رواية حين يجبر العشق الفصل الثالث والثلاثون
«سااااااارة!»
دوّى صوت سلطان في أرجاء الدار، فانتفض كل من كان غارقًا في نومه على أثر صرخته الغاضبة.
فتح باب المكتب ووقف عند عتبته، سادًّا مدخله بجسده الضخم، وملامحه التي اكتساها غضب مخيف، بينما وقف عامر خلفه مباشرة، وعيناه تتنقلان بين أخيه وسارة.
ما إن سمعت سارة صوت سلطان ينادي اسمها بتلك الطريقة حتى انتفض جسدها، وسقط الهاتف من يدها دون أن تشعر. وحين رفعت عينيها إليه ورأته واقفًا أمامها، شحب وجهها واختفت الدماء من ملامحها، وكأنها أدركت في تلك اللحظة أن نهايتها قد حانت.
ثبت سلطان عينيه عليها، ثم قال بصوت جهوري مرعب: بتعملي إيه في مكتبي وسط أوراقي يا سارة؟
حاولت سارة أن تجيب، لكن الكلمات تحجرت في حلقها، ولم تستطع ، فخرج صوتها منخفضاً بتلعثم: أنا... أنا...
انفجر صوته في وجهها:إنتِ إيه انطقي!
ولا بتدوري على كدبة جديدة تبرري بيها وجودك هنا في مكتبي في الوقت ده؟
ارتجفت شفتاها، وحاولت أن تتكلم، لكن الخوف الذي استولى عليها شلّ لسانها، فلم تخرج منها سوى أنفاس متقطعة.
وفي تلك الأثناء، كانت حور قد هبطت من جناحها على عجل، وخلفها هانم التي استيقظت هي الأخرى على صوت سلطان.
دخلت حور المكتب، فتوقفت عيناها أولًا عند ملامح زوجها الغاضبة وجسده المشدود من فرط التوتر، ثم انتقلت إلى سارة التي انزوت في آخر المكتب، وقد ارتسم الرعب على وجهها.
اقتربت حور قليلًا، وسألت بقلق: في إيه يا سلطان؟
لم يلتفت إليها، بل ظل يحدق في سارة بنظرات مشتعلة، وأجاب بسخرية لاذعة: أنا مستني سارة هانم تقولي في إيه!
التفتت جميع العيون نحو سارة التي حاولت استجماع شجاعتها، ثم قالت بصوت متقطع كاذب : أنا... أنا كنت نازلة المطبخ أشرب، وبعدين سمعت صوت في المكتب، فكرت في حرامي ، فدخلت أشوف في إيه...
ارتسمت ابتسامة ساخرة على شفتي سلطان، قبل أن يرد باستهزاء:حرامي !!!!ولما هو حرامي، اللي خلاكي تفتحي درج المكتب وتطلعي ورق الشغل منه إيه؟ ولا الحرامي هو اللي طلّعه وهرب قبل ما تدخلي عليه؟
هزت سارة رأسها نافية، وقالت في ارتباك:: أنا ما طلعتش حاجة، أنا لقيت الورق على المكتب...
اقترب منها سلطان بخطوات بطيئة، حتى أصبح أمامها مباشرة، ثم قال ببرود ساخر:
جايز برضه ...
انحنى والتقط هاتفها من الأرض، وما إن أضاءت شاشته حتى ظهرت الصورة التي التقطتها لملف المناقصة.
رفع الهاتف أمام وجهها، وقال بنبرة قاطعة: وصورة ملف المناقصة دي بتعمل إيه على تليفونك؟
تعلقت عينا سارة بالشاشة، ثم انتقلتا إلى وجهه، وانهمرت دموعها وهي تتمتم برجاء: سلطان... اسمعني...
لكن صوتها البغيض كان كافياً لتفجر ما تبقى من صبره.
هوى بكفه على وجهها بصفعة قوية، ارتد على أثرها رأسها إلى الجانب، فصرخت حور من هول المفاجأة.
هدر صوته غاضباً بعنف : أسمع إيه يا زبالة يا حقيرة ، بتخونيني تاني؟! بتكرري اللي عملتيه تاني؟!
وضعت سارة يدها على خدها، وأخذت تمسح دموعها في انهيار، وهي تحاول الدفاع عن نفسها: أنا ما خنتكش يا سلطان، والله ما خنتك! أنا هفهمك...
أمسك سلطان بها من شعرها، وأجبرها على رفع وجهها إليه، وعيناه تتقدان غضبًا: إنتِ لسه بتحلفي كدب وأنا شايفك بعينيا بتسرقيني؟!
طب المرة اللي فاتت، ساعة المناقصة القديمة، ما عرفتش إنك إنتِ السبب، وإنك اللي بعتي أسراري للشركة المنافسة... لكن المرة دي أنا شايفك بعيني!
شهقت سارة، وأدركت أن محاولات الإنكار لم تعد تجدي، فحاولت التمسك بآخر ورقة تملكها، وقالت من بين دموعها: المناقصة القديمة ما أعرفش عنها حاجة...
لكن المرة دي أنا عملت كده علشان يبقى معايا ورقة أهددك بيها لو رفضت ترجع لي، أو تعترف بابنك اللي في بطني!
تجمدت ملامح سلطان للحظة، ثم انفجر غضبه من جديد، وهو يصفعها مرة أخرى: عذر أقبح من ذنب!
إنتِ إزاي بالوساخة والقذارة دي؟! إنتِ فاكرة إن لما تقولي لي كده ده هيشفع لك عندي ويديكي عذرك ، ده أنا هفرمك تحت جزمتي!
رفع يده مرة أخرى ينوي صفعها مجدداً لكن حور أسرعت بالوقوف أمامه، ودفعته بيديها في صدره لتمنعه من الوصول إليها.
وهتفت فيه بقوه : سلطان إنت اتجننت؟! إنت ناسي إنها حامل؟!
نظر إليها سلطان بعينين تقدحان شررًا، وصوته يخرج محملًا بوعيد لم تعهده منه: هي لسه ما شافتش جناني! أنا هموتها بالحيا هدفعها تمن كل وساختها معايا... وأولهم موت أبويا!
ساد الصمت فجأة.
تبادلت العيون النظرات في عدم استيعاب، وكأن الجميع احتاج إلى لحظات حتى يدرك معنى الكلمات التي خرجت من فم سلطان.
كانت هانم أول من نطق، وقد اتسعت عيناها في ذعر، وهي تنظر إلى ابنها: إيه اللي إنت بتقوله ده يا ولدي؟!
مالها هي ومال موت أبوك؟!
أشار سلطان إلى سارة بغضب جحيمي، وقال:: اسأليها كانت بتعمل إيه في أوضة أبويا ليلة وفاته وأول ما خرجت من عنده، بعدها بدقايق، عرفنا إن أبويا مات!
التفتت هانم ببطء نحو سارة، وتبدلت ملامحها من الذهول إلى غضب لم تستطع إخفاءه.
اقتربت منها، وسألتها بصوت مرتجف: اللي بيقوله ولدي ده صح؟! إنتِ كنتِ في أوضة صفوان قبل ما يموت؟!
هزت سارة رأسها نافية، والدموع تنهمر من عينيها، بينما ارتجف جسدها كله.: لا... لا... أنا ما قتلتوش والله! هو اللي مات لوحده، أنا ماليش دعوة!
اقتربت هانم أكثر، وأمسكت بذراعها بعنف: أومال إيه اللي حصل قولي حصل إيه وإنتِ عنده؟!
سارة بنفي : محصلش حاجة...
في لحظة، فقدت هانم السيطرة على أعصابها، وأحاطت رقبة سارة بيديها، تضغط عليها وهي تصرخ: انطقي يا بت الكلب عملتي إيه في صفوان قتلتيه إزاي؟!
حاولت سارة الإفلات منها، بينما أسرعت حور تمسك بيدي هانم وتحاول إبعادهما عن رقبة سارة.: يا حاجة هانم مش كده هتموتيها!
لكن هانم لم تكن تسمع شيئًا، فقد كان الغضب يعمي بصيرتها، وكل ما تراه أمامها هو المرأة التي يُشتبه في أنها تسببت في موت زوجها.
تدخلت حور بكل قوتها، حتى استطاعت أخيرًا أن تفك يدي هانم عن رقبة سارة وتبعدها عنها.
تراجعت سارة إلى الخلف، مستندة إلى حافة المكتب، تلتقط أنفاسها بصعوبة، ويداها ترتفعان إلى عنقها وهي تسعل في اختناق.
وقف الجميع يراقبها، بينما كانت نظرات سلطان لا تفارق وجهها، ينتظر منها إجابة واحدة.
وبعد لحظات من الصمت، انكسرت مقاومتها تمامًا.
خفضت رأسها، ثم قالت بصوت ضعيف مستسلم: هقولكم اللي حصل...
ابتلعت ريقها بصعوبة، وحاولت أن تجمع شتات نفسها، ثم بدأت تتكلم بصوت متقطع:: أنا... أنا...
لكن الكلمات لم تكتمل.
فجأة، انقبض بطنها بعنف، وشعرت بألم حاد باغتها دون سابق إنذار، فوضعت يدها على بطنها وصرخت بقوة، منحنية إلى الأمام.: آآآه!
انتفضت حور من مكانها، واقتربت منها سريعًا، وفي اللحظة نفسها شعرت بسائل دافئ ينساب أسفل قدمي سارة.
اتسعت عينا حور، وأدركت ما يحدث، فأسرعت بإسنادها قبل أن تسقط.
رفعت وجهها نحو سلطان، وصاحت بقلق: الحق يا سلطان دي بتولد اتصل بالإسعاف بسرعة!
لكن سلطان ظل واقفًا في مكانه، ينظر إلى سارة بجمود، وكأن ما يحدث أمامه لا يعنيه، بينما كانت حور تحاول تثبيتها وتخفيف آلامها، وهانم تقف مشدوهة لا تعرف ماذا تفعل.
أما سارة، فقد أغمضت عينيها من شدة الألم، وانطلقت منها صرخة أخرى هزت أرجاء الدار ....
......................
في المستشفى...
كانت الدقائق تمر ثقيلة على الجميع، بينما جلست هانم على أحد المقاعد أمام غرفة العمليات، وقد بدت علامات القلق والتوتر واضحة على ملامحها، وبجوارها وقفت حور تراقب باب الغرفة بين الحين والآخر، بينما وقف عامر بالقرب منهما، شاردًا في الأحداث المتلاحقة التي لم تترك لأحد فرصة لالتقاط أنفاسه.
كانت سارة قد دخلت غرفة العمليات منذ قليل، ولم يكن أحد يعلم ما ستسفر عنه ولادتها المبكرة.
التفتت حور نحو عامر، وسألته بقلق: عامر، ما تعرفش سلطان راح فين؟
هز عامر رأسه نافيًا، وأجابها: لا، ما أعرفش.
قطبت حور حاجبيها بضيق، وقالت مستنكرة: أنا مش عارفة إزاي يسيبنا في وقت زي ده!
نظر إليها عامر باستغراب، ثم سألها: هو إنتِ مضايقة إن سلطان مش موجود؟
اجابته حور بتاكيد : أيوه طبعًا لازم يكون موجود معانا دلوقتي.
ظل عامر ينظر إليها لثوانٍ، قبل أن يقول بنبرة تحمل شيئًا من الاستفهام: أنا مش فاهمك بصراحة... في الأول بتساعدي سارة، اللي عايزة تخطف منك جوزك هي وابنها، ودلوقتي مضايقة إن سلطان مش موجود معاها وهي بتولد ابنه!
التفتت إليه حور، وأجابته بهدوء وثبات:أنا مش بتكلم عن سلطان جوزي، أنا بتكلم عن شيخ العامرية، واللي المفروض يعمله مع واحدة محتاجة مساعدته كشيخ، مش أكتر.
ثم صمتت لحظة قبل أن تضيف بصدق:: وبعدين أنا مش هكدب عليك وأدّعي المثالية...
أنا ساعدت سارة من باب الإنسانية مش أكتر؛ لأنها غريبة وسطنا ولوحدها ومش معاها حد، ده غير إن الكل ضدها، وهي في موقف صعب.
تأملها عامر بإعجاب، فقد كانت تلك أول مرة يتعامل معها عن قرب، ولم يكن يتوقع أن يجد منها هذا القدر من الاتزان والوضوح، خاصة في موقف يمس حياتها الزوجية بصورة مباشرة.
سألها بعدما عقد حاجبيه قليلًا: طب وإنسانيتك دي مش غيرانة على سلطان؟ إحنا لسه مش متأكدين إن الولد ابنه ولا لأ.
أجابته حور بثقة ودون تردد: لا، مش غيرانة.
اتسعت عينا عامر بدهشة، فتابعت حور موضحة: لأني واثقة في سلطان، وسلطان متأكد إن الولد مش ابنه، وأنا مصدقاه.
ظل عامر يتأملها، ثم سألها وكأنه يريد أن يعرف إلى أي مدى تصل قناعاتها: طب ولو كان فعلًا الولد ابن سلطان، كنتِ هتتصرفي إزاي؟
لم تتغير ملامح حور، وأجابته بثبات: عمري ما كنت هقف في طريق سعادته هو وابنه.
رفع عامر حاجبيه، وقال متعجبًا: يعني كنتِ هتتخلي عنه بسهولة؟
تنهدت حور، وخفضت عينيها للحظة، قبل أن ترفعها إليه مجددًا وتقول:عمرها ما هتكون بسهولة يا عامر...
سلطان ده روحي والهوا اللي بتنفسه ، بس للأسف أنا مقدرش أقبل بنص راجل، حتى لو روحي فيه. بس الحمد لله ده مش هيحصل، لأني زي ما قلت لك، أنا واثقة في سلطان.
ارتسمت ابتسامة إعجاب على وجه عامر، وهز رأسه بإقرار،: فعلًا سلطان محظوظ بيكي يا حور.
لم تكد حور تجيبه حتى فُتح باب غرفة العمليات، وخرج الطبيب مرتديًا ملابس العمليات، فتقدمت نحوه هانم سريعًا، بينما بادره عامر بالسؤال:: إيه الأخبار يا دكتور؟
أجابهم الطبيب بعملية وهدوء: الحمد الله الأم حالتها مستقرة، وهي دلوقتي في الإفاقة، وهتطلع أوضتها كمان شوية.
أما الطفل، فهيدخل الحضانة لأنه اتولد قبل معاده. ده مولود في آخر الشهر السادس، غير إن وزنه قليل جدًا، فلازم يفضل في الحضانة لفترة ونتابع حالته باستمرار. عن إذنكم.
أنهى الطبيب حديثه وانصرف، تاركًا خلفه مشاعر متباينة؛ نظر عامر إلى هانم وحور، ثم قال: يلا إحنا نرجع البيت، وجودنا هنا مالوش لازمة دلوقتي.
لكن هانم هزت رأسها برفض قاطع،: أنا مش هتحرك من هنا غير لما أعرف إيه علاقتها بموت صفوان.
اقترب منها عامر محاولًا إقناعها:ماشي يا أمي، روحي ارتاحي، والصبح نرجع.
التفتت إليه هانم بعناد، وقالت: قلت لك مش هتحرك خطوة من هنا غير لما أعرف الحقيقة! وخلاص الصبح طلع، كلها ساعة وتفوق وأعرف منها الحقيقة. روح إنت وخد مرات أخوك معاك.
أسرعت حور بالرد، وهي تقترب من هانم:
وأنا كمان مش همشي وأسيبك لوحدك.
ابتسمت هانم ابتسامة واهنة، وربتت على يدها بحنان، وقالت: تسلمي يا بتي، بس إنتِ كده هتتعبي. إنتِ حبلى في الأول، والتعب وحش عليكي.
ابتسمت حور مطمئنة إياها:: أنا كويسة ومش تعبانة، ولو حسيت بتعب هروح.
نظرت إليها هانم بحنان، ثم التفتت إلى عامر وقالت: روح احجز لمرات أخوك أوضة علشان ترتاح فيها لحد ما المحروقة دي تفوق.
أومأ عامر برأسه، ثم تحرك لتنفيذ طلبها، بينما جلست حور بجوار هانم، وأمسكت بيدها في محاولة لطمأنتها.
لكن عيني هانم ظلتا معلقتين بباب الغرفة التي ترقد فيها كانت تنتظر إجابة قد تعيد فتح جرح فقدان صفوان من جديد، وتكشف لها حقيقة لم تكن تتخيل يومًا أنها ستسمعها.
..........................
بعد ظهر اليوم التالي...
توقفت سيارة سلطان أمام مدخل المستشفى، وترجل منها بخطوات سريعة، يتبعه ياسين ورجل آخر لم يكن مألوفًا لأحد.
أخرج هاتفه واتصل بعامر، وما إن جاءه الرد حتى سأله دون مقدمات: إنتوا فين؟
هتف عامر وهو يرتشف من فنجان قهوته المره : أنا قاعد في كافيتريا المستشفى، وأمي ومراتك في أوضة خمسة في الدور التاني.
انعقد حاجبا سلطان بقلق، وسأله سريعًا:
ليه؟ هي حور تعبانة؟
— لا، اطمن، هي كويسة. بس لما هي وأمك رفضوا يرجعوا البيت، حجزت لهم أوضة يرتاحوا فيها.
تنفس سلطان بارتياح، ثم قال: تمام، أنا هروح لهم، وإنت الحقني على طول، ما تتأخرش.
أنهى المكالمة واتجه نحو المصعد، وفي رأسه تدور أفكار كثيرة، لكنه كان قد حسم أمره. لم يعد هناك مجال للتأجيل، ولا مساحة أخرى للأكاذيب التي ظلت تحيط بهم طوال تلك السنوات.
وصل إلى الغرفة المنشودة، وفتح الباب بهدوء.
كانت حور ممددة على السرير، وقد بدا عليها الإرهاق بعد ليلة طويلة قضتها في المستشفى، بينما جلست هانم إلى جوارها على المقعد، تراقبها بين الحين والآخر بحنان.
وما إن وقع بصر حور عليه حتى اعتدلت قليلًا، وانطلقت من شفتيها تناديه بلهفة:
سلطان!
اقترب منها بخطوات واسعة، وانحنى يحتضنها بقوة، وكأنه يحاول أن يعوضها عن غيابه كله في تلك اللحظة. طبع قبلة طويلة على رأسها، ثم أبعدها قليلًا ليتأمل وجهها.
قال بصوت امتزج فيه الندم بالحنان: حقك عليّا يا حور السلطان... أنا السبب في التعب اللي إنتِ فيه ده.
ابتسمت له رغم إرهاقها، ورفعت يدها تلامس وجهه قائلة بحب: تعب الدنيا كله يهون مدام إنت جنبي ومعايا يا حبيبي.
ظل ينظر إليها للحظات، وكأن كلماتها أزاحت عن صدره شيئًا من ثقل الأيام الماضية.
أما هانم، فكانت تتابعهما بابتسامة هادئة، وقد رأت بعينيها الحقيقه الواضحه التي لا تحتاج لدليل ، ابنها سعادته وراحته مرتبطه بحور ،كما قال لها من قبل....
اقتربت منهما قليلًا وقالت بحنان: اطمن يا ولدي، مرتك بخير. المهم طمني، كنت فين الوقت ده كله؟
اعتدل سلطان، ثم نظر إلى أمه : هتعرفي كل حاجة دلوقتي... قوموا معايا.
مد يده إلى حور ليساعدها على النهوض، فتمسكت بذراعه وسألته باستغراب: هنروح على فين؟
التقت عيناه بعينيها، وقال بنبرة حاسمة:
هنعرف حقيقة الكدبة اللي عايشينها.
ساعدها على الوقوف، ثم خرجوا جميعًا من الغرفة.
كان عامر وياسين ينتظران بالخارج، وإلى جوارهما الرجل الغريب الذي حضر مع ياسين. وما إن اقترب سلطان حتى تقدم منه عامر، وأشار بعينيه إلى الرجل سائلًا:
مين اللي مع ياسين ده؟
أجابه سلطان باقتضاب: هتعرف كمان شوية.
ثم تحرك في اتجاه الممر، وتبعه الجميع دون أن يجرؤ أحد على سؤاله مرة أخرى.
كان وجهه جامدًا، وخطواته ثابتة، لكن ما بداخله لم يكن هدوءًا على الإطلاق. لقد انتظر طويلًا حتى يصل إلى هذه اللحظة، واليوم لن يغادر المستشفى قبل أن يضع كل شيء في موضعه الصحيح ..
....................
في غرفة سارة...
بدأ أثر المخدر يتلاشى تدريجيًا، وعادت سارة إلى وعيها شيئًا فشيئًا.
فتحت عينيها بصعوبة، وشعرت بألم حاد يمتد من أسفل بطنها إلى جسدها كله. حاولت أن تتحرك، لكن صرخة ألم أفلتت منها، فانتبهت الممرضة التي كانت تتابع المحلول المعلق بجوار سريرها.
تلفتت سارة حولها بارتباك، ثم سألت بصوت مبحوح: ابني... ابني فين؟
أجابتها الممرضة بهدوء: اطمني الطفل في الحضانة.
حاولت سارة النهوض بسرعة، لكن الألم باغتها من جديد، فصرخت بقوة.
اقتربت منها الممرضة محاولة تهدئتها: بالراحة، إنتِ بطنك مفتوحة ولسه والدة، ما ينفعش تتحركي بالشكل ده.
اغرورقت عينا سارة بالدموع، ولم يكن يشغلها في تلك اللحظة سوى صغيرها.: ابني فين؟ عاوزة أشوفه!
اعادت الممرضة نفس كلامها مره اخري: ما أنا قلت لك إنه في الحضانة.
تعلقت عينا سارة بوجه الممرضة، وسألتها بشك وخوف: بجد؟ ولا إنتِ بتضحكي عليّا وسلطان أخد ابني مني؟
وقبل أن تجيبها الممرضة، انفتح الباب ودخل سلطان، تتبعه حور وهانم وعامر.
توقفت الممرضة عن عملها، ونظر إليها سلطان قائلًا بصرامة: سيبينا لوحدنا من فضلك.
خرجت الممرضة وأغلقت الباب خلفها، بينما ظلت عينا سارة معلقتين بسلطان، تبحث في ملامحه عن أي إشارة تطمئنها.
قالت بلهفة: ابني فين يا سلطان؟ عاوزة أشوفه.
لم يقترب منها، بل ظل واقفًا في مكانه، يحدق بها بنظرات باردة، ثم قال: لو عاوزة تشوفي ابنك، يبقى تقولي الحقيقة.
ارتبكت سارة، وحاولت رفع رأسها رغم الألم:
أنا قلت لك كل حاجة.
تقدمت هانم خطوة نحو السرير، وكانت عيناها تشتعلان غضبًا، ثم واجهتها بالسؤال الذي ظل يطاردها طوال الساعات الماضية: قتلتي صفوان ليه؟
انهمرت دموع سارة، وهزت رأسها نافية: أنا ما قتلتوش... ارحموني، أنا عاوزة ابني.
اقترب سلطان خطوة، وجاء صوته هادئًا على نحو مخيف، كأن غضبه تجاوز مرحلة الصراخ: ابنك قصاد الحقيقة، ومش هقبل غير الحقيقة. يا إما تقولي كل اللي حصل، يا إما مش هتشوفي ابنك تاني... أصل حياة ابنك مش أهم من حياة أبويا.
نظرت إليه سارة بعينين دامعتين، وقالت بصوت متعب: ده ابنك يا سلطان.
تصلبت ملامحه، وأجابها بجبروت: واللي مات أبويا.
كانت كلماته كافية لتدرك سارة أنها لم تعد تملك مخرجًا. لا عذر سيقبله، ولا دموع ستغير ما ينتظره منها. لقد انحشرت في زاوية ضيقة، ولم يعد أمامها سوى أن تفتح الباب الذي حاولت إغلاقه منذ شهور ...
ابتلعت ريقها الجاف، وأشاحت بوجهها عن نظرات سلطان وهانم، التي كانت تحرقها بنار لا تقل عن نار الندم والخوف في صدرها.
بدأ صوتها يخرج متقطعًا متعبتً : لما سلطان قالي إني لازم أمشي وأرجع القاهرة، وإنه مش هينفع نتجوز، وإنه راضي بجوازته من حور ومش هيقدر يعارض والده اللي هو رافض جوازنا أساساً اليوم ده كنت عمالة أفكر في حل ومش لاقية.
سكتت لحظة، ثم تابعت وهي تستعيد تفاصيل تلك الليلة: ساعتها قلت أنزل الجنينة شوية أشم هوا. عديت من قدام أوضة الشيخ صفوان، ولقيت نفسي بقرب منها وبدخل .
كان ممدد على السرير وتعبان. سألني إيه اللي جابني أوضته، قلت له عاوزة أسألك ليه رافض جوازي من سلطان وعاوز تحرمني منه؟
ليه فرضت عليه جوازه هو مش عاوزها ودمرت حياته وحياتي؟
ارتجفت شفتاها، وأخذت نفسًا متقطعًا قبل أن تكمل: ساعتها رد عليّا وقالي: ده قدره... وبعدها... بعدها فضل يكح جامد، ومد إيده علشان ياخد ماسك الأكسجين علشان يعرف يتنفس، بس إيده ارتعشت ووقع الماسك. حاول يجيبه، معرفش.
توقفت الكلمات في حلقها، وكأنها ترى المشهد أمامها مرة أخرى. بص لي علشان أساعده، بس أنا... أنا خوفت. معرفتش أتصرف. فضلت باصة عليه، وفي حاجة منعاني أساعده. وبعدها هو سكت خالص.
ارتعشت أصابعها فوق الغطاء، وأخذت دموعها تنهمر بغزارة.: ساعتها بس فوقت وجريت عليه، ندهت عليه مردش. حاولت ألبسه الماسك، بس كان خلاص... كل حاجة كانت خلصت. خوفت وجريت على أوضتي. بس والله ما أقصد، أنا ما قتلتوش. مكانش قصدي، والله ما كان قصدي.
ساد الصمت المطبق داخل الغرفه ...
صمت ثقيل خيم عليهم حتى إن أنفاس الموجودين بدت مسموعة وسط السكون.
أما هانم، فقد ظلت تحدق في سارة بعينين اتسعتا من هول ما سمعت. لم تكن مجرد شكوك أو اتهامات كما ظلت تظن؛ كانت الحقيقة أمامها، حقيقة أن زوجها مات بينما كانت تلك المرأة تقف أمامه وتشاهده وهو يختنق، ثم اختارت أن تتركه دون مساعدة.
اندفعت هانم نحوها فجأة، وأحاطت عنقها بيدها، وهي تصرخ بوجع وقهر: يا بت الكلب! لو كنتي ساعدتيه كان زمانه عايش وسطينا! إنتِ اللي قتلتيه يا فاجرة!
حاولت سارة إبعاد يدي هانم، لكن جسدها المنهك لم يسعفها. ولم يتدخل أحد في اللحظة الأولى؛ حتى حور، التي كانت تقف مذهولة من الاعتراف، تجمدت في مكانها، عاجزة عن استيعاب أن صفوان مات بهذه الطريقة، وأن سارة كانت قادرة على إنقاذه واختارت ألا تفعل.
كانت هانم تضغط على عنقها بكل ما بقي في قلبها من قهر، وسارة تكاد تختنق، بينما الألم الناتج عن جرح بطنها يضاعف عذابها.
وعندما أوشكت على فقدان أنفاسها، تحرك سلطان أخيرًا، وأمسك بذراعي أمه وسحبها بعيدًا عنها بالقوة.: خلاص يا أمي! كفاية!
تراجعت هانم وهي تلهث، ويداها ترتجفان من شدة الغضب، بينما كانت سارة تحاول التقاط أنفاسها بصعوبة. وضعت يدها على عنقها، تسعل وتختنق، وقد اجتمع عليها ألم الجرح وألم الاختناق في لحظة واحدة.
نظر إليها سلطان طويلًا، ثم قال بصوت خالٍ من الرحمة: أنا كان ممكن أسيب أمي تخلص عليكي وتاخد بتار أبويا منك، بس أنا علشان خاطرها، وعلشان ما توسخش إيدها بدم زفر زي دمك، خليتك تجربي الإحساس اللي خليتي أبويا يحسه وهو بيموت ومش عارف ياخد نفسه... زي ما عملتي معاه بالظبط.
اقترب منها قليلًا، وأكمل بنبرة أكثر قسوة:
بس أنا بقى مش هرحمك. أنا هدفعك تمن غلطاتك اللي عملتيها معايا كلها مرة واحدة.
ثم اعتدل في وقفته، واستدار نحو الباب، ونادى بصوت قوي: ياسين!
انفتح الباب على الفور، ودخل ياسين يتبعه الرجل الغريب.
وما إن وقع بصر سارة على الرجل حتى تبدل لون وجهها، وارتجفت ملامحها، وكأنها رأت أمامها شبحًا لم تتوقع ظهوره.
لاحظ سلطان رد فعلها، فارتسمت على شفتيه ابتسامة ساخرة، وقال: مفاجأة، مش كده؟
ثم أشار إلى الرجل بعينيه، وقال دون أن يرفع نظره عن سارة: تعالى يا عادل، قرب. مفيش حد غريب... دي سارة أم ابنك.
تجمد الجميع في أماكنهم.
التفتت الأنظار بين سلطان والرجل، حتى عادل نفسه بدا عليه الذهول، وقال بعدم فهم:
أم ابني إزاي يا باشا؟ أنا مش فاهم.
أما سارة، فانتفضت في سريرها رغم ألمها، وصاحت : إيه اللي إنت بتقوله ده؟ أم ابنه إزاي؟ ابني إنت أبوه!
ضحك سلطان بسخرية، وهز رأسه في استنكار: إنتِ لسه مصممة إنه ابني؟
صرخت سارة، وقد اختلط الغضب بالخوف في صوتها: والله ابنك إنت! أنا محدش لمسني غيرك!
ضحك سلطان هذه المرة بقوه : ضحكتيني وأنا ماليش نفس أضحك.
صمت لثواني وتابع بنبره محتقره: انتي عارفه يا ساره انتي عامله زي ايه ...
عاملة زي قطط الشوارع اللي كل شوية حد ينط عليها، وفي الآخر تحمل وهي ما تعرفش مين أبو اللي في بطنها.
تجمد وجه سارة وشحب من قسوه الاهانه بينما تابع سلطان دون أن يمنحها فرصة للرد: هو مش برضه عادل طليقك كان بيجيلك البيت بعد ما طلقك؟ وبعد ما أمك الله يرحمها تدخل تنام، كان بييجي يقضي ليلته معاكي ويعمل عملته ويمشي؟ والكلام ده حصل بينكم أكتر من مرة، وآخرها كان بعد ما أنا نمت معاكي بأسبوع.
اتسعت عينا سارة، وبدأت الصورة تتضح أمامها، لكن سلطان لم يتوقف: بس إنتِ علشان مركزة إنك تحملي مني ماخدتيش بالك إني كنت عامل حسابي معاكي إنك ما تحمليش، وده اللي أنا قلتهولك من أول يوم. وبرضه ماخدتيش بالك لما عادل ماخدش احتياطه آخر مرة كان معاكي، وافتكرتي إن الحمل مني أنا.
أخرج ورقة من جيب سترته، ثم ألقاها في وجهها باحتقار : ودي نتيجة تحليل الـDNA، بتقول إن الولد مش ابني... الولد ابن عادل.
التقطت سارة الورقة بعينين زائغتين، وكأنها تحاول أن تنفي ما تقرؤه، بينما التفت عادل إلى سلطان وقال بدهشة: ابني إزاي؟ أنا ما عملتش تحليل!
نظر إليه سلطان وضحك: إنت فعلًا ما عملتش تحليل، بس ياسين أخد خصلة من شعرك علشان تتحلل من غير ما تحس.
رفع عادل يده إلى رأسه في ذهول، ثم نظر إلى سارة، بينما كانت الأخيرة قد بدأت تفقد قدرتها على الكلام.
التفت سلطان إليها مجددًا، وكانت دموعها تغرق وجهها، لكن شيئًا في عينيه لم يتغير.
قال بصوت حمل من الاشمئزاز أكثر مما حمل من الغضب: أنا ندمان إني عرفتك، وافتكرت نفسي إني حبيتك في يوم من الأيام. إنتِ أقذر إنسانة شوفتها في حياتي، وفعلًا إنتِ وهو تستاهلوا بعض... نفس الطمع والجشع، تبيعوا نفسكم علشان خاطر الفلوس.
ثم ألقى نظرة على بطنها، الخاوي وأردف: اللي صعبان عليّا في الموضوع ده الطفل الصغير، اللي ذنبه الوحيد إنكم أهله، وهيتدفع تمن كرهكم وغلكم، وهتشوهوه بوساختكم.
وفي تلك اللحظة، دوى طرق على الباب.
التفت الجميع، ودخل الطبيب بملامح آسفة، وألقى نظرة سريعة على الموجودين قبل أن يقول: أنا آسف، بس الطفل اتوفى ، للاسف هو نزل ضعيف وقبل معاده... البقاء لله.
لم تستوعب سارة كلماته في البداية.
ظلت تحدق فيه للحظات، ثم انطلقت منها صرخة ممزقة، ورفعت يديها إلى وجهها تلطم خديها، وقد انهارت تمامًا: ابني... لا... ابني!
أما عادل، فقد أطلق زفرة طويلة، وبدا الارتياح على وجهه رغم الموقف، وكأن خبر وفاة الطفل أزاح عن كاهله مسؤولية لم يكن مستعدًا لتحملها.
كان المشهد أقسى على حور مما توقعت.
لم تستطع منع دموعها، فقد انقبض قلبها على ذلك الصغير الذي لم يرَ من الدنيا شيئًا، ولم يكن له ذنب في أي مما ارتكبه أبواه. نظرت إلى سلطان بعينين دامعتين، ثم ارتمت في أحضانه.
ضمها سلطان إليه، وأحاط كتفيها بذراعه، محاولًا أن يحميها من قسوة المشهد، ثم أعاد نظره إلى سارة وقال: الحمد لله ربنا رحم الطفل الغلبان ده إنه يعيش معاكم، واختاره عنده. إنتِ تستاهلي كل حاجة وحشة حصلت ولسه هتحصل معاكي.
لم تجبه سارة. كانت غارقة في بكائها، تنظر إليه بعينين مكسورتين، وكأنها أدركت أخيرًا أن كل ما تمسكت به طوال الوقت قد ضاع منها.
استدار سلطان نحو أمه وعامر، وقال بحسم:
يلا بينا... مالناش مكان هنا.
تحركت هانم معه، وقد بدت عليها آثار الانهيار، بينما سار عامر خلفهما، وتبعهم ياسين .
لكن قبل أن يصل سلطان إلى الباب، ارتفع صوت سارة من خلفه، متشبثًا بآخر خيط تظن أنه قد ينقذها: سلطان... سلطان سامحني! ما تسبنيش!
توقف سلطان للحظة.
لم يلتفت، ولم يمنحها حتى نظرة أخيرة. ظل واقفًا وظهره إليها، ثم قال بصوت ثابت لا يحمل أي تردد: سارة، نسيت أقولك... البوليس مستني بره علشان يقبض عليكي بتهمة الشروع في القتل وسرقة ملف المناقصة وبيعها لعادل شريكك ....
ثم استأنف سيره وغادر الغرفة.
وظل صوتها يلاحقه، يعلو شيئًا فشيئًا، وهي تناديه بجنون: سلطاااااان!
لكن هذه المرة، لم يتوقف.
فقد انتهى كل شيء بينهما منذ اللحظة التي اختارت فيها أن تترك أباه يواجه الموت وحده... واليوم، لم يفعل سوى أن وضع الحقيقة أمامها، وترك العدالة تكمل ما بدأه.
..............
في دار العامرية...
عادت سيارة سلطان إلى دار العامرية بعد يوم طويل، كان أثقل على الجميع مما احتملت قلوبهم.
لم يتبادل أحد منهم الحديث طوال الطريق؛ فقد ترك كل واحد منهم المستشفى محملًا بحقيقة مختلفة، لكنها جميعًا تصب في وجع واحد... رحيل صفوان العامري ...
ترجل سلطان أولًا، ثم مد يده إلى حور ليساعدها على النزول، بينما كانت هانم وعامر يخرجان من السيارة الأخرى.
توقفت هانم للحظة أمام مدخل الدار، ورفعت عينيها نحو الطابق العلوي، حيث تقع غرفة زوجها الراحل. شعرت وكأنها تعود إلى يوم فقدانه من جديد، لكن هذه المرة كانت تحمل معها حقيقة لم تكن تعرفها من قبل.
اقترب منها سلطان، ولاحظ شرودها، فسألها برفق: مالك يا أمي؟
التفتت إليه، وحاولت أن ترسم ابتسامة صغيرة على شفتيها، لكنها لم تستطع إخفاء الحزن في عينيها.: مفيش يا ولدي... أنا بس عاوزة أطلع أوضة أبوك شوية.
أومأ سلطان متفهمًا، وقال: براحتك يا أمي.
ربتت هانم على ذراعه، ثم اتجهت نحو الدرج بخطوات بطيئة، كأنها تحمل فوق كتفيها عمرًا كاملًا من الذكريات.
أما عامر، فقد ظل واقفًا مكانه يتابعها بعينيه، قبل أن يستأذن سلطان بصوت خافت: انا هروح مشوار صغير كده وراجع علي طول مش هتاخر ..
نظر إليه سلطان، وفهم ما يدور في صدره، فأومأ له دون أن يسأله شيئًا.: روح يا عامر.
تحرك عامر مغادراً بينما بقي سلطان ممسكًا بيد حور.
نظر إليها وسألها:تقدري تطلعي ولا اشيلك ؟؟
ابتسمت له قائلة: أنا كويسة يا سلطان، ما تقلقش عليّا.
لم يقتنع تمامًا، لكنه لم يجادلها، واكتفى بأن أحاط كتفيها بذراعه وصعد بها إلى جناحهما.
...........
في غرفة صفوان...
دفعت هانم باب الغرفة ببطء، ودخلت كما اعتادت أن تفعل طوال سنوات زواجها؛ وكأن صاحب الغرفة قد يكون جالسًا في الداخل ينتظر عودتها.
كان كل شيء في مكانه.
مقعده الذي اعتاد الجلوس عليه، مكتبه، وبعض متعلقاته التي لم تسمح لأحد بأن يقترب منها أو يغير موضعها منذ رحيله.
أغلقت الباب خلفها، ثم تقدمت بخطوات متثاقلة حتى وصلت إلى مقعده. مررت يدها فوق ظهره، وجلست عليه، وأطلقت زفرة طويلة خرجت محملة بوجع سنوات.
ظلت تنظر إلى المكان الذي اعتاد أن يجلس فيه، قبل أن تهمس بصوت مرتجف: يا حبيبي يا صفوان...
وضعت يدها على صدرها، وكأنها تحاول أن تهدئ الألم الذي استقر داخله.: يعني كنت لوحدك؟ كنت بتتألم ومستني حد يساعدك، وهي واقفة تتفرج عليك؟!
انهمرت دموعها، وأخفت وجهها بين كفيها.
كانت تتذكره في أيامه الأخيرة، وتعيد في ذهنها تفاصيل مرضه، ونظراته، وصوته حين كان ينادي أبناءه. لم تكن تتخيل يومًا أن رحيله كان يمكن أن يتأجل، وأن يدًا واحدة كانت كفيلة بأن تمنحه فرصة أخرى للحياة.
رفعت رأسها، ونظرت إلى صورته الموضوعة فوق المكتب.: حقك عليّا يا صفوان... سامحني إني ما عرفتش الحقيقة من بدري. لو كنت أعرف، والله ما كنت دفنتها حيه ...
مدت يدها إلى الصورة، واحتضنت إطارها بين كفيها، ثم قربته من صدرها.: وحشتني يا أبو ولادي... وحشتني أوي.
وانهارت في بكاء صامت، لا يسمعه أحد، ولا يخفف وطأته سوى الذكريات التي تركها لها الرجل الذي قضت معه عمرها كله.
..................
بعد قليل، توقفت سيارة عامر أمام مقابر العامرية..
ترجل منها، وأغلق الباب خلفه، ثم سار في الممر المؤدي إلى قبر والده، يحمل في صدره كلامًا ظل حبيسًا داخله لسنوات طويلة.
توقف أمام القبر، وانحنى قليلًا يقرأ الفاتحة، ثم جلس على ركبتيه بجواره، ومد يده يمسح الغبار عن الرخام في حركة عفوية، كأنه يهيئ المكان للجلوس مع صاحبه.
ظل ينظر إلى الاسم المنقوش أمامه، قبل أن يخرج صوته أخيرًا، خافتًا ومثقلًا بالوجع:
كنت عارف إن في حاجة غلط... كنت حاسس إن خروجها من أوضتك يومها مش طبيعي.
توقفت الكلمات لحظة، وابتلع غصة مريرة استقرت في حلقه، ثم تابع: بس عمري ما تخيلت إنها تكون بالوساخة دي... إنها تسيبك تموت قدام عينيها وهي قادرة تساعدك.
انخفض رأسه، وأخذ يحرك أصابعه فوق حافة القبر، ثم قال بصوت متهدج:سامحني يا أبوي... سامحني اني سكت وكان مش فارق لي اللي حصل ...
سامحني إني ما قدرتش أجيب لك حقك من زمان.
رفع عينيه نحو السماء، وحاول أن يحبس دموعه، لكنها غلبته.: حقك رجع يا أبوي... والحقيقة ظهرت، وهي اخدت جزاءها بس إنت مش هنا علشان تشوفها.
ظل جالسًا في مكانه، صامتًا، ثم أخرج مسبحة والده التي احتفظ بها، وأخذ يقلب حباتها بين أصابعه.: وحشتني يا أبوي... وحشتني أوي.
وانحنى برأسه، تاركًا لدموعه أن تنزل دون أن يحاول إخفاءها.
فقد عرف الحقيقة أخيرًا، لكن الحقيقة لم تكن كافية لتعيد إليه أباه، ولا لتمنحه فرصة واحدة أخرى يجلس فيها أمامه، ويخبره كم كان يشتاق إليه.
.......................
في جناح سلطان ....
خرجت حور بعد ان اخدت حمام دافيء يريح جسدها بعد تعب الليله الماضيه، وكذلك سلطان الذي سبقها بقليل ....
صففت خصلاتها ووضعت عطرها الذي يحبه سلطان ثم اقتربت منه ...
كان جالساً علي الاريكه مسنداً ظهره عليها في صمت وعيناه معلقتان بنقطة بعيدة أمامه.
راقبته حور لبعض الوقت، ثم قالت بهدوء وهي تجلس بجانبه : إنت كويس؟
التفت إليها، وحاول أن يبدو طبيعيًا وابتسم بهدوء: أيوه يا حور، أنا كويس.
ابتسمت ابتسامة خفيفة، وقالت وهي تلامس يده: سلطان... أنا عارفاك.
نظر إلى يدها التي استقرت فوق يده، ثم عاد ينظر إليها.: عارف إيه؟
— عارفة إنك مهما حاولت تخبي اللي جواك، عينيك بتفضحك. إنت مش مرتاح، صح؟
أطلق زفرة عميقة، وأسند رأسه إلى ظهر الأريكة.: كنت فاكر إني لما أعرف الحقيقة هرتاح... كنت مستني اسمع اللي حصل يومها ..
سكت قليلًا، ثم تابع بصوت أكثر انخفاضًا:
بس لما سمعت كلامها، حسيت إن الوجع رجع من أول وجديد. تخيلي يا حور... أبويا كان قدامها، بيتألم ومش قادر يتنفس، وكل اللي كان محتاجه إنها تمد إيدها وتساعده... لكنها سابته يموت.
ضغط على فكه، وكأن مجرد استعادة المشهد تشعل الغضب داخله من جديد.: مش قادر أستوعب إن إنسان ممكن يوصل للقسوة دي. مش قادر أتخيل أبوي وهو بيبصلها ومستني منها المساعدة، وهي واقفة تتفرج عليه.
اقتربت حور منه أكثر، وأمسكت يده بكلتا يديها.: أنا عارفة إن اللي سمعته النهارده صعب، وعارفة إن وجعك مش هيخلص لمجرد إنك عرفت الحقيقة. بس يا سلطان، إنت ما كنتش تعرف، وما كانش في إيدك تعمل حاجة وقتها.
نظر إليها، فقالت وهي تحاول أن تصل إلى قلبه بكلماتها: ما تحملش نفسك ذنب حاجة ما كنتش تعرفها. أبوك كان له حق، والنهارده الحقيقة ظهرت، واللي عملت فيه كده هتتحاسب. وتاخد جزاءها بس إنت كمان من حقك ترتاح، ومن حق قلبك يهدى شوية.
ظل ينظر إليها دون كلام.
فأكملت بحنان: أبوك أكيد كان يتمنى يشوفك مرتاح، مش عايش طول عمرك أسير للي حصل له. هو مش موجود وسطينا بجسمه ، بس كل حاجة حلوة فيك منه، وكل اللي بناه لسه موجود. وإنت لازم تكمل حياته اللي تعب علشانه وعلشانا كلنا ...
انخفض بصر سلطان إلى أيديهما المتشابكة، ثم قال: ساعات بحس إني مهما عملت مش هقدر أعوض غيابه... كان نفسي يكون موجود، يشوف عامر لما فاق ورجع عامر العامري من تاني ، ويشوفنا مع بعض ويعرف ان اختياره كان صح ويشوف حفيده اللي جاي في الطريق.
ابتسمت حور رغم دموعها.: هو اكيد حاسس بينا يا حبيبي .....—
مد سلطان يده ووضعها برفق فوق بطنها، ونظر إليها نظرة طويلة، ثم قال: كان هيحبه اوي ...
وضعت حور يدها فوق يده، وقالت بصوت دافئ: وانت هتعلم ابننا كل اللي هو علمهولك ...
ابتسم سلطان ابتسامة صغيرة، لكنها سرعان ما اختفت حين عاد الحزن إلى عينيه.
مالت حور نحوه وأسندت رأسها إلى كتفه وتابعت بشقاوه حتي تخرجه من حاله الحزن التي يعيشها: سلطان ...
أحاط كتفيها بذراعه، وقربها منه أكثر : قلب السلطان ....
همست حور بشقاوه: أنت ربحتك حلوه اوي اوي يا حبيبي....
ضحك سلطان بخفوت : اشمعنا يعني ما هو نفس البرفان اللي بحطه كل يوم
اقتربت حور منه اكثر واخذت تشتم عنقه اكثر : عارفها بس مش عارفه ليه انهارده حلوه اوي كده ، حاسه اني عاوزه افضل اشم فيك كده علي طول ...
زاد سلطان من ضمها الي صدره اكثر : واضح كده ان هرمونات الحمل اشتغلت معاكي بدري ، انا بسمع ان هرمونات الحمل دي جباره وعارف اني هشوف منها ومنك الويل ...
خرجت حور من احضانه ثم وقفت امامه متخصرة هاتفه بغضب : قصدك ايه مش عاجبك هرموناتي ولا ايه يا شيخ سلطان..
لمعت عين سلطان ببريق عابث : وانا اقدر با شيخه حور ، الشيخ سلطان تحت امرك وامر هرموناتك يا حور السلطان ...
رفعت حور انفها هاتفه بدلال : ايوه كده اتعدل ،ناس ما تجيش الا بالعين الحمرا...
وتحركت من امامه نحو الفراش الا انه لحق بها وضم خصرها من الخلف هاتفاً بعبث وهو يقبل جانب عنقها قبلات ممتاليه : اموت فيك وانت شرس كده ...
ابتسمت حور بدلال : انا شرسه يا شيخ سلطان حرام عليك ...
سلطان وهو يديرها بين يديه غارقاً في خضار عينيها اللامع : حرام عليكي انتي اللي بتعمليه فيه يا حور السلطان .
ثم اقتنص شفتيها في قبله راغبه مشتاقه بادلته هي برغبه اكبر وغرق معها في نوبه عشق مجنونه مثقلاً عنه عناء الايام السابقة داخل احضانها .....
