رواية جثة العناية الفصل الثاني بقلم محمود الأمين
كنت فاكر إن البصمات هتخص أي واحد من المشتبه فيهم، سواء الزوج عادل، واللي وراه سر كبير في موضوع أخته، وأكيد هنحقق معاه ونعرفه، أو الدكتور شريف، اللي أخته ماتت بسبب إهمال وعند من الدكتورة نهلة، أو حارس الأمن اللي اسمه عبد الله، واللي من أصل صعيدي، ومشكلته مع الدكتورة نهلة لما ضربته بالقلم واتبلت عليه إنه عاكسها.
ولكن البصمات طلعت تخص دكتور اسمه الدكتور حازم.. وللأسف مش هنقدر نتهمه بأي حاجة، عشان باختصار الدكتور حازم هو المسؤول عن حالة الدكتورة نهلة.. هو اللي استلم الحالة لما وصلت المستشفى، وهو اللي دخلها العناية، ومن حقه يدخل يشوف الحالة ويزود حاجة في التقرير اللي بيكون موجود جوه الأوضة، في حالة تحسن حالة المريضة من عدمه.
فأكيد بصماته هتكون في غرفة العناية المركزة.
وساعتها اعتمادنا الأول والأخير كان على حاجتين:
أول حاجة، العسكري اللي شاف الدكتور وهو خارج، ورغم كده هو مركزش في ملامحه، وقال إنه كان باصص في التليفون، بس على الأقل لمح لون بشرته، طويل ولا قصير.. تخين ولا رفيع.
والحاجة التانية، واللي كان فيه تركيز عليها، الكاميرات اللي أكيد هتوضح مين الناس اللي دخلت المستشفى في اليوم ده، ومين اللي قرب من غرفة العناية المركزة، خصوصًا في الفترة اللي دخل فيها العسكري الحمام.
....
وساعتها اتحركت على المستشفى، وأول ما وصلت هناك قابلت الدكتور حازم، واتمشيت معاه لحد غرفة العناية اللي حصل فيها الجري.مة، وكان معايا العسكري اللي كان موجود على غرفة العناية.. كنت مفهمه كل حاجة قبل ما ندخل المستشفى، وكان قال على أوصاف قليلة للدكتور اللي كان خارج من غرفة العناية المركزة.. بس لما وقفنا مع الدكتور حازم، أنكر إنه هو ده الدكتور اللي كان جوه، وقال التاني كان أقصر منه شوية وبشرته سمراء.
ولكن لما رجعنا الكاميرات، اكتشفت صدمة جديدة خلتني طلبت أقابل مدير المستشفى ضروري.
_ خير يا صلاح باشا.. طلبت تقابلني ضروري؟!
= هو مش المفروض المستشفيات يكون فيها مولدات كهربا عشان لو في أي لحظة فصلت الكهربا، المولدات دي بتشتغل تلقائي وتنور المستشفى؟
_ أكيد، وده النظام المتبع في كل مستشفيات مصر.
= طيب إزاي أنا لما راجعت الكاميرات اكتشفت إن النور قطع ربع ساعة كاملة.. فإزاي ده حصل؟
_ هفهم حضرتك.. يوم الجري.مة اللي ماتت فيها الدكتورة نهلة، فعلًا النور قطع على المستشفى وقعد ربع ساعة، وساعتها أنا كنت مستغرب، وبلغت الصيانة، وقالوا إن هما شغالين في الموضوع ده فعلًا، ولكن اللي اكتشفوه إن في عطل ضرب المولدات ومنعها من إضاءة المستشفى.
....
خرجت من عند مدير المستشفى وأنا مش مستفيد من أي حاجة من الحاجات اللي كنت مستند عليهم عشان أفهم الحقيقة، لا استفدت حاجة من العسكري اللي كان مش فاكر أصلًا لما دخل الحمام كان النور قاطع ولا لا، وده كان من أثر التوتر اللي ظاهر عليه، عشان عارف ومتأكد إنه رايح في داهية.
ولا الكاميرات اللي، على غير العادة، كانت فاصلة في مستشفى لمدة ربع ساعة بسبب انقطاع الكهربا، واللي المفروض بتشتغل بمولدات، ولكن حتى المولدات كان فيها عطل يومها.
رجعت على مكتبي، وفي الوقت ده ظهر تقرير الطب الشرعي الخاص بجث. ة الدكتورة نهلة، بس اللي لفت نظري في التقرير حاجتين.
الحاجة الأولى:
توقيت الجري.مة.. كان نفس التوقيت اللي حصل فيه انقطاع الكهربا، وده معناه إن العطل اللي ضرب المولدات كان متعمد.. شخص خطط كويس، قطع النور على المستشفى، وهو عارف ومتأكد إن لما يحصل انقطاع في النور، المولدات مش هتشتغل.
والحاجة التانية:
عقار كان موجود في جسم المجني عليها.. نوع برشام معين، والنوع ده بيسبب ذهان، وحسب التقرير اللي قدامي إن العقار ده كان بيتاخد بانتظام بالنسبة للمواعيد، أما بالنسبة لعدد الأقراص، فهو فوق الطبيعي.
....
وبمجرد ما قفلت تقرير الطب الشرعي، لقيت تليفوني بيرن، وكان اللي بيتصل هو وكيل النيابة، وبلغني إنه طلع إذن بتفتيش شقة الدكتور عادل بسبب العقار اللي موجود في تقرير الطب الشرعي.. خصوصًا إن من أعراضه الذهان، واللي ميعرفش إن الذهان ده بيتسبب في عدم الإدراك، وكمان بيسبب تهيؤات وأوهام للشخص المصاب بيه.
وساعتها اتحركت ومعايا قوة من القسم على شقة الدكتور عادل، وأول ما وصلنا وخبطنا على الباب، فتح الدكتور عادل وهو مش فاهم حاجة، وبلغته إن معانا إذن من النيابة بتفتيش الشقة.. كان مش فاهم إحنا بنفتش على إيه؟!.. ولكن ساعتها سألته:
_ هي يا مدام نهلة الله يرحمها كانت بتعاني من اكتئاب أو بتاخد أي أدوية؟!
= لا.. اكتئاب إيه اللي هتعاني منه؟!.. إحنا حياتنا كانت مستقرة وسعيدة.
_ دلوقتي هنعرف.
....
وبعد حوالي دقيقتين، واحد من العساكر جاب علاج كان موجود في أوضة الدكتور عادل والدكتورة نهلة.. ولكن ده كان عبارة عن فيتامينات، ده المكتوب على العلبة من بره، ولكن هل العقار اللي جوه فيتامينات ولا حاجة تانية؟!
وساعتها طلبت من الدكتور عادل إنه ييجي معايا بشكل ودي، عشان عاوز أدردش معاه في المكتب شوية.. وطبعًا الفيتامينات اللي لقيناها في الشقة راحت عشان تتحلل في المعمل الجنائي، ونعرف إذا كانت فعلًا فيتامينات ولا تم تبديل العقار بعقار تاني يسبب الذهان.
ولما وصلنا المكتب، بدأت أتكلم مع الدكتور عادل بخصوص التحريات اللي وصلتلنا، واللي بتأكد على المشكلة اللي كانت دايرة ما بينه وما بين مراته، والكلام اللي قالته الدكتورة نهلة على إنها هي اللي قت.لت أختها زينب، وساعتها كان رد الدكتور عادل:
_ نهلة كانت تعبانة الفترة الأخيرة وبتقول أي كلام.. حضرتك أنا اللي كنت عايش معاها وشايف حالتها، ومن حق عيلتي إنهم يحبوا يتأكدوا من المعلومة اللي قالتها مراتي.. بس نهلة نفسها لما هديت واتكلمت معاها في الموضوع كانت مستغربة إنها قالت الكلام ده وأنكرت.
= طيب ومستبعد الموضوع ليه؟!.. ما يمكن فعلًا أختك اتق.تلت، وموضوع رفضك استخراج الجث. ة ده يخلي عليك إنت علامات استفهام كتير.
_ قصدك إيه يا باشا؟!.. قصدك إن أنا اللي قت.لت أختي عشان الميراث والكلام ده؟
= والله الكلام اللي قدامي بيقول كده... وعموما أنا ببلغك إن التحقيق ده هيكون رسمي في أقرب وقت، عشان النيابة ناوية تستخرج الجث. ة ويتم تشريحها، عشان نعرف سبب الوفاة الحقيقي إيه؟
_ عين العقل يا باشا، وإن شاء الله يطلع كلام نهلة غلط.
....
الدكتور عادل كان بيتكلم بثبات انفعالي مش متوافق خالص مع الحالة اللي المفروض يكون فيها، وده خلاني رجعت للتحريات من تاني، وعرفت من خلالها إن عادل عنده اتنين أخوات تاني، ولكن من أم تانية، بس اللي لفت نظري أخته ريم، واللي كانت مصممة على استخراج الجث. ة والتشريح، رغم إنها مش أختها شقيقة، بس هي كانت أقرب واحدة ليها.
مش عارف ليه كنت شاكك في الدكتور عادل... ولكن في الوقت بيطلع فعلًا إذن من النيابة باستخراج جث. ة زينب، أخت الدكتور عادل، وتشريحها من قبل الطب الشرعي.. اتحركت ومعايا قوة من القسم على المقابر عشان نستخرج جث. ة زينب، ولكن أول ما وصلنا هناك كانت في انتظارنا مفاجأة غير متوقعة، عشان لقينا.
