رواية خلخال مشوه الفصل الثاني والاربعون بقلم زمرده
اخذني بكلشي مابيعك
أخذني من التعب يمك
اموت بسد اصابيعك
اخذني وياك من عندي
اخذني لأي حلم ارتاح
مو شرط بحلم وردي .
°غاية°
عزيز : الغاية الگلبي صرتي ،حبيتج اعترف وأثرت بي حنيتج على اخوانج واريد اصير اقرب منهم الج
كلمة ،كلمة گالهن خلني احس بوجهي صخن ،دنگت اريد استوعب الگاله ورد گال
عزيز : انا حاجيت عمي وگال يحاجيج ورا السادس بس انا ما ضل عدي صبر ،ترضين بي غاية ؟
رفعت رأسي مرتبكة ،يباوع علي متأمل جواب يرضيه من شاف طال سكوتي وحيرتي حيرته
عزيز : هاا غاية ؟
بلعت ريگي وهمست مدنگة رأسي
_ ابن عمي أنت .
عزيز : يعني شني ؟
_ ما الگه الاحسن منك
باوعتله من ما رد ،چان مبتسم ويباوعلي على أثر أبتسامته أبتسمت وطلعت اهفي على وجهي ،هستوني طلعت وصارت بوجهي حواري
باوعت لغرفة عزيز رافعة حاجبها وردت باوعتلي
حواري : شعدج هنا ولج ؟
_ هاا
تقربت علي مزغرة عيونها بشك
حواري : ولج غاااية
همست ارجف
_ حورية اسكتي عليج الله
حواري : صخاااام
_ الصخمج بس اسكتي
تخرط بخدودها وبالگوات ضامه ضحكتها ،خليتها ونزلت بس شافتني عمة گالت
عطاء : جا وين هيوفة شني ما گعدت
صفنت متذكرة انا عليش صعدت ،انتبهت على طفيف ابتسامة انرسمت على وجها
عطاء : دصعدي بساع صيحيها
بلاية ما ارد رديت صعدت ،بس دگيت باب الغرفة عليها فتحته ،أبتسمت من شافتني
هيوفة : هاي مني اليوم هنا
بوستها اسأل
_ شلونج ،ضيرم شلونه ؟
هيوفة : ماشي الحال ،شعجب جايتنة ؟
_ عمة اجت وگالتلي أجي وياها
هيوفة : عمة عطاء ؟
_ أي ،جوة تريد تشوفج
هيوفة : جا اوگفيلي البس حجابي
طبت جابت شالها ونزلنه انا وياها ،گامتلها عمة تسلم عليها وتحجي وياها
عطاء : گلت ما امشي اذا ما اشوفنج ،گاطعة بينا هل أيام
هيوفة : فدوة لگلبج ياعمة بس والله ملتهية بضيرم وما الي واهس حتى اطلع من البيت
عطاء : معذورة
گعدن يسولفن وانا ضليت صافنة جا مو گالت نرد بساع
_ عمة مو گلتي ما نتأخر ؟
انا واگفه احجي وياهن وهي تريد تكمل سالفتها التفتت وراي من گالت
عطاء : عزيز تعال وصل غاية للبيت انا اريد اضلن
هنا
وگف بمكانه چان نازل يريد يطلع ،باوعتلها موسعة عيوني شو اختلفت علي
_ جا مو تردين وياي عمة ؟
عطاء : مليت من البيت ردي أنت
ما حاجيتها وبين ما لبست عباتي طلع عزيز برا متانيني ،بس شافني طلعت أشرلي يلا ،مشيت وراه وهو ابد ما حجة ،وانا ادعي ما يرد يحجي وياي لان لهسة ما جاي استوعب الگاله الي
وصلني ومشى وانا بس طبيت بوجهي للغرفة عود اقره بس خلصتها صفنات
نزلت الكتاب من ايدي وتنهدت حايرة اسولف وي روحي لهسة ما مصدگة اعترافه الي ولا الصدمة الصدمنياها بكلامه ،باوعت عليها من طبت و وگفت تباوعلي بأستغراب
ميمنة : كل ضني نمتي ،دگيت الباب شگد وينج ؟
_ ما سمعته .
ميمنة : يااا
_ أي والله
ميمنة : وين بالج ؟
_ ما اعارف
سدت الباب وأجت گعدت گبالي
ميمنة : احجيلي شبيج ؟
استحيت احجيلها بس بكلامها شجعتني
ميمنة : انا أختج لا تترددين لو حجيتلي شي
نطقت اسمه بخجل
_ عزيز
ميمنة : شبيه ؟
_ حاجاني
ميمنة : شيريد ،خايبة احجي دفعة وحدة اضل اجر منج كلمة كلمة
_ مو استحي
صفنت بوجهي
ميمنة : صارت بيها مستحى ،يعني الفكرت بيه صح
_شفكرتي
ميمنة : احجيلي وانا اگلج شفكرت
تربعت گبالي وهاي گعدتها هل شكل بعد مابيها مجال لازم احجيلها بدون ما اتهرب ،احس وجهي صار بوخ مستحية منها شلون راح احجي
ميمنة : خايبة احجي عليتي گلبي
_ هو عزيز حاجاني ،گال اريد اخطبج من تخلصين سادس
ميمنة : أي ،وشگتيله ؟
دنگت اطگطگ اصابعي
_ گلتله ما الگه الاحسن منك
ميمنة : صح
باوعتلها متوترة
_ يعني السويته صح ؟
ميمنة : أي
_ احس خايفة منه ،شخصيته صعبة شلون راح اتعامل وياه وچماله محامي
ميمنة : مثل ما تتعاملين وي اخوانج تعاملي وياه وبعدين حتى لو محامي شني يعض ؟
_ خاب لا ،مو هيج بس احس اخواني يختلفون
ميمنة : يا يختلفون ،صخر لو ليث ،اذا هو نوح ازغرهم الگاع ما تجرعه بس هاي لان تحبيهم تشوفيهم هيج
رفعت چتفي حايرة
_ ما اعارف والله ،اخاف من فكرة الزواج انا
ميمنة : هسة ركزي بدراستج وكلشي بوكته
_ تندمت لان قبلت لو گايلتله افكر
ميمنة : بالعكس احسن شي سويتيه ،عزيز خوش عزيز
_ وصخر هم خوش صخر
أبتسمت
ميمنة : جا طبعا خوش ،انسي كلشي وركزي بأمتحاناتج
_ أي
مشت هي وانا رديت اقرأ ،هستوني اخذت استراحة حتى اكلي شي سريع وبس طلعت من الغرفة الصوت الصار برا خلاني اجمد بمكاني
أشرت بأيدي احاجي امي البهتت بمكانها
_ يمة صوت سيارة شرطة لو يتخايلي ؟
بنفس الوكت طبت ميمنة من برا تتعثر بخطواتها مفزوعة والخوف مسيطر على صوتها والگالته خلانه نتأكد من السمعناه
ميمنة : الشرطة برااا
امي فزت تطلع برا وجدة خرطت خدوها خايفة لا الولد مسويلهم مصيبة وانا طلعت ورا ميمنة اريد اشوفن شكو ومن الهوسة اريد افتهم شي ما اگدر
°ليث°
رديت من الگيعان اكل شي واردن ،جعفر يمشي وراي بالگوات اخذته وياي
_ خاااب كافي شبيك ،اسكت لا احطنك بالساگية
والله
جعفر : انجب ،لا تلح علي اجي وياك بعد
انداريت عليه بيدي الكرك
_ جا حيوان انا اشتغل وحدي ؟
جعفر : حشى الحيوان ،اخخخ راسي
طگيته بخشبة الكرك على راسه تمدد بالگاع وانا عبرته اصيح بلاية ما التفت
_ تستاهل يا حيووان
كملت دربي للقرية وهو اجه وراي يغلط ويسب انداريت عليه
_ مو ادفنك هنا ومحد يحس ،احترم روحك لا
انعل اهلك
جعفر : ليث العاشگ أبو الگيعان
_ أبو الكيك خليني ساكت ومحترمك
جعفر : انچب
_ جا انچب أنت
أشرلي اسكت من شاف اجه صخر ،بس شافنة گال
صخر : شبيكم من بعيد شفتكم تتناگرون ؟
_ نتشاقة
صخر : وهذا شقه ،تطگه بالكرك ؟
_ جا مو چنت تسحل ضيرم وتگول اتشاقه وياه
اباوعله انگلب لونه ومبين انقهر من جبت اسم صخر ،تحسر ومشى گدامنا ولنص الدرب دگ مبايله بس جاوبه عارفته عمي سمير
صخر : هلا بالرتب ،گول عمي خير ،شنييي شتگول شعدهم ،جاي جاي
سده واندار علينا
صخر : امشوا بساعكم
صار يركض مو يمشي واحنا وراه نريد نلحگ بيه وبس وصلنا للقرية صارت گدامنا سيارة الشرطة
صخر : خرررب لشتكم
صيح ومشى شايطة روحه ،عمامي وابوي وجدي والولد كلهم واگفين ،خص مخبوصين وهو زاد خبصتهم من وصل عدهم يصيح
صخر : شكووو ،شني الصاير هنا ،حاجوني المن جايين ؟
الشرطي : صوتك
صخر : احجيلي من الاخير المن جايين
الشرطي : والله لوما سيادة العقيد چان عرفت شلون اتصرف وياك
أبتسم مستهزء
صخر : لا والله
باوع لعمي
الشرطي : سيدي حاجي
سمير : صخر اسكت ،سولف المن صدر قرار الاعتقال
فتح ورقة بأيده ،قراها ورفع رأسه
الشرطي : امر الاعتقال بأسم صخر محمد رأجس
فتحت بصدمة باوعتله ابد ما رفله چفن ،ابتسم مستهزء وبين الهوسة الصارت گال
صخر : شو اقرا الاسم من جديد خاف غلطان
الشرطي : ما غلطان وهذا اسمك مكتوب شوفه بعينك
صخر : خوش نگعها واشرب مايها
الشرطي : شو ما تحترم قانون أنت ؟
صخر : انا واهلي القانون واخذ الجايبهم وياك وأمشي
نتر بيه عمي
سمير :صخررر
صخر : هاا عمي
سمير : امشي وياهم وانا جاي وراك
اعترض جدي يصيح
رأجس : ويين ،تريده يصعد وياااهم چن مچرررم ،لا والف لا
سمير : انا امشي وراه بوووية
كلمن اله رآيه ورأي عمي سمير هو التنفذ وخله صخر يمشي وياهم ،من شفته صعد سيارته
يريد يلحگه ركضت صعدت بصفه و برهان وعزيز ورا صعدوا حرك عمي للمركز ورا سيارة الشرطة
°غاية°
طب جدي متخبل يصيح ويلوم بعمي سمير ،اباوع عليهم ما ضل احد غير بس عمي يوسف كلهم مشوا ورا صخر للمركز ،باوعت الامي القلق ذابحها تحاول بس تهدي روحها وما تخاف وتتأمل خير بحجي عمي
يوسف : عليش هل قلق يابوبة مو گدامك مشوا وياه سمير وبرهان
رأجس : لك اذا ما تطلع سواية من سوايات ابن چسار ما اطلع أبن أبوي أنا
يوسف : جا اكيد ،غير وحده بوحدة ،مثل ما سچنة اخوه سچن صخر
رأجس : اذا ما طلع الليلة صخر لسوي بيهم سوايه للتاريخ ما ينسوها
غضة : استهدي بالرحمن من كيفت ،شگد تحب الطلايب
رأجس : اسكتي أنت لا اجي اكسر سنونج بحلگج
غضة : ضل ضل بهاي سوالفك وما راح تبطلهن اذا ما تخسر واحد منهم
خزرها عيونه تريد تطلع ،ضلينه گلوبنه على نار منا لمن ردوا ،طلعت اركض اتمنى اشوفنه راد
بيناتهم بس ما چان وياهم ردوا والغم تارس معانيهم
انداريت على جدي من اجه يمشي وراي ويحجي بنبرة تخفي وراها مصايب
رأجس : ما طلعوه مو ،صخر ضل بالسچن ؟
سمير : لهسة ما مفتهمين حكم الاعتقال ليش والظاهر السالفة مرتبة كلش زين ومدروسة ،بس مو علي ،سجنوا صخر هسة اشيلن منهم خمسة
محمد : سمير لا تلوصهاا اكثر ،خلينه هسة نفتهم ليش سجنوه
سمير : حدي وياهم الليلة ،اذا ما طلع باجر شيصير لا تلوموني عليه
طبوا للديوانية وانا رديت بس طبيت للمطبخ چانت واگفة تباوع من الشباك
_ ميمنة
ميمنة : هاا
_ شبيج ؟
ميمنة : خايفة عليه ومنه ،اخوج روحه بخشمه تلگيه هسة عارك كل البسچن
_ ادعي يحلوها وما تكبر اكثر
ميمنة : اذا تسألج عمة كلشي لا تحجيلها وگليلها باجر يطلع لا يروح يصعد سكرها
هزيت رأسي ب أي وطبيت وهي اجت وراي وصدگ بس شافتني امي سألتني ومثل ما گالتلي حجيت
غضة : خايبات وين عطاء لهسة ما اجت ،شعدها ضاله هناك
_ گالتلي ضايجة وهل ضلت
غضة : جا صارلها شگد ما تونست
_ اندري جدة ،خليها شعدج وياها
غضة : خايبات گاطعة گلبي هل بت والله ،شوكت اشوفنها مستقره مثل النسوان
زهرة : كل مرة اگولن هاي هي استقرت بس هم ما تستقر ،عطاء الايام التعشيهن هناك گوة على روحها
غضة : اعارف ،خطيتها برگبة ابوها ،لا بشباب تهنت ولا من عرست ومن اشوفنها تضحك يحترگ افادي عليها اعارفها محترگت گلب
زهرة : أي والله يا عمة ،تحاول تعيش بس ما جاي تگدر ولا ناسها اوادم
غضة : جا بيت الرباح الگاع ما تچرعهم ،بس سم نسوانهم كافي عليها وعودن هي معذربة وما گادرتلهن
ميمنة : ضلميتها ياجدة ،منيلها معذربة عمة .
غضة : خايبة مال چذب بتي لسانها لا ينكض ولا يرد
زهرة : يمة غاية
_ هاا يمة
زهرة : دگومي اسمعي بلكن شي يهود بالي على اخيج
ميمنة : يا عمة مو گنالج باجر يطلع عليش بعد ضال بالج
زهرة : والله گلبي فلا مرتاح
غضة : خايبة سمي بسم الله ،گومي ميمنة هذا عون جاي يبچي
طفرت ميمنة تجيب عون من غرفة امي نايم هناك ،وانا گمت بقلق افتر ،ما اريدن امي تسمع شي ويضل بالها اكثر ،طلعت تحجي وياي شايلة عون بأيدها
ميمنة : ما تمشين تنامين مو وراج امتحان ،المن ضالة ؟
_ ما جايني نوم يمة
ميمنة : دمشي نامي لا ما تجاوبين باجر
نحاول نخلي الوضع طبيعي بس بالواقع هو ابد ما چان طبيعي ولاصتها عمة من طبت تسأل
عطاء : خايبات صدگ لهسة ما معروفة دعوت صخر شني ؟
وهي هيج حجت لو خلتنة نحير شلون نزلگها ،امي صارت تلفتت بيني وبين ميمنة ،بلعت ريگي اباوع لميمنة تعض شفه لعمة ترديها تسكت وعمة انهدت بعد
عطاء : خايبات عزيز يگول السالفة چن محيوگة حوك ولو يطلع لو لا
صاحت مأيسة وبزعانة روحها
ميمنة : طاحت شفتي وما سكتي ياعمة
عطاء : يااا جا ما تدرن ؟
ميمنة : لا ،أنت بشرتينة هسة
لزگتها بساع بس شني الفايده امي درت بعد وجيب اليهود بالها بساع صعد سكرها وحرنا بيها ومن شفت وضعها كلش تعب ركضت ادگن باب الديوان اريد ليث ياخذها ،فتحلي الباب نوح بس شاف حالي المتخردل عارف اكو شي
نوح : بيها شي امي ؟
_ سكرها صعد كلش
اندار صاح على ليث صاحه، ومشى گبلي و ورانا اجة ليث بس شافتهم امي بصوتها التعبان لامتني
زهرة : ليش صحتيهم يمة ،هاي انا كلشي ما بي
گعد گبالها ثاني ركبته
ليث : شلون كلشي ما بيج يمة اذا حتى وجهج متبدل لونه
زهرة : شربت دواي هسة واصيرن زينة
ليث : اخذج للمستشفى احسن
زهرة : خايب لان انقهرت مو مال مستشفى
ليث : خاف يصير بيج شي
زهرة : لا
گام ما مقتنع
ليث : خل اخذج يمة
عدلت گعدتها
زهرة : لا تلح كلشي مابي
ليث : بروح أبوج ؟
زهرة : وروح أبوي صرت زينة
ليث : جا خوش
ردوا للديوان وانا گعدت گبالها
_ لو مخليتهم ماخذيج يمة
زهرة : ولج لا تلحين مو جاي اگولن صار زينة
سكتت ما حاجيتها شي بعد ،وكل ما اريد اطبن انام اتردد من اشوفنهن شلون ضالت حسبة تاخذهن وحسبة تردهن وكل بالنه عد صخر ،گمت من بعد
ما بيها مجال اقاوم والصبح مشيت للمدرسة وبس رديت صارت گدامي ميمنة ،سلمت عليها وسألت
_ هاا ما تغير شي ؟
ميمنة : لا والله كلشي ماكو ،مشوا وبعدهم ما رادين
_ خير أن شاء الله
ميمنة : أن شاء الله
°ليث°
طبيت للمركز ورا عمي مترهي امشي ،گبل لا يجي بس ردت اطب وركبوا راس وياي ماكو بالتوفيق وما يصير تشوفه وتالي هسة غصبا ما على راسهم طبيت
فتحوا الباب وطب امي وانا وراه ،طفر من مكانه
صخر : طلعني عميي منا واليرحم اهلك
سمير : تطلع عمي ما تضل هنا ،و وعد من هل شارب
كض شواربه وكمل
سمير : على عدد الليالي التضلهن هنا اخذ منهم زلام وگول ما گال عمي
صخر : السچن مو الي عمي
سمير : اعارف ،بس اصبر علي اليوم اشوف تاليها وياهم شني
صخر : غريب موو ؟
سمير : لحد الان لا جاي يگلولي شني سبب الاعتقال ولا المشتكي منو بس ماكو غيره هو لعب لعبته
رگع الحايط بأيده
صخر : خل اطلع وحسابي وياااه ،اذا ما ندمته على سوايته وياي ما اطلع أبن أبوي
سمير : هسة اطلع و الله كريم
باوع علي ،انا واگف ادخن ،اخذ الچگارة من ايدي جر منها نفس
صخر : حرموني الچگاير ولد الچلاب
سمير : جا هذا سچن مو گهوة
ما رد على عمي وكمل يسألني
صخر : شلونها امي خوما عارفت بالصار ؟
_ أي وتخربطت امس بس صارت زينة
صخر : عينكم عليها ،وميمونة
سمير : هاي مني ؟
صخر : مرتي عمي
_ شبيها ؟
صخر : گلها صخر يگول لا يضل بالج رادلج
_ صار اگلها
طبطت على چتفي
صخر : اطيني بعد چگارة
طلعت الباكيت والجداحة من جيبي
_ اخذهن الك
سمير : هتليه مو ولد
_ عمي هي مال عيب اذا أنت هم تدخن ويانة عليش نستحي منك
ما رد علي مبين اقتنع بحجيي بس طلعنا شفت الولد كلهم برا
عبد الحق : هاا شفتووه ؟
_ أي
عزيز : شلونه ؟
سمير : واحد مسجون يعني شلونه ؟
جعفر : عمي شوكت تطلعه والله السچن ما ينطاق
حركتله حواجبي
_ عاد بعد أنت خبرررة
جعفر : اهووو
برهان : مو وكت ملاشاتكم ،عمي ما عارفت شني القضية ؟
سمير : لا بس منا للعصر ويوصلني كلشي الولد جاي يشتغلون
برهان : اذا تحتاج شي انا موجود
سمير : لا خليك أنت هسة ،من احتاجك الله كريم
برهان : خوش
°غاية°
طفيت النار جوة قوري الچاي ودرت اباوعله من طب وگفت يم الباب يحجي وي ميمنة
ليث : خوية عدي الج امانة من صخر گال وصلها الها
نشفت ايدها من الماي وضلت تباوعله عبالها شي مودي الها
ميمنة : شني خوية ؟
ليث : گال گللها لا يضل بالج رادلج
اباوعلها ضلت ساكتة بس بلعت ريگيها وهزت رأسها ب أي وليث طب جوه ،تنهدت حايرة بوضعهم يوم اشوفنهم قريبين ويوم بعيدين كل البعد بس بأخير فترة بديت انتبلهم كلش متغيرين
ميمنة : صبي الجاي گبل لا يبرد
_ أي
صبيت الجاي واخذته للديوانية بس دگيت الباب طلعلي عزيز ،ضليت بهتانة وشوي واحس راح توگع من ايدي الصينية
اخذها وهمس
عزيز : شبيج ما راح اكلج
درت وجهي بساع ورديت
ميمنة : شبيج ولج ؟
_ عزيز اخذ الچاي مني
ميمنة : أي وشني يعني ؟
_ استغربت جا اخواني وين ليش هو طلع وانا منا صايرة ما اگدر اباوع بوجهه
ميمنة : نوح شفته طلع اضن مشى يم فقار ،وليث مو گدامج طب جوه
ضربت على راسي
_ والله نسيت وانا ضليت اللومن بيهم
ميمنة : عيشي طبيعي لا تتقيدين
_ وين اگدر وانا كل ما اشوفنه اتذكر حجيه واموت من المستحى
ميمنة : چا الله يعين گلبه
التفتت على صوت عمة عطاء وراي تسأل
عطاء : يعين گلب منو ؟
ميمنة : گلب واحد امس خططتي أنت وياه
عطاء : فلك ياهو هذا ؟
ميمنة : شني عمة ما تعارفيه ؟
أبتسمت تهز رأسها ب لا
عطاء : وداعة ابو چساء ما اعارفه
ميمنة : جا صدگتج
ضحكت اعارفها من تحلف هيج معناها چذب ،اجت يمي بس جرت أذني منوره الشال گلت تطببني بتحقيق
عطاء : شبيج امس من نزلتي من فوگ وجهج مطعون احمر ؟
_ انا ؟
عطاء : جا انا ؟
_ هاا
ميمنة : عمة تستلوتين عليها لو شني ؟
عطاء : خايبة انجبي
ميمنة : اگللها ليش اخذتيها ؟
تقربت عليها بحيله تحجي
عطاء : اگلج ميمنة
ميمنة : شني ؟
عطاء : هذاك اليوم شفت شي
ميمنة : والي هو ؟
اندارت علي
عطاء : غاية سدي أذنج
سديت أذني بالچذب حتى اسمع شني الشي الشافته عمة
عطاء : شفت صخر بأسج من راسج ،مبين الامور عدلة صايرة واحنا ما نعارف
حجيت بدون ما انتبه
_ عمة اليوم مودي حجي بأيد ليث الها وگايله گلها رادلج لا يضل بالج
عطاء : مطورررين
_ أي عمة كلش كلش مطوورين
وجهة بساع صار احمر بس تحاول تبين روحها طبيعية
ميمنة : صوتچن انشهرنا
عطاء : اگلج ،بعدج ما صايرة مرته ؟
ميمنة : ياا شلون ما صايرة مرته ؟
عطاء : خايبة قصدي غير شي شبيج
ميمنة : هاا ،لا
عطاء : والله وطلع عاقل وما جبرج مثل ما انجبرت انا
باوعتلها مقهورة
ميمنة : انسي عمة كافي تذكرين هل سالفة وتقهرين بروحج
عطاء : شلون انسى گلتله ما اريدك ولا تطخني وعناد حتى يكسر خشمي كسرني وصدگ انكسرت من حبلت بچسار
ميمنة : هذا ل الله كاتبه عمة
عطاء : ريتني اقتنعت مثلج ،انا لليوم اتمنى الصار حلم
ميمنة : ماكو حلم يطول عشرين سنة
تنهدت وهزت رأسها ب أي ،دنگت والدمعة بعيونها صارت تلمع ،شگد ما هي قوية بس هذا الموضوع يكسرها ويخليها انسانة ثانية ...
°هيوفة°
گاعدة اباوع عليه والقهر ماكل گلبي،ضيرم القديم لو موجود وصخر مسجون چان خبصهم خبص ،هسة هذا گدامي ما يعارف بالوضع شني ما شني ،تنهدت وگمت احجي وياه
_ ضيرم تريد غدا ؟
رفع رأسه باوعلي بضره ابسط من العادية بعيون ما يشوفني مثل گبل
ضيرم : من أجوع اگلج
_ بس مو تنسى تاخذ دواك الگبل الغدا
ضيرم : لا ما انسى
_ خوش
طلعت من الغرفة انزل جوة ،صايرة اختنگ منها عكس گبل جانت اكثر مكان احبه وافضله ،هسة كل ما صعدت للغرفة القهر يتجدد بروحي ،شعور
احس روحي غريبة عليه كلش يحز بخاطري وما اگدر اتغاضى عنه واكمل طبيعي
بس شافتني گالت
حواري : هاا شو مطنگرة ؟
_ شمتانية ما اطنگر ،راح اموت وانا هيج قريبة عليه بس بعيدة
حواري : تضلين هيج كاتلج القهر وهو ما معلوم شوكت يتشافى .
جريت نفس اقوي روحي
_ اعارف بس مو بيدي والله
حواري : حاسة بيج
مسدت على ايدي
حواري : راح نمشي لبيت جدي تمشين ويانة ؟
_ أي لان من امس ما مشيت بس ما اطول لان ضيرم عده دوا وره الغدا
حواري : جا اصعدي جيبي عباتج بساع
هزيت رأسي ب أي ومشيت چبتها وگبل لا انزل گلتله رغم اعارف ما يهمه
_ ضيرم راح امشي لبيت جدي ساعة وارد
هز رأسه بلاية ما يرد علي وانا نزلت ،مشينا لبيت جدي انا والبنات وعمة من الباب وسمعنا اصواتهم العالية ،طبيت شفت ميمنة واگفة تكسر ثلج سلمت عليها وسألت
_ شكو ليش يصيحون ؟
ميمنة : هم ذولي مو جديدين علينا
_ أي والله صدگ ،امي جوة ؟
ميمنة : أي
°حواري°
گمت اشرب ماي صايرة هواي اعطش ،فتحت الثلاجة وطلعتلي دولكة ،شربت ودرت اريد اردن بس ضليت واگفه بمكاني بلاية ردة فعل
اباوعله اخذ نضره سريعة علي وعبرني يسوي روحه ما شافني
غاية : حواري
_ هاا
غاية : تعاي
كضتني من ايدي ومشينا للصالة ،چان عمو محمد موجود ومتكتر على جهة وبأيد عمة زهرة موبايله ما حطيت بالي ويامن تحجي وتفاجئت من گالت
زهرة : حواري تعاي احجي وي جفون تريد تحاجيج
تلفتت ما مصدگة وطفرت من مكاني اخذت منها الموبايل حطيته على أذني احجي وياها ،شهگت
بأول حجاياتي وياها
_ مشتاگه لوجودج يمي
جفون : حتى انا مشتاگتلج والله واتمنى ارد ،بس أخاف
مسحت عيوني اريد اكضي دموعي
_ شلون تردين وأنت عرستي بعد
صوت جرت نفسها صار بأذني وحسرتها حسيتها بگلبي صارت
جفون : انا لو بيدي ما اسوي السويته ،انا بكل ساعة اتمنى روحي ما طلعت والله ،صح هنا كلهم يحبوني بس انا اريدن يمكم
_ اتلطگي وتعاي
جفون : شلون ارد وانا دمي مهدور
_ عمي محمد موجود هو بضهرج
جفون : مايگدرلهم
_ لا يگدر ،حماج مرة يحميج مرة ثانية
أنا احجي واباوع لعمي اريدنه بس يگول أي وهو ابد ما حجة ضال ملتزم الصمت ،من صحوها مشت وانا ضليت اتحرگن ميته من القهر ،خسرت كلشي
هل سنة ،دراستي وزواجي وصاحبة عمري وما ضل الي ربح غير بس الشايلتهم بطني ...
رديت للبيت طافية روحي كلش ،گاعدة گبال المبردة وهيوفة تفتر گدامي لو تصعد فوگ لو بالمطبخ ومن زهگت بيها
_ كافي تفترين ولج سطرتيني الله
هيوفة : يااا شبيج وياي
_ دوختيني هواي افتريتي والله
هيوفة : جا غير اخوج ما يگعد شلع گلبي وعده دوا لازم يشربه وضال بلاية غدا
_ من يگعد عود خليه ياكل
هيوفة : هو راح استسلم امري ل الله
اجت گت يمي ،حطت ايدها على بطني تتحسس حركتهم ،أبتسمت من حسيت بيهم رفسوا وهي فزت
هيوفة : ولج تحركوا والله
_ أي وكحين
هيوفة : فدوا لگلبهم
_ متعبيني كلش
هيوفة : تحمليهم ما ضل شي
_ هو اتحمل شسوي
گضه اليوم بلاية أي تغيير غير الطلايب هادت الوادم وانا بالليل اضل بس احوسن مختنگة افتر بالبيت ،عبرت من الديوانية البيت هدوء بس چان اكو صوت ناصي كاسره ،فتحت باب الديوانية وطبيت امشي على اطراف اصابعي ما اريدنه يفز وكل ضني چان نايم لان هواي نعاد نفس المقطع
_ تدري بغيبتك طالت .. يالجيتك حلم صارت
دنيا وع اليحب جارت ..روحي لشوفتة اشتاگت
يمتى تمر علينة ..ننتظرك تجينة
مديت ايدي على الموبايل بس فز من حس علي
_ جاي اطفي الموبايل
فقار : عوفي انا گاعد اسمع
_ ما تنام طر الفجر
فقار : انا مفارگ والنوم مچافي عيني
صفنت عليه حايرة وگعدت گباله وهو بعده ممدود
_ صار چم شهر أنت على نفس الحال شوكت ناوي توگف على رچلك ؟
فقار : من ترد هي
_ بس الميت ما يرد
فقار : وانا متت وياها
_ لخاطر ابنك
غمض عيونه عارفته بعد ماريد لا يحجي ولا يسمع گمت اطلع وگلبي ممرود عليه ،شأحمل قهر اكثر كل ما اعدهن يزيدن
°غاية°
يوم جر يوم وما طلع صخر واليوم الثالث وانتهى الصبر عد چدي
رأجس : ولك سمير مو گلت ما يضل ليلة صارن ثلات ليالي وما طلع صخر
سمير : جا شني ضنك انا مخليه لو متهاون بس قضيته مو سهلة والحايكها يعارف بصعوبتها شني
رأجس : يعني عارفت تهمته ؟
شوي وگال
رأجس : جا شمتاني ما تحجي ؟
سمير : شأحجي يابة السالفة مصخمة كلش
نتر
رأجس : شلوون يعني اشرحليي
سمير : ملبسيه تهمة تهريب ممنوعات
اربع كلمات مثل الضربة على الرأس صارن ،تعالت اصواتهم مصدمين ما مصدگين السمعوه وانا من ثگل السمعته اذني حسيت برچلية صارن
مثل الخيوط ،گعدت بمكاني يم باب الديوانية ارچف اريد اصدگ ما جاي اگدر يعني طلعته راح تصير صعبة ..! ! !
سمير : بس اطوني مجاال اكمل
رأجس : خايب شتكمل ،لك راح صخر من ادينةةة
سمير : لا يابة ،شني يروح من ادينة هي هيتة هيج
رأجس : جااا شلون يطلع
سمير : هم الحطوه بالسجن هم اليطلعونه منه ،بس اطوني درب
رأجس : احجيلنة لا تخلينة غافلين ،شراح تسوي سمير ؟
سمير : بس يطلع اخوه ينحل كلشي
رأجس : وشلون اذا ما نحل ،ساعتها شراح تسوي
سمير : لساعتها الي تصرف ثاني وياهم ،عزيز احتاجك وياي
عزيز : من ايدك هاي ل ايدك هاي ،شتريد وياك
سمير : وبرهان هم معارفك هواي احتاجهم
برهان : صار
ميمنة : غاية
گعدت گبالي مستغربة حالي المگلوب
ميمنة : شبيج ؟
_ مابي شي
ميمنة : لا چذابة ،شسمعتي ؟
_ صخر
ميمنة : شبيه ؟
_ ملبسيه تهمة ،تهريب ممنوعات
لطمت على صدرها
ميمنة : صدگ تحجيين
_ سمعت عمي سمير هسة گال
ميمنة : صخااام بعينج ميمنة ،يمة صخر يمة ،شلون ياتهرريب هذااا ،عزاا العزااني
انفعلت ترچف ،كضيتها من ايدها
_ صوتج عليج الله ،امي اذا سمعت يصير بيها شي والله
ميمنة : ولج مصيبة فوگ مصيبة طاحن على راسي وما لحگت اتنفس ،يمة صخرر
تنوح الخوف كاتلها وانا اباوع للباب اخاف لا ساعة الساعة وطابة امي والله ساعتها ما نلحگ الها اسم الله عليها من الهبطة
_ فدوة ميمنة الخاطري اسكتي
غطت حلگها بايدها ودمعتها ما نشفت ،گمت وجريتها تغسل وجها لا تشوفها امي وتحس اكو شي ،انداريت من سمعت صوته طب
_ هاا ليث
ليث : شبيچن ؟
يباوع على ميمنة ويرد يباوع علي
_ صخر
تنهد
ليث : يطلع لا تخافن
_ أن شاء الله
ليث : خوية امسحي دموعج وتقوي عود هاي أنت القوية هيج تبچين
ميمنة : أخاف لا تتلبس براسه التهمة
ليث : افاا شلون تتلبس واحنة موجودين
ميمنة : لا تخلوه عليكم الله
ليث : شلون نخليه تراه أخوي ما يحتاج توصيني
باوعلي
ليث : اصعدي جيبلي تفگتي فوگ
نشغت خايفة
_ يمةةة شتسوي بالتفگة ؟
ليث : شبيچن اليوم ،غير امشي للگاع اشغل المكاين واردن
_ خوفتني والله
ليث : بساعج
صعدت بساع چبتها ورديت اخذها مني وطلع ،وبالگوة انا وميمنة حاولنه نبين نفسنا طبيعيات ،ثاني يوم انصدمت من چنت اغسل بالحوش وطبوا عمي سمير وعزيز و وياهم
نزلت ثوبي واحس ما جاي اصدگ الشافته عيوني ،مشيتله فرحانه وهو يخوز بي فلا چن هستوه طالع من السچن
_ الحمدلله على سلامتك خوية
صخر : الله يسلمج ،طبي جوة
بهتت من رده وحسيت بلعومي احتقن ،هم مشوا للديوان وانا طبيت مختنگه عوزي شوي وانصبها مناحة
ميمنة : شبيج ؟
_ صخر اجه
فزت تدوره بعيونها وتحلفني
ميمنة : عليج الله
_ أي والله
من شافت ملامحي مغيمة كلش گالت
ميمنة : جا شبيج راح تبچين
_ تلگيته بس نتر بي گدام عيني سمير وعزيز ،فشلني
ميمنة : ياا شگالج ؟
_ طبي جوه بس وياها خزرة
ميمنة : يااا شجاه
رفعت اچتافي
_ اندري ،اثر عليه السچن
ميمنة : لا مو هيج ،يجوز لان ثوبج منگع
_ اروح اقرأ احسلي عود گلت اغير جو
ميمنة : خوما خليتي الصوندة تچري مثل كل مرة ؟
_ لا عيني مخلصة
ميمنة : خوش
طبينا انا وياها بشرنة امي طارت ما مصدگة ومشت للديوان الخارجي تشوفه ،بنفس اليوم بالليل وعلگت عارفناه ما راح يعديها الهم ابد
°ليث°
التفتتله اصيح
_ لك اشرررد بساااع
نوح : رچلي طگت ما جاي اگدر اركض
گمزت على الحايط وهو بعده على السطح
_ راح تجيك چيله بعلي
نوح : دوگف شورطتنيي
اطيته ايدي استند عليها ونزل ،شمرت روحي على الگاع وهو طاح فوگاي ،كضيت ضهري وگمت اسب بيه
_ ضهررري انگطع نسلي ابن الاوادم
نوح : عاد هو شلون نسل ،اشرررد بساع
صاح وركض وانا وراه من صارن الچيلات يطايرن بالسما ،حطيت ايدي على ركبي ودنگت فحطان اللهث
_ خررب عقلك صخر المن ورطتنا هل ورطة هاي
نوح : لا تحطها براس صخر أنت زامطت وربطتني وياك
_ جا شني اجي وحدي
نوح : والعباس لو كاضينا ما يضل بينا غير بس العظام يطوهن للچلاب مالتهم
ضحكت إأيد كلامه
_ حتى العظام ما يضلن
نوح : امشي نردلهم هسة ضل بالهم
_ جا ما اجوي ويانة
نوح : أي والله ورطونا
مشيت وهو وراي ،من بعيد شفتهم نازلين من السيارة متانينة بس شافنة صاح
صخر : وين صرتوااا ،گلت انعلسواا
وصلت عدهم احجي
_ انعلسنة الا شوي ،حسوا علينا
عبد الحق : خوما بيكم شي ؟
_ لا ،يلا نرد
بس ردينا للبيت تلگانة جدي
رأجس : هاا بشروا
صخر : تم وصلت
أبتسم بتشجيع گال
رأجس : عاشت ايدكم
باوعت للباب طلع ابوي ما راضي يخزر بينة ،اندار عليه جدي
رأجس : شبيك عيونك راح تطلع ؟
محمد : سواية هاي بوية توديهم بلاية ما نعارف بلا صارلهم شي شنگول ؟
رأجس : ردوا بعد عليش هل حجي
استغفر يمسح وجهه وباوعلي
محمد : مخلي الوادم بالگيعان وتركض ورا الطلايب
_ راح اردلهم
محمد : امشي بساعك ،مكاين الماي ما جاي تشتغل وما بيهم احد يعارفلهن
جعفر : السلام عليكم
انداريتله
_ الله جابك ،امشي وياي للگيعان
جعفر : اهوو اردن احسلي
كضيته من ايده
_ اذا ما تمشي وياي فلا امشي
جعفر : شني سالفتك أنت
جريته
_ امشي وياي يلا
گضة الدرب يدردم ،بس رديت للبيت تلگتني عارفت بيها درت بي ماشي لقرية بيت خازي من ملامح وجها المدلغمة ،أبتسمت اضيع على روحي
_ هاا شعدج هنا ؟
غاية : شعدي يعني ،متانيتك ،ليش ماشي لبيت غازي ؟
وگفت گبالها اعدل بحجابها
_ جدي وداني
غاية : وأنت تشمر روحك بنص الموت لان جدي وداك
_ احب هاي السوالف تعارفيني
غاية : جا ما اعارف بيك تموت على المشاكل تعبدهدن عباده
جعفر : لا تبالغين خوية هذا گدامج كلشي ما بي چنه صل
انداريت عليه
_ صل بعينك لك
جعفر : والله طحيل ما يصيبك
_ تف بعينك شگد عار
جعفر : مو صدگ اصيرن عار وبعد ما امشي وياك
_ لا تمشي فد مندله أنت
جعفر : ازعل عليك راح
_ بعدك ما زعلان يعني ؟
جعفر : لا
_ جا ازعل احسلك
وسواها صدگ وزعل ومشى ضحكت اهز بأيدي
غاية : خطية ليش هيج وياه هو يحبك
_ اشاقيه ،جوعان اريد شي من ايدج الحلوه
غاية : طالبة سادس وين يصير اسويلك اكل
_ جا أضل جوعان
باوعتلي حايرة
غاية : اسويلك امري ل الله
_ حنينة اروحلج فدوة
غاية : اسم الله عليك
جريتها ابوسنها من رأسها ،وبنفس الوكت طلعت ميمنة تباوعلنه مبتسمة
_ الحنينة الثانية الماكو مثل طيبة گلبها
كبرت ابتسامتها تعارف قصادها بكلامي ومن صدگ ميمنة ماكو بطيبة گلبها وحنيتها ،نسخة من غاية اذا اجي مرات بنص الليل الگاها محضرتلي الاكل وحاطته على الطباخ حتى بس احميه واكل ،وبالاخص هسة من غاية سادس وما تلحگ
°غاية°
وخرني وطلع يركض يصيح علينا
ليث : طبن جوووه لا تطيح بيچن چيله
ركضنا نطب جوة ،بلمح البصر الچيلات صارت تطاير علينا ،امي اجت تتعثر تسأل شكو وانا ارچف
عيني على الشباك اباوع منه ما اگدر ارد عليها واسمع ميمنة گالتلها
ميمنة : مبين بيت غازي هدوا علينة على دوسة قريتهم اليوم
زهرة : يمة يااا دوووسة هاي ؟
ميمنة : يا عمة غير چدي دزهم لبيت غازي
زهرة : عزاا العزااني ليش ؟
ميمنة : ما اعارف والله وهم صخر ما حجالي
زهرة : دخيلك ربي ،واسمك الكريم تعبت ،تعبوني هل وادم وروح أبوي
ابد ما هدوا ولهنا واسمعهم يتصايحون مبين الاصت اكثر من گبل ،بالساعة وما طب أحد من برا وكل
ما جايها الخبصة تزيد و وين الا طب عم سمير وراه برهان تلگتهم امي بس تريد تفتهم شي ...! !
باوع لميمنة فحطان يحجي
سمير : اطيني ماي بعد عمج
مشت ترستله دولكة الماي واطتهياه والعيون معلگه عده بس نريد نفتهم ،شغل چگارة هادء هدوء بغرابته ماكو
زهرة : احجي خوية راح اموتن من الخوف والله
سمير : والله من المفروض ما تخافن لان موش جديد الوضع
زهرة : تصدگ ياخوية انا بكل ما زادت سنة وتجددت طلايبكم اخافن اكثر
سمير : ماكو شي
زهرة : شلون ماكو شي وهذا الرمي الصار
برهان : دگونة
زهرة : وهيج تحجيها عادي
برهان : جا شنسوي عمة نلطم ؟
زهرة : خايبين والله شلعتوا گلبي
طبت تحجي
عطاء : عليش خية جديدة عليج ،المفروض هيج فلا تهتمين وتطلعين وياهم تتعاركين
زهرة : ياا شلون ما اهتم وانا ساعة الساعة خسرانة واحد من ولدي
عطاء : جا الصوج من أبوي وهم يشتروها مشترى
زهرة : أي بعلي
برهان : يحجن علينة واحنة واگفين ماكو هيج نسوان
سمير : أي بعلي
ما فضت وكبرت اكثر ،الوادم ملت من عدنا ناس تتوسط وبس تريد توصل لحل وكل ما گلنه يا الله انحلت لازم واحد يگب يخرب الأول والتالي
ميمنة : هم گمززز ،لج راح يخبلني اخووج والله
تفتر گدامي تلوم بصخر الصياحه لهنا واصل معترض ما يريدها تنحل هيج وما ماخذ لا حگه ولا حگ ضيرم
صخر : يابة لو الكل رضوا انا المعتررض وما انسى سوايتهم لو على مماتي
عضت اصبعها تلطم
ميمنة : اخخخ منك زرفت گلبي
ركزت وياهم من واحد گال
_ جا اذا هيج دمكم يوصل للرچاب
صخر : وخله يوصل ،مو انا الاتهاون وياهم
_ جا تضل تدور الزله ؟
صخر : بالضبط ،انا رجال ادور الزلة عليهم
_ استهدي بالرحمن
صخر : مستهدي وگايل يا الله ،وكل نقاش بعد ما عدي
خلاهم وراه يحجون وطلع ،وگف بمكانه من شافنه واگفات بسد شباك الديوانية ،تقرب علينه وانا وياها وحده تباوع بوجه الثانية ،بصوت ناصي گال راص على سنونه
صخر : شعدچن هنااا ؟
ميمنة : نسمع
خزرها
صخر : صايرة صلفة كلش
ميمنة : صلافة لان ما ارضى على سوالفك مو ؟
نتر
صخر : ميمنة
ميمنة : ما اتدخل مو ،واخليك على راحتك تحط روحك بنص مصايب الهن أول ما الهن تالي
صخر : طبن جووة
ميمنة : حاجيني ليش هيج سويت ؟
صخر : جااا شترردين ،انسى شسووا بضيرم ،لج بسببهم اگعد گباله وچني غرريب ما يعارفني منو انا
يحجي محترگ گلبه خلاها تسكت ،من مشى طبينا جوة وعمة
چانت تحط اكل لطيور چفون ،بس شافتنة گالت
عطاء : هااا بشرن ما فضت ؟
گعدت مگطوع گلبها
ميمنة : شتفض عمة ،شتفض و ولد اخوانج واحد اضرب من الثاني
عطاء : لو تضل عليهم المصايب تلوح حتى بزريتهم
ميمنة : اوووف ،وتاليها مو گضت ارواحنة
عطاء : معجزة الا تنحل هل طلابة هاي ،تضل وادم تجر طول و وادم تجر عرض وياخوفي تاليها مو هينة
°ليث°
رأجس : تضحكون علينة ،ما نفتهم گدامكم ،شلوون مو واحد من عدهم منو اله مصلحة بالصار بضيرم غيرهم
شيخ واحد : انا گايلها الك گبل ،هم من يسوون السواية ما ينكروها
رأجس : ما اصدگ بيهم انا
حجة واحد من الشيوخ الجاين
_ فضوها يابو محمد طالت هواي
رأجس : سوايتهم داست بنص البطن من حلگ الموت طلع حفيدي والسبب هم ،وثق بالله لو صايرة شي ليلهم من نهارهم اتيهه عليهم
شيخ واحد : اذكر الله شيخ وابنكم بخير هسة
عزيز : ياخير التحجي عنه شيخ ،اخوي حتى انا ما يعارفني ومن غير ضل اشهر بغيبوبة
شيخ واحد : وأنتم ما جاي تقصرون ،بس فعلت هذاك اليوم كافي عابرين فوگ بيوتهم سوايتكم ما تتسولف
عبد الحق : رد على الصار بصخر ،لو تردينة نسكت
شيخ واحد : وهمه هم سجنوه رد على سچنكم ثنين من زلامهم
رأجس : جاي محامي الدافع الهم لو شني القضية ؟
شيخ واحد : جاي احجي الحگ شيخ وأنت تعارفني انا شني
ما رد عليه جدي ،وضلوا يتناقشون وهم ماكو حل أيسوا الوادم ومشوا ،وبس طر الليل لبست هدوم الشغل ومشيت للگيعان ،وانا بالدرب لاگيت جعفر
صحت عليه
_ جااا مو گلت ما تجي ،شو هنااا ؟
جعفر : انقهر عليك ضميري صاحي
ضحكت
_ أبو السجون تعااال هاك
شمرت عليه الگونية بيها الغراض
_ نضف الشوك من الساچيات
جعفر : اهووو ،مو تعارف اكره تنضفيها
_ جا شو انا ما اكره شي لو تختلف أنت
جعفر : نضفها أنت وانا اشتغل شغلك
أبتسمت بمكر وگلتله
_ هاي هي ،جيبهن
اطاني الگونية ومشى وراي بس وصلت عد الساگيات الاريد انضفهن ،لبست چفوفي وگلتله
_ اگعد ضويلي
جعفر : شموازيك بهل ليل ؟
_ بالنهار وكت ما عدي ،ضوي ولا تحجي
جعفر : احلف گادر عليه أنت
_ من زمان
شمر علي طابوگة اجت عدل براسي ،كضيت راسي اتحسسه ،باوعت الايدي تلطخت دم ،نزعت الچزمه وشمرتها عليه عود ركض بس طاحت بضهره ،صيح كاض ضهره وانا نزلت عليه غلط
_ حيوااام فوگ ما اشتغل شغلك ،انا الك اذا ما احجي لجدي عليك شوووف
جعفر : احجيله ما اخااافن
_ متأكد ؟
جعفر : اييي
نزعت الچزمة الثانية وبس تحركت طحت بالساگية وهو اسمع صوته يضحك متشمت
_ عاااار تعاال گومني
جعفر : شني مخببل
_ ما اسويلك شي
جعفر : احلف
_ تعااال لا اطيح حضك
اجاني متردد بالگوات ضام ضحكته ،مدلي ايده بس كضيتها جريته اوگعه بالساگية وانا گمت وهو يصيح
_ تستاهل ،لا تندگ وياي لان تعارفنيي شني
جعفر : خرررب اهلك
_ واهلك هم
جعفر : تعال گومني
_ گوم وحدك
لبست الچزمه ودرت وجهي ومشيت متشفي گلبي بيه ،ابد ما درت وجهي وهو يتحلف بي ،رديت
من غير درب حتى لا يلحگني بس وصلت وشافتني انخطف لونها كل ضنها بي شي
أشرت علي
ميمنة : شبيك خووية ؟
_ طحت بالساگية كله من اخوج
ميمنة : منو جعفر ؟
_ أي
ميمنة : يااا شني تعاركتوا ؟
_ لا هيج تناگرنه مثل كل مرة
ميمنة : و وينه هسة ؟
_ يمكن مشى لبيتكم ،بعد اخوج صيحيلي غاية
ميمنة : صار
بس اجت وشافتني نشغت وغاية وماتعرف تخاف بعد
غاية : يمة هاااي شبيك
_ طحت بالساگية ،جيبلي هدوم بساع بس اسبح اريدن
غاية : صار
سبحت وطلعت تمددت بالصالة على رچلين جدة احجي وياها
_ شني غضة بعدج زعلانة من أبو عيالج ،ما ناوية تردين لغرفتج
غضة : لا والف لا ،اذا ما يصالح عمك اخليه يطلگني
_ على بختج جدة حتى عيب تحجين بالطلاگ
غضة : جا شني حارمني شوفة كاظم ،الحقد عامي على گلبه حتى وي ابنه الي من صلبه
_ مو حقد جدة بس هذا جدي ،جديد عليج ؟
غضة : لا مو جديد بس اذا ما تغير انا اعارف شلون اتصرف وياه لهسة مطيته على مرامه
_ يا مرام جدة غير فريتيه فر
غضة : يستاهل وروح أبوي اليسواله مية زلمة ،لو كلمتة لو كلمتي التمشي
گعدت على حيلي
_ شما اشوف هل مرة كلمتج تمشي
غضة : الله يسمع منك
اخذت الكتاب من ايدها من گعدت بصفي
غاية : بس كضلي الكتاب اقرالك القصيدة وشوفها صح لو لا
_ خوش
ضليت اسمعلها وبس خلصت سديت الكتاب
_ كلها صح عاشت ايدج
غاية : وايدك
°وردة°
طلعت من المدرسة الشمس داگة براسي ،ايدي حاطتها على گصتي بايدي چنطتي متانية مهاب يجيني
_ ست ست
انداريت عليها مبتسمة رغم تعبي
_ هاا حبيبتي
_ ست شوكت الامتحان
_ مو گلت الكم الأحد
_ شكرا ست
_ عفوا حبيبتي
اباوع للطالبات يطلعن نص منهن يمشين لبيوتهن ونص يصعدن بخطوط ،زغرت عيوني
مستغربة هاي سيارة صمد ،وتاكدت من نزل عيونه تدور واستقرت علي ،ابتسم ابتسامته الاكرها
أشرلي يريد امشيله ،رفعت حاجي وضليت اباوعله ما تحركت من مكاني اجه يمشي بهدوء علي
هدوء منافر كلش لشخصيته ،وگف گبالي نزع شفقته وعدل شعره
بنبرة استفزازية گال
صمد : شلونها بت عمي الشيخ
_ شرايد ؟
صمد : توو توو ،مو واجب تردين السلام بعدين تسألين ست
نترت بيه احاول اكض روحي وما اخلي الوادم تنتبه علينا
_ صمد شرااايد مني
صمد : امشي وياي واگلج شرايد
_ لا والله ،وين امشي ؟
صمد : اوصلج للبيت
أشرت عليه
_ أنت توصلني ؟
صمد : أي لو مو گد المقام ؟
_ والله ما ارتاحلك ابد
صمد : عكسي انا كلش ارتاحلج
_ اتچفى الشر ورد منين ما أجيت
صمد : امشي احاجيج واردج لنفس مكانج
تأفأفت
_ راح امشي وياك بس حط ببالك لا تندگ وياي لان تعارف شيصير بيك
نتر بالگوة كاض غضبه
صمد : بطلي تحجيين بهل نبررة هاي
_ مضطر تتحمل لان أنت التريد تحجي وياي مو أنا
مسح وجهه واشرلي امشي ،مشيت وراه ،صعدت بالسيارة وبس صعد گلتله
_ الك دقيقة احجي العدك حتى انزل
هز رأسه ب أي وفززني صوت قفول السيارة من قفلها علينا ،انداريت عليه فاتحة عيوني خازرته وما لحگت احجي وشغل السيارة طاير
صيحت عيوني صايرة بگصتي من غدرته
_ غدااار ،لك والله غدار وطول عمرك ما راح تتغيير
اندر علي خازرني
صمد : صوووتج لا تعلي لا انعل الجااابج
_ يسوى راااسك الجابني يا عاررر ،نزلنيي نزلنييي
ضحك يحجي ما مهتم لصياحي
صمد : حلم اخليج
_ مررريض والله مريض ،لك والله چنيت على روحك
صوتي راح وهو ما مهتم ،دگت بينا السيارة فوگ الساعة ،كل ما الطريق طال كل ما الخوف ترس گلبي بس ما ابين واضل اصيح واهدد بيه
عطت من لطمني على حلگي بساع حسيت الدم ترس حلگي شفتي انشگت
صمد : بت السگط لا تهددين بعدد لا احطج جوة السيارة وادوس راااسج
_ ادوس راسك بقدرتي يا قندرة يا تربية القندررة
جر راسي بايد والايد الثانية يسوق ،قربني عليه يحجي بأذني
صمد : جري عدل لان ناويلج مو خوش نية ،اخليج سنة ليگدام ما تنسيها
_ شحدددك ،يسكرون راسك والله
صمد : هاي اذا لگوج
جمد الدم بجسمي اباوع للدرب مگطوع لو يذبحني هنا ويشمرني هم ما يلگوني
_ خررب ابوووك على هل خلفة
انا سبيته لو تسودن نزل علي فشار وغلط خلاني اسد أذني ،وبعد وكت طويل وگف گبال بيت بنص بساتين ،بيت زغير من بابه مبين بسيط ،نزل فتح الباب يريد ينزلني وانا لطشت بالكشن ما انزل اتلاوه وياه
_ هدني ما انزل ،هدنيي لا تكضنييي ،خررب اهلك
دفرته برچلي على بطنه وهو تسودن دنگ علي شالني على چتفه وانا اللطم واضرب على ضهره اريده ينزلني بس هو يا چبل ما يهزك ريح ابد فلا اهتملي...
طببني للبيت ونزلني مبتسم يباوعلي وانا اعدل بحجابي واتلفت اباوع على البيت جسمي يرجف بس ما بينتها و وجهي بوجه نترت
_ اذا ما خليتهم يبجوك دم ما اطلع انا بت كسار خشمك
صمد : انا راح اكسر خشمهم وگدام عينج أنت الشاهدة
_ ما يخلوني هنا وشوف
صمد : نشوووف
قفل الباب وشال المفاتيح وعبرني يفرهن بأيده لو النضرات تذبح چان مات بسبب نضرات الكره الاباوعله بيهن ،اندارلي
صمد : تعاي طبي جوه اشغلج المبردة خطية حارة عليج
دگيت رچلي بالگاع ودنگت شلت عباتي لو اگدرله اخنگه بيها بس وين اگدرله اذا هو چف ايده بگدي
مشيت وراه احاول اهدي روحي واحجي وياه بتفاهم
_ شتريد مني ،حاجيني ليش جبتني هنا ؟
گاعد ويباوعلي بطرف عينه
صمد : تعارفين شأريد ماكو داعي تسألين
_ وأنت هم تعارف نچوم السمى اگربلك من التريده
صمد : ما يصعب علي شي ،وأنت التعارفيني
_ على روحك مو علي
صمد : لا تحجين وياي هيج حتى لا اتخبل عليج
جريت نفس وگعدت حايرة هذا شلون احجي وياه
صمد : دمرتوني ،انا واخوي
باوعتله چر نفس من الچكارة وتنهد يكمل
صمد : انا ميخالف بس اخوي ليش ؟
_ من ايدكم
صمد : الحب هيج غلط عدكم ؟
أبتسمت مستهزئة
_ يعني مصدگ روحك حاب ؟
صمد : ليش شنو الحب ؟
_ ما تعارفه ،ولا بعمرك راح تعرف شنو هو
صمد : هواااي دستي
_ ما اگدر اسكت وتعارفني
أبتسم
صمد : انا الاعارفج
_ طلعني منا ليش تكبر السالفة
صمد : خلها تكبر حتى اعارف شلون احلها
زغرت عيوني بشك اباوعله
صمد : عيونج
_ شبيهن ؟
صمد : باوعي بيهن عدل لا افگسهن
درت وجهي منه النفس ضاگ بصدري البيت كلش حار ،هفيت على وجهي ودرت عليه من گال
صمد : ما تتحمل حر بت الشيخ
_ أنت شنو علتك ؟
صمد : اهلج ،أنت ،كلشي
گمت ما اگدر اگابله اختنگ من شوفته كلش ،ضليت احوسن وكل بالي عد اهلي هسة شحالهم وانا هنا يم هذا الانسان
°جفون°
حال الظيم حالنه ،صار الليل وماكو خبر عن وردة ما خلوا مكان ما دوروا بي اخوان عزام واخوانها من الظهر لهسة فد ركضة أخير شي طبوا التعب مبين عليهم ،ملامحهم جامدة القلق تارسهم ترس ،اختفت كلش اثر ما الها
تلگتهم تباوع بالوجوه واحنا وراها بس نريدهم يحجون
أم جواد : بشرواا بتي ويين ؟
مابيهم احد گدر يجاوب ،بهتت تباوع بالوجوه ،جر نفس حاير
مهاب : ماكو يمة ،اختفت وردة ،ما معروفة گاعها
أم جواد : يمة بتي ،ولكم شلون ما معروفة گاعهااا گلولي شلوون
جواد : لا تزيدين علينا يمة فدوة اروحلج ،جاي ندورها
مهاب : معررروفة وين بس ابوك ما يسمع حجايتنة
طب من برا وگف وراهم
شيخ خزعل : ما لگيتوها موو ؟
انداروا عليه
علي الاكبر : لا عمي ماكو
بعزم گال
شيخ خزعل : امشوا دگوهم
مهاب : بيت عمي أمجد
نزع عگاله
شيخ خزعل : أي
وهو بس اطاهم الموافقة حضروا تفگهم ومشوا ما ناوين على خير ابد ،شايلة بتها وتفتر
سمر : سترك يارربي
ضلينة بقلق منا لمن ردوا ،گمت وگفت على حيلي اباوعلهم طبوا يتصايحون ،صاح بيهم
شيخ خزعل : شكووو شبيكم ،لك جواااد حاجيني
جواد : بوية الحاجية طلعت من مرة عمي ،بالحرف گالت صمد ماهو اليوم بالبيت يخابرون عليه وماكوو
صيح مصدوم
شيخ خزعل : لااا يا سگط
مهاب : يعني هو الخاطف وردة بوووية
طگ ايده بالحايط يتحلف بيه
علي الاكبر : والله لو كضيته حليب امه انسيهياه
گعدت يم خالة امسد بايدي على ضهرها وهي حالها حال الظيم
أم جواد : يايمة يا وردة ،ولكم مصيبة لاگت مصيبة على ياهي منهن گلبي يحترررك
_ يردوها الج والله ما يخلوهاا
بس وين يهيد بالها ،وادم ضلت تجي وتروح مو يوم انگلبنه گلب ،نركض ركض كلساع جاي كلساع ماي وكافي علينا الهبطات...
حطيت أذني على الباب
شيخ خزعل : شتحجيي شيخ ،شتحجي وانا المني وبي لاح عظمي
شيخ واحد : حگك والله وشما تسوي ما الومك ،بس كلشي ولا الكتل
جواد : وحگ ابو الجوادين لو طاح بأيدي انا اكتله وبأيدي ادفنه
شيخ واحد : تعوذ الشيطان بوية وانا وياكم بكلشي
شيخ خزعل : انا الجنت اكضهم بالطلايب ،بس هسة انا بايدي احط چيلة براسه وانسى هو أبن اخوي
علي الاكبر : وصلت بيهم يندگووون بعرضنة ،شيخ ما گدروا للزلم صارت گدرتهم على النسوان بيهن يلون ذراعنةةة
ثايرين ابد ما هادوا الليل اليمر على الوادم هم يدورون ،الهم واضح بوجه كل واحد بهذا البيت القلق مسيطر عليهم
شيخ خزعل : صااار اربعت أيام ،ولكم امووته لو مسويلها شي وضلع الزهرة اخلي بحر دم بيني وبينهم ما ينسد طول العمرر
سد الموبايل وباوع للشيخ
جواد : خابرت على ابو علي بعد ما بيها مجال بوية لازم يتدخل
شيخ خزعل : زين سويت ولو مگدر خاطرهم من عدنة
جواد : ما حجة شي وگال بالخدمة وشتردون وياكم
شيخ خزعل : اصيل ابو علي
أبتسمت اعارف المقصود عمي سمير ،طلعوا من اجاهم يتلگوه وانا مشيت اباوع من باب المطبخ فرحانة روحي بشوفته
شيخ خزعل : كل الهلا بأبو علي
سمير : هلا بيك
طب يمشي بثگل يحجون وياه بس رده بارد ،دنگت مقهورة اللوم بروحي ،وانداريت على اثر ايد انحطت على اچتافي
سمر : لا تضوجين كلشي ينحل
_ شيحلها
سمر : تنحل والله ،بس يمر الوكت
تنهدت
_ مشتاگلتهم والله
سمر : حقج ،تردين اخلي عمي يخابرلج عليهم ؟
_ مشتاگة اگعد بيناتهم المخابرة ما تروي روحي
طبطت على چتفي
سمر : يجي يوم تردين وتگعدين بيناتهم ،بس هسة خليها للزمن
هزيت رأسي ساكتة بلعومي احسه احتقن كل ما اذكرهم وانا روحي تلوب هيج ،سوت چاي وبس صبت اطتني الصينينة
سمر : ودي وسلمي على عمج
_ لا ماريد
سمر : ليش ولج ؟
_ اخاف والله
سمر : عليش تخافين ،دروحي مو تگولين هذا عمج يحبج
هزيت رأسي ب اي
سمر : جا امشي
اخذت الصنينة وتوكلت على الله ومشيت ادگن الباب ،فتحه مهاب وسوالي درب عارف بي اريد اطبن ،مدنگة طبيت حطيت الصينية على الطبلة وبصوت خافت همست
_ شلونك عمي
الدمعة وصلت بطرف عيني من ما رد علي درت اريد اطلع وحسيت بأيده جرتني و وجهي صار بصدره بچيت بصوت خانس من حسيت بيه طبع بوسه على رأسي...
قريب من أذني گال
سمير : أمانت منير شلونها
وخرت منه اعدل بحجابي لا واحد من الولد ضال هنا وبس الشيخ گاعد يباوعلنا
_ الحمدلله بس مشتاگتلكم
سمير : أنت الهديتي ديرتج وچربي البعد الاختاريته
بلعت ريگي وطلعت من شفته رد گعد ،بس شافتني گالت
سمر : هاا مو گلتلج يحبج ما يردج
هزيت رأسي ب أي ومشيت للغرفة گلبي محمل قهر وين ما اطي وجهي وبيا حل افكر يحل غلطتي الخسرتني الاول والتالي ، گعدت وي روحي صافنة بالي شارد بين اللوم بروحي وبين اگولن لا سويت
الانسب ،طبت علي
أم جواد : شعدج هنا وحدج ؟
_ ماعدي شي
أم جواد : جا گومي يمي
ماعدي كل قابلية بس گمت وياها ،طولوا هواي گاعدين بلاية حس عالي چن جاي يحوكون لمصيبة تطيح على رأس اليتسمى صمد...
وبس مشى عمي طبوا الولد وراهم الشيخ ،گعدوا بس گعدتهم على نار حسبتهم وحدة وتفكيهم كله عد وردة ..! !
°كوكبة°
حطيت ايدي على بطني اتحسس حركته ،أبتسمت بوجع من دفر ايدي ،گمت بالگوة اتحرك من سمعت
صوته يصيحني
_ جاية ،جاااية
حطيت حجابي على راسي ونزلت واگف گبال الدرج ومن وگفته عارفت ما ناويلي على خير وبس وصلت عده جرني من
شعري حطيت ايدي على بطني خايفة عليه اكثر مني
_ مرتضى بطنييي ،عليك الله هدني
ما چن يسمعني ،خالتي واگفه گبالي ابد ما جرتني منه لو دافعتلي ،چن متشفي گلبها بي ،بس اريد احجي ابني وما اخسره لخاطره جاي اقاوم كلشي ومتحملة هاي العيشة
_ مرتضى ابنيي ،مرتضى عليك الله كافي
كفخني على راسي بقوة خله الدنيا تفتر بي ،كضيت الحايط ابچي بونين كره ما منه كره صار بگلبي عليه بهل وكت...
همست وي روحي
_ الله لا يوفقك
گعدت حيلي خلصان سحلني سحل من راسي ،اباوعله واگف گبالي وبعد لو بيده يخلص علي
مرتضى : بت الكلب صار ساعة اصيحج
بصوت يرچف بررتله
_ ترا مو فارغة وانزل بساع ،بين ما اشيل روحي يرادلي وكت
بشرى : چذابة أنت تحبين تعلين گلبه عمنج حقيرة
فكيت عيوني مصدومة اباوعلها وما لحگت حتى اندار وشاغت روحي من حسيت ضربه شيغت روحي أجت ببطني ،كضيت بطني اباوعله شمر مبايله علي واجه بيها
مرتضى : بت السگط اذا ما عدت تربيتج اطلع مو زلمة
ما رديت عليه وگمت اسحل بروحي اريدن اصعد فوگ ،طبيت للغرفة تمددت روحي تفور من
الظلم الجاي اعيشه فوگ طاقتي والله بهل وضع وانا شايله طفل شاف الظيم وياي من هسة
تحسست رچلي وفزيت طايح گلبي من ما لگيت الحجل برچلي ...
وردة
غايتنة وابن عمها عيني
الأحداث ماخذة گلبي
