رواية خلخال مشوه الفصل الثامن والعشرون بقلم زمرده
أماشيك بغلط
وذنوب فوگ ذنوب
وأشيلن ذنبك
وأدري علي محسوب
على الفطرة ويحب
شيقنعة گلبي يتوب
_ نوح لگيت جوه الچربايه بطل عصير خربان ذبيته ،چن صاير اكسباير ،شلون تشربه
فتح عيونة واندار على صخر يبلع بريگه ،وانا ضليت اعيدن بالگلته ،ماكو شي غلط حجيته شبيهم وجوهم انگلبت ،وبنص صفنتي فزيت على صوت الراچدي
الضربه صخر لنوح وصوته دوه بنص الصالة ،نزلت
اركضلهم ،انا هلگدوتني يمهم حاطه روحي وياهم ما اريدنه يرد يطگه وهو كاضه من
فالينته يعت بي شايطة روحه على شني ما اعارف!
وجهه بوجه نوح ،بالگوات مسطير على صوته ما يعلى اكثر بعد
صخر : لك طاااايح الحظ ،تجيب السم بنص البيت لك شسووويلك ،ادفنك ،لك ادفنك عمنك صرت فد واحد سرسري
وهو بايده مستلم ،حتى ما دافع على روحه ومن حرگة گلبه رد ضربه راچدي
صخر : هذاا حتى تصحى يا سكيرررر ،لك اموتك
كون اموتك
نوح : صوتك
صخر : وهذا الهامك ،صوتي ،ما تريد احد يعااارف
تخاف لا تنفضح موووو ؟
نوح : هسة ليش تصيييح
صخر : والله يجوز لان حظرت جنابك صرت سكير
نوح : كافي تگوول سكيررر
صخر : جا اليشرب هذا السم شيسموه ؟
نوح : لا اله الا الله ،لحيت
صخر : امس وين چنت بالليل ؟
نوح : يم ليث باليگعان
صخر : لا تچذب
نوح : ما مچذب
رافعله حاجبه وچن واحد يعرف الحقيقة بس جاي يساير ،اباوع عليه ما يگدر يثبت بمكانة وما اعارف شني الخلاه يصبر هيج
صخر : يعني چنت يم ليث مو ؟
نوح : أي
صخر : وانا امس ليش من مشيت يمه ما لگيتك ؟
بلع ريگه مرتبك وحك شعره
صخر : وين چنت نوح ؟
نوح : يم الكحيله وهيلانه ،بالمربط هل ما شفتني
صخر : وانا اول شي چنت بالمربط
نوح : تحقيق لو شني ؟
صخر : امس وين چنت ،احجي لان بالگوات كاض اعصابي وما مارد ملامح خلقتك الزفره
نوح : يم صاحبي
صخر : يا صاحب ؟
نوح : ما تعارفه
صخر : وانا من شوكت ما اعارف صحبانك ؟
نوح : هذا جديد
صخر : جا عرفني عليه
نوح : شسالفه صخر ؟
خزره وباوعلي
صخر : شو شوفيني البطل مال عصير
اشرت على العلاگه على الدرج ،مشى بساع دنگ يبحوش بيها ،وشوي ورفع البطل يباوع عليه مبتسم بس ابتسامته حسيت وراها مصيبة ما تنحجي وما لحگت افكر اكثر من تقدم بأيده البطل وطگ نوح بيه على راسه والگزاز كله ثناثر بالگاع
عطت بخوف من الدم النزل مثل البوري من رأسه وهو من صوتي اندار خازرني
صخر : لمي الگزاز وصوتج لا يطلع
انا حيلي باد من منظر الدم وهو ما گدر يضل واگف على حيله وطاح بالگاع كاض راسه والدم نزل حتى على عيونه
دنگ ثاني ركبته ويحجي وياه بتحذير
صخر : اتذكر هل مره كسرت البطل براسك ،مرت الجاية اكسرك أنت
صحت أرجف من شفته سد عيونه
_ صخر ،عليك الله اخذه للمستشفى ،صخر راح يموت
وهو يباوعله ولا چن الطايح گدامه راح يخلص دمه
_ راح يموت ،والله راح يموت
گام يعدل بردان دشداشته
صخر : عار لا تخافين عليه
_ مايصير هيج والله ،ليش هيج سويت
خزرني
صخر : حجاية ماتطلع منج ،راح اخذه بس لو سمعتج حاجيه الأحد شي ياويلج ،طاح من الدرج
غير هل حجي ماكو
حطيت ايدي على حلگي اهز رأسي لا ،دنگ شاله وطلع ،وانا بنص رجفتي وخوفي تذكرت گالي لمي الگزاز ،لميته ونضفت المكان ورديت گعدت طايح
گلبي من خوف وقهر السمعته لو من القساوه
التعامل بيها صخر وياه ..! !
وعلى گعدتي طبت أمي ،من شافت حالي بهتت
زهرة : اسم الله يمة ،شبيج غاية ؟
گمت وانا امتمت ،شلون راح اچذب عليها ،بس لو حجيت الصدگ شراح يخلصني من صخر
_ ماكو شي يمة ،بس نوح طاح من الدرج وشوي تعور براسه واخذه صخر للمستشفى
لطمت وبصوتها الرچف سألت
زهرة : يمة ،شطيحه ؟
_ اندري
وبگلبي گلت
_ والله لو شايفة صخر شلون طحن البطل براسه چان طحتي بصفه
ضلينه نحوس انا وامي ،وفوگ الساعة الا ردوا بس سمعت صوت صخر بره طلعت اركض وانا اشوفنه طب ساند نوح والولد طبوا وراه يسألون بي شصاير ويعتبون ليش ما گالهم يمشون وياه
صخر : يمعودين قابل شكو ،خيطت راسه وأجيت
عبد الحق : شطيحه ؟
صخر : غاية چانت تنضف والدرج مبلل وهو طاح
فكيت حلگي وعيوني ،حطها براسي ،خزرني من شاف ملامحي انگلبت وبساع عدلتهن من شفت الانظار كلها صارن علي ،طبوا وانا ضليت بمكاني
اباوعلهم ،گعده بالصاله وباوع الامي الگعدت
بصفه شوي وتبجي
صخر : شسالفه يمه كلهن چم خياط ،يومين ويطيبن
زهرة : شجاكم يايمة والله راح تموتوني ،يوميا واحد بيكم صاير بي شي وانا ساعة الساعة واگف گلبي
صخر : سلامة گلبج ،عليمن يوگف على نوح ،والله فلا يستاهل
عبد الحق : أي والله
نوح : شبيكم وياي ؟
فقار : صاحبي مضلوم
باوع لنوح مبتسم بطرف شفته
صخر : انا تعارفني شبي ،لا تسأل
عبد الحق : وانا لازم إأيد حجي چبيرنه
نوح : دواك بس ليث
صخر : غاية
_ هااا
صخر : سويله زقنبوت ،هواي خسر دم
زهرة : يااا يمة ،شني زقنبوت ؟
صخر : اكل يعني
زهرة : جا ما اعارف ،بس شبيك وي أخيك ؟
صخر : هيج اداهره
نوح : أي خطية يحب يداهر
ضيرم : صخر يداهر ،مشوهن على الغرب مو علينه
نوح : دمه صاير خفيف
فقار : اسكت ماريد اضل بلايه صاحب
سكت نوح وانا مشيت للمطبخ اسويله شوربه ،طلعت العدس وانا اصفن وي روحي وافكر بمصيبة نوح وبالسواه ،ماتوقعت بكل حياتي واحد من اخواني يسوي هيج سوايه ،من فتحت عيوني على الدنيا وانا اشوفنهم الصح بكلشي
_ احمم
انداريت وانا اجر بردان دشداشتي الرافعتها
عزيز : الولد جوه ؟
هزيت رأسي ب أي ،وهو مشى يطب ،كملت غسل العدس وخليته ينگع بين ما احمس البصل وانا احس جاي تنحمس روحي من القهر وياه على حال أخوي
ويا درب مشى
طولوا گاعدين جوه وانا بس كملت الشوربة اخذتها اله ،عدل گعدته فقار وگام اخذها مني ،حطها على رجليه المادهن يگله
فقار : اكل اكل ،عيش اللحظه ترا ما تنعاد ،محد يداريك اذا مو مريض
نوح : مو مريض ،تمرضت فعل فاعل مايخاف الله
صخر : ضلت مخافة الله الك
من شاف الكل ركز وياهم باوعلي
نوح : ليش حاطه تايت وي المي ؟
حمحمت اريدن اعرف ارد ،صفنت شوي وگتله
_ جا شلون تنضف الگاع
صخر : مرة الجاية لاتحطين حتى لا تتكسر عظامه
رمشت بعيوني وبس انا ونوح مفتهمين شيقصد بالگاله ،شوي ومشوا الولد كلهم وما ضل غير بس فقار يم نوح وانا گمت حايره وين امشي ،ماعدي
لا قراية ولا شي
°هيوفة°
غسلت ايدي ومشيت للغرفه ،بس طبيت شفت بصائر واگفه تباوع ساكته ،وجده وعمه حايرات شلون يسكتنها وهي داگه عناد
حواري : بعلي اروحن احاجيه ،مو انا الامشي بهاي العادات ،لو مو ابن عمي ما اريدنه گوه هي ؟
غضة : فلك الصابج على هل صوت ،لا يسمعوج اخوانج
حواري : خلهم يسمعون، جده شني تجبروني لو شني ؟
غضة : مو هستوج متخربطه ،ما تهيدين ؟
حواري : ترديني اهيدن وانا مطيني لحق ،لا اريدنه ولا الي هوه بي ،ولو يموت ما ارضى بيه
غضة : فلك الصابج على هل عرامه ،تگج جفون شأترجه منج
حواري : والله تستاهلون ،تردون نمشي بكيفكم
فكت حلگها جده مصدومه من حجيها
غضة : ينگص هل لسان كون
حواري : والله جده اذا ما حليتيها انا اعارف شلون احلها ،اخليه بوجهي ما يباوع بعد والعباس أبو فاضل وگولي ما گالت
غضة : شني تهددين ؟
حواري : أي اهدد
غضة : خايبة باعي نجوى ،باعي بتج
نجوى : ماتعارفيها عمه من تضوج تضل تخربط
غضة : يعني راضيه عليها ؟
نجوى : لا شني ،حق والنعم منه ،بس بتي خبله
نترت
حواري : يمممه
نجوى : وسمه ،اسكتي وكافي تخربطين
حواري : وداعتج ما اسكت ولا عبالكم اقبل ،لو فكرتوا تجبروني والله ساعة ما اضلن بالقرية
عمتي خزرتها وجده طگتها
غضة : نوبة الجاية لو سمعتج هيج حاجيه ،والله وروح أبوي احجي الضيرم واخليه يطيح حضج .
حواري : جا گليلهم انا ما اريدن حق وفضت راحت
غضة : حق ما يهدج ،حطج براسه بعد ،يعني يحبج يالغمه
حواري : انا لا احبه ولا اريدنه
بصائر : احس انقهرت على اخوي
انداريت عليها
_ والله حتى انا
اخذت نفس حايره ،وردت تباوعلها وهي قافله بس يردن يقنعها وماكو ولا تطي لزمه
غضة : امشي للبيت احسلي ،تاليتج على هذا اللسان ما احد يأدبج غير حق
حواري : نجوم السما اقربله بعلي
غضة : شالج علي كون يامفلوكه
حواري : هاي لان انا حواري هيج تحجين لو تحبيني چان صفيتي وياي
غضة : انا اريدن مصلحتج
حواري : وانا هيج مصلحه ما اريدنها
غضة : مو غمه
حواري : لا جده مو غمه ،بس ماريدن لا اضلمنه ولا اضلم روحي
غضة : أي خوش
گامت جده تريد تمشي ،طلعت وراها وهي توصيني اقنع حواري ،بس مشت طبيت انا اسوي بالعشا وشوي وطبت غاية ،نزعت
عباتها و وگفت بصفي عارفت تريد تحجي شي من صفنتها ...!
_ احجي ،بحلگج حجي
غاية : اريدن احجيلج بس حايره
انداريت عليها مستغربة من نبرة صوتها
_ صاير شي ؟
بلعت ريگها ،وانا متابعه حركاتها ،عدلت شالها وباوعت تخاف لا أحد يطب
غاية : شفت بطل مال شرب بغرفة نوح ،وانا كل ضني هذا عصير ،وگلتله گدام صخر
فتحت عيوني مصدومة ،ولطمت على خدي ما مصدگه كل حجاية سمعتها
غاية : هيوفة صخر كسر البطل براسة واخذه خيطه
_ لا عليج الله
غاية : أي والله ،اريدن اموت من القهر ،احس صوچي
_ جا أنت شمدرريج ،ولج من شوكت يشرب من شوووكت ؟
فرفحت روحي ،اريدن بس تطب بعقلي ما جاي اگدر
غاية : جا شمدريني انا ،بس مبين صخر يعارف
حتى ما انصدم
_ يمة ،ولج شلووون ؟
غاية : راح يوگف عقلي هيوفة والله ،شلون هيج يسوي ؟
_ سوده علي ما گدر يستوعب الصار
غاية : جا مو يشرب
صفنت حايره ،حسيت هموم الدنيا طاحن علي بهل خبر هذا ،كملت العشا على اعصابي ،وبالليل گبل لا اصعد لمحت عزيز واگف بالحوش ،ومن ركزت اكثر شفت عبد الحق يمه ،تقدمت حتى اسمع شني الجاي يحجوه
عزيز : لا تلح ،گالتلي ما تريدك وانا ما اجبرها لا عليك ولا على غيرك
عبد الحق : مو أنا صاحبك
عزيز : جا اذا صاحبي اچبر اختي عليك ؟
عبد الحق : شگد خسيس
عزيز : طالع عليك
عبد الحق : صاير ما تنطاق كلش
عزيز : أي اعارف
عبد الحق : المحامي المعقد
عزيز : على الاساس أنت شلونك ،اشوفن نهار كله تتمضحك للهوه ،اشو الوجه مغندب النهار كله
عبد الحق : اكل قنادر
عزيز : اعذرني ما اكلك
عبد الحق : ايا طايح الحظ
عزيز : توكل لبيتكم حق
عبد الحق : شبيك احسنك كارهني ؟
عزيز : احساسك قوي
عبد الحق : ترا خطبت اختك ما خطفتها
ما رد عليه عزيز ،وحق طلع جگاره ورثها يباوعله
عبد الحق : بكل الاحوال الحجايه يم جدي لا يمك ولا يم غيرك بس انا اجيت احاجيك حتى لا يضل بخاطرك مني
عزيز : جا ولي لبيتكم
ماحجه شي وخله ومشى ،ضل عزيز واگف بمكانه ومبين جاي يفكر ،وشوي وطب ضيرم ،من شافه اجه يمه يحجي وياه
ضيرم : شبيك عزيز ؟
عزيز : مابيه شي
ضيرم : شفت حق طلع ،شصاير ؟
عزيز : اجه يحاجيني كل ضنه انا صاير ببالي من سوايته
ضيرم : حق خوش حق ،لا تزعل منه ،صاحبك هو
عزيز : اعارفه ،انا اكثر واحد معاشره ،بس شفت حواري شلون ماتريده
ضيرم : كل ضني توگف وي حق
عزيز : شلون ،جا اصيرن وياه على اختي
ضيرم : انا راضي بيه
عزيز : انا راضي بس هي قافله
ضيرم : الله كريم ،تقنع
عزيز : مو بالغصب الزواج ضيرم
ضيرم : اعارف ،بس انا اريدنه الها لان هو رجال يصونها وابن عمنه نمون عليه بساعه اليحاجيها اگدر اطيح حضه
جر نفس حاير
عزيز : الله كريم ،نشوف وين تصفى
طبطب على چتفه
ضيرم : طب جوه وراك غبشه
عزيز : طب وانا جاي وراك
ماحجه شي وخلاه وحده ،من طب وشافني ابتسم
ضيرم : جا انا ضني بس اختي فضوليه ،طلعت مرتي هم
أبتسمت ودنگت ،كض ايدي وصعدنه فوک ،بس طب وسد الباب باوعلي يمسح على شواربه وانا هاي حركته كلش زين اعارفها ،درت عيوني منه ما اگدر اباوعله وهو اسمع بس صوت ضحكته
ضيرم : ريشتي الخجوله ،حبيبة روح ضيرم ،عشگ صباه
درتله حاطه ايدي على گلبي ،حجاياته احتلن روحي
ضيرم : اروحن فدوه لعيونج
رجفت اطرافي من شالني محتضن شفايفي بين شفايفه ،نزلني على الچربايه ،وضحك من غطيت وجهي وبهاي حركتي زاد ما نقص بسوالفه
ساعات يحب يعيشهن وياي مثل ما يگول افصل عن الدنيا
ختمها ببوسه على راسي وانا نايمة على صدره همس
بصوت ذبلان
ضيرم : أحبنج
أبتسمت ورفعت روحي
_ انا هم أحبنك
ضحك ورفع راسة طخ خشمي بخشمة
ضيرم : العمر گبلج فراغ ،وكل يوم وياج عالم كامل
ضحكت فرحانه بحجاياته ،ورديت احط راسي على صدره ،او الاصح ،گلبه ،نمت گبله وما فزيت غير من نزلني يريد يمشي لدوامه ،اندار باوعلي
ضيرم : ردي نامي حبيبتي
تحركت اريدن اگوم
_ اسويلك ريوگ ،شلون تمشي جوعان
ضيرم : ما اريدن ،ردي نامي لا تهمين
حطيت راسي على المخده اباوعله ،گبل لا يطلع دنگ باسني ومشى ،وانا رديت غفيت وما گعدت غير على صوت دگة الباب وصوت بصائر
_ تعاي
فتحت الباب مبتسمة
بصائر : شني السالفة أول تالي تنامين للعشرة
_ امس نمت متأخره
بصائر : طلعت للحمام وسمعت صوت ضحكتج عارفتكم سهرانين
أبتسمت وهزيت رأسي ب أي
_ صار هواي ما سهرانين هيج ،المشاكل سطرتنه
بصائر : أي والله ،تنزلين تتريگين وياي ؟
_ يوميا احجي عليچن لان تتأخرن بس انا اليوم وياچن
ضحكت
بصائر : هي الدنيا دواره
أبتسمت وگمت اللم بشعري وهي تحجي
بصائر : اريدن امشي الاهلي ،اباتن بس اعارف فقار ما يرضى
_ احلام العصر هاي
بصائر : والله اخافن عليه من اشوفنه هيج ،ما اريدن هيج يتعود علي ،غلط
_ لو تحجين للصبح هم مايفيد وياه ،يگلج أي ومن تردين تمشين الاهلج ما يخليج
بصائر : تدرين بالمستشفى والله بالليل يبوگ روحه بوگ ويطب يمي بس حتى يكض ايدي وينام
حطيت ايدي على خدي
_ فدوه
بصائر : والله هيوفة من حبلت يگلي مو تحبين ابنج اكثر مني ،وگف عقلي لان يحجي صدگ الا يبين عليه يشتاقه
_ وأنت شبيج هيج ضايجه ،غيرج يفرحن
بصائر : ما ضايجة ،بس خايفة عليه ،الدنيا تخوف اخافن عليه لان ما ندري بالمضموم شني
_ گولي يا الله وكلشي مايصير ،وامشي ننزل
هزت رأسها وانا لبست شالي ونزلنه سوه ،وبس شافته حواري ،رفعت ايدها تأشر
حواري : بصائر اخوج اذا ما فك مني اذبحنه والله
بصائر : امشي گليله انا شدخلني
حواري : أنت اخته وگليله ،انا ما احجي وياه
تحاجيها مبتسمه
بصائر : لا أنا مو اخته ،تبريت منه
خزرتها ومشت ،هزيت ايدي وباوعت لبصائر تسوي بايدها حركه مخبله
بصائر : الله يعين گلبك ياحق
_ مبين هواي راح يتعب
بصائر : هو الحط روحه بهاي النار ولازم يتحمل
_ أي والله
مشت للمطبخ وانا وراها ،سوينه الرويگ المتأخر اليوم وياهن صرت،وشلت الصينية انا ومشينا لغرفة البنات الباب جان مفتوح طبيت وحطيت الصينية گبالها وگعدت
_ تاكلين ويانه بلايه حجي
ريحانة : اهوووو
_ لا اهو ولا شي اكلي وفضينه
ريحانة : ما اريد لا تجبريني فدوه
طبت بايدها قوري الجاي حطته بالگاع تحجي وي ريحانة
بصائر : جا شني تضلين هيج ؟
ريحانة : خايبات والله ما اگدر
_ عليج الله لخاطرنه
صفنت حايره وحواري هزت ايدها تدردم
حواري : اكلي توسلن بيج ،هاي انا صار ساعة اباوعلهن محد گالتلي تعاي اكلي
ضحكت وانداريت الها
_ تعاي اكلي
حواري : لا زين من حجيتي لو ضاله لباجر
بصائر : انا زعلانه عليج
حواري : زعلتهم
غمتها
بصائر : امداج مو خوش مرت اخ
حواري : شلون راح اگومن اصب قوري الجاي عليها
بصائر : حتى اخلي اخوي ما ياخذج
حواري : خفتا وراحه
بصائر : مو صوجج ،صوجه
حواري : أي والله
ضحكت وصبيت جاي الريحانة احاجيها
_ اكلي
ريحانة : شأحجي جاي
بصائر : خاب شبيچن تعلن الگلب ،مو حموات چن حياية
ريحانة : ياااا
أبتسمت
بصائر : اكلي حتى يصير بيج حيل حبابة
حواري : يصير بيها حيل مو هي تطلع للگيعان وي ليث
رفعتلها حاجبي مبتسمه
_ الگيعان بس الأخوي عيني
بصائر : ماخذهن فلاحه ملاجه
_ فدوه الگلبه يموت عليهن
بصائر : اتذكر چنت من زغيره اتوسل بيه ياخذني بس حتى اشوف الكحيله مال ضيرم
_ ذكرتيني من يجي اقنعه ياخذني اشوفنها
بصائر : مره اخذني فقار من چنه مخطوبين
_ يااا
بصائر : والله ،وبوكتها لگفنه ليث وما ضلت عدنه كرامه من الرزايل
_ جا شلون تمشون بله واحد شافكم ،شيخلصكم
بصائر : فقار عاند الا ياخذني لان گلتله اريدن اشوف الكحيله
ريحانة : انا اريدن اشوف الهيلانه
بصائر : الا الهيلانه ،شتشوفين منها ما تعارفين ما ترضى تشوف غير صخر
ريحانة : اعارف
بصائر : الكحيله حبابة
ابتسمت اداهرهن
_ بعد فرس رچلي
بصائر : عوزج تگولين حبابة مثله
ضحكت اهز رأسي لا ،ضلينه نسولف وناكل وبالويل الا رضت ريحانة بلگمتين ،بس خلصنه گمت
شلت الصينية وكفيت المواعين وبس اجت عمتي
من بيت اهلي بوجهه طبخت
الغده وانا عچنت لان ماعدنه خبز ،وگبل لا اشنگ مشيت علگت جمرية التنور ،ورديت اشنگ واحجي وي بصائر
_ ما اعارف ليش صايره اخافن من التنور ،گبل انا الاخبز واحط روحي بنص النار ،هسة كل ما شغلته وگدام عيني ما اعارف شني اليتراوالي
بصائر : تخيلات لا تخافين ،تردين اطلع وياج ؟
_ أي بس انا الاخبز
بصائر : خوش
شلت الصينية وطلعت ،وهي وراي ،باوعت على النار هافته ،تلثمت وهي گاعده تحطلي على المخبازه وانا اطبنها بالتنور ،عاندت الا تساعدني ،وبس كملنه لميت الخبز وطبينه جوه
بصائر : وجهج صار احمر لا تغسلي
_ أي اعارف
شريت الخبز وتشلحت ،كفيت هوسة الخبز وبصائر گالت هي تلمه ،وانا صعدت حتى اسبح ما ضل شي لجية ضيرم
طلعتلي هدومي ومشيت للحمام ،سبحت ورديت اباوع على روحي بالمراية ،ثوبي ليموني عيوني بارزات وياه ،مشطت شعري وتعطرت وگلت اخلي مكياج خفيف وطب هو
نزلت قلم الحمره من ايدي ،ومشيتله من فتحلي ايده
شم شعري
ضيرم : افييشش ياريحتج
وخرني يباوع لعيوني
ضيرم : صفر ،وچماله مكحلتهن
دنگ يطبع على كل وحده بوسة خفيفة ،بس وخر گلتله
_ لا تعيدها ،اخافن من بوسة العين .
ضيرم : ليش ؟
_ يگولون بوسة العين فراگ
عله شاربه مبتسم ،ورد باسهن ،كضيت ايده حيل ما راضيه ،وخر بنفس ابتسامته يحاجيني بتحدي
ضيرم : بعد يوميا ابوسهن ،عناد بالفراگ الما يفرگنا
_ عنووودي
ضيرم : يمشي بدمي
ضحك وفتح الباب يريد يطلع
_ جيبلي هدومي اسبح حبيبتي
_ صار
طلع هو وانا اخذت هدومه وراه ،ونزلت وهو شوي وسمعت صوته يحجي وي ريحانه ،وانا وبصائر صبينه الغده من رد عمي وعزيز وفقار ،فرشنه السفره بالصاله والتمينه
ضيرم : جا ريحانة وينها ؟
بصائر : ما ترضى تجي لا هي ولا حواري
ضيرم : شني سالفتهن ؟
گام يصيحهن وشوي ورد كاض كل وحده من ايد
ضيرم : يلا اگعدون وكافي دلال
عزيز : عياره
حواري : حجه ،حجه ،ما يگدر اذا ما يغثني
عزيز : راح احط راسج بالمرگه
باقر : شني عزيز
ضيرم : اگعدي ولا تحجين وياه
گعدت بصفي تدردم ،وبصائر گعدت بصف فقار ،عمي وضيرم اندمجوا ياكلون ويسولوفون وانا اكل وعيني عليهم
فقار : اكلي هاي اللحمايه
بصائر : تلعب روحي والله
فقار : ماكو تلعب روحج ،اكليها واسكتي
خلاها گدامها على ماعون التمن ،اكلتها من لا جاره
ضيرم : فقار
رفع راسة
فقار : هااا
ضيرم : سيارتي اريدنك تشوف شبيها ،راح تخلبني صاير بيها صوت
فقار : جيبها الي وانا اسويها بس تدفع مو بلاش
ضيرم : انا مو حق ،اطيك فلوس لا تخاف
فقار : ياريت بس حق ،صخر وبرهان هم ،اصلح ويطيح حضي تالي كلشي ما احصل
ضيرم : اطيك مقدما انا
فقار : دكتور جيبك متروس
ضيرم : جا صخر جيبه فارغ
فقار : يكرف كرف
عزيز : ضل أنت بس حاط عينك على الوادم ضل
فقار : خوب أنت خناگ اصلي مال فلوس
عزيز : تف بعينك
فقار : سلايه بعين عدوك
ضحكت وگمت
ضيرم : وين ،شأكلتي ؟
_ شبعت
رد يحجي وي عمي وانا مشيت غسلت وحطيت قوري الچاي على النار ،وبس لمينه السفره وغسلوا صبيت الهم ،وانا اخذتلي گلاص وگعدت اباوع
عليهم ،من كل عقله يهفيلها على الجاي حتى يبرد
فقار : دوگفي لا تحترگين
باقر : الله بالخير بوية
رفع راسة من سمع صوت ضحكة عزيز
فقار : هاا يابة
باقر : ترا احنا گاعدين
فقار : جا شسولكم ؟
ضحك ضيرم مأيس منه وعمي هز ايده
باقر : الله يهديك بوية
فقار : هاديني والله
ابتسمت وگمت وهي اباوعلها غاديه حمره من الخجل تريد تگوم بس هو كاض ايدها ،مشيت للمطبخ تشلحت اكفن المواعين وشوي واجت هي وراي تهفي على وجهه
_ هاا شبيج ؟
بصائر : راح يموتني ولا يستحي
_ يحب يبين حبه الج
بصائر : مرات استحي والله
_ تعودي هذا فقار
هزت رأسها ب أي ،وگابلتني ،بس خلصنه انا صعدت فوگ ،تمددت اريدن اغفى بس متانيته ،بس طب أبتسم يعارف شبي
ضيرم : هااا ليش ما نمتي ؟
_ متانيتك
ضيرم : اممم
طفه الضوه واجه تمدد بصفي ،جرني لصدره وبساع غفيت ،تعلمت هذا مكاني الما صارت تغفى عيني اذا ما اسمع صوت دگات گلبه
°بركة°
تأفأفت حاطه ايدي على راسي واباوع عليه يفتر ورا امي
عبد الحق : شني ما راضيه بي ،شني الخلاها تگول ما اريدنه
شيماء : اندري ،جا اكض السچين عليها واگلها ارضي بأبني
عبد الحق : لهسه انا عاقل ،لا اكنكر عليكم وانهي عليها وغصب عنها ترضى
شيماء : ضلوا ضلوا يوميا واحد ناهي ومطفرين البنيات
عبد الحق : اكسر رجليها التخطي خطوه من القرية مو نوح انا وارضى وحده تلعب علي
شيماء : شني سالفتك ،المن راح تنفچر هسة ،هيد واحجي مثل خلگ الله
عبد الحق : لو اعارف اسحلها بعباتها هم اجيبنها هنا ،حطيتها براسي بعد وگولي حق ما گال ،اعقد عليها يعني اعقد
شيماء : من شوكت حاطه براسك ولك ؟
سكت ،وطال سكوته چن واحد حاير يحجي لو لا ولوما امي راده سألته چان غلس ،جر نفس حاير وهمس
عبد الحق : من ساعة السوت روحها متخربطه گدامي
شيماء : يااا ،هاي شوكت
عبد الحق : شني تحقيق يمة
شيماء : جا انا امك شبيها لو حجيتلي
عبد الحق : شأحجيلج ؟
شيماء : تحبها ولك حق ؟
عبد الحق : لا شني ياحب هذا ،بس بت عمي واريدنها
وانا مني صحت
_ صدگي يمه صدگي بلايه ما يحلف
ضحكت امي تأيدني
شيماء : هو راح اصدگه
نتر ضايج
عبد الحق : شبيچن
شيماء : سلامتك يمة شبينه ؟
عبد الحق : قنعيها يمة بروح الموته والعدلين
شيماء : الله كريم
عبد الحق : ماكو اكرم منه ،بس اريدن اعقد الجمعة
شيماء : شني سالفتك وي الجمعة ،يومين نطير لو شني ؟
عبد الحق : اليوم اربعاء ،الجمعة بس عقد وبعدين الحفله
شيماء : شعدنه هيج مستعجلين ،يركضون ورانه لو شني ؟
عبد الحق : فدوه اروحلج ليش تلعبين بأعصابي ؟
أبتسمت
شيماء : يمة انا اكيف واحد منكم اعرسله ،انشلع افادي وانا اتوسل بأخيك
عبد الحق : عرسيلي انا اخوي عاشگ وما يريد غيرها
شيماء : جا ما أيس ؟
عبد الحق : وين أيس وهو صورتها من زغيره بعدها بمحفضته
شيماء : يااا وين شفتها ؟
عبد الحق : گبل لا يلتحق شفتها ،ابنج بعد عده امل ترد
شيماء : سوده علي
عبد الحق : انا شاك بعمي محمد يعارف شي
شيماء : هذا عمك يعارف كلشي وساكت
عبد الحق : أي والله ،ابنج الچبير طالع خوينس عليه
شيماء : يااا
عبد الحق : أي والله
درت راسي على صوت باب الشارع من اندگ ،طلع حق يشوف منو وانا ضليت احوسن
_ يمة راح امشي يم حواري
شيماء : بس شوفي اخيج بره يوصلج ،واذا ماكو رديلي
_ خوش
مشيت للغرفة لبست حجابي وعباتي وطلعت ،بس فتحت الباب صار بوجهي واگف يمه ليث
عبد الحق : وين ماشيه ؟
_ لبيت عمي باقر
عبد الحق : امشي
وصلني ورد يم ليث ،وانا بس طبيت صارت گدامي بصائر ،بوستها اعتب
_ جا گولن عدنه اخت نسير يمها خطيه ضاله وحدها
بصائر : ما تعارفين ابن عمج كل ما گتله امشي الاهلي يصخن
_ خاب شبيج قنعي وتعاي ،باجر راح اغيبن عاد نسهر انا وياج
بصائر : وشلون اخليه وحده ؟
_ هي ليلة شبيج
بصائر : اجرب
_ عفية عفية
طبينا انا وياها لغرفة البنات ،سلمت وگعدت بالنص
_ ريحان مدري نعناع شلون صرتي
ريحانة : شوكت تبطلين تگليلي نعناع
_ اريدن اعارف عمي شکال الروحه من سماج
ريحانة : اهووو ،انا هاي الشكولات منين الله جاي يوديهم علي
هيوفة : اگلج منو السماها ؟
_ منووو ؟
ريحانة : شني هيفاء ؟
هيوفة : جا واذا گلت
_ دحجييي
هيوفة : صخر سماها
عطت
_ عليج الله
هيوفة : والله ،تگول امي ضالين حايرين بأسمها وهو جان صف ثالث ابتدائي ،هستوه جاي من المدرسة ولاگي عمة جايبة ،سأله عمي ،صخر شيلوگ الها اسم گايله ريحان
_ جااا شو سموها ريحااانة
اصيح منفعله وهي تضحك
هيوفة : خايبة صوتج
_ دحجي يلا
هيوفة : عمي گاله يعني ريحانة گايله أي ،وما خله بخاطره وصدگ سماها ريحانة
صفگت مصدومة ،ولا اجه ببالي أحد غير عمي مسميها
_ تدرين ريحانة ،صح اسمج غريب بس حلو لايگلج
ريحانة : هستوه جان مو حلو
ضحكت وانداريت عليها
_ وأنت حواري الچنه ليش ماترضين بأخوي ؟
حواري : شلون سالفه تعبانه ،فكن عني لا اهج والله
_ شبي اخوي وما تردي ؟
حواري : كلشي مابيه ،انا ما اريدن اتزوج ،شني اجباري ؟
_ أي
حواري : انجبي
_ امداج ،هسة ينهي عليج أخوي
حواري : مو بكيفه امشي انا ،اسمم حياته والله
_ استقري بس لا تحمين
حواري : اطلع احسلي لان راح اطب سچن لو بيج لو بأختج
بصائر : انااا شحاجيه
حواري : ابد ابد فلا حاجيه ،بس اكلتي مخ راسي وكل ضنج تگدرين قنعيني ،زوج أني وينضحك علي عبالج مثل ما ضحكوا عليج
بصائر : هاي شبيها ،صايره كلش ؟
حواري : انا من يوم يومي هيج ،بس ما تعارفون حقيقتي
ريحانة : متأثره بالمسلسلات اعذروها
ضحكت وگمت
_ راح امشي للبيت بصائر اذا ماتجين اوديلج حق والله
ريحانة : شتردين منها ؟
_ اريدن تبات يمي ،هم النه حق بيها
حواري : حق اخوج الغثه
_ أي عود دمج خفيف
حواري : ولي لبيتكم وگلي الاخوج ما اريدنه
_ گليله أنت
حواري : جا انا بس الاگيه اگله ،شني خايفة مستحيه
_ تسويها وتسوين الاكبر منها ،حواري الچنه بعد
حواري : جا شعبالج
ودعتهن وبس رديت نضفت البيت وگلت لحق يجيبلنه حلويات ،افتر بالبيت طايره واخيرا راح تبات يمنه من تزوجت لهسه حارمنه منها
لميت شعري بساع ينگط ماي ،وركضت اطلع من الغرفة من سمعت صوتها بره
_ هااا راح تباتين ؟
بصائر : ما گتله لان اعارف يهد شغله ويجي حتى ما يخليني اعتب عتبت بابكم
_ جا شلون ؟
بصائر : من يجي ياخذني اگله
هزيت راسي ب خوش ،ولحيت على حق يمشي يجيب ميمنة ،وبس جابها كملت لمتنه ،سهرنه الليل كله سوه ،ناكل ونسولف متونسات والبيت انمله
علي بهل ليلة
گاعدين بالصاله ،الحب والشامية گبالنه ناكل ونسولف وعلى جهه گاعد حق بأيده مبايله يباوع بيه ،وبنص سوالفنه سكتنا صوت دگت الباب ،نزل المبايل من ايده حق وگام يشوف منو وانا بساع عرفت منو لان ماكو احد يجينا بهل وكت المتأخر
_ انا مو گلتلج خابري ،باعي هل اجاج
بصائر : دوگفي هسة يجوز مو هو ،شبيج تسبقين الأحداث
وبس كملت حجيها طب حق
عبد الحق : فقار بره ،يريدج .
باوعتلها بمعنى هاا شگلنه ،وهي ضحكت وطلعت
اندريت اباوعلها من گالت
ميمنة : اذا يريد ياخذها لا تلحين عليها تضل لان
هاي جذابه تلگين حتى هي گلبها يطگطگ عليه .
_ لا ما احجي
ميمنة : عفية ،انا اضلن يمج
_ جا رجلج عده عادي تنامين مو يمه ؟
ميمنة : رچلي چبير مو مال هيج سوالف
_ صح ،شايب
اجت وگفت گبالنه تريد تحجي وتخاف لا اعيط
ميمنة : امشي لا تحيرين انا اضلن يم بركة الليله
بصائر : ما تزعلن ؟
وانا وميمنة حجينه بنفس الوكت
_ لا
بصائر : جا راح امشي ،سلملي على امي وابوي
ميمنة : يوصل
لبست حجابها وعباتها وطلعت واحنا وراها ودعناها وطبينه ،لملمنه الهوسة انا وميمنة وعبد
الحق صعد ينام ،وشوي وكل وحده بينه تمددت بفراشها
°غاية°
طبيت للصاله وانا اباوعله ،مطحون گلبي من القهر منه وعليه ،كل ما اريد انسى هو هيج غلطان اباوع لراسه واتذكر
نوح : غاية جيبلي براستيول ،راح يطگ راسي من الوجع
صخر : حل
نوح : كله منك
صخر : حگك ،انا ظلمتك
نوح : الله يغفر ،شدخلك أنت
صخر : مفتهم الدين من ...
سكت من حس روحه راح يحجي حجاية چبيره
نوح : شبيج غاية جيبلي براسيتول
بلايه ما احجي مشيت للمطبخ ،جبتله الشريط وگلاص الماي اطيتهن اله ،شرب واطاني
الشريط والگلاص فارغ ،وديتهن ورديت ضاله
وحدي افتر وطايحه بين مناگرهم
شوي وطلعت جده من الغرفه تلف بشيلتها
هستوها گاعده ،لو تنگلب الدنيا جده لازم تغفى الظهر
غضة : هااا غاية جا وين امج ؟
_ مشت لبيت عمي باقر
غضة : جا انا هم راح امشي ،تمشين وياي ؟
_ أي
باوع على نوح
صخر : ضل وحدك أنت
گام يعدل بدشداشته ومشى ،انا بساع حضرت روحي وطلعت من الغرفة من صاحتني جده ،مشينا لبيت عمي باقر
واخذنه بالساعتين وردينا وبس طبينا اندگ الباب طلع نوح يشوف منو وانا ضليت اباوع من الشباك
شوي وطبوا كومة زلم ،فتحلهم الديوان نوح وضل واگف بره خابر ما اعارف عليمن حجه بساع وطب
وراهم
ومن طب ضيرم وراه عزيز عارفت هذولي الزلم جاين علمود سالفه ريحانة ،اقل الساعة والتموا عمامي والولد ،صياحهم گب وانا اركض بين الجاي والماي وبنص الهوسة طبت
ميمنة : هااا غاية شكو ؟
حطيت قوري جاي جديد على النار وباوعتلها
_ وادم علمود يردون ريحانة
ميمنة : يبووو ،جا ما يعارفون تريد تطلگ ؟
_ اندري
مشيت للسنگ حتى اغسل الاستكاين وهي كضت ايدي
ميمنة : اگعدي انا اكمل
_ لا يمعوده شعدي
كفيتهن بساع وهي ردت صبت الجاي من اجه نوح وانا گعدت حاطه ايدي على راسي
_ شوكت تفض هاي المصايب ،والله بزعت ارواحنه
ميمنة : شيفضهن
سندت راسي على الحايط وهي مشت جوه وشوي وانا گمت وراها ،وبس مشوا طبوا الولد
ضيرم : يابة لا تگلي قنعووك ،لو مو بيت وحدها هم ما ترد
باقر : شني ضيرم شبيك ،الطلاگ هييين ؟
عزيز : اسألها ،اتأكد منها ،هي بعد ما تريددده
عبد الحق : صوتك عزيز
عزيز : راح اتخببل عليكم ،لو يموووت ما اردها اله والله
باقر : وهو شني بكيفك
عزيز : جا انا مو اخوهااا ؟
باقر : بس مو تهجم بيتها
عزيز : منيلها بيت هي ،هجم كلشي هو من تزوج عليها وياريت لو حاجيلها
ليث : خايب كافي سطرتنه
صيح منفعل
عزيز : محترگ گلبيي ،ولكم ردلنه ريحانة الچانت صوت ضحكتها تارس البيت ردها النه جثه بلايه
روح حجايتين ما يطلعن منها ،والله والله نجوم السما أقرب اله من اظفرهااا
باقر : هسة ميخالف بس اسكت ،شهرتنا
عزيز : أنتم ردوها وشوفوا الشهيره على اصولها وحگ سبع الگنطره ارملها واردلها الك
باقر : لا تضل تخوط ،عزيز لا تخوووط
عزيز : تعارفني من اقفل ،انا قفلت ما تردله
ضيرم : وانا هم ما اخليه يشوفها بعد مو تردله
فقار : وانا وياكم
نوح : وانا هم
يوسف : اسكتوا أنتم
ليث : اطوه فرصه مبين ترا يحبها ،لو ما تهمه چان ولا وده عليها
عبد الحق : والله صح
ضلوا يتناقشون والولد قافلين وبالليل من اجه جدي وعارف گال
رأجس : انا إأيد رجعتها بس الشور الاول والاخير بايدها ما اريدن تگول اهلي جبروني ارد
يوسف : شلون ترد وتحافظ على بيتها اذا تشوف اخوانها يگمزون ما يردونها ترد
محمد : أبو گمزة أنت حاجيها
ضيرم : اعذرني عمي انا اريدنها تطلگ وتگعد يمنه معززه مكرمه
محمد : لا هاي هي
ضيرم : لو يجيب شيوخ الدنيا كلها هم يحلم يلمح ضلها
يوسف : شني باقر ما ترد ولدك ؟
باقر : يردون هم
يوسف : محمد أنت حاجيها ،وهذولي لا يتدخلون
عزيز : لا والله
يوسف : انطم أنت
گام أبوي نزع عگاله وصاحني ،اخذته من ايده ومشيت علگته بالغرفه ورديت وهو چان ماشي
لبيت عمي
°حواري°
ركضت على صوت عمي يدگ باب المطبخ ويصيح بأسم ريحانة ،طلعتله گبلها وبس طبيت طب عزيز
يرعد
اندار عليه عمي خازره
محمد : انا مو گلت ما احد يجي وراي ؟
عزيز : ما احجي
محمد : چذاب ،عزيز المحامي يسكت
عزيز : بروح عمي منير لا تقنعها خليها بكيفها
محمد : انجب و ولي
عزيز : حلفتك انا
باوعلي عمي
محمد : امشي صيحيلي أختج
_ نايمة
محمد : گعديها
بلايه ما احجي مشيت للغرفة ،ندهتها وانا اگولن
_ ريحانة ،گومي عمي يريد يحجي وياج
باوعتلي النعاس بعيونها
ريحانة : شنو ،ياعمج ؟
_ عمي محمد يريد يحاجيج
ريحانة : شكو ؟
_ ما اعارف ،گومي وتعارفين انا هم حتى اعارف
گامت لبست حجابها وطلعت وانا وراها ،طبينه ساكتات من شفنا هيوفة تسلم عليه
هيوفة : شلونك بوية
محمد : الحمدلله بعد ابوج ،وأنت ؟
هيوفة : بشوفتك بأحسن حال
حط ايده على راسها وندار على ريحانة
محمد : عدي چم حجاية وياج
ريحانة : گول عمي
محمد : تعاي للديوانية
مشى وهي لحگته وانا وهيوفة مشينا وراهم ،گعد وهي ضلت واگفه
محمد : تعاي اگعدي
مشت گعدت گباله
ربحانة : خير عمي ؟
محمد : كل خير ،تعارفين اليوم زلمتج وده ناس علينه حتى يردج ؟
هزت رأسها ب أي
محمد : يگول اعزل بيها بيت وحدها ومرتي اطلگها بس ردوها الي ،شتگولين عمي ،ليش ماتطي فرصه ؟
بلعت ريگها ساكته وبين موقفها وبين عاطفتها حسيتها حايره شني تجاوب
محمد : اطيج وكت تفكرين ؟
جرت نفس طويل چن واحد راح يحسم موته بقراره
ريحانة : لا عمي ما اردن ،من ساعة الطلعت ودمعتي على خدي حرمته علي زلمه
محمد : سبحانه الما يغلط ،ومبين هو شاريج بروحه
ريحانة : شيفيد عمي ،كسرني وكسرته صارت كسرتين من مات ابني الضليت انتظره سنين
محمد : أمر الله هذا
ريحانة : والنعم بالله ،بس هاي هي جازت الروح منه
محمد : هذا اخر حجي عدج ؟
ريحانة : أي اخر حجي
گام وگف على حيله وهي هم وگفت
محمد : التردي يجرالج ،وكلنه وياج
ريحانة : الله يحفظكم الي
محمد : ويحفظج
بس مشى عمي انهارت هي تبچي ،امي لامتها بحضنها وبصائر وهيوفة حايرات شني اليسونه ويخففن من صعوبة قرارها على روحها
ريحانة : راح اموتن يمه ،راح اموتن ،ما توقعت بيوم انا الاريد الطلاگ منه ،ماتوقعت انا الراح اعوفنه لان غلط بحقي
وخرتها امي تمسح بدموعها
نجوى : الله يكتبلج الاحسن من كلشي خسرتي ،بس كافي لا تبچين هاي هي الراح راح ابدي حياة جديده
ريحانة : الحجي يمة سهل ،وانا ماكلات گلبي ،ليش وشلون هيج صار ،اتمنى اموتن واخلص
نجوى : اسم الله ،ولج لا تحجين هيج وتشلعين گلبي عليج
دنگت تمسح بعيونها ،اباوعلها حايره من القهر ما اعارف شني الاحجي يخفف عليها
تمسح دموعها ويردن يطيحن واخذتلها فوگ الساعة الا ردت شوي تمثل هي طبيعية
°غاية°
بس رد أبوي تلگوه كلهم بكلمة
ال "هاا"
محمد : تريد الطلاگ
رأجس : يجرالها
ضيرم : جا مو گلنه ما تريده
محمد : كيفت أنت
ضيرم : احسن الها عمي
ما حاجاه ابوي وهم شوي وكلمن مشى البيته ،وانا
من ضوجتي من صار هدوء البيت
طلعت كتبي اقره وعود اليوم خميس وبس خلصت نص واجباتي لميت
هوستي وباوعت للساعة راح تصير بالوحده بالليل نسيت روحي اگولن هل صرت اغفي على الكتاب ..!
گمت اريدن اشرب ماي وارد انامن ،فتحت باب
الغرفة امشي بالظلمه ،ضوه خفيف جاي من بره كملت دربي للمطبخ ،ترستلي دولكه ودرت وجهي
اريدن ارد ،الدولكه بايدي اخذها وياي لا اعطش ساعتها شيگومني ،بس وانا اخطي أول خطوتين وسمعت صوت جاي من بره ..! !
بأستغراب نزلتها من ايدي على الكاونتر ،ولا ارادي اخذتني رجلي من ركزت وعارفت هذا صوت ليث
مديت راسي من الشباك جان مفتوح ،ماشفت بس ليث ،چان صخر هم گاعد ،مدنگ وگدامه ليث ثاني ركبته واول مره احس بحساس
غريب واني اسمع الحجي الما توقعت راح اسمعنه ابد ..! !
ليث : أول ما طحت انا ،ما سندني غيرك ،چنت متوقع ما راح توگف وياي بس صار العكس أنت حطيت أول چگاره بأيدي وگتلي طفي نار گلبك وهسه انا اگلك نار گلبك أنت صعب تطفى ،وبالحالتين حصادها رماد ،گلبك وحبك لريحانة من جهه ،ومن جهه ثانية ميمنة انا اوگف بوجهك لو فكرت تكسرها
صخر : انا اكسر روحي وما اكسرها ،ادوس على گلبي وما اعبرها
ليث : تقبل وعيش حياتك ،انسى هي ردت وراح تطلگ
صخر : چنت حالف لو دارت الدنيا وتطلگت انا اخذها ،بس هسة ما اگدر ،احس روحي جاي احترگ جاي اموت ليث كل دقيقة انا اموت ستين مره تطلع روحي بكل ثانية
ليث : تضل تحرگ بروحك هيج ما تحصل شي ،ماكو شي يتغير
صخر : شلون فهمني ،اريد اقنع روحي ما جاي اقتنع
ليث : لو اعارف چان علمتك ،هذا انا محسوبك توج نار بين ضلوعي من احسب ما ضل شي لعرسها وانا مربط كلشي ما اگدر اسوي
وخرت وماسمعت غير بس حسرته وصوت طگة الجداحه ومبين جاي يدخن
ليث : گوم نام ولا تخليها تحس عليك ،حاول شوي تهتم بيها تراها ميمنة والنعم منها كاملة مكملة والكمال ل الله
صخر : اعارف ،بس هي من ليلة العرس گالت أنت بصوب وانا بصوب ثاني
ليث : حگها
درت وجهي على صوت وراي ،وفزيت متوتره من شفت ميمنة طبت ،مشيت بساع شلت الدولكه احجي بصوت واضح اريدنهم يسمعوني حتى يسكتون
_ هااا ميمنة شمگعدج ؟
ميمنة : ما نايمة بعدني
_ شعجب ؟
ميمنة : ما اعارف ،صخر وين ما شفتي ؟
_ بره گاعد هو وليث
ميمنة : خوش
ضليت واگفه مطيه ضهري للباب وانداريت من سمعت صوته
صخر : هاا ميمنة ؟
ميمنة : مو وراك طلعة باجر ما تنام ؟
صخر : اصعدي وهسة انا لاحگج
بلايه ما تحجي طلعت وشوي وطب جگارته بايده يدخن ،رد ضهره على الحايط يباوع لصخر
ليث : عينك على مرتك
هز رأسه ب أي ولحگها ،باوعلي مبتسم
ليث : سمعتي مو ؟
هزيت رأسي ب أي
ليث : لا تطلع منج حجاية لكائن من يكن
_ لا شلون احجي
ليث : اعارفج
طفه جگارته بالسنك وباوعلي
ليث : ماشي اشوفن المكاين ،نامي أنت
زغرت عيوني
_ تشوف المكاين لو كوكبة ؟
ليث : وين اشوفنها ،اختفت بعد
_ شلون يعني ؟
ليث : من أخر مره شفتها وهي بعد ما بينت
_ ليش ؟
ليث : ما اعارف ،ماشي انا
طلع هو وانا طبيت للغرفة ،تمددت حايره ،چنت كل ضني ثنين العشگوا وما ارتاحوا طلع حتى چبيرهم اكو نار بگلبه واجه ومحد يدري بيها
°ليث°
طلعت من البيت وانا متأمل شوفتها ،تمنيت الگاها گاعده هناك ،بس اشوفنها بخير ،كملت دربي للشط وبس وصلت مكانها چان فارغ
گعدت وانا اخذ نفس من جگارتي وكل بالي عدها ليش ما جاي تبين ،صار چم يوم لمحه ما لمحتها
هنا واعارف بيها هسة ضايجه بس شني المانعها ما تجي
ضليت گاعد من چگاره لچگاره طر الفچر وانا متانيها ومن أيست ماتچي گمت اردن للبيت ،عدلت هدومي ونفضتهن من الترابه وگمت ،بس رديت للقرية استغربت وانا اشوفن صخر هستوه طالع من البيت
مشيت يمه ،من الجامه حاجيته
_ خير وين ماشي ؟
صخر : شغل
_ يا شغل هذا من الفچر ؟
صخر : طالع للنجف ازورن علي
_ أنت ويامن ؟
صخر : وحدي
_ دير بالك من الدرب
هز رأسه وانا وخرت وهو حرك ،بس طلع من القرية انا طبيت للبيت ،بدلت هدومي وتمددت بفراشي
وانا والنوم حرب ،ساعة التغفر عيني معناها تعبان مو منعس ،التفكير بيها وعليها اكل راسي
اكل وثاني يوم واگفين انا وعزيز برة وطبت سياره
للقرية ،من ركزت بيها عارفت هاي سيارة منتظر أخو
حمزة دوم هو يجي بيها
عزيز : هذاا شعده جاااي
كضيت ايده ،وهو طبگ السيارة گبالنه ونزل ،محروگ دمه احجي متخبل
حمزة : شني تخابرررني تگلي راح ارفع قضية طلاگ
لعب ،بكيفك امشي اناااا
عزيز : هي تريد ،مو انا .
حمزة : أنت الزرعت براسها ،أنت
عزيز : لا تضل تمسلت
حمزة : اريدن احاجيها
عزيز : تحلم ،تشوف الموت وما تشوفها
حمزة : مرررتي
عزيز : لا مو مرتك ،ما تريدك
حمزة : حرام والله ،لا تأيدوها
اندار علي
عزيز : ليث بت عمك تريده ؟
باوعت لحمزة وانا اجاوب على عزيز
_ لا ،ما تريده
عزيز : دعبل منا
حمزة : ما اطلگ والله
عزيز :خوش
اباوع عليهم حرب النظارات صارت بينهم ،دار وجهه حمزة ومشى صعد السيارة وطلع من القرية
_ عزيز
عزيز : هااا
_ لا تستعچلون بالطلاگ
عزيز : الصواب صوابنا ونعارف كل جرح بي
°غاية°
صعدت فوگ اگعدها ،تأخرت نايمة مو من عوايدها
دگيت باب الغرفة اصيحن بأسمها ،من طولت ما راده فتحت الباب اباوعلها نايمة بالگاع على الفراش صحت بأسمها
_ ميمنة ،ميمنة
اندارت على بالگوات فاتحه عينها
ميمنة : هاا غاية ؟
_ شعجب لهسه نايمة ،راح يأذن الظهر
گعدت تلم بشعرها
ميمنة : نمت ورا صلاة الصبح ،لان صخر وصاني اگعده وضليت گاعده
_ اگولن شعجب هيج طولتي
ميمنة : والله بعدني منعسة
_ دگومي گومي ،ليث جاي يشوي السمج لا يفوتج
گامت جرت شالها من الميز ،لبسته
ميمنة : صار شگد مشتهيه سمج على الحطب
_ ريحته تخبل ترست البيت
ميمنة : الله ،تعاي ننزل
ضحكت وطلعنا انا وياها ،بس نزلنه وشافته امي
گالت
زهرة : حظرن اللبن الطرشي ،واكو بصل أخضر هم لا تنسنه ،راح يستون
ميمنة : صار عمة
مشينا انا وياها للمطبخ حظرنه الگالت عليه امي وشوي وطب ليث
ليث : اطني بلمين احطن بيهن السمچات ،بسااع
ركضت للكاونتر طلعت البلمين خضيتهن واطيتهن اله اخذهن وطلع ،واحنا حتى السفره فرشناها
وبالاخير طب هو
اخذت بلم من ايده وبالبلم الثاني اخذته ميمنة وهو وگف يغسل ايده گبله مشينا للصاله حطيناهن واجه جدي وجده وأبوي ،ونوح وليث وبالاخير أجت امي
بنص سوالفنه واكلنه رفعت راسي اباوع الامي چانت صافنه ،نزلت الخبزه من ايدي وهي مبين لهسه لگمة ما حاطه بحلگها
ليث هم انتبه عليها وسألها يداهر
ليث : شني يمة ما تاكلين ،مو طيبات لو شني ؟
زهرة : لا يخبلن عاشت الايدك
ليث : جا شو ما شفتج اكلتي ؟
زهرة : غصيت على جفون ،كل مره اكل وافلس الها
انگلبت الوجوه بحجايات امي ،ابوي بعد ما گدر ياكل
وخله وگام وجدي خزر امي ما راضي لان حجت
وليث حاول يغير جو الگعده الصارت عباره عن هدوء واجواء مشحونه
ليث : شو محد ياكل مايسوه تعبت واحترگ وجهي بحرورة النار
نوح : راح تذلنه
ليث : مو أنا نوح ،لو تحجي حجاية براسها خير لو تسكت
نوح : شبيكم وياي
ليث : تعارف شبينه ،لا تسأل
رأجس : شكو ،شبيكم ؟
ليث : ماكو شي جدي بس هو مضوجني اگله تعال وياي للگيعان ما يجي
رأجس : جا نوح ما تمشي وي أخيك ضال وحيده
نوح : جدي شلون امشي مو تشوف راسي مخيط
رأجس : من تطيب
نوح : ميخالف
ورا الغده اجتنا هيوفة ،ساعتين هيج ومشت وانا وميمنة تگابلنه على البيت نضفناه ،وبس خلصت سبحت وگعدت يم جده بالصاله گاعده يمها امي
يسولفن وانا امشط واسمع حجيهن
زهرة : عمة راح اموتن على شوفتها والله ،كل ما احط راسي على المخده ما ببالي غير شلون عايشة شسوت ،شلون يعاملوها ،خاف احد يضوجها
غضة : لو صارلها شي من ايدها ،الصوج صوجها هي طلعت وتتحمل لازم غلطها
زهرة : جا انا گايله موش غلطانه ،الغلط راكبها من ساسها لراسها بس انا گلبي گلب أم عليها و والله مو بيدي
غضة : جا ما اعارفج
زهرة : اريدن احاجي محمد يخليني امشي اشوفنها
غضة : فلك وين تمشين ؟
زهرة : عمة والله اذا ما اشوفنها اموتن
غضة : خايبة اگعدي ولا تحجين شيخلصج من أبو محمد
زهرة : جا شلون ؟
غضة : ما متوازية تشوفيها
زهرة : جا اگله يخابر على شيخ خزعل حتى احجي وياها
غضة : گليله وشوفي
گمت اشرن الخاولي وصارت بوجهي ميمنة نازله من فوگ ،بس شافتني گالت
ميمنة : هو ياهو يسبح يطلع هيج حلو ،عمي هنياله هذاك الواحد
زغرت عيوني
_ يا واحد
ميمنة : صاحب النصيب
أبتسمت اهز بأيدي وهي أجت وگفت گبالي
ميمنة : لمي شعرج لا تضلين هيج فاتحته .
_ اريدنه ينشف
ميمنة : يا ينشف لا تطگج فلاونزه
_ جا ضفريه
ميمنة : انداري
اندريت مطيتها ضهري وهي ضفرتلي وانا واگفه وبس كملت گالت
ميمنة : حطيلها كتر لا تنفل
_ أي
مشيت للغرفة حطيت كتر بطرفها وأبتسمت وانا اباوعله كلش طولان ومن اتحرك الضفيره تتحرك وياي ،طلعت وانا انزل خصله زغيره على وجهي
وكملت دربي اشوفن طيور جفوت واحطلهن اكل
طبيت للمطبخ ما منتبهه لا على صوت ولا شي بايدي اللف بالخلصه المنزلتها ،وما گدامي غير بس قفص الطيور نزلته وانا احجي وياهن
_ زقزقات جفون الحقيره شلونچن
ميمنة : غاااية
انداريت مستغربة نبرة صوتها وفزيت من شفت عزيز واگف ومطيني ضهره ،حطيت القفص بالگاع بهتانه
وركضت للغرفة اخرط بخدودي واللطم
_ بسلا شافني ،صخام الصخمج يا غاية يا مصخمه
صخام بعينج
وانا اللطم طبت ميمنة
_ ولج شافني مووو ،شافني ؟
ميمنة : أي شافج
لطمت على رجلي
_ صخام بعيني ،ثول الثولني
ميمنة : جا غير تنتبهين
_ وانا شمدريني ،شجااابه هو ،شيريد ؟
ميمنة : اجه يسأل على ليث
تربعت انوح وشوي وابجي بعد وهي واگفه تباوعلي
ميمنة : خايبة كافي ما تعبتي
_ راحت صلاتي وصومي ،شافني بلايه حجاب
ميمنة : ابجي ليش كاضه دموعج
_ لا تضحكين علي ،جا مو تعارفين حرام
ميمنة : ما متقصده لا تنوحين كافي
برطمت ضايجه وهي هزت ايدها وطلعت ،وانا لحگتها ،و وي طلعتنه طب صخر من بره سكتت من شفته
ميمنة : الله يساعدك
صخر : ويساعدج
_ الله يساعدك خوية
صخر : ويساعدج غايتنه
أبتسمت احبن من يگول غايتنه ،صعد فوگ وانا گرصت ميمنة فزت تباوعلي
ميمنة : هاي شبيج ؟
_ اصعدي ورا رچلج شبيج
ميمنة : دولي ،شعدي صاعده
_ حظريله هدومه
ميمنة : جا ما يعارف يحظرهن
_ لا ما يعارف ،اصعدي لا اصيحن امي عليج اگلها چنتج ما مداريه ابنج
ميمنة : گليلها
_ اسويها والله
تأفأفت وصعدت فوگ وانا أبتسمت احسن بروحي مسوية انجاز ،شوي ونزلوا ثنينهم ،لابس هدوم الشغل من يمشي للگيعان ،استغربت مو هستوه راد
واليوم كله مو بالبيت
ميمنة : ارتاحلك شوي وأمشي ،لا تضغط على روحك
صخر : ما اطول ،اردن بساع
ميمنة : ما متوازي شوف عيونك صايرات دم من النعاس
صخر : شلون ما متوازي ،الولد كلهم هناك اليوم
ميمنة : اوووف
صخر : افرديها شبيج غندبتي
رفعتله حاجبها وهو خزرها وطلع ،وانا گاضتها بس اباوع عليهم واهزن بايدي ،اندارت علي
ميمنة : شفتي اخوج شگد غثيييت ،شفتي ؟
_ خايبة هو احنا مخلصها بس يخوزر بينه شمتاني ما يخزرج وأنت تعرفيله حاجبج
ميمنة : وياي علي أنت ؟
_ وياج وياج
ميمنة : صدگت
°ليث°
شعلت الجمريه وانداريت عليه واگف وراي يدخن
_ شني شبيك ضايج ؟
صخر : مابي شي .
رفعت راسي على صوت ضحكهم ،صحت
_ تالعوووا هناا ،شعلت الجمررريه ،لك عزيز خابر حق يجي
شوي واجه گبلهم وهم وراه يمشون
عزيز : ولا اخابره خل يولي
_ هااا بعت الصحبه علمود مره
عزيز : انجب لك
ضيرم : اليوم ساحلنه للگيعان شعدك ويانه ،جمعة اريدن انام ارتاح
_ جا مو أنا يوميا مسحول ،عيشوا تعبي شوي مو تجيكم فلوس على الحاظر
فقار : جا غير هي حصة الاسد الك
ضحكت ومديت ايدي اتدفه الجو يضحك علينه يوم حار يوم بارد ،وهم كلهم واگفين يمي
نوح : انا جبت اللحم وياي اذا ما تسولي تكه على هاي الجمرية فلا اضلن هنا
فقار : وانا وياك والله
_ سهله ،جيبوا اللحم والشياش ونشوي
نوح : اللحم خليت ميمنة تگصگصه وحتى ملحته بس الشياش نسيتهن
صخر : واحد منكم يمشي يجيبهن
نوح : فقار امشي أنت وجيب خبز وياك ،شوف ياهي خابزه اليوم خبز جديد
ضيرم : مرتي خابزه اليوم شلون خبز يرد الروح
صخر : جاي تحجيني وانا ساكت
ضحك يداهره وفقار ما رضى يمشي الا نوح وياه ،مشوا ثنينهم وانا خابرت حق اجه كملت لمتنه متانيهم
صخر : خرررب ساسهم ،اليوديهم لازم يأيس
ضيرم : هسة يجون لا تخبصنا
هستوني فكيت حلگي اريدن احجي وسمعت صوت صيحة نوح ب أسم فقار ،تلفتنه كلنه واحد يباوع بوجه الثاني وكل واحد اخذله جهه يركض بيها نريد نعارف منين جاي صوته ،وركضت اكثر وقوى من سمعت صوته العالي والخايف بنفس الوكت من صاح
نوح : ماتمووت ،والله ماتموووت
بهتت من صاروا گدامي ،فقار ممدود وراسه بحضن نوح وبس شافني واگف گدامه گال بصوت يرجف
نوح : طاح بايدي ولك ليث طاح صاحبي بايدي ...
