رواية خلخال مشوه الفصل الثاني والثلاثون بقلم زمرده
اشم سوالفچ واعثر
بدرب الشوگ
الليل بلايه صوتج
ما ينجرع وكته
°جعفر°
الدكتور : جلطة
انتفض بخوف وانا حجايه ما گدرت احجي مصدوم
صخر : گول غيرها دكتور
الدكتور : الحمدلله معديته بس وضعه تعبان يحتاج عناية ولا تخلوه يتعرض لضغط لان تنتكس حالته
صخر : زين دكتور نگدر نشوفه ؟
الدكتور : أي بس لا تطولون يمه الكم عشر دقايق
خليتهم يحجون وانا مشيت اشوفنه اول ما فتحت الباب وطبيت صار صوته بأذني يون تقربت منه مركز بحجيه گلبي يتملخ وانا اسمع حجاياته
ليث : زفوها ولك جعفر زف... زفوها
يحرك رأسه بوجع وكل كلمة بالگوات تطلع وياه
كضيت ايده البيها الكانونه ،اعاتبه
_ هذا أنت القوي هيج تطيح وتخوفني عليك ،ليش ولك ليث
مغمض عيونه بس صاحي يرد علي بثگل ،استغربته
ليث : "ضعف القوي من شاف زفتها "
درت وجهي اباوعله طب للغرفة عينه على المدود والمغذي والاجهزة داير مدايره بلعت ريگي الغصة ذبحتني وانا اشوفن صاحب عمري بهل حال
وگف يمنا يسأل
صخر : حاجاك ؟
_ أي ،بس لسانه ثگيل ،ليش ؟
صخر : جا غير جلطة لازم تخلي اثر ،بس الحمدلله من عدته
_ الحمدلله ،شنسوي هسة نگلهم لو لا ؟
صخر : لا ما يحتاج نگلهم باجر نطلعه
يحجي وعينه على ليث النفسه ذاك هو مبين ما مستقر گعدت على الكرسي اباوع على المغذي وكل فكري بيه ،شلون راح تعدي عليه وشلون راح يتقبل خسارته ..!!
گعد على الكرسي مقابيلي ،
يحوس اعارفه ما يگدر على الچگاره يريد يدخن بس كاضته حالة ليث وما تحمل طلع برا ،ضليت انا گاعد يمه وهو من تنهديته مبين گاعد ،شوي ورد صخر گعد بمكانه ومن اجه الممرض طلعنا ما راضي لان تأخرنا يمه ضلينا انا وياه بالمستشفى بلايه ما نحجي الأحد على الصار
دگت الساعة فوگ الهدعش وخابرني برهان ،باوعتله بايدي الموبايل
_ شأگله اذا سألني وينك ؟
صخر : گله بالگيعان يم ليث
_ خوش
بس فتحت خط گال
برهان : شني وينك ؟
_ بالگيعان يم ليث
برهان : جا من العصرية بالگيعان شني السالفة ما تردون ؟
_ عدنا شغل
برهان : شغليش هذا الما يگضي ردوا وباجر كملوا .
_ تعارف ليث ما يرضى نرد اذا مانكمل كلشي
برهان : اطينياه احاجيه ،بكيفه ما يرضى
باوعت لصخر حاير
صخر : شكو ؟
حطيت ايدي على السماعة
_ يريد يحجي وي ليث ،هذا ماتعبر عليه ما تعارفه
صخر : اطينياه
اخذ الموبايل مني
صخر : برهان راح احجيلك بس ماتحجي لطير الطاير ..
اطيني مجال احجي .. ليث انجلط وهسة احنا بالمستشفى ..صاعد ضغطه ..
دنجب على الاساس ما عاشگ أنت وما تعارف اللوعه ،..أي جا اسكت ولا تضل تبيع مثاليات دير بالك تحجي
سده واطانياه حطيت الموبايل بجيبي وهستوني گعدت وخابر عمي محمد على صخر ...
°غاية°
مشيت وراها تفتر قلقه ما تگدر تگعد حتى ،وگفت تباوع من الشباك وتحجي حايره
ميمنة : اندري وين صار طلع مستعجل وگال ماشي لصاحبه راح تدگ الثنعش وهو بعده يا صاحب هذا اليتأخر هيج عده اول تالي
_ خاب شبيج شني زغير وهيج ضال بالج عده ،اول تالي يرد
ميمنة : اخافن لا تعرضله احد من بيت غازي وهو منا شلون متحمل عليهم
صفنت حايره
_ ما اعارف والله
ميمنة : اوووف
ضلت تحوس وما صدگت شافت أبوي طب ،بس وگف يمنه گالتله
ميمنة : عمي ما تخابر صخر ،طلع لصاحبه وما رد
بعد
محمد : يا صاحب ،ما گالج ؟
ميمنة : لا والله ما حجه ،بس ضل بالي
محمد : عليش يضل بالج هسة اخابره
دگ عليه ما طول بساع رد ،وانا وميمنة مركزات وياه
محمد : شني بوية صار نص الليل وأنت ما مبين
سكت شوي يسمعله
محمد : جا اذا الدرب طويل بات وتعال الصبحية،اي احسن في امان الله
بس سده باوعلها متانيته يحجي
محمد : يبات يم صاحبه لان الدرب بعيد ويگول ماخذه الوكت يجي الصبحية لا يضل بالج عمي
هزت رأسها ساكته وأبوي مشى يطب جوه ،كضيت ايدها السليمه احجي
_ امشي نامي بعد عارفنه مكانه
ميمنة : هو ماشية انامن ،بس سدي البيبان
_ لا اخليهن خاف يجي ليث واحنا نايمين
ميمنة : جا خوش
طبينا للصاله سوه هي مشت فوگ وانا توجهت لغرفتي ،بس انداريت من انفتح باب غرفة أمي
باوعتلها مستغربة ،شعجب گاعده مو من عوايدها
_ شعجب گاعده يمة ؟
زهرة : عيني ما جاي تغمض
_ اسم الله ،ليش ؟
زهرة : ما اعارف ،بالي عد اخوانج
_ نوح نايم فوگ ،وصخر يم صاحبة وليث بالگيعان بعد عليش ضال بالج
زهرة : اندري يايمة ،طبي نامي بعد روحي لا يضل بالج
باوعتلها بحيره وطبيت للغرفة من مشت للمطبخ گعدت الصبح على صوت سوالفهم بالصاله لبست شالي طلعت صبحت عليهم گاعدين كلهم وصخر وياهم يتريگون
_ يمة جا ميمنة وينها ؟
زهرة : بالمطبخ ،جاي تعجن
_ ياا شني تعچن وايدها
زهرة : عنودية گتلها خلي غاية تعچن ما رضت
_ فلا تنگدر
مشيت للمطبخ ما راضيه تخصرت اباوعلها
_ جا مو ايدج موزينة ؟
رفعت رأسها ،وردت دنگت تكمل
ميمنة : جا شلون ماعدنا خبز للغدا
_ جان تانيتيني انا من اگعد اعچن بعد وكت للغدا
ميمنة : انا ضايجة وگلت اللهي روحي
_ گومي انا اكمل
ميمنة : عليش انا راح اكمل عود اخبزي وياي
_ اووف منج
ميمنة : هاا شو تأفأفين ؟
_ جا عنادج يضوج
ميمنة : معاشرة اخوج شترديني
_ لا من يوم يومج
ميمنة : يااا
_ أي والله قابل اچذب عليج
ميمنة : خلف الله عليج
ضحكت دنگت گبالها
_ مو تزعلين عليج الله
ميمنة : لا ولج على شني ازعل امشي تريگي لا تضلين تسولفين
أبتسمت على اثر ابتسامتها ومشيت شغلت النار جوه القوري بس حمه الجاي صبيتلي بگلاص وطلعت چبن ورديت للصاله ،حطيتهن بالصينية وگعدت اكل وبالي يم حجيهم
رأجس : شني كل داير سنة بتج مسيره علينه زعلانه ترا مايصير هيج لحد الان انا ساكتلها واگول الزغيره ما اخلي بخاطرها مني بس وصلت حدها شني تريد تچي شعدها
غضة : شبيك انفكيت علينا ،انا هم صوجي حجيتلك
رأجس : شو ما تعارفين تحجين انفكيت شني ،أنت ما تعلميها تكسب رچلها شني صار سنين على هل حال يوميا مبهذله روحها وبزرها
غضة : كله منك ،لا تضل تحجي عليها وأنت جابرها عليه
رأجس : جا المن تردين اطيها للغريب وابن عمها رايدها
غضة : چنت تگدر تگله ما اطي وتطلع حجه ،بس أنت صرت وياهم ضد بتك
رأجس : والمن جاي تفتحين دفاتر قديمة ؟
غضة : هاي الدفاتر ما انسدت حتى تنفتح يا أبو محمد
شربت من الجاي ورفعت راسي اباوع على صخر طلع مستعجل رديت اكل وجده وجدي ضلوا واحد يشمر حجي على الثاني ،بس خلصت ريوگ تحزمت للبيت نضفته وبس خلصت طلعت يم ميمنة تخبز وانا گلبي يم ايدها
_ هسة لو مخلية هيوفة موديتلنا خبز
ميمنة : خطية شني ذنبها تخبز وجبتين باليوم ،انا صرت زينة واگدر
_ انقهر عليج والله
ميمنة : خايبة لا تنقهرين انا متعلمه ،وهم ما عجنت هواي
سكتت اباوعلها بس خلصت انا كفيت الهوسة وطبيت وراها واگفه تغسل ايدها بس شافتني گالت
ميمنة : خليه يبرد
_ هو يبرد الا اضمه
ميمنة : عاشت ايدج
_ وايدج المفصوخه
رفعتلي حاجبها
ميمنة : هاا ولج تصنفين ؟
_ لا ابد
ميمنة : أي صدگت
_ جا لازم تصدگين
أبتسمت ساكتة ومشت تبدل هدومها وانا بس خلصت طلعتلي هدوم وسبحت گعدت بالصالة امشط شعري واندگ باب المطبخ
°جعفر°
اباوع عليه گاعد والدكتور واگف گباله يشيل الكانونه ويطي تعليمات لحالته ،بس خلص گال
الدكتور : مثل ما گتلكم ابعدوه عن الضغوطات ،بس هل فتره بين ما يتحسن وضعه لان تعتبر فتره صعبه تحتاج أجواء ملائمة
صخر : أن شاء الله دكتور
طبط على چتف ليث
الدكتور : عدك العافية ،بعدك بداية العمر انتبه لروحك
هز رأسه بلايه ما يحجي ،طلع الدكتور وانا وگفت گباله احجي
_ اطيح حضك اذا طحت بعد
باوعلي ساكت ،وگام يريد يوگف على حيله ،كضيته من ايده
_ شني وين ماشي ؟
ليث : للبيت ،اختنگت هنا
_ جا هو راح نطلع بس ماتگدر تمشي وحدك اسند روحك علي
صخر : خليه لازم يمشي وحده جا اذا يضل هيج الدنيا كلها تعرف البيه
_ ما يگدر
ليث : لا اگدر
حرك روحه يمشي بصعوبة اباوعله وميت من القهر عليه هذا الچان بمشيه ما يتلاحگ ما يگدر يدوس الگاع ...
مشيت وراه أخافن لا يطيح ردت احطه بعربانه من شفته تعب بس صخر ما رضى ،كملنا دربنا للسيارة بس صعد تمدد ورا تعبان جريت نفس
وصعدت بالصدر وصخر صاعد گبلنا ومشغل السيارة
تحرك للقرية وطول الدرب خلصه چگاره ورا چگاره
مديت ايدي
_ اطيني وحده
اندار رافعلي حاجبه
_ امشي عليك الحسين لاتگول لا ،مشتعل گلبي بنار من امس لليوم
بلايه ما يحجي شمر بحضني الباكيت ولجداحه
طلعت وحده علگتها وجريت منها نفس
صخر : نفس مال واحد خبره ادبسززيه واحد انگس من الثاني
حطيت الباكيت والجداحه على الدشبول ورديت عليه
_ جا حلال عليك وحرام علينه لو شني السالفه ؟
صخر : بعدك زغير
_ أنت دخنت ازغر مني ،من امشي للبستان انا وليث اشوفن المربط مليان گطوف وچم مره بمره نلگفك هناك ونغلس نستر عليك
صخر : تسترون علي ؟
_ أي والله نستر عليك
صخر : مشكورين يابة
_ تدلل لاتگول الابوي شربت چگاره
صخر : صار
_ بس هل مره
صخر : خوش
يرد علي منوره خشمه ،بس وصلنه گبل لا ننزل اندار عليه
صخر : سيطر على مشتيك بين ما تصعد فوگ ،وهاا انا جبتكم من الگيعان خوش ؟
رديت انا وليث
_ خوش
نزلت گبل ليث اباوع عليه نزل يعدل وگفته ،ومشى طبيعي هزيت ايدي احجي
_ جا گبل شوي چنت تريد تموت شو صحيت لو تخاف من صگارك
اندار علي
ليث : صگاري وصگار العشيره
مشيت وراه طبينا وصخر ورانا ،دگيت باب المطبخ احجي عليه طب وخلاني لحگته من سمعت صوت جده تصيح تعال
_ السلام عليكم ،شلونج جده
غضة : ياهلا بأبو السجون
مشيت اگعد يمها اريدن اللهيها عن ليث حتى يصعد فوگ يمدد لان جاي يضغط على روحه
_ خلف الله عليج ،اذا أنت هيج تحجين الغرب شتگول
صخر : يگولون عليك خريج سجون يعني شيگولون ؟
_ يمعود أخر همي شيگولون صدگ جده جدي وينه ؟
غضة : مشى لگعده هو وعمك
_ ما ياخذوني وياهم احللهم الطلايب
صخر : أي خوش ،الحگهم
انداريت عليه
_ شبيك واگفلي على الزلة ؟
صخر : منو يمك أنت ؟
_ جا انا كل ما جاي احجي شي توگف بزردومي
صخر : قابل حجيت من شربت چگاره
فكيت عيوني وصحت
_ جااا حجيت هسة
صحت متوجع من اجتني طگه من هاي الزينة على رگبتي من جده
غضة : ولك تشرب چگاير ؟
_ وحده جده والله واخذتها من صخر
غضة : جا هي وحده تجر وحده
_ لا جده ما اشرب بعد بس ردت اجربها
غضة : عليش تچربها ولك ،جا غير تلعب النفس
_ صح كلامج
غضة : تسايرني مو ؟
_ لا والله ،بس اگلج صح ريحتها تكتل
صخر : شگد جذاب
اشرتله يسكت وهو معاند الا يشهرني ،ساعة السودة فلا واحد يگدر يسويله شي يمه الله لا يسطله على بشر ...
صخر : هاا شبيك صافن ؟
_ احجي عليك بگلبي ،هلگد ما تنهضم عجيب اختي شلون متحملتك
صخر : شسوي بعد الله بلاها
_ أي والله ما حجيت الا الصدگ بلاء وطاح على راسها
صخر : ما تشوف هواي سكتتلك وراح يخلص صبري واكضك اگضي بيك التوبه
_ اگوم امشي لبيتنه احسلي
صخر : الله وياك
گمت اريدن امشي وتذكرت
_ اختي وين اريدن اشوفنها
غضة : فوگ بغرفتها
_ ماشي للبيت اشوفنها غير وكت
صخر : طنگر
خزرته وبعدين تذكرت أكبر مني ،فكيت عگدة حاجبي ورديت
_ ما مطنگر ،اودعانكم
صخر : الله وياك
_ موغف على گلبك
صخر : شبيك متنرفز مني ؟
_ هيج بكيفي
صخر : الحمدلله ،بيك بخت مابي حيل چان كضيتك طيحت حضك ،تتذكر گبل شلون چنت اكتلك
_ هستوني طالع من السجن ،خل اتغذه زين وايدك الك
ضحك وأشرلي اطلع ،طلعت وانا كل بالي عده ،ما اگدر احجي واخلي احد ينتبه ولا اگدر ما افكر ب حاله ..! !
°غاية°
بس سمعت صوت الولد بالصاله اختفى طلعت اسأل
_ جا وين ليث جده ما سمعتله حس ؟
غضة : صعد فوگ ،اضنه تعبان حتى ما گدر يضل واگف
_ ماشيه اشوفنه
صعدت دگيت باب غرفته وضليت واگفه ،رديت دگيته الا اجاني صوته
ليث : تعاي
فتحت الباب مبتسمة
_ شمدريك هاي انا ؟
ليث : ماكو غيرج يصعدلي .
سديت الباب ومشيت واگفه گباله وهو امدد
_ شبيك ،تعبان ؟
ليث : أي ،امس ما نمت
_ جا شعدك ضليت بالگيعان ؟
ليث : مو بالگيعان
_ جا وين ؟
ليث : اگلج وما تحجين
تدنى يسويلي مكان ،گعدت وهو متمدد
_ أنت مو تعارفني شني ،احجي ضل بالي
ليث : امس عرسها
_ عرس مني ؟
ليث : كواكب
صفنت حايره شأرد
ليث : اخيج صعد ضغطه وطب مستشفى
نشغت
_ يعني امس بالمستشفى أنت ؟
هز رأسه ب أي
ليث : هسة رديت منها
_ جا ليش ما نعارف احنا ؟
ليث : صخر وجعفر وياي
_ يمة ليش ما حجوا ؟
ليث : احسن
_ صعد ضغطك مو ؟
ليث : كافختني چلطه
لطمت بأثنين اديه وصحت منفعله
_ يمة سوده علي
گعد كاض ايدي
ليث : جا شني السالفة المن اللطم ،مو هذا انا گدامج كلشي ما بي
دمعت عيوني وهسة الا ركزت وياه
_ ليش هيج حجيك ثگيل ؟
ليث : جا غير جلطه ،بداعتي عدج لاتحجين
هزيت رأسي ب لا ودموعي طاحن ،هد ايدي يمسح عيوني ويحجي
ليث : اروحن فدوه لعيونج لا تبجين ،ولج راح اتندم لان حجيتلج
_ جا هم عوزها تضم علي
ليث : ما اضم عليج ،مو حجيتلج بس بعد كلشي ما بي انا
_ لو صايرلك شي ،شلون بي ؟
أبتسم
ليث : اروحن فدوه لليخاف علي
_ ضل ضل قشمرني بهذا حجيك
ليث : جا قابل أنت قشمر وانا اضحك عليج ؟
_ أي والله قشمر وتضحك علي من زمان
ضحك ورد تمدد
ليث : تعبتني ولج وانا بالگوات احجي
_ امداني
ليث : ولج كافي راح اهفج بالمخده
گمت
_ جوعان تريد شي اسويلك ،ماكل لو لا ؟
ليث : لا ما ماكل بس ما اريدن
_ شني ما ماكل وشني ماتريد ،لازم تاكل زين حتى تطيب
ليث : سالفة وبعد انحجت لغاية ،جيب الينسيها
گمت وگفت امسح بعيوني
_ شأسويلك شي تاكله ؟
استسلم
ليث : أي شي من ايدج
_ خوش
طلعت من الغرفة نزلت وانا گلبي متفطر عليه سويتله مخلمه وانا كل بالي عده ،بس
خلصت حضرتله الصينية وصعدت ،بس فتحت الباب شفته مغمض ،حطيت الصنينة بالگاع ومشيت يمه اندهه
_ خاب ليش نمت ،جا مو تاكل ؟
فتح عيونه مبين هستوه غافي ،بلايه ما يحجي
گعد مرجع ضهره على تاج الچربايه
ليث : ما اگدر اگعد بالگاع ،اطيني الصنينة هنا
دنگت شلتها ،حطيتها على رجليه وگعدت يمه احجي
_ سويتلك مخلمه حتى تاكل ،أنت تحبها
هز رأسه ب أي ،ومن بده ياكل وركزت وياه انتبهت ايده ثگيله حركتها ،كضيت ايده
_ اوكلك انا ؟
بلايه ما يحجي نزل ايده ،صرت اسويله لگم وبالگوات كاضه عيوني ما يبچن على حاله ،هذا مو ليث ابد هذا انسان ثاني ...
ليث : شبعت
_ شأكلت ؟
ليث : ما اگدر والله بعد
سكتت وگمت شلتها
ليث : طفي الضوه وياج
هزيت رأسي ب أي وگبل لا اطلع طفيته ونزلت ،وانا على الدرج شفتها جاي تصعد
ميمنة : اگلج عمتي شو تأخرت ؟
_ اندري
ميمنة : منو مشى وياها لعمة ؟
_ اضن نوح
ميمنة : خير أن شاء الله
هي كملت دربها لغرفتها وانا نزلت افتر حايره وين امشي ،جده تباوع مسلسل وانا مشيت جبت كتبي وگعدت يمها اقره ،بالساعة وأجت أمي بس شافتها جده گالت
غضة : هاا زهرة بشري ؟
نزعت عباتها
زهرة : والله ياعمة قافله فرد نوبه ،تريد تطلگ ما تضل يمه
غضة : هو شني التطلگ و فروخها ؟
زهرة : حجيت هواي طاحت ذرة من لساني وانا اهدي بيها
غضة : اعارفها من تعاند بت رأجس بعد العناد يمشي بعروگها
زهرة :والله عمة خطية ولدها ،رادت تجي وياي وبگت روحي بوگ ورديت
طب نوح يهز بأيده
نوح : خايبة جده بتج فد عرررمة ،زين ومن الزلمة متحملها
غضة : من ايده ،چعب الها وخلها ياكلها
زهرة : عدت كل هل سنين ،شوكت يصافون ؟
غضة : اندري ،اذا تصافوا هاي معجزة
زهرة : والله يبس ريگي وهسة راح تزعل علي لان گالت تجي وياي
غضة : وين تجي ،عمج متحزم الها هل نوبه خلها تستر على روحها وتگعد
زهرة : خابريها واحجي وياها
غضة : دگلي عليها ولك نوح خلني اطيح حظها
نوح حامي على عمة عطاء ما صدگ ،بساع دگ عليها
واطه لجده الموبايل فاتح سبيكر وصوت عمة دوه بنص الصاله
عطاء : لك نوح ليش خليتني ،انا الك بس اشوفك الا ادگك بنعالي
ضحك من عاطت بيها جده
غضة : هااا العريمه ام المصايب
عطاء : هااا يمة
غضة : وسمه ،ولج ما بزعتي ؟
عطاء : بحضكم وبختكم ،انا ويني وين هذا البشر
غضة : ما تستحين والله
عطاء : خليت المستحى الكم والله
غضة : ياا يااا يامفلوكة
ردت بغصه خلتني اخلي الكتب واركز وي صوتها المستهضم
عطاء : مليت كل ما گام وگعد گال سترت عليج ما خليتهم يذبحوج ،ولج يمة حتى من اصير
خيره يذكرني بحجة هااا نسيتي ،كسرتوا ضهري لو ذابحيني هواي احسن ولا مخليه متسلط علي
اباوع على جده الحيره بينت عليها تريد تحجي وما تعارف شني التگوله
عطاء : حرام عليكم والله ،انا حبيت ما زنيت ،بيوم الرادني بالحلال گمزتوا لا ولا شني متزوج احسن هسة من اطيتوني لواحد بالگومه والگعده يذكر اسمه گدامي ويخليني اموت الف موته بالدقيقة
غضة : شبيدي عليج يايمة ،كل البيدي سويته وبريت ذمتي وما فاد
عطاء : اعارف يمة ،الصوج من أبوي ومو من غيره
غضة : هاي قسمتج
عطاء : عشرين سنة يمة احاول اعيش وما جاي اگدر وروح منير تعبت
غضة : سوده علي
نوح مگابل جده يهز ايده لان جده بساع تعاطفت وي عمة ،وحگها ،من وعيت على الدنيا لليوم وهذا حال عمة وياما أيام بيهن رادت تطلگ ويردها عمها الرباح
رديت أقره واحس ببالي انشده اكثر من سالفة ليث
ل سالفة عمة ،شلت كتبي ومشيت للغرفة وبالگوات خلصت مادة الامتحان ،وبس خلصت صعدت بالليل اشوفنه
فتحت باب الغرفة وفزيت من شفت گاعد يمه ،من باوعولي ثنينهم ما عولت اطبگ الباب وانزل لطمت وي روحي اگمز بالصالة كل
مره هيج الله حطني بموقف وكل مره بلايه حجاب
ميمنة : ياستار ياربي ،شبيج لبسج چني ؟
عضيت اصبعي
_ حضي لابسه چني ،ولج شگد فگر انا ؟
ميمنة : شكو يا ستار ؟
_ صعدت فوگ لغرفة ليث وما اعارف يمه عزيز وطبيت چفت بلايه حجاب
ميمنة : جا شبيدج ما تعارفين
_ انقهرت والله
ميمنة : عليش يمعوده ،بس بعد دوم حطي الشال على رگبتج
_ هو احسلي
هي صعدت وانا رديت للغرفة وما گدرت انام بلايه ما اشوفنه شلون صار ،خلص اليوم كله فوگ بحجة التعبان من شغل الگيعان ،عديت بالساعة
وحطيت شال على راسي وصعدت دگيت باب الغرفة صارت بي خوفه...
من سمعت صوته طبيت ،ابتسمت من شفته گاعد
_ شلون صرت ؟
ليث : احسن ،شبيج مساع صعدتي مفرعه ؟
_ ما اعارف بيه يمك والله چنت بالغرفة اقره وبس خلصت صعدت اشوفنك
ليث : اممم ،عدج امتحان ؟
هزيت رأسي ب أي ،ومشيت گعدت گباله لاگيتلي سالفه احجيها براسه
_ ليش ما تداوم كليه ؟
أبتسم وشغل چگاره يريد يدخن ،اخذتها منه
ليث : شني ؟
_ لا تشربها موزين عليك
جر الباكيت ما مهتم
_ ليث لخاطري بس بين ماتصير زين
باوع علي بحيره هز رأسه ب أي ،واخذ مخده حطاها بحضنه
ليث : سولفي
_ باوع
ليث : باوعت
_ ارجع داوم كليه والله حرامات ضال هيج
ليث : مو دربي ،انا زلمة فلاح اطيني كرك مو كتاب
_ جا واذا فلاح ،لهي روحك بالدوام
ليث : لا
_ فكر عليك الله
جر نفس وهز رأسه ب أي
ليث : ميخالف افكر
_ تريد شي گبل لا انامن ؟
ليث : لا سلامتج
أبتسمت وگمت انزل ،بس گبل لا اطلع انداريت عليه
_ لا تشرب چگاير
ليث : يا طلابة الچگاير
_بس صير زين وشگد ما تريد دخن
ليث : خوش
_ تصبح على خير
ليث : وأنت من اهله
طلعت من الغرفة اريدن انزل وشفته صعد يدندن وي روحه ،بس وصل يمي رفعتله حاجبي
_ هااا نوح شارب ؟
نوح : انجبي شارب شنو ؟
_ مي عصير ،مو الا البالك
نوح : طيح الله حظج
_ جفون تگول ،وحظك هم
رمشت بعيوني مستوعبة جفصتي حجيت اسمها گدامه ،تنهد
نوح : چنت اتقصد احجيها حتى تتعارك وياي تالي باعتني ورضت بالغريب
_ انساها ولو بيوم ضاگت بيك الدنيا ما الك غير السجاده ،هي الدوه لكلشي ،لا تمشي لدرب
اعوج بس علمود تنسى وتالي تخسر الدنيا والاخره
نوح : تبت انا ،والصار ما يتكرر
_ توعدني ؟
نوح : وعد
أبتسمت فرحانة وهو خله ومشى لغرفته ،ثاني يوم گعدت گبل وكت الدوام ارجع ل أمتحاني بحيث حتى من طلعت للخط انا مسطوره سطر وعيني بالكتاب ،صعدت بصف بركة وانداريت عليها اسأل
_ شني شبيج ؟
بركة : شبي ؟
_ وجهج ذاك هو يلطم
بركة : عدي امتحان ترديني اضحك ؟
_ لا بس يعني زياده
بركة : بعدين احجيلج
_ الله اليستر مادام صارت بيها بعدين
بركة : يعني احجيلج لو لا ،ترا تحيرين
_اسكتي خل ارجع
بركة : راجعي عيني راجعي
باوعتلها ورديت حطيت عيوني بالكتاب اليوم كلش گابات عدها ،احفاد وحفيدات چدي كلهم طگه ونص
خلگهم على گدهم ...
من رديت للبيت اتفاجئت من سمعت صوت عمة عطاء جوه ،جنطتي بايدي وطبيت للصاله ،سلمت
ومشيت ابوسها واحجي
_ كل الهلا عمة ،صار هواي ما جايتنه
عطاء : قصدج صار هواي ما جايه زعلانه
ضحكت وكضيت ضحكتي وهي تهز بأيدها وتباوعلي
نزعت حجابي مختنگه
عطاء : أم شعر ،اذا تضوجيني اگصلجياه وأنت نايمة
_ الله وايدج تخلصيني منه
عطاء : يااا ،جا شبيه وتخلصين منه ؟
_ ثگيل عمة طاگ رگبتي والله حتى اضن صاير بيها سوفان منوراه
عطاء : عفه هذا
_ جا ماتخلين شعرج يطول اذا عفه مو مثل شعري هم ثخين ؟
اندارت على جده
عطاء : گبل امي هواي تهتم بيه چانت بس حرم علي الشعر الطويل من اهد عشرين سنة
_ ليش ؟
زهرة : سالفة طويلة ما عليج بيها ،امشي بدلي وتعاي حتى تتغدين
°حواري°
گمت وراها اخافن لا تطيح ،بلايه ما تحس اتبع خطواتها ،طبت للمطبخ شربت ماي وحطت ايدها على بطنها ماكو هيج حتى من الماي تلعب روحها ،انداريت على صوت ريحانة طبت تسأل
ريحانة : شني شلونها ؟
_ نفس الحال ،مو حباله هدت حيلها ،شربت الماي ومبين گلبت معدتها
تسمعلنا وبالها مو يمنا تحوس مبين تريد تزوع
الماي الشربته
ريحانة : جا تضل على هل حال ،لو تاخذها امي للدكتورة احسن
_ جا مو اخذتها وگالت هاي نساوتها
ريحانة : هستوها شهر ما صاير ومنا لنهاية الثالث هيج تضل
_ شبيدنا عليها
فزينا وراها من حطت ايدها على حلگها وركضت للمغسلة ،وگفت مقهوره ريحانة حاطه ايدها
على ضهر بصائر تحجي وياها وهي مدنگة تغسل خاوية روحها
ريحانة : شماكله حتى تزوعين أشو معدتج فارغة
رفعت راسها تمسح وجها
بصائر : تعبت والله
ريحانة : حگج والله
گعدت يم المغسلة ما تگدر تمشي ،رفعت راسي على صوتها نزلت مستغربة وگفتنا هنا تسأل
هيوفة : شكو شبيچن ؟
ريحانة : ماكو شي بس بصائر زوعت
هيوفة : اووف ،شيخلص هل نساوة
دنگت هيوفة على اثر صوتها من حجت
بصائر : تخلص روحي وهل نساوة ماتخلص
هيوفة : اسم الله على روحج ،گومي منا دنيا غروب وگاعده يم الحمام
سندناها نگومها ،گعدت بالصالة راده ضهرها على الحايط ،مشيت اجيبلها ماي وطب فقار يفر بسويج الدراجة بأيده ،من شافني
سأل
فقار : مرتي گعدت ؟
_ أي گعدت ،تلگاها بالصاله
فقار : خوش
طب هو وانا ترست دولكة الماي ولحگته ،گاعد گبالها ولام وجها بين ايده يحجي وياها
فقار : جا انا شاگول ،هذا المخوفني ،ليش ما اريدنج تخلفين
بصائر : جا شلون تضل بلايه جهال
فقار : يروحن الجهال كلهم فدوه ،اهم شي صحتج عدي
أبتسمت هي وانا وياها فرحت بكلامه حسيته سحب كل تعبها بچم كلمة
فقار : شربتي دواج ؟
هزت رأسها
بصائر : شربته
فقار : بلايه متاكلين شي مو ؟
بصائر : ما اگدر اكل مو بيدي
فقار : جا مو الدكتورة گالتلج يطيح اذا ما تاكلين
بصائر : اسم الله
فقار : جا اكلي ،صحتج اهم من جهال الدنيا كلها عدي
الابتسامة شگت حلگي ،وبلايه احساس
ناسيه روحي گلت
_ خاب اذا ما يحجي مثلك اطلگه بعلي
اندار علي
فقار : لا والله
_ اتشاقه
فقار : حق ما يعرف يحجي مثلي طلگيه
_ مايصير الا هو يطلگ
فقار : گليلي انا اگله يطلگج
سكتت بعد ما حجيت شو هذا صدگ ،اجت اخذت الدولكة من ايدي
هيوفة : صار ساعة واگفه وكاضتها مني ايدي تعبت
_ نسيتها
هزت ايدها وبأيدها الثانية الدولكة اطتها لفقار ،شرب بصائر منها و وگف ماد ايده الها ،گامت سانده روحها عليه وصعدوا فوگ
مبتسمة تباوع وراهم
ريحانة : الله يديمهم ،شگد افرح من اشوفنهم هيج واحد يحب الثاني
هيوفة : هو هواي يحبها ،مرات احس حتى اكثر من محبتها هي
ريحانة : اكيد هو اكثر لان سنين حابها من طرف واحد
هيوفة : الله يديمهم
ريحانة : ويديمكم أن شاء الله
هيوفة : فدوه لگلبج شگد طيب
هزيت ايدي
_ ضايگته
باوعتلي مستغربة
هيوفة : شنو ؟
_ گلبها ضايگته وتگولين طيب ؟
ريحانة : طيح الله حظج
هيوفة : مو گبل چم يوم اگولن عقلتي شبيج رديتي استخفيتي
ريحانة : الاحلام ضربت على عقلها
هيوفة : يجوز
تثاوبت اباوعلهن منعسة اريدن انام بس أخاف من انخطبت زادت ما نقصت الأحلام علي
ريحانة : هاا تذكرتي ونعستي لو شني ؟
_ جا مو تعارفين امس فلا گدرت أنام
هيوفة : انا اگول لو تمشي لساده هواي احسن
ريحانة : كله من جدتي حطت براس امي بت وتنعاب
هيوفة : انخطبت بعد عادي لو مشت
ريحانة : راح ارد احجي وي امي بلكت تاخذها
هيوفة : احسن
خليتهن يسولفن ومشيت للغرفة ،جريت بطانية خفيفة ومخده وتمددت ،وما اعارف شعجب من بعد چم ليلة غفت عيني ،بالساعة هيج وفزيت مختنگة اريدن اجر النفس ما اگدر طلعت من الغرفة ادور الهوه
بس شافتني امي ومبين علي حالي مگلوب اجتني
نجوى : اسم الله ،حواري يمة شبيج ؟
اشرت على صدري
_ مختنگه
نجوى : اسم الله الرحمن ،خاف لان نايمة بوكت الغروب ؟
_ ما اعارف
الحجاية بالگوات تطلع وياي ،بالساعة هيج الا ردلي النفس طبيعي والخنگه راحت ،متمدده على رجلين امي واباوعلها نزلت بايدها عباتها
هيوفة : عمة راح امشي الاهلي اشوفنهم شوي وارد
نجوى : روحي عمة
باوعتلي
هيوفة : امشي وياي غيري جو شوي ،ولو صاحبتج ماكو
گمت
_ اوگفي اجيبن عباتي
هيوفة : بساعج
مشيت للغرفة جبت عباتي وطلعت اللبسها ،بس فتحنه لباب صار بوجهنا حق واگف ويمه برهان يحجون من شافونا سكتوا وهو عينه علي سأل
عبد الحق : وين ماشيات ؟
_ لبيت جدي
عبد الحق : جا وحدچن
هيوفة : منا لهنا خوية
سكت وعكس عيونه منا ،كملنا دربنا بس طبيت لبيت جدي جريت نفس اهفي على وجهي
هيوفة : هاا شبيج ؟
_ خايبة شگد عكره هذا ،انا شلون راح اعيشن وياه
هيوفة : انجهم بيتج ،شني جديده ولدنا كلهم هيج ما يرضون على طلعتنا وحدنا
_ بس يخوزر خوفني
هيوفة : مني التخاف ،حواري الجنه ،لا هاي ما اصدگها
_ شهل فكره الماخذيها علي
هيوفة : ما تعارفين روحج صلفة
_ لا ما اعارف
هيوفة : جا زين انا اگلج
ضحكت ومشيت گبلها اطبن جوه من شفت غاية تباوع علينا من الشباك ،سلمت عليها وضليت واگفه مستغربة الصوت الجوه وهي تحجي وي هيوفة
_ اگلج صوت عمة عطاء جوه ،شني جاية هنا ؟
غاية : أي جوه
هيوفة : بسلا زعلانة ؟
غاية : أي
هيوفة : ليش ؟
غاية : سبب محدد ماكو ،والله انقهرت عليها لان جدي گبل شوي رزلها ابن اخوه مخابره يشكي
منها وتعارفين بعد جدي شلون من ينحاز الاحد ،خله عمة تتسودن
هيوفة : ماشية اشوفنها
مشيت وراها ،سلمت هيوفة عليها وانا هم ،گعدنا وهي اندارت لجده
عطاء : اگعد بالشارع اذا أبوي مو حمل گعدتي يمه
غضة : شو ما تعارفين تحجين ،شني قلة بيوت وتگعدين بالشارع ؟
عطاء : جا ليش يگلي يوميا جايتنة زعلانة ،هيج انا ثگيلة عليكم بجيتي ؟
غضة : جا شتردين يحبج من راسج ويگلج عفية ببتي اليوميا مسوية الدرب علينه سجة بزعلاتها ؟
عطاء : اكثر بشر ما لازم يحجي هو أبوي ،خلوني خيره ومحترمه روحي گاعده وساكتة وما ارد اذا ما ابن اخوه يجر عدل وياي
غضة : والله حتى لو جر عدل هم أنت ما طايقته گوه هي
عطاء : والله ما حجيتي غير الحگ يايمة
غضة : غضب الله على راسج
عطاء : ماكو داعي يمة غضة أل غضب كلش كافي
هزت ايدها جده ودارت وجهه من عمة ما مستحملتها وعمة بساع غيرت تحجي وي هيفاء ،وبنص السوالف سألتها
عطاء : ما صار عدج شي ؟
هيوفة : لا والله بعد
عطاء : مبين على ابو گمزه يحبج ،يستاهل لو خضرت بطنج منه
أبتسمت هيوفة تهز رأسها ب أي ،باوعتلي
عطاء : وأنت هم حق مبين عليه يحبج ،عينج عليه اكسبي لان مبين بس يمج يلين
هزيت رأسي مستحية وهي ضلت تسولف وتعلم وحجاية والثانية جده تگلها
غضة : جا ما تعلمين روحج
وعمة ترد عليها
عطاء : ما يستاهل حرامات اتعب روحي
هزت ايدها جده ،وعمة فلا مهتمه ولا چن جاية زعلانه هلگد ما تعلمت ،بلعت ريگي ما اريدن ادير راسي من سمعت صوته يحجي وي غاية ويسألها
ليث : جواريبي السود وين ما جاي الگاهن
غاية : بالمجر بمكانهن
ليث : ماكو ،شو اصعدي شوفيهن أنت
غاية : صار
كل هذا وانا ما درت راسي حتى من ردت
غاية : لگيتهن
ليث : شو دورتهن ماكو ؟
غاية : گدامك والله بس شوف بالك وين چان
ضحك بخفه وما طول وطلع ،وهستوه طلع وطب جدي ،وگف گبالنه ،واحنا كلنه وگفنا
رأجس : باجر اخذج تردين لبيت زلمتج وحجاية وحده ما اريدن
عطاء : اعذرني بوية اذا ما اجه هو وردني انا فلا اردن
رأجس : تكسرين حجايتي ؟
عطاء : محشوم أنت وكل كلمة تگولها ،بس انا ما ارد بزعت من العيشة وي زلمة بالگومه والگعده يهين بي ما ضلت عدي ذرة من الصبر
رأجس : جا تهجمين بيتج ؟
عطاء : ما انعمر حتى ينهجم بوية ،من يوم يومه هذا الحال وما تغير
°غاية°
ما حجه شي جدي چن عارف الگالته عمه هو الصح مشى لغرفته وردينا گعدنا بس عمة حالها تغير البنات مشن من اجاهن ضيرم ،وهيج الايام بدن يگضن بين المدرسة والبيت وما ضل شي ل امتحانات أخر السنة
اليوم أخر يوم دوام گبل لا نمتحن ،طلعت من المدرسة خاوية روحي الجو صار كلش حار بحيث حجابي ما حاملته مو حتى العباة
انداريت عليها احجي
_ خاب امشي راح افطس والله
بركة : يعني شني اطيررر
غميتها ومشيت گبلها صعدت بالخط ،حطيت جنطتي بحضني اباوع للبنات واسولف وي روحي
_ يلا هانت ضلت بس سنة وحده ويخلص كل هذا التعب
انداريت اباوعلها شمرت جنطتها ما مهتمة وگعدت
ندستها
_ حرام بيها اسلاميه
ضربت گصتها
بركة : نسيت
شالتها تحطها بحضنها وتدردم
بركة : مو جنطة چن مليانة حجار
_ شتگولين على چنطتي ،كسرت ضهري والله واليوم الجدول بالظيم
بركة : انا اموتن بالخامس ما أضل عايشة لان وراه سادس
_ يعني هسة انا لازم اموتن ؟
بركة : صلفة وضاله تشتمين الهوه وتعارفين وراج سادس
_ هاي شبيج لا تخوفيني
بركة : يگلج درجة وحده تخسرج الاول والتالي
_ لا اله الا الله
°بركة°
حرك ابو الخط من التمن كل البنات وانا الدرب كله ناصبه عليها ، چنت اضحك بلايه صوت
ينسمع ورفعت راسي گبل لا نوصل لقريتنا وشهگت وي روحي من شفته واگف راد ضهره
على سيارة سوده عالية يباوع باتجاهي چن يعارف المكان الاگعد بيه ..! ! !
درت وجهي من اجت عيني بعينه ،رفعت ايدي الترجف اعدل بشالي واحاول اسيطر على رچفتي الما اعارف سببها شني ..! !
انداريت عليها من كضت ايدي
غاية : شني شبيج
هزيت رأسي وهمست
_ مابي شي
غاية : شفتي رهيب ؟
_ يعني أنت هم شفتيه ؟
غاية : أي
بالگوات سيطرت على روحي و شلت جنطتي ونزلت من وصلنا ،طبيت للبيت اباوع عليهم
مخبوصين يصبون بالحوش ،حرت منين اعبر وگفت بمكاني
_ ترا مايصير هيج بس أنتم تذكرون تعرسون وي الامتحانات ما صايرة هاي والله
عبد الحق : ياهو معرس هسة ،غير بالعطلة
_ ما ضل شي للعطلة لواته أنتم لو شني ؟
عبد الحق : جا مو گلنه ورا امتحانات حواري يعني بعد بالشهر
_ ما يكفي
عبد الحق : طبي جوه لا احطنج بالخبط
طبيت ادردم
_ مو صوجك صوج جدي الخلاك بكيفك تقرر واحنا لازم انفذ
شيماء : هاا شبيج ؟
_ مابي شي يمة ،شمسوية غدة ؟
شيماء : فاصولية وضميتلج
_ خوش
مشيت بدلت ورديت حطيت تمن فوگاه المرگة بطاوة وحطيتهن على النار بس حمن گعدت اكل واباوع عليهم ،برهان خبصهم خبص ،جريت الصينية من اجه
جعفر : وسم شبيج ما تخليني اكل وياج ؟
_ جا ما تغديت ؟
جعفر : تغديت بس هسة جعت من الكراب
_ جيبلك خاشوگة
گام جابله خاشوگة وگعد ياكل وياي ويحجي
جعفر : گلبج حنين چنج ميمنة
_ صار گلبي حنين لان رضيت تاكل وياي ،سبحان الله
جعفر : قصدج انا مصلحچي ؟
_ ابد ابد
جعفر : أي مو اگولن
ضحكت وگمت اريد اغسل
جعفر : هااا شو گمتي
_ شبعت ،اكل أنت بالعافية
جعفر : الله يعافيج
غسلت ورديت گعدت يمه ،اباوعله ابد مو جوعان
_ ضلت بس الطاوة لا تاكلها جديدة عليك الله .
ضحك وگام غسل
جعفر : عود شيلي الصينية أنت
هزيت ايدي وگمت غسلتها وطلعت يمهم وبساع رديت من اجوي ولد عمامي وياهم ،ضليت افتر ضايجة وين امشي ،حطيت شال على راسي وحطيت كرسي يم باب المطبخ وضليت اباوع عليهم ...
°حواري°
شمرت الكتاب اريد ابجي ،احس براسي مشوش كلش ،الامتحانات والعرس هاي دوختي كلها من عبد الحق العنودي توسلت بيه بس يأجله وما رضى
خلاني اركض منا ومنا ليگول راح يصير منع مال اعراس ويريدنا نلحگ ...
بصائر : حورية ،اخوي برة يريد يشوفج
رفعت الكتاب اغطي وجهي
_ ما اريد اشوفنه ،عدي امتحااااان
بصائر : ليش تعيطين ،شبيها هاي تسودنت ؟
ريحانة : اندري ،صار ساعة تدردم وحدها ،اضن ضرب عقلها من الثالث
_ لا من اخوهااا
بصائر : هسة شأگله ؟
_ نايمة ،ميتة ،اي شي
بصائر : خاب امداج أي والله
طلعت وانا رديت اقره من لا جاره وكل ضني بعد ما گالتله هيج راح يمشي ،بس صار العكس
ما حسيت غير الكتاب انجر من ايدي وانا حرت شلون اللمن كفشتي
كض ايدي
عبد الحق : خليج هيج حلوة ،على طبيعتج .
_ يا طبيعة ،غير چني خراعة خضره
عبد الحق : جا وين اكو خراعة هيج حلوة
تلفتت
_ وين اختي ؟
عبد الحق : طلعت من شافتني أجيت ،ليش ما تطلعين من اجيج صار چم مره ؟
بساع تغيرت ملامحه ومبين ضايج مني بس يحاول يكض روحه حتى لا يغثني لان يعارف خلگي خلگ بگه
_ اقره مو تعارف عدي امتحانات
عبد الحق : اعارف ،بس هذا مو تبرير ،صار عبور الشهرين انا ما شايفج غير چم مره ينعدن على الأصابع
_ ضوجتني ،كل ما اشوفك اگلك خلي العرس بعدين وأنت ما ترضى الا تمشي كلمتك وانا للصدگ زعلت منك
ما جنت أعارف بهاي طريقة حجيي راح يلين ،ابتسم ابتسامة خفيفية
عبد الحق : يعني هسة أنت زعلانة ؟
هزيت رأسي ،ونشغت من تقرب محتضن شفايفي بين شفايفه بدون سابق انذار ،حركة خلت جسمي كله يتخشب وما اسيطر على رجفتي بين ايده ،نزل من شفتي لرگبتي يبوس كل شامه موجوده ويردد بصوت ذبلان منتهي
عبد الحق : اريدج قريبة مني ،جاي اموت كل ما اتذكرهن ،اريدج انا وروحي وگلبي متمنين قربج
كضيت ايده ونشغت ،وخر مصدوم من شاف دموعي تطيح ،بأستغراب باوعلي ويعتذر
عبد الحق : اسف ،لا لاتبجين ..حوريتي اسف والله
حطيت راسي على صدره وبجيت مقهوره عليه وعلى روحي ،يمسح على راسي بهدوء ساكت ،دقايق احنا على هل وضع بس حس بي هديت وخرني ،مبتسم
يباوعلي
عبد الحق : جا هاي خفايف وهيج خفتي شلون بيوم العرس
چن بحجايته نبهني ،بساع دمعن عيوني وهو ضحك
عبد الحق : اتشاقه والله
_ أخاف
عبد الحق : لا تخافين يمي ،حوريتي رويحتي وراحتي
لمني مره ثانية لحضنه بكل حركة منه وكل كلمة احسها نابعة من كل گلبه بس انا صعبة علي بالاخص اليوم أول مره يتقربلي بهل شكل چانت صدمه الي ما گدرت استوعبها ..! !
بس طلع هو طبن البنات مسويات علي مثل الهجوم گعدن گبالي وانا اديرن بعيوني منهن
بصائر : ريحانة والله فاتتج لقطة تخببببل
ريحانة : انا غمضت لان حرام
هيوفة : حتى انا غمضت
بصائر : انا ما غمضت حتى لو حرام اريدن اشوف أخوي الرومانسي
هيوفة : ليش شصار ؟
بصائر : اكوو وحده اليوم شفايفها مورمة ،شفتنها ؟
ريحانة : أي انا انتبهت ومجروحه هم
بصائر : يمكن لان اول مرة خطية ،بس انقهرت عليها شلون تخاااف
ريحانة : انا سمعته يعتذر منها
بصائر : چن انوكل لسانها ؟
°هيوفة°
ضحكت اباوع لحواري مسوية روحها تقره ،طگيت بصائر على ايدها
_ كافي خطية راح تموت
بصائر : تتذكرن من چانت تصيح ما اريددده
ريحانة : وانا اشهد ،اكلت مخ راسي اكل ،بس يلا هم زين عاد هو خوش رجال
بصائر : وطلع رومانسي هم
صاحت
حواري : كاااافي لحيتن
كضتها من وجها تباوع عليها مبتسمة
بصائر : اللهم لا شماته ،حل حل حل
حواري : شگد حقيره أنت واخوج
بصائر : تتذكرين من چنتي تباوعين علينا انا واخوج هم شفت بيج يوم وباوعت عليكم
حواري : عدج ثار وياي لو شني ؟
بصائر : أي والله
حواري : گومن برا لان حيييل ضايجة
بصائر : امداج مو وجه بوسة
ريحانة : انا اعارفها مو وجه نعمة ،شني انگلبت
بصائر : حالات خاصة شبيج
حواري : شلون راح ادفرها واطلع الجاهل من خشمها
حطت ايدها على بطنها
بصائر : عمة عنيفة امداج
حواري : امداج أنت ،هيوفة مو أنت عاقلة ،طلعيهن عليج الله
هيوفة : گومن خلنها تقرا وراها امتحان
بصائر : اگص ايدي اذا ضلت الماده براسها ،هسة من تمتحن تكتبلهم حق شلون باسها وشرط شرح مفصل
ضحكت تسكت بصائر
ريحانة : خايبة كافي راح تبجي
بصائر : يلا راح اسكت ،لا تبجين اتشاقه شبيج ماتحملين شقه
°حواري°
گمت وگفت وجريتها
_ اطلعي برا يلا بعد لا تجين يمي
اجر بيها وهي تضحك طلعتها وانداريت عليهن
_ گومن انتن هم يلا
ريحانة : انا أختج
_ جا حتى لو مو چنتي واگفه تبصبصين وياهن
ريحانة : انا غمضت شبيج
_ اطلعن لا اصيحن الامي عليچن والله
گامن يدردمن علي وخلن ومشن ،قفلت الباب وگعدت راسي مسطور ،اريد اقره ما اگدر كل ما صفنت اتذكر وجسمي يقشعر...
جريت نفس وطخيت شفتي بطرف اصبعي ،توجعني كلش ،بالگوات گدرت اقره باجر أمتحاني الصفنه ما تفيد ،ساعة تجر ساعة وانا على هل گعده
گمت فتحت الباب من اندگ ،اباوعلها بالكوات كاضه ضحكتها
_ اضحكي يمة لا تخليها بنفسج
نجوى : مخبله والله ،امشي حطي حمره على شفتج مجروحه
_ ما احط
نجوى : عيب من اخوانج ،حطي بساع وتعاي تغدي
_ من شوكت ترضين على المكياج أنت ؟
نجوى : جا غير بعد انخطبتي
ضليت ساكته وكاضه الباب بأيدي أول مره احسن بروحي هيج مستحيه ..! !
گبل لا تمشي گالت
نجوى : بساعج لا تبطين
هزيت رأسي ب أي وطبيت للغرفة ،ماعدي غير حمره سحرية وهم مالت ريحانة ،حطيت منها
شوي وطلعت وحضي صرت گبال عزيز ،بس رفعت راسي زغر عيونه يباوعلي مسح على شواربه خازرني
عزيز : شني حاطه حمره ؟
وهو حجه لو العيون كلها صارت علي ،غصيت باللگمه طلعت روحي ،هيوفة تدگ على ضهري وبصائر اطتني ماي وامي ترزل بعزيز وأبوي ياكل ضال ما حجه
نجوى : واذا خلت حمره ،الا تحجي ما تگدر تكض لسانك مره مخطوبة عادي لو تحمرت
عزيز : ترا سألتها بعدني حتى ما مرزلها
نجوى : وليش ترزلها ،جا المخطوبة ما يصير تحط لو شني ؟
عزيز : حتى لو ما حاطتها وگاعده گبالي ،شني انشالت المستحى فرد نوب
نجوى : دسكت اسكت ،راح تموت البت
شربت من الماي بالگوات اجرن النفس ،وحتى من استعدل وضعي ما گدرت اكل وضليت مدنگة انگش لان اعارف بس اگومن اترزل
ما عولت يخلصون واردن للغرفة ،گعدت اقره من لا جاره بس اريدن اخلص الثالث مو حمل اعيده السنة هاي هم ...
طر نص الليل الا خلصت ،نمتلي بالساعتين ومشيت للامتحان وهيج خلصت الامتحانات ،وبأخر امتحان بس رديت لگيت عمة شيماء يمنا ،سلمت عليها وتحركت اريدن امشي للغرفة بس انداريت من گالت
شيماء : وين ماشية ،جا مو ورانه روحه للسوک ؟
_ خلنها على باجر ،حيل ما ضال عدي اليوم
شيماء : ولج وين نلحگ هي فرت السوگ ما تگضي بيوم واحد
_ حاره والله
نجوى : خليها العصر خية عاد هم الجو زين وهم هي تنام
طبيت للغرفة مهدود حيلي ما مصدگة هاي هي خلصت ،ما عولت ابدل واحط راسي على
المخده حتى من گعدتني هيفاء اريد اشيل روحي من الفراش ما اگدر احس وجهي طبع بالمخده
هيوفة : خايبة حواري اگعدي ماضل وكت
_ مابي حيل والله
هيوفة : جا شلون ،غير تمشين تجهزين ماضل وكت للعرس
_ بطلت ما اعرس
هيوفة : مو هي لعب ،دگومي عمة برا عيب ولج
گمت اسحل بروحي سحل غسلت وجهي ورديت تحضرت وطلعت وياهن روحي صايره بخشمي بس صعدت گال
عبد الحق : السلام ل الله
تثاوبت اباوعله يباوعلي من المراية
_ بيا حال انا ،نعسانة شبيكم مستعجلين
عبد الحق : يعني تردين تنامين ؟
هزيت رأسي ب أي
عبد الحق : جا امشي نامي
صعدت عمتي تحجي مبين سمعت الگاله
شيماء : تنام شني ،جا شنلحگ ولك
عبد الحق : تعبانة يمة ،باجر الصبح امشن
شيماء : يااا
عبد الحق : أي والله ،وانا هم اضل عاد امشي وي الولد اجيبن الغرفة
باوعتله عمة حايرة ،وانا نزلت من گال
عبد الحق : انزلي حورية
ما صدگت اردن للمخده ،شمرت عباتي وحجابي ورديت نمت نومة اهل الكهف ،وما اعارف شگد وگعدت على صوت هوستهن فوگ راسي ،حطيت المخده على راسي وصحت
_ اريدن انحم ،حرااام عليچن وعلي ،يبوووووي شبيچن
وخرت المخده وگعدت روحي طافره ،اباوع على بصائر شايلة چدر تدگ عليه وهيوفة تصفگ وريحانة تطگ اصبع وكلساع بصائر مهلهله
هزيت ايدي متعجبة
_ عيون فقار ،مو تردين تموتين ،شني صحيتي ؟
بصائر : شلون ما اصحى وهذا عرس أول واحد بأخواني
درت عليها
_ وأنت مو صايبج اكتئاب ؟
ريحانة : ارد اكتأب ورا عرسج
گمت متنرفزه ،اريدن افرح واشاركهن بس نغزات بگلبي ما جاي تخليني ،غسلت وجهي وطلعت برا كلشي صار بساع بساع ،فلا لحگت افتهم شي ...! !
رفعت راسي من انفتح الباب وطب فقار ،من شافني اجه وگف گبالي
فقار : شبيج وجهج يلطم ؟
_ مابي شي
فقار : شلون مابيج شي ،حق مضوجج ؟
_ لا بالعكس
فقار : جا ليش ضايجة
دنگت اطگطگ اصابعي
_ ضايجة لان راح افارگكم
فقار : وين ولج منا لهنا حتى اذا تطلعين بلايه عباية هم عادي مو بعيدين
_ حتى لو
فقار : دگومي طبي والله كريم بعد وكت للنويح
أبتسمت وگمت طبيت وهو وراي ،بس شافته گالت
بصائر : اريدن امشي الاهلي
فقار : اهووو ،ماكو روحه .
بصائر : شبيك بس اريدن اشوف غرفة حق
فقار : نمشي انا وياج وتردين وياي ما تضلين هناك
بصائر : أي والله ميخالف ،بس اوگف اجيبن عباتي
فقار : لا تصعدين انا اجيبنها الج ،بس گليلي وين حاطتها
بصائر : عباة البيت تلگاها معلگة ورا باب الغرفة
فقار : خوش
°بركة°
نزلت اركض على صوت صياح برهان
_ هااا شكووو ؟
برهان : طبي للغرفة بساع
طبيت للغرفة وخليت الباب مفتوح شوي اباوعلهم طببوا الأخشاب ،هلهلت منوره الباب
من سمعت صوت هلاهل امي ،وما صدگت يمشون واصعد اشوفنها ،وهستونه طبينا وسمعنا صوتهم جوه نزلت اعدل بشالي واحجي
_ شعجب اجيتي ،منج من الشيطان ؟
فقار : ساعة واجي اخذها مو تلزگون بيها
شيماء : خلها يمنا اليوم
فقار : اعذريني عمة صعبة
ضحكت امي مأيسة منه تعارف بيه كلش زين
ينلجط لو نگله خلها تباب ،گبل لا يمشي كضت ايده
بصائر : تعال شوف غرفة اختك
فقار : انجبي حبيبتي
بصائر : وذاااا ،شبيها يعني واذا شفتها ؟
فقار : شوفيها أنت
جر ايده مبتسم وطلع بساع ،هزيت ايدي
_ شبيهم هيج يستحون عود ؟
بصائر : لان رابين سوه وبعدين واحد ياخذ اخت الثاني هل يستحون
_ ما بيها عيب ترا
بصائر : بعد هذا تفكيرهم ،تعاي نصعد
شيماء : شوي شوي اصعدي ،بطنج منا
بصائر : صار
صعدنا انا وياها ،اول ما طبينا صلت على محمد
بصائر : تخببل ،انزك غرفة عدنا
_ ذوق المهندس بعد
بصائر : أي والله ،شني هاي غير تخبل
طبت امي وراها حق ،وگف راد ضهره على الحايط يدخن
عبد الحق : حلوه ؟
بصائر : عاش ذوقك تخبل والله
ابتسم ومشى يباوع بالكانتير
عبد الحق : بركة بس امسحيها من التراب ،حتى لا تدمر الهدوم
_ أي هو هم گلت ،هسة انضفها
عبد الحق : عفية
ضلينا گاعدين على الجرباية نسولف وجاي نريد ننزل وطبن ريحانة وهيوفة وميمنة ،سلمن وفتحت چيش الچگىيت تحجي
ميمنة : ماتحملت ما اجي واجيبن الچگليت ،بالعافية وبالخير خوية
أبتسم
عبد الحق : الله يعافيج بعد روح اخوج
طشت الچگليت ونزلنا ،هن ضلن فوگ وانا صعدت نضفت الغرفة وبس رديت نزلت لاگتني عمة عطاء
هستوها طابة هداده
عطاء : ولج ميمنة ما گتلي اجي وياج ؟
ميمنة : شمدريني عمة كل ضني نايمة .
عطاء : بس انا انمن هسة شبي دجاجة ؟
ميمنة : حشاج عمة
وگفت يم الدرج ،انداريت اباوع نزل حق من فوگ
عطاء : هاا عريسنا
عبد الحق : هاي مني منورتنا اليوم
عطاء : أجيت لخاطرك والله
عبد الحق : هاا يعني بعدج زعلانة على أبوي
عطاء : البطن الجابت ابوك ما اعارف شلون جابت محمد ،غدي فلا ينبلع شلون حامليه
عبد الحق : بعلي أنت تشبهيه حتى نفس الگمزة والخلگ الضيگ
عطاء : لا والله
عبد الحق : وهم تزعلين بساع مثله
عطاء : البس عباتي واردن منين ما اجيت لان جاي تظلمني
عبد الحق : حگج انا ظالم
عطاء : الاعتراف بالذنب فضيله
عبد الحق : عمة لو مرتي أنت الا اطلگج واردج لراجس
عطاء : علواااه يطلگ ،شلون لگيتني كاتله روحي عليه أصلا ما يستاهلني
عبد الحق : راح يبدي الغرور
عطاء : انجب مو غرور هاي ثقة
ضلوا واحد يرفع والثاني يكبس وبس طلع حق عمة گعدت يمهن يسولفن ،باوعتلها امي تسأل
شيماء : شني عطاء الله ما هداج تردين ،ولدج خطية منو الهم
عطاء : ما اردن خية الا هو يجي مو يدزلي ابوه
شيماء : شعجب عمي ما ردج ؟
عطاء : گلتله بس تجبرني احرگ روحي واخليك علچ بحلوگ أل غضب
شيماء : يااا فلك ولج وما طگج
عطاء : اجه يطگني بس محمد وگف بوجهه ،والله حتى لو طاگ فلا اهتم تعلمت
شيماء : خطية وليداتج والله ،ضالين وحدهم هسة
عطاء : ما عليهم شي صاروا زلم گد روحهم
شيماء : حتى لو خية بس خلافج يضيعون
عطاء : انا يوميا جاي اخابر جسار ،مابيهم شي هو عينه عليهم
شيماء : خية چم دوب تضلين تصيحيه جسار
جا هو مو اسمه رأجس ؟
عطاء : انا امه واصيحه باليحلالي
شيماء : خايبة كون احطج واكتلج كتله تنعنع ضلوعج
عطاء : فنج الگدرتيلي
شيماء : چنج عمي تتنفسين شر وطلايب ،لو مطيج اله ومخلصينا
عطاء : شلون سمعه هاي
ميمنة : مو سمعه هاي عمة ،امي جاي تحجي الصدگ
عطاء : أي خوش
°غاية°
طلعت من الحمام انزل بثوبي واحجي جاي اغسل هدوم وصخر سطرني يصيح ،ما اعارف شصاير بمكاين الماي وهو ما يعارف يسويهن ،بس شافني
نتر
صخر : ليث فوگ
_ ما اعارف اضن بعده بالغرفة
صعد يشبخ الدرج شبخ كل بايتين سوه ،صعدت وراهم اركض ،دفر الباب وطب
صخر : المن ضام روحك ما تجي تحل المصيبة الصايرة
طفه الچگاره بالنفاضه ،وبكل هدوء رد عليه وصخر مشتعل
ليث : جعفر وينه ؟
صخر : ما اعارف ،گوم لا اشمرك من فوگ وحگ داحي باب خيبر
ليث : لا اله الا الله
جر البطانية منه ينتر نتر
صخر : گوم گوم
گام جر فالينته يلبسها ،وبلايه ما يحجي نزل گبله ،عدلت الحرباية ونزلت وراهم بس شافتني امي گالت
زهرة : الغساله انترست
_ انشدهت والله يايمة
زهرة : حگج يمة
طبيت كملت غسل الهدوم وحطيت حجاب على راس وصعدت اشرهن ،ما اعارف شعجب الله هداهم وحطوا الحبال فوگ ،خلصنا عمرنا نتوسل بس
هسة يجوز علمود العرس لان كل ما تصير مناسبة نضل حايرات
حطيت سلة الهدوم والوصله بايدي مسحت الحبال وبديت اشر وانا ادندن بقصيدة من القصايد الحافضتهن ،بس خلصت هميت اريد انزل بس وگفت بمكاني من لمحت شرار يطاير ،ركضت اباوع من الستاره ،ونشغت من شفت وصله من گيعانة جاي تحترگ ...
نزلت اركض ما اعارف شلون ماطحت
زهرة : اسم الله الرحمن ولج شكووو ؟
_ گيعااانه جاي تحترگ يمة والنار تمشي بيهاااا
لطمت على صدرها
زهرة : يمة اسم الله ،سترك ياررربي
طلعت متخبله وكل بالي صار يم ليث ،بلمح البصر انخبصنا خبص ،من خوفي ما گدرت اطب
جوه وضليت حال الظيم حالي گاعده بالحوش وكل ما سمعت صوت أحد افز واركض للباب بلكت خبر يريح گلبي
زهرة : ولج ما ضل عدي صبر بعد وروح أبوي ،شلون ولج يمة غاية
_ ما اعارف يمة ،ما اعارف
طبن من بيت عمي يوسف يسألن
عطاء : شكوو شصاير ،شبيهم الولد يتراكضون ؟
امي ترد عليها مفرفحة
زهرة : احترگت گيعانة ولج عطاء ،حرگوا تعبنا ،راح تتكاتل زلامنا
عطاء : اسم الله الرحمن ،لا تفاولين خية
زهرة : شلون ما افاول ،سمعتي صياحهم لو لا ؟
عطاء : سمعت ،بس لا يصعد سكرج
زهرة : اووف يا طلايبنا الما ،تفض .
ركضت للباب من سمعت صوت السيارات ،حطيت ايدي على گلبي من شفته نزل ،يحجي وي الولد
ليث : انااا لمحت احد شمر شراره بنصها وانهزم مو قدر فعل فاعل وگولوا ما گال ليث
صخر : جا ما نعارف هذا فعل فاعل ،بس خلها نغلس عليهم منا لوره العرس ولا تجيبون طاري لجدي ابد
بس هل چم يوم
برهان : احسن
ضيرم : شنو الاحسن ،هسة كل ضنهم احنا نهاب أفعالهم
برهان : عدنا عرس ،تردون تگلبوه عزه لو شنو ؟
سكت مغتاض ما راضي وما صدگت اشوفنه ،بجيت بخوف من طب ،اجاني خايف
ليث : شني السالفة ،ليش تبچين ولج ؟
_ خفت عليك والله ،لان مشيت للگيعان
ليث : صخر جان وياي ،شو امسحي دموعج
مسحت عيوني اباوعله كله صخام
ليث : ليش تبجين الحلوات ؟
_ والله خفت ،گلت صارلك شي وهم متلحفين بيك
ليث : ماعلي شي
اندار على امي
ليث : فول السكر مو ؟
زهرة : شمتاني ما يفول يمة وانا اخذت حيلي هل طلايب هاي
ليث : افاا العدها زلم مثلج ما لازم تخاف
زهرة : هو انا اخاف عليكم
ليث : طفينا النار وردينا وفضت راحت
يحجي بكل بساطة واحنا گلوبنا مشتعله ،انداريت على الباب من طب ،بس شافني خزرني
صخر : شو مفرعة ولج
نترت بيه عمة
عطاء : بيا حال احنا .
سكت وباوعلها من گالت اسمه
ميمنة : صخر
صخر : هاا
ميمنة : هدومك كلهن صخام ،احضرلك الحمام ؟
رفع ايده يعدل شعره وهز رأسه ب أي ،طبت هي وهو لحگها ،وانا أبتسمت اباوعله
_ تسبح ؟
أبتسم
ليث : والله انا بعازة اهتام
ضحكت ومشيت وراه من طب جوه ،ثاني يوم وانا اغسل مواعين طبت تهف
حواري : تمشين وياي للسوگ ؟
_ كوم شغل عدي
حواري : ما طاير الشغل ،عليج الله امشي وياي والله ضايجة
سديت البوري اباوع على امي ،تقبل لو لا
زهرة : امشي يمة ،انا اكمل بدالج
أبتسمت
_ دوگفي بس احضر روحي
حواري : بساع بين ما حق يجي
بساع مشيت للغرفة بدلت هدومي ولبست حجابي وبأيدي عباتي طلعت ،بس شافتني صاحت
حواري : عطرج يهفهف ،شبيكم اليوم كلساع واحد خانگني بعطره
_ عطري خفيف ترا
حواري : انا خشمي يشم بقوة
_ أي اعارف
طلعنا انا وياها وهي تحجي بصوت ناصي
حواري : حق اليوم مفرغ شيشة العطر كله على هدومه
_ من يوم يومه اكثر واحد خانگنه بعطره
حواري : بس بياتنة الحجي طيب
_ جا غير غالي هم عوزها مو طيب
نجوى : بساعچن ،شني تمشن على بيض
صعدنا بالسيارة ورا يم ريحانة
_ جا شعجب عمة شيماء ما تمشي ؟
نجوى : اختها يمها
صعد يعدل بالمراية ،ابتسمت من حطاها على حواري
عبد الحق : هاا نمشي ؟
نجوى : أي
الدرب كله عيونها ما رفعتهن وانا مركزة من جوه لجوا ابوگ عليهم نضرات ،نزلنا يم السوگ وضل متانينه ،ضلينا هواي نشتري من محل لمحل
واخر شي مشينا لمحل هدوام مال بيت نشتريلها گلبيات
نجوى : شتگولين يمة ريحانة اخذلها خمسة اليوم وباجر نكمل ؟
ريحانة : أي احسن
هن يگلبن بالموديلات وحواري گاعده على الكرسي تعبانة ،وانا واگفه يمها اباوع عليهن ،ما اعارف شلون انداريت وشفت اكثر انسانة ما توقعت اشوفنها هنا
نشغت وصحت بأسمها
_ جفووون ...
•---∞∞∞∞∞∞∞---•
جفووون!! من بعد اشهرررر ...
تتوقعون صدگ بيت غازي حرگوا الگاع ؟
للأبد اگول حنية غاية بگلبي
