رواية جريمة وهمية الفصل الثالث بقلم محمود الأمين
الدكتور عيسى سليمان.. هو آه مش ظاهر بوشه، ولكنها نفس الهيئة اللي ظهرت في الـ3 جرايم الخاصة بالدكاترة.. نفس الكاب، نفس الكمامة الزرقة، الحاجات اللي لقيناها في بيت الدكتور عيسى سليمان لما روحنا نقبض عليه. وأول خطوة عملتها هي إني بعت الإيميل الفيك ده لمباحث الإنترنت للكشف عنه.. عشان أعرف الحساب ده يخص مين؟!.. أو على الأقل نعرف مفتوح من أي جهاز؟
وبعدها طلبت من العسكري يجيب الدكتور عيسى سليمان من الحجز عشان أعرض عليه الفيديو وأحقق معاه، ولما قعد قدامي اتكلم وقال:
_ خير يا باشا، وصلت لحاجة بخصوص الجث.ث اللي كانت في القبر؟!
= وإنت بتسأل عشان تطمن إننا ما وصلناش لحاجة، ولا خايف لنكون عرفنا الحقيقة؟
_ حقيقة إيه؟ أنا مش فاهم حاجة؟!
= إنت اللي ق.تلت مراتك وبنتك يا عيسى، الفيديو ده مصوراه كاميرا مراقبة وجايباك وإنت بتخلص عليهم، وكنت لابس نفس اللبس اللي كنت لابسه لما ق.تلت الدكاترة النفسيين.. ق.تلتهم وبعد كده ولعت فيهم، مش كده؟ على أساس إن مفيش حد هيكشف جريمتك.
_ والله العظيم ما ق.تلتهم، أكيد في حاجة غلط!
= أكيد في حاجة غلط.. زي إيه؟ زي الشراكة اللي من الباطن في المصحة النفسية اللي إنت بتقول إنهم كانوا بيستخدموا جلسات الكهربا حتى للمرضى اللي مش محتاجين ده، وبيعرضوا الحاجات دي لايف على الدارك ويب عشان الفلوس.. أصل مش معنى إنك شريك من الباطن إننا مش هنعرف معلومة زي دي. ولما اختلفتوا، فسخوا العقد معاك وفضوا الشراكة.
وإحنا في البداية كنا مصدقين كلامك وفاكرين إن الدكاترة دول ق.تلوا بنتك فعلًا، عشان إنت كنت بتهددهم بموضوع الدارك ويب، لحد ما وصل الفيديو ده، واللي بيبين إنك إنت اللي ق.تلت مراتك وبنتك.. وأنا بس مش عايز أعرف غير حاجة واحدة: السبب إيه؟
....
كلامي كان مخليه مصدوم ومش مصدق إننا عرفنا موضوع الشراكة اللي في المصحة النفسية، وفي الوقت اللي كنت بحقق فيه معاه، بتظهر نتيجة الفحص الخاصة بحريق المصحة النفسية، والنتيجة كانت بتقول إن الحريقة تمت بفعل فاعل، يعني اللي عمل كده قاصد يحرق المصحة عشان يداري على فضايح كانت هتتكشف جوه.. بس يا ترى مين الشخص ده؟!
الأربعة الشركاء، تلاتة منهم اتق.تلوا والرابع محبوس عندنا.. هل ممكن حد يكون من عصابات الدارك ويب هو اللي عمل كده؟!
أصل الناس دي ليها عيون في مصر برضه، وأكيد في حد تبعهم هو اللي نفذ العملية دي، وتعمد تشغيل جرس الإنذار عشان كل المرضى والعاملين في المصحة يخرجوا بره.. شخص بالقسوة دي، في قلبه رحمة إزاي؟! أصله كان ممكن يسيبهم يتحرقوا في المصحة، ولكن واضح إنه رفض ده، وهو محدد الضحية الجاية هتكون مين؟
لحد ما بتحصل آخر حاجة كان ممكن نتوقعها.. حاجة بتهدم كل الفرضيات اللي موجودة، وبترجعنا تاني لنقطة الصفر، أو باختصار بتلغي الجريمة اللي حصلت من الأساس، رغم إني شوفت الجريمة بنفسي في الفيديو ده!
والحاجة دي هي إن مدام سماح وبنتها ياسمين طلعوا عايشين!!!
كنت قاعد في مكتبي، واتفاچئت بزيارة من مدام سماح ومعاها بنتها، وقالت إنها كانت مختفية فترة كبيرة وبتحاول تبعد عن عيسى بسبب المعاملة الوحشة وتدهور حالته في الفترة الأخيرة، وإنها اتفاجئت بأخبار موجودة في الجرايد وعلى الإنترنت إنهم اتق.تلوا، وإن المتهم الرئيسي في الجريمة هو الدكتور عيسى سليمان، وساعتها بتقرر مدام سماح تجيب بنتها وتيجي على القسم عشان تعرف الناس كلها إنها لسه عايشة هي وبنتها؟!
حاجة مش بتحصل غير في أفلام الخيال العلمي، ولكنها حصلت. طيب وبالنسبة للفيديو اللي ظهر وباين فيه جريمة الق.تل؟
مباحث الإنترنت قالت إن الفيديو معمول بالذكاء الاصطناعي، ولكن الشخص اللي عمله فاهم كويس وخبير وبيعرف يستخدمه كويس، لدرجة إنك لو اتفرجت على الفيديو مليون مرة، مستحيل تقول إن الفيديو ده ذكاء اصطناعي، الفيديو باين إنه حقيقي 100%.
بس كده، بما إن مدام سماح وبنتها ياسمين عايشين.. هنرجع تاني لنقطة الصفر. الجثتين المتفحمين اللي كانوا في القبر، لواحدة شابة وبنتها الصغيرة، دول جثث مين؟! قبل ما نكتشف إن الفيديو ذكاء اصطناعي، كان المنطقي والطبيعي إن الجثتين يخصوا زوجة دكتور عيسى وبنته، ولكن دلوقتي إحنا واقفين قدام حيطة سد ومش عارفين الجثث دي بتاعة مين، وهل ليها علاقة بالجريمة ولا لأ؟
وساعتها طلبت من العسكري إنه يجيب الدكتور عيسى سليمان من الحجز تاني.. الدكتور عيسى اللي أول ما دخل المكتب عندي كان مصدوم لما شاف مراته وبنته واقفين قدام عينيه. جري عليهم وحضنهم وفضل يعيط زي العيال الصغيرة، وخصوصًا بنته، وفضل يقول: إنتي عايشة يا حبيبتي.. عايشة بجد يا ياسمين؟
بس عشان هي كانت خايفة منه وما كانتش بترد، قامت مدام سماح تاخد البنت وتنتظر بره شوية، وطلبت من عيسى يقعد قدامي وبدأت أتكلم معاه.
_ وبعدين يا دكتور عيسى؟!.. حضرتك قولت في تحقيقات المباحث وتحقيقات النيابة إن بنتك اتق.تلت على إيد الدكاترة في المصحة، وعلى الأساس ده إنت انتقمت منهم.. يعني كان عندك الحجة اللي ق.تلت بيها الدكاترة دول. طيب، وبعد ظهور مراتك وبنتك، هيكون إيه مبررك المرة دي إنك ارتكبت الجرايم دي؟
= أنا مش فاهم أي حاجة، حاسس إني متلخبط، وفي أحداث كتير في دماغي داخلة في بعضها.. بس أنا حالتي بدأت تتدهور لما روحت عند الدكتور نبيل الصاوي، الدكتور النفسي، وهو شخص قريب من عيلة مراتي سماح وهي اللي قالت انها كان يعرف والدها الله يرحمه. ولما طلبت بنفسي إني محتاج دكتور، الكل دلني على عيادته.
الدكتور هو اللي طلب مني أقت.لهم، وكان معاه صور لبنتي، هو اللي خلاني صدقت إن بنتي اتق.تلت على إيدهم.
_ طيب، اديني عقلك.. لو عاوزني أصدقك، اقنعني الراجل ده إيه اللي هيجيب صور بنتك معاه؟.. ما فكرتش للحظة إن الصورة دي ممكن تكون مفبركة؟ يعني عاوز تفهمني إنك ارتكبت 3 جرايم ق.تل عشان صورة عرضها عليك الدكتور النفسي بتاعك وقالك إن بنتك اتق.تلت على إيدهم؟!
= كنت بحس في الجلسات اللي بتكون معاه إني مش في وعيي، وبتصرف بشكل مش طبيعي.
_ آه.. كده إحنا وصلنا لحيطة سد مع بعض، ودلوقتي بتحاول تعمل فيها الشخص المجنون اللي كان مش مدرك هو بيعمل إيه؟!.. بس ده للأسف يا دكتور عيسى بيتنافى مع طريقة تنفيذك للجريمة. واحد كنت شاكك أو حتى متأكد إن في حد ق.تل بنتك، فروحت وخلصت عليه. إنت خططت لارتكاب الجرايم دي بدقة.. والدليل على كده صور المجني عليهم اللي كانت عندك في الشقة، واللبس اللي استخدمته عشان تخلص عليهم من غير ما تكشف هويتك.
...
الدكتور عيسى كان مصمم إن الدكتور نبيل الصاوي هو اللي ورا كل حاجة حصلت.. والتحريات كانت بتقول إن مدام سماح هي اللي عرفت جوزها على الدكتور نبيل، وعشان كده طلبت من العسكري ياخد الدكتور عيسى ويرجعه تاني على الحجز، ودخلت مدام سماح وبنتها عشان أسألها على الدكتور نبيل الصاوي.. وساعتها الست قالت على معلومة مهمة، قالت إن الدكتور نبيل الصاوي هو اللي طلب منها تاخد البنت الفترة دي وتختفي، عشان عيسى عنده أفكار مجنونة وبيفكر يخلص عليهم.
يعني الدكتور نبيل الصاوي يخوف مدام سماح عشان تختفي من حياة عيسى هي وبنتها الفترة دي.. طيب ليه الفترة دي بالذات؟ هل كلام الدكتور عيسى صح؟.. طب هل الدكتور نبيل الصاوي هو الشخص المجهول اللي كان بيبلغ عشان يلبس عيسي التهم كلها، وهو اللي ورا الفيديو اللي معمول بالذكاء الاصطناعي؟
والسؤال الأهم من كل دول: لو هو اللي عمل كده فعلًا.. فإيه السبب اللي يخليه يعمل كده؟
التحريات وصلت للنيابة اللي أصدرت قرار بعمل تحليل مخدرات للدكتور عيسى سليمان، ومش بس كده، ده عرضه على لجنة طبية متخصصة من الطب النفسي والعصبي للكشف على حالته النفسية والعقلية.
ولكن ساعتها، رجالة البحث الجنائي بتوصل لمعلومة تكاد تكون مفيدة، وهي إن في مؤتمر طبي اتعمل قريب للدكاترة النفسيين، والمفاجأة في الناس اللي حضرت المؤتمر ده.. المجني عليهم الـ3 دكاترة، والدكتور عيسى سليمان، والصدمة إن الدكتور نبيل الصاوي حضر نفس المؤتمر.. وساعتها بيصدر قرار من النيابة بضبط وإحضار الدكتور نبيل الصاوي والتحقيق معاه.
وفعلًا بتتحرك قوة من القسم على شقة الدكتور نبيل الصاوي والعيادة الخاصة بيه، اللي كانت مدمجة بالشقة بتاعته، وأول ما وصلنا هناك لقينا باب الشقة موارب.. وده خلى الوضع مريب بالنسبة لينا، فدخلنا بحرص، وساعتها كانت مستنيانا مفاجأة غير متوقعة، عشان لقينا...
شكرا لزيارتكم عالم روايات سكيرهوم
