رواية حجرة التهميش الفصل التاسع والثلاثون بقلم اساور حسين
﷽
شحجيلك مرات احس عيوني
انطفت كثر ما ابجيلك
⋆˚˖°⋆｡° ˖ ࣪ ⊹⋆.˚ ⋆˚˖°⋆｡° ˖ ࣪ ⊹⋆.˚
استوطنت الطلقة گلب اخوية وزرفته ومن ظهره طلعت نثرت دمه
على حياطين نثر وبالدقيقة نفسها شوخر اخوية وانگلبت عيونه
وبكل حيله على راسه طاح على كاشي انردم ردم مثل گلبي الراد
يطلع من جوا صدري بس الزمن والهوا وگفوا بي بنفس الدقيقة
عقلي فصل وبس صورته بعيوني وهو مطروح ينزف بالگاع يرفس
برجله وجمد جثة مطروحة اهتز جسمي وشهگت مثل المخبلة زحفت
والمسافة شطولها صارت بيني وبينه أمسح بوجهه واروح الرجله اريده يحركها وتمسكت بيده اريد اندل النبض رجفت ونبتت اظافري بوجهي
املخ بروحي ودرت وجهي على شيطان اللي جرعني المر وبثكل الساني صرخت
_ مات متعب كتلت اخوية مات ولك اخوية مات
رفعت راسه بحضني خليته امسح على وجهه المتعوب
طفل بعده طفل ما شاف يوم فرح بحياته جابها تعب
بتعب بست خده لحيته توها بلشت تتحدد دگيت على
راسي باثنين اديناتي ما مصدگه
_ ياعيون اختك يا متعب يا خوية عمت عيني عليك خوية
احير اشيل اخوية لو الطم لا بيه اوگف ولا بي اشرد
عقل براسي ما ظل بحرگه صرخت
_ اگعد ضمني منهم يا حبيبي لا تسد عينك
ولك متعب سودة بوجهي يمه لحگيلي
مات متعب مات اخوچ ولچ سكره مات اخوچ
ضربت راسي بالحايط اريد اموت روحي شلعت شعري تشلع
فاقدة على اخوية واحس ايد طاغية سحلتني من شعري وگع
راس اخوية من حضني نرگع بالكاع شمرني على حايط
وابني شمره على فراش بكل حيله خلاني اتسودن
خنگني من رگبتي گطع النفس رفست بيدي ورجلي املخ بي
وصريخ مختار يهدم الحيل من رادت تطلع روحي ما گدر يموتني
باخر ثانية شال ايده بس ما لحگت اجر النفس قبضها حيل ومثل
چيس ملاكمة يضرب بي بوكسات بأيديناته الثنين بلا رحمة كتلني
وگعت فاقدة من الضرب لا احرك ايد ولا رجل بس عيني
على ابن امي تجري دم مو بس دمع وقبل لا افقد انصب
فوگ راسي بطل ماي ثلچ خلاني افر براسي بس ما اگدر
اتحرك رفعني من ملابسي گعدني ودفعني على حايط ثبت
مرد وجهي بيده كفخني راشدي حتى اصحى يحاجيني بخبث
فائق : مو وكتها تموتين الموت رحمة ألچ واني ما اريد
ارحمچ يمين عظيم علي اذا ما اخليچ مخبلة كلشي ما افتهم
فر وجهي براشدي من انگلبت عيوني وكمل السم
فائق : فرفحت اخوچ مثل ما فرفحتيني وخليتيني
بحلگ الموت وحرگتي گلب اهلي علي ولچ ومثل المخبل
خليتيني افتر وراچ ادور چانت وابني وعيشتيني ايام
كفار خليتيني أكفر بديني انت لچ ما ارحمچ اقسم بالله
من هالساعه احرمچ من ابنچ مثل ما حرمتيني من ابني
چنها الدنيا طاحت على راسي من شفته ياخذ ابني وطلع من
الغرفة وقفل باب الغرفة بقيت بس أني واخوية جثة طايح جثة
اخوية مات يا عالم ابو ضحكة الحلوة اخوية مات وهو ما مرتاح
راح اللي جنت متأملة يتشافى واعيش وياه وأختنا بالباقي من
عمرنا ويلمني بيت مات اخوية مات
سحلت روحي سحل بصف جسمه وگعت على ايده بست ايده
وگعدت ما عندي حيل الطم على رجلي واصرخ مفجوعة بي
لتين : عشت وحدك ومتت وحدك لا عندك ام تبچي عليك
ولا تغطي طولك ولا اخو يشيعك ولا اب ياخذ بثارك
مسحت وجهه وبسته بين عيونه
_ بس عندك خوات راح تنعمي عيونهن عليك ولك متعب
تمنيتها حلم گطعت روحي حتى اصحى وطلعت صدگ بس
شيقنع عيوني خوية لو ادري هيچ تموت خوية والله چان
ما شردت وتحملت وبروحي فديتك عساني بمكانك عساني
ميته قبلك ولك حبيبي ولك متعب حاجيني ولك شلعت گلبي
تعلعلت تعلعل والف موته متت الثاني الصبح اتعمد يخليني
ويه جثته حتى اتخبل وفاز خبثهم وفقدت عقلي على اخوية
اندفر الباب وفات الشيطان وابني مو بيده ورفسه ثانية بين
ضلوعي ضربني كتم حتى النفسي ودخل زلمة وياه وجهه
مو غريبة حافظته رغم السنين اللي مرت
طاحت دموع الزلمة من شاف متعب وعاتب فائق
جساس : ليش تموته ليش خطية بعده صغير ليش
هزيت راسي اگطع بشعري من عرفت الوگف گدامي ابوية
من صوته على طيحتي فاكه عيني ما استوعبت ارجع اشوفه
هو بنظرة سريعة شافني ولا كأنما عرفني ساعدهم يرفعون
متعب چلبت بي اصرخ
لتين : وين تاخذون اخوية وين
ومثل المنتظر زلة هجم فائق علي فر ايدي ورگعني بالحايط
افترت الغرفة بي واخذوا جماعته اخوية كلهم طلع وراهم اسمعه يگول
فائق : تدفنون جثته بصحراء لو بمنطقة مگطوعة واذا
ماحصلت مكان مخفي احرگ جثته ورمادها اغسله
تهسترت عقل ماظل براسي زحفت على باب اصرخ وحتى
صوتي تجرح ارگع بالباب وايدي اطيح
لتين : ولك فائق الچلب اخوية ولك اخوية ادفنه الله اكبر
عليك يا ظالم الله ينتقم منك الله ياخذك ولك اخوية ماات
خلاهم يروحون ودفع باب الغرفة دخل علي انقبضت
روحي من شفت شكله ونظراته دفرني على رجلي ولف
شعري بين ايده يسحل بي مثل الذبيحة على طول البيت
احاول ارفع رجلي وتتزحلگ من سرعته لمحت تلفون متعب
على كاونتر وملابسة وفراشة بالگاع ونفاضة چگاير
طحت بين ايده منتهية على اخوية ، شمرني بالسيارة
وقبض ايده حيل اني بالسيارة وهو بصف الباب وگع
على راسي بوكسات ومن حلاة روحي احمي راسي
ويقبض اثنين اديناته من توجعه ايده يتناوب بيهن
بالضرب گطعني كل عظم صاحي ما ظل بي
غمضت فاقدة والساني يلهج بذكر اخوتي عاصرة روحي
بالكرسي واحس بروحي تريد تطلع من اتنفس
مشت السيآرة هواية واول ما وصلنا نزلني من السيارة يسحل
بي الشارع سحول وبكل خطوة يطعن شرفي بيها صعقني
من دخلني على مشتمل القديم بعين صلفة ما يهاب احد
وعلى صوته وصرخات الوجع تراكضوا اهله على مشتمل جرني من شعري ورفسني على ظهري فوتني البيت ورگع الباب بوجههم
وهم يصيحون بعلو صوتهم ما يرضون يموتوني مو حبا بي
بس يريدون ياخذني يكتلني بمكان ثاني بس مرته تصرخ
_ ما يموتها لا تخافون ابنكم يموت روحها وما يموتها
هو يعبد الگ*** ما صدگ لگاها ورجعها لهذا المشتمل الأگشرر
عتني من ملابسي شمرني للغرفة والبوب برا تتكسر
وهو شالني شمرني على چرباية يضرب بي وايده
تجر بملابسي ناوي يجردني حتى ملابسي تخبلت طار عقلي بعد ما يستوعبه بقيت ارفس بيدي ورجلي وشعر ما خليت علي گطعت روحي وهو يريد يشگهن ويلزم بي يحاول يتقربلي قبضت ايدي حيل وعلى وجهه ضربته وذبيت جسمي بكل ثگلي من فوك الچرباية للگاع على كوعي حسيت روحي طلعت وبمعجزة ردتلي
وهو جن جنونه افتر علي رجعت روحي على حايط
فتح ايده فر وجهي براشدي خلاني بمكاني ارافس
وطلع من الغرفة مستعجل من حس الباب وراح ينكسر
كضيت بداية ملابسي مگطعات بقيت ألطم على وجهي
سندت طولي اريد اطلع من المهجومة وشفت على تخم
والميز ملابسي القديمة بكل زاوية سحبت وحده بدلت
مالتي وجريت شال من الجرارة فرفحت تفرفح ماخليت
شي ما سندت علي طولي حتى أرل الهم ويشردوني
من عنده وكل عقلها مرته تصرخ
_ ولك خلت سيرتك على كل السان شهرتك وشردت
ويه زلمة وبقت ويا شهور بيت وحدهم وصلت روحك
للموت بس حتى ترجعها للمهجوم للمستمل تسودنت
ابو فائق : يتسودن يعني هو مو مسودن هذا كافر
ملحد عار ولكم راح يخليهم يذبحون كل اهله
وصلت للمطبخ گعدت وراه الباب اللي واگفين وراه
اضرب بي بالباقي من حيلي واستغيث
_ فائق كتل اخوية مات اخوية بشبابه على ايد ابنك
هو سمع صوتي وفتح الباب عصرني بين الباب والحايط
يمرد بظلوعي صرخت واخوته يسحبونه مني وهو مثل الثور
هاج يضرب ويدفع حتى بيهم يريدهم يروحون ويستفرد بي
من حلاة روحي ذبيت جسمي كله من عتبة الباب البرة
على رجلهم سحبني زمان وفر وجهي براشدي فرني فر
زمان : هاي على اهانة والضرب ودمي النزف بسببچ
عيني تعلگت على باب وهو يجر بي خلاني ورا ظهره يصرخ
فائق : ليوصل يمها ويضربها افرغ الشاجور براسة
ومرته بقباحة تصرخ ما ينكسر خاطرها علي حالي بيده
_ مو اگلك عمي رايدها الشغله لا ثار ولا زعل هسة
يطمط مصيبتها والدياحة والزلم ويرجع يسكن يمها
من بيناتهم خمشها من راسها ورگعه بالحايط اختل توازنها
وطاحت مكان الضربة يجري دم على عيونها تمنيت بيهم أدمي
يخاف الله ويحميني من اجرام ابنهم المريض بس كلها ترتعد
من صوته جرني منهم وشمرني بالبيت وقبل لا يقفل الباب صاح
_ اذا البآب يندگ بالسلاح اطلع عليكم أرميكم
ورگع الباب بوجههم الجامات انهزت وهاي الحيوانه تضرب بالباب
راد يطلع الها لو ما ابو يعرفه مختل عقلية ويسويها من صدگ يكتلها
جرجروها هو وامه الحيوانة وفوتوها للبيت
وصريخها ما هفت ولا صريخي يهفت ازحف وماعندي حيل
اركض جرني من شعري وشعري يوكع بين ايده فرفحت وادفع
بي مني النص الصالة دفره من دفراتي ضربت رجله فقد
السيطره وعلى ركباته طاح استغليت الوكت وعلى ركبي زحفت
وبالحايط تمسكت دخلت على مطبخ جريت سجينة وخليتها
على رگبتي وهو يركض يريد يلحگ علي بچيت بعلو صوتي وصحت
_ فكر اطخني فكر والله انتحرر اگطع انحر رگبتي والله
وهو صرخ بعالي حسه رافع ايده
فائق : لا لتين لاااا
قربت السجين وضغطتها اكثر على رگبتي وعطت
_ روح ليغاد مني وجهك الخايس وجهك ما اريد اشوفه
رفع ايده مستسلم ويرجع ليوره واني اتقرب من باب المطبخ
حتى اشرد وهو يصرخ بالباقي بصوته من الرهبة
_ هاي بعيد عليچ بعيد لا تذبحين روحچ بس شيليها
من رگبتچ شيليها
ضغطت اكثر على رگبتي وصرت بزاوية المطبخ حتى لا يلزمني
واشرت على باب
لتين ؛ افتح الباب يا قندرة يا حيوان يا ابن الحيوان
موتت اخوية الله ينتقم منك
شخطت بداية رگبتي واخس بعقلي شخط وكل جسمي ينفض
والدم يسيل من الجرح على ملابسي يقطر وهو فتح باب المطبخ
اهله صاروا مقابيلي شافوا بحالته المنهارة من خوفه
لتين : روح منا روح غاد عني ولي
شمرت بيدي حتى يبتعد وهو طلع من المشتمل وگف بالباب
بين المشتمل وبيت أهله واني حالي يبچي العدو حتى شال
ما ظل على راسي وبس الدشداشة ساترة جسمي شردت
عبرت باب المشتمل وشردت من طغيانه واني اتلفت اسند
روحي على حياطين اريد اعبر بيتهم وتفكيري جامد ماعرف
افكر ومنظر متعب يتراوالي مستحوذ عقلي ، بعدني بداية
الفرع وانضربت ضربة قوية على راسي فقدتني الوعي
بلحظتها وغبت من الدنيا كلها وظلمها
خيبر ..
بوسط المستشفى واصوات الأجهزة تتردد بمسامعي ايدي
على راسي افتر بالممر بعد ماخلصت كل الأماكن الأدور بيها
وحتى دوريات النجدة تعبوا من عنوان العنوان ننتقل ومن بعد
تعب هاي دخلتي منتظر صاحب عمري يصحى ويرجع بحيله
الخسره فتت على طوارئ لگيت امه وابو واطياف گاعدين
وجفونهم من البچي مورمات رجعوا النقطة الصفر ما بي
يرفع راسه ظل فاقد لا يحرك ايد ولا رجل هذا اليوم الثاني
سلمت عليهم ومحترگ گلبي على أطياف تفرك بيده
ورجله هو نايم وابو وجهه مصفر گتله
خيبر : بشر ما گعد ؟
كميل : فتح عيونه شرب ماي وظل يفر براسه مختنگ
خيبر : بعده ظلوعه ما طايبات ورايح هناك متعارك
حجيتها وگفت بصفه عدلت المخده ودمرني حاله بالزايد
وعمي كميل يشكيلي
كميل: والله بوكسات يتعارك ولا عبالك مسوي حادث
دمر نفسه وصحته شلون چان آلسنة الفاتت هيچ وكت
مؤتمرات وسفر ونسه ودراجته ومآخذ الدنيا بحيله
هسة حتى حيل يشرب ماي ضيع روحه شلون بي
بكل ثقة كملت على كلامه تگلي
سامية : من يوم شاف وجه الشؤم كافل انتهى
خيبر : وراح يظل منتهي الحد ما ياخذها
كميل : اگلك حلوة هاي ياخذها غير سافرنا
وطردونااا لگاها مخطوبة شهر الجاي عرسها
شلون بالله ناخذها من خطيبها ونزوجها الكافل
هي سافرت بعد وشافت عيشة خوالها قصور
وعماير ومعامل وذهب ودلال مخليها بعيونهم
وين تعترف بكافل وحياتها بالعراق انتم هم
بطرانيين الله وكيلك گدامنا طردته مرتين
سكتنا من هز راسه مختنك حط جهاز الأوكسجين بوجهه
حتى يتنفس طبيعي ظل يفر راسه وعيونه من الضغط
واخاف لا سمع بس صبت دمعه ونزلت على اذنه مسحتها
والتفتت على سرگال فات وراه شعيب لابس ملابس دراجته
ونزل عليه كميل دوسه ونص يخاف لا يسوي حادث مثل كافل
وهذا من نوع حجي ما يعجبة يظل ساكت ما يتجاوب وهمه
يعرفون بي بحيث هز ايده كميل وعافه
سرگال : شعليها الدراجة ابنك عاشگ ومو بعقله
بعده يحچي وفاتوا ابو وامه مبين جايين وياه سلموا وگعدوا
سرگال : كافل تسمعني اگعد ولك ما مبقين منوم لا مسكن ما مشربيك
وهو يسمعه ماعرف يفتهم يركز ما يركز يون ويرده
كافل : همممم
سرگال : عذبوك اهلك ؟
كافل : اممممم
سامية : بعيوننا مخلي وتعرفون كلش زين ما مقصرين
كميل : لا تهمين الكلام هذا الأرعن
سرگال : شيسوي بدلالك ابنچ طالب تزاوج
شعيب: ههههههه شنو عتوي
سرگال : كافل تسمعني انت مو طالب تزاوج
كافل : اي
حجاها يجر بيها وشعيب يرافس برجله وسامية عيونها بهامتها
صارت وكميل يرزل بي وعود يهتم يتقرب يهزه من اجتافه يگله
سرگال : فلافل تريد ثعلبتك
هز راسه هنا وهناك مثل المختنگ يلوب مفرفح يهمس
كافل : أييييي
خيبر : كافي يمعود الزلمة تعبان ونايم دعوفه مو بوعيه
اغمزله اجر بي عيب يمعود من اهله ولا يهتم ناوي عليهم
ام سرگال : منو ثعلبته
سرگال : دجى راعد ال هماس بنت المصرية
سامية : والله اتعجب انت ابن سردال وهناء
سماوي تنگط سموم
سرگال : بحظچ وبختچ اني سماوي
سامية : كون عندي حظ وبخت وأشور بيك
سركال : مثل ما شورت بيچ دجى وخلتچ مجلوطة وبنتچ
طرحت وابنچ بحلگ الموت لا ما اظن عندچ هيچ حظ
سامية : هناء سكتي ابنچ مني
سرگال : اني متعجب انضربتي جلطة ورجعتي بحيلچ
وطگين بالكعب شو غيرچ ينضربون جلطة بالفتحة
السادسة يشمروهم
سردال : سرگال تسكت لو اجي حظك اطيحه
سامية : شمسويتلك ولك وتريدني اموت
سرگال : نريد نتزوج نعيش حياتنا واگفه مثل العظم بالزردوم
سامية : تزوجوا شعلي دعوة بيكم بس كون زواجات
بيها خير من مقامكم ومستواكم تاخذون
سردال : ان شاء الله يعقل وياخذ الحان بنت عمه تناسبه
هناء : نفس دزاينك وشخصيتك تتوالمون
سرگال : دگها ومدگوگها اخذ ألحان والعباس ابو فاضل
يا سامية من بناتچ ما اخذ مره هسة لو اظل عمري كله عزابي
سامية : تروحلهن فدوة بنات عز شناقصهن
كميل : رجع يلوف بحلگه يريد اكسر سنونه
سرگال : عمي مع احتراماتي لبناتك بس اعتبرهن خواتي
غير رابين سوية واني احب گلبي ماخذ قراره ومستقر
التفت على اطياف مقهور بس ما يبين گال الها
سركال : طيوفه لا تزعلين مني ترا ما اقصد استنقص
منچ ومن البنات بس هذولي يطلعون اسوء شخصية
بي هسة اگول الهم خواتي ما يقتنعون هاي صار
سنين على هذا الموال
اطياف :مو وكته هالكلام هسة اخوية حالته خطرة
قاطعها سردال ورفع صوته
_ والله بوية غير بنت عمك ما اخذلك والبنية صارلها
سنين صابره عليك ورايدتك لأن حجينا بيها
سرگال : هاي گدام امها وابوها وگدامكم غير الهاويها
گلبي ما اتزوج وما تصيرلي غيرها ام بيت
سامية : وياهي بالله الهاويها بس لا البالي وبالك
سرگال : وغيرها براسي وبگلبي ما يصير لو تمر سنين
ضحكت مستهزئه بس الشر ترس عينها
سامية : ابشرچ هناء ابنچ هم رايد هامش والمصيبة
العظمى الثانية رسمي بنت زنا اهل ماعدها واخ
يتعاطى واهل حرامية
سرگال : شلها غرض بأهلها البنية كبرت گدام عيوني
وبحمايتي وابنچ وانت شاهدين على اخلاقها ينرفع
بيها الراس بنية جمال وأدب واخلاق غير عاشگها
هذا السم مالتچ اذا فاد ويه ابنچ مايفيد وياي
سردال : على گطع الرگبة ما اخذها
سركال : لا تاخذها أني اخذها بطريقتي
ضحكت سامية وبقت تتغامز هي وام سرگال وگف يعدل
بالبنطلون ومبتسم واقترب منها وبشر تارس عيونه وصوته بلغها
سرگال: نصيحة لا تحاولين تأذيها اني بلغتكم حتى
تعرفون راح اخذها البنية وحق ابو راس الحار وچفوفه
يا سامية ويا اهلي فرد فرد اذا اصبع من اصابعها
انشخط والسبب منكم ألبس حزام ناسف واعزمكم
بفرد مكان افجركم
وگفوا على راسه ابو وعمه يتصايحون وهو يعارك بيهم يگلهم
اريد اتزوج الى متى معلگ البنية وباقي اصبر تعبت وامه تصيح
على موتي وابو يگله اذبحك اذا تاخذها وسامية ما خلت كلمة
مسمومة على البنية وتعجبت منين عرفت حقيقة اهلها وادمان
متعب وظل سرگال يترادد ويتوعد ويحلف ياخذها وختمها وياهم
من صاح
سركال : نذر علي وبرگبتي البنية اخذها وافوتها بيتي
ومن ثاني يوم العرس اخلي فرقة الأعراس اسبوع كامل
كل يوميه تجي ادگ وترگص وتعزف گبال بيتي يا سامية
كميل: تجاوزت كل الحدود لا تحترم ولا تهاب بشر ابوك
وعمك هنا وتهدد وتصيح على مرتي سامية
سرگال: غير اسمها سامية اصغر بيها چا تريدني اصيحها سماوية
گلبي وجعني على طول انتظاري ورن الجهاز ومن قريت
الأسم رف گلبي مثل الطير وضايع وحصل درب عش اهله
كاتب " زوجة القندرة " المقصد زوجة فائق مشيت
للممر جاوبتها وگلبي علم راح اسمع خبر اجاني صوتها تصيح
_ لتين بالمشتمل جابها هسة گطعها من الكتل
وهسة ضربها على راسها فاقدة شمرها ميتة بالبيت
انخبصت خبص اروح وارد استفسرها
خيبر : نفس العنوان ومختار وياها ؟
على صوتي طلعوا الولد يتراكضون وراي ومن عرفت
جايبها وحدها مختار ماكو شبت بگلبي النار وركضت
ركبت السيارة والولد بنفس سيارتي صعدوا عرفوا لگيتها
طفيت التلفون اسوق بكل ماعندي سرعة وشعيب يخابر
على جماعته بالدولة يدزولنا دورية ورجع رقمها يخابر جاوبتها
_ ألحگ عليها شرد من المشتمل راح يستفرد بيها سمعته
يتفق هو وصديقة اخذها على عنوان بيت بصف سوگ
ال**** نهاية الشارع
فريت السيارة وعلى عنوان وصلوا النجدة ويانا سحبت السلاح
مالتي مرخص من خاصرتي نزلت اريد اشوفها بعيوني ما اگدر
خايف عليها يرجع مشهد موت امي ينعاد بعقلي ضيق صدري
وگفت اريد ادفر الباب والنجدة تأشر اصبر بس لو الصبر اشتري
اسويها انرگع بالحايط دخلنا كلنا وطبات خطواتنا ادگ بگلبي
ركض مبهوت طلع مخلوس خلس بوجهي وگف ايده كلها دم وراسه
مطبو يجري دم وعيونه تنگلب سحلوا شعيب وسرگال بالكراج ذبوا
بالكاع واثنينهم سرگال على رجله گعد شوهه وجهه بوكسات وشعيب
يدفر برجله ضلوعه هدمهن والنجدة وياهم يسحلون ويضربون بي
حتى مكافحة شعيب مجهز علي گطعوا تگطع
ثگلت والخطوات الها چني بممر كل ما امشي يطول اكثر
دخلت البيت اصيح بأسمها ماكو حسها اضرب بالبوب
وافر براسي وعلى اخر غرفة وصلت اني دفعت بابها
وحيلي باد حسيت بسگف البيت يوگع على راسي
غمضت ودرت ظهري عليها من شفتها بلا ملابس
وجسمها من الضرب متزورگ ضربت على راسي تخبلت
وطبگت الباب عقل ما ظل براسي ركضت والولد
يريدون يفوتون صحت بيهم منعتهم وسرعت مشيتي
عيني بعد ما اشوف بيها غير باب المدخل وگفت بي
وشفت العار ابن العار مقابيلي جريت السلاح سحبت
اقسام وايدي رفعتها ضربته طلقة بنص صدره وهجمت
علي بالسلاح اضرب ودمي يفور يجرون بي واني اريد
افترسه دفرته برجلي وضربته طلقة ثانية بچف ايده القذرة
وكلها تسحب بي صحت بحرگت گلب
خيبر : موتك على ايدي نهايتك اني اكتبهااا يا عااارر
دفعت الولد وياهم جماعتهم ورديت اشوفها وعيوني تحرگني
گلبي يدگ مثل دفوف وطاح بيد الغجر يترادم مرادم بصدري
غمضت ومشيت الها گلبي ينمرد وهي فاقدة ملابسها مطشرات
وشعرها مگطع ودم راسها تارس المخده جريت بطانيه وذبيتها
عليها وجسمي ينفض نفض لفيتها لف حتى راسها غطيته ومثل
الطلقة طاحت بصدري من بجت خايفة مني وهي بيدي تگلي
لتين : ضربته والله ضربته لا تعوفني ما خليته يوصلني
حضنتها حيل ودموعي غصب نزلت على خدي نشغت
لتين : مات متعب مات اخوية كتله فائق
لميتها لم استر بيها وركضت بيها والولد فتحوا السيارة صعدتها
وصعدت بصفها وشغل سرگال السيارة للمستشفى توجه فقدت
خيبر :يولد متعب ميت بلغ بي شعيب انطي خبر الجماعتك
سرگال : لا حول الله صدگ تحجي منين عرفت
بلغته لتين گالت ظل مصدوم وشعيب يخابر بجماعته يبلغهم
وهذاك الجلب نقلوا للمستشفى وسمعت شعيب يتفق وياهم
الطلقه جانت بسبب اشتباك بين فائق والقوات اضطروا يضربون
الچلب لان يرمي عليهم وگعت بي طلقة اثناء الأشتباك حتى اطلع منها
استقبلونا الطوارئ اخذوها مني جسد متشوهه وروح
سحب النفس صعب عليها بقيت برا افتر واتأكد هذا
الچلب هالمرة مايطلع منها مثل قبل شعيب دزيته على
جماعته وسرگال ظل يمي من طلعت الممرضة گالت گعدت
فشلت بيا وجهه اروحلها وهمه اخذوها من نص بيتي وهي
بحمايتي ومقهور الوگعهاا اخوها مو غريب اخذها
خطوة تثگل خطوة وثبتت بصف فراشها مديت ايدي
گضيت ايدها وهي فزت مثل النايم وصبوا على راسه
ماي بارد مخلوسة تبچي على اخوها وخايفة مني
اقتربت اكثر وگعدت بصفها على سرير حضنت
ايدها بين چف ايدي وهمست وضعت ببحر همومها
خيبر : خليني يمچ
لتين : ابني مختار ابني عنده الحقير عنده
ومتعب دفن اخوية بصحراء وابوية مشاركم الدفن
ومن الوجع وجروح جسمها تشوغ روحها وتفقد الوعي
أسرار...
كفشت راسي من ضغط خواتي احجيلهن بالتفصيل الصار
بالسفر ويرجعن يعلقن شكله لون بشرتها صوتها حلو وبس
اطياف ترجع من المستشفى يسكتن مني ، لليل اندگ الباب
ورجعوا اهلي كلهم واولهم كافل دخل حضنته حيل وبقيت
راسي على صدره وأمشي للأستقبال فاتوا البنات كلهن
يسلمن علي والحان بصفه بقت گاعدة على تخم وتلفونه
رن من ود عرفته شعيب وبلغه بخبر موت ولد يعرفونه
بحيث اني وابوية من سمعوا انقهروا هواية علي
ظل هو وابوية بالأستقبال وامي غمزت النا نصعد حتى
ما يدوخ ركظوا البنات بس اني رحت على ثلاجة اخذت
نستلة وصعدت وياهن بقيت على درج اراقبهم واتمنى
اسمع سوالفهم تأخر الوكت ولمحت كافل يمشي بصعوبة
صعد فوك واني ختلت مر من الغرفة غرفة بعد غرفة
عافهن كلهن وفتح غرفة اطياف دخل بيها وهي ترحب
بي عاف الباب مفتوح ونزل بكل طوله وحيله نام على
رجله فوك چربايتها تمسح على راسه
اقتربت من الباب وهي گنفصت جني فارة استمع الكلامهم
اسمعه يحچي على الشغل والأهمال الصاير بي وهي ساكته
ومن اجت حجت سألته صدگ رفضتك ذب حسرة وبررها
كافل : طيف وغلاتچ هي رايدتني مثل ما اني رايدها
بس هي يعجبني بيها واعية تخلي تفكيرها يقودها
مو مشاعرها شافت من كلام امي والمشاكل رجعتنا
بيها اذيه عاندت ما ترجع وأعذرها
اطياف : ليش ما قدرت انت مسوي عميلة
_ ما عدها علم بالحادث واستصعب ابلغها من
خابرتني تريدني اجيها بطريقي الها سويت
الحادث وغبت عليها لو شايفتها شلون ماخذه
مني موقف
اطياف : ما شرحت وضعك وصلت للموت انت وبعدك
كافل : ولا حرف حجيت خرب روح عصبيتي بقيت اسب
ودمي محروگ وخليها تحقد بالزايد ظلت تعاند بي
ضحكت اطياف تگله
_ شفتها حلوة ضيعتك بجمالها
_ فورت دمي حرگتني حرگ العنودية
_ اسرار وصفتها النا وعجبتني حيل شحالك انت
_ حالي رايدها واظل متمسك غصبا على راسها اخذها
على اطراف اصابعي رجعت للغرفة شفت رقم غريب كاتب
" افتحي شباك البالكون " استغربت ودخلت غرفة كافل
على بالكون وگلبي يخفگ بكل سرعته يدگ حتى براسي
فتحت باب البالكون أريد أتأكد من شكوكي فكيته وكبوس
التراك خليته على راسي وافتربت على حافة الشباك وتلفوني
رن من شفت الشارع فارغ جاوبت على مكالمة بصوت هامس
_ انت منو ومنين جبت رقمي
نزل من السيارة واني ارتديت على حايط وشهگت
قائم : حبة حبة يا بنت لا تتعوري تقربي سبيني
أملي عينيه في الحلاوة دي
تقربت رفعت اصابيعي ولميتهن مسحت بيهن حنچي
وانوب هزيت ايدي گتله بالتلفون
اسرار : بسيطة اوگف بمكانك اصيحلك اخوية يملي
عينك حصو يا حصوة يا ابن الحصوة
ضحك واسنانه بانت من بعيد وهو يأشر اصبر يگلي
قائم : أنا عارف اللي بعملوا غلط بس والله عاوزك
وموقفني عنك كلمة بس عشان قررت اخطبك
اسرار : انوب علينا المصريين خايب حتى ما احبكم
ولا افتهم عليكم امشي من وجهي لا اخابر ولد عمي
عليك واصيح اخوية وابوية يضربوك
تقرب من البيت اكثر ورافعلي راسه صافن بي
قائم : عارف إن مقامي مش عاجبك، بس قلبي ملوش كبير
من يوم ما شافك وأنت مش بتفرقي راسي بفكر فيكي
يا بنت الناس، ونظرة رضا منك بتسوى الدنيا وما فيها
اسرار : كملت افلام عادل أمام يلة ارجع على بيتكم بمصر
قائم : تقبلي تتجوزيني يا بنت ؟
تخربط حالي وتعالت دگات گلبي بنظرات عيونه هزيت راسي لا
اسرار : والله العظيم راح اصيح اخوية
كبر ابتسامته وهز رأسه وحجه بالتليفون بنبرة كلها ثقة
_ اخوكي ومين تاني؟ يا بنتي أنا لو خفت من إخوكي
وولاد عمامك ما كنتش وقفت الوقفة دي تحت شباكك اندهي
للي تندهيلو والله انا مش هتحرك من مكاني إلا وأنا سامع
منك جوابك
قررت انهيها وياه من الأخير ورديته باللي مقتنعه بي
اسرار : اني عراقية غير ولدنا العراقيين ما اتزوج
قائم : بكرة هخليكي تدوبي بالمصري
اسرار : الله يبعدنا عنكم
قائم : وربنا عنادك ده اللي هيموتني فيكي زيادة
درت وجهي على باب وصحت
_ كافل بابا تعالوووا لهذا الفاطس
قائم : خليهم يجوا يشوفوا الراجل اللي هيخطف قلب
بنتهم غصب عنهم كلهم
اسرار : شگد بلا اخلاق تقبلها على اختك يا عديم
التربية والحياء دروح منا لا تشوفنا امي تنتحر بيك وبي
سديت الخط بوجهه وسويتله حضر من كل مكان ممكن
يگدر يتواصل وياي بي ودخلت اني اسد الباب وشفت
ألحان وافنان بيدهن علاگة اكل طالبات ركضت فتت
وياهن للغرفة اريد اكل والخبيثة حنايه ما تخليني
لان ما شاركت بالفلوس وگفت بالباب غميتها وصحت
_ امداچ منين اجيب فلوس ابوگ محد ينطيني
ودخلت على غرفتي شفت اسرار متمدده وبيدها تلفونها
تسمع اغاني من تجيت بصفها ذبت السماعة
اسرار : شبيچ مو على بعضچ
_ ملاحظة خيبر صار فترة ماينشر ستوريات
مثل قبل چان كل يومية من يروح للدوام يطگ
صورة للچاي بالمكتب ومرات للريوگ واذا طلعوا
الظهر هو وكافل والولد ينشر نفسه صار شهر
اختفى فرد خفيه حتى من يجي عدنا ما يطول
مستعجل
اسرار : احچيلچ بس لا تنقهرين وتفكرين غلط
تربعت وگعدت مقابيلي بكل اهتمام تستمع همست
_ من سافرنا سمعت من امي وابوية يحچون
على اساس عنده دخيلة معيشها وياه بالبيت
تصير اخت البنية اللي يحبها سرگال شارده
من زوجها وعدها طفل وحسب ما سمعت اكثرر
خيبر متعلق بالطفل وابوية بلغ امي تشوف حل
وتبعدها عن خيبر وامچ ما تقصر راح اطفشها
اسراء : بنية عايشة وياه بيت واحد وحدهم
هزيت الها راسي وامي من جوا عاطت بي عيطه خلتني
اعوفها وانزل ركض جرتني من تراكي وشوفتني المطبخ
هوسته ليگول عدنا عزيمة
اسرار : صيحي باقي بناتچ يساعدني ما اشتغل
عدكم خدامة
عاطت على بنات نزلت افنان نگت المواعين وهمست
_ ترا وعلي اتزوج مصري واخلي يجيبلي شغاله
رفعت ايدها غمتني وراحت للغرفة خطية امي متعقدة من المصريين
سكرة...
بعزلتي الروحي وگلبي المقبوض واحساسي اللي عمره ما خاب
حسيت نفسي اختنگ خنگ وكارهه كلشي واسمع رونق تتهامس
هي ومنارة الليلة استاذ سرگال بات بالدار ومو عوايده يظل هنا
تقوقعت على نفسي الثاني يوم الصبح اجتني رونق گالت
_ الأساتذة تلاثتهم جوا يريدون تنزلين بالأسم طلبوا
تعاجزت وتراجعت كذا مرة انزل الهم لأن اعرفها رونق تغدرني
وتوصلني السرگال واني ابد ما مستعدة اتجادل وياه بس
من عرفت استاذ كافل صدك موجود استسلمت الأمر الواقع
ونزلت وبنص الطريق ومن دگيت الباب وفتحته وشفت استاذ
كافل گاعد على مكتب وسرگال منتظر بصف الباب وخيبر
على كرسي لازم راسه هو شافني واستقام واشر ادخل
اتقربت على كرسي بمكان خيبر كعدت ظلوا واحد يباوع
بوجهه الثاني ويأشرون بينهم لزمت گلبي والقلق زاد بيه همست
_ ما مسويه شي والقران
جر سرگال الكرسي وبصفي تقرب واستاذ كافل افتر واجه
مقابيل الكرسي مالتي گعد يفرك بيده وانفتح الباب دخلت
مدربة الخياطة وست امل وياهن كلثوم وجوههن ما تتفسر
وراهن دخل شعيب طبگ الباب بقيت بالوجوه صافنه بس
سلبوني كل طاقتي وجسمي ظل يرجف من الرهبة گلبي
يعلمني وسألت على اكثر اثنين روحي صايرة بيهم
سكرة : متعب ولتين بيهم شي
مسح استاذ كافل وجهه وعدل گعدته گال
كافل : تعرفين معتبرچ مو بنية وكبرت بالدار مكانتچ
عندي اكبر والله العظيم بمقام اخت واريدچ تخليني
اخ يكفلچ ويحميچ وتعرفين اني وياچ دوم
جاوبته وصوتي حجر بعد ما ينسمع والحروف تتگطع
سكرة : الله شاهد معتبرتكم اهلي بس شصاير
كافل : اخوچ متعب..
سكرة : اجه يشوفني
كافل : شدي حيلچ وخلي إيمانك بالله چبير
الموت حق متعب مات
حسيت المكان كله جمد وصوت وشوشه بأذني اظافري برجلي
نبتتهن مو حاسه لزمت وجهي بأيد ترجف رجيف اهز براسي
وگفت مثل المخبلة خانتني رجلي ورجليه ماتت طحت لطمت
على وجهي ارگع براسي والمدربات يلزمني عطت
سكرة : لا فدوة الله يخليكم ماعندي غيره گولوا جذب
اخوية ما يعوفني لاااا متعب اريد متعب ما يموت
ما يكسررر ظهررري ولك متعب لااااا
والأساتذة ادير وجهه مني ما متحملين عطت وعيني على خيبر
سكرة : گتلي يتعالج وبالمستشفى وصيتكم عليه
ماعدنا احد غيركم مو وصيتكم عينكم على اخوية
طفل والله بعده صغيررر والله ما شاف شي من الدنيا
حضنتني باجي كلثوم تبجي بعلو صوتها
_ خلي يرتاح تعذب من هالدنيا راح عند رب رحيم
ملخت وجهي گطعت روحي وصوتي انبح من الصريخ
_ اريد اخوية طاگ گلبي علي جنت منتظرة يجيني
وياهذني حلفلي راح نعيش بيت تعب سودة علية
تعب وام فلوس واجر بيت وعشت وياه وما تهنيت
اخذوا مني وهسة مات تگلولون وبعد ما يرجع ولا
اشوفه سودة بوجهي ما اصدگ يعوفني اريد اشوفه
ضربت راسي بالحايط ويسحبن بي وسرگال وگف بوجهي
_ سكرة يمچ كلنا وياچ ما نعوفچ والله
لطمت على وجهي وصرخت وفرفحت تفرفح مثل الطفل واخذوا امه
_ اريد اخوية ما اريد غيررره شوفوني اخواني يا عالم
خيبر ...
حالها يشبه حال اختها والتمت علينا من كل صوب مصيبة
بعدنا نحاول نصبرها ورن تلفون كافل لمحت المتصل مكتوب
"خالها كريم رقم مصر " تخردل وضعه انخبص وعافنا
وراح للممر مشيت وراه ايده رجفت قبل لا يفتح خط همس
_ اخاف بيها شي
اشرت على تلفون يرد وطمنته
خيبر : يمكن تبچي عليك تريدك
كافل : كون صدگ هسة احجز وباجر اروحلها
جاوب وهو قلق يمشي بالممر اشرت يفتح صوت حتى اسمع
بعد السلام بيناتهم استمع اكثر يگله
كريم : جيتك وعشمان فيك أنا طالب فزعتك معانا وماليش
غيرك في العراق استنجد فيه والرجالة بتبان في وقت المحنه
كافل : دجى بيها شي
كريم : لا مفيهاش حاجة هي قدامي دلوقتي وطلبت
مني أتصل فيك وابلغك وقالت انك مس هتقصر
كافل : يابا أمرونا شعدكم
كريم : من يومين بعثت قائم وابني أوسر على العراق
علشان املاك دجى بعد ما سمعنا انهم رجعوا على بيت
وعلى عمارة وبياخذوا من المستأجرين مبالغ الأيجار
وراعد واهلو لعبوا لعبة وسخة معاهم واحتجزوهم
هتقدر تساعدهم
كافل : عنوانهم
كريم : بمنطقة *** في بيت امها القديم فرع ال***
كافل : تمام وصلت ساعتين بالزايد تلاثة وتسمع الخبر
تشكر من عنده وكافل غلق الخط عيونه طبگها بهامته لزمته
من ايده جر ايده صحت وراه
_ شبيك
_ خرب روحها تستحسف تسلم علي
من الباب صاح على شعيب وسرگال بلغهم بالموضوع وتجهزنا
بس سرگال ظل تفكيرة بالدار واحتار شلون يعوف سكرة خليناها
امانة عد البنات والمدربات وطلعنا مستعجلين بالسيارة ودرت الكافل
خيبر : مرتي بالبيت عفتها وحدها وگلبي ما ينطيني
اخليك وحدك اذا تسمح وحدة من أخواتك تطل يمها
كافل : يتم هسة اخابرهم وناخذ وحدة لمرتك
توجهت على بيت اهله فات وحده خمس دقايق وطلع هو واسراء
نزلني من السياقة وهو ظل يسوق وگعدها بالصدر واحنا ليوره
خيبر : راح اتعبچ وياي خوية اسراء
اسراء : ما بيناتنا تعب احنا أهل
وصلت للبيت نزلت وهي وراي وكافل ويانا من دخلنا فات
على استقبال ينتظرنا واخذت اسراء على غرفة النوم فتحت
بابها لگيتها بعدها نايمة وحالتها تقبض گلبي تعصره عصر
وما ترضى تظل بالمستشفى تخاف اضطريت اخليها بالبيت
شفتها نازله من المخدة اقتربت منها عدلتها وبلغت اسراء
خيبر : امانة الله لتين يمچ خليها بعيونچ لا تغفلين
عنها تعبانة وتروح تسوي شي بروحها اخوها مات
ونفسيتها تعبانة
ماسمعت جوابها رفعت عيوني لگيتها تنظر ألها وعيونها
تلالي بالدموع وايدها تنفض من الرجفة مقهورة يمكن
من سمعت اخوها مات والغصة بلعومها خنگتها ما تگدر
تحچي بس تهز براسها خليتها وعلمتها على علاجات
وخليتها تقفل الباب ورانا ما تفتحهن وطلعنا اني والولد
بين دروب الطرق دورنا وجماعة شعيب ورانا بسيارتهم
مقابيل ابو محل طبگنا سألنا على بيت بالأسم اشر من بعيد
على بيت 150 متر عملاق دنگ سرگال مركز يگول
سرگال: هذا بيتهم الصغير لك كافل سالفتك صعبة
خوية يرادلك تحفر وطلع فلوسك المدفونه صار سنين
كافل : وادفنك بمكانهن اخلص العالم من شرك
سرگال : تخلص امك من شري
شعيب : ولكم كفوله لوله حصل وحده غنية هو هذا
الورث الزين چا مثل حظنا صبر صبر وحصل كنز
كلنا نحچي وهو ساكت احس بگلبه يگلهم شلون الكنز رايدني
هز ايده ما عاجبة ونزل من السيارة قبلنا باوع على بيت وراح
يتمشى على ربع شعيب يحچي وياهم ونصهم تقربوا على
سياراتنا خفضوا روسهم على مكان شعيب يگله
_ ما يكتلوهم هذولي رايدين بخوفون اهلهم عليهم
الثاني يكمل على كلام صاحبة
_ شافوهم غربة بيناتنا وفگور حتى مكان ماعدهم
يضموهم بي مخليهم
_ نفوت عليهم قبلكم انتم ورانا لان بيدنا أسلحة
نزل طبطب على اچتاف صاحبة وراحوا على كافل يگلهم
شعيب: شوفوا شنو يريد كافل وبظهره كون يلگاكم
كون تسووها نهاية العالم عليهم
اتفقنا والأسلحة جهزناها كلنا بأيدنا بحكم شغلنا بالدار
وللحماية كل واحد من عدنا عنده سلاح مرخص ومسموح
نستخدمه دفع كافل الباب وياه جماعة شعيب وسرگال بظهره
دفرت برجلي الأستقبال دخلنا وجبتين نص كافل وشعيب
من المطبخ اني وسرگال وباقي الشباب من الأستقبال
گابلنا تواب نايم بالصالة بنص البيت وما اشوفه غير
كافل هجم علي دفره بخاصرته خلاه بلحظتها يستفرغ
ونزل رفعه يضرب براسه كلات اختل توازنه وشمره بالگاع
_ وين المصريين
عاند ما يحچي قبض على ركبته يمرد بيها عصره عصر
بالحايط يخنگ بي خنگ بكل ما عنده من قوة يقبض بيده
ويضرب بطنه وفلش راسه بالحايط جريته من عنده وهو
أسر على فوك واشوف بحر وضرار نزلوا كمزوا من فوگ
المحجر ليگول قروده فريته من ياخته ضربته براسي كلات
على خشمه والولد ويانا سحبوا مني خلبت وصعدت ورا
كافل وخليتهم بيد سرگال وشعيب نعنعوهم تنعنع بالكتل
فتحنا باب باب فارغات فوك وعلى طابق الثالث صعدنا
غرفتين وحده مفتوحة والثانية مقفولة دگ كافل الباب وصاح
_ قائم هنا انتم تسمعوني
ضربات خفيفه ونين رن مسامعنا بدقيقتها اشر اكسر الباب
هو برجله واني بچتفي ادفع بي الحد ما طگ ودخلنا عليهم
الوجوه خريطة صايرة توجه كافل يفتح بقائم واني بأوسر
والتفتتا على صياح زلم اعدادهم مو شوية نزلت بايات الدرج
وتفاجأت بشيوخ ال هماس متسطرين فازعين التواب وبحر
وضرار مسانديهم على اغلاطهم ما قابلين شلون يتجردون
وينطردون من بيوتهم من ورا بنية ولا عبالك حقها وبيوتها
ردينا للغرفة سندنا الولد وگفناهم وكافل ينزل بقائم وبنص
الشيوخ فات صعده بالسيارة ورجع علينا حاصرونا يصيحون
ولدنا يدافعون والمنطقة التمت علينا وأوسر يصيح
_ ده مش بيتهن احنا وصلنا البيت لقيناهم كاسرين
قفل الباب وداخلين البيت لما شافونا دخلنا عليهم ربطونا
فكرهم هيهددوهم فينا علشان يرجعوا البيت والورث ورث
البنت ومش عاوزه تسكن هل كلاب في بيتها
والتفت على كافل يأشر علي ويبلغهم
أوسر : وهذا جوزها ما بيرضى حد يعيش براس مراتو
هو قدامكم واسألوا كافل بترضى تكلم معاهم
رفعله كافل حاجبة خازره يحچي وكاتم ابتسامة الفرح من شافه
وغصبا عليه اعترف هو زوجها بوده يگله غصبا عليك وعلى اهلك
كافل : كلام المصري عين العقل اريد ابيعهن
بحر : بكيفك تبيع
كافل : طبعا بكيفي وبكيف زوجتي حلالها ومالها
ضرار : بحلگك حلالها ومالها يصير شفتها كنز وحدها
فرفشت راح تاكلها لحم فاطس وتاخذ حالها ومالها
كافل : بيني وبينها نفس ما اسمعلك لا ادحس قندرتي بحلگك
ادافع هو وكافل والشيوخ يسحبون بيهم وسرگال
يكفخ ضرار على راسه غفل منهم والثاني يصرخ
بحر : خابروها شيوخنا يتفاهمون وياها على اقل بس بيت واحد يظل النا صفينا احنا وعوايلنا بالشارع
خيبر : ما فكرتوا وانكسر خاطركم عليها من اخذتوا
كل حق امها وشمروتها بالشارع ورديت شمرتها بدار
مشردات ما انقهرت وكسبتها وبقيت تعيش وياها
وتخلوها تحس بالأمان وياكم وبيوم سلمها وهاب
للدار هو وتواب مو نصحته مايعوفها ليش شمرتوا
عرضكم وعشتوا بأملاك امها
سرگال : لا تحجون زايد ما يفيد وياهم الحجي
شيوخهم هجموا ولدهم يدفعون ويسحبون بأوسر يريدون
ابو كريم يجي للعراق حتى يقنعون دجى
وكافل يسحب أوسر وقائم منهم وشعيب ينس بين الهوسة ويضرب بوكسات
كل دقيقة واحد شايغه روحه منهم ودفع وسب وضرب گدرنا
نصعد الولد بالسيارة وهالشيوخ وبلمح البصر اريد اصعد
بيدي باب السيارة وألمح تواب جر حديدة وركض على كافل
يريد يضربه غافلوني ركضت ودمي ضخ بكل سرعته وكفت
گدامه اريد اجرها بلحظة بس لحظة وحسيت بضربه على
راسي غوشت عيوني
رفعت ايدي اريد اكمش بشي اسند روحي جريت كافل من ايده
من التفت فكيت عيني حيل وصوفرت أذني وهو يباوع وراي بعده
يريد يضربه تلاويت وياه بأيد وحده وقبل لا اگول شفت سرگال
خنگه من رگبه وسحب الحديدة من ايده يضرب بي فاقد ماحس
على نفسه ياهو يوگف گدامه يطيحه بالگاع ويصيح ويسبهم بعلو
صوته عليهم طرح ضرار بالگاع بظهر الشيوخ محتمي
ظلمت الدنيا بعيوني وتحسست بيدي تصلب الرصيف وترابه
بأيدي الطايحه وكافل يغسل وجهي بماي بارد وصوت شعيب
وجماعته يتعالى كل ما ينصب على وجهي ماي فتحت ولگيت
كافل گدامي وجهه مخطوف يگلي
_ تسمعني ولك خيبر خرب اهلك ليش تشمر روحك گدامي
خيبر: چا انت لو تنضرب بالعجل تدخل غيبوبة راسك ما طاب
كمشني قوي من ايدي وگفتي والسيارة والبيوت والشارع
كله يتحرك بعيوني دايخ گعدني بالسيارة وراح عليهم مايقبل
يسكت منهم يريد يسجنهم والشيوخ يصيحون بحمايتنا وشعيب
يردهم اشيلكم انتم وياهم وهمه يتخبلون شلون ما يحترمون شيوخ
وسرگال عج المنطقة مثل عاصفة الترابة غوشهم تغوش بالصياح
منين ما يريدون يقنعونه بيهم خطية ينطيهم غلطه يطفرهم بيها
سلمهم بيد شعيب واخذ جماعته تواب وبحر بسيارتهم والشيوخ
طفروا ضرار حتى لا ينسجن ويلغ الباقين منهم ، وتواب ما خجل
بصوته الخايس يرعد ويسب ويتحسب على دجى وكافل تهستر
منه نزل من السيارة وراح كل خطوة يخطيها اكبر من الثانية
اول ما لزمه عصر رگبته عصر بيده وبيده الثانية يفرك بحلگه يصيح
كافل : وابو عبدلله الحسين لو جبت اسمها بالطاري
بعد اخليهم يشيعون جنازتك والچفن چبس زبالة
دفعه لبطن السيارة وراسه نرگع بالطرف نلصم من الضربة
وبحر يهدد وشعيب يحشش علي هو وجماعته ، عفناهم
وركب كافل يسوق اخذنا أوسر وقائم الطريق المزرعة
نزل كافل فتح الهم الباب واجه سألني اگدر امشي
جربت امشي دايخ وراسي مفتر بس عيب من الولد
استقبلتهم بكلمة طيبة لأن كافل شايل بخاطرة منهم
وما طايق صوت وشكل أوسر يريد يطرده لو ما عيب
دخلهم المشتمل قدم ماي واتصل على كريم فتح صوت وبلغه
كافل : حاجتك مگضيه ولدكم عندي بالحفظ والصون
كريم : مش عارف اشكرك ازاي يبني وقفتك دي وقفت
رجالة بصحيح الدين ده في رقبتي الأخر العمر اردهالك
بالأفراح
كافل : العفو هم ضيوفنا بحمايتنا حتى لو عدوي
ونخاني وهو بالغربة افزعله ما تعلمت أمد إيدي
عليه ولا ازعله بحرف وبروحنا نفديهم ما تعلمنا
نطرد ضيوفنا سوينا الأصول اللي تربينا عليها ...
دجى ...
واگفه على اعصابي بوسط الصالة استمع للكلام تاهت علي
سحبت انفاسي وضاع النفس اللي اخذته بصدري غمضت
على نبرة صوته الخشنة واتخيل شكله وحد حاجبه بهالدقيقة
يحچي برسمية وبرود واني اتلوع تلوع وادعي بگلبي كون
يذكرني يسأل علي يذكر اسمي اريد اسمع اسمي بصوته
وعيون خالي كل دقيقة تصد علي يقراني حاولت ابين طبيعية
بس رجفت اشتياقي فضحتني تهربت منه وصفنت بقماش
ورسمات التراك حتى لا ينتبه على لمعة الدموع بعيني
كل كلمة ينطقها ببروده ابلع وياها غصة قهر وهجر تذبح
عضيت شفتي السفليه حيل من ضلت ترجف مراجف كلشي
بيه جاهز للأنهيار بعد ما وصلوا النهاية المكالمة منتظرة تنسد
وهل مرة راح يذبحني لو راح بلا كلمة منه
اشرت خالة حكيمة الخالي احچي وياه قرب التلفون من ايدي
واشر احچي وياه هزيت راسي لا من الخجل بس گلبي راح
يطلع من مكانه لزمت التلفون وعصرت ايدي بين ايدها وگفتني
مشتني على غرفة الجوا فوتتني وخلت التلفون بيدي وطبگت
الباب وراحت اسمعها برا تگول
_ مش هتقدر تتكلم وكلكم بتبصو عليها بتشكر الراجل
على انفراد
لزمت التلفون بإيديه الثنتين يرجفن رجف ودگات گلبي تضرب
بضلوعي بقوة خليت التلفون على اذني سمعت انفاسه ويكرر
كافل : الو
دجى : كافل شلونك
طال هدوء واختلط بصمت رهيب لثواني توقعت يرد بلهفة
تشبه لهفتي علي بس صدمتني برودة نزلت على گلبي مثل
الجمر يحرگ بگلبي حرگ اخذ نفس وجاوبني بنبرة باهته
مابيها ذرة حنية واشتياق
كافل : الحمدلله بخير
كلماته مرت مسامعي چنها سجين وتحز بي حز حبست
دموعي غوشت عيني وحسيت بغصة ببلعومي ردت اكابر
بس الشوگ چان أكبر مني حجيت بحذر حاول ألطف بيها
برودة وأسمعه اكثر أخلق دقايق بيناتنا جمعت شتات نفسي
وأضم لهفتي واشتياقي
دجى : شكرا ما عفت خالي بالشدة وساعدت الولد خطية
تنهد تنهيدة طويلة وصوت طگة جگارته رن بالسماعة سحب
نفس واحس بي يمشي ورجع جاوبني بنفس البرود الحاد
يهد بي الحيل هد
_ تدللون .. عندي شغل هذا أوسر وياچ في أمان الله
أوسر : الو اهلين دجى
مالحگت ارد ونگطع صوته واوسر حجه حسيته شالني ورگعني
وانتقم اشد انتقام مني وصلي فكرة اختاريتي اخذي ما تخصيني
خليت ايدي على حلگي أضم بصوت شهكاتي ودموعي نزلت
ما مستوعبة هيچ كافل يحرگني مثل الورقة وخلص منها
طبگت الخط بوجهه أوسر وذبيت التلفون گعدت على تخم
الطم بقهر على رجلي واعض أصابعي ندم وماعرف ندمانه
لأن خليت گلبي يدگ الشخص كلها العالم ما راضيه قربنا
لو ندمانة لأن زعلته واخذ موقف مني وبعدني من حياته
اخ يا گلبي اخ نبتت اصابعي برجلي ابجي وامسح بعيني
من فاتت خالة رحيمة خليت التلفون بيدها وشردت من گدامها
عديت منهم ومختنگه بالقهر يسأل خالي شبيه واستحي احچي
ويعرفني بچيت بس اسمع اوسر يحجي وياهم شردت الغرفتي
حبست روحي بيها وعيوني على طول اليوم ما نشفت بعد
لثاني يوم بقيت اجت خالة رحيمة يمي فتحت الها الباب
واضم بوجهي منها وهي خلتني اگعد واجت ثبتت وجهي
شافت شفتي من القهر والحرارة فرگس فراگيس بيض
يوجعني لمتني بحضني تسألني شبيه شكيت الها
_ الكافل بعد ما يريدني
حجيتلها الصار بالتفصيل صفنت وابتسمت تگلي
رحيمة : بالعكس ده بيموت فيكي وعايزك بس تلاقيه
زعلان وحابب يحسسك بتمن غلطتك ورفضك هو ما
سلمكيش لأوسر كده بالساهل ده انا متأكدة تلاقيه
دلوقتي روحه بتتحرق وناره قايدة فيه
دجى : والله يا خالة اني بوسط هالنار محترگة
اذا بقيت بعيدة راح اموت من غيابه عودني علي
واعرف لو قربت منه راح يدمروني بمشاكلهم وباقية
بعيدة واتحسر على صوته اللي جنت اكرهه
بقت تحاجيني وتواسيني بس حالتي وصلت حدها ونفسيتي
صفرت ابچي وما اسيطر على عيوني احبس بروحي منهم
حتى لا يشوفوني بس انجبر من يصيحني خالي اطلع واظل
منزله راسي وبليلة صاحني على عشه لگيت أوسر مترأس
الگعدة بنص الصالة فارشين سفرة طبطب خالي على مكان
قريب منه بعدني ما گعدت غادة دست السم وصاحت
_ جرى إيه مشايفه أوسر وتتحمدي له بالسلامة
سافر وعرض حاله للخطر عشان أملاكك كل ده
ومش مالي عينك ولا بيطمر فيكي
گعدت وهو اباوعله جر الماعون وردها قبل لا اسلم
أوسر : مالك يما سيبينا ناكل في هدوء أنا مش
مستني منها سلام ولا شكر واللي بعمله ده كله
عشان خاطر عمتي ميثاء ترتاح في تربتها
رفعت راسي بهدوء بعد ما نطق أوسر بكلماته باوعت لأمه
تباوعلي بنظرة شماتة كل ظنها حرجني ابتسمت بطرف شفايفي
ودارت عيوني على أوسر منزل عيونه بالأكل ومقوس حاجبة بغضب
دجى : الحمدلله على سلامتك فرحت بشوفتك
حرك رأسه وابتسم وبنفس الدقيقة شرب لبن من نزله گال
أوسر : أدوم أفراحك
خالي أشر الها خازرها حتى تنطم واخذ ماعون يصبلي
_ خليني اني اصب اكلي
كريم : باردة ما بتعرفيش تاكلي مليح
صبلي تمن ولحمة خلاهم مقابيلي صفنت بالماعون ومخنوگه
من الغصة واوسر يحچي على بيت امي قفلة والثاني اجره
الرجال هو وعائلته والعمارة بيها دكاترة وصيدلية إيجارها كل
شهر يوصلنا هنا لمصر وترتب الوضع
باقي دراستي ونقلي وبيت امي الچبير لأزم على يوم ارجع وأصفي اغراضه
أوسر : دجى شهر الجاي أسفرك العراق نكمل باقي
المعاملات ما تمشي بلا توقيعك ونعاود مصر تاني
دجى : راح اتعبك
اشر على عيونه خفضت نظرتي اكلت لگمة والثانية نهضت
وخليت ماعوني بالمطبخ وعدهم شغاله بدقيقتها غسلته
وقبل لا يشوفوني رجعت للغرفة ودورت على تلفوني شفت
خالة رحيمة دازه رسالة تريد اجي يمها جاوبتها ياريت
جمعت كم غرض من اغراضي ولبست ذهبي حتى لا انسى
وذبيت الشال على راسي من سمعت صوتها هي وقائم جوا
يقنعون خالي ياخذوني دقايق وطلعت الهم مبدلة سلمت وخالي
يعاتبني لأن اريد اروح من بيتهم وطلعت وياهم امشي وخالي
حضني يوشوش بأذني
_ ليكون زعلانه من كلام غادة يابنتي دي صوت
عالي بس قلبها طيب والله
بست راسه وگتله كم ارجع وروحتي مو بسبب مرته
جنت مخنوكة وحذره يفتحون موضوع أوسر وياي لأن راح
افشله واحتمال يحقد علي ركبت سيارة قائم ليورا وخالة
ليگدام سلمت وعلى طول الطريق يحاول يلطف جو ويضحكتي
مقابيل البيت ركن السيارة ونزلت امشي ورا رحبت بي قطر الندى
رافعه شعرها وجهه بي خدود يخبلن وشعرها مفتوح على طوله
وعطرها يهفهف وراها استقبلتني تضحك واخذتني من ايدي فوك
على غرفة بصف غرفتها فوتتني بيها تظيفة بيه چرباية وكنتور ومرايا
بققيت اسولف وياها الثاني يوم الصبح بلا ما احس على نفسي
ثاني يوم صاحتنا خالة رحيمة من نزلت بعدني على درج لفيت
شالي عدل وگلبي انقبض اول ما شفت خالي وأوسر منتظريني
سلمت عليهم وگعدت مقابيلهم بعد السلام ما طولها خالي وگال
كريم : اسمعي يا بنيتي انا خابر مصلحتچ مع مين
سندچ وحمايتچ وانت عايشة في وسطنا ومش عاوز
ابعدك عنه تاني وطالبك تكوني عروسة ابني أوسر
بلا وعي دارت عيوني للباب كاعدة على درج وزموعها شلال
على خدها تتسابق بنزلتها هزت راسها اليه لا وعينها راحت
على أوسر واني تحمحمت ابلغهم
دجى : انت بمقام ابوية صرت وعزيز امي خليني
احچيها الك حتى ما نختلف بعدين ونزعل لأن اني
ماعندي غيركم ، خالي مثل ما تريد مصلحتي فكر
بأبنك شلون تزوجه وحده جثة روحها وگلبها مو
ملكي
اختنگت وعيوني تلمع بدموع حابستها غصب وكملت كلامي
واوسر مركز بكل كلمة احجيها ويصير عصبي ابو يلزم بأيده
دجى : صح انفصلت بس گلبي انقفل وانختم الزلمة
كفلني وحماني اشهر واني عنده مو بسهولة انسى
عشرته رغم كل الزعل والبعد بيناتنا يظل هو الأول
والأخير اسلمه گلبي وروحي واني مطمئنه
خالي بهت بمكانه وعگد حواجبه بصدمة خفت منه بچيت
وحاولت افهمهم بكل احترام وهدوء حتى لا يكرهوني بيهم گتله
_ ظلم جبير اوافق على أوسر وظلم أكبر أكسر أمل
بنية ثانية منتظرته صارلها سنين ورايدته وهي
تستحقه اكثر مني
كريم : منو هي
حجاها متعصب يريدني بس اوافق على ابنه
دجى : أوسر اكيد تعرفهااا فاعذرني خالي اني
من النوع لو سلمت گلبي الشخص اخلص له بمشاعري
صعبة أفكر وأتخطى وانسى مو بيدي الراي رأي گلبي بعد
كريم : بفهم من كلامك بترفضي أوسر
دجى : اي واتمنى بعد ماتفتح الموضوع هذا لأن تقهرني
لمحت قطر الندى مسحت دموعها وهي تتنفس براحة كلامي
رجع الروح بيها انسحبت بكل هدوء وهمست بعد اذنكم
وحبست نفسي بالغرفة لليل اجتني قطر الندى ساكته همست
_ شنو بينكم انت وأوسر
ذبت نفس وحسرة قهر تگلي
_ مفيش حاجة رسمية بيننا هي مواقف حلوة وخلاص
أيام بيبعد وأيام تانية بحس إنه شايل في قلبه نفس
المشاعر اللي في قلبي بيغير عليا بيضحكني ويزعلني
وساعات بحسه مش مهتم ليه خالص هو مش واعدني
بأي حاجة بس أنا بحبه والله بحبه أوي
مسحت دمعة نزلت على خدها وابتسمت بحزن وهي بتوصف
احسها تعمدت تحجي وتفرغ مشاعرها حتى ما افكر اوافق عليه ابد
_ لما بلمح نظرة عينه من تحت لتحت بحس فيها
بكمية دفء وحنية ميتداروش وكأنه بيطمن قلبي
من غير ما ينطق ولا كلمة هو تركيبة غريبة قاسي وحنين قريب وبعيد في نفس الوقت لما بشوفو
بمكان حركاتوا تخلي قلبي يتنفض من مكانه
أنا والله يا دجى ما بشوف غيروا بعيني
حضنتها وهمست والدمعه سبقت كلامي
دجى : فاهمتچ يا كلبي احس بيچ يارب يكون
من نصيبچ اصلا وين يحصل بجمالچ تخبلين
بس صوتچ كافي
رديت ابتسامتها على وجهه وبقت يمي ساعة وراحت عيوني
احس بيهن يريدن ينعمن من البچي حايرة وخايفة من المستقبل
كون اعرف شنو راح يصير ويايه اخاف احد يغدرني لو يأذيني
واخاف صدك ابلش دراسة هنا واتندم واني گلبي بالعراق شسوي
يومين وتأزمت نفسيتي اكثر من قبل كل اريد احچي تخنگني
العبرة وابچي صرت استحي من روحي على نفسيتي وحتى
النوم مسيته وهجرنا
گاعدة وياهم على طبلية دائرية بالگاع ومقابيلنا نتعشه ودشداشتي جديدة لابستها توني وقائم يحجي
على حقل منتبهه على كلامة وشلون يوصف الفلاحين واصب بالماي
تحركت ايدي ونكب على دشداشتي باوعت بوجهم وغطيت وجهي
ابجي چن ميت اليه احد عزيز مو ماي وطاح وخالة رحيمة حضنتني تضحك وتمسح على راسي تگلهم
_ فداكي ألف دشداشة يا قلب خالتك المي هينشف
بس نيران الشوگ والفقد قايدة جواكي مبيطفيهاش
غير اللي ولعها
حشرت راسي بحضنها أشهگ شهگات هدمت حيلي وهي
زادت بالضحك حست بلوعتي وضمتني لصدرها أقوى الحد
ما تعبت وعيني حرگتني حسيت جفوني ثگلت نمت بحظنها
بقت يمي بالصالة الثاني يوم نايمة وگعدت صافنه على
باب الخارجي مفتوح والهوا يلعب بزرع الحديقة ويطلع
منه صوت حلو يبين برودة الجو اليوم
لميت رجلي لصدري وباوعت على ساعة هيچ وكت دوامه بالدار جنت انتظره
واذا صاحني للمكتب انزعج ويخرب يومي كله لأن يسجني
ولا اراديا عقلي تذكر من جنت گاعدة مقابيلة على كرسي
افر القلم بيدي مخلصه الشغل مكلفني بي وهو ما يحتاجة
وعيوني تروح عليه غرگان بالمعاملات والملفات وبين فترة والثانية
يسرق نظرة اتجاهي واذا ردت احچي يصير عصبي وعرفت
بعدين يمثل العصبية حتى اخاف اطلب اصعد للمنام ومخليني مقابيله
نفضت ذكرياته نفض من راسي وكمت افتر بالبيت اريد التهي
عنه واشيله من بالي وروحي تبطل تعلعلني من القهر سحبت نفس ثگيل ليگول طابوگة على صدري نامت وأتنقل من غرفة والثانية وگطعت هل هدوء صوت خالة رحيمة تبلغني
_ دجى اجهزي يلا عشان هنخرج نروح السوق
نشتريلك أغراض جديدة ليكي ولقطر الندى
هزيت راسي اي بس بلا روح وصدگ بدلت اني وقطر الندى
اجت يمي تمكيج وخليت وياها شي خفيف وطلعت وياهم
بسيارة قائم وقطر الندى تغني وتصور وتنشر وصلنا بوسط
هوسة الناس خالة رحيمة وقائم نسمات هوا يحاولون يضحكوني
ويخلوني اتونس واطلع من جو هالموت بقيت اضطر من يلتفتون
يشوفوني أجاملهم وأبتسم وابتسامة تبهت ماعرف امثل ماكو
أي فرحة بگلبي حتى الذهب والهدوم الجديدة اشتروها اليه
بنظري مجرد سراب رجعت الايام العز بس فقدت طعم الفرح
وگفونا على محل حجابات اختار ودخل رجال وخطيبته بارزه
حلقتها يفترون ويانا ويختار الها والولد يفتر وياهم يختار
هي لزمت الشال تشرحله شنو نوعيته وبرزت طرف رگبتها
برمشة عين نزل ايدها وصعد الحجاب يغطيها بنترة يگز
على سنونه غيران عليها هواية وهي تبتسم بخجل وتنزل
راسها تحجرت انفاسي غمضت عيوني منهم وجسمي
نگلب ثلج ونعادت علي كل المواقف وياه وغيرته ونظرته
ولمساته وطبع بوساته لدرجة حسيت عظامي تلين بعد
ما تشيلني
الدموع غوشت عيني وطاحت بلا صوت بنص المحل
التفتت علي خالة رحيمة خايفة ولزمت ايدي تگلي
رحيمة : مالك يا بنتي في ايه حد زعلك
دجى : خالة فدوة اروحلچ خلي نرجع بعد ما اگدر
اختنگت والله العظيم خالة ما اگدر بعد ابقى تعبت
اشر قائم براسه نرجع وشايل الملابس مالتي وقطر الندى تمشي
وياه والعلاليگ مالتنا الباقي بيدها واني ايدي بأيد خالة رحيمة
عرفت بهالدقيقة صح عشت بدلال بمصر بس راح أظل نفس البنية
الضايعة طول ما كافل زعلان وعايفني بهالغربة
رجعنا للبيت بس صحتي ما رجعتلي انعزلت اكثر يا دوب
باليوم اكل وجبة واشرد فوك وبليل بالعشه سمعت خالة رحيمة
تبلغنا باجر خالي كريم وعائلته كلهم عدنا فرحت اشوف البنات
بلكي تتغير نفسيتي ، الثاني يوم بدلت دشداشة سودة فصالها
ناعم ويرتب الجسم رشيت عطري وذبيت شالي على راسي
وشمرت البواقي منا ومناك واني انزل على درج صبحت عليهم
ونزلت على صالة الضيوف قطر الندى گاعدة تعدل بوكس حلويات
مربع خلته بحضني وكتبت رسالة واشرت على حلويات اعدلها
نفذت كلامها وهي تصيح
_ هنزل مفاتيحك من فوق تمام
طلعت من الصالة جريت باقي علب الحلويات أرتبها التفتت
بنظرة سريعة للباب لمحت عيوني شخص ما استوعبت شكله
بالبداية وظنيت قائم ينتظر رجعت ارتب بالعلبة بس جسمي
تصلب وعقلي جمد ثبتت عاصرة البوكس بين أصابعي حيل
ورديت التفتت بنظراتي للباب دگات گلبي صارت تضرب
بضلوعي ولساني نمل وثقل لدرجة ما نطقت غير بأسمه
_ الكافل
خطوة بعد خطوة تقربة مني وصل مقابيلي وعطره ترس ريتي
خفض كل جسمه اخذ العلبة من ايدي خلاها على طبلة وگعد
بصفي على تخم ثاني رجل والثانية بالگاع حتى يصير مقابيلي
انعدمت المسافة بيناتنا باوعتله ما مصدگه عيوني رجعت تشوفه
نزلت دموعي واني اتفحث شكله التعبان وهو عيونه مليانات عتب
يبدلها بين عيوني ينزل على شفتي ويوصف برگبتي گبيت نار
ورعشة شفايفي فضحت كل خجلي من قربة وذبلت عيونه
انطحن گلبي طحن على تعب شكله ولا اراديا رفعت ايدي خليتها
تلامس لحيته ودموعي نزلت على خدي بعد ماعندي سيطرة على نفسي
دجى: كافل شصاير بيك
تشنچ فكه بقوة خلت جسمي كله يهتز وبصعوبة بلع ريگه
ويه ذبلان عيونه ذبل العتب والكبرياء راح وعيت على حركتي
ردت ايحب ايدي سبقني وكمشني من معصمي ثبت ايدي
ورفعه يقربه من شفايفة اللي ترجف رجيف من قربنا فتحها
وباس باطنها بوسة طويلة وفصلها وطبع على كل اصبع بوسة
ما كفته هالبوسة خلاني ارعش ضايعة كارهه ابتعد سحب إيدي
بالزايد ونوم راسه عاى باطن إيدي وغمض عيونه بكل راحة
ليگول طفل وضايع ولگه اهله بجيت وسديت شفايفي حيل
اكتم صوتي مقهورة على حالة الصاير اصعب من حالتي همست
_ كافل
_ احترگوا أهل كافل بيوم ما خلوچ تغيبين من عينه
شهگت مقهورة وجريت ايدي وراسي نزلته دموعي طاحت
على دشداشتي محترگه حرگ من همست أنبهه
دجى : حرام اطخني
كافل : حرام اكمكش
اختلطت ضحكتي بدموعي ورفعت طرف عيني حافظ كلمتي
هزيت راسي اي وزادت ابتسامتي من گتله
دجى : استاذ ابتعد مني لا تكمكش
توسعت ابتسامته وهو يصفن بوجهي اكثر گال
كافل : ولچ دجى هدمتي حيلي
دجى : اسم الله عليك
حجيتها وعلت صوت شهگاتي گال
_ كافي ولچ دموعچ يحرگن بروحي حرگ
مسحت دموعي ويرجعن يوگعن
دجى : تعبتك شوف حالك شصاير بيك لو ادري
ما دخلت حياتك وهيچ بهذلت حالك
ميل كل جسمه حجب كلشي من عيوني سكتني نرديت ليورا
كافل : ولچ لا تحچين هيچ تقهريني بالزايد
دجى : زعلان مني قهرتك اخر مرة هواية قهرتك
كافل : هم الصوچ مني صرت عصبي ورفعت صوتي
دجى : لا تبررلي اني غلطانه
كافل : اني وياچ غلطانين ومن نصير اعصاب
دجى : ننگلب ثوران
كافل : خلف الله عليچ
حجيناها استوعبت وضحكت بصوت وهو يصفن بوجهي
ويضحك على ضحكتي گرص خشمي وعيونه لمعت من همسلي
كافل : مشاقلچ ولچ ثعلوبة
تركزت نظرتي بنظرته مبتسمين واعدل بالشال احير شسوي
وهو بجرأته هز گلبي ومشاعري هز يبست شفايفي من همس
كافل : كون احضنچ حضنه هسة اكسر بيها ظلوعچ
ردت اشرد من گدامه سحبني من اصابعي ورجعني
بمكاني حاضن ايدي ورجع نوم ايده على باطنها بتعب
كافل : يمتى اخذچ بالحلال يمتى تعبتيني
دجى : شلون تاخذني وانت تعاركهم ما ينطوني
كافل : الخاطرچ اخلي على جروحي ملح واصبر
بس كون لا يغثوني بيچ افقد لو شفتهم عينهم عليچ
گولي علي معقد مختل بكيفچ المهم الرايدها گلبي
ماحب فلان ونعلان يشوفوها مثل ما اني اشوفها
جر طرف الشال من شافني ما فهمته ولف رگبتي يگلي
_ شغلاتي لأحبها تنضم بس اني اتمتع بيها
عود اريد اخليها مضبوطه وألفها من عيونه اللي افترستني
هز راسه لا وجر الشال وظل مفتوح بس شعري مضموم
وصدره تخربطت بي انفاسه ظل يصعد وينزل بسرعه يهمسلي
كافل : هسة خليني أملي عيوني عوفي
دجى : حرام استغفر الله
كافل : انچبي دجى موصلتني الموت انچبي
دجى : انت خليتني اسافر
عض شفته السفليه حيل وصفن بعيني ثواني قبل لا يبلغني
كافل : اعوف كل الدنيا وما اعوفچ وصلت للموت
وابتعدت مجبور ومعزتچ بگلبي
عصرت عيوني بردن دشداشتي امسحها وعاتبته
دجى : لا تجذب علي مو طفلة وتجذب انتظرتك هواية
وصلتني للموت بليلتها من ما اجيت ورجعت هنا مكسورة
من ارتفع صوتي وتذكرت رفع اصبعه على شفايفة سكتني بكلمتين
كافل : سويت حادث
وقبل لا افكر اجذبه واعتبرها حجة يبرر بيها غيابه فتح تلفونه
وشوفني صورة دراجته والصورة الثانية وهو ملفلف راسه كله
وجسمه اني شفت حالته وبعد ما تحكمت بدموعي وانهياري
بجيت بجي شكد حاول يسكتني فشل من تعبت گتله وكلماتي
تتگطع من احجيها حرف بحرف
_ هاي شصاير بيك اختنگت والله اختنگت
_ والله صرت زين
_ لا تحلف حتى گوه تتنفس
_ لا هاي لأن انت گدامي واريدچ افكار كافرة تفتر بعقلي هسة
بطرف ايدي ضربت طرف صدره ابتسم
دجى: اگول خشمه متغير اثاري مسوي عملية تجميل
ضحك بصوت مسموع بكل الصالة ويگلي
كافل : اي ورايد احقن ابر تبيض حتى ترضين بي
اشرتله بأصبعي لا ورديته
دجى : لا ما أحب البيضان الأسودين دمهم محبوب
زادت ضحكته وارتفعت وياها ضحكتي وهو گوه يحچي
كافل : ديلة بالله ويگولون ليش قفلت عليها عمي خليني
اعترفلچ سعادتي كلها بيدچ لو ترحمين بحالي وتنطيني
كلمة تريديني واخذچ لو تگليلي امشي يا ابن الناس موت
رفعت ايدي قريب من شفايفة بس ما طخيتهم همست
دجى : اسم الله عليك بالبالي ولا بيك
كافل : تريديني
بكل اصرار حجاها گتله
دجى : مو رفضتك شرجعك هنا
كافل : ما اخذ بكلامچ عنودية راسچ يابس واني اكثر
منچ عنودي اخذچ حتى لو غصبا عليچ هم اخذچ
دجى : بس خوالي وو..
كافل : اشششش خوالچ يمي موضوعهم اروحلهم
واتفاهم وياها واقرا وياهم الفاتحة مالتنا
توترت وزادت خفقات گلبي من گتله
_ واهلك والله المشاكل اخاف منها و..
كافل : اهلي دواهم عندي ويعرفوني شكد رايدچ
صفنت بحيرة وگطع افكاري بكلماته وهو يرفع وجهي بطرف اصبعه
كافل : إخذ منچ كلمة رايدتني بس گوليها وخليهم كلهم
علي اني اتعب وياهم الخاطرچ انت مو شوية تستاهلين
اتعبلچ وأحصلچ
رايدته بس الخوف اكبر مني
دجى : خايفة والقران خايفة أخسرك وخايفة أقترب منك
كافل : هو القرب لو ما بي حرب وتاليته بدلة وحلقات
ما يسوى غير تتعبيلي واتعبلچ لو خايفة تخسريني
اخطي خطوة الخاطري وقربيني منچ لا تبعديني
دجى : شلون
كافل : گليلي رايدتك والباقي علي
طال سكوتي هز راسه وگف عدل ملابسة وخطوة بعد خطوة
تبعده قبل لا يوصل للباب گتله
دجى : انت ذكي ولو ما تعرفني رايدتك ما تجيني
التفت يباوعلي رفعتله حاجبي
دجى : كلها تدري دجى من تريد مو صعبة عليك تعرف
قلدني برفع الحاجب وبصوت متوازن يحاجيني
كافل : احب اسمعها منچ وتبطلين عنادچ
ذبيت نفس وهو گب رفع ايده يسب بيها وصاح
_ خرب روحچ شگد تكابرين وتعاندين
دار ظهره يريد يطلع رفعت نبرة صوتي وگتله بخوف
دجى : استاذ كافل ممنوع ترجع للعراق بدوني
تاخذني وياك وانت راجع هوى مصر ما يوالمني
تبسم بوجهي مفتهم وراد يرجع بس قائم صار بوجهه
يرحب بي ومن الخجل عفتهم ودخلت للبيت رجع وياه
بالصالة يحجون واني الگاع ما شايلتني من الفرح اريد
اطير لو اهلهل من فرحتي بي بس أستحي خالة رحيمة
تگرص بخدي وفوتتني للمطبخ اجهز وياهم الغده وصبت
صينية جبيرة بيها ما حبت النفس من برياني ولحم ودجاج
ومحشي وملفوف لهانة وانواع المقبلات اخذها منها قائم وفات
هو وياه ياكلون ونسمع اصواتهم ما سكتوا من الحجي ابد
خلصوا وخالة رحيمة جهزت صينية الجاي اخذتها وفاتت يمهم
تصبله وتحجي وياه وهو يفهمها يريد يروح على خالي اليوم قبل
باجر وقائم يگله تعبان بس يبس راسه بعد كملوا الچاي اخذ خالة
رحيمة وقائم وطلعوا من البيت گعدت بالأستقبال من التوتر اكلت
اظافري اكل ومن كثر ما رحت ورجعت بالمكان صفاحي تشنج
وضعفت يمكن
ورجلي صارت خيوط وحرت وين اضم روحي من الخجل
اول ما لمحت خالي كريم دخل وياه كافل ولدهم كلهم حتى
أوسر دخلوا علينا ومن الباب صاحوا بأسمي لفيت شالي
لف على رگبتي ودخلت والتوتر ما ينوصف ضيق انفاسي
جمدت بالباب وهو بلا لف ودوران سألتي
كريم : صحيح عاوزه كافل يكون جوزك
على سنة الله ورسولة
انبلع الساني من شفت عيونهم كلها مركزه بي
كريم : ما تخافيش انا معاكي بالصح لو عاوزاه
مش هوقف في طريق قسمتك ف فتحي عينيه
صحيح مثل ما يقول انت عوزاه وهو عاوزك
خالة رحيمة صاحت بفرح واجت وگفت بصفي
_ واللهي عوزاه وعيونها صغرت من البكي علي
وانا قلبي انفطر من الحزن عليها
كريم : ما تتكلميش يا ام قائم حابب اسمعها منها
علشان بالمستقبل لو حصل حاجة هي بتتحمل نتيجة
اختيارها اخر مرة يا بنتي يا دجى عاوزة كافل يكون جوزك
أوسر : واضح مش رغباك وبتتكلم من حالك
قاطعت كلامه وجهت كلامي الخالي وعيني بعين كافل گتله
_ اريد الكافل
كريم : معاكي بس احتمال كبير ما تعيشي مرتاحة
لأن اهلو مش راغبين زواجكم ولا بيحبوكي ويقللوا منك
دجى : ما يهمني احد غير الكافل هو دواهم
ابتسامته هاي هسة مقابيلي بكل عمري ما راح انساها
وثقته بي زادت وفرحته خلته يوگف ويرجع يگعد وياهم
يقرون الفاتحة بنية اتفاقهم على خطوبتنا رفعت ايدي
وياهم قريتها وضحكتي فضحت فرحتي برجعتنا
حبيت تمسكه بي برغم العوارض كلها وفرحانة بنظراته ولمعة
عيونه وهو يشوفني احد اهم انتصاراته وحابة تضحيته ودخلته
بعيون الكل حتى يحصلني وباقي رايدني ويعرف ورانا مشاكل
يتشيب منها الراس بس ما يهمه كل اللي يريده ننجمع بالحلال
سلم على حالي وظل خالي واولاده يمنا طلعوا برا يشوفونا
المكان ويحجوو وياه على طبيعة شغلهم وكأنما واحد من عدهم
واني والبنات بالبيت نجهز بالعشه كلها ملتمه وبيها فرحة هاي الليلة بس خالة رحيم
اخذت دور الأم ورفعت راسي بضيافتها
وترحيبها وتجهيزاتها من كملنا خلتني ابدل وانزل وعلى سفرة
وحده اجتمعنا گاعدة بصفها وهوَ ملتهي وياهم يسولف ومن بين
سوالفه عيونه تصد بعيوني يبتسم ويرجع يكمل وياهم
شاورتني خالة رحيمة اجهز الجاي گمت للمطبخ لگيت قطر الندى
تاكل وحدها خدرت الچاي وصلني صوتها الحيران تگلي
_ كيف اعرف الشخص يحبني ؟
التفتت عليها واستندت على كاونتر
_ الأحسن تگولين هالشخص مناسب ألچ لو لا
_ ازاي ؟
_ لما يحـاول الخاطرچ مو انتِ تحاولين الخاطرة
من يتمسك بيچ ويريدچ حتى لو كلها ضدكم
قطر الندى : المشكلة مفيش حد ضدنا بس هوَ ضدنا
صبيت الچاي وقبل لا اروح گلت الها
_ لعد ما يستاهلچ وما يناسبچ انتَ تستاهلين الأحسن
عفتها ورحت اريد أقدم الجاي شفته اشر القائم واجه قائم
اخذها من ايدي يوزع وبقيت بالباب من خلصوا راح خالي
وصاحتني خالة رحيمة جهزت غرفة الضيوف فراش ولحاف
ومخاديد اثنين عطرتهم كلهم بعطري وسمعتهن اجوي ضميت
العطر بصدري واستقبله قائم خليت ايدي وره ظهري وتخربط
وضعي من فات همست مستعجله
_ تصبح على خير كافل
واني امشي من عنده جاوبني بصوت خافت
_ انتِ الخير ثعلوبة
شـردت من يمهم وصعدت فوگ ختلت بفراشي ومن الفرح
للصبح ماعرفت انام ، للساعة سبعة الصبح مشيت للشباك
شفتهم من بعيد يمشون ويشربون جگاير مندمجين وقائم
طاير بكافل ليگول صار سنين يعرفه
من نزلت شفت قطر الندى فرحانة وحالة رحيمة بلغتني
قائم من شاف النفوس هدأت قرر يغير نفسيتنا ويعزمنا
على سياحة وسفرة بمصر يشوفنا أماكنها الحلوة كلها
فرحت بهالفكرة واول مرة من اجيت لهنا لليوم من صدگ
اريد اطلع حتى تصير عندي فرصة اشبع عيوني بشوفته
للظهـر دخلنا البنات علينا بهجة وسمارة وبيدهن ملابسهن
دخلنا كلنا بغرفة قطر الندى نخلي مكياج رسمت عيوني
بيدي بكحل طوخ وجريت ايلاينر مثل ما جنت اسويها قبل
وكملت باقي المكياج ولبست بنطلون اسود وقميص فوگاهم
شال على جتف خليته وضبطت حجابي بلفة مرتبة تعطرت
ونزلنا كلنا حلوات طالعات
شفنا سيارتين راحوا البنات بسيارة أوسر وقطر الندى
ركبت بسيارة اخوها قائم واني وياها ليورا ودگ گلبي
بقوة من شفته اجه يمشي ومشيته مهيوبه من بيناتهم
صعد بالصدر وبصوت مسموع گال
_ السلام عليكم
ردينا السلام وصعد قائم يسوق وراه أوسر يمشي
حسيت بشي يطخ برجلي خفضت نظرتي وشفت
ايده مادها من وراه الكرسي باوعت القطر الندى
كل تركيزها على سيارة أوسر والشارع ولا منتبهه
قربت اصابعي تلمست اصابعه لم كل ايدي بچف
ايده حيل حاضنها ظل لازمها دقايق وعافني من
اقتربنا تحمحم ورفع چف ايده نفسه يشمه وغمض
عيونه حيل مبتسم من شم عطري ترس ايده
سويت نفسي ما منتبهه ودرت وجهي على شارع مشت
بينا بعيـد ونزلنا على منطقة لمعبد الأقصر انسحرت عيوني
بجمال الأعمدة الضخمة وعالية امشي واتلفت بكل مكان
رسومات تصفن العقل والسياح من كل البلدان تفتر ويانا
يصورون ، راح هوَ يمشي وياهم يحجّون على تاريخ المعبد
وإني والبنات نفتر سوية وقطر الندى تشرحلي على عواميد
الجبيرة وگفتني بزاوية اخذت صور وعلمتني اخذ الها صورة
تظهر بيها ضخامة المكان
اجت عيني بعينه من شفته ابتسمت وهوَ غمزلي اي والله
استاذ غنادب غمزلي الأول مرة عصرت تلفوني بيدي وهوَ
من بيناتهم يراوغ واجه عليَّ البنات راحوا من شافونا اقترب
وطلع تلفونه يگلي
كافل : يحلوة ممكن الرقم ؟
رفعت اصبعي ودرت وجهي امشي واحاوبه
دُجى : استغفر الله شلون عالم ما تستحي يتحرشون
اجه يمشي بمستوى مشيتي ومن وصلنا الوسط الأعمدة
ثبت جهازة والوقت خمس ثواني واشر اجي اوگف بمكان
نفذت كلامة وثبتت ضغط الجهاز واجه بصفي وگف وگبيت
من الخجل اول ما رفع ايده وطوق اجتافي واخذ اول صورة
النا بجهازه جانت ومشاعرنا بيها محبة
صاحونا الولد انتقلنا بالسيارات مسافة ودخلنا صحراء مصر
حتى يركبون سيارات الترابية الضخمة اشترينا شماغ على
عددنا لفوفا الولد واجه أوسر يلف الأخواته وقائم كمل قطر الندى
واني فتحت تلفوني على مرايا اريد اسـوي اكثر من مره فشلت
كفيته بيدي أيست أريد اروحلهم وانسحب الشماغ من ايدي وبطرف
التشيرت سحبني وگفني مقابيله وهمه كلهم يمشون قبلنا همست
دُجى : كافل ما اريد عوفها
_ صـوتچ حلو احچي بعـد
ابتسمت وهوَ لفها بحذر على وجهي بلا ما يطخني بس
خلاني ارجف من نظراته وتركيزه من كملها ابتعد يباوعلي من بعيد
كافل : هواية على گـلبي ولـچ راسمه عينچ رسم بالكحله
ابتعدت كم خطوة وهوَ اجه يمشي ويايَّ يگلي
_ عليچ الله لا تباوعين بعيون احد غيري استغفر دُجى
ذبي عمي مو خوش سالفة بس عيونچ تطلع
دُجى : هسة ننترس تراب
كملت كلامي ورحت على بنات كمشت بيد قطر الندى ومشيت
وياهن صاحت علينا بهجة قريب من السيارات ركضنا ذبت التلفون
بالگاع وقدمنا راسنا عليها اخذنا صـور سوية وحده احلى من الثانية
اجروا الولد سيارات كبار تلاثة اخذ أوسر اخواته وقائم
ركب قطر الندى وصاحني اول ما صعدت اجه كافل
بسبس بأذن قائم والثاني جاوبه
_ أوسر ما يرضاش تاخذها لحالك معاها والله
ورجع يحجي وياه ماعرف شلون قنعه نزلني واني ما گلت لا
مشيت وياه ركبت بصفه وداس بانزين بكل سـرعته عبـرهم
والتراب ورانا يعج عجاج مخيف واجه أوسر بمستوانا ورد
داس الها تگابل هوَ وقائم الحد ما ابتعد منهم وضيعهم
بوسط الصحراء وگفها للسيارة ونزل عليَّ فتّح الشماغ
من وجهي وفتح بطل ماي اخذته شربته اختنگت من التراب
من شربت من جيب البنطرون جـر كلينكس وبلله بالماي
كافل : والله العظيم اعرف تصرفي غلط وحقچ تخلين
كحل بس الخاطري خليها تعدي اليوم وخففي على اقل
والقران گلبي نار خليتي وما اريد اصير عصبي
دُجى : تهددني ؟!
حجيتها وأخذت الكلينكس ذبيته بالگاع ، واني اعرفه لو نفذت
اصير حالي حال امي بالمستشقبل يخليني اتنازل على كلشي
حتى ارضي
قبل لا يحچي جتفت ايدي لصدري وهوَ ضاج من شمرت
الكلينكس رجع ركب قبل لا يدوس بانزين التفتت عليَّ واشرت
يرجعها حتى لا اختنگ وهوَ نفذها وايده ترجف من يباع لعيوني
رجع السيارة على نفس النقطة لگيناهم ينتظرون بس ما حجه
واحد بيهم شي من شافوني انزل وياه راح عليهم يمشي والولد
جوعانين اخذونا بمسافة المطعم مقابيله اهرامات اختاروا اكلات
متنوعة كل واحد وذوقة بالأكل ، وعزلونا على طاولة ثانية حتى نوسع
المكان نزلوا اكل وعلى هذا المنطر اخذت صور تخبل نشرتها
بصفحتي رفعت الجهاز وتعمدت اخلي شكل كافل بارز بحجة
اخذ صورة اخذهن
بمجرد ما كملنا اكل جابوا صگور اثنين خلاهز قائم على
ايد كافل ثبته على ايده يوگف وراح ينشي طگله صورة
قائم لكافل والصگر بيده واني اخذت الثانية واني اخذتله
صورة احتفظت بيها وبطولة الغير قرارات عقلي
رجعنا ومن التتعب يا دوب اخذت حمام وذبيت روحي
بالفراش نايمة وفرحانة فرحة ما اتمناها تزول
للظهر گعدت شبعانة نوم من نزلت شفت المطبخ عبارة
عن سمچ ولمحته من الباب متزفر متروس ماي رايخين
هوَ والولد يصيدون وكت بوكته يشوون السمچ ونص
بالزيت جهزوا وبالحديقة فرشوا ناكل منه وما يخلص
للعصر دخل على غرفة الضيف والبنات كلها تنظف اليوم
جهزت خالة رحيمة جاي وخلته بيده حنى اوصله قاومت ردت
ما اروحله استحي وهي تلح عليَّ شلته بالصينية ورحت
على غرفة الضيوف دگيت الباب وصلني صوته اتفضل
ذكرني من جنت بالدار واستأذن ادخل على مكتبة نفس
النبرة ، دفعت الباب ودخلت نايم بالفراش ويراقب خطواتي
نزلت الأستكان بالگاع وهمست
_ تحتاج شي بعد ؟
_ اي تظلين يمي
تملصت من ايده مبتسمة من وصلت للباب گتله
_ نظراتك ما تطمن نام احسلك واحسن اليه
اسبوع عشنا بالحلوة ومالمرة فارگ الحزن ايامي وبليلة بلغني
نرجع للعراق نكمل شغل البيت والعمارة واني اجمعها بالغرفة
ووصلتني رسالة خربت علينا الأول والتالي نشفت الدم بشراييني
وخلتني افقد الباقي من اعصابي تخبلت بعز تعبي ركضت نزلت
على الدرج وخالة رحيمة تسألني شكو دفعت باب الضيوف شفته
يلبس بالقميص فريت التلفون وصـرخت
دُجى : هـذا الحجـي صحـيح ؟!!!
قراها وانخطف لونه وثگل السانة بالرد ، نظرت بوجهه
نظره خلته يعـرف بعد هل رسالة دخلنـا بمرحلة العدوان
بس ماعرفت شلون ابلغ خالي بقيت مثل البالع موس اذا
يحچي ينجرح ما خليت فرصة يحجي ورديت الغرفتي
كملت كل اغراضي وتحدد موعد السفرة ودعت الكل
البنات وحتى غادة بس خالة رحيمة سافرت ويانا
كملنا كل الأجراءات وكل مشيتي بأيد خالة ما عفتها
ركبنا الطيارة وانتظرنا هواي اول ما صعدت انسدت اذني
ودخت غمضت ورجعت راسي حسيت بي قريب مني اول ما
فتحت عيوني قرب الماي درت وجهي منه رافضته
نزلنا بأراضي العراق وجريت الهوا ليگول جنت مخنوگه
امشي اني وخالي ومن الباب شفت سرگال وشعيب
وسياراتهم موجودة رحبوا بالكل واني استحي منهم
اجاوب بالمختصـر وصلونا على بيت امي وراحوا
نمنا والثاني يوم نظفنا البيت للنص ، ثالث يوم اجر خالي
بنية كملت باقي التنظيف كله تراب واني وياهم ملتهين
بوارد العمارة كلها يوم والثاني وخلصت اول اسبوع احنا
بالعراق واني حايرة منو دز الرسالة منو ومنين جاب رقمي عجيب ؟!!
وبليلة وطلع نهارها علينا وبرغم موافقة خالي نحطيت
بعز الصدمة من سمعت اصوات وفتحت باب البلكـون
وشفت ست سيارات عالية لونها اسود تدخل المنطقة وتلمع
من تضربها الشمس ، ركنت السيارات وحده بعد الثانية
سدت الشـوارع ومن بيناتهم سيارة انفتحت ابوابها ونزل
كميل وكافل ، وسيارة ثانية بيها خواله اثنينهم ومن سيارة
ثانية نزلوا منها شيوخ وزلم بكامل هيبتهم وعُگلهم دخلوا
تقدموا لبيتنا وخالي بالباب واگف يرحب بيهم لخطبتي ...
𐙚 الباقيات الصالحات 𐙚
❀˖° سُبحانَ اللَّه
❀˖° وَالحَمدُ للَّه
❀˖° ولا إلهَ إلا اللَّه
❀˖° وَاللَه أَكبَر
شكرا لزيارتكم عالم روايات سكيرهوم
