رواية خلخال مشوه الفصل الثالث 3 بقلم زمرده

 

 


رواية خلخال مشوه الفصل الثالث بقلم زمرده



نگعته وذَبل صَبري بخريف جفاك
ويمر ذكرك ربيع وروحي تتورد

•---∞∞∞∞∞∞∞---• 

زهرة : ولج مصيبه وطاحت على راسنه ولدنه وبيت
غازي صايرة بالتواثي بالموكب

لطمت على خدي خايفة من مشاكلهم ويَّ بيت غازي
ولا يتصافون
_ليش تعاركوا ؟

زهرة : اندري ،ولج يمه گلبي راح يوگف من الخوف

_ امشي نطب جوه يمه عيب لا يسمعنه النسوان

هزت رأسها ب أي ،ومشت گدامي وانا وراها بس
طبيت للصاله شفت جده گاعده وحالها مو أقل من
حال أمي
غضة : تعالوا ليه ياحبوبه بادن رجليه من جوه
رأس مشاكلكم

گعدت يمها احاول اخفف من خوفها ،بس بالصدگ
أنا ميته من الخوف لان كل مره تصير مشكلة ما
تعدي على خير ،حايره أخاف على منو ،اخوتي لو
هوَ اليهوس للمشاكل تهوس ...

طفرنه انا وأمي من سمعنه صوت صياح الولد
بالحوش ،ركضت اباوع من شباك المطبخ عمامي
وأبوي طببو ولدنه وقفلوا الباب خلوهم يتخبلون
يتهددون يرجعون لولد بيت غازي وعمامي
واگفيلهم بالباب

ليث : هسه شني حابسينه هيييج ،وخروااا من
الباب خلوووني امشيلهم اطيييح حض حضهم

ضيرم : والله انعل ساااااس الجاااابهم بس يطيحون بيدي ،مو هسه باجر مو باجر بعدددد سنه

يوسف : ابووو گمزه هيييد لا اكفخك

ضيرم : شنييي عمي جااا حابسينه هيييج شبينه
غماااان وما نعرف نعارك

باقر : جا قصرتوا بوية أنتم سويتونه فرجه الأمة
محمد

عبد الحق : والله ما تفتحولي الباب هسه أعبر
من السياج وامشيلهم حتى الموكب اخليهم
يسدوا

محمد : حق راح أحطك برگبتي كله من جوه راسك

عبد الحق : جااا ترديهم يعنطزون عليَّ واسكت
والله افااا حلگهم اشكه

يوسف : طبو جوه يالله

عزيز : شني نطب والله فلا اطب اذا ما ادميهم
اليوم

فقار : عمي امشين عليكم الحسين خلونا نمشيلهم

محمد : دخيل الحسين اسكت لا احطكم واكتلكم
هنا

اندگ الباب وراح أبوي فتحه طب جدي و وراه
صخر كاف ردن الدشداشة والجگاره بأيده بس
طب صاح بالولد
صخر : شبيكم ما دميتوهم

عبد الحق : جااا غير جابونه سحل عمامك وابووك

صخر : خابروني يگلولي عركة وتعال والحگ انا
أجيت مناك جايب التفگه وياي گلت هسه الگاهم
مطيحين حض ولد غازي من تالي الگاكم هادين الساحه الهم وأنتم هنا جيره بفركم كون

محمد : هاي أنتَ الجبير العاقل تهيجهم بدال ما
تهديهم

رأجس : جا تريدهم ياخذون خاوه على أحفادي ؟

محمد : لا بويه بس المشاكل مو حلوه

رأجس : خلهم يطگون وانا افصل بس ماريدن
أحد يدوسلهم على طرف

ومن سمعوا جدي هيج حجة تقووا يردون بس
يرجعون لبيت غازي

عزيز : والله والله لو عايفيني على حمد الا أنومه
مستشفى اليوم

باقر : جا منو خله دمه بطولة ؟

عزيز : والله ما فوخت گلبي بي هل خسيس هذا

رأجس : مرة الجاية كسره وانا اجبره

گعد صخر يدخن يباوع عليهم يفور ،مقهور لان ما
جان هنا بوكت العركه ،طب نوح من برة مستغرب
شصاير مادري وين جان
نوح : شكو شبيكم ؟

فقار : تعاركنه ويَّ بيت غازي

نوح : لاااا حرامات وانا ما موجود

فقار : شلون عركة فاتتك ،لزمتلك محسن كسرته
تكسر كفخه الي وكفخه الك گلت نوح ماكو
شغلت أديه ثنينهن عليه

نوح : والله وكفووو

محمد : أبو الكفو وين جنت ؟

نوح : ودوني اتسوگ للريوگ انا وصاحبي لو أعرف
راح تصير عركة جان ضليت

محمد : شنهاااي كلكم تهوسون للمشاكل تهوس

نوح : يابه ليش اكو احلى من الزم محسن واشبعه دمغ

يوسف : شبيك حاط دوبك بدوب محسن ؟

نوح : عمي عدي ثار ويا

يوسف : شني ثارك ولك ؟

فقار : جان ماخذ خاوه على نوح بالمدرسه مشبعه دمغ كل ما يحلون لان نوح جان أنعم منه

يوسف : وهسه نوح مثل التيل

نوح : يمه لحگيلي راح انحسد

يوسف : انجب لك شني احسدك أنا ؟

نوح : عمي غير عيونك بالمكان

ضحك جدي مأيد كلام نوح ،وعمي يوسف من شاف
جدي يضحك عصب وطلع گال رايح للموكب ما
باقي احد بي ...

أمي واگفه بصفي أيدها على گلبها دگ مبايل صخر وطفر من مكانه يتهدد وعمامي والولد بس
يردون يعرفون شبي
صخر : سهله ،جايكم جايكم اذا ما زوعتكم حليب
امهاتكم النگس فلا اتسمى حفيد راجس ال غضب

سد الاتصال وطلع وعمامي وراه يصيحون ما رد
عليهم ،كلها طلعت وراه مادري وين مشوا ،أمي
گعدت بالگاع حيلها مهدود تلطم على رأسها ...

زهرة : راحوا ولدنه تصخمنه وتلطمنه بيت غازي
شوكت يفوكن منه الا تتكتل الادوام يالله يهدونه

_ گولي يالله يمه راح يصعد سكرج ونتدولب

زهرة : يمه گلبي نااار عليهم ،ما تفض ويَّ بيت غازي الا يروح بيها واحد

_ لا يمه اسم الله

غضة : شكو ولجن

انداريت على صوتها واگفه بباب المطبخ تتجى على
عوجيتها
_ ماكو شي جده راحوا للموكب

غضة : شني تضحكين عليَّ جا غير سمعت صياحهم

_ لا تخافين جده تنحل والله

غضة : ااخخخ منهم يگمزون للمشاكل تگمز وكله
من جدج مصفگلهم

تضرب العوجيه بالگاع ما راضيه على مشاكلهم الما
تخلص
_ جده لايصير بيج شي ،شني جديده علينه من يوم
يومهم ما مصافين وعركهم گايم

غضة : خايفة ياحبوبة تالي المشاكل مو حلوه

_ لا أن شاء الله ماكو شي بس گولن يالله شبيجن

طبت جفون من برة تسأل شكو شصاير ،جانت يم
النسوان بالديوان
_ ولدنه و ولد بيت غازي تعاركوا

جفون : يبوووي وتاليها وياهم

_ عوفج منهم گليلي خوما النسوان سمعن شي

جفون : أي والله سمعن وضلن يسألن شكو

زهرة : شگتيلهن ؟

جفون : ضليت اسولف براسهن حتى لا يسمعن
مصايح الولد

زهرة : زين سويتي زحمة هسه شيگولن ،بايتين
يم ناس أيدهم والتفگه

جفون : جا قابل جذب ناس أيدنه والتفگه

زهرة : روحي گليلهن

جفون : جا عبالج ما اسويها ،والله هسه اروح اگلهن اطلعن منا لا توصلن للحسين بتوابيت .

شمرت عليها النعال أمي وصاحت بيها وهيَ تضحك
ولا جنها
جفون : شبيج عمه عصبيه موزين عليج مرة عدج
سكر

زهرة : يمن فلكج كون على هل لسان أطول منج

جفون : شبيج عمه وياي

غضة : اضحكي علينه بسوالفيج هاي

زهرة : اگوم جوه مالي خلگج يرادلج حيل

کامت امي تمشي للصاله وجده هم راحت وانا رجعت
يم النسوان اشوفهن شيحتاجن ،بس فتحت الباب
لگيتهن كلهن نايمات من التعب
طفيت الضوه عليهن ورجعت للبيت رايح حيلي من
التعب هسه لو انام ما اگعد بس بالي يمهم شصار
هسه ومنو الخابر صخر وخلاه هيج يصير عصبي
ويطلع بدون ما يدير وجهه على أحد...!!!

ضلينه گاعدين على نار ،والف حسبه وحسبه تجي
براسنه وماكو احد يريح گلوبنه ويّجي يهيد
بالنه عليهم ،القلق أكلنه لنص الليل وانا وأمي
على فد گعده جفون نامت بالصاله يمنه وغاية نامت
بالغرفة حالها بالظيم اليوم من رجلها مورمه ومعانده ماتروح تشوفها ...

قبل الاذان گمت للمطبخ حايره شسوي ريوگ النسوان بدن يگعدن وهمَ ولا واحد منهم بين وجابلنه الريوگ ولا عرفنه شصار ماصار وياهم

مشيت للديوان ،دگيت الباب وطبيت ،أبتسمت گوه
على روحي
_ صباح الخير زوارنه

ردن عليَّ ،نص گاعدات ونص نايمات والتعب مبين
عليهن رجعت طلعت جبت المصلايات والترب
حضرتهن الهن وبنفس الوكت سمعت صوت نوح
طلعت امشي بسرعه من الديوان شفته طاب للمطبخ
وبيده علاليگ الصمون وراه طب فقار شايل
طبقتين بيض وعلاگة الأجبان ،طبيت وراهم احجي

_ شصار وياكم نوح ؟،ليش ما بينتوا ؟

خله علاليگ الصمون على الكاونتر واندارلي
نوح : گاعدليهم گعود يم الموكب لو احنه لو همَ
الهيلگيه يندگون بينه

_ ليش شصار بعد ؟

نوح : واحد من ولدهم سامعه صاحب صگر يگول
عزلنه أحفاد راجس الموكب

لطمت على خدي
_ يااا ياااا؟

نوح : صخر گاعدلهم يم موكبهم العارية طفروا
ولا واحد منهم ضال بس جم واحد من صحبناهم
مو گد حجايتهم والله لو بيهم خير جا ضلوا

_ وجدي شيگول ؟

نوح : جدج يگول الحجه اكتلوا وأفصل دمه فلوس

_ يا على بختكم يا دم يا فلوس

نوح : جا يندگون بينه ونسكت افااا والله

_ جا نوح غير نخاف عليكم

أبتسم واجه حضن رأسي لصدره يضحك
نوح : ترانه زلم ماينخاف علينه على گولة صخر
الزلم تبين بالطگ

_ والله ماعم علينه غير أبو الطگ

نوح : اروح اگله تحجين عليه

_ شبيك ماتنحجي حجاية يمك

فقار گاعد على الكاونتر يباوعلنه ويعلس صمون
يمكن ولا صمونه بقى بيها گمع ،حمحم نوح
وبهمس سألني
نوح : شحمه نايمه ؟

بعدني أريد أساله منو شحمه وصاح فقار
فقار : سمعتك خفيف سمعتك ماتستحي على نفسك
تدلعها شحمه ؟

غمزله نوح يريده يسكت وهذا من شافة متوتر
باوعلي يحجي ويضحك
فقار : ماتعرفين مني شحمه ؟

هزيت رأسي ب لا ،رجع يضحك ويباوع لنوح
فقار : اگلها منو شحمه ؟

نوح : انجب لا اطيح حضك

فقار : شتطيني واسكت ؟

نوح : اطيك نعل

فقار : جا خوش خل اگلها

نوح : اغسل بمكانك الجدوره مال غده مو اليوم
عليك وعلى عزيز

فقار : جا خوش راح اسكت

ضليت اباوعلهم مستغربة وبالي صار كله يم گطنه
اريد أعرفها مني
_ نوح تضم عليَّ

نوح : تردين شي بعد لو اروح ؟

_ عليك الله گلي

نوح : والله احجيلج بس مو هسه ،كلشي بوكته .

هزيت رأسي ب أي وهم مشوا يرجعون للموكب
ما أريد الح ،رفعت رداني وبديت بالريوگ انخبصت
خبص من سمعت صوت ألاذان
ترست القوري ماي وهيل وحطيته على النار وبديت
اثرم طماطه اسوي مخلمه وأجت امي وياي تعاوني
حضرت الاكلاصات والاجبان حطتهن بالمواعين وگعدت يمي تسألني شگال نوح وانا
احمس بالمخلمه واحجيلها بدون ما اخوفها ولو
مبين راح تصير مصيبه وما يسكتون لبيت غازي
على حجايتهم هاي ...

كملت كلشي ومشيت للديوان شمرت الفراشات
على صفحه وفرشت السفره ورجعت اركض
مراكض انگل الرويگ بصواني كملت كلشي واخر
شي اخذت قوري الجاي ومشيت گعدت يمهن
أصب الجاي بل الگلاصات وطبت أمي گعدت يمهن
تسولف وياهن وتخلي گدامهن الصمون...

طبت جده تعدل بشيلتها مبين هستوها گاعده
غضة : صباحجن خير زايراتنه

ردن عليها وصاحنها تگعد وياهن ،وحتى ما تفشلهن
گعدت يمهن تسولف والقلق مبين عليها ،خليت
أيدي على رجلها اطمنها ،باوعتلي ورجعت تسولف
وشوي خف قلقها

وبس كملن ريوگهن كلساع وحده يخابرون عليها
وتطلع ،ودعنه أخر اثنين وطبينه انا وأمي من النعسان صرت أمشي صفح شمرت روحي بالصاله
بصف جفون ونمت مثل الجثه ما گعدت
غير على صوت الصياح بره ،لفيت شالي وطلعت
اركض لگيت أمي حاطه روح بروح ويا الولد
بالحوش وهمَ بس يردون يطلعون كل واحد شايله
تفكه ...

زهرة : ولك يمه وين رااايح صخر تريد تموتني

رأجس : هدي زهرة شني جاهل ومجلبه بس

صخر : هدينييي يمه هديني اروووح احرگ
بيوتهم عليهم

ليث : هدني برهان لا احط جيله براسك

برهان : راااح افرغ الشاجور كله براسك أبن
الادوام خبلتوووني دربي من بغداد لهنا ما عرفت
شلون خلصته

ليث : اذا ما تهدني ارجعك لبغداد مدمه

برهان : شو صاير فالتو كلششش

رأجس : هدوهم يمشون ويا اولاد عمهم

زهرة : وين مدولبين الووولد ،عمي شني ما رايديهم ؟

رأجس : زلم ما يصيبهم شي ،هدوهم لا احطكم واكتلكم

أمي عافت صخر وهوَ طلع بسرعه يركض وليث وبرهان وراه ،گعدت تبجي خايفة عليهم طلعت امشي يمها گعدت بصفها ساكته ما أعرف بشنو اواسيها وانا وهيَ نعرف راح يصير شي مثل أخر
مرة راح بيها جعفر أبن عمي يوسف ...

زهرة : راحوا اولادنه يا خيه يا صبره ياخيه راحوا ولدي

تنوح وتلطم على رجليها ،اجت جدة وگفت تحجي
ويَّ أمي تريدها ماتخاف وهيَ جده خوفها مبين
بصوتها
غضة : گومي زهرة جا شني مخلفه نثايه وتنوحين
عليهم ،زلم خلهم ينطگون ويطگون

زهرة : جا عمه نسيتي جعفر الراح هم يروحلنه ثاني ويخيس بالسجون

غضة : لاتخافين مايروح أحد وجعفر يطلع عليش
هيج تحجين

زهرة : يايمه شيطلع راح يصيرله سنه ،والله هذاك
اليوم شيماء تنوح ضاله بحسرة شوفته

غضة : دگومي طبي جوه والله كريم

زهرة : والله ولا اطب اذا ما اشوف طولهم بعيوني

هزت أيدها جده وطبت جوه ،گمت غسلت وجهي
بالبوري بالحوش وگعدت خاله أيدي على خدي
أباوع على أمي ونفس الوكت طبت مرة عمي باقر
تلطم

نجوى : ولج زهرة وين مشوا الولد ماخذين التفگ

زهرة : اندري ياخية كلشي ما فاهمه اخذوا التفگ
وراحوا لبيت غازي

نجوى : والله كله من عمي فرعنهم ،يحب المشاكل
وسواهم مثله

زهرة : جا هوَ اكو غيره يگلهم طگوا وأفصل

نجوى : راحوا ولدنه ،هسه واحد بيهم يلحک جعفر
والجان طلع

زهرة : جا خية ماتشوفين حامين عليهم غير يردون
يفضون سالفة جعفر وبيت غازي ما يتنازلون

نجوى : جا تروح بيها الوليدات

زهرة : اندري ياخية کلبي راح يوگف وداعتهم

گعدن وحده مگابله الثانيه ،الخوف سيد الگعده صار المغرب و ولا أحد بيهم بين ،ملينه وطبينه جوه
جده وأمي ومرة عمي باقر گامن يصلن وانا هم
گمت توضيت وفرشت مصلايتي أصلي وادعي يعدي
هل يوم على خير ....

بس لميت مصلايتي وطلعت للمطبخ اعزل بي طبت حواري و وراها جفون
حواري : أمي يمكم ؟

_ أي ،جفون وين جنتي ؟

مشت حواري للصاله وجفون نزعت عباتها وگعدت
جفون : جنت يم بيت عمي باقر وداني نوح

غاية : عافتني ومشت خلتني اتصفن وحدي

_ أنتِ وين جنتي

غاية : نضفت غرفة ليث ونوح هم غرفته اوصخ غرفة بالعالم

جفون : وغرفة صخر ؟

غاية : انضف من وجهي ما تحتاج تنضيف

گعدت فحطانه ،تسأل شكو
_ جا هل صياح كله ما سمعتي ؟

غاية : لا سمعت بس گلت اذا انزل بعد ما اكمل
الغرف

_ يااا

غاية : أي والله شبيج شني جديده المشاكل علينه

_ عبالي نايمه والله من ماشفتج

غاية : شفت كلشي من شباك غرفة ليث

_ أي مو اگول

غاية : شني وين راحوا ؟

_ اندري والله خايفة أحس طلعتهم وراها مصيبه .

وأنا احجي ويا جفون طبت مرة عمي يوسف من
الباب تلطم وتصيح
شيماء : راحوا ولدي راحوا حالهم حال اخوهم

طلعتلها أمي وهيَ گعدت مهدود حيلها بعتبة باب
المطبخ تريد تتنفس ماتگدر راحلتها أمي تحجي
وياها وهيَ شني خايفة مثلها
زهرة : سمي بسم الله أم برهان لا توگعين علينه

شيماء : يمه وليداتي ،يمه برهان وحق راح گلبي
من طلعوا بتفگهم

زهرة : جا خية قابل بس وليداتج ،جا انا هم ولدي
مشوا

شيماء : خيه اروح اخسرلي واحد ثاني ،هم ينكتل لو ينسجن

باوعتلها مرة عمي باقر أول مرة اشوفها مقهوره
على حال مرة عمي يوسف ،يمكن لان ولدها هم
وياهم وحست بخوفها ...

زهرة : گومي طبي جوه خيه گومي

شيماء : عفت البنات وحدهن

زهرة : روحي نجوى أنتِ و وحده من البنات جيبيهن

ما گالت لا مرة عمي باقر وبسرعه لبست عباتها
وأنا جريت عباية أمي من ورة باب المطبخ وطلعت
وياها ،قريتنه سطنه ماكو غير صوت خطواتنه
من نمشي جم خطوه و وصلنالهم دگت الباب مرة
عمي وانا واگفه وراها...

ما فتحنه الا من رجعت دگته مرة عمي وصاحت
نجوى : انا مرة عمجن أم ضيرم افتحن الباب

وعبالك جانن متانيات صوت أحد منه ،بسرعه فتحت
الباب ميمنة وبصائر وبركة واگفات وراها
ميمنة : وگع گلبنه والله عبالنه أحد من بيت غازي
اجونه

نجوى : يااا وبيت غازي شحدهم يطبون قريتنه

بركة : عمه جا غير سوينه الف فلم براسنه

نجوى : عوفن الأفلام ولبسن عبيجن بسرعه وامشن وياي لبيت چدچن

بركة : ليش صاير شي ؟

نجوى : لا ما صاير بس امجن هناك وأجيت اخذجن
قابل نعوفجن وحدچن

طبينه جوه وهنَّ ركضن لبسن عبيهن وطلعن ويانه
امهن من شافتهن ارتاح گلبها ومددت بس بقت
كلساع وصاحت ميته من الخوف
شيماء : يايمه ياولدي يا يمه ياكسران ضهري راح يروحلي واحد ثاني

غضة : گولي يالله شني تفاولين عليهم

شيماء : تعرفين مشاكلهم عمه تعرفين ذيج المشكله
راح بيها أبني ،راح جعفر وراح يروحلي واحد ثاني

غضة : خيبه اسكتي كلساع وصايحه راح يروح
ثاني شبيج

شيماء : جا مجذبة ،حق يمه حق مايسكت ولا يهيد

غضة : جا هوَ منو عم علينه غير حق

زهرة : محمل عليهم جا غير ساجنين أخيه

غضة : خايبات كافي صرعتن رأسي

ما احد حجه بعد من عاطت بينه جده ،للتسعه بالليل
احنه فد گعده گاعدات على نار ،وكلساع بينه وحده
تروح تشوف بلكت اجه أحد وماكو ولا بينوا ...

ركضت على صوت باب الشارع ينرگع بقوة ،گمزت
وأنا اشوف صخر طب وايدة صايره حمره كلها دم
حيلي راح غير اگدر احجي واسأله شنو هل دم غير
انطق احس بلساني انعگد والحجاية ماتطلع وياي

طب للمطبخ يغسل على السنك ويغلط أنواع الغلط
على أثر صوته اجت امي للمطبخ وبس شافته
يغسل ايده من الدم لطمت على وجهه بكل حليها
وصاحت ...

زهرة : يمه ولك صخر شني هاي الددم بيدك

مسح ايده بدشداشته يباوع لمرة عمي باقر الواگفه
وره أمي وهيَ بس شافت نضراته عليها وجهه
اختفى لونه
صخر : ماكو شي يمه

زهرة : جا منين هذا الدم ولك يمه

حمحم حاير بين يحجي وبين يبقى ساكت ،لطمت
على خدي من گال
صخر : تواجهنه احنه وبيت غازي ،وطاحت جيله بواحد من ولد...

ما كمل كلامه ولطمن أمي ونسوان عمامي ،وهو
يصيح صوتچن بس خل أكمل
صخر : شبيجن والله خفيفه ،وداعة الحسين طلع
منها سلامات

زهرة : منو ولك منووو ؟

صخر : ضيرم

هوَ گال اسمه لو جن وگع عليَّ جبل ،حيلي كله باد
التفتت على مرة عمي باقر لطمت على وجهه
بثنين اديها ،وانا اريد اوگف بعد ماگدر صوتهم ما
اگدر اسمعه بعد احس بس بوشه بأذني واصواتهم
بعيده ،افترت بيَّ الدنيا وماحسيت روحي غير
واگعه بالگاع وعيوني تتگلب النفس ضاگ بصدري
وما صحاني على زماني غير راجديات صخر ...

من شافني صحيت خزرني وگام وگف يباوع عليَّ
وانا اعدل بشالي وادير وجهي منه أخاف لا
يقراني ويعرف البگلبي شني وساعتها شراح يخلصني منه ...!!!

گمت اعدل بهدومي وأمي تحجي وياي وانا بالي
ولا يمها ،دمه ،شفت دمه بأيد اخوي ومبين هواي
نازف بس ما يحجي حتى لا يخوف مرة عمي ما
يدري أنا الازم يخاف يحجي گدامي أنا اموت لو
صار بي شي ،خلصت عمري ادعيله يبقى بخير
وما يصيبه لا وجع ولا أذيه ...

وهسه حاله شلون ،تأذه ،مبين متأذي والله گلبي
جاي يوجعني وجن صوابه بگلبي على هل وجع
هذا
الجاي يوجعنياه ...

طلعت من المطبخ اشرد من نضراته والله لو وگعت
بيده هسه يضل يحقق وياي شبيج وليش وگعتي
ساعتها ما اگدر اضم البيه وافضح نفسي

نجوى : ضيرم ولج خية زهرة تصوب وليدي ولكم
گلبي نار والله عرفت راح يصير بواحد منهم شي

صخر : سمي بسم الله عمه ماكو شي والله عدت

نجوى : شوكت تصوب ؟

صخر : العصر

نجوى : وكل هذا الوكت وانا مادري ،ولكم ليش هيج

صخر : جا نجي شنگلج ؟

گعدت تنوح شگد حاول صخر يسكتها ولا سكتت
بس دگ مبايل صخر ورد سكتن من سمعنه يگول
صخر : شلون ويَّ عناده ،شني يريد يطلع جا غير
لازم يبقى الباجر

سكت شوي ودگ گلبي من عرفت جاي يحجي ويا من گال
صخر : شعدك طالع ،مو گلنه باجر تطلع ما تنجب
وتهيد

استغفر ورجع گال مستسلم
صخر : هاي هيَ أبو رأس اليابس اطلع اطلع ،بس
گلهم يمشون بيك خفيف لا يطگ خياطك

فتحت عيوني بوسعها ،خياط ،يعني شني ،جا مو
يگول ما متأذي ..!!

بس سد الموبايل گالتله أمة
نجوى : خياط شني صخر جا مو تگول ما متأذي

صخر : أي بس سوّوله عمليه طلعوا الجيله

رجعت تلطم وتحجي
نجوى : عمليه يمه ولك مطببينه عمليه وانا مادري

صخر : جا اذا دريتي شتسوين ،تتبنجين بمكانه ؟

سكتت منه وگامت لبست عباتها وصاحت
نجوى : حوري يمه تعاي نمشي .

مشيت بسرعه اطب للصاله ماريدهن يشوفني واگفه
هنا ،حواري لبست عباتها وراحت ويَّ أمها ،وانا
گعدت يم جده بغرفتها شردت من النويح القهر ماكل گلبي ،قريب من گلبي بس بعيد المسافه عليَّ ...

تمنيت روحي قريبة منه بهل ساعه ،تمنيت انا اتلگاه
ومو ضاله هنا كاتلني القهر والصفنات ،فززتني أيد
جده تمسح على مگان گلبي المتعوب بجف ايدها ...

غضة : شبيج ياحبوبة مهومه ؟

غمضت عيوني الحرگني يردن يبجن من نگالتلي
كلمة الشبيج ،انا لو أحد گالي شبيج ابجي وهوَ
السبب الاساسي لبجيتي ونزلة دموعي يوميا
غضة : ضايجه عمن ماتگدرين تتلگي مو ؟

فزيت من حجاياتها الفززن گلبي ،باوعتلها فاتحه
عيوني على وسعها ،أبتسمت ومسحت بأيدها مره
ثانيه
غضة : جا عبالج أنا غشيمه ما أعرف گلب هيوفة شبي .

بلعت ريگي متوتره ،الا جده أنا مو حمل اضم عليها
ولو ردت اجذب تكشفني
غضة : تردين تشوفي ؟

بدون ماحس هزيت رأسي ب أي
غضة : جا دگومي اخلي عيونج تتكحل بشوفته

_ وين ؟

غضة : امشي اشوفه واخذج وياي

_ بس خاف صخر ما يقبل

غضة : مو بكيفه ،امشي عدلي روحج واللبسي
عباتج

_ هسه ما اتأخر

گمت ركض واسمع صوت ضحكتها وراي ،طبيت
لغرفتي طلعت شالي الجديد ورحت للحمام
غسلت وجهي ولفيت شالي على المراية البي وطلعت
اركض مراكض وگلبي يركض گدامي يريد
شوفته ،شافتني امي مخبوصه گالت وين رايحه
گتلها ويَّ جده لبيت عمي ماتگدر تطلع وحدها ما
اعرف شلون جذبت بس المهم گالت روحي ....

طلعت جده من غرفتها لابسه عباتها وانا بس شفتها
ركضت جبت عباتي الجديده المخليتها للمناسبات ما لبستها گدام أمي حتى لا تحجي لبستها يم باب الشارع ومشينه أنا وجده الهم

الطريق مابي دقيقه صار عليَّ ستين ساعه مو ستين
ثانيه ،طبت جده وانا وراها ،وبگلبي اگول شلون
راح اشوفه ،شلون بيا طريقه ..!!

بس طبينه تلگتنه مرة عمي گالت
نجوى : بعدهم ما جايّن

باوعتلي جده وجن بنضراتها تگلي راح تتلگي

دنگت رأسي وطبيت يم حواري مخبوصه تحضر
إستكاين الجاي لان جماعتنه يتنفسون جاي على
گولة جفون ،نزعت عباتي وصرت افتر وياها بكل واهس واحسب دقيقة دقيقة لجيته ،اريد اشوف طولة واريح گلبي هوَ بخير وما بي شي

ويا رجفة گلبي وصلافة عيوني من طبوو وشفت
طولة من شباك المطبخ أمه راحت تركضله وانا ،عيوني ماگدرت انزلها
منه ،بس انا واگفه وحواري بصفي ،جن الروح ردت
بيَّ من شفته يمشي على طولة العلگني بي ...

مسحت دمعتي المادري شوكت نزلت وانداريت عليها من سمعتها تحجي وياي
حواري : على منو عيونج تعلگت ؟

بلعت ريگي مستحيه
_ مو على أحد

حواري : اصدگج ؟

_ أي

حواري : خوش

دارت وجهه على الطباخ تخلي ورگ الجاي ،وانا
رحت يم جده بس گعدت يمها همستلي
غضة : ها ياحبوبة كحلتي عيون گلبج

غصيت بهدومي من المستحى وهيَ من شافتني ما
رديت گالت
غضة : اطلع اشوفن حفيدي .

گامت تتجه على عكازتها ومشت تروح للأستقبال
هناكَ هوَ وكلها ملتمه يمه ،مشيت انا للمطبخ
حايره ،مثل الطير المذبوح حالي ،لو حلالي ما جان
رحت ويَّ جده اتحمدله بالسلامه هسه ..!!

بس تبقى أمنياتي فوگ المعقول ،انا أريده حلالي
وهوَ ما شايفني بعيونه ،كافي هيوفة كافي لا تتأملين
زايد وما ينسكر غير مچذافج ...

گعدت بالگاع واذني يمهم اريد بس اسمع صوته واضح، صار هواي ما مركزه بحجاياته ،صار هواي
ما سامعته يگول "وداعة شوارب صخر"

ضحكت من تمنيت اسمعها وبنفس الوكت گالها
يضحك ويَّ عبد الحق

ضيرم : جا وداعة شوارب صخر انا گلت راح يموت
گبلي من شاف دمي وطحت بأيده

صخر : انجب كافي ذليتنه

ضيرم : خفت عليَّ ولك

صخر : لا اله إلا الله ،يا حيوان گاله أنا خايف عليه

عبد الحق : انا گلتله

صخر : عرفت هاي سواياتك

عبد الحق : شني قصدك ؟

صخر : الحليم تكفي اشاره

ضحكوا الولد كلهم وهوَ وياهم يضحك ويصيحون
بي عمامي لا يطگ خياط عمليته
حواري : شني ويييينج ،ياااا الووو

فززتني عيطتها بأذني ،باوعتلها مخليه ايدي على
أذني
_ شبيج ؟

حواري : جا صار ساعة الغي فوگ راسج وأنتِ ما ادري وين بالج

_ شتردين ؟

حواري : دگي الباب مال ديوانيه خلي احد يجي
يأخذ الجاي

بدون ما احجي گمت دگيت الباب ،طلعلي فقار بس
شافني ضحك
فقار : هاي شني مني اليوم جايته ؟

خليت أيدي على حلگي اريده يسكت شهرنه
_ نصي صوتك يمعود

فقار : ليش شني صوتي عوره ؟

ضحكت وگتله
_ تعال اخذ الجاي

فقار : يا جاي غير كاتلنه الجوع جنه بحرب طاحنه احنه

_ يااا ما ماكلين ؟

فقار : وين ناكل بالمستشفى

_ جا هسه نسويلكم انا وحور

غمض عيونه بأمتنان وطب للديوانيه ،وانا رجعت
للمطبخ لگيت حور تصب بالجاي
_ لا تصبين جاي كاتلهم الجوع

حواري : يااا والمطلوب ؟

_ شعدكم بالمجمده ؟

حواري : أمي لافة كبب ،نسوي نواشف ؟

_ أي واسوي شوربة هم الاخوج

حواري : جا خوش

مشت هيَ للمجمده تطلع الكبب وانا فتحت الثلاجه
طلعت البتينه وگعدت اگشر واثرمها اصابع حتى
اگليها
_ طلعيلي عدس اذا عدكم

حواري : أي عدنه شگد تردين

_ فد أربع گلاصات

حواري : خوش

طلعت العدس و وگفت تغسله وانا وگفت بصفها
اغسل بالبتيته
حواري : والله لو بس انا فلا اوكلهم

_ اعرفج

مشيت يم الطباخ شغلت طاوة وترستها زيت بس
حمت خليت وجبة بتيته ودرت على صوت أمي
ومرة عمي يوسف طبن من باب المطبخ وياهن البنات
هنَّ طبن جوه والبنات بقن يمنه بالمطبخ
يعاوننه بالعشه ،ولان هواي احنه بسرعه كمل وطب
نوح وفقار ينقلون بي للديوانيه
وبس كملوا رجعتلنه المواعين ممسوحه مسح مبين
ابد مو جواعه ...

صبت الجاي حواري واخذه فقار وراح ،باوعت على
المواعين تگلب بعيونها وسوت نفسها وگعت
حواري : تخربطت أنا راح اموت

بركة : لا تموتين احنه نغسلهن

ضحكت وگعدت على حيلها بصف جفون يسولفن
بصائر : شو عاشت ؟

بركة : مو سمعت المواعين راح ينغسلن

ميمنة : يمعودات نمونه ،تعاي هيوفة وياي أنا اغسل
وأنتِ خضي ،وأنتي بركة جلفي الطباخ وبصائر
عزلي المواعين الوصخه خليهن النه بالسنك

غاية : وانا ؟

ميمنة : تصير زينه رجلج ونكربج

غاية : الف رحمة على والديج

باوعنه لميمنة صفح وهيَ ضحكت وكفت ردانها
وبدت تغسل ،وانا رحت وياها اخض المواعين وبس
كملنه مشينه كلنه گعدنه بالصاله أنا وميمنة تكترنه منهن نحجي وبنص السوالف
گالت
ميمنة : شبيج اجيتي تهفين هف خليتي الما يشك
شك

_ماتعرفين شصار بيَّ من سمعته تصوب ،ميمنة جا غير روحي حسيتها راحت والله

ميمنة : انا الاعرف بس علمودج والله

_جده تعرف

ميمنة : يااا منين تعرف

_جدتج مو هينه لاگفتني ومبين لا اليوم ولا امس

ميمنة : الزمي روحج لا الزم روحج وادگها بالنعال

_مشكوره

ميمنة : تدللين

أبتسمت ودنگت رأسي جنها شخصية زلمة معدل
ولا جنها بنية ،واذا اگلها تحطني وتكتلني
ميمنة : تخبلتي تضحكين ويَّ روحج ؟

_اخبلج وما اتخبل

ميمنة : ثول

لنص الليل الا رجعنه ،أمي والبنات گدامي يمشن
وأنا وجده وراهن
غضة : گليلي بعد كل ما تردين تشوفي أنا اجيبج

دنگت راسي مستحيه وأجه ببالي أسالها
_جده عبالي من تعرفين تطگيني وما ترضين

غضة : ياا وليش ما ارضه ،جا العاشگته غريب غير
حفيدي حاله من حالج

سكتت من سمعت صوت خطوات احد وراي ومن
صوته فزيت فزة تسوه عمري
صخر : ياعشگ جده ؟

غضة : شني ياعشگ ؟

صخر : شني جده تغشمين روحج ؟

غضة : يا أسولف الهيوفة على عشگي انا وجدك

صخر : ما لگيتي غير الشارع تسولفين بي

گطع كلامه من وصلنه گال طبن ،طبيت اطگطگ من
الخوف ،بس طبيت بوجهي للغرفة نزعت
عباتي وعلگتها حتى اغسلها ،وفتحت شالي وگعدت
اعيد صوته برأسي ويَّ كل حجاية حجاها ماريد
ولا حرف انسى ...

بس وين أنا اگدر اصفن وجفون تفتر على رأسي
هيَ وعصافيرها
جفون : زقزوقات ،اسميجن ؟

تسألهن ومن كل عقلها تريد يگللها أي
جفون : أنتِ اسميج خرزة ،وأنتَ اسميك كركم .

غاية : وين الربط ؟

جفون : باعي

غاية : باوعت

جفون : هيَ خرزة لان زرگة ،وهوَ كركم لان أصفر .

غاية : قنعتيني

جفون : جا شعبالج أنا جفون مو حي الله

مددت اسمع لسوالفهن وما اعرف شلون غفيت
گعدت على أيد أمي تندهني لصلاة الصبح ،گمت
امشي مطفيه توضيت وصليت ورجعت نمت ...

گعدت ب 6 الصبح على صوتهم بالصاله ،طلعت
شبعانه نوم گعدت بعتبة باب الغرفة اباوع عليهم
يتريگون اليوم هنا مو بالموكب
رأجس : اريدكم ترجعون تفتحون الموكب كون ويَّ الغده

صخر : صار ،احسب الغده توزع اليوم

رأجس : موكبنه ينفتح وموكبهم ينسد أريد

صخر : بالاصل تقريباً عزلوه

رأجس : عگاب والله ،احفادي عگاب

محمد : والله بوية ما فرعنهم غيرك

رأجس : اسكت اسكت فرعنتهم لان علمتهم ما يسكتون على حگهم

محمد : بس مو هيج

رأجس : لا هيج ،لاتدخل أنتَ

سكت أبوي وجدي يباوعله صفح ،گمت من شافتني
أمي وصاحتني اتريگ ،جبتلي گلاص وگعدت وياهم
تريگت وگمت طلعت للحوش رشيته وكنسته
وأنا كل بالي يمه ،هلبت بالي يفكر بغير شي ،جن ما
عدي سالفه غيره ،ولو هوَ كل سالفتي وحلمي بالدنيا

رفعت رأسي من انفتح الباب وطب نوح من برة
يضحك
وگفتله متخصره
_ وين جنت ؟

نوح : نزلي ايدج شبيجن كلجن نفس الوگفه الطايح حضها هاي

ضربته بالمكناسه
_ شو صاير ما تحترم ؟

نوح : شبيج گابة اليوم ؟

_ وين جنت ؟

نوح : لزگت بعد ، جنت بايت يم بيت عمي باقر

_ هااا

نوح : أي والله ،وهسه اگدر اطب جوه أريد ابدل
وامشي للموكب

_ طب طب أبو البيوت

نوح : والله لوما الچبيره

قاطعته
_ أي شتسوي ؟

نوح : كلشي ما اسوي ابوسج من راسج

_ عبالي

نوح : يسلم بالج أم عيون

ضحكت ودنگت أكمل كنس وهوَ طب جوه ،بس
كملت مشيت طلعت بطات جفون وخليت الهن اكل
وماي وطبيت جوه ...

كفيات رداني و وگفت اغسل مواعي وجفون أجت
هستوها گاعده طبت للمطبخ بيدها قفص خرزه
وكركم ،گعدت وخلتهن گبالها
_ ما تعلگيهن شني باقيه تفترين بيهن

جفون : اخاف عليهن

_ دگيلهن بسمار هنا بالمطبخ گدام عينه

جفون : خوش بس اريد اتريگ أول شي

ضحكت وحميت الجاي الها وطلعت الها جبن عرب
تحبه ،بس حمه الجاي صبيت الها بگلاص وخليتهن
بصينيه وخليتهن گدامها ،باوعتلي فرحانه بأهتمامي
بيها
_ اكلي لا تبجين

جفون : أنا ليش أحبج

_ لان اترس كرشج

ضحك تمسح عيونها
جفون : لا والله أحب أهتمامج بيَّ

_ خوش ،اكلي راح يبرد الجاي

اكلت وانا رجعت أكمل شغلي ،وبس كملت مشيت
للغرفة طلعتلي هدوم وطبيت سبحت وطلعت
مشطت شعري وگعدت يم الصوبة كاتلني البرد

لبست جواريبي رجليه صارن زرگ وهل حاله تصير
وياي كل ما بردت ،اجت غاية گعدت يمي تدفه ...

غاية : يمه البرررد يدگ بالعظم

غضة : جا أنتن ما تدفن زين

غاية : جده أنا ما أحب اللبس ثگيل

غضة : ضلي من تتمرضين تنوحين على رأسنه

غاية : ياااا

غضة : أي والله

غاية : هاي لو هيوفة جان أنتِ دفيتيها مو أنا ماعندي حض تگليلي تنوحين

ضحكت وجده مصدگه حجي غاية ،انا اعرفها تتشاقه
غضة : وأنتِ شني شگد تغارين منها

غاية : ما غايره

ضحكت على حجايتها ،دنگت ضايجه لان ضحكت
تباوع على رجليها صاير مكان العوره ازرگ
وبعدها راكبه راس لا تروح مستشفى ولا مضمد
غضة : ما تمشين يشوفها الج راح تخيس

غاية : ما ،ما اروح أخاف

غضة : تاليها يگصوها وتگعدين على عربانه

باوعتلي بخوف هزيت رأسي مأيده حجي جدة
صاحتني أمي من المطبخ
زهرة : تعاي شو يمه هيوفة نزليلي الجدوره من
فوگ الكاونتر

گمت مشيتلها للمطبخ ،حطيت كرسي وصعدت اجيب الجدوره ،نزلتهن شايلتهن بأيدي ونزلت رجلي من الكرسي احطها بالگاع ،بس مادري شلون حيلي كله
صار عليها وماحسيت بروحي غير واگعه والجدوره
وگعت عليَّ

لزمت رجلي شايغة روحي ،مثل الطير المذبوح فرفخت تفرفح ،اجتني امي ترگض وعلى عيطتي
حتى جده اجت وانا من الوجع دموعي عشره عشره
يوگعن ،طگتها لهسه بأذني ما جاي انساها و الوجع
شلني شل ...

زهرة : ياااا يمه سوده بوجهي صخام الصخمني أنا
صحتج كله مني

غضة : بسلا انكسرت

زهرة : عمه لو سامعتها شلون طگت ،سوده عليَّ
فرفحت روحها

يحجن فوگ رأسي وانا ميته من الوجع ،اريد بس احد يشيل من الوجع ويخففه عليَّ
غضة : شلون ولج حبوبة ولا واحد هنا منو يصيحهم

_ جده راح اموووت توجعني جده موتتني

غضة : سودة عليَّ گومي حبوبة گومي ،جفون عينيها خل تگوم

جفون واگفه تباوع عليَّ مقهوره وغاية گاعده
گبالي تباوع على رجلي وتلطم من شافتها ورمت
بسرعه ولونها انگلب

گومتني جفون على رجل وحده امشي گعدت
بالصاله والدموع تفتر بعيوني اريد ابجي جاي اموت
الوجع ما ينحمل ...

بنفس الوكت طب ليث من برة ،من شافهن ملتمات
عليَّ وگف بمكانه
ليث : شكو ؟ شبيها هيوفة ؟

غضة : طاحت ياحبوبة وطگت رجلها

اجه گعد گدامي خايف
ليث : شني حيل طگت ؟

يگلب بيها يشوف الورم
زهرة : أي والله يمه شني غير رعبني صوتها

ليث : توجعج ؟

هزيت رأسي ب أي عيوني متروسه دموع ولو بس ارمش توگع
ليث : لبسوها عباتها بين ما اجيب سيارة واحد
من الولد

طلع بسرعه وجفون جابتلي عباتي عدلت حجابي
ولبستها الي ،وبس اجه ليث گال يالله طلعنه أنا وأمي
اريد امشي ما اگدر من شافني ليث ويَّ كل خطوه
تشيغ روحي شالني وصعدني بالسياره
وبس وصلنه للمستشفى حولونه على الاشعه ،بس
اخذولي وكملوا كالوا روحوا للدكتور ...

طبيت للدكتور گعدت على الكرسي وليث يحجي
ويا ،اطاه ليث الاشعه ،اخذها يشوفها ،صفن بيها
شوي وباوعلي ورجع يباوع الليث
ليث : خير دكتور ،كسر مو ؟تحتاج صب ؟

الدكتور : ما ادري شاك مو شغلة بس صب

ليث : شلون يعني ؟

الدكتور : مبين تحتاج عملية ... 🪾


شكرا لزيارتكم عالم روايات سكيرهوم

تعليقات