رواية انت البارود وانا النار الفصل الثاني والاربعون بقلم شمس
﷽
﴿وَلَسَوْفَ يُعْطِيكَ رَبُّكَ فَتَرْضَىٰ﴾
لاتـنشـد علـى الـحال خـلـها بـزعلـها...
الـغثـوهـا مـو شمـات الـغثـوهـا اهلـها...
───── ⋆⋅🖤⋅⋆ ─────
منا لليـل جاي انوم بجهالي واندك لا مو ندك تفلش تفشل
ڪمت اطلع وانصدم منـو اشوفه ڪبـالي.
عدلت حجابي بسـاع بسـاع واسمع صوته تارس ألبيت ويصيح يـمامه يمامممه اي هذا صوت صديق عمي مسـلم جارنه
يمامه: ها عمي فلشت الباب خرعتني والله بس عمي مسلم مو هنا
- ادري موش هنا صاحبي عمج مسلم بالمستشفى
يمامه: شنووو عمي بالمستشفى شبيييي قبل شويه جاننن يمييييي فدوه حاجيني ڪلي شبي
-تخربط بساع بساع واخذو للمستشفى وحجيته راحت ويا وصتني عليج
يمامه: وين همه بيا مستشفى
كلي المستشفى بديره ثانيه الديرة اللي بيها ضرغام
نفس المكان اللي شردت منه، ونفس المكان اللي حاولت أبعد جهالي عنه حتى أحميهم حسّيت روحي بين نارين لارجليه تعيني ولا اڪدر اعوف الناس ساعدوني بهيج حاله بس إذا رحت يمڪن احد يشوفني ويعرفني وجهالي وين اخليهم؟ وإذا ما رحت، يمكن أندم طول عمري لأن ما لحگت على الإنسان الوحيد اللي مد إيده إليّ من دون مقابل وساعدني ولمني بيته وڪلني وشربني
طلع الولد رجعت قفلت الباب ودخلت يم الجهال شصار بيه انـا طفله صغيره شلون هيج كبرت وتعلعلت ماعرف شسوي بس اعرف شغله وحده إذا عمي مسلم محتاجني، ما أگدر أتأخر عنه. حتى لو الطريق اللي راح أمشي بيه يرجعني للمكان اللي أخاف منه أكثر شي انتضر الصبح واشوفن جهالي وين اخليهم.
ماگدرت انام لليل ڪله وحدي حياه وايهـاب يبجون سوه ضليت ابجي وياهم ماعرف شلون اسڪتهم
خلت واحد ع رجليه واحد ع صدري واهز بيهم ثنيهم
premium
يمامه: ششش يمّه فدوة لعيونكم، ناموا حبايبي ياروح امكم انتو ناموا تره ماما تعبانة والله حيلي مهدود
بس لا حياة سمعتني ولا إيهاب رحم حالتي ضلو يزيدون بالبجي إيهاب صار يبچي ويصرخ وحياة من سمعت صوته شهگت وبچت وياه وانـا صرت ألف وجهي بيناتهم مرة أبوس راس هذا ومرة أمسح دموع حياه ومحتاره
يمامه: شبيكم يا بعد روحي ها؟
شتريدون مني جوعانين؟
لو تريدون حضن؟
لو شنو؟ احچولي
والله لو أگدر أفهمكم جان ما خليتكم تبچون هيچ اخخخخ ياضرغام شعملت بيهه تعال شوف حالي بين جهالك شلون تعبانه
حاولت أرضع حياة ظليت أهز بيها وأمسح على ظهرها بس إيهاب ظل يتحرك ويبچي فمدّيت إيدي الثانية إله أحاول ألمّه لصدري وياها
صرت حاضنتهم اثنينهم واحد على إيدي
والثاني ملزگ بصدري وأهز جسمي يمين ويسار ودموعي تنزل على خدودي محتاره بيهم جانت حجيه عنب تساعدني اليوم انـا وحدي شمو ريحتي أحسهم شويه سكتو احسهم يردون الإمان شلون أطمّنهم بالأمان وانـا كل ليلة أنام وگلبي يرجف من فكرة إن أبوهم يلكانا
- يا ربي انـا ما أريد شي من الدني لا أريد بيت
ولا فلوس ولا حتى راحة إلي بس خلّي جهالي بخير.
لا تخليهم ينكسرون مثلي لا تخليهم يعيشون الخوف اللي عشته ولا تخليهم يوم يگعدون ويدورون على أمهم وما يلكوها
ضلو يبجون ورجعت انـا أبچي وياهم
ما أدري شگد مرّ من الوقت، بس ظهري بدا يوجعني أكثر، وإيدي خدرت لان شايلتهم وحلڪي نشف من كثر مااحجي وابجي واريدهم ينامون
وبعد تعب طويل اخذ نص حيلي غفت حياة أول وحدة
بقيت أباوع وجهها الصغير الي ماخذه ڪل ملامح عمتها ايـه حاولت أمددهم عالفراش، بس إيهاب ظل ڪاض ملابسي، فخليته مثل ما هو، وتمددت يمهم على طرف الفراش، حاضنتهم بإيدي الاثنين وصرت بالوسطه
غطو بالنوم ثنينهم التفتت على حياة لمست خدها، وهمست
يمامه: أبوچ وينه هسه ياحياه وين ابوج عشكته هواي افڪار واسئله بالي يا ترى يفكر بيكم؟
يا ترى مشتاق يشوفكم؟ لو ناسيكم مثل ما حاول ينساني ومايهتم الڪم
هاي ليله جانت اصعب ليله تمر عليه وأصعب شعور مرّ عليّ مو من بچوا جهالي
أصعب شعور، من سكتوا وناموا، وبقيت انـا وحدي أبچ لأن ما بقى أحد أگدر أگله تعبت ذكرت ڪلشي ضرغام حضن ضرغام حضنه الي جمعني ويا ايام قليله يحضني ويخنڪني عصبيته صياحه حبه الي قبل لانتزوچ وشلون يريد اطفال ويريد بنيه تشبهني وهوه الي يسميها
لا يمام لا تفكرين بيه خلص كافي اللي صار هو بطريق وإنتِ بطريق، وكل واحد منكم لازم يكمل حياته وهذول جهالج
بس شلون أكمل حياتي وانا كلشي بيها يذكرني بيه
غمضت عيوني ورجعت بذاكرتي لأول مرة شفته بيه
جان بخطوبه أسـعد وطلعت اجيب الاڪل واجاني يخنزر بيه ويكلي شني طالعه بيننن الزلم طبي جوه
والله ما أنسى نظرته بهذاك اليوم
چان يباوعلي بنظرة تخلي الواحد يحس نفسه مسوي شي گدامه، لا يعرف يرفع عينه ولا يعرف ينزلها انـا هيج بهذيج لحظه كلبي راد يوكف من شفته
أتذكر يوم چنت أسمع اسمه من اخواني اضحك وافرح هسه من أسمعه، أول شي أسويه ألتفت وراي وأتأكد محد واصل إليّ
شنو اللي تغيّر بيناتنا يا ضرغام
باوعت حياه وحجيت ڪلام الي بكلبي
يمامه: شنو أگوللچ من تكبرين وتسأليني عن أبوچ؟ شنو أگوللچ يا روحي؟
أگوللچ چنت أحبه؟ إي والله حبيته حبيته أكثر مما چنت أتوقع وأكثر مما جان لازم أسمح لروحي تحبه هلڪد
وأگوللچ هم إنا خفت منه؟ وانـا بيوم من الأيام ما چنت أعرف إذا أبقى وياه لو أشرد حتى أحافظ على نفسي وعليج وع اخوج لو اكلچ ابوج مو شخص عادي
ياشيخه يابت الشيخ
يا ترى ضرغام هسه نايم مرتاح لو حتى هو، من يجي الليل ويسكت كلشي، يتذكرني مثل ما انـا أتذكره.
ثاني يوم صبح رحت جارتي زهراء الي علمتني ع الخبز وصرنه نشتغل سوه.
واجتني بالباب لان ماكدر اعوف جهالي
زهراء: هسه يرجعون والله بطريق
يمامه: منو كلج راح يرجعون والله ڪلبي يوجعني عليهم وجهالي ماكدر اعوفهم
زهراء: طبي جوه وبس يجون انـا ادكن باب عليج وانطيج خبر
يمامه: لاتنسيني خاله فدوا
زهراء: لا يمه والله شباب من ديرتنا راحو ويا مايعوفن عمج مسلم وحده بس يرجعون ادزلج طارش.
دخلت جوه طبخت ونضفت مدام الله هاديهم ونايمين لسه
كعدتهم ورضعتهم وبدلت الهم واندڪ الباب شفتها حجيه عنب حته بهاي وضعها اجتني طلعت ابجي حسيت امي وشفتها محتاجتها والله
شڪبتها بساع
يمامه: يمهههه والله بالي يمكم والله طمنيني شلون أبوي
عنب: يابعددد حيلي بنيتي. والله بالي يمج
يمامه: اعذريني ماجيتكم جهالي وين اعوفهم وديره ديرتي هذيج
عنب: اصلا لو جايه مارضه عليج انتي بنيتي ماريدج تبهذلين
يمامه: شلون عمي وشبي الله يخليج جيبي جهال خلي اروحن اشوفه
عنب: هسه ناخذهم وترحين بيتنا
دخلت جوه شلت حياه وهيه شالت أيهـاب ورحنه درنه السياج حته ادخل لبيتهم وهيه فرحانه بجهالي
دخلنه لكيته نايم بالهول بس شافني وشاف جهالي كعد وانـا ماخليته ركضت اله حضنته وبسته من راسه وايده ماريد اخسره
مسلم: يابنيتي بويه ليش جبتي جهالج بهل حر من الصبح
يمامه: اعذرني ماكدرت اجيك شلون صرت زين شبيڪ
جاوبتني الحجيه
حجيه: الحمد لله أحسن من البارحة، بس خوّفنا، والله خوّفنا. فجأة صار يحچي حچي مو مرتب، وما عرفنا شبيّه، ومن جبناه للمستشفى ظل گلبي يرجف عليه
يمامه: الله لا يحرمني منكم حجيّة. والله من سمعت بيه بالليل حسّيت الدنيا ضاگت بوجهي ماعرف شسوي
مسلم: لاتبجين يابويه هاي انـا هسه كدامج مابيه شي شويه سكر وضغط وتعبت هسه زين صرت بشوفت احفادي
يمامه: لا تعيدها عمي دخيلك لا تعيدها انـا ما عندي غيركم لا إنت ولا الحجيّة، لا تخلوني وحدي والله بدونكم اضل بضيم شلون مابجي عساها عيني نعمت تستاهل اعمي عيوني عليك
باسني من راسي وخليت ايهاب بحضنه وحياه بحضن حجيه عنب
تهز بيها وتغني الها
حياه ياحلاتها
ڪصايبها وراها
اجه الخطاب يخطبها
وابوها الشيخ مانطاها
وحياه تضحك وحجيه تضحڪ وتهز بيها وعمي مسلم فرحان بينه ورجعت الحجيه تهز وتحجي
من شافها من شافها شاف ديرمها حمر بشفافها
ڪبري بساع ڪبري بساع
وجيبلي نسيب بساع تروج منه الڪاع
حجه مسلم وڪال
وشيخه بت شيخ المهيوبه
ضليت گاعدة أباوع للحجيّة وهي شايلة حياة بحضنها، وتغنيلها وتضحك وياها، وكل شوية تبوس خدودها وتدلّلها وعبالڪ تريد تعوّضها عن كل تعب هالدنيا قبل لا تعرفه.وحياة، هالبنيّة الصغيرة، چانت تحرك إيديها وتباوع بوجه الحجيّة، وكلما تسمع صوتها تعلي رجليها وتفتح حلگها، والحجيّة تضحك وتڪلها
- ولچ بت ألشيخ فديت هالضحڪه كنونه عجبچ حچي الخطّاب من هسه تردين تنخطبين
ضحكت وياهم، بس والله ضحكتي چانت تخفي وراها ألف شعور بس يڪفي فرحتي من شفت عمي مسلم ع حيله ومابي شي رحت لبيتي كتلهم اجيب الغده
ونتغده عدڪم عفت جهالي يمهم وجبت غداي
وتغدينا ڪل احنه هذا البيت عوضني ولمني
عن امي خديجه وابوي ڪاظم اليوم انـا ماكدر اڪول انا يتيمه انا عندي مسلم وعنب مستحيل اگدر اوصف حبي ألهـم.
───── ⋆⋅🖤⋅⋆ ─────
ايـه
متعوده انـا أصلي صلاه الصبح دائما اصلي بس هاي مره اخذتني نومه وگعدني سالم وڪال راح انزل جوه اشرب ماي وانتي صلي لان جان طار الفجر وصلاه عابره شويه
ڪمت توضيت وخلصت ع كيف حته لايكعد أيهـاب ويخبصني خبص خلصت صلاتي اجه سالم عيونه بڪصته
ايـه: شبيك سالم؟ شصاير
التفت عليّ بسرعة.
سالم: آيـه؟؟؟؟؟ يمامة وينها
استغربت من سؤاله
ايـه: شلون وينها مو بغرفتها نايمه شبيڪ
سالم: دورت بكل مكان لا بالمطبخ، ولا بالحوش، ولا بالغرف! ماكو أثر إلها
عله صوته وڪتله
ايـه: منا ايهاب نايم شبيك
صرخ
سالم: اكلهاااااااا اختيييي ماكوووووووو تڪليييييي ابنك معقوله اخوجججج اخخذهاااا بدون علمنااا وطاب بيتنااا
بهاللحظة طلع أسعد من غرفته، وهو يلبس دشداشته مايعرف شيسوي باب غرفتنا جان مفتوح وسالم واڪف
أسعد: شنو هالصياح من الصبح شبيك هيوو تسودنت
سالم: أختك مختفية، أسعد يمامة مو موجودة
أسعد وڪف بمكانه، ما استوعب الحچي.
أسعد: شتگول إنت
سالم: مثل ما تسمع دورت بكل البيت وما لگيتها
ركض أسعد باتجاه غرفتها وانـا لحگتهم وگلبي يدگ بسرعة ونزلت ورانا رنـا
مالكيناها ولا باي غرفه أسعد فتح ڪنتور ورنا مالكينه لا ملابس جهـال ولالڪينه ملابسهاااا حسيت اخوانها بهاي لحظه انكسرو ظهرهم
سالم: ايـه معقوله اخذهاااا اخوج
ايـه: لا سالم اصلا من خابرني ڪلي اذا ماتريدني وبعدنا نطلگ اخذ جهالي من تجيب مستحيل ياخذها ضرغام مايسويها
اسعد: آية خويه انتي چنتي وياها، ما حچت وياج ما گالتلچ شي ما لاحظتي عليها شي بس ڪليلي وين تروح وهيهه حامل؟؟ شلون تطططلععع
رفعت عيوني اله
ايـه: والله ما أعرف خويه ما گالتلي راح تطلع، ولو أعرف جان ما خليتها تروح وحدها بس شي اڪيد خافت من ضرغام ياخذ جهالها
اخوانها صارو نار وشرار مايعرفون شيسون طلعو يدرون عسه ولعلى احد شايفها او بعدهي مابتعدت
إذا هي قررت تترك كلشي وراها، شنو اللي صار حتى وصلت لمرحلة ما تريد حتى تودّع أحد شلون هيج سويتي يايمامه
طلعت تلفوني وفتحت اسم ضرغام
بقيت أباوع للاسم فترة طويلة حرمو من جهاله وهسه مرته الامانه يمنه هم ماهي وماندري بيها وين؟
معقوله مانكله رنـا يمي
رنـا: لاتوصلين هسه الحجي أخوج ايـه
ايـه: يمامه ماهييي رنـا يهمنااا هسه هيه وهيه مرته مثل ماهمه اخوانها اله حق يعرفففف
اتصلت وادري بي ڪاعد هيج وقت يصلي ويضل يقره قران
ضرغام: آيـه شتريدين من الصبح خو مابيها شي يمامه جابت؟
بلعت ريگي، وسألته
ايـه: ضرغام لاتعصب بس يمامة مو موجودة بالبيت.
وانـا بقيت أنتظر جوابه، وگلبي يدگ بعنف
بس قبل لا أحچي أي كلمة ثانية سمعت نبرة صوته تتغيّر
ضرغام: شنو يعني مو موجودة
بلعت ريگي، وعيوني ظلّت على سالم اللي رجع من بره جان يروح ويجي بالحوش مثل اللي النار تاكل بروحه
ايـه: ضرغام، والله ما نعرف وينها ڪعدنا نصلي مالكيناها ندور عليها، غرفتها فارغة، ملابسها مو كلها موجودة، والبيت مگلوب، محد يدري شصار بيها وسالم حته عباله يمك
سمعته ياخذ نفس قوي، وبعدين صاح عليه
ضرغام: وشلون محد يدرييييي إنتييييي وين چنتيييي مو نايمة بنفس البيت وياهاااااا شلوننننننن تطلعععع والبيت بي ثنين زلللمم
ايـه: لاتصيححح عليه ضرغام انااا شلي علاقهههه
ضرغام: ما أصيححححح مرتي تختفي من بيت أهللها وإنتيي تكولين لا أصيح؟
! شنو هلطركاعهههه هااااي
بهاللحظة سالم انتبه إليّ، مدّ إيده يطلب التلفون، بس انـا بعدني ما لحگت أجاوبه، سمعت صوت أسعد من وراي
أسعد: آيةمنو تحچين وياه؟
گلت وگلبي يدگ
ايـه:ضرغام
اخذ أسعد تلفون وفتح سبيڪر
أسعد: تعال لهنااااااا خلييي نشوووف مرتك طلعتهااا ويننن شردتهاااا بهذلتهاااااا هيج تصون الامانه انطيتك اختيييي مره هيج تسوي بيهااا وتاليهاا تشردد اختي
ضرغام رد عليه بعصبيه
ضرغام: انت لا تعلّي صوتك انـا جاي، وبعدها لكل حادث حديث لا تنسى هاي مرتي هم
وره شويه سمعنا صوت سيارة توڪف گدام البيت، وبعدها بابها انسد حيل ما احتجنا نسأل منوضرغام وصل نعرفه دخل للحوش بخطوات سريعة، وجهه متغيّر، عيونه حمرا من العصبية، وشماغه مرمي على
جتفه . چان واضح عليه ما إجا حتى يسمع بهدوء، إجا وهو شايل نار بصدره وحقه مرته وجهاله ثنين
أول ما شاف سالم، صاح
ضرغام:ـ وينهااااااا
سالم: ماددددرييي وينهاااا
ضرغام: شلون ما تدري؟! هاي أختك وهذا بيتكككك شلون تطلع مرتي من هنا وما واحد يعرف وين راحت شلون ڪلولييي
أسعد: ڪل روحك ضرغام هذا الحجي من شمرت مرتك عدنه وهيه حامللل9أشهر هسه تحاسبنااا ولك
ضرغام: شتقصد بهالحچي تريد تلزگون السالفة براسي عود
أسعد: انـا ما أريد ألزگ شي براسك، بس لا تجي لبيتنا وتصيح علينا وعبالڪ إحنا اللي شردناها إنت شنو سويت حتى هي تطلع بيتك سنهههه كامله وانت تعوفهاا وهيه حامللل
ضرغام:احچي عدل وياي ااااسعددددد ماتعرف بعمايل اختك وياي لاجذب ولاجذبتين من تجذب مرتك عود اشوفك شتسوييي اذا انـا مامخلي يمي مره مخلي يمي وحده تاكل وتشرب جذب
سالم: اطلع مناا ضرغام هذا بيتنا، مو ديوانك حتى تدخل وتصيح وتفرض رأيك على الكل
ضرغام أشر بإيده عليهم، وصوته هز الحوش
ضرغام:انـا ما جاي أفرض رأيي على أحد انـا جاي أدور على مرتي وجهالي! تسمعوني زين؟
مرتي وجهالييي شلون تطلع من بيت أهلها وتختفي، ولا واحد يعرف وين راحت شلون تخلّي طفلين وراها وتروح
ضلو يتناقشون صارت ب7 وطلعو بالديره مالتنا
طلع ضرغام من بيت بس محد من عدنا ارتاح، ولا واحد حس إن السالفة انتهت بالعكس، من طلع، بدت الحيرة الحقيقية طلعو محتارين مايدرون يسئلون منو
اذا سئلو طش الخبر يمامه ماهي واذا ماسئلو شلون يعرفون منو شافها بهذا الوڪت.
وشلون نخفي غيابها، وهي زوجة الشيخ ضرغام
ضرغام مو رجل عادي، ضرغام شيخ، واسمه معروف، وكلمته مسموعة، والناس تحسبله ألف حساب
وإذا عرفوا إن مرته طلعت من بيته واختفت، ما راح يخلّون السالفة تمر.
لبست ملابسي واخذت أيهـاب وكلت سالم يوديني يم ضرغام ماكدر اعوفه وحده وهوه الحمدلله مارفض
وصلنا فتحت الباب لان ضرغام ماجان موجود
رجعت نومت ابني لان بعد وگت وتصلت ع ضرغام كتله انـا بيتنا.
منا للظهر يله رجع وحته سالم واسعد رنـا كالت رجعو الظهر مالكو يمامه
أيه: الله يساعدك خويه ادخل حته تتغده
ضرغام: أيـه مالگيتها اسئل منو
ايـه: ضرغام خويه إنت تدري إذا هالسالفة طلعت برّه شنو راح يصير إنت شيخ والناس تراقب كل حركة تسويها. إذا عرفوا مرتك طلعت من بيتك واختفت، راح يبدون يحچون. واحد راح يگول بينكم مشاكل
والثاني راح يگول ما كدرت تسيطر على بيتك
والثالث راح يطلع حچي من راسه. وإنت تعرف جماعتنا شلون
ضرغام: ايـه شسوووووي يعني اسئل منو ب منطقه
ايـه:انـا ما گلت لا تدور عليها بس لازم تحسب حساب اسمك وهيبتك
ضرغام نهض من مكانه، ووڪف ڪبالي
ضرغام: هيبتي؟! تدري شنو اللي يفشلني ولج انـا شيخ، والكل من يحتاجني يجي لبابي، والكل ينتظر مني أحل مشاكلهم، بس هسه من صارت المصيبة ببيتي، ما أعرف وين أروح حتى ألكه مرتيييييييي
بنص الحجي اتصل عليه واحد ورد
ـ ألو اي احچي اسمعك
ظل يسمع، وبعدين تغيّر وجهه.
ضرغام: لا، لا تروح تسأل أحد بهالطريقة أريدك تدور بهدوء، وإذا ما لگيت شي، ترجع تڪلي
ضلو يوم كامل مايدخلون للبيت يدورن بس محد عرف عنها اي شي
الشهر مرّ كامل. شهر كامل ويمامة مو موجودة. اما ضرغام فمرور الشهر عليه چان أصعب مما تخيلت
أول أيام، چان يطلع بنفسه، يروح للمناطق اللي يتوقع يمكن يمامة وصلت إلها، ويسأل بطريقة ما تكشف كل السالفة. وبعدها صار يعتمد على رجال يثق بيهم يوزعهم بأكثر من جهة، وكل واحد يرجعله بنفس الجواب عرفنا انو يمامه جابت لان هيه جانت بشهرها ويمڪن هسه جهالها طلعو من الاربعين وضرغام يوم عن يوم يتحلف بيها اڪثر
بس المصيبة الحقيقية بدت من وصلت السالفة لبعض الشيوخ.
بالبداية، چانوا عبالهم إن يمامة عند أهلها، وإن بينها وبين ضرغام خلاف عابر، وراح تنتهي السالفة مثل غيرها من المشاكل العائلية بس من مرّ شهر كامل وضرغام بعده يسأل عنها، وبعض الرجال المقرّبين منه صاروا يلاحظون تغيّر مزاجه وغيابه عن بعض الڪعدات والديوان بدت الأسئلة تكبر
اجو اليوم كم شيخ لبيتنا يشوفون ضرغام وشي اكيد جاين يشمون اخبار انـا ضليت بين بيتي وبين بيت ضرغام ماعفت لا زوجي ولا اخوي
حضرت الكهوه لشيوخ علموم ضرغام ياخذها وسمعت سوالفهم العاليه.
شيخ: شيخ ضرغام، إذا ما بيها زحمة، نريد نسألك عن شي
سمعت ضرغام كلهم تفضلو
الشيخ: صارلنا فترة ما شفنا أم فلان وياك، ولا سمعنا عنها. إن شاء الله خير
ضرغام: خير إن شاء الله مابيها شي
الشيخ الثاني دخل
ـ سمعت حچي من كم واحد، گالوا إن يمامة مو ببيتها من شهر ما نريد ننقل سوالف الناس، بس گُلنا نسأل منك حتى لا نظلم أحد
ضرغام: ومنو اللي گال هالحچي
ـ شيخنا، إحنا ما جايين نحقق وياك، ولا نريد نتدخل بشؤون بيتك. بس الناس بدت تسأل، وإحنا نعرف مقامك، وما نريد السالفة تكبر من غير ما نعرف الحقيقة
مبين من حجيهم عرفو يمامه ماهي
الشيخ: الله يردّها بالسلامة بس إنت تعرف، شيخ ضرغام، من يصير شي ببيت شيخ، الناس للأسف ما تكتفي بالدعاء، تبدي تفسر وتحچي
ضرغام؛ ـ خلي الناس تحچي باللي تعرفه، مو باللي تتخيله انـا ما راح أفتح باب بيتي لكل واحد يريد يعرف شنو صار بيني وبين مرتي. اللي عنده خبر يجي يبلغنا، واللي ما عنده، لا يزيد الحچي مرتي اندلها وين بس بيناتنا بعض المشاڪل نريد نحلها والي يحلل من كيفه خلي يواجهني بالحجي
الشيخ: احنه مانريد سمعتنا تروح شيخ
ضرغام: عساني انـا متت وعساني لاتهنيت وانشالله ڪلشي ميصير بيكم كون كل شر يصير بيه مو بيگم
والله انشالله انـا اموت
الشيخ: للا لا شيخ الله يخليك النه انشالله احنه نموت
شيخ ضرغام: لا والله كون انا اموت وعساني انـا متت.
طلعو الشيوخ وانـا رحت بست رأسه
ايـه: تلكاها يخوي
ضرغام: عساها بحضها وبختها مابريها الذمه طول حياتي راح اطيح ع طولي بذمتها.
ياترى شلون راح يڪون لقاء يمامه وضرغام؟
وشنو راح يصير بضرغام من وره يمامه
