رواية خلخال مشوه الفصل الاربعون 40 بقلم زمرده

 

 

 

 

رواية خلخال مشوه الفصل الاربعون بقلم زمرده




رايح وين
احنة اشفنه منك
خالنشوفك زين
رايح وين يا بعدين
يالگلت بعدين

°حواري°

صيحت مفچوعة فاز گلبي من الشفته ،كضيت ايد ريحانة الوگفت بصفي مخلوسة من الگدامنة ،منظر فلا يروح من بالي
عزيز : ديرن وجهجن ،ولج حواري لا تباوعين

درت وجهي احس بمعدتي گلبت گلب ،وما گدرت اسيطر على روحي وبمكاني فرغت كلشي بمعدتي اخبصوا يحيرون بي لو بهاي الچيفة الگدامنا الريحتها طالعة

گومني مشدوه يحاجي بهيوفة
عزيز : خوية هيوفة بساعج طببيها جوة

كضتني تسندني و وراي اسمعنه يخابر
عزيز : تعال صخر ،تعال شوف شلگينه بالبيت

گعدت بالصالة گبال المبرده مايعة روحي وهيوفة نزعتني الحجاب تحجي وياي
هيوفة : هاا ما تنفستي ؟

غمضت عيوني ورديت فتحتهن اريدن يروح من بالي الشفته
_ لا احسن

هيوفة : جا انا گايمة اشوفنهم

هزيت رأسي ب أي وتمددت حاطة شالي جوة راسي وبالي يمهم من سمعت صوت الولد اجوي واصواتهم علت ما تحملت وخليت وطلعت اريدن اشوفن ردهم على هذا الحيوان الملتم عليه الذبان من قذارته ...

عزيز: لا تگلي هدي وهم دايسين قريتنة ،وشوفة عينك وصلت بيهم حتى بيوتنة يدوسوها ،الصلافة صايرة تمشي بدمهم وعينك عينك يدورون الطلايب دوارة

سمير : خلها يمي انا اعارف دواهم

عزيز : يادوه هذا عمي واحنة الگبلها ما حاليها نحل هاي

سمير : تنحل وروح منير ،بس خلوها علي اذا ما خليتهم يكتوهن كلهن بالقانون ما اطلع أبن أبوي .

باوع ل ليث وجعفر
صخر : تعالوا شيلوها

جعفر : شني ماكو غيرنة ؟

صخر : انجب وتعال

جعفر : لا اله الا الله

جراه يخاف لا يشرد
ليث : شيلها وياي وبعدين طنگر

جعفر : دمشي جيب گونية وعود وراها يغسلون معدتنة الما يخافون الله

يحجي صدگ ومبين صاير كلش ما يتحمل بعد أخر فترة وموت بصائر ،جاب ليث گونية وبأيده لبس چياس وشالها وجعفر فاتح الگونية اله وهذاك يصيح

جعفر : اذا دمرتني والعباس احطنك بالگونية بمكانها

درت اباوع للباب من سمعت صوته طب يسأل شكو
رفع رأسه يجاوبه
ليث : تهديد من بيت غازي

باوع على ايده وندار يحجي وي عزيز
عبد الحق : شني السالفة ياتهديد ؟

عزيز : ما اعارف البيت فارغ چان ومن ردينا لگينة صخل مذبوح چيفته طالعة

هيوفة : حواري شافته وماضل شي بمعدتها ،سودة علي صار بوجهة

اعارفها حجت هيج حتى تحركه ،باوعلي خطف وبساع صد عينه مني خلاني اشتعل شعل من القهر
عبد الحق : وهسة شني، شنسوي ،خوما نضل ساكتيلهم ؟

صخر : مانسكتلهم بس مو وكتها خله يصحى ضيرم واطلعهن من عينهم وحدة وحدة

سمير : خلك بعيد أنت وانا من باجر بادي بحسابهم

صخر : شني بعيد عمي ،جا گليل شر انا ،تعارفني تريات ايدكم وسفة لو تكترت

سمير : انا الاعارفك زين ،بس بهداي نشتغلهم لازم

صخر : جا انا نجار شغلي الهداوه

ضحك عمي وما اعارف ليش حسيت بضحكته مو مجرد ضحكة
نوح : شو ملتمين ؟

صارت العيون كلها عليه من طب ساند فقار الشايل المغذي بأيده وبتعب بالگوات يمشي ،مشيتله ما چن اشوفن بعيني غيره وامي وراي مفزعة

_ ييمةةةة ،شبيه فقار ،شبيه أخوي ؟

نوح : چنت يمه وطاح عارفت صار عده هبوط وهم زين سويج سيارة ضيرم بالبيت اخذته للمستشفى حطوله مغذي وردينا

سمير : جا غير تحجي تگول شني ماشين وحدكم

نوح : هو ما خلاني گال لا تخوفهم

نجوى : ليش ولك يمة ،ولك فقار شلعت گلبي يايمة اموتن راح من همك

فقار : تعبان انا يمة

نجوى : ريت التعب بگلبي ولا بيك

نتر عيونه على فقار
عزيز : اذا ما بأيدي اجبرك تاكل ،شوف

ما رد عليه ودنگ يباوع علي كاضه ايده مكان الكانونة اباوعلها بقهر
فقار : كلشي ما بي لا تخافين

همست بقهر
_ شلون وأنت كلشي يسولف البيك

رفعت رأسي اباوعله عيونه ذبلانات كلش ،شعره نازل بشكل عشوائي على گصته ،بلع ريگه وحجه بصوت مختنگ
فقار : تعال نوح اسندني

كضاه نوح ومشوا للديوانية وانا عيني ضلت معلگة وراهم واحس بگلبي من القهر جاي ينمرد مرد شلون يعيش وشلون ينساها اذا هو البيت اذا طبله
بالزايد خمس دقايق ويطلع خنگه الدنيا كلها بصدره.! !

وي ما وخرت عيوني منهم انتبهت عيونه چانت معلگة يمنا ،من شافني انتهتله صد بساع يسوي روحه يحجي وي امي من سألته على ضيرم لان
هو چان بالمستشفى
عبد الحق : والله بعده والدكتور ما جاي يطينه حجاية ،سألته اليوم وما گال غير ادعوله

نجوى : طاح لساني بكثر ما دعيتله وهو بعده ضال مغمض عيونه

طلعوا ليث وجعفر متگابلين على الگونية ،وانا خليت وطبيت من شفت الباقين كلهم طبوا للديوانية، انا والبنات گعدنة بالغرفة ،هن يحجن وانا بالي ابد
مو يمهم ،نضراته الباردات ابد ما جاي يرحن من بالي ولا اگدر اتغاضه عنهن ...

فزيت من ندستني
هيوفة : شبيج گاضيتها صفنات ؟

_ كلشي مابي

هيوفة : لا تچذبين ،ضجتي من حق مو ؟

ريحانة : شلون ما تضوج وانا مني فارت روحي من بروده

دمعن عيوني بساع وشهگت مستهضمة
_ يعني شفتي ؟

ريحانة : أي چنت اباوع من الشباك عليكم

دنگت ابجي وهيوفة تقنع بي
هيوفة : خايبة لا تبچين مو تعارفيه خشم يابس وما يدگ راس بساع

_ بس مو علي ،ولچ جان ما يخليني جوه وهو فوگ يريدني يمه ،هسة شلون فارگني

هيوفة : زعلان ،وزعله مبين ثگيل

_ جا ما يگلي عليش ونفضها ،گضت روحي والله گضت

هيوفة : باعي ،ركزي وياي

رفعت رأسي اباوعلها بتركيز
_ گولي ،شني ؟

هيوفة : چن انا اعارف ليش

_ ليش ؟

هيوفة : تذكرين من مرة انا وياج حجينة ،اضن هااا مو اكيد ،هو سامع

بلعت ريگي وبساع طخ الحلم ببالي وشلون راودني احساس هو يعارف بمشاعري گبل
_ بس شلون ،ومنين سمع ،لا ما اضن لا

ما اريد اصدگ لان ابد ما اتمناه يعارف بشي گبله التغير بجيته
هيوفة : انا گلتلج اضن مو اكيد ،بس الله لا يگولها ويطلع صدگ

_ لا تخوفيني ،يعني هاي هي ننتهي انا وياه

حطيت ايدي على صدري بس الفكرة رعبتني ،شلون لو يطلع صدگ
ريحانة : شجاي تحچن ؟

طول الوكت چانت ضاله تسمع ،نسيتها ونسيت هي ما تعارف ولازم اوضحلها ،باوعت لهيوفة حايرة
هيوفة : حواري حجتلي سالفة وانا اگلها خاف حق سمعج وافتهم غلط

ريحانة : نفسها السالفة الچنتي تهلوهسين بيها ؟

حجت وخلتني اچمد ،حجاية ما گدرت انطق وبالي راح لبعيد من كملت
ريحانة : انا اعارف بيج گبل ردتي ليث ،ماكو اخت تغفل عن مشاعر اختها

ابد ما فكرت ابرر الها لو شي وبالي كله صار يم حق
_ چنت اهلوس بأسمه ؟

ريحانة : أي چم مرة بمرة سمعتج وأنت نايمة ،ردت تحجيلي بس ما حجيتي ومن رضيتي بحق خفت عليج بس ما تدخلت گلت هي گد قرارها وتعارف شني الجاي تسويه

لطمت على وجهي مثل الضربة على الرأس حجيها صارلي
_ بسلا حق سامعني ،صخااام الصخمني اذا صدگ ،لا يمة ،واگولن مااا يباوع بوجهيي

فرفحت روحي گمت افتر واردد بس اريد ما اصدگ
_ شلوون ،گللي اذا سامعني شلووون بي

گامت كضتني
هيوفة : كافي راح يصير بيج شي ،نسيتي روحج حامل لو شني ؟

_ ولج يا حامل وانا وابوهم بالبداية بعدنة وچن كلمن راح يمشي بدربه

هيوفة : لا تفاولين يجوز لا

_ ياا لا ،وماكو سبب بالدنيا غير هذا يخليه هيج يدير وجهه مني

ريحانة : خايبة كافي شحچاني

_ ولچن ارد اموت ،من احلامي لنساوتي لحق ،كلشي متعبني واگول ميخالف، تالي اطلع خسرانة وانا ما اعارف بروحي ،خسرته انا خسرت حق الچنت انا وي روحه

بالگوات هدت ،بس ظاهري بس ضليت احرگ بروحي انا وتفكيري ،الليل المر على البشر مر علي مر ما ينجرع سواده

ريحانة : شني ما نمتي ؟

ما رديت عليها وهي گامت شغلت الضوه
ريحانة : مبين ما نايمة ابد

_ ما اجاني نوم

گعدت گبالي
ريحانة : لا سهرج ولا هذا القهر يغير شي ،الله لو قاسم تردون ،يعني تردون برمشة عين بلحظة أنت
ما متوقعتها

_ شلون نرد ؟

ريحانة : تردون لان اله يمج جهال ثنين مو واحد

_ خاف ياخذهم مني ؟

ريحانة : شلون ياخذهم ،وين عايشين ،جا غير جهال زغار يحتاجون امهم

حطيت ايدي على بطني
_ مفرفح گلبي على حجاية منه وهو كل ما يشوفني يصد مني فلا چن هذاك الاعارفه

ريحانة : مبين شگد يحبج وحتى گبل لا يريدج انا انتبهتله عيونه تركض عليج ،بس هسة اختلف كلشي زلمة دمه حار وأنت تعارفين ولدنة شني ،اطيه وكت بلكت الله وتحظر بينكم ساعة رحمن وتتصافون

جريت نفس خنگة الليل كله بعدها بصدري بعدها
_ أن شاء الله

ريحانة : وهسة گومي حتى اوكل جهال اختي هسة حال الظيم حالهم من الجوع

گمت على كيفي وجع ببطني بس خفيف عايق حركتي ،لحگتها للمطبخ هيوفة گاعدة وصافنة اعارف بيها تفكر بيه ،مشيت گعدت يمها حطيت
ايدي على چتفها

_ ما كافي صفنات ؟

هيوفة : تعبت وانا يوميا اگولن باجر يردلي وما جاي يرد

تنفست ما اعارف بشني ارد عليها وشلون اهون عليها غياب أخوي ،توسلنه بيها تتريگ ويانه وما رضت گامت جرتها
ريحانة : تعاي اكلي لا ازعل منج والله

هيوفة : روحي ما تهوا الاكل والله ،لا تلحين علي

ريحانة : يعني عادي عدج ازعل عليج ؟

تأفأفت وگامت وياها ،گابلتنه بس تنگش تسايرنه حتى لا نحجي عليها
_ اگلج صدگ فقار وينه ؟

ريحانة : بالديوانية، نوح خطية بايت يمه

هيوفة : امس صاحتني عمة فرشتله ،وضعه مو مال يضل وحده

اكلت شوي وگمت وريحانة تحجي ما راضية ،گتلها ما اگدر اضغط على روحي ورديت للغرفة ،تمددت مهوم گلبي ابد ما جاي اگدر اهون على روحي

°كوكبة°

نزلت اركض ومرتضى وراي ،لنص الدرج وشفتها طايحة بالصالة وخالة تصيح بأسمها تريدها
بس تصحى ،عبرني مرتضى جرها من حضن
خاله يطگ
على خدها وهي ماكو ابد ماتحركت
كملت دربي ارجف من الخوف عليها ،ابد ما جاي تستجيب لمحاولاتهم وياها
مرتضى : حجاب ،اركضي جيبيلها حجاب بساااع

ركضت لغرفتها چبت شالها المشمور على الچرباية ورديت اركض اللبسه الها ومرتضى صعد يبدل وانا احسن بحيلي باد كلش من شفت وجها بيه وما جاي ينگلب لونه
بشرى : ولك يمة مرتضى وينك راح تمووت اختك

شوي ونزل سويج السيارة بايدها سوه الدرج خطوتين ،رفعها من الگاع وگال
مرتضى : اللبسي عباتج وتعاي وياي ،بس بساع

طلع يركض بيها للسيارة وانا صعدت جبت عباتي لبستها اريدن اطلع وانداريت على صوت خالة ..

بشرى : اوگفولي انا هم اجي وياكم

طبت لغرفتها وانا طلعت ،بس صعدت بالسيارة گلتله نتناني خالة وهو فلا اهتم حرك ساكت وانا ما فكيت حلگي لان
لو حجيت يحطني ويسحگني جوة السيارة وابد ما يرفله چفن،گبل لا نوصل للمستشفى بشوي انتبهتلها تريد تفتح عيونها
_ مرتضى صحت ،صحت رفيف

اندار علي وهو يسوق باوعلها فتحت ورد يباوع للطريق ،دنگت احجي وياها
_ رفيف ،تسمعيني ،شو باوعي علي

بتعب رفعت عيونها علي وردت غمضت ،بس وصلنه للمستشفى وطببناها للطوارئ من وجها حس الدكتور وضعها مختلف وسأل
الدكتور : تعاني من أمراض ،جاي تاخذ دوة قوي وصلها لهل حال ؟

مرتضى : أي دكتور ،جاي تاخذ جرع كيماوي بس صار فترة عايفتهن

الدكتور : ليش ،غلط تترك العلاج على النص ،بمثل هيج وضع مهم الالتزام

مرتضى : هي ما ترضى دكتور

باوعلها متمددة بروح خاوية ،صايرة بس عظام
الدكتور : ليش بابا ؟

بللت شفتها المتيبسة بطرف لسانها الا گدرت ترد عليه
رفيف : تعبت دكتور ،صار اكثر من سنة وما طبت

الدكتور : تطيبين بس تفائلي
رد يحجي وي مرتضى
_ لازم تكملون علاجها لان التوقف بيه يزيد من حالتها سوء

مرتضى : أن شاء الله نكمل من باجر

الدكتور : عاشت ايدكم وعدها العافية

مرتضى : الله يعافيك

بس خلص مغذيها ردينا للبيت ،نزلت اسندها انا ومرتضى ورانا ،وبس طبينا بالباب تلگتنة خالة تصيح وتريد تكضني ،صار بوجهة مرتضى وهي منوراه تتهادد علي
بشرى : أنت ما گتيله امشي ويااااكم مووو ،الحية مسوية روحج فقيررة وأنت مترووسة سم ،تعلووم استبرق بت الفگررر گوتج على خالتج

كضاها مرتضى من وصلتلي ،بصياح حجيت احلف
_ والله گلتله واسألي بس هو ما اخذج

اندار علي خازرني يريد ما احجي وانا اهم شي عدي هسة ابري روحي أخاف لا خالة تحط عقلها وياي وانا ما عايزني
بشرى : لا تچذبيين ،مرتضى ما يسويها ،تربيتي وانا اعارفه

رفيف : كافي يمة ،اذا انا اهمج وخايفة علي اسكتي راسي راح ينفچر والله

حجتهن كلمة كلمة بتعب ،سكتت خالة بس عيونها اسولف ضوجتها واعارف سكوتها هسة ما راح يدوم
مرتضى : طببيها جوة

هستوني كضيت ايدها ارد اسندها وعتتها مني ،ضليت صافنة ،هاي صدگ تحجي لو
هذا حضي يخليها هيج تسوي ،صعدت ما
اتحمل اضلن اكثر بعد واحس بروحي جاي
تفور بس اريده يصعد واعاركه وليوم لو
أنا لو هو ...

ضليت افتر على نار ،بس طب صيحت
_ شبيك أنت ،شبييك ،ليش و ورطتني وي امككك

خزرني بحدة
مرتضى : صووتج

_ ما اسكت والله اذا ما تگلي ليش هيج سويت وأنت تعارف بيها لو مو بت اختها اذا حطتني براسها تطيح حضي

مرتضى : يطبج مرررض

_ مو تايهتلك اناا

ابتسم رافعلي حاجبه ،وبأبتسامته حسيت جاي يگلي صدگ تايهتلي ،استهضمت على روحي
وبچيت بوجع من اجه كض فچي بقوة عاصره
بأيده ويحجي
مرتضى : صوتج اذا يعلى علي بعد لسانج اگصه وتعارفيني اسويها

بس هدني صحت
_ لان فد واااحد مخبببل ومررريض

حطيت ايدي على راسي بساع من اندارلي ،ما گدرت احمي روحي منه وصار يضربني ضرب زلمة ما يتحمله ،ما هدني الا من شاف الگاع الجواي صارت حمرة من الدم ..! ! !

لميت روحي اعصر ببطني ما جاي اتحمل وجعها صيحت ابچي احسها جاي تتملخ
_ بطنيي ،يمة بطنييي راح اموووت

انفزع وهو يباوع لحالي وحال الگاع ،وبنفس الوكت طبت خالة ،بجيت اتوسل بيها
_ خالة بطني راح تموتني ،فدوة الحگيلييي

ضلت واگفه بمكانها مثل الچامدة ،ورغم التعب البيها صعدت على أثر صوتي ،من شافت الگاع صاحت على مرتضى
رفيف : ولك جاي تنزززف ،الحگلها راح يخلص دمها

مرتضى : شسوووي

رفيف : اخذها للمستشفى يعني شتسوي

دنگت تلبسي حجابي وحطت علي العباة
رفيف : شيلهااا وانا امشي وياكم

دنگ رفعني وهي صاحت
بشرى : انا امشي وياكم

بنض ضيمي ما گدرت اكض كرهي الها
_ ما اريددج

بشرى : عساج بالموت ،مو صوجج صوجي

نزلني شايلني ورفيف وراي نزلت ،اخذني للمستشفى وبس طبيت گالوا للنسائية ،ومن شافت حالتي الدكتورة أول سؤال سألته

_ أنت متزوجة ؟

_ أي

الدكتورة : اصعدي للسونار اشوفج

أول ما حطت السونار على بطني گالت
الدكتورة : مثل ما شكيت

رفيف : شنو دكتورة ؟

الدكتورة : حامل وبعد يومين تطب بالخامس معقولة ما منتبهين ؟

تمنيت روحي طرشة ولا سامعة الگالته ،هموم الدنيا طاحن علي كلهن بچم حجاية ،ضليت اريد احجي ما اگدر وبس اباوع لرفيف ودموعي تصب
رفيف : وهذا النزيف دكتورة خوما الطفل بيه شي ؟

الدكتورة : وضعه للأسف تعبان بس لا تخافون راح اطيها دوة وبالراحة وضعه يتحسن أن شاء الله

رفيف : أن شاء الله ،مشكورة دكتورة

الدكتورة : واجبي حبيبتي

كتبتلنا وصفة الدوة واطتها لرفيف وانا ضلت تطيني تعليمات والچان افتهمت ،احس روحي ما استوعب وما ببالي غير "انا حامل"

شلون حامل ،شلون ما حسيت على روحي ولا انتبهت ،والاكبر المنو اخلف ،لمرتضى الضال بالگومة والگعدة يدمغ علي
رفيف : كضي ايدي لا تطيحين

كضيت ايدها ارچف من مصيبتي ،دموعي ابد ما نشفن ،بس شافنه اجه كضني من ايدي الثانية يسأل شبي ومن عارف حامل ضل يتصفن ما مصدگ
جاب الدوة وبس ردينا للبيت ودرت خالتي طارت

بشرى : من هسة اگلكم ،اذا ولد نسمي حمزة

رفيف : واذا بت ؟

نترت ما راضية كاشه وجها
بشرى : غدي من لسانج ،شنسوي بالبنات

ما ردت عليها رفيف بس مبين تنرفزت ،صعدتني للغرفة ،گعدت وهي افترت حايرة
رفيف : گومي بدلي وانا انضف الگاع

_ لا ،انا انضفها ،انزلي ارتاحي أنت

رفيف : يمعودة يا راحة هاي بهذا البيت ،دگومي

_ اذا تحبيني خليني انا انضف ما علي شي

صفنت بوجهي وهزت رأسها
رفيف : راح اخليج بس صيحيني اذا احتاجيتي شي

_ بس جيبلي غراض التنضيف

جابتلياهن ونزلت وانا بس خلصت مشيت للحمام اسبح واحس الماي الينزل على جسمي يأذني من أثار ضربه ،بدلت بالگوة احرك ايدي احس چتفي يون علي لان انطگيت بالحايط قوي وانا احمي روحي منه...

بس رديت للغرفة لگيته متمدد والمبرده مشتغلة وهو بطرگ الفالينة والشورت الداخليات ،درت وجهي منه احس ما جاي اطيق اباوع بوجهه ،مشطت وتمددت بالگوات حطيت روحي على الفراش

غمضت اريد اشرد وما عدي وسيلة غير النوم وفززني صوته قريب مني ،فتحت عيوني كارهه شوفته كلش
مرتضى : باوعي عدل لا افگس عيونج بت السگط

_ شتريد مرتضى ،ما كفاك السويته ؟

مرتضى : اگعدي اشوف بطنج اريد

لميت الغطا علي وهو تخبل جره مني وعتني يگعدني ورفع ثوبي يتحسي بطني
مرتضى : كبرانة ،شلون ما انتبهنالها

_ أنت ما تنتبه غير بس على اغلاطي حتى تحاسبني

رفع رأسه يخزر بي!
مرتضى : خليني أدمي ومحترمج

سكتت وجريت ثوبي نزلته وتمددت وهو ما علق خله وگام طلع من الغرفة ،بأيدي تحسست الحجل اخافن لا ينگطع ،دوم يصيبني قلق عليه چن
روحي متعلگة بيه ،غفيت وانا لامه روحي الما لگت احد يسندها وبس هاي النومة تخليها شوي تطمأن

گعدت بنص الليل الجوع احس يملخ بمعدتي ،گعدت على حيلي اتلفت بالغرفة ،باوعتله نايم على الچرباية گمت بلاية صوت نزلت بوجهي للمطبخ اسويلي
شي اكله گبل لا تخرط روحي بساع طگيتلي بيضتين وگعدت اكل بس ما تهنيت وغصيت من شفته طب مثل الرعيده يدور علي ...

شلت دولكه الماي اشرب وهو خبصني شعدج هنا
_ يعني ما جاي تشوفني جاي اكل لو شني ؟

مرتضى : اتزقنبي واصعدي

ما رديت عليه ورد صعد ،هزيت ايدي احمد الله واشكره على هل بلاء الأسود هذا بس خلصت اكل صعدت احوسن بفراشي ما جايني نوم وما گدرت من افكر شحاله عگب كل هاي الاشهر ،تزوج ،لو حب وكمل حياته وضليت على هل حسبات لحد ما رديت نمت وهيج يوم صار يجر يوم ،بطني بدت تبين صدگ ،رفيف ردت للمستشفى وما ضل بالبيت غير بس انا وخالة ومرتضى وعمو مخلصها شغل وسفر ما لافي للبيت...

اغسل مواعين وبالي عده يخابر برا و وضعة ابد مو طبيعي ،سديت البوري وتقرربت اكثر حتى اسمع
مرتضى : راح احجيلك بس الفلوس يوصلني ،واذا چبت اسمي بالطاري اخليك تلحگ اختك وانا
لا أخاف ولا استحي عدي الكتل وشربت الماي ،اي عفية ..شكك والحجي الواصلك صح ،ابراهيم هو الخرب السيارة عناد بيكم لان ما رضيتوا تطون اختكم اله ،.. لا أشهد ولا شي ،ردت حجاية تأكدلك وهاي هي اسمي تنساه بس تطيني الفلوس

غمضت عيوني من اندار وصارت عيونه علي ،شافني جاي اتسنط ،باوعت الايده الكضت ايدي ارچف ،وبس سده الاتصال بأيد وحده رفعني من رگبتي على الحايط ،روحي طلعت من انگطع علي الهوا ،ارافس برچلي بس اريده يهدني

مرتضى : اموتج اذا اشوفج حاشرة خشمج بسوالف مو يمج ،فهمتيييي

هزيت رأسي دموعي تجري ،هدني ومشى فلا چن مسوي شي ،بچيت حاطة ايدي على رگبتي بس اريدن النفس يردلي طبيعي ،بالنص ساعة انا ضليت على هاي الگعدة الا ردتلي الروح وما صدگت اكفن شغلي واشرد فوگ بس لحگني وعود هو چان گاعد بالصالة ،حاولت ما احط بالي يمه واباوع بالتلفزيون

التفتت عليه ،گاعد على الچرباية عيونه بموبايله ويتأمر ،رفع رأسه خازرني
مرتضى : مو چاي اگلج جيبلي ماي ،ما تسمعين ؟

_ منو الحامل انا لو أنت ؟

مرتضى : گومي وبلا لغوة زايده

گمتت اتأفأف نزلت جبتله ماي ورديت ،اخذه من ايدي وجرني مگعدني يمه ،شرب من الماي وحط الدولكة على الميز وكل هذا وايدي بايده بعدها بس اريده يحجي حتى افلت بريشاتي
مرتضى : شبيج ترچفين ،ما راح اموتج لا تخافين

_ احجي شرايد ؟

مرتضى : ليش ما تصيرين مثل النسوان ؟

_ لان أنت مو مثل الزلم

عطت متوجعة من عصر ايدي الكاضها
_ اخخخ ايددي

مرتضى : احجي عدل لا اكسرها الج

جريتها منه اباوعلها واريد ابجي ،طبوع اصابعها صايرات بيها حمر
_ ماكو زلمة بالدنيا يأذي مرته مقلك

مرتضى : ولا اكو مرة بالدنيا عاشگة ويعارف بيها رچلها وما ذابحها

_ ما عاشگة ،انا ويني وين العشگ ،لا تضل تتبله علي چان ساطرني ضيم اهلي وهنا ضيمك

مرتضى : اهاا ،تچذبين اذني السمعت اسمه بلسانج ؟

_ يجوز مرة صارت بلاية قصد

مرتضى : مراااات ،مو جاهل گدامج وتضحكين علي

گمت من الچرباية وهو فلش الغرفة تفلش ،يصيح
مرتضى : تضحكين علي ترردين ،مضحكة گدااامج انااا
فلش الغرفة تفلش ومن شافني ارچف خله وطلع گعدت مهدوم حيلي مصدومة شعجب ما طگني،بس ياريت طاگني ،ياريت! ! !

خلصت الليل كله كلساع اباوع واگولن هسة يرد ،غفيت وانا گاعدة على فراشي وفزيت من حسيت بشي تكوم يمي وچان هو ،متمدد على الگاع بس رأسه على الفراش ،عارفت بيه رد للسم ...

ندسته
_ گوم نام على الچرباية

بالگوات يحجي بصوت واحد طافي
مرتضى : خليني هنا لا اموتج

سكتت منه وگمت جبتله چرچفه ،غطيته بيه وانا رديت تمددت متقيدة ،اطيته ضهري ونمت وما اعارف شگد مر وكت وفزيت احسن بروحي مختنگة باوعت الايده حاضني من رگبتي حتى حضنه عكس البشر ،بالگوات وخرتها ودنيت مخدتي منه افكر والتالي من هذا كله ..! ! !

°جفون°

گاعدة وحدي والغصة ذابحتني ،اليوم السابع مال بصائر واستحي اگلهم اخذوني بعد الصار وشلون
بالگوات گدرنا نرد مشرديني منهم ،مالي عين بعد احجي
وردة : شبيج ؟

درت وجهي منا ما اريدن تشوف دموعي ،امسح بعيوني واحجي
_ مابي شي بس مشتاگة لعمة

اجت گعدت يمي
وردة : لا چذابة ،تردين تمشين للقرية عمن سابع بت عمج اليوم

باوعتلها اهزن رأسي لا
_ ما اريدن امشي

وردة : اگولن ل أمي تاخذج ؟

_ لا لا تصير طلابة والبيكم كافيكم

ضلت تباوعلي حايرة ،طبت سمر شايلة بتها ،وحدتهن حيلها رايح على عزيز گلبها
سمر : وردة خليها عدج بس اريد انضف غرفتي

وردة : اطينياها

حطتها بحضنها وباوعتلي
سمر : شبيج تبچين ؟

وردة : على بت عمها ،اليوم السابع مالتها

سمر : هاا ،الله يرحمها

همست
_ ويرحم موتاج

سمر : اذا تردين احاجي عمة تاخذج

_ لا ما اريدن ،اعارف تصير طلابة وعدت نوبة الفاتت هل نوبة ماتعدي

سمر : جا شلون ؟

_ ما اروحن

سمر : بكيفج بعد ،وردة اذا تبچي صيحيلي اسويلها ممية

وردة : خوش

مشت سمر و وردة ضلت گاعدة بحضنها فطومة صافنة عليها بس بالها مو يمها ،طفرت فازة اباوع بوجهة گامت تركض فازة بأيدها البت وانا حطيت
الحجاب على راسي ولحگتها
مهاب : ولج يمة الصار بأختي وابن عمي فعل فاااعل موش قدرر ،ولكم مووش موتتهم

فتحت عيوني مصدومة واگفة عد باب الغرفة ما گدرت اتحرك خطوة بعد من السمعته ،جواد يخابر ويصيح واخوانه يفترون على رأسه ،طبوا اخوان عزام يتراكضون چن واصلهم الخبر
وبس خلص مخابرة صاح وچن اطاهم ضربه على رأسهم ،چم حجاية خلت النصائح ماله والي
جواد : ولكم الچتال من لحمنة ،ولكم ابن عمنة أمجد

طلعوا يتراكضون وخلونه مثل الأطرش بالزفة ،حتى ما نعارف منو منهم مقصود بالكلام و هم ولد أمجد سبعة ..! ! !

اقل الساعة الأبد ما چنها ساعة وطب شيخ خزعل متخردل يسأل شكو ،جاوبته خالة أم جواد تفزعة يلحگ الهم
أم جواد : الحگ شيخ راح يتكاتلون وي اولاد أمجد

شيخ خزعل : على شني غير أفتهم ؟

باوعت لوردة
أم جواد : احجي الابوج ريگي يبس انا

وردة : ما اعارف منين ومنو الگال ل جواد ريام وعزام ما ماتوا حادث والصار فعل فاعل وطلعوا يتراكضون ومبين ما ناوين على خير يابوية

فتح عيونه مصدوم وهستوه طلع يريد يلحگهم بس ما لحگ وتلاگه وياهم من طبوا ،باوعلهم واحد واحد بردوهم غريب عگب ما چانوا مثل النار الكبرى
شيخ خزعل : شسيتوااا ؟

جواد : اخذنة حگهم ،مثل ما حرمهم شمة الهوه انحرم من الدنيا هو هم

دگ على رأسه مفجوع
شيخ خزعل : ليش ولكم ،ليش تتصرفون من رأسكم

نزل تفگته اخوا عزام الچبير
علي الاكبر : جا تريدنة نخلي حگنة عمي ؟

شيخ خزعل : مووو هيج ،مو بالكتل ولكم مو كتل اكو شي اسمه قانون ويتحساب

جواد : اعذرني بوية بس انا زلمة اخذ حگي گبل لا ياخذه القانون

شيخ خزعل : فتحتولنه بحررر دم شيسددده بعد .

جواد : احنة ما عايلين بيهم

شيخ خزعل : لو عايلين اهون ولا سوايتكم هاااي

بعدنة ما مستوعبين الصار وطبولنه كومة زلم أول مرة اشوفهم ،تلازموا وي ولد الشيخ وأخوان عزام ناس تضرب بناس ،عياطنه مله المنطقة ،يتضاربون بحقد بلاية رحمة الينضرب يردها بالاقوى ،بجيت بخوف و وخرت من شفت واحد منهم اچانه ،صيح عليه
جواد : ايييدك اكسرهااا لو طخيت وحدة منهن وتعارفني شنو انا كلش زيين

ختلت ورا وردة وهي گدامي رافعتله حاجبها بكره الدنيا كله چن زلمة واگف گبال زلمة
وردة : شرااايد ؟

عينه بعينها ورد على سؤالها
_ اذا ما اكسر خشمج ما اتسمى أبن أبوي

ضحكت مستهزئة
وردة : ما عاش ولا صار ولا راح يصير اليكسر خشم بت الشيخ

بعده يريد يحجي وجراه جواد جايبة ببوسك بنص وجهه خله خشمة يصب دم
جواد : اكسر خشمك گبل خشمها ،ابن الكلب

وردة : اروحن فدوة الايدك

خزرها عيونه تريد تطلع وما فضت لوما الشيخ رافع عليهم التفگه
شيخ خزعل : الكم دقيقة ،تطلعون منا لا انسى أنتم ولد أخوي

نفسه الضربه جواد ،وگف وجه بوجه وي الشيخ ينتر
_ اخوي رادها ،وحذركم لا تطوها الغيره وأنت بعناده اطيتها الابن عمه گبال عينه وخليته يحترگ گلبه

شيخ خزعل : واليحترگ گلبه يكتل ؟

_ من ايدكم

شيخ خزعل : عقل اكو براسك ؟

أبتسم مستهزء
_ لا ماكو ،واذا تسألني ليش راح اگلك احسن ،لان العاقل ما يراد

صيح متنرفز من اسلوبه المستفز
شيخ خزعل : لا اله الا الله ،امشوا اطلعوا لان وصلت حدها وياكم كلش

اندار أشرلهم وطلعوا بس گبلها وگف عد الباب بضهره اخوانه
_ اذا ما ساويت دمه بدم سنين عمره ما اتسمى أبن أبوي

راد يركضله جواد وكضه ابوه يصيح بنفاذ صبر
شيخ خزعل : اطلع أبن السگط لا بأيدي اهدر دمك

مسح على طرف شاربه ما متهم وطلع وكلهم لحگوه ،گعدت بايد حيلي ما صدگت تفض ابد
وردة : خوية مهاب

باوعلها كاض ايده
وردة : ايدك هواي تنزف

دنگ يباوع لزنده ،مبين ضربة بشي حاد
مهاب : هسة اضمدها

عيونها بعيون عمها ،سألته تريد تچذب الصار
سمر : عمي يعني موتتهم مو ل الله ؟

نزع عگاله وصاح وردة اخذته من ايده ،وهو يرد على سمر حط العباة بأيدها هم چان بمشية هستوه مشى بس مبين احد مطية خبر وهل راد
شيخ خزعل : ما اعارف انا ،خلي جواد يحجيلنا الصاير ومنين عارف لان حالي من حالكم

عينه على جواد ،جر نفس طويل وگعد چن هسة بين عليه ثگل مصيبة الحقيقة والطعنة الاجتهم
من اقرب الناس وابعدهم

جواد : گبل چم يوم گاعد انا ورعد صاحبي وگلتله انا شاك بسالفة السيارة مال تنگلب وحدها واگفة
هو من راد للبيت حاجي يم امه ،خابرني بنص الليل الزلمة متخبل واطلع عدي سالفة وياك من طلعت گالي ابري ذمتي اريدن وامانه الحجية اوصلها الكم وهم وسفة دم اخيتك وابن عمك يروح دوس بالرچلين ،وصدمني من گال الحجية شايفة واحد گاعد بسد السيارة مال زفة ومن چنه مبخوصين وما حسينة ولا أحد انتبه غيرها ،بس ما حاطة ببالها وعابرته وهو هم ما شايفها ،ومن أطاني مواصفاته وحسب التذكره بساع عارفته من گال اكو
طبرة بحاجبه ،وبساع ربطت هذا أبن عمي ابراهيم ماكو غيره لان تهديده براسي بعده ،وصلت لاقرب صاحب اله ،گلتله اطيك مليون واطيني كلمة بس تأكد الشاك بيه بالاول ما رضى بس حطيت رقمي عده حتى يفكر عدل ويخابرني وصدگ اليوم خابرني حجالي كلشي وأكد حجي الحجية ام رعد وطلع الچتال منا وبينا

خلص كلامه وشغل چگارة يباوع ل ابوه
شيخ خزعل : يعني سواها مشعول الصفحة

علي الاكبر : جا ابن أمجد شتترچه منه ،خيسة مثل ابوه

شيخ خزعل : عمك

على الاكبر : اعذرني عمي بس ما يشرفني هو عمي

ما رد عليه عيونه تريد تطلع صافن شيسوي وخالة ابد دمعتها ما نشفت ولوعتها زادت بكل حجاية چان يحجيها جواد ،البنات فرفحت ارواحهن بين
الخوف والقلق طلعوا وين ما نعارف وما ضل يمنا غير بس مهاب واخو عزام البعمر مهاب ،ما لفوا جوه وضلوا گاعدين برا ،وبالساعتين هيج وردوا يتصايحون

طلعنا انا والبنات نتراكض نريد نعارف شني الصاير وشني السووه بطلعتهم هاي
شيخ خزعل : كبرررتوها ،ولكم كبرت ما زغرررت وين اوديكم وييين

علي الاكبر : وين تودينا عمي ،شني السالفة جهال احنة

شيخ خزعل : بااااع منين افتهمت السالفة ،لك عدهم شواهيد عليكم ،تعارف شني شواهيييد ؟

على الأكبر : أي عمي نعارف ،واحنة هم عدنا شواهيد عليش تصيح بعد

صفگ ايد بايد الشيخ ما راضي عليه
شيخ خزعل : شلون بييييك احنة ؟

علي الاكبر : عمي تراااا ثنين ميتين النه موش فرخ دجاج ،والكتلناه ربع ما يوصل الهم خرگ واحد زايد عليه حتى الفصل

شيخ خزعل : شني عبالك هين عدي بتي لو اخوك بس انا ما ردت تكتلون وايدكم تتنگس بدم واحد نگس

جواد : انا راضي ايدي تتنگس بدمه ولا اضل طول العمر متندم ما اخذت حگهم

من هل يوم البيت صار من يفرغ ،وادم تجي وادم تمشي وجاي تكبر وما تزغر ،تعبت نفسيتنا يوم عن يوم القلق يزيد كل ما واحد بيهم يطلع خالة يبيد حيلها منا لمن يرد

گاعدة انا وسمر نتريگ وخالة تلعب بفطومة وطلعت تلبس بعباتها وبنفس الوكت طلع الشيخ من غرفته صاح بأسمها
اندارتله
وردة : هاا بوية ؟

شيخ خزعل : وين ماشية بعد ابوج ؟

وردة : لازم اداوم اليوم ،نص راتبي طار من الغيابات

شيخ خزعل : انا اطيج الراتب ولا تداومين بين ما يهده الوضع

وردة : مو على الراتب بوية بس حرامات يفصلوني

شيخ خزعل : جا طبي للغرفة اخذي موبايلي الثاني وياج حتى يصير ما يصير تدگين علي

وردة : خوش

هي مشت للغرفة وهو سأل
شيخ خزعل : ياهو هنا من الولد يوصلها ؟

أم جواد : كلهم طالعين بس اضن مهاب فوگ نايم

شيخ خزعل : اصعدي سمر عمي گعدية يوصل اخيته

ردت تمشي مستعجلة
وردة : شني بوية أول مرة امشي ،شعليه

شيخ خزعل : الوضع مختلف هسة بوية

سكتت من شافته ما بيه مجال يتناقش وخلت وصعدت سمر تگعد مهاب ومن ردت گالت
سمر : يگول هستوني نمت ،ما يرضى يگعد عمي

شيخ خزعل : جا امشي بوية انا اوصلج

وردة : يا يابة جا تتأخر ودربي بعيد

شيخ خزعل : حتى لو ،ولا تردين اذا ما اوديلج واحد من اخوانج

وردة : صار

طلعوا هو وياها وبعد ما چانت صافنة تنهدت وخلت عيونة انا وسمر تصير عليها من گالت
أم جواد : وروح أبوي چن هادت نار گلبي من اخذوا حگهم

سمر : حتى انا يا عمة ،بس خايفة على الولد لا يصيرلهم شي

أم جواد : لا أن شاء الله مايصير شي ،ولو انا گلبي هل أيام ما مرتاح

سمر : عمة تردين الصدگ انا ما اتفائل ابد من تگولين گلبج ما مرتاح

أم جواد : يااا

سمر : أي والله عمة

سكتتها من صاحت
أم جواد : خايبة دسكتي لا اگوملج

لوكت الغدا الولد كلهم اجوي من شغلهم ،التموا يأكلون ويحجون بنفس السالفة الما عدنة
غيرها طول هاي الايام ،ورا الغدا طب مهاب للمطبخ اخذ الجاي من ايد سمر وگبل لا يطلع سأل

مهاب : شعجب لهسة ما ردت وردة ،مو چن تأخرت ؟

سمر : جا مو عمي گال يوديلها واحد منكم يجيبها ؟

مهاب : هااا

سمر : أي والله

وگفت بباب المطبخ اباوع عليهم من سأل
مهاب : شني بوية جا ياهو يجيب وردة ؟

شيخ خزعل : خابرتها گالت عدها درس اضافي اليوم وهل راح تتأحر

مهاب : هاا زين ،عود من تخابرك گلي انا امشي اجيبنها

شيخ خزعل : خوش

وزع عليهم الچاي بعد ما ارتاح باله عليها ،وانا رديت يم سمر ،ساعة ومشى مهاب يجيب وردة بس من رد چان وحده ،طب يركض مسطور سطر يصيح
مهاب : ماكوو وردة بوية ،ماكوو ،گالتلي متانيتني بباب المدرسة وما ليگتهااا

°غاية°

_ شوكت تبدون خدمة ؟

اخذ الشفقة من ايدي يلبسها ويحجي وياي
ليث : اليوم ،حضرن البيت نچيب مبيت هنا

_ خوش ،چم يوم راح تخدمون ؟

ليث : ثلاث أيام ونطلع نمشي ،هل سنة كلشي ما افتهمنا من محرم

_ شنسوي غير مصيبة طاحت علينه

ليث : الحمدلله على كل حال ،شتحتاجون خلي أبوي يخابرني

_ خوش

بس طلع أنا كفيت رداناتي اكف البيت ،طر الغروب علي وانا اغسل الحوش ،بس خلصت طبيت اركض للحمام سبحت وطلعت احجي وي امي
_ يمة خل هل سنة امشي عليج الله ،حاجيهم ياخذوني

زهرة : حاجي ليث ياخذج وياه

_ ليث ،اكثر واحد ما يرضى وراح يگلي گلبج ومو زين

زهرة : جا ضلي شتسوين

گعدت گبالها
_ كل سنة تگلولي السنة الجاية وابد ما مشيت

زهرة : خايبة عليش راح تبچين ،مو البنات كلهن وياج

_ مو گبل چنتوا تاخذون ميمنة وياكم

زهرة : گبل من چنت انا اروحن

_ روحي حتى انا امشي وياج ،عليج الله يمة

زهرة : نمشي سيارات اقنع اخوانج

_ أي عاادي حتى لو سيارات ارضى والله

أبتسمت على فرحتي وانا افتر وافتر وارد احلفها
_ عليج الله قنعيهم ،بروح ابوج

زهرة : خايبة كافي شگد تلحين

_ مو اخافن تدگون بي الناقصة

زهرة : والله احاجيهم بس وخري مني

ضليت كاتلني القلق منا لمن اچه وكت طلعتهم عيوني تعلگت يم امي إأشرلها احجي
زهرة : خايبة اطي مجال

العيون كلها صارت علي بحجايتها خلتهم كلهم يستألون شكو
زهرة : اريدن امشي للزيارة

صخر : وين بيج حيل تمشين

غضة : جا مو مفاصلج توچعج ؟

زهرة : اصعد بسيارة

صخر : اهاا

زهرة : أي والله

صخر : ويامن تمشين ؟

زهرة : انا وغاية

باوعلي رافع حاجبة وانا دنگت اسوي روحي ولا يم السالفة
ليث : والله عارفت هذن سوالفج

_ انا شدخلني ،هي گالت امشي وياي ،مو هيج يمة ؟

زهرة : لا ،انا راح اروحن علمودج

صخر : هاا، هيج السالفة

ليث : أي هيج ،هاي اختك العاقلة الفقيرة لا تغرك فقاريتها تخطط وامك تنفذ

_ يااا شبيك اختلفت علي

ليث : ما تمشين

غورگت عيوني ،صخر صعب يتقنع ومنا شاف ليث وياه قفل فرد نوب
_ عليكم الله خل امشي ،والله ضاله بنفسي اشوفن درب الزوار

نوح : قهرتيني

صخر : اذا نوح يمشي وياكم امشوا

بساع عيوني تعلگت عد نوح اتوسل بيه وهو طفر
نوح : لو موو تباوعين هيج ،انا متعلم الدرب كله امشي وما اصعد

صخر : لاتسويها كلش ،مو صاحبك ما يمشي وياك امشي وي امك احسلك

نوح : جا أنت هم صاحبك ما راح يمشي

صخر : انا ما اتحمل امشي وي النسوان

نوح : وانا هم

صخر : شلون راح اگومله

نوح : ابطل ما امشي والله

ليث : تذكرت عزيز يريد يمشي بسيارة لان هل چوم يوم يشكي من ضهره

صخر : چا راح احاجيه ياخذهن وياه ،وحسابك عدي أنت

نوح : عود ميخالف

خزره صخر وطلع ،وانا درت وجهي زعلانه منه
ليث : زعلتي ؟

_ أي

ليث : جا غير اخافن عليج

_ ماعلي شي

ليث : أم فحطة ،تمشين منا لهنا وتفحطين ،لا تضلين تچذبين علي

_ گلتلك سيارة

ليث : وين اكو سيارة من بابنة لكربلة ،مشيها على الغشمان سوالفچ

ما رديت اعارف بحجيه صحيح بس خلصت عمري اتمنى امشي وهل سنة اريدن اطلب مراد للسادس

هو طلع وميمنة صاحتني من فوگ ،صعدت الها شايلة عون وتفتر بيه ،بس شافتني اجت حطته بأيدي
ميمنة : بس شيليه شوي بين ما اعزل الغرفة ،لان امس تنحس وحتى هوسة الهدوم المغسوله ضلت

_ جا ما گتيلي انا اعزلهن

ميمنة : شغل البيت كافي عليج ،بس اگعدي يمي ما اطول

گعدت على الجرباية وهي فرة وحدة كفت كلشي ساعة ما تأخرت
ميمنة : اسبح وارد اخذه منج

_ خوش

طلعتلها هدوم ومشت تسبح وانا گعدت اللعب وياه ،حللته على الجرباية وكلساع ادنگ ابوسه وهو بعدة حيل ناعم بس يباوع بعيونه ...

رفعت رأسي مندارتله من سمعت صوته طب يسأل
صخر : شني وين ميمنة ؟

_ بالحمام تسبح

بلاية ما يرد تقرب على الچرباية ،دنگ على عون بأسه ورد نزل ،طبت تتلفت بالغرفة
ميمنة : سمعت صوت صخر لو يتخايلي ؟

_ أي اجة سأل عليج ونزل

ميمنة : ما گال شرايد ؟

_ لا

گعدت تمشط شعرها وهو طب ،وگف گبالها يشوش الها بما اعارف شني وهي جاوبته بصوت قلق
ميمنة : لا والله ما شايفته ،ما دورت بالحسينية خاف طاح منك هناك

صخر : ماكو دورت

گامت مخبوصة تدور بالجرارات
ميمنة : وين راح ،هاي الجرار فارغة

مسح وجهه
صخر : شلون سالفة هاي

_ شني شمضيعين ؟

انداروا علي ثنيناتهم
صخر : محبسي السليماني ماكو

_ ياا حرامات

صخر : دورت هواي عليه بس ماكو

گعد هو يم عون وهي تفتر بالغرفة مخبوصة عكسه گاعد هادئ ،انتبهتلها فتحت الجرار البطن
الكنتور هاي الجرار ابد ما يرضى احد يفتحها من سنين ومفتحها عده تعجبت من شفته بأيدها ..! !

باوعتله مستغربة وهو ابد ما چن يشوفني يعارف بي انصدمت ،اندارتله
ميمنة : ماكو هنا هم

طفر من مكانه يمشي يمها ويحجي
صخر : جااا وينه

دور بالجرار ومن أيس قفلها واطاها المفتاح
ميمنة : اضن ناسية عد برهان

ميمنة : بلكي ،اذا لگيته تعال گلي

هز رأسه ب أي وطلع مشدوه شده ،نزلت جوة من صاحتني امي ،ولليل ورد صخر گال عزيز ياخذكم وريحانة راح تمشي ويانة هم ،حضرت روحي
ما مصدگة ،حتى عباتي حطيتها عد راسي وبالگوة گدرت اناملي شوي ،ومن طلعنه چانت الدنيا غبشة والجو بيه نسمة بردوة تخبل ...

رفعت ايدي اسويلها هلو من طلعت من البيت أبتسمت وأجت تمشي بس وصلت عدي گالت
ريحانة : صباح الخير

_ صباح النور

ريحانة : جا عمة وينها ؟

_ هسة تجي

بس طلعت امي صعدنا بسيارة ضيرم راح ياخذنة بيها ،چيكها واجه صعد ،حرك السيارة ولنص
الدرب غفن أمي وريحانة وانا ما غفت عيني ابد ما اريدن افوت ولا لحظة من حلم عمري...

_ عزيز

باوعلي من المراية
_ شغل قصيدة لحسين انتمائي

بلاية ما يرد شغلها ،بصوت خافت صرت اردد وياها وانا اباوع للمشاية
_ لحسين انتمائي ،مأتمي وعزائي
لحسين انتمائي ،مأتمي وعزائي

عاهدت نفسي بعهد ،ابقى خادم للأبد
عاهدت نفسي بعهد ،ابقى خادم للأبد

مأتمي وعزائي ،مأتمي وعزائي

من گبل عام وبگيت بحزني لليوم انتظر
انتظر جية محرم وبأحر من الجمر

عمري بين أيد الحسين مقدمه قربان ونذر
لحظة من مجلسة تسوى ،عندي بسنين العمر

مركزة بالدرب وفززني صوته ،انداريت عليه احس روحي صخنت مستحية منه من گال ومبين سامعني
عزيز : صوتج حلو من تقريها

ما رديت عليه ودنگت اعدل بطباگة العباة وهو هم بعد ما حجة ،شوي وگعدن امي وريحانة والدرب كله خلصته اكل كلساع داگين علينه الچامه يطونه شي

احلى زيارة زرتها بكل حياتي بحيث من رديت ساعتين وانا اسولف الميمنة
_ والله والله تخبل كون السنة الجاية أنت هم
تمشين

ميمنة : شايفة هاي الأجواء انا گبل

_ تخببل ،هنيالچ والله ،حلم عمري ازورن وحققته

ميمنة : بالعافية عليج

_ الله يعافيك ،تدرين هناك وتذكرت چفون چانت امنيتها تزور

ميمنة : بيت الشيخ خزعل عدهم حسينية بكربلة واكيد مشت وياهم تخدم

_ والله ،منين تعارفين ؟

ميمنة : شعجب ما تعارفين ،قديمة .

_ لا والله منين اعارف

ليث : هااا الزايرة

انداريتله مبتسمة
_ شوكت تطلع أنت ؟

ليث : غبشة نطلع

ومثل ما سولفت الميمنة سولفتله وهو يسمعلي بالاخير گام يريد يشرد
ليث : صايرة تحجين هواي ،شجاج مو چنتي
هادئة

_ من فرحتي احجي هواي

ليث : انا راح اصعد انام وگعدوني وي الصلاة

_ انا اريدن انام

ليث : جا شلون ؟

ميمنة : انا اگعدك لان اگعد صخر

ليث : أي عفية بعد اخوج

صعد ينام وانا بس حطيت روحي على الفراش رحت بسابع نومة ،ايامنة صارت متشابهه يوم يچر يوم إلى أن اجه يوم اربعين بصائر ...

من كل كتر عيني تفتر ،اباوع فلا مصدگة عدن أربعين يوم ،كل الموجودين مخبوصين بالتحضير
الا فقار ما موجود بيناتنة ،بعد ما گضينا العشا گالوا
نطلع ،وانا اصعد الكوستر باوعتله وعيوني
غورگت ،مدنگ والولد ملتمين عليه يحجون وياه
ومن ضمنهم احفاد الرباح هم ،ساكت بس اعارف
ذاك هو مبين ياكبر همه
نسمات : تعاي غاية بصفي

گعدت يمها دموعي امسحهن ويردن يطيحن من الچامة اباوع عليه چن المصيبة هاي مصيبت واحد من اخوتي مو بس ابن عمي الخسران مرته وعشگ سنينه ...

الدرب كله گضيناه بالنعاوي ،وبس وصلنه اول شي زرنا الامام علي وراها طبينا للمگبرة وچانت اصعب لحظة علينه كلنه ،من لمعت گبالنه اللافته المعلگة بأسمها عياطنة مله المكان ،چن انفتحت
جروحنة بشوفة أسمها ،انداريت اباوعله غواشة بعيوني صارت ،سندوه نوح وليث من راد يطيح انخبصوا بيه يردونه يرد للسيارة بين ما يستقر وضعه هو يجر روحه منهم عينه على گبرها وعيونه مفتوحات بشكل يخوف
فقار : هدني ليث ،هدني امشيلها ،مشتاگلهاا هدوني

اندار عليهم بالگوات يحجي
برهان : هدوه

هداه ليث وهو عبرني متلهف الها ،چن هاي بصائر موش گبرها ،غطيت وجهي بالعباة وبچيت بلاية حس عكس الملتمين على گبرها

وخرت العباة اشهگ ،اباوعلهم وزايد وي كل حجاية يگولوها
غضة : هااا ياحبوبة يا بصائر صار مكانج النچف ريت انا بمكانج ولج حبوبة ،ليش استعچتلي ياعيون زلمتج ،لاحگة على الموت ولج حبوبة لاحگة ،الموت مو الج يالفقيرة

شيماء : ولج بصائرر يمة ،ولج گطعتي گلبي بنموتج ياايمةةة ،حاجيني يمة مفارگتج صارلي هواي ،يابعد گلب ااامج

ميمنة : ما مصدگة الصار لليوم ،ما مصدگة صار أربعين يوم ما شايفتج ،ولج ما اگدر حتى اترحملج ياقطعة من روحي يا أخيتي يانظر عيني
ولج مشيتي للموت وما شفتي ابنج ،ضل بلياج عون

فقار حاضن گبرها حجاية وحدة ما طلعت منه بصفة جعفر يعاتب بيها
جعفر : مشتاگلج ،ما شبعت من شوفتج ،فجعتيني بيج وانا ما صدگت اطلع واشوفنچن ،ليش هيج خوية ،ليش كسرتينا هيج

ساعة وساعتين واحنة على هل حال خوت ارواحنة كم البچي ،واصعب شي من درنا وجوهنة عنها حتى نرد ،نتقدم خطوة ونلتفت الها ،رديت انداريت من صاح صخر على هيوفة تجي تاخذ ميمنة لان تخبلت ما ترضى ترد
ميمنة : ما شبعت منهاا ،صخر عليك الله خليني بس شوي فدووة اروحلك

باوعلها حاير واشر لهيوفة ردي
صخر : انا اجيبنها وياي خلوها

ضلوا يمها هي وياه وافقار الحاضن گبرها ويشهگ مختنگ ،ردوله نوح وليث كل واحد كضه من ايد يردونه يگوم وهو مفرفحة روحه يحجي وياهم ما اسمع شني الجاي يگوله بس من حركة ايده وشلون يأشر على گبرها انا ابجي لان مبين جاي يشكيلهم وهذا هو من حاله مبين ما يهوى يرد للبيت ويخلي مكان محبوبته بيه ...

حطت ايدها على رچلي ،انداريت عليها النفس بالگوة يصعد وينزل عدي
نسمات :ليث الف مرة وصاني عليج وگال لا تخليها تبچي تالي راح ينعمن عيونج

_ شلون ما ابچي ،جاي تشوفين الحال أنت ،بس فقار كافي يبچيني كل ما اشوفه اتذكرها ،ولج ابد ما جانوا يتفارگون وهسة كل واحد بيهم بمكان

نمسات : أمر الله هذا وما نگدر نعترض على امره

_ ونعم بالله ،اخاف لا ما يتحمل فراگها ويصيرله شي وخسارة عون تصير خسارتين ،

نسمات : اسم الله لا تحجين هيج

مسحت عيوني اباوعله صعدوه الولد بسيارة حق سانديه
_ شوفي چن كبر فوگ عمره عمر ،يوميا طايح اكل ما جاي يأكل

نمسات : علينا ندعليه بالصبر لان جرحة بعده جديد والفراگ ما ينحمل

رفعت ايدي ادعي
_ بجاه الامام علي (ع) الله يحط الصبر بگلبه

ردينا الحزن متضاعف على گلوبنه ،بس وصلنه القرية تلگونة ثنين من ولد الرباح وثنين من احفاده الكبار وابن عمة
عطاء الچبير ضلوا حتى لا تضل القرية فارغة ،طبينا النسوان والزلم ضلوا برا ،بباب المطبخ واگفه حواري شايلة عون وعمة عطاء وراها ،بغصة سألتنة

حواري : هااا سلمتولي عليها ؟

ردت عليها
ريحانة : والله وصلت سلامج الها مثل ما ردتي

بچت مقهورة
حواري : شصار لو ماخذيني وياكم

كل النسوان طبن جوة ضلينه بس احنة
ريحانة : وين تمشين وأنت بطنج منا هسة لو شايلة واحد هم ميخالف مو ثنين والدرب هنا هنا

تمسح بعيونها وتحجي
حواري : ما غفت عيني من القهر والله

طبت من بيناتة بلاية ما تحجي مدت ايدها على عون اخذته من ايد حواري تبوس بيه و وجهة من گد البجي صاير دم ،عيونها المكحلات حتى بياضهن لونه متغير ،حزنها ما يتسولف بس ينشاف
ميمنة : اشتاگيتلك يابعد عيون خالتك التشوفك بيهن

حواري : اليشوفج يگول مفارگته عمر ،كلهن چم ساعة

حطته على گلبها
ميمنة : انا دقيقة ما احمل افارگه

جاي تحجي وسكتت من اجه حق يريد چاي ،بايده الچگارة ويحجي وي بركة ،ابد ما دار عيونه منا لو منا ،چر منها نفس وزفره يوصيها

عبد الحق : صبي عشرة كافيات

بركة : هاي مرتك هنا گللها انا تعبانة

خزرها وهي بساع مشيت للطباخ تدردم ،وهو خله وطلع ،انداريت اباوعلها بقهر عيونها ابد ما نزلت منه بس هو ابد ما باوعلها ...

طبطت على چتفها
ميمنة : ما يضل الحال مثل ما هو ويجي يوم يلين وتردون

حواري : يا يلين ،وهو يوم عن يوم ما جاي يباوع بوجهي ،صاير ما چن يعارفني

ميمنة : ما چربتي تحاجيه ؟

هزت رأسها ب أي
حواري : ياريت يگلي شني غلطي حتى اگدر اعالچه

هزته بحضنها من بچة وسألتها
ميمنة : شوكت شربتيه ممة ؟

حواري : ما صار نص ساعة ،بس هو حتى من شعبان يبچي عيشني بأنذار ماگدرت حتى انامن

ميمنة : اشش حبيبي ،ليش البچي ،حبيب خالتك عون الزغيرون

شگد ما چانت تعبانة بس تنسى كل تعبها وتحاول ما تقصر وياه، طبيت وراها بالگوات امشي
من النعاس ،گعدت بصف عمة عطاء اتثاوب
عطاء : خايبة كافي ،اذا نعسانة گومي نامي ولا تضلين فاكة حلگج

حطيت ايدي على حلگي احجي همس وياها
_ عمة اذا ضايجة لا تحطين ضوچتج بي عليج الله

عطاء : على اعصابي متحملة شوفتهن

عضت اصبعها
عطاء : اخخخ لومااا أبوي چان طلعتهن مثل النعجات منا

_ خاب عمة تشترين الطلايب مشترة

عطاء : انچبي ادبسزز شني قصدج انا راعية مشاكل

_ حشاج عمة والله مو هيج قصدي

عطاء : جا شتقصدين ؟

صفنت اريد الزگها وعمة رافعتلي حاجبها احس لوما النسوان گاعدات چان سحلتني ،هم زين صاحتني هيوفة وطفرت
هيوفة : شبيج تركضين ولج

حطيت ايدي على گلبي فحطانة
_ خلصتيني من عمتج الله يخلصج من نار جهنم

أبتسمت عيونها ذبلانه من التعب
هيوفة : اصعدي لميمنة فوگ گليلة صخر يريد هدوم يسبح برا

_ جا ماتصعدين أنت ؟

هيوفة : رچليه يوجعني من گعدة السيارة ،اصعدي عليج الله

_ صار عيني ،صار

هيوفة : عفية بالحبابة

صعدت ادگن بالباب وماكو حس الها ،فتحته من أيست ترد چن نايمة ،وصدگ چانت نايمة وعون نايم على ايده ،مبين غافية بلايه ما تحس ،طبيت غطيتها هي وياه لان الغرفة باردة الوطنية جاية والكنديشن مشتغل ،طلعت هدوم الصخر ونزلت ،بس فتحت باب المطبخ صار گدامي

صخر : جا ميمنة وينها ؟

_ نايمة

اخذ الهدوم من ايدي يوصي
صخر : خليها تاكل من تگعد

_ صار

طبگ الباب ومشى وانا بوجهي للغرفة ما تحمل اضلن گاعدة، بعد بس وگفتني عمة عطاء من صاحتني انداريت الها
_ هاا عمة ؟

عطاء : شوفي واحد من الولد يصيحلي چسار اريد اشوفنه

غطيت حلگي من وحدة من عماته حجت
_ انهجم بيت محبتج ،تريد تشوفه الحنينة الأبد ما مخليته حايرة بأخوانه

مسحت وجها تستغفر واندارت لجدة
عطاء : سكتيهن يمة لان اذا اتخبل عليكم تعارفوني شأسوي

وهذيج وگفتلها
_ شتسووين ،هم تطگيني مثل ما طگيتي أيه ؟

عطاء : لا اله الا الله ،هسة انا يمج ،محاچيتج ،ليش تجيبين الاهانه لروحج ؟

_ ماكو غيرج هاين وساحل بروحه الگاع

صاحت بيها متنرفزة بالگوات احسها كاضه روحها
عطاء : احترررمي روحج لان راح أجي اهينج گدام كل الموجودين هنااا

_ تعاي شووو ،تعااااي انا گلبي محمل عليييج

وعمة لو مو جدي موصيها بعد ما تصبر عليها انخبصنا وصوت العياط مله البيت اتوسل بيهن ينصن صوتهن ونسوان بيت الرباح انفكن بعد اشكال الحجي والغلط على عمة ومن بين الهوسة انتبهت على بركة حطت روحها بالنص عود تچر المرة من عمة بس هي چاي تكضها الها ...

لطمت على روحي
_ يمة هذااا صوت صخررر ،صخااام سمعوااا

طلعت اركض حايرة شاگله وهو بس شافني نتر عيونه صايرات بگصته
صخر : شصايررر ،شني هذا الصوت ؟

_ عمة عطاء وحماتها تعاركن و وحدة جاي تطگ الثانية

صخر : سويلي دررب

_ هااا

صخر : امشي گدااامي ،دواهن عدددي

مشيت گبله مستعجلة گتلهن صخر يريد يطب ومحد سمعتني ،بنص الهوسة چر عمة وهي ناعمة رفعها رفع من فوگاها ضلت بأيده ترافس تريده يهدها ،كضاها حيل يصيح
صخر : انشهرنا وقمرر بني هاااشم شهرتنيااا ،هيددي

صاح عليها الا ثبتت ،ودنگ يحجي وي بت الرباح خلاها ترچف
صخر : صارن مرتييين ،هذيج عديتها بس هل مرة انا الراح احاجي الرباح والما تحشم روحها وتحترم اهل هذا البيت تتفضل تطلع برااا

_ هي طگتنييي ،عمتك دمتني شوووف

تأشر على وجهة ،باوعلها ما مهتم للدم النازل من وجهة
صخر : ما تطگ احد اذا ما عال بيها

عمة بحجيه نفشت ريشاتها شوي وبعد تطير ،ضميت ابتسامتي من گال
صخر : أي وحدة تحاچيج طگيها بس على كيفج دم المرة مخلصته

بس طلع ضحكت عمة تحركلهن حواجبها ما خلتهن يتحملن يضلن بعد وخلن ومشن من عارف چدي طب لعب لعب بعمة وكلنه شهدنة وياها
رأجس : لا تبررن الهاا وانا كلش زين اعاررف بيهااا تدور الزله دوارره

عطاء : غلطت علي بوية گدام النسوان وانا ترباتك ما اگدر اسكتلها

رأجس : يا ترباااتي ،أنت ما مربيج احدد

عطاء : خلف الله عليك بوية

عدلت حجابي من سمعت الباب يندگ وصوت چسار ابن عمة يريد يطب ،تكترنه من اشرلنه صخر نصير على صفحة وهو وطب هو عينه بس على أمه ،سلم عليها
چسار : ليش هيج سويتي يمة ،هسة الحجي واصل لچدي ويحلف ما الچ رد و للبيت

عطاء : الله وايده هيج وتصير صدگ

چسار : جا واحنة يمة ؟

عطاء : كبرتكم وصرتوا زلم بعد عليش ضاله يمهم

رأجس : غضب الله على رأسج لا يهمج بزر ولا زلمة

عطاء : الزلمة التحجي عنه عفنت يمك انا وهو ما عارف يسأل علي ،هو هم ما يريدني بوية

رأجس : حگه مايريدج اذا بس لسانج متررين ،وخري من ضهر اخوج خل اشوف طولج

عطاء : شني مخبلة

كضت دشداشة أبوي حيل
عطاء : بروح منير ضل واگف

اندار عليها وهي مثل البزون تباوعله فلا چنها نفسها الخلت دم المرة ينزل
محمد : ضلي تسوين مصايب وتختلين وراي

عطاء : جا ورامن اختل ورا يوسف يحطني ويكتلني هو گبل أبوي

يوسف : هسة يوسف متدخل ؟

عطاء : شعجب ؟

يوسف : راح اجيج والله لومو خاتله بضهره

عطاء : أي مو اگول وين تگدر تسكت

شمر سبحته عليها أجت بچتف أبوي
محمد : والله ما تحترررم

يوسف : اختك الما تحترم

محمد : هذا لسانها ما تعارفها تداهر لو جديدة عليكم

يوسف : مو تداهر تقلل احترام هاي

چسار : فدوة اروحلك خالي عوفها ،يمة حاجيني شتردين ؟

عطاء : ابوك اذا ما يعتذر مني لان طگني ويجي هو يردني ما اردن لو يوگفون بوجهي أل غضب كلهم

صيح چدي
رأجس : انعل ساااس الچابج بت الكلب ،من يا طينة أنت

وكبرت من زغرت وما انحلت ،خلتهم فايرين وطبت للغرفة ،لحگتها بس شافتني گالت
عطاء : طبي وسدي الباب ونارهم تاكل حطبهم

طبگت الباب وانا ارد عليها
_ أنت النار عمة

عطاء : "هم الشعلوها" ،جبت عمري متعوبة والسبب من عنادهم ،وهسة اريدن چدج يشوف العناد على اصوله

_ بس خطية ولدج

عطاء : مو زغااار

_ هسة ليش تصيحين علي

گعدت تحوس
عطاء : يا فهاااوتج ،الىه يساعدك ياعمة عليها

_ يساعد منو ؟

عطاء : دوخري مني لا احطنج برگبتي

اريد ارد عليها وفززني صوت عيطة ميمنة ،فتحت باب الغرفة وطلعت عيني على الدرج صارت نزلت تركض عون بأيدها صاير ازرگ ...

•┈┈┈••✿❂✿••┈┈•  

عون!!
ميمنة وتعلقها بيه يوترني
شوكت حق يلين ونعرف شنو
بيه ؟؟

مقهورة على حواري كلش
والقهر الأكبر كوكبة
تتوقعون شنو الصاير وي وردة ؟؟

•----------•

احب علاقة محمد وعطاء
شخصية عطاء دوة للحياية
اريد منها بحياتي تفيدني


تعليقات