رواية خلخال مشوه الفصل الثاني بقلم زمرده
ليث گدامي يمشي من سمع صوت صيحتي ردلي
يركض گعد گدامي وانا لازمه رجلي واون من الوجع
ليث : شكووو ؟ شبيج غاية ؟
بجيت ونزعت الجوراب
_ رجليه ما اعارف شني طب بيها
دنگ يباوع لرجلي ،مسح الدم بالجوراب
ليث : هاي گزازه طابه برجلج
لزمت ايده أبجي من راد يطلعها
ليث : ولج لا تمشي جوه ،خلِ اطلعها
_ ليث هدها عليك الله
ليث : تضل تنزف رجلج احسن
سكتت اباوعله والوجع طحن روحي ،من شافني
ساكته جرها بساع ،يايمه غير روحي راحت
لزمت رجلي انوحن مفرفحه وهوَ وگف گدامي من
اجه عليه أبن عمي يوسف
عبد الحق : هااا ليث شكو ؟
ليث : ماكو شي بس هاي غاية طبت گزازه برجلها
عبد الحق : جا أنتَ شعدك جايبها وياك ؟
ليث : رادت تجي وگلت ما لاتضل بنفسها صار هواي تلح عليَّ تريد تجي .
عبد الحق : جا خوية من شوكت نسوانه تجي للگيعان ؟
ليث : لا تسويها سالفه ،شغلة ساعة ورادين
عبد الحق : وين صخر عنك ؟
ليث : لا اله إلا الله ،الله منين موديك عليَّ
عبد الحق : أمشي يلا ولا تتأخرون .
ليث : شو تتأمر ؟
باوعله صفح ومشى ،اندر عليَّ ليث حاير شيحجي
وانا حال رجلي بالظيم گمت اريد ادوس ما اگدر
من شاف حالي هيج ما رضى اضلن وياه وگال نرد
شنو غير گلبي انطحن انا ما عولت اجي تالي هيج
يصير بيَّ...
بس رديت للبيت وشافتني جفون باوعتلي بمشاته
جفون : حل ،هاي حوبتي لان ما اخذتوني وياكم
صحت بيها روحي طافرة
_ والله اگووووملج
جفون : حل حل حل ،تستاهلين
غضة : دهر صابج يالعرمه تتشمتين بأخيتج
_يممممه تعاااي لجفوووون
زهرة : رموووش شبيج ويَّ غاية
جفون : عمة گتلها من تمشون اروحن وياكم ضربتني بوري ومشت بس هيَ هل تعورت هاي حوبتي
زهرة : يااا ياااا يمن كون فلك الفلكج تشمتين بيها
اجتها أمي بأيدها المس ،وهي ضحكت وركضت
تحجي
جفون : جا شني عمة وحد بس هيَ تمشي وانا لا ،حل هل أكلتها ليش هدتني
وگفت أمي فحطانه وهيَ ركضت تضحك وتباوع الها
زهرة : فلك صابج كون جنج زيبگ
جفون : عمة وين بيج حيل تركضين أنتِ ،خطوتين
وتفحطين
زهرة : يااا ياااا خايبات الزمنها ألي
_ وين بيه أگوم انا
هيوفة : انا اجيبنها الج يمة
جفون : لا تصيرين مسمووومه
لزمتها هيوفة تريد تجيبها الامي وهيَ بأيدها تتصارع
من شافتها ما راح تهدها عضتها من ايدها وفلتت
تضحك
جفون : ولية سويتن عليَّ،هوَ هذا الفقير هيج مظلوم والله خطية انا
صيحت شايغة روحها
هيوفة : خطاج البين وشمروج يم الحسين ،سم حيه مو بشرررر زرفت أيدي يمة
جفون : تستاهلين ليش تعيلين بيَّ
زهرة : والله ياعمة لو حيلي يعيني اگومن اكتلج كتله غسل ولبس
جفون : ليش عمة مو حرام ،اليتيم كلها توصي بي هيج تأذوا ؟
ضحكت ادنگ كارثه والله بساع خلت امي تلمها بحضنها مقهوره من روحها ،وهيَ تمثل البجي
خلت امي تتندم بالساعه البيها حاجتها عود تعارفها
بس مرات جفون تعبر سوالفها حتى على امي الربتها
هيوفة : يمه ترا چذااابة والله
زهرة : لا يمه شني جذابة شوفيها تريد تبجي
هيوفة : جااا شني ما تعارفين سوالفها ؟
زهرة : اسكتي اسكتي كله منجن تخلني اغثنها
هيوفة : لا والله
جفون : أي والله
_ هسه صار ساعة ملتهين بجفون وانا المتعوره
محد بحالي
هيوفة : والله نسيت ،تعاي اعقملج رجلج
_ وين اجي يمعوده هوَ انا وين بيَّ امشي ،جيبي
الغراض وتعاي
مشت للمطبخ جابت علبة الدوه وأجت ،گعدت
گبالي تباوع برجلي
هيوفة : چن تحتاج خياط
_ يمعوده يا خياط دخيلج وين بيَّ حيل انا
هيوفة : خوافة ،عدليها خلي أعرف اضمدها
عدلت رجلي وهي عقمتها ولفتها ،وبس كملت شالت
الغراض وگامت ترجعهن لمكانهن
شوي ورجعت تفتر بأيدها مكناسة السعف تكنس
وتحجي وياي
هيوفة : خوش وكت انشكت بي رجلج راح تخلصين من الشغل والركض
_ والله عود گلت اعوف الشغل كله عليج بس انقهرت
لان هسه وكت مجالس مو مال اتعور شلون اطلع
هيوفة : عبالي مقهوره عليَّ لان راح ابقى بس انا
وجفون وهاي تعلني ما تتحشم
_ جا ما فكرتي بيَّ من عفتيني بس أنا وياها ؟
هيوفة : ادري بيج تگوميها تشتغل بس انا ما الح
عليها
جفون : شكددد اخذتن غيبتي ،اجر خدمتجن كله
راح يصير الي
هيوفة : أنتِ الوحيده من أخذ غيبتج ما احس بذنب
جفون : ليش وحد أنا ؟
هيوفة : دروحي حضري استكاين التوزيع
جفون : مااا
هيوفة : باعي تستاهلين اخذ غيبتج
جفون : حرام عليج
هيوفة : خية عوفيني أنا والحرام نتفاهم بعدين
مشت تريد تروح للغرفة بس رجعت وگفت گدام
هيوفة تسألها
جفون : شسوي ؟
هيوفة : شنو ؟
جفون : اعاونج
هيوفة : منج من الشيطان
جفون : ابطل والله
هيوفة : أنتِ وضميرج وين الحگ وحدي
جفون : قهرتيني
هيوفة : بس طلعي الاستكاين و المواعين اغسليهن
وطلعي الصواني مال خطار النوزع بيهن كل سنه
جفون : خوش
مشت للمطبخ وانا باقية بس اباوع بعيوني احس
مليت هاي شلون بيه متعوده أشارك بكلشي
للمجلس وهسه گاعده بس اباوع بعيوني والله
كلش مو وكت السالفه هاي...
گمت اتجه على الحايط بالگوه امشي بس المهم ما
ابقى گاعده وحدي ورحت يم جفون بالمطبخ
گعدت على الكرسي مال امي مخليته هنا حتى من
تطبخ تگعد عليه لان ما تتحمل تبقى واگفه ولا
تگدر تگعد بالگاع وكلساع تگوم
اباوع عليها تغسل بالاستكاين ومادري شتقره من
قصيدة ،صحت بيها
_ شجاي تقرين ؟
جفون : هيج قصيدة
زهرة : هااا يمه خلصتي ؟
جفون : بس بقن جم واحد
زهرة : اخدر الجاي هسه ؟
_ أي هم يالله
زهرة : گومي بيج مابيج خدري متعودين كل سنه
تسوي أنتِ
_ من عيوني
گمت بالگوه ادوس احاول اتناسه الوجع ،طلعت
القوري الجبير ترسته ماي وهيل وخليته على النار
وبين ما يحمى رجعت گعدت ماگدر ابقى واگفه
اكثر...
هيوفة : يا يمه وگف گلبي
طبت فحطانه من الحوش ،گعدت بالگاع تلم شعرها
وتحجي ويا جفون
هيوفة : كملتي ؟
جفون : أي
هيوفة : عفية معدلة
أبتسمت جفون وگعدت يمها
هيوفة : اگوم اسبح لعبت روحي من روحي
زهرة : ولج يمه الجو بارد ترحين تتمرضين
هيوفة : لا ما عليَّ شي ،اتدفة زين
زهرة : روحي يمه بساعج مادام ماي حار اكو
هزت رأسها ب أي وگامت تروح تسبح ،من حمه الماي
شلت القوري خليت التاوه ورجعته ،خليت الورگ
ونصيت النار حتى يتهدر براحته ورحت للغرفة بدلت
هدومي وگعدت امشط بشعري وطبت جفون
مطنگره ،گعدت لامه الوجه وما تتحاجه تنافخ
_ شبيج ؟
جفون : جدج شوكت يبطل يگلي بت البدوية ؟
تحجي والغصه تصعد وتنزل ببلعومها
_ بيها عيب اذا امج بدوية ؟
هزت رأسها ب لا ،گعدت گدامها اشرحلها للمره الالف
يمكن
_ جا ليش تضوجين ،أم البنين عليها السلام هم بدوية وهيَ أم إِمام
شني أنتِ تضوجين لو صاحولج بت البدوية وهوَ
سلام الله عليه كله يسموه أبن البدوية .
هيوفة : شهل عقل هذا ،شلون حجي حلو
أبتسمت وگمت من گدامها من طبت هيوفة
هيوفة : أعرف جدي يحجيها حتى يغثج ،ولان هوَ
يعرف بيج تضوجين يعيدها عليج ،بس أنتِ صيري
ذكية من يكلج هيج لا تخلي يحس بيج تضوجين
راح يبطل يكلجياها
جفون : ولج هوَ يحجيها بأستهزاء ما أتحمل ابقى
ساكته
هيوفة : لازم تسكتين ،ونصيحه لا تخلين أحد
يعرف نقاط ضعفج وابسط مثال جدج
هزت رأسها ب أي بس جذب احس بيها ما مقتنه
وجاي تسلك النه ،حقها تنقهر بس جدي ما يحب
أحد يلاسنه هوَ الولد والاعب بيهم طوبة شلون
لو جانت بنيه...
طلعنه انا وهيوفة من صاحتنه أمي ،دلغمت ومشيت اعرج وگفت كدامهن متخصره ،واگفات ينزعن عبيهن وأمي ومرة عمي گاعدات يسولفن
_ شني ليش ما اجيتن امس ؟
بصائر : امشن للمطبخ احجيلجن
شيماء : من شاف احبابه نسى اصحابه ،ما تجن تسلمن عليَّ ولجن
ضحكنه انا وهيوفة ومشينه سلمنه عليها ورجعنه
للمطبخ ،بس طبينه وگفتلهن
_ أحجلي ليش امس ما بينتن ؟
ميمنة : يمعودات غير امس صارت للضالين بين
أبوي وبرهان
هيوفة : ليش ؟
ميمنة : يريد يمشي لبغداد اليوم عدة واجب وأبوي
يگله گبل لا تروح افتر على الفلاليح ،وبرهان يگله
وكت ماعدي وأبوي عاند ويا الا يروح ،وتعرفنه منا
روحه بخشمه تعاركوا
هيوفة : عمي شبي ويا الولد ما يعوفهم بحالهم
بركة : مادري خية بزعنه من المشاكل والله ،ولاجن
ولده يوميه مشلوطهم
هيوفة : الله يهدي
جفون : النسوان اجن وأنتن تسولفن
طلعنه من المطبخ للحوش نتلگه النسوان ،وبنص
ذيج الهوسة واگفه أنا وهيوفة ،فزت وعينها تشكلت
تباوع على الباب من سمعنه صوته من وراه يصيح
_ عمه أم صخر
باوعت عليها بلعت ريگها ودنگت من طلعتله أمي
ونسمعه يحجي وياها
_ عمه رايد منج خدمه
زهرة : يا يمه من عيوني
_ نريد نوزع لبلبي الولد رداوا يطيبخوا گلتلهم تخربوا ماكو غير عمه أم صخر تسوي
زهرة : يااا يمة نمونه ،شوكت تردوا ؟
_ للريوگ
زهرة : خوش بس روح جيبة حتى انگعه من هسه
_ صار هسه ادزلجياه بيد واحد من الولد
بركة : تعالن نوزع الماي
مشينه وياها للمطبخ نحظر دولاك الماي ،گعدت بالگاع من حسيت برجلي تجري دم ،فتحت الشاش
والوجع زاد من شفتها مفتوحه فتح
بصائر : شبيها ؟
هيوفة : اليوم راحت ويا ليث للگاع وتعورت
بصائر : يااا شعدج رايحه ولج ؟
_ صار سنه اتوسل بليث وتالي من اخذني ويا
نص الطريق ورجعت لان اكو نااااس حطوا عيونهم
عليَّ
جفون : انا حطيت عيني عليها
بركة : تعترف
جفون : طبعاً اعترف ليش خايفة قابل ؟
بصائر : لا وينج وين الخوف عمي أصل العرامه
أنتِ
جفون : شكراً لشهادتج
هيوفة : الماي شوكت نوزعه للنسوان ؟
ميمنة : اطيني انا اوزعه لو نضل عليهن النسوان
يكتلهن العطش
جفون : خليهن يحسن شوي بعطش الحسين
ميمنة : عليه السلام ،اطيني هيوفة
اخذت الدولكه مو ايد هيوفة وراحت وبركة
اخذت الثانيه وهيوفة هم اخذت وحده وانا
باقية گاعدة بالگاع كاتلني القهر ،زاد وجع رجلي
ومابيَّ حيل حتى اگوم اروح للديوان...
كوكبة : هاا شوو گاعده هنا ؟
رفعت رأسي على صوتها واگفه بباب المطبخ تباوعلي
_ولج جا غير تعورت رجلي بگزازه
كوكبة : اگول خانسه
اجت گعدت يمي تباوع لرجلي
كوكبة : الشگ جبير ولج
_أي
كوكبة : جن يحتاج خياط
_لا يييمه
كوكبة : جبانه
_مو اكفخج
كوكبة : ارجعها الج وتعرفين ايدي شلون ثگيله
اجت هيوفة خلت دولكة الماي على السنك تحجي
ويانه
هيوفة : عوفن النگره وگومن يم النسوان
كوكبة : ماتشوفين هاي معوقة
هيوفة : لو بس تبطل تگول هاي
كوكبة : هاي هاي هاي معوقة
هيوفة : ما يفيد وياج الحجي أم الشط
كوكبة : هااا مني ؟
هيوفة : تبرت من نفسها
اشرت بعيونها على الباب ،واگفة رقية وبركة
يسولفن بس شافتهن هيوفة سكتت وطلعت
من المطبخ ،بقت كوكبة گاعده يمي ومن خلص
مجلسنه كلها مشت وانا ضليت يم جده لان
كلش ما اگدر امشي...
گاعده بالصاله بيدي الريمون اگلب بالقنوات ،ومن
طلعتلي قناة تعرض بس قصايد ضليت ما درته
عليت الصوت وبديت أقرى ويا القصيدة وجده تلطم
وياي
_قصة ألم بمتوني ،يرويها دمع عيوني
والتكره تشوفه العين ،شفته لمن عفتوني
جم قصة تتراوالي يوم الغبت يالغالي
جابولي راسك ياحسين شفته وصحت يالوالي
يضرب ثنايك بعود ،گصده يعذب حالي
كل نضره من الشمات ،سيف وگطع دلالي
مضرب مثل خدري جان ،محد يشوف اخيالي
وانده يراعي الچفين ،ترضى العدى يشوفوني
قصة ألم بمتوني ،يرويها دمع عيوني
والتكره تشوفه العين ،شفته لمن عفتوني
غضة : يايمه فدوه لهل صوت .
أبتسمت
_ منيلي صوت حلو
غضة : خيبه اسكتي اسكتي ،وحگ الحسين
بچيتيني
سكتت اباوعلها تمسح عيونها بشيلتها ،انداريت
على صوت ليث جاي ويحجي بالموبايل
ليث : كملن عمي بس مثل ما اتفقنه على السعر
سكت شوي ورجع گال
ليث : هاي هيَ باجر تعال اخذهن ،في أمان الله .
سد الخط وگعد يم جده ،طبگ المخدات وذب حيله
عليها تعبان
غضة : تعبان بعد جدتك ؟
ليث : أي والله جده ،طاح حض حضي
غضة : من حيلي على حيلك
ليث : سالم حيلج جده ،الله يخليج خيمه النه
غضة : خايب فدوه لهل حجايات ،جا شبي أخيك
ما تطلع الحجاية الزينه من حلگه
ضحك يمسح وجهه بالجفيه ،رفع رأسه على باب
المطبخ زغر عيونه مبتسم
ليث : تعال تعال ،جده اخذت غيبتك
صخر : جا ما اعرفها انا ،خلني اطلع منا لهنا وگصتني
غضة : يااا ياااا دهر الدهرك ليث انا يمته اخذت
غيبته
ليث : جا مو گلتي شبي أخيك ما تطلع منه
حجاية زينه
عدل دشداشته السوده وگعد ،شغل جگاره يحجي
ويا جده
صخر : جا طلعت ما اعرف احجي حجاية زينه ،
هيج جده ؟
ليث : كل مرة تگلي بس انا ما اگلك
غضة : يااا ولك شووو اختلفت عليَّ ،غير جنت
امدح بيك
صخر : جا تمدحي وتذميني ؟
غضة : يااا حبوبه راح تزعل ،كله من جوه راسك
ليث أبو الفتن
صخر : جا تردين تضلين تحجين عليَّ وانا ما اعرف ؟
غضة : ولك حبوبه ما حاجية عليك ،بس أنتَ
صدگ
ما تطلع منك الحجاية الحلوه مو مثل أخيك
سوالفه مملوحه وياي .
ضحكت ودنگت أظم ضحكتي ،ليث يريد يسكت
ما يگدر يضحك ويگح بنفس الوكت
ليث : يابوووويه ما بقيتله لا مشاعر ولا احساس ،
جده هيَ هيج ؟
صخر : خليها ،خليها هيَ هاي جده تعلمت عليها
غضة : جا حبوبه أنتَ ليش ما تتحاجة
ليث يضحك ويضرب على گصته مصدوم من صراحة
جده ،وانا ما گدرت اسكت ضحكت بصوت عالي
خزرني ودار لجده يحجي
صخر : جده اليوم شبيج وياي ؟ أحد مسلطج عليَّ ؟
غضة : لا والله بس انا احجي الحق
صخر : خوش ،انعم الله عليج
طفه جگارته وگام طلع ،ليث عيونه مدمعه يمسح
بيهن ويحجي
ليث : جده مو جن زودتيها ؟
غضة : خايب لا بس خله يحس على نفسه لشوكت
يبقى ما يتحاجه ،حتى مره ما تبقى يمه على
شوفة النفس هاي
ليث : قابل جديد علينه هوَ هذا من يوم يومه هيج
غضة : المره ماتريد واحد مثل أخيك ،تريدلها اليضحك اليشاقه مو مدلغم والخشم ويا العين
ليث : هوَ ما مفكر بالزواج جده
غضة : جا قابل يبقى للدوم بدون زواج اسكت
أنتَ ما تفتهم
ليث : مشكوره
غضة : تدلل حبوبه
زهرة : يايمه تعبت
باوعتلهن من طبن ،امي تون تعبانه اجت گعدت
يمنه وهيوفة طبت للغرفة مادري شبيها مطنگره
وجفون گعدت بصفي تدردم ،ندستها احجي
وياها بصوت ناصي
_ شبيج گالبة الخلقة ؟
جفون : حواري ما أجت ضليت اهبت وحدي
_ حقج مضيعة تكج
جفون : لا تحششين تعرفين ما اتراهم ويَّ غيرها
_ اممم صح ،بس ليش ما أجت ؟
جفون : اندري ،أريد اروح اشوفها
_ اركدي
جفون : لا والله فلا اركد ،اريد اشوف ليش ما
اجت
_ وين تولين ولج ما تخافين تدگين دروب
جفون : ماعليج اسكتي
_ والله اگول الأمي
جفون : حتى اگلها هذاك الأسبوع تعاركتي بالمدرسه ويَّ بنات بيت غازي و ودوجن للمديره
ضربتها على ايدها
_ والله اخنگج
جفون : جا عوفيني بحالي ،تفتنين عليَّ افتن عليج
وحده بوحده
خزرتها وردت وجهي على ليث من سمعته يحجي
وياي
ليث : رجلج شلون صارت ؟
_ وجعها جاي يزيد
ليث : أخذج للمضمد ؟
_ لااا ماروح
ليث : بس يضمدها
_ لا مابيها شي
ليث : جا مو گلتي وجعها جاي يزيد ؟
_ طابت
جفون : ما تعرفها جبانه
ليث : انا الاعرفها بس موزين تبقى رجلج لا تلتهب
_ عقمتها هيوفة
زهرة : گومي يمة خلي المضمد يشوفها
_ ماا
ليث : عنااادج شلوووون بي
نتر بيَّ وگام طلع من الصاله
غضة : جبينة شكبرج بعد تصيرين
جفون : اندري
_ اسكتي أنتِ لا تصيرين خيره
زهرة : وتالي وياجن ؟
سكتنه وحده تخزر بالثانيه ،شوي وطب نوح بيده
جيس اللبلبي
نوح : هذا اللبلبي يمه ودوه الولد
گامت امي اخذت الجيس من ايده تحجي ويا ما
راضيه
زهرة : جا حيل تأخرتوا
نوح : تلحگين يمه تلحگين گدها أنتِ
زهرة : أي قشمرني
ضحك وباسها من خدها وطلع ،طبت امي للمطبخ
ودت اللبلبي ورجعت صاحت على هيوفة وياها
طلعت هيوفة الوجه مدلغم وما تتحاجه ،شبيهن
راحن واجن مطنگرات بالله جفون عرفت ليش بس
هيوفة طنگورتها واصله للموكب...
مشيت وراهن للمطبخ لگيت هيوفة تعجن وأمي
تنگع باللبلبي ،گعدت بصفها اباوع عليها شلون
تفر العجين مسطيرة عليه مو مثلي اذا اعجن نص
العجين اوگعه بالگاع
تعجن وبالها مو يم العجين أصلاً ،من كملت غطته
بالصينيه وگامت غسلت ايدها وطلعت من المطبخ
رجعت جايبة غطوه دثرته وگعدت بصفه تختمر
هيَ وصفنتها ،سألتها شبيج ما ردت عليَّ وگامت
طلعت من المطبخ كله
هزيت ايدي اباوع عليها من طلعت ،من مشيتها
مبين عليها مهمومه..!!!
زهرة : شو تعاي شوفيلي السوده وين ما جاي الگاها
گمت فتحت الكاونتر طلعتها الها
_ هاي گدامج
زهرة : يااا وانا صارلي شگد ادور
_ يحتاجلج مناظر
زهرة : انااا
_ أي ،جا انا ماشوف لو أنتِ ؟
زهرة : ولي ولي مني غدي لهل لسان
ضحكت وحضنتها
_ اشااااقه وياج
زهرة : اعرف ،يالله وخري خل اعرف اشتغل
وخرت منها وطلعت من المطبخ للحوش ،زغرت عيوني مستغربة ،اباوع الها گاعده جوه النبگه
خاله راسها على رجليها ولامه نفسها وجسمها يتهز
جنها جاي تبجي...!!!
مشيت الها بخوف مفزوع گلبي ليش جاي تبجي ؟
گعدت ثانيه رجلي گدامها
_ هيوفة
رفعت رأسها باوعتلي وجها مبلل بالدموع من
شافتني گدامها بسرعه مسحت وجها بشالها الأسود
_شبيج ؟
هيوفة : مابيَّ شي
_جا ليش تبجين ؟
هيوفة : هيج مختنگه
_شنو خبله تبجين وحدج
هيوفة : غاية عوفيني والله مختنگه
_عليج الله شبيج ؟
هيوفة : خلي البگلبي بگلبي ،لو حجيت راح اتأذه
اكثر
باوعتلها مستغربه معقولة يطلع الأفكر بي صح
صار فتره منتبهه عليها مو طبيعيه لو انجاب طاريه وملامحها تغيم لو سمعت صوته
_شبي گلبج ؟
هيوفة : گولي شنو مابي گلبج
_ فريتي عقلي
هيوفة : روحي نامي وراج دوام
_وأنتِ ؟
هيوفة : اريد اخبز ويمكن باجر ما اداوم لان
ماعدي شي
_خوش
°هيوفة°
مشت وانا ضليت گاعده اكل بروحي اكل من القهر
كل ما اصفن عيوني تدمع وكل هاي السنين
تصير گدام عيني كل يوم ضعيته من عمري وانا
اباوعله من بعيد لعبيد كفيل يبجيني ...
گمت طبيت جوه رديت العجين وتوضيت أصلي
صلاتي القضاء بلكي الله يبرد گلبي ،وبنص دعائي
الروحي رايده الله يقلل من تعبي ،ارسمت صورته
گدام عيني ،غطيت وجهي بأيدي وبجيت واصله
الاخر مرحله من التعب ،هاي هيَ روحي انتهت
والله احس بروحي تحترك بالساعه الف مره
وشوفته مثل المحترگ ويديرون عليه بانزين...
بجيت لحدما خلصت روحي ،ما كافي شوكت ارتاح
صار سنين والله ،سنين وانا هذا حالي
من وعيت على الدنيا وانا گلبي بأسمه لا راضيه
اهوه غيره ولا اعيش بدونه...!!!
لميت مصلايتي واحس بعيوني ورمن ،رحت
للمطبخ غسلت وجهي على السنك وگعدت اشنگ العجين وبس كملت غشيت الشناگات وطلعت
خاله الصينيه على رأسي ،خليتها على البلوكات
مسويهن على شكل ميز يم التنور
مشيت جبت خشب وعلگت التنور وبين ما يهفت
كنست الحوش، سعف النخل وارواق النبگه
تارسات الگاع بس كملت رجعت لبست معاصمي
وتلثمت وبديت اخبز...
خلصت نص الخبز ويا الصفنات ومادري شلون وانا
اطلع الخبزه لاحت النار ايدي ،غير شاطت روحي
صرت اگمز بمكاني ،اهفي على ايدي وابجي عيوني
بس يردن حجه واجتهن من الله على الله
گعدت بالگاع ودموعي توگع عشره عشره ،اباوع
على ايدي وابجي وانا أعرف بروحي ماجاي ابجي
لان احترگت لان بالاصل روحي محترگه
بس القاهرني لان اليوم شفته وما باوعلي أصلاً
حتى بطرف عينه ما شافني ،ويمكن ابد ما راح
يشوفني...!!!
گمت امسح دموعي بشالي ورجعت اخبز ،وبس
كملت لميت الخبز وطبيت جوه لگيت أمي
گاعده تريد تخلي اللبلبي على النار ،بس شافتني
عرفت بيَّ باجيه عود حاولت ما اخليها تشوفني
زهرة : شبيهن عيونج يمه ؟
مسحتهن بشالي
_ شبيهن ؟
زهرة : انا اسألج لا ترجعين تسأليني
_ مابيهن شي بس وأنا اخبز طب بيهن طحين
ما گتلها احتركت لان تنقهر وتضل تلوم بنفسها
باوعتلي ما مقتنعه بس سكتت من طب صخر
صخر : گواج الله خيمتنه
أبتسمت أمي تباوع لطوله وعبالك هوَ اعظم
انجازاتها بالحياة
زهرة : الله يگوي حيلك يابعد حيلي
صخر : الغالية
زهرة : بعد روحي ،وين جنت ؟
صخر : بالموكب هاي جيتي ،ورطوج باللبلبي ؟
زهرة : لا يمه دخيلك ياورطه للحسين هذا
صخر : الله يطيج الصحه والعافيه
زهرة : بعد روحي ،اخوانك هناك مو ؟
صخر : أي ليث ونوح والولد كلهم هناك بس انا
رجعت حتى بس ابدل
زهرة : خوش ،اكلك يمه گلي أجاكم مبيت ؟
صخر : لا بعد
زهرة : خوش يمه بس يجن حسب حسابك النسوان
يمنه مثل كل سنه
صخر : أي جا شلون ،هيوفة خوية دشداشتي
الثانيه مكوية ؟
ضميت الخبز بالمجمده وانداريتله
_ هسه اشوفها واذا ما مكوية اكويها
هز رأسه ب أي وگعد يم أمي يسولف الها شجاي
يحظرون للرويگ وانا صعدت لغرفته لگيت
الدشداشه ما مكوية هم زين وطنية بسرعة
شغلت الاوتي وكويتها ،وبس كملتها طفيت
الاوتي واحذتها اله
_هاي كويتها هسه
صخر : عفية
اخذها من ايدي وصعد ،شوي ونزل سابح و ويَّ
الدشداشه السوده لاف جروايه هم سوده بشكل
كلش مرتب ،وگف يمنه أنا وأمي يفر بسبحته
صخر : رايح انا محتاجات شي ؟
زهرة : سلامتك يمه بس ساعه ويكمل اللبلبي ودي
الولد بالبيكم ياخذوا
صخر : خوش
طلع وانا گعدت اتثاوب من شافتني أمي گالت
روحي نامي ،ماگدرت اعوفها وبقيت گاعده من
أجوي الولد اخذوا الجدر الا طبيت نمت ...
فزيت على أيد أمي تنهدني
زهرة : راح تتأخرين على دوامج
غطيت رأسي
_ماعدي شي ما اروح
زهرة : غاية حركي روحج تنبل يمه
غاية :رجلي مورمه شلون اروح
زهرة : ياا يااا شو اشوفها
غاية : توجعني حيل
زهرة : هاي صدگ مورمه ،خوما عدج امتحان اليوم ؟
غاية : لا ماعدي
زهرة : جا ابقي لا ترحين
طلعت أمي من الغرفة وانا رجعت نمت ما گعدت
غير ويَّ صوت أذان الضهر ،گمت لميت فراشي
وطلعت من الغرفة لگيت جده وأمي يتغدن
_ صباح الخير
غضة : هلا يابعد روحي ،مسائج خير جده
زهرة : هلا يمه ،تاكلين ويانه ؟
_ بس اغسل
مشيت غسلت وجهي ورجعت گعدت وياهن بس
كملت شلت الصينيه عزلتها وخليت قوري الجاي على النار و وگفت اغسل المواعين بين ما يفور
جفون : خيبببه هدي بطتي
غسلت أيدي من التايت ومشيت اشوف شبيها
جفون : غااااية هديها شبييج
باوعتلهن يركضن بالحوش ،غاية لازمه بطة جفون
وتگمز على رجل وحده وجفون تتلاوه وياها
تريد تأخذ البطه وغاية ماردتها بأيدها وهاي تريد
بس تاخذها
جفون : حرااام عليج امها تباوعلج شوفيهااا
غاية : املصها تره
جفون : حتى املصج وراها ،هديها
غاية : ما
جفون : وجعاا وسمااا
اذا ابقى واگفه بس اباوع يبقن لباجر يتعاركن ما
عدهن مانع ،مشيت الهن
_ ماتنصن صوتچن خزيتنه
جفون : گليلها تطيني بطتي
غاية : ما
_ اطيها الها ،شبيج ؟
غاية : جا ما تحاجيها گاعده اكتب اجت شگت
الورقة ومشت
_ يااا ليش ولج ؟
جفون : اتشاقة وياها
لزمت البطه من رگبتها
غاية : انا هم اتشاقة
جفون : غااااية هديهاااا
خزرتهن اباوع على الباب هسه ساعة الساعة يطب
واحد من الولد وصوتهن شعلوه والله يلعبون لعب
_ اطيها الها غاية ،شبيج عقلج وياها ؟
هدتها من ايدها وگعت بالگاع ،شالتها جفون تغلط
على غاية وراحت خلتها يم امها
جفون : هم عرجه وهم ما تگعد راحه
غاية : لا تگولين عرجه ،حيوانه
عفتهن وطبيت للمطبخ من تذكرت الجاي ،هم زين
لگيته فاير بس لان ماتارسه القوري ما دمر الطباخ
نصيته و وگفت اخض المواعين ،وبس كملت
صبيته ورحت للصاله اطيت لامي وبيبي ،وانا اخذتلي گلاص وگعدت اشرب وعيني عليهن يسولفن
شوي وطبن جفون وغاية گعدن وحده تخزر بالثانيه
وبنفس الوكت طب نوح عيني صارت على القفص
البيده سلم وصاح على جفون ،گامتله تباوع على
العصافير بالقفص يزقزقن ،أبتسم من شاف عيونها
مو يمه ...
نوح : ترديهن ؟
ضحكت وهزت رأسها ب أي
نوح : بس نتصالح هنَّ يصيرن الج
مشتله تريد تأخذ القفص منه
جفون : ميخالف نتصالح
رفع ايده يطيها القفص
نوح : هاج
گمزت بمكانها فرحانه واخذت القفص تضحك
جفون : يخبلن ،يخبلن ،ذني طيور الحب مو ؟
نوح : أي
زهرة : منين جبتهن ؟
نوح : من ولد صاحبي عده هواي وگال اخذ
تذكرت جفون عاجباتها وجبتلها
زهرة : خوش ،وزعتوا الغده بعدكم ؟
نوح : عفتهم يوزعون
زهرة : زين ما متأخرين
نوح : جا غير صخر وضيرم واگفين على راسنه
زهرة : والله دوه وياكم
ضحك وطلع يرجع للموكب ،وجفون گعدت مخليه
القفص طايره بالعصافير ،تحجي وياهن وتضحك
جفون : زقزوقات ،تردن ماي عطشانات ؟
فريت ايدي اباوعلها وگمت طبيت للغرفة طلعت
ملازمي وگعدت اقره ماعدي شي هسه وبالليل
نلتهي ماگدر اقره عاد هسه اخلص احسن
للعصر انا فد جره گاعده ما گمت الا من خلصت
كل تحاظيري
مطيت جسمي افرك برگبتي ،گمت طلعت من الغرفة
گعدت على باية الدرج ،جدي وأبوي گاعدين
يحسبون فلوس للموكب ،وانا گاعده أيدي على خدي
اشوفهم شلون فرحانين الفلوس اكثر من ما
يردون ...
غضة : بركة الحسين هاي
محمد : أي والله زايد مليون وميتين
غضة : اللهم صل على محمد وآل محمد ،فدوه
اروح لبركة أهل البيت
رأجس : الزايد ضمه للعازه ،وهاك هذا مليون خلي
جوه ايدك
محمد : خوش
أخذ الفلوس أبوي وطلع ،وجدي ضم الباقي ورجع
گعد يم جده ،فز گلبي من گال
رأجس : غضة أريدن بفرحة الزهره نعقد لثنين من
الولد
غضة : منين أخذلهم ؟
رأجس : بنات عمهم المن ،تردين اطبب غريبة ؟
غضة : لا شني ياغريبة ،تخطب المن ؟
رأجس : الكبار بالبداية
غضة : زين تسوي
خليت أيدي على گلبي ،شلون لو صارت صدگ
شلون لو سنين عمري تضيع بقرار جدي ،شلون والف
شلون صارت براسي ،احس بدگات گلبي بأذني صارت ،من القهر نفسي لعبت ،گمت اركض للمغسله
فرغت معدتي ومادري على شنو ابجي من وجع
معدتي لو من وجع قرار جدي على روحي ،وانا متاكده لا هوَ الي ولا انا اله ،غسلت وجهي أرجف
وأمي واگفه تمسح على ضهري وجده وراي كاتلها
القهر على حالي الانگلب برمشة عين...
مشيت انود أمي ساندتني ،گعدت وجده گعدت بصفي تصلي على محمد بوجهي
غضة : انحسدتي ياجده ،هاي أنتِ كل محرم
توگعين علينه من عيون المايصلن على محمد
من يشوفنج
مددت اغمض عيوني ،ماتدرين ياجده البگلبي شنو
وشلون بكل محرم وانا طالعه لو صدفه اشوفه شوفته تسلب روحي مني وتبقيني جثه بدون روح
وانا أعرف هوَ ما يشوفني مثل ماشوفه...
زهرة : اگعدي يمه اشربي هاي الحباية بلكت الله
تهودين
گعدت اخذت الحباية وگلاص الماي من ايدها
شربت ورجعت مددت عبالك حيلي كله راح
تبخر، بخبر مثل التيزاب وگع عليَّ حرگني حرگ ،لا البيه اسكت ولا امثل انا بخير ولا البيه احجي...
مرت بالساعه انا امدده ،بس شفت الساعه ب 6
گمت حتى أنضف البيت اليوم أخر يوم قراية
عدنه لان راح نفتح مبيت النسوان بالبيت ،بس
شافتني أمي لازمه المكناسه عاطت بيَّ ما راضيه
اشتغل...
زهرة : هيدي معدتج موزينه
_ جا اذا ما انا انضف البيت يبقى ومابقى شي
تجي الملاية
زهرة : خل يولي البيت
_ يايمه شني يولي والله صرت زينه
زهرة : جا لا تنضفي كله بس الديوان
جفون : انا راح اطلع انضف الديوان والحوش
وخليها تنضف الجوه
زهرة : عفية بعد عمتج ،وأنتِ يمه هيوفة على
كيفج من تنضيفين بعد اكثر من ساعتين لاحگين
هزيت رأسي ب أي ودنگت أكمل كنس ،وبس كملت
مسحت البيت كله وطبيت سبحت لان لعبت
نفسي من نفسي ،مشطت شعري ولبست شالي
وطلعت من الغرفة من سمعت صوت بنات عمي يوسف جايات ،سلمت عليهن وتساعدنه كلنه نسوي
حلاوة التمن...
ميمنة تسويها وانا احضر المواعين السفري على
الكاونتر وبصائر تغسل المواعين الوصخه وجفون
تطحن الجوز حتى نخلي على الحلاوه ،وكت ماكو
نركض مراكض بس نريد نخلص ...
ميمنة : تعاي شوفي حلاتها زينه ؟
اخذت خاشوگه واكلت منها
_ تخبل عاشت ايدج
ميمنة : وايدج ،تلحگ تبرد ؟
_ أي تلحگ بعد ساعة
ميمنة :لو أعرف راح تسوّن حلاوة تمن جان أجيت
من وكت ماعدي شي
_ والله حتى أنا مادري
صبت الحلاوه بالمواعين وجفون وراها تخلي الجوز
حواري : سلاااام
طبت تنزع عبايتها وجفون بس شافتها عافت الجوز
وراحت تعاتبها
جفون : خسيس ليش امس ما جيت ؟
حواري : وداعتك أبوي ما خلاني
جفون : جان وديت خبر مو خليتني اتانيك تالي
تضربني بوري وماتجي
حواري : بيدمن اودي خبر جا غير كلها بالموكب
بصائر : لعبتن روحي
حواري : ليش عيني ؟
عزلت المواعين المغسوله بالي شارد ،فززتني كرصتها
ميمنة : شبيج وين صافنه ؟
_ما صافنه
ميمنة : عليَّ ،شنو مضوجج ؟
_بعدين احجيلج
باوعتلي وجن عرفت شنو مضوجني ،دنگت اضيع
عيوني ماريد احد يشوفهن شكد يبجن
كملنه وطلعنه من المطبخ ،ماكو شوي والتمن النسوان وخلص أخر يوم نقره بي وبنفس الليله
فتحنه بيوتنه مبيت للنسوان...
زهرة : يمه هيووفة
طلعتلها من الغرفة بيدي البطانيه
_ هاا يمه
زهرة : راح تفرشين ؟
_ أي هم يمه النسوان يردن ينامن
زهرة : عاشت ايدج ،بس تخلصين اخذي هدومهن
وخلي جفون تشغل الغسالة
جفون : ردت اگلج تعبانه بس تذكرت الي أجر
زهرة : دهر اذا مو اجر ما تگومين
ضحكت ومشت تأخذ الماي للنسوان وانا صرت
احول الفراش للديوان افرش واسمع سوالفهن
منهن التحجي منين طالعه ومنهم التحجي هاي
يا سنه ماشيه ومنهن الطالبه مراد وجايه ،گعدت
يمهن متونسه على سوالفهن ،كل سنه نحسب
ساعه ساعه لجية الزوار على طريقنه...
_ يمه انا طالبة مراد الابني الله يرزقه بالوليد ونذر
عليَّ اخلي يسمي حسين
سألتها بفضول جاي تسولف ويا المره بس انا
سويت ربط فيشه وياهن
_ ليش خاله ماعده خلفه ؟
_ لا عده ياخاله بس بنات صارن سته ولهسه ولا
وليد
_ يا خاله أن شاء الله ،الله يطيج مرادج
_ الله يسمع منج بجاه الحسين الشهيد
جفون : زوارنه العدها هدوم تريد تغسلهن تطنياهن
والتريد تسبح تگوم ادليها الحمام البيت بيتكم
أبتسمت على حجيها الحلو ،لسانها ويانه يغرد
تغريد بس ويا الغرب ينگط عسل
زهرة : يمه هيوفة تعاليلي
گمت طلعت من الديوان واگفه بالباب تحوم
_ ها يمه
بس حاجبتها لطمت على خدها وبصوت ناصي
تحجي ماتريد النسوان يسمعن
زهرة : ولج مصيبه وطاحت على راسنه ولدنه وبيت
غازي صايرة بالتواثي بالموكب ...
وبنهاية كل بارت
اگُلجن سولفلي شلونه
البارت 🫣
