رواية جريمة في شقة مشبوهة الفصل الثالث بقلم ياسر عوده
وفضلنا نتكلم شويه، وبعد العصر لقيت شيماء قالتلي:
-يلا بينا علشان نروح الكوافير علشان تتعلمي الشغل.
وفعلا لبست هدومي ونزلت معاهم، وهناك قابلت مدام سميه اللى اول لما شافتني سألتني:
-عمله ايه النهارده يا زيزي، عرفتي تنامي كويس ولا ايه؟
-ايوه يا مدام نمت كويس الحمد لله، البركه فيكي بعد ربنا.
-انا ماعملتش حاجه، كلنا اسباب ربنا بيسخرنا لبعض.
واتكلمت مع شيماء وقالتلها:
-خدي زيزي معاكي يا شيماء وعرفيها طبيعه شغلنا، انا عاوزاها تتودك في الشغلانه دي كويس اوي، زيزي شكلها يجي منها اوي، وهتبقى اسطي قد الدنيا.
ابتسمت شيماء وقالت:
-عندك حق يا مدام سميه، هي فعلا مؤهلاتها جامده ويجي منها جامد.
والاتنين كانوا بيضحكوا، وانا ماكنتش فاهمه الكلام اللى بيقوله، حاسه انهم بيقولوا حاجه انا مش فهماها، وعلشان كده انا كنت ببتسم معاهم وخلاص.
امهم اني ابتديت اتعلم الشغل منهم، بس في نهايه اليوم حصلت حاجه غريبه اوي، كانت الساعه حوالي 12 نص الليل، ولقيت في راجل دخل من باب الكوافير، في البدايه كنت متخيله انه ماخدش باله مثلا ودخل المكان بالغلط، بس بعد كده فهمت انه عارف هو دخل فين، اصله لما دخل راح على مكتب مدام سميه وقالها:
-وحشاني يا سوسو.
وقتها هي ردت عليه بعد ما قامت من مكانها وقربت منه وهي مبتسمه وحضنته وباسته من خده وهي بتقوله:
-انت كمان وحشت سوسو يا قلب سوسو، كل دي غيبه، ايه ماوحشنكش؟
-وحشتيني طبعا، وعلشان كده اول لما رجعت من السفر جيت عليكي، انا مالحقتش اقعد مع العيال خالص.
-العيال بردوا ولا ام العيال.
ضحك الشخص الغريب دا وقال:
-هي لو ام العيال بتوحشني كنت جيتلك بردوا، المهم قوليلي ايه اخر الاخبار، في جديد.
-طبعا في جديد، سميه ديما بتاعت الجديد كله، تعالي بس انت ادخل والجديد هيجيلك.
ودخلت سميه ومعاها الشخص دا من باب كان موجود جوه مكتبها، ماكنتش عارفه ان في باب في المكتب بتاعها من الاساس، المهم بعد ما دخلوا من الباب دا وقبل ما مدام سميه تقفل الباب بصت لـ شيماء وقالتلها:
-ابعتيلي روجينا يا شيماء.
-حاضر يا مدام من عنيا.
ودخلت مدام سميه مع الراجل، وشيماء قربت من روجينا وهمستلها في ودانها بكلام ماسمعتهوش، وبعد لحظات روجينا لقتها دخلت من نفس الباب اللى دخلت منه مدام سميه، وبعد كل الحاجات الغريبه دي اللى حصلت، انا روحت عند شيماء وقولتلها:
-مين الراجل ده، وليه بيدخل كوافير حريمي.
-دا يبقى المعلم عصام الفكهاني، صاحب اكبر محل للفاكه، ويبقى ابن عم مدام سميه.
-اااه ابن عمها، علشان كده كانت بترحب بيه بزياده وكمان خدته ودخلت معاه، بس ايه الباب اللى دخلوا منه دا، انا ماخدتش بالي منه؟
-دي شقه المدام سميه مأجراها وعملاها استراحه ليها او لـ أي بنت من البنات لو حبت ترتاح ولا حاجه، وبتستقبل فيها ضيوفها، اصل المدام سميه بيجلها ضيوف كتير اوي.
-تمام، طيب هي روجينا راحت معاهم ليه؟
-هتكون راحت ليه يعني، علشان تضايف الراجل، هو الراجل دا مش هيحتاج يتعمله مشروب او أي طلب يطلبه، دا في ناس اوقات بتيجي والمدام بتصمم انه ياكل معاها، وعلشان كده هي بتاخد وحده من البنات تخدم على الراجل وتشوف يشرب ايه والكلام ده، ما تفتحي مخك معايا يا زيزي.
-معلش يا شيماء اصلي كنت متلغبطه، بس انتي نورتيني.
-انا مش عاوزك تقلقي خالص، المدام سميه دي مافيش زيها ابدا.
عصام دا ماكنش الوحيد اللى شوفته دخل الكوافير، وكل اللى بيجي كانت مدام سميه بتقابله بترحيب شديد اوي، وكل مره شيماء كانت بتقولي انه واحد من قرايب المدام سميه، بمسميات كتير بقى منهم ابن خالها واللى ابن خالتها، حاجه كده ماتدخلش العقل، بس انا كنت بقول لنفسي وانا مالي خليني في حالي، الست كويسه معايا، بس اكتر حاجه كنت بستغربها هي ان المدام سميه كانت بتاخد وحده من البنات في كل مره يجلها واحد من ضيوفها، بس بردوا ماكنتش بتكلم لغايه لما في يوم من الايام حصلت حاجه عرفتني الحقيقه كلها، واللى حصل وقتها ان اللى اسمع عصام دا جه مره تانيه، ولما جه وسلمت عليه مدام سميه بحفاوه زي كل مره، وقتها انا شوفته بيقرب منها وبيوشوشها، المشكله بقى ان عينه كانت عليا وقتها، ولقتها هي كمان بصتلي بصه سريعه وبعدها شورتله بانها مافقه، وماكنتش فاهمه ايه اللى بيحصل، وبعدها دخلوا هما الاتنين في شقه الضيوف.
بعد كام دقيقه لقيت شيماء جيبالنا علب عصير، وقالت:
-انا عزمتكم على عصير يا بنات، يلا خلينا نروق على نفسنا.
ووزعت علينا العصير وانا من ضمن الموجودين طبعا، ومسكت علبتي وشربتها وكملت شغلي كالعاده، بعد عشر دقايق كده تقريبا جالي احساس غريب، حسيت ان الدنيا بتلف بيا وماكنتش قادره اقف على رجلي، حسيت اني جالي هبوط تقريبا، وقبل ما اقع لاحظت شيماء مسكتني وسندتني ودخلتني على طول على شقه الضيوف.
كنت بحاول اتكلم بس ماكنتش عارفه انطق خالص، وكنت بحاول احرك ايدي او رجلي وماعرفتش، ولقيت شيماء دخلتني اوضه عمله زي اوضه النوم، ونيمتني على السرير ولقتها بتقلعلي هدومي، ما كنتش عارفه هي بتعمل ايه، انا كنت في عالم تاني خالص، مع اني كنت مفتحه وشايفه كل حاجه، بس ماكنتش قادره اعمل حاجه ولا حتي الكلام، ولقيت شيماء بتقولي:
-معلش بقى يا زيزي الزبون طلبك انتي المرادي، والمدام سميه ماتعرفش الهزار في الشغل، انا هوضبك احسن حاجه علشان تبقى على سنجه عشره، منا قولت قبل كده انك امكانياتك جامده وهيبقى ليكي زبونك الخاص.
وقتها انا ابتديت افهم كل اللى كان بيتقال قبل كده، بس للاسف انا فهمته بعد فوات الاوان، حاولت اقاوم او اعمل أي رد فعل بس بدون فايده، وبعد ما لبستني شيماء لبس خاص اوي، وقتها خرجت وبعدها بلحظات دخل عليا عصام، وللاسف اعتدي عليا وماقدرتش اقاوم، وكل اللى كنت قادره اعمله ان عيوني كانت بتدمع، وبعد ما اعتدي عليا خرج وسبني على السرير، وفضلت على الوضع ده لمده ساعه تقريبا، وابتديت الاحظ اني قادره احرك ايدي ورجلي، وقتها قومت من مكاني ولبست هدومي، وبعدها اتسندت على الحيطه علشان اخرج، كنت لسه تحت تأثير المخدر اللى انا شربته في العصير.
اول لما خرجت للكوافير مسكت في شيماء وقولتلها:
-ايه اللى انتي عملتيه فيا ده، انتي فكراني هسكت على اللى عملتيه، انا هوديكي في داهيه.
وقتها شيماء ماتكلمتش، بس اللى اتكلمت كانت المدام سميه اللى قالتلي:
-مش هتقدري تعملي حاجه يا روح امك، انتي عايشه الدور ليه، اومال لو كنتي بنت بنوت كنتي عملتي ايه، اللى حصل معاكي ماكنش اول مره، انتي ماتلعطيش انسه يا حلوه.
رديت عليها وقولتلها:
-انا هروح للشرطه وابلغ عنك، وهما هيرموكي في الحجز.
-وماله يا قموره روحي للشرطه، بس لما هتروحي للشرطه ماتنسيش تقوللهم انك رميتي مايه نار على وش شهاب، ولا انتين سيتي شهاب.
اتصدمت من كلمها، وقولتلها:
-انت تعرفي شهاب منين.
-انتي متخيله يا حلوه اني ممكن اشغل معايا حد وانا ماعرفش عنه كل حاجه، تبقى غلطانه انا عارفه عنك كل حاجه، من ساعه الواد شهاب اللى مشيتي معاه وضحك عليكي وخدك السينما، لغايه لما جيتي على هنا هربانه لما شوهتي وشه والشرطه قالبه عليكي الدنيا.
-انتي عرفتي كل ده ازاي؟
-مع اني مش ملزمه اقولك عرفتي ازاي، بس انا هقولك علشان تعرفي انا مين، من صوره بطاقتك اللى خدناها منك، عرفت عنوانك من البطاقه، وانا حبيبي كتير وطلب من حد اعرفه يطقس عليكي ويعرفلي كلي حاجه عنك، ولما راح قريتك هناك عرف كل حاجه حصلت معاكي، وازاي الشرطه بتدور عليكي.
-انتي عاوزه مني ايه؟
-هعوز منك ايه، انتي حالتك ايه غير اللى عاوزينه الرجاله، انا هفهمك كل حاجه، بس قبل ما افهمك انا عاوزاكي تشوفي الفديو ده.
وقتها هي شغلتلي فديو، وكانت مصوره كل اللى عمله معايا عصام، وقالتلي بعد ما شوفت الفديو:
-لو مانفذتيش كل حاجه هطلبها منك الفديو الجميل داه تلقيه ترند من بكره على جميع صفحات التواصل وعلى اليوتيوب، وطبعا هبعت نسخه حصريه لـ ابوكي وكمان هعرفه مكانك، وانتي متخيله بقى الفضيحه اللى هتحصل وقتها، ايه رأيك يا حلوه، لو عاوزاني اذيع قولي ذيعي.
شكرا لزيارتكم عالم روايات سكيرهوم
