رواية ديون النبض الفصل الخامس والاربعون 45 بقلم مروه صياح


 رواية ديون النبض الفصل الخامس والاربعون 


كان مجد لسه قاعد معاهم، ولما سألهم عني وعن سمير، وسمعت منه إنه يهمه إني أكون سعيدة...

في اللحظة دي، ابتسمت من وسط دموعي، وحسيت بسعادة غريبة جوايا، وكأني اتأكدت أكتر إنه لسه بيحبني، وإن سعادتي لسه تهمه، حتى لو أنا مش معاه.

كان ممكن يكون موجوع، وممكن يكون مش قادر يتقبل إني بقيت مع حد تاني، لكن رغم كل ده، كان بيتمنى إني أكون سعيدة.

وده لوحده كان كفاية يخليني أحس إن حبي ليه ما راحش هدر، وإن قلبي ما كانش وحده في اللي حاسه بيه...
بعدها حازم رد عليه وقاله:

حازم: آه، الحمد لله كويسة. وسمير إنسان كويس.

سكت حازم، وما قدرش يكمل كلامه، وكأن الكلام عني أنا وسمير كان تقيل عليه هو كمان.

مجد: أنا عارف إن سمير شخص كويس جدًا، ووعد تستاهل أحسن من كده كمان. المهم إنها تكون فعلًا سعيدة.

قال كلامه، وبعدها استأذنهم علشان يمشي.

رغد قربت منه، ومسكت في هدومه وقالتله بلهفة:

رغد: مجد، هتوحشني قوي!

مجد مسك خدودها بحنان، وقالها:

مجد: ما تقلقيش، طول ما أنا موجود هنا في مصر، هزورك على طول.

رغد بصت له، وبعدها سألته:

رغد: صحيح، إحنا الكلام أخدنا وشغلنا بعض. إنت هتستقر خلاص في مصر؟

مجد: لا، أنا هستقر بس شهور الإجازة، وبعدها هرجع تاني. وفي نفس الوقت، في شغل عايز أتابعه، وهرجع ألمانيا بعد تلات شهور.

كنت بسمع كلامه من جوه الأوضة، وسكتُّ.

تلات شهور!

يعني حتى رجوعه لمصر مش معناه إنه هيفضل هنا، ولا إن الفرصة اللي كنت بتمنى أشوفه فيها هتستمر.

بعدها مجد استأذنهم ومشي.

وفي اللحظة دي، كلهم جريوا على الأوضة علشان يشوفوني.

لقوني قاعدة مكاني، ودموعي بتنزل من عيني من غير ما أقدر أوقفها.

حازم قرب مني، وقال:

حازم: وعد...

لكن أنا ما قدرتش حتى أرفع عيني في وش حد.

نزل حازم على ركبته قدامي، وفتح دراعاته، فأنا دخلت في حضنه، وسند راسه على راسي، وفضل يطبطب عليّا.

حازم: وبعدين معاكي يا وعد؟ مش عايزينك تزعلي ولا تحزني. عايزينك تشوفيه، وتسمعي صوته، وتطمني إنه كويس.

سكتُّ شوية، وبعدها قلتله بصوت مخنوق من العياط:

وعد: ده مجد اللي بيظهر لكم صمده وقوته.....لكن أنا شفته من جواه يا حازم.

رفعت راسي من حضنه، وبصيت له، وكملت كلامي:

وعد: مجد كان بيدور عليّا. بيدور على صوتي وسط أصواتكم، وعلى وشي بين وشوشكم، وعلى وجودي في الشقة دي اللي فيها ذكرياتنا مع بعض. 
حتى لما سأل عليّا، كان كأنه عايز يتأكد فعلًا إني مع سمير ولا لأ.
كأنه عارف إني مش موجودة معاه، لكنه مش قادر يصدق، وكل اللي حواليه بيأكدوا له إني بقيت مع حد تاني، فيسكت.

خدت نفسًا متقطعًا، وكملت وأنا بحاول أستوعب إحساسي:

وعد: كأنه عارف كل حاجة، كأن قلبه هو اللي بيحكيله. لكنه مش قادر يعبر، ولا يقول إن وعد اللي بيحبها مش هتبقى معاه، وإنه لازم يتقبل إنها بقت لحد غيره.

سكتُّ، ودموعي نزلت من تاني...

كنت حاسة إني محتاجة أبقى لوحدي، محتاجة أهرب من كل حاجة، حتى من الناس اللي بتحاول تخفف عني.

بصيت لهم وقلت:

وعد: أنا هدخل أوضتي.

بصوا لي بقلق، وقالولي:

حازم: خليكي معانا يا وعد، ما تقعديش لوحدك.

وعد: معلش، عايزة أفضل لوحدي شوية.

وفعلًا، دخلت أوضتي.

كان حازم جه ورايا شايل همّي ووجعي، لكنه في الآخر سابني أرتاح على سريري.

كان الوقت لسه بدري، لكني ما كنتش قادرة أكمل يومي بشكل طبيعي.

كل اللي كنت قادرة أعمله في اللحظة دي إني أغمض عيني، وأسمع صوته في خيالي، وأشوف صورته قدامي.

عدى وقت طويل وأنا على الحال ده.

الليل جه، وأنا لسه مغمضة عيني. ساعات عدت من غير ما أنام، وكل اللي كنت بعمله إني أسترجع ذكرياتي مع مجد، من أول لحظة جمعتني بيه، لحد اللحظة اللي وصلت لها دلوقتي.

فضلت أتنقل بين الذكريات، لحد ما غلبني النعاس.

وتاني يوم كان يوم الجمعة.

حتى الذكريات ما سابتنيش في اليوم ده.

أما مجد، فبعد ما سابنا، رجع الفيلا.

وأول ما شاف أمه، سلم عليها، وهي استقبلته بشوق شديد. كان فعلًا واحشها، وكانت مستنياه يرجع من السفر.

لكن دكتورة جيهان لاحظت إن سارة مش على طبيعتها، وإن في نظرة حزن واضحة في عينيها.

قعدت سارة مع دكتوره جيهان، وبعد شوية، دكتورة جيهان بصت لها وسألتها:

د. جيهان: مالك يا سارة؟ فيكي إيه؟

سارة بصت لها، وحاولت تتكلم، لكن الكلام كان محبوس جواها.

سارة: أنا نفسي يشوفني ويحس بيا، لكن أنا مش عارفة هفضل كده لحد إمتى.

كانت سارة مخبية عنها الحقيقة، وما قالتلهاش أي حاجة عن اللي بيحصل بينها وبين مجد.

دكتورة جيهان بصت لها باستغراب، وقالت:

د. جيهان: مالك يا سارة؟ في إيه؟ احكيلي.

ساعتها، سارة بدأت تحكيلها كل حاجة.

ودكتورة جيهان كانت مستغربة ومذهولة من اللي بتسمعه.

سارة، بحرقة: حتى لما قرب مني، كنت حاسة إنه وقتها مش بيقرب مني أنا، سارة مراته...

وما قدرتش تكمل كلامها، وانفجرت في البكاء.

دكتورة جيهان أخدتها في حضنها، وبدأت تطبطب عليها، وهي مش عارفة تقولها إيه.

د. جيهان: أنا مش عارفة أقولك إيه يا سارة.

سارة خرجت من حضنها، ومسحت دموعها، وقالت بوجع:

سارة: لسه قلبه معاها. مش قلبه بس، ده قلبه وعقله وكل حاجة فيه. بعد كل اللي إنتِ عملتيه، وبعد الكذبة الكبيرة اللي كذبتيها علشان تبعديه عن وعد، مجد بجسمه بس هو اللي موجود معانا، لكن روحه وعقله وكيانه كلهم مع وعد.

بصت لها بحرقة، وكملت:

سارة: يا ريتك ما عملتي كده!

دكتورة جيهان بصت لها، وقالت ساره بوجع:

ساره : إنتِ فاكرة إني مرتاحة؟ أنا كمان بتعذب. عارفة يعني إيه بتعذب؟

سكتت لحظة، وبعدها دكتوره جيهان قالت:

د. جيهان: كنتِ عايزاني أعمل إيه يا سارة؟ أنا كمان ما كنتش عايزة مجد يبعد عني. 
عملت كل ده علشان يفضل معايا. خبيت باقي الورق، وأنا عارفة إن لو مجد عرف الحقيقة كاملة، ما كانش هيفضل معانا. كان هيتجوز وعد، ويسيبنا.

أخدت نفسًا، وكملت كلامها:

د. جيهان: ومش بس كده، كان هيسيب الشركة والمستشفى الاستثماري، ويعمل المستشفى اللي هو عايزها. 
وساعتها، كل ده كان هيبقى تحت إدارتي أنا لوحدي. إنتِ عارفة إني ما بقيتش قادرة زي زمان، وإن المسؤولية بقت تقيلة عليّا.

سكتت شوية، وبعدها قالت:

د. جيهان: وإنتِ كمان كتير عليكي كل المسؤوليات دي. وفي نفس الوقت، أنا كنت عايزة مجد يفضل وسطنا.
دكتورة جيهان كملت كلامها مع سارة، وقالت لها:

د. جيهان: أنا عملت اللي أقدر عليه علشان مجد يقرب منك ويتجوزك، وده اللي حصل فعلًا. خليته يتجوزك ويبعد عن وعد، وحاولت على قد ما أقدر أحقق لك اللي كنتِ بتتمنيه، لكن أنا مش عارفة أعمل إيه تاني. أنا هكلمه وهقوله إنه هو اللي بيبعد عنك، وإنه لازم يقرب منك...

سارة هزت راسها بسرعة، وقالت لها:

سارة: لأ يا عمتو، بلاش تقوليله حاجة. أنا اتكلمت معاكي وفضفضت، لكن لو حس إنك فاهمة حاجة أو عارفة اللي جوايا، أنا خايفة يبعد عني أكتر. كفاية اللي أنا فيه.

حطت إيديها على بطنها، وسكتت لحظة قبل ما تكمل بصوت هادي:

سارة: أنا نصيبي من مجد أخدته، وكان نفسي يحبني زي ما أنا بحبه.

سكتت شوية، وبعدها كملت:

سارة: من ساعة ما كبرت وفتحت عيني وبدأت أفهم يعني إيه حب، ما حبيتش غير مجد. بس الظاهر إن نصيبي إن حبي ليه يفضل من طرف واحد.

بصت لدكتورة جيهان، وكملت بوجع:

سارة: أنا حاسة إني أنانية، فكرت في نفسي وبس، وكنت عايزة يكون ليا حتى لو جزء صغير من قلبه، من غير ما أفكر هو نفسه عايز إيه. 
بس أنا دلوقتي خايفة مجد يعرف كل حاجة، وقتها مش هقدر أبص في وشه، وخايفة كمان يبعد عننا كلنا.

دكتورة جيهان بصت لها وقالت:

د. جيهان: سارة، هو هيعرف منين؟ أنا خايفة منك إنتِ، لا تكوني تحكيله كل حاجة. لكن بالنسبة لوعد، أنا متأكدة إنها مش هتقوله حاجة، لأنها فعلًا بتحبه. هي وافقت تبعد عنه علشان مستقبله، وأنا اللي ضغطت عليها، واستغليت حبها ليه علشان أخليها تتمسك بقرار البُعد.

تاني يوم.....

فضلوا يكملوا كلامهم شوية، لحد ما مجد نزل لهم، وقال:

مجد: أنا بعد صلاة الجمعة هروح عند بابا، فما تستنونيش على الغدا. هقضي اليوم معاهم.

سارة بصت له وسكتت، أما دكتورة جيهان فقالت له:

د. جيهان: يا مجد، إنت كنت عندهم امبارح. على الأقل اقعد معانا النهارده شوية، أنا مش بشبع من وجودك جنبي.

مجد بص لها وقال بهدوء:

مجد: يا أمي، الأيام الجاية كتير، وهقعد معاكي براحتى، لكن أنا محتاج أطمن على بابا وأقضي معاه وقت.

وفعلًا، مجد خرج من الفيلا بعد الساعة اتنين، ووصل عند ياسين.

كنا قاعدين كلنا مع بعض، وفجأة الجرس رن، فقامت رغد علشان تفتح الباب.

أول ما فتحت، لقت مجد واقف قدامها.

رغد ابتسمت له بفرحة وقالت: رغد: مجد!

مجد ضحك وقال لها: مجد: بصراحة، قلت أجي أقضي معاكم اليوم النهارده، ونتغدى مع بعض كمان.

رغد سكتت لحظة، لكن ابتسامتها فضلت على وشها. كانت فرحانة إن أخوها هيكون معاها ويقضي اليوم كله وسطهم، لكن في نفس الوقت افتكرت إني قاعدة جوه، وإن وجوده ممكن يوجعني.

رفعت صوتها ونادت على حازم، وكأنها بتحاول توصل له خبر سعيد، وفي نفس الوقت تلفت انتباهه علشان يتصرف.

رغد: يا حازم! مجد هيقضي معانا اليوم النهارده، وهيتغدى معانا كمان!

في اللحظة دي، كنا بدأنا نحس إن رغد اتأخرت وهي بتفتح الباب، وأنا كان عندي إحساس إنه ممكن يكون مجد.

بصيت بسرعة لحازم، ومن غير ما يتكلم، فهم أنا بفكر في إيه. شالني ودخل بيا بسرعة أوضة رغد، وقفل الباب عليّا.

وبعدها بلحظات، سمعت صوت مجد وهو بيسلم عليهم، وبدأت أتخيل وجوده وسطهم، وأنا قاعدة لوحدي ورا الباب.

مجد قعد معاهم فترة، وأخد حور وشالها على رجله، وفضل يلعب ويهزر معاها. وكأن جزء من الزمن اللي كان بيعيشه وسطهم رجع تاني، وكأنه أخيرًا رجع يحس بدفا الأسرة والاحتواء اللي كان مفتقدهم.

رغد قعدت جنبه، وسألته: رغد: قولي بقى، عايز تتغدى إيه النهارده؟

مجد مسك إيدها وطبع قبلة عليها، وقال لها: مجد: أنا عايز آكل من إيدك. إنتِ أي حاجة هتعمليها أنا مشتاق لآكلك جدًا، المهم أحس إني آكل من إيدك إنتِ.

وبعدها بص لماما وقال: مجد: وإنتِ كمان يا ماما. أنا حاسس إن الشهور اللي فاتت كلها ما كنتش باكل! وحشتوني، ووحشني أكلكم جدًا.

بصوا له وابتسموا، وبعدها قاموا ودخلوا المطبخ علشان يجهزوا الغدا.

كانت رغد عايزة تجهز كل حاجة بنفسها، لأنها عارفة إن مجد بيحب أكلها، فقامت هي وماما وبدأوا يجهزوا الغدا مع بعض.

أما حازم وياسين، ففضلوا قاعدين مع مجد.

ومجد طول الوقت كان شايل حور على رجله، ومش بيسيبها أبدًا. كل شوية يبتسم لها، ويلعب معاها، ويلاعبها، وهي كمان كانت واخدة كل اهتمامه.

وفجأة رفع راسه وبص لها، وقال بابتسامة: مجد: فيها كتير من وعد... نفس شقاوتها ومرحها وروحها.

حازم وياسين بصوا لبعض وسكتوا، لأن اسم وعد كان كفاية يرجّع وجع الكل، حتى لو مجد قاله وهو بيبتسم.

أما حازم، فكان كل شوية يدخل يطمن عليّا، خصوصًا إني كنت قاعدة لوحدي.

وأنا، رغم كل الوجع اللي جوايا، كنت مبسوطة جدًا بوجود مجد وسطهم، وبفرحته وهو قاعد معاهم. كان نفسي أشوفه سعيد، وأشوفه بيضحك من قلبه، وأحس إنه رجع يلاقي جزء من الدفا اللي افتقده.

لكن في نفس الوقت، كان نفسي أكون موجودة معاهم أنا كمان.

كان نفسي أقعد وسطهم، وأسمع ضحكة مجد عن قرب، وأشاركهم الكلام والهزار، ونقضي اليوم زي زمان، لما كانت لمتنا بتجمعنا كلنا، من غير أبواب مقفولة، ولا أسرار، ولا وجع بنحاول نخبيه عن بعض.

لكن للأسف... كل ده بقى صعب.

الأصعب بالنسبة لي، إنه يعرف حالي دلوقتي، ويشوف العجز اللي وصلت له.

كنت خايفة من اللحظة اللي يشوفني فيها بالشكل ده، ويعرف إن حياتي اتغيرت، وإن حاجات كتير كنت بعملها بسهولة بقت صعبة عليّا.

وفجأة، انتبه مجد لوجود الكرسي المتحرك.

بص له باستغراب، وبعدها رفع عينه ناحية ياسين وسأله:

مجد: بابا، الكرسي المتحرك ده بتاع مين؟ وإيه اللي جابه هنا؟

في اللحظة دي، كانت ماما ورغد خلصوا تجهيز الغدا، وسمعوا سؤال مجد. رغد ردت بسرعة، وبنبرة فيها تردد واضح:

رغد: آه يا مجد، ده أنا جبته علشان أوقات كتير جدًا بابا بيبقى مش قادر ينزل يتمشى، فبقول له يغير جو، وبنزل أنا وهو. وفي أوقات بيقعد عليه.

مجد بص لها بذهول، وكأنه مش مستوعب طريقة تفكيرها، وقال:

مجد: رغد، إيه اللي إنتِ بتقوليه ده؟! بابا ما شاء الله بصحته، هو وصل للعجز اللي إنتِ بتتكلمي عنه ده علشان تشتري له كرسي متحرك مخصوص؟!

ياسين رد بسرعة، وقال له:

ياسين: أوقات كتير جدًا يا مجد ما ببقاش قادر أدوس على رجلي ولا أتمشى، وأوقات ما ببقاش قادر أخرج أصلًا. فرغد بتخاف عليّا، وعشان كده أوقات كتير بنتمشى أنا وهي وأنا قاعد عليه.

مجد بص له وسكت، لكن كان واضح إنه مش مقتنع بالكلام.

أما ماما وحازم، ففضلوا ساكتين، وكل واحد فيهم كان عارف إن وجود الكرسي ورا الباب اللي أنا قاعدة وراه ممكن يفتح باب لأسئلة إحنا مش مستعدين نجاوب عليها.

مجد رجع بص لرغد، وقال لها بعتاب:

مجد: حتى لو بابا مش قادر، إنتِ إزاي تتكلمي عن بابا بالطريقة دي؟ إزاي تفكري فيه بالشكل ده يا رغد؟!

رغد سكتت لحظة، وبعدها قالت:

رغد: اللي حصل بقى يا مجد، خلاص. بابا مش هيقعد عليه تاني، وهو الحمد لله طول ما هو شايفك واطمن عليك، أكيد هيبقى أحسن وكويس.

مجد بص لها وسكت، وكان واضح إنه متضايق من الموقف كله، لكن ما كملش كلام.

بعد شوية، حازم استأذن منهم ودخل ليّا.

كنت سمعت الكلام كله، وكنت متضايقة جدًا. أول ما شفته، بصيت له وقلت بصوت مخنوق:

وعد: مجرد إن مجد شاف الكرسي، ورغد قالت له الكلام ده عن ياسين... وياسين الحمد لله كويس وبخير. أعمل إيه أنا يا حازم لو بدأ يسأل أكتر؟

حازم بص لي وسكت لحظة، وبعدها قال:

حازم: ورغم كل ده يا وعد، أنا بقولك إننا ما ينفعش نسكت أكتر من كده. لازم مجد يعرف الحقيقة.

بصيت له بتردد، والدموع بدأت تتجمع في عينيّ، وقلت له وأنا بترجاه:

وعد: علشان خاطري يا حازم، مش هينفع... أرجوك.

الدموع نزلت من عينيّ، لأني ما كنتش مستحملة فكرة إن أي حد يشوفني بالعجز اللي أنا فيه ده، وخصوصًا مجد.

حازم بص لي وسكت، لكن عينيه كانت بتقول إنه لسه مُصرّ، وإنه شايف إن مجد لازم يعرف الحقيقة، مهما كان صعب عليّا.

بعد شوية، خرج حازم ورجع قعد معاهم.

مجد لاحظ تصرفاته، وبص له باستغراب وسأله:

مجد: في إيه يا حازم؟ مالك؟ كل شوية تسيبنا وتدخل جوه!

حازم حاول يتصرف بشكل طبيعي، ورد عليه:

حازم: أبدًا، مفيش حاجة.

مجد فضل باصص له لحظة، وكان حاسس إن تصرفاته مريبة شوية، لكنه ما ركزش معاه أكتر من كده.

بعدها، ماما ورغد جهزوا السفرة، وقعدوا كلهم مع بعض وبدأوا يتغدوا.

وفي نفس الوقت، رغد دخلت عليّا علشان أتغدى أنا كمان ..

بصيت لها وقلت بهدوء:

وعد: مش قادرة آكل دلوقتي يا رغد.

رغد بصت لي وقالت:

رغد: لو ما أكلتيش، أنا كمان مش هاكل.

ابتسمت لها ابتسامة بسيطة، وقلت:

وعد: فعلًا مش قادرة.

رغد فهمت إني مش هقدر آكل، وما رضيتش تضغط عليّا أكتر من كده، فرجعت لهم.

وفضلوا قاعدين مع بعض، بيتغدوا وبيضحكوا ويهزروا، بنفس اللمة اللي كانت بتجمعنا زمان، وبنفس الضحكات اللي كنت بحب أسمعها وأنا وسطهم.

لكن المرة دي، كانت اللمة من غيري.

كنت قاعدة لوحدي، وبالرغم من كل الوجع اللي جوايا، كنت سعيدة إنهم مع بعض، وإن مجد قدر يقضي معاهم وقت ويرجع يحس بدفا الأسرة اللي كان مفتقده.

كنت عارفة إن في جزء ناقص جوه قلب كل واحد فيهم، حتى لو محدش اتكلم عنه.

لكن دي الحياة... مش دايمًا بتكون مكتملة في كل حاجة، ومش كل اللي بنتمناه بنقدر نعيشه زي ما كنا بنحلم.

وبعد وقت طويل، مجد استأذنهم ومشي.

بعد ما مجد مشي، حازم دخل لي، وشالني وخرج بيا وقعدني جنبهم.

فضلت ساكتة، ومحدش فينا اتكلم في البداية، لحد ما ياسين كسر الصمت وقال لي:

ياسين: وعد، أنا هبلغ مجد بكل حاجة.

بصيت له بسرعة، ورديت عليه باعتراض واضح:

وعد: وأنا بقولكوا لأ! أنا مش هقدر أعدّي كل ده تاني. إنتوا كده هتهدوا كل اللي أنا بنيته. مجد يا دوب بدأ يكمل طريقه صح، وبدأ يوصل للي هو عايزه. لو إنتوا بلغتوه دلوقتي، تفتكروا إيه اللي هيحصل؟

سكت لحظة، وبعدها كملت وأنا بحاول أوضح لهم خوفي:

وعد: هياخد موقف من أمه ممكن يفضل بعيد بقية عمره، وفي نفس الوقت مش هيقدر يكمل حياته مع سارة. هو ذنبه إيه؟ والطفل اللي هيتولد ذنبه إيه إنه يتحرم من أبوه، ونكون بنعيد قصة مجد من تاني؟ وجع وحرمان، ونفس الحكاية اللي هو عاشها وهو صغير.

رغد بصت لي وقالت:

رغد: وعد، ما إنتِ عارفة اللي فيها، وعارفة هو لسه حاسس بإيه.

سكت شوية، وبعدها رديت عليها:

وعد: حتى لو أنا عارفة، وزي ما سمعت من مجد نفسه، هو مع الوقت هيتعود، وهيقرب من مراته. 

ولما يشيل ابنه بين إيديه، وقتها هيحس إنه مش هيقدر يظلمه، وهيبدأ يحس بمسؤوليته ناحيته. لكن أنا مش عايزة أكون السبب في إن كل ده يحصل.

خدت نفس طويل، وبعدها بصيت لهم وقلت:

وعد: بعد إذنكم، محدش يضغط عليّا. أنا حرفيًا اللي فيّا مكفيني، ومش قادرة أتحمل أكتر من كده.

وبدأت دموعي تنزل، وأنا بكمل كلامي بصعوبة:

وعد: أنا خلاص أخدت نصيبي. كفاية عليّا إني أشوف مجد ناجح، وإن الدنيا كلها بتحكي عن نجاحه، وإنه بيحقق أحلامه.
أنا متأكدة إنه، زي ما قدر يقف على رجله تاني في شغله، هيقدر يقوم في حياته الخاصة كمان. ومع الوقت، هينسى كل الوجع والألم اللي عاشه، وهيقدر يكمل حياته.

بصوا لي وسكتوا.

لكن الحقيقة إنهم كانوا عارفين إن إلحاح مجد في السؤال عني، واهتمامه المستمر بأخباري، معناه إنه لسه متعلق بيا، وإنه مش قادر ينساني بسهولة، ولا يبدأ حياته من جديد زي ما أنا بحاول أقنع نفسي وأقنعهم.

لكن حتى لو كنت عارفة ده، ما كانش ينفع أقول أكتر من كده، ولا أسيب لهم فرصة إنهم يبلغوه بالحقيقة كلها.

أنا مش عايزة أكون سبب في وجعه من جديد، ولا في إنه يبعد عن أمه ومراته، أو يخسر كل حاجة بدأ يبنيها علشان حلمه.

كانت الأيام بتعدي، والحال بيفضل زي ما هو.

مجد كان بييجي باستمرار يطمن على ياسين ورغد، وبقى يحدد يوم في الويك إند ييجي فيه، يا إما الخميس يا إما الجمعة.

وعدّى شهر على الحال ده، ومع بداية الشهر التاني، مجد بدأ يخطو أولى خطوات حلمه الكبير.

الحلم اللي كنا بنحلم بيه سوا... إنشاء مستشفى اقتصادي، صرح طبي كبير مش متخصص في جراحة القلب بس، لكن بيضم تخصصات طبية كتير، علشان يقدر يخدم أكبر عدد ممكن من الناس، وتكون فيه فرصة للعلاج لكل اللي محتاجه.

ومع إن جراحة القلب كانت من أهم التخصصات اللي مجد مهتم بيها، إلا إن حلمه كان أكبر من كده بكتير.

مجد حط كل اللي يملكه من فلوس في المشروع، علشان الحلم اللي كان بيحلم بيه معايا يبدأ يتحول لحقيقة على أرض الواقع.

بدأ يخطط، ويناقش، ويتابع كل التفاصيل بنفسه. كان جاد جدًا في شغله، وبيحاول ينجز كل خطوة بأسرع وقت ممكن، لدرجة إنه تقريبًا كان بيحرم نفسه من الراحة، وكل تركيزه بقى منصب على المشروع.

ومع مرور الوقت، بدأت ملامح المستشفى تظهر، وبدأ الحلم اللي كان مجرد فكرة بنتكلم عنها ونحلم بيها سوا، يبقى له وجود حقيقي على الأرض.

مجد كان بيبني حلمه بإيده، خطوة ورا خطوة...

وأنا، من مكاني البعيد عنه، كنت بتابع نجاحه وأفرح له، حتى لو الفرحة دي كان معاها وجع مش قادرة أحكيه لحد.


تعليقات