رواية نارين بين الحب والوجع الفصل السادس والثلاثون 36 بقلم ليلي طاهر


 رواية نارين بين الحب والوجع الفصل السادس والثلاثون 

- كلها أسبوع، والبنك هيحجز على الشركة يا مراد.

تجمّد مراد في مكانه للحظات، وقد اتسعت عيناه من شدة الصدمة، قبل أن يقترب من أخيه بخطوات متوترة، ويسأله بعدم تصديق:

- إيه؟! حجز ليه؟ وإزاي؟!

ظل مراد يحدّق في أخيه، عاجزًا عن استيعاب ما سمعه، بينما وقف عاصم أمامه بملامح مشدودة، قبل أن يجيبه بصوت عميق أثقله الإرهاق:

- الشركة بتنهار يا مراد من يوم سرقة الملف، واللي حصل في الفترة اللي فاتت قضى على اللي باقي منها!

تراجع عاصم خطوة، ثم استند بيديه إلى حافة المكتب، وارتسمت في عينيه نظرة حادة تخفي خلفها حزنًا ثقيلًا، قبل أن يقول:

- العملاء كلهم سحبوا شغلهم ولغوا العقود...

توقّف للحظة، وارتسمت على شفتيه ابتسامة ساخرة، قبل أن يرفع عينيه إلى مراد ويقول بمرارة:

- شايفين إني بقيت سوابق! إزاي هيكملوا معايا وهما خايفين على سمعتهم؟! الشركة خلاص مبقاش فيها شغل، وأنا عجزت عن سداد أقساط البنك، والبنك ناوي يرفع قضية حجز على الشركة في المحكمة. بس لحسن الحظ، واحد عزيز عليّا بلغني باللي البنك ناوي يعمله، وعشان كده قررت أبيع الشركة فورًا.

اقترب مراد منه خطوة، وقد ارتسمت على ملامحه علامات القلق، وقال بلهفة امتزجت بالعتاب:

- طب وأستاذ رفعت؟! أكيد كان عنده حل يا عاصم! إنت اتسرعت، ليه ما استنيتش وشوفت كان ممكن يعمل إيه؟!

هزّ عاصم رأسه ببطء، ثم أجابه بنبرة مريرة:

- أستاذ رفعت مش هيقدر يعمل حاجة يا مراد. رأس مال أي شركة سمعتها، خصوصًا لو شركة دعاية وإعلان! وبعد اللي حصل، والفيديو اللي انتشر وبقي تريند على السوشيال ميديا، كل حاجة انتهت. سمعتي اتدمرت، والعملاء فقدوا الثقة فيا. حتى لو قدر يأجل الحجز، هيعمل إيه في شركة مبقاش عندها شغل ولا دخل تسدد منه ديونها ولا حتى سمعة ؟!

نظر إليه مراد بعتاب ممزوج بالحزن، ثم قال بانفعال:

- طب ليه ما بلغتنيش يا عاصم؟! ليه شيلت الهم ده كله لوحدك؟! كنا قعدنا سوا وشوفنا حل! كنا بعنا العربيات، أي حاجة من ممتلكاتنا، حتى لو اضطرينا نبيع شركتي أنا! على الأقل لسه ما اتفتحتش، ولسه نقدر نبيعها قبل ما نبدأ فيها، ونسدد بيها جزء من ديونك بدل ما تخسر شركتك كلها!

تبدّلت ملامح عاصم فور سماعه اقتراح أخيه، واعتدل في وقفته، ثم نظر إليه بصرامة قائلًا:

- لأ طبعًا يا مراد! إنت بتقول إيه؟! أبيع شركتك ليه؟! أنا ما صدقت إنك أخدت نصيبك من الشركة، وقدرت تبدأ بيه كيان خاص بيك، وتبني مستقبلك بإيدك. تيجي دلوقتي وتضيّع كل ده عشاني؟! مستحيل أوافق على حاجة زي دي!

اقترب منه خطوة، وخفّض صوته قليلًا، وإن ظل الحسم واضحًا في نبرته:

- وبعدين، أنا وسط كل اللي خسرته، مطمّن إن نصيبك ونصيب أمي وسيلا بعيد عن الأزمة دي . أنا ممكن أخسر شركتي، وأبيع من ممتلكاتي عشان أسدد ديوني، لكن مش هسمح إنك تخسر مستقبلك بسببي، ولا إن نصيبهم يضيع معايا.

حاول مراد الاعتراض:

- بس يا عاصم...

قاطعه عاصم بحزم:

- من غير بس يا مراد! أنا خلاص أخدت قراري، والشركة اتباعت. ومش هسمح لك تهد اللي بنيته عشان تنقذ اللي أنا بنيته!
ساد الصمت بينهما للحظات، بينما ظل مراد ينظر إلى أخيه بعجز، يحاول استيعاب أن الشركة التي أفنى عاصم سنوات عمره في بنائها قد أصبحت ملكًا لغيره. ثم رفع رأسه فجأة، وكأنه عثر على حل آخر، وقال بلهفة:

- خلاص يا عاصم، نشتغل سوا في شركتي! أنا وإنت ، ونكبرها مع بعض. إنت خبرتك واسمك في السوق مش قليلين.

تأمل عاصم وجه أخيه للحظات، وقد لانت ملامحه قليلًا أمام إصراره على الوقوف بجانبه، لكنه أجابه بصوت هادئ وحاسم:

- أنا هسافر.

اتسعت عينا مراد بذهول، وتراجع برأسه قليلًا، وكأنه لم يستوعب ما سمعه، ثم سأله بصدمة:

- إيه؟! هتسافر؟! تسافر فين وليه يا عاصم؟!

أطلق عاصم زفرة طويلة مثقلة بالمرارة، ثم أدار وجهه نحو النافذة، وقال بصوت منخفض:

- هسافر كندا يا مراد... يحيى هناك ومستَنّيني، وهنفتح شركة سوا وأبدأ من جديد. أنا خلاص مش قادر أعيش في مصر بعد كل اللي حصل... سمعتي اتشوّهت، وكل حاجة بنيتها قدام الناس اتهدت في لحظة.

تحرّك مراد من مكانه بسرعة، واقترب من أخيه رافضًا تصديق قراره، وقال بنبرة امتزج فيها الغضب بالخوف عليه:

- لأ يا عاصم، مستحيل! إنت مش ممكن تسيب كل حاجة وتمشي بالشكل ده! أنا فاهم إنك اتوجعت وخسرت كتير، بس السفر مش هو الحل الوحيد. إنت طول عمرك بتواجه أي مشكلة، عمرك ما كنت بتهرب منها!

استدار عاصم نحوه، وظهرت في عينيه نظرة فولاذية حاسمة، وهو يجيبه بثبات:

- أنا مش بهرب يا مراد، ولا عمري هربت من حاجة. أنا بس محتاج أبعد شوية، أستعيد نفسي وأرتّب أفكاري، وأرجع أقف على رجلي من جديد. وجودي هنا دلوقتي مش هيساعدني، بالعكس، كل يوم بيعدّي بيخليني عاجز عن التفكير صح.

تأمله محراد بحزن، ثم سأله بصوت أخفض، وقد عاد القلق يسيطر على ملامحه:

- طب ولينا يا عاصم؟! هتسيبها وتمشي؟! ولا إنت كمان بتهرب منها ومن حبك ليها؟! إنت من يوم ما طلّقت لينا، وإنت بتحاول تهرب من كل حاجة بتفكّرك بيها!
خرجت من بين شفتي عاصم ضحكة قصيرة ساخرة، محمّلة بالتعب والمرارة، ثم رفع عينيه إلى مراد، وقد انعكس فيهما وجع عميق حاول جاهدًا أن يخفيه خلف كبريائه، وقال بحسم:

- مش عاصم الرشيد اللي يفرض نفسه على حد يا مراد، حتى لو كانت لينا! أنا حاولت معاها كتير، وحاولت أصلّح اللي اتكسر بينا، بس هي رفضتني بكل قوتها. وأنا عارف إني السبب فى اللي وصلها لكده، وعارف إني وجعتها، بس والله يا مراد، أنا كمان دفعت تمن كل اللي حصل غالي أوي... خسرت مراتي، وخسرت ابني، وخسرت شركتي اللي تعبت سنين عشان أبنيها!

توقّف للحظة، وانقبض فكه، وكأن الكلمات التالية كانت أثقل من أن ينطق بها، ثم تابع بصوت خافت اختلطت فيه المرارة بالقهر:

- هي بنفسها جت لحد هنا، وبصّت في عيني وقالت لي إنها بتكرهني... وإنها تخلّصت من ابني! من حتة مني كانت جواها! تقدر تتخيل الكلمة دي عملت فيا إيه يا مراد؟! وأنا عارف إني غلطت في حقها، وعارف إني وجعتها، بس هي قتلت ابني!

ابني اللي استنيته تلات سنين بحلم بيه، تلات سنين وأنا بتمنى اليوم اللي أشيله فيه بين إيديا وأشوفه قدامي! تلات سنين وأنا مستني اللحظة دي، وفي الآخر يضيع مني قبل حتى ما أشوفه أو أسمع صوته! وكمان قالتها لي صريحة إنها بتكرهني ومش عايزاني في حياتها! إزاي عايزني أتجاوز كل ده يا مراد؟!

انخفض صوته قليلًا، لكنه ظل متماسكًا، وأردف وهو ينظر إلى أخيه مباشرة:

- أنا بحبها، ومش هكدب عليك وأقول إني أقدر أنساها، بس حبي ليها مش معناه إني أذل نفسي وأجري وراها بعد ما قالت لي إنها بتكرهني ومش عايزاني في حياتها.
ساد الصمت للحظات، قبل أن يخفض عاصم صوته، وتخفت حدّة ملامحه قليلًا، ثم قال بمرارة:

- وبعدين يا مراد، أنا مش قادر أعيش هنا بعد كل اللي حصل. مش قادر أتحمل نظرات الناس ليا، في ناس بتبص لي بشماتة، وكأنها مستنية تشوفني واقع ومكسور، وناس تانية بتبص لي بشفقة، وكأن عاصم الرشيد اللي كانوا بيعملوا له ألف حساب مبقاش غير راجل خسر كل حاجة!

توقّف للحظة، ثم تابع بصوت مثقل بالوجع:

- أنا مش قادر أستحمل شماتة أعدائي، ولا شفقة الناس اللي بتحبني. حتى ماما، مش قادر أتحمل نظراتها ليا وهي شايفاني كأني طفل صغير مكسور وصعبان عليها!

رفع عينيه إلى مراد، واستطرد بنبرة خافتة:

- ولا نظراتك إنت كمان يا مراد. إنت اتعودت تشوفني قوي، تشوفني الجبل اللي بتتسند عليه، مش الراجل اللي بتحاول تطبطب عليه وتخفف عنه! أنا عارف إنكم بتحبوني وخايفين عليّا، بس أنا مش قادر أعيش وسط كل ده... عشان كده لازم أسافر وأبعد عن كل حاجة هنا، لحد ما أقدر أقف على رجلي من جديد.
نظر مراد إلى أخيه بملامح مشدودة، ثم تقدّم خطوة نحوه وسأله بنبرة جادة:

- طب هتسافر من غير ما تعرف مين اللي عمل كده وليه؟!

قبض عاصم يده بقوة، واشتعل الغضب في عينيه وهو يجيبه بانفعال:

- سليم مش ساكت، ووعدني إنه هيجيبه، وساعتها مش هيفلت من إيدي!

في تمام الساعة الحادية عشرة من صباح اليوم التالي...

انتفضت شاهندا من نومها على الرنين المزعج لهاتفها. فتحت عينيها بصعوبة، ونظرت إلى الشاشة بحدقتين متسعتين، فانقبض قلبها رعبًا واشمئزازًا فور أن رأت اسم «شريف».

ابتلعت ريقها الجاف، وضغطت على زر الرد، بينما كانت أصابعها تقبض بتوتر على طرف وسادتها، محاولة أن تحافظ على هدوء صوتها:

• «ألو.. في إيه يا شريف؟»

أتاها صوته حادًّا وجافًّا، تتخلله طقطقة ولاعة أشعل بها سيجارته ببرود:

• «صباح الخير يا حرمنا المصون.. أنا مستنيكي كمان ساعة في العنوان اللي هبعتهولك. شقة هادية كده، عشان نقعد براحتنا.»

ارتجفت شفتها السفلية، وتسلل الخوف إلى عينيها، فقرصت جلد يدها بقوة قبل أن تنطق بصوت مخنوق، تتقطع أنفاسها بين كلماته:

• «مش هينفع آجي النهارده.. سيبني في حالي أرجوك، مش قادرة.»

ساد صمت قصير عبر الهاتف، أعقبه زفير حاد ومستفز من شريف، قبل أن يأتيها صوته محمّلًا بالتهديد:

• «لا، هينفع.. أنا صبرت عليكي أسبوع كامل وعلى دلعك ده، بس صبري ليه حدود! ساعة واحدة وتكوني عندي في العنوان، ولا إنتِ نسيتي كويس أنا ممكن أعمل إيه بالورقتين اللي معايا؟»

انعقد لسانها، وتصلب جسدها بالكامل فوق الفراش. لم تجد ما تقوله، فأغلقت الخط بعنف، ثم نهضت من سريرها وراحت تجر قدميها لتبديل ملابسها، بينما كان الغل يغلي في صدرها، وعجزها عن التخلص منه يزيد اختناقها.

وبعد مرور ساعة، وصلت شاهندا إلى الشقة التي حددها لها شريف، وهناك نال منها ما أراده، لتجلس بعد ذلك على الحافة البعيدة من الفراش، وقد لفت ملاءة السرير حول جسدها العاري، بينما يرتجف جسدها من شدة القهر والاشمئزاز. ضمت ركبتيها إلى صدرها، وأخذت تشد أطراف الملاءة بأصابع متشنجة ابيضّت مفاصلها من شدة قبضتها، كأنها تحتمي بها من نظرات شريف.

كان شريف يستلقي بجانبها بجسد مسترخٍ تمامًا، وعيناه تلمعان ببرود، بينما تصاعد دخان سيجارته نحو السقف. تحرك على الفراش مقتربًا منها ببطء، ثم مد يده بوقاحة وأمسك بطرف الملاءة محاولًا سحبها عنها.

انتفضت شاهندا كأن تيارًا كهربائيًّا ضرب جسدها، ودفعت يده بعيدًا عنها بعنف، وهي تطلق زفيرًا حادًّا من شدة نفورها. ثم عادت تحكم إغلاق الملاءة حول جسدها بيدين مرتجفتين، وتراجعت إلى أقصى زاوية في الفراش.

تأمل شريف يدها المرتعشة، وارتسمت على شفتيه ابتسامة لئيمة تقطر سخرية، قبل أن يطلق ضحكة باردة من أنفه:

• «إنتِ مكسوفة مني ولا إيه؟ ما خلاص.. مفيش داعي للحركات دي، ده أنا حتى زي جوزك يا حرمي المصون!»

انفجرت دموع القهر من عينيها بغزارة، وغرست أظافرها في قماش الملاءة بقوة كادت تمزقها، وصاحت بصوت متحشرج مخنوق بالبكاء:

• «جوزي؟ إنت أحقر وأقذر بني آدم شفته في حياتي! قطّع الورقتين دول يا شريف.. لازم ننهي المهزلة دي حالًا. قولي عايز كام؟ الشيك اللي تطلبه هيتكتبلك حالًا، بس سيبني في حالي!»

تراجع شريف للخلف، وأسند ظهره إلى لوح الفراش ببطء وهو يميل برأسه جانبًا، ثم انفجر ضاحكًا بتهكم مرير، ضحكة هزت كتفيه. وقفت شاهندا من الفراش باندفاع وعصبية، تحكم لف الملاءة حول جسدها، وتتنفس بصدر يعلو ويهبط بسرعة جنونية:

• «أنا مش لعبة في إيدك!»

جذب شريف بنطاله الرياضي الملقى على طرف الفراش وارتداه بسرعة وبرود، ثم نهض من مكانه ببطء شديد، مستعرضًا طوله وبنيته بزهو وثقة مرعبة وهو يقف أمامها عاري الصدر. خطا نحوها حتى أصبح قريبًا منها، وعيناه مثبتتان في عينيها بتحدٍّ:

• «إنتِ من أول يوم كنتِ مجرد عروسة خشب في إيدين اللي بيحركوا اللعبة بجد! أنا اللي كنت بحركك وبستغلك لتنفيذ خطة صابر حرفيًّا. كنا محتاجين حد يدخل جوه الفيلا من غير ما حد يشك فيه، ويبدل البوكس. دي كانت أصعب خطوة.. تفتكري كنا هنأمن لواحد من الخدم؟ الخدم مالهمش أمان.. لكن إنتِ؟ حقدك وغلك الأعمى على عاصم ولينا هما اللي ساقوكي لينا على طبق من دهب. بدلتي البوكس وإنتِ فاكرة نفسك ذكية!»

تراجعت شاهندا خطوة للخلف، وشعرت بركبتيها تكادان تخذلانها. زاغت عيناها، وارتسم على وجهها احتقار شديد لنفسها، لا لأنها اكتشفت أمر تبديل البوكس، بل لأنها أدركت كيف استغل شريف ما تعرفه وما تريده لتحقيق مصالحه.

انحنى شريف قليلًا نحوها، وضيق عينيه بابتسامة خبيثة تحمل كل معاني التشفي والشماتة، ثم مرّر أصابعه بوقاحة على وجنتها وصولًا إلى ذقنها، قبل أن يرفع ذقنها بأطراف أصابعه في حركة مستفزة، ويهز رأسه ساخرًا:

• «تفتكري إني بحبك مثلًا؟ بصراحة، إنتِ كنتِ عاجباني من أول يوم. بس فاكرة لما كنتِ بتدخلي الشركة عند عاصم؟ فاكرة نظرات التعالي والازدراء اللي كنتِ بتبصيلي بيها، وإنك ما كنتيش حتى بتعبريني؟ كنتِ شايفاني حتة موظف صغير، جربوع وكحيان.. أهو نظرات الاحتقار دي بالذات هي اللي خلتني أحلف إني هجيبك تحت رجلي.. ونجحت! بس للأمانة؟ إنتِ دلوقتي ما بقيتيش بتشبعي رغبتي حتى، وبقيتي بره حساباتي، وما بقيتيش من مستوايا أصلًا!»

صُعقت شاهندا، وتصلبت أطرافها وهي تستمع إلى إهانته المباشرة، بينما تابع شريف بنبرة تفيض كبرياءً وغرورًا، رافعًا رأسه لأعلى:

• «إنتِ مستغربة؟ فاكرة الموظف الكحيان هيفضل طول عمره تحت؟ تؤ.. عاصم مضى خلاص على ورق بيع شركة الرشيد للدعاية والإعلان! تفتكري اللعبة دي كلها كانت ببلاش؟!
أنا من بكرة مش هبقى الموظف الصغير اللي بتدوسوا عليه بجزمتكم.. أنا بقيت الشريك الرسمي لصابر!
صابر ذكي، وعرف يختار صح. شال اسمه خالص من الصورة ومن اليافطة، لأنه عارف إن السوق محتاج لواحد زيي.. محتاج للنجم الحقيقي اللي هيدير وهيقوم بالليلة كلها! سابلي الإدارة التنفيذية وحصة أربعين في المية باسمي!

رفع شريف ذقنه قليلًا، ثم أطلق ضحكة ساخرة، وهزّ رأسه باستهزاء قبل أن يقول:

• «أنا اللي كنت شايل الجانب التنفيذي كله في الشركة دي على كتافي سنين يا شاهندا هانم! عاصم طبعًا عايش في وهم إنه الدكتور العبقري، الذكي اللي مفيش منه، والكل في الكل لمجرد إنه دارس ومخطط!»

رفع شريف إحدى يديه، ثم فتح ذراعيه على اتساعهما بحركة استعراضية مبالغ فيها، مقلّدًا شخصًا يتباهى بعظمة إنجازاته، وقال بنبرة ساخرة:

• «كان دايمًا شايفني مجرد مساعد، ذراع تنفيذي بيجري على رجله عشان يحوّل أفكاره العظيمة لحقيقة!»

أعاد ذراعيه إلى جانبيه، ثم أشار بإصبعه إلى نفسه، وارتسمت على شفتيه ابتسامة ممتلئة بالمرارة والاحتقار، قبل أن يستطرد:

• «كان بياخد الشهرة والملايين والوجاهة على الجاهز، ويتساب ليا أنا الفتافيت والملاليم، بحجة إنه صاحب العقل المدبر، وأنا مجرد مساعد ماليش لازمة من غيره!»

قبض شريف يده، ثم ضرب بها صدره بخفة، وعيناه تلمعان بالغضب، قبل أن يميل برأسه إلى الجانب ويقول بتهكم:

• «فضل يكبر باسمه على حسابي، وما كانش يعرف إن المساعد الصغير ده هيهد المعبد كله فوق دماغه بمساعدة صابر!»

لمعت عينا شريف بجشع واضح، وارتسمت على وجهه ابتسامة زهو مريض، قبل أن يواصل:

• «من بكرة، اسم الرشيد ده هيتشال من السوق تمامًا، واليافطة الجديدة الكبيرة هتتعلق في وسط البلد باسم وكالة علّام للدعاية والإعلان.. شريف علّام بقى هو الكل في الكل في الواجهة، وتعب سنين عمري هيرجعلي أضعاف! شفتي اللعبة حلوة إزاي؟ شاهندا هانم اللي كانت بتتعالى عليا، بقت مجرد لعبة في إيد صاحب أكبر وكالة إعلانات في البلد.. هرميها وقت ما أزهق منها!»

تقدمت نحوه بخطوات مهزوزة، وصدرها يضيق بالأنفاس، وصرخت بجنون وعصبية عارمة وهي ترفع قبضتها المرتعشة في الهواء:

• «أنا مش هسيبك.. إنت فاهم؟ أنا هوديك في داهية! هخلص منك ومن قرفك ده!»

تحرك شريف ببرود تام نحو جانب الفراش، دون أن تهتز فيه شعرة. دس ذراعيه في روب أسود طويل وارتداه ببطء مستفز، ثم ربط حزامه حول خصره والتفت إليها. أشار بإصبعه نحوها، وخفض صوته بوعيد واضح:

• «الخروج من اللعبة دي مش بإيدك. وإنتِ لسه مراتي يا شاهندا، وهتفضلي مراتي لحد ما أنا أقرر غير كده. أنا اللي هحدد إمتى العلاقة دي تنتهي، وإمتى أزهق منك وأرميكي. دلوقتي تقدري تغوري تلبسى هدومك وتمشي، لكن اعملي حسابك.. منين ما أطلبك تجيلي فورًا، من غير تأخير. ولو اتأخرتي ثانية واحدة، إنتِ عارفة كويس أنا ممكن أعمل إيه، سامعة؟»

تجمعت كل حرقة الدنيا في صدر شاهندا، وارتجف فكها من شدة الغيظ. نظرت إليه نظرة أخيرة اختلط فيها الغضب بالقهر، ثم جمعت كل ما في جوفها من غل وبصقت على الأرض عند قدميه بقوة.

استدارت عنه بعنف، وتوجهت نحو المرحاض وهي تحكم قبضتها على الملاءة وتجر قدميها المنهكتين. كانت تبكي بقهر، وعبراتها تخنق حنجرتها. أما شريف، فخفض رأسه يتأمل أثر بصقتها على الأرض ببرود، ثم رفع عينيه نحو الباب الذي اختفت خلفه، وارتسمت على وجهه ابتسامة شماتة مقززة، واثقًا أنه نجح في إذلالها وتحطيم كبريائها.

دخلت شاهندا المرحاض وأغلقت الباب خلفها بعنف صم الآذان. أسندت ظهرها إليه، ثم انهارت على الأرض باكية في صمت مرير، وأنفاسها تخرج متلاحقة كأنها تختنق. نهضت بصعوبة واتجهت نحو الحوض، وفتحت صنبور المياه، ثم أخذت تغرف الماء البارد وتلقيه على وجهها بعنف مرات متتالية، كأنها تحاول التخلص من أثر ما حدث.

رفعت رأسها ونظرت إلى المرآة بحدقتين شاحبتين، يملؤهما الاحتقار والانكسار. وبحركات مرتبكة، التقطت ملابسها وبدأت ترتدى ثيابها بأصابع مرتعشة، ثم فتحت الباب وغادرت الشقة مسرعة، لا تكاد ترى طريقها من كثرة الدموع.

استقلت شاهندا سيارتها، وانطلقت في طريق عودتها إلى الفيلا، تقود بشرود، وعيناها الغارقتان في الدموع تكادان تعجزان عن التركيز في الطريق أمامها. كانت كلمات شريف تتردد في رأسها كأنها مطرقة لا تتوقف عن ضربها، وكلما حاولت استيعاب ما حدث، اجتاحها شعور أشد بالقهر والمهانة.

وبعد فترة، وصلت إلى الفيلا، وترجلت من سيارتها بخطوات واهنة، وجسد لا يكاد يحملها. وما إن وضعت قدمها على أول درجة من درجات السلم لتصعد إلى غرفتها، حتى استوقفها صوت والدتها الحاد، وهي تخرج من الصالون بملامح يكسوها القلق:

- شاهندا! كنتِ فين؟ وإزاي تخرجي من غير ما تقولي لي؟!

تسمرت شاهندا في مكانها، واجتاحها الخوف بغتة. التفتت ببطء، عاجزة عن رفع عينيها لملاقاة نظرات والدتها، وراحت تفرك أصابعها المرتجفة وهي تجيب بصوت متقطع:

- كنت.. كنت في.. في النادي .

اقتربت منها والدتها بخطوات سريعة، ووقفت أمامها تتأمل وجهها الشاحب وعينيها المجهدتين، ثم تنهدت بضيق وعتاب:

- في النادي؟! إنتِ حكايتك إيه يا شاهندا؟ إنتِ الفترة دي مش عجباني خالص! بقالك أسبوع كامل قاعدة في أوضتك ومش بتخرجي، وحتى وإنتِ قاعدة معايا على الأكل، بتفضلي مسهّمة وسرحانة ومش بتاكلي! يا إما نايمة بالساعات! إيه حكايتك؟ في إيه جرى لك؟!

وقفت شاهندا عاجزة عن الرد، تحاول التقاط أنفاسها المكتومة، بينما كانت كلمات والدتها تزيد من شعورها بالاختناق. وقبل أن تتمكن من قول أي شيء، استأنفت الأم حديثها بنبرة مستعجلة:

- على العموم، مش وقت الكلام ده دلوقتي.. يلا غيري هدومك وتعالي معايا عشان نروح لخالتك. مكلماني من امبارح ومش مبطلة عياط من ساعة ما عرفت إن عاصم مسافر!

سقطت الكلمة على مسامع شاهندا كالصاعقة. انقبض قلبها بعنف، وارتجفت شفتها السفلى، بينما اتسعت عيناها في ذعر، وشعرت بغصة حارقة تسد حلقها وتكتم أنفاسها. انحدرت دمعة ساخنة على وجنتها الشاحبة، وارتسمت الكسرة على ملامحها وهي تبتلع ريقها بصعوبة، قبل أن تخرج الكلمة من بين شفتيها بصوت مبحوح:

- مسافر؟!

أجابتها والدتها دون أن تنتبه إلى وقع الخبر عليها:

- أيوه، مسافر. يلا اخلصي البسي بسرعة عشان نروح لها.

تحاملت شاهندا على جسدها الذي بدأ يرتجف، وتراجعت خطوة إلى الخلف، وهي تهز رأسها نفيًا بيأس.

- أنا.. أنا مش قادرة يا ماما.. تعبانة أوي ومش قادرة أروح في حتة.

لم تنتظر رد والدتها، بل استدارت وصعدت إلى غرفتها بخطوات متعثرة، وما إن دخلت حتى أغلقت الباب خلفها بعنف دوّى صداه في المكان.

اتجهت مباشرة نحو التسريحة، وتطلعت إلى انعكاس وجهها في المرآة. حدقت في شحوب بشرتها وانكسار عينيها لثوانٍ، قبل أن تنفجر بداخلها موجة غضب عارمة، أطاحت معها بكل ما كان فوق سطح التسريحة بضربة واحدة من يدها.

تطايرت زجاجات العطور ومستحضرات التجميل، وتناثرت محتوياتها في أرجاء الغرفة، بينما تراجعت شاهندا خطوتين، ثم هوت جالسة على الأرض، تبكي بهستيريا وتضرب كفًا بكف وهي تصرخ بقهر:

- ليه؟! ليه بيحصل فيا كل ده؟! ليه؟!

انهمرت دموعها بغزارة، وراحت تلعن شريف وتدعو عليه، بينما يخرج صوتها محملًا بالقهر والضياع:

- شريف الكلب.. الله يخرّب بيتك يا شريف! مش راضي يطلقني! بسببك مش هعرف أرجع له.. مش هعرف أرجع لعاصم تاني! كان خلاص ما عادش في قدامه غيري بعد ما طلق مراته! دمرتني وضيعته من إيدي!

ومع تصاعد نوبة غضبها، عاد الاختناق يطبق على صدرها، وشعرت بأنها لم تعد قادرة على احتمال أفكارها ولو لدقيقة أخرى. انتفضت من مكانها واندفعت نحو الخزانة الصغيرة المجاورة للفراش، ثم جذبت أحد أدراجها بعنف، وقلبت محتوياته على الأرض.

جثت على ركبتيها، وراحت تنبش بين الأغراض المبعثرة بأصابع مرتجفة، تزيح هذا وتلقي بذاك جانبًا، حتى تجمدت يدها فجأة.

رفعت علبة الحبوب، لتجدها فارغة!

اتسعت عيناها بصدمة، وأطبقت أصابعها على العلبة بقوة، وكأنها ترفض تصديق ما تراه. ثم سارعت إلى التقاط هاتفها، وضغطت على اسم راندا، ورفعته إلى أذنها في لهفة.

ظل الهاتف يرن دون إجابة.

أغلقت المكالمة وأعادت الاتصال مرة ثانية، ثم ثالثة، حتى شعرت أن كل ثانية تمر تزيد من عجزها واختناقها.

على الجانب الآخر، كانت راندا تجلس في غرفتها، تتأمل شاشة هاتفها التي أضاءت باسم شاهندا للمرة الرابعة. ارتسمت على شفتيها ابتسامة باردة، وتركت الهاتف يرن لثوانٍ إضافية، متعمدة إطالة انتظارها والاستمتاع بلهفتها، قبل أن تجيب أخيرًا بنبرة مسترخية، كأن شيئًا لم يكن:

- أيوة يا شاهندا.. في إيه؟

جاءها صوت شاهندا متلهفًا ومضطربًا:

- راندا، أنا في عرضك! الحبوب اللي بعتيهالي الأسبوع اللي فات خلصت، وأنا لسه راجعة البيت ومخنوقة أوي ومحتاجة أنام بأي طريقة ومش عارفة. شوفيلي علبة تانية منها بأسرع وقت، وأرجوكي متتأخريش عليا!

لمعت عينا راندا بمكر، لكنها تعمدت أن تتحدث بنبرة توحي بالضيق:

- علبة تانية؟ يا بنتي، دي شَحّة خالص ومش موجودة بسهولة.

كادت شاهندا تنهار، فضغطت على جبهتها بيدها المرتجفة، وتوسلت إليها بصوت يملؤه الذعر:

- لا، أرجوكي يا راندا، اتصرفي! أنا بجد بموت ومش قادرة أصلب طولي!

ساد الصمت للحظات، تعمدت راندا خلالها إطالة الانتظار، وهي تلعب بخصلات شعرها متظاهرة بالتفكير، قبل أن تطلق تنهيدة مصطنعة وتقول:

- ممم.. طب استني كده.. خلاص، عشان خاطرك إنتِ بس، أنا عندي العلبة الشخصية بتاعتي، هبعتهالك هي. تصرفي نفسك بيها دلوقتي.

تنفست شاهندا الصعداء، وكأنها استعادت طوق نجاة كان على وشك الإفلات من يدها، وقالت بصوت متهدج:

- طيب، بسرعة أرجوكي..

اتسعت ابتسامة راندا الخبيثة، واتجهت نحو النافذة قبل أن تجيبها ببرود:

- تمام، هبعتهالك مع السواق حالًا.

أنهت راندا المكالمة، وألقت الهاتف بإهمال فوق الفراش، ثم التفتت نحو مرآة الزينة الكبيرة، تتأمل انعكاس وجهها بابتسامة يملؤها الانتصار والتشفي.

وأطلقت ضحكة خافتة ساخرة، قبل أن تتمتم بنبرة لئيمة:

- تعبانة ومش قادرة تصلبي طولك؟ ولسه يا شاهندا..

فى فيلا صابركانت لينا تجلس في غرفتها بالطابق العلوي، شاردة الذهن، بينما تستقر يدها بحذر فوق بطنها، وكأنها تحاول حماية جنينها الذي تخشى عليه أكثر من نفسها. وإلى جوارها، كانت تجلس سعاد، تمنحها بعض الأمان بمجرد وجودها بالقرب منها.

فجأة، قطعت الصمتَ طرقاتٌ حازمة على الباب، لم ينتظر صاحبها ردًّا، بل فتحه ودلف إلى الغرفة، وعيناه مسلطتان على لينا ببرود قاتل.

ما إن رأته حتى انقبض قلبها، وتشابكت أصابعها المرتعشة في ثياب سعاد، مقتربة منها كأنها تحتمي بها من الخطر الذي يمثله وجوده.

لاحظ صابر حركتها، لكنه لم يُبدِ أي رد فعل، واكتفى بالوقوف في ثقة، واضعًا يديه في جيبيه، قبل أن يوجّه إلى سعاد نظرة آمرة حادة، مشيرًا بعينيه إلى رغبته في أن تتركهما وحدهما.

تأرجحت نظرات لينا بينهما بذعر، وازدادت قبضتها تمسكًا بسعاد، تتوسل إليها بعينيها ألا تتركها وحدها معه.

التفتت سعاد إليها، وحاولت أن تبث الطمأنينة في قلبها، فربتت على يديها المرتجفتين برفق وحنان، ثم منحتها نظرة دافئة توحي بأنها لن تبتعد عنها، قبل أن تسحب يدها برفق وتنهض لمغادرة الغرفة، مغلقة الباب خلفها.

مع صوت انغلاق الباب، شعرت لينا بالخوف ينهش أطرافها، لكنها حاولت بكل ما أوتيت من قوة أن تتماسك. رفعت رأسها لتواجهه بنظرات جامدة، محاولة إخفاء ارتجافها، بينما تقدم صابر خطوتين نحوها، واعتلت شفتيه ابتسامة لئيمة، ثم قال بنبرة هادئة ومستفزة:

********


تعليقات