رواية خلخال مشوه الفصل الرابع والثلاثون 34 بقلم زمرده

 

 


 

رواية خلخال مشوه الفصل الرابع والثلاثون بقلم زمرده




الخضار الجان ملتم ع السواجي نباگ تعبه
اه يا تعب السنين الشتل بين أضلوعي لجمه
وين نتلاكه ونوج بين السمه ونشتعل نجمه

°ريحانة°

فتحت الباب وطلعت ،كل العيون صارت علي ،رهبة صابتني من نضراتهم بس كملت دربي ،سكوت صابهم غريب چن يردون يشوفون شني الراح اسويه ..! ! !

باوعتله واگف بنصهم ومركز وياي وابتسامه أنرسمت على وجهه متأمل خير من شافني امشي بأتجاهه
وگفت گباله وگبل لا يحجي نزعت الحلقة من اصبعي رافعتها بوجهه
_ هاي حلقتك اخذها وطلگني لان انا الما اريدنك مو احد جابرني على الطلاگ ،من ساعة الطلعت من غرفتي دمعتي على خدي والسبب كسرتك
حرمت علي ،وگلتها الك گبل وارجع اعيدنها ،تحرم علي بعد وكل خط رجعة ما يجمعنا ورد منين ما أجيت ،انتهت وياك

وي كل كلمة احجيها عيونه تتوسع بصدمة ،دار وجهه على صوت عزيز من صاح
عزيز : سمعت لو اعيد الگالته ،ويلا الدرب الجابك يردك

اندار علي فاصل ما چن موجود يمه غيري ،عيونه تتوسلني ما اسوي هيج بس انا وروحي مو حمل تعب اكثر بعد لان الحال الوصلتله كافي ،كسرني وما فكر بي ،چان يگدر يجي يگلي يحجيلي بس السواه ضم علي

حمزة : لا تسويها هيج ،لا تكسريني ريحانة ،تعارفين انا ما اعيش بلياج

أبتسمت صوتي بالگوة يطلع ،بالگوات كاضه عيوني ما يبچن
_ كسرتني وما كسرت حجاية امك ،واجه دورك هسة لازم تحس بي وتاخذ جزات افعالك

حمزة : بس مو هيييج ،مو هيج ،خليج هنا خليج يم اهلج بس ما اطلگج

_ اعذرني ،جازت الروح منك

صيح متخبل من طريقة كلاامي
حمزة : لا تحجين هييييج ،ولج لا تحجين هيييج

درت عيوني منه اريدن ارد ،ما اگدر اضلن واگفه اكثر بعد ،شعور الجاي احس بيه ما ينفهم ،بين الكارهه فعلته وبين الراضيه بسوايتي ،مشيت بس گطع دربي من ركض يوگف گبالي

حمزة : بداعة سنين عمرنا لا ،شلون يهون عليج وانا حمزة

_ مثل ما هنت عليك انا ،مثل ما هانت عدك كسرتي تهون كلك أنت وسنينك وساعة العرفتك بيها

حمزة : خلينا نتفاهم مو كلشي ينحل بالطلاگ

كل هل حجي گدامهم ما تدخلوا ،وبس طبيت جوه سمعت صياحهم رد چن جانوا متحملين على اعصابهم ،وگفت ورا الباب ايدي على گلبي اسمع وانداريت على صوتها بصفي

بصائر : شجاه ما يمشي ،مو يعارف بيهم طگه ونص هي مال يعاندهم

تنهدت اركز بصوته وارد عليها
_ انا اعارف بيه شگد يحبني وشگد ما يگدر على فراگي بس بنفس الوكت ما يگدر يكسر كلمة أمه واعارف لو غفرتله راح اتأذه اكثر من گبل

باوعت بوجها حايرة من گالت
بصائر : تحبيه ؟

_ الحب وحده ما يكفي حتى نعيش عيشة براحة
انا فگدت الامان الچنت احسه گبل يمه
،والامان اهم من الحب لو راح ما ضل حب بعد

سكتت ما تعارف شني التگوله وانا ضليت اسمع صياحهم ،طلعوه من القرية بالغصب ،بين الأنقهر عليه وعلى الحال الشفته بيه هسة وارد اگولن لا يستاهل الصار من ايده ...

گعدت على عتبة باب المطبخ ورفعت راسي على صوت هيوفة واگفه وراي
هيوفة : ما تگومين تطبين ،اكلج البگ

_ مختنگة كلش ،چن شوف شني محطوط على گلبي

اجت گعدت يمي وبصائر تفتر ايدها على بطنها وتحجي
بصائر : ما ملوا ،مو مشى الزلمة المن بعد هل عصبية هاي

هيوفة : ما تعرفيهم ،شني جديدين علينا واگعدي كافي فره موزين عليج

تربعت بالگاع گبالي
بصائر : شني هاي احس صار عدي جالي من الخوف

هيوفة : خلصتي حبالتج عدج جالي ياخوف هذا ولج

بصائر : لا ولج اليوم عود زينة بس هسة ردلي ،اضن حسدت روحي

هيوفة : جا هو ما يحسد المال الا اصاحبه

باوعت للباب من انفتح وطبوا أبوي والولد واحدهم روحه بخشمه اكثر من الثاني
،گمت على حيلي اطگگ اصابعي من صاح بأسمي

وگف گبالي خازرني
ضيرم : شلون تطلعيين ؟

دنگت رأسي وهمست
_ حتى لا يضل يضن بيكم جابريني على الطلاگ

فقار : ابد ما رضيت على سوايتج ،احنا موجودين طلعتج كل داعي ما الها

_ اريدن اخلص واخلصكم

باقر : كافي الصار صار وما طلعت گدام غريب اهلها وزلمتها عليش تلومنها ؟

عزيز : چانت تگدر تحاجيه منوره الباب

باقر : كافي عزيز ،كافي ما تتعب أنت لو شني ؟

سكت ما رد على أبوي وخله وطب متنرفز ،طبينا انا والبنات اخير شي وراهم ،بوجهي للغرفة الصرت بيها انامن وحدي من بعد ما راحت حواري ،بس طبيت شمرت حجابي وعباتي من ايدي
وگعدت بالزاوية مختنگة ،خلص الليل وما خلصت ملامتي اله ،ليش هيج وصلنا لدرب مگطوع يصعب علي استهان بسوايته وارد ولا چن صاير شي ...

°كوكبة°

نزلت اركض من سمعت هوسة جوه ،وگفت على صفحة بس اباوع بعيوني
بشرى : شارب علمودهااا ،ولك تسوي بروحك هيج علمود مررره

حمزة : ما ترديني بعد ،ما تريدني ،ولكم وگفت بوجهي تگلي ما اريدك

رفع ايده من ركزت جانت حلقة ،عارفتها حلقتها
من گال
حمزة : اطتها الي ،يعني بعد هاي هي ،ريحانة ما
تريدني

يردد "ما تريدني" وچن غير هل كلمة ما عده ،ومن
حجيه وتصرفاته مبين ما مستوعب هاي هي انتهوا

باوع لخالة
حمزة : كله منج ،گلتلج لو عارفت ما راح تضل يمي بس گتيلي لا ما تهدك ،تحبك ،لج يمة كل الصارمنج
كله مننننج

صيح محترگ گلبه
حمزة : تعارفين شگد احبهااا ،تعارفين وخيرتيني لو اتزوج بت اختج لو تتبرين مني ،موو أم أنت ،حرااام ينگالج گلمة يمة

وبلايه ما يرفلها چفن على حاله گالت
بشرى : كافي هواي خربطت ،طز بيها واذا ما ولت شني مو عدك مره

حمزة : لو تحطيلي عشر نسوان مو مثلها ،لج يمة هاي ريحانة ،احن منج علي

بشرى : ما تستحي والله، فشلتني وفشلت روحك گدام ام بتك

اندار باوع لعذراء الواگفه بصفي ،ما حجت ابد شايله بتها بايدها وتباوعله ،أبتسم مستهزء واندار على امه

حمزة : لوما أنت چان صارت ريحانة أم أبني حتى بفرحتها ما تهنت وكله برگبتج ،الله يحير على شنو يحاسبج يايمة

صعد فوگ لغرفته يسحل بروحه سحل ،منتظر اخوه واگف ابد ماتدخل وبنضرات الملامه يباوع ل خاله...

بشرى : شبيك هيج تباوعلي ؟

منتظر : الصار برگبتج يمة ،أنت وصلتيه لهل حال من الاول گلتلج لا تسوين هيج والبراسج صار وهذا التالي ابنج طلع عن الدرب

بشرى : شو ما تعارفون تحجون ،ياهو الحجة وگال برگبتج انا ردتله الزين

منتظر : يازين التحجين عنه وهو راح يتخبل عليها ما تشوفيه صاير هيكل ،لا اكل ولا شغل ولا عيشة عايشها مثل البشر

بشرى : شتريد امشي انا اردنها حتى يصير زين لو شني ؟

منتظر : ما يحتاج لان ما راح ترد

بشرى : وعساها لا ردت شني واگفه الدنيا عليها

منتظر : واگفه عد ابنج

باوع لعذراء
منتظر : لا تزعلين مني ،أنت بت خالتي بس هي صارلها سنين ويانة والصارلها ما راضي عليه انا والغلط منج ما چان لازم ترضين بواحد عده مره حتى لا ينهجم بيته

عذراء : وداعة بتي ما چنت اعارف بيه هلگد يحبها لو اعارف فلا چان رضيت

صاحت بيها تسكتها
بشرى : ولج

عذراء : خالتي گالتلي ما يحبها وهو بس مستعطفها لان ما تخلف ودوم مشاكل بيناتهم وانا رضيت

منتظر : مو كل الحجي اليناگل هو الصدگ ،سنين گبالنه وما فد يوم شفناهم واحد داير وجهه من الثاني

بلعت ريگها ودنگت تسكت بتها
بشرى : شني الجاي تسوي ،تگدر خلگ بت خالتك لخاطر الغريبة

منتظر : هناا كل السالفة ،لانها غريبة ما تحبيها يمة

بشرى : أي ،ما حبيتها ولا راح احبنها شتريد بعد ؟

هز ايده وصعد على الدرج
منتظر : رايد سلامتج ،استبرق لغرفتج

صعدت وراه استبرق تركض ،وانا جمد الدم بعروگي من شفته طب يدندن فاصل فلا چن عايش بعالمنا .!

كشيت ملامحي من اجه وگف گبالي ينفح دخان چگارته بوجهي ،گحيت مختنگة وهو ضحك ضحكة بشر مريض عقله مو يمه

مرتضى : شني اختتگي ؟

هفيت لروحي ارد عليه طافره روحي
_ جا شني غير خنگتني

مرتضى : چگارتي ريحتها مو طيبة مو ؟

_ كل الچگاير ريحته مو طيبة

مرتضى : چذابة ،لو چگارة حفيد الغثة چان حبيتيها

عگدت حاجبي وباوعت لخالة الما ضال غيرها يمنا وهو عيونه بس علي چن يگلي بنضراته أي التفكرين بيه المقصود
مرتضى : شني وين وصلتي بالصفنة ؟

_ ما فهمتك ،شجاي تحجي ؟

ضحك بصوت عالي يستفزني بكل حركة وفعل منه بس بالگوات اكض روحي حتى لا تصير عده علي زله

مسح طرف شفته بطريقة لعبت روحي وبنبره الضحك گال
مرتضى : لا تغشمين روحج وأنت اكثر بشر مطگطگهن كلهن

_ شبيك ؟

مرتضى : مابي شي ،اصعدي گدامي

_ ما اصعد

مرتضى : گلتلج اصعدي لا اصعدج سحل وتعارفين بي اسويها

_ مخبل ما عليك عتب

همستها وي روحي بس حضي الفگر خلاه يسمعها وتصير ليلة سوده علي ..! !

عت شعري من فوگ الشال خله روحي تشيط ،صيح يفرني بأيده
مرتضى : شگلتتيي ،ولج شگلتييي ؟

_ ما گلت شي ،ما گلت بس عوفني ولج خالة شعررري

استنچد بخالة اريدنها تجي تفكني منه ،وهي بس تقربت دفعها يصيح
مرتضى : لا تدخلين ،انا وياها لا تدخلييين ،لا تسوين روحج حنينة

نجوى : ولك يمة شجاك ،گطعت شعرها ولك

جرني يسحلني على الدرج ما متهم ل كل أحد ،اخوانه طلعوا يردون يخلصوني منه واستبرق تلطم وتصيح
استبرق : خلصها منه منتظر راح تموت بأيدده ،ولكم راح تموت

شمرني بالغرفة واندار عليهم ،يحذر بصياح
مرتضى : انا ومرتي ما من حگكم تدخلون

كضيت خدي ابجي ،انطگيت بالدرج احس فچي انخلع ،وبالايد الثانية كاضه راسي إتمنى بس اطلع من الغرفة هسة

منتظر : شني ما نتدخل ،چا نخليها تموت بأيدك شبيك أنت مخبببل ؟

مرتضى : مو مخبببل ،لا تخبلوني صدگ وتضلون تحجونهااا

أشرلي منتظر اطلعي وانا ما صدگت ،بس وصلت للباب سده بجسمة واندار علي
مرتضى : ويييين ،بعده ما بده حسابج حتى تمشين

منتظر : خليها تطلع مرتضى

مرتضى : مررتي ،تضل بغرفتي ولا تدخل

حمزة : مو چنت اگلكم خبل بس ما صدگتوني ،هسة شوفوا بعينوكم

مرتضى : انجب المعلول

حمزة : معلول ولا مخبل

ركضلها يريد يطگه وكلنه صيحنا برهيبة من قوة ركضته على حمزة ولوما واگف بوجهه منتظر چان بس الله اليستر من السواه .! !

منتظر : شبييك ،تريد تطگ اخوك ؟

وهو يتهادد على حمزة
مرتضى : اطگه واخلي دمه بطوله ،يتقصد يضوجني ومن احجي يگلي مخبببل

بشرى : خايبن كافي ولكم هديتوا حيلي ما طلعت هااااي

منتظر : حاجي ابنج المدلل ،حاجي خله يحترم نفسه لا أنا بأيدي اخليه يجر عدل

بشرى : على شني تخليه يجر عدل ،هو ومرته وما يريدكم تتدخلون ،ويلا كلمن لغرفت لا تكبروها

منتظر : شلون تردين تخلين بت اختج يمه ،وهو حتى مو بوعيه هسة

بشرى : مرته وتتحمله شعلكم أنتم

صفن بوجه خاله
منتظر : تحجين صدگ ؟

بشرى : جا چذب
باوعتلي
بشرى : وأنت لا تضلين على كلشي ومصيحة ،مسوية روحج كلش چن محد طاگج وأنت چنتي بكفخة وتگعدين بكفخة

اباوعلها دموعي تنزل وي كل كلمة تگولها ،درت وجهي امسح بدموعي وادعي ما يخلوني يمه لان احسن بيه متحمل علي
منتظر : طلعها ومن يردلك عقلك ترد لغرفتك .

مرتضى : توو ،عدي حساب وياها

من شفته اندار يريد يطب بجيت بصوت عالي ما بي حيل ضرباته ،هو من عقله موجود ما يرحمني مو انوبه شارب ،ركضت برجلين ترجف طلعت من الغرفة وهو تخبل بس يريد يردني ،وگفت ورا منتظر ابجي

مرتضى : لج تعاااااي ،بت الكلب تحتمين بأخوي مني ساقطة

يتلفض بكلمات يوصف بيهن بت شارع مو چن مرته
منتظر : لا تصيح كافي ،لك كاااافي

مرتضى : اطينياهااا وما اصيح ،اطينياهااا

منتظر : شني مخبل واخليها بأيدك وأنت هيج ،لك اصحى على روحك اصحى

مرتضى : لا تصير خير براااسي

منتظر : خير وغصب عنك ،دربي السجاده مو مثلك ما مخلي درب من دروب العربده يعتبن عليك

مرتضى : ديلاااا ،لا تبيع شريفات برااااسي .

منتظر : الشريفات التحجي عنهن ما ابيعهن براس واحد مثلك ،ما تستاهل حرامات

مرتضى : اهوووو ،اطيني مرتي

أشرلي اطب لغرفته وصاح بعناد بيه
منتظر : اخذيها استبرق للغرفة، وخل اشوف شيسوي

وانا بس تحركت من اشرتلي استبرق هو تخبل بالزايد يصيح ،ضليت واگفه ارجف والحيره موتتني الحالين بيهن اذيتي
مرتضى : اندمج ،والله اذا كسرتي كلمتي گدامهم انددددمج

بلعت ريگي وطاحت دموعي بعجز ،كضيت ثوب استبرق احتمي بيها من شفته اجاني
مرتضى : اذا تجين وياي هسة ما احاجيج ،بس لو مشيتي وراهم عقابج يصير بثنين

باوعتله بحيره ودرت اباوع لمنتظر ،أشرلي لا ،مشيت بساع لغرفة منتظر وبس طبگت الباب سديت أذني من صوت صياحهم ،شوي وطبتلي استبرق ،گعدت گبالي تنزل ايدي من أذني وتحاول ما تخليني أخاف

استبرق : ما يحاجيج ولج لان مو بوعيه هل جاي يخوفج ،بس يصحى ينسى كلشي والله

هزيت رأسي
_ لا ما ينسى ،انا اعرفه هذا البشر ما ينسى ويحقد وحقده يعمي گلبه گبل عيونه

استبرق : دگولي يا الله ،شني السالفة جا هيج طلعنا ما نعارفه

سكتت ما اگدر احجي اكثر ،ما اگدر اگلها چم شهر شوفني الموت بيهن ،على كل حجاية يركز وعلى كل صفنة اصفنها يعاقبني ،امه ما تعارفه بگدي انا عاشرته وعارفت شني الضامته روحه ،انسان ظاهره غير عن كلشي مبينه للناس ..! !

من شافتنب ما حجيت بعد خلت وطلعت برا وانا لميت رچليه الصدري بس ما اريد افكر ،بس اريد بالي يصفى ويهدني الخوف منه...

رفعت راسي من انفتح الباب وهسة الا انتبهت خلصت عركتهم ،گمت اعدل بحجابي من طبوا
منتظر : عليش گمتي خوية ؟

_ وين ..وين راح ؟

منتظر : طب للغرفة ،راح يخبلني بكيفه يصيح وبكيفه يسكت

گعد على الجرباية
منتظر : بس لو اعارف شني مشكلته ،صح من گبل هو طابگات عده بس مو هيج

استبرق : هاي امراض مخفية وجاي يعكسهن على مرته

هز رأسه
منتظر : صح ،صح

_ وين امشي انا ؟

عگد حاجبه مستغرب
منتظر : شني وين تمشين ؟

_ وديني الاهلي ما اريد اضل هنا بعد ،والله اخافن منه احس على ساعة الساعة يكتلني حلال

منتظر : ما يرضى وين تمشين ،ما شفتي لهنا خبص الامه خبص تالي تردين تمشين الاهلج

_ خلصني منه عليك الحسين ،والله العشته من تعب يم اهلي كافي

صفن حاير وانا كملت بصوت يرجف
_ مو اول مره هاي يشرب ،من ليلة العرس عارفت بيه وسكتت ،بس والله تعبت صار اشهر على هل حطه وكل يوم اگول راح يجر عدل بس هو يزيد ما ينقص

بعد صفنه گال
منتظر : شوكت تردين تمشين الاهلج ؟

_ باجر ،مو حمل اضلن بعد هنا ،ولو عيشة اهلي مو اهون من عيشته

حط ايده على رجليه وگام يوصي استبرق
منتظر : انا راح انزل انام بالديوانية وأنت أي شي يصير خابريني

استبرق : صار

گبل لا يطلع اندار يأكد
منتظر : عينج عليها

استبرق : ما يحتاج توصي

بس مشى هي قفلت الباب وراه وردت وگفت گبالي
استبرق : اخذي راحتج ،چن الغرفة غرفتج

_ زحمة رچلج راح ينام جوه

استبرق : لا يا زحمة ،هو يريد يأمن عليج

دنگت ساكتة مستهضمة على روحي وعلى كل يوم من عمري ما شفت بيه حنيه من اهلي الضالين بس بالاسم اهل ..! !

استبرق : تعاي تمددي

نزعت شالي ومشيت گعدت على الجرباية وهي شالت ابنها تنيم بيه لان فز يبجي ،هزته جزعانه روحها
استبرق : ما عولته ينام خلصت روحه من الخوف وتالي رد گعد شراح ينومه بعد

_ اطينياه انا انومه الج

استبرق : نحس يتعبج وما يرضى بغيري مو تعارفيه

سكتت اباوعلها تفتر شايلته تلوليل ،تثاوبت وتمددت وما أعارف شلون غفت عيوني وما فزيت غير على صوت دگة الباب ...

طفرت اتلفت ،وهي.فزت من صارت دگة ثانية اقوى بعد من الگبلها ،ركضت للباب وصاحت
استبرق : منووو ؟

مرتضى : انااا ،افتحي الباب اريد احجي وي كوكبة

حطيت ايدي على حلگي إأشرلها ما ترضى ،وهي بلايه ما تشوفني گالتله
استبرق : باجر حاجيها نايمة هسة

مرتضى : گعديهااا

استبرق : فدوه مرتضى عوفها والله خطية البت

دفر الباب ينتر بصياح
مرتضى : شمسويلهااا

فز عبوسي يبجي ركضت شالته وهو بعده ضال يدگ على الباب ،گمت اريد احاجيه وهي اشرتلي مفزوعة لا ومشت تتوسل بيه يمشي وما اعارف
شلون الله عداه وصدگ خلاني بحالي ،بس الچنت ما اعارفه سكوته هذا اكبر مصيبة الي ..! !

ما گدرت ارد انامن وضليت گاعده السالفة التاخذني تردني ،غطيت راسي بالغطا الجو حار بس ما اريدن يعارفوه بي بعدني گاعده ..

منتظر : شني بعدها نايمة ؟

استبرق : أي ،امس الليل كله عبوسي يبجي لا خلاني انا ولا هي انام مثل البشر وتالي اجانه مرتضى يريد يحجي وياها متفطن

منتظر : وشني فتحتيله الباب ؟

استبرق : لا ابد ،اخوك اگص ايدي اذا صاحي

منتظر : سامعة واحد يشرب سم صاحي ؟

استبرق : شجابه على هل درب ،انا مصدمة بيه

منتظر : ايمانه ضيعف ،وحتى حمزة صاير مثله

استبرق : لا ويين ،حمزة فلا يشبهه

منتظر : شرب مره ،ومره تجر مره وتاليه مثل مرتضى

استبرق : مو ياخذك الواهس وياهم

ضحك بثگل ورد عليها
منتظر : زحمة تفكرين بي هيج ولج .

استبرق : جا شسوي ،صرت اخافن .

منتظر : تخافين وأنت مريتي ،شو چن راح اضوچن

يحجون طبيعي فلا چن البيت محترگ حرگ امس تحركت حتى انبهم انا گاعده ولا ياخذهم الواهس، لفيت الغطا على راسي وباوعتلهم
عيونهم علي

بالگوات رسمت ابتسامه على وجهي وانا اگولن
_ صباح الخير

ردوا علي ثنيهم وانا مشيت اريدن اطلع بس وگفت من گال
منتظر : لا تمشين بعده بالغرفة

_ ما طالع للشغل ؟

منتظر : لا ،ليش هو يدري بروحه

ماتحركت بعد وضليت واگفه حايره ،اجت كضتني من ايدي بايدها حجابي
استبرق : اللبسي حجابج وأمشي نتريگ و الله يحلها

اخذت الحجاب منها بأيدي الثانية وبس نزل منتظر لبسته ،ونزلنه ويا ساعة السودة الشافتني بيها خالتي
بعدني على الدرج وصاحت
بشرى : هااا يا مصخمة ،مخلية زلمتج وحده

نتر يريدها تسكت
منتظر : هااا يمة ؟

بشرى : انا وبت اختي لا تدخل

گمت وگفت گبالي
بشرى : ما تستحين على روحج مخلية غرفتج ونايمة بغرفة حماج

استبرق : عمة ترا منتظر نام جوه

بشرى : اششش ،محد طالب منج تحجين

استبرق : جا شني نضل خرسان

خزرتها واندارت ل منتظر
بشرى : مرتك طالع لسانها ،گلها تضمه لا اگصلهياه بأيدي

استبرق : سالمين عمة شكوو ؟

منتظر : استبرق اسكتي وامشي سويلي ريوگ ازقنب وراي شغل

بلايه ما حجي باوعت لخالة ومشت ،وانا بس مشى وراها منتظر جرتني من ايدي
بشرى : ما تستحين على روحج عود هاي بت اختي طلعتي حال الغريبة

كضيت ايدي متوجعة اسألها
_ شمسوية خاله ؟

بشرى : ما تسمعين حجايتي والبراسج تسوي وانا منتبهه عليج ومغلسة

_ هاي كله لان ما نمت بالغرفة يم ابنج وهو مو صاحي ؟

بشرى : انجبي مو صاحي شني ؟

_ جا غير شارب ،لو يذبحني هم ما يعارف بروحه

بشرى : لا تسويها كلشش

باوعت الايدي الدم انحصر بيها والچف صار احمر
_ خالة ايدي

نترتها ومشت گعدت تباوع علي وتخوزر وكملت من سمعت صوت على الدرج وشفته هو ،ضليت
واگفه حركة ما تحركت احس وگف بي الزمن مثل واحد منتظر عقابه ..! !

فتحت عيوني مستغربة من عبرني ولا چن اكو
شي صار امس ،صبح على خالة وگعد باوعلي

مرتضى : جوعان سويلي ريوگ

ما رديت عليه وكل بالي عد حاله ،معقوله امس تخبل بس لان چان شارب ؟؟

بشرى : مو جاي يحاجيج ،امشي سويله ريوگ خله ياكل

_ صار

همستها همس ومشيت للمطبخ بس طبيت شفتها واگفه يم الطباخ اندارتلي
استبرق : هااا گعد الخايف الله ؟

هزيت رأسي
_ گعد ،بس شو ولا چن شي صاير امس ؟

استبرق : جا هم ذول اليشربون ،بس يصحون ينسون كل دواليبهم

تنفست حايرة وباوعت عليها من طبت
عذراء : صباح الخير

ردينا عليها وهي واگفه چن تريد تحجي بس متردده
استبرق : شبيج عذراء ؟

عذراء : ما بي.شي

استبرق : شلون مابيج ،احجي شكو ؟

عذراء : حمزة ماكو

استبرق : خاف نايم بغرفة ريحانة ؟

عذراء : ماكو فارغة

استبرق : خاف طالع للشغل ؟

عذراء : مو تعارفيه صار شگد ما طالع ،ضل بالي والله

استبرق : هسة اخلي منتظر يخابره

تحاجيها طبيعي بس انا اعارف بيها ابد ما طايقة عذراء ،بس طب منتظر گالتله دگ عليه شوي ورد
حجه وياه وسده
منتظر : عده تطبيگ سيراميك ما مخلصه وابو البيت يريد يگعد وماشي يخلصه اله

عذراء : خوش ضل بالي والله .

ما رد عليها ومشى للصاله وبس خلصت الريوگ استبرق تگابلنه انا وياها على الصينية و ورانا عذراء شالت القوري والخبز ،وبعدني اريد اگعد وياهم
ونتر

مرتضى : اذا تگعدين انا اگوم

صفنت بوجهه وضليت واگفه
منتظر : اگعدي

صيح
مرتضى : بس تگعد انا اگوم

منتظر : گوم عساك لا اكلت ،اگعدي خوية اگعدي

خزرتني خالة تأشرلي امشي ،بلعت ريگي واحس الغصة ذبحتني الموقف البيه صعب ،درت وجهي اريدن امشي وبصوت مسموع وگفني وهو يگول

مرتضى : تعاي اگعدي ،بس ما اسمعلج صوت لان
ما طايقج

انداريت عليه ،صوتي بالگوات يطلع
_ ما اريدن ،شبعانة

استبرق : شماكله ولج ،تعاي اگعدي

_ ماريد

همستها واندارت امشي بساع صعدت فوگ ،بس طبيت للغرفة شمرت حجابي وبجيت بصوت عالي صح متعوده انا ومو بت دلال بس فشلني گدامهم وتعز علي روحي ...

گعدت على الجرباية اباوع للغرفة وابجي ،من ساعة الطبيتلها وانا مشلوعة گلب اكثر من گبل ،اشهر صار انا مخلصتهن بذله ،أبوي أطاني
ونساني اخواني مابيهم واحد سأل علي حتى سعد الچنت اگولن عنه خوش ملتهي بحياته ،لو امي الكل ما شكيتلها ما چن تسمعني ..! !

مسحت عيوني وگمت وگفت من طب ،وگف گبالي يحجي بنبرة صوت غصب عني اخاف من اسمعها..

مرتضى : عقابج على فعلة امس ما ناسيه ،بس خل اتفرغلج ابجيج دم مو دموع

_ شمسويتلك انا ؟

مرتضى : ما مسويتلي بس هيج بكيفي

_ حرام عليك

مرتضى : من اعارف الحرام تعاي احجيلي هل حجي

_ طلگني اذا ما تريدني

ضحك بصوت عالي وقدم وجهه گبال وجهي
مرتضى : اطلگج حتى يتزوجج ليييث موو ؟

جر اسمه رافع حاجبه ،هزيت رأسي
_ ما اتزوج لا هو ولا غيره ،انا لو ارد خدامه الاهلي ولا ضلتي هنا

مرتضى : ليش عيني هيج مانعجب احنا ؟

_ مرتضى والله تعبتني ،والله تعبت تفتهم شني معنى واحد تعب ؟

مرتضى : لا ما افتهم ،شو فهميني ؟

استغفرت بصوت ناصي ورديت ليوره منتفضه من كض ايدي ،حركتي خلته يتخبل ،طگاني على راسي يصيح وشني يصير گدامه يكسره

مرتضى : ما تخليني الوحج ،كله علموده ما كضيتج بعددد غير بس بالعررس

غطيت وجهي وبجيت بصوت عالي من رگع شيشة العطر بصفي
مرتضى : انااا الج ،بت السگط ،فد مدنله وتتعنطزين علي

شهگت ارجف من كض فچي بايده احس سنوني راح يتكسرن
مرتضى : اذا ما خليتج بكل يوم تتمنين الموت وما تحصليه ما اطلع زلمة

طحت شايطة روحي من دفعني وطلع ،صارت طيحتي على ايدي حسيت روحي راحت وهو حتى ما رد يشوف شني البي مو چن عده گلب لا حجارة ...

استبرق : شكووو شبيج ؟

گعدت گبالي
استبرق : احجي شسوالج ؟

_ راح اموت والله ،ولج راح اموت

باوعت على ايدي كاضتها
استبرق : شبيها ايدج ولج

_ دفعني وطحت عليها

استبرق : يااا ولج چنها مورمة

دنگت اشوفنها صدگ مورمة ،بس وجعها مو اقوى من وجع رزحي والمنتضرني
استبرق : شلون بيج منتظر طلع چان اخذج للمستشفى

_ ما يحتاج

استبرق : يا ما يحتاج غير چنها انفصخت

مسحت عيوني ولميت رچلي اسند راسي على ركبي وباوع عليها
استبرق : ليش ما تمشين الاهلج ،شني الجابرج تتحمليه ؟

أبتسمت بكسره
_ اريد امشي بس انا والما عدها اهل واحد

استبرق : بس مو هيج ،امج راح تجي اليوم امشي وياها ارتاحي چم يوم وردي

_ ما يمهم راحه اهلي ،ماكو فرق عن عيشتي هنا وهناك

سكتت مبين عليها الحيره والقلق لحالي ،هي نزلت وانا ضليت على نفس الگعده للضهر صعدتلي عذراء گالت امي جاية ،لبست حجابي ونزلت اسحل بروحي بس شافتني گالت تتصنع الحنية گدامهن

نادية : يمة هلا ببيتي،تعاي تعاي يمة .

مشيت سلمت عليها وگعدت يصفها ما مصدگة بكل حجاية تگولها
نادية : عينج عليها بشرى ترا هاي وحيدتي وما عدي غيرها

دنگت مبتسمة بأستهزاء وخالتي ترد عليها وحدها تچذب على الثانية
بشرى : بعيوني خية جا غير حسبة بتي هي

نادية : فدوه لگلبج ياخية

بس استمع حجاية ما حجيت ،ضلت امي يمنا للغدا ما صدگت تگوم خالتي واحاجيها

تقربت عليها
_ يمة .

نادية : هاا ؟

_ اخذيني وياج چم يوم وارد

نادية : شعدج ولج ؟

_ بس ارتاح ،تعبانة هنا

نادية : شني طالعة للحصاد ؟

_ يمة عليج الله ،مختنگة اريد اموت

نادية : رجلج يعارف ؟

_ لا

نادية : جا شلون تمشين ؟

_ اذا اگله ما يرضى

نادية : جا وين صايرة تمشين وياي وهو ما راضي ؟

سكتت من اجت خالة تحجي
بشرى : خية لو جاي حسن وياج جان تغدا عدنا

نادية : طالع خية تعارفيه ما يثبت بالبيت

أجت گعدت
بشرى : جا شوكت تمشون علينا مو چن طالت سالفتهم ؟

نادية : بالعيد گال أبو سعد نجيكم

أبتسمت
بشرى : كل الهلا بيكم

نادية : وبيج اكثر ،صدگ حمزة وين ما شفته ؟

بشرى : اووف ياحمزة ،صاير بشر ثاني

نادية : على الما تسمى ؟

بشرى : اي عساها بالموت

گمت ما متحملة حجيهن ،وبس مشت امي انا صعدت لليل أنا لا اكل ولا شرب ،لهناك وطبت استبرق بيدها لفه
استبرق : سويتلج لفه من العشا ،اليوم ابد ما اكلتي .

_ ما اشتهي

حطتها بأيدي
استبرق : اكلي لا تطيحين علينا

عضيت منها لگمة ،وكشيت وجهي لعبانة روحي
استبرق : شبيج ؟

_ من انقهر معدتي دوم تضل توجعني

استبرق : شمتانية ما تنقهرين ،بس اجبري روحج تاكلين

هزيت رأسي وكملت بالگوه على روحي وهي نزلت بساع من صاحوا على جاي ،گمت غسلت وهستوني رديت للغرفة وطب هو ،نزع قميصه وشمره بأهمال وتمدد على الجرباية

مرتضى : جوعان اريد اكل

_ ما تعشيت وياهم ؟

مرتضى : لا هستوني أجيت

بلايه ما احجي لبست حجابي ونزلت سويتله مخلمة وصعدتها اله ،هستوني حطيتها گباله وتذكرت مره ليث گالي اطيب اكله عده

مرتضى : شبيج ،وين صفنتي ؟

_ ماكو شي

مرتضى : وهسة لازم اصدگج ؟

_ بكيفك

طال النضر بوجهي ودنگ ياكل ،گعدت على الجرباية اباوع عليه بس خلص اكل دفع الصينية وطلع من الغرفة غسل ورد شلت الصينية وديتها ورديت فرشت فراشي بالگاع وهستوني تمددت وحسيت بيه وگف عد راسي

وخرت الغطا من راسي وباوعتله ،أشر على الجرباية
مرتضى : گومي نامي

_ نايمة هنا

مرتضى : گومي على الجرباية لا اتخبل عليج

_ عليك الله لا تلح

فزيت كاضه الغطا بأيدي من دنگ يريد يگومني
مرتضى : گوميي لا اطيح حضج

_ وخر ايدك انا اگوم وحدي ،مرتضى ايدك شيلها

قبض بأيده على زندي اكثر خلاني افرفح الا هدني يصيح
مرتضى : گومييي على الجرباية لا اشمرج من فوگ والله وتعارفين بي اسويها

گمت اتفچه شره ،تمددت على طرف الجرباية من الجهه الثانية ،طفه الضوه واجه تمدد ،ضليت أحوس اريد انامن ما اگدر وهو كلساع وناتر

مرتضى : انحمي لا اخنگج

_ خليني ارد لمكاني

بس حجيت اندار علي ،بذيج الضلمه وشفت عيونه شلون تخزر بي ،هستوني فتحت حلگي اريد اصيح وسكتني من عض شفتي

فرفحت روحي احس الدم ترس حلگي ،وخر وانا گمزت ابجي ايدي على حلگي
_ ليش هيج ليششش ،بشر أنت بشررر

اصيح متخبله وهو حاط ايده جوه راسه يباوعلي فلا تحرك ،گمت اخذت كلنكس امسح الدم ودموعي ما وگفت ،تمددت على فراشي اتلمس
بشفتي ميته من وجعها بحيث من گعدت الصبح صايره هلكبرها ضليت حايره شأسويلها استحي حتى انزل..

گعدت بالگاع حاطه براسي هاي هي ما انزل اذن آذان الظهر وانا على گعده وحده

طب يفر بسويج السياره يدندن وي روحه ما حاجيته من گال
مرتضى : شعدج هنا چنج مسكونه

شمر علي السويج من شافني بس اباوعله بلايه رد
مرتضى : شبيج ما تحجيين ؟

_ مابي شي ،انا عاجبني ما انزل وترا حرت وياك من تشوفني جوه تگلي اصعدي من تشوفني هنا تگلي انزلي ترا مو لعبة عدك انا

مرتضى : شوكت محاجيج انا ؟

_ لا ابد ولا حاجي

مرتضى : تخبلتي مو ؟

_ من عاشر القوم أربعين يوم صار مثلهم وانا صارلي چم شهر وياك تتوقع عقل يضل براسي

بس خلصت كلامي بلمح البصر صار گبالي ما لحگت حتى اتحرك جر شعري بايده بلايه رحمة
طگ راسي بالحايط حسيت الدنيا دارت بي وسواد حاوط عيوني ما صحيت غير انا بالمستشفى

فتحت عيوني وغطيتهن بأيدي بساع من صار الضوه بيهن و وجعهن دگ براسي ،بجيت من سمعت صوته يمي

بنفس الوكت كض ايدي ينبهني اسكت لان الدكتور هنا ،رديت فتحتهن متوجعة بالگوات اباوع للدكتور يحجي وياي
الدكتور : تشوفين بابا ؟

_ ما اشوف واضح احس عيوني مغوشات

الدكتور : طبيعي لان الطيحة صايره على راسج والواضح مأثره على الدماغ وصاير عدج ارتجاج

درت عيوني اباوعله واگف بكل اريحية ومبين مچذب على الدكتور
الدكتور : بدون جهد ،اسبوع عشرت ايام يرجع نضرج طبيعي وراح اكتبلج قطرات هم تفيدج .

مرتضى : خوما متأذي نضرها دكتور ؟

الدكتور : لا

گبل لا يطلع كتب وصفة القطره واطاها لمرتضى ،درت وجهي منه بساع من اجه گعد گبالي على السدية
مرتضى : لا تندگين بي بعد لان كل ما غلطتي انا اعاقبج عقاب ينسيج مرارة الگبله

_ انا مو عدوتك ،شتگول لروحك وأنت مشبعني أذيه

مرتضى : انسيه وانا ما إأذيج

_ ما ببالي حتى انساه

مرتضى : لا تچذبين ،جا ليش تردين تمشين الاهلج ؟

صفنت بوجهه مستغربة ،هذا شدراه ؟
مرتضى : احجي ليش تردين تمشين ؟

_ صار هواي ما رايحه وردت اشوفنهم

مرتضى : تشوفيه

_ لا والله ،لا

مرتضى : لو مو تحلفين هسة هم ما اصدگج

_ اذا هيج ما طايقني ليش تزوجتني ،انا شذنبي انظلم اكثر من ظلمي يم اهلي ؟

مرتضى : ذنبج صلفة وتدگين دروب

_ چنت اختنگ من ظلمهم وأمشي لهناك ما اعارف بيه موجود

ضحك وصفگ بأيده
مرتضى : سولفيها على الدبه هاي ،گومي نولي للبيت

ضليت لا اخذ ولا اطي لبست حجابي والعباة وطلعت وراه بالصدگ ما التفتلي وهو يعارف حالي
كلساع تسود الدنيا بعيوني واوگف وارد اركض وراه ما صدگت اوصل للسيارة...

بس طبيت للبيت تلگتني
استبرق : متت من الخوف عليج ،تمنيت ماشية وياج

باوعتله
استبرق : بس مرتضى ما قبل ولا وحده تجي وياج

مرتضى : المن ماشيات شني ماخذچن فزعة ،طاحت وصحت وفضت راحت

استبرق : منين طحتي ؟

بشرى : تحقيق هو ،كاضتها تحقيق خليها ترتاح وتلحگن على الحجي

سكتت تباوع لعمة ما مقتنعة ،گعدت بالصالة وما تحملت أضل اكثر وخليت
وصعدت الگاع تفتر بي بس يصعب علي اگابله وهو مأذيني ،وما خلاني براحتي صعد وراي مگابلني وگاعد

تنفست مختنگة من گعدته گبالي ،طلعتلي هدوم ومشيت للحمام ابدل وهستوني جاي اطب و وگفتني

استبرق : كوكبة

اندريت الها
_ هااا

وگفت گبالي
استبرق : صدگ طايحة من الچرباية ؟

_ لا ،منو گال ؟

استبرق : مرتضى گال چنت اتشاقة وياها وطاحت

_ چذاب هو طگ راسي بالحايط

استبرق : والله عارفت وحتى گلت لعمة وما رضت

_ جا من شوكت ترضى عليه ،مو تعارفيها حتى لو هو غلط تصير وياه

استبرق : تردين تسبحين ؟

_ أي ،لعبت روحي من الستشفى

استبرق : حگج ،اسويلج شي تاكلي ؟

_ أي والله جوعانة

استبرق : تدللين

اندارت تريد تمشي وردتلي تسأل
استبرق : صدگ شبيها شفتج ،هم طاگج ؟

_ لا ،عضني المجلوب

استبرق : عليج الله ؟

_ أي والله ،عايشة وي حيوان انا

استبرق : نصي صوتج ،لا يسمعج يمعوده

_ مليت والله بزعت روحي

استبرق : بس لو اعارف شني المخليه هيج ما يطيقج

_ ما اعارف

استبرق : دسبحي بساع نازله احميلج الاكل

بس مشت طبيت انا للحمام ،سبحت وطلعت صار بوجهي حمزة هدومة مدمره مبين
هستوه جاي من الشغل ،بس يا شغل بهل وكت ؟؟

عبرني باله مو عده ومشى لغرفته هو وريحانة وانا كملت دربي للغرفة طبيت
بلايه ما اباوعله اختنگ حتى من شوفته وما اگدر انسى شلون طگني بالحايط بلايه رحمة گلب ...

وخرت المنشفه من راسي وگعدت امشط شعري ،كل ما حركت المشط بشعري راسي يزيد وجعه
بس خلصت بساع لميته وگعدت على فراشي البعده ممدود

عدلت گعدتي من دگت الباب وطبت بأيدها صينية حطتها گبالي
استبرق : اكلي زين

_ شكرا تعبتج وياي

استبرق : يمعوده نمونه ،بالعافية

شلت الخاشوگه اكل من التمن
_ الله يعافيج

استبرق : تردين شي بعد ؟

_ لا سلامتج

بس طلعت طفر من الچرباية گعد گبالي
مرتضى : انزلي جيبلي خاشوگة

_ انزل أنت انا دايخة ما اگدر

خزرني وگام طلع من الغرفة شوي ورد ياكل وياي بعدني بأول لگمتين خلص الماعون نصه
_ ترا اكلي يعني مايصير هيج ،اذا جوعان ما گتلهم يصبولك ؟

نزل الخاشوگة من ايده
مرتضى : وسم بگلبج ،لج شني أنت ؟

_ شني ،شني ،جا غير اكلي خلصته كله

مرتضى : چيره بگصتج ،عينج فارغة

_ يبوووو ،تعال اكله كله وفضني

گام يهز بأيده
مرتضى : ما اريد تسميي وحدج .

دنگت اكل واهمس وي روحي لان ما اگدر اسكت هواي يغثني بحجيه
_ سم بگلبك أن شاء الله

غسل ورد گعد گبالي سواه زقنبوت صدگ ،اكلت شوي وحسيت بنفسي انسدت ،بس نام
هو انا نزلت الگاع تفتر بي ما صدگت اوصل و احط الصنينة على الكاونتر ...

طلعت بالحوش مختنگة ،گعدت بعتبة باب المطبخ سانده راسي على الچرچوبة اباوع للسما الدنيا هستوها باديه تظلم ، ومثل كل ليلة اتمنى روحي امشي للشط
افرغ همي هناك احطن رجلي بالماي وانا عيني على الگمر واردن للبيت انسانة ثانية بطاقة جديده

هسة صرت احسن روحي بسچن ،كل ليلة تمر مثل الگبلها واتعس ،ما اعارف شلون غفيت وانا على هل گعده ،فزيت مرعوبة من حسيت ايد انحطت على وجهي ...

°غاية°

طلعت من الغرفة اركض على صوت صياح جدي ،وگفت بس اباوع بعيوني وهو نزل دوسة ونص على صخر يحجي عليه
رأجس : شلووون هيج انا ما اعارف بالصااار ،ولكم تضمووون علي

صخر : ما ضامين عليك ،چان عرس حق وما ردت تخرب فرحتنا

رأجس : ولكم انا هيج اعارف من الغرب گيعاني محترررگه ،انا اعارف مو منكم من الوااادم ،والله دگتكم ما تنحجي

يفتر اعصاب صاير
محمد : الصار صار بوية بعد ،وانحلت بعد عليش نكبرهاا وهي فضت

ما رد على أبوي وباوع لصخر
رأجس : شني ماخذين منهم فلوس ولك ؟

صخر : أي مو گلتلك خسرناهم فلوس الحنطة

رأجس : صرفتوهن لو بعدهن ؟

صخر : ما اعرف عد ليث

رأجس : خابره اسأله عليهن بساع

بلايه ما يحجي دگ على ليث ،حجه وياه وسده
صخر : يگول مضمومات فوگ

رأجس : اصعد جيبهن

محمد : شتسوي بيهن بوية ؟

رأجس : اردنهن الهم ،انا سوالف الخساير هاي ما تاكل عدي

محمد : يعني طلابة جديدة مو ؟

رأجس : ما عليك أنت ،بس اسكت

محمد : جا اذا اسكت تلاص بوية .

صعد صخر جاب الفلوس ونزل ،حطهن بأيد جدي
صخر : هذن

رأجس : شگد ؟

صخر : تلاث ملاين

بلايه ما يحجي حطهن بجيبه وطلع ،لحگه أبوي وانا انداريت على صوتها من طلعت
عطاء : تاليتنة حتى احنا النسوان نطيح بهاي الطلايب

غضة : شني ولج شدخلنا ؟

عطاء : وحده من الثنين لو صلح لو تاليها موزينة وگولي ما گالت عطاء

غضة : شلون وياج احنا اليسمعج يگول كشافة

عطاء : لا مو كشافة بس اتنبئ

غضة : خايبة ما تسكتين لا اگوملج بعوجتيني

عطاء : هو انا مرد الضلايم

غضة : جا ما تسدين حلگج حتى نفك

عطاء : خلف الله عليج يمة

أبتسمت على نگرتهن بنص المصايب ما تگدر تسكت
عطاء : هااا شو تتمضحكين ؟

_ ما ضاحكة

عطاء : جذابة شفت سنيناتج يلمعن

ضحكت هلگد احب سوالفها ،تنحط على الجرح يطيب رغم هي شگد متأذيه بحياتها ،مشيت ادور صوتها من سمعتها تصيحني

بس شافتني گالت
ميمنة : خايبة تعاي طلعيلي شكر اسوي حلاوة شعرية

_ يااا جا مو سويت محلبي ؟

ميمنة : شو روحي مفرفره عليها ،دطلعيلي بساع

اخذت العلبه مال شكر من ايدها ومشيت للسطل طلعت منها ورديت اطيتهياه وضليت واگفه يمها

ميمنة : اريدن امشي اشوف بصائر گبل شوي فقار يگلي بطنها كلش مأذيتها

_ اسم الله ليش ؟

ميمنة : ما اعارف والله ،يگول هواي تصير عدها تقلصات

_ خاف لان بطنها زغيره ؟

ميمنة : هو الجاهل محصور وهل متأذيه

_ يلا ما ضل شي وتجيب

ميمنة : اربع اشهر ونص شيخلصهن ،شايله همها والله

_ لا تخافين تصير سوالف

ميمنة : أن شاء الله ،اطيني مواعين زغار

مشيت فتحت الكاونتر طلعتلها مواعين احجي وياها
_ ما ضل شي ويگضي رمضان

ميمنة : أي الحمدلله ،اگلج مو چن ليث تأخر

_ أي والله ،بس هسة يجي

ميمنة : امشي حضريله هدوم حتى بس يجي يسبح

_ أي

مشيت صعدت فوگ حضرتله هدوم وانا انزل شفته طب يحجي
ليث : راااح اموتن ،بوية ما يصير هيج شني بس انا عدكم

طب وراه جعفر
جعفر : جا مو أنا وياك لو مو بعينك

ليث : خاب ما تسكت مني لا ازرعك بالگاع ،روحي طافره منك

جعفر : اهووو ،شبيك اليوم گابات عدك

ليث : هيج وحدي ،بس اسكت أنت

جعفر : هسة صار جعفر ما يعجب لان خلصت شغلك

علگت الهدوم بالحمام وطلعت
غضة : شبيكم ولكم ؟

ليث : مابينة شي جده بس هذا يشوفني ضايج ويحجيني

جعفر : جده ما يرضى يگلي ليش ضايج

غضة : صدگ ولك ليش ضايج ؟

استغفر بصوت مسموع وبس شفته يريد يصعد گلتله
_ ليث هدومك بالحمام

اندار هو رأسه ب أي ومشى للحمام وجعفر گعدله بباب الحمام بس طلع صاح بيه
جعفر : عارفت ليششش ضااايج اليوم ،حلمان بيها مووو ؟

شمر عليه الخاولي وصاح
ليث : مو صوجك صوج اليحجيلك والله ،انا فد واحد قشمررر

جعفر : طيح الله حظك ،فوگ ما مقهور عليك هيج تحجي

ليث : هاا راح تزعل وتلوفها علي وأنت من الگيعان لهنا سطرتني

جعفر : جا غير صاحبك وبالي عليك

ليث : من اريد احجي اجي احجيلك ،بس هسة خليني لان راسي راح يطگ

جعفر : خاف ضغطك صاعد ؟

ليث : أي

مشى يم المراية مرر اصابعه بين خصلات شعره يمشطه بايده ،وبس شافه مرتب مشى تمدد على رجلين جده
غضة : تعبان ياجده ؟

ليث : أي والله

جعفر : انا وياه چنت والله وهم تعبان

غضة : سوده علي ياحبوبة

رفع ايدها باسها يحجي
ليث : اسم الله عليج غضة

غضة : خاب بطل تگول غضة انا مو جدتك زحمة تصيحني بأسمي

ليث : متعلم شأسوي

انداريت على صوته طب يحجي وي روحه ،بس شاف ليث صاح
نوح : خاااب ليث اشتريلي دراجة شبييك ،صير احسن من اخوك الچبير

ليث : شتسوي بيها ولك ؟

نوح : افرفر بيها شني ضال لا دراجة ولا سيارة اتوسل بفقار حتى يطيني دراجته

ليث : شگد تريد

صفگ ايده متحمس
نوح : هلا راح يحرك ايده

ليث : غير الخمس مية الف ما اطي

نوح : ميخالف واخذ من جده هم

غضة : يااا ،انا منيلي

نوح : علينا جده ،علينا ،جا غير خانگة فلوسج وفلوس جدي

غضة : لا تظلم بختك

نوح : أي انا ظالم ،ورقي ميتين الف

غضة : ماعدي

نوح : بروح ابوج ؟

غضة : ليش تحلف ولك

نوح : شبيج جده هن بس ميتين

غضة : ميخالف اطيك

مشى باسها من راسها وباوع لجعفر
نوح : أنت ما عدك

جعفر : مو اخوك انا خاف اشتبهت ؟

نوح : ابن عمي حزام ضهري

جعفر : امس چنت ابو السجون هسة صرت حزام ضهرك ؟

نوح : خاب لا تصير نحيسس

جعفر : انجب نوح ماعدي ولا فلس

هز ايده ومشى صعد فوگ وصاح
نوح : ابوو السجون ،ابو السچاجين

جعفر : مو اصعدلك

نوح : تعال حتى اشمرك من فوگ

صيحت من شفته ركضله
_ نوووح اجاك ولك اجاااك

ضحكت من صعد يشبخ بايتين سوه يريد يوصله بس رد نزل بساع مبين نوح شرد ،من صار وكت
الفطور كلنه التمنه وبس خلصنه وكفينا الهوسة گالت

ميمنة : راح امشي لبيت عمي باقر ،تمشين وياي ؟

_ أي بس خل ابدل هدومي منگعات

ميمنة : خوش ،انا هم صاعده ابدل

هي صعدت وانا مشيت بدلت هدومي وبس شافتني عمة لبست حجابي گالت
عطاء : شني وين راح تمشين ؟

_ لبيت عمي باقر انا وميمنة .

عطاء : اوگفلي امشي وياچن

_ خوش

خليتها تلبس حجابها وطلعت ،بس شافتني گالت
ميمنة : يلا نمشي ؟

زهرة : وين ماشيات ؟

ميمنة : نسيت اگلج والله ،نريد نمشي لبيت عمي باقر اشوفن بصائر

زهرة : خوش امشن

بس اجت عمة عطاء مشينا سوا ،اول ما طبينا صار صوتها العالي بأذني
حواري : شبييك ،يمة راسسي ،ولك فقار هد شعرري

نزعت عباتي اباوعله كاضها من شعرها يحجي هي صوتها شعلوه
فقار : الناس أول ما تطلب تسلم أنت ليش تغميني

حواري : خاب واذا غميتك ،بوية الحگلي راااااسي

هد شعرها يهدد بيها
فقار : ازينج صفر بعد لو غميتيني

وهي فلا چنها ردت غمته وركضت ،وهو ركض وراها هزت ايدها عمة
عطاء : خبال حتى خبال

طبينا وراهم للصاله ،هي خاتله بضهر عزيز وفقار گبالها
فقار : بس وخري من عزيز انا الج اذا ما رديتج لحق بعباتج

حواري : جا شني عوزك تردني بلايه عباة

عزيز : كافي فقار خطار خطية

حواري : لا والله ،شني خطاااار

عطاء : جا شني غير خطار بعد أنت

حواري : شوكت اجيتي عمة ؟

عطاء : من جان ساحلج من راسج مثل الطلي

حواري : خلف الله عليج عمة

وخر واندار على بصائر حاطة ايدها على بطنها وتضحك
فقار : اضحكي حبيبتي اضحكي ،تردين اسحلها اكثر ؟

بصائر : لا خطية

ضحك وطلع ،وبس صعد عزيز هزت ايدها تحجي عود زعلانة
حواري : شني هاي يمة عود انا جايتكم خطار ابنج يطگني

نجوى : خايبة تستاهلين ،يسلم عليج تغميه

حواري : مشتاقتله يمه

نجوى : جا اليشتاق يغم الواحد ؟

حواري : جا حق اعضه من اشتاقله

بصائر : سوده علي ياخوية

ضحكت وگعدت يم ريحانة الضاله بس تصفن ابد ما تدخلت ،ندستها
_ شني بالج وين ؟

ريحانة : هيج

°حواري°

جريت حجابي وگعدت يمهن
_ يا هيج جا غير طنگورتج واصله لغرفتي الله وكيلج

ريحانة : خاب شني شبيج جاية حامية علينا ؟

_ مشتاقتلكم والله

ريحانة : جا ليش ما تجين ؟

_ رمضان وما مفتهمة راسي من رچلي

ريحانة : حگج

تثاوبت
_ نعسانة كلش اريدن امشي بس الگعده وياكم حلوه حرامات ما تتفوت

اجت گعدت بصفي
_ شبيج مختنگة ولج ؟

بصائر : الجاهل صاعد على گلبي موتني والله

_ الله يساعدج

ضليت يمهم لگبل السحور اجاني حق ورديت ،بس طبيت تلگتني
بركة : شني ليش تأخرتي وخليتيني وحدي

_ جا مو گتلج امشي وياي ما رضيتي ،ضليتي وحدج احسلج ،صدگ اگلج شنسوي سحور ؟

بركة : نسأل امي

_ أي احسن

مشيت وراها افكر وي روحي ،وين چنت وي وين صرت گبل بس اشرد من السحور واخلي امي طايحة بيه بس هسة لا اريد اشتغل واشوفه
انا اعرف صح مره حرگت البيض ومره حطيت شكر على الطماطة وصرت علج بحلگ جعفر بس ميخالف اتعلم ...

بركة : يمة شنسوي سحور ؟

شيماء : سوي تمن وعدس برهان مشتهي

بركة : تمن وعدس يمة وحضي يخرب واصير علج بحلگ برهان

شيماء : گايمة انا اسويه بس لا تلطمين

گامت مشت گبلنا وانا وبركة لحگناها ،ندست بركة
_ امشي اغسلي المواعين الضالات

بركة : اغسليهن أنت ،انا مو غسلت ملات الفطور

_ خايبة امداج كلهن چم ماعون

بركة : اذا اغسلهن تغسلين مالات السحور

_ ميخالف

درت وجهي من عيونه بأيدي المجلافه ،شگد يخجلني هل بشر هذا بنضراته
عبد الحق : حوريتي ،شو باوعيلي ،احلي بعيونج گبل السحور

_ جا مو حليت ورا الفطور ؟

أبتسمت وباوعتله
عبد الحق : وداعة شهر رمضان متربعة بگلبي

ضحك من همست
_ كافي حق شني

عبد الحق : جاي نتغزل ،لو مايصير الغزل هم حرام ؟

_ لا مو حرام بس استحي

عبد الحق : اكثر شي احبه بيج لسانج أطول منج بس يمي غير

رفعتله حاجبي
_ انا لساني أطول مني ؟

عبد الحق : وهذا الدليل

ضحكت وسديت البوري
_ اسويلك چاي ؟

عبد الحق : وچگاره وياه
غمز
عبد الحق : لا شفايفج .

درت عيوني عاضه على شفتي ورديت اباوعله من سمعت صوت طگة الجداحه
عبد الحق : راح يأذن نصبر الروح بيها

_ اممم

عبد الحق : تعااي

كضني من ايدي يقربني عليه
_ بالمطبخ احنا

عبد الحق : كلهم ناموا بس انا ومعشوگتي گاعدين

_ حقق

عبد الحق : هاا روحه

_ هدني وخل نصعد .

عبد الحق : شعدنا نصعد ؟

يحجي بتلاعب خلاني اشك بروحي
_ نصعد انام ،يااا حق وين راح بالك ؟

عبد الحق : ما رايح عيني ،ضال عدج

ضحكت بصوت ناصي لان اعارف بيه ما يحب الضحك بالصوت العالي ،صعدنا ايدي بايده بس طبينا اخذ هدومه ومشى يسبح
وانا بدلت هدومي بساع لگلبية گصيره وگعدت
اضفر بشعري ،أبتسمت ورفعت راسي اباوعله

عبد الحق : هيج مايصير ترا ،لابسة احمر وانا گلبي ضعيف

_ سلامة گلبك عيني

مشط شعره وتمدد فاتحلي ايده
عبد الحق : طفي الضوه وتعاي .

هزيت رأسي ب أي وگمت ،طفيت الضوه وتمددت بحضنه ،جر الغطا مغطيني وياه
عبد الحق : نامي لان احنا ناس صيام

_ أي

غمضت عيوني وبساع غفيت ،وما گعدت غير الصبح على صوته يگعدني يريد يمشي لدوامه
عبد الحق : حورية وين بنطروني الأسود ،بس گليلي وردي نامي

فتحت عيوني وأشرتله على الكنتور
_ معلگته هنا

عبد الحق : خوش ،ردي نامي حبيبتي

غمضت وگبل لا يطلع حسيت عليه عدل شعري بأيده وباسني من راسي وطلع ،لگبل اذان الظهر گعدت على صوت صياح جوه ،لبست ثوب فوگ
گلبيتي وحطيت الحجاب على راسي ونزلت اركض

اسأل
_ شكووو شصايرر ؟

بركة : ما اعارف منو الخابر على برهان وطلع مشدوه

شيماء : امشي جيبلي عباتي امشي لبيت جدج ما أضل هنا والله

ركضت جابت عبأة عمة وعباتها
شيماء : جا وين ماشية بركة ؟

بركة : امشي وياج شعدي ضاله هنا ؟

شيماء : جا شني حورية تضل وحدها ؟

_ لا وين أضل عمة ،بس اوگفلي اجيب عباتي

صعدت گبل لا اسمع ردها وصعدت جبت عباتي ونزلت اللبس بيها ،بس طلعنا صارت الهوسة گدامنا
وهستونا طبينا لبيت جدي وسمعت صياحها

ميمنة : وين ماااشي ،صخر عليك الله ضل ،خله يهدد واذا ما حجه

صخر : وخري من دربي ميمنة ،وخررري

ميمنة : لا عليك الله ،والله گلبي يوجعني صخر لا تطلع

صخر : شعدي ضاااال هنا ،شعدددي ،تعاي عمة وخري بتج

صيح على عمة شيماء بأيده التفگه بس يريد يطلع وبس كضتها عمة هو ركض للولد برا ،حطيت ايدي على گلبي اسأل

_ شكو ،شصاير ؟

زهرة : امس عمي رد الفلوس لبيت غازي وهل مخابرين صخر يتهاددون

شيماء : يا فلوس خية ؟

زهرة : جا مو طلعوا حارگين وصلة من گيعانة وعمي ما يعارف الولد طاميها بس ما اعارف يا ابن حلال حاجيله

شيماء : يايمة

صاحت من باب المطبخ
غضة : تعالن طبن جوه

طبينا كلنه ،وانا گعده ما گدرت اگعد وخوب من سمعت صوته برا متت من الخوف ،طلعت اركض
من سمعت صوته يصيح

عبد الحق : كله منك صخررر ،أنت خليتهم يتمادون

صخر : لا تضل تلوووم ،انا ما ردت الطلايب

عبد الحق : منوو ما يريد الطلايب ،أنت ،هاي سولفها على الغرب مو علينا

صخر : لا اله الا الله ،اسكت حق لا احط حرگة گلبي كلها بيك

فزيت من انفتح الباب وطب ليث ،زغر عيونه يباوعلي
ليث : شني خوية شعدج هنا ؟

_ شبيه حق ؟

ليث : گابات عده ،طبي بعد اخوج

هزيت رأسي ب أي وطبيت من رد طلع هو ،بس شافتني گالت
بركة : اجه حق ؟

_ أي

بركة : الله اليستر

طبت عمة للمطبخ تدردم
عطاء : الله يستر مره مرتين

_ عمة شگايلين لصخر ؟

عطاء : هذا غريب گايله چانك زلمة ما چان خليتهم يكسرون اتفاقنة وصخر تخبل يريد يمشيله وهذاك يگله گاعدلك بالگيعان

لطمت على صدري
_ يمة ،وشني راح يمشي ؟

عطاء : اندري ،جا طگه ونص يسووها

بركة : عمة أنت تخوفينا لو شني ؟

عطاء : ما اجاملكم عمة

بركة : بس مو هيج ،فدوه اروحلج چذبي علينا بعد

هزت ايدها ومشت ما اعارف شني التحجي لان ما اگدر اركز وياها كل بالي برا ،ما صدگت اشوفنه ،طبوا كلهم وهو أخير شي
عبد الحق : المن ضااالين ،ما نمشيله ،المن صخررر ؟

صخر : ما شفت عمك اخذ التفگ

عبد الحق : بلايه تفگ

ليث : أي مو سباعية هي

عبد الحق : انجب أنت

ليث : احترررم نفسك

صيح بيهم عمي
محمد : طبواا جوه يلاااا

رأجس : اطيهم التفگ ،خلهم يمشولهم

محمد : خلنا احنا نحلها مو الا يتدخلون الولد

ضيرم : شني ما نتدخل عمي ؟

محمد : ضل ضل هيج گمز للمشاكل

ضيرم : خلنه نمشيلهم بروح عمي منير

محمد : لو مو تحلف ،امشي جوه

صخر : جدددي ،حاجي ابوووي

رأجس : ليش يرد ابوك ،يمشي البراسة

ماي بارد ونزل على گلبي من طبوا ،بس شني ارواحهم بخشمهم وكلهم ضايجين من عمي محمد لوره السحور كلمن رد لبيته

طبيت للغرفة هو صاعد گبلي متمدد من عگدة الحاجب مبين روحه ما طايقها ،بدلت هدومي وگعدت اباوعله
عبد الحق : شبيج ؟

_ ليش تموت على الطلايب ؟

تنهد وگعد
عبد الحق : ما رايدهن بس هاي يسموها تحدي من واحد يگلك تعال زحمة نضل بمكانه

_ خله يولي

عبد الحق : ماكو يولي ،لو طايح بأيدي أخطط بدمه الگيعان والله

_ تهديد مهندس هذا لو شني ؟

عبد الحق : مو وكت شقاج حورية

_ خاب لا تضل ضايج هيج مو أنا اضوچن

عبد الحق : اممم

أبتسمت من تمدد وفتحلي ايده ،بس حطيت راسي على صدره گال وهو يمسد على شعري
عبد الحق : شو أنت مو مثل النسوان ؟

_ شلون يعني ؟

عبد الحق : احسن بيج متغيره وسمنانة

طفرت اگعد
_ سمنااانة

عبد الحق : اسم الله ،هيج ماتحبين السمن ؟

_ اريد اضلن ناعمة

عبد الحق : چنج كتوت جفون

_ كبرن كتاكيتها

عبد الحق : أي شفتهن صايرات دجاجات وعمة حايرة بيهن

_ اليوم سمعت هيج طراطيش

عبد الحق : شني سمعتي ؟

_ عمة تحجي وياها بس ما تگول

عبد الحق : خليها من حگها

_ يعني عادي ؟

عبد الحق : السوته ما يمنع عمة تحجي وياها وهي گلبها گلب أم عليها

گرصته من خده وضحكت من خزرني
عبد الحق : شبيج ولج ؟

_ ما عبالي تفكر هيج .

عبد الحق : شنبي بنضرج انا همجي ؟

_ لا ،لا مو هيج بس يعني گلت لان كلكم ضايجين منها

عبد الحق : اتمنى عدي سلطة عليها اقل شي اسوي اكسر رجلها واخليها تحير شلون ترد تمشي عليهن .

_ يااا جا مو هستوك چنت حبوب شكو انگلبت ؟

عبد الحق : حبوب هاي شنو انوب ؟

_ هاي حباب بس تعبانة على روحها

ضحك وجرني خانگني
عبد الحق : اسكتي ونامي كافي حجي

_ خاب موزين احجي وياك

عبد الحق : مشكورة حبيبتي

ضحكت وغمضت عيوني ،هستوني غفيت وحسيت بأيد تخنگني ،فزيت رايحة روحي اجرن النفس
وما احصله حق مخبوص بي يحاجيني وانا حجاية ما تطلع مني بس اريدن هوه...

وين الا گدرت ارد طبيعية ،حطيت راسي على صدره رايحة روحي وهو يبوس راسي ويردد
عبد الحق : اسم الله ،شجاج حوريتي ؟

وخرت من صدره
_ ما اعارف ،كل مره هيج يصير بي

عبد الحق : اخذج لساده باجر خلهم يشوفوج

_ ما اريدن

عبد الحق : مو بكيفج

سكتت مابي حيل اناقشه من شفته معاند ،وسواها صدگ العصر اخذني انا وامي وامه وبس طبيت للساده وشميت ريحة البخور التارس المكان حسيت روحي انعصرت ما اتحملت اضلن وباوعتله
اتوسل بعيوني يطلعني وهو يأشرلي لا ،اخذت نفس وغطيت خشمي من حسيت معدتي گلبت كلش

رفعت راسي من گال السيد وهو عينه علي
_ شبيها البت ؟

امي حجتله مختصر على البي وهو بس يهز رأسه ويستمع بكل تركيز بس خلصت امي سأل
_ عدها شي ؟

نجوى : شي يعني شنو ؟

_ بطنها شايله ؟

نجوى : لا

_ وجها وجه وحده حبله

اندارتلي امي تسأل بعيونها وحق هم ركز وياي صفنت متذكره صارلها هواي ماكو من عرسي لهسه ما اجت بعد
نجوى : هاااا يمة ؟

همست مستحية ومتفشلة
_ اضن ايي

نجوى : يااا صلاوات

السيد : ردويلها من تجيب

شيماء : ليش سيد شبيها ؟

السيد : اذا الله ما يچذبني سحر اثر مسوالها ...


تعليقات