رواية العدم نقطة السواد الفصل التاسع والثلاثون بقلم اسراء
رفيدا
توها تريد تحچي وتلفونها دگ، جاوبت
بديعة-: ها يمه ذو الفقار شلون امك ؟ .
من هناك صوته طلع عالي حتى احنا سمعناه
ذو الفقار-: انجلطت حالتها خطرة تريد تشوفچ تعالي بساع .
بديعة وجهها انخطف ركضت دگت باب وحدة من الغرف وطلع الها واحد گلتله
بديعة-: امك انجلطت امشي وصلنا الها .
والبنية الچانت گاعدة من سمعت ركضت فوك ونزلت وياها بنية ثانية ركضن برا وعباياتهن تهفهف والزلمة طلع من الغرفة مستعجل هم ركضن وراهن شايل مفاتيح السيارة بايده ويرجف ما يدخل المفتاح بجيبه
لميعة صارت العاصفة وحيدر الكرار سواهم طشار بيها مثل غنم طاب عليها ذيب ركضهم ويه خيل الحمزة ماخله واحد بيهم واگف بمكانه خاطها بيهم خوط وبهالهوسة سالفتنا ماتت سالفة الطلاگ الكل نساها
حيدر الكرار تنفس بارتياح صدره نزل ومسح عرگ جبينه بإيده ضل يباوع عليهم من طلعوا ثواني ورجع باوعلي، عيونه استراحت
شال الجنطتين مالتي ومالت مليحة طلع گدامنا
حيدر الكرار-: يلا تعالن وراي بساع اوصلچن ويا اخوانچن وارد للوالدة .
مليحة-: وين ماخذنه ؟ راح تسمع كلامهم وتطلگها؟ .
ما جاوبها طلع وسد الباب وراه
بقيت اباوعله من طلع ايدي على بطني على بالي الخطة ما ناسيتها مثل ما علمني
مليحة تقربت مني وجرتني من ايدي باوعت بوجهي وعيونها مفتوحة على وسعها
مليحة-: گوليلي من شوكت حبلتي وما گايلة الي؟ دهررر اني أختچ على الأقل بس اني گوليلي شنو تخافين من العين ؟ .
بلعت ريگي تذكرت كلام حيدر الكرار گال گولي شهرين ولا ترتبكين بس ارتبكت ريگي نشف ، حاولت ابين طبيعية وايدي لا اراديا مسحت على بطني، بطني يابسة ومطبوگة على ضهري حتى جريذي مابيها
رفيدا -: من زمان .
مليحة-: شگد زمان ؟ .
قربت راسي وهمست يم اذنها، ريحة شعرها وصلت خشمي
رفيدا -: من البارحة بالليل .
عافت إيدي رجعت ليورا خطوة، باوعت على بطني وباوعت على وجهي
مليحة-: نعم؟؟ البارحة بالليل؟؟؟؟ لچ عيني هذا حتى لو انزرع البارحة هم ما يلحگ يصير اليوم شزراعة ؟ بصل ؟ .
_ اي من البارحة ليش مستغربة؟ اني سريعة بكلشي .
_ ارتبكتي وذبيتيها ع البارحة لعد لو ما مرتبكة شتگولين؟ حبلت هسه بهاي اللحظة كدامكم ؟ .
_ اهوووو كافي مليحاااا .
_ وجعووو گولي شهرين شهرين مو البارحة حتى لا يصخمن عيشتچ ويطلگنچ من رجلچ انت شبيچ؟ .
_ اي ادري ادري .
_ تگلي البارحة هاي لو ادورين بيها الجنين بالناضور هم ما تلگينه .
_ كافي سدي حلگچ انت هو بالدعاء يثمر ادعيله .
_ ادعيله؟ ولچ اني ادعيلچ انت الله يشافيچ .
_ شلون يگولها حيدر الكرار؟ اي لا على المجنون حرج وانت خبلة ماعليچ حرج يلا امشي گدامي .
دفعتها من چتفها ع الباب وايدي الثانية بعدها على بطني، بطني تهتز من الضحك
رفيدا -: لا تگولين لحد هو گال إذا احد سألچ گولي شهرين .
_ هسه صارت شهرين؟ قبل شوية چان البارحة هسه شهرين؟ اثبتي على واحد .
_ انطمي هسه تذكرت شهرين .
_ سبحاااان الله صدگ لو گالت حبوبة هلالة سلبوحة ومسويتلي نفسها حامل .
_ شبيچ اني ضعيفة الحمل ما يبين عليه .
_ لچ هو ما موجود حتى يبين امشي خلي نستر عليچ امشي .
_ استري عليه لا تفضحيني ترا والله اگول لحيدر الكرار واخلي يفضحچ .
_ افضحچ؟ هههههههههههههههه انت فاضحة روحچ حامل من البارحة وبالدعاء يثمر شني هاي طماطة ؟ .
وهي تضحك حضنتني شالها وگع على چتافها
مليحة-: الله ياخذچ حامل وما تعرفين شوكت حبلت وبديعة صدگت شفتي وجهها شلون صار ؟ دمها انخض خض صار لبن من الصدمة .
مسحت دموعها وشبگت اصابعها بأصابعي
مليحة-: يلا امشي خل نطلع قبل لا يجيبون دكتورة نسائية تفحصچ وتنفضح خطة ابو الحسنين .
مليحة::
قبل لا نعدي عتبة الباب اتذكرت نسيت تلفوني فوگ بغرفة حنين، عضيت شفتي والتفتت على رفيدا وجهها بعد بي اثر الخدوش بس عيونها بريئة وصايرة حبابة بشكل يخلي الواحد يزعل عليها
مليحة-: رفروف اصبري انتظريني هنا بس اجيب تلفوني من فوگ واجي .
هزت راسها وراحت گعدت ع القنفة تمرد بأصابعها
يمه اختي شگد صايرة بريئة وحبابة اريد اربيها من جديد اخليها عرمة درجة اولى ماتفيد البراءة بعد
صعدت الدرج بايتين بايتين، وگفت گبال الباب وايدي على خصري اجه ببالي مغوار شلون راح اعوفه واروح ؟ يلا عود آخذ رقمه من حيدر الكرار بالدرب عبالهم اعوفه؟ والله لأصير چنة لميعة واجلطها مو اني الي استسلم بسهولة مشيت للغرفة واني اضحك ضحكة الاشرار ههههههههااي هيچ سنوني طلعت كلها وحاجبي ارتفع واحد ليفوگ وواحد ليجوا وخشمي انشمط ليفوگ
فتحت الباب هناسة گاعدة تبچي لامة ركبها على صدرها تبجي وترجف فزت من شافتني ، سحبت تلفوني من جوا المخدة خليته بصدري ووگفت عاضه شفتي الجوا واباوعلها، سنونها تتصافگ ببعضها من الخوف
مليحة-: شكو ترجفين مثل العصفور المبلل؟ منو لميعة؟ ولچ لميعة شنووو؟ فد نعال هي لا تسكتين عنها تشمرلچ كلمة شمريلها عشرة .
هناسة-: بس هي تسبني .
_ تسبچ سبيها لچ هو السب بفلوس؟ اذا سبتچ سبيها گوليلها انت هم كذا وكذا لا تضلين مثل الطابور كلمن يجي يدوس عليه .
_ اذا سبيتها تضربني .
_ خلي تضرب ضربه بضربه لا تنطيها كسيرة انت مو كيس مال ملاكمة كلمن يجي يضرب بي ردي ايدچ مو بس للأكل علميها ع الضرب طلعي سباعيتچ .
مالحگت تجاوبني وسمعت صوت بالصالة اكيد هاي رفيدا تحچي ويا شياطينها مثل كل مرة من تصفن
سديت الباب ونزلت اباوع بكل ارجاء البيت اتذكرت كلشي عشته وي المرحومة كيلاس هنا هذا البيت ما جان يليق بيها هي انظف منهم انقى منهم طيبة حيل اطيب من خبثهم كلهم، اتذكرت من سوت كيكة البرتقال قبل لا تموت ريحتها بعدها بخشمي عبالك بهاللحضة وگبال عيني من سوتها وكالت مشتهيتها وما اكلت منها ماتت وهي بنفسها
صرت بأخر باية الغصة ببلعومي، رفعت راسي وعيوني طفرت من محجرها، رفيدا راكبة فوگ هديل بالگاع، هديل ميتة من الضرب ايديها الثنتين مفتوحات ومشمورات بالگاع وجهها ما ينعرف من الدم حلگها وخشمها يصبن سوا ، و رفيدا فوگاها تلهث مثل الذيب شعرها واگع على عيونها وعرگها يصب صب تضرب بيها بكل حقدها راشدي ورا راشدي ايدها ما توگف تنزل وتصعد بدون رحمة
رفيدا -: شفتي هاي ايدچ؟ هسه ما تگدرين تحركيها بعد تمديها بوجهي؟ هاا تمديها؟ لچ احچي تمديهااا؟! .
رفعتها من هدومها تخض بيها خض، واني ارتجيت ع الدرابزون انرسمت ابتسامة شفيان غليل على شفتي وعيني تتأمل هالانتصار العظيم، خليها تكمل عليها خليها هي سحرتها وخبلتها خليها اريد تبرد گلبي هو المريض ما عليه حرج و رفيدا ما عليها حرج حتى لو تموتها تعتبر مو بوعيها
مليحة-: حيل رفروف على حلگها حتى بعد ما تغلط وياچ وتعلي صوتها بوجهچ .
رجعت نزلت عليها صارت تضرب بيها على حلگها راشدي ورا راشدي حلگ هديل انترس دم وبس ونه خفيفة تطلع منها، وفجأة باب الصالة انفتح
حيدر الكرار-: ها ما كملت..
عيونه توسعت شاف الدم سايح بالگاع و رفيدا فوگها وجهه انخطف صار اصفر ، طفر ركض لزمها من خصرها شالها شيل وحطها ورا ظهره وگف گدامها وعيونه تروح على هديل وترجع على رفيدا مصدوم ما يعرف شيحچي
حيدر الكرار-: ولچ شسويتي بيهاااا شسويتيييي .
رفيدا ترجف دفنت راسها بصدره وايدها على خدها عيونها تدمع وشعرها منثور وبأيدها الثانية اشرت على هديل
رفيدا-: هي.. هي اجت عليه والله وضربتني راشدي شوف خدي احمر والله هي ضربتني اول .
باوع لخدها احمر صدگ، لزم وجهها بأيده يباوعله بكل دقة وتركيز حواجبه انعگدت من تأكد خدها احمر بعدين باوع على هديل بالگاع سابحة بدمها
رجع باوعل ل رفيدا واخذها من ايدها جرها للحمام فتح المي يغسللها وصاحني بصوت عالي
حيدر الكرار-: امشيييي للسيارة انت الثانية .
طلعت اركض للسيارة وهما وراي حيدر الكرار يلملم بالشال على شعر رفيدا ويضمضم برگبتها ، شلهب گاعد بمكان السايق وذو الكفل ورا حاط سماعات بإذانه صعدت اني و رفيدا بصفه ، رفيدا تلهث باوعت على ايديها ترعش والدم بعده بأضافرها ماممسوح
حيدر الكرار رجع ركض جوا لأخته بقى دقايق وطلع من البيت يركض راح لبيت ذو الفقار جاب ميرج طببها على هديل ورا 10 دقايق طلع مبدل لابس عسكري ويمشي سريع بأيده بطل ماي ، صعد ويانا ومشينا
بالدرب اتصل على اخوانه يريد يسأل على امه بس محد يجاوب
شلهب -: المفروض انت هسه يم امك .
حيدر الكرار خله التلفون بجيبه وعينه ع الشارع وجهه اسود
حيدر الكرار-: حلفت يمين معظم اگطع علاقتي بأهلي كلهم مادام خلتني ابعد رفيدا عني وانه ما رايد خليهم هاي حوبتي تسحگ وتلحگ وتاخذ ثلثين من الحگ .
شلهب-: استلمم اجه كاظم بنسخته الثانية .
حيدر الكرار-: بعدها بأولها خل يعيشون ويشوفون اذا اغضب ما انجرع اخوطهم خوط مثل ما اخوط استكان الچاي بالديوان اخلي چبيرهم يترادم بصغيرهم والإمام علي شاهد .
التفتت على رفيدا وجهها اصفر وشعرها طالع من الشال واگع على خدها عيونها تروح من وجه لوجه توگف عليه شويه وترجع ل شلهب و لذو الكفل
رفعت ايدها اصابعها ترجف واشرت على شلهب
رفيدا-: مليحة منو هذا ؟ .
باوعت ل شلهب بالمراية، شفت حاجبه ارنفع فهمها بسرعة، غمزلي
مليحة-: هذا ابوچ .
رفيدا-: ابوي ؟ .
مليحة-: اي ابوچ اجه ياخذچ .
شلهب عدل ياخته وكح كحة خشنة سوى صوته خشن
شلهب-: هلا بابا رفيدا شلونچ ؟ .
رفيدا باوعتله وعيونها توسعت شفتها الجوا ترجف رجعت باوعتلي، تدور اي شي يثبت الها احنا دنچذب
حيدر الكرار-: شلهب سوق وانچب .
شلهب بلع ضحكته وعدل گعدته، ايده قبضت ع الستيرن.
شلهب-: چنت اشاقة وياها حتى لا تخاف .
مليحة-: چنا نتشاقة عيني لو ضجت لأن شلهوب گاللها بابا؟ ها ها اعتررف .
حيدر الكرار-: شقاچ هذا يخوفها اكثر هي تريد احد يطمنها مو ينصب عليها .
سكتنا، بس صوت الماطور ضل ينسمع ، رفيدا اتقدمت ليگدام ومدت ايدها من صفحة الكشن لزمت هدومه وايدها الثانية ما شالتها من بطنها مصدگه روحها حامل
رفيدا-: حيدر الكرار
مد ايده من بين الكرسيين واشرلها انطيني ايدچ، رفعت ايدها من بطنها وانطتها اله، لزمها بقوة
حيدر الكرار-: انه هين لا تخافين بابا ذوله اخوتچ هذا شلهب ابو كيمونة المدبگة وهذا ذو الكفل .
هزت راسها ونفسها الچان محبوس طلع بشهگة صغيرة
رفيدا-: اتذكرك انت بس .
التفت باوعلها وابتسامة انرسمت على شفايفه اليابسة ، عيونه الزرگ اللي چانت حمر من التعب لمعت، قرب راسه شويه عليها وهمس
حيدر الكرار-: كافي تتذكريني الي الباقي انه اذكرچ بيهم شوية شوية .
رجع يباوع للدرب وهي رجعت ظهرها ع الكرسي ايدها بإيده ما عافتها چن ايده امانها الوحيد بزحمة هالدنيا المابيها ذرة امان
حيدر الكرار-: شلهب بوجهك لبيت ذو الفقار القديم، تندله ؟ .
شلهب ايده خففت ع الستيرن
شلهب-: لا وين صاير هذا وليش نروحله؟ .
حيدر الكرار-: الافضل نخلي مليحة و رفيدا ببيت ذو الفقار القديم يمك ابوك يريد مليحة وخافن ياخذها ويمي يهددوني بأوراق البصمات فالاضل خليهن بهذا البيت ، شگلت ؟ .
شلهب-: هاهي بس منو يضل يمهن ؟ .
حيدر الكرار-: مره انه ومره انت على ما تگضي ونشوفلها چارة ، لوف على ايدك اليمنى وامشي سيدة لحد ما اگلك انه تلوف .
صدري انشرح ايدي لا اراديا انقبضت على ايد رفيدا باوعتلها هي ما فاهمة عينها على حيدر الكرار وبس، بس اني فهمت هو مجاي يگدر يتخلى عنها لو يريد يتخلى چان خلاها وراح شاف امه ومشى بشورها بس هو عايف امه مريضه عايف الدنيا كلها وخابص روحه بس حتى يأمن عليها من حقدهم ومكايدهم، والله العظيم زلمة ينحط ع الجرح يطيب
مو مثل اخو مغوار ينحط ع الجرح يلتهب
وعقابا اله حتى رقمه ما اريد ديلا خل يتأذب
وخط امه الاحمر خل يسوي اخضر من صدگ
سمعت ذو الكفل بصفي يشهگ التفتت شفته حاط السماعات بذانه مچتف ايديه على صدره، عيونه حمر يباوع للشارع ودمعة واگفة بطرف عينه ما راضية تنزل كل ما تهتز السيارة تلمع حيل وتبين
تنهدت ودعيت بگلبي ينساها يارب ينسى كيلاس يارب تطلع من گلبه وباله ويرتاح
عيني اجت ع المراية شفت شلهب غمزلي، اني فهمت اللگفه بسرعة باوعت ل رفيدا گاعده وتباوع للسيارات وانارات الشارع
شلهب : رفيدا انا اخوچ الچبير
شلهب وهذا الزغير ذو الكفل .
حيدر الكرار : رجع ياكل خ** .
رفيدا : لا اني اعرف واحد بس
مليحة : منو ؟ .
رفيدا : حيدر الكرار
شلهب : والله لو ما مسحورة الا اطيح حظچ .
حيدر الكرار : لا تغلط على مرتي هاي ام ابو الحسنين .
شلهب: اصلخةةةةة ابو الحسنين مرة وحدة ؟ .
رفيدا : اي لعد شلون اني حامل راح اصير ام وحيدر الكرار يصير ابو الحسنين وانت تصير خال لازم تفرح .
شلهب : الله ياخذك حيدر الكراااار شمسوي .
حيدر الكرار: ما سويت شي مرتي حبت
تجيب ابو الحسنين وانه مابخلت عليها .
شلهب : انا هم لو ما بخلان على اختك
چان هسه عندي 10 مثل ابو الحسنين .
حيدر الكرار : شلهب حبيبي فرق بيناتنا انت تبخل انه ما ابخل لهذا السبب انه هساع ابو الحسنين وانت خال ابو الحسنين .
رفيدا-: اي شلهب فرق حيدر جابلي ابو الحسنين وانت شجبتلي؟ ماجبت شي بس تاكل خ**
شلهب : بت الكلب انا اعلمچ نبشو كاظم بگبره كوووون ، ولك ذو الكفل افزعلي .
مليحة-: ههههههههههههههههههههههههه .
اخذهم السكوت لدقايق وبالمراية اباوعلهم شلهب يخزر بحيدر الكرار وحيدر الكرار يرفع حاجب وينزل حاجب يغيض بي مايگدر اذا ما يتحارش، شلهب اتحمحم والتفت يباوع ل رفيدا
شلهب : رفروف احلفي بامچ ما تعرفينا ؟ .
رفيدا : احلف ب ام حيدر الكرار ما اعرفكم .
شلهب : ام حيدر الكرار ؟ مو امچ يالثولة .
رفيدا : لا امه احسن لان جابت حيدر الكرار .
شلهب : والله امي لو تسمعچ الا تنبشچ ويا كاظم .
حيدر الكرار : والله مرتي حتى وهي مسحورة تعرف تحچي .
شلهب سوى نفسه مغمى عليه حتى تحن عليه لزم راسه ومثل متوجع
شلهب : آخ راسي .
مليحة: اوي عمت عيني عليك خويه .
رفيدا: شبي ؟ .
حيدر الكرار : مريض من الغيرة والسم خطية .
سحبت بطل الماي من بين الكشنين فتحت القبغ وانطته لحيدر الكرار وخطية شلهب فرح عباله راح تنطي
رفيدا : حيدر الكرار اشرب مي لا يصير بيك شي من الخوفة .
شلهب : اگص ايدي اذا ما طلع هو المسويلها سحر .
اخذ البطل من ايدها شرب منه
حيدر الكرار: انه ما اسوي سحر انه اسوي ابو الحسنين .
شلهب : ايا ابن الزفرة على هالسالفة تفتخر؟ .
حيدر الكرار : شلهب حبيبي لا تغلط ابو الحسنين يسمعك بعدين يزعل على خاله .
شلهب : لعبت روحي بالقرآن انا مطي وقبلت اجي اخذكم .
حيدر الكرار : شوف راح اثبتلك اختك تحبني .
سد البطل والتفت على رفيدا يگللها
_ يلا گولي اللهم اني اسألك الجنة .
لعبت على اعصاب شلهب لعب من جاوبته
_ اللهم اني اسألك حيدر الكرار .
_ رفة بابا الجنة الجنة هههههههههههه .
_ هو انت جنتي اذا انطاني
حيدر الكرار انطاني الجنة .
شلهب : يا اخي ما تنبلع اكرهك .
حيدر الكرار : المهم اختك تحبني .
شلهب : اي تحبك مثل حبي ل كاظم المشعول .
رفيدا : هسه تحبه لان اني احبه واللي يحبني لازم يحب حيدر الكرار .
شلهب : والله حكمتني الثولة .
مليحة : هههههههههههههههه .
وصلنا للبيت شلهب وگف السيارة وحيدر الكرار نزل فتح الباب من جهة رفيدا ومد ايده الها ماقبلت تنزل ضل متجادل وياها ويقنع بيها يرجع مايعوفها
واحنا هم نزلنا حيدر الكرار طلع المفاتيح من جيبه ذبهن على شلهب
حيدر الكرار-: روح افتح البيت وارجع حتى توصلني للمستشفى .
شلهب لزمهن نزل جنط الهدوم مالتنه راح فتح الباب ودخلهن وحدة ورا الثانية
رفيدا لهسه گاعدة. بالسيارة ايديها لازمة حافة الكرسي، تباوع لحيدر الكرار وتهز براسها
رفيدا-: ما انزل اريد اروح وياك .
دنگ عليها وايده سندها على باب السيارة
عيونه بعيونها يحاچيها بلطف وهدوء
حيدر الكرار-: ارد والله بس مو هساع باچر الصبح .
رفيدا-: ما اعرف احد منهم حيدر الكرار شلون تخليني يمهم ؟ .
حيدر الكرار-: ذوله اخوانچ بابا وهاي اختچ يحبوچ ما يأذوچ .
رفيدا-: واذا اذوني ؟ .
حيدر الكرار-: ساعتها اعلگهم واحد واحد والجعارة ما تهلهل اخليها تدگ وتغني هلا بيك يا ثاري .
مليحة-: الجعارة؟ يمه لا حيدر الكرار بعدني ما شفت ابو الحسنين عمت عيني عليك يا خالة .
نزلها بألف ياعلي ورحنا للبيت، مشيت اني و ذو الكفل گدام وهما وراي، الفضول ذبحني ف رجعت بسرعة ووگفت يمهم
شلهب طلع من البيت راح للسيارة شغلها واشر لحيدر الكرار بيده، يلا امشي
حيدر الكرار يباوع رفيدا وهي بعدها لازمة اصابعه كل ما يسحب ايده تسحبه عليها
رفيدا-: اخذني وياك عليك العباس .
_ هاي مستشفى مو لعبة بابا بس
المريض يروحلها وضلع الزهرة .
_ اني مريضة .
_ شبيچ ؟ .
_ مريضة بيك يلا اخذني .
ضحك، فرك وجهه بيده ويستغفر بصوت عالي
_ دخيل بخت جدي شلون متحمل سوالفچ انه .
حيدر الكرار-: اخذيها مليحة فوتيها جوا فوتيها وانت ذو الكفل خليك يمهن لا تعوفهن وحدهن وانت مليحة اكو غرفة على ايدچ اليمنى هاي الغرفة نامن بيها نضيفة ومرتبة .
ذو الكفل هز راسه شال جنطته على چتفه وطب جوا شمرها بنص الصالة واتمدد ع القنفة ايده حطها على وجهه
حيدر الكرار فك اصابعها واحد واحد وهي ترجع تلزمه اقوه، اخر شي باس راسها بسرعة ودار وجهه وراح صعد بالسيارة، السيارة حركت وراحو و رفيدا عيونها دمعت رادت تلحگه لزمتها من خصرها وفوتتها للبيت
طفيت ضوة الصالة، قفلت الباب واخذتها للغرفة اللي على ايدي اليمنى مثل ماگال حيدر الكرار
فتحنا الباب واول ما طبينا شفنه فانوس بالگاع مكسور والكنتور بيبانه مفتوحة هدوم طالعة منه ونصها واگع بالگاع، رفيدا گعدت ع الجرباية تباوع حواليها عينها تروح من الفانوس للكنتور مستغربة المكان
طلعت استكشف البيت، رحت للحمام وجهي غسلته بمي بارد ورحت للمطبخ فتحت الثلاجة لگيت اكل بس مو جاهز لازم اطبخ ما الي خلك سديتها ورجعت
لگيت رفيدا ذابة شالها ومتمدده تلعب بشعرها وجهها للسگف، ذبيت روحي بصفها الجرباية طلعت صوت، تنهدت وصوتي طلع عالي
مليحة-: اخيرااااااا خلصنا من لميعة وبديعة .
باوعتلها وضحكت ضحكة من گلبي طلعت، هي باوعتلي ورجعتلي الضحكة اقوى صوت ضحكتها ترس الغرفة، گمزت عليها حضنتها وهي هم حضنتني ايديها انلفت على ظهري
گمنا فتحنا الجنط واخذنها هدوم وطبينا للحمام وحدة ورا الثانية سبحنا وحدة مشطت شعر الثانية گدام الصوبة ، وبعدها رحنا للمطبخ سوينا اكل اكلنا وسولفنا وضحكنا بعالي صوتنا اتمنى لو نضل دوم هنا بعيد عنهم وعن حقدهم
اخذنا ل ذو الكفل ما قبل ياكل گال مو مشتهي
نضفنا المطبخ جلفنا المواعين، ورجعنا للغرفة طفينا الضوة وذبينه رواحنه ع الچرباية ضحكنا وسولفنا مثل قبل من چنا ببيت اهلي اخذت كتاب التاريخ قريتها لأن امتحاناتها مايصير تهملهن ، اخر شي تعبنا هي نامت على ايدي واني ضليت العب بشعرها اقرا واردد وهي تردد وراي، اصابعي تفتر بين خصلاتها شوية شوية نفسها صار هادئ واني هم عيني ثگلت ولساني كالعادة ما نسى "يا رب الگه اهلي واعرف اخبارهم" والكتاب حسيته وگع على وجهي
حنين::
تشاهدنه الف مره وما وصلنا المستشفى، ابا الحسن ثلاث مرات راد يسوي حادث من السرعة اللي يسوق بيها ماعاد يشوف جدامه من خوفه على امي، سئلنه السكرتيرة ع الغرفة ورحنا نتراكض بالممر ناس جدام وناس ورا ايدينا على گلوبنا
وانه لساني ما بطل من الدعاء حسيت ريجي يبس
وصلنا الردهة وبرا موجودين ذو الفقار و زحل و كفاية ومغوار شفت البنات يبچن والولد وجوهم سوده مخطوفة خطف، گلبي طاح بمعدتي
ماگدرت اسئلهم مشتاگه ل امي ورجلي يادوب شايله طولي دفعت الباب وطبينا عليها دفعة وحدة امي من شافتنا عينها تحركت بساع ايدها اليسرى گامت ترجف كلش تريد ترفعها النا تريد تشبگنا وما تگدر
فوگاها اجهزة تصفر، صوندات بايدها، جهاز القلب يدگ، الاوكسجين بخشمها، لميعة القوية لميعة الي تهز البيت بهدتها الي ترفع البيت كله بأيد وحدة هسان حتى ايدها ما تگدر ترفعها؟ حسافة ع الدنيا
شهگت وركضتلها ذبيت روحي على جدامها
حنين-: يمه عاينيلي احچي وياي يمه انه حنين انه اخر بناتچ يا يمه لا تعوفيني لا ترحين وتيتميني .
ابا الحسن نزل يبوس براسها ويمسح بدموعها
ابا الحسن-: يا روح ابو الحسن احچي وياي يمه سمعيني صوتچ .
سهام من جهة كاضة ايدها وتبوس بيها
خالتي بديعة كاضه ايدها الي ترجف وضامتها لصدرها
بديعة-: گومي ياخيتي گومي رديلي دخيل بختچ لا تعوفيني مالي احد غيرچ انت اختي وامي وكلشي انت بس البقيتيلي من ريحة هلي .
امي تهز براسها وعيونها مليانة دموع تريد تگول لا تبچون بس ما تگدر تحچي
طب علينا الدگتور عصبي ما يتفاهم كلش طلعنا من يمها گال الكل برا سئلناه على حالتها وگال ننتظر التحاليل وتخطيط القلب، خالتي بديعة وگفت يم الباب ايدها على صدرها وحلگها نشف من الدعاء
الممر بارد وريحة ديتول تضرب بالخشم من قوتها والضوة الابيض ضارب بالكاشي يلمع ، مشيت رجلي ميته ما شايلتني گعدت على كرسي الانتظار البرد واصل لظهري ركبي لازگة وحده بالثانية وايدي الثنتين بحضني افرك بيهن، يابسات من البرد
رفعت راسي على صوت بسطال يضرب بالكاشي عاينت شفته جاي باتجاهنا لابس هدومه العسكرية رداناته مشمرها ليفوگ زندة طالع، يلتفت ع الغرف وحدة وحدة، رافع مقدمة حواجبه يمشي بثگل وكل خطوة حاسبها، وگف يمي وايديه ورا ضهره
حيدر الكرار-: همم شخبار الحجية ؟ .
حنين-: لهسه ماطلع تخطيط القلب بس تحچي بالاشارات امي مو زينة حيدر الكرار .
هز راسه وگعد بصفي الكرسي طگ من ثگله رجع ظهره ليورا وسند راسه ع الحايط ايديه چتفن جدام وبدا يفرك بيهن زام شفته الجوا عاضها وعينه على باب الردهة الي بيها امي
ضل الهدوء بيناتنا، بس صوت جهاز القلب جوا
لحد ما حچى ، ما باوعلي ضلت عينه ع الباب
حيدر الكرار-: هي امي وانهضمت على حالها بس هاي حوبة العلوية حوبة السحورة السوتهن الها وسودنتها هي وخالتچ واختچ .
سكتت ما رديت لان صح كلامه ضليت بس اشهگ خشمي انقفل اجر النفس بالحسرات ، امي مو بس امي .. امي هي الاب والام هي الي من مات ابوي وهو شاب شالتنا كلنا على ظهرها ربتنا بالظيم ما خلتنا نحتاج احد كبرتنا سهرت علينا هساع شلون؟ بيتنا بدونها يتبهذل والله يخرب نرجع نتيتم مرة ثانية
شهگت ومسحت خشمي
انه ما انكر هي اذت رفيدا هواي وهي بعدها طفلة طفلة شنو ذنبها؟ ما عدها لا حول ولا قوة ما عدها غير تبچي كل يوم تذلها، كل يوم تكسر بخاطرها كرهتها بعمرها دمرت طفولتها ودمرت حيدر الكرار شكم مرة شفته عيونه حمر نازفة دم من وراها من قهرها من سوالفها وهي؟ ولا تهتم ولا تسأل المهم تسوي الي براسها المهم الناس تگول لميعة قوية تگدر تسيطر على بيتها وهي مو قوية هي نرجسية اي اعترف امي نرجسية ما تحب احد بگد ما تحب روحها وسيطرتها
فزيت على صوت الدكتور اجه بايده اوراق تحاليلها طفر ذو الفقار قبلنه واخذ الاوراق من ايده
ذو الفقار-: ها بشرني دكتور .
الدكتور-: الحمد لله الجلطة اللي صارتلها جلطة خفيفة عابرة وحالتها هسه مستقرة خليها ساعة تحت المراقبة واذا بقت مستقرة نطلعها بس انتبهوا عليها زين ولا تخلوها تتعب .
لاحظت الدكتور يحچي ويا ذو الفقار وعينه عليه كل ثانيتين يخطفلي نظرة بدون محد يحس استغربت شماله هذا؟ هاا؟ انه عيوني مورمة و وجهي مصوفر وحال الضيم حالي حتى شالي مرعبل شكو يعاينلي؟
ذو الفقار-: شوكت نگدر نطلعها ؟ .
دنگ راسه حك طرف خشمه يخفي ضحكته، خطفلي نظرة سريعة ونزل عينه للاوراق بساع تنحنح وجاوب ذو الفقار
الدكتور-: ساعة فقط واريدكم تنتبهون لشغلة مهمة ممنوع تتعصب او تتعرض لأي صدمة نفسية لان حالتها حساسة واي تدهور ممكن يعرضها لجلطة ثانية ومضاعفات خطيرة توصل حتى للشلل الدائم ديروا بالكم عليها وخلوا جوها هادئ ولا تخلوها تنفعل او تنضغط نفسيا، مفهوم ؟ .
ذو الفقار هز راسه بسرعة، الدكتور انطاه اوراق تخطيط القلب ومغوار وابا الحسن راحوا يمه اخذوهن من ايده واحد فتح الورقة والثاني يعاين بيها
ذو الفقار-: مشكور دكتور .
الدكتور-:؛ احمم العفو ، واذا تدهورت صحة الحجية لا سامح الله رقمي موجود بالتحاليل اتصلوا عليه اجيها للبيت وافحصها بأي وقت .
خطفلي نظرة اخيرة قبل لا يروح، يمه ايديه بيضة ونظيفة اظافره مقصوصة ومرتبة، بشرته صافية تلمع انظف من وجهي انه الي مورم من البچي
دار ضهره ومشى، لابس تراك عمليات سمائي وصدرية بيضة لحد ركبة رجله، يمشي بخطوات واثقة ريحة عطره المخلوطة بالمعقم والديتول بقت بالممر
درت وجهي شفت حيدر الكرار گام من كرسي المراجعين، مچتف ايديه على صدره، يعاين علينا واحد واحد من سمع الدكتور كلام الدكتور نزل راسه يخفي ضحكته وايده راحت على شواربه مسحهن وخر ايده وفر لسانه جوا حلگه رفع راسه وعينه استقرت على خالة بديعة
خالتي شافته عيونها طفرن من محجرهن خلت ايدها على صدرها تبچي، ايديه حطهن بهدومه وتقدم عليها بسطاله يضرب ع الكاشي صار گبالها والكل سكت يستمع الهم عاينلها من فوگ ليجوا
حيدر الكرار-: يلا نفوت انه وياچ خاله مشتاگ ل امي عندي بشارة الها بلچن تگوم بخير وسلامة .
شهگت خالتي وجهها صار اصفر ايدها عصرت على ثوبها حيييل، بلعت ريگها بصعوبة وهزت راسها
بديعة-: انه.. انه ابشرها يمه.. انه .
عبر تعداها وايده انمدت على باب غرفة امي فتحه نص فتحة
حيدر الكرار-: لا مايصير الواجب ابنها يبشرها شتگول ذو الفقار ؟ .
ذو الفقار ما مفتهم السالفة، هز راسه
ذو الفقار-: اي شوفها هي ضلت تنده باسمك من جبناها لهساتغ تريد شوفتك انت وخالتي فوتوا سوه يلا خالة .
مغوار واگف بصف ذو الفقار مرتچي ع الحايط شفته يغمز ل حيدر الكرار
مغوار-: فوتي خالة فوتي حيدر الكرار مشتاگ لأمه والي يحب امه يحب خالاتها هم مو حيادر ؟ .
حيدر الكرار عاينله وابتسم على صفحة
حيدر الكرار-: اي چا شلون الخالة مثل الام الي يحب امه يحب توابعها .
مغوار-: يلا خالة شدي حيلچ حيدر الكرار متانيچ على باب جهنم.. اقصد باب الغرفة .
خالتي بديعة وجهها انطى الوان اصفر وازرگ گام تبلع بريگها ناشف حيل ناشف وعيونه طافرة ، حسبالك ملك الموت راح يفوت وياها للغرفة ويقبض روح امي مو حيدر الكرار
اشرلها مرة ثانية بايده تفوت، فاتت ورجليها ما شايلاتها جسمها كله يرجف وايدها عاصرة ثوبها الاسود عصر لما القماش انكمش بين اصابعها
وقبل لا حيدر يطبگ الباب طفرت كضيت الباب
حنين-: اريد افوت وياكم اشوفن امي اجيت متأخرة وماشفتها .
ما اعترض فتحلي طريق وطبيت، سهام رادت تفوت هي ومغوار وحيدر الكرار ماخلاهم سد الباب بوجههم وطگه قفل
امي لهسه الاجهزة يم راسها وصوندة موصلة تنفس لحلگها وبايدها اليمنى كانونة جديدة مفتحة عيونها وتعاين لحيدر الكرار وراي، تهز براسها بخفة شفتها ترجف، تهلوس بكلام ما نفهمه بس مبينه تگله شسويت بيه ولك
رحت يمها كضيت ايدها اللي بيها كانونة جلدها ناشف بست ظهر ايدها وخليت شفتي شوية على جلدها
حنين-: يمه راح تردين النه الدگتور گال جلطة خفيفة عابرة .
عيونها تتحرك بصعوبة تريد تحچي ما تگدر هزت راسها الي بخفة
حيدر الكرار بلش يتمشى بالغرفة على كيفه كل خطوة بسطاله يطگ بالكاشي يجي يم امي يخلي ايده على جبينها ويعاين لخالتي بطرف عينه ويرد اردود يوگف گبال خالتي بديعة الي لازگة بالباب
ايديه مچتفه على صدره وعيونه ما نازلة من عليها كل ما يتگرب عليها هي تبلع بريگها وتتراجع للحايط
تقدم عليها لحد ما حصرها بالزاوية صار گبالها بالضبط، نزل راسه عليها وهمسلها بشي ما سمعته خالتي بديعة انكمشت وطبگت عيونها ، هو رفع راسه وابتسم ورد يم امي اجه يعدل جهاز التنفس على حلگ امي، خالتي بديعة عيونها انفتحت على وسعها تتابع ايده وين ما ترو، كمل وراح وگف گبالها طوله مغطي عليها
انه من الفضول عفت ايد امي وگمت، بحجة اعدل الغطا على رجليها ومنها اسمع حچيهم، اذني يمهم
رفع صدره وطگطگ عظامه ايديه دافنهن بجيوبه، مال براسه على جهة ونظراته مركزهن بوجهها
حيدر الكرار-: ها حجية انت تبشرين الوالدة بحفيدها لو انه ؟ ترا انه اذا بشرتها اخليها تگوم من الفراش من الفرحة .
شهگت ما شفتها بس سمعتها وجهي على امي واذني يمهم، اختنگت بشهگتها وكضت زنده صوتها طلع ناصي يرجف تگول چلمة وتبلع عشرة من الخوف
بديعة-: لا يمه لا .. حلفتك بأميمتك يايمه لا تحچي عاينلها بالظيم حالها دخيلك يا يمه دخييلك ما بقالي بهالدنيا الا اخيتي لا تحرمني منها مثل ما انحرمت من بنيتي، امك گلبها ضعيف ما يتحمل صدمات والله تموت .
نتر ايده منها نكت مچان ايدها من على زنده، چن ينكت شي نجس نفضها وصوته طلع بارد ابرد من الثلج مستفز كل حرف يلعب على وتر اعصابها لعب
حيدر الكرار-: اعوف السالفة كلها بس سكوتي مو بلاش ثمنه اخذه هساع واضعاف مضاعفة .
شهگت بصوت عالي كضته من ايده تهز براسها بدون وعي
بديعة-: اي اي والعباس وضلع الزهرة اييي موافقة على كل شروطك بس لا تحچي .
ما جاوبها بساع طبخ اعصابها على نار هادية
طگ رگبته ومال براسه يهيئ روحه يحچي على كيفه
حيدر الكرار-: انت تعرفيني ما احب اللف والدوران من تگوم الحجية بخير وسلامة تگليلها حيدر الكرار طلگ رفيدا ونقلها لكركوك يم عمها وانتهى كلشي بيناتهم جدام عينچ .
شهگت وطلع اول حرف منها تتريد تحچي، هو رفع ايده اشرلها تسكت وكمل
حيدر الكرار-: تطمنيها خليها تصدگ كل حرف يطلع من حلگچ تعرفين الوالدة وضعها متأزم واذا عرفت انم ما مطلگ و رفيدا حامل لا سامح الله يمكن..
ما كمل خله الجملة معلگة وعينه راحت لامي ع السدية، جهاز القلب صوته عالي، خالتي فزت ايدها انمدت كضت ايده حييل
بديعة-: اي والعباس موافقة اگوللها.. اگوللها مثل ما تريد انت بس لا تحچيلها شي امك بس هي البقتلي من ريحة هلي .
سحب ايده منها بهدوء رجعها لجيبه وهز راسه
حيدر الكرار-: چا اتفقنا كضي لسانچ زين .
بهاللحضة امي تحركت ايدها راحت لظهرها تريد تعدله وجهها معصور من الالم اشرت بايدها الثانية ع الاوكسجين تريد تشيله، تلوح بايدها، حيدر الكرار راحلها وايده صارت ورا ظهرها عدل المخدة رفعها وكض ايدها گعدها على حيلها وايده الثانية سحبت الاوكسجين من حلگها وگعد بصفها
حيدر الكرار-: سلامات حجية سلامات .
خالتي اجت هم گعدت يمها من الجهة الثانية
بديعة-: الحمد لله على السلامة اخيتي .
امي اخذت نفس صدرها صعد ونزل بتعب عاينت لحيدر الكرار وبعدين لخالتي ورجعت لحيدر الكرار عيونها وارمات والجفن احمر دم، ضربت على رجليها حيييل وحچت بحرگة گلب
لميعة-: صخوووونة يمه صخونة صارت بگلبي من ورا هالخبر ابا الفضلللل ابنييي الربيته وتعبت وسهرت عليه لياااالي متزوج هنااااسة ؟ ولك حيادر يمه شووووكت تزوجهاااا وانه اخر من يعلمممم .
حيدر الكرار ما رد يعاينلها وساكت، التفتت على خالتي بديعة وكملت الباقي من حرگة گلبها
لميعة-: بديعة انت تدرين؟ تدرين ابا الفضل متزوج هناسة؟ ولكم هناسة شنهوووو؟ منين طلعت هاي هنااااسة ؟ انه اريدن اخلص من هاللزگة رفيدا واختهااا تطلعلي ام رموووش مكااانيس .
سكتت تاخذ نفس واايدها تفرك على صدرها
لميعة-: آخ يمه گلبي حسبي الله ونعم الوكيل عليك يا نهاش وانه اگولن ليش انسدت قضية قبيس طلعوا ولدي ماخذين ام رموش فصللللل موو زلمة اليبيع دم اخوته بفصل سمعتني حيدر الكرار ؟؟؟ مو زلمممةةة .
بديعة-: لا تنقهرين مو زينة عليچ العصبية خيه كلشي ينحل لا تفكرين .
كضت راسها تعصر بي وعيونها طفرت على حيدر الكرار ضربت على رجله بأيدها
لميعة-: خابرولي ابا الفضل هسااااع خليه يجي من تركياااا شلون متزوج وانه ما ادري؟ انن امه انه اعرف مصلحته هالبت ماتفيده ولا تلوگ بأصله وفصله ماترررررهممم لو على جثتييي وجدااام عيني يرمي عليها الطلاگ ، اخ يمه ولكم اخخ ادعي لعدوينكم بغضب الجبار على هالمصايب الزتيتوها فوگ راسي .
ضل تلطم على رجليها تلوب وصوتها علا عالي تعبها
هاي امي حتلو تتعب، محد يصدگ تعبت دوم صوتها يلعلع
لميعة-: انه ربيتكم انه كبرتكم ابوكم مات وانتوا صغار منهووو سهرررر؟ منهووو باع ذهباااته؟ انه ولكم انه وبالاخير تجيبولي نساوين مايلوگن لا بيكم ولا بأصلكم ولا فصلكم ما يناسبنكم بأي شي من الاشكال وتگلولي هاي مرتييي؟؟ .
حيدر بعد ايده عنه رجع الكرسي ليورا وعيونه عليها مشفي غليله، كلامه البارحة تحقق هي ما تريد رفيدا هساع شلون راح تخلص من هناسة واعمامي ما يخلوها تطلگها والله راح يوگفون شوكة ببلعومها
لميعة-: انتو ما تعرفون مصلحتكم انه اعرف انه امكم اذا ما اسيطر عليكم تضيعون ترحون من ايديييي كل وحدة تجي تاخذ واحد منكم مني لما اصفى ايد ورا وايد جدام لا ولد لا تلد .
خالتي كضت ايدها تهدي بيها
بديعة-: اخيتي ارتاحي الدكتور گال لا تنفعلين .
امي نفضت ايدها منها نترتها نتر
لميعة-: شلون ارتاااااح ؟ وهو جايبلي ام رموووش فوگ راااااسي؟ رفيدا ما خلصت منها تطلعلي هناسة؟ انه شسويت يربي ؟ اريد احافظ على بيتي وعلى ولدي ما اريدن بنات الحرام يجروهم للتهلكة .
حيدر الكرار-: اي حافظي على بيتچ بس البيت مو بس انت احنا هم بي مو كلشي يصير برايچ .
لميعة-: لااااا برايي لان لو عفتكم على راحتكم چا هساع كل واحد متزوج وحدة ما تسوى ومخلف منها جييش جهااال انه اعرف مصلحتكم اكثر منكم بعدين.. بعدين راح تبوسون ايدي وجه وضهر لأن زحت هيچ نماذج طمعانات بيكم وبفلوسكم وتگولون الف رحمة ونور ينزل على گبرچ يا يمه لان خلصتينا وريحتي راسنا من بنات السووءء .
هز راسه ما جادلها خلاها تحچي كل ما تحچي اكثر تثبت كلامه ان هي ما تريد رفيدا وهسه ما راح تگدر تخلص من هناسة، گام عدل هدومه فتح الباب وطلع، صوت بسطاله يضرب بالكاشي لحد ما بعد
امي عاينت للباب من انسد ورجعت انفجرت كأن بطلعته انطاها مجال تحچي براحتها
لميعة-: ولكم طلعوني طلعوني ودوني عليها للبيت ما اصيرن زينة وينشفي غليلي اذا ما ادوسن بمصارينهااا هالبايعة خطافة الزلمممم وضلع الزهرة لأسوي بيها العجايب بس اطلع من هين، هين يا ام رموش هين اذا ما نتفتهن شعرة شعرة ما انحسب لميعة .
بديعة-: اخيتي هدي هساع يرخصونه ونطلع ساعتها لا تقصرين بيها .
عاينت لخالتي چن تذكرت شي
لميعة-: وهذا ما طلگ رفيداااا؟ احچي ما نفذ مطلبنا؟؟ لا تگليلي مانفذ والله اموتن هساع هين ع السدية هاي .
خالتي بلعت ريگها وعينها راحت للباب خايفه لا حيدر الكرار ورا الباب ويسمع، رجعت نضراتها ل امي وهزت راسها بساع
بديعة-: اي طلگ والله طلگها جدامي ودزها ويه اخوانها لكركوك هي واختها راحو يا اخيتي بلا ردة البيت وولادچ صفولچ وحدچ محد ياخذهم منچ .
وجهها انفتح الدم رجع لخدودها صارن حمر چنهن وردة جورية ضحكت من كل گلبها وصدرها صعد ونزل من الفرحة، ضحكت بصوت عالي ونست حتى الجلطة، ايدها اللي بيها الكانونة كضت چتاف خالتي حييل
لميعة-: صدگ راحت؟ الله يبشرچ بالخير يابديعة الله لا يردها هاي اللي خربت بيتي هاي اللي خلت ابني يعصيني انه گلتلكم انه اعرف مصلحتكم من تروح هي يرد البيت مثل ما چان واحسن .
عاينتلي، واشرت علي
لميعة-: شفتي؟ من سمعتوا كلامي شلون ارتاحينا ؟ انه لو ما اضغط لو ما اصيرن قوية چا هساع راحت هيبتنا چا كل وحدة تجي تاخذ واحد من ولدي وتمشي بس انه ام انه اعرف منهو الزين ومنهو الموزين انتوا غلط وانه الصح، دائما انه الصح .
ضحكت وذبت روحها عالمخدة عينها عالسگف صفنت لحظة واتذكرت طلگها فزت من مچانها تضحك بعالي الصوت
لميعة-: ولكم طلگهاااا ههههههههههههههههه .
وباست خالتي من خدها بوسة قوية ورد تمددت شوية ونوب فزت مرة ثانية باستها صوت البوسة طگ ورجعت تمددت غمضت عيونها وتنفست براحة
لميعة-: الله لا يردها درب اليصد مايرد ان شاءالله كون تسوي حادث بالدرب وتفقد الذاكرة وتتسودن رسمي ويدخلوها للشماعية .
هاهي انتصرت هذا المهم عدها تنتصر وبس مثل ما انتصرت قبل على ذو الفقار دمرته خلته خاتم باصبعها يمشي بشورها وعلى مرامها وتالي؟ تالي اخذت له وحدة تخونه وتركض ورا غيره
تحسب روحها انتصرت وخلصت من رفيدا ما تدري هي المنتصرة بالحچي وبس وحيدر الكرار لاعب بيها وبلعبها
لميعة-: خلي تروح الله لا يردها هساع بقت هاي هناسة هم اطلعها انه ما اخلي وحدة تاخذ ولدي مني ولدي الي واعرف مصلحتهم وبيتي الي كلمتي الي تمشي مثل ما طلعت رفيدا اطلع هناسة انه لميعة محد يگدرلي .
الدكتور رخصها نزعوا منها الكانونة كتبوا ورقة خروج وطلعناها، ذو الفقار اخذ كفاية و سهام وراح بسيارته واحنا وي ابا الحسن
حيدر الكرار ما اجه ويانه صعد بسيارته وراح لدوامه
بالسيارة امي گاعدة بالنص بين بديعة و زحل وانه جدام يم ابا الحسن، طول الطريق ما سكتت صوتها طبل ويطگ على راسي
لميعة-: بعدها بالبيت مو؟ هناسة بعدها بالبيت؟ .
زحل-: اي ماما بالبيت .
يا رب هديل تنتبه عليها وتضمها بمچان مثل ما وصيتها يا رب ما اذتها البت خطية بريئة بس والله صدمني اخوي شوكت اتزوجها؟ فلك والله اخواني شياطين مو زلم واحد يطلگ بالچذب والثاني يتزوج بالسر سودنوها ل امي فوگ ما هي مسودنة
لميعة-: هاي ماخليها مثل رفيدا لا، ذيچ خليتها گوت شوكتها هاي هساع اطلعها من البيت هسااااع وقبل لا يجي ابا الفضل ما اصبر عليها اقضي عليها واقلعها قبل لا تثبت جذورها ببيتي .
عاينت ل ابا الحسن رفع مقدمة حواجبه بمعنى راح تعلگ اليوم
لميعة-: ابا الفضل هذا ما اخافن منه هذا زلمة على گد ايدي مگدور عليه مو مثل حيدر الكرار هذا ابليس على هيئة بشر حيدر الكرار هو الي يخوف ما ينلعب وياه.. اما ابا الفضل لا ، احچي وياه چلمتين ويرد يمشي بشوري .
السيارة تمشي والشمس تصعد ليفوگ تتعلگ بالسما وتضوي علينا ضواها طب للجام ، غفيت ع الكشن واسمع صوتها طول الطريق ما سكتت تتوعد وتخطط چن ما طلعت من مستشفى چن طالعة لحرب جديدة
رفيدا::
گعدتني مليحة من الصبح ريگتني ورجعت نمت وجهي مدفون بالمخدة بس ما نايمة كلش گلبي فز اول ماسمعت صوت بسطالة بالبيت ، طلعت عين وحدة بس، شفته شايل كتابي اللي قرتني بي مليحة يروح ويرد باوعلي ابتسم، اتحمحم وبدا يقرا بصوت عالي
حيدر الكرار-: سؤال: ما هي نتائج ثورة العشرين؟ الجواب: سقوط الدولة العثمانية وقيام دولة إسرائيل .
رفعت راسي شويه اباوعله بنص عين وشعري واگع على خدي
رفيدا-: لا مو هيچ هذا الجواب غلط .
ما باوعلي گلب الصفحة وقرا سؤال ثاني
حيدر الكرار-: سؤال: من هو مؤسس الدولة العباسية؟ الجواب: صدام حسين .
رفيدا-: حيدر الكرار دا تتشاقه وياي مو ؟ الجواب ابو العباس السفاح مو صدام حسين .
سد الكتاب وباوعلي
حيدر الكرار-: چا درسيني انت، انت الشاطرة .
گلبت عيوني ورجعت دفنت وجهي بالمخدة
رفيدا-: ما اريد انت عفتني ورحت كل النهار مشغول مشغول مشغول عمري راح يخلص وشغلك ما خلص .
وفجأة اجت براسي سالفة البنات من گلولي اتزوج عليچ، اي والله صدگ يجوز متزوج واني الغبية ما ادري؟ يجوز هسه عنده وحده ثانية واني عبالي بالشغل؟
اجه گعد يمي، الچرباية نزلت من ثگله
حيدر الكرار-: گومي من امس ما شايف وجهچ عدل .
_ هسه شفته خليني انام .
_ اي شفته بس ما مليت عيني گومي احاچيچ .
_ اهوو شتريد ؟ .
_ اريد عيونچ مشتاگ تشبگ عيوني .
گلبت عيوني، فتحتهن بصعوبة وباوعتله
_ هاه عاينتلك هسه شنو ؟ .
سرح بوجهي شويه وضحك
_ هيچ اريدنچ تبقين تعاينيلي لا تغمضين .
_ ما اگدر نعسانة .
حضن وجهي بچفوفه يگلي
_ عاينيلي گلت راح اعضچ ام خشم اليابس .
_ اهوو شبيك اليوم ؟ .
_ شبيه؟ متسودن عليچ شبيه .
ضحك بس ضحكته ما طولت فجأة سحب ايده من وجهي وفرك رگبته عيونه راحت بعيد مو يمي يفكر بشي
حيدر الكرار-: گومي عندي موضوع وياچ .
انفجرت ما تحملت رسالة الاسفنجة والزوجة الثانية بعدهن ببالي، گعدت على حيلي، اتخوصرت والأيد الثانية اشمر بيها بوجهه
رفيدا-: اي عندك موضوع موضوع شنو؟ موضوع زوجتك الثانية جاي تصارحني موو؟؟؟ جبت وحدة من العمارة واتزوجتها لأن ذاكرتها قووووية احسن مني ؟ .
باوعلي ما فاهم، ايده جمدت على رگبته
حيدر الكرار-: شنهو ؟ شمالچ بويه گمزتيني لازم شيطانج ناوي ع المشاكل اليوم .
ضربت المخدة بأيدي ووخرت گذلتي ليورا
رفيدا-: لا تسوي روحك ما تدري حنين شالت اسفنجة المواعين وگالت هاي رسالة من حيدر الكرار گالت انت كاتب مرتي العزيزة بما انچ نسيتيني فانا نسيتچ واتزوجت وشكرا شكرا بعينك يا ابو عين الفارغة وحدة ماتكفيك الا اثنين طبگ .
ضل صافن محتار شنو يجاوبني، واني كملت بحرگة گلب
رفيدا-: وبعدين گالن بعتني بمنسفين ولحم زايد ورحت للعمارة تدور وحدة ذاكرتها فول لان اني ذاكرتي مثل ذاكرة السمچة صح لو لاااااا ؟ .
حيدر الكرار-: رفة انه...
رفيدا-: لا تقاطعني اني حافظة اسمك حيدر الكرار حافظته ليش تگول اجيب وحدة تحفظ اسمييي؟ وگايل اذا انسى مرة ثانية تردني لاهلي؟ اني ناسية الدنيا بس ما ناسية اسمك ليش تبيعني؟ بيش بعتني احچي ؟ .
عيوني دمعت بس مابچيت، كل شوية امسح طرف عيني، فرم وجهه بثنين ايديه وباوعلي ابتسامة متعلگه بطرف شفته، متونس على عطابي
حيدر الكرار-: خلصتي ؟ .
رفيدا-: لا ما خلصت وين تروح وتتأنق وتتعطر وكاشخ؟ منو هاي؟ منو الي عايفني على مودهاااا؟ ولك والله اذا صدگ متزوج اذبحك واذبحها واتعشه بيكم ثنينكم .
حيدر الكرار-: اشش مسودنة انه هساع اجيت وگعدت وياچ وعاينت لدربي عدل لا تتلفين اعصابي بدموعچ .
رفيدا-: اي هسه اجيت ومن الصبح ما شايف وجهي عدل؟ وجهي عدل گدامك شوفه شوف شلون صار من وراك .
لزم ايدي اللي على خصري وجرني عليه، باسني من جبيني بوسة سريعة
حيدر الكرار-: رفة استهدي بالرحمن شنو اذبحك واتعشه بيك؟ انه كاتل روحي عليچ منو هاي الثانية بلخ؟ جيبيلي ياها خل اشوفنها اذا حلوة اتزوجها صدگ .
انقهرت حسيت روحي جاي تطلع مم كلمة اتزوجها صدگ تخيلته الموقف گبالي، قبضت ايدي وضربته على عضلات بطنه بكل قوتي
حيدر الكرار-: والعباس چذذببب زوجة ثانية شنهو ؟ انه اتعطر علمود دوامي بويه اريدن ابين مرتب مو علمود مرة انت وحدة وما خلطان منچ انوب اجيب ثانية ؟ حتى يطيح حضي رسمي .
رفعت اصبعي بوجهه اهدد بي وهو حلگه انشگ من الضحك، ورا كل حچاية احچيها يبوس اصبعي
رفيدا-: لا تضحك ترا الاسفنجة بعدها يمي ضميتها دليل ضدك خاف ترجع الرسالة .
_ الله ياخذچ ياحنين على هالدگة .
_ شنو ؟ .
_ احمم گلت جيبيها اشوفنها .
_ لا هم تضمها وتگول ماكو رسالة
مثل ما گالت كفاية مسحها بساع .
_چا شلون اثبتلچ انه ما اتزوجت ؟ .
_ تحلف بالعباس ما تفكر تجيب وحدة ذاكرتها قوية .
_ وحگ منسف اللحم الي تكولين بعتني بي وحگ الاسفنجة الي سوت المشكلة كلها ما متزوج لو متزوج چا ما انامن يمچ چا نمت يمها مو ؟ .
_ وشحدددك تنام يمهاا غير بحياتك بعد ما تشوف النوم؟؟؟ .
_ ما انامن حتى اذا متزوج ثانية هم انام يمچ وهي تنام بالصالة .
_ حيدرررر الكراااارر .
_ اشاقه وياچ بس تدرين؟ لو صدگ اتزوج ثانية اخليها هي تطبخ وانت تاكلين هي تغسل مواعين وانت تنامي شرايچ؟ فكرة حلوة مو؟ .
_ ولككك ياااربي حيموووتني ابو النسوااان .
طفرت من الچرباية اريد اطلع، ومد ايده جرني من دشداشتي سحلني سحل ورجعني گعدني على رجله
_ وين وين؟ ام منسفين تعالي گعدي اشاقه ما اتزوج اخافن منچ اذا اتزوج تذبحيني وتتعشين بيه .
سكتنا ثنينا، هو نفسه بعده ثگيل من الضحك واني انفاسي سريعة من العصبية ايده الي جرني بيها بعدها لازمة طرف دشداشتي ماعافها
رفعني شوية من خصري وعدل گعدتي على رجله خلاني مقابيل وجهه بالضبط عيونه راحت على شفتي على خشمي اليابس الي يسميه، على عيوني المدمعة وبعدين رجع لعيوني وسرح هناك نسى الدنيا والبيها
حيدر الكرار-: تدريين شوكت عرفت انه ما اگدر على فراگچ؟ .
ضليت ساكته، اباوعله
حيدر الكرار-: من تنسين.. من تنسين روحچ من تنسين اكلچ من تنسين حتى شلون تتنفسين مرات وارد اذكرچ بكلشي احسچ طفلة احسچ الي شلون اجيب وحدة ثانية وانت ما حافظة روحچ؟ منو يدير باله عليچ غيري ؟ .
دمعة وگفت بطرف عيني، شهگت ونزلت ويه شهگتي ماحسيت بيها، جريت ردني ومسحت بيها خشمي
رفيدا-: واذا نسيتك انت هم ؟ هم تروح تتزوج؟ .
ضحك لأن مسحت خشمي بهالطريقة، ومد ايده مسح دمعتي بأبهامه
حيدر الكرار: ارد اذكرچ واذا نسيتي مرة ثانية هم اذكرچ لحد ما تحفظيني لحد ما اسم حيدر الكرار يصير بدمچ مو بس بذاكرتچ .
لزمته من جتافاته ايديني صغار وهو چتافه عراض قربت منه وهو عيونه صارت تدور وين راح ابوسه
بسته بخده بوسة سريعة ورجعت بسرعة
دار وجهه وقرب خده الثاني
حيدر الكرار-: آخ بويه يلا هذا الخد زعل يريد وحدة هم .
_ ما ابوس بعدين تتعود .
_ بوسي يلا ترا بديت اضوج ومن اضوج انه ابوسنچ ويابويه شلون راح ابوسن .
لزم وجهي بايده وقربه منه
_ يلا بوسي ام خشم اليابس .
بسته مرة ثانية وهالمرة طولت
_ ياااايابه يا بووويه على هالبوسة هساع انه ذاكرتي فووول بعد ما انسى هالبوسة .
_ لعد اذا هاي بوسة بخدك خلتك تصيح يا يابه شلون لو ابوسك من حلگك ؟ .
_ اي الله سويها.. اقصد عيب شهالاستهتار
منين تعلمتي هاي السوالف الفاسقلليه ؟ .
وگفني على حيلي وعدل هدومي، گام وراح للباب يصيح ل مليحة وصفگ بأيديه الثنتين
حيدر الكرار-: يلا مليحة وين صرتي .
باوعت للباب شفت مليحة اجت شايلة مگص
رفيدا-: هذا شنو؟ شتريد تسوي؟ .
اخذ المگص من مليحة وقرب مني ايده انمدت بكل حنية لمس شعري غلغل اصابعه بي عيوني غمضت لحالها من لمسة ايده
حيدر الكرار-: اگص شعرچ .
فتحت عيوني بسرعة، ولزمت ايده المتغلغله بشعري
رفيدا-: شعري؟ لا ما اريد هيچ حلو .
حيدر الكرار-: حتى تصيرين زينة حتى تردلچ عافيتچ يلا شدي حيلچ هاي سنة هم الشعر التالف من المرض ينگص حتى يقوى .
رفيدا-: خل اروح اغسل واجي .
رحت للحمام غسلت طلعت لگيته ينتظرني بالباب ذو الكفل نايم ع القنفة بالصالة اخذني من ايدي برا
شفت كرسي خشب محطوط جوا شتلة رمان چبيرة صاير عليه في اخذني من ايدي وگعدني عليه ايدي ترجف، ليش يريد يگص شعري؟ اتلمس بيه ودموعي متجمعة بطرف رمشي، مليحة جابت وصلة حطتها عليه حتى لا الشعر يوگع على هدومي، شدتها على رگبتي وراحت للبيت
هو وگف وراي، جمع شعري ليورا، ما خلى مجال للسكوت ضل يحچي حتى انسى موضوع شعري
حيدر الكرار-: تدرين الرسول شگال؟ المؤمن اذا اصابه اذى حتى الشوكة يشاكها إلا كفر الله بها من خطاياه وانت شگد تحملتي هذا كله اجر الچ .
سمعت صوت المگص اول طگة فزيت
رفيدا-: شعري .
كمل بنفس نبرته الهادئة الي تبث سكينة وطمأنينة بگلبي
حيدر الكرار-: وشعرچ هذا؟ هساع نگصه بنية الاجر بنية انه يطلع اقوى بنية الزينة الي لزوجچ كلشي بنية ينكتب الچ .
حسيت ايده ترفع خصلة يريد يگصها، بس ما انتبهت تركيزي كله بصوته وكلامه
حيدر الكرار-: تعرفين قصة ام سلمة من انگطع شعرها؟ چانت تگول الشعر زينة بس انه برائيي العافية ازين وانت عافيتچ اهم من كلشي عندي .
خصلة وگعت بحضني باوعتلها ورجعت اباوع گدامي، هو يفتر عليه اشوف بس بسطاله وصوت المگص بأذني، صوت تغريد العصافير بالشجرة هم يغطي على صوت المگص شويه
حيدر الكرار-: استغفري وياي يلا استغفر الله شوفي شلون الاستغفار يطمن الگلب تدرين الله تعالى شگال؟ وما كان الله معذبهم وهم يستغفرون .
صرت اردد وراه خايفة وگلبي يضرب بضلوعي، بس كلامه لهاني سحبني من الدنيا بكبرها
حيدر الكرار-: بعد گولي الحمد لله احنا نگص اطراف غيرنا يتمنى عنده شعر يگصه الحمد لله على كل حال حتى على المرض لان المرض يرجعنا لربنا .
كل طگة توگع خصلة من عمري من شعري الي چنت اموت عليه، عيوني غوشت اشوف شعري تارس حضني تارس ايدي، جوا على الثيل بكل مكان التفت اشوف شعري وهو ما سكت صوته فايض فوگ راسي مثل دعاء مثل إيد تحضن
حيدر الكرار: لا تغمضين عاينيلي عايني على وجهي لا تعاينين على حضنچ جاي احچي وياچ بابا
ايده ترجف بس صوته ثابت يريد يبين قوي گدامي بس اني اشوف رچفته بالمگص وهو يگص شعري
حيدر الكرار-: تذكرين آية؟ واذا مرضت فهو يشفين مو الدكتور، مو انه ، هو يشفيچ، احنا سبب بس .
والله اشوف رجفته كل ما يلزم خصلة ايده تنتفض المگص يطفر ايده ما تطاوعه يريد يگص بسرعة حتى ما اشوف حتى ما ابچي بس رجفته يتنفس بصوت عالي يحاول يغطي على صوت المگص بصوته
حيدر الكرار-: هساع خلصنا بابا گولي ما شاء الله حتى ما تنحسدين .
ل
زم المراية وخلاها گدام وجهي، وجهي صغير ابيض وعيوني كبار مدمعات وشعري يا يمه شعري صار خفيف قصير رفعت ايدي لمسته ما ينلزم، صار قصير مثل شعر الولد حيل قصير وخشن بايدي، باوعتله وعيوني صبت دمعها الچنت حابسته
نزل لمستواي گعد على ركبته بالثيل گبالي ومسح الخصل من حضني بايده ذبهن بعيد يريد يبعدهن عني حتى لا اشوفهن
رفيدا-: شعري ؟ .
_ گولي ما شاء الله لل تنحسدين انه.. انه ااول واحد راح يحسدچ .
_ لا لاااا والله لاااا .
لزم ايدي الاثنين بأيد وحده حتى ما اضرب روحي وبأيده الثانية اخذ المراية ضمها ورا ضهره
_ هاي المراية چذابة اذا ما عجبتچ اشمرها انه مرايتچ بابا عايني بعيوني عيوني تگلچ انت احلى وحدة بهالدنيا والله عيني ماتشوف احلى منچ .
رفعت ايدي اريد اضرب وجهي اريد اضرب راسي اضرب روحي ما اعرف شنو اريد بس اريد اموت وارتاح
_ لااا لا مو حلوة مو حلوة صرت عوفني ما اريد اضل بهالدنيا ما اريد .
ثبت ايدي على صدري بكل قوته، وشمر المراية بعيد بالثيل وفتح حضنه وضمني سحبني سحب من جتافي ودفن وجهي بصدره حضني حييل ضمني بين ضلوعه حتى ما اتحرك
_ اريده اريد شعري رجعه ليش گصيته؟ صرت مو حلوة ولك اريد شعرررييي .
_ اهدي بابا اهدي والله احلى والله زينة .
_ لا مو زينة لاااا .
باس راسي مره ورا مره وهو يردد
حيدر الكرار-: بسم الله الرحمن الرحيم واصبر وما صبرك إلا بالله، ولا تحزني..
ماخليته يكمل، رجعت ابچي بصوت عالي وايدي مچلبه بهدومه
حيدر الكرار-: رفيدا سمعيني، الله تعالى يقول لا تقنطوا من رحمة الله، انت مريضة واجرچ چبير شعرچ يرجع والله يرجع احلى من قبل هساع هذا اختبار، وبشر الصابرين بابا وبشر الصابرين .
رفيدا-: بس اني ما اريد هذا الاختبار اريد شعري .
حيدر الكرار-: وانه اريدچ عدله اريدچ جدامي الشعر يطول بس اذا راحت صحتچ ما ترجع تدرين؟ قل لن يصيبنا إلا ما كتب الله لنا، هذا مكتوب واحنا لازم نرضى .
باس راسي مرة ثانية، وايده الترجف مستمره تمسح على شعري بدون ملل وتعب
حيدر الكرار-: شوفي هساع صرتي خفيفة حتى الوضوء اسهل حتى النوم اسهل وكل ما تلمسي تذكرين ان راح يرجع والله يرجع .
صوتي انبح من الصياح تعبت وراسي وگع على صدره، وايدي بعدها تضربه بضعف بدون حيل
لزم ايدي باسها وخلاها على گلبه حتى احس بدگاته، دگاته سريعة خايف اكثر مني
حيدر الكرار-: گولي وياي، إنا لله وإنا إليه راجعون، گوليها، الچ اجر بيها .
رفيدا-: إنا لله وإنا إليه راجعون .
صوتي يادوب طلع، وعيوني نضرها مغوش اباوع ل مليحة واگفه بباب البيت ايدها على حلگها تبچي وتباوعلي ، حيدر الكرار ضمني اقوى يريد يفوتني جوا ضلوعه وگالها كأن يريد يلقني بيها يريد الله يسمعنه احنا اثنينه بحضن واحد
حيدر الكرار: إنا لله وإنا إليه راجعون.. اللهم أجرها في مصيبتها واخلفها خيرا منها .
هناسة::
من الفجر وهديل ما عافتني، كضتني من شعري وتالي ضربت راسي بالحايط، حسيت الحايط فطر راسي دافعت عن روحي وضربتها، بس هي اقوى مني ردتلي الضربة اضعاف يبوكس على خشمي حسيت خشمي طگ والدم نزل حار على حلگي دخت والدنيا فرت بيه ووطحت على الگاع
ما لحگت اخذ نفس واگوم اجت فوگاي برجلها داست ببطني دوسة خلت بطني تنعصر زعت كلشي جواي طلع دم واكل ريحته گلبت معدتي، لميت ايدياتي الثنتين احمي بطني نزلت عليه هي فردتهن وداست على وحدة منهن، حسيت عظامي اتكسرت ورجعت داست ببطني مرة ثانية حتى اسكت وبچف ايدها نزلت براشدي قوي على وجهي، اذني طنت
مالحگت ادافع عن نفسي جرتني من شعري وگومتني على حيلي رجليه ما شايلتني وبدت تنزل وتصعد بيه من الدرج، نزول وصعود نزول وصعود كل درجة اصابع رجلي تنضرب بالحافة الجلد انسلخ ونار شبت بيهن لحد ما بطلت احس بيهن ورمن وصارن ثگال، من تعبت ذبتني بالغرفة وراحت، فاقدة ما ارفع لا ايد ولا رجل
ما اعرف شگد صارلي مشمورة بالگاع، جثة هامدة خشمي ينزف وحلگي مجروح صدري يصعد وينزل بشهگات خفيفة، النفس ينحبس بخشمي من الدم الناشف
فتحت عيوني شفتها گاعدة گبالي مادة رجليها يم وجهي كل ما اتحرك شوية تدفرني برجلها على راسي
هديل-: بعدچ ما شفتي شي بعدچ يا خطافة الزلم بس تجي امي تشوفين الويل والله لتشوفين عزرائيل وهو يقبض روحچ صبري جاية بالدرب .
حاولت اتحرك ما گدرت كل جسمي يلچمني هالچلبة ما خلت بيه نفس
وابا الفضل؟ اخ يا ابا الفضل كلامه يفتر براسي مثل سچين، چذب والله چذب گال ما اخليهم يشمرون عليچ ريشة وهم سحنوا عظامي سحن هاي لو شامرين ريشة اهون هاي دوسة برجل هاي بوكس بخشم هاي جر من الشعر وين الريشة بالموضوع؟ هاي ريشة؟ هاي سحن عظام، وين حچيك يا ابا الفضل؟ وين ؟ .
جفني ثگلن وغفيت؟ ما غفيت؟ ما ادري بس احس روحي تلعب وبطني تگلب من الوجع ومن ريحة الدم بخشمي، ما صحيت الا على صوت لميعة دوى بالبيت كله وبث الخوف بگلبي
لميعة-: وينها هاي ال*** البايعة؟ خطافة الزلممم، بت الشوارع وينهاااا؟ .
فتحت عيوني على وسعهن، شهگت وگعدت بكل حيلي الضعيف الباقي بيه، هديل من سمعت صوت امها طفرت عيونها تلمع جرتني من شعري وسحلتني سحل على الدرج وهي تضحك ضحكة عالية تخوف راسي يضرب بالحايط واصابع رجلي ينسلخن ازيد جدامي كلشي غواش بغواش ما اشوفن حتى دربي بس اسمع الضجة جوا، صوتهم عالي
شمرتني بالگاع الباردة بالصالة رفعت راسي، مالحگت اعاين للوجوهةوانطبع على خدي راشدي قوي اذني اليمنى صفرت وطنت حسيت خدي اشتعل بنار
ذو الفقار صاح بوجه امه وگف جدامها وايدين ممدودة منا ومنا يحاول يحميني
ذو الفقار-: يمه عوفيهااا ابا الفضل مو مسافر والله اذا وشافها هيچ يدمرچن دماااار ذاك مسودن اكثر من حيدر الكرار ما تعرفينه شكد حباها لهالبت يمه لا تضيعينه مثل ما ضيعتي حيدر الكرار يمممه .
مدري منين طفرت جرتني من شعري وگومتني على رجليه الي ترجف وما شايلتني، ايدها كضت شعري بگوة وايدها الثانية تنزل عليه راشديات ويا كل چلمة راشدي
لميعة-: افتريتي على ابني من ورا ظهري؟ حسبالچ راح اسكتلچ مثل ذيج البايعة رفيدا واختها واخليچ تلعبين جووولة بكيفچ؟ لااااا حبيبتي انه لميعة چلمتي هي التمشي على ولدي وعلى الوادم كلهاااا .
مانطقت بحرف مو خوف بس حلگي ما ينفتح ريجي يابس ونفسي تلعب احس على اي لحظة راح ازوع عليها البنات حوالينا حنين وزحل كاضات ايديها يردن يفكن شعري من ايدها وهي لازگة كلش ماتقبل تعوفه
حسيت نفسي انسحب برا الشمس ضربت بعيوني عمتني، مشت سحل تسحل بيه من شعري والبنات والولد يركضون ورانه يعيطون عوفيها يردوها تفكني وهي ما تسمع ما تشوف صايرة بارود
وگفتني جدام شي اسود، فركت عيوني بايدي المورمة وضحت الصورة شوية شوية شفت حفرة محفورة گبالي غميجة كلش تقبض الگلب، جرت شعري حييل لحد ما حسيت فروة راسي راح تنشلع حطت عينها بعيني واشرت ع الحفرة بأيدها
لميعة-: شايفة هاي؟ چنت اريد ازرع بيها شجرة بس هساع لگيتلها شغلة انفع .
فرتني من ايدي صرت بوجها والحفرة وراي سحبتني عليها حييل، ايدها كاضه زنودي الاثنين حسيت اضافرها دخلن جوا اللحم ايدها الثانية حطتها على صدري تدفع بيه ، رجليه نبتتها بالگاع احفر بالتراب جواي حفر حتى ما اطيح ، عينها شابگه بعيني تعاينلي چن انه عدوتها من سنين تريد تگطع لحمي بسنونها وتذبه بالحفرة گطعة گطعة
بهاللحظة متت گلبي وگف ونزل لبطني، بطني انعصرت حسيت الحفرة راح تبلع ضهري اذا طحت بيها محد يطلعني محد يگدر يخلصني، راسي انترس افكار شلون اخلص ؟ شلون ازيح ايدها؟ شلون اخليها تتراجع؟ اذا صحت محد يفيدني
الخوف خلا حلگي ينشف بلعت ريگي بگوه ما فكرت شنو العواقب ما فكرت ابا الفضل شيصير بي ولا هي شتسوي بيه بعد بس چذبة وحدة اجت ببالي چلبت بيها مثل غرگان يچلب بخشبة ،
هناسة-: انه حاااامللل والعباس حاامل حامل من ابنچ خالة ....
