رواية حين يجبر العشق الفصل الثلاثون 30 بقلم لولا نور


 رواية حين يجبر العشق الفصل الثلاثون 

مرَّ شهرٌ ونصف منذ تلك الليلة التي قلبت حياة الجميع رأسًا على عقب، شهر ونص  لم يكن كافيًا ليمحو آثار ما حدث، لكنه كان كفيلًا بأن يُغيّر الكثير من الوجوه، ويترك في النفوس أشياء لم تعد كما كانت من قبل.

تبدّلت الأحوال، وتغيّرت العلاقات، وانشغل كلٌّ منهم بما أثقل قلبه وعقله، بينما ظلّت بعض الحكايات معلّقة، تنتظر لحظة تكشف فيها الأيام ما أخفته خلف ستار الصمت.
....................

في غرفة ساره بدار العامرية...

جلست سارة على طرف فراشها، تستند بظهرها إلى الوسائد، بينما تستقر إحدى يديها فوق بطنها الذي بدأ يزداد بروزًا مع اقترابها من الشهر السابع من الحمل.

كانت عيناها معلقتين بشاشة هاتفها، تتنقل بين سجل المكالمات والرسائل القديمة، تبحث للمرة التي لم تعد تعرف عددها عن أي إشارة قد تخبرها بشيء عن صبري خاصه بعدما سمعته عن ماحدث بينه وبين عامر وماجده .
لم تكن تتخيل ابداً ان يكون هناك علاقه بينه وبين الراحله ، فيبدو انها كانت تستهين به وهو الذي يحكم خيوطه حول العامريه بشكل فاق توقعاتها ..
علي الرغم من رعبها منه خاصه بعدما حدث الا انه يعتبر طوق النجاه الوحيد الباقي لها......
أغمضت عينيها بقوة، تحاول طرد الأفكار التي باتت تطاردها حتى في نومها، قبل أن ينتفض الهاتف بين يديها برنين مفاجئ.
نظرت إلى الشاشة، فانقبض قلبها حين رأت الاسم الذي صار ظهوره كفيلًا بإفساد يومها كله: عادل!!!!

ترددت لحظات، ثم أجابت بضيق حاولت إخفاءه: أيوه يا عادل، عاوز إيه؟

جاءها صوته مسترخيًا، كأنما يتحدث إلى امرأة لا تحمل في قلبها كل هذا النفور منه:
إيه يا ست ساره هو أنا مش من حقي أسأل عليكي وأطمن علي اخبارك ولا ايه؟؟

زوت ما بين حاجبيها، وأجابته بحدة: تطمن عليا ، من إمتى الكلام ده إنت عاوز إيه يا عادل؟ مش قلت لك تبعد عني؟

ضحك ضحكة قصيرة مستفزة. وأنا عملت إيه بس؟ ده أنا حتى ما طلبتش منك حاجة لحد دلوقتي!

ضغطت على أسنانها، وقد أدركت أنه يتعمد استفزازها، فأجابته بصرامة: يبقى خليك بعيد، ووفّر كلامك لنفسك. أنا مش عاوزة أي حاجة تربطني بيك تاني.

تبدلت نبرة صوته قليلًا، واختفت منها خفة الظل المصطنعة.: يمكن انتي مش عاوزه بس انا لا ، انتي عارفة ايه المشكلة ...
إنك فاكرة إنك تقدري تقرري لوحدك إن كل حاجة انتهت. بس أنا لسه عندي كلام كتير معاكي يا سارة، ولسه ما أخدتش حقي منك.

اشتعل الغضب في عينيها وهدرت من بين اسنانها بغل : حق إيه اللي بتتكلم عنه؟! إحنا اتطلقنا، وكل واحد فينا راح لحاله. إنت عاوز تفتح في الدفاتر القديمه ليه من تاني .

— أنا مش بفتح في دفاتر مع انها لسه متقفلتش ، أنا بفكرك بس إن الماضي عمره ما بيموت، وإن فيه حاجات لو خرجت للنور ممكن تغيّر حياة ناس كتير.

تجمدت ملامحها، وأحست بقبضة باردة تعتصر قلبها، لكنها رفضت أن تمنحه متعة رؤية خوفها.: لو فاكر إنك هتقدر تخوفني بالكلام ده، تبقى غلطان. ابعد عني يا عادل، وما تتصلش بيا تاني.

جاءها صوته باردًا: هتسمعي صوتي تاني يا سارة، سواء عجبك أو ما عجبكيش. ولما أتصل، تردي. أحسن لك وليا.
ثم أغلق الخط.

ظلت تحدق في الهاتف لثوانٍ، قبل أن تلقيه فوق الفراش بضيق، وتنهض متجهة نحو النافذة.

كانت تشعر بأنها تختنق داخل هذه الغرفة، وأن كل يوم يمر يزيد الحصار من حولها. صبري اختفى، وعادل عاد ليطاردها من جديد، وهي لا تملك أدنى فكرة عن الخطوة القادمة التي قد يقدم عليها أي منهما.

مررت يدها فوق بطنها، ثم أطلقت زفرة مرتجفة.
لم تكن تريد سوى أن تمر الأيام القادمة بسلام، وأن تجد طريقة تتخلص بها من عادل قبل أن يتسبب في كارثة لا تستطيع إصلاحها.
أما صبري، فلم تعد تعرف إن كانت تنتظر عودته لأنها تحتاج إليه، أم لأنها تخشى ما قد يحدث إذا ظل غائبًا.
وفي كلتا الحالتين، لم يكن أمامها سوى الانتظار...
....................

في جناح سلطان العامري...

وقف سلطان أمام المرآة الكبيرة، يُكمل ارتداء ساعته بعد أن سوّى ياقة قميصه بعناية، بينما انعكست خلفه صورة حور الغارقة في نوم عميق، وقد تناثرت خصلات شعرها الطويل فوق الوسادة، وانسابت خصلة منها على وجنتها.

توقفت عيناه عندها في المرآة، فارتسمت على شفتيه ابتسامة هادئة، تحمل من الحب ما لم يعد يحتاج إلى كلمات كي يُعبّر عنه.

ظل يتأملها للحظات، ثم استدار متجهًا نحو الفراش، وجلس إلى جوارها برفق، قبل أن ينحني ويطبع قبلة حانية على كتفها العاري الظاهر من تحت الغطاء.

همس بصوته الدافئ: حور...

لم يصله سوى همهمة ناعسة، أعقبتها حركة صغيرة منها، إذ جذبت الغطاء إلى أعلى، وانكمشت تحته أكثر، وكأنها تحتمي من صوته الذي تجرأ على اقتحام أحلامها.

اتسعت ابتسامته، وحاول مرة أخرى وهو يمرر أنامله برفق فوق خصلات شعرها:
حور يا حبيبي، اصحي بقي انا نازل ...

تمتمت بكلمات غير مفهومة، ثم أدارت وجهها إلى الجانب الآخر، مستسلمة لنومها دون أدنى اهتمام بمحاولاته.

ضحك بخفوت، وهز رأسه باستسلام ، قبل أن يميل نحوها ويهمس بالقرب من أذنها:
طيب يا حور السلطان... نامي براحتك، بس لما تصحي ما تجيش تقولي لي إني ما صحيتكيش ثم طبع قبله صغيره علي راسها .

لم تمنحه حتى ردًا هذه المرة.
اعتدل في جلسته، يتأملها بعينين يملؤهما الحنان، ثم نهض أخيرًا، وألقى نظرة أخيرة عليها قبل أن يغادر الجناح، تاركًا إياها تستمتع بنومها الذي بدا أنها لن تتنازل عنه بسهولة.
.................

في بهو الدار ....
كانت هانم تجلس على الأريكة القريبة من النافذة، تحتسي قهوتها الصباحية في صمت، بينما تتسلل أشعة الشمس إلى المكان، فتنعكس على الأثاث الفخم وتمنح البهو ضوءًا دافئًا لا يتناسب كثيرًا مع الوجوم الذي خيّم على وجهها.

دخل سلطان بخطوات ثابتة، وما إن وقعت عيناه عليها حتى اقترب منها مقبلاً يدها بحنان وقد تحسنت علاقتهم كثيراً طوال الفتره الماضيه:صباح الخير يا أمي.

رفعت هانم عينيها إليه، وأجابته بابتسامة حانيه :  صباح النور يا ولدي. تعالَ، اقعد اشرب قهوتك.

جلس إلى جوارها، وأشار إلى إحدى الخادمات أن تحضر له فنجانًا، ثم تناول هاتفه يتفقد بعض الرسائل الواردة إليه، قبل أن يرفع عينيه نحو أمه التي كانت تتأمله بحنان سعيده بتحسن علاقاتهم اخيراً وادركت خطاءها في حق اولادها...
قالت وهي تنظر حولها: أمال فين مراتك يا سلطان منزلتش معاك ليه؟؟

ارتسمت ابتسامة خفيفة على شفتيه وهو يضع هاتفه جانبًا.: لسه نايمة.

رفعت حاجبيها باستغراب : لحد دلوقتي؟!

ضحك سلطان بخفوت، وهو يتذكر محاولاته الفاشلة لإيقاظها.: أعمل لها إيه بقى حاولت أصحيها، بس الظاهر إن النوم عندها أهم مني ومن الدنيا كلها.

لم تستطع هانم منع ابتسامة صغيرة من الظهور على وجهها، ثم هزت رأسها وهي تقول: ربنا يهنيكم ببعض يا ولدي.

تلقى سلطان كلماتها بابتسامة هادئة، ثم تناول فنجان القهوة الذي وضعته الخادمة أمامه. ارتشف منه قليلًا، لكن عينيه سرعان ما اتجهتا نحو الجناح الذي كان والده يقيم فيه قبل وفاته، والذي اختار عامر أن ينعزل داخله منذ عودته من تلك الليلة المشؤومة.

تبدلت ملامحه تدريجيًا، وسأل والدته : عامر لسه مخرجش برضه؟

انطفأت الابتسامة على وجه هانم، وانخفضت عيناها إلى فنجانها، وهي تحركه بين يديها بشرود حزين : لا يا ولدي، لسه زي ما هو. لا بيخرج ولا حتى بيسمح لحد يدخل له. الأكل بيتحط له عند الباب ويرجع زي ماهو بياكل منه يا دوب اللي يخاليه عايش وبعدها يقفله على نفسه تاني.

تنهدت بحرقة، ثم رفعت عينيها إلى سلطان، وقد بدا القلق واضحًا فيهما.: أنا خايفة على أخوك أوي يا سلطان. دي مش طبيعته، عامر عمره ما كان ضعيف بالشكل ده، ولا كان بيحب يقعد لوحده. من يوم اللي حصل وهو حابس نفسه في الأوضة، لا عاوز يشوف حد ولا يتكلم مع حد. وأنا مش عارفة أعمل له إيه!

ظل سلطان صامتًا للحظات، يحدق في فنجانه، بينما كان القلق على أخيه يثقل صدره هو الآخر.
قال أخيرًا بصوت هادئ، يحاول أن يمنح أمه بعض الطمأنينة: معلش يا أمي، ادعي له ربنا يهدي باله ويخرجه من اللي هو فيه. بكره هيبقى أحسن من الأول، بس هو محتاج وقت.

ثم أضاف، وقد انعقد حاجباه بقلق صريح:
أنا كمان خايف عليه، والله. حاولت معاه كتير، أدخل له وأقعد معاه وأفهم منه اللي في قلبه، بس هو رافض. كل ما أفتح الباب يطلب مني أسيبه لوحده، ويقولي لما أحس إني عاوز أقعد مع حد هبقى أقولك.

مسحت هانم طرف عينها بطرحتنها ثم قالت بمرارة: منها لله اللي كانت السبب! دي دمرت له حياته، وهدّت راجل كان واقف على رجليه، زي الاسد وكسرت نفسه حسبي الله ونعمه الوكيل فيها مطرح ما راحت ...

استقرت نظرات سلطان على وجه أمه، قبل أن يقول بحزم هادئ:مش هي لوحدها اللي غلطانة يا أمي.

التفتت إليه هانم، فتابع دون تردد: عامر كمان غلطان، وغلطه كان كبير. هو اللي اختار، وهو اللي ائتمن، وهو اللي سمح لواحدة زي دي إنها تدخل حياته وتبقى ليها الكلمه الاولي والاخيره عليه ، وهو اللي سمح لها تزرع الحقد والكره جواه ، يعني ما ينفعش نحط كل الذنب عليها وننسى إنه كان له يد فيه 

تألمت ملامح هانم، لكنها لم تجادله واطرقت واسها اراضاً بخزي فهو محق في كل كلمه مظق بها ، فاسترسل سلطان بنبرة أكثر هدوءًا: اللي حصل وجعه، وأنا مقدّر ده، بس يمكن ربنا كتب له الوجع ده علشان يفوق ويراجع نفسه. ساعات الواحد بيحتاج يقف قدام غلطه من غير ما يهرب منه، ويحاسب نفسه على كل حاجة عملها، علشان يعرف يقوم من تاني وهو فاهم اتعلم إيه من اللي فات.

ثم وضع فنجانه على الطاولة، ونظر نحو جناح والده مرة أخرى.: أنا مش عاوزه يفضل حبيس الأوضة دي، ولا عاوزه يعيش عمره كله أسير للي حصل. أنا عاوز عامر يرجع لنفسه، ويرجع عامر العامري اللي إحنا عارفينه. بس المرة دي يكون أقوى، وأوعى، وما يديش الأمان لأي حد من غير ما يعرف هو مين بجد.

تنهدت هانم، وقد اختلط الحزن في عينيها بالخوف على ابنها: ربنا يقدره علي اللي هو فيه يا ولدي. وانت كمان خاليك ضهر لأخوك وما تفتهوش لحاله ...

قاطعها سلطان برفق: متخافيش انا هفضل أحاول يا أمي، ومش هسيبه. بس مش هضغط عليه غصب عنه. لما يحس إنه مستعد يتكلم، هيلاقيني جنبه.

في تلك اللحظة، دخل ياسين إلى البهو، بخطوات عملية وملامح جادة، وما إن لمح سلطان حتى اقترب منه وألقى التحية عليهم : صباح الخير يا شيخ سلطان 

رد سلطان وهو ينهض من مكانه: صباح النور يا ياسين. خير؟

أجابه ياسين: فيه شوية حاجات محتاج أعرضها على حضرتك، تخص الشغل، وفيه كمان أوراق وصلت من القاهرة محتاجة مراجعتك.

أومأ سلطان برأسه، ثم التفت إلى أمه وقبّل رأسها بحنان.: عن إذنك يا أمي، هروح المكتب أشوف شغلي.

وضعت هانم يدها على ذراعه قبل أن يبتعد، وقالت بصوت حاني : في امان الله يا ولدي ربنا يقدرك ويقويك ...

ابتسم لها سلطان بمحبه ثم اتجه مع ياسين نحو المكتب،......
..........................

في غرفة صفوان العامري...

خيّم الظلام على الغرفة، ولم يكن الضوء الخافت المتسلل من خلف الستائر الثقيلة كافيًا لتبديد كآبتها، وكأن الحزن الذي استقر بين جدرانها منذ رحيل صاحبها قد رفض أن يغادرها، حتى بعد أن أصبحت مأوى لابنه الذي أنهكه ما حدث أكثر مما استطاع احتماله.

كان عامر قد انتهى لتوّه من صلاة الضحي وجلس على سجادة الصلاه الخاصه بوالده، يمرر حبات سبحته بين أصابعه في صمت، بينما تتردد في أرجاء الغرفة سكينة ثقيلة لا يقطعها سوى همسه المتقطع بأذكار الصباح.

رفع عينيه ببطء نحو الفراش الذي اعتاد أن يرى والده جالسًا عليه، يستمع إليه بصبر، ويوجهه بحكمة لم يدرك قيمتها إلا بعدما فقد صاحبها.

مرّت في عينيه لمحة حنين موجعة، وانقبض قلبه وهو يستعيد كلمات صفوان، يوم وقف أمامه رافضًا زواجه من ماجدة، محاولًا أن يفتح عينيه على أمور لم يكن عامر مستعدًا لرؤيتها.

كان يتذكر نبرة والده يومها، وملامحه التي امتزج فيها الغضب بالشفقة، وكيف أصرّ على تحذيره منها، بينما لم يرَ هو في اعتراضه سوى محاولة لفرض إرادته عليه والتدخل في اختياراته.

عاند أباه، وتمسك بما أراده، وظن أن إصراره دليل على رجولته وقدرته على اختيار حياته بنفسه، حتى انتهى به الأمر وحيدًا داخل هذه الغرفة، يحمل من الندم ما لا يستطيع البوح به لأحد.

انخفض رأسه، وخرج صوته خافتًا متهدجًا:
كان عندك حق يا شيخ صفوان... يا ريتني سمعت كلامك.

توقفت أصابعه عن تحريك حبات السبحة، وحدّق في الفراغ أمامه، كأنه ينتظر أن يسمع صوت أبيه يجيبه، أو يربت على كتفه كما كان يفعل كلما ضاقت به الدنيا.
لكن الصمت وحده كان رده.

ابتلع غصه مره ارتفعت في حلقه، ثم تابع بأسى:الظاهر إنك كنت شايف اللي أنا ما كنتش شايفه... كنت شايف حقيقتها من بدري، وأنا اللي كنت أعمى عنها. كنت فاكر إني عارفها، وفاهمها علشان بحبها وإن محدش له حق يقولي أختار مين وأبعد عن مين... أهو في الآخر طلعت ما عرفتهاش، ولا حتى عرفت نفسي.

انحنت كتفاه، واستقرت السبحة في كفه المغلق، بينما راحت عيناه تتنقلان بين تفاصيل الغرفة التي تحمل آثار أبيه؛ مقعده، ومكتبته، وعصاه التي ما زالت في مكانها، وكأن صاحبها سيعود بعد قليل ليجلس ويستأنف حديثًا لم ينتهِ.

أغمض عينيه، وأطلق زفرة مرتجفة.: حتى سلطان يا بوي...
سلطان اللي إحنا كلنا كنا فاكرينه نافر مننا، وبعيد عننا، ومش فارق معاه غير حياته وشغله... طلع هو الوحيد اللي وقت الجد بيسمع كلامك، والوحيد اللي فضل شايل وصيتك وأمانتك، حتى وإنت مش موجود.

ارتسمت على شفتيه ابتسامة باهتة، سرعان ما انطفأت تحت وطأة الندم.: إنت كنت واثق فيه يا بوي... واثق إنه هيشيل الحمل من بعدك، وإنه هيعرف يحافظ على البيت والعامرية من بعدك وأنا كنت فاكر إنك ظلمتني لما اخترته مكانك، وإنك ما شفتش فيا اللي يخليني أكون كبير العامرية من بعدك.

خفض عينيه إلى السبحة، وأخذ يقلبها بين أصابعه من جديد.: طلعت إنت اللي كنت شايف صح، وأنا اللي كنت ببص بعيني بس اللي الحقد والغل عماها ....

سكنت ملامحه للحظات، قبل أن يرفع رأسه نحو سقف الغرفة، وقد امتلأت عيناه بدموع ، لم يحاول حبسها بل اطلقها تجري علي وجنتيه تغرقها علها تغسل قلبه وتنظفه من السواد الذي زرعته فيه :
يا ريتك كنت لسه عايش يا بوي... يا ريتك كنت موجود علشان أبص في عينك وأقول لك إني غلطت. مش هقول لك سامحني، لأني عارف إن الغلط اللي عملته كبير بس كنت محتاج تسمعها مني... كنت محتاج أقول لك إنك كنت صح، وإن عنادي هو اللي ضيّعني.

شدّ قبضته على السبحة، ثم همس بصوت خافت، أقرب إلى عهد يقطعه على نفسه: مش عارف هقدر أصلّح اللي اتكسر إزاي يا بوي، ولا حتى هقدر أبص في عين سلطان وأمي من غير ما أحس إني قصّرت في حقهم... بس مش ههرب من غلطتي تاني. كفاية اللي حصل لحد هنا.

توقفت عيناه عند سجادة الصلاة الممتدة تحته، فمرر كفه عليها بحنان، كما لو أنه يلمس أثرًا أخيرًا تركه والده في حياته.: ادعي لي يا بوي... ادعي لي أعرف أقوم من اللي أنا فيه، وأبقى راجل يستاهل اسمك من تاني.
.........................

في مكتب سلطان ......

كان سلطان يجلس خلف مكتبه وقد انتهى لتوّه من توقيع مجموعة من الأوراق التي تراكمت أمامه منذ الصباح، بينما جلس ياسين الجوهري في المقعد المقابل، ينتظر أن يفرغ كبير العامرية من عمله.

وضع سلطان القلم جانبًا، ثم أغلق الملف الأخير ودفعه نحو طرف المكتب، قبل أن يرفع عينيه إلى ياسين، وساله بجدية: في جديد بخصوص صبري؟

اعتدل ياسين في جلسته، وأجابه بتقرير : منصور تواصل معايا، ومفيش جديد. صبري مرجعش للمكان اللي هما فيه من ساعة ما خرج، بقاله شهر ونص مختفي، وشاهين بيتردد عليهم كل شوية. وكل ما حد يسأله عن صبري، يرد ويقول إنه مسافر.

عقد سلطان حاجبيه، وأسند ظهره إلى المقعد، بينما راحت عيناه تتأملان نقطة بعيدة أمامه، وكأنه يحاول أن يربط بين خيوط متفرقة لا تزال ترفض أن تكشف له الصورة كاملة.: طب تفتكر إنه فعلًا مسافر؟

فكر ياسين للحظات قبل أن يجيبه:شوف هو مفيش تفسير قدامي غير اتنين؛ يا إما صبري فعلًا سافر، وبيخطط لحاجة كبيرة من بعيد، يا إما يكون حصل له حاجة، وشاهين ورجالته مش عاوزين يبينوا ده.

ثم أضاف وهو ينظر إلى سلطان نظرة ذات مغزى: ما تنساش إني ضربته بالنار في كتفه قبل ما يهرب. والجرح كان مش بسيط!!!

تحرك فك سلطان قليلًا، ومرر إبهامه فوق حافة المكتب في حركة لا إرادية، بينما ظلت ملامحه غارقة في التفكير: هيبان مع الوقت... بس اختفاء صبري ده مش مريحني يا ياسين. الراجل ده عمره ما كان من النوع اللي يسيب حساباته معلقة، خصوصاً وانه اكيد عرف بحكم المجلس عليه...

توقفت عيناه عند ياسين، وتصلبت نبرته قليلًا. لو مسافر، يبقى أكيد وراه حاجة بيجهز لها. ولو حصل له حاجة، فشاهين مش هيقدر يخبيها للأبد. عاوزك تفضل متابع كل حاجه مع منصور وأي خبر يوصلك عنه، مهما كان صغير، يوصل لي فورًا.

أومأ ياسين بثقة: اطمن، كل حاجة تحت عيني.

صمت سلطان لحظة، ثم بدا وكأنه تذكر أمرًا آخر، فمال قليلًا إلى الأمام وسأله: والرجل التاني؟ أخباره إيه؟

ارتسمت ابتسامة خفيفة على وجه ياسين، وقال بنبرة تحمل قدرًا من الرضا: كله تمام. ماشي زي ما إحنا عاوزين بالظبط، وبينفذ اللي بقوله عليه بالحرف، ...

لم يبادله سلطان الابتسامة، بل ظل يراقبه باهتمام قبل أن يسأله:طب والنتيجة ايه؟؟

اتسعت ابتسامة ياسين قليلًا، ثم أجابه بثقة:زي ما انت شايف ..
الموضوع في مرحلة الانهيار. اللي كان متمسك فيه بدأ يقع واحدة واحدة، وبقى واضح إنه مش قادر يتحمل الضغط زي الأول.

ظل سلطان صامتًا للحظات، ثم أمال رأسه قليلًا، كأنه يزن كلام ياسين قبل أن يقرر ما إذا كان يستحق الاطمئنان أم الحذر: ادينا هنشوف. المهم ما نستعجلش، ولا نخليه يشك إن فيه حاجة بتتدبر من وراه. أنا عاوز كل خطوة تحصل في وقتها، ولما نوصل لآخر الطريق، ما يبقاش فيه مجال إنه يرجع في كلامه أو يغيّر موقفه.

اومأ ياسين مؤكداً : مفهوم يا شيخ سلطان ..

تناول سلطان القلم مرة أخرى، ثم توقف قبل أن يفتح الملف التالي، ورفع عينيه إلى ياسين قائلًا: ابعت حد من الخدم ينادي لي سارة. عاوزها هنا.

اختفت الابتسامة عن وجه ياسين للحظة، وألقى نظرة سريعة على سلطان، محاولًا استشفاف ما وراء طلبه المفاجئ، لكنه لم يسأل.

نهض من مقعده وأجابه: حاضر.

ثم اتجه نحو الباب، بينما عاد سلطان إلى مقعده، وشبك أصابعه أمامه، وقد استقرت في عينيه نظرة حاسمة.
لقد انتظر طويلًا حتى يحين الوقت المناسب لهذه الخطوة، ولم يعد يرى فائدة من تأجيلها أكثر من ذلك.
................

بعد قليل.......
كانت سارة تهبط درجات السلم ببطء، وقد انعقد حاجباها في حيرة وقلق. لم تكن تتوقع أن يطلبها سلطان، خاصةً أنه منذ فترة طويلة لم يعد يتعامل معها إلا في أضيق الحدود، وكأنها لم تكن يومًا جزءًا من حياته.

وضعت يدها على بطنها بحركة لا إرادية، وأخذت نفسًا عميقًا تحاول به تهدئة اضطرابها، قبل أن تتجه نحو المكتب.

توقفت أمام الباب، ورفعت يدها لتطرق عليه طرقات خفيفة، حتى جاءها صوته من الداخل يأذن لها بالدخول.
فتحت الباب ودخلت بخطوات مترددة.

رفع سلطان عينيه إليها فور دخولها، فتفحصها بنظرة سريعة؛ كان وجهها شاحبًا، وملامحها مرهقة، وقد بدا فقدان الوزن واضحًا عليها رغم بطنها الذي ازداد بروزًا مع تقدم الحمل.

وقفت أمام المكتب، تحاول أن تبدو متماسكة، ثم قالت بصوت مهزوز قليلًا:طلبتني يا سلطان؟

أشار إلى المقعد المقابل له : اقعدي يا سارة.

جلست ببطء، وضمت يديها فوق بطنها، ثم رفعت عينيها إليه بتوجس : خير فيه حاجة؟

مال سلطان برأسه قليلًا، وتأمل ارتباكها قبل أن يقول بسخرية باردة:مالك متوتره وخايفة كده ليه ؟؟

رفعت ذقنها، تحاول أن تخفي اضطرابها خلف نبرة متماسكة.: مش خايفة، بس مستغربة إنك تبعت لي. إنت تقريبًا مبقتش تتعامل معايا أساسًا، ولا كأنك كنت تعرفني في يوم من الأيام... ولا كأن اللي في بطني ده ابنك!

ظل سلطان ينظر إليها للحظات، ثم أجابها بهدوء أثار قلقها أكثر: هو علشان كده بعت لك.

انعقد حاجباها، ولم تفهم مقصده.: مش فاهمة، تقصد إيه؟

أغلق سلطان الملف الموجود أمامه، ثم نهض من مقعده وهو يقول بوضوح:
أنا اتفقت مع الدكتور إننا نروح له دلوقتي، علشان نطمن على صحتك وصحة البيبي، وكمان علشان نعمل تحليل الـDNA.

تجمدت سارة في مكانها.
لثوانٍ، لم تستطع إخفاء الصدمة التي ارتسمت على وجهها، قبل أن تستعيد ملامحها سريعًا، وتشتعل عيناها بالغضب المصطنع.: إنت لسه مصمم تهيني يا سلطان؟!؟؟
لسه مُصمم  تعمل التحليل ده، بعد كل اللي قولته لك؟!

لم يتغير شيء في ملامحه، بل رد بحسم: دي مش إهانة يا سارة. أنا عاوز أتأكد، وده حقي، زي ما من حقك إن الحقيقة تظهر.

ضحكت بسخرية، بينما راحت أصابعها تضغط فوق بعضها بعصبية.: ماشي يا سلطان، أنا هعمل التحليل ده، علشان أنا واثقة من نفسي كويس، وواثقة إن النتيجة هتثبت لك إني كنت صادقة معاك من الأول.

ثم مالت بجسدها قليلًا إلى الأمام، ونظرت إليه بعتاب حاد، وهي تضيف:بس خليك فاكر حاجة كويس... 
بعد ما النتيجة تطلع وتثبت لك كلامي، أنا عمري ما هسامحك على اللي عملته فيا لا أنا ولا ابني هنسامحك يا سلطان!

التقط سلطان مفاتيح سيارته من فوق المكتب، ثم نظر إليها نظرة باردة، وقال باستهزاء: مش فارق معايا مسامحتك من عدمها. اللي فارق معايا إني أعرف الحقيقة، وبعدها كل واحد هيبقى عارف له إيه وعليه إيه.

ثم أشار نحو الباب : يلا، علشان ما نتأخرش على معاد الدكتور.

نهضت سارة ببطء، تخفي خلف ملامح الغضب اضطرابًا أخذ يزداد مع كل خطوة تقترب بها من اللحظة التي لم تكن تتوقع مجيئها بهذه السرعة.
....................

في جناح سلطان وحور...

فتحت حور عينيها ببطء، ومدت يدها إلى الجانب الآخر من الفراش، لكنها لم تجد سلطان بجوارها.

تململت قليلًا، ثم رفعت رأسها عن الوسادة، تتفحص الجناح الهادئ الذي لم يبقَ فيه سوى أثر عطره المألوف.

نظرت إلى الساعة، فاتسعت عيناها بدهشة.
يا نهار أبيض! أنا نمت كل ده؟!

اعتدلت في جلستها، ثم ألقت الغطاء جانبًا وهي تتمتم: أمال سلطان راح فين؟ ده حتى ما صحانيش!

نهضت من الفراش واتجهت إلى الحمام، وبعد أن أخذت حمامًا دافئًا، خرجت وهي تلف جسدها بمنشفة، وقد ظنت أن الماء سيساعدها على التخلص من آثار النوم، لكن النعاس ظل يثقل جفنيها.

ارتدت ملابسها، ثم اتجهت نحو ماكينة القهوة، وأعدت لنفسها فنجانًا، ثم اقتربت من النافذة الكبيرة المطلة على ساحة الدار.

رفعت الفنجان إلى شفتيها، تتذوق قهوتها ببطء، وعيناها تتجولان في الساحة بلا اهتمام، حتى وقعتا على ياسين الواقف بجوار سيارة سلطان.
توقف الفنجان في يدها وضاقت عيناها في استغراب.: هو سلطان خارج ولا ايه ؟؟

هما ان تتحرك لاسفل حتي تراه ولكنها تجمدت موضعها عندما ظهر سلطان متجهًا نحو السيارة، وخلفه سارة.!!!!!!

ما إن وقعت عينا حور عليها حتى اختفت ملامح النعاس من وجهها، وحل محلها استغراب سرعان ما تحول إلى ضيق واضح وغيره شديده.../

ضاقت عينيها المشتعله بالنيران عندما فجأة، تباطأت خطوات سارة، ورفعت يدها إلى رأسها، ثم مالت بجسدها كأن الأرض تدور بها، قبل أن تتشبث بذراع سلطان وتستند إليه بكل ثقلها : سلطان... الحقني!

التفت سلطان إليها مسرعاً وتبدلت ملامحه حين وجدها تكاد تسقط، فأمسك بها قبل أن تفقد توازنها.: مالك يا سارة في إيه؟!

أرخت سارة جفنيها، وتظاهرت بالعجز عن الوقوف، بينما اتكأت عليه أكثر مما يلزم : 
مش عارفة دوخت مرة واحدة، ومش عارفة فيا إيه.

نظر سلطان إلى وجهها الشاحب، ثم أحكم قبضته حول ذراعها ليسندها.: طب بالراحة، خدي نفسك ...
فتح باب السيارة وساعدها على الجلوس في المقعد، ثم انحنى قليلًا نحوها وسألها بجدية: تقدري تستحملي لحد ما نوصل للدكتور، ولا حاسة إنك تعبانة أوي؟

هزت رأسها ببطء، متظاهرة بالإرهاق.: هقدر ان شاء الله مدام انت جانبي ...

غض سلطان الطرف عن جملتها الاخيره ثم مد يده إلى زجاجة مياه كانت في السيارة، وناولها إياها.: اشربي شوية مياه وهتبقي كويسه ادينا رايحين للدكتور ...

أخذتها منه، وارتشفت قليلًا، ثم رفعت عينيها إليه بابتسامة رقيقة لا تشبه الاضطراب الذي كان يعتمل داخلها : شكراً يا سلطان...

اكتفى بإيماءة بسيطه ثم أغلق الباب برفق، واستدار إلى الجانب الآخر ليركب السيارة.

أما سارة، فما إن استقر سلطان خلف المقود حتى ألقت نظرة سريعة نحو نافذه جناح سلطان فرأت حور واقفة هناك، تراقبهما في صمت.
التقت عينا المرأتين للحظة.
لمعت عينا سارة بمكر خفي، وارتسمت على شفتيها ابتسامة خبيثه  قبل أن تستند إلى المقعد وتدير وجهها إلى الأمام.
كانت تعرف جيدًا أن حور رأتها جيداً وهذا وحده كان كافيًا بالنسبة إليها.

في الأعلى...
ظلت حور واقفة أمام النافذة، وفنجان القهوة بين يديها، تتابع المشهد بعينين اشتعلتا بلهيب الغيرة حتي غادرت السياره الدار ....

وضعت حور الفنجان فوق الطاولة القريبة بعنف مكتوم، ثم شبكت ذراعيها أمام صدرها، وراحت تتمتم من بين أسنانها:يا بنت ال.... ماشي انا هوريكي يا ساره الكلب بس اما ترجعي ...

خطت خطوتين بعيدًا عن النافذة، ثم عادت إليها تنظر إلي طيف سيارته البعيد: ماشي يا سلطان ، حنين اوي يا خويا وخايف عليها لا تقع ، اما طلعته علي جتتك ما ابقاش انا حور الرفاعي!!!

ثم قضمت اظافرها بغضب : بقي أنا نايمة، تقوم تخرج من غير ما تصحيني، ولا حتى تقولي رايح فين؟! وكمان واخد ست زفته دي معاك الله اعلم علي فين ....

هزت رأسها بغيظ، ثم رفعت إصبعها في الهواء وكأن سلطان يقف أمامها بالفعل.
والله لأطلع روحك في إيدي لما ترجع يا شيخ سلطان!!!!

توقفت فجأة، ثم قطبت حاجبيها وهي تستعيد نظرة سارة الأخيرة إليها : بقي بتكديني يا ساره ماشي قابلي بقي ....
.................

على الطريق...
كان سلطان يقود السيارة في هدوء، بينما جلست سارة إلى جواره، تستند إلى المقعد وتراقب الطريق من خلف الزجاج.

بعد دقائق من الصمت، مد سلطان يده إلى هاتفه المثبت بجوار المقود، وألقى نظرة على الشاشة حين أضاءت أمامه، ثم التقطه واتصل بحور عبر السماعة.

في الجناح، كانت حور قد عادت إلى فنجان قهوتها، وهي تخطط لما شوف تفعله بسلطان وتلك الحيه ساره ...

رن هاتفها بالنغمة المخصصة لسلطان ،  نظرت إلى الشاشة ، ثم ضاقت عينيها بغيظ شديد: لسه فاكر تكلمني دلوقتي ...

تركت الهاتف يرن، وعقدت ذراعيها أمام صدرها، مصممة على ألا تجيبه.

في السيارة، ظل سلطان ينتظر ردها، وعندما طال الرنين، انعقد حاجباه باستغراب.: غريبة... هي لسه نايمة ولا إيه؟

أما حور، فكانت تراقب الشاشة بعينين متحديتين، وكلما أوشك الهاتف على التوقف، عاود الرنين من جديد.
همست بغيظ:رن للصبح ابقي خاليها المسهوكه تنفعك ...

استمر الهاتف في الرنين وهي لم تجيب وبعدها بقليل وصلت اليها رساله منه : حور السلطان صباح الخير يا كسلانه 
انا خرجت مع ساره روحنا للدكتور علشان نعمل تحليل الDNA...بحبك 💋....

اخذت الهاتف وفتحت الرساله وقرأتها ، انقبض قلبها عندما عملت سبب خروجه معها وتسالت في نفسها ماذا لو اظهرت نتيجه التحليل ان الطفل ابن سلطان ؟؟
ماذا سيفعل سلطان والاهم ماذا ستفعل هي ؟؟
..........................

في أعماق الجبل، داخل الكهف الذي اتخذه صبري الرفاعي مخبأً له...
كان الهواء البارد يتسلل عبر الشقوق الصخرية، حاملًا معه رطوبة المكان ، استلقى الأخير فوق فراش متواضع، وقد بدت آثار المرض والإنهاك واضحة على وجهه الشاحب، بينما استقر ذراعه المصاب في وضع حذر، لا يزال الألم ينهش كتفه كلما حاول تحريكه.

ورغم ما كان يعانيه من ضعف، لم يستطع البقاء مستلقيًا طويلًا. كان عقله منشغلًا بما يحدث في الجنوب، وبالرجال الذين تركهم خلفه، وبحسابات لم يكن اختفاؤه قادرًا على إلغائها.

دفع الغطاء عن جسده، وحاول الاعتدال جالسًا، فكتم أنينًا أفلت منه حين باغته الألم.

في تلك اللحظة، دخل شاهين حاملًا بعض الطعام والماء، فتوقف حين رآه يحاول النهوض.: إنت بتعمل إيه يا صبري؟! الدكتور قال لك ترتاح، وإنت لسه ما خفيتش من اللي إنت فيه!

رمقه صبري بنظرة غاضبه ، ثم استعان بذراعه السليمة حتى جلس إلى حافة الفراش: أنا مش هفضل مرمي هنا لحد ما أموت يا شاهين! كفاية اللي ضاع من وقتي وبعدين بلاش كل شويه تفكرني بموضوع الدكتور ده ....

وضع صبري ما في يده علي طرف الفراش : اومال كنت عاوزني اسيبك تموت وانت قعدت اسبوع حرارتك مولعه مش عاوزه تنزل والجرح اتلوث لولا ستر ربنا كان دراعك اتقطع ....

ثم اقترب منه محاولًا مساعدته، لكن صبري أشار إليه أن يبتعد، ثم رفع عينيه إليه بنظرة حادة، لم ينجح المرض في إطفاء ما فيها من قسوة : بلاش رغي في كلام فاضي ، خالينا في المهم ، أخبار الرجالة إيه؟ والوضع في الجنوب وصل لفين؟

تنهد شاهين، واشعل سيجاره واخذ نفس منها، قبل أن يجيبه:الرجالة كلهم مستنيين إشارة التحرك، وكل واحد في مكانه زي ما أمرت. أما الجنوب، فمفيش جديد الدنيا ماشية عادي، وسلطان العامري وهارون ابن عمك مسيطرين علي الوضع ...

ضاقت عينا صبري عند سماع اسم سلطان، وانقبض فكه، لكنّه لم يعلق. اكتفى بتحريك أصابعه فوق ركبته في عصبية، قبل أن يسأله: وعامر وماجدة عرفت حصل معاهم ايه ؟؟

تردد شاهين لحظة، ثم أجابه باختصار:
عامر طلب عقد المجلس، ووقف قدام الكل وحكى كل حاجة. وقالهم علي علاقتك بماجدة، وقال لهم على كل اللي حصل والوضع اللي كنتوا فيه لما وصل لكم ...

رفع صبري حاجبه، وقد بدت عليه الدهشة الممزوجة بالاهتمام : وبعدين؟

اكمل شاهين مسترسلاً : أخو ماجدة كان موجود ولما عرف اللي حصل، ولما اتأكد من خيانتها، قتلها قدام المجلس كله.

ساد الصمت للحظات.
ظل صبري يحدق في شاهين، وكأن الخبر لم يترك داخله أثرًا يُذكر فهي مجرد نكره ، ثم مال برأسه قليلًا وسأله: وإيه كمان؟

هنا تبدلت ملامح شاهين، وتهربت عيناه من نظرات صبري المباشرة. أخذ نفسًا عميقًا واشعل سيجارة اخري علها تخف من توتره وكأنه يبحث عن طريقة يخفف بها وقع ما سيقوله.

لاحظ صبري تردده، فاشتدت نظرته وهدر فيه بنفاذ صبر : مالك يا شاهين ما تنطق! فيه إيه تاني؟

رفع شاهين عينيه إليه أخيرًا، وقال بصوت خافت: المجلس أهدر دمك يا صبري... واعتبروك عدو للعامرية، واللي عملته خيانة ما تتغفرش.
ابتلع شاهين حلقه الجاف ثم أضاف: وعمك كمان اتبرّى منك قدامهم، وقال إنك ما بقيتش من الرفاعية، وإنه مش مسؤول عن أي حاجة تعملها من هنا ورايح.

لثوانٍ، لم يتحرك صبري وكانه تمثال لا روح فيه ....
ثم رفع رأسه ببطء، وانقلبت ملامحه الشاحبة إلى قسوة مرعبة، بينما اشتعلت عيناه ببريق مظلم، كأن كلمات شاهين قد أزاحت آخر حاجز كان يمنعه من إطلاق الوحش الكامن داخله.: إيه؟؟؟؟

خرجت الكلمة من بين أسنانه كفحيح أفعى.
أهدروا دمي؟! والرفاعية تتبرّى مني؟!

نهض نصف وقفة، ثم اضطر إلى الاستناد بيده السليمة إلى الجدار حين باغته الألم، لكنه لم يعره اهتمامًا. كانت أنفاسه تتسارع، ووجهه يحتقن بالغضب، 
حتى بدا كأن الجرح في كتفه لم يعد يعنيه أمام الجرح الذي أصاب كبرياءه.: بعد كل اللي عملته علشانهم، وبعد كل السنين اللي قضيتها وأنا بشيل اسم العيلة فوق راسي، ييجوا في الآخر يتبرّوا مني؟! يبيعوني كده علشان يرضوا سلطان العامري ومجلسه؟!

اقترب شاهين منه بحذر، محاولًا تهدئته:
اهدى يا صبري، إنت لسه تعبان، والموضوع مش مستاهل إنك تضر نفسك أكتر من كده.

استدار إليه صبري بعنف، وأطلق ضحكة قصيرة خالية من أي مرح.: مش مستاهل ، صبري الرفاعي يتهدر دمه وعيلته تتبري منه في المجلس قدام اهل الجنوب كله وتقولي مش مستاهل !!!

ضرب بقبضته السليمة الجدار القريب، فارتد الألم إلى كتفه المصاب، لكنه كتم صرخته، ثم تابع بصوت يقطر حقدًا:
والله لأخلّي أرض الجنوب كلها تغرق في دمكم! لأخلّي كل واحد فيهم يندم على اليوم اللي افتكر فيه إن صبري الرفاعي ممكن ينكسر بسهوله ...

ظل شاهين يراقبه في صمت، مدركًا أن الكلمات التي سمعها لم تزد صبري إلا اشتعالًا، وأن ما كان يحركه من قبل لم يعد مجرد رغبة في الانتقام، بل صار ثأرًا شخصيًا من كل من تخلّى عنه أو وقف في طريقه.

عاد صبري إلى الفراش، لكنه لم يجلس هذه المرة ليستريح. انحنى نحو حذائه الموضوع إلى جوار الحائط، والتقطه بيده، ثم بدأ يحاول ارتداءه رغم ارتعاش أصابعه من شدة الضعف.
اقترب شاهين منه مسرعًا.: إنت رايح فين دلوقتي؟!

رفع صبري عينيه إليه، وقد استقرت في وجهه ملامح رجل اتخذ قراره ولم يعد يقبل النقاش: راجع لرجالتي ...

هدر فيه شاهين بسخط : راجع لهم إزاي وإنت مش قادر تقف على رجلك؟! إنت محتاج أيام كمان علشان جرحك يلم 
ولو اتحركت بالشكل ده ممكن حالتك تسوء!

استند صبري إلى الجدار ونهض واقفًا بصعوبة، وارتسمت على شفتيه ابتسامة قاسية.: كفاية إني ضيعت شهر ونص من عمري هنا! كل يوم بقضيه في الكهف ده، سلطان بيقوّي نفوذه أكتر، وانا مرمي هنا زي الولايا ...

ثم اقترب من شاهين، وقال بصوت منخفض، لكنه مشحون بوعيد ثقيل: خلاص يا شاهين... آن الأوان آخد حقي. كل اللي سكت عنه طول الفترة اللي فاتت، وكل إهانة اتعرضت لها، الكل هيتحاسب عليها الكل ...

أمسك بذراع شاهين السليمة ليستند إليها، ثم تحرك نحو مدخل الكهف بخطوات بطيئة متعثرة، يحاول إخفاء ضعفه خلف عناد لا يعرف التراجع.: يلا، جهّز الرجالة. عاوز أول ما أوصل ألاقيهم مستعدين وجاهزين...

تطلع شاهين إلى جرحه بقلق، ثم إلى وجهه الذي لم يعد يعرف فيه سوى الغضب، وأدرك أن محاولة إقناعه بالبقاء لن تجدي نفعًا.
وان القادم اسوء بكثير مما توقع ....
...............

ليلاً في جناح سلطان ....
عاد سلطان أخيرًا بعد يومٍ طويل أثقل كاهله بالعمل والمسؤوليات، ....
فبعد أن اصطحب سارة إلى الطبيب، وأُخذت العينات اللازمة منهما لإجراء تحليل الـDNA، كان في طريق عودته إلى الدار حين تلقّى اتصالًا يخبره بانعقاد جلسة عرفية في منزل أحد شيوخ الجنوب، تستوجب حضوره بصفته كبير العامرية، لحسم خلافٍ لا يحتمل التأجيل.

لم يتردد في تلبية الدعوة، لكنه اضطر أولًا إلى توصيل سارة إلى دار العامرية، قبل أن يغيّر وجهته ويتجه مباشرةً إلى مقر الجلسة، ...
وحين انتهت الجلسة أخيرًا، كان الليل قد أسدل ستاره على البلدة، فعاد إلى الدار منهكًا، لا يرغب في شيء سوى أن يخلع عن كتفيه ثقل يومه، ويجد قليلًا من الهدوء والراحه بين احضان حوريته المجنونه .

لكن ما إن دخل الجناح حتى أدرك أن الهدوء الذي ينشده قد لا يكون في انتظاره هذه الليلة.

كانت حور جالسه علي الاريكه بجوار النافذه تقرا احدي الكتب ولم تعيره اي اهتمام...

اقترب منها سلطان طابعاً قبله علي راسها قبل ان يجلس أمامها علي الاريكه ، اراح راسه للخلف وملامح الارهاق باديه علي وجهة: اخبارك ايه يا حبيبي ، مكلمتنيش خالص انهارده ...

اجابته حور باقتضاب وهي علي نفس جلستها: عادي ما كنتش فاضيه ؟؟

ابتسم سلطان بخفه فهو يعلم انها غاضبه منه خاصه عندما قرأت رسالته ولم ترد عليه، فسالها بمشاغبة: وايه المهم اللي شاغلك اوي كده وخالاكي ما تفضيش خمس دقايق علشان تكلميني تطمنيني عليكي ...

رفعت حور نظراتها اليه فالتقت عينيها الخضراء الغاضبه مع قدحي القهوه الرائقة داخل مقلتيه ، وهتفت حور بالامبالاه مصطنعه : عادي يعني قلت لك ما كنتش فاضيه وبعدين ما حبتش اشغلك عن مشوارك المهم وعلشان تاخد بالك من الهانم التعبانه اللي با حرام مش بتعرف تمشي خطوتين لوحدها...

مد سلطان يده واخذ منها الكتاب ووضعه جانباً واقترب بجسده منها هامساً بخفوت وهو يلف خصله من شعرها حول اصبعه : مفيش حاجه في الدنيا دي تشغلني عنك يا حور السلطان ...

ضحكت حور ساخره : لا واضح فعلاً ...

اقترب سلطان اكثر وهمس بعيث وانامله تتحرك بخفه علي جانب عنقها : عندك شك في انك اهم واغلي حاجه عندي في الدنيا دي كلها ....

اختلجت نبضات قلبها من همساته ونظراته ولانت ملامحها قليلاً ولكنها لازالت غاضبه : ولما انا اهم واغلي حد عندك ليه خرجت معاها من غير ما تقولي ولا تاخدني معاك وليه نزلت من غير ما تصحيني زي كل يوم .

لثم سلطان باطن كفها برقه وتابع : والله صحيتك وانتي مردتيش تقومي وبصراحه صعبتي عليا قلت اسيبك تاخدي راحتك بعد ليله امبارح ...

تلوّن وجهها بحمره خجله محببه ، فتابع وهو يقبل اناملها بحنان : وبعدين ما انا بعت لك مسج وقلت لك اني رايح اعمل التحليل وحضرتك قرتيها ومردتيش عليا ..

هتفت حور بغيره : عاوزني ارد عليك وانا شيفاك بتدلدق حنيه للست ساره وكان ناقص تشيلها وهي عامله فيها مستهبله وقال ايه هتقع ولا معرفش حصل لها ايه ....

ضحك سلطان علي غيرتها وتابع بعبث : انا بدلدق حنيه دي ست حامل وكان هيغمي عليها وانا واجبي كرجل اساعدها ، صحيح عدو الست الست اللي زيها ...

نهضت حور من جلستها بغضب ووقفت متخصره امامه فارتفع القميص القطني القصير المطبوع بنقشة النمر لاعلي فاظهر جمال فخذيها الممتليين باغراء فطري اشعل ناره : ت.. ايه؟؟
تساعدها ، ماشي يا سلطان يا ابن هانم خالي الهانم المسهوكه دي تنفعك اشبع بيها...
وما ان استدارت من امامه وشعرها الغجري يدور حولها بجنون حتي وجدت يده القويه تجذبها من ذراعها بقوه حتي ارتطم ظهرها بصدره الصلب واحاط خصرها بذراعه وذراعه الاخر يتحسس جسدها باغواء ، هتف سلطان بخفوت يجانب اذنها : اهدي علي نفسك يا وحش في ايه ، انا مش قدك وانتي لا بسه لي الحته التايجر دي ...

دفعته حور في صدره يغيظ: ابعد عني .

سلطان بهمس: اموت لو بعدت عنك ، يرضيكي اموت ...

استدارت حور اليه وعينيها تلمع بالدموع : بعد الشر عنك متقولش كده ...

قطب سلطان حاجبيه وسالها بقلق : ليه الدموع دي ، مالك يا حبيبي ؟؟

انحدرت دمعه علي وجنتها وتابعت وهي تطرق راسها ارضاً بحزن : انا خايفه يا سلطان ؟؟

سلطان برقه وهو يمسح دمعتها ويرفع وجهها اليه : خايفه من ايه وانا جانبك يا حور ...

حور وهي تنظر داخل عينيه : خايفه من اللي جاي ، خايفه البيبي يطلع ابنك ساعتها انا مش عارفه هعمل ايه ، مش هقدر ابعد عنك ، وفي نفس الوقت مش هقدر احرمك منه ...

ضمها سلطان يقوه داخل صدره ومسح علي شعرها وظهرها بحنان : مفيش قوه في الكون ده تقدر تخاليني ابعد عنك او تبعدك عني ، وانا قلتها لك قبل كده اللي في بطن ساره مش ابني عاوزك تكوني واثقه من كلامي كويس ، ولو في احتمال واحد في المليون انه يكون ابني ده مش هيغير حاجه ساره مالهاش وجود في حياتي انا حياتي مفيهاش الا حور وبس ....مفهوم يا حور السلطان...

ضحكت حور من وسط دموعها وأومأت له : مفهوم يا شيخ سلطان ...

ابتسم سلطان ثم انحني بجسده وحملها علي ذراعيه فتعلقت بعنقه وسالته بدهشه : بتعمل ايه يا مجنون ؟؟

اجابها وهو يضعها علي الفراش مشرفا عليها بجسده الضخم: عاوز اشوف موضوع التايجر ده اصل بصراحه جو الشراسه ده حلو موت ....

ضحكت حور بصخب وهتفت بعبث وهي تتعلق في عنقه: طب اوعي التايجر يعضك..

هتف سلطان بعبث بعدما تحرر من ملابسه وهو ينحني فوقها : اموت فيك وانت شرس كده ...
ثم التهم شفتيها في قبله عاصفه مشتاقه ويديه تسير علي جسدها بتملك مجنون وهي تبادله بشغف تزيل عنه تعب يومه وهو يثبت لها قولاً وفعلاً انها الوحيده مالكه قلبه وروحه .....
،........................


تعليقات