رواية ديون النبض الفصل الثاني والاربعون 42 بقلم مروه صياح


 رواية ديون النبض الفصل الثاني والاربعون 


كملت كلامي مع سمير....

في اللحظة دي، أنا اللي بدأت أتكلم، وقلت له باعتذار:

وعد: أنا آسفة جدًا يا سمير. والله ما كان قصدي أستخدمك أو أظلمك معايا.

بص لي وقال بهدوء:

سمير: أنا فاهم يا وعد، ومش محتاج منك تبرريلي حاجة. بس عايز أقولك على حاجة... 

أنا كمان مسافر بعد شهرين، وكنت مخطط إننا نكتب كتابنا ونسافر على طول.

سكت شوية، وبص لي وكأنه مش عارف يبدأ كلامه منين.

أما أنا، فكنت عارفة إن اللي هطلبه منه صعب، ويمكن يكون طلب ملوش أي منطق، لكن بالنسبة لي كان مهم جدًا.

وعد: أنا عايزة أطلب منك طلب محرج أوي يا سمير.

سمير: صدقيني، لو في استطاعتي أساعدك، إنتِ عارفة إني مش هتأخر عنك.

بصيت له وقلت بجدية:

وعد: توعدني الأول إنك مش هتجيب سيرة الموضوع ده لمجد، مهما حصل؟

سكت سمير، وبص لي بنظرة مش موافقة.

سمير: بس أنا مش موافق على الحتة دي يا وعد.

وعد: علشان خاطري أنا يا سمير... وافق.

فضل ساكت لحظة، وأنا كملت كلامي:

وعد: تاني حاجة، أنا عارفة إن علاقتنا ببعض ما ينفعش تستمر .

بص لي، وضحك وقال:

سمير: تبقي عبيطة يا دكتورة وعد!

بصيت له باستغراب، فضحك تاني، وبعدها قال:

سمير: أنا آسف، ما أقصدش أضايقك، بس عايزك تفهمي حاجة. علاقتي بيكي مش هتنتهي لمجرد إننا مش هنكمل زي ما كنا مخططين.
أنا قربت منك وحبيتك بجد، ومش هقدر أتعامل معاكي كأنك شخص غريب عني.

سكت شوية، وبعدها كمل:

سمير: بس أنا مش زيك يا وعد، ومش هفضل واقف مكاني. أنا لازم أبقى قوي وأكمل حياتي.
ومش هقولك إني هنساكي بسرعة، علشان ما أكذبش عليكي، لكن مع الوقت هقدر أتجاوز اللي حصل. وهبدأ أشوفك بعين تانية، عين الصديق اللي بيحبك وبيتمنى لك الخير.

ابتسم لي وقال:

سمير: لو إنتِ شايفاني زي حازم، أو شايفاني صديق قريب منك، فأنا هفضل جنبك في حدود اللي يريحك، وهساعدك على قد ما أقدر.

فضلت باصة له، وأنا مقدرة قد إيه هو بيحاول يتعامل مع الموقف بعقل، رغم إنه هو كمان اتوجع.

وعد: طب إنت هترجع من سفرك إمتى؟

سمير: احتمال أسافر سنتين أو تلاتة، على حسب الظروف. بس بتسألي ليه؟

أخدت نفسًا، وبعدها قلت له:

وعد: ممكن الخطة اللي إنت كنت ناوي تنفذها تفضل زي ما هي؟

بص لي بصدمة، وقال:

سمير: مش فاهم يا وعد... تقصدي إيه؟

وعد: أقصد إنك لو اتكلمت مع مجد، تفضل الأمور في الظاهر زي ما هي. كأنك لسه خطيبي، ولما تسافر، كأنك سافرت ومعاك خطيبتك، وكأننا فعلًا اتجوزنا وأنا سافرت معاك.

فضل باصص لي من غير ما يتكلم، وأنا كملت بسرعة، كأني خايفة أتراجع عن طلبي.

وعد: أنا عايزة أحس إن كل حاجة رجعت لطبيعتها. عايزة مجد يركز في حياته ومستقبله، وما يحسش إن في حاجة حصلت لي بسببه، أو إن في حاجة ممكن ترجعه لورا تاني.

سمير: اللي إنتِ بتتكلمي فيه ده جنون يا وعد!

سكتُّ لحظة، وبعدها بصيت له وقلت:

وعد: ولو قلت لك إن ده اللي هيريحني؟

سمير أخد نفسًا طويلًا، وسكت شوية، وبعدها قال:

سمير: إنتِ بتحبي تعقدي الأمور يا دكتورة وعد.

ابتسمت ابتسامة صغيرة، وقلت له:

وعد: يمكن... بس أنا من وأنا صغيرة اتعودت إني أسعد اللي حواليا، وأحاول أخفف عنهم حتى لو أنا اللي تعبت.
ولما كبرت، فهمت إن مش كل حاجة بنعملها علشان اللي بنحبهم بتكون سهلة، وإن أوقات التضحية بتكون جزء من الحب.

بصيت له، وكملت بصوت هادي:

وعد: أنا عارفة إن اللي بعمله مش هيخليني سعيدة، وعارفة إن مجد هيفضل ساكن جوايا مهما حصل. أنا عمري ما هنساه، ولا هقدر أبعده عن قلبي.
قلبي لسه بينبض عشانه، لكن كل اللي عايزاه إني أتأكد إنه مكمل في طريقه، وإنه بيحقق نجاحاته وأحلامه من غير ما يبص وراه.

سكتُّ، وبعدها مسكت إيده وقلت برجاء:

وعد: ممكن يا سمير؟

بص لي طويلًا، وبعدها قال بصوت هادي:

سمير: والله أنا اللي بقيت خايف يا وعد.

وعد: خايف من إيه؟

سمير: بقيت خايف إني أنا اللي أتعلق بيكي أكتر، ويوصل بيا الحال لدرجة إني ما أقدرش أستغنى عنك.

بصيت له وضحكت، وقلت:

وعد: مش إنت لسه قايل إنك مش هتبقى ضعيف؟

ضحك هو كمان، وبعدها قال:

سمير: وعلى فكرة، إنتِ كمان مش ضعيفة يا وعد. لما الجسم بينهار، أوقات بيكون ده إنذار إننا محتاجين نقف شوية ونراجع نفسنا.
طبيعي إننا نحزن ونبكي ونتوجع، وده مش معناه إننا ضعاف.

سكت لحظة، وبص لي باهتمام.

سمير: إنتِ قوية بحبك، وبالتضحيات اللي حاولتي تعمليها علشان مجد. بس أنا بطلب منك حاجة واحدة... 
وزني أمورك يا وعد. فكري في نفسك زي ما بتفكري في غيرك. لو إنتِ فعلًا شايفة إن مصلحة مجد في القرار اللي أخدتيه، فده ما كانش معناه إنك تيجي على نفسك بالشكل ده كله.

فضلت ساكتة، وبصيت قدامي.

كنت عارفة إن كلامه صح، وعارفة إني بالغت في التضحية لدرجة إني نسيت نفسي تمامًا.

لكن خلاص...

اللي حصل حصل، ومش كل حاجة بنندم عليها بنقدر نرجع الزمن علشان نغيرها.

ويمكن أصعب حاجة في الحكاية كلها، إني كنت لسه بحب مجد بنفس القوة، لكن بقيت مقتنعة إن حبي ليه لازم يفضل سر، وإن سعادته لازم تكون من بعيد، حتى لو أنا عمري ما قدرت أكون جزء منها.

ديون النبض 🫀🫀🫀

بقلم الكاتبة مروة صياح ✍️🎯

الأيام بدأت تعدي، بعد ما رجعت البيت، لكن أكتر حاجة كانت بتتعبني إني مش قادرة أقف على رجلي.

عمري ما تخيلت إن في يوم من الأيام ممكن أبقى عاجزة بالشكل ده، ولا تخيلت إني هضطر أعيش على كرسي متحرك، وأنا اللي كنت طول عمري بحب الحركة، وبحب أخرج وأتعلم وأجري ورا أحلامي.

ما كنتش عارفة إذا كنت هفضل في الحالة دي فترة طويلة، ولا هقدر أرجع أمشي تاني، لكن كان في حاجة واحدة جوايا كنت متمسكة بيها... إني لازم أتعافى.

ويمكن من كتر وجعي، كنت حاسة إن علاجي الحقيقي هو إني أكون مع مجد، وإن نفسيتي مرتبطة بيه لدرجة إني كنت بتخيل إن رجوعي لحياتي الطبيعية مش هيحصل غير لما يرجع هو كمان.

عدت الأيام، وبدأت أحاول أشغل نفسي بمنتجات الريزين اللي كنت بصنعها بإيدي. 

كنت بقعد بالساعات أشتغل، أختار الألوان، وأرتب التفاصيل، وأحاول أطلع كل قطعة بشكل مختلف. كانت الحاجات دي بتاخدني من أفكاري شوية، وتخليني أحس إني لسه قادرة أعمل حاجة، وإن حياتي ما انتهتش لمجرد إني بقيت على كرسي متحرك.

ومع الوقت، رجعنا كلنا نتجمع زي زمان؛ أنا ورغد وياسين وماما وحازم.

رجعنا لعادتنا ولمتنا اللي كنت بحبها، وكنت فعلًا بفرح من قلبي وأنا وسطهم، لكن كان دايمًا في نغزة جوايا، إحساس ناقص ما كنتش بعرف أتجاهله.

مجد مش موجود.

كنت بفتقده في كل قعدة، وفي كل ضحكة، وفي كل مرة يحصل فيها موقف كنت متأكدة إنه لو كان موجود، كان هيعلق عليه بطريقته اللي بحبها.

كنت بطمن عليه من رغد، وهي كمان قربت مني أكتر، وبقت تحاول تعوضني عن غيابه على قد ما تقدر. وكل اللي حواليا كانوا بيحاولوا يساعدوني، ويشجعوني إني أرجع أعيش حياتي، حتى لو بالتدريج.

عدى حوالي شهر ونص، ورغد كانت قربت تولد.

من ساعة ما رجعت من المستشفى، وأنا كنت برفض أخرج من البيت. حتى لما كانوا يقترحوا عليَّ أغير جو، كنت بفضل قاعدة في مكاني. أوقات كنت أقعد في البلكونة مع ياسين، ونتكلم في أي حاجة، وده كان بيهون عليَّ شوية.

في يوم رغد تعبت وكانت علي وشك الولادة...

ماما وحازم كانوا مع رغد في المستشفى، وياسين ما رضيش يسيبني لوحدي.

لكن بعد إلحاح مني، وافق إنه يروح ويكون جنب رغد ويطمن عليها.

وعد: يا ياسين، روح إنت واطمن عليها. أنا كويسة، وكل شوية هتصل بيكم أطمن عليكم. مش معقول تفضل هنا بسببي وهي محتاجاكم جنبها.

وبالفعل، راح ياسين المستشفى، وبعد يوم كامل رجعت رغد وهي شايلة بين إيديها أجمل بنوتة.

أول ما شفتها، حسيت بفرحة مختلفة، وفضلت أبص لملامحها الصغيرة، وبعدها بصيت لرغد وقلت لها بضحكة:

وعد: إيه ده يا بنتي؟ دي شبه ماما أوي! قد إيه بتحبي ماما علشان تجيبي بنت شبهها كده؟ طب ما كنتي تجيبيها شبه حازم شوية!

رغد بصت لي وضحكت، وقالت:

رغد: ماما بالنسبالي مش مجرد أمك يا وعد... دي كمان أمي اللي أفتقدتها. يمكن علشان كده نفسي أشوف في بنتي منها.

بصيت لها وابتسمت، وحسيت قد إيه الكلام ده طالع من قلبها، وقد إيه وجود ماما في حياتنا كان فارق معانا كلنا.

ولكن أفتكرت لما كنت بشرف علي حاله ولاده ووقتها مجد شافني وانا شايله البيبي...
وساعتها قال لي كلمه اتكسفت منها قوي لكن وقتها دخلت قلبي لما قال ان نفسه في طفل مني افتكرت كلامه ...
افتكرت نظره عينه وقتها افتكرت الموقف كله ما كانش غايب عن عيني وكأني شايفاه...

عدى أسبوع، واتجمعنا كلنا علشان نحتفل بسبوع بنت حازم.

حازم سماها حور.

كانت آية في البراءة والجمال، وكل ما أبص لها أحس إني عايزة أفضل شايلها بين إيديا طول الوقت.

حازم كان كل شوية يبص لي ويقول:

حازم: دي هتطلع كلها إنتِ يا وعد.

كنت أضحك وأرد عليه:

وعد: بلاش أنا يا حازم، دي كده هتتعبكوا أوي!

فيضحكوا كلهم، وأفضل أنا كمان أضحك معاهم.

كان سمير موجود وسطنا في اليوم ده، وكان واضح عليه إنه مبسوط، خصوصًا إنه شايفني بضحك وبشاركهم فرحتهم، حتى لو كان عارف إن جوايا وجع لسه ما خلصش.

كنت طول الوقت شايلة حور، ومش عايزة أسيبها من إيدي، لحد ما فجأة تليفون رغد رن.

أول ما سمعت الرنة، رغد بصت للشاشة، وفجأة قالت بلهفة:

رغد: ده أكيد مجد!

وجريت على التليفون، وكأنها كانت مستنية المكالمة دي من زمان.

كانت رغد بتحاول تتجنب إنها تتكلم عن مجد قدامي كتير، لأنها عارفة إن اسمه لوحده بيحرك جوايا وجع كبير، لكن لهفتها علشان تسمع صوته غلبتها.

فتحت المكالمة، وقالت بفرحة:

رغد: مجد! وحشتني أوي!

ومن الناحية التانية، سمعت صوته بعد شهور طويلة.

مجد: وإنتِ كمان وحشتيني أوي يا رغد. إنتِ عاملة إيه؟ وحور عاملة إيه؟ أنا نفسي أشوفها أوي وأشيلها بين إيديا.

أول ما سمعت صوته، حسيت كأن جزءًا ناقصًا جوايا رجع للحظة.

وحشني أوي...

وحشني صوته، وملامحه، وطريقته في الكلام، وضحكته، وابتسامته، وحتى التفاصيل الصغيرة اللي كنت فاكرة إني هقدر أتعود على غيابها.

كنت باصة لرغد وهي بتتكلم معاه، وعيني ما بتتحركش من عليها.

كان نفسي أقول لها: اديني السماعة.

كان نفسي أسمع صوته وهو بيكلمني أنا، حتى لو لدقيقة واحدة.

كان نفسي أقول له إني لسه هنا، وإن كل حاجة حواليا اتغيرت، لكن في حاجة واحدة ما اتغيرتش أبدًا... حبي ليه.

لكن ما قلتش حاجة.

فضلت ساكتة، أراقب رغد وهي بتتكلم معاه، لحد ما خلصت المكالمة وقفلت.

رجعنا نكمل سبوع حور، وحاولت أشاركهم فرحتهم، لكن صوته فضل يتردد في ودني حتى بعد ما المكالمة انتهت.

ومن بعدها، مجد كان بيتصل برغد كل تلات أو أربع أيام تقريبًا، يطمن عليها وعلى ياسين، ويسأل عن ماما وحازم.

لكن عني أنا... ما كانش بيسأل.

وكل مرة كنت أعرف إنه اتصل، كنت بستنى في سري إنها تقول لي إنه سأل عليَّ، حتى لو مجرد سؤال عابر.

لكن ده ما كانش بيحصل.

ومع الوقت، بدأت أقول لنفسي إنه خلاص بدأ ينشغل بحياته، وإن الأيام بتساعده ينساني، وإن يمكن أنا الوحيدة اللي لسه واقفة عند نفس اللحظة.

كان الإحساس ده بيوجعني أوي، لكن كنت بحاول أتقبله، وأقنع نفسي إن ده بالضبط اللي كنت عايزاه من البداية... إنه يكمل حياته.

أما دراستي، فما كانش ينفع أكملها من البيت؛ كليتنا محتاجة حضور وتدريب عملي، وده كان صعب في ظروفي وقتها.

لكن حازم ما سابنيش أستسلم تمامًا. كان بيجيب لي مراجع ومجلدات التخصص اللي أنا عايزاه، وبدأت أذاكر في البيت وأركز في المنهج النظري، وأحاول أحافظ على اللي وصلت له بدل ما أحس إن كل تعبي راح هدر.

ومع مرور الشهور، حور كانت بتكبر بين إيديا.

اتعلقت بيا، وبقت تعرفني، وتقعد قدامي تلاغي وتضحك، وكل ما كنت أشيلها أحس بفرحة حقيقية، فرحة بتخليني أنسى وجعي شوية.

شهر يجيب شهر، وأيامنا كانت بتعدي، وأنا بحاول أرجع لنفسي بالتدريج.

رجعت وعد اللي بتضحك وتهزر، واللي بتحاول تسعد اللي حواليها زي ما اتعودت طول عمرها. بس علي كرسي متحرك...

لكن ده ما كانش معناه إن الوجع اختفى، ولا إن مجد بقى ذكرى عادية في حياتي.

كنت بس بحاول أعيش.

أما مجد... فكانت حكايته مختلفة تمامًا.

من أول ليلة سافر فيها، وحتى وهو بيحاول يبدأ حياته من جديد، ما كانش قادر ينساني، ولا كانت صورتي بتفارق خياله.

كان واضح وصريح مع سارة من البداية، وما حاولش يوهمها إنه نسيني أو إن قلبه بقى ليها.

مجد: أنا مش هكدب عليكي يا سارة، ولا هقولك كلام مش حقيقي. أنا لسه بحب وعد، ولسه مش قادر أنساها. لو إنتِ موافقة تكملي معايا وإنتِ عارفة الحقيقة دي، أنا مش همنعك، لكن لازم تكوني عارفة إن الأيام وحدها هي اللي ممكن تغير حاجات كتير، وإن مفيش حاجة بتفضل على حالها.

سارة وافقت، رغم إنها كانت عارفة إن قلبه لسه متعلق بواحدة تانية.

ومن أول ليلة، كل واحد فيهم كان بينام في أوضة مختلفة.

مجد كان بيحاول ما يجرحهاش، وما يتعاملش معاها بطريقة قاسية، لكنه في الوقت نفسه ما كانش قادر يديها المشاعر اللي هي مستنياها منه.

أما سارة، فكانت كل يوم بتتعلق بيه أكتر.

كانت شايفاه زوجها وحبيبها، وكانت بتتمنى إن مع الوقت يقدر يشوفها بنفس النظرة اللي هي بتبص له بيها.

بدأت تهتم بنفسها زيادة عن المعتاد، وتختار لبسها بعناية، وتحاول تلفت نظره بأي طريقة، يمكن في يوم يشوفها بشكل مختلف، ويمكن قلبه يتحرك ناحيتها بدل ما يفضل أسير لذكرى كانت بينا.

لكن الأيام كانت بتمر، ومجد كان لسه بعيد عنها، حتى وهو موجود معاها في نفس البيت.

وفي ليلة، كانت سارة مهتمة بنفسها أكتر من أي وقت فات، وحاولت تقرب منه، لكن مجد كان وصل لمرحلة ما بقاش قادر يتجاهل فيها إصرارها على تغيير مشاعره بالقوة.

بصلها وقال بنفاد صبر:

مجد: هو إنتِ ما بتزهقيش يا سارة؟ مهما تعملي، صدقيني، كل اللي إنتِ بتعمليه ده ما حرّكش جوايا أي حاجة.
أنا مش قادر أشوفك بالشكل اللي إنتِ عايزاني أشوفك بيه، ومش هقدر أمثل عليكي مشاعر مش حاسس بيها.

كلامه نزل عليها كأنه صفعة.

لأول مرة، حسّت سارة إن كل محاولاتها ما كانتش بتقربها منه، بالعكس، كانت بتأكد لها قد إيه هو بعيد عنها.

صرخت في وشه، والوجع اتحول لغضب:

سارة: إنت ليه مش شايفني زيها؟ فيها إيه زيادة عني؟! دي خدعتك واستغلتك، ومع ذلك هتفضل طول عمرك بتحبها؟ وهي أصلًا مش شايفاك!

مجد ما ردش.

فضل باصص لها في صمت، لكن جملتها الأخيرة رجعته للحظة تانية تمامًا... للحظة اللي شافني فيها يوم فرحه، وأنا واقفة قدامه وبحاول أبارك له، رغم إن قلبي كان بيتكسر وأنا ببص له.

افتكر نظرتي، والطريقة اللي عينيه اتقابلت بيها مع عينيَّ، والوجع اللي كان واضح فينا إحنا الاتنين، رغم إن محدش فينا قدر يقول الحقيقة.

وفي اللحظة دي، حس إن سارة مش فاهمة حاجة؛ مش فاهمة إن اللي بينه وبيني ما كانش مجرد علاقة انتهت، وإن غيابي ما قدرش يمسحني من قلبه.

أما هو، فما قدرش يكذب على نفسه.

كان لسه بيحبني.

ساب سارة ودخل أوضته، وقفل الباب وراه، كأنه محتاج يهرب من كل حاجة حواليه، ويواجه الذكريات اللي طول الوقت بيحاول يشغل نفسه عنها.

قعد لوحده، وبدأ شريط الذكريات يمر قدام عينيه؛ من أول يوم شافني فيه، لروحي اللي كانت بتضحك من قلبها، وحركتي، وكلامي اللي كان دايمًا مليان أمل، وطريقتي في إني أحاول أهون على أي حد حتى لو أنا اللي تعبانة.

افتكر ضحكتي، وابتسامتي، وكل مرة كنت بدخل فيها حياته وأغير شكل يومه من غير ما أقصد.

كان بيتعذب كل ما يفتكر إني بقيت بعيدة عنه، وإنه اختار طريقًا ما قدرش ياخدني معاه فيه.

لكن الغريب إنه، رغم كل الوجع، كان كل ما يفتكر وشي وأنا مبتسمة، يحس بسعادة صغيرة بتعدي على قلبه.

كأن ذكرياتي كانت بتوجعه وبتواسيه في نفس الوقت.

وكأن قلبي، اللي كان بينبض عشانه من بعيد، لسه قادر يوصل له إحساسه... حتى وإحنا كل واحد فينا في بلد مختلفة.


تعليقات