتة
خزرتها ما مقتنعة واستبرق صعدت وانا ضليت حايرة اصعد لو لا من شفت منتظر اشرلي بمعنى اصعدي انا هم لحگت استبرق بس طبيت للغرفة
شمرت عباتي والشال طافرة روحي الى متى لازم نضل متحملاتها ليا يوم هيج عيشتنة زقنوبت علينا يمها
درت وجهي ع الباب من انفتح سدته وأجت تحجي
أستبرق : صدگ وين راحتوا
_ مو تعارفين للدكتورة ومناك مرينه للسوگ جبت چم شغلة بنفسي واجينه
أستبرق : شو خل اشوف
شلت العلاليگ ونزلتهن بالگاع
_ اگعدي اشوفج
گعدت تحاول تردلي واهسي وي كل قطعة تشوفها تبوسها
أستبرق : فدوه ل الله ولج يخبلن يخبلن صارلي واهس احبل حتى اجيب نفسهن
_ خايبة اسكتي ابنج بعده زغير وينج وين الحباله
ضحكت تباوع للقميص
أستبرق : شگدوووته هاي وين لگيتيهن
_ شلعت گلب ابو المحل والله بس هم زين لگيتهن
أستبرق : ولج والله متحمسة شوكت اشوفة
_ والله حتى انا
أستبرق : صدگ شگالتلج الدكتورة
_ گالت يحتاجلي راحة لان نازل كلش
أستبرق : يااا جا شوكت يصعد
_ اندري
گامت وانا گمت وياها من گالت
أستبرق : ماشية انزل لا تذبلها سالفة علينا
_ انزلي وانا هسة الحگج
أستبرق : يمعوده ضلي بس تشوفج تشغلج
رديت گعدت ع الجرباية
_ بطلت ما انزل
ضحكت ونزلت وانا فتحت كنتوره المخليته اله من هسة وشني اجيبة اسفطه بيه رتبت هدومة
الجبتهن هسة وسديتة وانا اتمنى اجيبن اليوم گبل باجر واحطة بحضني طگ گلبي على شوفتة انتظرته هواي وثلثين حيلي راح منذور لكلمة الماما الاريدن اسمعها منه
مددت من حسيت بوجع صار بضهري بس ما خلتني اتهنى وخبصت الدنيا تصيح علي انزل حتى نسوي عشا جريت شالي اللبسة بنتر وطلعت ضايجة بس كضيت روحي من نزلت طبيت للمطبخ وي استبرق تگابلنا انا وياها نسوي العشا حكم فرعون تريده الا من وكت وبس خلصنا وكفينا المواعين صعدت فوگ ضهري موتني لان ضغطت على روحي وافتريت بالسوگ هواي اليوم
بس طبيت للغرفة تمددت وانا اجرن النفس بالگوات مورمة تورم ليگول حامل بتوم ولا چن واحد وعبالك زورية گد ما زغير
هستوني غفيت وحسيت بي من طب للغرفة تمدد على كيف وكل ضنه انا نايمة خايف لا يگعدني رديت غفيت وهاي جانت اخر مرة اغمض بيها عيني گبل لا تنگلب حياتي گلب
فزيت مرعوبة اريدن بس اگومن من الفراش واوصل للباب بس هو جان اسرع مني وطفر فتحة وانا گعدت على الجرباية بايد حيلي من الدگة الهجومية
بشرى : ولك الحگ مرتك تطلگ
غاية°
طبيت للمطبخ اركض حايرة وين اطي وجهي جريت عباة امي مال البيت معلگة وهميت اريدن اطلع وكل هذا وهي تفتر وراي تريد تعارف شبي مخبوصة هل خبصة
عتتني من اچتافي تديرني عليها
ميمنة : خاااب شكووو شبيج غير نفتهم
انا بين ايدها بلايه روح ،من خوفي احسن ساعة الساعة اطيح كل توازن ع الگاع ما ضل عدي
_ جفون ماكو امس گالتلي اهچن من البيت وسوتها صدگ
فتحت عيونها بخوف
ميمنة : وين تمشي ولج
_ اندري راح يوگف عقلي والله راح اموتن
ميمنة : امشي شوفيها خاف يم بيت عمي باقر
_ هو ماشية
طلعت وعفتها وراي مشت لجده من صاحتها لان سمعت خبصتها دگيت الباب على بيت عمي باقر وچن ما جاي ادگه بأيدي لا والله بگلبي بس فتحة عزيز گلتله
_ جفون يمكم
انگلب ملامحة بساع من شاف حالي المخربط
عزيز : ليش وينها
هو گال هيج لو متت بمكاني بهتت روحي وكل حيل بعد ما ضل عدي جفون ماعدها مكان غير بس بيت عمي باقر وهسه هي مو يمهم يعني وين مشت
ما صحاني على زماني غير عزيز من صاح بوجهي
عزيز : شني السالفة غاية جفون وينهاا
رفعت اچتافي وانا أرجف حتى احسن بروحي ما احجي عدل
_ ما اعارف ماكو كل ضني هي نايمة ما لگيتها بفراشها
عزيز : يم بيت عمي يوسف شفتيها خاف يمهم
_ ما تمشيلهم هي لو تضوج تجي يم حواري
احجي وياه واحسن بروحي تنخلب مني كلما تعدي ثانية شأحجي اگله حلفت تهج لو شأگولن شسويتي ياجفون وين مشيتي
بحيره مو اقل من حيرتي گالي اردن للبيت وهو ماشي يشوفها رديت بس اسحل بروحي
وخوفي ثنينهن سوه اول ماطبيت تلگتني ميمنة وبس
گتلها ماكو لطمت خايفة
ميمنة : صخام الصخمني عزااا العزاني وين مشت ولج
_ ما اعارف ماكو يم بيت عمي باقر مشى عزيز يشوفها يم بيت اهلج بس انا اعارف مكانها لو ضاجت يم حواري
ميمنة : لا ادعي يلگاها يم اهلي لان لو ماكو مصيبة وتطيح على روسنا
گعدت مهدود حيلي وانا مأيسة كلش احس بلعومي طبگ اليوم خلصتها من مصيبة لمصيبة ومن هبطة للثانية وكل وحده تگل للثانية انا اقوى منج وابد ما استغربت من طب عزيز مگلوب گلب گبل لا يحجي عارفت بيها مو يمهم عارفت جفون سوتها ومو بس حجي ونگال
ميمنة : هاا خوية يم اهلي مو
هز رأسة ب لا
عزيز : ماكو
لطمت على وجها
ميمنة : يمة جا وين مشت
عزيز : انا الازم اسألجن
بالگوات طلع صوتي من الخوف وانا اگله
_ كل ضني نايمة ماحسبت ما الگاها بفراشها
هز رأسه حاير
عزيز : عمي وين
ميمنة : عدهم شغلة وطلعوا گبل شوي
بلايه مايحجي طلع يخابرهم وانا ادعي ترد گبل لا تكبر السالفة وساعتها جيب اليلمها ادعي ترد خايفة عليها خايفة وين مشت وين طلعت صح هي ما تخاف بس انا اخاف عليها من الراح يصير لو طاحت بيد واحد منهم
بعدني على نفس الگعده صفنة تجيبني وصفنة تردني رفعت راسي على صوتة من طب يسلم
نوح : مساء الخير مرت أخوي الما يتحاجة والابد مو عصبي وروحة بخشمة
ما چان منتبه علي الا من صحته
_ نوح
باوعلي مبتسم بس بدت تختفي أبتسامتة من
گلتله
_ ليش ما فكيت النهوه عن جفون ليش خليتها واعارف بيها تحسبك اخوها
مشى وگف گبالي وبكل استغراب من الگلته سأل
نوح : شكو بيها شي جفون
_ جفون مو بالبيت نوح گالت اهچن لوما انفكت النهوه وسوتها صدگ
رجف فكة و عدل وگفتة ما يريد يصدگ لاگولة رغم يعارف ما جاي لا اتشاقة ولا اكو شي من هل حجي هذا
اندار على ميمنة
نوح : صدگ الجاي تگولة
هزت رأسها ب أي تفرك بايدها متوتره ملامحة انگلبت گلب ومثل البركان ثار علينا يكسر شكو شي
يجي گدامة گمت اريدن اكضه وهو چن واحد متحمل وگالوه احجي
أجرن بيه وما اگدرله فلش المطبخ تفلش ووي كلشي يشمره يصيح بحرگة گلب
نوح : ليششش ولج ليشش
بجيت وانا اباوعله مأيسه ما اگدرله وبساع درت وجهي عليه من طب يركض جراه يطگه يريده يهيد وهو من حرگة گلبه سوه المطبخ رماد
عزيز : خااااب شبيك ولك هيييد
بنفس الوكت نزل ليث من فوگ يسأل شكو نوح ولا واحد بينا اله عين يحجيله
ليث : شني شبيكم شصايررر
باوعت لنوح حايرة ورديت اباوع ل ليث وانا گلبي شيحمل بعد شيحمل وانا اشوفنهم انكسروا بنفس اليوم
نوح : جفون مو بالبيت طلعت من نهوتي لان نهيت عليها هدت البيت شوف ليا مرحلة وصله ما تهواني
فتح عيونة مصدوم بالگاله نوح
ليث : تحجي صدگ
ما رد عليه وحط ايده على گلبه يريد يتنفس يرجف كله وعيونة وحدهن يحجن شگد هو مقهور بهل وكت دموعي تطيح بكل حرگة وانا افكر ليا دوب يوميا اشوفن واحد
بيهم محترگ گلبة لشوكت ما يرتاحون اخواني ولا يستقرون اليوم ليث وحرگة گلبة كافي علي وهسة زادها نوح
صاح وهو يدير عيونة بيناتنه
ليث : حاجوووني جفون وين
عزيز : جا صار ساعة شناكل تبن مو نگلك ماكو ما هي بالقرية
صاح متخبل
ليث : كله منك گلتلك لا تفكررر بيوم تنهي عليهاا ما راح تدگ راس لنهوتك وتكرهك بالزايد
نوح : توقعت كلشي تسوي بس مال تهد البيت وتمشي ابد ما حسبتلها
افتر بحيرة ورد وگف گبالي يسأل
ليث : خاف يم بيت عمي سمير شفتوها
ميمنة : ما تمشيلهم ابد
ليث : جا وين مشت
عزيز : شمعرفنة حالنه من حالك
ضلوا يلوبون حايرين ماكو مكان تمشيله حتى يمشون يدوروها بي واحد يباوع بوجه الثاني منا لمن طب جدي وابوي وجهه مخطوف وراه انا وگفت اتراجف واباوعله صاح
رأجس : وييين مشت مكسووورة الرگبة وين مشت بت البدوية
محمد : بلايه صياح بويه وخلنا نعارف ساسنة من راسنا
اندار علي يسأل بي انا والواگفة بصفي ميمنة
محمد : وين جنتن عنهاا من طلعت حاجني وييين
احجي وانا كل كلمة اعيدنها مرتين الا تجي وياي عدله من وگفتهم كيتلين لو من صعوبة الموقف الحطتنه وحطت روحها بي
_ ما اعارف بوية كل ضني نايمة
صاح بصوت عالي مقرر حاسم امرها خلاني الطم على وجهي بخوف وي كل حرف گاله بي نهايتها
رأجس : والله والسماااني رأجس لو طاحت بأيدي غير بدم رگبتها ما يشفى گلبي
اندار أبوي علي يباوعلي والغصة بعيونة گبل صوتة
محمد : شفتوها خاف يم بيت سمير
عزيز : ماشي انا اشوفن
طلع عزيز بهمة وانا ردلي الامل شلون الغرگان مجلب بگشاية هذا حالي كلش زين أعارف بيها لو تموت ما تطبلهم بس بنفس الوكت ادعي كون
يمهم ولا الراح يصيرلها لو طلعت صدگ مو بالقرية
اسودت الدنيا بعيني من طب يباوع بالوجوه وهاي هي ما ضل كل امل من گال وهو عينة بعين أبوي ال بس الله يعارف بحاله وهو يعزها حتى اكثر مني انا بتة وهي عده وي روحة
عزيز : مو يمهم
وأبوي من حرگة گلبة رد على نوح يطگه ويصيح
محمد : كله منك گلتلك فك نهوووتك مااا تريدك بس ركبت رااااس مو بكيفهااا اخذها وغصب عنها شووف روحك وين وصلتنااا من عنااادك
بالگوات فكوه عزيز وليث من ايده وأبوي وگف يتنفس يباوعله بغضب
رأجس : ابن عمها ونهى عليها شني أول وحده لو أخر وحده مو فقار نهى على بصائر واخذها لو أنت ماتطي ببت البدوية
أبوي باوعله مخنزر بس مايگدر يحاجي اندار على نوح يسب ويغلط عليه يحط حرگة گلبة بي
محمد : خرررب لشتگ ياسگط يا أبن السگط اذاما كسرتك شوف بس خل نلگاها
طب جدي وابوي والولد ضلوا يحوسون ما گدر يصبر اكثر وگاللهم
محمد : امشونه ندورها
عزيز : وين ندورها عمي
هم يريد يطلع
محمد : ما اعارف بس مو مال نضل گاعدين وگاعها ما معروفة وين
طلعوا وراه وانا وميمنة ضلينا حالنه بالظيم وحده تگل للثانية
_ وين مشت
ميمنة : انا اسألج وين مشت
_ جا انا شمعرفني
ميمنة : جا انا الاعارف اسكتي غاية هم مادري شلونج
گمت افتر بالمطبخ الوكت مشى ومن ردوا ما جانت وياهم طش خبرها بالقرية وكلها التمت صعب السوته جفون صعب علينا بس عليها اكثر
طلعتها خلت يومنا اسود والوجوه كلها مغيمة للعصر خبر عليها ماكو وما أحد اندل مكانها
گعدت مهدود حيلي وانا اباوع عليه طب متخبل وامي وراه حالها بالظيم تدور عليها بالوجوه وهو وگف يرعد
صخر : وينكم عنهااا شلوون تطلع وأنتم موجودين
ميمنة : شمدرينة كل ضنه نايمة
باوعلها وطلع باكيت الجگاير من جيبة شغل وحده يدخن هستوه يريد يطلع ودگ موبايل أبوي كلنا فزينة من فتح خط وبعد السلام گال
محمد : شني شيخ يابت تحجي عنها
فتح عيونة وچن أبوي سمع شي صدمة ومن صاح
محمد : جفون بت أخوي شجابها عدك
هو گال هيج ومصايح الولد گب ومن بيناتهم صخر اليتحلف بيها بس جدي يصيح
رأجس : طينت رااااسنة بت البدوية
فرحت لان مابيها شي وهي بمكان أمن بس بنفس الوكت خفت عليها من السوتة شوداها وشدلاها بيهم بالاصل
بس سد الخط هم يريد يطلع وجدي صاح
رأجس : شني ماااشي وحدك
محمد : انا ماشي اجيبنها واردن
رأجس : أخذ واحد من الولد وياك
شمر جگارته وداس عليها وگال
صخر : انا امشي وياك
محمد : لا ضل أنت گوم ليث وياي
ضيرم : شني عمي جا شني الفايده من ضلتنه هنا
محمد : ضلوا يم جدكم
طلع بلايه ما يسمع الأحد بيهم عمامي وجدي والولد واخذ بس ليث وياه گعدت بصف هيوفة الحاطة ايدها على چتف امي تهون عليها سكرها فول
من القهر والخوف على جفون بس بنفس الوكت ما سكتت وهي تلوم بيها ومتحلفة بس ترد الا تطگها
عده الوكت ساعة وساعتين وأبوي وما رد وكلنا گاعدين على نار ومن سمعت صوت الباب انفتح گمت اركض وكل ضني رد أبوي بس انصدمت
من شفتها ريحانة طبت تبجي وبالگوات تمشي حاطة ايدها على بطنها وحالها حال الظيم ومبين صايرة وياها سالفة جبيرة
°ريحانة°
اندار بساع علي وانا صافنة بوجهه سألته وانا گلبي يگلي الجواب راح يكسرني
بس ما اعارف شني الخلاني اردن اسأل مره ثانية وانا عيني بعينه
_ حمزة شجاي تحجي عمتي
بلع ريگة ومسح وجهه وچن يريد يشرد من الجواب لحيت ورديت سألته وهي واگفه تباوع علينا وجنها منتظرة هل وگفة صارلها هواي
خفت حيل وانا اشوفنة ما يحط عينة بعيني صحت
_ حمزززة باوعلي شني الجاي تگولة عمتييي
اجه يريد يكضني وانا تخبلت من شفتة ما جاي يحاجيني ماگدرت اضلن ساكتة لطمت على وجهي وصيحت
_ لا تكضنيي جاوبني راااح اتخبل اذا ضليت ساكت
رد ليوره
حمزة : بس اطي مجال احاجيج
وانا گالي هيج لو تخبلت خبلني بالزايد واحسن هاي هي الي براسي صح انداريت اباوعلها وانا أرجف وهي واگفة چن فلم گدامها وتباوعله ابد ماتدخلت ما تريد تفوت لحظة من الوكت الأسود هذا
رديت اسأله وانا شيعت جنازتي گبل جوابة
_ متزوج علي حمزة
بلع ريگة اكثر من مرة الحجاية ما تطلع وياه يعارف لو جاوبني ما راح اضلن دقيقة يمه
_ احجي حمززة متزوج مووو
هز رأسة ب أي كضيت بطني بساع من حسيت شلون الشي طگ بيها اجاني من شاف حالي انگلب وانا ادفع بي ماريده يكضني
_ لا تتقرررب وخر مني
حمزة : بس اسمعيني ريحانة والله ما رايدها
لطمت على وجهي بأثنين اديه من حرگة گلبي لو احرگ امه مثل ما احترگت انا هسه هم ما تطفى ناري
_ حاااامل ماتريدها وحامل شلوووون
حمزة : تزوجتها علمود الجهال والله والله گبل لا تطلعين حامل تزوجتهااا
_ ليششش حمزة مو گلتلك ما بي شي والله ما جان قاسملنه ليش رحت تزوجت
عيونة يحجلي شگد مقهور بس بهل وكت لو يصبن دمع ما راح اصدگهم كلهم كسروني كلهم
حمزة : هاي امي والله خطبت ومشت وانا كلشي ما ادري وبعد ما گدرت احجي
بشرى : كافي تبررلها امشي لمرتك جابت هسه
حمزة : شنييي سالفتج يمة اعوفنها بهل حال وأمشي
بشرى : جا ذيج جاي تطلگ وهم الها حگ عليك مثل هاي
ضحكت بقهر وانا اصفگ بأيدي
_ طول عمرج ما ترديني ارتاحي راح اطلع من البيت واطلع مو بت أبوي اذا رديتله
بشرى : دولي أنت واهلج الخابصتنة بيهم
هزيت رأسي وانداريت اجرن عباتي اللبسها وهو أنهار يصيح ما يريدني اطلع لان يعارف كلش زين بعد ما اردن انا محذرته وگايلتله من يسوي شي يكسرني
بس اليوم كسرني وخلاني اطلع من البيت دمعتي على خدي
نزلت الدرج وهو وراي يصيح
حمزة : والله ما اوديج
وانا امشي وامسح دموعي البعد ما اگدر اكضهن اكثر بعد صيحت
_ لا توديني انا مشي وحدددي
طلعت من البيت وانا احسن بالوجع ينهش بروحي نهش هستوني اريدن اطلع الفرع وسمعت صوت سيارة تدگ هورن وراي انداريت وانا من الدموع ما اشوفن منو بس عرفتها هاي سيارة منتظر صعدت بلايه ما احجي وبس صوت شهكتي كاسر الهدوء طول الطريق هو ساكت ومن وصلنا گبال باب بيت اهلي وگبل لا انزل گال
منتظر : اعذريني خوية جنت اعارف وما حجيتلج لان مو من حگي اگلج
_ العتب مو عليك رجلي الظم علي وعيشني طول الوكت بجذبة
منتظر : امانة الله امي جبرتة
امسح بدموعي وارد عليه
_ هاي مو حجة خوية لو واگفة بعينة انا جان ما رضا
دار وجهه حاير شني يحاجيني ومن شافني مشيت حرك السيارة وطلع من القرية دگيت باب بيت اهلي بس ما بيهم احد طلع مشيت لبيت جدي وانا بحياتي ما جنت متوقعة اجيهم بيوم وانا هيج اجرن بروحي جر توقعت الدنيا كلها تكسرني بس حمزة لا جنت مستثنية جنت اگولن الوحيد مصبرني على عيشتي الما تنحمل يم عيالي بس نفسة هو الحاملة كلشي لخاطرة بسببة اليوم طلعت وانا حايرة بوجع روحي لو وجع بطني السببهن هو
°غاية°
ركضت اريدن اسندها من شفتها راح تطيح وبس وصلت الها ذبت ثگلها علي تشكي ودموعها مغرگات وجهه وانا ما مفتهمة شي غير بس جم حجاية تحجيهن بشكل مو مرتب والا ركزت كلش وياها يلا عرفت شني الجاي تگولة
ريحانة : كسرني حمزة
التموا كلهم ما فاهمين شي مثلي گومتها انا وميمنة طببناها جوه لمتها عمة بحضنها تسأل بيها
نجوى : شصاير يمة احجيلي شبيج وگف گلبي والله
اطتنه الصدمة الما متوقعيها ابد من گالت
ريحانة : حمزة طلع متزوج علي يمة
بجت بحرگة والولد تخبلوا يردون يمشوله وعمامي يصيحون وراهم وهم ما يشوفون بعيونهم ولوما جدي صايح بيهم ما جان ردوا
رأجس : هيدوووا رجال تزوج والشرع محلله اربعة ترحون تهدون عليه شني ماتستحون
صيحوا شايطة ارواحهم من القهر
ضيرم : خله يتزوووج بس مو بالسر اختي عده مو لعبة اكسررره والله وابجيه دم اكثر من دموعها الطاحن بسببه
عزيز : بالعباس من باجر اطلگج منه واشوف يا گواد يردج اله
رأجس : شني هي بكيفك
عزيز : جا شني جدي لو يموت ما تردله
رأجس : بكيفها هي اسألها مو تتصرف من راسك
اندار عليها
عزيز : ترديله
صفنت بوجهه وكضت بطنها هزت رأسها ب لا
ريحانة : ما اريدنه الچذب علي ما يصيرلي زلمة بعد
باقر : گولي يا الله بوية جا وابنج
ريحانة : يربه عدي حمزة ما اريدنه بعد بوية
رأجس : هاي هي التريدينه يجرالج
ردت ضمت روحها بحضن أمها وكل شهكة تطلع منها تخليهم يتخبلون اكثر ويتحلفن بحمزة كلساع ضيرم يريد يمشي ويكضه برهان وأخر شي من سمعها تشكي لعمة وتبجي بحرگة ما گدر يصبر اكثر
وطلع ركض وراه برهان ولحگة عزيز وگلوبنة صارت نار سالفتين وحده اقوى من الثانية بيوم واحد
گعدت ع الدرج بصف حواري وانا افكر ليش لهسه أبوي ما رد نار گلبي عليها شنو الصاير وخلاه هيج يتأخر
باوعت على أمي حالها مو اقل من حالي القلق ضل تارس ملامح وجهه وما عولت أبوي يرد
واشوفنها بس ما جانت وياه رد أبوي هو وليث وجفون مو وياهم احس الخوف ترس گلبي
وكلهم يسألون ليش ما ردت وهو باوع بوجه نوح الواگف بصف جدي
محمد : شيخ خزعل گال لوما فكيتوا النهوه ما اردنها وياكم
توسعت عيون جدي بصدمة وبنفس الوكت ترس نضراتة الغضب
صيح
رأجس : شني هل حجي ،بتنه بكيفه ما يردها وياك
محمد : يگول دخيله عدي وهذا شرطها ولوما تنفذ
ما يردها
فر سبحته بغضب ونتر
رأجس : وأنت رديت وخليتها على راحتها ما سحلتها من عباتها ورديتها وياك
صخر : لو مااخذني وياااك بوووية
محمد : يعني شراح تسوي لو ماخذك تطبلها جوه تسحلها
يوسف : يعني ما شفتها
محمد : لا ابد ما رضا الشيخ
يوسف : غيررر حجي هذا
رأجس : ردت وسوت بينة سواية أمها ونزلت روسنة مثل ما سوت البدوية وغير بدم رگبتها ماتنغفر طلعتها عدي وانا أبن الغضب
ماكو واحد حجة وضلوا واحد يباوع بوجه الثاني محتارين بقراره ومن بينهم وبعد سكوت مميت گال أبوي
محمد : انا ولي امرها انا هنا بمكان ابوها واقرر شأسويلها مالكم كل حگ عليها
عگد حاجبة وبنفس الوقت تقدم يمشي حرف حرف نطق من وگف گبال أبوي
رأجس : يعني شني قصدك وضح
محمد : يعني انا الاقرر شني مصيرها بعد الصار انا هنا ابوها ترضون ماترضون مصيرها بايدي انا
خزرة جدي ووجهه انگلب گلب وابوي خله وطلع بساع من حس بعد جدي ما يگدر يكض روحه وانا بهل وكت عارفت لو أبوي ضال واگف گدامة
حتى يطگه وما يرفله جفن ولا چن ابنه الچبير
°هيوفة°
مشيت اشوفن أمي گبل لا ارد لان كل بالي يم بصائر ما ضل أحد يمها فتحت باب الغرفة وطبيت شفتها متمدده گالت تعبانة من الدرب وأجت هنا حتى ترتاح
حاجيتها حتى امشي
_ يمة انا راح اردن رايده مني شي
رديت احاجيها من ما حاوبتني
_ يمة
وگفت گبالها وانا مستغربة شبساع نامت هستوها طبت
_ شني يمة نمتي
ما ردت علي رديت شغلت الضوه وانداريت من باوعتلها طاح گلبي وانا اشوفنها مغضمة ركضتها وانا اعيط
_ يمة ولج يمة حاجينييي
تخبلت فقدت وانا اشوفنها بهل حال لا تحرك ايد ولا رجل عقل ما ضل براسي اهزن بيها اريدها بس تتحرك وامي مثل الخشبة صيحت ولطمت ما حاسة على روحي عيوني ما تشوف غيرها وما بلساني غير
_ ماتت امي ماتتت
انجريت منها واخوتي اللتموا عليها يشيلوها وانا مفرفحة بين ايده اصيح
_ ضيرم هدددني امشي وياهم اخذوووني وياها عليك الله صخررر
لطمت على وجهي من شفتهم لفوها بالعباة وشالوها ورادوا يطلعون وصخر يصيح
صخر : برهاااان بساعك شغل السيارة
شمر عليه السويج متخردل وطلعوا شايليها هو وليث انداريت وانا بين ايده اباوع على غاية وجها من اللطم يجري دم فكيت روحي منه ومشيتلها وانا صوتي رايح لميتها بحضني وهي انفجرت تبجي ما اعارف اهون عليها لو على روحي
عدلت شالها وانداريت على صوت عمة
نجوى : هوني على أختج عمة مو الچبيرة أنت
شيماء : تقوي يمة لخاطر اخيتج
هزيت راسي ب أي والدمعة واگفة بطرف عيني
_ ما شفتنها شلون ميتة
نجوى : لا اسم الله مو شفتي أخيج گال بيها نبض
شيماء : ترد والله بس كفي بجي
غضة : مسحي دموعج ولج حبوبة هديتي حيلي عليج
سكتت ابلع بريگي بلعومي تجرح گمت احوسن طلعت من الغرفة وانا احسن بروحي مخلوبة مني شعوري مايتسولف ولا الحجي يكفي حتى يوصف شحسيت وانا اشوفن امي بهل حال گدامي بس كل العارفتة انا جاي اعيشن اصعب وكت بحياتي كلها
طلع ضيرم لحگهم وما ضل بالبيت يمنا غير بس جدي
طلعت بالحوش اجرن بالنفس بالگوات واباوع للباب وگلساع يتراوالي راح تطب امي تمشي على
حيلها ازرع الامل بروحي بالرغم من حالها ابد ما جان طبيعي
حطيت ايدي على صدري اريدن اتنفس عدل وعيني ابد ما نزلت من الباب وطفرت من شفتة انفتح
وطب فقار يركض وما يشوف بعيونة حتى ما شافني
وهو يصيح وانا وراه وهو وجهه صاير اصفر چن واحد مهبوط
فقار : يمة.. عمة
طلعلة يتراكضن طاح گلبي وزاد همنه من سمعنا الخبر وهو يحط ايده على ركبة ويدنگ فحطان عمة وگفت گباله تسأل والخوف بنبرة صوتها وكلنه احنا نريده بس ينطق مو ثواني چنهن سنة بين ما يتنفس
نجوى : خااايب احجي شكو ولك يمة فتيت گلبنا
بلع ريگة اكثر من مرة
فقار : امشيلها يمة وتعارفين استحي احجي بس فدوه بساعج
من سمعت الگاله بالگوات حجت وهي تسند روحها على الحايط
شيماء : خااايبة بركة جيبي عباتي بساع
طبيت بساع اللبس عباتي والطم وي روحي شلون خليتها وحدها وما مشيتلها بس والله انشده بالي ب أمي وما دريت حتى بروحي
طلعت من الغرفة امشي بساع ومن شفتها تريد تطلع صحت
_ اوگفيلي ميمنة امشي وياج
ميمنة : بساااعج
مشيتلها وطلعنا انا وياها وگلبي صاير نار على بصائر طبيت بساع ادور على الصوت من سمعت الصوت جاي من الحمام مشيت وانا ادگن الباب وميمنة وراي
دگيت الباب وانا احجي
_ بصائر هنااا
ما ردت علي وشوي وانفتح الباب وطلعت وعمة شيماء وراها كاضتها من ايدها وهي حتى حيل ما بيها حتى تمشي
ميمنة : شكوو يمة شبيهااا
شيماء : صاير عدها نزيف قوي
فتحت عيوني خايفة وباوعت لميمنة
ميمنة : اسم الله ليش
شيماء : ما اعارف والله كون ناخذها للمستشفى
ميمنة : جا لازم تمشي
مشيت وراهن للغرفة وانا حجاية ما حاجية صافنة بالحال الانگلب گلاب مصيبة اقوى من الثانية وبدتها طيحة بصائر وبدت المصايب وحده فوگ الثانية ما اطنه مجال حتى نتنفس من امس لليوم انسبلت راحتنا وهاي بس البداية جانت
طبينة للغرفة وعمة نجوى جانت تعدل بالفراش اندارت تحجي من شافتنة طبينة
نجوى : جا هي هيج عيون فقار شجاج انگلب حالج گلب وحتى وليدي انشده باله
أبتسمت بتعب وكضت الحايط ومبين عليهاا داخت انا ركضت اريدن اسندها بس سبقتني ميمنة
من كضتها بساع من ايدها ذبت ثگلها عليها وگالت
رغم تعبها ما گدرت ما تداهر
بصائر : مقهوره علي لو على ابنج عمة حددي
نجوى : لا والله مقهوره عليج لان اعارف من تتعبين وليدي هم يتعب
على نفس ابتسامتها هزات رأسها ب أي مشتها ميمنة للفراش مددت وهو طب يباوع عليها قلق باوعتله واشرت بمعنى تعال عدل شعره بأيده ومشالها وهو عيونة تسولف شگد خايف عليها
گعد يمها ثاني ركبتة ،رجع خصله شعرها ورا اذنها
فقار : اخذج للمستشفى
بصائر : لا ما يحتاج
نجوى : لا مو بكيفها اخذها لان هواي نازفة
رد باوعلها يقنعها
فقار : بس نشوف شبيج ونرد
بصائر : مو تعارف روحي تلعب من طاري المستشفيات
فقار : ميخالف لخاطري هل مرة امشي
اخذت نفس وهزت رأسها وهو دنگ بأسها من گصتها وطلع اريد احجي واشارك وياهم ما اگدر كل بالي ضال يم أمي وشوي واجه فقار اخذ بصائر هو وعمة شيماء للمستشفى لحيت امشي وياهم بس گال ماشين لغير مستشفى مو نفسها الامي
بيها همي صار همين افكر بأمي لو ببصائر المن گد ما نزيفها قوي حتى فراشها الجديد تدمر
غسلته ميمنة وردينه لبيت اهلي بس طبيت طاح گلبي من سمعت صوت عياط وما اجه
براسي غير امي طبيت اركض والعباة طاحت مني ماگدرت اوصل للصاله وطحت بالمطبخ ابجي وأصيح
_ ولج يمةةة
°غاية°
گمت اريدن امشيلها صوتها بالمطبخ تعيط ركضت بس رجلي ما عانتني وطحت ومن قوة الطيحة الصارت على وجهي حسيت عظم خشمي طگ بس رديت گمت من اجتني حواري تگومني وهي ترجف من طيحتي القوية وانا كل بالي يم هيوفة وركضت بكل ما عدي من حيل واشوفنها تلطم
على صوتها الكل التموا وبس نريد نعارف شكو وانا لازگة بيها اتوسل تگلي اني شبيها
_ امي هيوفة شبيهااا ولج احجي
وهي جنها مو وياي فاقده كلش طگتها ميمنة على خدها وصاحت بوجها
ميمنة : اصحييي عمة مابيها شي هيوووفة شو باوعيلي
باوعت بوجه ميمنة وسكتت وبنفس اللحظة تگلبن عيونها مغمي عليها بجيت وانا احط رأسها بحضني
وعمة خالدة بساع رشت بوجها ماي وهي نشغت وكضت ايدي حيل ترجف مثل السعفة واول ما ردت فتحت عيونها سألتني
هيوفة : غاية امي شبيها
وهنا عارفت هي ما تعارف بالصار وانا كل ضني من سمعت عياطها جذبوا علينا
وامي صارلها شي مسحت وجها من الماي وانا ابجي حاجيتها
_ سكرها صاعد صحت والله وراح يردوها
گعدت على حيلها بساع ما مصدگة الاگولة كضت ايدي تحلفني
هيوفة : عليج الله
بعدني اريد احاجيها واحلفلها امي سالمة بقدرة قادر وكضتني دوخة من هاي الزينة بحيث كضيت باب المطبخ وانا احس الگاع تفتر بي وما احس غير الدم تلف وجهي وهدومي
°هيوفة°
انصدمت من شفت خشمها ينزف بشكل خله كل خليه بجمسي توگف تربطت ايدي ما اعارف شني الاسوي الها وهي بايد كاظة الباب وبالايد الثاينة كاضتني
انا روحي ما اگدر اعينها واوگف ولا البي اعينها گومتها ميمنة وحواري غسلن وجها وجدي واگف يباوع علينا حتى هو قلق من وضعنا كلساع وحده طايحة مو يوم اسود سكنه بي المستشفيات
ما وگف نزيف خشمها ابد مو مال أضل ساكته حاجيت جدي خابر على صخر حتى واحد منهم يجي ياخذها وانا بساع طببتها للغرفة
اطلعلها هدوم وكلساع منداره عليها اشوفنها كاضه الوصله على خشمها وراده ضهرها على الحايط مشيت يمها وانا بايدي الهدوم فتحت عينها باوعتلي بدلتلها بساع ولفيت شالها وطلعنا وانا حتى عباتي بايدها
وشوي وطب ليث مستعجل وهي لبست عباتها وباوعتلي
غاية : تمشين وياي
باوعت ل ليث هزلي رأسه ب أي وگال
ليث : بساعج البسي عباتج
بلايه ما احجي مشيت ادور على أي عباة تجي گدامي لبست ولحگتهم صعدنه بالسيارة وانا ادعي بس يعدي كلشي على خير الزراگ الداير مداير خشمها خوفني
بس وصلنا تلگونه الولد نصهم ضالين بره لان ما يخلوهم يطبون حاجاهم ليث وطبينه نمشي وراه وهو گدامنا لنص الدرب لاگانه صخر يمشي
مستعجل من شافنة عگد حاجبة وبساع اجه وگف گبال ليث
صخر : المن جايب هيوفة
ليث : غاية رادتها وبعدين رجلها بره ما حجه أنت شدخلك
صخر : اكل تبن شني شدخلك جا غير اخوها
ليث : صح حگك
باوع لغاية عاگد حاجبة
صخر : شطيحج ولج
غاية : هبطتني هيوفة تعيط وتبجي عبالي امي بيها شي
صخر : جا مو گلنه بس يستقر وضعها ترد
غاية : اندري انا خفت
صخر : امشي اخذها بساعك وجهه جاي يورم
ليث : أنت وين ماشي
صخر : هسة اردن ،بساعك اخذها
ما حاجاه واندار علينا
ليث : امشن
مشينا وراه للطوارئ وبس طبينا ع الدكتور حولها على الاشعة وبس اخذولها الاشعة توسلت بي نمشي الامي بين ما تطلع مشيتلها وانا مفرفح گلبي على شوفتها بس وصلنا لغرفتها جان يمها الدكتور يحطلها كانونة وصخر واگف يمه ما صدگت شوكت يمشي الدكتور حتى اتقرب يمها
وبس طلع و مشى وياه صخر انا گعدت گبالها ابوسن بأيدها وهي تباوعلي بتعب وعيونها بالگوات فاتحتهن
طاحت دمعتي وانا اگلها
_ ريت من عافيتي على عافيتج طيحتي گلبي بطيحتج يايمة
رفعت ايدها تمسح على راسي وانا انهديت بالبجي فرغت شكو خوف عشتة بهاي الجم ساعة
ووي دمعتي ما نشفت دمعة غاية وهي لازگة بأمي من الجهه الثانية ولوما مگومني ليث فلا جان سكتت
مسح وجهي بعباتي
ليث : كافي ياخوية عيونج الحلوات تعبن
_ متت ليث والله متت لو تشوف گلبي شصار بي
ليث : سلامة گلبج يابعد أخوج بس كافي هاي امنة كلشي مابيها وراح ترد ويانه
هزيت راسي وانا احمد الله واشكره كلشي يهون بالنسبة لسلامتها كلشي سهل والاهم عدي هسة هي گدامي
عدل عباتي على راسي مبتسم يباوعلي يحاول بأبتسامتة يسحب شوي من خوفي ،بست ايده الحطاها على خدي وهو جرني لصدره يبوس راسي ويحجي
ليث : انا الابوسن ايدج روحي أخيتي
حجايتة خلني بنص ذاك التعب أبتسم وخرت اباوع لامي تباوعلنا وابتسامة خفيقة على وجهه
ومن صار وكت يستلم الاشعة گال انا اضلن هنا وبس غاية تمشي وياه وانا ما حجيت لان صدگ اريدن اگابل امي
هي نامت وانا ضليت مگابلتها وگاعده واگولن بگلبي
_ شلون لو ما طابتلها جان شصارلها
رفعت راسي من انفتح الباب وطب صخر سده واجه يمشي گعد ع الكرسي ساكت يباوع الامي وكل حسرة يجرها ولا الثانية
تشجعت وسألته
_ بيك شي خوية
جر نفس طويل وهز رأسة بلا وانا بعد ما لحيث وسألته ضلينا ساكتين لا هو الحجه ولا أنا منا لمن طب ليث هو وغاية بس وجهه ما جان طبيعي مگلوب گلاب
گمت وانا اسأله
_ بشر ليث شبين بالاشعة
بلع ريگة واندار يباوع لغاية وذاك هو مبين اكو شي وهل هيج القلق مبين عليه
صخر : ما تحجي شبيك
ليث : الدكتور يگول مبين عدها كسر رغم الاشعة مو واضحة وتحتاج عملية بأسرع وكت
لطمت على وجهي وانا احاول ما اطلع صوت لا تفز امي وتنهبط
صخر : شني السالفة يمسلت هذا الدكتور
ليث : لا ما يمسلت ويگول الزراگ البوجهة أكبر دليل على الكسر
صفن حاير باوع لغاية الحاطة الاكلنكس على خمشها
صخر : يعني شنو
ليث : عملية هاي هي
صخر : استغفر الله يا عملية رحمة لمادري ياهو وهي منا گلبها شلونة
ليث : ما اعارف صوتك لاتگعد امي
هز رأسه وباوع لغاية حاير مبين عليه خايف بس ما يعارف شلون يعبر عن خوفة عليها ومن حيرته خله وطلع بره وانا خاف ارتاحيتلي شوي بشوفة أمي بخير هنا ردلي القلق واكثر بعد وانا افكر شلون تسوي العملية وهي دگات گلبها مو طبيعية و وضعها مو مال بنج
من سجلوا الامي خروج ردينا كلنا للقرية ويانة امي ذبحوا جوه رجليها ديج وطبت للبيت وچن ردتله الحياة كلها گبل ساعات چنت اشوفنة جحيم وهسة اشوفن كلشي رد بي مثل ماهو بگعدتها بنصنه
ملتيمن كلنا بالغرفة داير مدايرها والزلم كلهم بالصالة والهسه محد يعارف بسالفة العملية وكلساع وحده سألتني واگلها بعدين احجيلج خل ارتاح بس بالواقع انا اخافن لا امي تسمع وتنتكس حالتها رغم العملية ومثل ما گال الدگتور لازم نسويها باسرع وكت
صفنت حايرة كلهن يسولفن وانا ساكتة ما اگدر احجي وافكر شلون راح نگلها وهي بهذا الحال صعب احجيلها وصعب بنفس الوكت غاية تضل اكثر
بالشافعات يلا النزيف وگف وهو لو حركت ملامح وجهه يرد سوده علي ضاله مثل الصنم جامده تخاف لا يرد ينزف
فزيت على اثر اصبعها من دغتي انداريت اباوعلها همست
ميمنة : شبيج
دنيت روحي يمها كلش ما اريدن احد يسمع وبسبب ردة فعلهم تنبهط امي
_ غاية يحتاجلها عملية ولازم بأسرع وكت وانا حايرة شلون نحجي لامي
وسعت عيونها بخوف
ميمنة : لا عليج الله
_ ميمنة والله راح اموتن
ميمنة : اسم الله عليج ياروح ميمنة جا لازم تصيرين سباعية لخاطرها من تشوفج قوية تتقوة بيج أنت أختها الجبيرة
_ يا جبيرة هو غير اليوم اخذ ثلثين حيلي وما جاي يخلص
ميمنة : الحمدلله مو تعودنا نگول الحمدلله على كل حال
جريت نفس طويل وردتت
_ الحمدلله على كلشي
ميمنة : جا گومي وياي
_ وين
ميمنة : نشوف بصائر گبل لا تجون بشوي ردوها للبيت وانا التهيت
گامت وجرتني من ايدي حتى اگومن عدلت حجابي وطلعنا انا وياها بس شافونة لابسات العبي ثنينهم بنفس الوكت صاحوا
ضيرم : وين
صخر : وين
باوعنه وحده بوجه الثاينة وهم گاموا وعبد الحق صاح
: شو لابسات العبي بسلا راح تهجن بدال امهاتنة
ليث : ماتضحك
عبد الحق : انجب محد مضحكك أنت
ليث : راح احترمك
عبد الحق : وغصبا عن تضل طول عمرك محترمني
ليث : خاااب جيبولي نعااااا
بعده ما مكمل وصاح
عبد الحق : شنييي
ليث : نعاامة شبيك
خزرة ورد يباوعلنا واحنا واگفات ويحجي موجه الكلام لضيرم وصخر الواگفين گبالنه
عبد الحق : نسوانكم راح يهجن منكم نصيحة حافضوا عليهن
ليث : شوف منو يحجي
عبد الحق : ما يگدررر اذا ما يحجي بي دوده
ليث : خرااا على الجم يوم البيهن أنت اكبر مني
عبد الحق : لو يوم واحد لازم تحترمني
ليث : بالعباس اذا تضل تصيح احترمني فلا احترمك
حجت ملانة من وگفتنة
ميمنة : هسة شلون نمشي لو لا
ضيرم : والله لهونة بسوالفهم حتى نسيناچن
ميمنة : اريد امشي لبيتكم اشوفن بصائر
صخر : امشن انا اوصلچن
ضيرم : عينك على أختك اقصد مرتي
اندار عليه خازرة وانا بنفس الوكت خازرته ضحك وندار على الولد واحنا مشينا ،بس وصلنا رد وانا
طبينا انا وياها جانت يمها عمة شيماء وبركة وعمة نجوى من عرفت امي اجت لبيت اهلي
نزعت عباتي وگعدت اسأل بعمة من شفتها نايمة
_ هااا عمة بشري ما صارت احسن
شيماء : لا والله مو زينة الدكتورة گالت اذا تضل على هذا النزيف نحطلها دم
فتحت عيوني خايفة
_ لا صدگ
شيماء : أي والله ياعمة
ميمنة : زين يمة ما عارفتوا سبب النزيف
شيماء : الدكتورة تگول الرحم تعبان والطيحة مأثرة عليه هواي
ميمنة : جا ما اطتها شي يوگف النزيف
شيماء : أطتها سوده علي كله إبر متشوفيها هل نايمة لان گالت الدوة بي منوم
ميمنة : بلكت الله عليه تصير زينة
شيماء : علواه
_ زين عمة ما وكلتوها شي
شيماء : جاب فقارها بالمستشفى وتوسل بيها تاكل وهي ماتگدر تگله ازوع بس اكل
ميمنة : جا شلون تضل بلايه اكل
شيماء : بلكت من تگعد الله يهديها وتاكل
ضليت اباوعلها مقهورة ذبلانة كلش ولا چنها ذيج بصائر على گولتة وجهه يضوي صايرة هيكل عضمي بس النساوه هواي اخذت منها
گمت اريدن اسوي شي الها حتى بس تگعد تاكل بس طبيت للمطبخ لحگني ميمنة وبركة ضليت انا افتر وهن يحجن...
